Zeqiri: Në Francë e kuptova për herë të parë se çfarë do të thotë të kesh mirëqenie

Qendrim Badalli

Para pak orësh në një ceremoni në rezidencën franceze në Prishtinë, regjisorja e njohur Blerta Zeqiri është nderuar me titullin “Kalorëse e Artit dhe Letrave” nga Ambasada e Francës në Kosovë, shkruan KultPlus.

Kjo është njëra nga dekoratat më të larta që e ndanë Republika e Francës, përmes së cilës shpërblen individët, që janë dalluar përmes krijimtarisë së tyre, në fushën artistike ose letrare, apo përmes kontributit që ata kanë dhënë për rrezatimin dhe promovimin e artit dhe letërsisë në Francë dhe në mbarë botën.

Në fjalën e saj të rastit, Ambasadorja e Francës në Kosovë, Marie-ChristineButel, ka theksuar disa nga çështjet që regjisorja Zeqiri ka trajtuar ndër vite.

“Karriera juaj si regjisore e filmit ju ka bërë që të shikoni gjërat më nga afër, homoseksualitetin, luftën, refugjatët, sistemin pararel të arsimit në Kosovë”, ka thënë ajo.

Tutje, Ambasadorja Butel, ka bërë një ndërlidhje mes promovimit të vlerave të Francës dhe të regjisores Zeqiri.


“Me një fjalë, e dashur Blerta, si një regjisore plot talent por edhe si një grua e përkushtuar ju  keni ditur që përmes filmave tuaj të shkëlqyeshëm të bartni vlerat universale të tolerancës dhe lirisë, vlera që Republika Franceze dëshiron të promovojë”, ka vazhduar tutje, ku në fund, Ambasadorja e Francës në Kosovë, ka treguar për arsyet se pse ky simbol ka shkuar për regjisoren Blerta Zeqiri.

“Përmes karrierës suaj shembullore zonja Zeqiri, me përpjekjet tuaja të vazhdueshme për të mbrojtur ekzistencën e një kinemaje të pavarur, krijuese dhe të përkushtuar ju meritoni që Republika Franceze të ju shpërblejë me simbolin “Kalorëse e Artit dhe Letrave”.

Regjisorja Blerta Zeqiri, fillimisht ka treguar shkurt për rrugëtimin e saj nga Kosova për në Paris, pikërisht në periudhën kur në Kosovë kishte shpërthyer lufta.

“Isha nëntëmbëdhjetë vjeçe kur hipa në aeroplan për herë të parë ku me gjithë familjen po shkoja drejt Parisit, vendit të dashurisë dhe artit. Këtë rrugëtim me familjen time drejt vendit të dashurisë dhe kulturës ne po e bënim me një aeroplan ushtarak, ishte viti 1999, një kohë lufte në Kosovë. Ne ishim refugjatët e parë nga Kosova që shteti francez me aq bujari na mirëpriti”, ka thënë Zeqiri, e cila ka vazhduar tutje duke treguar ballafaqimin me një shtet të drejtë karshi qytetarit për dallim nga ajo se çfarë kishte përjetuar në Kosovën e okupuar.

“Për sa kohë unë kisha jetuar në Kosovën e okupuar kisha qenë gjithmonë një qytetare e rendit të dytë. Në Francë, për herë të parë e shijova lirinë dhe fillova ta kuptoj domethënien  dhe rëndësinë e gjithë kësaj. Në Francë kuptova që shteti ndihmon qytetarin, qytetarin e tij dhe nuk e shtyp atë. Në Francë për herë të parë e kuptova çfarë do të thotë të kesh mirëqenie dhe se mirëqenia nuk është luks por domosdoshmëri e cila duhet t’i takojë secilit individ në botë”, ka thënë regjisorja e filmit “Martesa”.


Ajo ka folur edhe për ndikimin që vlerat që kultivon shoqëria franceze kanë pasur në jetën e saj qoftë profesionale qoftë në atë personale.

“Kur e shijova dhe përjetova mirëqenien franceze, u bëra përkrahëse e flaktë e Lirive dhe të Drejtave të Njeriut dhe të kafshëve, vlera këto që i morra nga Franca perëndimore që vazhdojnë të ma udhëheqin jetën dhe punën time artistike tash e sa vite. Ndihem pafundësisht e nderuar dhe falendëruese ndaj Republikës Franceze për këtë dekoratë kaq të çmuar për mua”, ka përfunduar ajo.

Ceremonia vazhdoi tutje me një koktej rasti në prani të të ftuarve në mesin e të cilëve ishte edhe kryeministri në ardhje Albin Kurti. / KultPlus.com





Blerta Zeqiri do të dekorohet me titullin “Kalorëse në Urdhrin e Artit dhe Letërsisë”

“Të martën, më 19 nëntor në ora18:30, në një pritje e cila do të organizohet në rezidencën e Francës, Shkëlqesia e saj ambasadorja e Francës, Marie-Christine BUTEL do të ketë nderin të dekorojë znj.Blerta Zeqiri, « Kalorëse në Urdhrin e Artit dhe Letërsisë »”, bëhet e ditur nëpërmjet një komunikate nga Ambasada e Francës në Kosovë, shkruan KultPlus.

Kjo është njëra nga dekoratat më të larta që e ndanë Republika e Francës, përmes së cilës shpërblen individët, që janë dalluar përmes krijimtarisë së tyre, në fushën artistike ose letrare, apo përmes kontributit që ata kanë dhënë për rrezatimin dhe promovimin e artit dhe letërsisë në Francë dhe në mbarë botën

Përmes kësaj dekorate, Republika e Francës njeh kontributin e jashtëzakonshëm të zonjës ZEQIRI, gjatë gjithë karrierës profesionale, në përhapjen e gjuhës dhe kulturës franceze në Kosovë, thuhet më tej në këtë njoftim.

Blerta Zeqiri është regjisore e njohur në Kosovë, e cila ka shënuar një sukses të madh me filma të metrazhit të shkurtë, sikurse edhe e filmin debutues të metrazhit të gjatë “Martesa”./KultPlus.com

Gjykata i jep të drejtë Blerta Zeqirit, reagon Blerim Gjoci: Gjykatësja nuk e ka kuptuar lëndën

Filmi “Kthimi” me regji të Blerta Zeqirit ishte mollë sherri në mes regjisores dhe Blerim Gjocit, i cili në atë kohë udhëhiqte Festivalin e Filmit të Shkurte “Nine Eleven”, shkruan KultPlus.

Gjithë kjo nisi pasi filmi filloi të shpërblehet në festivale, nga ku Gjoci pretendonte se autor i filmit duhej të njihej festivali, brenda të cilit ishte krijuar filmi, dhe poashtu pretendonte se edhe çmimet do të duhej ti takonin organizatorit. Gjoci kishte ngritur padi ndaj Blerta Zeqirit ku kërkonte nga ajo që ta njihte të drejtën e tyre të autorësisë dhe që e njëjta të paguante shpërblimet prej çmimeve të fituara nëpër festivale sikurse t’i kthente edhe çmimet.

