Specialistët e laboratorit të restaurimit në Muzeun Kombëtar të Artit Mesjetar në Korçë, me përkushtim shpëtojnë çdo ditë thesaret e trashëgimisë sonë kulturore.
Në bazë të një marrëveshjeje mes Muzeut Kombëtar të Artit Mesjetar dhe Universitetit Politeknik Tiranë, në kuadër të projektit “Hartografimi dhe dokumentimi i zonave Arkeologjike, Lubonjë, Korçë”, specialistët janë duke u kujdesur për 7 ikona.
Ikonat aktualisht janë në proces konsolidimi dhe restaurimi.
MKMA shpërndau në rrjetet sociale imazhe nga puna që po kryhet mbi ikonën “Shën Maria me Krishtin në fron”. Ikona i përket vitit 1814, me origjinë mga kisha e Shën Marisë, Lubonjë, Korçë./atsh/ KultPlus.com
Jam shqiptar e kosovar: Zot e krenar, -Zot e bujar- mbi këtë Dhe, që e kam fe e përmbi fe: e kam Vatan! E kam Atdhe! Që gjysh stërgjysh, që brez pas brez, që gjithëmonë! Ti shkja thërret ti shkja bërtet, deri lart në retë: se jam barbar. Jo, s’jam! si bërtet ti, si buçet ti, ti, Mal i Zi.
Po Vendin tim e dua, lirinë e dua,- e s’dua zot mbi mua. Se jam këtu kur s’kish njeri, kur s’kish kufi as fqinjëri, as shkja të zi. Se jam këtu kur Mal i Zi ish Iliri: kur nga një det në tjatrin det isha zot vetë! Unë jam këtu nga moti kur vetë Zoti e bëri fushën fushë e malin mal. Unë jam këtu e do të jem -dem baba dem- sa mali të bëhet hi e hiri mal përsëri. / KultPlus.com
Kryeministri Edi Rama deklaron se mbi 238 mijë nxënës të arsimit bazë dhe atij të mesëm janë pajisur me tekstet shkollore falas për vitin shkollor 2024-2025.
Nga programi mbështetës i qeverisë përfitojnë të gjithë nxënësit e shkollave 9-vjeçare si dhe mbi 12 mijë nxënës nga 16 kategori të grupeve më në nevojë në gjimnaze.
Programi i librave falas synon të lehtësojë barrën financiare për mijëra familje shqiptare në prag të vitit të ri shkollor.
Pajisja e nxënësve me libra falas realizohet përmes financimit nga buxheti i shtetit me një fond prej 9 milion euro./ KultPlus.com
Emri i tij i vёrtetё ёshtё Mohandas Karamchand Gandhi. Lindi nё Indinё Perёndimore (Porbandar) dhe vdiq nё vitin 1948, nё Nju Delhi. Ishte njё personalitet i madh politik i Indisë, qё shprehte besimet e tij tё thella filozofike nё veprimin e tij politik.
Dedikoi tё gjithё jetёn e tij qёllimeve mё tё larta: pavarësisё sё Indisё, barazisё sё tё drejtave tё shtresave tё ultëta tё popullit, paqes midis induistëve dhe myslimanёve.
Indianёt qё kanё njё koncept shumё tё ndryshёm nga bota perёndimore, sa u pёrket shenjtorёve, e vendosin Gandin midis shenjtorёve tё tyre dhe pёr kёtё arsye e quajnё Mahatma( Maha Atma- shpirt i madh) dhe madje akoma kur jetonte.
Gandi konsiderohet si njëri nga personalitetet e rralla në historinë e humanizmit dhe politikës botërore. Ai ka lënë shumë mesazhe të fuqishme për njerëzimin, para se të vdiste.
Ju bëheni ajo që mendoni.
Aty ku ka dashuri, ka edhe jetë.
Mëso sikur do të jetosh përgjithmonë.
Shëndeti është pasuria jote e vërtetë.
Ruaj gjithmonë sensin e humorit.
Jeta jote është mesazhi yt.
Veprimet që bën, tregojnë prioritetet e tua.
Madhështia jonë qëndron në faktin, se jemi në gjendje të ndryshojmë/përmirësojmë vetveten.
Duhet të jesh gjithmonë në shërbim të të tjerëve.
Bëhu ndryshimi që dëshironi të shihni në botë / KultPlus.com
Ekspozita “Thesare të Muzeut Historik Kombëtar” vjen në Shkodër.
