Letra e rrallë e dashurisë: Ti lexon çdo gjë në shikimin tim, me syrin tënd hyn në brendësinë time

Posted on by Kult Plus

Kur shkrimtari Erich Maria Remarque i shkruante aktores së njohur Marlene Dietrich:

18 janar 1939

“Shpirti im, qielli im i dashur, ti më ke shkruar kaq e kaq letra të bukura e, unë përsëris atë që kam thënë gjithmonë: shkrimtarët nuk duhet të shkruajnë letra dashurie. Sepse ka të tjerë që shkruajnë shumë më bukur se ata.

Ti më quan “Rezonancë që merr fryme” – e si do të mund të arrija unë vallë, të gjeja një figurë të tillë kaq prekëse? E, përveç kësaj edhe diçka tjetër! Ti, arrin, dhe ke atë aftësinë magjike qe t’i thuash dikujt se sa shumë e si e dashuron atë – kurse unë, unë, e di, nuk arrij ta them atë në mënyrë të plotë. Sa mirë ndjehem kur ti me thua se, edhe pse je vetëm, ndjehesh e qetë dhe e lumtur. Unë, këtë, kam uruar vazhdimisht për ty. Nuk kam uruar kurrë që ti të ndjehesh e mërzitur dhe fatkeqe. Kam dashur gjithmonë që ti të jesh e lumtur, në formë, vezulluese, plot dritë dhe e bukur si kurrë here tjetër e, dua që kjo gjendje e jotja të jetë e dukshme edhe së largu në kilometra e, që ti t’a dish me siguri absolute që dikush tjetër nuk jeton në këtë botë, veçse për ty.

Sot gjeta dhe lexova edhe një herë poemën tonë të Gëtes. E lexova dhe e rilexova vërtetë me një emocion të thellë: A s’është e vërtetë që fati po na bashkon? A nuk po na lidh ai për jetë? Ah, dhe në kohët që shkojnë, Nuk di, ti je motra a nusja ime? Ti njeh me imtësi çdo pjesë të qenies sime, Ti ndjen tek unë dhe nervin më të hollë, Ti lexon çdo gjë në shikimin tim, Me syrin tënd hyn në brendësinë time Hyn në gjakun tim të ngrohte qe rrjedh ne deje Dhe ecën si i çmendur në drejtimin tënd e që me krahët e tua prej engjëlli gjoksin tim shëron . Po, e dashura ime, a nuk është pikërisht kështu? Nganjëherë, më ndodh të eci i vetmuar nën shi e të mendoj e ndjej që lidhja jonë është gjithmonë e fortë, e askush nuk mund t’a prishë atë e, në ato çaste, me hapa të lehta ndjej të vijë dikush drejt meje e, ajo je ti e, atëherë, unë jetoj një ndjenjë të veçantë lumturie që asnjë qenie tjetër njerëzore nuk e ka jetuar kurrë. E, atëherë, ndjej qe së bashku me ty, të kthehen tek unë vitet e rinisë që lufta dhunshme mi mori e, ato vite je ti që mi sjell e mi shumëzon me dy, e bashkë me to ndjej të prek me delikatesë – freskinë, gjallërinë dhe aventurat e rinisë. E, kështu, ti bëhesh, në të njëjtën kohe: aventura e gruaja ime.

Ti je bërë për mua e unë jam bërë për ty; nuk mund të jetë ndryshe. Nuk je vetëm ti ajo rezonancë që unë ndjej e thith si ajër, por i tillë jam dhe unë. E di?… Unë jam një pasqyrë konkave të kap plot ethe dritën tënde, e mbledh atë plotësisht në gjoks dhe, duke e djegur fort, e dërgoj krejt refleksin në drejtimin tënd. Herë të tjera vetja me duket si një merimangë që end një pëlhure vezulluese, të trëndafiltë e plot reflekse, – një pëlhure mendimesh, ndjenjash, pune, fjalësh ngrohtësie, e cila do të të kapë e pastaj të bëhet banesa jotë, – e mbushur plot gjëra të cilat ty të mungojnë, një pëlhure plot trëndafila e dafina, e thurur me fije të ndritshme argjendi, e lehtë dhe e fortë për të mbajtur ty dhe hapat e tua të lehte si kaprolli, një pëlhurë të ngritur nën një qiell të kaltër e mbi ujin blu të detit, nga ku ti mund te hidhesh e të kridhesh gjithë qejf në ujërat e kristalta e të kthehesh pastaj përsëri tek ajo, si një lodër e këndshme fëmijësh e cila t’a mbush zemrën plot ngashërim .

O, drita ime e dashur!… E di?… Nganjëherë, unë nuk mund të ulem për të shkruar librin që kam nisur, e të cilin e urrej, sepse ai më largon prej teje. E atëherë tërhiqem nga studioja, nxjerr fotografitë e tua dhe i vendos në radhë para meje edhe pse e di që kjo gjë nuk më qetëson, përkundrazi, e bën edhe më të rëndë gjëndjen. Por, megjithatë, edhe pse këtë e di, nuk ndërroj mendje e, duke i vështruar ato, nis e flas me ty e, pastaj, ndjej që gjendja ime shpirtërore bëhet edhe më e rëndë, sepse është një gjest i vështirë ky, i padurueshëm, por edhe i mrekullueshëm e, pastaj unë tërhiqem përsëri aty tek vendi im, ulem në tavolinën e shkrimit për të vazhduar librin… Ja, tani ndalova përsëri, sepse ndjej që dora s’më bindet. Më duaj! Më thuaj që ti më do, kjo fjalë më bën mirë, më shëron. Kur ti më thua që më do, unë gjej forca e shkruaj edhe më bukur e më shpejt. Sepse unë nuk jetoj veçse për dashurinë tënde.

Më duaj, puma*!…

(Puma – quan ai me përkëdheli Marlene Dietrich) / KultPlus.com

Vdes astronauti Ken Mattingly, i cilësuar si heroi që ndihmoi ekuipazhin e Apollo 13

Posted on by Kult Plus

“Ne humbëm një nga heronjtë e vendit tonë më 31 tetor,” tha administratori i NASA-s Bill Nelson në një deklaratë.

Ken Mattingly, një astronaut i cili mbahet mend më së shumti për përpjekjet e tij në terren që ndihmuan në kthimin e sigurt të anijes kozmike të dëmtuar Apollo 13 në Tokë, ka ndërruar jetë, sipas një njoftimi të bërë nga NASA. Ai ishte 87 vjeç.

“Ne humbëm një nga heronjtë e vendit tonë më 31 tetor,” tha administratori i NASA-s Bill Nelson në një deklaratë. Ai shtoi se:

NASA nuk përmendi se ku dhe si vdiq Mattingly. Megjithatë, New York Times raportoi se Mattingly vdiq në Arlington, Virxhinia.

Një ish-pilot i marinës, Mattingly iu bashkua NASA-s në vitin 1966. Ai ndihmoi në zhvillimin e kostumit hapësinor dhe çantës së shpinës për misionet e hënës Apollo, tha NASA.

Megjithatë, fluturimi i tij i parë hapësinor erdhi vetëm në vitin 1972 kur ai orbitoi hënën si pilot i modulit komandues Apollo 16, ndërsa dy anëtarë të tjerë të ekuipazhit u ulën në sipërfaqen e hënës.

