Sot është Dita Ndërkombëtare e Zjarrfikësve.
Komuna e Prishtinës do të mbajë aktivitete nga ora 09:00 deri në 14:00.
“09:00- 14:00-Komuna e Prishtinës mban aktivitet për shënimin e “Dita Ndërkombëtare e Zjarrfikësve”. Në orën 11:00, aktivitetit do t’i bashkohet edhe kryetari i Kryeqytetit, Përparim Rama. (Sheshi Zahir Pajaziti)”./ KultPlus.com
Kryeministri Edi Rama mori pjesë sot në çeljen e sezonit turistik në Himarë.
Në fjalën e tij, Rama vlerësoi punën e bërë nga kryebashkiaku i Himarës, Vangjel Tavo si dhe përshëndeti kryebashkiakun e Korfuzit për pjesëmarrjen në ҫeljen e sezonit.
“Himara është e pozicionuar perfekt për të zhvilluar edhe diplomacinë vendore”, tha Rama.
Rama falënderoi kryebashkiakun për sjelljen e bandës frymore të Korfuzit.
“Duhet të organizohemi sepse bashki si Himara, ose bashki të tjera të vogla, nuk e kanë të mundur ta krijojnë dhe ta mbajnë një bandë me atë prestigj, por ama qarqet e kanë të mundur dhe do të organizohemi që qarqet të kenë bandat e tyre frymore dhe pastaj bashkitë t’i përdorin sipas interesit të tyre”, tha Rama.
Rama siguroi se, “ne do të vazhdojmë të punojmë, të përpiqemi të shtyjmë përpara dhe gjëja më e mirë që ka ndodhur këtu në këtë territor është që ka rënë një qetësi dhe ndihet një energji pozitive”.
“Tani të mbarojë edhe fushata elektorale dhe të fokusohemi përsëri tek punët që duhet të vazhdojmë në këtë territor”, theksoi Rama.
“Kemi përmbyllur një pjesë të konsiderueshme të ҫështjeve të pronësisë mbi shtëpitë e vjetra, por e di shumë mirë që puna vazhdon me pjesë të tjera që kanë të bëjnë me pronësinë dhe nga ana tjetër të shtyjmë përpara për investime që të sjellin cilësi”, u shpreh Rama.
Kryeministri u shpreh se ka folur me kryebashkiakun Tavo për qendrën e Himarës.
“Himara nuk e ka një qendër. Ka një tmerr atje dhe ne do të duhet të veprojmë”, tha Rama.
Gjithashtu Rama u shpreh se ka folur me kryebashkiakun Tavo për parkingun e madh nëntokësor aty ku është stadiumi i qytetit.
“Do të bëjmë një gjë spektakolare aty tek territori i stadiumit, me parking nëntokësor për shumë makina, se nuk mundet dot që mbrëmjet e mrekullueshme të kësaj vije ujore të kushtëzohen nga gjithë barrikadat e makinave, se s’kanë ku rrinë makinat”, tha Rama.
Rama u shpreh gjithashtu se kanë folur me kryebashkiakun për Borshin dhe zonat e tjera turistike të bashkisë së Himarës.
“Dhërmiu do të jetë komplet tjetër”, u shpreh kryeministri falë punës shumë të bukur që ka bërë ministrja e Turizmit dhe Mjedisit, Mirela Kumbaro dhe kryebashkiaku Tavo./atsh/ KultPlus.com
Tirana, ka hapur dyert për edicionin e parë të Festivalit Mesdhetar të Filmit (TMFF), një ngjarje kulturore që ka bashkuar filma, aktorë, regjisorë dhe producentë nga e gjithë bota, për të ndarë me publikun shqiptar disa nga historitë më emocionuese dhe reflektuese të Mesdheut.
Nga një total prej 3030 filmash të aplikuar, festivali ka përzgjedhur prodhime që trajtojnë tema të thella dhe aktuale si emigracioni, pabarazitë sociale dhe marrëdhëniet mes qytetarëve dhe shtetit.
Këto filma prekin tema universale që flasin për përpjekjet njerëzore për një të ardhme më të drejtë dhe më të mirë, duke sjellë në ekran histori që ngjallin ndjenja dhe ndihmojnë për të kuptuar më mirë sfidat e kohës.
“Me një grup djemsh dhe vajzash të reja jemi munduar që në këtë festival të sjellim artistë, aktorë, regjisorë e producentë shumë të mirë nga Mesdheu. Në vitin 2025, Tirana është shpallur kryqyteti mesdhetar i artit dhe kulturës. Në këtë epokë të re, Tirana merr rolin kryesor të kryeqytetit të filmit mesdhetar. Le të jetë ky festival pikëtakimi i ideve, projekteve, ëndrrave”., – thotë Ledion Zoi drejtor i festivalit.
Festivali, do të vijojë deri më 4 maj, duke ofruar një program të pasur me shfaqje filmash, por edhe me Workshop-e dhe diskutime të vlefshme me profesionistë të njohur të industrisë së filmit.
I ftuar nderi i këtij edicioni është aktori i mirënjohur Arben Bajraktari, ndërsa juria e kryesuar nga regjisori dhe producenti Eno Milkani do të vlerësojë artistët pjesëmarrës me pesë çmime./ euronews/ KultPlus.com
Festivali agro-kulturor “Hardh Fest” ka bërë të ditur se edicioni i sivjetëm do të mbahet më 5, 6 dhe 7 shtator.
Organizatorët e festivalit përmes një shkrimi në facebook kanë njoftuar se hyrja për këtë vit do të jetë falas.
Ky festival tradicional zhvillohet çdo vit në qytetin e Rahovecit dhe, përveç mbrëmjeve festive, ofron edhe aktivitete të ndryshme që promovojnë kulturën dhe trashëgiminë e qytetit të njohur për kultivimin e rrushit.
Ende nuk është bërë i ditur linë-up i artistëve për edicionin e sivjetëm, por se siç njofton Hardh Fest do të bëhen të ditur më vonë.
“Festivali është i veçantë, me aktivitete të vazhdueshme që kultivojnë e kujtojnë traditën dhe kulturën rahovecase për të gjithë vizitorët, promovon verërat, rrushin dhe produktet tjera lokale, duke i kurorëzuar të gjitha këto të mira me muzikë LIVE në fund”, thuhet në njoftim.
Është padyshim një nga këngëtaret që ka lënë gjurmë në muzikën shqiptare me një karrierë muzikore 45-vjeqare, shkruan KultPlus.
E lindur në një familje në të cilën janë kultivuar vlerat e artit dhe muzikës, Shpresa i ka trashëguar ato duke i sjellë para publikut me një mjeshtëri artistike të jashtëzakonshme.
Ishte një nga vajzat e pakta shqiptare që në vitet e 70-ta kishte kryer studimet në Akademinë e Muzikës në Zagreb të Kroacisë më pas fillon punën në televizionin e Prishtinës, duke qenë çdo herë aktive në muzikë.
Shpresa ishte një nga emrat e rrallë të muzikës shqiptare që në ish-jugosllavi në festivalin e Opatisë përfaqësoi Kosovën me këngë për në Eurovizion, ajo u shpërblye dy herë me çmimin e këngëtares me karrierë të suksesshme në Shqipëri si dhe çmimin “Mbretëresha Teuta” të cilin e marrin vetëm emra të mëdhenj të skenës së artit shqiptarë.
