Nesër në Dodona vjen shfaqja “Artisti i vetëm “, i pranishëm edhe autori i tekstit Ralph Hammerthaler

Pas pritjes së ngrohët nga publiku, gjatë prezantimit në Teatrin Kombëtar Eksperimental në Tiranë, shfaqja “Artisti i vetëm ” nesër me datë 26 janar 2019 , duke filluar nga ora 19:00 do të shfaqet në Teatrin e Qytetit të Prishtinës – Dodona, shkruan KultPlus.

Në këtë reprizë do të jetë prezent edhe autori i tekstit dramatik, dramaturgu dhe romansieri i njohur gjerman Ralph Hammerthaler. Në këtë shfaqje në rolin e Hans Klipp – it luan aktori Naim Berisha, i cili po ashtu është edhe regjisor i shfaqjes, ndërsa regjisor mbështetës është Shkelqim Bunajku.

 “Artisti i vetëm”, trajton dramën e brendshme të një artisti të madh, i cili për shkak të degradimit të artit dhe shijes se publikut, përjashtohet nga shoqëria me dhunë, për t’u vënë në situatë të skajshme jetësore dhe ekzistenciale. Personazhi i vetëm i kësaj shfaqje Hans Klip, gjatë prezantimit të tij të fundit para publikut të tij të zgjedhur rrëfen jetën e tij, momentet kulminante artistike në të kaluarën dhe dramën e tij në të tashmen. Në fund të tekstit Hans Klip largohet vet, i dëshpëruar nga arti i tij dhe nga vetvetja, duke renë në humnerën e pakthyeshme të dëshpërimit.

Vepra në mesazhin e saj, bënë thirrje për kthimin e vlerave kulturore, në një shoqëri që është zvetnuar nga vlerat e mirëfillta dhe paraqet protestën më sublime kundër antivleres”

Ralph Hammerthaler është i lindur me 2 dhjetor 1965 në Wasserburg në Gjermani. Aktualisht jeton në Berlin ,ku e ushtron veprimtarinë e vet prej shkrimtari. Ai botoi romanet: “ E tera në rregull”, “ Por ky është kapitulli tjeter”, “Rënia e Friderich Voss” dhe “ Një romancë e shkurter  krimi”. Në vitin 2006/2007 ai punoi si dramaturg në Berlin Schaubuhne. Libretoja e tij “ Bestmanoper” për kriminelin nazist të luftës Alois Brunner, u luajt si vepër muzikore nga Alex Nowitz. Veprat e tij janë përkthyer në disa gjuhë të botës dhe janë luajtur në Berlin, Halle , Düsseldorf, Munyh, Mexiko City dhe në Omsk. Ai ishte i angazhuar si zyrtar në Dresden (2011), Rheinsberg (2012) , Prishtinë (2013) dhe Split ( 2014) . Punoi si kolumnist në revisten për teater “Der Zieit”. Ai gjithashtu shkruan në Suddeutsche Zeitung mbi letërsinë spanjolle dhe latino- amerikane. Është anëtar nderi i teatrit Sombrero Azul në Mexico City. Në vitin 2018 botoi romanet “ Nën bashkëpunëtorët” dhe “ Dueli i lojes” si dhe esenë “ Rruga e tregut”./ KultPlus.com

Shfaqja ‘Artisti i vetëm’ vjen premierë në teatrin ‘Faruk Begolli’

Teatri Faruk Begolli në Prishtinë kësaj radhe do të mirëpres premierën e shfaqjes “Artisti i vetëm”, me autor dramaturgun gjerman Ralph Hammerthaler, përcjellë KultPlus.

Në shfaqje luan aktori Naim Berisha ( në rolin e personazhit Hans Klipp), i cili njëkohësisht është edhe regjisor i shfaqjes, kurse regjisor mbështetës është Shkelqim Bunjaku.

“Artisti i vetëm” trajton dramën e brendshme të një artisti të madh, i cili për shkak të degradimit të artit dhe shijes se publikut, përjashtohet nga shoqëria me dhunë, për tu vënë në situatë të skajshme jetësore dhe ekzistenciale.
Personazhi i vetëm i kësaj shfaqje Hans Klip, gjatë prezantimit të tij të fundit para publikut të tij të zgjedhur rrëfen jetën e tij, momentet kulminante artistike në të kaluarën dhe dramën e tij në të tashmen. Në fund të shfaqjes Hans Klip vetlargohet dëshpërueshëm nga arti i tij dhe nga vetvetja, duke renë në humnerën e pakthyeshme të dëshpërimit.

Shfaqja në mesazhin e sajë, bënë thirrje për kthimin e vlerave kulturore, në një shoqëri që është zvetënuar nga vlerat e mirëfillta dhe paraqet protestën më sublime kundër antivleres.

Premiera e shfaqjes vjen më datë 2 nëntor në ora 18:00 në Teatrin “Faruk Begolli” në AAB. /KultPlus.com

Doli nga shtypi libri “Vëzhgime leksiko-frazeologjike në të folmet e Rrafshit të Dukagjinit”

Doli nga shtypi libri “Vëzhgime leksiko-frazeologjike në të folmet e Rrafshit të Dukagjinit”. Me këtë libër synohet që të plotësohet sadopak gama e gjerë e studimeve leksikore për këto të folme, por edhe të jepet kontributi modest në fushën e leksikologjisë shqiptare.

Libri me titull “Vëzhgime leksiko-frazeologjike në të folmet e Rrafshit të Dukagjinit”, i Naim Berishës, sjell një korpus të rëndësishëm të leksikut dhe frazeologjisë nga një areal i studiuar mirë në rrafshin dialektologjik edhe nga gjuhëtarë të tjerë, porse leksiku i këtyre trevave tani është marrë në një observim më të plotë e më të detajuar, më tërësor.

Libri ndriçon aspekte të sistemit leksikor të një areali të përcaktuar gjuhësor – të Rrafshit të Dukagjinit, e trajton dhe e analizon jo vetëm leksikun dialektor, po sidomos leksikun krahinor, bashkë me frazeologjinë dialektore e krahinore, shpesh në përballje me leksikun e gjuhës standarde. Trajtimi i lëndës së vjelë është bërë duke marrë për ba¬zë parime e kritere studimi të zba¬tuara me sukses në studimet gjuhësore shqiptare dhe sido¬mos në ato që lidhen me objek¬tin e studimit të këtij libri.
Ky botim është rezultat i një pune të gjatë sistematike në terren, për të grumbulluar e sistemuar, grupuar e tipologjizuar fjalë e frazeologji, duke sjellë, kështu, kontribut me interes për studimet e leksikut dialektor të shqipes dhe në përgjithësi për dialektologjinë leksikore. Materiali gjuhësor është trajtuar në pesë krerë tematikë: Fusha tematike në leksikun e Rrafshit të Dukagjinit, Vështrim leksikor dhe etnolinguistik në leksikun e Rrafshit të Dukagjinit, Vështrim leksiko-semantik në leksikun e Rrafshit të Dukagjinit, Fjalëformimi, Leksiku i rrafshit të Dukagjinit dhe fjalorët dialektorë./KultPlus.com