Në udhëtimin e kthimit në Tokë, Mattingly eci në hapësirë për të mbledhur kuti filmash me fotografi që ai kishte shkrepur nga sipërfaqja e hënës. Në vitet e mëvonshme, Mattingly komandoi dy misione anije kozmike dhe u tërhoq nga agjencia dhe marina si admiral i pasëm.

Por misioni i tij më dramatik ishte ai që ai kurrë nuk fluturoi. Në vitin 1970, Mattingly supozohej të ishte bashkuar me ekuipazhin e Apollo 13, duke pilotuar modulin e komandës. Por ai u hoq nga misioni disa ditë para nisjes pasi u ekspozua ndaj fruthit gjerman.

Ai nuk u prek nga sëmundja, por u zëvendësua në bordin e misionit nga John Swigert Jr.

Disa ditë pas misionit, një rezervë oksigjeni në modulin e shërbimit të anijes kozmike shpërtheu, duke rrëzuar pjesën më të madhe të fuqisë dhe oksigjenit në modulin e komandës. Zbarkimi hënor u anulua dhe NASA filloi përpjekjet e furishme për të shpëtuar Swigert, James Lovell dhe Fred Haise.

Mattingly, i cili e njihte nga afër anijen kozmike, punoi me inxhinierë dhe të tjerë ndërsa ata analizuan situatën dhe u përpoqën të gjenin zgjidhje dhe t’i kalonin udhëzimet ekuipazhit.

Treshja e astronautëve përfundimisht u grumbulluan në bazë, i cili ishte projektuar për vetëm dy, dhe e përdorën atë si një varkë shpëtimi për katër ditë, ndërsa Apollo 13 rrotullohej rreth hënës dhe më pas u ul i sigurt në Tokë.

Mattingly “qëndroi prapa dhe dha vendime kyçe në kohë reale për të sjellë me sukses në shtëpi anijen kozmike të plagosur dhe ekuipazhin,” tha Nelson i NASA-s.
“Një nga mësimet e shumta nga e gjithë kjo është fillimi që në ditën e parë që ishte që në momentin e parë, supozoni se do të keni sukses dhe mos bëni asgjë që ju pengon,” kujtoi Mattingly në një intervistë për historinë dhe për NASA-n në 2001.

Historia e Apollo 13 u tregua në librin e vitit 1994 “Lost Moon: The Perilous Voyage of Apollo 13”, bashkëautor nga Lovell, dhe në filmin e vitit 1995 “Apollo 13”, ku Gary Sinise luajti Mattingly./shqip/ KultPlus.com

Adil Olluri dhe Elsa Skënderi mbi librin “Dritarja e Marin Shkrelit”

Posted on by Kult Plus

Së shpejti pritet të botohet libri i autorit Ndue Ukaj, ‘Dritarja e Marin Shkrelit’ nga Shtëpia Botuese “Onufri”, shkruan KultPlus.

Lajmin për botimin e librit e ka bërë të ditur vetë autori i librit Ndue Ukaj, përmes një postimi në facebook.

Ndërsa, më poshtë KultPlus ua sjell edhe dy vlerësime të tjera mbi librin e autorit Ukaj.

“Dritarja e Marin Shkrelit” nis me një fillim tronditës dhe mbaron me një fund tragjik, që për mendimin tim janë dy pikat më kulmore të rrëfimit artistik të Ndue Ukajt. Fillimi i romanit është i vendosur në një hapësirë pranë ambasadave të huaja dhe me një grup të rinjsh që doemos dëshirojnë të ikin sa më parë nga Kosova. Kohësisht fillimi i romanit vendoset shumë vite pas luftës në vendin tonë, por që realisht është fundi i fabulës dhe rrëfimit të Marin Shkrelit, një krijues dhe kontribuues për lirinë e vendit të tij, që tronditet me dëshirën e pakompromis të të rinjve për ta braktisur sa më parë, në çdo çast e në çdo rast, Kosovën, për të cilën ky kishte sakrifikuar shumë. 

Adil Olluri

*

Romani “Dritarja e Marin Shkrelit” është një mimesis i fuqishëm i kujtesës për të djeshmen e luftës në Kosovë, që trysnoi, shtypi e përçudnoi ëndrrat e një të riu, duke ia mohuar atributet më domethënëse të qenies, lirinë dhe vullnetin, atij vetë dhe rrethinës së tij. Me këtë vepër Ndue Ukaj lëvron shembullin tipik të asaj letërsie që etablohet si kujtesë kulturore, ku transfigurohet e djeshmja e afërt historike dhe ankthi post-traumatik i gjetjes së kuptimit të ekzistencës së të sotmes. 

Elsa Skënderi / KultPlus.com

Zana Ramadani së shpejti shpalos ekspozitën “Kur ngjyrat flasin”

Posted on by Kult Plus

Artistja Zana Ramadani së shpejti vjen me ekspozitën e saj të shtatë të radhës, të titulluar “Kur ngjyrat flasin”, shkruan KultPlus.

Nëpërmjet artit, ajo shprehet lirshëm me nuancat e ngjyrave, me ç’rast i plason ato nëpërmjet formave të ndryshme. E krejt ky insipirim, vjen nga gjërat e thjeshta që e rrethojnë atë në përditshmëri, e që kanë rëndësi të madhe pë artisten.

Hapja e ekspozitës vjen me datën 6 nëntor, duke filluar nga ora 18:00, në Lapidariumin e Muzeut Kombëtar të Kosovës.

Ekspozita do të jetë e hapur për dy javë. / KultPlus.com

Tensionet në veri lënë pezull zbatimin e Deklaratës për të zhdukurit

Posted on by Kult Plus

Zhvillimet e muajve të fundit në veri të Kosovës, kanë lënë pezull edhe zbatimin e Deklaratës së përbashkët mes Kosovës e Serbisë, për personat e zhdukur.

Kjo deklaratë e cila u miratua në maj të këtij viti, me ndërmjetësim të Bashkimit Evropian ka mbetur vetëm në letër.

Por jo nga ana e Kosovës, pasi që sipas kryetarit të Komisionit qeveritar për persona të zhdukur, Andin Hotit, Serbia është duke e neglizhuar qëllimshëm moszbatimin e saj.

“Deklarata është miratuar nga të dyja palët, të dyja palët kanë pranuar nuk është që kemi pranuar vetëm ne dhe Serbia, dhe Deklarata edhe në aneks të Ohrit në një nga nenet shkruan, që me urgjencë duhet të trajtohet kjo çështje dhe në zbatim të aneksit të Ohrit dhe të deklaratës, ne po kërkojmë të fillojmë punën Kosova po kërkon të zbatohet deklarata sepse, për atë kemi shkuar në Bruksel gati dy vite, prandaj e kemi harmonizuar dhe pikërisht që është çështje humane”, ka thënë Andin Hoti, nga Komisioni qeveritar për të zhdukurit.

Hoti, tek thotë se Bashkimi Evropian duhet të rrisë presionin në anën e shtetit serb për këtë çështje, thotë se janë zbehur shpresat se Serbia do lejojë ndonjëherë që të gërmohet në territorin e saj për personat e zhdukur dhe as të ofrojë informacione për ta.

