Teatri Kombëtar i Kosovës pas vdekjes së aktores Shirine Morina ka njoftuar se do të mbajë mbledhje komemorative, në nderim të veprës së aktores tashmë të ndjerë.
TKK po ashtu ka njoftuar se varrimi i aktores Morina do të bëhet nesër në ora 16:00, në varrezat e qytetit, në Prishtinë.
“Me dhimbje të thellë morëm lajmin e shkuarjes në amshim të aktores së Teatrit Kombëtar të Kosovës, znj. Shirine Morina.
Nesër, e hëne, 15 prill 2024, në ora 14:00 në Amfiteatrin e Teatrit Kombëtar të Kosovës, organizojmë mbledhje komemorative për të kujtuar aktoren e ndjerë.
Varrimi i të ndjerës është në ora 16:00 në varrezat e qytetit, Prishtinë”, thuhet në njoftimin e TKK/KultPlus.com
Teatri Kombëtar i Kosovës ka prezantuar progaramin për dhjetëditëshin e fundit të muajit Mars.
Programi i muajit mars në Teatrin Kombëtar të Kosovës fillon me premierën e shfaqjes “Kamarja e Turpit” dhe reprizat me 20, 21, 25 dhe 26 mars 2024.
Si shfaqje tjetër e cila do të jepet gjatë këtyre ditëve është edhe “Kopshti i hijeve” i regjisores Nastazja Domaradzka dhe “Corre o Fado” e regjisorit Daniel Cardoso./KulPlus.com
Teatri Kombëtar i Kosovës ka njoftuar se gjatë vitit 2024 do të filloj të shfaq produksionet e institucionit edhe për diasporën shqiptare, shkruan KultPlus.
TKK përmes një njoftimi ka bërë të ditur se produksionet do të shfaqen në vendet ku jeton diaspora në bashkëpunim me shoqata e organizma të ndryshme të diasporës.
“E fillojmë me ftesën e Unionit të Shqiptareve ne Republiken e Kroacisë, ku me 14 shkurt 2024 në ora 19:00 në Zagreb do të shfaqim komedinë “Club Albania”, ka njoftuar TKK./KultPlus.com
Teatri Kombëtar i Kosovës ka filluar provat e shfaqjes “Kamarja e turpit” e cila vjen me regjinë e Kushtrim Koliqit, shkruan KultPlus.
Aktorët të cilët do të luajnë në këtë shfaqje janë: Adrian Morina, Armend Smajli, Gresa Pallaska, Ylber Bardhi, Bislim Muçaj, Teuta Krasniqi, Kosovare Krasniqi, Zana Berisha, Art Pasha, Fiona Abdullahu, Florenta Bajraktari, Jehona Gashi, Redon Kika.
Stafi tjetër i shfaqjes është si në vijim:
Dramatizimi dhe adaptimi: Doruntina Basha
Ass. Regjie: Elif Bas lyibozkurt, Qëndresa Spahiu, Diellza Dedushi, Ardijana Mehmeti
Kompozitor: Adhurim Grezda
Skenograf: Bekim Korça
Kostumografe: Yllka Brada
Koreografe: Erna Salihu
Video Artist: Miran Bratush
Inspicient: Mursel Haziri
“Perandoria Osmane po dobësohet, e në sheshin kryesor të kryeqytetit të saj është vendosur kamarja e turpit, për t’i ekspozuar kokat e tradhëtarëve. Për ta ruajtur pushtetin, perandoria do të bëj çmos për të kapur kokën e Ali Pashë Tepelenës, i cili, i ngujuar në kalanë e vet, po pret përgjigje nga trojet shqiptare për të luftuar perandorinë”, është citat nga vepra e Ismail Kadare “Kamarja e turpit” premiera e së cilës pritet të jetë me 19 mars 2024./KultPlus.com
Teatri Kombëtar i Kosovës ka publikuar programin e muajit nëntor 2023, shkruan KultPlus.
Shfaqja e parë e cila do të jepet më 1 nëntor është ‘Correr o Fado” nga Baleti Kombëtar i Kosovës, përderisa shfaqja “Udhëtim i gjatë drejt natës” do të jepet më 2 dhe 3 nëntor.
Më poshtë mund të gjeni programin e plotë të Teatrit Kombëtar të Kosovës për muajin nëntor:
Sonte në Amfiteatrin e Teatrit Kombëtar të Kosovës do të jepet shfaqja “Molly”, e cila vjen me regji të Sibel Abdiut, sipas Brian Friel, që trajton përjetime të përsonave me aftësi të kufizuara, shkruan KultPlus.
Aktorët që do të marrin pjesë në këtë shfaqje janë Verona Koxha, Afrim Muçaj, Bujar Ahmeti.
Ndërsa pjesa tjetër e stafit janë:
Kompozitor: Albin Sopa
Artist vizual dhe foto: Lulzim Luigji Bejta
Inspiciente: Nazmije Krasniqi
Shfaqja do të jepet sonte në Amfiteatrin e Teatrit Kombëtar të Kosovës me fillim në ora 20:00./KultPlus.com
Akorët si: Adrian Morina, Flaka Latifi, Ylber Bardhi, Arta Selimi, Basri Lushtaku, Edona Reshitaj, Shpejtim Kastrati, Xhejlane Godanci, me lojën e tyre të paparë, kanë jetësuar mbrëmë premierën e shfaqjes “1984” që erdhi nën regjinë e regjisorit francez Igor Mendjisky. Shfaqja vjen e bazuar në romanin ikonik të autorit George Orwell, por ajo që e ka bërë këtë shfaqje të dalë përtej imagjinatës, ka qenë trajtimi i dramaturgjisë nga Zoga Çeta Çitaku, rrezatimi depërtues i esencës së veprës si dhe aktrimi i tetë personazheve thellësisht të komplikuar por edhe të thjeshtë në vetvete, shkruan KultPlus.