Në kuadër të sezonit turistik 2024, më datë 10 shtator, pranë sheshit përpara Bashkisë Shkodër, Muzeu Historik Kombëtar hap ekspozitën fotografike “Thesare të Muzeut Historik Kombëtar” në bashkëpunim me Bashkinë Shkodër dhe Drejtorinë Rajonale të Trashëgimisë Kulturore Shkodër.
Ekspozita përbëhet nga 27 stenda që shfaqin fotografi të objekteve të rralla nga pavijonet e Muzeut Historik Kombëtar. Kjo ekspozitë do të jetë si një udhëtim në kohë dhe një mundësi për t’u njohur nga afër me thesaret e trashëgimisë sonë kulturore.
Muzeu, bashkia dhe organizatorët e tjerë të aktivitetit ftuan artdashësit të marrin pjesë dhe të zbulojnë historinë dhe pasurinë kulturore të Shqipërisë./Tema/ KultPlus.com
Festivali i 81-të Ndërkombëtar i Filmit në Venecia filloi këtë vit me 21 filma ndërkombëtarë që konkurruan për çmimin kryesor ”Luani i artë”.
Kandidatët për ”Luanin e artë” vinin nga filmat e mbushur me yje deri te kinemaja artistike premtuese.
Luanin e artë e rrëmbeu filmi “The Room Next Door”.
Personazhet vdesin në filma çdo ditë. Nëse jeni duke parë një thriller të dhunshëm ose disa nga meditimet më makabre të Ingmar Bergman, mund të thoni se filmat, në një farë mënyre të madhe kolektive, nuk janë asgjë më pak se një provë për vdekjen. Megjithatë, është ende e rrallë të hasësh një dramë të ekranit të madh që rrëmben vdekjen për brirë, që e shikon atë në sy, që na kërkon të përballemi me realitetin e saj të frikshëm në çdo nivel, siç bën “The Room Next Door” lirik dhe emocionues i Pedro Almodóvar.
“The Room Next Door” është xhiruar me gjallëri (nga Eduard Grau), veçanërisht kur personazhet zhvendosen në një shtëpi pushimi me qira të stilit modernist në shtetin verior pranë Woodstock, NY. Kryesisht, megjithatë, është një film në të cilin Marta dhe Ingrid flasin për vdekjen, dhe Marta më në fund kupton se çfarë do të bëjë për të. Ajo nuk ka reshtur së dëshiruari për të jetuar. Por ajo është lodhur duke luftuar me frikën se do të vdesë.
Pedro Almodóvar, 74 vjeç, nuk është fatalist spanjoll, por filmat e tij janë bërë gjithnjë e më të përhumbur nga vdekja. Kjo është arsyeja pse komedia në to është djegur kryesisht. “The Room Next Door”, i nxitur nga njerëzimi përvëlues i performancës së Swinton, ju ngre lart dhe jep një katarsis. Filmi ka të bëjë me vdekjen, por në ndershmërinë e pandërprerë me të cilën përballet me këtë temë, është fuqimisht në anën e jetës. / KultPlus.com
Nicole Kidman fitoi çmimin për aktoren më të mirë në Festivalin e Filmit në Venecia për filmin “Babygirl”, por ajo e humbi ceremoninë për shkak të vdekjes së nënës së saj.
Në Babygirl, ku interpretojnë Nicole Kidman dhe Harris Dickinson, regjisorja Halina Reijn portretizon një aferë të turpshme zyre në të gjithë “kompleksitetin e saj të çrregullt” – është “lëvizëse” dhe “shumë qesharake”.
Ritmi i vrullshëm i marrëdhënies së tyre të mban në teh, por është gjithashtu prekëse të shohësh se sa e përlotur dhe e hutuar mund të jetë Romy, dhe është tepër qesharake të shohësh se si ajo ia del me bllof jetës së saj të dyfishtë. Megjithatë, në fund të fundit, Babygirl duket vërtet romantike, sepse Romy dhe Samuel po ecin drejt një kuptimi më të thellë të njëri-tjetrit. Sado i pakëndshëm që mund të jetë filmi, është e qartë se Reijn i do dhe i respekton personazhet e saj të dëmtuar, edhe nëse ata nuk janë të sigurt se si ndihen për veten e tyre. / KultPlus.com
Aktori Vincent Lindon me rolin në The Quiet Son, një film francez që eksploron dinamikën e familjes në mes të radikalizimit të ekstremizmit të djathtë, ka fituar çmimin për “Aktorin më të mirë” në Festivalin e 81-të të Filmit në Venecia.
