Muzeu Kombëtar “Shtëpia me gjethe” kujtoi sot në ditën e tij të ndarjes nga jeta, poetin lirik, eseistin, publicistin dhe botuesin Frederik Rreshpja (19 korrik 1940-17 shkurt 2006). Pena e tij është ndër më përfaqësueset e vargut shqip.

Frederik Rreshpja u lind në Shkodër më 1940-ën në një familje me origjinë nga Dukagjini. Kreu në vendlindje shkollimin fillor dhe të mesëm pranë gjimnazit “29 Nëntori”. Studimet universitare i ndoqi pranë Pedagogjikut në Tiranë me korrespondencë.

Më 1967 iu botua vepra e parë letrare, përmbledhja me poezi “Rapsodi shqiptare”. Më 1975 vepra e tij u hoq nga qarkullimi me urdhrin e një qarkoreje të Ministrisë së Arsimit dhe Kulturës. U arrestua dhe u dënua “…si një person që paraqet rrezikshmëri shoqërore që synon në minimin, dobësimin dhe përmbysjen e pushtetit popullor…”.

Frederik Rreshpja vuajti 17 vjet burg. Pasi doli nga burgu, botoi vëllimet “Erdhi ora të vdes përsëri” – 1994, “Lirika të zgjedhura” – 1996, përmbledhje kjo që u shpall më e mira për vitin përkatës, si dhe vëllimin me poezi “Në vetmi” që u botua në vitin 2004, i cili i solli titullin “Poet i vitit 2004”. U përfshi në vëllimin “Historia e Letërsisë Shqiptare” e Robert Elsie-t të 2003. Frederik Rreshpja përfaqësohet me disa poezi në “Antologjinë e poezisë shqiptare” të Aleksandër Zotos (1998) dhe në “Antologjinë e poezisë shqipe”.

Frederik Rreshpja jetonte në Tiranë, i vetëm. Vdiq më 17 shkurt 2006 në Shkodër, nga një sëmundje e zemrës, i rrethuar nga vëllezërit dhe familja e gjerë dhe u varros më 18 shkurt, në varrezat katolike “Rrëmaj” të Shkodrës./ atsh / KultPlus.com

Policja Arjeta Kavaja me prejardhje nga Kosova, është nderuar me dekoratën “Policja e Vitit 2022 për Ekip të Intervenimit në Kriza” nga Universiteti i Central Florida.

Kjo dekoratë asaj iu dhurua për nder të performancës dhe shërbimit të jashtëzakonshëm ndaj komunitetit universitar në Florida. / KultPlus.com

Seanca festive e Kuvendit të Kosovës sot është hapur ndryshe nga herët tjera. Filharmonia e Kosovës sollën një mini koncert tejet të veçantë çka e bëri edhe më madhështore këtë ditë.

Koncerti filloi me fragment nga baleti “Shotë e Azem Galica” nga Nikolla Zoraqi, për të vazhduar me “Bareshën” e Rexho Mulliqit.

Në mbyllje Orkestra interpretoi “Odën e Gëzimit” nga Beethoven me dirigjent Gridi Kraja. / KultPlus.com

Më lejoni që fillimisht të falënderoj Filarmoninë e Kosovës për këtë minikoncert të mrekullueshëm në fillim të kësaj Seance, dhe po ashtu të falënderoj Presidentin e Republikës së Shqipërisë, z. Bajram Begaj që na ka nderuar me prezencën e tij.

Z. President,

Z. Kryetar i Kuvendit z. Konjufca,

Z. Kryeministër Kurti,

Të nderuar zëvendëskryeministra, ministra të kabinetit qeveritar,

Shumë të nderuar deputetë, përfaqësues të qytetarëve të Republikës së Kosovës,

Të nderuar shkëlqësi ambasadorë,

Të nderuar përfaqësues të familjeve të dëshmorëve, veteranë të luftës,

Përfaqësues të institucioneve të sigurisë,

Shumë të dashur qytetarë të Republikës!

          Jam e nderuar që sot, në ditëlindjen e pesëmbëdhjetë të Republikës sonë, të mund t’ju drejtohem nga foltorja e Kuvendit të Republikës, institucionit që bart peshën e jetës plurale dhe demokratike në vendin tonë.

