Janë dënuar me nga 300 euro kompanitë CIMA dhe LORIANO për gabimin e bërë sot në Rrugën B në kryeqytet.
Ato kanë vendosur reklama në një vend ku supozohej të kishte grafite, si vazhdimësi e tërë hapësirës në fjalë ku grafitet kanë nisur të realizohen prej artistëve të vendit e të huaj qysh në majin e vitit të kaluar.
Lajmin e ka dhënë vetë Shpend Ahmeti – kryetar i Prishtinës. / KultPlus.com
Entela Kasi me poezinë e saj “Nëse bota është e egër, Anja…”, ishte fituese e “Penës së Flakës”, aktivitet ky letrar që organizohet në kuadër të Manifestimit kulturor mbarëkombëtar “Flaka e Janarit 2018”, që mbahet përgjatë muajit janar në Gjilan, bëhet e ditur përmes një komunikate për media.
Ndryshe, në hapësirat e bibliotekës “Fan S. Noli”, ishin dy veprimtari letrare, Ora e Madhe Letrare, ku poetët e përzgjedhur paraprakisht, konkurruan për Çmimin e poezisë më të mirë të Manifestimit, “Pena e Flakës” si dhe shpallja e rezultateve të Konkursit anonim letrar për poezi e tregim të shkurtër.
Poetët që lexuan në “Pena e Flakës” ishin: Alketë Spahiu ( Gjilan ), Anton Nikë Berisha (Prishtinë ), Avni Rudaku ( Gjian ), Dhimitër Pojanaku ( Pogradec ), Entela Kasi ( Tiranë ), Flamur Shala ( Prishtinë ), Gani Neziri ( Gjilan ), Hajredin Kovaçi ( Ulqin ), Ibrahim Kadriu (Prishtinë), Izet Abdyli (Drenas ), Kliton Nesturi ( Tiranë ), Linditë Ramushi- Dushku ( Gjilan ), Nijazi Ramadani ( Gjilan ), Prend Buzhala (Klinë ), Rakela Yzeiri ( Tiranë ),Ramadan Mehmeti ( Prishtinë ), Ramadan Oraça ( Podujevë ), Rozafa Shpuza ( Shkodër ), Sadije Krasniqi (Lipjan), Sarë Gjergji ( Viti ), Sinan Sadiku ( Kamenicë ), Xheladin Rexhepi (Ferizaj ), Zeqir Fazliu ( Gjilan ).
“Për dallim nga herët e tjera, vlerësues të poezisë më të mirë, në “Pena e Flakës” 2018, kësaj here ishte paraparë të jenë vetë poetët konkurrues, të cilët me votën e tyre do të përcaktonin poezinë fituese, por që pas votimit doli që dy poete kishin numër të njëjtë votash (Entela Kasi – Tiranë dhe Rakela Yzeiri – Tiranë), andaj sërish është dashtë përcaktimi të bëhet nga juria e grupit punues (Xhevat Latifi, Fatushe Haliti dhe Sabit Rrustemi), që kishte bërë edhe përzgjedhjen e të gjitha poezive për t’u lexuar në këtë orë letrare, dhe vota e tyre përcaktoi edhe fituesen, Entela Kasi”, thuhet në komunikatë.
Ndërsa, kur jemi te rezultatet e konkursit anonim letrar, juria profesionale në përbërje, Ramadan Musliu, Donikë Dabishevci dhe Bardh Frangu, u bë i ditur edhe rezultati:
Anëtarja e Jurisë Donikë Dabishevci, vlerësoi prurjet në kwtë Konkurs dhe bëri të ditur se:
Në poezi:
Shpërblimi i parë i jepet poezisë – Në sheshin e Shkupit – Shifra – Gracka
Shpërblimi i dytë poezisë – Buka, toka, njeriu – Shifra – Hija e shtetit
Shpërblimi i tretë poezisë: Shtëpia e puthjeve – 20-9
Në prozë:
Shpërblimi i parë i jepet tregimit: Figura shtatëmbëdhjetë – Shifra – Shahu i përgjakur
Shpërblimi i dytë: Natë lutjesh – Shifra – Najazum
Shpërblimi i tretë: Mjaltë e hidhur – Shifra – Unë dhe vetvetja
Poezia e shpërblyer dhe të tjerat që u lexuan në Orën e Madhe letrare, bashkë me krijimet e shpërblyera të konkursit letrar, do të publikohen në revistën letrare – kulturore AGMIA. / KultPlus.com
Qendra për Zhvillimin e Artit (Q’art) shpreh shqetësimin për degradimin e hapësirave publike të dedikuara për art në Prishtinë. Ditëve të fundit është vërejtur ri-shfaqja e reklamave tek muri në Rruga B. Pas mbulimit të shkarravitjeve dhe reklamave në kuadër të festivalit ndërkombëtar “Meeting of Styles”, e tërë ajo pjesë pat marrë një pamje të re si dhe ka vazhduar të shërbej si prapavijë për shumë video incizime, me ç’rast edhe për promovimin e Prishtinës si vatër e artit të rrugës prej të cilës përfitojnë më së shumti qytetarët dhe kafiteritë e asaj pjese.
Sot vërejtëm se një pjesë e këtij muri pranë rreth rrotullimit është mbuluar nga reklamat e dy bizneseve, CIMA Construction dhe Restoran LORIANO.