Pasi të pranishmit dalëngadalë zunë vendet e tyre përbrenda hapësirës së Teatrit Kombëtar të Kosovës, mu në skenë ata u vendosën ballë me aktorët që gjendeshin nëpër pozicionet e tyre përkatëse. Loja nisi fiks në orën 20:16 e së bashku me të, si rrjedhë uji u lëshua një mjegull e lehtë që u shpërnda horizontalisht në ambient, duke paralajmëruar realitetin distopik që përmban në thelb vetë vepra letrare.
Një nga një, aktorët procesojnë të prezantojnë “veten” e tyre para publikut, por tërë këtë shtjellim e tutje do ta drejtojë si një shkop magik, O’Brien (Adrian Morina), i cili me shikimet e tij tinëzake kafshon mendimet e gjithsecilit. “1984” sjellë para nesh historinë e Uinston Smith (Ylber Bardhi), djaloshi i cili tërë kohës lufton për copëza të vogla dashurie, lirie e vërtetësie si dhe Xhulias (Flaka Latifi), vajza që ipet lehtësisht pas shikimeve të para të Smithit dhe kësisoj fillojnë të lindin ndjenjat e para mes tyre. Por kjo nuk është thjeshtë një dashuri e zakonshme. Në këtë histori i përfshirë është ‘Big Brother’ i cili mendërisht dhe fizikisht, hyn brutalisht në jetën e tyre dhe përmbys gjithçka, duke krijuar kështu botën ideale të tijën, aty ku mosbesimi dhe dhuna, shkelin këmbë mbi çdo trup.
Majat e larta të intensitetit që tronditin audiencën vijnë të shoqëruara nën melodi të qëlluara nga kompozitori Trimor Dhomi dhe së bashku me reflektorët që ndërronin ngjyrat herë pas here, krijonin një ambient ku portretizohej më së miri egërsia provokative e pushtetit. Shfaqja në Kosovë ka ardhur e adaptuar për herë të parë posaçërisht për Teatrin Kombëtar të Kosovës nga regjisori francez Mendijsky dhe një bashkëpunim i tillë ka qenë tejet i nevojshëm për të shpalosur një kryevepër të tillë të përmasave botërore.
Orwelli në vepër trajton një shoqëri të kontrolluar nga një qeveri autoritare që mbikëqyr dhe kontrollon çdo aspekt të jetës së qytetarëve. Megjithatë, në interpretimin e regjisorit Mendjisky, fokusi i shfaqjes ka qenë pikërisht historia e dashurisë së çiftit protagonist, Uinston dhe Xhulia. Pas disa situatave të ndryshme, Uinston detyrohet të rrëfejë për mendimet e tij që sipas pushtetit janë jo korrekte dhe kësisoj publiku shndërrohet në dëshmitarin e heshtur të torturave nëpër të cilat kalon ai. Refuzimi i tij për të pranuar realitetin e manipuluar të Partisë, i sjell atij fundin.
Hetuesi i tij, O’Brien ka ndarë plotësisht mendjen se populli nuk do të revoltohet dhe sipas tij, ata nuk do të shikojnë nga ekranet e tyre aq gjatë sa të vërejnë se çfarë po ndodh në të vërtetë. Andaj, kërcënimet e tij ngjallin frikë të tmerrshme brenda shpirtit luftarak të Uinstonit. Mendja e tij hyn në një vijë të paqartë, derisa arrin tek një pikë ku e pyet edhe veten se a ka ekzistuar vetja e tij. Tani për të, të gjitha momentet ku ka menduar për mikrofonat e fshehtë, teleekranët, monitorët e kudogjendur, po shndërrohen në iluzione.
Fatet personale të dy personazheve kryesorë duket se përcaktohen nga vendimi i Charrington, personazhi që spiunon takimet e tyre tek Policia e Mendimit. Ngushëllimet e Uinstonit dhe Xhulias mes tyre, tanimë nuk kanë asnjë kuptim. Ferri i ashpër i dhomës 101, po i pret të dy personazhet. Edhe pse audienca sheh pasojat e përgjakshme dhe jo aktet, masakra të bënte që të dridhesh në karrige.
Po ashtu, përdorimi i guximshëm i videove e tingujve që lëshoheshin papritmas përgjatë shfaqjes e cila zgjati plot dy orë, ishin sinjalizues për një përkushtim të lartë të gjithsecilit. Në anën tjetër, skenografia nga Mentor Berisha qe diçka që ka rrëmbyer vëmendjen që në sekondat e para. E krejt kjo për të përcjellë ndjenjën e terrorit klaustrofobik të një shteti totalitar.
