Përmbledhja e tregimeve ‘Richard Gere ka qenë këtu’ përmbyllë edicionin e shtatë të ‘Mirëdita, Dobar Dan’

Suada Qorraj

‘Richard Gere ka qenë këtu’, përmbledhja e tregimeve të shkurta nga Tristan Halilaj, që lidhshmërinë e vetme mes tyre kanë aktorin amerikan, Richard Gere. Ndonëse i shkruan në anglisht dhe i përkthyer vetëm në gjuhën serbe, fragmente të këtij libri u lexuan mbrëmë në Qendrën për Dekontaminim Kulturor, shkruan KultPlus.

Autori i librit Tristan Halilaj ka thënë se tregimet që ndonëse të bëra bashkë mund të lexohen edhe si të ndara nga tërësia e këtij libri.

“Ky libër është një përmbledhje e tregimeve të shkutra që i kam shkruajtur, nuk kanë një lidhje të domosdoshme të tëra bashkë, thjesht mund të lexohen edhe jo të lidhura me njëra tjetrën”

Ndërkaq për përkthyesin e këtij libri në gjuhën shqipe, Dejan Ilić, në momentin e parë që kishte parë Tristanin duke lexuar karakteret e tij nga fletorja e vogël, ka menduar se është e nevojshme të përkthehet.

“Në momentin kur e kam parë Tristanin duke lexuar prej fletores së vogël të tij ka qenë diçka e mrekullueshme, i kemi parë se si i ka lexuar karakteret e tij dhe përmes aktrimit të tij dhe në këtë moment kemi menduar që është diçka që duhet të lexohet dhe përkthehet”, tha Ilić.

Tristan Halilaj ka lindur në Shkodër, Shqipëri, në vitin 1992.

Ai ka studiuar aktrim në Maqedoninë e Veriut; sot ai jeton në Kosovë. Ai ka luajtur në disa filma dhe shfaqje. Ai ishte pjesëmarrës në kampuset e talenteve për filmbërësit e rinj të Festivaleve të Filmit në Berlin dhe Sarajevë.‘Richard Gere’ e Tristan Halilaj mbylli natën e fundit të edicionit të shtatë të ‘Mirëdita, dobar dan’.

Ndër të tjera është bërë e ditur se edicioni i vitit të ardhshëm të ‘Mirëdita, Dobar Dan’ do të mbahet në Prishtinë./ KultPlus.com

Frymëzohet nga studentët, aktori denoncon rastin korruptiv te Akademia e Arteve

Protesta disa ditore studentore ka frymëzuar të gjithë shqiptarët, t’i mbështesin ose të tregojnë eksepriencat e tyre negative në universitetet shqiptare.

Aktori Tristan Haliaj ka denoncuar një rast korruptiv të vitit 2011, ku aktori Alfred Trebicka i kishte sugjeruar që të bënte kurs pregatitjeje për provimin në Akademi tek bashkëshortja e tij, Violeta Trebicka.

Tristan Halilaj shkruan:

Në përkrahje të protestës së studentëve deshta të tregoj eksperiencën teme të vitit 2011 në Akademinë e Arteve të Tiranës.

Klasën do e merrte Alfred Trebicka, profesor në akademi i cili me njihte pasi kishte punu në para-produksionin e filmit “Falja e Gjakut”. U takum disa kohë para konkursit, më shprehu lumturinë që doja të isha pjesë e Akademisë dhe më sugjeroi që të bëja një kurs përgatitjeje për materialet e konkursit të Violeta Trebicka, gruja e tij dhe po ashtu profesoreshë në Akademi. I mbajta 10 orë që kushtun 20.000 lekë. Violeta më tha që të mos tregoja që kisha mbajt kurs te ajo kur të shkoja në konkurs. Para konkursit një vajzë që konkurronte si unë më tregoi që edhe ajo kishte mbajt kurs te Violeta. As unë as ajo nuk fitum.