Si organizata e vetme që deri më tani ka arritur të bëj intervenime në hapësira publike, Q’art vazhdimisht ka ngritur zërin kundër fenomenit të dominimit të reklamave në hapësirat publike, siç ka qenë deri më tash në mënyrë kaotike dhe pa kritere të duhura.
Si organizatë ftojmë Komunën e Prishtinës dhe organet përkatëse që të marrin masat përkatëse për të evituar shëmtimin e mëtejmë të kësaj pjesë. Për të vendosur rregull në këtë fushë, Q’art propozon rekomandimet si në vijim:
1. Muri tek Rruga B të mbrohet nga reklamat dhe dëmtimet, dhe të jetë i dedikuar për vepra arti.
2. Bizneset që kanë ngjyrosur këtë pjesë me reklamat e tyre të gjobiten dhe mjetet nga gjoba të përdoren për të mbuluar këtë pjesë me vepra të reja arti.
3. Komuna e Prishtinës dhe Qendra për Zhvillimin e Artit të nënshkruajnë një Memorandum Bashkëpunimi, me të cilin synohet si në vijim:
a. definimi i strategjisë afat shkurtër për ringjalljen e hapësirave publike të mbetura shkret;
b. arti në hapësira publike të hyjë në agjendën prioritare të komunës; dhe
c. të bëhet rregullimi institucional i artit në hapësira publike.
Q’art është organizata e vetme në Prishtinë e cila ka arritur që në mënyrë të qëndrueshme të trajtoj hapësirat publike përmes veprave artistike. Deri më tani kjo ka ndodhur 3 edicione përmes Guerilla Art Festival si dhe edicioni i parë i festivalit ndërkombëtar International Meeting of Styles – duke përmirësuar mbi 3000 metra katror hapësira shkrete dhe beton brenda qytetit të Prishtinës. / KultPlus.com
Rita Ora do të prezantohet me një koncert me rastin e dhjetëvjetorit të Pavarësisë së Kosovës, shkruan KultPlus.
Ky koncert do të mbahet më 17 shkurt, kurse sipas burimeve të KultPlus, koncerti do të mbahet në ambient të hapur, pikërisht te Sheshi “Zahir Pajaziti”.
Poashtu KultPlus merr vesh që koncerti do të nisë në ora 22:00, pikërisht duke përkuar me përvjetorin e dhjetë të Pavarësisë së Kosovës. Ndryshe, zëvendëskryeministri i Kosovës, Behgjet Pacolli ka njoftuar se Rita Ora do të performojë në Kosovë pa pagesë./KultPlus.com
Gili Hoxhaj
Filmi “Martesa” me regji të Blerta Zeqirit, sot u shfaq për herë të parë në Kosovë, në një premierë për media. Ky film tashmë ka nisur rrugëtimin e suksesshëm ndërkombëtar me dy çmime nga Tallin Black Nighs Film Festival, ku edhe pati premierën botërore në Estoni.
Kjo është eksperienca e parë e regjisores Blerta Zeqiri, me një film të metrazhit të gjatë. Ngjarja e këtij filmi shtjellon dashurinë nëpërmjet një trekëndëshi, i cili përbëhet nga tri personazhe që vijnë në lojën e aktorëve Adriana Matoshi, Alban Ukaj e Genc Salihu, shkruan KultPlus.
Ngjarja prekë kohën e luftës në Kosovë, atëherë kur dy të rinj, Bekimi dhe Noli jetojnë brenda një ndërtese, ku edhe fillojnë të ndjejnë shenjat e para të dashurisë për njëri-tjetrin. Shumë vite më pas, luftën më të madhe do ta kenë me barrierat e kësaj dashurie. Unaza që Bekimi ka në gisht, nuk është shenja më e fortë e dashurisë së jetës së tij, ani pse e ndajnë vetëm dy javë nga dita e martesën me Anitën. Anita, është vajzë e një familjeje të të zhdukurve gjatë luftës. Martesën e çiftit, me mjaft emocion e pret familja e Bekimit, por jo dhe ai vet. Madje rrjedha e ndjenjave të tij, vjen e komplikohet me kthimin e Nolit, i cili është muzikant. Ai në Prishtinë vjen pas disa vitesh jetë në Francë.
Dashuria e tij me Bekimin ecën me hapat e njëjtë, pikërisht aty ku ishte ndalur që nga ndarja e parë e tyre, e nga koha kur mes tyre nuk kishte një të tretë.
Ngjarja e filmit shtjellohet në krejt këtë situatë, deri në ditën e martesës së Bekimit me Anitën, të cilët edhe po e presin fëmijën e parë. Filmi përmes ndërtimit të këtyre personazheve paraqet tendencën e shoqërisë për të mos e pranuar dashurinë mes anëtarëve të komunitetit LGBT, ndërsa ky është filmi i parë në Kosovë që trajton dashurinë mes personave të së njëjtës gjini.
Regjisorja Zeqiri, tashmë vetëm ka nisur të kurorëzojë suksesin e këtij filmi në të cilin ka shpenzuar pesë vite punë. Këtë film, ajo e ka cilësuar si projektin më së miri të realizuar. Zeqiri sot pas premierës për media, tha se gjatë këtij projekti përmes elementeve të ndryshme është përpjekur që të prekë sa më shumë jetën reale.
