Autor: KultPlus

Ky është filmi i parë i animuar në shqip, i realizuar në vitin 1975

Posted on by KultPlus

Viti 1975 shënoi një sukses të ri, u prodhua i pari film multiplikativ shqiptar (teknika e kartonave) “Zana dhe Miri” nga piktori Vlash Droboniku i cili mbasi kreu studimet në Institutin e Lartë të Arteve në Tiranë, bëri një specializim të shkurtër në studion “Animafilm”në Bukuresht (Rumani).Filmi multiplikativ ishte një domosdoshmëri e kohës për të mbushur një boshllëk të ndijshëm për filmat për fëmijë, ndonëse tematika që trajtuan ata nuk ishte vetëm për botën fëminore; shkruan kritiku i kinemasë Abaz Hoxha.
Filmi multiplikativ mori një zhvillim të shpejtë, një vit më vonë, 1976, u prodhuan 4 filma. Ekipi krijues u zgjerua ndonse baza teknike ishte ende e dobët mbasi u përdorën aparatura të vjetra të cilat u adaptuan për këtë qëllim. Viti 1977 një hap cilësor, nga kartoni i animuar realizohet filmi i parë me vizatime “Zhgarravinat” me regjisor-piktor Bujar Kapexhiun.

Ky ishte një film mjaft i suksesëshëm i cili u nderua me Kupën e Festivalit të Dytë të Filmit Shqiptar për gjininë e tij më 1977 dhe me çmimin e Parë në Festivalin e Tretë të Filmit Ballkanik në Stamboll (Turqi); duke shënuar kështu edhe të parin çmim për filmat shqiptarë në Festivalet Ndërkombëtare të Filmave.

Teknikat e filmit multiplikativ kombinohen midis tyre, lëvizjet bëhen më ekspresive, me shprehje më të qarta karakteresh, me një ndërtim më origjinal në dramaturgji e me kërkesa të veçanta të stileve grafike për seicilin krijues. Më 1979 regjisori Esat Musliu, piktori Astrit Tota dhe operatori Faruk Basha prodhuan të parin film me kuklla “Vajza me pata”, teknikë që u pasua më vonë në një sëri filmash të Vlash Drobonikut. U rritën kuadrot dhe brenda pak viteve prodhimi i filmave të kësaj gjinie u rrit shumë shpejt. “Në fillim të viteve ‘80 prodhoheshin çdo vit 12 filma multiplikativë të teknikave të ndryshme.

Kjo rritje ishte rezultat i punës këmbëngulëse të krijuesve të këtij sektori. Këta filma u mirëpritën nga spektatorët e moshave të ndryshme, por veçanërisht nga të vegjëlit”; thotë Hoxha. Tipari dallues i tyre ishte karakteri kombëtar në subjekt,skenografi, psikologji. Ata transmetuan tek spektatori i vogël një moral të shëndoshë dhënë nëpërmjet të një humori bindës e të kuptueshëm por që nxiste fantazinë e tyre.

Baza teknike u rrit gradualisht duke kaluar në atelie më të modernizuara që dhanë mundësi për xhirime më të komplikuara dhe teknika më të avancuara. U krijua një bërthamë e konsiderushme krijuesish të gjithë profileve-skenaristë, regjisorë, piktorë, operatorë, multiplikatorë, kompozitorë etj të talentuar që e ngritën sektorin e tyre në lartësi përherë më të mëdha duke realizuar shumë filma cilësorë që u mirëpritën në publikun shqiptar dhe të huaj.

Duhet theksuar se filmi vizatimor iu shmang që në fillimet e tij politizimeve dhe diktatit ideologjik, ndoshta edhe vetë nga natyra e tij ku sundonte lufta midis së mirës dhe të keqes që përfaqësojnë një nga normat bazë të moralit të përgjithëshëm njerëzor sikurse u mbështetën edhe në përrallat popullore.

Ndërsa themeluesit e filmit vizatimor u bënë Vlash Droboniku e Bujar Kapexhiu, mbas tyre vijuan një plejadë e tërë piktorësh dhe regjisorësh të suksesëshëm si Tonin Vuksani, Boris Ikonomi, Gazmend Leka, Artur Muharremi, Esperanca Konomi, Majlinda Agolli, Artur Dauti, Robert Qafëzezi, Artan Maku, Sokol Xhahysa, Gjin Varfi, Stefan Taçi, etj si dhe një ansambël i tërë piktorësh ekzekutues dhe multiplikatorësh si Natasha Vodica, Diana Hoxha, Beti Kumi, Suzana Thaçi, Alma Bengu, Ana Arapi, Suzana Varvarica, Elefteri Milla,…. etj.

Një kontribut të rëndësishëm në xhirimin e filmave për fëmijë dhanë kinooperatorët Tomi Vaso, Diana Diamanti, Jovan Kondakçi, Beqir Vaqari,Vangjush Valla, Sonja Mamaqi, etj. Në këtë mënyrë xhirimi i filmave vizatimorë filloi të konsolidohesh dhe të rritej nga viti në vit duke u bërë e mundur që deri në vitin 1995 të ishin realizuar mbi 160 tituj filmash vizatimorë të teknikave të ndryshme./gazeta shqip

‘The New Body’ nga Astrit Ismaili sonte në Digital Spring Festival

Posted on by KultPlus

Artisti nga Kosova Astrit Ismaili, do të prezantohet sonte në “Digital Spring Festival” me projektin tij të titulluar “The New Body” në ARGEkultur në Salzburg, shkruan KultPlus.

Artisti në kë projekt krijon një trup që shkon përtej kapaciteti të tij natyral dhe është i hapur për mënyra të tjera- një trup që tejkalon funksionin e tij të zakonshëm si vend për negocimin e çështjeve të tilla si raca, etnicitetit, gjinisë, gjuhës dhe politikës së klasës.

Projekti ka për qëllim të sfidojë kapacitetet dhe kufizimet e paracaktuara, fizike dhe mendore të trupit, duke ndryshuar elementët ekzistuese dhe duke shtuar elemente të reja. Kështu që tingujt të cilët lëshohen gjatë lëvizjeve mendohen që të shfaqen si pjesë të brendshme të trupit. Tinguj këto të cilat janë të ndryshëm varësisht nga lëvizjet.

Duke e ndarë trupin me tinguj, artisti trajton paragjykimet e supozuara dhe mundëson që të kapërcehet nga pikëpamja tradicionale në perspektiva të reja.

“The New Body” do të prezantohet me performancën që do të jetë live nga artisti dhe pastaj me video të cilat do të projektohen si holograme për të dhënë ndjesinë e prezencës së artistit gjatë ekspozitës.=
Performanca do të jetë më 13 mars dhe 14 mars, në ora 19:30. Istalacioni më 17 mars dhe 18 mars 18:30. Ndërsa më pas ky projekt do të vazhdojë më 23 mars në Brisfelden në Zvicër.

Astrit Ismaili ka përfunduar studimet e larta në Fakultetin e Arteve të bukura në Prishtinë. Më pas ai vijoi studimet master në Universitetin e Arteve të Amsterdamit, në programin e DasArts Master of Theatre. Në artin e tij bëhen bashkë disa mediume si fotografia, muzika, dhe video-performanca. /KultPlus.com

‘Shfaqja e fundit e Marie Gjonit’ për Bekim Lumin

Posted on by KultPlus

Tashmë janë shpeshtuar aktivitetet artistike për ta ndihmuar regjisorin Bekim Lumi, i cili po përballet me sëmundjen e rëndë të kancerit, shkruan KultPlus.