Prandaj, duke bartur në kujtesë këtë akt sublim të shpalljes së shtetit të pavarur të Kosovës, më lejoni ta përgëzoj secilin qytetar të vendit tonë për kontributin në ndërtimin e shtetit tonë të përbashkët; ta kujtojmë sakrificën  e pashembullt dhe qëndresën e pareshtur të brezave, e cila i parapriu jetësimit të ëndrrës për liri e demokraci; ta kujtojmë prijatarin e shtetësisë sonë, presidentin historik të Kosovës, dr. Ibrahim Rugovën, i cili e siguroi respektin e gjithë botës demokratike; t’i kujtojmë bijtë e bijat tona, të cilët, të rreshtuar në Ushtrinë Çlirimtare të Kosovës, sakrifikuan jetën e tyre në mbrojtje të vendit, komandantin historik të kësaj ushtrie, Adem Jasharin, i cili i priu rezistencës për liri; t’i kujtojmë përfaqësuesit e institucioneve të pavarura të Kosovës, të cilët përgjatë këtyre 15 vjetëve kontribuuan në ndërtimin e jetës demokratike në vend, por edhe në paqen e përgjithshme, të kujtojmë po ashtu kontributin e ushtarëve e policisë sonë, përfshirë ushtarët e FSK-së, të cilët, përderisa ne sot po festojmë 15 vjetorin e shtetit tonë, ata po luftojnë për shpëtimin e jetëve nën rrënojat e ndërtesave të shembura nga tërmeti tragjik i cili e goditi Turqinë dhe Sirinë, ditë më parë.

          Por, sot i rikujtojmë e u falënderohemi edhe miqve tanë, aleatëve tanë, të cilët i kemi quajtur me të drejtë shpëtimtarë e miq të lirisë, të cilët kanë qenë së bashku me ne përherë, kur ne ishim të shtypur e luftonim për lirinë, kur u çliruam dhe filluam jetën demokratike në tokën e lirë, në vendin e lirë e të dashur tonin. Ata janë këtu edhe sot, partnerë të besueshëm e të qëndrueshëm, me të cilët bashkërisht ne po e ndërtojmë të ardhmen tonë, si partnerë të besueshëm e ndërveprues.

Të nderuar deputetë,

Të dashur qytetarë të vendit tonë!

          Në këto 15 vjet Kosova është zhvilluar e forcuar si shtet i ri; ajo ka dëshmuar kulturë demokratike në organizimin e jetës politike dhe funksionimin e institucioneve, i ka ndërtuar e zhvilluar kapacitetet e saj shtetërore dhe ka krijuar bazë solide për funksionim të mëtejshëm. Institucionet tona po forcohen dita-ditës. Kjo është e arritur e madhe e qytetarëve tanë.

Sfidat, sigurisht, kanë qenë të pranishme, por i kemi tejkaluar me urti, duke qenë të përkushtuar për shtet të mirëfilltë e partneritet të qëndrueshëm me aleatët tanë.

Këto sfida ndonjëherë na kanë bërë të përplasemi së brendshmi, ngaqë pikëpamjet tona kanë qenë të ndryshme, sikur është e nënkuptueshme për shoqëritë demokratike. Por, gjithsesi, na kanë bërë edhe më të fortë. Kanë dëshmuar aftësinë tonë për të qenë të qëndrueshëm karshi tyre e për ta zhvilluar më tej jetën tonë demokratike.

Këto sfida janë të pranishme edhe sot, kur Kosova, falë përcaktimit të saj të hershëm, po përpiqet që ta fuqizojë edhe më tej pozitën e saj ndërkombëtare drejt integrimit të vendit në strukturat euroatlantike. Sigurisht, Kosova nuk mund të jetë ishull i izoluar karshi sfidave e kërcënimeve që e kanë sfiduar gjithë kontinentin tonë dhe botën demokratike. Por, ajo nuk mund t’i injorojë edhe kërcënimet e sigurisë ndaj saj, të cilat vijnë si rrjedhojë e përpjekjeve për ta minuar shtetësinë tonë.

Sot e kësaj dite, forca destruktive provojnë ta cenojnë shtetësinë  tonë. Ato provojnë të ushtrojnë ndikimin e tyre, duke përdorur përpjekjen për ta thyer unitetin tonë historik karshi çështjeve madhore. Por, ne nuk duhet të lejojmë që shoqëria jonë të polarizohet karshi sfidave të tilla. Në përballje me Serbinë, duhet dhe do të jemi një. Si gjithnjë, ne duhet të reflektojmë maturi, të bashkëndiejmë e të bashkëveprojmë karshi këtyre sfidave.