“Shumë herë filmi është tentuar të paraqitet si rrëfim për LGBT, por filmi është një rrëfim dashurie në Kosovën tonë duke u munduar ta bëjmë një pasqyrë sa më reale të jetës këtu”, tha sot regjisorja Zeqiri, ndërsa shtoi se filmi tenton të prekë rrëfimet e të tre personazheve kryesore, pa e penguar rrëfimin që tenton të bartë secili nga ky rol i caktuar në film.
Genc Salihu, përvojën e parë me aktrimin në një film, e shijon pikërisht përmes rolit të Nolit. Aktrimin në njërin nga rolet më kryesore të këtij filmi, ai e cilëson si një nga përvojat profesionale më përmbushëse dhe si përvojën më të mirë në jetën e tij, dhe gjithë kjo falë bashkëpunimit me regjisoren e aktorët e këtij filmi.
“Kam mësuar vërtetë shumë për artin e performancës në përgjithësi, më ka ndihmuar shumë që të hapem dhe që t’i kuptoj gjërat në detaj më të hollësishëm. Ka qenë një bashkëpunim mjaft organik dhe unë jam ndjerë shumë i sigurt gjatë tërë procesit dhe jam shumë i sigurt që kjo është meritë e Blertës për shkak se ka ditur shumë mirë që të më akomodojë brenda filmit”, është shprehur Genci sot në konferencën për media.
Derisa Genci është debutant në këtë film, Adriana Matoshi ka kaluar nëpërmjet shumë roleve ndërsa ky është edhe bashkëpunimi i saj i tretë me regjisoren Blerta Zeqiri, me të cilën ajo thotë se ndihet shumë komode.
“Përvoja në këtë film është një proces më i gjatë, por unë ndihem shumë rehat me bashkëpunimin me Blertën për shkak se e ka një natyrë të punës që din ta nxjerrë më të mirën nga aktori dhe di të jap indikacione që ta lehtësojnë jashtëzakonisht shumë punën”, është shprehur Adriana lidhur me rolin e saj në këtë film.
Aktori Alban Ukaj, si në këtë film ashtu dhe në shumë role të tjera tashmë është i dëshmuar për punën e tij. Ky është bashkëpunimi i tij i parë me regjisoren Zeqiri, mirëpo thotë se me natyrën e punës së saj njihet shumë para marrjes së këtij roli. Ai thotë se realizimi final i rolit të tij në këtë film ka kaluar në shumë improvizime e hulumtime.
“Blerta është njëra prej regjisoreve me të cilën është lehtë ta ndërtosh karakterin, pasi që nuk ka diçka në letër së cilës duhet t’i përmbahesh, pra Blerta mundohet që karakteri të ndërtohet bashkë por edhe që ta ketë një pjesë private të karakterit tënd në mënyrë që ta shfaqë në pjesën e rolit”, ka thënë sot aktori Ukaj.
Të gjithë ata që duan ta shohin këtë film, ai nga nesër do të jetë pjesë e repertorit të Cineplexx në Prishtinë, ndërsa publiku mund ta shijojë premierën e këtij filmi nesër në Cineplexx në Prishtinë dhe në Dokukino në Prizren kurse premiera për publikun tiranas vjen më 2 shkurt. / KultPlus.com
Juria profesionale e edicionit të dytë të konkursit të poezisë “KultStrofa”, të organizuar nga KultPlus, nga 150 poezitë sa kanë konkurruar për këtë edicion, tashmë ka përzgjedhë edhe dhjetë finalistët e këtij edicioni.
Në mesin e dhjetë finalistëve është edhe Sibel Halimi, e cili në këtë konkurs ka konkurruar me poezinë “Vdekje e bardhë”.
KultPlus do të shpalosë një nga një dhjetë finalistët, sikurse që do të bëjë publike edhe jurinë profesionale të këtij edicioni.
Sponsor gjeneral i këtij edicioni është ProCreditBank. Kurse tre çmimet e para nga dhjetë finalistët do të kumtohen në orën letrare që do të organizohet së shpejti nga KultPlus. / KultPlus.com
Ministri i Kulturës, Rinisë dhe Sportit, Kujtim Gashi, qëndroi në Tiranë për të realizuar vizitën e tij të parë zyrtare, me ç’rast ka takuar homologen e tij, Ministren e Kulturës, Mirela Kumbaro Furxhi.
Ministri Gashi gjatë takimit me Ministren Kumabaro ka diskutuar për mundësitë e thellimit të bashkëpunimit midis dy ministrive përkatëse në fushën e kulturës, trashëgimisë kulturore dhe atë të së drejtës së autorit, duke krijuar edhe hapësira dhe mundësi për intensifikim e bashkëpunimit edhe ndërmjet skenës së pavarur kulturore të të dyja vendeve.
Ndër temat konkrete të bashkëpunimit të dy ministrive të kulturës asaj të Kosovës dhe asaj të Shqipërisë për vitin 2018 u nënvizua nënshkrimi i kalendarit të përbashkët kulturor, si një traditë e mirë dhe shumë domethënëse për kulturën në të dyja vendet, gjë e cila do të ndodhë brenda muajit shkurt. Marrë parasysh që viti 2018 është shpallur edhe Viti mbarëkombëtar i Gjergj Kastriotit – Skenderbeut, dy ministrat u pajtuan që të ketë më shumë aktivitete për të shënuar këtë përvjetor me rëndësi për shqiptarët.