Me sharmin dhe elegancën e saj dhe me një zë të mrekullueshëm, Shpresa ka ditur të bëjë gjithmonë publikun për vete, ajo ka një trashëgimi të pasur me shumë këngë.
E pyetur nëpër shumë intervista se cila është kënga e saj e preferuar, Shpresa ka thënë: Këngën që e ka më së shumti për zemër është ‘’Ballada për Drenicën” të cilën e ka kënduar në Akordet e Kosovës gjatë viteve 1988-1989.
KultPlus sot ju sjell një nga interpretimet e këngëtares, këngën “Kroi i fshatit tonë” të cilin përmes origjinalitetit, timbrit dhe një zëri të veçantë, Shpresa e sjell në mënyrë unike. / KultPlus.com
Peshëngritësja shqiptare Enkileda Carja u shpall kampione bote në Botërorin e Peshëngritjes për moshat deri 17 vjeç që po mbahet në kryeqytetin e Perusë, Lima.
Kjo është hera e parë që Shqipëria fiton medalje ari për të rinjtë në një kompeticion të tillë, ndërsa sportistja ka dominuar në pedanë dhe veç titullit kampione bote në shkëputje, shtytje dhe dygarësh, ka thyer edhe tre rekorde evropiane duke përmirësuar peshat e ngritura.
Sipas medieve, Carja jo vetëm që fitoi medalje ari në peshën deri në 64 kilogramë, por mori edhe medalje të bronztë në stilin e shkëputjes pas dy sportisteve nga Kina. Në stilin e shkëputjes Carja ngriti 98 kilogramë, duke përmirësuar edhe rekordin evropian që më herët ishte 97 kg për moshat deri në 20 vjeç.
Peshëngritësja Carja ngriti me radhë 94, 97 dhe 98 kilogramë në shkëputje, për të merituar medaljen e parë të artë. Më pas triumfoi edhe në shtytje, teksa finalizoi me sukses provat me 110, 113 dhe 115 kilogramë. Me 213 kilogramë në total, sportistja kuqezi koleksionoi gjithashtu edhe medalje ari në dygarësh, duke e mbyllur si kampione e trefishtë e botës për U-17.
Lidhur me suksesin e peshëngritës shqiptare ka reaguar edhe ministrja për Rininë dhe Fëmijët, Bora Muzhaqi, e cila tha se kjo është hera e parë që Shqipëria fiton medalje ari për të rinjtë në Botëror, me Carjan që është futur në historinë e peshëngritjes.
“Urime Enkileda Carja, Kampione Bote e Trefishtë dhe krenaria jonë kuqezi! Enkileda ngriti flamurin shqiptar më lart se kurrë, duke fituar medaljen e artë në Botërorin e Peshëngritjes U17 dhe duke thyer 3 rekorde evropiane për të rinjtë”, tha Muzhaqi në një postim në rrjetet sociale.
Sipas Muzhaqit, kampionia nga Elbasani e përfaqësoi vendin me dinjitet, forcë dhe përkushtim, si një shembull frymëzues për të rinjtë në Shqipëri./atsh/ KultPlus.com
Udhëtimi mund të jetë i kushtueshëm, por nëse e zgjidhni destinacionin tuaj me kujdes, mund të jetë më i përballueshëm nga sa mund të mendoni, shkruan Selene Nelson në një artikull të botuar në të përditshmen britanike “Rest Less”.
Ekzistojnë shumë vende të mrekullueshme, tërheqëse dhe me kosto efektive për t’u eksploruar – shumë prej të cilave janë pikërisht në Evropë.
Nëse jeni gati të planifikoni udhëtimin tuaj, ju sugjerojmë 14 vendet më të lira për t’u vizituar në Evropë mes të cilave është renditur edhe Shqipëria.
Shqipëria
E izoluar nga pjesa tjetër e kontinentit për pjesën më të madhe të shekullit XX, Shqipëria ka qenë prej kohësh një nga sekretet më të ruajtura të Evropës.
Por sot, dyert e Shqipërisë janë të hapura dhe nuk do të kalojë shumë kohë përpara se vendi të mbipopullohet nga turistët.
Bregdeti i saj i quajtur Riviera Shqiptare – është i mbushur me plazhe mahnitëse dhe ujëra të kristalta blu.
Vendpushimet më të njohura të plazhit janë, Dhërmiu dhe Ksamili, të cilat nuk janë prekur ende nga turizmi masiv. Si rezultat, akomodimi, ushqimi dhe udhëtimi mbeten mjaft të lira.
Në brendësi të vendit, do të gjeni male të larta, qytete fortesash, kështjella të rrënuara dhe rrënoja të panumërta të lashta greke dhe romake.
Pavarësisht nëse jeni – i apasionuar pas i historisë, një aventurier apo një adhurues i plazhit – ka diçka për të gjithë.
Kryeqyteti i gjallë, Tirana, është një bazë e shkëlqyer për të eksploruar pjesën tjetër të Shqipërisë dhe është një nga vendet më të përballueshme në Evropë për të ngrënë jashtë.
Revista britanike “Rest Less” rekomandon 14 vendet më të lira për t’u vizituar në Evropë;
Shqipëria, Mali i Zi, Portugalia, Malta, Republika Çeke, Greqia, Sllovakia, Bullgaria, Polonia, Rumania, Hungaria, Bosnjë-Hercegovina, Sllovenia, Estonia. /atsh/ KultPlus.com
Ted Chiang (1967), shkrimtar amerikan. Ka fituar nga katër herë si çmimin Nebula ashtu edhe atë Hugo. Ka botuar përmbledhjet me tregime ‘Stories of Your Life and Others’ (2002) dhe ‘Exhalation: Stories’ (2019). Tregimi i tij ‘Story of Your Life’ ishte marrë si bazë për filmin Arrival (2016).
HESHTJA E MADHE
Nga Ted Chiang
Njerëzit e përdorin Aresibon që të kërkojnë inteligjencën jashtëtokësore. Dëshira e tyre që të lidhen me të është aq e fortë sa e kanë krijuar një vesh që është në gjendje të dëgjojë përqark universit.
Por unë dhe shokët e mi papagaj jemi bash këtu. Pse ata s’kanë interesim të dëgjojnë zërat tonë?
Ne jemi një specie jonjerëzore e zonja të komunikojë me ta. A s’jemi ne saktësisht çka po kërkojnë njerëzit?
***
Universi është aq i gjerë sa jeta inteligjente mund të ketë lindur shumë herë. Universi është po ashtu aq i moçëm sa madje edhe ndonjë specie teknologjike mund të ketë pasur kohë të përhapet dhe ta mbushë galaksinë. Po prapëseprapë nuk ka shenjë të jetës askund përveç se në tokë. Njerëzit e quajnë këtë paradoksi i Fermit.
Një zgjidhje e propozuar për paradoksin e Fermit është se speciet inteligjente në mënyrë aktive përpiqen të fshehin praninë e tyre, që të shmangin të qenët shënjestër e pushtuesve armiqësorë.
Duke folur si anëtar i një specieje që është çuar krejt afër zhdukjes nga njerëzit, mund të dëshmoj se kjo është një strategji e mençur. Ka kuptim të qëndrosh i qetë dhe të shmangësh tërheqjen e vëmendjes.