Tash, shtatë vite pas vjen lajmi se kërkesëpadia nga “Nine Eleven”, është refuzuar si e pabazë.

Zeqiri ka reaguar dje duke u shprehur që drejtësia ka ardhur në vend. “Pas 7 vitesh, më në fund u arrit drejtësia, duke u refuzuar si e pabaze kërkesëpadia që “Nine Eleven” ka ngritur kundër meje lidhur me çmimet e filmit të shkurtër “Kthimi”.

Por, një reagim tjetër na vjen edhe nga Blerim Gjoci. Ai ka kritikuar regjisoren Zeqiri për një mori gjërash, përderisa vendimin e gjykatës e ka quajtur të padrejtë, sipas tij gjykatësja nuk e ka kuptuar lëndën dhe nuk ka nda drejtësi.

Më poshtë po ju sjellim reagimin e plotë të Gjocit:

Pershendetje miq,

Asnjehere nuk kam pas deshire qe problemet apo kontestet qe kam, me i ba mediale e publike.
Por per hir te vertetes kesaj radhe po e jap nje shpjegim dhe te jeni te bindur se pas kesaj me sdo te ju lodh me kesi tema;
Besoj se cdo person, me dy pal mend e din qe shperblimi per filmin me te mire i shkon producentit, per kete arsye ekzistojne shperblimet per secilen kategori veq e veq, per regjisor, montazher, kompozitor, fotografi etj, ndersa shperblimi per Filmi me I Mire i shkon atij qe i ka mbledh, menaxhu dhe pagu te gjith keto kategori me larte bashk.
Per pretendimet e rrejshme, e them me pergjegjesi te plot se asnjehere, as une, dhe askush nga festivali 911, nuk ja konteston as Blerta Zeqirit dhe askujt tjeter autoresine mbi funksionin qe ka ushtruar ne nje projekt filmik qofte ne festivalin tone apo diku tjeter. Dhe pretendimet per te perzier pronesine me autoresine jane diletante dhe qellimkqija, dhe ne kete rast perdoren per te hequr vemendjen nga e verteta.
Ne rastin e festivalit 911, secilit regjisor te angazhuar i eshte ofruar mundesia qe te hek dore nga honorari i saj/tij dhe ne do ti jepnim hise/pronesi ne film, pra bashkeproducent! Dhe 99% te regjisoreve atebote kan refuzuar duke preferuar honorarin e festivalit mbi pronesine. Ne e benim kete kerkese, sepse me ato pak te holla qe do kursenim mund te ndihmonim edhe nje film tjeter per tu krijuar!
Ne rastin e Blerta Zeqirit, qe eshte vetem regjisore ne kete projekt, pervec qe ka refuzu te heqe dore nga honorari qe te jete bashkepronare ne film, dhe perveq qe filmi eshte xhiruar mbi nje skenar ne pronesi timen, me kameren time, ndricimin tim, montuar ne zyren time, ne kompjuterin tim, paguar nga une secili shpenzim ne kete xhirim, ajo madje me fakturoi 50 Euro shtese, per dhomen e saj te fjetjes ku eshte xhiru nje skene e filmit!
Kjo gje me pat befasuar shume atehere, sepse Zeqiri e dinte mjaft mire se buxheti i festivalit na ishte harxhuar dhe ishim vonuar per te filluar xhirimin e ketij projekti, dhe une po e finansoja kete film me te holla nga xhepi im – nje prej arsyeve te voneses ishte sepse skenaristi refuzonte te bashkepunoj me Zeqirin sepse kjo kishte krijuar reputacion per mosmirenjohje, e vjedhje te ideve dhe autoresise!
Ishte ky filmi i trete qe une po ja finansoja Zeqirit, dhe me dolen fjalet e te gjith atyre qe me paralajmeronin per karakterin e saj.
Cka eshte edhe me interesant, filmi ka fituar edhe ne festivalin 911 edhe si “Filmi me i Mire” edhe si “Regjia me e Mire”; ne edicionin e vitit 2011 dhe Zeqiri mori shperblimin per “Regjine me te Mire” dhe nuk shfaqi asnje pretendim per shperblimin “Filmi me i Mire”, sepse ky shperblim gjithmone i takon producentit, ne kete rast festivalit, e kete e kishim te specifikuar edhe ne kontrate, te cilen Zeqiri vazhdon ta shkele edhe kur komenton per projektin, atehere e tash!
Pretendimet per te marre parate e shperblimit, qe nuk jane shume e madhe megjithate, por ne ishim festivali i vetem ne bote qe po finansonte filmin e shkurt dhe me ato para do te mund te finasonim nje film me shume vitin e ardhshem, pra keto pretendime te Zeqirit per te “marre” parate, dolen kur u fitua shperblimi ne Sundance. Dhe qe nga aty edhe ne dy festivale tjera radhazi, shuma ne te holla qe shkonte per Filmin me te Mire dhe Shperblimin e Publikut – zhdukej, por jo edhe certifikatat sepse ato nuk i interesonin aq shume Zeqirit. Pra filmi kishte fituar ne kater festivale nderkombetare, nga 35 sa kishim aplikuar me minimum 50 Euro kosto per aplikim dhe te gjitha te paguara nga xhepi im, por as per keto nuk di gje Zeqiri sepse nuk po dilnin nga xhepi saj!
Zeqiri madje e permend edhe cmimin Evropian, dhe eshte pikerisht faji dhe grykesia e Zeqirit pse filmi nuk mori pjese! Filmi ishte nominuar nga festivali i Sarajeves per kete cmim dhe Zeqiri kishte shfrytezuar rastin atje, derisa ne ne Prishtine po pergatisnim filmat e ri per edicionin e Shtatorit, dhe kishte plotesuar dokumentacionin si pronare e filmit, per te pervetesuar shperblimin. Ndersa organizatoret e cmimit Evropian kishin lexuar emrin e producentit ne titrat e filmit dhe te befasuar na kishin kontaktuar per te sqaruar kete problem. Ne, edhe me te befasuar ju kemi sqaruar kush eshte producenti/pronari i filmit. Cmimi Evropian kerkoi nga ne qe ne te kontaktojme festivalin e Sarajeves per te ndrequr dokumentacionin. Sarajeva nuk u pergjigj asnjehere ne emailin tone dhe Festivali Evropian vazhdoi rrugetimin pa ne.
Ndersa sa i perket gjykates, pas leximit te nje aryetimi te quditshem, per mendimin tim gjykatesja pervec qe nuk e ka kuptuar lenden, me shume ka dashur te na heqe qafe sesa te ndaj drejtesi. Nejse!
Nje pike ku pajtohem me Zeqirin eshte qe krijuesit te kene shume kujdes me ke bashkepunojne, sepse ne ne festivalin 911 pasi na ndodhi ky problem, na humbi deshira per te punuar! Sidomos me krijues filmi mosmirenjohes, qe behen kinse nuk i dijne as rregullat baze te krijuarit film. Shume me mire qe ky festival pushon!
Ndersa per fund po ju pyes, Cili shperblim duhet ti takoj producentit/pronarit te filmit?
Per Skenografi, ndoshta?
/ KultPlus.com

Luftë gjykatash mes Blerta Zeqirit dhe Blerim Gjocit, gjykata nuk i jep të drejtë Blerim Gjocit

Filmi “Kthimi” me regji të Blerta Zeqirit ishte mollë sherri në mes regjisores dhe Blerim Gjocit, i cili në atë kohë udhëhiqte Festivalin e Filmit të Shkurte “Nine Eleven”, shkruan KultPlus. Gjoci, pretendonte se autor i filmit duhej të njihej festivali, brenda të cilit ishte krijuar filmi, dhe poashtu pretendonte se edhe çmimet do të duhej ti takonin organizatorit, për të cilin edhe kishte paditur Blerta Zeqirin.