Ministri Gashi, me këtë rast, ka kërkuar nga ministrja shqiptare “huazimin” e disa eksponateve që i përkisnin heroit kombëtar Isa Boletinit, për të qenë pjesë e ekspozitës së përhershme në Muzeun e Kosovës, që do të hapet më 17 Shkurt – Përvjetorin e Dhjetë të Pavarësisë së Kosovës, duke theksuar se ekspozimi i gjërave që i përkasin Isa Boletinit në Muzeun e Kosovës është një ngjarje me rëndësi për kulturën dhe historinë tonë, meqë kjo është një dëshmi që personalitetet nga Kosova kanë dhën shumë për cështjen kombëtare.
Ministri Gashi ka shtuar: “Biseduam, po ashtu, rreth aktiviteteve të përbashkëta që do t’i kemi edhe me shënimin e 10-vjetorit të vitit jubilar të shpalljes të Pavarësisë të Kosovës, për çka kërkova që të kemi dhe aktivitete të përbashkëta Kosovë-Shqipëri”.
Ministrja e Kulturës, Mirela Kumbaro, tha se fokus i diskutimit me homologun e tij kosovar ishte përgatitja për kalendarin e përbashkët kulturor Shqipëri-Kosovë; si dhe diskutuam për vazhdimin e bashkëpunimit ndërmjet institucioneve kulturore të dy vendeve.
Ministri Gashi, gjatë ditës ka vizituar edhe Muzeun Kombëtar të përgjimeve “Shtëpia e gjetheve” si dhe ka takuar drejtues të institucioneve të kulturës në Shqipëri. / KultPlus.com
Rruga B në Prishtinë mbetet ndër rrugët më artistike të kryeqytetit.
Madje, disa grafite e murale e zbukurojnë këtë pjesë të kryeqytetit që nga maji i vitit të kaluar.
Artisti Alban Muja megjithatë ka postuar sot një fotografi në rrjetin social Facebook ku shihet se në vend të grafiteve, ato janë dëmtuar dhe janë vënë sipër tyre reklama të bizneseve private.
“Pronarët e këtyre bizneseve duhet të dënohen patjetër, për shkatërrimin e një vepre arti dhe shkatërrimin e pronës publike” ka shkruar Muja derisa ka kërkuar vëmendjen edhe të Shpend Ahmetit – të parit të Prishtinës dhe Yll Rugovës – drejtor i Kulturës në Komunën e Prishtinës, shkruan KultPlus.
Ky i dyti ka reaguar.
“Kemi të bëjmë me vandalizëm tipik, që do t’i dënojmë me të gjitha mekanizmat që i kemi. Ndërkohë, po shikoj menjëherë mundësitë që të gjejmë mënyra të rikthimit të grafiteve të mbuluara (nëse është e mundur, sepse gjasat janë që autorët nuk janë të Kosovës—dhe nëse skicat për ato punime janë të ruajtura). Nëse jo, në kuadër të thirrjes për art në hapësira publike, do të shohim trajtimin edhe të kësaj hapësire (si masë rehabilituese)” i ka reaguar Rugova artistit Muja.
Meeting of Styles Kosovo vitin e kaluar solli artistë edhe nga jashtë Kosova për të zbukuruar këtë pjesë të qytetit me grafite të cilat edhe sot i japim dukje më të mirë dhe të freskët kësaj pjese të frekuentuar të kryeqytetit. / KultPlus.com
Rita Ora ka zënë vendin e tretë në top listën e artisteve femra më të dëgjuara në aplikacionin iTunes.
Vendin e parë e ka zënë Camilla Cabello, të dytin Selena Gomez, të tretin Rita dhe vendin e katërt Demi Lovato.
Lajmin e ka bërë me dije vetë këngëtarja me origjinë shqiptare Rita Ora në rrjetin social Instagram, ku shkruan: “Sa bukur. Viti 2018 do të jetë i mrekullueshëm”.
Sheshet kryesore të Prishtinës ishin mysafirë të disa protestuesve, të cilët shprehën kundërshtimin e tyre rreth ndotjes së ajrit.
Mesin e shumë qytetarëve kishte edhe shumë figura publike të botës së industrisë së kinematografisë shqiptare.
Ndër ta edhe aktorët e njohur si Fatmir Spahiu, Astrit Kabashi, Jeton Zogiani, Ylber Bardhi, Fisnik Ademit, të cilët janë bërë të njohur në saje të roleve në serialet “O Sa Mirë” dhe “Kafeneja Jonë”.
Aktorët kanë gjetur kohë edhe kanë realizuar edhe një fotografi të përbashkët që e kanë publikuar në Instagram.
“Europë mos u bon kështu”, ka shkruar Fatmir Spahiu në përshkrimin e imazhit të publikuar në rrjetet sociale.
Aktoret Irena Cahani, May-Linda Kasumoviq e Teuta Krasniqi kanë qenë në rendin e parë të protestës, njëjtë edhe Aurita Agushi.
Theksojmë se pos protestës, Komuna e Prishtinës ka marr masa në uljen e nivelit të ndotjes së ajrit, ku në rrugët kryesore nuk është lejuar të hyjnë automobilat privatë. / KultPlus.com
Poezi nga Rafael Alberti.
Do t’ i mbart të pashlyer
në dy sytë e mi.
Në beben e syve të mi.
Kur të mbërrij do t’i shohin
e do thonë:
– Ka lumenj,
edhe kuaj në dy sytë e tij.
Shpirti i peizazheve të tjerë
më ka mbetur në sy,
i përgjumur.
S’e ndieni? Ç’ujëra të largëta
e ç’kuaj të shastisur
kalojnë lehtë-lehtë në dy sytë e mi.