Forcimi i mëtejmë i shtetit të Kosovës është mision i gjithsecilit: i institucioneve, i gjithë spektrit politik e i secilit qytetar, pa dallime, ashtu siç ishte edhe liria jonë e pavarësia e Kosovës ëndërr dhe mision i shumë brezave dhe gjeneratave para nesh.

Prandaj, pavarësisht dallimeve në pikëpamje, ide dhe platforma politike, spektri politik i vendit, do të jetë i bashkuar përballë të gjithë atyre që përpiqen të minojnë shtetin tonë, apo të pengojnë përparimin e tij. Ashtu siç kemi qenë të bashkuar gjithmonë dhe kurdoherë që e ka kërkuar interesi madhor i vendit tonë.

Beteja për fuqizim ndërkombëtar, për anëtarësim në organizatat ndërkombëtare, e rruga drejt integrimit euro-atlantik, kërkon bashkëveprim të plotë me shtetet mike e aleate, tepër të rëndësishme historikisht për secilin proces të rëndësishëm nëpër të cilin ka kaluar Kosova jonë.

Siç e kemi kurorëzuar lirinë me ndihmën e tyre, njësoj shpresojmë ta përmbyllim edhe procesin e integrimit në familjen evropiane dhe të anëtarësimit në NATO po me ndihmën e tyre. Ne jemi fuqishëm në anën e aleatëve tanë, ndaj është e domosdoshme që vendet e Ballkanit Perëndimor ato që janë demokratike sa më parë të anëtarësohen në NATO dhe BE, si masë parandaluese kundrejt cenimit politik, ushtarak e ekonomik të Rusisë dhe satelitëve të saj në rajon. Procesi i dialogut me Serbinë e ka një epilog, një epilog që e kemi thënë gjithsecili prej nesh, një epilog që e rikonfirmoi edhe Presidenti Biden në letrën e tij drejtuar mua si Presidente e vendit dje, e ajo është njohja reciproke. Tërësia territoriale, kushtetutshmëria, rendi juridik e sovraniteti jonë janë të panegociueshme.

Të nderuar deputetë!

Përvjetorët si ky janë mundësi e mirë për të reflektuar mbi rrugëtimin tonë të gjatë e të dhimbshëm por krenar si dhe mundësinë që, duke punuar çdo ditë, ta zhvillojmë më tej jetën tonë demokratike e ta forcojmë shtetin tonë për të cilin është sakrifikuar aq shumë. Prandaj, le të punojmë bashkë e pareshtur që shtetin tonë, Republikën e Kosovës, ta zhvillojmë e ta forcojmë. Sa më shumë që të tjerët punojnë për minimin e shtetit tonë, aq më i fortë do të jetë uniteti ynë për ta forcuar dhe për ta përparuar atë, sepse Republika jonë është e përjetshme.

Zoti e bekoftë Republikën e  Kosovës!

Zoti i bekoftë miqtë e saj!

Zoti i bekoftë qytetarët tanë!

Faleminderit! / KultPlus.com

Sekretari Amerikan i Shtetit, Antony Blinken ka uruar Kosovën me rastin e 15 vjetorit të pavarësisë.

Blinken ka shkruar se këtë vit Kosova dhe SHBA kanë riafirmuar partneritetin e fortë dhe përkushtimin e përbashkët për demokraci, sovranitet dhe integritet territorial të Kosovës derisa janë shfaqur sfida të reja në mjedisin e sigurisë evropiane.

“Përparimi i Kosovës gjatë pesëmbëdhjetë viteve të pavarësisë është i jashtëzakonshëm për hapat e saj të mëdhenj në zhvillimin e një demokracie të qëndrueshme, multietnike dhe gjithëpërfshirëse”, ka shkruar Blinken në letrën e tij.

Sekretari amerikan ka thënë se SHBA është mirënjohëse për pritjen bujare që Kosova kishte bërë për refugjatët afganë dhe për përgjigjen e prerë të Kosovës për agresionin rus në Ukrainë.

