Trashëgimia kulturore në Shqipëri, një aset i vyer për t’i dhënë jetë itinerarit të muzeumeve

Trashëgimia kulturore, është aset i vyer për vendin tonë që i jep vlerë të shtuar dhe jetë itinerarit të muzeumeve.

Ministrja e Kulturës Elva Margariti dhe Ambasadorja e Shteteve të Bashkuara të Amerikës, në Tiranë, Yuri Kim vizituan qytetin e gurtë të Gjirokastrës,  pasuri botërore, nën mbrojtjen e UNESCO-s.

“E ndodhur në këmbët e saj, Gjirokastra së pari të krijon një ndjesi ngurrimi, por kur hyn në të, nuk do të doje të largoheshe”- shprehet Margariti.Ministrja thekson se, “teksa vizitoi disa nga pikat më të bukura turistike dhe të trashëgimisë kulturore, ndau me ambasadoren edhe projektet për t’i dhënë jetë itinerarit të muzeumeve, që rrëfejnë historinë e qytetit”. /atsh/ KultPlus.com

Margariti: Më shumë hapësira dedikuar fëmijëve dhe edukim mbi kulturën

“Më shumë hapësira të dedikuara për fëmijët, por edhe më shumë edukim dhe njohje me trashëgiminë kulturore”.

Ministrja e Kulturës, Elva Margariti, e pranishmenë aktivitetin “Dizajni dhe Trashëgimia fuqizojnë Komunitetin” të organizuar nga CHËB, mbështetur nga Ambasada Holandeze e Bashkia e Tiranës dhe Ministria e Kulturës, ministrja Margariti theksoi se, “prania e aq shumë fëmijëve që luanin mes strukturash kartoni, që në të vërtetë simbolizonin një copëz nga qyteti i tyre, na bën edhe më tepër të përgjegjshëm, që qytetin ta vëmë në shërbim të tyre”, u shpreh Margariti.

“Më shumë hapësira të dedikuara për ta, por edhe më shumë edukim dhe njohje me trashëgiminë kulturore”, theksoi ajo.

“Pranëvënia e aktivitetit “Dizajni dhe Trashëgimia fuqizojnë Komunitetin” pranë Mozaikut të Tiranës e bënte edhe më domethënës këtë aktivitet. Një gjetje e goditur nga organizatorët CHËB, mbështetur nga Ambasada Holandeze e Bashkia e Tiranës e me shumë dëshirë edhe nga Ministria e Kulturës. Le të jetë kjo ndalesa e parë drejt qytetesh të tjera”, u shpreh ministrja Margariti./ atsh/ KultPlus.com

Shpallen fituesit e Fondit të Përkthimit të veprave letrare

Ministrja e Kulturës, Elva Margariti premtoi sot më shumë mbështetje për autorët dhe përkthyesit shqiptarë.

Margariti mori pjesë në aktivitetin e organizuar nga Qendra e Librit dhe Leximit, për të shpallur fituesit e “Fondit të përkthimit nga shqipja në gjuhë të tjera” dhe “Fondi i përkthimit nga gjuha e huaj në gjuhën shqipe”.

Ekspertët morën në shqyrtim veprat letrare, autorët dhe përkthyesit e tyre, të paraqitura nga shtëpitë botuese përkatëse.

Mbi bazën e këtij gjykimi, juria shpalli 6 titujt fitues nga 12 aplikime për Fondin e përkthimit nga gjuha shqipe në gjuhën e huaj:

1 Vaxikon Yorgos Goumas Ben Blushi “Otello, arapi i Vlorës”/ Οθέλλος, ο Αράπης της Αυλώνας (greqisht)
2 Petergailis Dens Dimin Ismail Kadare “Gjenerali i ushtrisë së vdekur”/ Mirušo Armijas Generalis (lituanisht).
3 Plethora Eleana Zhako Fatos Lubonja Ridënimi/ Επανακαταδική (greqisht)
4 Besa M. Mandalà Visar Zhiti “Rrugët e ferrit”/ Le strade dell’inferno (italisht)
5 Salento E. Derhemi, F. Ferrari Romeo Çollaku Mjaltë në teh/ Miele sul coltello (italisht)
6 Eurasia Eleana Zhako Gëzim Qendro Heronjtë janë të uritur/ Oι ήρωες είναι πεινασμένοι (greqisht)

