Hapet shkolla shqipe në Rümlang të Kantonit të Zyrihut

Vazhdojnë sukseset e Shkollës Shqipe në Zvicër, nga njëra shkollë te tjetra, nga njëri kanton te tjetri, vazhdon të rritet interesimi i prindërve dhe njëkohësisht edhe i nxënësve, të cilët vijnë me përkushtim t`i ndjekin mësimet në gjuhën amtare. A ka gëzim më të madh kur i sheh këta fëmijë, të buzëqeshur, të lumtur me abetare në duar.

Mësuesja Qefsere Sejdiu së bashku me nxënësit e shkollës shqipe në Rümlang të Zyrihut dje, e hënë, datë 24 tetor 2022 hapi dyert e shkollës shqipe në Rümlang të Zyrihut. E kemi thënë në vazhdimësi se aty ku mësuesit punojnë me përkushtim dhe bëhen bashkë me prindërit sukseset nuk mungojnë. Kjo është dëshmi e pikës shkollore në Rümlang të Zyrihut dhe dhjetëra pikave shkollore ku prindër dhe mësues u bënë bashkë me qëllim që  të hapet pika shkollore sa më afërm këtyre fëmijëve, të cilët jetojnë dhe i vijojnë mësimet në shkollën e vendit në këtë rajon. Mësimi zhvillohet çdo të hëne nga ora 16:00 -18:30, ku Medini, Burhani, Jora, Aroni, Alisa, Xhensila, Saranda, Rejhani, Sara, Almini, Lorisi, Rinesa, Lea, Selina dhe Era ju bëjnë thirrje edhe bashkëmoshatarëve të tjerë, t`iu bashkëngjiten në orët mësimore të gjuhës shqipe.

Të gjithë kanë arsye të buzëqeshin, nxënës, prindër, mësues, sepse i shoqërojnë fjalët që mrekullueshëm tingëllojnë, ora e mësimit në gjuhën shqipe ka filluar!

Klasa ku zhvillohej mësimi në gjuhën shqipe i ngjasonte një çerdheje të vogël në vendlindje. Një copëz e atdheut shpërndahej nëpërmjet teksteve shkollore.

Në fytyrat e prindërve shihej qartë gëzimi se tani fëmijët e tyre jo vetëm që do të mësojnë edhe shqip, por edhe e kanë afër shkollën shqipe. Gatishmërinë e tyre për një bashkëpunim sa më të afërt e treguan edhe në mbledhjen e prindërve në mbrëmjen e kësaj të hëne, ku ata vullnetarisht zgjodhën edhe kryetaren e Këshillit prindëror, Burbuqe Elmazi, e cila së bashku me prindërit tjerë do të angazhohen jo vetëm në rritjen e numrit të nxënësve por edhe rreth aktiviteteve të lira. / Shkruan: Vaxhid Sejdiu / KultPlus.com

Hapet shkolla e gjuhës shqipe në Halkidha të Evias në Greqi

Fëmijët e komunitetit shqiptar në Halkidha të Evias në Greqi nga sot e tutje do të kenë një shkollë për mësimin e gjuhës shqipe.

Hapja e këtij kursi u realizua falë përpjekjeve të vazhdueshme të Shpresa Rajta, Drejtuese e Shoqatës së Emigrantëve Shqiptarë në Evia dhe anëtarëve të saj, si dhe falë bashkëpunimit të ngushtë midis shoqatës, Ambasadës dhe pushtetit vendor.

Pjesë e ceremonisë së hapjes ishte edhe Ambasadorja e RSh-së në Athinë, Luela Hajdaraga së bashku me Oficeren Koordinuese për Diasporën, Joneda Dodaj.

Të pranishëm gjithashtu në këtë ceremoni ishin Drejtoresha e Liceut të Përgjithshëm grek ku do të zhvillohet mësimi plotësues i gjuhës shqipe, Maria Mattheu, Kryetari i Komunitetit Shqiptar në Greqi, Ermal Sulaj, Kryetari i Lidhjes së Mësuesve Shqiptarë në Greqi, Pierin Lleshi, Kryetarë dhe anëtarë të shquar të komunitetit, prindër, nxënës, të cilët dhanë mbështetjen e tyre për këtë aktivitet.

Aktiviteti u përshëndet nga Ambasadorja Hajdaraga, e cila pasi përgëzoi shoqatën për këtë iniciativë, vuri në dukje se ruajtja dhe promovimi i gjuhës shqipe dhe kulturës shqiptare përbën prioritet të rëndësishëm për Ambasadën, ndërsa theksoi se e drejta e të mësuarit gjuhën amtare është detyrë jo vetëm e mjedisit familjar dhe atij shkollor, por gjithashtu detyrë e vendit amë dhe shtetit pritës.