***
Paradoksi i Fermit është nganjëherë i njohur si Heshtja e Madhe. Universi do të duhej të ishte një kakofoni zërash, po në vend të kësaj është tmerrësisht i qetë. Disa njerëz teorizojnë se speciet inteligjente shuhen para se të mund të përhapen në hapësirën e jashtme. Nëse janë korrekt, atëherë qetia e qiellit të natës është heshtja e një varreze.
Qindra vite më parë, lloji im ishte aq i begatshëm sa Mali Río Abajo oshtinte nga zërat tonë. Tash pothuajse e ka pasur puna jonë. Së shpejti ky mal shiu mund të jetë aq i heshtur sa edhe pjesa tjetër e universit.
***
Na ishte njëherë një papagall i hirtë afrikan me emrin Aleks. Ai ishte i famshëm për aftësitë e tij njohëse. I famshëm në mesin e njerëzve, që të jemi të qartë.
Një hulumtuese njerëzore me emrin Irene Pepperberg i kaloi tridhjetë vjet duke e studiuar Aleksin. Ajo vërejti se Aleksi jo vetëm që i njihte fjalët nga format dhe ngjyrat, por ai në të vërtetë i kuptonte konceptet e formës dhe ngjyrës.
Njerëzve ua ka ënda të mendojnë se janë unikë. Po në të vërtetë Pepperbergu i bindi ata se Aleksi nuk i përsëriste thjesht fjalët, se ai e kuptonte se çfarë thoshte.
Në mesin e të gjithë kushërinjve të mi, Aleksi ishte ai që më së shumti mund të merrej seriozisht si partner i komunikimit nga njerëzit.
Aleksi vdiq papritur, sa ishte ende relativisht i ri. Mbrëmjen para se të vdiste, Aleksi i tha Pepperbergut, “Ji mirë. Unë të dua”.
Nëse njerëzit janë në kërkim të një lidhjeje me një inteligjencë jonjerëzore, çka mund të duan më shumë se kaq?
***
Çdo papagall ka një thirrje unike që përdoret për ta identifikuar vetveten; biologët i referohen kësaj si “thirrja e kontaktit” e papagajve.
Astronomët e kishin përdorur më 1974 Aresibon për të përcjellë një mesazh në hapësirën e jashtme me qëllim që të demonstronin inteligjencën njerëzore. Kjo ishte thirrja e kontaktit e njerëzimit.
Në egërsi, papagajtë e thërrasin njëri-tjetrin me emër. Njëri zog e imiton thirrjen e kontaktit të tjetrit për të tërhequr vëmendjen e zogjve të tjerë.
Po qe se njerëzit detektojnë ndonjëherë ndonjë përgjigje të kthyer në tokë ndaj mesazhit të Aresibos, atëherë do të kuptojnë se dikush po mundohet tërheqë vëmendjen e tyre.
***
Papagajtë janë nxënës vokalë: ne mund të nxëmë të nxjerrim tinguj të rinj pasi t’i kemi dëgjuar ata. Është një aftësi që e posedojnë pak kafshë. Qeni mund të kuptojë një duzinë urdhrash, por kurrë s’do të bëjë tjetër veçse të lehë.
Edhe njerëzit janë nxënës vokalë. Këtë kemi të përbashkët. Pra njerëzit dhe papagajtë e ndajnë një marrëdhënie të veçantë me tingullin. Ne nuk bërtasim ashtu thjesht. Ne shqiptojmë. Ne shprehim.
Ndoshta për këtë arsye njerëzit e ndërtuan Aresibon ashtu siç e ndërtuan. Marrësi nuk ka pse të jetë përcjellës, por Aresibo është që të dyja. Është vesh për të dëgjuar dhe gojë për të folur.
***
Njreëzit kanë jetuar përkrah papagajve me qindra vite dhe vetëm së voni kanë shqyrtuar mundësinë se ne mund të jemi inteligjentë. Ma ha mendja se s’mund t’i qortojmë. Ne papagajtë e kemi zakon të mendojmë se njerëzit nuk ishin edhe aq të mençur. Është zor t’i japësh kuptim një sjelljeje aq të ndryshme nga ajo e jotja.
Por papagajtë janë më të ngjashëm me njerëzit se sa çfarëdo specie jashtëtokësore qoftë dhe njerëzit mund të vëzhgojnë nga afër; mund të na shikojnë në sy. Si mund të presin të njohin një inteligjencë aliene nëse e gjitha që mund të bëjnë është të përgjojnë nga një largësi qindra vite dritë?
***
Nuk është koincidencë pse fjala “aspiratë” nënkupton si shpresën ashtu edhe aktin e frymëmarrjes.
Kur ne flasim, përdorim frymën në mushkëritë tona që t’u japim mendimeve tona një formë fizike. Tingujt që nxjerrim ne janë në të njëjtën kohë qëllimet tona dhe forca e jetës sonë.
Unë flas, pra jam. Nxënësit vokalë, si papagajtë dhe njerëzit, ndoshta janë të vetmit që e kuptojnë plotësisht të vërtetën e kësaj.
***
Ka një kënaqësi që vjen me formësimin e tingujve me gojën tënde. Është aq parësore dhe instinktive sa, në të gjithë historinë e tyre, njerëzit e kanë konsideruar këtë aktivitet si një shteg drejt hyjnores.
Mistikët pitagorianë besonin se zanoret paraqitnin muzikën e qiejve dhe psalnin që të përfitonin fuqi nga to.
Të krishterët pentekostalë besojnë se kur flasin në gjuhë, janë duke folur gjuhën që e përdorin engjëjt në parajsë.
Hindusët brahmanë besojnë se kur recitojnë matrat, ata janë duke i shtrënguar blloqet ndërtimore të realitetit.
Vetëm një specie e nxënësve vokalë do të mund t’ua atribuonin një rëndësi kaq të madhe tingujve në mitologjitë e tyre. Ne papagajtë e vlerësojmë këtë.
***
Sipas mitologjisë hinduse, universi ishte krijuar me një tingull: ‘om’. Është një rrokje që përmban brenda vetes gjithçka që ka qenë dhe gjithçka që do të jetë.
Kur teleskopi i Aresibos drejtohet kah hapësira mes yjeve, dëgjohet një zukatje e dobët.
Astronomët e quajnë këtë prapavija e mikrovalëve kozmike. Është rrezatimi i mbetur i Big Bengut, shpërthimit që e ka krijuar universin katërmbëdhjetë miliardë vjet më parë.
Por mund ta mendoni atë edhe si një oshtimë e mezi të dëgjueshme e atij ‘om’-i zanafillor. Kjo rrokje ishte aq kumbuese sa qielli i natës do të vazhdojë të vibrojë për aq sa të ekzistojë universi.
Kur Aresibo nuk është duke dëgjuar diçka tjetër, e dëgjon zërin e krijimit.
***
Ne papagajtë portorikanë i kemi mitet tona. Janë më të thjeshta se mitologjia njerëzore, por mendoj se njerëzit do të ishin kënaqur me to.
Medet, mitet tona po humbin teksa specia ime po zhduket. Dyshoj se njerëzit do ta deshifrojnë gjuhën tonë para se të ikim ne.
Pra zhdukja e species sime nuk do të thotë vetëm humbje e një grupi zogsh. Do të thotë po ashtu shuarje e gjuhë sonë, ritualeve tona, traditave tona. Do të thotë heshtje e zërave tonë.
***
Aktiviteti njerëzor e ka sjellë llojin tim në zgrip të zhdukjes, por nuk u vë faj. Nuk e kanë bëtë këtë me qëllim të keq. Thjesht nuk po i kushtonin vëmendje.