Po kështu, juria përzgjodhi 6 fitues të tjerë për “Fondin e përkthimit letrar nga gjuha e
huaj në gjuhën shqipe” nga 22 aplikime të paraqitura:

1 “Dudaj”, Adrian Beshaj- Isabel Allende “Përtej dimrit”/ “Mas alla del Inverno” (spanjisht)
2 “Onufri”, Granit Zela -William Faulkner/ “Absalom, Absalom” (anglisht)
3 “Dituria”, Oriana Tamburi -Robert Galbraith “E bardhë vrastare”/ “Lethal white” (anglisht)
4 “Pika pa Sipërfaqe”, Arben Idrizi- Roberto Calasso “Martesa e Kadmit dhe Harmonisë”/
“Le nozze di cadmo e Armonia” italisht.
5 “Pegi”, Gentiana Kasemi- Kazuo Ishiguro “Një pamje e zbehtë e kodrave”/ A pale Wiew of hills (anglisht)
6 “Albas”, Edlira Lloha- Wladyslaw Reymont “Komediana”/ “Komediantka” (polonisht).

Specialistët e monumenteve me ekspeditë për gjendjen e konservimit të pikturave murale në Kostar dhe Delvinë

Mirëmbajtja e monumenteve të kulturës vijon të jetë në qendër të vëmendjes së specialistëve të Institutit Kombëtar të Trashëgimisë Kulturore dhe Ministrisë së Kulturës në Shqipëri

Ministrja e Kulturës, Elva Margariti, tha sot se “së bashku me specialistët e Drejtorisë Rajonale të Trashëgimisë Kultore Vlorë , Sektori Sarandë, u zhvillua një ekspeditë për gjendjen e konservimit të pikturës murale në Kishën e Manastirit të Shën Mërisë në Kostar dhe në Kishën e Manastirit të Shën Triadhës në Kardhikaq, Delvinë”.

“Qëllimi i kësaj ekspedite është verifikimi dhe hartimi i projekteve të ndërhyrjes konservuese e restauruese në pikturën murale të këtyre dy objekteve “monument kulture”, si dy objekte me mjaft vlera dhe interes në këtë zonë”, – tha Margariti.

Kisha Shën Meria e Kostarit ngrihet në anën lindore të qytetit antik të Finiqit dhe ndodhet brenda një shpelle të natyrshme në malin Kostari. Pjesa veriperëndimore u ndërtua për herë të parë në 1332 dhe, më vonë, në vitet 1690-1770 u unifikua me pjesën tjetër.

Duke u gdhendur në shkëmb, manastiri mbart një vlerë të madhe dhe të rrallë historike; Kjo ndodh sepse ndër të tjera, gjatë okupimit osman, funksiononte si një shkollë sekrete, mësuesi i saj i fundit ishte Pilo Papa.

Kisha e Shën Triadhës nga tiparet tipologjike duhet ti përkas fundit të shek. XVI- fillimi i shek. XVII, ndërsa mbishkrimi që gjendet mbi portën hyrës tregon se ajo është pikturuar në vitin 1827. /atsh/ KultPlus.com

Elva Margariti: Bileta falas në disa qytete të Shqipërisë për qytetarët që vizitojnë objektet kulturore

Ministrja e Kulturës, Elva Margariti deklaroi se janë marrë disa masa në mbështetje të qytetarëve që duan të vizitojnë zona kulturore.

Ajo bëri një lidhje me “Skype” për edicionin e lajmeve në “Vizion Plus” dhe deklaroi se në Gjirokastër dhe Krujë ofrohen bileta falas për qytetarët, transmeton KultPlus.