“Fatkeqësisht kjo çështje është zvarritur dhe unë jo në forma zyrtare por me aq sa e di shkak për këtë janë edhe ngjarjet e fundit që kanë ndodhur në veri të vendit, sidomos tendenca e fundit e atij grupi kriminal të udhëhequr nga Beogradi zyrtar, jo që përafron besimin tonë dhe të ardhme të afërt që Beogradi do të bashkëpunoj dhe do ta trajtoj këtë çështje si çështje humanitare por shpresën dhe besimin tonë e ka larguar”, ka deklaruar Hoti.

Në përgjigje për Dukagjinin nga Bashkimi Evropian, kanë thënë se BE-ja pret që palët të bëjnë përparim të prekshëm në mbylljen e rasteve të pazgjidhura të personave të zhdukur dhe në përmbushjen e detyrimeve të tyre dhe se zbatimi i deklaratës mund të nisë vetëm kur palët të bien dakord për Termat e Referencës për Komisionin e Përbashkët.

“Më 2 maj 2023, nën lehtësimin e BE-së, Presidenti i Serbisë Aleksandar Vuçiq dhe kryeministri i Kosovës Albin Kurti miratuan një Deklaratë të Përbashkët për Personat e Zhdukur. Duke miratuar Deklaratën, të dyja palët u zotuan të përmirësojnë bashkëpunimin, duke përfshirë identifikimin e vendeve të varrimit dhe ndjekjen e gërmimeve, dhe të shmangin politizimin e një çështjeje që është thjesht humanitare. Palët gjithashtu u zotuan të punojnë së bashku përmes një Komisioni të Përbashkët të kryesuar nga Bashkimi Evropian dhe të vëzhguar nga Komiteti Ndërkombëtar i Kryqit të Kuq (KNKK) me qëllimin për të mbështetur përpjekjet për të zgjidhur fatin e personave të zhdukur të mbetur. BE-ja ka mirëpritur miratimin e deklaratës nga palët. Zgjidhja e çështjes së personave të zhdukur nuk është vetëm një detyrim humanitar. Ai është gjithashtu një mundësi thelbësore për pajtimin dhe besimin mes njerëzve. BE pret që palët të bëjnë përparim të prekshëm në mbylljen e rasteve të pazgjidhura të personave të zhdukur dhe në përmbushjen e detyrimeve të tyre përkatëse ndaj familjeve. Kujtimet po zbehen dhe individët, vendet dhe ngjarjet janë më të vështira për t’u hetuar. Zbatimi i Deklaratës së Përbashkët nuk ka filluar ende. Kjo do të ndodhë sapo Palët të bien dakord për Termat e Referencës për Komisionin e Përbashkët”, thuhet në komunikatën e Bashkimit Evropian.

Në Kosovë janë edhe rreth 1 mijë e 600 persona të zhdukur që nga përfundimi i luftës./Dukagjini/ KultPlus.com

Thënie shkodrane: E han marren me bukë

Posted on by Kult Plus

Në vijim, KultPlus ju sjell disa nga shprehjet më të njohura shkodrane.

 -Prej fmijës dhe budallës mësohet e vërteta.

• Fukaraja ma mirë mos leftë.

• Aj mend xixi mend, as për vedi as për kënd.

• Lype – s’ta japin; merre – s’t’thojnë gja.

• Kur s’ke pula mos ban “ish”.

• Ka thanë frati shko te shtrati n’mos t’marrtë gjumi t’pushon shtati.

• Grueja asht si gjarpni nën jastek.

• Deka me nder asht kapak florini.

• Ç’ka del prej mice gjun për mij…

• A ke pa me fjetë?

• Kryet thi e menden fmi.

• Zoti të dhashtë bereqet n’tru

• T’bana bir, me hjekë mirë; m’dole dreq me hjekë keq.

• Mendja e madhe e zeza e t’zot.

• Inatin e mramjes, lene për nadje…

• Gungaçit vetëm vorri ia drejton samarin…

• E han marren me bukë.

• Bane t’mirën e hidhe n’det, n’mos ta dit’t peshku, ta din Zoti vetë.

• I buti – si muti.

• Kur s’ka njeri mend ka kamë.

• Kmisha me arrna e trupi me barna s’mbahen.

• Zemra m’don – betha s’ma mban.

• Vesha – kopilesha.

• Malli i mirë shitet afër.

• Kush ka mik ka çiflik. / KultPlus.com

Java e Kulturës Hungareze, mbahen aktivitete në Tiranë dhe Vlorë

Posted on by Kult Plus

Java e Kulturës Hungareze vazhdoi në ditën e saj të dytë me aktivitete në dy qytete të vendit, në Tiranë dhe në Vlorë.

Në një shfaqje mahnitëse të mjeshtërisë strategjike, dita e dytë e ekstravaganzës Chess ‘n Jazz erdhi me simultanen e realizuar nga Grandmaster Imre Hera.

Një nga lojtarët e shahut më të njohur në Europë, Hera u përball me një sërë sfidash paralele me talentet e reja të Federatës Shqiptare të Shahut, e cila zbriti me panteonin e saj të kampionëve europianë dhe botërorë.

Eventi intensiv u shoqërua me improvizimet xhaz të Fatjon Pulës, talentit të ri shqiptar të pianos. Kujtojmë që seria Chess ‘n Jazz do të vazhdojë në Tiranë te Galeria e Artit “Kalo” përgjatë gjithë Javës së Kulturës.

Paralelisht me aktivitetet në kryeqytet, qyteti i Vlorës u shndërrua në një qendër të gjallë të shprehjes artistike hungareze.

Qendra e Kulturës në Vlorë u bë skena e rradhës e festivalit dhe programacionit të pasur me kulturë hungareze. Me hyrjen falas, festimet e ditës mirëpritën një mori vizitorësh, duke i lënë ata të pasuruar nga përvoja dhe gjuha universale e artit, performancës dhe historisë së përbashkët.

Mbrëmja filloi me prezantimin e dy ekspozitave, të ndryshme në natyrën e tyre, por gjithaq tërheqëse për publikun vlonjat. “Petőfi: Rreth botës” erdhi si një ekspozitë kushtuar jetës dhe trashëgimisë së Sándor Petőfi, poetit të famshëm hungarez, i cili këtë vit ka 200-vjetorin e lindjes. Nëpërmjet kësaj shfaqjeje vizuale dhe edukative, vizitorët u zhytën në botën e Petőfi, duke eksploruar ndikimin e tij të thellë në kulturën dhe historinë e Hungarisë. Kujtojmë që vetë Hungaria e ka shpallur vitin 2023 si vitin e Petőfi-t në nder të kësaj figure të madhe letrare dhe historike.

Njëkohësisht, artdashësit vlonjat u prezantuan me frymën inovatore të artistes hungareze Anna Konya, teksa çeli dyert ekspozita e saj “Liria e dashurisë”. Këtu, artistja hungareze komunikoi dashurinë e saj të thellë për Shqipërinë përmes artit abstrakt dhe intuitiv. Çdo vepër ishte një rrëfim i ngjyrës dhe formës, i ndërthurur me një mesazh të fortë të qëndrueshmërisë mjedisore, duke i shtyrë shikuesit të reflektojnë mbi tejkohësinë dhe dashurinë që kapërcen kufijtë.