Dhe njerëzit kanë krijuar aq mite të bukura; çfarë imagjinate që kanë. Ndoshta për këtë arsye aspiratat e tyre janë kaq të pafundme. Shikojeni Aresibon. Cilado specie që mund të ndërtojë një gjë të tillë e ka madhështinë brenda vetes.
Specia ime me gjasë s’do të jetë këtu edhe gjatë kohë; ka të ngjarë të vdesim para kohës sonë dhe t’i bashkohemi Heshtje së Madhe. Por para se të largohemi, po ia dërgojmë një mesazh njerëzimit. Shpresojmë që teleskopi në Aresibo t’ua mundësojë ta dëgjojnë atë.
Mesazhi është ky:
Ji mirë. Unë të dua.
/The Penguin Book of the Modern American Short Story, nën kujdesin e John Freeman, Penguin, 2022/Gazeta Express/ KultPlus.com
Kryeministri në detyrë, Albin Kurti, mbrëmë, mori pjesë në ngjarjen e organizuar me rastin e shënimit të 50-vjetorit të themelimit të Shoqatës kulturo-artistike “Malësori” dhe në edicionin e 36-të të Festivalit Folklorik “Hasi Jehon”.
“Pesë dekada përkushtim e punë të palodhshme për ruajtjen e vlerave të folklorit burimor, përmes veshjeve, instrumenteve e këngës popullore, e kanë shndërruar këtë manifestim në një nga ngjarjet më të rëndësishme kulturore në trojet ku jetojnë shqiptarët. Është një vendtakim i përvitshëm për mijëra artdashës dhe një skenë ku vlerat kulturore marrin hov”, u shpreh në hyrje të fjalës së tij kryeministri Kurti.
Në vijim, Kurti tha se ky manifestim, që mbahet në fillim të muajit maj, përkon me datat simbolike të pajtimit të madh të gjaqeve më 2 maj 1990, ngjarje kjo e cila ndodhi pikërisht këtu, në vendin ku po zhvillohet manifestimi edhe sivjet, njofton Kryeministria.
“Përballë sfidave dhe periudhave të vështira të së kaluarës, “Hasi Jehon” ka qëndruar si një dëshmi e gjallë e rezistencës dhe angazhimit për ruajtjen e identitetit tonë kulturor”, u shpreh kryeministri në detyrë.
Ai shtoi se Qeveria e Republikës së Kosovës dhe Ministria e Kulturës, Rinisë dhe Sportit, i kanë kushtuar vëmendje të veçantë mbështetjes institucionale dhe financiare për të gjitha fushat e kulturës, veçanërisht në fushën e folklorit, ku kemi mbështetur në vazhdimësi ansamblet, manifestimet, studimet dhe botimet në tërë territorin e vendit, me qëllim zhvillimin e mëtejshëm të kapaciteteve për ruajtjen, kultivimin dhe promovimin e trashëgimisë sonë.
“Hasi Jehon” është më shumë se një festival: është një urë që na lidh me njëri-tjetrin dhe me botën, përmes zërit të pastër të folklorit shqiptar”, tha kryeministri.
Shoqata kulturo-artistike “Malësori”, me projektin Festivali Folklorik “Hasi Jehon”, është mbështetur nga Qeveria përmes Ministrisë së Kulturës, Rinisë dhe Sportit. Gjatë vitit 2021 është përkrahur me shumën 7 mijë euro, në vitin 2022 kjo përkrahje është më shumë se trefishuar në vlerën prej 25 mijë euro. Ndërkohë, festivali ka marrë mbështetje edhe në vitin pasues me vlerë prej rreth 27 mijë euro, ndërsa kjo përkrahje gjatë vitit 2024 ka arritur në vlerën prej 30 mijë euro.
Presidentja Vjosa Osmani ka thënë se Kosova dhe Malajzia janë një partneritet që e ka zanafillën në ditët më të vështira për Kosovën, kur Malajzia na doli në krah.
Në një postim në Facebook, ajo ka thënë se partneriteti mes dy shteteve dita ditës po bëhet më i fortë dhe më domethënës.
“Kjo vizitë ishte jo vetëm një mikpritje e nderim për Kosovën që nuk do të harrohet, por edhe një premtim i qartë që i shërben zhvillimit dhe fuqizimit të ndërsjellë”.
“Faleminderit! Terima Kasih!”, ka thënë Osmani.
Sunny Hill Festival zbulon artisten e parë të nivelit botëror që do të ngjitet në platformën e re gjigante të skenës së muzikës elektronike: Peggy Gou!
Peggy Gou, ikona botërore e muzikës elektronike, e njohur për setet e saj energjike dhe hitet që pushtojnë skenat dhe festivalet më të mëdha nëpër botë, do të jetë një nga emrat kryesorë që do të elektrizojë mijëra adhurues të muzikës elektronike në edicionin e ri të Sunny Hill Festival, i cili këtë vit fillon nga 1 deri më 3 gusht.
Sunny Hill Festival ka njoftuar zyrtarisht se Peggy Gou është artistja e parë nga gjashtë artistë kryesorë të këtij viti. Emrat e performuesve të tjerë do të zbulohen në ditët në vijim.
“Përveç yjeve ndërkombëtarë, edicioni i vitit 2025 do të sjellë një numër madh të artistëve, me rreth 60 emra vendorë dhe të huaj që këtë vit do të performojnë në Sunny Hill Festival. Po ashtu këtë vit, skenat janë disa herë më të mëdha se ato të edicionit të kalur duke premtuar kështu një eksperiencë vizuale shumë më të veçantë”, kanë bërë të ditur organizatorët.
Me origjinë nga Koreja e Jugut, Peggy Gou është bërë një nga emrat më të dashur të skenës globale të muzikës elektronike, falë stilit të saj të veçantë që ndërthur kulturën aziatike me ritmet bashkëkohore të house dhe techno.
Superhiti i saj “(It Goes Like) Nanana” pushtoi skenën muzikore gjatë verës së kaluar, duke dominuar top-listat muzikore dhe skenat më të mëdha të festivaleve në mbarë botën. Me këngë si “It Makes You Forget (Itgehane)” dhe “Starry Night”, ajo ka krijuar një identitet unik që i flet një audience globale.
Rritja e saj nga një sensacion në TikTok në një ikonë të vërtetë të muzikës elektronike ka qenë spektakolare – dhe tani, ajo vjen në skenën e Sunny Hill Festival 2025 për të sjellë një natë të paharrueshme, plot energji pozitive.
Ajo është artistja e parë që zbulohet, nga lista e performuesve në skenën C4. Është fjala për skenën që Festivali inaguroi vitin e kaluar, me titull që vjen si nderim për hyrjen e ndërtesës në Ulpianë, Prishtinë ku familja Lipa ka jetuar më herët. Skenë kjo që këtë vit vjen me pamje të re dhe më përmasa shumë me të mëdha se vitin e kaluar.
Performanca e Peggy Gou pritet të jetë një nga momentet kulmore të edicionit të sivjetmë, duke i dhënë festivalit një tjetër dimension ndërkombëtar dhe duke forcuar më tej statusin e Sunny Hill si një nga festivalet më të rëndësishme në rajon.