Margariti specifikoi se numri i biletave është i limituar.

“Kemi ulur çmimet, edhe ato simbolike, kemi shtuar edhe të katërta të dielat e muajit falas. Kjo ofron gjithmonë më tepër familjet, sidomos në parqet arkeologjike. Një nismë tjetër është ajo e marrëveshjes së nënshkruar me disa bashki ku ka më shumë vizitorë duke ju ofruar atyre bileta falas që shkojnë drejt njësive akomoduese të këtyre qyteteve. Marrëveshjet i kemi kryer me Gjirokastrën, Krujën dhe së shpejti edhe me Beratin”, u shpreh ajo.

Ministrja foli edhe për ecurinë e punimeve në objektet kulturore të dëmtuara nga tërmeti i 26 Nëntorit.  

“Ka filluar puna për vënine në stabilitet për disa prej këtyre monumenteve, sin ë Krujë, ashtu edhe në Durrës. Faza e emergjencës është duke u kryer ndërkohë, kjo në fakt edhe nga donatorët e vendeve të huaja. Kemi mbështetje edhe nga qeveria amerikane. Është një program shumë i gjerë. Shteti ka marrë përsipër të kryejë të gjithë projketet e zbatimit të restaurimit për fazën e parë, ndërsa pjesën e implementimit, presim punë ditësh ose javësh që Komisioni Evropian, mbështet trashëgiminë kulturore dhe arsimin. Në rastin e trashëgimisë do të kemi një fond prej 50 mijë eurosh. Kemi punime në shumë monumente në territor” deklaroi tutje Margariti. / KultPlus.com

Rikonstruksioni i Operës dhe Baletit, ministrja Margariti: Arritëm akustikën maksimale, projekti 1.2 miliardë lekë

Ministrja e Kulturës Elva Margariti ka folur për ndryshimet e reja që ka pësuar skena dhe ambientet e rinovuara në Teatrin Kombëtar të Operës dhe Baletit. Ndonëse na ndan vetëm pak kohë nga inaugurimi i këtij objekti, Margariti flet për skenën e re, akustikën e saj, sallat e instrumentiste edhe balerinëve, por edhe për pupulitin e shumëpërfolur.

Ndonëse pritjes së gjatë të artistëve të Teatrit Kombëtar të Operës dhe Baletit po i vjen fundi,  ministrja e Kulturës Elva Margariti rrëfen për “Report tv” rikonstruksionin e institucionit 70-vjeçar. I nisur në janar të 2017-s, pas katër vitesh punë, ministrja ndalet tek skena e rikonceptuar me dy ballkonata, duke theksuar se si përmes teknologjisë bashkëkohore është siguruar akustika maksimale.

Sallat e reja për balerinët, instrumentistët edhe studiot e tyre, tashmë janë gati. Ndërsa, artistët janë ata që do të thonë fjalën e fundit për të rishikuar çdo problematike të hasur.

Inaugurimi i operës për të gjithë artdashësit do të bëhet në muajt në vijim, ndërsa projekti fillestar i rikonstruksionit është 1.2 miliardë lekë, për arritjen e standardeve bashkëkohore është përdorur edhe buxhet shtesë. / KultPlus.com

Ministria e Kulturës në Shqipëri pagëzon majin si ‘Muaji i Muzeve’

Ministria e Kulturës e ka pagëzuar majin si “Muaji i Muzeve”. Ministrja Elva Margariti shprehet se muzetë janë pjesë e kujtesës, na rrëfejnë prej nga vijmë e ku duhet të shkojmë.

Sipas ministres së Kulturës për të qenë sa më pranë publikut edhe ky muaj u pagëzua, si “Muaji i Muzeve”. “Me shpresën se shumë shpejt do të mund të rikthehemi për të vizituar fizikisht muzetë, por edhe duke dashur të jemi sa më pranë publikut virtualisht, menduam të pagëzojmë majin si “Muajin e Muzeve”.