Përtej ekspozitave, të pranishmit shijuan një kryevepër të rradhës me vendosjen në skenë të shfaqjes së fuqishme “Djemtë e rrugës Paul”. Me një regji fine nga Pëllumb Kulla dhe Xhulieta Kulla, ky adaptim i romanit të Ferenc Molnar, aq i dashur për lexuesit shqiptarë, u vendos mjeshtërisht në skenë. Produksioni, me në qendër nxënës të rinj të përgatitur profesionalisht nga çifti Kulla, solli nostalgji dhe një thellësi të jashtëzakonshme emocionale, duke i kthyer të pranishmit në pafajësinë rinore dhe sprovat e personazheve të dashur të Molnarit.

Surpriza e fundit e mbrëmjes ishte performanca e gjallë dhe ritmike nga grupi i vallëzimit popullor “Szinvavölgyi”. Interpretimi i tyre i “Valleve Petőfi ” ishte një vorbull hapash dhe ritmesh tradicionale hungareze, dëshmi e pasionit të grupit për trashëgiminë e tyre kulturore. Grupi “Szinvavölgyi”, i përbërë nga 20 anëtarë, vinte për herë të parë në Shqipëri, posaçërisht për “Hungarissimo”. Valltarët, të veshur me veshje shumëngjyrëshe, rrotulloheshin dhe kërcyen, ndërsa lëvizjet e tyre i bënin jehonë ritmeve të gëzueshme të folklorit hungarez./atsh/ KultPlus.com

Britney Spears feston për suksesin që arriti libri i saj

Posted on by Kult Plus

Ylli Britney Spears po feston suksesin e librit të saj “The Woman In Me” i cili mori vëmendje të madhe edhe para se të dilte në shitje javën e kaluar, raporton agjencia e lajmeve Associated Press.

275 faqe të këtij libri përmbajnë kujtimet e këngëtares për të cilat publiku ishte shumë kureshtar dhe deri më tani janë shitur 1.1 milionë kopje të tij.

“Dhashë zemrën dhe shpirtin në librin tim, dhe jam mirënjohëse ndaj fansave dhe lexuesve në të gjithë botën që më ofruan mbështetje të pa kursyer”, ka thënë këngëtarja.

Ajo filloi të festonte që nga dita e parë që doli në shitje libri duke shkruar në Instagram se libri i saj u shit më së shpejti në historinë e memoareve të personaliteteve të famshme.

Në këtë libër ajo flet në detaje për jetën e saj dhe problemet që kishte me familjen, duke treguar se nuk komunikon më me ta.

“Këto ngjarje kanë ndodhur 20 vjet më parë … tash i kam tejkaluar ato dhe jam në një rrugë të pastër”, ka thënë Spears./ KultPlus.com

Matthew Perry varroset nga familjarët dhe pesë miqtë e tij

Posted on by Kult Plus

Aktori Matthew Perry, i cili vdiq të shtunën në moshën 54-vjeçare, u varros të premten në një varrezë në Los Angeles në një ceremoni ku të pranishëm ishin familjarë dhe ish-kolegët e tij të serialit “Friends”.

Ata u mblodhën në varrezën “Forest Lawn”, ku janë varrosur edhe një numër yjesh të tjerë të Hollywoodit si Michael Jackson, Lucille Ball dhe Elizabeth Taylor, shkroi The Guardian.

Perry, i cili luajti rolin e Chandler Bing në “Friends” nga viti 1994 deri më 2004, u gjet i vdekur në shtëpinë e tij.

Pesë miqtë e tij të “Friends” dolën me një mesazh të përbashkët pas vdekjes së tij.

Të gjithë të pranishmit në varrim, rreth 20 persona, të veshur në të zeza u rrethuan te varri i tij.

Shkaku i vdekjes së Perryt ende nuk është bërë i ditur dhe pritet të kryhen testimet për ta bërë një gjë të tillë. / KultPlus.com

Përurimi i Linjës së 10 hekurudhore, Kurti: Do ta vazhdojmë deri në kufirin verior të Kosovës

Posted on by Kult Plus

Ministri i Infrastrukturës, Liburn Aliu, ka bërë të ditur se bashkë me kryeministrin Albin Kurti dhe disa kolegë të tij ministra kanë bërë inaugurimin e rihapjes së tuneleve T6 dhe T7, njëri me gjatësi 262 dhe tjetri 122 metra, si pjesë e linjës hekurudhore Hani i Elezit-Fushë Kosovë.

Duke e cilësuar këtë si një nga ngjarjet më të rëndësishme dhe një çast vendimtar për hekurudhën në Republikën e Kosovës, kryeministri, Albin Kurti, tha se kjo linjë hekurudhore do të vazhdohet deri në Mitrovicë.

“Sot po e shënojmë një çast vendimtar për hekurudhën në Republikën e Kosovës. Po e përurojmë rindërtimin e linjës 10 që e lidh Hanin e Elezit me Fushë-Kosovën. Po rihapim në veçanti dy tunele — njëri me gjatësi 262 metra dhe tjetri me gjatësi 122 metra — që kanë qenë të shembur tërësisht.Mbi 164.5 milionë euro është vlera e punimeve vetëm në këtë segment të linjës 10, nga kufiri me Maqedoninë e Veriut deri në Fushë-Kosovë. Mbi 200 milionë euro është vlera e punimeve që planifikojmë në segmentin e mbetur, nga Fushë-Kosova në Mitrovicë dhe nga Mitrovica në kufirin verior të Republikës së Kosovës”, tha Kurti. 

Ai shprehu mirënjohje për Bashkimin Evropian, Bankën Evropiane për Investim dhe Bankën Evropiane për Rindërtim dhe Zhvillim, për mbështetjen e financimit dhe rehabilitimit të kësaj linje hekurudhore, e cila do t’i sjellë qytetarët e Kosovës edhe më pranë Bashkimit Evropian./ KultPlus.com

Aktorët që u penduan për rolet e tyre në filma

Posted on by Kult Plus

Edhe aktorët më të respektueshëm të Hollywoodit ndonjëherë bëjnë gabime kur bëhet fjalë për zgjedhjen e filmave.

Këtë e dëshmon një listë e fundit e publikuar nga portali britanik “Far Out”, e cila tregon disa nga aktorët më të famshëm të të gjitha kohërave që janë penduar për role të caktuara në karrierën e tyre.

Ndërsa disa prej këtyre aktorëve u penduan për filmat që ishin dështime kritike dhe komerciale, të tjerë ishin të pakënaqur me rolet e tyre në filma të suksesshëm dhe prestigjioz që morën nominime për Oscar.

Zbuloni më poshtë për çfarë janë penduar disa nga fytyrat më të kërkuara të Hollivudit.

Christian Bale

Edhe pse trilogjia Dark Knight është provë se Bale mund të jetë fytyra kryesore e një ekskluziviteti popullor, aktori fitues i Oskarit nuk bëri emër me rolin e tij në filmin e katërt në ekskluzivitetin Terminator, të quajtur Terminator: Salvation. Aktori ka deklaruar vazhdimisht se është penduar që ka punuar në atë film.

“Është një gjemb i madh në anën time, sepse shpresoja se do të ringjallnim ekskluzivitetin”, tha aktori në një podcast. “Fatkeqësisht, edhe në fazën e prodhimit, ishte e qartë se kjo nuk do të ndodhte. Është një turp i vërtetë.”