Kjo e fundit, nëpërmjet rrjeteve sociale ka njoftuar që kërkesëpadia nga “Nine Eleven”, është refuzuar si e pabazë, e cila ka dhënë edhe shpjegimet për këto probleme në mes Zeqirit dhe Gjocit. KultPlus ju sjell reagimin e plotë të Blerta Zeqirit.

Pas 7 vitesh, më në fund u arrit drejtësia, duke u refuzuar si e pabaze kërkesëpadia që “Nine Eleven” ka ngritur kunder meje lidhur me çmimet e filmit të shkurtër “Kthimi”.

OJQ “Nine Eleven”, e kryesuar atëbotë nga Blerim Gjoci (poashtu kryetar i VAPIK), në vitin 2012 pat ngritur padi kundër meje duke kërkuar që unë ta pranoj organizatën si autore të filmit dhe t’ia kthej çmimet që filmi kishte fituar nëpër festivale, përkundër faktit që të gjitha festivalet në fjalë e kanë konfirmuar me shkrim që çmimet i takojnë regjisores. Si rezultat i këtij konflikti, Blerim Gjoci e mbylli veprën në sirtar, duke mos e lënë të shfaqet në shumë raste dhe për herë të parë në histori të Akademisë Europiane të Filmit, duke e tërhequr edhe nga nominimi për çmimin vjetor të filmit më të mirë të shkurtër europian të kësaj akademie prestigjioze (kjo gjithashtu ishte hera e parë që një film i shkurtër kosovar u nominua për filmin më të mirë të shkurtër europian). Arsyeja e tërheqjes ishte që Gjoci si producent, edhe pse në të vërtetë nuk e kishte kryer punën e producentit gjatë bërjes së filmit, dëshironte të ishte pranuesi evetual i çmimit në rast të fitores në ceremoninë e ndarjes së çmimeve në vitin 2012. Akademia Europiane e Filmit i kishte shkruar qartazi atëbotë që rregullorja e tyre e cekë që në rast të filmave të shkurtër shpërblimin e pranon regjisorja e jo producenti.

Edhe pse e tërë kjo kohë ka qenë shumë e vështirë për mua, edhe pse në momentin kur ka ndodhur e kam ndjerë si pengesën më të madhe që më ka dalë ndonjëherë në punë e jetë, nga thellësia e zemrës jam falënderuese për secilin send, sidomos për faktin që të mos ishte ky rrugëtim, nuk do të mesoja shumë gjëra që kam mësuar, që kanë të bëjnë me punën dhe relacionet në punë, por edhe nuk do ta shihja mirësinë, profesionalizmin dhe njerëzoren e shumë njerëzve që më kanë ndihuar në këtë betejë. Njëri prej tyre është edhe avokati im Kujtim Kerveshi (Kërveshi and Partners Law Firm), i cili me zemër të mirë dhe në emër të drejtësisë më ka përfaqësuar në këtë rast dhe ndihmuar ta sjellim drejtësinë në vend.

Shpresoj që kjo përvojë, sado e hidhur për mua dhe e dëmshme për kinematografinë tonë, sidomos në një kohë kur ishim duke i marrë këmbët nëpër botë, të shërbejë si shembull i rregullimit të relacioneve në mes producentëve dhe autorëve të filmave të shkurtër, por edhe të gjatë.

Për fund, regjisoret dhe regjisorët e rinj do t’i kisha këshilluar që të kenë kujdes për vendosjen e emrave të producentëve në filmat e tyre të ardhshëm, pasi që një vendim që gjatë bërjes së filmit mund të duket i thjeshtë dhe i pasherr, pas përfundimit të tij mund të ketë pasoja të mëdha./KultPlus.com

Rudina dhe Blerta rikthejnë muzikën e viteve të 90-ta

Nisma e artisteve Rudina Xhaferi dhe Blerta Zeqiri të cilat morën përsipër të rikthejnë muzikën e viteve të 90-ta, po vjen pas një pauze të gjatë, shkruan KultPlus.

Duke e konsideruar si një ide të qëlluar e cila është mirëpritur nga gjeneratat përkatëse, regjisorja Blerta Zeqiri dhe artistja Rudina Xhaferi, po e risjellin një event të tillë përsëri në Hamam Bar Prishtina.

Hitet më të bukura botërore dhe vendore të viteve të 90-ta do të keni rast t’i dëgjoni e t’i shijoni në një natë ku do të riktheheni në kohë.

“Pas një pauze bukur të gjatë, bashkë me Rudinen vendosem ta rikthejmë në Hamam ndejen tone! Hajdeni e knaqUm bashke shpyertin: çaraveshUm, kcejna, shkunUm, duhUm me muziken qe e kuptojme ma s’miri”, ka shkruar Blerta Zeqiri në Facebook.

Eventi ‘Rudina’s and Blerta’s mixtape’ mbahet të premten duke filluar nga ora 21:30 në Hamam Bar Prishitna./KultPlus.com

“Martesa” e Blerta Zeqirit nesër në Sydney Film Festival

Filmi “Martesa: nga regjisorja Blerta Zeqiri nesër do të shfaqet në “Evropa! Zëri i grave në filma”, në Sydney Film Festival.

Filmi merr pjesë në këtë festival falë Qendrës Kinematografike të Kosovës dhe Evropës Kreative, shkruan KultPlus.

Edicioni i 65-të i festivalit të filmit ne Sidnei “Sydney Film Festival” (6-17 Korrik), në partneritet me “European Film Promotion” dhe “Screen International” pati shpallur programin “Europe. Voices of Women in Film”.

“Evropa! Zëri i grave në filma”, është një program i 10 filmave të ri nga regjisoret e suksesshme të Evropës, në me e tyre do të jetë edhe filmi “Martesa” nga regjisorja kosovare Blerta Zeqiri.

Festivali do të këtë edhe tetë mysafire filmbërëse të cilat do t’i prezantojnë filmat e tyre dhe do të marrin pjesë në një diskutim publik rreth hendekut gjinorë në industrinë e filmit.