Ju ftoj të na ndiqni në rrjete sociale për të zbuluar copëza nga thesaret, shpërndarë në muzetë tanë, ture virtuale që do të na japin mundësinë të udhëtojmë në të gjithë muzetë e botës, si edhe kuriozitete e guida të përshtatura për më të vegjlit në kuadër të programit “Edukimi përmes kulturës””, shkruan ministrja Margariti në profilin e saj. Gjatë këtyre ditëve muzetë e vendit po vazhdojnë që të prezantojnë objektet e tyre në mënyrë virtuale për publikun. Jo vetëm muzetë në Tiranë, por dhe në rrethe prej disa ditësh po prezantojnë objektet e tyre në mënyrë virtuale. Muzeu Historik Kombëtar si më i rëndësishmi në vend, këtë tur virtual e quan si një udhëtim në thesaret e tij, po ashtu dhe Muzeu Arkeologjik i Apollonisë ka vijuar me prezantimin e objekteve, gjithashtu dhe Muzeu Kombëtar i Fotografisë “Marubi” dhe të tjerë institucione muzeore kombëtare janë bërë bashkë në këtë nismë të Ministrisë së Kulturës. Në vijim me udhëtimin në thesaret e Muzeut Historik Kombëtar, institucioni publikoi edhe reliev me figurën e Nikes, gjysma e dytë e shekullit V para Krishtit Vrinë, Butrint.

Artefakti që mbart figurën e perëndeshës së fitores u gjet në bregun pranë derdhjes së kanalit të Vivarit në Vrinë, Butrint, në fund të viteve ‘20 të shekullit të kaluar. Stili, punimi dhe lloji i veçantë i mermerit dëshmojnë për prejardhjen e relievit, që datohet në gjysmën e dytë të shekullit V para Krishtit. Relievi paraqet Niken, perëndeshën e fitores me qëndrim triumfal dhe me flatra të hapura. Dora e majtë e saj mbështetet mbi tropajon, shenjë e fitores, formuar nga parzmore armike vendosur mbi shkëmb./sot/ KultPlus.com

Margariti: Qëndro në shtëpi, trego kulturën tënde

Ministria e Kulturës ndërmori ditën e djeshme një iniciativë të veçantë: “Hapni dritaret. Lëreni muzikën të hyjë në shtëpitë tuaja”, për t’i nxitur qytetarët të mos dalin nga shtëpitë dhe për t’u qetësuar sadopak shpirtrat e trazuar në kohërat e koronavirusit.

Thirrjes iu bashkuan dhjetëra artistë, të cilët kanë performuar nga ambientet e tyre të vetëkarantinimit.

“Artistët që na u bashkuan dje kanë qenë të shumtë dhe për këtë meritojnë një falenderim nga të gjithë ne”, shprehet ministrja e Kulturës, Elva Margariti.

“Qëndro në shtëpi, trego kulturën tënde”, ky është mesazhi që përcjell ministrja Margariti.

Sot ajo na sugjeron të dëgjojmë performancën e artistit Pashko Flutra.Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij. /atsh / KultPlus.com

https://www.facebook.com/EKOMendje/videos/4012430572164346/?t=49&v=4012430572164346

Homologia Elva Margariti uron ministren Dumoshi për detyrën e re

Homologia nga Republika e Shqipërisë, Elva Margariti, e ka uruar ministren Vlora Dumoshi për marrjen e pozitës për të udhëhequr Ministrinë e Kulturës, Rinisë dhe Sportit.

Ky është urimi i Ministres së Kulturës së Republikës së Shqipërisë, Elva Margariti.

Përshëndetje Ministre Dumoshi.

Doja të përcillja urimet më të sinqerta për këtë sfidë të re e për rolin e rëndësishëm që ju kanë besuar!