Mësimdhënia e gjuhës shqipe në Halkidha do të zhvillohet çdo të dielë, ora 10:00 – 12:00. Për më tepër informacion, të interesuarit mund të kontaktojnë Shoqatën e Emigrantëve Shqiptarë në Evia në linkun https://www.facebook.com/shoqataevias. / Diaspora shqiptare / KultPlus.com

Shkolla e mësimit të gjuhës shqipe në Zvicër, 3 dekada histori

Më 26 shtator 1990 për herë të parë në Zvicër u hap një shkollë për mësimin e gjuhës shqipe. Ishte një dëshirë e madhe dhe punë e palodhur e Selami Bajrami dhe Azem Sadullahu kryetar dhe sekretar i Këshillit Prindëror si dhe anëtarëve të këtij këshilli. Kjo shkollë u hap në një moment të vështirë, nuk ishte vetëm një akt patriotik por hapja e një shkolle jashtë suazës së Ambasadës së Jugosllavisë ishte  edhe një çështje politike që mund të kishte pasojat e saj.

Prandaj ky aktivitet në shërbim të shkollës shqipe ishte dhe është akt atdhetarie, të cilin akt e morën mbi supe veprimtarët e Këshillit prindëror të Kantonit të Glarus-it, në krye me kryetarin e saj Selami Bajrami dhe më 26 Shtator 1990 hapën edhe Shkollën e Parë shqipe, në Bilten, të kantonit të Glarus-it, që në fakt ishte edhe shkolla e parë në Zvicër.

Sot pas tridhjet vitesh dy pionerët e hapjes së shkollës tregojnë për historikun e saj, vështirësitë dhe arritjet.

Si ndiheni sot pas 30 vjetësh?

(Përgjigja është e thjeshtë ashtu siç ishte dhe është puna e tyre në shërbim të shkollës shqipe. E thjeshtë, e urtë, dëshirë dhe ideal). Ndajnë të njëjtin mendim: në bashkëpunim me anëtarët e Këshillit prindëror kemi kryer një obligim kombëtar ndaj fëmijëve tanë dhe ndaj të gjithë fëmijëve, që po lindin dhe po rritën në vend të huaj.

Ç`do të thotë të hapësh shkollë shqipe jashtë ombrellës së Ambasadës së Jugosllavisë, më 1990?

Selami Bajrami: Ishte një përpjekje që të konfrontonte me ligjet e shtetit, nën sundimin e të cilit, ishin të gjithë shqiptarët në Kosovë, Maqedoni, Mal të Zi…

Azem Sadullahu: Ishte një përpjekje që kishte rrezikun politik, por mbi të gjitha dominonte vullneti, dëshira dhe ideali për t`u shkëputur njëherë e përgjithmonë nga vargojt e politikës jugosllave.

A ishin pjekur kushtet për një gjë të tillë?

Selami Bajrami: Duke e njohur diskriminimin dhe kufizimin e të drejtave të shqiptarëve kudo ku jetonim nën Jugosllavinë antishqiptare, ne që ishim në mërgim mendonim se kishte ardhur momenti të veprojmë.

Azem Sadullahu: Ishte dëshirë e të gjithë prindërve njëherë e përgjithmonë të kemi shkollën tonë të pavarur, të cilën e formuam me djersën e mërgimtarëve shqiptarë të të gjitha fshatrave të kantonit të Glarus-it.

Nga jeni me prejardhje apo vendlindja?

(njëzëri) Ne jemi nga Kumanova, qytet që kanë zënë vend të gjitha politikat diskriminuese ndaj shqiptarëve.

Kishit ndihmesën e bashkatdhetarëve:

Selami Bajrami: Natyrisht që po.

Azem Sadullahu: Pa ndihmën dhe mbështetjen e tyre ishte e pamundshme të bëhej diçka.

Selami-Bajrami-dhe-Azem-Sadullahu-në-manifestimin-shkollor-në-Schëanden-më-1992-dhe-Logoja-e-Shkollës-së-Parë-Shqipe-në-Zvicër-“Hasan-Prishtina”

Kanë kaluar 30 vjet që kur është hapur shkolla e parë shqipe në Zvicër, si ju duket sot ky përvjetor?