Krahas filmit të Zeqirit, do të jenë edhe EmilyAtef me “3 DAYS IN QUIBÉRON” nga Gjermania, Isabella Eklöf me “HOLIDAY” nga Danimarka, Nanouk Leopold me “COBAIN” nga Holanda, Fanni Metelius me “THE HEART” nga Suedia, Katharina Mückstein me “L`ANIMALE” nga Austria, SinéadO`Shea me “A MOTHER BRINGS HER SON TO BE SHOT” nga Irlanda, Virpi Suutari me “ENTREPRENEUR” nga Finlanda, Jagoda Szelc me “TOWER. A BRIGHT DAY” nga Polonia dhe Ana Urushadze me “SCARY MOTHER”nga Gjeorgjia./ KultPlus.com

“Martesa” e Blerta Zeqirit në Sydney Film Festival

Edicioni i 65-të i festivalit të filmit ne Sidnei “Sydney Film Festival” (6-17 Korrik), në partneritet me “European Film Promotion” dhe “Screen International” shpalli këtë javë “Europe.

Voices of Women in Film”: një program i 10 filmave të ri nga regjisoret e suksesshme të Evropës, një prej të cilëve do të jetë filmi “Martesa” nga regjisorja kosovare Blerta Zeqiri.

Festivali do të këtë edhe tetë mysafire filmbërëse të kontinentit të cilat do t’i prezantojnë filmat e tyre dhe do të marrin pjesë në një diskutim publik rreth hendekut gjinorë në industrinë e filmit.

Krahas filmit të Zeqirit, do të jenë edhe Emily Atef me “3 DAYS IN QUIBÉRON” nga Gjermania, Isabella Eklöf me “HOLIDAY” nga Danimarka, Nanouk Leopold me “COBAIN” nga Holanda, Fanni Metelius me “THE HEART” nga Suedia, Katharina Mückstein me “L`ANIMALE” nga Austria, Sinéad O`Shea me “A MOTHER BRINGS HER SON TO BE SHOT” nga Irlanda, Virpi Suutari me “ENTREPRENEUR” nga Finlanda, Jagoda Szelc me “TOWER. A BRIGHT DAY” nga Polonia dhe Ana Urushadze me “SCARY MOTHER”nga Gjeorgjia./ KultPlus.com

“Martesa”, filmi i Blerta Zeqirit me premierë edhe në Turqi

Filmi i metrazhit të gjatë “Martesa” me regjisore Blerta Zeqirin do të ketë premierën turke gjatë muajit prill në Instambul Film Festival, në Turqi, shkruan KultPlus.

Filmi “Martesa”, që u përkrah financiarisht nga Qendra Kinematografike e Kosovës (QKK), flet për një trekëndësh dashurie pranë dhe gjatë një martese. Treshen e personazheve kryesore të filmit me skenar të Blerta Zeqirit dhe Keka Kreshnik Berishës e interpretojnë Alban Ukaj, Adriana Matoshi dhe Genc Salihu. E gjithë ngjarja shtjellohet, para dhe gjatë martesës së Bekimit me Anitën, e cila nuk është në dijeni se Bekimi është ende në dashuri me shokun e tij më të mirë, Nolin.

Ngjarja prekë kohën e luftës në Kosovë, atëherë kur dy të rinj, Bekimi dhe Noli jetojnë brenda një ndërtese, ku edhe fillojnë të ndjejnë shenjat e para të dashurisë për njëri-tjetrin. Shumë vite më pas, luftën më të madhe do ta kenë me barrierat e kësaj dashurie.

Anita, është vajzë e një familjeje të të zhdukurve gjatë luftës. Martesën e çiftit, me mjaft emocion e pret familja e Bekimit, por jo dhe ai vet. Madje rrjedha e ndjenjave të tij, vjen e komplikohet me kthimin e Nolit, i cili është muzikant. Ai në Prishtinë vjen pas disa vitesh jetë në Francë.

Ata të cilët dëshirojnë që të shohin filmin në kuadër të këtij festivali duhet që të blejnë biletat në faqen e festivalit. Ky film do të shfaqet gjatë muajit prill, më 14, 15 dhe 17 Prill. / KultPlus.com

Shitja e biletave për premierën e filmit “Martesa”, tejkalon edhe premierat botërore në Cineplexx

Kinemaja Cineplexx Kosova, ka njoftuar mbrëmë se për premierën e filmit “Martesa” të regjisores Blerta Zeqirit, janë shitur të gjitha biletat, duke tejkaluar kështu edhe premierat botërore si Maze Runner dhe Den of Thieve, shkruan KultPlus.

Në këtë film që shtjellohet dashuria nëpërmjet një trekëndëshi, me rolet e tyre luajnë aktorët: Adriana Matoshi, Alban Ukaj e Genc Salihu. E gjithë ngjarja shtjellohet, para dhe gjatë martesës së Bekimit me Anitën, e cila nuk është në dijeni se Bekimi është ende në dashuri me shokun e tij më të mirë Nolin.
Të gjithë ata që duan ta shohin këtë film, tashmë ky film çdo mbrëmje do të jetë pjesë e repertorit të Cineplexx në Prishtinë në dy orare prej 19:20 dhe 22:30. Po ashtu premiera e këtij filmi mbrëmë u prezantua edhe në Dokukino në Prizren. Sonte ky film do të jepet premierën në Tiranë, në kinemanë Milenium./KultPlus.com

Kosova gjatë vitit 2017 ishte e pranishme në 5 festivale të kategorisë ‘A’

Filmat e mbështetur nga QKK, ndër vite kanë pasur suksese të shumta në festivale ndërkombëtare, duke qenë të pranishme edhe në shumë festivale të kategorisë ‘A’.

Vetëm brenda këtij viti filmat kosovar kanë pasur premierë në 5 festivale të kategorisë ‘A’, gjë që shënon suksesin më të madh deri më tani.

Duke filluar me filmin ‘T’padashtun’ nga Edon Rizvanolli i cili u dha premierë në Karlovy Vary International Film Festival dhe në International Film Festival në Indi Goa, pastaj filmi ‘Rooftop Story’ nga Gazmend Nela i cili pati premierën në Montreal World Film Festival, filmi shkurtër ‘Një Muaj’ nga Zgjim Terziqi që u shfaq premierë në Cairo International Film Festival si dhe filmi i metrazhit të gjatë ‘Martesa’ nga Blerta Zeqiri që pati premierën në Tallinn Black Nights Film Festival, gjithashtu festival i kategorisë ‘A’, nga ku triumfoi me dy çmime, çmimi i kritikës ‘Fipresci Award’ si dhe çmimi special për ansamblin më të mirë të aktorëve.