“1984” është një shfaqje që akoma jehon edhe sot nëpër botë. Meritat letrare të Orwell-it janë ngjallur në secilën epokë dhe çdo herë pas tyre, njeriu përbrenda vetes ka stimuluar reflektime të shumta për të kaluarën, të tashmen e të ardhmen.
Për të treguar më shumë rreth shfaqjes si dhe procesit të realizmit, për KultPlus foli regjisori Igor Mendjisky.
“Unë mendoj se kur Orwelli ka shkruar veprën ka menduar që ajo të jetë një satirë dhe më pastaj bëhet një novelë e parashikueshme. Është një çështje më universale. Kjo është hera e parë për mua që po punoj me një trupë të një shteti tjetër dhe puna me aktorët ka qenë me të vërtetë një aventurë e paparë. Bashkëpunimi me TKK-në ka qenë fantastike. Ajo se çfarë më pëlqen shumë nga shfaqja është mënyra e adaptimit që kam bërë unë. Pra, vendosa historinë e dashurisë në qendër të vëmendjes dhe fundi i shfaqjes asisoj është bërë më i rrezikshëm dhe më i stuhishëm. Mendoj se aktorët këtu kanë diçka brenda tyre për ta luajtur këtë shfaqje. Nuk e di saktësisht se çka, apo nëse lidhet me situatën e shtetit, por e ndjej se ka diçka në trupin e tyre.”
Ndërsa, aktori Adrian Morina i cili erdhi në dy role të ndryshme në skenë, për KultPlus ka folur për hezitimin e tij fillimisht nga roli, e pastaj deri tek arritja e finalizimit të shfaqjes në një kohë prej tridhjetë ditësh.
“Në konceptin e këtij dramatizimi, personazhi im i tërheqë të gjitha levat por vjen deri tek pjesa që tregon pushtetin e tij, në një mënyrë gati të pavërejtur. Natyrisht, është një rol negativ, ndonëse mu kanë bërë të shpeshta, më pëlqejnë për shkak se të japin mundësi për kreativitet në interpretim. Jam shumë i lumtur me krejt punën që e kemi bërë. Është një kryevepër e letërsisë dhe ka marr kohë deri në kuptimin e qasjes regjisoriale. Nuk e besoj që e ka inskenu dikush në këtë mënyrë më herët. Nëpërmjet një historie dashurie, është pruar edhe diktatura, natyrisht me një intervenim të vogël artistik që e bën regjisori në fund të shfaqjes, duke i ringjallë personazhet dhe duke jep kështu një dritare shprese për të ardhmen.
Procesi ka qenë tepër i shkurtë për shkak të datave të regjisorit, duke marrë parasysh se ai është një nga regjisorët më të mirë në Francë sa i përket gjeneratës së re. Roli ka qenë sfidues e sidomos ai i narratorit, në të cilin nuk ke shumë mundësi si aktor për të luajtur dhe dialogon me vetveten dhe publikun. Ka qenë e vështirë mënyra poetike e tekstit, andaj edhe kam pasur frikë shumë. Është çmenduri për të realizuar shfaqjen në një kohë kaq të shkurtër por e kemi ndje në çka jemi futur dhe për çka po punojmë. Sonte u dëshmua ajo se kur e bën një shfaqje të mirë, vërehet edhe tek njerëzit, ndaj të cilëve shihej një mungesë për të parë diçka të gjallë, për të parë një botë magjike që po na mungon neve. Ky tekst për neve, duket më i qëlluar sepse ne kemi çka të dhurojmë nga shpirti jonë.
Pas gjithë kësaj shfaqje, unë kam dalë si një njeri më i mirë.”
Ndërkaq, reprizat e shfaqjes ”1984” do të vijnë me datat: 5, 6, 7, 24 dhe 25 tetor. / KultPlus.com
“Skena i ka dy rregulla: Gjithçka mund të ndodh dhe diçka duhet të ndodh” është një shprehje e Peter Brook, me të cilën drejtori i Teatrit Kombëtar të Kosovës Kushtrim Sheremeti, ka të bëj me dije se TKK është në vlugun e punës sa i përketë projekteve dhe prurjeve të reja, para audiencës, për periudhën e mbetur deri në fund të vitit, shkruan KultPlus.
Për tre shfaqje, të cilat do të shfaqen premierë veçse kanë filluar provat. Në Opole të Polonisë, që nga java e kaluar kanë filluar provat për shfaqjen “The Best European Show”, si një ko-produksion i Teatrit Kombëtar të Kosovës, me Teatro Due – Parma, Teatri Kombëtar Slloven – Nova Gorica, Teatr Opole dhe Teatru Malta, e me të cilët TKK është bërë partnerë duke qenë pjesë e European Theatre Convention.
Kjo shfaqje e cila vjen nën regjinë e Haris Pasoviç, do të ketë premierën botërore me 13 tetor në Opole, ndërsa në Kosovë do ta ketë premierën me 25 prill 2024.
Në këto prova po marrin pjesë një ekip ndërkombëtarë artistësh nga 9 shtete të ndryshme, ndër të cilët edhe aktorët tanë rezidentë, Armend Smajli, Maylindak si dhe kompozitori Trimor Dhomi.