Shkruar dhe drejtuar nga Delphine Coulin dhe Muriel Coulin, kasti merr pjesë Vincent Lindon, Benjamin Voisin dhe Stefan Crepon, shkruan KultPlus.
Thelbi i The Quiet Son nuk është marrëdhënia midis vëllezërve dhe motrave, e cila mbetet gjithmonë diçka që jeton dhe merr frymë, konturet e së cilës mund të ndryshojnë nga dita në ditë. Në vend të kësaj, motrat Coulin përqendrohen më shumë te Pierre, babai që mendon se duke punuar shumë dhe duke i trajtuar djemtë e tij me dashamirësi do ta bëjë disi njësinë e tyre të vogël familjare të imunizuar nga presioni i jashtëm ose tragjedia e mundshme. Për shkak se personazhi luhet nga Lindon imponues, kjo anë e historisë ndihet e mirë. Por, pas një inspektimi më të afërt, bëhet e qartë se shumë nga kjo varet nga performanca karizmatike dhe jo nga ajo që historia po na tregon në të vërtetë. / KultPlus.com
Të prekësh heshtjen tënde siç prek një send, të shohësh thellë në ata sy, ku dashuria hepohet si anije e të mos duash të jesh përherë me ty? Të ecësh me krahun mbi supet e tua e të harrosh oshtimën e kaltër, limonat mbi krye, peshkarexhat si zjarre të natës? Të jesh me ty, tok me ty të qeshësh e mos kuptosh se si perpiqet deti të dalë jashtë guaskës së vetvetes? Të jesh me ty? Të jesh me ty!/ KultPlus.com
“Jeta nuk do të thotë ta gjesh veten apo të gjesh çfarëdo tjetër”, thotë Bob Dylan, “Bëhet fjalë për krijimin e vetes”. Në moshën 78-vjeçare, muzikanti kalon në një fazë të re të vetë-krijimit me filmin intrigues, magjepsës, hutues e ndonjëherë ekzaltues – “Rolling Thunder Revue: A Bob Dylan Story by Martin Scorsese review” të regjisorit Martin Scorsese. Kjo do të thotë se Scorsese ka mbikëqyrur edhe editimin e arkivit filmik dhe se bashkëpunoi me Dylanin në një akt tjetër artistik të vetë-riformimit, shkruan kritiku i filmit Peter Bradshaw.
Filmi flet për turneun e koncerteve të quajtur “Rolling Thunder Revue”, që u mbajt në SHBA dhe në Kanada në vitin 1975 – turneu 57-ditësh ku trubaduri u shfaq me grim të bardhë në fytyrë e me një listë të jashtëzakonshme të akteve mbështetëse, ku përfshiheshin Joan Baez, Joni Mitchell, Roger McGuinn, Ronee Blakley, “Ramblin” Jack Elliott, Bob Neuwirth dhe violinistja Scarlet Rivera. Vendet ku luanin nuk ishin arena masive; ishin salla dhe hapësira të vogla, me publicitet ndonjëherë të kufizuar në fletushka të shpërndara gjatë ditës tek banorët e qyteteve të vogla, në të cilat autobusi i turneut i stilit të Ken Keseyt do të kalonte me Dylanin e buzëqeshur në timon. Mundohuni të paramendoni se po ndodh tani.
Çfarë nënkuptonte për Dylanin, që të udhëheq këtë ngjarje në një si thashetheme muzikore që gjarpëronte nëpër Amerikën që po e merrte veten nga turpi i skandalit Watergate dhe që po bëhej gati për festimin e 200-vjetorit të pavarësisë?
“Ishte aq moti sa që nuk kisha lindur”, thotë sot Dylani ironik, duke ngritur supet. Të gjitha paraqitjet e tij në intervista janë shumë qesharake, me zë të thatë si bari i prerisë.