Dhe imagjino sikur të kishe fitu. Mbas do kohe, mbasi të kalon entuziazmi me u ba aktor, je në orë të aktrimit t’u e ndigju profen e të kujtohet që ai me gru t’vet si të babzitun mezi kanë prit që ti të kalosh ka Akademia për me te ba nji prezantim hyrës pvr se si është të jesh student i aktrimit në këtë vend dhe se si shprehja “Eshtë shumë vështirë të jesh aktor në Shqipëri”, qëndron në klasë për momentin, e ulun në karrige të profes.
#mestudentet
#tristanhalilajmjeshterimadhe

Tristan Halilaj

Fatos Berisha inskenon shfaqjen e parë për 2018-të në TKK, sjellë dramë për ‘peshqit e vegjël’

Sarandë Selimi

Pak kohë pas publikimit të katër projekteve që do të inskenohen në skenën e vogël të vogël të Teatrit Kombëtar të Kosovës, kanë nisë provat për shfaqjen “Bardh”, të autorit kroat Dubravko Mihanovic, e që në skenë do të vijë me regji të regjisorit kosovar Fatos Berisha.

Shfaqja, e cila ka filluar me prova në muajin janar, tashmë është thuajse në përfundim dhe shumë shpejt pritet të dalë para audiencës kosovare. Për të folur më shumë rreth tekstit, inskenimit, kastës së aktorëve e poashtu edhe për datën e premierës, KultPlus, sjellë një rrëfim të shkurtër më regjisorin Fatos Berisha.

“Bëhet fjalë për dramën ‘Bardh’ të autorit bashkëkohor kroat Dubravko Mihanovic. Është një dramë minimaliste, e cila më bëri përshtypje për stilin e shkrimit, dialogët dhe mënyrën e trajtimit të vet strukturës dramatike. Unë kisha lexuar më parë një dramë tjetër të tij, dhe në kontakt e sipër me autorin, më ra në duar edhe kjo dramë e tij e cila më pëlqeu shumë dhe më është dukur e përshtatshme për skenën e vogël të TKK”, tha fillimisht për KultPlus, Berisha, i cili vazhdoi tutje të tregoi për veçantitë që do të sjellë kjo shfaqje sa i përket inskenimit.

“Të them të drejtën, unë tentoj që gjithmonë të sjellë risi në projektet e mia, por kjo gjë nuk është e lehtë natyrisht. Në anën tjetër, në vazhdimësi më preokupojnë temat sociale dhe fatet e njerëzve nga margjina e shoqërisë, dhe ky tekst më ka ofruar pikërisht atë. Është një dramë për ‘peshqit e vegjël’”, tha regjisori.

Kasta e aktorëve të “Bardh” përbehët nga Shpëtim Selmani dhe Tristan Halilaj. Dy emra të aktorëve kosovar të cilët jo rrallë herë i kemi parë në shfaqjet e regjisorit Berisha.

“Me të dy aktorët kam punuar më parë në projekte tjera teatrore dhe i njoh shumë mirë. Vlerësova se personazhet e shkruara në dramë u përshtaten atyre si aktorë. Poashtu edhe ata njohin stilin dhe metodën time të punës, andaj vendimi për të punuar së bashku ishte i lehtë për të gjithë ne”, u shpreh Fatos Berisha, duke thënë tutje se janë një ekip e vogël dhe kjo ua lehtëson pak punën logjistike, megjithëse sipas tij, nga ana artistike kjo nuk përbën ndonjë lehtësi, përkundrazi.

“Si proces i punës deri tani ishte vërtet i këndshëm, në një atmosferë relaksuese që na jep të gjithëve një hapësirë të domosdoshme për punë kreative”, pohoi ai.

“Bardh” është përkthyer nga gjuha kroate nga vetë Fatos Berisha ndërkaq për skenografinë dhe kostumet është përkujdesur Arben Shala.

“Bardh”, është premiera e parë e vitit 2018-të që ngjitet në skenën e Teatrit Kombëtar të Kosovës. Premiera shfaqet më 14 shkurt ndërsa reprizat e para vijnë më 23 dhe 24 shkurt./ KultPlus.com