Shitja e biletave “Early Bird” tashmë ka filluar, ndaj sigurohuni të mos e humbisni mundësinë për të qenë pjesë e këtij edicioni: https://ticketing.festtix.co.uk/events/sunny-hill-festival-2025 / KultPlus.com
Bryan Adams një nga artistët më me ndikim dhe me disqet më të shitur të të gjitha kohërave, me llojin e tij të rok-ut të butë që e çoi atë në majat e muzikës botërore, pasi pushtoi zemrat e miliona fansave gjatë karrierës së tij prej gati pesë dekadash, performoi dje në Tiranë.
Për herë të parë, Adams u ngjit në skenën e Pallatit të Kongreseve ku biletat për të ndjekur performancën e tij ishin shitura të gjitha.. Koncerti zgjati mbi dy orë i cili përshkroi kufijtë e diskografisë së gjerë të kanadezit.
Adams e filloi shfaqjen e tij me hitin “Let’s Make A Night To Remember”, e cila ishte hapja perfekte e koncertit, ndërsa salla u mbush me tingujt e kitarës. Energjia ishte fantastike që nga fillimi i koncertit dhe vazhdoi të rritej ndërsa Adams performonte me hitet e tij duke e bërë të gjithë turmën të këndonte së bashku me “Everything i do, i do it for you”.
Zëri i Adams jehoi në të gjithë Pallatin e Kongreseve me “Please forgive me”, ndërsa fuqia e këngës dhe muzikës iu bashkua edhe më tej publiku që këndoi me gjithë shpirt. Ishte një moment magjik.
Është e mahnitshme të mendosh se sa shumë hite ka Adams gjatë karrierës së tij dhe ai i luajti pothuajse të gjitha, përfshirë edhe bashkëpunimet e shumta si dhe këngë, kolona zanore të filmave të njohur të Hollivudit.
E pabesueshme se sa i ngjashëm tingëlloi zëri i Adams dje me albumet që ai ka bërë dekada më parë dhe se si ai po njësoj, këndoi në skenë përballë një publiku qe e admiroi gjatë gjithë kohës.
Edhe pse Adams nuk e pati të nevojshme të performonte ndonjë cover duke pasur parasysh diskografinë e tij të jashtëzakonshme, ai këndoi një superhit të tij me Tina Turner, “It’s Only Love”, një moment i ndjeshëm dhe për vetë këngëtarin.
Ai e mbajti audiencën në këmbë ndërsa nisi të këndojë “Summer of ’69”.
Adams e mbylli koncertin me këngën “Straight from the Heart” të cilën ia dedikoi nënës së tij 97-vjeçare. Mënyra e tij e thjeshtë për ta mbyllur natën dhe komunikimi fantastik gjatë gjithë koncertit, u shpërblye me të njëjtën dashuri edhe nga publiku.
Bryan Adams, një këngëtar i mezipritur në Shqipëri, shkëlqeu me vokalin dhe muzikalitetin e tij me vetëm një kitar dhe një piano.
Për publikun, koncerti i mbajtur në “Pallatin e Kongreseve”, ishte gjithçka që mund të kërkonte nga një këngëtar i këtij niveli ndërkombëtar, dhe e vetmja gjë që mund të shpresojmë është që kjo të mos jetë hera e fundit./atsh/ KultPlus.com
3 Maji është një datë që feston parimet themelore të lirisë së shtypit, për të vlerësuar lirinë e shtypit në mbarë botën, për të mbrojtur median nga sulmet ndaj pavarësisë së saj dhe për të nderuar gazetarët që kanë humbur jetën në ushtrimin e profesionit të tyre.
Dita Botërore e Lirisë së Shtypit u shpall nga Asambleja e Përgjithshme e OKB-së në vitin 1993 pas një Rekomandimi të miratuar në sesionin e 26-të të Konferencës së Përgjithshme të UNESCO-s në vitin 1991.
Tema e Ditës Botërore të Lirisë së Shtypit për vitin 2025 është “Raportimi në Botën e Re të guximshme – Ndikimi i inteligjencës artificiale në lirinë e shtypit dhe median”.
OKB thotë se, rritja e shpejtë dhe përdorimi i Inteligjencës Artificiale (IA) po ndryshon gazetarinë, median dhe lirinë e shtypit në mënyra të mëdha. Ndërsa parimet e medias së lirë, të pavarur dhe pluraliste mbeten vendimtare, ndikimi i IA në mbledhjen, përpunimin dhe shpërndarjen e informacionit është i thellë, duke paraqitur si mundësi novatore, ashtu edhe sfida serioze.
Inteligjenca Artificiale mund të ndihmojë në mbështetjen e lirisë së shprehjes duke e bërë më të lehtë aksesin e informacionit, duke lejuar më shumë njerëz të komunikojnë në të gjithë botën dhe duke ndryshuar mënyrën se si informacioni rrjedh globalisht.
Në të njëjtën kohë, IA sjell rreziqe të reja. Mund të përdoret për të përhapur informacione të rreme ose mashtruese, për të rritur gjuhën e urrejtjes në internet dhe për të mbështetur lloje të reja të censurës./ KultPlus.com
Udhëtimi mund të jetë i kushtueshëm, por nëse e zgjidhni destinacionin tuaj me kujdes, mund të jetë më i përballueshëm nga sa mund të mendoni, shkruan Selene Nelson në një artikull të botuar në të përditshmen britanike “Rest Less”.
Ekzistojnë shumë vende të mrekullueshme, tërheqëse dhe me kosto efektive për t’u eksploruar – shumë prej të cilave janë pikërisht në Evropë.
Nëse jeni gati të planifikoni udhëtimin tuaj, ju sugjerojmë 14 vendet më të lira për t’u vizituar në Evropë mes të cilave është renditur edhe Shqipëria.
Shqipëria
E izoluar nga pjesa tjetër e kontinentit për pjesën më të madhe të shekullit XX, Shqipëria ka qenë prej kohësh një nga sekretet më të ruajtura të Evropës.
Por sot, dyert e Shqipërisë janë të hapura dhe nuk do të kalojë shumë kohë përpara se vendi të mbipopullohet nga turistët.
Bregdeti i saj i quajtur Riviera Shqiptare – është i mbushur me plazhe mahnitëse dhe ujëra të kristalta blu.
Vendpushimet më të njohura të plazhit janë, Dhërmiu dhe Ksamili, të cilat nuk janë prekur ende nga turizmi masiv. Si rezultat, akomodimi, ushqimi dhe udhëtimi mbeten mjaft të lira.
Në brendësi të vendit, do të gjeni male të larta, qytete fortesash, kështjella të rrënuara dhe rrënoja të panumërta të lashta greke dhe romake.
Pavarësisht nëse jeni – i apasionuar pas i historisë, një aventurier apo një adhurues i plazhit – ka diçka për të gjithë.
Kryeqyteti i gjallë, Tirana, është një bazë e shkëlqyer për të eksploruar pjesën tjetër të Shqipërisë dhe është një nga vendet më të përballueshme në Evropë për të ngrënë jashtë.