Filmi nuk mëton të na tregojë qartazi se për çfarë bëhet fjalë. Ka diçka të çuditshme dhe djallëzore aty. Pamjet e koncerteve dhe të prapaskenave duket se janë marrë nga i njëjti arkiv i materialeve që formoi bazën e filmit të gjatë dhe të dështuar të vitit 1978 – për këtë turne, “Renaldo and Clara” – të cilin ai shkroi me të ndjerin Sam Shepard (i cili është intervistuar në dokumentar). Ashtu si ai film, “Rolling Thunder Revue” ka disa karaktere që nuk mund të jenë bash faktikë. Xhirimet i atribuohen filmbërësit dispeptik i cili në fakt është artisti i performancave dhe komediani Martin Von Haselberg, bashkëshorti i aktores dhe këngëtares Bette Midler. Një politikan i caktuar është intervistuar dhe ju mund të thoni: “Prit, ai djalë duket si aktori Michael Murphy”! Dhe është aktori Michael Murphy. Mund të jetë kjo një komedi moderne dell’arte në të cilën, me ndihmën diskrete të Scorseses, Dylan po tërhiqet prapa maskave që mund ta lejojnë të tregojë një të vërtetë më të madhe?
Mbase po. Scorsese hedh më shumë aludime me copëzat nga filmat që në një mënyrë kanë të bëjnë me performancat skenike: “The Vanishing Lady” (1893) nga Georges Melies, “Children of Paradise” (1945) nga Marcel Carnes dhe “Latcho Drom” (1993) nga Tony Gatlif. Ndonjëherë gjysmë-kujtimi kreativ është pak i errët dhe ka raste kur unë do ta kisha bërë më shumë si një realizëm të drejtpërdrejtë dokumentar. Por, nuk bën të ankohem kur gjithë kjo është aq e mahnitshme, si një kapsulë kohore dhe si një shfaqje unike me Dylanin dhe me paraqitje të lavdishme nga Baez, Mitchell dhe gjithashtu Patti Smith – e cila në fakt nuk ishte anëtare i turneut “Rolling Thunder”.
Allen Ginsberg, një tjetër figurë me rëndësi e viteve 1970, shfaqet në turne, sa egoist aq edhe i nënshtruar nga rëndësia e Dylanit. Është një intervistë e mirë me aktoren Sharon Stone, e cila si e re duket se ka qenë pak në turneun me “Rolling Thunder”. Ajo është intervistuar për përvojat e saj – përfshirë shpërthimin në lot kur zbuloi se kënga e Dylanit, “Just Like a Woman”, përkundër fjalëve që ai i kishte thënë, nuk i dedikohej asaj!? A mund të ndodhte kjo meqë ishte e vetmja femër e re, në udhëtim tek e cila Bob mund ta përdorte atë varg?
Pjesa më emocionale e filmit është kënga e Dylanit, “Hurricane”, për boksierin Rubin “Hurricane” Carter i cili u burgos gabimisht për një vrasje. Kjo këngë dhe turneu “Rolling Thunder” ishin pjesë e rëndësishme e momentumit që e përmbysi dënimin për Carterin – megjithëse nuk do të lirohej edhe për 10 vjet.
Për fund, kjo është një përvojë e mrekullueshme, që të zhyt përsëri në vitet 1970. Ka pasion aty. E, pa marrë parasysh se sa kaotike apo të zymta bëhen gjërat, askush nuk ka dyshime se muzika ka rëndësi. /KultPlus.com
Ministri i Ekonomisë, Kulturës e Inovacionit, Blendi Gonxhja ka publikuar detaje nga eventet që do të mbahen për nisjen e Javës Kulturore Holandeze në vendin tonë që do të zhvillohet nga data 7 deri më 11 shtator.
Sipas tij, Holanda e njohur për kulturën e saj të lëvizjes me biçikletë, tulipanët, kinematografinë e pasur, inovacionin dhe dizajnin si dhe artin që sfidon kohën dhe një sërë traditash të tjera, do të zër vend në Javën Kulturore Holandaze që nis në vendin tonë.
“Përgatituni të përjetoni magjinë e kulturës holandeze gjatë Javës Kulturore Holandeze nga 7-11 Shtator! Një vend i njohur për tulipanët, kinematografinë e pasur, inovacionin dhe dizajnin si dhe artin që sfidon kohën, Holanda është një thesar i vërtetë kulturor. Për të gjithë ata që nuk e kanë vizituar ndonjëherë, tani keni mundësinë të prekni një copëz të saj këtu, në Shqipëri”, shkroi ministri në rrjete sociale.
Gonxhja tha se, java do të sjellë aktivitete të shumta të shtrira në qytetin e Tiranës, Korçës dhe Shkodrës. Nga ekspozita imersive e Van Gogh që ju zhyt në botën e ngjyrave dhe penelatave të tij, shfaqje filmash dhe sesione Q&A me regjisorë, workshop-e kreative, ekspozita të ndryshme, një panair dhe një festival jazz që do t’ju mbajnë të frymëzuar gjatë gjithë javës.