Për ta ndihmuar regjisorin, do të shiten 200 kopje të dramës “Shfaqja e fundit e Marie Gjonit”. Këtë e ka bërë të ditur vet Surroi, shkruan KultPlus. “Drama e ndaluar, ‘Shfaqja e fundit e Marie Gjonit’, nesër në Skenën e Vogël. 200 kopje për Bekim Lumin”, ka shkruar ai në rrjetin e tij social në Facebook.

Paratë e mbledhura do të përdoren për tu solidarizuar me regjisorin dhe profesorin Bekim Lumi, një artist që për vite me radhë ka dhënë kontribut të jashtëzakonshëm për skenën artistike dhe teatrale si dhe edukimin e studentëve dhe artistëve të rinj./KultPlus.com

“Shqiptarët i ka çmendur mendjemadhësia”, 15 këshilla të Mit’hat Frashërit, që tregojnë shqiptarin e vërtetë

Posted on by KultPlus

“Shqiptarët do t’i fitojnë të gjitha betejat, pasi të mbarojnë betejën e fundit mes tyre”.

Kjo është thënia simbol e Mit’hat Frashërit, alias Lumo Skëndo, e thënë në vitet ’30 kur shkëlqeu një plejadë dhe traditë letrare, por dhe elitare në Shqipëri.

Mit’hat Frashëri u lind më 25 mars 1880 në Janinë; vdiq më 3 tetor 1949 në Nju-Jork, SHBA.

Ishte i biri i Abdyl Frashërit dhe nipi i Sami Frashërit dhe Naim Frashërit.

Ai e njohu shumë pak babain e tij dhe u rrit nën kujdesin e Samiut dhe Naimit.

Ai është konsideruar si njëri nga intelektualët më të shquar të brezit të vet. Gjatë pesë dekadave të sundimit komunist, ai mbeti i hetuar dhe u quajt “reaksionar”, “tradhtar” etj.

E vetmja tradhti që kishte bërë ishte ajo ndaj ideologjisë komuniste dhe ideologëve të saj…

Pa u zgjatur shumë te veprimtaria letrare dhe patriotike e Mit’hat Frashërit, e cila studiohet që në shkollë dhe interneti “gëlon” me to, supershendeti.com ka përzgjedhur disa nga thëniet e tij më të spikaura për shqiptarët, që duket se do të mbeten gjithnjë aktuale; sado shekuj kalojnë.

Ja çfarë thotë Mit’hat Frashëri për shqiptarët:
1- Shqiptari prej natyre është kotësidashës, plot vanitet dhe egoizëm. Nuk i pëlqen kurrë të shohë dhe të njohë fajin dhe të metën e tij: i pëlqen kurdoherë të ngarkojë një tjetër.

2- Shqiptarët, megjithëse në pjesën më të madhe myslimanë, nuk e kanë konsideruar veten kurrë turq. Në të kundërtën, ata kishin një nocion të qartë për individualitetin e tyre dhe një hendek i thellë i pengonte ata të ngatërroheshin me racën e pushtuesve.

3- Kur merr një detyrë, ki disiplinë e durim. Shqiptarin e ka prishur mungesa e disiplinës dhe zjarri i padurimit

4- Shqiptarin e ka prishur mosbindja dhe jo bindja. Nis ti më parë të japësh shembullin e bindjes jo të verbër.

5- Hiqe veten si pak të mençur dhe pak të ditur. Mendjemadhësia na ka çmendur gjer më sot.

6- Duhet të kemi kurajo të themi të vërtetën, të bardhës t’i themi të bardhë dhe të zezës – të zezë.

7- Mos e qorto dhe mos e shaj shqiptarin për fajin që ka bërë, se ajo është mënyra më e fortë që ta bësh të këmbëngulë në atë faj. Merre me të mirë dhe shiko ta bindësh, pa pasur as pamjen e të dhënit këshillë.

8- Shqiptari, duke mos qenë i mësuar me jetë politike, dua të them, duke mos pasur gjer më sot shtet, qeveri dhe independencë, s’ka kuptuar dot akoma barrën, detyrat dhe përgjegjësitë që rrjedhin nga një jetë indipendente.

9- Patrikularizma, lokalizma dhe ekskluzivizma tek shqiptari rrëfehen me atë mani që ka secilido të marrë emrin e fshatit ose të qytetit si emër familjeje. Kur piqen dy shqiptarë, pas gëzimit të parë, pyetja esenciale është: nga të kemi zotëri?

10 – Shumë herë ideali për shqiptarin është të qenët i zoti, me çdo mënyrë që të jetë. Pa dyshim, duke pasur horizontin të ngushtë, nuk mund të kërkojë veç sukseset e lehta.

11- Vetëm një proverb të mirë di: ”Trimi i mirë me shokë shumë”. Por kur mendoj fjalën e Ali Pashës: dy shqiptarë janë shumë! Atëherë kam dëshirë ta kthej proverbin: ”Trimi i mirë me shokë…pak!”

12 – Shpëtimi i Shqipërisë do të vijë me anë të vetes tonë.

13 – Mos u hidhëro po të shkoj tjetri para, edhe pse nuk ndenje dot në krye. Zilia na ka lënë të panderuar.

14 – Shpesh herë zemërimi ynë vjen jo se kemi të drejtë, po se kemi faj dhe na vjen ligsht që na e shohin të tjerët.

15 – Dhembja më e madhe është pikëllimi i brendshëm, jo ai qe rrëfehet./konica.al

Pse myslimanët nuk luten shqip?

Posted on by KultPlus

Gani Mehmetaj

Perandoria turke që nga fillimi i islamizimit të dhunshëm në Gadishullin Ilirik, i shpalli luftë kombit dhe gjuhës sonë. Luftën nuk e pushoi asnjëherë. Me Shqipërinë nuk bëri armëpushim e paqe, ndërsa bëri armëpushim e lidhi marrëveshje paqe më Serbinë, Greqinë, Rumaninë e Bullgarinë. Me Shqipërinë nuk i përcaktoi as kufijtë, që do të ndalte sulmet serbe, greke e malazeze, por bëri marrëveshje të fshehtë ushtarake me armiqtë tanë, duke ua dhënë territoret shqiptare fqinjëve kriminelë, pasi ushtria turke i vrau e ua dogji shtëpitë shqiptarëve.

Turqia po ashtu lidhi një varg marrëveshjesh me Serbinë e Greqinë për zhvendosje të popullatës: dha grekë nga Anadolli e mori shqiptarë nga Selaniku, Trakia lindore e Çamëria. Turqia bleu me para shqiptarë të okupuar nga Serbia dhe i dërgoi në fund të Anadollit për t’ia ruajtur kufijtë me Kurdistanin.

Edhe gjatë okupimit turk, bullgarët, serbët, grekët e rumunët patën të drejta e privilegje, i kishin shkollat laike e predikimin në kisha në gjuhën e tyre amtare, nuk i detyronin me forcë të shkonin në luftërat e perandorisë turke, ua pranonin kombin, gjuhën e fenë.
Ndërkaq shqiptarët Porta e lartë i vriste, i ndiqte, nuk ua lejonte gjuhën shqipe në shkolla e në predikimin fetar.