Selami Bajrami: Shkolla shqipe në kantonin tonë ka pasur dy etapa të zhvillimit të suksesshëm. E para nga viti 1990-2001 dhe e dyta nga viti 2009-2018

Në fazën e parë ishin themeluesit e shkollës shqipe, të cilët bashkë me anëtarët tjerë: Jakup Sabedini, Prend Markaj, Muhamet Ramadani, Jahi Zeqiri dhe Naser Jusufi e organizuan mjaft mirë shkollën shqipe në Kantonin e Glarus-it

Azem Sadullahu: Dhe e dyta, pas një pauze gati 8-9 vjeçare, me ardhjen  mësuesit Vaxhid Sejdiu, i cili së bashku me mësuesit Qefsere Sejdiu dhe Endrit Mulaj, si dhe veprimtarët e  arsimit shqip Sahit Idrizi, Shaban Asani, Selami Bajrami, Afrim Ibishi, Afrim Rexhepi, Nexhat Hajdari, Emrush Hajdari, Musa Salihu, Avdyl Asani, Fuat Sherifi, Agim Hoxhaj në kantonin tonë filloi një epokë e re, e shkollës shqipe. Sa që shkollat: në Glarus, në Niederunen, në Netsal, në Bilten, në Näfels, në Mitlödi, në kantonin tonë përsëri u shndërruan në “çerdhe” të gjuhës shqipe.

Lista e anëtarëve të Këshillit të parë Prindëror, të shkollës së Parë shqipe “Hasan Prishtina” në Glarus

Si ishin atëherë përpjekjet për hapjen e shkollës së parë shqipe në Zvicër?

Selami Bajrami: Rrugëtimi natyrisht nuk ishte i lehtë, mjaft i vështirë, me pengesa të ndryshme. Kishim edhe pengesa nga Ambasada Jugosllave, e cila ndërhynte në Drejtorinë arsimore Zvicerane duke mos dashur të na japin objekte shkollore (klasa) për mësim. Por ia dolëm.

Azem Sadullahu: Pengesat ishin të natyrave të ndryshme, kishim edhe presion.

Si erdhi deri te themelimi apo hapja e Shkollë së Parë Shqipe në Zvicër?

Selami Bajrami: Siç thashë, dëshira dhe vullneti i madh që fëmijët e bashkatdhetarëve tanë ta mësojnë gjuhën amtare. Por, edhe ndihma e institucioneve arsimore kantonale nuk ka munguar, më të zëshmit për hapjen e shkollës shqipe kanë qenë,  ministri i arsimit z. Fritz Weber, z. Luis Bügler, sekretar i arsimit dhe Maya Hauser, kordinatore e arsimit për vendas dhe të huaj.

Azem Sadullahu: Ky vullnet dhe kjo dëshirë ishte e të gjithëve.

Cilët ishin bashkëveprimtarët tuaj?

Selami Bajrami: Prindërit, ata na jepnin forcë që të punojmë pa pushim.

Azem Sadullahu: Në veçanti anëtarët e Këshillit: Selami Bajrami, Shaban Asani, Sakip Alili, Agim Zeqiri, Imer Murati, Rrahim Shehu, Nevzat Kamberi, Tahir Sadiku etj.

Cilët ishin mësuesit e parë?

Selami Bajrami: Fillimisht mësuese e parë ka qenë Drita Krasniqi, pastaj janë angazhuar Ylfete Zymberi, Ziharete Mazllëmi, Shenadije Berisha, Burbuqe Hasani, Hamit Krasniqi etj.

Azem Sadullahu: Pas disa përpjekjeve arritëm me përfaqësuesit e Arsimit në Prishtinë, të biem në kontakt me mësuesen Drita Krasniqin edhe ne si këshill prindëror e angazhuan në procesin mësimor, dhe i siguruam rrogën për dy muaj dhe banesën.

Në fillim sa klasa kishte dhe cilat ishin ato, ku ishin hapur?

Selami Bajrami: Fillimisht në Bilten dhe pastaj Niederurnen, Oberurnen, Näfels–Mollis dhe Rüti GL dhe në Schwanden.

Në rreshtin e fundit, (nga e majta) Jakup Sabedini, Selami Bajrami dhe mësuesja Dritë Krasniqi së bashku me nxënësit

Cili është dallimi në mes dikur dhe sot?

Selami Bajrami: Punohej më shumë, numri i veprimtarëve të arsimit shqip ishte shumë më i madh

Azem Sadullahu: Kemi pasur mbledhje, takime me prindër dhe angazhime të ndryshme të cilat e mbanin gjallë aktivitetin shkollor.

Si është tani gjendja  e shkollave shqipe në kantonin tuaj?

Selami Bajrami: Momentalisht numri i nxënësve është shumë i vogël, është dëshpëruese

Azem Sadullahu: Mendoj se LAPSH kohëve të fundit nuk është duke e kryer detyrën e saj si duhet.

Si është gjendja e shkollave shqipe në Zvicër?

Selami Bajrami: E pakënaqshme, veçanërisht në kuadër të LAPSH-it nuk kemi ndonjë aktivitet serioz në organizimin e shkollë shqipe. Kryesinë qendrore nuk e shohim fare në aktivitet për organizimin dhe hapjen e shkollave shqipe.

