Muaj: Gusht 2017

“Parku i Artit”, një projekt që rivitalizon parkun natyror dhe kthen në një hapësirë arti u prezantua sot në ambientet e Ministrisë së Kulturës. Projekti titullohet “Shokët dhe engjëjt”, një projekt për një hapësirë-kopsht dedikuar politikanit dhe mendimtarit të famshëm italian, Antonio Gramsci-t në qytetin e Tiranës, konceptuar nga Alfredo Pirri, artist dhe arkitekt me ekspozita ndërkombëtare.

Në fjalën e mbajtur me këtë rast ministrja e Kulturës, Mirela Kumbaro u shpreh se “kjo projekt-ide sjell një rifunksionalizim të parkut për një pol të ri kulturor dhe për të parë në dritën e filozofisë së Antonio Gramshit skulpturat e realizmit socialist”. “Ky do të jetë një debat i gjerë kulturor, lidhur me figurën e Antonio Gramshit”, shtoi ajo.

Vetëm një vit e gjysmë më parë Ministria e Kulturës në bashkëpunim me Universitetet e Arkitekturës prezantoi konkursin për përshtatjen e territorit të ish-Kinostudios në Kopshtin e Artit. Qëllimi i projektit ishte krijimi i një hapësire ekspozimi të përkohshme dhe të përhershme për veprat e artistëve të rinj e më gjerë. Një ide e hershme në platformat kulturore të MK-së është kthimi i territoreve të brendshme në një park për art dhe medium, për të gjitha stinët, për aktivitete sociale, kulturore e ekspozita të hapura, për ngjarje rinore e jo vetëm, pa kufij gjinish dhe formash, madje edhe ato më të guximshmet.

Kumbaro shtoi se “rikualifikimi i parkut në një skenë të hapur nuk është një koncept statik”. “Punuam për rikualifikimin e Kinostudios, duke e sjellë jo vetëm një qendër zyrash, por edhe në në një pol kulturor dhe social. Sot kemi disa institucione të artit duke filluar që nga QK e Fëmijëve e deri tek TKOBAKVP. Morëm propozimin nga artisti Pirri për të krijuar një mesazh me një filozofi të caktuar. Ky projekt ka mbështetjen e Regione Puglia-s dhe Fondacionit “Antonio Gramshi””, tha ajo.

Sipas Alfredo Pirrit, “qëllimi është që Antonio Gramsci të kujtohet jo vetëm nëpërmjet ‘një monumenti’ po nëpërmjet realizimit të një hapësire publike të karakterizuar nga prania e artit, por që ka edhe një vlerë qytetare dhe simbolike shumë të fortë: një “kopsht” që strehon brenda tij një instalacilon të përhershëm që na jep një paraqitje mes natyrës dhe historisë”. Një lloj peizazhi natyral në të cilin elementi i egër dhe spontan i natyrës bashkohet me elemente botanikë dhe artistikë, fuqimisht të projektuar në mënyrë të atillë që të krijojnë një ekuilibër në mes asaj që rritet në natyrë në mënyrë të mëvetësishme dhe formave të artit që janë në gjendje të dëshmojnë për integrimin me historinë dhe kulturën.

Bëhet fjalë për një vend me vlerë që është tokë në pronësi publike e cila është ngjitur dhe i përket godinës së Ministrisë së Kulturës së Shqipërisë, aktualisht kjo tokë është thuajse e braktisur dhe në pritje për t’u kthyer në një ambient publik. Kombinimi i emrit të Antonio Gramsci-t me një institucion shtetëror i nivelit më i lartë në fushën e kulturës, do të risillte, në një farë mënyre, në ‘shtëpi’ mendimtarin dhe politikanin e famshëm italian duke kontribuar në zgjerimin e rolit të atij që u konsiderua interpret absolut i cili për herë të parë reflektoi mbi rolin dhe detyrat e intelektualëve në kohët moderne dhe do ta bënte Shqipërinë vendin e parë në botë që i dedikon një vepër të qëndrueshme Antonio Gramsci-t, i cili aktualisht ka frymëzuar me dhjetëra nisma politike, kulturore dhe artistike në të gjithë botën, por që mbeten vepra të momentit për të mos thënë (me qëllim por pozitivisht) jetëshkurtra.

Politikani dhe mendimtari i famshëm italian, Antonio Gramsci konsiderohet simbol i rezistencës ndaj fashizmit, ndërsa të menduarit dhe shembulli praktik i të jetuarit të tij, është aktualisht në qendër të vëmendjes së studiuesve, institucioneve politike dhe kulturore në të gjithë botën. Familja e tij është me origjinë shqiptare, dhe vjen në fakt nga Gramshi, një vend jo shumë larg Tiranës dhe prej aty zhvendosen në Itali ku lind Antonio më 1891. / KultPlus.com

Është një park me rrënoja arkeologjike që përfaqësojnë rënien e një qytetërimi të hershëm Ilir.