Po ashtu, në vazhdën e punës së TKK-së, të premten kanë filluar edhe provat e shfaqjes “Ditë Vere” të Slawomir Mrozek, në të cilin luajnë një grup të përzier artistësh për nga gjeneratat përfshirë edhe ata që për herë të parë do të punojnë në TKK – Era Balaj, Andi Bajgora, e Art Pasha, përkrahë aktorëve rezidentë Ismet Azemi, Lumnije Sopi, Adhurim Demi e Veton Osmani.
Kjo shfaqje premierën do a këta më 18 tetor 2023 në njërën prej hapsirave alternative të teatrit.
Kurse dje, TKK po ashtu ka filluar provat për kryeveprën e George Orwell – 1984 – e dramatizuar dhe në regji të Igor Mendjisky, e cila premierë pritet edhe të hapë sezonin 2023/2024 në TKK nga data 30 Shtator!
Në këtë shfaqje Mendjisky së bashku me aktorët do të punojnë bashkë edhe me Imer Kutllovcin i cili kthehet si bashkëpunëtor i TKK-së pas gati 20 viteve.
Drejtori i Teatrit Kombëtar të Kosovës, Kushtrim Sheremeti, ka bërë të ditur se këto tre premiera janë vetëm fillimi i punës dhe bashkëpunimeve të tjera, duke theksuar se në radhe janë edhe dy premiera të tjera.
“E kjo s’është krejt për sivjet – por vetëm fillimi: na presin edhe 2 premiera tjera, organizimi i Festivalit Mbarëkombëtar MOISIU në datat 20-27 nëntor si dhe turne të shfaqjeve nëpër Kosovë, rajon e Evropë”, ka bërë të ditur drejtori Sheremeti.
Ai përmes një postimi në facebook u ka uruar artistëve punë të mbarë deri në finalizimin e projekteve në fjalë, që do të shfaqen para audiencës së TKK-së.
“Ju uroj mbarësi e suksese të gjithë artistëve që do të punojnë me zell në mënyrë që publikut të TKK-së t’i sjellim një program të pasur e me vlerë”, ka shkruar drejtori Sheremeti ne facebook/KultPlus.com
“1984” e dramatizuar nga romani distopik i autorit George Orwell, është shfaqja e radhës për të cilën Teatri Kombëtar i Kosovës dje ka filluar provat, shkruan KultPlus.
Kjo shfaqje e cila vjen me regji të Igor Mendijsky, do të interpretohet nga aktorët: Adrian Morina, Ard Islami, Arta Selimi, Edona Reshitaj, Flaka Latifi, Shpejtim Kastrati, Xhejlane Godanci dhe Ylber Bardhi.
Pjesë e stafit të cilët po punojnë për jetësimin e këtij projekti janë edhe:
Teatri Kombëtar i Kosovës filloi provat e shfaqjes së radhës “Ditë vere” të autorit Slawomir Mrozek në regji të regjisorit Kaltrim Balaj.
Në një ditë të bukur vere pa diell, ballafaqohen njerëzit dhe fatet e tyre. Dëshira për të jetuar dhe pamundësia për të dëshiruar është një nga faktet kryesore që përballen personazhet e kësaj shfaqje. “E keqja është dëshira për gjithçka dhe nuk merr asgjë” dhe “e keqja është kur nuk do asgjë sepse ke gjithçka” .
Ka vdekur sot në moshën 76 vjeçare aktori i mirënjohur kosovar, Xhevat Qorraj, përcjell KultPlus.
Lajmin për vdekjen e aktorit e kanë pritur me pikëllim të thellë jo vetëm familjarët po edhe komunitetit artistik dhe publiku që e deshi shumë.
Një telegram ngushëllime vjen edhe nga Teatri Kombëtar i Kosovës të cilët shprehen të pikëlluar për këtë humbje.
Nga TKK janë shprehur se Qorraj do të kujtohet për talentin e tij të rrallë, rolet e tij të shumta, kolegialitetin e tij të pashoq dhe kontributin e tij të pafund në kulturën dhe artin tonë kombëtar.
“Me pikëllim të thellë morëm lajmin për humbjen e njeriut tonë të çmuar, aktorit të Teatrit Kombëtar të Kosovës e artistit të njohur, Xhevat Qorraj.
Rolet e tij në teatër dhe film do mbahen mend gjatë dhe do të vazhdojnë të ndriçojnë rrugën e artit për shumë gjenerata.
Teatri Kombëtar i Kosovës do ta kujtojë Xhevat Qorrajn për talentin e tij të rrallë, rolet e tij të shumta, kolegialitetin e tij të pashoq dhe kontributin e tij të pafund në kulturën dhe artin tonë kombëtar.
Le të kujtojmë dhe të nderojmë së bashku jetën dhe veprën e mrekullueshme të Xhevat Qorraj.
Ngushëllime të sinqerta për familjen dhe të gjithë komunitetin artistik.
Për detaje të ceremonisë së varrimit do të ju lajmërojmë me kohë!”, shkruajnë nga TKK. / KultPlus.com
Teatri Kombëtar i Kosovës më 13 Qershor do të jep shfaqjen e radhës “Megalomani”, e cila jepet nën drejtimin dhe konceptimin e Robert Nuhas, shkruan KultPlus.
Shfaqja para publikut do të jepet në ora 20:00, në Amfiteatrin e Teatrit Kombëtar të Kosovës./KultPlus.com
Në Amfiteatrin e Teatrit Kombëtar në Prishtinë është mbajtur takimi i Asociacionit të Teatrove Publike të Qyteteve të Kosovës.