George Clooney

Të gjithë fansat e George Clooney tashmë janë njohur me Batman & Robin, dështimin e superheroit të drejtuar nga Joel Schumacher. Shumë besojnë se Batman & Robin është filmi më i keq në karrierën e aktorit dhe me këtë është dakord edhe vetë Clooney, i cili beson se për shkak të atij filmi nuk ka marrë ftesë për Comic Con për vite me radhë.

“Unë nuk mendoj se kam marrë një ftesë në Comic Con për 20 vjetët e fundit për shkak të Batman. Unë në fakt takova Adam West atje dhe i kërkova falje. Më vjen keq për lythat në kostumin e Batman”, tha ai.

Tom Cruise

Cruise njihet si ylli i disa prej filmave më të mëdhenj të të gjitha kohërave, nga Top Gun te Mission: Impossible, por një film për të cilin ishte penduar shumë ishte filmi aventureske fantastike Legend i vitit 1985, në të cilin ai luajti së bashku me Tim Curry, Mia Sara dhe David Bennent.

“Së pari, shtypi e kapi atë film dhe filloi të ekzagjeronte gjithçka,” tha Cruise për Legend. “Nuk dua të punoj më në një film të tillë”.

Viola Davis

Viola Davis është e njohur për shumë për The Secret Lives of Housemaids, në të cilën u shfaq përkrah Emma Stone dhe për të cilën mori një nominim për Oskar. Por aktorja tha se “The Secret Lives of Housemaids” është një film shpëtimtar i bardhë dhe se ajo “tradhtoi veten dhe njerëzit e saj” duke luajtur atë rol.

“Ndjeva sikur në fund të ditës, zërat e shërbëtoreve nuk u dëgjuan. Unë e njoh Aibileen. E njoh Minny. Ata janë gjyshja ime. Ata janë nëna ime,” tha Davis. “Dhe nëse jeni duke bërë një film ku e gjithë premisa është: Unë dua të di se si është të punosh për të bardhët dhe të rritësh fëmijë në vitin 1963, atëherë dua të dëgjoj se çfarë mendojnë ata në të vërtetë për të. Nuk dëgjova atë gjatë filmit”.

Tom Hanks

Një nga aktorët më të dashur të të gjitha kohërave, Tom Hanks, dikur deklaroi se Vanity Fireworks e viteve 1990 ishte një nga gabimet më të mëdha të karrierës së tij, sepse ai nuk ishte i kënaqur me përshtatjen e romanit të famshëm të Tom Wolfe.

“Kur ne po punonim për atë film, ai ishte i madh. Ne nuk mund ta xhironim atë askund në Nju Jork. Të gjithë po flisnin për të,” kujton Hanks.

“Ne të gjithë kemi qenë zgjedhja e gabuar për një film, veçanërisht unë. Nuk mund të marrësh një roman si ky i shkruar nga Tom Wolfe, i cili ndryshoi mënyrën se si njerëzit flasin dhe mendojnë, dhe e kthen atë në një film të kënaqshëm… Ose të ndryshojë se për çfarë bëhet fjalë materiali burimor. Ka mundësi që thjesht të mos funksionojë në film.”

Tom Cruise

Spektakli epik Troy, me regji të Wolfgang Petersen, ishte një nga filmat më të mëdhenj të suksesshëm të fillimit të viteve 2000, por Brad Pitt, i cili luajti heroin e Akilit në film, tha se filmi e zhgënjeu atë, veçanërisht pasi punoi me regjisor si David Fincher.

“Nuk mund të lëvizja nga mesi i kuadrit. Po më çmendte. Le të jemi të qartë, ky nuk është një sulm ndaj Wolfgang Petersen; filmi i tij Das Boot është një nga filmat më të mirë të të gjitha kohërave. Por Troy është diku gjatë xhirimeve u bë një film i komercializuar. Çdo kornizë thoshte, “Ja një hero!” Filmit i mungonte misteri,” tha Pitt për hitin mbarëbotëror.

Ryan Reynolds

Ryan Reynolds mahniti fansat me portretizimin e tij të Deadpool, por përpara se të portretizonte antiheroin sarkastik, Reynolds hyri në botën e superheronjve me filmin e vitit 2011 të DC, Green Lantern.

“Problemi me Green Lantern ishte se askush nuk e kuptoi saktësisht se për çfarë bëhej fjalë. Përveç kësaj, filmi ishte viktimë e procesit të Hollywood-it në të cilin fillimisht bëhet posteri i filmit, pastaj zgjidhet data e premierës dhe vetëm në fundi vjen shkrimi i skenarit”, tha Reynolds.

Silvester Stalone

Me hite si Rocky dhe Rambo, Sylvester Stallone ishte mbreti i Hollywoodit në vitet ’70 dhe ’80, por për Stallone u pendua në karrierën e tij ishte përshtatja e komikeve Judge Dredd.

“Gabimi më i madh që kam bërë në jetën time ishte qasja e pakujdesshme ndaj gjyqtarit Dredd… Mund të ishte një vizion fantastik, nihilist, interesant për të ardhmen – gjyqtar, juri dhe ekzekutues. Unë u zhgënjeva shumë nga ai film ”, tha Stallone.

Meryl Streep

Tre Oskarë dhe 21 nominime për çmimin prestigjioz janë dëshmi se Meryl Streep është një nga aktoret më të mira të të gjitha kohërave. Ndër nominimet e shumta të aktores për Oskar ishte roli i saj në filmin The French Leeutenant’s Wife, me të cilin Streep nuk ishte i kënaqur.

“Filmi m’u duk artificial sepse mishërova një aktore që luante gruan e një togeri francez. Në të njëjtën kohë, isha një aktore amerikane duke luajtur një grua britanike. Isha e re dhe e re në të gjitha këto. Nuk u futa në rolin”, shpjegoi Streep.

Kate Winslet

Ylli i Titanic, Kate Winslet nuk pendohet shumë për karrierën e saj të suksesshme, por pendohet që ka punuar me regjisorët kontrovers Roman Polanski dhe Woody Allen. Winslet punoi me Polanskin në filmin e vitit 2011, “Marrëdhëniet martesore” dhe me Allen në dramën “The Carousel of Life” të vitit 2017.

“Unë mendoj me vete: çfarë dreqin po bëja me Woody Allen dhe Roman Polanski?” tha Winslet. “Më duhet të mbaj përgjegjësi për faktin se kam punuar me të dy. Nuk mund ta kthej kohën pas”./ KultPlus.com

Felix Mendelssohn, një ndër kompozitorët më të njohur të epokës romantike

Posted on by Kult Plus

Pak a shumë të gjithë artistët dhe jo vetëm, janë të kapur përdhunshëm nga një egoizëm i pashërueshme dhe këtë ata e shprehin kryesisht nëpërmjet asaj që krijojnë dhe impaktit në publik. 

Në një cak të udhëtimit të tyre ata e kuptojnë se gjithçka që bëjnë, e bëjnë për kënaqësinë e tyre dhe vetëm për të. Një ndër më tipikët e muzikës klasike është gjermani, Felix Mendelssohn. Burimi i fuqisë krijuese ishte vetë ai zjarr i egos së tij të pashërueshme, zjarr i cili e dogji, por ai do të ringrihej si një Feniks nga hiri i tij.