Jam e bindur që urat e komunikimit e përkushtimi për të lartësuar të bukurën shqiptare nuk do të na mungojnë!

Përzemërsisht, Elva Margariti
Ministre e Kulturës së Shqipërisë
. /KultPlus.com

Margariti: Teatri i Operas dhe Baletit po shndërrohet në hapsirën e ëndërruar nga të gjithë artistët

Ministrja e Kulturës Elva Margariti tha sot se Teatri Kombëtar i Operës dhe Baletit, po shndërrohet në hapësirën e ëndërruar nga të gjithë artistët.

Ministrja Margariti ka inspektuar nga afër punimet që janë drejt përfundimit në Teatrin Kombëtar të Operës dhe Baletit.

“Po shkurtohen ditët, kur punëtorët do t’ia lënë vendin artistëve të skenës. Ditë pas dite shohim se si ajo gërmadhë, që nuk arrinte të mbante më mbi supe, me emrin e madh të Teatrit Kombëtar të Operës dhe Baletit, po shndërrohet në hapësirën e ëndërruar nga të gjithë artistët”, shprehet Margariti.

Investimi madhor vjen pas 60 viteve për t’u kthyer artistëve një skenë europiane.

“Kjo ndërtesë priti gjatë, plot 60 vjet që nga dita e ndërtimit, që të shihte një investim kaq madhor. Së shpejti ajo do t’i kthehet prapë artistëve e publikut, që do të mund të shijojnë një shfaqje si kudo në Europë, pa u shqetësuar për të ftohtët e dimrit dhe vapën e verës”, tha ministrja Margariti.

Teatri Kombëtar i Operas dhe Baletit është transformuar si nga akomodimi ashtu dhe garancia e parametrave teknikë e profesionalë të akustikës, cilësisë së zërit dhe me një skenë moderne në qendër, falë investimit të qeverisë shqiptare.

Salla e Teatrit të Operas dhe Baletit ka filluar të shfrytëzohet që nga shtatori i vitit 1966 dhe që në fillim janë hasur problemet që lidheshin me akustikën si: intensiteti i ndryshëm i përhapjes së valëve zanore në mënyrë jo të njëtrajtshme në pika të ndryshme (dhe veçanërisht në lozhën qeveritare) dhe dëgjimi i dobët dhe pa kolorit. Për këtë u bënë ndërhyrjet e para në akustikë në vitin 1975. /atsh/ KultPlus.com

‘Mos harro librin e pushimeve’, fushata e radhës për nxitjen e leximit

Autoritetet shqiptare kanë lansuar fushatën e radhës për nxitjen e leximit. Kësaj radhe, në fokus janë filloristët. Nisma më e re e ndërmarrë nga ministrja e Kulturës e Shqipërisë, Elva Margariti, “Mos harro librin e pushimeve” po angazhon brezin e ri në leximin e librave, si dhe po e bën këtë brez më solidar, kanë raportuar të hënën mediat shqiptare. Në Bibliotekën Kombëtare gjatë fundjavës fëmijët kanë dhuruar libra për shkollën e Kasallës, një fshat jo fort larg Tiranës, që dhe këta fëmijë të kenë mundësi të lexojnë personazhet e tyre të dashur gjatë pushimeve verore.

“Kënaqësi të shohësh fëmijët të kalojnë kohën e lirë duke lexuar, por edhe më e madhe kur i sheh tek bëhen solidarë me bashkëmoshatarët e tyre, që kanë më pak mundësi se ata. Në Bibliotekën Kombëtare, me fëmijët që dhuruan libra për shkollën e Kasallës dhe për të ndarë nismën: ‘Mos harro librin e pushimeve”, citohet të ketë thëne ministrja e Kulturës, Elva Margariti. Sipas saj, edhe jashtë kryeqytetit shqiptar ka lexues të apasionuar, të cilët do të bëhen lexues të përhershëm në të ardhmen. Prandaj, sipas saj, edhe kjo nismë do të bëjë të mundur pasurimin me tituj të rinj për fëmijët jashtë kryeqytetit, ku të rinjtë të kalojnë kohën e lirë në mënyrë produktive edhe gjatë pushimeve verore, shkruan sot Koha Ditore.