Qyteti Ilir i Bylist i vendosur në pllajën e një kodre pran fshatit të sotëm Hekal,dikur shtrihej në një sipërfaqe prej 30 ha e cila mbrohej nga një mur rrethues me gjatësi 2.2 km, gjerësi 3.5 m dhe lartësi 8-9 m i cili ende sot ruhet relativisht mirë.

Muri rrethues ishte pajisur me hyrje dhe kulla të shumta mbrojtëse.

Që në shek. III. p.e.s. qyteti pajiset me monumente të shumta dhe të rëndësishme të tilla si, teatri me kapacitet 7500 spektatorë i cili shërbente jo vetëm për shfaqje të ndryshme teatrale dhe muzikore për banorët e qytetit dhe zonave përqark tij por edhe si vend mbledhjesh ku merreshin vendime të rëndësishme për fatet e bashkësisë byline.

Krahas teatrit qyteti kishte stadiumin e vet, dy shëtitore, njëra prej të cilave dykatëshe, depozitën e ujit, prytaneonin, gjimnazin, altarë, banesa, rrugë etj.

Krahas këtyre monumenteve, qyteti kishte punishtet e veta të poçarisë, ndërtimit, skulpturës, metalpunuesit si dhe punishten e prerjes së monedhave të veta. / KultPlus.com

Ministrja e Kulturës e Republikës së Shqipërisë, Mirela Kumbaro Furxhi është nderuar me urdhrin “Oficere e Nderit në Art dhe Kulturë” nga Ministria e Kulturës dhe Komunikimit të Francës, përcjellë KultPlus.

Ky është njëri nga katër titujt e nderuar ministerialë të Republikës Franceze që akordohen për personalitete në Art dhe Kulturë.

Ky titull iu akordua ministres Kumbaro nga ministrja e Kulturës dhe e Komunikimit e Republikës së Francës, Audrey Azoulay, me motivacionin për kontribut të lartë në fushën e kulturës dhe të bashkëpunimit shqiptaro-francez.

Mirela Kumbao Furxhi ka dhënë një kontribut të veçantë në marrëdhëniet kulturore shqiptare-franceze me synimin promovimi i vazhdueshëm i kulturës shqiptare në Francë dhe në Europë, por edhe forcimi i lidhjeve mes dy vendeve tona në fushën e kulturës dhe trashëgimisë kulturore si ura komunikimi dhe shkëmbimi të vlerave reciproke.

Kujtojmë se Mirela Kumbaro dhe Audrey Azoulay nënshkruan në vitin 2016 Deklaratën për bashkëpunim ndërmjet Ministrisë së Kulturës dhe Komunikimit të Francës dhe Ministrisë së Kulturës së Shqipërisë lidhur me bashkëpunimin kulturor.

Urdhri “Oficere e Nderit në Art dhe Kulturë” jepet për persona të veçantë që dallohen për kontribute të larta në fushën e kulturës dhe komunikimit në Francë dhe në botë. / KultPlus.com

Muzeu Historik Kombëtar, i ndodhur në zemër të Tiranës, fton vizitorët, vendas apo të huaj, që kërkojnë të njohin më shumë nga historia e Shqipërisë, që të mos ngurojnë t’i drejtohen dyerve të tij.

“Temperaturat e larta dhe vetë sezoni i pushimeve, nuk kanë të bëjnë me reduktimin e orëve të punës në këtë institucion. Përkundrazi, që nga fillimi i sezonit turistik në 15 maj e deri në përfundim të tij në 15 tetor, orët e punës në Muzeun Historik Kombëtar janë shtuar. Kjo do të thotë që askush që ka dëshirë ta vizitojë atë të mos stepet nga ideja e ditëve të pushimit javor apo të orëve pushim ndërmjet turneve. Muzeu është i hapur dhe aktiv përgjatë gjithë ditëve nga ora 09.00 e mëngjesit e deri në 19.00 të pasdites”, thuhet në njoftimin e MHK-së në rrjetin social Facebook.

Sipas MHK, natyrisht kësaj atmosfere i shtohet dhe iniciativa më e re, ajo e komunikimit online.

“Eja në muze për t’u njohur me thesare kulturore”, është një program që fton çdo të interesuar jo vetëm fizikisht në pavijonet e këtij Muzeu. Përkundrazi, materialet e trajtuara në këtë hapësirë muzeale vijnë tek çdokush nëpërmjet komunikimit onine.

“Në faqen e tij zyrtare, por dhe me atë të rrjeteve sociale, Muzeu Historik Kombëtar do të jetë aktiv në paraqitjen e informacioneve të zgjeruara. Kjo nuk do të kushtëzohet me aktivitete që zhvillohen brenda këtij institucioni, por dhe ato që kanë të bëjnë me çështjet historike, pra asaj që tanimë jemi mësuar t’i themi: informacion mbi trashëgiminë kulturore”, thekson MHK.