Këta filma përveç premierës u shfaqen edhe në festivale tjera ndërkombëtare, pa lënë anash edhe filmat e vitit 2016, të cilët vazhduan shfaqjen në festivale të ndryshme si: filmi ‘Home Sweet Home’ nga Faton Bajraktari, ‘Eho’ nga Dren Zherka, ‘Home’ nga More Raça etj./KultPlus.com

“Martesa” e Blerta Zeqirit me premierë në Kosovë

Filmi artistik i metrazhit të gjatë “Martesa” me regji të Blerta Zeqirit tashmë ka shijuar suksesin e premierës botërore, film i cili në festivalin “Tallin Black Nighs Film Festival” ka marë çmimin e kritikës dhe atë të ansamblit të aktorëve, shkruan KultPlus.

Dhe pas këtij suksesi, ky film është duke shqyrtuar rrugëtimin e mëtejmë të prezantimit të këtij filmi edhe nëpër festivale të tjera, por edhe të prezantimit të filmit nëpër kinema.
Blerta Zeqiri, regjisorja e filmit ka thënë për KultPlus se filmi “Martesa” do të prezantohet edhe në Kosovë, dhe mbrëmja e parë kur do të prezantohet ky film është një shkurti. Ajo ka treguar se filmi do të prezantohet në Cineplexx.

‘Martesa’ flet për një trekëndësh dashurie pranë dhe gjatë një martese, trekëndësh ky problematik dhe një diskutim më i thellë i tabuve të pranishme në plot shoqëri, ku rolet kryesore interpretohen nga: Alban Ukaj, Adriana Matoshi dhe Genc Salihu./KultPlus.com

“Martesa” dha premierën botërore në PÖFF | Tallinn Black Nights Film Festival

Filmi ‘Martesa’ nga Blerta Zeqiri u dha premierë botërore dje, 28 nëntor, në festivalin e mirënjohur të kategorisë ‘A’ – PÖFF | Tallinn Black Nights Film Festival. Filmi u mirëprit dhe pati komente shumë pozitive nga audienca, mediat dhe kritikët.

‘Martesa’ flet për një trekëndësh dashurie pranë dhe gjatë një martese, trekëndësh ky problematik dhe një diskutim më i thellë i tabuve të pranishme në plot shoqëri, ku rolet kryesore interpretohen nga: Alban Ukaj, Adriana Matoshi dhe Genc Salihu.

Në Tallinn, përkatësisht në festival po qëndrojnë ekipa e ngushtë e filmit, regjisorja Blerta Zeqiri, producenti Keka Kreshnik Berisha, aktorët Alban Ukaj dhe Genc Salihu si dhe drejtori i QKK-së Arben Zharku.

Rreth premierës regjisorja Blerta Zeqiri u shpreh: “Jam shumë e lumtur, pasi që filmi u prit jashtëzakonisht mirë nga publiku dhe e pati një sesion të gjatë dhe shumë të mirë të pyetje-përgjgjeve pas filmit. Gjithashtu, ‘Martesa’ ishte një prej tre filmave të rekomanduar në mediat estoneze për ditën e djeshme, kështu që presim pjesëmarrje të mirë të publikut edhe në shfaqjen e dytë.”

‘‘Martesa’ do të shfaqet edhe sot, 29 nëntor, në ora 20:30 dhe me datë 3 dhjetor në qytetin Tartu të Estonisë.

Filmi pritet të jepet premierë kosovare në fillim të muajit shkurt të vitit 2018 dhe është i mbështetur nga Qendra Kinematografike e Kosovës, Qendra Kombëtare e Kinematografisë së Shqipërisë me producent Keka Kreshnik Berisha dhe koproducent Eno Milkani./ KultPlus.com

Blerta Zeqiri: Filmi “Martesa”, filmi më i mirë që kam realizuar deri tani (FOTO/VIDEO)

Ekipi i filmit “Martesa” me skenar dhe regji të Blerta Zeqirit, me aktorët: Adriana Matoshi, Alban Ukaj e Genc Salihu në rolet kryesore janë në ethet e premirës së këtij filmi, që pikërisht në ditën e flamurit ka premierën në një festival shumë prestigjioz në Estoni. Në një intervistë për KultPlus, pikërisht para nisjes në Estoni, regjisorja Blerta Zeqiri ka treguar për pritjet që ka për këtë film. Për këtë film që ka guxuar të prekë për herë të parë një temë mjaftë të ndjeshme, atë të dashurisë në mes gjinisë së njëjtë, Zeqiri ka thënë se pret të hapë debat në shoqërinë kosovare, dhe pikërisht premiera në Prishtinë, sipas saj i jep ethe më shumë se sa paraqitjet jashtë vendit. Për filmin “Martesa”, sa i përket lojës së aktorëve, skenarit, regjisë, fotografisë dhe shumë elementeve të tjera që përbëjnë realizimin e filmit, ajo ka thënë ta ketë zemrën plot, pasi që realizimi i filmit ka tejkaluar edhe pritjet e saj.

Ardianë Pajaziti

KultPlus: Tashmë jeni në ethet e premierës së filmit “Martesa” që do të prezantohet më 28 nëntor në festivalin e kategorisë A në Estoni, një pritje e gjatë, por duket të jetë një pritje e suksesshme, me çfarë emocioni jeni duke e kaluar këtë periudhë?
Blerta Zeqiri:
Tani po bëhen 5 vite prej kur kemi filluar punën në këtë film. Ka qenë punë e gjatë, shumë sfiduese, herë herë e lodhshme, por gjithnjë me shumë dashuri e entuziazëm, sepse kemi pasur një ekip të mrekullueshëm. Jam shumë e gëzuar që më në fund do ta japim premierën e filmit dhe e pres me padurim ta shoh nëse ky film do të komunikojë edhe me publikun, ashtu siç ka komunikuar edhe me profesionistët e idustrisë së filmit, sepse shpesh një film mund të pëlqehet nga industria, por jo edhe nga publiku. Jam duke i numëruar ditët deri në premierë.

KultPlus: Është filmi i parë kosovarë që ka guxuar të prekë një temë më të ndjeshme, sikurse është dashuria në gjininë e njëjtë, dhe zakonisht këto tema shumë shpesh janë përcjellë me zhurmë, je e përgatitur për këtë “zhurmë”?
Blerta Zeqiri:
Prej momentit kur kemi filluar punën në këtë film, e kemi diskutuar gjithmonë këtë çështje. Kemi folur edhe për zhurmën që do ta bëj ky film tek ne. Unë kam dëshirë shumë që filmi të shikohet dhe të hapë debat në shoqëri. Kohët e fundit kam parë shumë projekte artistike që kanë trajtuar këtë temë dhe nuk kanë shkaktuar skandale. E kam ndjenjën se në Kosovë ka ndodhur një lloj përparimi sa i përket të drejtave të komunitetit LGBTIQ- natyrisht ende jo aq sa duhet – por mjaftueshëm sa projektet artistike të kuptohen dhe të trajtohen si të tilla.