Që ta përshpejtonin shkombëtarizimin, zyrtarët turq lejuan hapjen e 3000 shkollave në gjuhë greke bullgare, serbe e rumune në krahinat shqiptare, por shkolla shqipe nuk lejuan. Xhamitë i ndërtuan mbi kishat shqiptare katolike e ortodokse, ndërsa nëpër xhami urdhëruan lutjet e predikimi në arabisht e turqisht. Kishat ortodokse e katolike ua morën shqiptarëve e ua dhanë serbëve.

Deri vonë në Shqipëri (Dardania ishte një tërësi me Shqipërinë) hoxhallarët i sillnin nga Turqia, Rusia e Arabia. Dikur nisën t’i rekrutonin edhe nga territoret shqiptare, kryesisht ardhacak aziatikë të natyralizuar, por më parë ua shpërlanin trurin, i bënin antishqiptarë të tërbuar. Sot pjesa më e madhe e hoxhallarëve janë antishqiptarë sa edhe serbët.

Meqë luftën kundër shqiptarëve nuk e kanë pushuar, myslimanët nuk luten shqip. Prandaj shqiptarët që deklarohen myslimanë janë shtresa më e nëpërkëmbur dhe më e diskriminuar në dy shtetet e tyre.
Një armatë hoxhallarësh gjysmë analfabetë, i nëpërkëmbin besimtarët, ua përbuzin gjuhën, i fyejnë kombëtarisht, i trajtojnë si dele, ua heqin qeleshen dhe i detyrojnë të vënë kapele beduinësh. Edhe hoxhallarët mbajnë kapele beduini ose çallme osmane. Kjo kope besimtarësh që shkon në xhami e lutet në gjuhën që nuk e kupton s’ka si të trajtohet ndryshe./KultPlus.com

A e dini kush e ka shkruar tekstin e këngës së famshme “Baresha” (VIDEO)

Posted on by KultPlus

Kënga e famshme “Baresha” vulë e përhershme e Bilbilit të Kosovës, Nexhmije Pagarusha është këngë perlë shqiptare që po i reziston kohës, shkruan KultPlus.

Edhe pse kanë provuar shumë talent ta risjellin këtë këngë të fuqishme, interpretimi i vet Nexhmije Pagarushës konsiderohet të jetë më i fuqishmi.

Mirëpo, shumë pak kanë njohuri se kush qëndron prapa krijimit të kësaj kënge të fuqishme. Tekstin e kësaj kënge e ka shkruar shkrimtari i njohur për fëmijë Rifat Kukaj, kurse kompozimi i kësaj këngë është rezultat i kompozitorit të mirënjohur Rexho Mulliqi./KultPlus.com


Tre musketjerët e rock-ut me koncert në Prishtinë

Posted on by KultPlus

Redon Makashi, Elton Deda e Aleksandër Gjoka do të vijnë me një koncert të madh në Prishtinë, shkruan KultPlus.

Tre musketjerët, që tashmë e shumë vite përbëhet nga treshja e famshme do të mbajë këtë koncert i përcjellë edhe nga orkestra e madhe.

KultPlus ka kuptuar se ky koncert do të mbahet më 14 prill, në Sallën 1 tetori në Prishtinë. /KultPlus.com

Kanë filluar punimet në Sheshin “Adem Jashari”, premtohet gjelbërim dhe ulëse për pushim (FOTO)

Posted on by KultPlus

Komuna e Prishtinës ka filluar punimet në Sheshin “Adem Jashari”, në Prishtinë, shkruan KultPlus.

Sipas një njoftimi për medie, këto punime kanë filluar sot dhe do të zgjasin për 90 ditë.
“Sot kanë filluar punimet për rregullimin e sheshit “Adem Jashari”. Kjo hapësirë do të shndërrohet në një shëtitore të përshtatshme dhe do të përfshijë brenda vetes edhe pjesët e gjelbëruara, edhe ulëset për pushim. I gjithë projekti pritet të përfundojë për 90 ditë pune”, thuhet në këtë njoftim./KultPlus.com

“Baby” film me Arta Dobroshin, tani mund ta shikoni edhe në Vimeo (VIDEO)

Posted on by KultPlus

Filmi i metrazhit të shkurtë “Baby”, me regji të Daniel Mulloy, tashmë është lansuar edhe online, shkruan KultPlus.

I realizuar në vitin 2010, ky film flet për një grua e cila ndiqet nga një i huaj. I nominuar edhe në disa festivale të njohura, në këtë film luan aktorja kosovare Arta Dobroshi, kurse me role të tjera janë edhe aktorët: Daniel Kaluuya, Etela Pardo, Celia Meiras. Për më shumë mund ta shikoni të plotë këtë film në videon e bashkangjitur./KultPlus.com

BABY (short film) from Daniel Mulloy on Vimeo.

“KOSOVA” në anglisht dhuratë nobelistit Ferid Muradi

Posted on by KultPlus

Me rastin e 10 vjetorit të pavarësisë së Kosovës, Shoqata Shqiptaro-amerikane në Darllas organizoi një manifestim të madh, ku morën pjesë rreth 500 veta nga Teksasi.

Në këtë manifestim botuesi i “Jalifat Publishing” Ramiz Tafilaj për të pranishmit dhuroi 50 komplete të “Kosovës” në anglisht. Me një dedikim të veçantë “Kosova” iu dhurua edhe nobelistit shqiptar Fund Muradi, i cili ishte mysafir i veçantë i mbrëmjes.

Nobelisti shqiptar Fund Muradi, në fjalën e tij tha se veprat e mëdha shpesh vinë nga individë. Prandaj e përgëzoj historianin Jusuf Buxhovi si dhe botuesin Ramiz Tafilaj, që nëpërmes kësaj vepre madhështore na kanë dhënë identitet dhe krenari. Kjo vepër madhore më ndihmon që miqve në Amerikë dhe më larg t’u flas për kombin tim me temë cilin krenohem dhe prej të cilit kam rrjedhë edhe unë.

Edhe kryetari i shoqatës Shqiptaro-amerikane në Darlas, Bano Ceka falendëroi botuesin “Jalifat Publishing” për dhuratë. Me këtë rast, zoti Ceka tha se ai dhe gjithë komuniteti shqiptarë në Amerikë ndjehen krenarë që Kosova e fitoi lirinë dhe pavarësinë, por njëherësh edhe të lumtur që po e festojmë 10 vjetorin e pavarësisë./KultPlus.com

Shqiptarët, populli më optimist për 2018, ja kalojnë edhe suedezëve!

Posted on by KultPlus

Statistikat vazhdimisht sugjerojnë se cilësia e jetës po përmirësohet në të gjithë globin, megjithatë njerëzit mbeten pesimistë.

Sipas një sondazhi të kryer nga Komisioni Europian, rezulton se pjesa më e madhe e Europës kanë pritshmëri të ulëta se si do të jetë 2018-a për ta, në aspektin e përmirësimit. E ndërsa fqinjët tanë grekë janë populli më pesimist për 2018, me 36% të tyre që mendojnë se gjërat në 2018 do të shkojnë keq, panoramë tjetër duket për Shqipërinë.