Nisma të shumta për nxitjen e leximit kanë ndërmarrë institucionet e Shqipërisë vetëm gjatë këtij viti. Në fillim të 2019-s nisi aktivitetin, ajo që Ministria e Kulturës e Shqipërisë e quajti, “Lëvizja Kombëtare për Lexim”. Po atë kohë u zyrtarizua Qendra Kombëtare e Librit dhe e Leximit, e themeluar prej Qeverisë së Shqipërisë. Qëllimi i këtij institucioni është përmbushja e detyrave zhvillimore dhe shërbimeve të drejtpërdrejta në fushën e librit, brenda dhe jashtë territorit të Republikës së Shqipërisë. “Misioni i qendrës synon përhapjen e kulturës së leximit në të gjithë vendin, nxitjen e krijimtarisë, forcimin e rolit promovues dhe edukativ të bibliotekave dhe mbështetjen e projekteve për promovimin e letrave shqipe në tregun evropian dhe atë botëror”, shkruhet në prezantimin e këtij institucioni qeveritar. Nisma të tilla në Shqipëri kanë nisur të fuqizohen duke parë se përditë e më shumë numri i lexuesve është më i pakët. Instituti i Statistikave në Shqipëri ka dhënë shifra alarmante sa i përket leximit. Sipas INSTAT-it, 1 milion banorë nuk kanë lexuar asnjë libër gjatë një viti kalendarik. Por me gjithë këto nisma, është një vendim i fundvitit të kaluar që godet librin. Bëhet fjalë për tatimin prej 6 për qind ndaj librit të miratuar në dhjetor të vitit të 2018-s.. Ka vite që botuesit në Shqipëri, ashtu sikurse edhe në Kosovë, kërkojnë heqjen TVSh-së.

“Kemi ngritur një grup pune, edhe faktikisht jemi duke filluar disa biseda të tjera me Ministrinë e Ekonomisë, e edhe të Financës, sepse përtej dëshirës dhe mundësive tona kalon në disa hallka burokratike. Është një vendimmarrje që është marrë shumë kohë para se unë të nisja këtë detyrë, prandaj edhe unë kam vështirësitë e mia për t’u rifutur në një proces të mbyllur. Megjithatë, mendoj se ka ende mundësi për rishikime”, kishte thëne ministrja Margariti, më 22 prill, një ditë para se të shënohej Dita Botërore e Librit.

Shqipëria promovon edhe vizitat virtuale nëpër monumente

Pos investimeve në disa prej aseteve më të rëndësishme të trashëgimisë kulturore në Shqipëri sa u përket restaurimit e mirëmbajtjes, shteti ka vendosur që t’i bëjë edhe më atraktive disa monumente duke përdorur teknologjinë.

Për këtë ministrja e Kulturës së Shqipërisë, Elva Margariti, të martën ka vizituar Kalanë e Prezës. Ajo ka bërë një shëtitje virtuale në këtë monument të kategorisë së parë, që është një destinacion historik dhe kulturor afër kryeqytetit shqiptar, shkruan sot Koha Ditore.

“Me realizuesit e projektit ‘Bota ndryshe’, që synon promovimin e monumenteve të Shqipërisë, si dhe t’u thjeshtojë aksesin turistëve dhe qytetarëve, duke i krijuar mundësinë e prekjes virtuale me VR videos 360 gradë, audiobook dhe fotografi të objekteve që mund të vizitojnë. Pesë kala janë përzgjedhur si epiqendra e pesë videove 360 gradë”, ka thënë ministrja Margariti sa i përket asaj që e ka përshkruar si eksperiencë të veçantë. Në këtë rast shteti shqiptar, teknologjinë ka nisur ta bëjë pjesë të promovimit kulturor.

