“Kthimi” i Kastriot Abdylit pjesë i edicionit të 67-të të International Film Festival Mannheim – Heidelberg në Gjermani

Pas premierës botërore ne Oldenburg International Film Festival në Gjermani dhe Calgary European Film Festival, filmi “Kthimi” me regji të Kastriot Abdylit do të prezantohet edhe në edicionin e 67-të të International Film Festival Mannheim-Heidelberg në Gjermani, i cili mbahet nga data 15-25 nëntor, shkruan KultPlus.

Filmi do të shfaqet në 5 termine dhe atë dy në qytetin e Mannheimit me datë 16 dhe 18 nëntor si dhe në qytetin e Heidelberg në tre termine 15, 17 dhe 19 nëntor.

Shfaqja e filmit, njëherësh është edhe një mundësi e mirë për komunitetin shqiptar në këto dy qytete për ta parë një film shqiptar.

Në filmin “Kthimi” trajtohet migrimin si fenomen te shqiptarët, si dhe kontradiktave që sjellë integrimi dhe globalizimi në traditat e familjeve shqiptare, ku vë në pah peshën e besës dhe nderin e femrës shqiptare.

Regjisor dhe skenaristi i filmit “Kthimi” është Kastriot Abdylit, ko-skenarist Isa Qosja, Drejtor Fotografie Vlatko Samoilovski, montazha Kastriot Saqipi dhe Bllagoje Nedelkovski, Kostumograf Izaet Curri, Skenograf Zeni Ballazhi.

Ndërsa filmi vjen i jetësuar nga aktorët: Selman Lokaj, Hazir Sh. Haziri, Delphin Depardieu, Liridona Shehu, Safete Rogova, Sefedin Nuredini, Xhevat Qoraj, Ismail Kasumi, Shkëlqim Islami, Labinot Lajqi, Valon Bujupi, Virus Shala, Venera Lumani, Zijadin Murtezi, Teuta Ajdini, Hamdi Rashiti, Muqbajadin Qamili, Nikola Kumev, Avdullah Gjikoka, Ellhame Bilall.

“Kthimi” është bashkëprodhim i Agjencionit të Filmit të Maqedonisë dhe Qendrës Kinematografike të Kosovës dhe është realizuar nga “Dardania Film” – Shkup dhe “Shkupi Film” Prishtinë./ KultPlus.com

Kastriot Abdyli: Gratë shqiptare na sollën deri këtu, ju kemi borxh atyre

Alberina Haxhijaj

Filmi “Kthimi” i regjisorit Kastriot Abdylit ka qenë filmi përmbyllës i edicionit të 10-të të PriFilmFest. “Kthimi” përmes premierës që pati mbrëmë në Prishtinë, risolli para publiku temën e migrimit, shkruan KultPlus.

Edicioni i 10-të i festivalit solli gjithsej 58 filma dhe së bashku me filmat PriFilmFest shpalosi edhe tema të ndryshme të cilat preokupojnë shoqërinë. Diçka të tillë bëri edhe filmi “Kthimi”.

Iliri, një i ri shqiptar nga Maqedonia që migroi në Francë, ka vendosur të martohet me një grua franceze me emrin Sabine (ndoshta nga dashuria, por ndoshta edhe për të siguruar lejen e qëndrimit).

Por gjithë ajo që ndodh përreth Ilirit dhe në film është në fakt është një dramë që ngërthen kontradikta mes kulturës perëndimore dhe asaj shqiptare e që shpesh herë shkaktojnë edhe situata komike. Rikthimi i tij në vendlindje për t’u martuar duket si një mundësi e mirë për ta parë familjen e tij përsëri pas shtatë vitesh por edhe për ta mësuar Sabinen më shumë me traditat shqiptare.

Sidoqoftë, vizita e tyre e papritur bëhet e thartë kur babai i Ilirit, një burrë tradicional, e kupton se djali i tij është kthyer vetëm për t’u martuar me një grua të huaj dhe pastaj për tu larguar, duke e thyer besën që ia kishte dhënë dikur Bardhës, vajzës nga fshati i tyre (të cilën e dashuronte).
Madje për regjisorin ajo që është në qendër përveç tematikës se migrimit është pikërisht “Bardha” dhe portretizimi i gruas shqiptare.

