Autor: KultPlus

Zbulo trashëgiminë kulturore më pak të njohur, bukurinë natyrore dhe zonat historike të vendit më të fshehtë të Mesdheut, shkruan në reportazhin e saj për Shqipërinë revista e njohur britanike “SAGA”.

Joanne Johnstone, ekspertja e kësaj reviste për shtetet si Sllovenia, Kroacia, Mali i Zi dhe së fundmi Shqipëria bën një përshkrim të përgjithshëm të udhëtimit të saj në vendin tonë duke vlerësuar trashëgiminë historike, bukuritë natyrore dhe kulturën gastronomike.

Për shkak të peridhës komuniste, që e mbajti vendin të izoluar nga pjesa tjetër e botës, Shqipëria njihet shumë pak dhe pas rënies së këtij sistemi vendit i’u deshën rreth 20 vite që të arrinte nivelin e Evrops Lindore.

“Megjithatë, aspektet pozitive të kësaj situate izoluese janë krijimi i zonave ku duket se koha ka ndaluar, zona arkeologjike të harruara, fshatëra, plazhe dhe male që mund të rivalizojnë pjesën tjetër të Ballkanit”, thotë Johnstone.

“Për shkak të mungesës së kapaciteteve për të përballur fluksin e lartë të turistëve që vjen në periudhat kulmore të vitit, Ministria e Turizmit ka ndërmarrë masa të cilat do të mbështesin turizmin në të ardhmen, megjithatë edhe aktualisht gjërat janë duke ndryshuar dhe ju mund ta ndiheni këtë”, shkruhet në këtë reportazh.

“Gjatë përgatitjes së këtij udhëtimi, kontakti im në Shqipëri më pyeti se çfarë doja të shikoja. Une thashë të gjithë. Kështu që ne planifikuam të vizitonim Tiranën, Durrësin, Fierin, Vlorën, Himarën, Sarandën, Butrintin, Gjirokastrën, Beratin, Pgradecin dhe Ohrin (Maqedoni) dhe të gjitha këto në vetëm pesë ditë”, tregon Joanne Johnstone e habitur se si një vend kaq i vogël kishte kaq shumë për të vizituar.

Ajo që është mahnitëse, është se si qytetarët e Shqipërisë kanë hedhur një dritë të re në historinë e errët duke kthyer bunkeret në simbole të artit dhe muzeume me synimin për të krijuar një kujtesë të asaj që kanë vuajtur dhe mbijetuar.

“Ne shpresojmë të ndihmojmë shqiptarët që të pajtohen me historinë e tyre dhe të kaluarën. Nuk mund të ketë vetëdije për të tashmen dhe vetëbesim për të ardhmen pa njohur terrenin se ku janë mbjellur rrënjët e tua”, thotë Carlo Bollino, kuratori i “Bunk’Art”.

Por a është Shqipëria një vend i sigurt për t’u vizituar?

Sipas faqes së internetit “www.gov.uk”, “siguria publike është në përgjithësi e mirë, veçanërisht në Tiranë dhe shqiptarët janë shumë mikpritës ndaj vizitorëve”.

“Krim dhe dhunë ka në disa zona, por raportimet për krime specifike me shënjestër të huajt janë të rralla (…) Tensionet mes grupimeve fetare dhe shprehja ekstremizmave janë shumë të rralla, ndërsa mendimi për vendet perëndimore është jashtëzakonisht pozitiv”, thuhet në këtë faqe sipas citimeve të bëra nga gazetarja.

“Këtë e ndjeva edhe unë. Nuk u ndjeva e pasigurt dhe nuk isha aq e kujdesshme sa jam në Britani të Madhe. Ajo që më habiti më shumë ishte faktori fetar”, thekson Johnstone.

“Zonat arkeologjike të mbrojtura nga UNESKO ishin shumë mirë të mbajtura dhe të mrekullueshme si Butrinit, kalaja e Gjirokastrës dhe qyteti i dritareve, Berati”, vazhdon ajo.

Por nuk janë vetëm bukuritë natyrore dhe historike që mrekullojnë eksperten e udhëtimeve në Ballkan.

“Ushqimi shqiptar ishte i mirë. Dua të them, me të vërtetë shumë i mir!”, thotë gazetarja.

Kjo është shqipëria, vendi më i fshehtë mesdhetar, që tani ka ardhur koha t’i zbulohet të gjithve./

Nga Joanne Johnstone (Përgatiti Gent Sinani)

Kruja nuk është vetëm qyteti i historisë, traditës, identitetit por edhe gjurmëve shqiptare që sot ndiqen nga të rinjtë e vendit.

Valltarë të rinj kanë zgjedhur të performojnë në Muzeun e Krujës duke bashkuar të kaluarën me të sotmen.

Të rinjtë e sotëm të apasionuar pas muzikës folklorike dhe valleve tradicionale, kanë sjellë për vizitorët e pranishëm emocionet e atdhedashurisë.

Një moment i bukur i provave të tyre në ambientet e Muzeut. / KultPlus.com

Të diskriminuar nga maqedonasit dhe nga pushtetarët shqiptarë në Maqedoni, të injoruar nga Tirana dhe Prishtina, që nuk e shohin të arsyeshme të hapin një konsullatë nderi siç kanë hapur shumë vende tjera, intelektualët e Manastirit kanë vendosur të marrin fatin në duart e tyre.

Pak shpresë dhe optimizëm lidhur me fatin e shqiptarisë në Manastir ka kthyer shoqata joqeveritare me emrin simbolik “22 nëntori”. Kjo shoqatë, që tubon intelektualët shqiptarë, udhëhiqet nga aktivistja e sektorit civil në këtë qytet, Sibela Alimovska.