Asociacioni i Teatrove Publike të Qyteteve ka votuar unanimisht përfshirjen e institucionit më të lartë teatror në vend – Teatrit Kombëtar të Kosovës në këtë mekanizëm dhe nga sot ta ndryshoj emërtimin e tij në Asociacioni i Teatrove Publike të Kosovës.
Në këtë takim janë diskutuar tema të ndryshme si: forcimi i pozicionit të teatrove publike në vend, Projektligjin për Art dhe Kulturë (në diskutim publik), pozicionimin e krijuesve dhe performuesve të teatrit, forcimin e mekanizmit të Trupave Rezidente dhe të tjera.
Gjatë takimit, përfaqësuesit e teatrove publike të: Teatrit Kombëtar të Kosovës, Teatri “Hadi Shehu” – Gjakovë, Teatri i Qytetit – Gjilan, Teatri “Bekim Fehmiu” – Prizren, Teatri “Dodona” – Prishtinë, Teatri “Istref Begolli” – Pejë, Teatri “Adriana” – Ferizaj, Teatri “Muharrem Qena” – Mitrovicë dhe Teatri “Avdush Hasani”- Podujevë janë dakorduar për formalizimin e Asociacionit të Teatrove Publike të Kosovës. / KultPlus.com
Shfaqja “Gratë” – ose ‘mëkatet e tyre në patriarkat’, vjen premierë nesër në Amfiteatrin e Teatrit Kombëtar të Kosovës, përcjell KultPlus.
Produksion i Teatrit Kombëtar të Kosovës, punuar e gjitha nga artiste të jashtëzakonshme të teatrit. Një shfaqje autoriale në bashkëpunim me ansamblin.
Shfaqja vjen nën regjinë e Nastazja Domaradzka. Luajnë: Edona Reshitaj, Gresa Pallaska, Lumnije Sopi, Sheqerie Buqaj, Shengyl Ismaili, Xhejlane Godanci. Ndërsa, dramaturgjia vjen nga Agnesa Mehanolli, Brikena Sopi, Ulpiana Maloku me konsulente dramaturgjike nga Doruntina Basha.
Skenografe është Rudina Xhaferi, kostumografia vjen nga Yllka Brada, mjeshtre ndriçimi është Lucia Sanchez Roldan, kompozitore është Rona Berisha Castrioti, koreografe është Behije Murtezi, asistente regjie është Xheraldina Krasniqi dhe asistente dramaturgjike është Zoga Çeta Çitaku.
Reprizat e para të shfaqjes “Gratë” vinë më 22 dhe 23 Dhjetor 2022. / KultPlus.com
Shfaqja “Gratë” – ose ‘mëkatet e tyre në patriarkat’, vjen premierë më 21 dhjetor 2022 në Amfiteatrin e Teatrit Kombëtar të Kosovës, përcjell KultPlus.
Produksion i Teatrit Kombëtar të Kosovës, punuar e gjitha nga artiste të jashtëzakonshme të teatrit. Një shfaqje autoriale në bashkëpunim me ansamblin.
Shfaqja vjen nën regjinë e Nastazja Domaradzka. Luajnë: Edona Reshitaj, Gresa Pallaska, Lumnije Sopi, Sheqerie Buqaj, Shengyl Ismaili, Xhejlane Godanci. Ndërsa, dramaturgjia vjen nga Agnesa Mehanolli, Brikena Sopi, Ulpiana Maloku me konsulente dramaturgjike nga Doruntina Basha.
Skenografe është Rudina Xhaferi, kostumografia vjen nga Yllka Brada, mjeshtre ndriçimi është Lucia Sanchez Roldan, kompozitore është Rona Berisha Castrioti, koreografe është Behije Murtezi, asistente regjie është Xheraldina Krasniqi dhe asistente dramaturgjike është Zoga Çeta Çitaku.
Reprizat e para të shfaqjes “Gratë” vinë më 22 dhe 23 Dhjetor 2022. / KultPlus.com
Për herë të parë në Kosovë, Shpat Deda vjen me një turne koncertesh nën emërtimin ‘Muzikë n’Teatër’, së bashku me multi-instrumentistin Visar Kuçi dhe muzikantin e producentin Tomor Kuçi. Adresa e parë qe Amfiteatri i Teatrit Kombëtar të Kosovës, me ç’rast është shpalosur një koncert që ka dalë përtej imagjinatës. Diversiteti i instrumenteve që të merrte pas vete, zëri i veçantë e i butë i Dedës, larmia e aranzhimet e mahnitshme të këngëve që i përkasin albumit “Rrugës” e deri tek ambienti i ngrohtë që u krijua me pjesëmarrjen e të pranishmëve dhe këndimin e tyre herë pas here, kanë qenë pikat kryesore mbi të cilat u jetësua koncerti i parë i këtij turneu, shkruan KultPlus.
Për të qenë dëshmitarë të një formati krejtësisht ndryshe, aty ku gërshetohet poezia me vija melodike të këndshme, të pranishmit kanë mbushur sallën qosh më qosh të hënën mbrëma. Ata kanë përjetuar një udhëtim që zor se harrohet dot. Në anën tjetër, ishte ndriçimi i errët me rreth gjashtë reflektorë që binin direkt në skenë, ai që e ka krijuar një atmosferë ku dukshëm fokusi qëndronte tek tre artistët në skenë. Veshja e tyre në ngjyrë të zezë i përshtatej prapavijës së zezë, asisoj që instrumentet e ngjyrshme që ishin vendosur rreth karrigeve, kanë pasur vëmendjen e gjithsecilit, dhe reflektimi i tyre veçse krijonte një magji me vete, akoma pa u lëshuar tingulli i parë.