Sipas kalendarit të aktiviteteve, rrugëtimi i këtij eventi nis nga kjo e shtunë, deri më datë 11 Shtator, ku aktivitetet e shumta të menduara për këtë javë do të shtrihen nga Tirana në Shkodër e Korçë.
Në galerinë e Artit Dixhital Korçë nga datat 8 deri më 11 Shtator do të hapet për publikun një ekspozitë e veçantë dhe gjithëpërfshirëse që pasqyron jetën dhe veprën gjeniale të Vincent van Gogh. Përmes projeksioneve, tingujve evokues dhe skenave reale nga veprat e tij, do të përjetoni artin e tij në një mënyrë të papërshkrueshme.
Kurse në Tiranë, nga data 8 deri më 22 Shtator, do të mbahet tek sheshi “Skënderbe” ekspozita “Ëorld Press Photo 2022”, përkushtuar lirisë së medias dhe të shprehjes. Ekspozita paraqet fotoreportazhet dhe fotografitë dokumentare më të mira dhe më të rëndësishme nga konkursi i 67-të i “World Press Photo”.
Në bashkëpunim me Institutin e Medias Shqiptare, do të organizohet edhe një workshop mbi karikaturat politike për studentët, dizajnerët e rinj dhe artistët. Ky event do të udhëhiqet nga Tjeerd Royaards, një karikaturist holandez i njohur dhe i nderuar ndërkombëtarisht, me një karrierë që përfshin botimin e punës së tij në media prestigjioze si The Washington Post, The New York Times, BBC, CNN, The Guardian, Le Monde, France 24, dhe Politico Europe. Një mundësi e shkëlqyer për të mësuar teknikat dhe strategjitë e përdorura në këtë ar, workshop-i është i hapur për të gjithë.
Mes eventeve të shumta, nuk mund të mungonte një seminar veçantë njëditor mbi ndërtimin e një infrastrukture të sigurt dhe gjithëpërfshirëse për biçikletat. E për të mbajtur këtë aktivitet, pa dyshim që nuk mund të zgjidhej një qytet tjetër përveç se Shkodrës, e njohur po ashtu për përdorimin në masë të biçikletave.
Ngjarja përmbyllëse e javës kulturore holandeze do të ofrojë një performancë të veçantë nga grupi jazz holandez Roaring Cats në The Cloud, Tiranë. Ky koncert është pjesë e edicionit të tretë të Festivalit Gjon Mili Jazz & Blues, i cili ndriçon trashëgiminë e Gjon Mili dhe kulturën jazz shqiptare. Performanca e Roaring Cats do të sjellë një bashkëpunim të veçantë mes kulturës jazz holandeze dhe asaj shqiptare, duke ofruar një mundësi të shkëlqyer për audiencën shqiptare për të eksploruar trashëgiminë muzikore holandeze dhe për të ndjerë energjinë e jazzit ndërkombëtar në një mjedis unik.
Java Kulturore Holandeze, pjesë e Javëve Kulturore Ndërkombëtare janë platformë e Ministrisë së Ekonomisë, Kulturës dhe Inovacionit që sjell një seri eventesh, të cilat kanë si qëllim njohjen dhe përqafimin nga publiku të kulturave të ndryshme botërore./ KultPlus.com
Sot bëhen një muaj nga ikja në amshim e dr. Kenneth J. Oberembtit, ish-drejtor i përkohshëm i Bibliotekës Kombëtare dhe Universitare të Kosovës, nga 14 tetor 2002 deri më 11 mars 2003.
Kujtimi për dr. Kenin është kujtimi për njeriu që librit dhe bibliotekës ia kushtoi një jetë të tërë, jo vetëm brenda Shteteve të Bashkuara të Amerikës, por duke dhënë kontribute të pakursyera edhe në shumë shtete të botës, ku bibliotekat kanë pasur nevojë për mendimet dhe drejtimin e tij.
Dr. Keni ishte ngulmues me idetë e tij. I qartë me një vizion të ndritur për librin dhe bibliotekën. Në çdo projekt që e udhëhiqte ishte insistues, sidomos për zhvillimet e reja në fushën e teknologjisë së komunikimit, duke i dhënë përparësi dijeve më të avancuara, sipas standardeve ndërkombëtare. I afërt me njerëzit. I drejtë në gjykime dhe vlerësime. Parimor dhe këmbëngulës në qëndrimet e tij. Mik i madh i shqiptarëve dhe i Kosovës.