Për dallim prej shumë bashkëmoshatarëve të saj nga Manastiri, që vendosin të migrojnë në Amerikë dhe Australi, Sibela ka vendosur të qëndrojë në qytetin e të parëve. E jo vetëm kaq. Duke formuar shoqatën “22 nëntori”, ajo synon të krijojë një vatër rezistence ndaj tendencave për zhdukjen e gjurmëve shqiptare në qytetin e konsujve. / KultPlus.com

Disa organizata joqeveritare në Gjilan kanë protestuar për të kundërshtuar largimin e përmendores e cila njihet si “Ushtari i panjohur”, pasi siç u tha kjo po bëhet pa diskutimin me qytetarët.

Sipas organizatorëve, deri më tani janë mbledhur më shumë se 380 nënshkrime të qytetarëve që kërkojnë të mos ndryshohet lokacioni i skulpturës, pasi lëvizja e skulpturës disa metra më lartë është e paarsyeshme dhe denigron këtë monument kulturor.

Albesa Aliu përfaqësuese e organizatës “Change”, ka thënë se komuna e Gjilanit fare nuk është konsultuar me qytetarët por gjithashtu ka dështuar të dëshmojë se Kuvendi Komunal ka marrë vendim për zhvendosjen e monumenteve.

“Ne vlerësojmë se debati i ngritur si shprehje e pakënaqësisë për veprimin e komunës rreth mënyrës së zhvendosjes së monumentit të njohur për publikun si ushtari i panjohur, pavarësisht historikut të saj dhe kërkesa që e njëjta të kthehet në vendin ku ka qenë është legjitime dhe si e tillë kërkojmë që të trajtohet seriozisht në institucionet komunale. Diskutimet duhet të mirëpritet nga komuna derisa komunikimi duhet të bazohet mbi argumente, rreth adresimit të nevojave të komuniteteve dhe kurrsesi mbi gjuhën e nxitjes së urrejtjes“, ka thënë ajo.

Vlora Shabiu nga organizata joqeveritare “KAN”, ka thënë se përkundër kërkesave që kanë bërë në komunë për të pas qasje në procedurën dhe vendimet lidhur me këtë monument, një gjë e tillë nuk është lejuar nga komuna.

“Andaj ne si organizata kërkojmë nga institucionet e lartpërmendura të shqyrtojnë situatën e krijuar”, tha ajo, derisa një person pastaj tentoi ta sulmonte për t’ia ndërprerë fjalimin e saj por që u mbrojt nga protestuesit tjerë, të cilët derisa kërkuan ndihmën e policëve që gjendeshin aty, por të njëjtin nuk ndërhynë, duke lejuar që i riu të largohet nga aty.

Kurse, i moshuari, Sabit Idrizi për KosovaPress ka treguar se për këtë përmendore ka pasur dy variant për emërtimin e saj, serb dhe shqiptar.

Sipas tij, kjo përmendore nuk duhet të largohet pasi që është simbol i masakrës së Gjilanit pas luftës së asaj kohe ku u masakruan rreth 8 mijë e 700 njerëz.

“Varianta e serbëve u kon gjojase një femer dikun u mbyt e me ngritë këtë përmendore në emër të asaj femre, varianta e shqiptarëve ka qenë masakra e Gjilanit në atë kohë pas luftës që janë pre 8 mijë 700 njerëz, që janë masakruar, edhe askund nuk shënohet. Përmendorja është ngritur, emër si kanë vu nuk është hero i panjoftur, është qytetar që e simbolizon masakrën e Gjilanit në luftë që e mban trupin ndër sqetull, hiq mos shko ma larg, kqyre ka një trup edhe një këmbë masakra që u pre Gjilani…kjo përmendore nuk është dashtë me u hjek”, tha ai.

Protesta u organizua nga Kartoni i Kuq dhe Organizata kulturore “Varg e vijë”.

Përndryshe, organizatorët kanë thënë se e respektojnë dhe i gëzohen vendimit për sjelljen e skulpturës së Idriz Seferit, por sugjeruan që kësaj skulpture t’i gjendet një vend meritorë, e jo të jetë zëvendësuese e skulpturës së vjetër. / KultPlus.com

Disa fotografi në internet po e tregojnë masakrën që po ndodhë në Valbonën e bukur shqiptare.

Masakra e Valbonës, ku po shkatërrohet me shpejtësi çdo orë.

“Krimi ka këtë fytyrë dhe t’qeverive shqiptare t’neveritshmen yndyrë
Këto njolla në Valbonë nuk janë nishane, por vraja të thella e të pariparueshme në një nga visoret më të bukura shqiptare. Dhe për habi, qytetarët i humbin gjyqet kur kërkojnë ta ruajnë atdheun, edhe në emër të fëmijëve të gjyqtarëve, edhe në emër të fëmijëve të qeveritarëve. Edhe të vetmen gjë që na ka mbetur për krenari, natyra, po e sosim përditë. Né cilin vend qeveritë janë kundër popullit, në cilin vend gjykatat janë kundër popullit, në cilin vend një pjesë e “popullit” është kundër popullit, përveç diktaturave.
Poshtë diktatura më e urryer, e parasë së oligarkëve mbi shpinë të Atdheut!” ka shkruar në rrjetin social Facebook shkrimtarja Flutura Açka.

https://www.youtube.com/watch?v=MrXXR6BnJlk

Friends of Valbona ka publikuar fotografitë ku shihen punimet në këtë zonë. Ndërtimi në këtë zonë të bukur shqipe ka sjellë rreth 40 protesta në të kaluarën, përfshirë edhe koncerte për të ndalur krimin që po i bëhet kësaj bukurie natyrore. / KultPlus.com