Kur ora shënoi fiks 20:10, skena mirëpriti këngëtarin Shpat Deda, instrumentistin Visar Kuçi dhe muzikantin Tomor Kuçi. Kënga e parë e performuar, “Instinktivisht” shënoi nisjen e këtij koncerti të shumëpritur. Qysh nga moment e tutje, vëmendja e publikut u rrëmbye krejt lehtazi. Gjurmë dashurie e melankolie, përshkuan tërë Amfiteatrin e TKK-së dhe bënë rrugëtimin e tyre nëpër secilin shpirt të pranishëm.
Tutje këngët si: “Kërkon”, “Nesër” dhe “T’Huj”, erdhën në një formë unike që rrëqethi krejt sallën. Gërshetimi i zërit të Dedës me fiz-harmonikë, kitarë elektronike, akustike, me talentin e muzikantit Tomor Kuçi dhe magjinë e pakrahasueshme të multi-instrumentistit Visar Kuçi i cili zotëronte violinën, harmonikën e kitarën dhe krijonte ndjesi të papërshkrueshme, ka krijuar një mbrëmje ku më së miri është dëshmuar se dashuria për muzikën nuk ka asnjë limit.
Në anën tjetër, këngëtari Deda, ka interpretuar edhe dy këngë nga albumi i tij i parë me kitarën e tij që sipas vetë këngëtarit, qëndron që 15 vjet. “Ëndërroj” ishte kënga që shkoqiti publikun nga hipnoza e krijuar nga këta tre artistë. Zëri i lehtë e i njëtrajtshëm nga ana e audiencës, së bashku me atë të këngëtarit Deda, ka qenë diçka tejet e ëmbël që u krijua në çast. Këtë ndjesi edhe vetë këngëtari e ka përshkruar si nga momentet më të bukura të jetës së tij. E njëjta situatë ndodhi edhe me “Ninullë”, dhe kjo medoemos tregon shumë për krijimet e Dedës, të cilat pa marrë parasysh kohës, tingëllojnë origjinale dhe japin ndjenja të rralla.
Disa minuta para se ora të shënonte 21:22, kënga që të dërgon në një udhëtim më vete, “Ditë e Re” vulosi fundin e këtij koncerti të dashur për gjithkënd. Ndërkaq, ishin duartrokitjet e shumta dhe brohoritjet e larta, ato që falënderuan këtë treshe për dhuntinë e tyre të jashtëzakonshme.
Për të treguar më shumë për këtë rrugëtim për të cilin fillimisht inspirimin e ka gjetur në Beograd më 27 maj të vitit 2022, për KultPlus, ka folur artisti Shpat Deda.
“Emocionet janë shumë të papërshkrueshme në këtë natë. Jam kënaqur shumë dhe asnjëherë nuk do ta harroj këtë energji që e kam marr këtu në qytetin tim, ku jam lindur e rritur. Këtë energji do e marrim e do e dërgojmë edhe në qytete tjera. Dëshirën për t’i bërë koncertet në teatro, e kam që një kohë, për shkak se ofron një kontekst tjetër se si dhurohet muzika. Fokusi është komplet në skenë dhe nuk ka gjëra që të tërheqin vëmendjen. Andaj, muzika depërton më thellë në këto raste. Kam pritur derisa krijova një program të duhur për skena të tilla dhe këtë e arrita bashkë me Tomorin e Visarin”, ka thënë ai.
Sipas tij, për shkak të buxhetit të vogël, turneu është dashur të zvogëlohet në gjashtë qytete, ndryshe siç ishte paramenduar më herët në pesëmbëdhjetë qytete.
“Në Prizren nuk kam mundur ta rezervoj sepse teatri i tyre është në renovim dhe nuk u ofrua një hapësirë e përshtatshme tjetër. Në Pejë kam qenë verës me këtë program në kinemanë ‘Jusuf Gërvalla’ dhe i dhashë përparësi një qyteti tjetër. Ndërsa, qytetet që i zgjodha, normalisht janë qendra urbane. Në këtë program i zgjodha këngët që i kam pak më artistike dhe nuk janë aq shumë të dëgjuara, sidomos këto dy të albumit të parë. Natyra e këngëve është e ngjashme me albumit të tretë dhe rrinë bukur në një set. Po ashtu, dy këngët e famshme “Ëndërroj” dhe “Përgjithmonë” kanë ardhur në version pak më ndryshe dhe u pritën shumë bukur”, përfundon Deda.
Ai tutje potencoi se kjo treshe fillimisht është thirrur për të performuar në Beograd nga festivali “Mirëdita, dobar dan” dhe pas ndërtimit të programit, këngëtari Deda ka vendosur të krijoj një turne të tillë në Kosovë.
Po ashtu, violinisti Visar Kuçi për KultPlus ka potencuar se aranzhimet kanë qenë sfiduese, por që për të këto sfida gjithmonë janë të mirëseardhura.