Me dr. Kenin për herë të parë u takova më 13 janar 2003, në Bibliotekën Kombëtare dhe Universitare të Kosovës. Ishte ditë e hënë kur filloja punën e drejtuesit të këtij institucioni. Atë ditë binte shi pandërprerë. Bashkë me të dhe me Besim Kokollarin, ish – asistent i Dr. Kenit, përpiqeshim ta gjenim një “strehë” të sigurt, për ta mbajtur mbledhjen e parë, meqë nga kupolat e prishura pikat e shiut binin pandërprerë mbi kokat tona…
Nga Dr. Keni kam mësuar se si udhëhiqet Biblioteka me të gjitha shërbimet e saj, si pasurohen e zhvillohen koleksionet, si bëhet modernizimi i saj me sistemin e automatizuar bibliotekar, cilat janë nevojat kryesore të lexuesve, pastaj për miqtë e librit e të bibliotekës, për rëndësinë e bashkëpunimit ndërkombëtar e për shumë projekte kombëtare dhe ndërkombëtare.
Dr. Keni ishte dijetar i cili me njohuritë e tij kishte me fushën e bibliotekarisë. Përvoja e tij shumëvjeçare në udhëheqjen e bibliotekave të ndryshme në shumë vende të botës dëshmonte se ai ishte mjështër në hartimin e strategjive për zhvillimin e bibliotekave.
Miqtë e tij në Kosovë do ta kujtojnë gjithmonë Dr. Kenin, si një njeri që e karakterizonin virtyte të shumta, një personalitet i veçantë që me dijen dhe përvojën që e kishte, i motivonte të tjerët për punë, duke u mbështetur në vlera.
Vdekja e tij, në radhë të parë, është një humbje për familjen, por edhe për miqtë e tij kudo që i kishte.
***
Parathënia ime në librin “Plani Strategjik për Bibliotekën Kombëtare dhe për Bibliotekën Universitare”, të autorit Kenneth J. Oberembt, botues BKUK dhe Zyra Amerikane, Prishtinë, 2004)
Plani Strategjik për Bibliotekën Kombëtare dhe për Bibliotekën Universitare, i hartuar nga dr. Kenneth J. Oberembt (ish-drejtor i përkohshëm i Bibliotekës Kombëtare dhe Universitare të Kosovës), paraqet një kontribut të çmueshëm dhe me interes të veçantë për misionin e bibliotekave në Kosovë, si dhe për zhvillimin, funksionalizimin dhe përparimin e veprimtarisë bibliotekare në përgjithësi.
Përmes këtij plani prezantohen ide dhe koncepte të qëndrueshme që kanë të bëjnë me strategjinë, prioritetet dhe objektivat e bibliotekarisë në Kosovë, nga faktorët e modifikimit deri te proceset e zhvillimit. Synimi është i qartë dhe faktet e shpjeguara këtu dëshmojnë përcaktimin e metodave produktive dhe dinamikën kohore, nga mund të fillohet realizimi konkret i këtij plani.
Çështje parësore dhe pikë referimi bëhet pikërisht mundësia e ndarjes dhe e zhvillimit të Bibliotekës Universitare nga Biblioteka Kombëtare. Dr. Oberembt këtë strategji e projekton përbrenda perspektivës së caktuar, duke i konkretizuar rezultatet, herën e parë përmes strategjisë afatgjate të zhvillimit (Biblioteka Kombëtare e Kosovës) dhe herën e dytë, përmes planit të hartuar për themelimin e institucionit të ri (Biblioteka Qendrore e Universitetit të Prishtinës). Dhe thelbi i argumentit është i qartë: Biblioteka Kombëtare shikon nga e kaluara, ndërsa Biblioteka Universitare nga e ardhmja.
Plani Strategjik për Bibliotekën Kombëtare dhe për Bibliotekën Universitare përpos që i trajton problemet kryesore në sferën e bibliotekarisë në Kosovë, duke dhënë fakte dhe argumente për gjendjen ekzistuese, gjithashtu sjell vizione dhe pikëpamje karakteristike edhe për standartet kulturore, duke iu përshtatur situatës aktuale dhe duke synuar vizionin për të ardhmen. Pra, ky plan mund të cilësohet lirisht si një dokument teorik i mbështetur në praktikat moderne bibliotekare të botës, në të cilin përcaktohen qartë dhe rrjedhshëm metodat më funksionale të konkretizimit të këtij projekti me rendësi për zhvillimin dhe përparimin e bibliotekarisë në Kosovë.