KultPlus:Filmi është një ndërlidhje: skenar, regji, aktorët, fotografia dhe shumë elemente të tjera, megjithatë, cilën e konsideroni si pikën më të fortë të këtij projekti?
Blerta Zeqiri:
Mendoj se natyrshmëria e lojës së aktorëve është ajo që më së shumti karakterizon punën time dhe më së shpeshti ndjehem krenare me lojën e aktorëve në film. Kësaj radhe është hera e parë që përveç aktrimit, në film ndjehem krenare për të gjitha elementet e filmit: çdo element i dizajnit të produkcionit (udhëhequr nga Lendita Zeqiraj), ka qenë jashtëzakonisht mirë i punuar, si skenografia (Burim dhe Blendina Arifi), kostumet (Yllka Brada), grimi(Leonora Mehmeti), ndaj dhe kemi arritur të kemi një fotografi shumë të bukur të drejtuar nga syri i Sevdije Kastratit.
Montazhin në film e ka punuar Keka Kreshnik Berisha dhe është kjo një montazhë shumë fluide e cila e ngrit lart punën e aktorëve duke e arritur që të bëj filmin të duket shumë i vërtetë.
Kolonën zanore gjithashtu e kemi të mrekullueshme: kemi këngë shumë të bukura që i interpretojnë aktorët kryesorë të filmit (Genc Salihu dhe Alban Ukaj), kemi muzikën popullore nga grupi Melodia e Vjetër me solisten e mrekullueshme Nezafete Shala. Zëri i filmit (Pëllumb Ballata) është i punuar për mrekulli. Kemi këngë nga artistë të ndryshëm kosovarë, si Shpat Deda, Nesim Maxhuni, Armend Xhaferi, Labinot Sponca, Bicalko e Iliros. Thjeshtë secili ka bërë punën e tij me përkushtim dhe kjo shihet në rezultatin final të filmit.

KultPlus: Ju pastaj keni rrezikuar në përzgedhje të aktorëve, duke përfshirë edhe jo profesionistë, sikurse është rasti me Genc Salihun, pse besove kaq shumë te Genci?
Blerta Zeqiri:
Performancat e Gencit gjithmonë i kam përcjellur, sepse është i mrekullueshëm kur është para publikut: këndon, folë, imiton, luan, të gjitha i bën pa pikën e kompleksit, ndaj dhe kam qenë e sigurt se do t’ia del edhe kësaj sfide. Gëzohem shumë që nuk kam gabuar, sepse Genci ka realizuar një performancë të mrekullueshme në film.

KultPlus: Në anën tjetër, rolet kryesore në këtë film vijnë nga aktorët më të treguar të periudhës së fundit, sikurse është Adriana Matoshi e Alban Ukaj, sa keni nxjerrë ndryshe këta aktorë, duke pasë parasysh se tashmë kanë pasë shumë role?
Blerta Zeqiri:
Albani e Adriana janë aktorë të përkryer. Jam shumë e lumtur që kanë qenë pjesë e projektit që nga fillimi (viti 2012). Kisha pasur shumë dëshirë t’i falenderoj publikisht, sidomos Albanin, me të cilin nuk kam punuar asnjëherë më parë, për besimin që ka pasur në mua dhe që ka pranuar të bëhet pjesë e projektit ende pa u shkruar skenari, atëherë kur filmi ka qenë vetëm një sinopsis. Zakonisht draftet e para të skenarit nuk janë edhe aq të mira dhe unë jam frikësuar shumë se Albani me të cilin nuk kisha punuar më herët, nuk do të qëndroj në projekt. Por, fatmirësisht që të tretë kanë qëndruar në projekt dhe bile kanë kontribuar në punën e skenarit, sepse pas çdo drafti të rëndësishëm kemi bërë punëtori, ku e kemi lexuar skenarin, kemi diskutuar për karakteret, aktorët kanë bërë improvizime të skenave të ndryshme dhe këto prova i kemi xhiruar, pastaj kemi inkuadruar gjëra nga provat në skenarin final. Aktorët, kanë arritur të mishërohen aq shumë me personazhet e tyre në film, sa që ata për mua në film janë Bekimi, Anita dhe Noli.

KultPlus: Personalisht, si skenariste dhe regjisore e keni zemrën plot me nxjerrjen e këtij rrëfimi?
Blerta Zeqiri:
Unë e kam përshtypjen se ky film është filmi më i mirë që unë kam punuar deri më tani. Ndoshta nuk do të pëlqehet nga të gjithë për shkak të temës që trajton, porse si realizim, unë mendoj se është puna më e mirë e imja deri më tani. Po. Zemrën e kam plot. Gjithmonë ka mundësi që diçka të jetë edhe më mirë, porse ky film i ka tejkaluar pritjet e mia dhe ndjehem krenare për realizimin e tij.

KultPlus: Filma me tema të tilla kanë përfunduar si filma shumë te suksesshëm, po guxon të mendosh për një sukses të tillë?
Blerta Zeqiri:
Filma që kanë trajtuar këtë temë kanë qenë shumë të suksesshëm në botë viteve të fundit. Nganjëherë kam frikë se kjo temë për botë nuk është shumë interesante, sepse ata i kanë trajtuar këto tema shumë. Porse, gjithsesi do të jetë një film i rëndësishëm për ne në Kosovë dhe ndoshta në rajon. Por tani filmi do të ketë premierën në Tallinn Black Nights dhe kjo më gëzon, sepse e shoh mundësinë e një suksesi edhe ndërkombëtar.

KultPlus: Filmi më pas do të prezantohet në dhjetor edhe në Kosovë, cila audiencë të jep ethe më shumë, ajo e Estonisë apo e Prishtinës?
Blerta Zeqiri:
Së shpejti do ta lajmërojmë edhe datën e premierës në Kosovë. Mua definitivisht gjithmonë më japin ethe paraqitjet në Kosovë, sepse kam dëshirë që filmi të përjetohet si i vërtetë dhe audienca të harrojë se është duke shikuar film dhe të zhytet brenda rrëfimit. Audienca jonë më së miri e gjykon këtë, ndaj dhe reagimi i publikut tonë është shumë i rëndësishëm për mua.

KultPlus: Keni marë ndonjë konfirmim për ndonjë prezantim tjetër?
Blerta Zeqiri:
Së pari do të shfaqet filmi në festival, pastaj nuk besoj se do të mungojnë edhe prezantimet tjera, porse të gjitha do të vijnë pas premierës.

KultPlus: Dhe për fund, ju jeni regjisore e shperblimeve me filma të metrazhit të shkurtë, mendon se jeni prej atyre regjisoreve që jeni e bërë vetëm për çmime?
Blerta Zeqiri:
Hahahahah. Si me u përgjigj në këtë pyetje? Po e marr si kompliment, faleminderit Ardianë!
Po provoj të përgjigjem disi: Unë i bëj filmat sipas vizionit tim dhe fatmirësisht deri më tash ky vizion më është shpërblyer. Por bota e filmit të gjatë është krejt tjetër dhe nuk e kam as edhe ndjenën më të vogël se si do të shkojë puna me këtë film. Besoj se do ta përcjellim bashkarisht jetën e këtij filmi./KultPlus.com

Lansohet traileri i filmit “Martesa” i regjisores Blerta Zeqiri (VIDEO)

Filmi artistik i metrazhit të gjatë “Martesa” me regji të Blerta Zeqirit tashmë ka publikuar trailerin zyrtar, shkruan KultPlus.