“Kosova është një nga vendet më të reja në botë; qytetarët e saj me të drejtë janë krenarë për progresin që ka bërë Kosova në promovimin dhe avancimin e vlerave demokratike dhe forcimin e institucioneve për të ofruar qeverisje të mirë, sundim të ligjit dhe mundësi ekonomike për të gjithë kosovarët. Ne jemi thellësisht mirënjohës për pritjen bujare të Kosovës të afganëve të zhvendosur, përgjigjen e prerë të Kosovës ndaj luftës brutale dhe të paprovokuar të Rusisë kundër Ukrainës dhe për ndihmën ndaj gazetarëve dhe të tjerëve që kërkuan strehim në vendin tuaj”, ka shtuar Sekretari.

Në fund Blinkena ka thënë se normalizimi i raporteve me Serbinë me synim final njohjen reciproke mbetet çështje thelbësore në forcimin e paqes dhe sigurisë në rajon. Ai ka thënë se SHBA e përkrah fuqishëm propozimin frnako-gjerman dhe thotë se ajo do të çojë Kosovën drejt stabilitetit dhe integrimit evropian dhe euro-atlantik.

“Partneriteti i qëndrueshëm ndërmjet Shteteve të Bashkuara dhe Kosovës i ka rrënjët në mirëkuptimin reciprok, vlerat dhe miqësinë mes popullit tonë. Mezi pres të vazhdojmë bashkëpunimin për prioritetet tona të përbashkëta për të forcuar sigurinë dhe stabilitetin në Kosovë dhe në Ballkanin Perëndimor. Normalizimi i marrëdhënieve me Serbinë, në qendër të njohjes eventuale reciproke, mbetet thelbësor për këtë. Marrëveshja e propozuar së fundmi në kuadër të Dialogut të lehtësuar nga BE-ja ka mbështetjen tonë të fortë dhe do ta çojë në masë të madhe vendin tuaj drejt stabilitetit më të madh rajonal dhe integrimit evropian dhe euroatlantik. Përsëri urime të gjithë popullit të Kosovës – mikut, partnerit dhe aleatit tonë – në këtë ditë të rëndësishme. Ju uroj një vit të qetë dhe të begatë në vazhdim.” , përfundon letra e Blinken për pavarësi./Express/ KultPlus.com

Mjek dhe drejtori i Institutit të Mjekësisë Ligjore, Arsim Gërxhaliu ka kaluar nëpër duar mijëra kocka nga varrezat masive në Kosovë.

Në një rrëfim për ABC News, ai ka treguar punën që ka bërë gjatë këtyre 24 viteve, duke theksuar momentet më të vështira kur i jepte lajmin familjarëve që një person i afërm i tyre i janë gjetur eshtrat.

“Menjëherë pas forcave të NATO-s, më 12 qershor të vitit ‘99, Prishtina u çlirua dhe unë fillova të ecja pas trupave të NATO-s dhe menjherë të nesërmen ishte ai kontakti i parë në afërsi të Prishtinës, ku shikoja kufoma në sipërfaqje të dheut, disa gjysmë të mbuluara. Edhe thjesht, njerëzit kishin humbur të afërmit e tyre gjatë luftës dhe sapo u ktheva nga Instituti i Mjekësisë Ligjore, filloi një vërshim i popullatës.”

“Duke e ditur se aty kishte edhe shumë mbetje mortore që aty ishin mbledhur apo nuk kishin arritur t’i çonin në ndonjë vend për t’i fshehur, sikur gjetëm më pas në këto 23 vitet. Është fakt se ka mbi 2 mijë pika të zhvarrimeve që kanë marrë pjesë dhe rreth 5 mijë persona të identifikuar. Rreth 400 herë kam shkuar në Serbi dhe thjesht i kam sjellë 1870 qeska me mbetje mortore, diku rreth 750 kanë qenë vetëm trupat e Drenicës dhe së fundmi kemi punuar në vitn 2014 në Rubnicë, ku i kemi marrë 54 trupa dhe para 2 vitesh, por numri i tyre është edhe më tutje. Do të thotë 1617 kuti mungojnë dhe thjesht kjo ishte një punë 23-vjeçare, që nuk ishte shumë e lehtë se ballafaqohesim me gjëra të rënda. Në këtë kohë kohë pas 23 vitesh, mund të them që puna në varreza dhe rihapja e tyre mu bë aq e lehtë, sa më rëndonte ajo koha kur duhet të jepnin lajmin familjarëve që është gjetur i afërm i tyre. Ato ishin momentet më të vështira”, u shpreh Gërxhaliu.