Në këtë pikë të shikimit, Plani Strategjik për Bibliotekën Kombëtare dhe Bibliotekën Universitare projektohet në dy rrafshe: Plani Strategjik për Bibliotekën Kombëtare të Kosovës dhe Plani Strategjik për Bibliotekën Qëndrore të Universitetit të Prishtinës. Në këtë mënyrë, dr. Oberembt, ofron informacione interesante dhe me vlerë duke pasqyruar realitetin e bibliotekarisë në Kosovë, si dhe duke i artikuluar kërkesat thelbësore dhe domosdoshmërinë faktike për ndryshime të dobishme në favor të përmirësimit të shumë sferave nga fusha e bibliotekarisë.
Këtu problematika esenciale shtresohet dhe strukturohet përbrenda temë dilemave që kanë të bëjnë me implementimin e këtij plani: misioni i bibliotekave, legjislacioni, pasurimi i fondeve, zhvillimi i koleksioneve të veçanta, përsosmëria e shërbimeve, teknologjia moderne e informacionit dhe komunikimit, bashkëpunimi ndërbibliotekar, kujtesa e Kosovës etj.
Prandaj, njohja e problemeve esenciale si dhe përvoja e gjatë e dr. Oberembtit në fushën e bibliotekarisë, bën që propozimet e tij të ilustruara edhe me shembuj konkretë përbrenda perspektivës së caktuar kohore, t’i përgjigjen kërkesave dhe nevojave, të cilat i shtron sot bibliotekaria në Kosovë. Në radhë të parë, duke reflektuar përmirësime në shumë drejtime, përmes reformave transformuese sipas standarteve bashkëkohore dhe herën tjetër duke propozuar aplikimin e sistemeve të reja të komunikimit, gjithnjë për të forcuar rolin dhe funksionin institucional, ndër të tjera, edhe në ruajtjen dhe pasurimin e trashëgimisë kulturore të Kosovës.
Plani strategjik është më shumë se një sprovë e propozuar dhe e diskutuar, madje edhe për vetëdijesimin e opinionit kulturor të Kosovës dhe të një varg të mekanizimave vendimmarrës, që i lëvizin përpara proceset demokratike në investimin dhe në zhvillimin e kulturës. Pra, është diçka më tepër. Është një udhëzim sesi hyhet në proceset e zhvillimit dhe të përparimit të dijes, përmes kulturës, edukimit, botës së librit, teknologjisë së informacionit dhe komunikimit, duke projektuar një vizion të ri për misionin dhe rolin e bibliotekave në shekullin XXI.
Me rastin e botimit të këtij libri, Biblioteka Kombëtare dhe Universitare e Kosovës u shpreh mirënjohje të veçantë Zyrës së Shteteve të Bashkuara të Amerikës në Prishtinës, si dhe ekspertit amerikan dr. Kenneth J. Oberembt, për ndihmën dhe kontributin e dhënë në vazhdimësi, duke shpresuar se bashkëpunimi ynë i frytshëm do të thellohet edhe më tutje me projekte të reja në të ardhmen.
Biografia:
Dr. Kenneth J. Oberembt ka shërbyer si drejtor i përkohshëm i Bibliotekës Kombëtare dhe Universitare të Kosovës prej 14 tetorit të vitit 2002 deri më 11 mars 2003, dhe më pas deri më 31 korrik 2003 si këshilltar i lartë i ministrit të Arsimit, Shkencës dhe Teknologjisë për zhvillimin e bibliotekave (Kosovë). Para kësaj, dr. Oberembt ka punuar në botën arabe 12 vjet radhazi, në fushën e bibliotekarisë, 6 vjet në Universitetin Amerikan në Kajro (Egjipt), dhe 6 vjet të tjerë në Universitetin Mbreti Fahd të Derivateve të Naftës dhe Mineraleve në Dhahran (Arabia Saudite).
Dr. Oberembt ka marrë titullin Ph.D. në anglisht nga Universiteti i Ajovës, Ajova (SHBA), dhe titullin Magjistër i shkencave të bibliotekarisë nga Universiteti Kolumbia, Nju Jork (SHBA).
Vdiq më 7 gusht 2024 në Renton, Uashington. / KultPlus.com
Kryeministri i Kosovës, Albin Kurti, ka marrë pjesë sot në përurimin e shtatores së presidentit Ibrahim Rugova në qytetin e Podujevës me rastin e 34 vjetorit të Kushtetutës së Kaçanikut.