Kalaja e Prezës ndodhet 277 metra mbi nivelin e detit dhe sipas historianëve dhe arkeologëve shqiptarë e të huaj ka filluar të ndërtohet rreth 2400 vjet më parë. Ajo ka një gjatësi 80 metra, gjerësi 50 metra dhe trashësia e mureve deri shkon deri në 1.4 metra. Nga Kalaja e Prezës mund të shihet ajo e Lezhës, Krujës, Ishmit, Petrelës, Mali i Dajtit, ai i Tomorit dhe Deti Adriatik.

Ky monument zë vend edhe në veprat e Marin Barletit, sipas të cilit më 26 janar 1445, në Kalanë e Prezës është bërë dasma e martesës të motrës së vogël të Skënderbeut, Mamicës me Muzak Topinë.

Sa i përket turizmit edhe mediat e huaja ka kohë që e shpërfaqin Shqipërinë si një destinacion kulturor.

Së fundmi gazeta franceze “20 minutes.fr” e ka përshkruar shtetin shqiptar si një vend ideal për turizëm edhe sa i përket trashëgimisë kulturore. Sipas kësaj media, si një mozaik historik, Shqipëria është një parajsë për të pasionuarit pas arkeologjisë. Është shkruar se vizita në Butrintin e lashtë që ndodhet pranë qytetit të Sarandës, ndalon rrjedhën e kohës.

“Ky port i vogël që bashkohet me ishullin grek të Korfuzit të lërë përshtypjen e një tempulli, ky amfiteatër çuditërisht i vendosur në anë të një kodre dhe një manastiri madhështor”, shkruhet në artikull. Qyteti i Apolonisë, sipas “20minutes.fr”, i nxjerrë në dritë pas Luftës së Parë Botërore nga Leon Rey, është i famshëm për portikun e tij të jashtëzakonshëm.

“Muzgu që bie mbi detin Adriatik ofron një shfaqje magjike në një heshtje që mezi thyhet nga erërat që fryjnë nëpër pemët e ullinjve”, shkruhet në artikull./KultPlus.com

Ministrja Margariti nënshkruan memorandumin e bashkëpunimit në fushën e librit dhe leximit me Bashkinë e Elbasanit

“Nisim nga Elbasani këtë marrëveshje bashkëpunimi në kuadër të Lëvizjes Kombëtare për Lexim, duke u angazhuar institucionalisht me Bashkinë e Elbasanit në pasurimin e bibliotekave publike. Ministria e Kulturës këtë vit ka organizuar programe të ndryshme si një lëvizje kombëtare që po shtrihet jo vetëm në Tiranë por në të gjithë Shqipërinë, jo vetëm në pak javë për gjatë gjithë vitit shkollor. Besoj tek energjia dhe nismat e të rinjve që po tregojnë se i bashkohen lëvizjes së librit ”- u shpreh Margariti në takimin me nxënës e mësues në Elbasan.

Në kuadër të programit kombëtar të Edukimit përmes Kulturës dhe Lëvizjes Kombëtare për Lexim si dhe duke pasur në vëmendjen, angazhimin e veçantë të Bashkisë së Elbasanit ndaj artit dhe librit, Ministrja e Kulturës Znj. Elva Margariti dhe Kryetari Bashkisë Elbasan z. Qazim Sejdini nënshkruan sot memorandumin e bashkëpunimit për t’u dhënë vëmendjen e duhur bibliotekave dhe leximit në këtë Bashki. Memorandumi sjell një institucionalizim të Lëvizjes Kombëtare për Lexim duke angazhuar edhe qeverisjen vendore në krijimin e kushteve sa më të favorshme për nxitjen e leximit dhe edukimin e brezit të ri përmes artit dhe librit.