Më tej, mjeku tregoi momentin emocionues kur kishte pastruar trupin e Adem Jasharit, prej të cilit kishte marrë një dhëmbë dhe disa qime floku. Sakaq ai bëri të ditur se humbur 33 pjesëtar të familjes, që janë kushërinjtë e mi dhe djemtë e axhallarëve.

“Të gjitha një nga një i kemi pastruar, i kemi larë, ato pjesët kockore me kujdesin më të madh, si të themi me një emocion të thellë. Me komandantin kam punuar rreth 7 orë dhe kur erdhi fundi që ta kompletojë, njëriu ka 206 pjesë kockore dhe e ktheva në pozitën anatomike, për ta futur në arkivol. Edhe kafka mbi ajo e fundit, edhe ishte një emocion që t’ju them të drejtën që nuk e di as vetë se si ka ardhur prej thellësisë së shpirtit tim me siguri. Thjesht kam qenë i emocionuar aq shumë sa që ndoshta nuk isha vetja. Pas 18 vitesh unë i shikova ato video-kasetat se kemi diku 15 mijë fotografi që kemi bërë dhe 13 ditët e punës kanë qenë të xhiruara dhe i kam këto filmimet e punës. Edhe kur e bëm një dokumentar, me thënë të drejtën dhe unë e pash për herë të parë pas 18 vitesh”, tha Gërxhaliu. / KultPlus.com

Deklarata e Pavarësisë së Kosovës

Të mbledhur në mbledhje të jashtëzakonshme më 17 shkurt 2008, në kryeqytetin e Kosovës, në Prishtinë,

Duke iu përgjigjur thirrjes së popullit për të ndërtuar një shoqëri që respekton dinjitetin njerëzor dhe afirmon krenarinë dhe synimet e qytetarëve të saj,

Të zotuar për t’u përballur më trashëgiminë e dhembshme të së kaluarës së afërt në frymë të pajtimit dhe faljes,

Të përkushtuar ndaj mbrojtjes, promovimit dhe respektimit të diversitetit të popullit tonë,

Duke riafirmuar dëshirën tonë për t’u integruar plotësisht në familjen euroatlantike të demokracive,

Duke vërejtur se Kosova është një rast special që del nga shpërbërja jokonsensuale e Jugosllavisë dhe nuk është presedan për cilëndo situatë tjetër,

Duke rikujtuar vitet e konfliktit dhe dhunës në Kosovë që shqetësuan ndërgjegjen e të gjithë popujve të civilizuar,

Mirënjohës që bota intervenoi më 1999 duke hequr në këtë mënyrë qeverisjen e Beogradit mbi Kosovën, dhe vendosur Kosovën nën administrimin e përkohshëm të Kombeve të Bashkuara,

Krenarë që Kosova që atëherë ka zhvilluar institucione funksionale, multietnike të demokracisë që shprehin lirisht vullnetin e qytetarëve tanë,

Duke rikujtuar vitet e negociatave të sponsorizuara ndërkombëtarisht ndërmjet Beogradit dhe Prishtinës mbi çështjen e statusit tonë të ardhshëm politik,

Duke shprehur keqardhje që nuk u arrit asnjë rezultat i pranueshëm për të dyja palët përkundër angazhimit të mirëfilltë të udhëheqësve tanë,

Duke konfirmuar se rekomandimet e të Dërguarit Special të Kombeve të Bashkuara, Martti Ahtisaari, i ofrojnë Kosovës një kornizë gjithëpërfshirëse për zhvillimin e saj të ardhshëm, dhe janë në vijë me standardet më të larta europiane për të drejtat të njeriut dhe qeverisjen e mirë,

Të vendosur që ta shohim statusin tonë të zgjidhur në mënyrë që t’i jipet popullit tonë qartësi mbi të ardhmen e vet, të shkohet përtej konflikteve të së kaluarës dhe të realizohet potenciali i plotë demokratik i shoqërisë sonë,

Duke nderuar të gjithë burrat dhe gratë që bënë sakrifica të mëdha për të ndërtuar një të ardhme më të mirë për Kosovën,

Ne, udhëheqësit e popullit tonë, të zgjedhur në mënyrë demokratike, nëpërmjet kësaj Deklarate shpallim Kosovën shtet të pavarur dhe sovran. Kjo shpallje pasqyron vullnetin e popullit tonë dhe është në pajtueshmëri të plotë me rekomandimet e të Dërguarit Special të Kombeve të Bashkuara, Martti Ahtisaari, dhe Propozimin e tij Gjithëpërfshirës për Zgjidhjen e Statusit të Kosovës.