“Ka qenë një përkushtim që e kemi bërë bashkë me Tomorin e Shpatin, për tu munduar e për të realizuar programin me këngët e Shpatit, pa ia humb vlerën muzikës së tij, por duke i inkuadruar krejt instrumentet e mundshme. Gjithçka është e punuar deri në detajet e fundit dhe një këngë është edhe e shkruar me partiturë sepse përndryshe është e pamundshme. Është e shkruar edhe kur të ndërrohen instrumentet sepse ka shumë detaje, por për mua është gjithmonë një kënaqësi kur kam programe të cilat janë sfiduese, për arsye se kjo më bën që të jem më i përkushtuar ndaj një pune, sidomos kur prezente janë të gjitha instrumentet që unë i dua më së shumti, e të cilat i kam studiuar dhe vazhdoj t’i mësoj. Është e bukur të kesh mundësinë për të bërë diçka si kjo dhe normalisht është shumë e vështirë”, ka thënë ai.
Sipas tij, këto këngë janë të njohura e të luajtura edhe në formacione tjera. Dhe ai ka qenë edhe orkestrues i harqeve në disa nga këngët e Dedës.
“Jemi ulur të tretë dhe i kemi dëgjuar mirë se cilat këngë dëshiron Shpati për t’i bërë për këtë program. Së pari kemi folur, kemi pasur ide të ndryshme, jemi takuar disa herë, kemi mbajtur prova, derisa ka ardhur tek versioni i fundit. Pastaj, krejt këto janë incizuar e regjistruar në studio për t’i dëgjuar ne se çfarë po tingëllon mirë dhe jo mirë. Ka qenë një proces shumë i bukur. Sonte kemi arritur të krijojmë diçka që ka qenë shumë e kënaqshme edhe për ne”, përfundon Kuçi.
Po ashtu, muzikanti dhe producenti Tomor Kuçi është shprehur i lumtur që programi i koncerteve është shndërruar në një vend për ta, që shpesh dëshirojnë ta vizitojnë.
“Ke shumë ndjenjë e veçantë. Në një këngë të Shpatit, mua më ka ra që të punoj edhe vetë në produskion të muzikës në studio. Duke qenë shumë i familjarizuar me albumin dhe duke i ditur krejt këngët, ka qenë edhe më e lehtë për t’i mësuar këngët. Ka pasur nevojë vetëm për të mësuar se si t’i aranzhojmë këngët. Programi ynë është si njëfarë vendi i ngrohtë që na pëlqen dhe ne dëshirojmë të shkojmë tek ky vend disa herë. Prej fillimit, kemi diskutuar për hapësira dhe ky është koncert ku teatrot i përshtaten më së shumti. Publiku është i ulur dhe ky është një format shumë i mirë. Koncerti është i qetë dhe ka nevojë që edhe ajri të ndjehet në atmosferë. Teatrot e kanë një qetësi të bukur që i shkon shumë koncerteve tona”, ka thënë Kuçi.
Më poshtë gjeni datat e koncerteve në qytete të ndryshme, gjegjësisht në gjashtë salla teatrosh të ndryshme:
7 DHJETOR- Teatri i Qytetit, Vushtrri
12 DHJETOR – Teatri i Qytetit ‘Hadi Shehu’, Gjakovë
13 DHJETOR – Teatri i Qytetit ‘Muharrem Qena’, Mitrovicë
16 DHJETOR – Teatri i Qytetit, Gjilan
Të gjitha koncertet fillojnë në ora 20:00 dhe hyrja në secilin qytet do të jetë 3€. Biletat do të mund të blehen në teatrot përkatës afër datave të koncerteve.
Turneu ‘Muzikë n’Teatër’ është përkrahur nga Ministria e Kulturës, Rinisë dhe Sportit në Kosovë. Koncerti i Prishtinës është përkrahur nga Komuna e Prishtinës. / KultPlus.com
Vepra dramaturgjike e Andon Zako Çajupit, “Pas vdekjes” do të ringjallet kësaj here për tu shndërruar në një shfaqje komedi që shumë shpejt do të prekë ambientin e ri të Teatrit Kombëtar të Kosovës, ‘Amfiteatri në Pallatin e Rinisë’. Ngjarja zhvillohet në një klub të shqiptarëve të Selanikut më 1910. Por, shfaqja është një mbindërtim, e shkruar nga dramaturgu Shpëtim Selmani, shkruan KultPlus.
Në qendër të veprës kemi demaskimin e demagogjisë së xhonturqve dhe bejlerëve që u bënë vegël e tyre, ndërsa ndodhitë jetësohen në zyrat e gazetës “Liria”. Është një komedi politiko-shoqërore, që shfaq fokusin nëpërmjet situatave komike por që në thelb janë shumë më të thella, dhe e njëjta tashmë do ta ketë premierën në muajin nëntor. Shfaqja vjen nën regjinë e Fatos Berishës me kastën e mrekullueshme të aktorëve si: Armond Morina, Ard Islami, Teuta Krasniqi, Ylber Bardhi, Majlinda Kosomoviq, Armend Smajli dhe Naim Berisha.
