Nesër, 12 gusht, shënohet Dita Ndërkombëtare e Rinisë. Duke filluar nga sot, gjatë tërë muajit Ministria e Kulturës, Rinisë dhe Sportit ka planifikuar aktivitete me qëllim të fuqizimit, integrimit, e përmirësimit të mirëqenies së rinisë.
Të rinjtë tanë do ta kenë mundësinë të marrin pjesë në bashkëbisedime mes të rinjve, shfaqje të ndryshme, ekspozita e punëtori, mbrëmje poetike, tryeza diskutimesh, aktivitete sportive e rekreative që do t’u japin mundësi t’i shprehin idetë e tyre e të diskutojnë mbi çështjet dhe sfidat me të cilat përballen në përditshmëri.
Ministria e Kulturës, Rinisë dhe Sportit i inkurajon të rinjtë të marrin pjesë në këto aktivitete, duke theksuar se ata janë shtyllë kryesore e shoqërisë./ KultPlus.com
Sot shënohet Dita Ndërkombëtare e Rinisë, me ç’rast Ministria e Kulturës, Rinisë dhe Sportit ka prezantuar platformën ‘Kosovoyouth.com’, përcjellë KultPlus.
Kjo platormë ofron mundësi për punë, punë praktike, trajnime, bursa dhe grante, të gjitha në një vend.
Projekti implementohet nga NGO Lens dhe mbështetet nga Misioni i OSCE-së në Kosovë në bashkëpunim me Ministrinë e Kulturës, Rinisë dhe Sportit.
Duke pasur parasysh mirëqenien dhe fuqizimin e të rinjve, “Muaji i Rinisë”, titullohet aktiviteti më i ri që do të organizojë Ministria e Kulturës, Rinisë dhe Sportit për nderë te Ditës Ndërkombëtare të Rinisë, përcjellë KultPlus.
Në njoftimin e ministrisë thuhet se programi i këtij aktiviteti do të promovojë dhe adresojë çështjet thelbësore për të rinj si aftësimin profesional dhe punësimin e të rinjve, shëndetin mendor dhe riprodhues, aktivizimin rinor në nivel lokal dhe qendror, rekreacionin dhe aktivitetet e kohës së lirë, vullnetarizmin, integrimin dhe mbrojtjen e të rinjve të margjinalizuar.
Aktivitetet e këtij muaji do të organizohen në bashkëpunim me partnerë vendorë dhe ndërkombëtarë nga data 2 gusht deri më datë 27 gusht.
Kjo ngjarje do të organizohet në bashkëpunim vendorë dhe ndërkombëtarë nga data 2 gusht deri më 27 gusht. / KultPlus.com
Ministrja e Kulturës, Rinisë dhe Sportit Vlora Dumoshi i ka vazhduar aktivitetet për Ditën Ndërkombëtare të Rinisë, në Skenderaj. Në Skenderaj ministrja u shoqëruara nga zv. ministri Engelbert Zefaj dhe përfaqësues të MKRS-së, ku u pritën nga Kryetari Bekim Jashari i cili i falënderoi qe kanë përzgjedhur këtë komunë për të shënuar një ditë kaq të rëndësishme.
Ministrja u shpreh e lumtur për vizitën dhe theksoi që të rinjtë e Skenderajt ashtu siç të rinjtë e gjithë Kosovës do të kenë vëmendjen e saj dhe të ministrisë duke i ftuar ata që të aplikojnë për grante dhe projekte të cilat i ofron MKRS-ja. Ndër të tjera ajo falënderoi Kryetarin Jashari për mbështetjen në trajnimet për ndërmarrësi të cilat po i ofron MKRS.
“Programi për rimëkëmbje ekonomike i Qeverisë Hoti e ka fokus kryesor punësimin e të rinjve, andaj në këtë frymë bazohet edhe gjithë aktiviteti i MKRS-së. Po përpiqemi të bëjmë maksimumin e angazhimit që situatën me Covid-19 ta përballojmë sa më mirë dhe të jemi pranë të gjithë të rinjve që kanë nevojë për mbështetje.
Ministrja e theksoi nevojën që të punohet më shumë në drejtim të përfshirjes së të rinjve në institucione të cilët për shkak të mungesës së përvojës së punës shpesh herë diskualifikohen nga konkurset publike. Me ligjin për fuqizimin e rinisë i cili qysh dje ka nisur plotësim-ndryshimin edhe kësaj problematike do t’i gjejmë zgjidhje.” – theksoi ministrja Dumoshi.
Ministrja Dumoshi dhe Kryetari Jasharaj zbuluan bashkërisht punimin “I Love Kosova” të Qendrës Rinore të Skenderajt i cili u vendos në Sheshin “Idriz Rreci” në Skenderaj.
Kryetari Jashari u shpreh se është fakt i pamohueshëm që Kosova ka një rini profesionale dhe konkurrente në tregun e dijes. “Personalisht kam vendosur që të rinjtë ti kem aleatët më të afërt për zhvillimin e Komunës tonë” – theksoi kryetari Jashari.
Gjatë qëndrimit në Skenderaj, ministrja Dumoshi vizitoi edhe pastiçerinë “Snap Cake” i cili në kuadër të projektit “Praktika në punë”, mbështetur nga Departamenti i Rinisë në MKRS.