Në beben e syve të mi.
Ndonëse nuk mori pjesë fizikisht në protestën kundër ajrit të ndotur në Prishtinë, Ambasadori i Shteteve të Bashkuara të Amerikës në Kosovë, Greg Delawie, ka përdorur një mënyrë të veçantë për ta shprehur pakënaqësinë me gjendjen e ajrit në Prishtinë.
Delawie, përmes rrjetit social Twitter, postoi një fotografi të shtatores së Skënderbeut në qendër të Prishtinës, të cilit i kishte vënë një maskë kundër ndotjes.
We know how he feels! Pollution is a serious issue in #Kosovo, I hope to see more government action to address it. Check out the #AirNowInPristina monitor to know when to stay inside: https://t.co/DKHjJ7GOwt pic.twitter.com/dKSzpwhhOl
— Amb. Greg Delawie (@USAmbKosovo) January 31, 2018
“E dimë si ndihet ai! Ndotja e ajrit është çështje serioze në Kosovë, shpresoj të shoh më shumë veprim qeveritar për të adresuar këtë problem”, shkroi ai, ndërsa bëri thirrje që qytetarët të informohen për cilësinë e ajrit dhe të dinë kur të qëndrojnë në shtëpi përmes KËSAJ faqeje.
Poezi e shkruar nga Jorge Luis Borges.
Përktheu: Orjela Apolloni.
E kam ba nji prej mëkateve ma t’mëdhá
që nji njeri mundet me ba: s’kam qenë
i lumtun. Akullnajat e harresës m’gjejnë,
m’zvarrisin e pamëshirshëm m’lânë me ra.
Prindët m’lindën që ta lu’j
Nji lojë t’rrezikshme e t’bukur në këtë botë,
për tokë, ajër, zjarm e ujë.
I mashtrova. S’qeshë i lumtun.
Qe e kotëdëshira e tyne e rinisë. Trunin tim
ia fala me vullnet e këmbëngulje
simetrive t’artit gjithë lajlelule.
Ata m’lanë trashëgim vlerat. Unë s’kam qenë trim.
Nuk më braktis kurrë, gjithmonë më rri pran’
hija e të qenit nji mjeran.
Ibrahim Kodra ishte një nga piktorët më të shquar të kohës së ti. Ky piktor njihet për stilin e tij të veçantë artistik dhe me anë të së cilit arriti edhe famën ndërkombëtare, shkruan KultPlus.
Piktori ka ndërruar jetë para dymbëdhjetë vitesh, në moshën 88 vjeçare. KultPlus sot ju sjellë një fotografi kur ai ishte më i ri ndërsa shihet i ulur pranë brushave të tij, e në duar mban një kitarë./ KultPlus.com
Teuta Krasniqi është ngjitur në skenën e Teatrit Kombëtar të Kosovës në rreth dyzetë premiera të shfaqjeve të baletit. Jo rrallë herë i janë besuar edhe rolet kryesore. Ajo numëron rreth dybëdhjetë vite të rrugëtimit të saj me trupën e Baletit Kombëtar të Kosovës, e kjo përvojë së bashku me balerinët e kësaj trupe, e bashkëpunim me koreografë vendas e të huaj, e kanë lehtësuar rolin në të cilin ajo po sfidohet këtë vit për të parën herë.
Gili Hoxhaj
“Pa mure”, quhet shfaqja me kereografi të Teuta Krasniqit, shfaqje me të cilën trupa e Baletit Kombëtar të Kosovës do ta hap këtë vit.
‘’Pa mure’’, do të sjellë në skenë njëzetë balerinët e trupës së baletit. Në këtë shfaqje moderne, tashmë kereografja e re, Teuta Krasniqi përmes mureve lëvizese ka simbolizuar problemet me të cilat përballet Kosova, e përmes lëvizjeve ajo shpërfaq përpjekjet e vazhdueshme për të zhdukur ato pengesa. Mes këtyre mureve, krejt në fund vjen një dritë shprese për t’i rrëzuar këto mure, ashtu sic janë tejkaluar edhe shumë barriera në të kaluarën.
Trajtimi i një temë të tillë ka nisur shumë herët, e është zhvilluar vazhdimisht brenda imagjinatës së balerinës Teuta Krasniqi. Ideja e saj është e bazuar kryesisht në një problematikë, e cila e ka preukopuar atë që kur ajo arrin të dëshmoj dicka, duke u bazuar në kujtimet e saj të hershme. Kjo lidhet me kohën e luftës, e të pasluftës, në një pikë prek gëzimin e Teutës në momentin e kthimit në Kosovën e pasluftës. Fjala liri kishte qenë gëzimi kryesor që ka karakterizuar fëmijërinë e saj, andaj si e re kishte guxuar që verberisht të besoj në një liri vërtetë ideale. Me kalimin e kohës, ajo përballet gjithnjë e më shumë me realitetin e një vendi të izoluar, ku shpresat shuhen shumë lehtë. Madje këtë reflektim artistik të saj, e kishte nxitur edhe më shumë fakti që edhe pas dhjetë viteve pavarësi, vendi i saj mbetet pa liri të lëvizjes. Të rinjt ndodhen me pak hapësirë për t’i shprehur aftësitë e energjinë e tyre këtu, e synimet e tyre për t’i prezantuar ato jashtë vendit rëndom mbesin të parealizuara.