Azem Sadullahu: Me vite në kuadër të LAPSh kemi rënie të numrit të nxënësve, veçanërisht në 7-8 e fundit.

Çka do t`iu kishe preferuar prindërve shqiptarë në Zvicër?

Selami Bajrami: Nëse fëmijët e mërgimtarëve shqiptarë nuk e ruajnë gjuhën amtare pasojat janë të rënda, gjuha amtare është e nevojshme si buka dhe uji

Azem Sadullahu:  T`i dërgojnë fëmijët e tyre në shkollë sepse një gjë të tillë e preferojnë edhe ekspertët zviceranë, të cilët thonë se pa njohjen e gjuhës amtare shumë vështirë e kanë të mësojnë gjuhën e huaj.

Kohëve të fundit në portale të ndryshme lexohet se LAPSh feston 30 vjetorin, a është me të vërtetë 30 vjetori i LAPSh-it?

Selami Bajrami: Jo, LAPSh nuk i bën 30 vjet, por 25 sepse LAPSh është themeluar më 26 mars 1995 dhe të gjithë ata të cilët flasin kështu nuk i bëjnë nder.

 Azem Sadullahu:  30 vjet i bënë Shkolla Shqipe“Hasan Prishtina” në kantonin e Glarus-it. Ka fjalë se edhe Shkollën e parë shqipe, këtu në Glarus, e ka hap ky apo ajo, por e vërteta është një. Shkollën e Parë shqipe e kanë hap anëtarët e Këshillit Prindëror në krye me kryetarin, Selami Bajrami./ Diaspora Shqiptare / KultPlus.com

Lipa merr pjesë në hapjen e shkollës shqipe në Teksas: Kam folur shqip me prindërit për të mos harruar rrënjët (VIDEO)

Këngëtarja shqiptare, Dua Lipa, ka marrë pjesë me një fjalim në ceremoninë e hapjes së parë të shkollës shqipe në Teksas të Shteteve të Bashkuara të Amerikës, shkruan KultPlus.

Përkundër angazhimeve të saja me koncertin dhe këngën e saj të fundit, Lipa gjeti kohë që të marrë pjesë në hapjen e shkollës shqipe dhe të ndajë përvojat e saja me të pranishmit e tjerë.

Fillimisht, 26 vjeçarja falënderoi organizatorët për ftesën, derisa u shpreh shumë e lumtur që po merr pjesë aty.

“Ju faleminderit shumë që më keni parë sot këtu dhe për të festuar me ju hapjen e kësaj shkolle. Kur u informova për hapjen e kësaj shkolle më kujtuan fëmijërinë time kur erdha nga Prishtina në Londër”, tha Lipa.

Ajo gjithashtu kujtoi edhe kohën kur gjatë shkollës fliste gjuhën angleze, ndërkaq në shtëpi që të mos harronte rrënjët e saj, fliste në gjuhën shqipe me prindërit.

“Kur isha në Londër flisja anglisht me miqtë dhe profesorët, ndërsa natën me prindërit flisja shqip për të mos harruar rrënjët dhe gjuhën”, përfundoi fjalimin e saj.

Dua Lipa së fundmi ka bërë publikimin e një kënge të re në bashkëpunim me Megan Thee Stallion, ku po dëgjohet nga e gjithë bota. /KultPlus.com

Hapet shkolla shqipe në Kreuzlingen të Zvicrës

Në vitin 2022 është hapur edhe një shkolllë e re shqipe në Zvicër, shkruan KultPlus.

Në qytetin e Kreuzlingen-it, kantonin Thurgau prindërit shqiptarë tanimë mund t’i dërgojnë fëmijët e tyre në shkollën shqipe.

Mësuesja e kësaj shkolle, Albana Bejta-Gjocaj, ka thënë për KultPlus se kjo shkollë është hapur me numër të kënaqshëm të nxënësve.

Disa prej fotove të cilat mësuesja i ndanë me të lexuesit, mund t’i shikoni më poshtë. /KultPlus.com

Hapet shkolla shqipe “Gjon Buzuku” në Rethimnos

Një tjetër klasë e gjuhës shqipe do të rinis mësimin në Rethimnos, të Kretës. Mësimi do të rinis për fëmijët që kanë ndjekur më parë kursin por gjithashtu do të kryehen dhe regjistrimet për fëmijë të tjerë.

Njoftimi i plotë:

Sot me dt 06-11-2021 ora 17.00 në Shkollën publike Atsipopulo( ΔΗΜΟΤΙΚΗ ΣΧΟΛΙΟ) inaugurohet ceremonia e hapjes së kursit të parë të gjuhës Shqipe në Rethimno.

Pas një përpjekje të gjatë, të Faktorit Shqiptarë në Rethimno, dhe nën përkujdesjen e SHOQATËS SË EMIGRANTËVE SHQIPTARË RETHIMNO realizohet një ëndërr e kahershme e mësimdhënies dhe fillimin e ABETARES së gjuhës shqipe në këtë shkollë dhe pikërisht sot.