Në këtë film që shtjellohet dashuria nëpërmjet një trekëndëshi, me rolet e tyre luajnë aktorët: Adriana Matoshi, Alban Ukaj e Genc Salihu.

Bekimi dhe Anita gjenden në një ngjarje të dhimbshme ku janë gjetur mbetje nga varrezat masive. Prindërit e Anitës janë të zhdukur, dhe çifti është gati për martesë. Çifti, i kthyer në Prishtinë, e takon Nolin, muzikantin që jeton në Francë. Ai ka qenë shoku i ngushtë i Bekimit, ndërsa ata nuk e kanë parë njëri-tjetrin për dy vite” shkruhet mes tjerash në kritikën e Vassilis Economou.

Ndërkaq, ky film ka premierën botërore më 28 nëntor në Estoni, në festival të kategorisë A.
Përndryshe, ky është filmi i parë i metrazhit të gjatë për regjisoren Blerta Zeqiri./KultPlus.com

Matoshi: Do të luaj në një film gjigant (FOTO)

Adriana Matoshi është një prej aktoreve që është duke u piketuar më së shumti prej regjisorëve kosovarë, dhe gjithnjë duke ia besuar rolet kryesore. Filmat “T’padashtun”, me regji të Edon Rizvanollit dhe “Martesa”, me regji të Blerta Zeqirit janë dy filmat e fundit që do të rrugëtojnë nëpër botë, që imazhi kryesor i këtyre filmave është vetë Matoshi. Në një intervistë për KultPlus, vetë Adriana Matoshi ka treguar për ndjesinë e lajmeve të fundit, ku “T’padashtun”, tashmë është propozuar nga Kosova për çmimin prestigjioz Oscar, sikurse “Martesa”, që do të ketë premierën botërore në festivalin e kategorisë A, në Estoni. Ajo ka treguar se për realizim të roleve jep shpirtin, sikurse që është shprehur të jetë e kënaqur pasi që, deri më tashti ka punuar më regjisorët më të njohur të vendit. Poashtu, Adriana Matoshi ka folur edhe për filmin e radhës që do të xhirohet në pranverë, sipas të cilës, do të jetë një film gjigant.

Ardianë Pajaziti

KultPlus: “T’padashtun”, është filmi që po synon Oscarin për këtë vit, dhe pikërisht në këtë film luani rolin kryesor, si e pritët lajmin?
Adriana Matoshi:
Si proces i punës nuk ka qenë i gjatë, as një muaj xhirim. Ka qenë një proces mjaftë i vështirë, por që kemi dhënë maksimumin. Po është e çuditshme që gjatë procesit të punës nuk mendoj gjëra të mëdha, ajo çfarë mendoj përgjatë xhirimeve është si të realizohen skenat, si të jenë të besueshme, por asnjëherë për suksesin. Në realizim të rolit të “T’padashtun”, sfidë ka qenë si me i dhënë shpirtë karakterit tim, dhe mendoj që ia kam dalë. Kur e mora lajmin që Kosova e ka selektuar po këtë film për Oscar, natyrisht është një ndjenjë që të bën të ndihesh krenare, por që jep edhe motiv për punën e së ardhmes. Unë mendoj që është shumë e rëndësishme që filmi ka me u pa prej shumë profesionistëve, dhe me prezantimin e këtij filmi, producentë, regjisorë, njerëz të filmit do të njoftohen për së afërmi edhe me vuajtjet e popullit shqiptar, me dhunimet që kanë bërë serbët në gratë e Kosovës dhe me shumë ndjesi të tjera. Po uroj që ky film të kthej vëmendjen ka Kosova, e sa i përket asaj se a do të nominohemi apo jo, është herët të paragjykojmë.

KultPlus: Përpos filmit “T’padashtun”, që po synon Oscarin, këto ditë sa është bërë e ditur se edhe filmi “Martesa”, do të ketë premierën botërore në një prej festivaleve të rëndësishme në botë, poashtu keni rol kryesor në këtë film, e pritje edhe këtë lajm kaq të rëndësishëm për karrierën tuja?
Adriana Matoshi:
E sa i përket filmit “Martesa”, është një proces shumë i gjatë, ndoshta pesë vjet. Bëhet fjalë për një trekëndësh dashurie, por që prekë edhe temën e luftës. Kemi bërë një punë shumë të mirë. Është temë pak tabu sa i përket asaj që e kemi trajtuar në film, por e di që është një film jashtëzakonisht i mirë. Premierën botërore e kemi në një festival të kategorisë A, pikërisht më 28 nëntor, në festën e flamurit ne do të jemi në Estoni, do të shohim më pas se çfarë po na pret. E më pas, ky film do të jepet edhe Cineplexx në Prishtinë, përgjatë muajit dhjetor.

KultPlus: Filmat mund të jenë edhe të suksesshëm, por ndodhë që aktori të mos jetë i kënaqur me rolet, me temën, personalisht sa je e plotësuar me këto dy role?
Adriana Matoshi:
Jam shumë e kënaqur, në të dy filmat rolet e mia flasin shumë, kam pas hapësirë të mjaftueshme që të tregoj veten në anën dramatike, dhe mendoj se dallojnë goxha prej filmave të tjerë. Jam e kënaqur me punën që e bëj, falë talentit por edhe punës, sepse nuk e kursej veten në asnjë moment. Kam pas fatin të bashkëpunoj me regjisorët më të mirë të vendit edhe ata më ngritën në nivelin më të lartë.

KultPlus: Pasi jemi te këta dy filmat e fundit, do të veçoje ndonjërin rol pak më shumë?
Adriana Matoshi:
Kur kemi xhiruar filmin “Martesa”, kjo ka ndodhë para dy viteve, pas tre dite menjëherë kanë filluar xhirimet te “T’padashtun”, më është dashur që nga një rol të kaloj në rolin tjetër dhe kjo ka qenë shumë sfiduese për mua. Prej një karakteri shumë të dashur që e kam pas te filmi “Martesa”, me një temë të dashurisë, më është dashtë të kaloj në një dramë të thellë psikologjike, në një grua që e rritë një djalë që e ka lindë si pasojë e dhunimit nga ana e serbëve. Por të dy rolet kanë specifikat e veta, dhe për të dy rolet kam dhënë shpirtin tim, kështu është e vështirë ti ndaj.

KultPlus: Të dy filmat kanë temë të ndjeshme, sa hezitoni për role të tilla?
Adriana Matoshi:
Fillimisht kur unë e lexoj skenarin e shoh nëse mundem të jap apo prej vetës. Ka pas rast kur një regjisor më ka ofruar një rol për një film, pasi regjisori më ka parë për atë rol, por pasi kam lexuar skenarin unë e kam parë vetën që nuk jam për atë rol dhe e kam refuzuar. Sepse, kam parë që nuk më ka shkuar ai rol, nuk kam qejf të realizoj një rol që nuk ma do shpirti.