Mendelssohn gjatë gjithë jetës, krijoi dhe interpretoi vetëm për kënaqësinë e tij, vetëm nga zemra e tij, dhe kurrë për hir të kënaqësisë së publikut ose kritikëve. Shijet e tij muzikore në thelb ishin konservatore, kundrarrymë dhe kundërkohë, tipizim që bëri atë të largohej nga bashkëkohësit muzikorë më famshmë, si Franz Liszt, Richard Wagner, Charles-Valentin Alkan dhe Hector Berlioz. Konservatori i Leipzig, të cilën ai e themeloi, u bë një bastion i këtij këndvështrimi antidikal (kundërmashtrues). 

Pas një periudhe të gjatë denigrimi për shkak të ndryshimit të shijeve muzikore dhe antisemitizmit, në fund të shekullit XIX dhe fillimit të shekujve XX, origjinaliteti i tij krijues është rivlerësuar. Ai tani konsiderohet ndër kompozitorët më të njohur të epokës Romantike.

Kompozitori, pianisti dhe dirigjenti gjerman Felix Mendelssohn u lind më 3 shkurt 1809 në një familje hebreje. Vdiq i ri më 4 nëntor 1847 i përndjekur nga shëndeti i keq. Koncertin e tij të parë publik ai e realizoi kur ishte vetëm 9 vjeç. 

Pas njohjes së virtuozitetit të tij në moshën 12-vjeçare, Gëte e krahasoi atë me Mozart duke cituar: “Ajo që mund të bëjë ky njeri i vogël në ekzekutim dhe lojën interpretuese, mrekullisë i vë të tjera caqe, dhe unë nuk mund ta besoja se ishte e mundur që kjo të ndodhte nga një djalosh në një moshë kaq të re.” Kur ishte 20 vjeç, Mendelssohn organizoi dhe performoi një pjesë të harruar të Johann Bach, dorëshkrimi i të cilit, gjyshja e tij ia kishte dhënë katër vite më parë. Performanca ishte një sukses befasues, u bë i dobishëm në ringjalljen e muzikës së Bach në të gjithë Evropën, dhe katalizoi karrierën e Mendelssohn dhe udhëtimet e tij të shumta nëpër kontinent.

Ai dha gjithashtu një kontribut të vlertë si dirigjent i periudhës së hershme Romantike. Kompozimet e Mendelssohn përfshijnë simfoni, koncerto, muzikë piano dhe muzikë dhome. Punimet e tij më të njohura përfshijnë muzikën e tij të ndryshtë dhe të rastësishme ku citohen, “Simfoninë italiane”, “Simfoninë skoceze”, “Oratorio Elijah”, “Përmbysja e Hebrides”. 

Melodia për karolinën e Krishtlindjes “Hark! Herald Angels Sing” është gjithashtu vepër e tij. Këngët pa fjalë të Mendelssohn janë kompozimet më të famshme solo në piano.

Mendelssohn përgjatë gjithë jetës së tij vuajti nga shëndeti i dobët. Në vitet e fundit të jetës, ndoshta i rënduar nga problemet nervore dhe nga puna e tepërt situata do të agravohej. Një turne i fundit në Angli e dërmoi duke e lënë të lodhur dhe të sëmurë. Vdekja e motrës së tij, Fanny, më 14 maj 1847, e përkeqësoi mëtejshëm gjendjen e tij. Më pak se gjashtë muaj më vonë, më 4 nëntor, në moshën 38-vjeçare, Mendelssohn vdiq në Leipzig. Mendelssohn e kishte përshkruar diku, kohë më parë vdekjen, në një letër drejtuar një të huaji, si një vend “ku shpresohet të ketë akoma muzikë, por nuk ka më pikëllim apo ndarje”. /albertvataj/ KultPlus.com

Margariti: Nxënësit interes për funksionimin e bibliotekave dhe ruajtjen e librave

Posted on by Kult Plus

Gjatë Tetorit të Librit rreth 600 nxënës të shkollave të mesme dhe 9-vjeçare publike dhe jo-publike të Tiranës kanë vizituar Bibliotekën Kombëtare të Shqipërisë dhe Qendrën e Librit “Sotir Kolea”.

Lajmi u bë i ditur nga ministrja e Kulturës, Elva Margariti, e cila tha se “nxënësit janë kureshtarë për të njohur dhe mësuar më shumë se si funksionojnë bibliotekat, si ruhen librat dhe si mund të shfrytëzohet informacioni”.

Margariti theksoi se “nxënësit e shkollave të mesme “Jordan Misja”, “Ismail Qemali”, shkollat e ciklit 9-vjeçar “Pjetër Budi”, “Ibrahim Hima”, shkollat jopublike “Turgut Ozal”, “Woodrow Wilson”, “Aristotel”, “Ylber, “New York”, etj., kanë ndjekur me interes programet “Aftësim në Media dhe Informacion” dhe “Miqtë e librit”, të cilat zhvillohen nga specialistët e bibliotekës”.

Nxënësit bashkëbiseduan me specialistët, duke zbuluar se bibliotekat janë mjedisi më i sigurt për marrjen e informacionit të saktë dhe të kontrolluar.

Këto programe, zhvillohen prej vitesh në Bibliotekën Kombëtare të Shqipërisë janë kthyer në një traditë të mirë për të afruar fëmijët dhe të rinjtë me bibliotekën dhe librin./atsh/KultPlus.com

Akil Gjakova mposhtet në çerekfinale, e kërkon medaljen e bronztë nga repesazhi

Posted on by Kult Plus

Përkundër që e nisi shumë mirë përballjen me garuesin moldav Petru Pelivan, Akil Gjakova në një pakujdesi u mposht në çerekfinale, kështu duke rënë në repesazh, ku tani vetëm medaljen e bronztë mund ta ndjekë.

Akili ishte fantastik edhe në këtë përballja, duke e vënë në vështirësi kundërshtarin, por një lëvizje e gabuar ia mundësoi kundërshtarit një IPPON.

Në repesazh të kategorisë deri në 73 kilogram, Akili do të përballet fillimisht me Daniel Szegedi./nacionale/KultPlus.com

Laura Fazilu kalon në gjysmëfinale, mposht legjendën franceze Clarise Agbegnenou

Posted on by Kult Plus

Xhudistja Laura Fazilu ka kaluar në gjysmëfinale, pasi mposhti legjendën franceze Clarise Agbegnenou, shkruan KultPlus.

Kjo fitore konsiderohet në prej fitoreve më të mëdha të Fazilut, pasi Agbegnenou konsiderohet një prej xhudistëve më të mira në historinë e xhudos./KultPlus.com

Kryeministri Kurti e quan çast vendimtar rihapjen e linjës hekurudhore Han i Elezit-Fushë Kosovë

Posted on by Kult Plus

Kryeministri Albin Kurti, ka thënë se sot po shënohet një moment i madh për hekurudhën në Republikën e Kosovës.

Kurti, mes tjerash, dha detaje nga përurimi i tuneleve gjashtë dhe shtatë dhe rihapjen e linjës hekurudhore Hani i Elezit-Fushë Kosovë.

I pari i ekzekutivit kosovar potencoi se projekti i përgjithshëm parasheh 13 ura të reja dhe shtatë tunele të rindërtuara sipas standardeve më të larta evropiane.