Sipas sondazhit, të zhvilluar në 2017, shqiptarët janë populli më optimist për 2018 sipas KE. 61% e tyre mendojnë se pritshmëritë për 2018 janë më të mira, 13% e tyre që do të përkeqësohen, 25% në kushte të njëjta dhe 2% e tyre janë përgjigjur me “nuk e di”.
Kjo është përqindja më e lartë e optimizmit në të gjithë Europën.

Në hartë vetëm Shqipëria është me jeshile të errët (nivel i lartë optimizmi) dhe është e vetmja që e ka nivelin e optimizmit mbi 60%. Më pas, me jeshile më të lehtë është Suedia dhe Irlanda.

Pritshmëritë e fqinjëve ballkanikë nuk kanë të njëjtat nota optimizmi, përkundrazi 48% e serbëve mendojnë se nuk do të kenë ndryshim në jetën e tyre dhe 15% mendojnë se do të përkeqësohet jeta e tyre në 2018. Në Maqedoni, 42% e tyre mendojnë se nuk do të kenë ndryshime në cilësinë e jetës, 14% përkeqësim dhe 40% përmirësim.

Sipas KE, çdo anketë përbëhet nga rreth 1000 intervista ballë për ballë për çdo vend. Raportet publikohen dy herë në vit. Flash Eurobarometrat janë intervista ad-hoc telefonike tematike të kryera me kërkesë të çdo shërbimi të Komisionit Europian. Sondazhet e Flash mundësojnë që Komisioni të marrë rezultate relativisht të shpejta dhe të përqendrohet në grupe specifike të synuara, kur dhe kur kërkohet.

Raportet e veçanta të Eurobarometrit bazohen në studime tematike të thelluara të kryera për shërbime të ndryshme të Komisionit Europian ose institucioneve të tjera të BE-së dhe të integruara në valët e votimit të Eurobarometrit Standard. /Monitor

ANDRRA sjell elektrofolkun shqiptar në Cyrih

Posted on by KultPlus

Në kuadrin e projektit të vet “Vajza, jo nuse”, shoqata “Brezi ynë” në bashkëpunim me „duyaka“ organizoi të shtunën e kaluar në “Photobastei 2.0” një koncert të një lloji të ndryshëm. Elektrofolku shqiptar nga Berlini u takua me një publik të entuziazmuar të Cyrihut.
Me zërin e saj pa peshë, shoqëruar nga tinguj të thellë dhe nga ritmi i lehtë i dy instrumentistëve Christoph Hamann dhe Jörg Wähner, artistja nga Berlini, me rrënjë kosovare, mbushi hapësirën koncertale të Photobastei në Cyrih deri në cepin e saj më të skajshëm.

“Kaj moj çikë , se sot të la nana, të la tezja. Sot të la dashnija e motrës”, këndon ANDRRA në gjuhën shqipe. Por, nuk është e domosdoshme ta njohësh shqipen që ta kuptosh përmbajtjen. Muzika melankolike e nënvizon secilën fjalë që del nga buzët e saj dhe gjeneron kështu një pjesëmarrje intensive emocionale të audiencës.

“Ju do ta kuptoni këtë tension dhe peshën e rëndë të këngëve”, thotë ajo në një intervistë për albinfo.ch. “Pas koncerteve në Gjermani, erdhën te unë disa njerëz që nuk e kuptonin shqipen dhe thanë se ishin shumë të prekur, aq sa madje kishin edhe lot në sy. Kjo flet shumë për kompozimet me të cilat ne po përpiqemi t`i përkthejmë tekstet”.

Me këtë lloj të kompozimeve, artistët nga Berlini kanë arritur të krijojnë diçka krejtësisht të re. Përmes kombinimit të teksteve folklorike dhe muzikës elektroakustike, ata krijojnë një balanc në mes të traditës dhe modernes, diçka që në këtë formë deri tash nuk ka ekzistuar dhe me të cilën po i bindin jo vetëm fansat shqiptarë.
Martesa me detyrim dhe një zë për gratë

Tradita unike shqiptare e narracionit përmban ne vete edhe transmetimin e historive në trajtë të këngëve. Këto melodi dhe këndime të vjetra, që kanë edhe shekuj, pasqyrojnë deri sot historinë kulturore dhe politike të popullit shqiptar. Këngët në albumin (EP) të parë të ANDRRES tregojnë historitë e Palinës, e cila ishte martuar si vajzë 14 vjeçe.
“ç`ke Palinë që je idhnue? Po don baba me më martue. Pse po m`qet o babë jasht, kush të don si une t kam dasht”, thuhet në njërën nga pjesët e saj më të njohura.

“Unë në radhë të parë dua të rrëfej tregime që janë pjesë e shoqërisë sonë. Kur të mendosh se në gjithë botën janë 700 milionë gra të cilat jetojnë edhe sot dhe që herëdokur i kanë martuar si fëmijë ose si vajza të reja, them se ky është një numër tepër i madh që të mos i bëhet vend në pop kulturë”, sqaron këngëtarja. “Unë e kisha ndjenjën se këto gra nuk e kanë zërin e tyre, sepse ato nuk kanë pasur fare mundësi që të dëgjoheshin. Unë doja që ato të ndiejnë veten se po dëgjohen nga të tjerët, në mënyrë të lehtësohej barra e fatit të tyre”.
Fatime Kosumi, që është emri i vërtetë i këngëtares, dëshiron që deri në fund të vitit t`ia shtojë kësaj historie edhe pesë këngë.

Për emrin e saj artistik “ANDRRA”, ajo është përcaktuar nga shkaqe të ndryshme. “Unë kujtoja një ëndërr timen si vajzë e re që të krijoja muzikë dhe që këtë ta jetësoja”. Një ëndërr tjetër e saj ka qenë që tekstet pakrahasimisht të fuqishme e prekëse të mbledhura nga fokloristi dhe albanologu Anton Çetta t`i bartë në një kontekst bashkëkohor, në mes të Berlinit. ANDRRES i është realizuar edhe kjo ëndërr.

Por ANDRRA e ka shpërblyer edhe publikun dhe e ka justifikuar emrin e saj artistik, duke i bërë dëgjuesit që me muzikën dhe zërin e saj të zhyten në një botë ëndrrash, e cila i drejton ata përtej çdo kufiri.

Për kënaqësinë e përjetuar, fansat e Cyrihut e kanë shpërblyer me duartrokitje të forta dhe me thirrje të zëshme entuziaste, gjë që trioja muzikore e ka merituar plotësisht./albinfo.ch

Gati për inaugurimin e bustit madhështor të Gjergj Kastriot Skënderbeut (VIDEO)

Posted on by KultPlus

Busti madhështor i Gjergj Kastrioti Skënderbeut, 8 metra i lartë, në Labinot të Elbasanit, i porositur dhe financuar nga biznesmeni Gjergj Luca dhe i realizuar nga mjeshtri i skulpturës Fiqiri Kasa ka përfunduar, shkruan KultPlus.