Revista britanike “Rest Less” rekomandon 14 vendet më të lira për t’u vizituar në Evropë;
Shqipëria, Mali i Zi, Portugalia, Malta, Republika Çeke, Greqia, Sllovakia, Bullgaria, Polonia, Rumania, Hungaria, Bosnjë-Hercegovina, Sllovenia, Estonia. / KultPlus.com
Kjo shprehje e Xhojsit, do ta përcaktone më saktë ndikimin e fuqishëm dhe gjurmët pashlyeshme në art, histori dhe letërsi. Shekspiri e ngriti artin poetik në majat më të larta. Të gjitha studimet e analizat e veprës së tij, kanë emërues të përbashkët: vepra shekspirane është e admirueshme si tërësi dhe në të gjithë përbërësit e veçantë. Vepra e tij, së bashku me Biblën dhe Deklaratën e të Drejtave të Njeriut, janë shtyllat mbi të cilat formohet identiteti historik i Evropës.
Shekspiri konsiderohet si shkrimtari më brilant i gjuhës angleze, në mënyrë absolute, një ndër shkrimtarët më të mëdhenj të të gjitha kohërave. Një ndër shkrimtarët më të famshëm në botë. Ai ishte qenë komedian, dramaturg, por edhe aktor. Shkroi disa tragjedi të jashtëzakonshme, që përfaqësojnë historinë e letërsisë botërore, si edhe shumë komedi dëfryese, që nuk u shfaqen kurrë nëpër skenat angleze.
Krijimtaria e tij, përmbledh 37 vepra për teatrin, prej të cilave 13 tragjedi, 10 drama historike dhe 14 komedi. Pjesa tjetër e krijimtarisë përfshin 154 sonete, që mbahen si realizimi poetik më i çmueshëm i gjithë kësaj periudhe dhe 2 poema.
Aftësia e tij qëndronte në të hedhurit e rrëfimit përtej, për të përshkruar kështu pamjet e brendshme dhe të thella të natyrës njerëzore. Mendohet se pjesën më të madhe të veprave, t’i ketë shkruar midis viteve 1585-1611 dhe pse, kronologjia e veprave që i atribuohen nuk njihet me saktësi, duke shkaktuar kështu mangësi në lidhje me hartimin e një biografie të thellë dhe të plotë, për këtë figurë madhështore të letërsisë.
Shekspiri përdori rreth 20 mijë unitete gjuhësore ndërkohë që e folmja e asaj kohe, nuk përmbante më shumë se 1,500 fjalë. Kishte një gjuhë jashtëzakonisht të gjallë dhe të pasur në neologjizma, lojë fjalësh, si dhe fjalë me shumë kuptime.
Për lexuesin shqiptar është e njohur mirë gjenia dramatike e Shekspirit, nga përkthimet e mjaft prej dramave të tij, sidomos nëpërmjet përkthimeve mjeshtërore të at Fan S. Nolit. Nëpër të 36 dramat e tij janë të shpërndara qindra këngë dhe pasazhe lirike (si kënga e Ofelisë së marrosur te “Hamleti”, profetizimi i magjistricave te “Makbethi” mjaft pasazhe tek “Antoni dhe Kleonatra”).
Veprat e para të Shekspirit në zhanrin e poezisë u shkruan dhe u botuan pasi ai kishte arritur të njihej si dramaturg. Në vitin 1593 u botua “Venusi dhe Adonisi” në vitin 1594 – “Përdhunimi i Lukrecias”, në vitin 1598/9 – 20 këngë lirike (midis tyre disa sonete) në “Pelegrini i apasionuar”, në vitin 1601 – “Feniksi dhe breshka”. Në këtë periudhë, me ndërprerje, Shekspiri filloi të shkruante sonetet, që i vazhdoi deri në vitin 1600. Ato qarkulluan për një kohë të gjatë në rrethin e miqve të tij dhe u botuan vetëm në vitin 1609. Ato u shkruan në kohën kur Shekspiri pati arritur pjekurinë e tij të plotë dhe paraprinë drama të tilla si “Hamleti”, “Makbethi”, “Otello”, “Antoni dhe Kleopatra”./ Konica.al / KultPlus.com
Agim Krajka u lind në Kavajë, më 3 maj 1937, në një familje me origjinë dibrane. Babai i tij ishte i pasionuar pas muzikës, dhe si amator luante në disa instrumente muzikore, si violinë, mandolinë, fizarmonikë.
Dashuria dhe pasioni për muzikën tek Agimi lindën që në fëmijëri, të cilën ia ushqeu edhe vetë i ati. Fizarmonika u bë shkak që vajti në Shtëpinë e Pionierit, ku filloi të merrej seriozisht me të.
Në vitin 1963 Agimi fillon studimet për teori e kompozicion. Degën e Kompozicionit e ka kryer nën drejtimin e të madhit Çesk Zadeja. Në vitin 1964 kalon pranë Ansamblit të Këngëve dhe Valleve popullore; në fillim si instrumentist, e më pas si kompozitor dhe drejtues orkestre.
Veprimtaria e tij muzikore është shumë e gjerë dhe përfshin një periudhë prej tri dekadash. Ka shkruar muzikë në shumë lloje dhe është bërë i famshëm si me muzikën e lehtë, ashtu edhe më atë popullore, të përpunuar e orkestrale.
Ka kompozuar mjaft pjesë orkestrale për fizarmonikë dhe me qindra këngë të muzikës së lehtë. Ka marrë pjesë në shumë festivale të muzikës deri në festivalet e fundit të pasviteve ‘90, duke filluar me këngën e famshme “Lemza”, kënduar nga Vaçe Zela në Festivalin e Parë të Këngës në Radio më 1961.
Ai është nderuar me mbi 15 çmime të dyta, 3 çmime të treta dhe vetëm një çmim të parë në Festivalin e vitit 1987, me këngën “Nuk e harroj”, të kënduar nga motrat Libohova. Agim Krajkës i është dhënë titulli “Artist i Popullit”. / KultPlus.com
Sot janë bërë 62 vite nga lindja e Heroit të Kosovës Agim Ramadanit.
Agim Ramadani (3 Maj 1963 – 11 Prill 1999) i njohur ndryshe me nofkën “KATANA”, ishte njëri prej komandantëve më të shquar dhe më aktivë të Ushtrisë Çlirimtare të Kosovës (UÇK) si dhe komandant i Zonës së Koshares.
Gjatë luftës në Kosovë në vitin 1998, ai zhvilloi operacione të suksesshme ushtarake kundër forcave serbe përreth kufirit Kosovë–Shqipëri dhe ai gjithashtu udhëhoqi Betejën e përgjakshme të Koshares e cila u zhvillua më 9 Prill të vitit 1999, ku edhe ishte komandant i Brigadës 138 deri në ditën e rënies heroike të tij. Pas përfundimit të luftës, ai u shpall Hero i Kosovës.
Lindi më 3 Maj 1963 në fshatin Zhegër të Komunës së Gjilanit dhe ra dëshmor më 11 Prill 1999 në fshatin Koshare të Komunës së Gjakovës gjatë një luftimi ballë për ballë me forcat serbe.
Të parët e Familjes së tij ishin me prejardhje nga Malësia e Karadakut, pikërisht nga fshati Depcë afër Preshevës. Shkollimin Fillor e kreu në vendlindje, ndërsa Shkollën e Mesme Teknike në Gjilan në vitin 1980, dhe më pas e vazhdoi Akademinë Ushtarake–Drejtimi i Komunikacionit në Zagreb të Kroacisë.
Me poezi dhe pikturë është marrë që nga shkollimi i mesëm. Përderisa poezitë e tij, sa ishte gjallë i mbetën të shpërndara nëpër revista të ndryshme e në dorëshkrim, si piktor organizoi ekspozita kolektive e personale në Kroaci, ku punoi si ushtarak dhe në Zvicër ku jetoi si emigrant politik dhe me fillimin e luftës në Kroaci, ai e braktisi ish–Armatën Jugosllave ku punonte si oficer. Në vitin 1998 pranohet anëtarë nderi në Akademinë Evropiane të Arteve.