“Sot shënohet një çast vendimtar për hekurudhën në Republikën e Kosovës, po e përurojmë rindërtimin e linjës 10 që e lidh Hanin e Elezit me Fushë Kosovën. Po rindërtojmë në veçanti dy tunele, njëri me gjatësi 262 metra dhe me një gjatësi 122 metra, që kanë qenë të shembur tërësisht. Mbi 164.5 milionë euro është vlera e punimeve vetëm në këtë segment të linjës 10. Nga kufiri me Maqedoninë e Veriut deri në Fushë Kosovë. Mbi 200 milionë euro është vlera e punimeve që planifikojmë në segmentin e mbetur nga Fushë Kosova në Mitrovicë dhe Mitrovicë në kufirin verior të Republikës së Kosovës”, ka thënë Kurti.

“Gjatë javëve në vijim ministrit e linjës dhe Infrakos do të nënshkruajnë marrëveshjen kornizë për financimin e infrastrukturës hekurudhore pesëvjeçare duke ndjekur normat evropiane”.

“Me Shqipërinë tashmë kemi filluar marrëveshjen e bashkëpunimit për të ndërtuar hekurudhën Prishtinë-Durrës, ku pastaj synojmë të ngrehim portin e thatë që kthen kryeqytetin ton në qendër të rëndësishme të tregtisë dhe qarkullimit, të shpërndarjes dhe akumulimit”.

“Edhe me linjën 10 dhe me hekurudhën Prishtinë Durrës, Kosova bëhet pjesë e e rrjetit të transportit trans-evropian”.

Ai tregoi se do të rritet edhe shpejtësia e trenit me hekurudhën e re.

“Me forcim rriten shkëmbimet, me zgjerim rritet ndërlidhja, ndërsa me modernizim rritet shpejtësia. Këtu treni mund të zhvillonte shpejtësi jo më shumë se 60 kilometra në orë, me hekurudhën e re mbi 100 kilometra në orë”. /Klankosova./KultPlus.com

Akil Gjakova i jashtëzakonshëm, pas serbit e mposht edhe bullgarin Hristov për të kaluar në çerekfinale

Posted on by Kult Plus

Akil Gjakova po tregon paraqitje të jashtëzakonshme në kategorinë deri në 73 kilogram në Kampionatin Evropian, ku tani ka arritur në çerekfinale.

Ai fillimisht e mposhti serbin Bajsangur Bagajev në raundin e dytë, për të vazhduar rrugëtimin e tij.

Ndërsa në raundin e tretë pati punë me bullgarin Mark Hristov, të cilin shumë lehtë me dy Waza-ari e mposhti, për të kaluar në çerekfinale.

Në garën për të shkuar në gjysmëfinale, Gjakova do të përballet me fituesin nga përballja Petru Pelivan – Valtteri Olin./nacionale/KultPlus.com

‘Mëkati i buzëqeshjes’, vepra më e re e shkrimtarit Sali Bashota

Posted on by Kult Plus

Vepra me prozë poetike “Mëkati i buzëqeshjes” e shkrimtarit Sali Bashota, është vepra më e re e tij, e cila është botuar këto ditë nga Botimet Rea.

Përveç poezisë, esesë, studimit letrar dhe publicistikës, Bashota është i njohur edhe me prozë poetike. Në librat e tij me poezi, duke filluar nga “Plagomë” (1994), pothuajse në secilën vepër autori ka përfshirë proza të ndryshme poetike, pastaj duke vazhduar edhe me vepra të veçanta me prozë poetike “Ëndrra në parajsë” (2006), “Sytë e vetmisë” (2010), “Rruzullimi i zjarrit” (2011), “Zemërimi i heshtjes” (2014), “Shkallët e natës” (2020).

Në veprën “Mëkati i buzëqeshjes”, Bashota trajton tema të ndryshme, të cilat dallohen për nga ligjërimi, gjuha, stili dhe figuracioni. Në parathënien e kompletit të veprave të Sali Bashotës, duke shkruar për prozën poetike të Bashotës, studiuesi Milazim Krasniqi, ndër të tjara, thekson se “falë përvojës së gjatë si poet dhe si studiues i pasionuar i letërsisë, Sali Bashota është autor që i njeh këto vibracione intonative-ritmike, ideologjike, stilistike e sociale, prandaj edhe arrin t’i definojë gjuhësisht në pajtim me realitetin. Prozat poetike, të cilat jam i prirur t’i shohë si pjesë komplementare e vargut poetik të Bashotës, janë brenda kornizave motivore e stilistike të vargut të tij. Në poezinë tonë nuk di ndonjë autor tjetër të ketë vëllim kaq të madh të prozave poetike dhe sigurisht edhe kaq arritje artistike në këtë formë sinkretike të shprehjes poetike”.

Vepra “Mëkati i buzëqeshjes” ndahet në tri kaptina” Afshi”, “Lumturia” dhe “Vetmia”. Në mesin e shumë prozave poetike dallohen: “Magjia e parë e ëndrrës”, “Njësoj si afshi”, “Nostalgjia e syve”, “Ngjyrat e kësaj bote”, “Zemërimi i parë”, “Intriga e mrekullueshme”, “Rrëfimi për pëllumbat e bardhë”, “Orari i ëndrrave”, “Kjo qenka dashuria”, “Perëndimi i hënës”, etj.

Sali Bashota është njëri ndër poetët më të përkthyer të Kosovës në gjuhë të ndryshme të botës dhe i përfaqësuar në shumë antologji brenda dhe jashtë vendit. Për krijimtarinë letrare e shkencore është nderuar me çmime të larta kombëtare dhe ndërkombëtare.

Botimi është përkrahur nga Drejtoria e Kulturës e Komunës së Fushë Kosovës. Librin mund ta gjeni në libraritë “Artini” dhe “Dukagjini”./KultPlus.com

Laura Fazliu në çerekfinale të Kampionatit Evropian, Loriana Kuka eliminohet

Posted on by Kult Plus

Laura Fazliu ka treguar paraqitje fantastike, për të kaluar në çerekfinale të Kampionatit Evropian, ndërsa Loriana Kuka është eliminuar në raundin e tretë.

Laura në raundin e dytë pati punë me garuesen nga Ukraina Yuliia Hrebenozhko, të cilën e kaloi pa vështirësi, duke e mposhtur me IPPON, për të kaluar në çerekfinale të kategorisë deri në 63 kilogram.

Në çerekfinale do të ketë punë me francezen Clarisse Agbegnenou, ku do të kërkojë me çdo kusht një vend në gjysmëfinale.

Në anën tjetër, Loriana Kuka edhe pse ishte shumë aktive dhe e fitoi raundin e dytë, pasiviteti ia humbi ndeshjen në raundin e tretë ndaj holandezes Sanne Van Dijke, kështu për të mbyllur eksperiencën e saj në këtë Kampionat Evropian./Nacionale/KultPlus.com

Agim Zajmi, artisti shumëdimensional dhe themeluesi i skenografisë moderne shqiptare

Posted on by Kult Plus

Nga Milena Selimi

“Teatri është fjala është mendimi, ajo  e ka mbajtur gjallë  për shekuj, ku teatri ka mbijetuar nga filozofia e veprës”- kështu më shfaqet në një intervistë të vitit 2009 Piktori, Skenografi dhe Profesori Agim Zajmi, e më tutje “Teatri edhe me gjëra të thjeshta bëhet i bukur, kur e dashuron atë. Teatri është shtëpia ime”.