Ne shpallim Kosovën një republikë demokratike, laike dhe multietnike, të udhëhequr nga parimet e jodiskriminimit dhe mbrojtes së barabartë sipas ligjit. Ne do të mbrojmë dhe promovojmë të drejtat e të gjitha komuniteteve në Kosovë dhe krijojmë kushtet e nevojshme për pjesëmarrjen e tyre efektive në proceset politike dhe vendimmarrëse.

Ne pranojmë plotësisht obligimet për Kosovën të përmbajtura në Planin e Ahtisarit, dhe mirëpresim kornizën që ai propozon për të udhëhequr Kosovën në vitet në vijim. Ne do të zbatojmë plotësisht ato obligime, përfshirë miratimin prioritar të legjislacionit të përfshirë në Aneksin XII të tij, veçanërisht atë që mbron dhe promovon të drejtat e komuniteteve dhe pjesëtarëve të tyre.

Ne do të miratojmë sa më shpejt që të jetë e mundshme një kushtetutë që mishëron zotimin tonë për të respektuar të drejtat e njeriut dhe liritë themelore të të gjithë qytetarëve tanë, posaçërisht ashtu siç definohen me Konventën Europiane për të Drejtat e Njeriut. Kushtetuta do të inkorporojë të gjitha parimet relevante të Planit të Ahtisaarit dhe do të miratohet nëpërmjet një procesi demokratik dhe të kujdesshëm.

Ne mirëpresim mbështetjen e vazhdueshme të bashkësisë ndërkombëtare për zhvillimin tonë demokratik nëpërmjet të pranive ndërkombëtare të themeluara në Kosovë në bazë të Rezolutës 1244 të Këshillit të Sigurimit të Kombeve të Bashkuara (1999). Ne ftojmë dhe mirëpresim një prani ndërkombëtare civile për të mbikëqyrur zbatimin e Planit të Ahtisaarit dhe një mision të sundimit të ligjit të udhëhequr nga Bashkimi Europian. Ne, po ashtu, ftojmë dhe mirëpresim NATO-n që të mbajë rolin udhëheqës në praninë ndërkombëtare ushtarake dhe të zbatojë përgjegjësitë që i janë dhënë sipas Rezolutës 1244 të Këshillit të Sigurimit të Kombeve të Bashkuara (1999) dhe Planit të Ahtisaarit, deri në atë kohë kur institucionet e Kosovës do të jenë në gjendje të marrin këto përgjegjësi. Ne do të bashkëpunojmë plotësisht më këto prani në Kosovë për të siguruar paqen, prosperitetin dhe stabilitetin në të ardhmen në Kosovë.

Për arsye të kulturës, gjeografisë dhe historisë, ne besojmë se e ardhmja jonë është në familjen europiane. Për këtë arsye, ne shpallim synimin tonë për të marrë të gjitha hapat e nevojshëm për të siguruar anëtarësim të plotë në Bashkimin Europian sapo që të jetë e mundshme dhe për të zbatuar reformat e kërkuara për integrim europian dhe euroatlantik.

Ne i shprehim mirënjohje Organizatës së Kombeve të Bashkuara për punën që ka bërë për të na ndihmuar në rimëkëmbjen dhe rindërtimin pas lufte dhe ndërtimin e institucioneve të demokracisë. Ne jemi të përkushtuar të punojmë në mënyrë konstruktive me Organizatën e Kombeve të Bashkuara gjersa ajo vazhdon punën e saj në periudhën në vijim.