Ndonëse e kishte të rregulluar statusin e emigrantit, Agim Ramadani në vitin 1998, iu përgjigj thirrjes së atdheut dhe u inkuadrua në radhët e Ushtrisë Çlirimtare të Kosovës (UÇK), duke i lënë në Zvicër gruan dhe tre fëmijët e tij.
Gjatë luftës u dëshmua si strateg i lartë dhe udhëheqës i dashur për ushtarët. Ishte njëri ndër hartuesit e planit për thyerjen e kufirit shqiptaro-shqiptar, gjë të cilën edhe e bëri bashkë me shokët e vet. Ishte i pari që shkuli gurin-piramidën-kufitare në Koshare.
Pas thyerjes së këtij kufiri, në pjesën e Kosovës, tek vendi i quajtur “Zharret”, ai ra dëshmor. Llogaritet si një nga heronjtë më të njohur të historisë së re shqiptare. Në Gjilan para Teatrit Kombëtar i është ngritur një shtatore, në të cilën janë komponuar të gjitha elementet artistike dhe luftarake të Agim Ramadanit–KATANËS./ KultPlus.com
Himara ka qenë kryeqendra e festimeve gjatë kësaj fundjave me rastin e çeljes së sezonit turistik të këtij viti.
Përgjatë dy ditëve në Himarë po zhvillohen festimet, të cilat synojnë të promovojnë Himarën si një nga destinacionet më tërheqëse në Rivierën shqiptare.
Në kuadër të kësaj feste po mbahet dhe festivali dyditor i titulluar “Magji mbi Jon”.
Festimet e çelura dje vijuan edhe gjatë ditës së sotme me aktivitete të ndryshme, ku në fokus ishin fëmijët.
Ngjyra, krijimtari dhe shumë buzëqeshje nga më të vegjlit, të cilët u bënë pjesë e atmosferës festive përmes pikturave plot fantazi në fytyrat e tyre. Ata përjetuan momente të bukura që e bëjnë këtë fillim sezoni edhe më të veçantë.
WebikeAlbania bëri të mundur në Himarë edhe pedalimin virtual që i dha energji hapjes së sezonit turistik.
Të rinj, fëmijë e vizitorë provuan një eksperiencë ndryshe – një udhëtim imagjinar mbi biçikletë, përmes peizazheve shqiptare. Kjo ishte një mënyrë argëtuese dhe miqësore me mjedisin për të promovuar lëvizjen e qëndrueshme dhe eksplorimin aktiv.
Hapja e sezonit turistik në Himarë u shoqërua me një aktivitet ndërgjegjësues për fëmijët, të organizuar nga Shoqata Shqiptare për Mbrojtjen nga Zjarri (AFPRA) dhe organizata gjermane Olam Aid, në bashkëpunim me Bashkinë Himarë.
Fëmijët morën pjesë në një trajnim edukues mbi parandalimin dhe rrezikun nga zjarret, ku nëpërmjet lojërave, demonstrimeve dhe pyetjeve interaktive, mësuan si të reagojnë në situata emergjente dhe si të kujdesen për natyrën gjatë sezonit të verës.
Ky aktivitet synon të rrisë ndërgjegjësimin që në moshë të vogël për mbrojtjen e mjedisit dhe rëndësinë e një sjelljeje të kujdesshme ndaj zjarrit.
Mbrëmjen e djeshme në Himarë performoi këngëtarja Aurela Gaçe, ndërsa sonte në mbrëmje skena do t’i takojë këngëtarit të njohur grek, Kristos Mastoras./ KultPlus.com
“Mos keni frikë nga madhështia. Disa lindin të mëdhenjë, e disa e arrijnë, ndërsa të tjerët e kanë madhështin të ngulur mes tyre.”
“Ferri është i zbrazët. Të gjithë djajt janë këtu.”
“Ne e dim çka jemi, por nuk e dim çka mund të bëhemi.”
“Frikacakët vdesin mijëra herë para vdekjes; guximtari vdekjen e shijon vetëm njëherë.”
“Mos e humb dashurinë tënde aty ku ajo nuk vlerësohet.”
“Nuk dashurojnë atë që nuk e shfaqin dashurinë e tyre.”
– William Shakespeare / KultPlus.com
Gjirokastra pas investimeve të kryera vitet e fundit nga 6 mijë turistë në vit që e vizitonin para 2013, vitin e kaluar arriti në 600 mijë.
Kështu deklaroi sot kryeministri, njëherësh kryetari i Partisë Socialiste, Edi Rama në një takim në Gjirokastër për prezantimin e arritjeve kyçe për sektorët më të rëndësishëm dhe sfidat e Shqipërisë 2030 në BE.
“Pyetja që më vjen natyrshëm është po pse votojnë njerëzit. Faktikisht besoj që njerëzit votojnë në shumicë sepse kur ne themi gjëra me të cilat të tjerët qeshin, këta të berbehaneve përqeshin, kjo është propagandë. Edhe pse shumë nga gjërat që bëhen nuk dalin nëpër këto pasqyrat e kënetave faktikisht prekin drejtpërdrejt njerëz edhe arrijnë drejtpërdrejt tek njerëzit”, tha Rama.
Përshembull, vijoi Rama, kur ne themi që Gjirokastra kur ne morëm detyrën kishte 6 mijë turistë në vit, ndërkohë që vjet kishte 600 mijë, këtë berbehanet e përqeshin ndërkohë që gjirokastritët e dinë dhe jetojnë përditë dhe e shohin përditë faktin që këtij qyteti i ishte vënë shkelmi në fyt dhe ngjante sikur po jepte shpirt.
“Sot Gjirokastra merr frymë, rritet zhvillohet edhe shkëlqen hap pas hapi në pjesë të caktuara të tij dhe për këtë arsye thashë se ç’mund të bëjmë ne në këto ditë që kanë mbetur dhe do të ishte e udhës në situata bashkëbisedimi dhe duke shfrytëzuar edhe praninë e mediave për t’iu treguar sa më shumë njerëzve disa fakte dhe të dhëna që nuk i dine”, tha Rama./ KultPlus.com
Më 3 maj të vitit 1877, në Janinë, nën kryesinë e Abdyl Frashërit, u formua Komiteti i Janinës.
Qëllimi i komitetit ishte mbrojtja e tokave shqiptare nga rreziku i copëtimit nga shtetet fqinje.
Komiteti i Janinës vendosi lidhje edhe me qarqet politike që vepronin në viset e tjera të atdheut, me të cilat shqyrtoi çështjen e përgatitjes së kryengritjes së armatosur. Në të njëjtën kohë ai ra në kontakt me oficerët shqiptarë që shërbenin në garnizonet osmane të vendit dhe që treguan gatishmëri për të marrë pjesë në kryengritjen e armatosur. Pas kësaj, shqetësimi kryesor i Komitetit u përqendrua në aspektin diplomatik të çështjes shqiptare.