Bëhet e ditur se inaugurimi i këtij busti do të bëhet ditën e verës, më 14 mars. Gjithçka përkon edhe me 550 vjetorin e vdekjes së Skëndërbeut dhe me shpalljen e këtij viti si Viti i Skëndërbeut në trojet Mbarëkombëtare. Ky monument ngjan si diçka e përafërt me portretet e presidentëve në Amerikë të gdhendura në mal./KultPlus.com

Bill Clinton sërish dërgon letër në Kosovë: Gjithmonë do të keni një vend special në zemrën time

Posted on by KultPlus

Ish presidenti amerikan Bill Clinton vazhdon të mbetet figura më e dashur për popullin e Kosovës, por një ndjesi të njëjtë vazhdon ta ketë edhe vet Clinton për kosovarët.

Ai ka dërguar së fundi një letër në shkollën Prishtina High School, i cili këtë letër e dërgon për të falënderuar më të vegjlit e kësaj shkolle, të cilët para disa mujave i kishin dërguar letra Bill Clinton.

Vetë shkolla ka njoftuar për pranimin e letrës së ish presidentit amerikan Bill Clinton. “Sot, na erdhi përgjigjia e tij në form të letrës nga Shtetet e Bashkuara për nxënësit dhe mësusen Dr. Ëaters. Në këto letër Presidenti Bill Clinton përmendi edhe 10 vjetorin e pavarësisë së Kosovës dhe dëshirën për të vizituar shkollën tonë në vizitën e tij të radhës në Kosovë”, thuhet në njoftimin e shkollës.
Dhë në letrën që e ka publikuar kjo shkollë, shihet të ketë shkruar Bill Clinton, se Kosova do të ketë gjithmonë një vend special në zemrën e tij./KultPlus.com

Kosova në gjendje të jashtëzakonshme në vitet e 90-ta, shikuesit e pyesin Rrahman Morinën për shkeljen e popullit shqiptarë (VIDEO)

Posted on by KultPlus

Është publikuar një video nga një emision i viteve të 90-ta, emision i drejtpërdrejtë në TVP, ku ishte i pranishëm Rrahman Morina, i cili atëherë ishe në krye të Partisë Komuniste në Kosovë, shkruan KultPlus.

Vitet e 90-ta konsiderohen si një periudhë mjaftë e vështirë për popullin e Kosovës.
Në këtë emision,ku shihet edhe gazetarja Dijana Toska, e cila lexon mjaftë pyetje të guximshme të qytetarëve, flitet për situatën e atëhershme, duke u inkuadruar edhe shikuesit.

Në këtë emision shikuesit janë interesuar të dinë se pse masa merren vetëm ndaj popullit shqiptarë, e jo ndaj të tjerëve, kur do të vjen demokracia në Kosovë, vrasja e të rinjëve shqiptarë, pastaj pyetja se pse po pohoni se populli shqiptar është i barabartë me popujt e tjerë të ish Jugosllavisë dhe shumë pyetje të tjera që ishin aktuale në atë kohë.

Për më shumë mund ta shikoni këtë video, ku shihet të përgjigjet edhe Rrahman Morina, i cili shqiptarët i quan nacionalistë, seperatistë e terroristë./KultPlus.com

Rama prezanton projektin e Teatrit të ri Kombëtar

Posted on by KultPlus

Kryeministri i Shqipërisë, Edi Rama, gjatë prezantimit të projektit të ndërtesës së re të Teatrit Kombëtar, e cila siç theksoi ai, do të realizohet në bashkëpunim me Bashkinë e Tiranës dhe sipërmarrjen private, vuri në dukje se ndërtesa e re do të ketë trefishin e hapësirës që ka sot dhe nuk do të jetë me kullë.

“Ndërtesa do shembet dhe mbi gërmadhat e të shkuarës do ngrihet teatri i ri kombëtar. Kushtet e teatrit sot janë poshtëruese për artistët. Nuk do jetë teatër me kullë, por s’do kishte asnjë mëkat të ishte nën kullë, se njerëzit shkojnë të shohin teatër dhe jo kullë. Këtu nuk është historia se çfarë ka sipër, apo anash, pavarësisht se sipër do ketë hapësirë teatrale në qiell të hapur dhe anash do ketë hapësirat e veta për artistët. Ne kemi bërë për teatrin aq sa pasur mundësi, por kemi bërë më shumë se të gjitha vitet e marra së bashku. Nga 3000 metra katror rrënoja do të kemi 9 mijë metra katror. Nga 1 sallë do të kemi 4 salla për shfaqje. Teatri është pjesë e një propozimi për një partneritet publik privat. Sipërmarrësi garanton projektin për teatrin e ri, por nuk vjen për të humbur”, u shpreh Rama.

Arbëreshët i këndojnë Skënderbeut (VIDEO)

Posted on by KultPlus

Arbëreshët shihen duke i kënduar Gjergj Kastriot Skënderbeut, të cilët me këngët e tyre e nderojnë heroin kombëtar, shkruan KultPlus.

Arbëreshët këtë përvjetor janë duke e shënuar me shumë aktivitete të ndryshme nëpër sheshe të Italisë, komunitet ky që i rezistoi periudhës 500 vjecare për të ruajtur kulturën dhe traditën shqiptare. Shikojeni për të ndjerë emocionet e këtij intepretimi./KultPlus.com


Dhjetë këshilla të një gjeniu

Posted on by KultPlus

I njohur për etikën e tij të punës së madhe, këmbëngulësisë dhe zgjuarsisë, Thomas Edison është njëri prej shpikësve më të mëdhenj të të gjitha kohërave. Nga llamba në fotografinë, gjatë jetës së tij Edison mbajti mbi 1000 licensa në Shtetet e Bashkuara në emrin e tij, pa përmendur edhe tjerat rreth botës.

Kontributet e tij të mëdha në energji elektrike, filma, inçizim të zërit madje edhe makina x-rreze ndryshuan botën në të cilën jetojmë sot. Së bashku me shumë arritje të tij, mentaliteti dhe etika e punës e Edison gjithashtu e shtyen atë drejt suksesit.

Ka shumë që mund të mësoni nga ky gjeni kreativ.

Shikoni këto 10 thënie të cilat do ju motivojnë dhe inspirojnë.

Për shanset
‘’Shanset humbasin nga shumë njerëz për shkak se ajo është e veshur me pantallona dhe duket si punë’’.

Për suksesin
‘’Fati i mirë shpesh ndodh kur mundësia takohet me përgatitjen’’.

Për kreativitetin
‘’Për të shpikur, ju keni nevojë për imagjinatë të mirë dhe për gjëra të vjetra’’.

Për punën e rëndë
‘’Gjeniu është 1 përqind inspirim dhe 99 përqind djersë’’.

Për këmbëngulësinë
‘’Dobësia jonë më e madhe qëndron në dorëzimin. Mënyra më e sigurtë për të pasur sukses është që gjithmonë të provoni edhe njëherë tjetër’’.

Për dështimin
‘’Unë nuk kam dështuar. Vetëm kam zbuluar 10,000 mënyra të cilat nuk kanë pasur sukses’’.

Për fuqizimin
‘’Nëse do të bënim të gjitha gjërat për të cilat jemi të aftë, do të befasonim veten’’.

Për ide
‘’Unë kam më shumë respekt për një njeri i cili ka një ide dhe arrin sukses me të se sa për një njeri i cili ka me mijëra ide dhe nuk bën asgjë’’.

Për suksesin
‘’Gjithçka vjen te ai i cili bën kërkime përderisa pret’’.