“Filmi trajton migrimin dhe pasojat që i sjellë migrimi në shoqëri. Mirëpo në këtë film e kam trajtuat edhe gruan shqiptare e cila e pret burrin, edhe pse akoma nuk janë të martuar për shtatë vjet. Na burrat nuk ua kemi kthyer njëjtë edhe pse gruaja shqiptare është ajo që na ka sjellë këtu ku jem. Pra ia kemi borxh asaj”, thotë regjisori.

Tema të cilën e ka trajtuar regjisori është edhe një temë të cilën ai e ka hasur edhe në jetën e tij të përditshme.

Kjo histori bashkëkohore zhvillohet në një fshat ballkanik ku të vjetrit dhe të rinjtë, tradicionalja dhe modernja, lindorja dhe perëndimorja, të gjitha ndërthuren. Këtë e theksoi edhe aktori, Selman Lokaj.

“Nuk e di sa kemi arritë që të sjellim në ekran një porosi e cila po na mundon shumë vite. Por, ma merr mendja se me punën e regjisorit dhe ekipit kemi arritur që sado pak ta pasqyrojmë atë. Besoj që filmi do të ketë një rrugë të gjatë pasi që pasqyron dilemën se a me shku andej a me nejt këndej. Nëpërmes arti dhe veprave artisitke pra po mundohemi që të tregojmë se ku jemi”, theksoi aktori Lokaj.

Për aktorin Ismail Kasumi pjesëmarrja në këtë film ishte një mundësi shumë e mirë, po ashtu ishte hera e parë që ai punonte në një projekt kaq të madh.

“Për mua ishte hera e parë që punova me një ekip kaq të madh. Ishte një emocion shumë i mirë bashkëpunimi me një ekip të tillë. Po ashtu ishte kënaqësi që pjesë nga traditat tona ti shohim edhe përmes filmit”, u shpreh ai.
Në anën tjetër aktori Shkëlqim Islami u shpreh i lumtur për kritikat pozitive që morën nga miqtë pas përfundimit të filmit.

“Për mua nata e mbrëmshme ishte premierë pasi që nuk kam arritur që ta shoh herën e parë në Shkup dhe jam ndarë jashtëzakonisht i kënaqur dhe e falënderoj regjisorin që ka besuar në mua dhe më ka bërë pjesë të ekipit”, theksoi ai.

Në rolet kryesore, pra në rolin e Sabine, paraqitet Delphin Depardieu , aktorja nga Franca (njëherësh mbesa e aktorit me famë botërore Xherard Depardeu). Krahas saj në rolet kryesore paraqiten Selman Lokaj, Hazir Sh. Haziri, Liridona Shehu, Safete Rogova, Sefedin Nuredini. Drejtori i Fotografisë Vlatko Samoilovski, Kostumograf Izet Curri, Skenograf Zeni Ballazhi, Kompozitor Memli Kelmendi, Montazhier Kastriot Saqipi dhe Blagoje Nedelkovski, Producent Ekzekutiv Simeon Damevski.

Filmi “Kthimi” ishte filmi përmbyllës i edicionit të 10-të të PriFilm Fest. Festivali ndërkaq vazhdon edhe sonte me ndarjen e çmimeve duke filluar nga ora 20:00./ KultPlus.com

“Kthimi” i Kastriot Abdylit të mërkurën me premierë

Filmi “Kthimi’ i regjisorit Kastriot Abdylit vjen premierë këtë të mërkurë, më 18 prill në Cineplexx (City Mail), në qytetin e Shkupit, shkruan KultPlus.

Skenari i filmit është punuar nga Kastriot Abdyli së bashku me Isa Qosën ndërsa ky film është koproduksion i parë mes Maqedonisë dhe Kosovës, realizuar nga “Dardania Film” Shkup & “Shkupi Film” Prishtinë.

Ngjarja zhvillohet në një fshat shqiptar. Iliri, një i ri shqiptar nga Maqedonia që emigroi në Francë, ka vendosur të martohet me një franceze me emrin Sabine. Për shkak të çështjeve ligjore (Iliri hyri në Francë në një vizë të rreme) ai duhet të kthehet në fshatin e tij të lindjes për t’u martuar. Kjo duket si një mundësi e madhe për ta parë familjen e tij përsëri pas shtatë vjet mungese dhe për Sabine që të mësojë më shumë për rrënjët e tij. Sidoqoftë, vizita e tyre e papritur bëhet e tharë kur babai i Ilirit, një burrë tradicional i moshuar, e kupton se djali i tij është kthyer vetëm për t’u martuar me një grua të huaj dhe pastaj për t’u larguar, duke thyer “Besën” që ai i kishte bërë Bardhës, një vajze nga fshati i tyre. Filmi është një dramë që ngërthen kontardita mes kulturës perëndimore dhe asaj shqiptare që shkaktojnë situata komike.