Gjithashtu është marrë leja dhe në shkollën e dytë në Rethimno për të vazhduar kursi tjetër i gjuhës shqipe i cili shumë shpejt do hapi dyert për vazhdimin e.

Për realizimin e kësaj ëndrre duam të falenderojmë të gjithë stafin e Shoqatës për gadishmërinë në përgatitjen e dokumentacionit të duhur.

Institucionet lokale për zemërgjërësinë e tyre dhe dhënien e lejeve.

Njëkohësisht falenderojmë Ambasadën Shqiptare në Athinë për ndihmën me paisjen me libra dhe Abetaret.

Falenderojmë Bashkinë Rethimno dhe Drejtorët e shkollave përkatëse në të cilën është dhënë leja e kurseve tona të shkollës Shqipe në Perfekturën Rethimno.

Sot në Atsipopulo Rethimno shkruhet për herë të parë në gjuhen Shqipe.

“Sot shkruhet historia e gjuhës tonë në mënyre të organizuar dhe legjitime. Sot rishkruhet “Meshari” ynë”.

Prandaj dhe shkolla shqipe do mbaj emrin atij që mbajti penën e parë dhe qëndisi shkronjat e para të kësaj gjuhe shqipe …GJON BUZUKU.

Ta gëzojmë dhe të mbajmë lart frymën e atdhedashurisë dhe gjuha jonë të jetoj brez-pas brezi dhe kudo në Diasporë.

Ju falenderojmë të gjithëve dhe jeni të mirëpritur të gjithë prindër dhe fëmijët tuaj. / KultPlus.com

Hapet një tjetër shkollë e gjuhës shqipe në Zvicër

Në Zvicër është hapur një tjetër shkollë e gjuhës shqipe në komunën Aadorf të Kantonit të Thurgaut. Mësimi do të zhvillohet çdo të mërkurë në orën 16:00.

Lajmi bëhet i ditur nga Ambasada e Shqipërisë në Bern: “Në vijim të punës për masivizimin e mësimit të gjuhës shqipe në Diasporë, “Shkolla Shqipe” në mbështetje të vazhdueshme nga Ambasada e RSH në Bern, hap dhe një degë të mësimit të gjuhës, kulturës e historisë shqiptare. Mësimi në këtë shkollë zhvillohet çdo të mërkurë, nga ora 16:00 me mësuese Feride Liçolli”, shkruhet në njoftimin e Ambasadës.

Ambasada e Republikës së Shqipërisë, gjithashtu u bën thirrje të gjithë prindërve dhe fëmijëve të moshës shkollore të bashkohen në këtë përpjekje për të ruajtur e promovuar gjuhën, kulturën, traditat e historinë Atdhetare. /diasporashqiptare/ KultPlus.com

Hapet shkolla shqipe në Cyrih

Vatrat e arsimit dhe kulturës shqiptare janë duke u përhapur kudo në Zvicër, pasi që puna aktiviteti dhe përkushtimi i mësuesve, prindërve e fëmijëve shqiptarë është duke dhënë rezultate të shkëlqyera.

Kjo, gjithnjë duke pasur pikënisjen e mbështetjen dhe organizimin e mirëfilltë që po bën  dr. Vaxhid Sejdiu në kuadër të Shkollave Shqipe në Zvicër, të cilën janë duke e përkrahur edhe Ambasada  e Republikës së Shqipërisë, Ambasada e Republikës së Kosovës në Zvicër, si dhe institucionet arsimore.

Kështu pasi u hapën shumë shkolla, kohët e fundit, si në Regensdorf, në Shkollën “Rüttihof” të qytetit të Cyrihut, po ashtu siç u çel shkolla në Otewil am See, edhe në Egg të Cyrihut, më 22 shtator 2020 u hap shkolla shqipe për nxënësit shqiptarë.  Mësimi mbahet ditëve të marta nga ora 16:00 deri në orën 18:00 dhe në këtë pikë shkollore punon mësuesja Albulenë Jusufi.

Natyrisht, gëzimi vihej re që në sytë, fytyrat e gjestet e nxënësve dhe prindërve që i kishin sjellë këta fëmijë në shkollën shqipe.

Kështu sukseset jo vetëm nuk na kanë munguar, por edhe zgjerimi e mbarëvajtja e shkollave shqipe ka ecur e po ecën në një udhëtim të mbarë dhe një aktivitet i këtillë do të vazhdoj me intensitet edhe në javët në vazhdim. /albinfo/ KultPlus.com

Në shkollën “Faik Konica” në Belgjikë filloi mësimi i gjuhës dhe kulturës shqiptare

Është bërë e ditur se në Namur të Belgjikës ka startuar sërish mësimi i gjuhës shqipe në shkollën “Faik Konica”.