Vepra u botua pas vdekjes së shkrimtarit Çajupi dhe konsiderohet të jetë udha e parë drejt komedisë politike në letërsinë shqiptare. Me një ndjesi poetike, nëpërmjet personazhit të doktor Adhamullit, shfaqet mendësia e njerëzve mendjemëdhenj, ata që shpirtin e kanë të varfër dhe asnjë punë atdhetare për ta, nuk ka vlerë pa prezencën e tyre. Ndërsa, personazhi tjetër i spikatur, Zeneli, përfaqëson njeriun e thjeshtë të popullit me ç’rast shpalos një humor e mençuri të paparë. Elementet si ‘Abetarja shqipe’ dhe ‘Kongresi i Manastirit’, po ashtu luajnë një rol të madh në këtë rrugëtim.
Shfaqja “Pas vdekjes” ka ardhur si propozim nga Teatri Kombëtari i Kosovës, dhe pasi është aprovuar si tekst, së bashku edhe me veprat e tjera për repertorin e sezonit të ri, regjisori Berisha e ka pranuar me kënaqësi këtë ftesë, dhe gjithmonë me idenë që mund të mbindërtohet kjo vepër një-aktëshe. Dhe ajo që po përpiqet që të bëhet, është një shfaqe që flet për neve, sot.
Në një intervistë për KultPlus, regjisori Berisha ka shpalosur ende më shumë, lidhur me këtë shfaqje dhe procesin e saj deri në premierë.
“I gjithë ekipi i aktorëve të shfaqjes, përveç Armond Morinës, është nga ansambli rezident i Teatrit Kombëtar të Kosovës. E ata janë: Teuta Krasniqi, Ylber Bardhi, Ard Islami, May-Linda Kosumovic, Armend Smajli dhe Naim Berisha. Jam shumë i kënaqur me ekipin, ndërsa jam i lumtur që pas një kohe të gjatë, përsëri do të punoj me Armondin në teatër”, ka thënë Berisha.
Sipas tij, vështirësitë që hasen në një rrugëtim të tillë janë nga më të zakonshmet. Pra, fillimi i provave, zbërthimi i tekstit, analiza e personazheve, marrëdhëniet e tyre. Gjithçka brenda normales gjatë punës në një shfaqje. Ai tutje thotë se ende janë në fillim të procesit dhe atmosfera konsiderohet të jetë e mirë.
Tanimë Teatri Kombëtar i Kosovës ndodhet në renovim, dhe regjisori Berisha ambientin e ri e ka vlerësuar si një hapësirë të përshtatshme pune.
“Ambienti i ri, Amfiteatri në Pallatin e Rinisë është një hapësirë shumë e mirë, në fakt. Sidomos për një shfaqje si kjo e jona. Drejtori Sheremeti dhe ekipi i TKK-së kanë arritur ta kthejnë në hapësirë të përshtatshme pune në afat rekord”, thotë ai.
Ndërkaq, premiera e shfaqjes “Pas vdekjes” ende nuk dihet saktë se kur do të shpaloset, por që patjetër do të jetë përgjatë muajit nëntor.
GRATË – është tema e shfaqjes së re e cila do të ketë premierën në dhjetor 2022 në Amfiteatrin e Teatrit Kombëtar të Kosovës në Prishtinë.
Sot, regjisorja polako-britaneze, Nastazja Domaradzka, mbajti takime/audicione me aktoret e Trupes Rezidente të TKK-së per këtë projekt i cili është duke u shkruar nën përkujdesjen e Doruntina Bashës nga dramaturget e reja Agnesa Mehanolli, Brikena Sopi dhe Ulpianë Maloku.
Një shfaqje e punuar totalisht nga gratë dhe e bazuar në ngjarje të vërteta të grave lidere të Kosovës. / KultPlus.com
Teatri Kombëtar i Kosovës së bashku me Teatrin Shqiptar në Shkup, Teatrin Kombëtar të Shqipërisë si dhe Teatrin Kombëtar Eksperimental, kanë nënshkruar marrëveshje bashkëpunimi.
Ky lajm është bërë i ditur përmes një postimi në faqen zyrtare të Teatrit Kombëtar të Kosovës.
“Me qëllim të rritjes së bashkëpunimit në mes të teatrove shqiptare u dakorduan për bashkë-organizimin e “Festivalit të Teatrit Shqiptar – MOISIU” i cili këtë vit do të mbahet në Shkup dhe do të vazhdojë çdo vit në rotacion në tre kryeqytetet, si dhe për bashkë-prodhimin e përvitshëm të një shfaqje me karakter kombëtar në mes të tre teatrove kryesore shqiptare – nga viti 2023.”, thuhet në njoftimin e TKK-së./ KultPlus.com
Teatri Kombëtar i Kosovës së shpejti ri-fillon punën në hapësira alternative deri sa të përfundoj procesi i renovimit të objektit aktual!
Një prej këtyre hapësirave është edhe Amfiteatri në Pallatin e Rinisë në Prishtinë, në të cilin sot u takua ekipi i i shfaqjes së re që do të punohet në TKK e bazuar në komedinë “Pas vdekjes” e A.Z. Çajupi me regji të Fatos Berishës!
TKK është e lumtur që me këtë projekt po ri-kthehet pas 16 vitesh në skenen tonë, aktori Armond Morina!
Premiera e shfaqjes do të jetë së shpejti, sapo të përfundohen adaptimet e nevojshme të kësaj hapësire.
Së shpejti edhe lajme tjera të mira nga TKK! /KultPlus.com