‘’Ideja ka lindur nga krejt ky gëzim, dhe kjo bindje si e re dhe naive që këtu nuk do të ketë më probleme. Por tani edhe pas kaq shumë vitesh ‘’liri’’, prapë se prapë ne si vend jemi të izoluar, përvec kësaj, tani edhe dhjetë vite më pas, si një shtet i pavarur ne ende nuk mund të lëvizim diku lirshëm ose duhet të përballemi me shumë përpjekje deri në marrjen e një vize, e shpesh me shumë dëshprim e tejkalojmë momentin kur viza na refuzohet’’, u shpreh balerina Krasniqi për KultPlus.
Ajo thotë së faktorët për këtë ceshtje mund të varen nga ne, apo edhe jashtë nesh, por synimi i saj dhe konceptit të shfaqjes nuk është ti drejtohet gishti drejt gjetjes së fajtorit, por duke i shpërfaqur këto probleme synon të reflektoj dicka tejet pozitive, se nuk duhet ta humbasim shpresën për një të ardhme pa mure.
Rolet e saj, e përkushtimi në punë, e kanë dëshmuar shpesh kapacitetin e saj artistik. Megjithatë, ajo nuk ishte rritur duke e ushqyer ëndrrën për balerinë.Teuta është rritur në një familje mjekësh, e ky kishte qenë edhe synimi i saj profesional. Pasi që ajo nuk pranohet në këtë drejtim, shkon e bëhet pjesë e drejtimit teorik të shkollës së muzikës ‘’Prenk Jakova’’. Gjatë gjysëmvjetorit të parë sa ishte pjesë e këtij drejtimi, ajo ka shfrytëzuar shpesh pauzat e orëve mësimore për të ndjekur provat e gjeneratës së parë të Trupës së Baletit Kombëtar të Kosovës. Profesori i atëhershëm, tani edhe një përkrahës i madh i balerinës, Ahmet Brahimaj, i kishte bërë asaj ftesën që t’u bashkohet nxenësve të tjerë në prova, të cilat kishin shërbyer si nxitje që Teuta t’i bashkohet nxenësve të tjerë të këtij drejtimi.
‘’Fillimisht vetëm i imitoja të tjerët se si i mbanin duart, profesori ndonjëherë i përmirësonte duart por më shumë jam mësuar duke e parë për së afërmi punën e të tjerve’’, ka treguar Teuta lidhur me eksperiencën e parë drejt rrugës së baletit.
Lëndimi i njërës nga koleget e saj e kishte nxjerrë për herë të parë Teuten në skenë, para diplomimit dhe para se t’i bashkohej Trupës së BKK-së. Sot, shumë vite më pas ajo thotë se e ka gjetur vetën në shfaqjet moderne, ku edhe i janë besuar në shumicën e rasteve rolet kryesore. Me mjaft stres e përgjegjësi, ajo po e bart mbi supe rolin e kereografës, mirëpo thotë se punën e kësaj shfaqje po e bën më të lehtë pëkrahja e madhe e kolegëve me të cilët ajo e ndan tash e një dekadë pervojë. Teuta thotë se përkundër peshës së këtij roli, guximi i saj është i bazuar më shumë tek pervoja që ndanë tash e sa vite me kereorgafët vendas e të huaj, dhe thotë se kjo eksperiencë i ka shërbyer më shumë se sa që ndoshta do të mund t’i sherbente studimi i kereografisë. Me intensitet të njejtë, Teuta së bashku me trupën e BKK-së tash kanë edhe një javë drejt finalizimit të premierës për publikun.
Të gjithë ata që duan të shohin premierën e parë të Trupës së Baletit Kombëtar të Kosovës, shfaqja ‘’Pa mure’’ do të prezentohet më 8 shkurt, duke filluar nga ora 20:00 në Teatrin Kombëtar të Kosovës. /KultPlus.com
Juria profesionale e edicionit të dytë të konkursit të poezisë “KultStrofa”, të organizuar nga KultPlus, nga 150 poezitë sa kanë konkurruar për këtë edicion, tashmë ka përzgjedhë edhe dhjetë finalistët e këtij edicioni.
Në mesin e dhjetë finalistëve është edhe Shkumbin Haxha, i cili në këtë konkurs ka konkurruar me poezinë “Pyetje e lagur”.
KultPlus do të shpalosë një nga një dhjetë finalistët, sikurse që do të bëjë publike edhe jurinë profesionale të këtij edicioni.
Sponsor gjeneral i këtij edicioni është ProCreditBank. Kurse tre çmimet e para nga dhjetë finalistët do të kumtohen në orën letrare që do të organizohet së shpejti nga KultPlus./KultPlus.com
Me një të kaluar prej Miss-i, pamja e saj natyrale e liston Adrola Dushin ndër femrat më të bukurat e Shqipërisë.
Ish-Miss Universe Albania është duke zhvilluar karrierën e saj si modele në SHBA. Dhe fati e ka takuar me divën latine me famë botërore, Jennifer Lopez.
Adrola ka ndarë në rrjetet sociale foto duke pozuar përkrah J-Lo-së në tapetin e kuq të një eventi të rëndësishëm.
E kush nuk do të dëshironte të ishte krah divës së muzikës latine…!
Adrola është nëna e një djali dhe tashmë është duke korrur sukses në botën e modës përtej Atlantikut./ KultPlus.com
Këshilli Kombëtar Shqiptar i Qytetit të Zagrebit, me rastin e 10 vjetorit të shtetit të Kosovës do të organizoj koncert festiv me veprat e muzikës klasike shqiptare, shkruan KultPlus.