Shoqata “Nënë Tereza” dhe shkolla “Faik Konica” për mësimin e gjuhës dhe kulturës shqiptare në Namur të Belgjikës lajmërojnë fillimin e vitit të ri shkollor 2020-2021 dhe oraret përkatëse të zhvillimit të mësimdhënies.

Duke ndjekur organizimin e shkollave belge, klasat e ofruara janë për të gjitha moshat, të ndara sipas niveleve. Mësimi kryhet nga mësues të diplomuar në lëndët përkatëse dhe me përvojë në mësimdhënie.

Qendra e Botimeve për Diasporën ka dërguar falas 403 tekste shkollore dhe të mësimit plotësues për të mbështetur mësimdhënien e gjuhës dhe kulturës shqiptare në Belgjikë. /albinfo/ KultPlus.com

Hapet shkolla shqipe në Emmen të Kantonit të Lucernit

Aktiviteti për hapjen e pikave shkollore në qytetin Emmen të kantonit të Lucernit po vazhdon.

Mësuesi Vaxhid Sejdiu para prindërve pjesëmarrës bëri një prezantim të detajuar të Shkollës Shqipe

Pas disa javëve punë dhe angazhim rreth hapjes së pikave shkollore në Emmen të Kantonit të Lucernit, më 15. Janar 2020, u organizua një mbrëmje prindërore me prindërit shqiptarë të këtij qyteti. Temë e kësaj mbrëmje informative ishte padyshim hapja e shkollës shqipe dhe njëherit ruajtja e gjuhës amtare.

Me të drejtë moto e kësaj mbrëmje informative ishte fjala popullore “Gjuha ruhet aty ku shkruhet”.

Mësuesja Liljana Doda – Gojani duke e bërë prezantimin e planit mësimor. Dhe me të drejtë u konstatua në këtë mbrëmje se është më se nevojshme hapja e jo vetëm një pike shkollore por e disa pikave shkollore në gjuhën shqipe sepse numri i fëmijëve shqiptarë është i madh dhe nevoja për ta mësuar gjuhën amtare është më se e domosdoshme. Ky aktivitet i cili filloi muaj më parë u iniciua nga veprimtari dhe një ndër mësuesit më të dalluar të gjuhës Shqipe në Zvicër Vaxhid Sejdiut, në bashkëpunim me Ambasadën Shqiptare në Bern, veprimtarët e kantonit të Lucernit, mësuesen Liljana Gojani dhe erdhi natyrshëm duke u bashkuar me vullnetin e prindërve arsimdashës, si dhe bashkërisht duke e konkretizuar këtë projekt kaq te rëndësishëm për fëmijët shqiptarë, më 15 Janar 2020.

Mbledhjen e hapi mësuesja zvicerane znj. Luzia Bozhdaraj – Sidler, e cila i përshëndet prindërit shqiptarë në emër të shkollës zvicerane duke ju dëshiruar mirëseardhje dhe njëherit duke iu bërë apel prindërve shqiptarë, që fëmijët e tyre t`i dërgojnë në gjuhën amtare. Pastaj mësuesi Vaxhid Sejdiu bëri një prezantim të Shkollës Shqipe në Zvicër, organizimin si dhe shtrirjen e saj gjithkund ku ka fëmijë shqiptarë.

Mësuesja e Shkollës shqipe në Emmen Liljana Doda – Gojani, i njoftoi prindërit për organizimin e shkollës shqipe, ndarjen në grupe dhe planin mësimor. Ajo me të drejtë tha: “se me prindër si ju mund të arrijmë edhe me shumë në të ardhmen. Bashkëpunimi, përkushtimi dhe mbështetja që kemi pasur nga autoritetet e drejtorive të shkollave përreth ka qenë befasues dhe mjaft motivues për ne . Dhe neve nuk ka mbetet gjë tjetër përveç se nxënësve të shkollës shqipe t`iu urojmë shumë suksese”. Pas një bashkëbisedimi me prindërit rreth organizimit të shkollës shqipe në Emmen të Lucernit u shtrua një apero për pjesëmarrësit. njekomb. /KultPlus.com

Viti 1941: Kur në Sanxhak të gjitha shkollat ishin në gjuhën shqipe dhe nxënësit me plisa

Sanxhaku me kryeqendrën Pazarin e Ri, kanë qenë të banuar me shumicë shqiptare por, politika e egër asimiluse të zbatuar nga Jugosllavia, sot shqiptarët janë asimiluar në kombësinë artificiale boshnjake.

Në foto shihen ushtarër shqiptarë së basku me ushtarët italianë dhe gjermanë duke mbajtur flamurin shqiptar dhe nazist në Pazarin e Ri, në vitin 1941.