Udhëheqësit e Komitetit të Janinës ishin të ndërgjegjshëm se qeveria greke nuk do të hiqte dorë aq lehtë nga qëndrimi i saj i vjetër, nuk ishte e prirur që të pranonte kërkesën e shqiptarëve për të përfshirë në shtetin e tyre krejt Shqipërinë e Jugut deri në Prevezë, sepse ishte pushtuar nga lakmia për të aneksuar krejt vilajetin e Janinës, deri te lumi Seman. Megjithatë ata shpresonin se përballë gjendjes kritike që ishte krijuar për Greqinë nga përparimi i ushtrive ruse, Athina mund të hiqte dorë nga platforma që kishte parashtruar vitin e kaluar dhe do ta shikonte me një sy realist propozimin e shqiptarëve./ Diaspora shqiptare/ KultPlus.com
Ylli i muzikës, kantautori amerikan, Bob Dylan do të hapë në Londër një ekspozitë me piktura që, sipas tij, janë krijuar me rezonancë emocionale.
Fituesi i Çmimit Nobel për Letërsi, 83 vjeç, do të sjellë 97 vepra origjinale që paraqesin personazhe dhe objekte në galerinë ”Halcyon”.
Ekspozita e tij personale “Point Blank”, e cila kap njerëz që luajnë instrumente, çifte, sportistë burra dhe gra, së bashku me dhoma dhe vende, bazohet në skica origjinale të krijuara midis viteve 2021 dhe 2022.
”Këto vizatime u pikturuan më pas me ngjyra, për të krijuar entitete të gjalla, që marrin frymë dhe kanë rezonancë emocionale, ngjyra të përdorura si armë dhe përcaktuese të humorit, një mjet për të treguar histori”, thotë Dylan.
“Ideja nuk ishte vetëm të vëzhgoja gjendjen njerëzore, por të hidhesha në të me një urgjencë të madhe”, tha ai.
Disa nga vizatimet janë ripunuar si studime monokromatike me blu, të kuqe dhe neutrale, të cilat mund të kujtojnë Periudhën e hershme Blu të Pablo Picasso-s.
Kate Brown, drejtoreshë dizajni në galerinë Halcyon, tha se “këto vepra në letër ndihen si kujtime, dritare të paprekshme në jetën dhe imagjinatën e njërit prej rrëfimtarëve më të mëdhenj që ka jetuar ndonjëherë”.
Paul Green, president dhe themelues i ”Halcyon”, tha se “kanë kaluar gati 18 vjet që kur ‘Halcyon’ filloi të punonte për herë të parë me Bob Dylan dhe ka qenë një përvojë e jashtëzakonshme të shikosh këtë ikonë kulturore të zhvillohet në një artist vizual kaq të respektuar dhe të rëndësishëm nga kritika”.
Dylan, i cili ka fituar 10 çmime Grammy dhe është nominuar 38 herë, është një nga kompozitorët më të vlerësuar dhe u fut në Sallën e Famës së Rock and Roll në vitin 1988.
Këngët e tij janë regjistruar më shumë se 6 000 herë, me artistë të ndryshëm si ”The Byrds”, Jimi Hendrix dhe Adele, që kanë gjetur sukses si komercial ashtu edhe kritik me këngët e interpretuara nga artistë të tjerë.
Dylan e filloi karrierën e tij në vitin 1962 me këngën ”Mixed-Up Confusion”, e cila nuk arriti të renditej në top listat e Britanisë së Madhe ose SHBA-së – përpara se të bëhej yll me një sërë këngësh të tjera në vitin 1965, duke përfshirë ”The Times They Are A-Changin”, ”Subterranean Homesick Blues” dhe ”Like A Rolling Stone”./ KultPlus.com
Vetëm 1 javë ka mbetur nga nisja e garës çiklistike Giro D’italia e cila vjen për herë të parë në Shqipëri.
Ministri i Ekonomisë, Kulturës dhe Inovacionit, Blendi Gonxhja, u shpreh në një postim në rrjetet sociale se aktiviteti më i famshëm sportiv në botë, do të mbledhë në datat 9, 10 dhe 11 maj çiklistët më të mirë të botës në Tiranë, Durrës dhe Vlorë, ku do të përshkojnë terrene të ndryshme për të arritur në pikën finale.
Gonxhja tha se, “nga Durrësi në Tiranë e deri në Vlorë, më 9, 10 dhe 11 Maj, 180 çiklistë profesionistë do të garojnë në rrugët tona, duke sjellë emocion, pasion dhe vëmendjen e gjithë botës”.
“Gara çiklistike Giro D’italia është një ngjarje e madhe që do të bashkojë 3 qytete në 3 ditë”, u shpreh Gonxhja.
“Giro D’italia” një nga ngjarjet më të mëdha vjetore të sportit do të kontribuojë në promovimin e Shqipërisë, duke nxitur kështu edhe më shumë turizmin dhe zhvillimin ekonomik të vendit. / KultPlus.com
“Giro d’Italia 2025” do të nisë më 9 maj në Shqipëri, ku do të zhvillohen tri etapat e para, dhe do të përfshijë 21 etapa duke përfunduar më 25 maj në Romë.
Prezantimi i ekipeve pjesëmarrës në aktivitet do të bëhet në datën 7 maj, në orën 20:30 në sheshin “Skënderbej”.
ETAPA 1: Durrës – Tiranë (9 maj)
Xhiro do të nisë rreth orës 13:10 që nga Porti i Durrësit, ku do të bëhet nxehja dhe pedalimi i ekipeve deri sa të arrijnë në KM 0, në Durrës nga ku do të startojë gara. Sportistët do të vijojnë drejt Malit të Robit, në Kavajë, Rrogozhinë, Peqin, Papër, Bradashesh, Gracen, Mullet, TEG, Sauk, Surrel, Tiranë. Në Tiranë, ata do të rrotullohen nga Surreli, në rrugën “Xhanfize Keko”, drejt bulevardit “Dëshmorët e Kombit”, pastaj sërish në rrugën e “Rexhekrit”, drejt Surrelit, në rrugën “Xhanfize Keko” e në bulevardin “Dëshmorët e Kombit”. Përfundimi i garës parashikohet të jetë rreth orës 17:03 në sheshin “Nënë Tereza”.
ETAPA 2: Tiranë – Tiranë (10 maj)
Gara nis që nga sheshi “Skënderbej” rreth orës 13:30, në drejtim të bulevardit “Gjergj Fishta”, pastaj nëpërmjet bulevardit “Bajram Curri” drejt sheshit “Nënë Tereza”, në Rrugën e Elbasanit drejt Saukut, rikthehen në bulevardin “Bajram Curri”, nga Ura e Brrylit drejt bulevardit “Dëshmorët e Kombit”, deri tek sheshi “Nënë Tereza”, ku rreth orës 17:15 është parashikuar të përfundojë xhiroja.
ETAPA 3: Vlorë – Vlorë (11 maj)
Xhiroja do të nisë rreth orës 13:15, nga Lungomare, ku do të bëhet nxehja dhe pedalimi i ekipeve deri sa të arrijnë në KM 0, në rrugën “Demokracia”, nga ku do të startojë gara. Sportistët do të vijojnë itinerarin drejt Kotës, në Brataj, drejt Qeparoit, më pas nga Porto Palermo në Himarë, e më pas do të kthehen nga Qafa e Llogorasë, drejt Orikumit, e nëpërmjet rrugës “Murat Tërbaçi” do të kthehen në Vlorë. Përfundimi i garës parashikohet të jetë rreth orës 17:26 në rrugën “Sadik Zotaj”./ KultPlus.com