Në këtë koncert do të interpretohen veprat e kompozitorëve Rudolf Marosh, Tonin Harapi, Ramadan Sokoli, Ymer Skenderi,Desar Sulejmani, Tish Daija, Albert Paparisto, Valton Beqiri, Rauf Dhomi dhe Genc Tukiqi.
Ne violë do të interpretoj violinisti Blerim Grubi kurse në piano Arjana Kuriu-Grubi.
Koncerti do të mbahet me 15 Shkurt në Hrvatski Glazbeni Zavod(HGZ), Gundulićeva 6; Zagreb, duke filluar nga ora 17:00. / KultPlus.com
Sot shënohet 21-vjetori i rënies së Heronjve të Kosovës, Zahir Pajaziti, Hakif Zejnullahu e Edmond Hoxha.
Zahir Pajaziti, Hakif Zejnullahu e Edmond Hoxha, luftëtarët e radhëve të para të Ushtrisë Çlirimtare të Kosovës, ranë heroikisht 21 vite më parë, në Pestovë të Vushtrrisë.
Sikur çdo vit, më 31 janar, përvjetori i rënies së tyre shënohen me një varg aktivitetesh.
Të tre, me vendim të Presidentit të Republikës së Kosovës, janë nderuar me titullin më të lartë që jepet në vendin tonë – Hero i Kosovës.
Zyrtarë shtetërorë, përfaqësues të institucioneve dhe familjarë e bashkëluftëtarë të tyre do të bëjnë sot homazhe pranë varreve të tyre në Orllan e në Lladoc të Llapit dhe në Junik të Dukagjinit.
Pastaj, në orën 12:00, në sheshin qendror të Podujevës zbulohen shtatoret e dëshmorëve Zahir Pajaziti, Hakif Zejnullahu, Ilir Konushevci dhe Edmond Hoxha. Aktiviteti mbahet nën patronazhin e kryetarit të Kuvendit, Kadri Veseli.
Në orën 17:00, në Bibliotekën Kombëtare “Pjetër Bogdani” në Prishtinë, mbahet akademi përkujtimore, nën patronazhin e kryeministrit Ramush Haradinaj.
Ndërsa, në orën 18:15, në Pallatin e Rinisë në Prishtinë luhet ndeshja finale e Kupës së Qyteteve, turne futbolli që organizohet çdo vit në përvjetorin e rënies së tre dëshmorëve.
Të gjitha këto aktivitete do të transmetohen direkt në Radiotelevizionin e Kosovës./ KultPlus.com
Ylli botëror, pavarësisht agjendës së ngjeshur nëpër prezantime të ndryshme nëpër botë, ka rezervuar kohën që të jetë e pranishme më 17 shkurt në Prishtinë, në dhjetëvjetorin e Pavarësisë së Kosovës, shkruan KultPlus.
Mirëpo, përpos që ka gjetur kohë të jetë e pranishme në këtë datë të rëndësishme, ajo poashtu ka refuzuar të paguhet për paraqitje.
Për këtë ka njoftuar edhe zëvendëskryeministri i Kosovës Behgjet Pacolli. “Familja Ora (Sahatçiu) meriton një respekt të madh për çdo gjë që kanë bërë për promovimin e Kosovës. Duke edukuar vajzën e tyre në një atdhetare të vërtet. Kam kënaqësinë të konfirmoj ardhjen e yllit tonë botëror Rita Ora me rastin e 10 vjetorit të Pavarësisë. Ajo nuk ka pranuar të paguhet për këtë ngjarje dhe kjo do të thotë shumë për personalitetin e saj.”, ka shkruar ai./KultPlus.com
Kjo fotografi është realizuar më 2 shkurt të vitit 2017, kurse ndotja e ajrit sivjet është vënë në fokus të reagimeve të qytetarëve më shumë se kurrë, shkruan KultPlus.
Kjo fotografi është relizuar nga fotografi i njohur kosovar Hazir Reka. Në këtë fotografi shihet një grua duke shkuar te pika e stacionit të autobusëve në Obilic, dhe në të njëjtën kohë shihet ndotja e ajrit që e rrethon këtë ambient./KultPlus.com
Është hedhur mbrëmë shorti për natën e parë dhe të dytë për shtetet pjesëmarrëse në festivalin “Eurovizion” që këtë vit do të mbahet në Lisbonë të Portugalisë në datat 8, 10 dhe 12 maj.
Për këtë vit Shqipëria do të përfaqësohet nga këngëtari Eugent Bushpepa, i cili fitoi festivalin në RTSH me këngën “Mall”.
Data 8 maj do të jetë dita kur Eugent Bushpepa nën flamurin kuq e zi do të performojë në natën e parë të festivalit.
Në natën e parë gjysmëfinale garojnë shtetet:
Shqipëria
Azerbajxhani
Bjellorusia
Belgjika
Bullgaria
Republika Çeke
Estonia
Islanda
Izraeli
Lituania
Armenia
Austria
Kroacia
Qipro
Finlanda
Ish-Republika Jugosllave e Maqedonisë
Greqia
Irlanda
Zvicra
Në natën e parë gjysmëfinale garojnë shtetet:
Australia
Danimarka
Norvegjia
Moldavia
Rumania
Rusia
San Marino
Serbia
Holanda
Hungaria
Gjeorgjia
Malta
Mali i Zi
Letonia
Polonia
Sllovenia
Suedia
Ukraina.