Ministrja Margariti e shoqëruar nga kryetari Sejdini dhe Prefekti i qarkut të Elbasanit, Z. Gledian Llatja vizituan bibliotekën publike vendore të qytetit, ku Ministria e Kulturës dhuroi 300 tituj librash për fondin e bibliotekës. Nxënësit u njohën nga afër me librat e dhuruar në orarin e pushimit duke treguar interes për titujt e rinj të letërsisë bashkëkohore.

Këtë vit Lëvizja Kombëtare për Lexim ka marrë si model 12 shkolla periferike, bibliotekat e të cilave do t’i pajisë me libra dhe do të synojë trajnimin e mësuesve të këtyre shkollave për mënyrën sesi të punojnë për të afruar nxënësit me librin. Një tjetër detyrë është dhe pasurimi i bibliotekave publike, kthimi në ambiente funksionale dhe tërheqëse për fëmijët dhe të rinjtë. Është një angazhim i kësaj lëvizje arritja e një marrëveshjeje me bashkitë e vendit për t’i nxitur të krijojnë një zë të rëndësishëm në buxhet për bibliotekat publike. Bashkia e Elbasanit është bashkia e parë e këtij bashkëpunimi, i cili do të pasojë edhe me bashkitë e tjera në rang vendi. Ministrja e Kulturës, Elva Margariti vizitoi lagjen kala të Elbasanit duke u shprehur se “Kjo lagje është kartvizita e qytetit, ku bashkëjeton tradita, kultura, besimi fetar dhe trashëgimia. Shumë shpejt do të përgatisim një projekt rijetëzimi si qendrat historike në Korçë, Vlorë, etj”./KultPlus.com

Margariti: Teatri i Operas i kthehet publikut në fund të vitit 2019

Vijon puna në kantierin e rehabilitimit  të Teatrit Kombëtar të Operas dhe Baletit, investimi më i madh në kulturë i qeverisë shqiptare, ku po ndërhyhet pas më shumë se 60 vitesh. Ministrja e Kulturës, Elva Margariti inspektoi punimet në TKOB, të cilat tashmë ndodhen në një fazë kulmore.
Ministrja Margariti së bashku me ekipin e inxhinierëve dhe drejtuesve të projektit u njoh nga afër me fazat e punës në kantier,  me punimet e ndërtimit, punimet strukturore, ku vlen të theksohet ecuria e mirë e punimeve të interierit, por edhe të instalimeve mekanike dhe elektrike.
“Shpreh angazhimin e qeverisë shqiptare në një projekt madhor, projekt i munguar prej 6 dekadash në investime në Art dhe Kulturë. Ky investim, që kap shifrën e 1,5 milard lekëve, synon t’i rikthejë dinjitetin e munguar artistëve. Punimet po vijojnë me ritme intensive. Bazuar në këto ritme pune të kantierit  besojmë  në një përfundim të këtij projekti në fund të vitit 2019”- u shpreh Margariti.

Projekti për rehabilitimin e Teatrit të Operas dhe Baletit  shumëfishon hapësirat, si për publikun, por edhe për artistët, të cilët do të kenë ambiente më komode për prova. Projekti i rehabilitimit synon një Teatër të Operas dhe Baletit tërësisht të modernizuar, ku  ndryshojnë të gjitha pajisjet e vjetra mekanike të viteve ‘50 dhe automatizohen krejtësisht në shërbim të publikut edhe të artistëve.


Punimet po vijojnë me ritme intensive ku vlen të përmendim punimet strukturore që janë drejt përfundimit si : Platforma e re e Publikut, ballkonet e reja, sistemi i ri i akustikës, gropa e re e orkestrës, nënskena, etj. Vijon puna edhe në punime të tjera që nga termoizolimi, rritja e vëllimit të godinës, ballkonet e skenës, galeritë e auditorit,  sallat e provave me panele të lëvizshme, perdet e lëvizshme, dyshemetë.
Përveç fasadës, i gjithë teatri në brendësi do të ndryshojë pamje pas më shumë se 6 dekadash ekzistencë./KultPlus.com