Artistët që në muret e lagjes pikturuan librat e preferuar të banorëve

Çdo mur apo gardh mund të shndërrohet në një vepër arti, duke sjellë kështu gjallëri e në të njëjtën kohë të jetë më afër njerëzve se çdo pikturë tjetër e vendosur në galeritë e arteve, shkruan KultPlus.

Arti në rrugë është një formë e veprave të artit që shfaqet në ndërtesat përreth një komuniteti, rrugëve apo trenave. Në të shumtën e rasteve arti i rrugës përdoret si formë e të bërit deklaratë publike nga artisti, për shoqërinë në të cilën jeton, e cila shpesh vie edhe në formë revolte.

Artistët Holandezë Jan Is De Man dhe Deef Feed, vitin e kaluar, në një ndërtesë në Utrecht të Holandës pikturuan një mural letrash 3D trompe l’oeil.

Dyshja e kthyen anën e ndërtesës trekatëshe në një raft libra me shumë nivele të mbushur me librat dhe koleksionet e tyre të preferuara si dhe disa tituj fiksional të librave që kanë autorësinë e tyre.

Artistët u kërkuan edhe banorëve të ndërtesës që t’u jepnin titullin librit të tyre të preferuar, në mënyrë që ta përfshinin atë në murale. Ata gjithashtu përfshinë në murale një libër të vogël të zi në anën e majtë të raftit të poshtëm i cili përmban një logo të vogël, por të veçantë të lepurushit Playboy në shpinë.

Që nga koha kur ky mural është bërë pjesë e kësaj ndërtese është bërë një burim artistik për të bashkuar fqinjët, si dhe për njerëzit që vijnë ta vizitojnë dhe t’i shohin muralet. / KultPlus.com

Turistët humbën festivalin e tulipanëve, fermerët u kushtojnë një mesazh të veçantë

Çdo vit, turistët udhëtojnë për në Holandë për të shijuar fushat shumëngjyrëshe të tulipanëve.

Por me pandeminë e koronavirusit e cila ktheu përmbys të gjitha planet e udhëtimeve, turistët nuk patën mundësi këtë vit të marrin pjesë në spektaklin e përvitshëm të luleve.

Sipas CNN, kjo është arsyeja pse “Dutch Daffodils”, një fermë lulesh në Holandë e një blog udhëtimi kushtuar tulipanëve në Holandë, u bashkuan për të krijuar një mesazh të veçantë për ata që janë të trishtuar për humbjen e luleve këtë vit.

“Ne i organizuam tulipanët në mënyrë të tillë që të shkruanim këtë mesazh. Nga familjet tona tek ato tuajat!” 

“Dutch Daffodils” shkroi një postim në Facebook fjalinë “Shihemi Vitin tjetër” të shkruar në lule, së bashku me një zemër. 

“Shpresojmë që kjo të ndriçojë paksa ditën tuaj dhe shpresojmë t’ju shohim vitin tjetër! Shumë dashuri!’, janë shprehur ata.

Holanda ka më shumë se 38 mijë raste të konfirmuara të koronavirusit, sipas të dhënave nga Universiteti Johns Hopkins. / KultPlus.com

Ndërtohet në Holandë parku madhështor i përrallave

Parku me temën e përrallave të vëllezërve Grimm është bërë tashmë realitet. Të apasionuarit mbas historive të përrallave që duan të vizitojnë parkun në Holandë do të magjepsen me pamjet e tij, transmeton BW.

Njëra nga historitë e vëllezërve Grimm tregon gjashtë princa të shndërruar në mjellma nga njerka e tyre xheloze dhe është detyrë e motrës së tyre të vogël Elisa që të prishë magjinë dhe t’i kthejë vëllezërit e saj përsëri në njerëz.

Kjo është bërë realitet nga krijuesit e parkut “Efteling”, ku fëmijët mund të shijojnë personazhet që kanë lexuar në përralla.

Vizitorët mund të ecin nëpër kështjellë ose të zgjedhin të udhëtojnë me njërën nga mjellmat tre metra të gjatë përgjatë një rrjedhe të vogël uji. / KultPlus.com

Fotografi shqiptar pjesë e ekspozitës së Jimmy Nelson në Holandë

Jeta Zymberi

Lufta e fundit në Kosovë ka bërë që shumë familje shqiptare të mbesin jashtë Kosovës. Të detyruar të largohen nga pushtimi serb, ato familje krijuan një jetë të re në vende të ndryshme të botës. Një prej këtyre është edhe familja Zymeraj nga Gjakova. Rrugët i drejtuan drejt Holandës ku edhe sot jetojnë. E vështirë edhe sot të jesh i pranuar pa ndonjë paragjykim, por të rinjtë e kësaj familje po ja dalin me sukses. Puna dhe angazhimi i tyre kanë bërë që ata të pranohen në rrethin e shoqërisë atje e mandej të fitojnë respekt të madh, shkruan KultPlus.

“Ka qenë e vështirë dhe vazhdon ende në disa raste. Në fillim më shumë kam qëndruar në shtëpi, e kisha problem të luaja më fëmijë të tjerë dhe të krijoja shoqëri, por kohën e kam shfrytëzuar për të marr mësime në fushën e teknologjisë, për fotografinë dhe modën, fusha që mua më prekin më shumë. Por, tashmë në shkollë njerëzit janë më të hapur dhe puna më ka bërë që të njoh shumë njerëz e të krijoj shoqëri në gjithë Holandën.

Arijani, sot merret me fotografinë. Këtë pasion ai po e zhvillon çdo ditë e më shumë dhe tashmë është duke u shkolluar për Bachelor Degree of Arts në Maastricht Academy of Arts, për fotografi. Fotografitë e tij kanë arritur të marrin vëmendje në Holandë dhe kjo është një arsye më shumë që po e nxit atë për të punuar vazhdimisht.