Në rolet kryesore, pra në rolin e Sabine, paraqitet Delphin Depardieu , aktorja nga Franca (njëherësh mbesa e aktorit me famë botërore Xherard Depardeu). Krahas saj në rolet kryesore paraqiten Selman Lokaj, Hazir Sh. Haziri, Liridona Shehu, Safete Rogova, Sefedin Nuredini.
Drejtori I Fotografisë Vlatko Samoilovski, Kostumograf Izet Curri, Skenograf Zeni Ballazhi, Kompozitorë Memli Kelmendi, Montazhier Kastriot Saqipi dhe Blagoje Nedelkovski, Producent Ekzekutiv Simeon Damevski.

Në rolet tjera paraqiten: Xhevat Qoraj, Shkëlqim Islami , Ismail Kasumi, Labinot Lajqi, Valon Bujupi, Virus Shala, Venera Lumani, Zijadin Murtezi , Teuta Ajdini, Hamdi Rashiti ,Muqbajadin Qamili,Nikola Kumev, Avdullah Gjikoka, Ellhame Bilall, Beqir Nuredini, Shota Baraliu, Muzafer Etemi, Flerentina Ademi, Valdete Ismaili, Donika Ahmeti, Enver Halimi, Agim Sulejmani, Ramadan Malaj, Abdurahman Rahman, Shkup Abdyli, Jon Saqipi, Arb Abdyli, Rron Grajqevci, Nadire Ismaili Salihu, Burhanedin Salihu Metush Agjani, Shoqëria Kulturo Artistike “Karshiaka”.

Ky film do të shfaqet këtë të mërkurë në Cineplexx Mall në Shkup ndërsa nga 19 prilli do të jetë në repertuarin e rregullt në Cineplexx. / KultPlus.com

Katër rolet e mëdha të Adriana Matoshit

Ata që pëlqejnë filmat shqiptarë, e njohin mirë Adriana Matoshin dhe shkëlqimin e saj në shumë prej filmave me regjisorë shqiptarë.

Një ndër aktoret që me disa vite bagazh prapa saj vazhdon të shkëlqejë në role artistike, Adriana Matoshi gjithmonë vjen e freskët dhe e mishëruar brenda artit që veç ajo di ta sjellë.
Shembull, roli në filmin “Kthimi” nga Blerta Zeqiri e sjellë një Adrianë gati gati histerike, një grua që nga e qeshura kthehet në pak sekonda në vajtim, kur burri i saj merr vesh se ajo ka një fëmijë me dikë tjetër. Një histori lufte, ku Adriana futet brenda në rol dhe afër aktorit Lulzim Bucolli është një grua që nuk dorëzohet. Me Adrianën filmi arriti suksese të mëdha, në Sarajevë dhe më pas në Sundance Film Festival, dhe kjo tregon për mjeshtërinë e kësaj aktoreje.

 

Një rol tjetër i Adrianës, e ku ajo jep maksimumin e saj është roli i Valentinës tek filmi “Babai” me regji nga Visar Morina. Një film i prekshëm për historinë e një djali dhe babait të tij, ku Adriana sjellë emocionin e saj. Adriana udhëtoi për në Karlovy Vary me suksesin që arriti ky film.

Dhe Adriana është fantastike edhe në shfaqje. Shfaqja “Zemër e huaj” e bashkon atë me aktorë të tjerë të kalibrit të saj, për një shfaqje që vjen si traktat kundër shoqërive të dobëta të Ballkanit, dhe jo vetëm. Problemet me viza i ka pasur edhe vetë Adriana, dhe brenda kësaj shfaqjeje që niset me përvoja personale ka ditur të mbushë skenën e teatrit. Cinizëm, humor, fjalë të pista, luftë kundër burokracisë, të gjitha i përkthekon Adriana në këtë rol.

Me shfaqjen “Mësimi” nga Bekim Lumi para disa vitesh Adriana Matoshi udhëtoi për në Itali e më pas për në Lugano, e këtu morri edhe çmim për shfaqjen më të mirë. Shfaqjen e blenë më pas italianët. Adriana luan rolin e një 12 vjeçareje, e vetë thotë se ka qenë vështirë të portretizojë dikë të kësaj moshe. Shfaqja është lojë fizike, ku ajo në fund mbytet dhe dhunohet. / KultPlus.com