Shqiptarët e Kosovës dhe të Sanxhakut nuk kishin zgjedhje tjetër përpos bashkimit me gjermanët dhe italianët sepse gjatë pushtimit 20 vjeçar serb ata ishin nënshtruar represionit të egër të Mbretërisë Jugosllave, duke iu mohuar çdo e drejtë elementare.

Prandaj, shqiptarët i panë gjermanët dhe italianët si çlirues të tyre.

Nxënësit shqiptarë në Pazarin e Ri, 1941

Gjatë kësaj periudhe në Sanxhak ishin hapur shkollat në gjuhën shqipe, që kurrë më parë nuk kishin ekzistuar.

Më ardhjen e komunistëve shkollat shqipe u mbyllen dhe fillon proçesi i asimilimit të shqiptarëve./KultPlus.com

Shkolla shqipe “Alba Life” në NY nis përgatitjet për Festën e Flamurit

Programi artistik me këngë e valle do të performohen në City Hall në Manhattan në NY në Ceremoninë, Bashkia e NY-ut.

Është bërë e ditur se në shkollën shqipe “Alba Life’ në Bronx, gjatë procesit të mësimit dhe përgatitjes së programit artistik me këngë e valle që do të performohen në City Hall në Manhattan në NY, në ceremoninë që Bashkia e NY-ut do të organizojë me rastin e Festës së Pavarësisë së Shqipërisë.

Themelues dhe drejtori i kësaj shkolle, Qemal Zylo, është shprehur se të gjithë nxënësit janë duke u përgatitur për Festën e Flamurit më 28 Nëntor.

“Të gjithë nxënësit ishin shumë të vëmendshëm për të dëgjuar mësueset e tyre. Në fund bëmë edhe një fotografi të përbashkët të mësueseve dhe nxënësve për t’ju përshendetur ju të dashur prindër dhe dashamirës të shkollës sonë me rastin e Festës së Flamurit dhe për t’ju ftuar të vini në këtë Celebrim të veçantë më 21 nëntor 2019“, tha ai.

Po ashtu, Zylo uroi festën prindërve dhe gjithë shqiptarëve. “Provat e përgjithshme të grupit artistik do të bëhen të shtunën e ardhshme, më 16 nëntor 2019, gjithashtu do të mirëpresim nëse ka ende prindër të interesuar që të regjistrojnë fëmijët në shkollen tonë.

“Gezuar Festën e Pavarësisë së Shqipërisë ose, si e quajmë ndryshe Festën e Flamurit!”, përfundoi themeluesi i kësaj shkolle, Zylo. Albininfo.ch / KultPlus.com

Nxënësit e shkollës shqipe “Kongresi i Manastirit” në Çikago kremtuan Ditën e Pavarësisë së Shqipërisë

Me një program të pasur kulturo-kombëtar nxënësit e shkollës shqipe “Kongresi i Manastirit” në Çikago kremtuan 28 Nëntorin-Ditën e Pavarësisë së Shqipërisë.

Në qendrën kulturore kishin ardhur prindër, veprimtarë dhe mësuesit e shkollës për të kremtuar bashkërisht Ditën e Pavarësisë së Shqipërisë, ndonëse jashtë atdheut në Amerikën e largët dhe me moton “Se nuk ka tjetër atdhe” me recitime, këngë dhe valle shqiptare e bekuan programin kulturor në Çikago.

Të vegjlit shqiptarë të veshur kuq e zi dhe tingujt, recitimet dhe këngët shqiptare që aq bukur shqip i shtonin duartrokitjet, për rendësin e kësaj ditë të madhe kombëtare foli drejtoresha e shkollës Qëndresë Brahimi, e cila ndër të tjera foli për rrugëtimin e plakut të urtë Ismail Qemali dhe për Shqipërinë e lirë në vitin e pavarësisë më 28 nëntor 1912 në Vlorë.

Kjo ditë e bekuar për kombin shqiptar, tha në fjalën e saj zonja Brahimi, ka qenë dhe do të jetë për tërë kombin tonë kudo që jetojnë dhe këtu në Amerikën e largët në atdheun e dytë për ne, simbol i bashkimit, të unitetit, të krenarisë, të qëndresës dhe vendosmërisë për liri e pavarësi të atdheut.

Shqiptaro-amerikanët dhe të vegjlit që kanë lindur e po rritën në Amerikën e lirë dhe fidanishte të demokracisë, theksuan se ky vend mik i përjetshëm me dekada ka qenë gardianë i lirisë dhe i pavarësisë së Shqipërisë dhe shtetit më të ri në Evropë të Kosovës.