Larmia e objekteve të ekspozuara në Muzeun Historik Kombëtar synon të ofrojë një panoramë gjithëpërfshirëse të kulturës materiale, që u formua në territorin e Shqipërisë dhe ftojnë vizitorin në një itenerar historik, duke ndjekur kronologjinë e ngjarjeve kryesore, që zunë vend në territorin tonë nga antikiteti e deri në ditët tona.

“Postimet do të marrin më shumë vlerë dhe nga fotot përkatëse me të cilat do të shoqërohet çdo informacion i kualifikuar. Dhe kjo përcjellje informacioni nuk do të reshtë asnjëherë. Muzeu Historik Kombëtar nuk mund të shihet thjesht një objekt atraktiv sa i takon arkitekturës, por vetë madhështisë që mbart vlerat historike të një kombi të lashtë. Në zemër të Tiranës, ai përthith disa mijëra vizitorë në vit. Ndërkohë që është shndërruar në një vendtakim seminaresh me nxënës, studentë, e profesionishtë të fushës”, thuhet në njoftimin e MHK-së.

Muzeu Historik Kombëtar

Muzeu Historik Kombëtar u përurua më 28 tetor 1981 dhe është institucioni muzeor më i madh në Shqipëri. I ndërtuar në pjesën perëndimore të sheshit ”Skënderbej”, godina e MHK është një nga veprat më të rëndësishme arkitektonike me rol të veçantë në formimin urbanistik të kryeqytetit shqiptar. MHK ka në fondin e tij 3600 objekte të trashëgimisë kulturore shqiptare, pjesa më interesante e të cilave u përkasin periudhave që nga Paleolititi deri në Antikitetin e vonë (shek. IV e.s); këto janë ekspozuar brenda Pavionit të Arkelogjisë, që numëron në vetvete mbi 400 objekte.

Ndër koleksionet më me vlerë të këtij seksioni janë ato që evidentojnë periudhën arkaike dhe periudhën protourbane ilire të kulturës shqiptare. Në pavionin e Periudhës Mesjetare, me më shumë se 300 objekte, realizohet dokumentimi i procesit historik të vijëmësisë iliro-shqiptare. Koleksioni i objekteve të periudhës Mesjetare përfshin: emblema heraldike të princërve shqiptarë, kolona të katedraleve të shkatërruara, relieve dhe ikona të ikonografëve më të mëdhenj shqiptarë si Onufri (Shek. XVI), David Selenica dhe Kostandin Shpataraku i shek. XIII.

Një objekt tepër i çmuar është epitafi i Glavenicës, punuar me ar nga një princ Shqiptar i shek. XIV, Gjergj Arianiti. Koleksionit të kësaj periudhe i është shtuar dhe pavioni i ri i ikonave qe ka në përmbajtjen e vet një ikonostas nga Elbasani dhe 50 ikona të marra nga koleksioni i Institutit të Monumenteve të Kulturës e të mbledhura nga objekte e kultit gjatë 50 vjetëve të fundit në të gjithë territorin e Shqipërisë.

Pavionet e tjera përmbajnë dokumente e dëshmi të periudhave të tjera si p.sh. të rezistencës kombëtare shqiptare, të Pavarësisë dhe themelimit të shtetit Shqiptar, etj./ KultPlus.com

Në kuadër të shënimit të Ditëve të Mërgatës, sot në Malishevë është hapur edhe panairi artizanal, ku po prezantohen punimet e dorës në veshje, dekorime në bizhuteri, si dhe të ushqimeve tradicionale.

Në hapjen e panairit morën pjesë edhe nënkryetari i Komunës së Malishevës, Rexhep Mazreku dhe drejtoresha për Kulturë, Rini dhe Sport, Blerta Krasniqi.

“Unë ju përgëzoj në rend të parë për punën që po e bëni dhe në të njëjtën kohë, për kultivimin e vlerave të mirëfillta shqiptare, tradicionale, përmes veshjeve dhe ushqimeve, shtrojës dhe mbulojës dhe gjërave tjera nga tradita jonë”, tha Mazreku, me rastin e hapjes së panairit.

Për punën që po bëjnë, sidomos gratë të cilat përmes artit të punimit të veshjeve dhe ushqimeve tradicionale, i ka përgëzuar edhe drejtoresha për kulturë, Blerta Krasniqi. Ajo gjithashtu ka thënë se “panairi tashmë tradicional, organizohet në kuadër të shënimit të ditëve të mërgatës dhe me këtë rast ju ka dëshiruar mirëseardhje edhe të gjithë mërgimtarëve nga Komuna e Malishevës”.

Krasniqi, gjithashtu tha se “përveç panairit, në kuadër të ditëve të mërgatës, mbahet edhe festivali folklorik “Oda e Llapushës”, edicioni i katërt, festival në të cilin prezantohen vlerat e mirëfillta të folklorit”./ KultPlus.com