Shfaqja “Bordel Ballkan”, njëra prej më të shikuarave në Teatrin Kombëtar të Kosovës, është anuluar të martën, 20 minuta para kohës kur është dashur të niste.
Këtë veprim TKK-ja e ka ndërmarrë pasi aktori Armend ka refuzuar të marrë pjesë në shfaqje në shenjë proteste për pakënaqësitë e tij ndaj institucionit ku punon, TKK-së. Kësisoj TKK-ja nuk ka hapur dyert për ata që kanë rezervuar mbi 100 bileta dhe të tjerët që kanë lënë t’i presin biletat pak para se të niste shfaqja.
“Me përgjegjësi mund të them se rreth 400 veta janë kthyer mbrapa sonte. Kjo është njëra prej shfaqjeve më të shikuara në TKK dhe sonte kanë ardhur shumë njerëz pasi ka kohë që nuk është dhënë ‘Bordel Ballkan’”, ka thënë organizatori i TKK-së, Beqir Beqiri. Në mbrëmjen e së martës drejtori i përgjithshëm dhe udhëheqësi artistik nuk u janë përgjigjur thirrjeve telefonike të gazetës.
Aktori Armend Baloku ka refuzuar të luajë duke përdorur si shkas disa akuza sipërfaqësore për udhëheqësit e TKK-së. Këtë e ka bërë nëpërmjet rrjetit social “Facebook”.
“Në shenjë proteste sonte nuk do të interpretoj në shfaqjen ‘Bordel Ballkan’”, ka shkruar ai në profilin e tij. Aty ka shkruar se ka kohë që ka reaguar përbrenda institucionit, lidhur me nivelin e ulët, qoftë të organizimit nga ana e menaxhmentit, qoftë nga ana artistike e, sipas tij, fatkeqësisht asgjë nuk ka ndryshuar.
Akuza brenda stafit të TKK-së shpërthyen javën e kaluar midis drejtorit të përgjithshëm, Agim Sopi dhe Këshillit Drejtues, që nisën në lidhje me programin e këtij viti, shkruan Koha Ditore./ KultPlus.com
Qeveria e Shqipërisë ka marrë një financim nga Banka Botërore kundrejt kostos së projektit, “Integrimi urban dhe zhvillimi i turizmit”, dhe ka për qëllim të përdorë pjesë të këtij financimi për kontratën “Restaurimi i ansamblit arkitektonik, Pazari Gjirokastër”, monument i kategorisë së dytë, për rehabilitimin e infrastrukturës dhe restaurimi i kalldrëmeve në pazarin e Gjirokastrës.
Fondi Shqiptar fton tani ofertuesit të kualifikuar për të paraqitur ofertat e tyre për punimet civile, “Restaurimi i ansamblit arkitektonik, Pazari Gjirokastër”, që parashikohen të kryhen për një periudhë kohore prej 12 muajsh. Tenderi do të zhvillohet në bazë të një dokumentacioni të harmonizuar ndërmjet dokumentacionit për prokurimin e tenderit të hapur, sipas Agjencisë së Prokurimit Publik dhe standardeve të Bankës Botërore, duke u realizuar sipas procedurave të përcaktuara në udhëzuesit e Bankës Botërore, për: “Prokurimi i mallrave, punët dhe shërbimet jokonsultuese nën huat IBRD dhe kreditë IDA e grantet nga huamarrësit e Bankës Botërore.
Ofertuesit/kompanitë e interesuar/a mund të marrin informacion më të detajuar nga Fondi Shqiptar i Zhvillimit (FSHZH) dhe të kontrollojnë dokumentet e tenderimit gjatë orareve zyrtare nga 9:00 deri 16:30, në adresën e Fondit Shqiptar të Zhvillimit (FSHZH). Ofertat duhet të dërgohen para datës 5.3.2018, ora 10:00. Ofertat elektronike nuk do të lejohen. Ofertat e vonuara do të refuzohen. Ofertat do të hapen publikisht në prezencë të përfaqësuesve të caktuar të ofertuesve dhe kujtdo që zgjedh të marrë pjesë. Të gjitha ofertat duhet të shoqërohen nga një sigurim oferte me vlerë 2,900,000 lekë (dy milionë e nëntëqind mijë). Një rrugë me kalldrëm, prej nga mund të shkosh edhe në portën veriore të kalasë, të çon drejt lagjes “Pazar i Vjetër”, shkruan SotNews.
Në kryqëzimin që ndan atë me rrugën që të çon drejt lagjes “Manalat” ndodhet një shesh i vogël, i njohur si “Sheshi i Pasha Kaurit” (një nga të rrallët pashallarë që ishte i krishterë). Më tej përmes një rrugice ngrihen banesat. Rrugica të ngushta, të shtruara me gurë e në pjesën më të madhe të lyera anash me gëlqere janë degëzimet e lagjes, me ndërtime interesante, duke filluar nga objekti i parë fetar i krishterë e deri te konsullata e parë greke që ka funksionuar në Gjirokastër. Nga dokumentet e kohës mësohet se kur numri i banorëve brenda kalasë u rrit me rreth 200 familje, një numër relativisht i madh, atëherë nisën të dalin jashtë mureve dhe të ndërtohen shtëpitë e vjetra, që i takojnë lagjes “Pazar i Vjetër”./ KultPlus.com