Muaj: Korrik 2017

Komuna e Prishtinës ka filluar rregullimin e parkut të të martuarve, park ky i pari i këtij lloji në vendin tonë.

Tashmë po punohet për rregullimin e shtigjeve, ulëseve dhe hapësirave të tjera të këtij parku, në kuadër të projektit paraprak të Komunës.

Rregullimi bazik i parkut pritet të përfundojë shumë shpejt, dhe më tutje ai do të pasurohet në vazhdimësi nga qiftet që do të martohen në kryeqytet. Secili nga këto qifte, do të ketë mundësi të mbjellë një fidan në këtë park. Në këtë formë, përveç që do ta shënjojnë lidhjen e tyre, do të ndikojnë direkt në zgjerimin dhe kultivimin e hapësirave të gjelbra.

Ky është veç një hap i vogël, por tejet i rëndësishëm në përmirësimin e ambientit në kryeqytetin tonë. Komuna e Prishtinës angazhohet për sa më shumë hapësira të tilla të gjelbra, dhe fton qytetarët për bashkëpunim në këtë drejtim. / KultPlus.com

Drejtori i Agjencisë Kombëtare të Bregdetit (AKB) në Shqipëri, Auron Tare, ka hedhur akuza në drejtim të pushtetit vendor të Bashkive bregdetare për mungesë bashkëpunimi me strukturat turistike shqiptare, ku këto të fundit sipas Tares, as këtë sezon nuk do të arrijnë t’u garantojnë pushuesve standardet e duhura të cilësisë së ujit, si dhe të shërbimit nga stacionet e plazheve.

Ndërkohë që kreu i AKB-së, Tare, ka shprehur shqetësimin se ishujt e Ksamilit po shfrytëzohen për biznes e kjo sipas Tares, është e palejueshme, shkruan sot Koha Ditore.

Ndërsa për sa i përket standardit të ulët të cilësisë së plazheve për shkak të ujit dhe të shërbimit nga stacionet e plazheve, kreu i Agjencisë Kombëtare të Bregdetit, Auron Tare, thotë se shkaku kryesor është mungesa e bashkëpunimit nga ana e njësive vendore.

“Ende unë mendoj se nuk jemi në standardin që duhet të jemi, sepse kemi kushtet që duhen për të qenë në një nivel më të lartë, aq më tepër që shumë subjekte private kërkojnë standarde. Por fatkeqësisht, për arsye nga më të ndryshmet, Bashkitë të cilat kanë detyrimin ligjor për të rritur standardin e kërkesës për cilësinë e plazheve, ende nuk i kanë zbatuar ato standarde që kërkohen nga ligji dhe nga vendimi i Këshillit të Ministrave për plazhet, siç është pastrimi i plazheve, pra shumë i rëndësishëm; është edhe standardi i sigurisë në plazhe”, thekson Auron Tare.

Kreu i AKB-së thotë se cilësia më e dobët e ujit haset në plazhet e Durrësit e Golemit, për shkak të ndërtimeve të shumta dhe shfrytëzimit pa kriter në vite. / KultPlus.com

Mirdita dhe zemra e saj Oroshi, ndodhen në lindje të Rrëshenit. Kjo është një zonë malore mjaft atraktive me mundësi të shumta për zhvillimin e llojeve të turizmit malor. Janë të përhapura lëndinat, burimet, shpatet e thepisur dhe kullotat alpine.

Zona më interesante është Nënshejti me burime uji dhe Fushat e Lugjeve me mundësi për turizmin malor. Oroshi është gjithashtu një vend i rëndësishëm historik.