Për mentalitetin
‘’Gjithçka vjen te ai i cili bën kërkime përderisa pret’’./KultPlus.com

Gravura e rrallë, ja si ishte flamuri shqiptar 540 vjet më parë

Posted on by KultPlus

Aurel Plasari

“Marrja e Krujës nga Mehmeti II” është njëra prej gravurave të punuara nga Jost Amman (1539-1591) që shoqërojnë veprën e Marin Barletit në vëllimin III të përmbledhjes “Kronika të turqve” (Chronicorvm Tvrcicorvm) (1578) nga Philippo Leonicero.

Bën përshtypje se si në qytetin që po digjet dhe ndërsa banorët po masakrohen, në njërën nga kullat e tij dallohet ende tek valëvitet flamuri me shënjesën heraldike të Kastriotëve, shqiponjën e zezë me dy krerë, sado që e skicuar “kalimthi”. E zmadhuar shënjesa nuk lë vend për dyshim.

“Marrja e Krujës nga Mehmeti II” është njëra prej gravurave të punuara nga Jost Amman (1539-1591) që shoqërojnë veprën e Marin Barletit në vëllimin III të përmbledhjes “Kronika të turqve” (Chronicorvm Tvrcicorvm) (1578) nga Philippo Leonicero.
Bën përshtypje se si në qytetin që po digjet dhe ndërsa banorët po masakrohen, në njërën nga kullat e tij dallohet ende tek valëvitet flamuri me shënjesën heraldike të Kastriotëve, shqiponjën e zezë me dy krerë, sado që e skicuar “kalimthi”. E zmadhuar shënjesa nuk lë vend për dyshim.

(Me rreth flamuri shqiptar i vitit 1478)

Mbas vdekjes së Skënderbeut, në përfundim të një qëndrese prej më se një viti të garnizonit të Krujës, nën komandën e një venedikasi (një Jacopo da Mosto, simbas Romaninit ose një Piero Vettori, simbas Kronikës së Benedetto Deit), ndaj një rrethimi të egër, Kruja dorëzohej më 15 qershor 1478 e shtrënguar urie. Gjatë dorëzimit të qytetit, me gjithë premtimin e pushtuesit për t’i lënë banorët të delnin të lirë së toku me pasuritë e tyre, me urdhër të sulltanit u veprua ndryshe: meshkujt u therën, kurse femrat dhe fëmijët u morën skllevër për t’u përdorur nëpër haremet.

Bënë përjashtim vetëm disapak pasunarë, të cilët e blenë jetën e tyre duke paguar (Romanin, Storia documentata, IV, 379, ASV). Tursun-beu, kronikan i Mehmetit II, ka “argumentuar” kështu këtë “ndëshkim” të mbrojtësve të kryekështjellës së Arbërisë, Akça-Hisarit, nga ana e sulltanit: “Ati i Pushtimeve e kishte marrë dhe nënshtruar mbarë territorin e asaj fortese, si dhe kishte prerë rrugët nëpërmes të cilave i mbërrin asaj nga toka e nga deti nozullimet dhe ndihmat.

Deri aty u detyruan të pafetë e mallkuar sa të hanin padallim qen, mace dhe krimba. Ngase rruga e përshkuar në rastin e ekspeditës kundër fortesës së Shkodrës kalonte pranë, të tmerruar nga mundësia e një sulmi prej ushtrisë osmane, të pafetë pranuan të dorëzoheshin. Por kur ishte e qartë se ata qenë dorëzuar ngaqë nuk kishin ç’të hanin, sulltan Mehmeti u shpreh i mendimit se mëshira nuk do të hynte aspak në punë. Ndaj dhe, si shpërblim për kokëfortësinë e tyre, mbështetur në fjalën që thotë se “fara është shkak për shtim”, të pafetë besëpakë vajtën t’i bënin shoqëri shpatës ndëshkimore dhe, për mrekulli të një aso shoqërie, skeletet e trupave të tyre u dyfishuan në numër” (Turgun-Beg, Târih-i ebül’feth, 169).

Për venedikasin Navagero komandanti i qytetit së toku me familjen u çuan skllevër në Kostandinopojë (Navagero, Storia, 1153).

Ndërsa, simbas gjenovezit Benedetto Dei: “U mor kështjella [e Krujës] më 5 të shtatorit dhe brenda ishte komandant dhe guvernator Piero Vettori, të cilit me urdhër të Turkut të Madh ia prenë të dyja duart…” (La Cronica dall anno 1400 all’ anno 1500, 87 verso). Në “Shpalljen për pushtimin e Krujës”, lëshuar nga Mehmeti II fill mbas pushtimit të qytetit, ai nuk harronte të njoftonte: “Paskëtaj do të fillojë shkatërrimi i kishave, ndërtimi i medreseve, ndalimi i kambanave dhe prishja e ligjeve.

Brenda në zemrat e të pafeve, ku kishte bërë vend pabesia dhe mëkati, paskëtaj do të çelë burbuqja e besimit në një zot të vetëm…” (“Fetih-name-i Akçehisar”, nga “Burime osmane”, 382). Në qytetin e zbrazur u vendosën kolonë turq, ndërsa vetë qytetit iu ndërrua emri; deri në shek. XIX të krishterët do ta kishin të ndaluar, me ndëshkim vdekjeje, hyrjen natën në qytezë (Jireček, Albanien, 83).

22 vjet më parë, Steve Jobs tha se 1 gjë i ndan ata që arrijnë, nga ata që ëndërrojnë (VIDEO)

Posted on by KultPlus

“Unë kurrë nuk kam gjetur askënd që nuk donte të më ndihmonte”, thoshte Steve Jobs 22 vjet më parë, në videon që e gjeni edhe në fund të këtij artikulli. “Nëse u kërkoja ndihmë … i telefonova Bill Hewlettit kur isha dymbëdhjetë vjeç: Përshëndetje, unë Unë jam Steve Jobs, jam dymbëdhjetë vjeç, jam nxënës në shkollë të mesme, dua të ndërtoj një numërues frekuencash, dhe unë doja të dija nëse keni ndonjë pjesë rezervë që mund të ma jepni”. Ai qeshi, dhe më dha pjesë këmbimi, dhe më ofroi një punë atë verë në Hewlett-Packard … dhe unë fluturoja”.

“Unë kurrë nuk kam parë a dëgjuar, asnjë person, që më ka thënë jo apo më ka mbyllur telefonin, kur e kam marrë. Thjesht kërkoja. Dhe kur njerëzit më kërkojnë, përpiqem t’u përgjigjem, që të shlyej atë borxh mirënjohjeje. Shumica e njerëzve kurrë nuk e ngrenë telefonin dhe të telefonojnë dhe të kërkojnë. Shumica e njerëzve kurrë nuk KERKOJNE, dhe kjo është ajo që ndan ndonjëherë njerëzit që bëjnë gjëra nga njerëzit që vetëm ëndërrojnë për to”./bota.al
https://www.youtube.com/watch?v=dxNQebY-Qdw

A ishin më të shkolluar kryeministrat shqiptarë më parë sesa ata që po garojnë sot?