“Ndjehem jashtëzakonisht mirë kur shoh që si ministri kemi kontribuar për diçka kaq madhore e të rëndësishme. Më gëzon jashtëzakonisht fakti të shoh se si mbi 10 të rinj janë angazhuar në këtë ndërmarrje sociale, gjë që reflekton më së miri shpirtin ndërmarrës të të rinjve të vendit tonë, të cilët me përkrahjen e duhur arrijnë të ecin përpara në biznes e ndërmarrësi.” – theksoi ministrja Dumoshi. / KultPlus.com
Me rastin e 12 gushtit – Ditës Ndërkombëtare të Rinisë ministrja e Kulturës, Rinisë dhe Sportit Vlora Dumoshi bashkë me zv-ministrat Valdete Bajrami, Arbër Grabovci, Engelbert Zefaj, Halil Matoshi dhe përfaqësues të MKRS-s priti në zyrën e saj një grup të rinjsh nga Kuvendi i të rinjve të Kosovës me të cilët diskutoi për planet e Ministrisë në fushën e rinisë dhe ndoqi shqetësimet dhe sugjerimet që ata kanë.
Ky takim ishte i veçantë për faktin se të rinjtë pjesëmarrës ishin nga komuniteti shqiptar, serb dhe RAE andaj edhe diskutimi dhe preokupimet ishin nga perspektiva të ndryshme.
Ministrja u shpreh e lumtur që ndonëse në rrethana pandemie MKRS po shënon ditën e rinisë.
“Shënimi i kësaj dite synon promovimin e aktiviteteve për të rinjtë, me qëllim që të pranojë dhe njoh përpjekjet dhe përkushtimin e të rinjve në mbarë botë për përmirësimin e shoqërisë. Andaj edhe ne si Ministri dhe si bartës të institucioneve që përkrahin fushën e rinisë ndonëse në rrethana pandemie u përpoqëm që kjo ditë mos t’i mungojë kalendarit të ditëve të shënuara”- u shpreh ministrja Dumoshi.
Kastriot Luma nga Kuvendi i të rinjve të Kosovës e falënderoi ministren për pritjen e përzemërt dhe u shpreh i lumtur që MKRS ka treguar gatishmëri që të mbështesë të rinjtë e Kosovës.
Ministrja Dumoshi i njoftoi për punën që po bëhet në plotësim ndryshimin e ligjit për fuqizimin e rinisë për të cilin ka pasur kërkesa të ndryshme nga Kuvendi i të Rinjve, KVRL-të dhe organizatat rinore.
Ajo i njoftoi edhe për projektet të cilat janë ndarë dhe do të ndahen nga MKRS, në shumë totale prej 820.000 eurosh. Kjo shumë akomodon sado pak nevojat rinore dhe reflekton rëndësinë që institucionet kanë për fushën e rinisë.
Ministrja Dumoshi falënderoi për vizitën i përgëzoi për aktivitetet e tyre të vazhdueshme dhe u premtoi që do të mundohet maksimalisht që do të shtyjë përpara ide sa më inovative dhe përmbushëse për të rinjtë e Kosovës. / KultPlus.com
Dita Ndërkombëtare e Rinisë organizohet më 12 Gusht të çdo viti. Ajo është caktuar nga Kombet e Bashkuara në vitin 1999 me miratimin e rezolutës 54/120.
Kjo ditë është menduar si një mundësi për qeveritë dhe të tjerët për të tërhequr vëmendjen për çështjet rinore në mbarë botën.
Koncerte, seminare, ngjarje kulturore, që përfshijnë zyrtarë dhe takime kombëtare dhe lokale qeveritare dhe organizatat rinore zhvillohen në botë në nder të Ditës Ndërkombëtare të Rinisë.
Edhe në Kosovë për nder të kësaj Dite MKRS-ja do të zhvillojë disa aktivitete si në vijim:
Me rastin e Ditës Ndërkombëtare të Rinisë, sot me datë 12 gusht, MKRS dhe ministrja e Kulturës, Rinisë dhe Sportit Vlora Dumoshi, do të ketë këtë agjendë:
09:30-10.00
Pritja e një grupi të të rinjve nga Ministrja Vlora Dumoshi, (Objekti i MKRS-së)
10:00-10:45
Shpërndarja e maskave nga Ministrja Vlora Dumoshi dhe Ministri Armend Zemaj (Përgjatë Sheshit në Prishtinë)
11:50-12:00
Skenderaj- Zbulimi i punimit “I love Kosova” nga Ministrja Vlora Dumoshi dhe Kryetari i Komunës së Skenderajt Bekim Jashari, (Sheshi “Adem Jashari”, Skenderaj)
12:00-13:30
Vizitë ndërmarrjes sociale “Pastiçeria Snap cake” në kuadër të projektit ‘Praktika në Punë” i mbështetur nga Departamenti i Rinisë MKRS, (Skenderaj)
15:10 -15:20
Aktivitete virutale: Lidhje në platformën Zoom, fushata “Psikologët e rinj për të rinjtë”
17:00 – 17:20
Linku shpërndahet në rrjetet sociale të MKRS. Lidhje në platformën Zoom, organizuar nga zyra e UNICEF-it në Kosovë / KultPlus.com