Këtu ndodhej bërthama e krijimit të krahinës së Mirditës dhe njëkohësisht në shek. XV ka qenë një nga qendrat më të rëndësishme të rezistencës anti – osmane. Në Orosh ka qenë edhe abacia e Mirditës.
Kjo është një zonë me mjaft objekte të trashëgimisë kulturore dhe të kultit. Ka një histori të pasur bëmash dhe ngjarjesh. Përveç Nënshejtit e Lajthizës, janë edhe fshatrat Ndërshenë, Shëngjin e Lari, që mundësojnë turizmin familjar. Mikpritja në traditën e mirditorit është një nga virtytet më të rëndësishme e të hershme. Por turizmi familjar për mirditorët është një praktikë e re, që kërkon edhe parapërgatitje për krijimin e një mjedisi tërheqës për turistët. Kjo zonë nuk ka vetëm natyrën e bukur, por edhe një histori qindra vjeçare. Edhe pylli, edhe guri, edhe majat e maleve e kanë një histori. Për këtë flasin qartë edhe toponimet e shumta, që ka në këtë zonë.

Mirdita ka edhe shumë qendra arkeologjike si në Prosek, Përlat e Bukmirë, Kodër Rrëshen dhe Bukël. Të njohura në harta dhe si Bjeshkët e Kuzhnenit, përbëjnë një bllok të pandarë Bjeshkët e Kaçinarit me bjeshkët e Tërbunit (Pukë), me majën më të lartë atë të Suçelit l476 metra. Bjeshka e Kaçinarit shtrihet në pjesën veriore të lumit Fani i Madh. Është përgjithësisht një bjeshkë nga më interesantet në veriun e Shqipërisë, me dy fusha (Laja e Madhe dhe Laja e Vogël), Fushën Gjobardh, Fushë Benën, Livadhin e Hamzit etj.

Është shfrytëzuar për disa dhjetëvjeçarë lënda pyjore e saj, si dhe bimët industriale qershigla, kërpudha etj. Burimet ujore të kësaj bjeshke sigurojnë bimësi të shëndetshme në fshatrat Kuzhnen, Gjegjan, Kaçinar, Arrës, Shtuf, Shëngjergj, Gjazuj. Nga kjo bjeshkë nis burimi i lumit të Gjadrit që përshkon Zadrimën me të cilën kufizohet Mirdita në pjesën perëndimore të saj. Kjo është një zonë me bukuri të rrallë natyrore ku mund të praktikohet turizmi gjithëpërfshirës, i gjelbër, i bardhë, kulturor dhe historik.

Në Orosh gjendet dhe një shpellë tepër e veçantë, “Shpella e Pashës” në Bjeshkët e Oroshit. Specialistët e AdZM-së Lezhë, kanë vendosur shkallë në këtë shpellë me qëllim që ajo të bëhet e vizitueshme nga turistët.

Kjo ndërhyrje u bë në bashkëpunim me banorët e zonës, duke bërë të mundur që kjo shpellë të jetë funksionale dhe e vizitueshme edhe në brendësi të saj. Që ky atraksion turistik të bëhet i prekshëm, kërkohet një vëmendje më e madhe në drejtim të infrastrukturës rrugore. Ajo është e vjetëruar dhe tepër e konsumuar, gjë që e bënë të vështirë turizmin në këtë zonë mbreslënëse./KultPlus.com

30 vite më parë, përkthyesi i telegrafeve të diktatorit, Ilir Bulka u arratis nga vendi. Ajo që bëri bujë në mediat Europiane nuk ishte arratisja e tij, por dëshmia e përkthyesit për jetën personale të Enver Hoxhës.

Iliri Bulka ishte i pari që zbërtheu figurën e diktatorit në një tjetët spektër. Dëshmia e tij se Hoxha ishte homoseksual bëri xhiron e disa gazetave prestigjoze greke e më pas italiane, oshëtima e të cilave mbërriti deri në Tiranën e atyre viteve.

“Kisha 10 vjet që planifikoja të ikja, por nuk gjeja rastin. Thashë të pres sa të vdesë Hoxha e të shoh se mos ndryshon situata, por e pashë se nuk ekziston as edhe një fije lirie. Ekonomia është në gjendje shumë të keqe. Në treg mungojnë të gjitha. Në janar – vjet – pashë se nuk ka asnjë shprese dhe mora vendimin që të arratisem. Hoxha ishte homoseksual. Këtë e dinë mirë njerëzit e oborrit të tij, por edhe shumë të tjerë që e patën njohur qysh kur ishte për studime në Paris,” ka deklaruar Bulka.