Posted on by KultPlus

Kryeministrat e parë shqiptarë ishin zë i fuqishëm për të drejtat e shqiptarëve, bartës të proceseve të mëdha, ndërtues të marrëdhënieve ndërkombëtare të shqiptarëve me shtetet tjera perëndimore, të ndjekur nga komunizmi, themeluan alfabetin dhe shkollat shqipe…
Ata njihnin disa gjuhë të huaja, kurse kishin mbaruar studimet në qendrat më të njohura universitare të asaj kohe si: në Itali, në Austri, në Zvicër, në Stamboll, në Romë…
Kryeministri i parë shqiptar Ismail Qemali u diplomua në gjimnazin Zosimea në Janinë. U arsimua në Paris për Shkenca Juridike dhe Ekonomike. Me këtë edukim ai ishte një nga më të arsimuarit në administratën turke të asaj kohe, transmeton “Zeri.info”.

Njihej si një poliglot, një armë që atij i shërbente në të gjithë aktivitetin e tij politik për çështjen shqiptare. Ai njihte shkëlqyer gjuhën shqipe, osmanishten, turqishten e re, greqishten e vjetër, latinishten, italishten dhe frëngjishten.
Ai u vlerësua nga qeveria turke si një diplomat, deputet, udhëheqës shteti, mendimtar, ndërsa mbajti disa pozita të rëndësishme e larta në qeverinë turke.

Asnjë kryeministër shqiptar nuk njihte më pak se katër gjuhë të huaja

Kryeministri i 2-të shqiptar Turhan Pashë Përmeti rridhte nga familjet e mëdha të qytezës së Përmetit në vilajetin e Janinës.
Ka mbaruar Fakultetin e Drejtësisë në Athinë, ka marrë mësim nga disa pedagogë privatë njohuri mbi të drejtën ndërkombëtare, të drejtën romake, mbi historinë e hartimit dhe të nënshkrimit të të gjitha marrëveshjeve duke filluar nga Paqja e Vestfalisë (1648) e deri në vitin 1815 Kongresi i Vjenës dhe njohuri mbi ekonominë ndërkombëtare, përcjell “Zeri.info”.
Njihte turqisht, frëngjisht, greqisht , italisht…
Ndër postet që ai ka pasur në perandorinë Otomane ishte Guvernator i Kretës në vitet 1895 dhe 1896 dhe ambasador në Shën Petërsburg.
Delvina, kryeministri që vendosi marrëdhënie diplomatike me shtetet e huaja

Një kryeministër tjetër ishte Sylejman Delvina ishte politikan i shquar shqiptar, kryeministër për periudhën 30 janar 1920-14 nëntor 1920 dhe pjesëtar i qeverisë së Fan Nolit…Studimet i ka kryer në Stamboll në vitin 1898, Universitetin “Mylkie”.
U emërua atashe në MPB-në Osmane dhe më pas sekretar në zyrën e dekreteve të Kryeministrisë, si dhe profesor në liceun e Gallatasarait e në gjimnazin e Vefa-s.
U bë shef seksioni në MPB dhe drejtor i përgjithshëm i vilajeteve. Ishte një ndër figurat qendrore të klubit shqiptar të Stambollit. Ishte zë i mbrojtjes dhe zhvillimit të të drejtave të shqiptarëve. Ishte një nga nënshkruesit e thirrjes së 18 nëntorit dorëzuar përfaqësive të Fuqive të Mëdha në Stamboll ku kërkohej të njiheshin të drejtat kombëtare të popullit tonë, transmeton “Zeri.info”.
Në prill 1919 kolonia shqiptare në Turqi, e dërgoi atë në Konferencën e Paqes në Paris, për të mbrojtur në emër të saj interesat e Shqipërisë…
Qeveria Delvina njihet se drejtonte në atë kohë pjesën më të madhe të vendit dhe u përpoq që të kishte jehonë edhe në fushën ndërkombëtare, duke vendosur marrëdhënie diplomatike me shtetet e huaja, me kusht që të respektohej tërësia territoriale e Shqipërisë.
Kryeministri që Franca e dekoroi dhe komunizmi ia humbi varrin

Një tjetër kryeministër është dhe Iliaz Vrioni, tre herë kryeministër nga 1921 deri më 1925, ishte i biri i Mehmet Ali Pashë Vrionit, nën-kryetarit të Lidhjes së Prizrenit, ndërsa vet ishte nënshkrues i Deklaratës së Pavarësisë së Shtetit Shqiptar së. Shërbeu tre herë si kryeministër i Shqipërisë dhe disa herë si Ministër i Jashtëm dhe si Ministër i Plotfuqishëm i Shtetit Shqiptar në Paris, Francë. Shërbeu gjithashtu për një kohë shumë të gjatë si Deputet i Parlamentit të Shqipërisë.
Vrioni, për kontributin e tij të pasur në marrëdhënie ndërkombëtare, është dekoruar nga Republika Franceze në vitet 1920 me urdhrin e lartë Grand Officier de la Légion d’Honneur, përcjell “Zeri.info”.
Në vitin 1946, regjimi dikatorial ia zhvarros eshtrat e ish kryeministrit Iliaz Vrioni, siç thuhet për t’i hedhur ato në lumin Osum të Beratit. Eshtrat e e tij vazhdojnë të mbeten të humbura duke e lënë ende pa marrë ish kryeministrin shqiptar.
Evangjeli, kryeministri që përpiqej të hapte katedrën e shqipes në qendrat evropiane

Një nga 33 kryeministrat shqiptar Pandeli Evangjeli që ishte katër herë kryeministër luajti një rol të jashtëzakonshëm në forcimin e ndërgjegjes kombëtare dhe në konsolidimin e shtetit të pavarur shqiptar.
Si anëtar i shoqërisë “Dituria” në Bukuresht do të jap kontributin e tij në botimin dhe përhapjen e librit shqip në gjithë trevat ku jetonin shqiptarë, me qëllim që ata të mësonin të lexonin dhe të shkruanin gjuhën e tyre.
Nën drejtimin e Pandeli Evangjelit, shoqëria “Dituria” botoi abetaret e para shqipe, gjithë librat e Naimit e të Sami Frashërit, si dhe shumë të tjera. Librat shpërndaheshin falas në të gjitha trevat shqiptare, transmeton “Zeri.info”.
Pandeli Evangjeli, ishte autodidakt, i kulturuar, që njihte shumë mirë greqishten, rumanishten, frëngjishten. Ai kishte kontakte dhe letërkëmbime me shumë personalitete të huaja, si dhe akademik që lobuan për çështjen shqiptare si akademikun e shquar rumun Vasil Urechea, filologun e shquar francez, doktor Louis Benloew, dekan në Universitetin e Dijonit, ndërsa në bashkëpunim me E.
Legdrand (studiues i njohur francez), që në atë kohë Pandeliu u përpoq të hapte një katedër të gjuhës shqipe në Paris. Këto përpjekje patën rëndësinë e tyre sepse në vitet 1896-1898 bënë të njohur problemin shqiptar në qarqet shkencore evropiane.
Hasan Prishtina, shqiptari i pasur që shkriu pasurinë për kombin