Kambana e ikjes së artistit ra më 3 nëntor 2013, (10 vite nga sot) atëhere kur ai kaloi përtej, duke na lënë një kujtesë që unëgjithmonë  e kam të vështirë ta ndaj nga Artisti, Njeriu, Qytetari.

E kam shkruar edhe më parë, mik i mirë i tim eti, Skënder Selimi, bashkëpunëtor në skenografi e kostumografi, të njëjtë dhe të kundërt në argument, frymëzues dhe pasionantë, kërkues dhe kontribues në artin shqiptar, sfidues deri në momentin e ngjitjes në skenë në moshën 70- vjeçare për të realizuar një ëndërr të shkuar krijimtarie si baleti “Sheherazade”me atë rivënie spektakolare në skenën e Teatrit të Operës dhe Baletit. Atëhere kur morën duartrokitjet duke u ndjerë në shtëpi..

Si e ndërtojmë shtëpinë, si e ngremë shtëpinë, si e mbrojmë shtëpinë? Nuk e kam përballë ta pyes profesor Gimin, por besoj se e di përgjigjen… na e ka lënë në themelet e skenografisë moderne shqiptare, me një kontribut me më shumë se 300 skenografi.  Bashkëpunimin më të frytshëm  me regjisorin Pirro Mani, me mbi 40 shfaqje, skenografi që e çliroi skenën nga mbingarkesa e objekteve përshkrimore, që ndërtoi skenografi që lindin dhe vdesin në skenë, që e pranoi konvencionin në teatër, që ndërtoi një skenografi unike që shpirtëzohet me autorin, regjisorin, aktorin. Duke besuar se “teatri është art kolektiv. Duhet të jesh 50% regjisor që të mbetesh 100%skenograf dhe anasjelltas. Na e tregoi këtë edhe në shfaqjen “Pamje nga ura”, në vitin 2009, atëhere kur skena bosh fillon e ‘trembet’ nga pesha e mendimit, urtësisë, cclirimit dhe kërkimit të një skenografi 71-vjeçar.

Artisti Agim Zajmi e ndërtoi “shtëpinë”në Teatrin  Kombëtar të Shqipërisë në Tiranë, duke kontribuar edhe në teatrot kombëtare të Prishtinës në Kosovë, Shkupit në Maqedoni dhe Malit te Zi. Dekan dhe profesor në Akademinë e Arteve të Shqipërisë, në Tiranë. Pjesa më e madhe e veprave shqiptare dhe të huaja, vënë në skenën e Teatrit Kombëtar, janë krijime të piktorit e skenografit të talentuar Agim Zajmi. Gjithashtu një kontribut të vyer sjell edhe në fushën e kostumografisë. Si një njohës i thellë i etnografisë shqiptare ai dha në skenën e Teatrit Kombëtar, jo vetëm mjediset, por veshjet e detaje të ndryshme që mbushnin skenën duke dhënë me sa më shumë realitet jetën shqiptare.

“Krijimtaria për Agim Zajmin është lumturi”- është shprehur regjisorja Drita Agolli, aktori magjik i skenës shqiptare, Naim Frashëri e cilëson “Mjeshtër i Teatrit”, ndërsa Sandër Prosi nuk kursehet në cilësime si “skenografitë e tij janë unaza floriri”. Atëhere besoj se Ai- Artisti e mbajti gjallë “Shtëpinë” me personalitetin unik, talentin shumëdimensional, çka i ka dhënë mundësi ta njohë atë thellë dhe të na “shëtitë” në laboratorin krijues të poetit të skenës duke na zbërthyer si askush deri më sot, magjinë dhe të fshehtat e artit të skenografit. Duke mbajtur mbi vete një tjetër vlerë si ajo që e cilëson artisti dhe profesori Gazmend Leka “gur kilometrik në skenografinë shqiptare”.

 Agim Zajmi si profesor në Akademinë e Arteve në Tiranës, për dekada me radhë, ai përgatiti piktorët e ardhshëm në Akademinë tonë të Arteve me durimin dhe thjeshtësinë që e karakterizonte. Si piktor, ai ka ekspozuar punimet e tij në Francë, Itali, Angli, Greqi, Turqi, Austri, etj.

 Agim Zajmi ky mjeshtër i ngjyrës si piktor kavaleti, me shumë peizazhe, tablo kompozicionale, portrete etj nga ku me kujtohen: “Valle shqiptare”, “Fushë-Kosovë”, “Qan qielli shqiptar”, “Zanat e maleve”, “Për luftën në Kosovë”, “Portret gruaje”, “Kosovarja”, “Emigracioni”, etj.

Artisti Zajmi, si bir i Pejës trajtoi temën që e kishte aq për zemër, temën e Kosovës. Si skenograf ka marrë pjesë në shumë festivale ndërkombëtare të teatrit. Është fitues i shumë çmimeve kombëtare në pikturë dhe skenografi. Në vitin 1975, iu dha titulli “Artist i Merituar” dhe më 1991-shin u nderua me titullin “Piktor i popullit”, ndërsa më 1995 iu dha titulli “Profesor”. Zajmi ka qenë dekan në fakultetin e artit figurative dhe më pas profesor në Akademinë e Arteve. Ishte president i Shoqatës Mbarëkombëtare të Artistëve Figurativë me qendër në Tiranë.

Une nuk i përmbledh dot të gjithë jetën e tij artistike, por e di se ajo është dhe vazhdon të jetë “Në Shtëpi” dhe në kujtesën e atyre që jetuan në kohën e Artistit Agim Zajmi.

Faleminderit Profesor Zajmi për kontributin, në skenografi, kostumografi dhe ekspozita plot ngjyra dhe ide..të falenderoj që u deshët me tim atë, si miq, artistē, krijues dhe nuk u ndatë deri në  fund..

Tani jeni në qiej bashkë!

Faleminderit Mjeshtër per Artin, Qytetarin, Pedagogun, faleminderit për gjithçka na dhurove!

(1936- 3 nëntor 2013)/KultPlus.com

Më 16 dhjetor mbahet ‘Kampionati Evropian i Xhudos’, ngjarja më e madhe sportive në vend

Posted on by Kult Plus

Më 16 dhjetor 2023 në Pallatin e Rinisë, pritet të mbahet për herë të parë Kampionati Evropian i Xhudos, ngjarje kjo që konsiderohet si më e madhja sportive e vitit në vend, shkruan KultPlus.

Pjesëmarrës në këtë ngjarje sportive pritet të jenë 50 shtete që me 100 sportistë do të garojnë për çmimin e madh prej 300,000 € në total në të gjitha kategoritë.

Lajmin e ka bërë të ditur Gëzim Sveçla përmes një postimi në facbook.

“Logoja e Kampionatit Evropian është frymëzuar nga ngjyrat bardhekaltër të Prishtinës si dhe ilustrimi i objektit të Pallatit të Rinisë dhe Sporteve,

Kampionati i Hapur Evropian i Xhudos, “European Championships Open”, organizohet në kuadër të programit të shtetit, “Kosova shtet i xhudos” nga Federata e Xhudos së Kosovës dhe mbështetet nga Ministria e Kulturës, Rinisë dhe Sportit”, thuhet në njoftim./KultPlus.com