KultPlus: Ju jeni një ndër aktoret që keni marrë shumë role kryesore në filmat e fundit që janë realizuar në Kosovë, qoftë këta që tashmë po prezantohen, por edhe filma që janë në proces e sipër, si po arrin ti bindësh regjisorët se ju jeni e duhura?
Adriana Matoshi:
Fillimisht unë kam luajtur në një film të shkurtë te Blerta Zeqiri, dhe ai film ka qenë një vulë që kam arritë të japë më të mirën në atë film. Pastaj edhe më thonë që jam tepër e natyrshme, nuk aktroj, që kjo është shumë e rëndësishme për një aktor të filmit. Nuk rrej për atë çfarë bëj. Nëse ndalemi në jetën tonë, ne si njerëz çdo ditë e bëjmë nga një film, si persona që jetojmë përditshmërinë, dhe pikërisht ky film i duhet vetë filmit. Mua më kanë thënë shumë se më do kamera dhe nuk rrej në kamerë. Por unë jam edhe prej atyre aktoreve që nuk hezitoj të shkoj në audicione.
Kam dëgjuar shumë shpesh që disa aktorë që e vlerësojnë vetën nuk dëshirojnë të jenë pjesë e audicioneve, me idenë e tyre se janë të famshëm, unë nuk mendoj ashtu, audicionet bëhen për aktorë dhe duhet të respektohen nga aktorët.
Pastaj, unë mendoj që kam të gjitha predispozitat që janë favor për një aktore, unë jam nënë, i di ndjenjat e një fëmiu, dhe përvoja e të qenit nënë natyrisht është edhe një pasuri që mund të gërshetohet për mrekulli me profesionin e një aktoreje, por është edhe tjetra se mua jeta më ka sprovuar shumë, dhe krejt këto përvoja natyrisht që mund të ndikojnë edhe në pjesën emotive, kjo përvojë jetësore më ka shërbyer që karakteret e mia të ndërtohen natyrshëm, si në lot, por edhe në gëzime. Dhe pikërisht si rezultat i punës sime, unë në pranverën e vitit të ardhshëm do të jem pjesë e një filmi gjigant, lirisht mund ta quaj ashtu.

KultPlus: Në anën tjetër, gjithë ky sukses nëpër filma të ndryshëm ju i shtuat angazhimeve tuaja edhe me rolin tuaj në serialin “O sa mirë”, pse tu desht seriali?
Adriana Matoshi:
Isha në një periudhë kur kisha nevojë të bëj dicka tjetër, të dalë pak prej roleve të rënda. Seriali më ka ndihmuar që të më njeh edhe një pjesë tjetër e popullit që nuk kanë mundësi me i pa filmat e mi, sepse ata filma jepen kryesisht nëpër festivale. Shfaqjet që i kam pas për dhjetë vjet nëpër teatro, është një pjesë shumë e vogël që i përcjellë, dhe pikërisht ky serial më ka bërë që të prekë një pjesë tjetër të audiencës. Në serial jam tepër e kënaqur, sepse audienca po ma kthen punën time me dashuri, e për me të dashtë sot dikush është goxha problem, dhe jam shumë e lumtur kur shoh reagimin e tyre kur më takojnë.

KultPlus: Dhe për fund, duke pasë parasysh se filmat në të cilët keni luajtur do të prezantohen në shumë shtete, sa beson që po këto role mund të sjellin ndonjë rol të madh në ndonjë projekt të huaj?
Adriana Matoshi:
Jetës kurrë nuk i dihet, pas filmit Babai kam pasë raste që të huajt veç më kanë piketuar, kurse në filmat e ardhshëm jam fytyrë kyçe dhe kam pas hapësirë që të tregoj vetën.
Unë nuk e parashoh të ardhmen time, por unë besoj në punën time, por nëse ndodhë ndonjë mrekulli me qenë pjesë e një filmit huaj, unë e di sigurt që nuk kam me i zhgënjyer. Unë kur jam në rol, harroj që jam edhe nënë, definitivisht harroj, falë mamit tim që është kujdes për fëmijët e mi. Nëse luaj në një film të huaj nuk kam me zhgënjyer as vetën, as familjen e as popullin e Kosovës./KultPlus.com

Katër rolet e mëdha të Adriana Matoshit

Ata që pëlqejnë filmat shqiptarë, e njohin mirë Adriana Matoshin dhe shkëlqimin e saj në shumë prej filmave me regjisorë shqiptarë.

Një ndër aktoret që me disa vite bagazh prapa saj vazhdon të shkëlqejë në role artistike, Adriana Matoshi gjithmonë vjen e freskët dhe e mishëruar brenda artit që veç ajo di ta sjellë.
Shembull, roli në filmin “Kthimi” nga Blerta Zeqiri e sjellë një Adrianë gati gati histerike, një grua që nga e qeshura kthehet në pak sekonda në vajtim, kur burri i saj merr vesh se ajo ka një fëmijë me dikë tjetër. Një histori lufte, ku Adriana futet brenda në rol dhe afër aktorit Lulzim Bucolli është një grua që nuk dorëzohet. Me Adrianën filmi arriti suksese të mëdha, në Sarajevë dhe më pas në Sundance Film Festival, dhe kjo tregon për mjeshtërinë e kësaj aktoreje.

 

Një rol tjetër i Adrianës, e ku ajo jep maksimumin e saj është roli i Valentinës tek filmi “Babai” me regji nga Visar Morina. Një film i prekshëm për historinë e një djali dhe babait të tij, ku Adriana sjellë emocionin e saj. Adriana udhëtoi për në Karlovy Vary me suksesin që arriti ky film.

Dhe Adriana është fantastike edhe në shfaqje. Shfaqja “Zemër e huaj” e bashkon atë me aktorë të tjerë të kalibrit të saj, për një shfaqje që vjen si traktat kundër shoqërive të dobëta të Ballkanit, dhe jo vetëm. Problemet me viza i ka pasur edhe vetë Adriana, dhe brenda kësaj shfaqjeje që niset me përvoja personale ka ditur të mbushë skenën e teatrit. Cinizëm, humor, fjalë të pista, luftë kundër burokracisë, të gjitha i përkthekon Adriana në këtë rol.

Me shfaqjen “Mësimi” nga Bekim Lumi para disa vitesh Adriana Matoshi udhëtoi për në Itali e më pas për në Lugano, e këtu morri edhe çmim për shfaqjen më të mirë. Shfaqjen e blenë më pas italianët. Adriana luan rolin e një 12 vjeçareje, e vetë thotë se ka qenë vështirë të portretizojë dikë të kësaj moshe. Shfaqja është lojë fizike, ku ajo në fund mbytet dhe dhunohet. / KultPlus.com