Një nga kryeministrat që shumë pak i zgjati mandati por dha kontribut të madh në pavarësinë dhe ndërtimin e shtetit shqiptar është edhe Hasan Prishtina përndryshe llogaritet kryeministri i 8-të shqiptar. Prishtina ka mbaruar gjimnazin grek të Selanikut ku mësoi edhe gjuhën frënge, në Stamboll u diplomua në Fakultetin e Drejtësisë, përkatësisht në Fakultetin e Shkencave Politike – Juridike.
Ishte ithtar i ideve të Revolucionit Francez (1789-1794). Ai njihte shumë gjuhë: anglishten, arabishten, çerkezishten, frëngjishten, greqishten, gjermanishten, italishten, serbishten e turqishten. Brenda një kohe të shkurtër zuri pozita të rëndësishme në administratën turke dhe arriti të bëhet edhe kryekonsull në shtetin e Turqisë.
Në vitet 1908-1912 u zgjodh tri herë deputet në Parlamentin osman si përfaqësues i Vilajetit të Kosovës në Prishtinë, të cilin e përdori si tribunë për mbrojtjen e të drejtave kombëtare të shqiptarëve, transmeton “Zeri.info”.
Në parlament luftoi për të drejtat e shqiptarëve, për njohjen zyrtare të kufijve të Shqipërisë, për hapjen e shkollave shqipe, për administratën shqiptare në Vilajetet shqiptare, që ushtria shqiptare të shërbejë në Shqipëri me oficerë vendas, etj.
100 vjet më parë diplomati dhe ideologu shqiptar Hasan Prishtina, shqiptari i pasur që shkriu pasurinë e tij, si dhe mblodhi të holla për të çuar në Shkollën Normale të Elbasanit djemtë shqiptarë nga Kosova.
Kryeministri i 10-të shqiptar Xhafer Ypi ishte ishte një politikan shqiptar, i edukuar në një universitet në Stamboll. Në 1920-1921 ai ishte ministër i Punëve të Brendshme dhe Ministrit të Drejtësisë. Ai gjithashtu ka mbajtur postin e Ministrit të Rendit Publik. Si udhëheqës i Partisë Popullore, në fund të dhjetorit 1921 ai formoi një qeveri ku Fan S. Noli ishte Ministri i Punëve të Jashtme dhe Ahmed Zogu ishte Ministri i Punëve të Brendshme….
Kryeministri i 14-të Mehdi Frashëri u diplomua në Stamboll për Shkenca Politike-Administrative

Spanja habiti botën me marshin e grave, ky marsh do të mbetet në histori (VIDEO)

Posted on by KultPlus

Krejt qytetet e Spanjës më 8 mars ishin të mbushura me gra, të cilat po kërkonin të drejtat e tyre, kërkesa këto që u thirrën nëpërmjet marsheve të shumta në shumë qytete të Spanjës, shkruan KultPlus.

Mirëpo, marshi i sivjetmë po del të jetë më masivi që ka mund të ndodhë ndonjëherë në Spanjë, për ta vlerësuar kështu edhe si marsh historik.

Një video që po qrakullon nga ky marsh, ku janë përfshirë protesta nga shumë vende të Spanjës të lënë pa fjalë. Për më shumë mund ta shikoni këtë marsh, që është mjaftë emocionues./KultPlus.com


Gazmend Kapllani, Thanas Medi dhe Manjola Nasin në Panairin e Librit në Lajpcig

Posted on by KultPlus

Letërsia shqipe prezantohet në Panairin e Lajpcigut nga 15 deri më 18 mars. Stenda e Shqipërisë atje është ideuar si një vënd promovimi dhe bashkëbisedimi mbi krijimtarinë shqiptare bashkëhore të fokusuar në trajtimin e temës së kujtesës, përshtatjen me ndryshimet rrënjësore historike, emigrimin, bashkëjetesën dhe integrimin.

Midis 15 dhe 18 marsit letërsia shqipe prezantohet në Panairin e Lajpcigut, nën kujdesin e Ministrisë së Kulturës.
Ajo që ministria e quan prurja më e mirë e letrave shqipe në vitet e fundit, përfaqësohet nga shkrimtarët bashkëkohorë të vlerësuar me çmime kombëtare dhe ndërkombëtare në tre vitet e fundit, si: Bashkim Shehu, fitues i Çmimit Balkanika 2015, Rudi Erebara, fitues i Çmimit Europian për Letërsinë, Idlir Azizaj Autori i Vitit” 2017, Agron Tufa “Autori i Vitit i Pananirit të Librit”, Parid Teferici, Virion Graçi, Luljeta Lleshanaku, Romeo Çollaku e të tjerë.
Stenda e Shqipërisë është ideuar si një vend promovimi dhe bashkëbisedimi mbi krijimtarinë shqiptare bashkëhore të fokusuar në trajtimin e temës së kujtesës, e përshtatjes me ndryshimet rrënjësore historike, emigrimit, bashkëjetesës.

Të ftuar në stendën shqiptare do të jenë autorët Gazmend Kapllani, një shkrimtar shqiptar që jeton prej njëzet vitesh në Greqi e që përmes krijimtarisë së tij zbulon se si totalitarizmi, emigracioni, kufijtë dhe historia ballkanike kanë formuar jetën private dhe narracionin e tij personal.
Thanas Medi, i cili në një pjesë të mirë të krijimtarisë trajton jetën e një pakice kombëtare në Shqipëri, si vllehët, si dhe historinë e një brezi që përjetoi ndryshimet e mëdha të viteve nëntëdhjetë.

Dhe brezi i më të rinjve prezantohet me Manjola Nasin, përkthyese dhe poete që sjell një lirikë urbane dhe imazhiste. Kjo është një mundësi e shumë që autorët shqiptarë të prezantohen aty me lexime, intervista të hapura për publikun, të krijonë kontakte me botues që i hapin rrugën përkthimeve në gjuhë të tjera.

Ministria e Kulturës ka menduar që në stendën shqiptare t’i bëhet homazh shkrimtarit Kasëm Trebeshina, duke e prezantuar atë pas vdekjes dhe për herë të parë në deklaratat publike të ministrisë, si simbol i disidencës. Profili i Trebeshinës shoqërohet nga një prezantimin i shkurtër i romanit “Odin Mondvalsen” që është përkthyer tashmë në gjunë gjermane.

Panairi i Lajpcigut që është ngjarja e dytë e madhe në botën gjermanofone pas Panairit të Frankfurtit, ka si karakteristikë leximin. Autori dhe lexuesi janë më afër se në çdo manifestim të tjetër lloji mbi librin./ora news

Hitet e Dua Lipës remiksohen në dy super-versione

Posted on by KultPlus

Dyshja nga Los Angeles, Two Friends, kanë lansuar remiksin e tyre të fundit dhe kësaj radhe kanë zgjedhur pop-yllin Dua Lipa dhe hitin e saj “IDGAF”.

Miqtë nga shkolla e mesme u bënë të famshëm me remikset e tyre shumë të vlerësuara të këngëve si “Mr. Brightside” dhe “Kids”, raporto Koha.net.
E tani që janë kthyer për të bërë atë që dinë më së miri, “Two Friends” kanë përpunuar hitin e fundit të Dua Lipës.

Ndërsa një tjetër remiks i është bërë këngëtares nga Prishtina, por, siç raporton Koha.net, kësaj radhe është përzgjedhur kënga “New Rules”.

Vokal-bendi i njohur botërisht, Pentatonix, kanë lansuar “coverin” me video të super-hitit të Dua Lipës, “New Rules”, duke e përzierë atë me hitin e Aaliyah të vitit 1998 “Are You That Somebody?”.
Ky grup, kohë më parë lansuan edhe versionin ‘cappella’ të Camila Cabellos, “Havana”.