Për të fotografia është një mënyrë ideale për tu shprehur dhe një mundësi e mirë për të pasur ndikim në botë.

Portretet dhe fotografitë për modën janë ato që përbëjnë pjesën më të madhe të albumit të tij, por Arijani ushtron edhe profesionin si dizajner grafik dhe fotograf i arkitekturës, të gjitha këto janë të lidhura bashkë dhe po i ndihmojnë atij që të jetë një fotografë më i kompletuar.

“Fotografia për mua është një art shumë interesant, është një mënyrë për t’i treguar botës qysh unë e shijoj botën nga sytë e mi”, thotë Arijani për KultPlus.

Ai tutje tregon se fotografia e tij vjen ndryshe për faktin se fillimisht ai njihet me personalitetin e njeriut që do e fotografojë, e që atë personalitet ta prezantojë në fotografi.

“Secilin njeri apo objekt që e fotografon, fillimisht duhet ta respektosh, ideja jote mund të realizohet edhe me telefon apo çfarëdo kamere, por ka rëndësi mënyra se si e tregon”.

Për të fotografuar, Arijani ka dy stinë të preferuara. “Stina e dimrit dhe vera, janë dy stinë shumë të ndryshme, por në secilën prej tyre mund të bësh të njëjtat fotografi por me tregime të ndryshme. Dimrit mund të realizosh fotografi përmes të cilës tregon një ngjarje më të brendshme, më personale dhe të ambienteve kryesisht të shtëpisë, ndërsa vera është më e lirë, mund të shkosh gjithkund dhe të jep hapësirë të shprehesh më shumë”.

Arti i tij ka marrë vëmendje në Holandë dhe ai ka arritur të nënshkruaj disa kontrata me marka të ndryshme atje. ATHRTY Amsterdam, janë të parët që kanë përqafuar artin e fotografit shqiptar. Vizioni i njëjtë i ka bashkuar dhe ata vazhdojnë të sjellin fotografi shumë të bukura bashkë. Por jo vetëm modë. Arijani fotografon edhe arkitekturë, ai ka krijuar lidhje me shumë muze dhe galeri të ndryshme.

Javën e kaluar, fotografitë e tij u bënë pjesë e ekspozitës së madhe të fotografit të njohur Jimmy Nelson.

“Shkolla ku unë studioj, kanë përzgjedhur fotografitë e mija që të bëhen pjesë e kësaj ekspozite dhe ky me të vërtetë ishte një nder i madh. Unë jam vetëm student i vitit të dytë dhe këtë e vlerësoj arritje të madhe. Jimmy Nelson ka një bagazh të madh dhe është tejet i vlerësuar dhe për mua është ëndërr që kam arritur të ekspozoj në një vend me të”.

Në këtë ekspozitë, Arijani ka prezantuar një mix të fotografive. Portrete dhe dizajne të ndryshme ai ka shpalosur para publikut në Holandë të cilët e përgëzuan për punën e mrekullueshme.

Përkundër asaj që kjo ekspozitë ishte si një ëndërr e bukur për të, ai ka një tjetër ëndërr të madhe. Hapjen e një ekspozitë në Kosovë.

“Dëshira ime e madhe është të realizojë një ekspozitë në Kosovë. Por jo vetëm kjo, ideja ime është që në të ardhmen të kem mundësi të jap mësim për fotografinë dhe artet tjera për fëmijët në Kosovë.”

Vizitat në Kosovë ai nuk i ka të rralla, por megjithatë të shkurta. Por këtë kohë ai e shfrytëzon që ndonjë pjesë të saj ta marrë me vete falë fotografisë.

“Më pëlqen shumë kultura në Kosovë, sidomos njerëzit në fshatra. Mundohem që kohen kur jam atje ta shfrytëzoj në maksimum që t’i fokusoj vendet dhe njerëzit që më pëlqejnë”.

Ai ka treguar për KultPlus që është duke e realizuar një projekt në Holandë. Ky projekt i cili do botohet si libër, lidhet me njerëzit që shprehen përmes modës. Ndërsa Arijani ka menduar që gjithçka të realizojë në Kosovë e ta prezantojë një pjesë të kulturës së Kosovës në Holandë.

Të ardhmen Arijani e sheh duke ndihmuar fëmijët që të zhvillohen sa më shumë në këtë art, të udhëtojë sa më shumë nëpër botë e të punojë me të gjitha llojet e modeleve. / KultPlus.com

‘T’padashtun’ nominohet për çmimin e kritikëve të filmit holandez

‘T’padashtun’ nga Edon Rizvanolli, është nominuar për çmimin e kritikëve të filmit holandez, shkruan KultPlus.

Filmi ka marrë pjesë në Festivali e Filmit Holandez i cili mbahet për çdo vit në fillim të vjeshtës. Ky film i cili pati premierën në Karlovy Vary, është filmi që do të përfaqësoj Kosovën si propozimi zyrtar për konsiderim në kategorinë ‘Filmi më i mirë i huaj’ të Akademisë Oscar.

‘T’padashtun’ me skenar dhe regji nga Edon Rizvanolli është dramë e cila merret me pasojat dhe traumat e shkaktuar nga lufta e vitit 1999 në Kosovë. Filmi trajton ngjarjen e një adoleshenti i cili jeton me nënën e tij kosovare në Amsterdam dhe që rikthimi i traumave të nënës së tij ia rrotullojnë botën.
Në rolet kryesore janë Adriana Matoshi dhe Jason de Ridder.

Ky projekt është i mbështetur nga Qendra Kinematografike e Kosovës dhe Fondi i Filmit Holandez./ KultPlus.com