Me pavarësinë vie detyra e anëtarësisë së përgjegjshme në bashkësinë ndërkombëtare. Ne e pranojmë plotësisht këtë detyrë dhe do t’i përmbahemi parimeve të Kartës së Kombeve të Bashkuara, Aktin Final të Helsinkit, akteve tjera të Organizatës për Siguri dhe Bashkëpunim në Europë, obligimeve ligjore ndërkombëtare dhe parimeve të marrëdhënieve të mira ndërkombëtare që shënojnë marrëdhëniet ndërmjet shteteve. Kosova do të ketë kufijtë e saj ndërkombëtarë ashtu siç janë paraparë në Aneksin VIII të Planit të Ahtisaarit, dhe do të respektojë plotësisht sovranitetin dhe integritetin territorial të të gjithë fqinjve tanë. Kosova, po ashtu, do të përmbahet nga kërcënimi apo përdorimi i forcës në cilëndo mënyrë që është jokonsistente me qëllimet e Kombeve të Bashkuara.

Ne, nëpërmjet kësaj Deklarate, marrim obligimet ndërkombëtare të Kosovës, përfshirë ato të arritura në emrin tonë nga Misioni i Administratës së Përkohshme të Kombeve të Bashkuara në Kosovë (UNMIK), si dhe obligimet e traktateve dhe obligimet tjera të ish-Republikës Socialiste Federative të Jugosllavisë ndaj të cilave obligohemi si ish-pjesë konstituive, përfshirë konventat e Vjenës për marrëdhëniet diplomatike dhe konsullore. Ne do të bashkëpunojmë plotësisht me Tribunalin Penal Ndërkombëtar për ish-Jugosllavinë. Ne synojmë të kërkojmë anëtarësim në organizatat ndërkombëtare, në të cilat Kosova do të synojë të kontribuojë për qëllime të paqes dhe stabilitetit ndërkombëtar.

Kosova shpall zotimin e saj ndaj paqes dhe stabilitetit në rajonin tonë të Europës Juglindore. Pavarësia jonë e sjell në fund procesin e shpërbërjes së dhunshme të Jugosllavisë. Gjersa ky proces ka qenë i dhembshëm, ne do të punojmë pa pushim për t’i kontribuar një pajtimi që do të lejonte Europën Juglindore të shkojë përtej konflikteve të së kaluarës dhe të farkojë lidhje të reja rajonale të bashkëpunimit. Për këtë arsye, do të punojmë së bashku me fqinjtë tanë për të avansuar të ardhmen tonë të përbashkët europiane.

Ne shprehim, në veçanti, dëshirën tonë për të vendosur marrëdhënie të mira me të gjithë fqinjtë tanë, përfshirë Republikën e Serbisë, me të cilën kemi marrëdhënie historike, tregtare dhe shoqërore, të cilat synojmë t’i zhvillojmë më tej në të ardhmen e afërt. Ne do të vazhdojmë përpjekjet tona për t’i kontribuar marrëdhënieve të fqinjësisë dhe bashkëpunimit me Republikën e Serbisë duke promovuar pajtimin ndërmjet popujve tanë.

Ne, nëpërmjet kësaj, afirmojmë në mënyrë të qartë, specifike dhe të parevokueshme se Kosova do të jetë ligjërisht e obliguar të plotësojë dispozitatat e përmbajtura në këtë Deklaratë, përshirë këtu veçanërisht obligimet e saj nga Plani i Ahtisaarit. Në të gjitha këto çështje, ne do të veprojmë në pajtueshmëri në parimet e së drejtës ndërkombëtare dhe rezolutat e Këshillit të Sigurimit të Kombeve të Bashkuara, përfshirë Rezolutën 1244 (1999). Ne shpallim publikisht se të gjitha shtetet kanë të drejtën të mbështeten në këtë Deklaratë, dhe i bëjmë apel të na ofrojnë përkrahjen dhe mbështetjen e tyre. / KultPlus.com

Qeveria e Kosovës ka mbajtur seancë solemne për nder të shpalljes së pavarësisë së shtetit të Kosovës.

Para kabinetit qeveritar, kryeministri Albin Kurti, tha se meritat për këtë 15-vjetor u takon qytetarëve. Ai tha se Kosova është shembull demokratik në Ballkan.

“Simbolikisht kemi zgjedhur ta hapim këtë ditë më mbledhje sepse kemi dashur të shprehim mesazhin se puna dhe festa do të shkojnë gjithmonë bashkë. Në këtë festë duhet të ja përkujtojmë njëri-tjetrin që kur të vijë 20 vjetori. Kosova është një shembull demokratik në një rajon problematik si Ballkani, kjo falë jush. Pavarësia jonë është rezoluta i historisë shekullore, kemi histori të gjatë bashkëjetese”./ Express / KultPlus.com