Ndër lajmet e publikuara pas kësaj dëshmie, artikujt flisnin për ministra, dashnorë të dikatorit të vrarë nga vetë dora e tij. Ditën e djeshme, Bulka e ripohoi dëshminë e tij të para tridhjetë vitesh. Due folur për Hoxhën, përkthyesi tha se diktatori u bë aq paranojak sa ndaloi këngët e dashurisë, porzitë populore dhe kërcimet e balerinëve meshkuj e femra në televizon. Më pas, Bulka tha se: “Homoseksualiteti i Hoxhës, për të cilin e shoqja ishte në dijeni, ishte një sekret që e dinin zyrtarët më të lartë komunistë të vendit. Të kundërshtoje marrëdhëniet me Hoxhën ishte njëlloj si të dënoheshe me vdekje. Paranoja e tij u shtua me moshën bashkë, duke bërë që ai të vriste shumë nga dashnorët e tij pasi i kishte detyruar të hynte në marrëdhënie seksuale me ta”.

Gjatë intervistët me median amerikane UPI, Bulka tregoi se Hoxha kërkonte të njihej personalisht me të gjithë shkrimtarët, poetët dhe kompozitorët e rinj shqiptarë. Dontetë kuptontë nëse ata përbënin kërcënim për të dhe kërkonte dashnorë.

Të dhëna dhe deklarata rreth prirjeve seksuale të diktatorit Hoxha kanë qarkulluar edhe në fillim të viteve ’90 dhe në mungesë të provave konkrete, thashethemnaja është shuar sërish, deri më sot. / KultPlus.com

Qeveria shqiptare po merr pjesë në sesionin e 41 -t të Komitetit të Trashëgimisë Botërore të UNESCO-s, që zhvillohet në Krakow, Poloni në datat 2-12 korrik 2017.
Delegacioni shqiptar përfaqësohet nga ambasadorja e Republikës së Shqipërisë pranë UNESCO-s Venera Domi, drejtoresha e Institutit të Monumenteve Arta Dollani dhe Kozeta Angjeliu-Drejtoria e Trashëgimisë Materiale dhe Muzeve në Ministrinë e Kulturës. Komiteti i Trashëgimisë Botërore përbëhet nga 21 përfaqësues të Shteteve Pjesëmarrëse në Konventë, të cilët po diskutojnë në lidhje me mbrojtjen e trashëgimisë botërore kulturore dhe natyrore të zgjedhur nga Asambleja e Përgjithshme e Shteteve Pjesëmarrëse në Konventë.

Delegacioni shqiptar raportoi për gjendjen aktuale në Qendrat Historike Berat dhe Gjirokastër, në mbrojtje të UNESCO-s dhe shprehu edhe njëherë vullnetin dhe angazhimin e qeverisë shqiptare për mbrojtjen e trashëgimisë kulturore duke theksuar se në çdo hap respektohen rekomandimet e UNESCO-s, ndërsa raportoi se shteti shqiptar ka ndërhyrë në një numër të konsiderueshëm objektesh në Gjirokastër dhe në Berat, si dhe ka ngritur disa operacione financiare me vlerë të lartë siç është projekti i restaurimit të Qafës së Pazarit me Fondacionin Shqiptaro Amerikan për Zhvillim, marrëveshja me Bankën Botërore për Beratin dhe Gjirokastrën, shkruan gazeta shqip.

Sesioni 41-t i Komitetit të Trashëgimisë Botërore miratoi pa vërejtje progres-raportin e paraqitur nga Qeveria shqiptare për Qendrat Historike Berat e Gjirokastër. Sesioni 41-t i UNESCO-s vlerësoi bashkëpunimin shumë efikas që është vendosur me Ministrinë e Kulturës dhe vuri theksin edhe në një fushë tjetër me rëndësi si mjedisi, ku edhe këtu UNESCO po jep një asistencë të vyer me implementimin e projektit për forcimin e menaxhimit të përbashkët të Liqenit të Ohrit, në përfundim të të cilit pritet që pjesa shqiptare të regjistrohet në Listën e Trashëgimisë Botërore, duke iu bashkuar pjesës maqedonase./ KultPlus.com