Mësuesit dhe të vegjlit shqiptarë e nderuan kryetarin e qendrës shqiptare dhe fetare Hasan Ramushi, i cili e ka përkrahur programin festiv, ndërsa prof. Skënder Karaçica, drejtor ekzekutiv i SHSHA-së duke uruar nëntorët historik për kombin shqiptar ka theksuar se pikënisje për pavarësinë e Shqipërisë ishte Kongresi Manastirit(1908)dhe Alfabeti i Gjuhës Shqipe me shkronja latine dhe udha e kombit drejt Evropës aty ku me shekuj ka dhënë vlera të qytetërimit me popujt tjerë europianë dhe më gjërë. Këto dy festa janë dy ngjarje të mëdha kombëtare që na nderojnë sot e gjithmonë dhe i paçim për jetë jetëve, ka thënë Karaçica. Kremtimin e festës së flamurit në Çikago e ka nderuar me një fjalë rasti Lirie Mehmeti, kryetare e Organizatës së Grave Shqiptaro-Amerikane dhe veprimtare dhe biznesmene e dalluar që për disa vjet e pati mbajtur gjallë fjalën e gjuhës shqipe përmes valëve Radio-Jeta.

Në kremtimin e sotëm festiv morën pjesë veprimtarë të dalluar të çështjes shqiptare në diasporën në Çikago si prof. Ilaz Kadriu, Mahmut Skenderi, Tefik Abdullahu, Vllaznim Sherifi, Nuri Ibrahimi, Riza Milla, Halil Gashi, Vullnet Dervishi e tjerë.

Programin festiv të ditës së flamurit në Çikago, nxënësit e shkollës shqipe “Kongresi i Manastirit” e nisën me një fragment të kohës së Ismail Qemalit dhe populli shqiptar para flamurit kuq e zi në ditën e pavarësisë në Vlorë. Me këtë rast defiluan artistët e vegjël si Darisi, Hadi, Erina, Besniku, Milena, Eraldini, Alena që begatuan programin “Zemra rreh për Shqipëri” për të vazhduar me recitime, këngë dhe valle shqiptare.

Duartrokitjet i gëzuan shumë artistët e vegjël shqiptarë të shkollës shqipe “Kongresi i Manastirit” në Çikago. /KultPlus.com

Nxënësit e shkollës shqipe të Glarusit, recitojnë e këndojnë shqip në Bernë të Zvicrës

Ambasadorja Nazane Breca, e shoqëruar nga ministri këshilltar, Mustafë Xhemaili, në ambientet e Ambasadës së Republikës së Kosovës në Bernë, ka pritur nxënësit e shkollës shqipe të degës së LAPSH-it në Glarus, kryeqytet i Kantonit të Glarusit, përcjellë KultPlus.

Në këtë pritje, me një atmosferë të ngrohtë me nxënësit, ka bashkëbiseduar ambasadorja Breca, duke u interesuar për shkollën e tyre dhe duke kërkuar nga ata që në ambasadën e tyre të recitojnë poezi dhe këndojnë këngë shqipe. Ata të udhëhequra nga mësuesja e tyre Anitë Asani kanë recituar dhe kënduar një tufë poezish dhe këngësh duke u duartrokitur kështu nga të gjithë e duke krijuar një atmosferë festive në ambientet e ambasadës.

Ambasadorja i ka përgëzuar nxënësit e zellshëm, mësuesen e përkushtuar dhe prindërit arsimdashës, të cilët kishin ardhur së bashku me fëmijët e tyre për ta vizituar ambasadën.

Ambasadorja Breca mes tjerash ka thënë se LAPSH-i ka bërë punë të jashtëzakonshme për edukimin e fëmijëve të mërgimtarëve, për ruajtjen e gjuhës dhe identitetit kombëtar dhe, në këtë mënyrë, kështu ka vepruar edhe shkolla shqipe e Glarusit. Ajo nxënësve u ka uruar sukses në vitin e ri shkollor dhe ka bërë thirrje që të gjithë prindërit që jetojnë në Zvicër, edhe në kantonin e Glarusit t’i dërgojnë fëmijët e tyre në mësimin plotësues në gjuhën shqipe, për të mos e harruar kulturën dhe prejardhjen e tyre.

Me një fjalë rasti, ka përshëndetur edhe Avdil Asani, kryetar i këshillit të prindërve të Kantonit të Glarusit, i cili ka theksuar se do të bëhen përpjekje që të mbijetojë shkolla shqipe e Glarusit, e cila njihet si shkolla e parë shqipe e cila në fillim të viteve 90-ta u shkëput dhe punoi e pavarur nga sistemi i atëhershëm i edukimit me plan programe shkollore speciale antishqiptare të cilat praktikoheshin për fëmijët e mërgimtarëve nga ambasadat dhe konsullatat jugosllave në perëndim. / KultPlus.com