Kurti ka shkruar se derisa Anton Çetta i kishte prirë pajtimit të gjaqeve dhe Adem Demaçi ishte kthyer tek populli pas 28 vitesh burg, Ibrahim Rugova kishte udhëhequr Alternativë për pavarësi me një rezistencë paqësore.
Kryeministri ka përmendur edhe Ejup Statovcin e Ukshin Hotin dhe emra të tjerë që kanë dhënë kontribut të jashtëzakonshëm në rrugën e Kosovës për liri dhe pavarësi.
Tutje kreu i VV-së ka shkruar se me fjalën e qetë dhe të urtë dhe me punëne vazhdueshme dhe durim, Rugova kishte përfaqësuar politikat e tij në Kosovës, për liri, demokraci dhe pavarësi.
Shkrimi i plotë i Kurtit:
Në përvjetorin e 34-të të Kushtetutës së Republikës së Parë të Kosovës, e njohur si Kushtetuta e Kaçanikut, sot me 7 shtator, në Podujevë u zbulua shtatorja e Dr. Ibrahim Rugovës, Presidentit të parë të Kosovës (24 maj 1992) dhe njëkohësisht Presidentit të parë të Kosovës së çliruar (4 shkurt 2002).
Fillimi i dekadës së fundit të shekullit të kaluar ishte i rëndë dhe i vështirë, por: Dr. Gazmend Zajmi ishte në krye të hartimit të kushtetutës për mëvetësi me vetëvendosje; Anton Çetta i printe pajtimit të gjaqeve mes shqiptarëve; Adem Demaçi u kthye te populli i tij pas gjithsej 28 vite nëpër burgje; Dr. Ibrahim Rugova e udhëhiqte Alternativën për pavarësi me një rezistencë paqësore; Dr. Ejup Statovci ishte në krye të rimbëkëmbjes së Universitetit të Prishtinës; Ukshin Hoti organizonte demonstrata popullore e shkruante për demokraci autentike; Akademik Rexhep Qosja dominonte debatet historike dhe frymëzonte rininë patriotike; etj. E në fillim të asaj dekade, pasi ishin kthyer nga stërvitjet ushtarake në Shqipëri, Adem Jashari, Zahir Pajaziti dhe Sali Çekaj organizonin grupet e armatosura drejt formimit të UÇK-së.
Qëndresa shoqërore që i parapriu protestave aktive studentore dhe luftës së lavdishme çlirimtare, kërkonte angazhim intelektual e kontribut qytetar, përkushtim kombëtar e nivel kulturor, vetëdije politike e afirmim ndërkombëtar. Me fjalën e qetë dhe të urtë, me punën e vazhdueshme dhe të durueshme, Presidenti Rugova përfaqësonte politikat e tij në Kosovë dhe jashtë saj, për liri, për demokraci dhe për pavarësi.
Kjo shtatore e Presidentit Ibrahim Rugova në Podujevë, e realizuar si vepër arti nga skulptori Gëzim Muriqi, e pasuron ikonografinë e shesheve tona publike në nderim dhe kujtim për të./ KultPlus.com
Shfaqja më e mirë, regjia më e mirë, roli më i mirë episodik dhe roli më i mirë dytësor, janë katër çmimet që kanë shkuar vetëm për shfaqjen “Tartufi” të Teatrit të Gjilanit, në regji të Qëndrim Rijanit.
Krahas Qëndrim Rijanit, Alban Shahiqit dhe Aurita Agushit, në Festivalin e Teatrove në Ferizaj janë shpërblyer edhe Yllka Brada për kostumografinë më të mirë në shfaqjet “Kamarja e turpit” të Teatrit Kombëtar të Kosovës dhe “Tartufi” të Teatrit të Gjilanit.
Ndërkaq çmimi special i jurisë është ndarë për shfaqjen “Togeri i Inishmorit” të teatrit “Adriana”. “Yll në ardhje” i është ndarë Albina Krasniqit për rolin në shfaqjen “Charles III. Çmimi “Ismail Rama” për aktorin më të mirë iu nda Ernest Malzogut për rolin në “Audienca”. Çmimin “Adriana” për aktoren më të mirë e ka marrë Suela Bako për rolin në shfaqjen “Çifti i hapur” nën regji të Sulejman Rushtit, produksion i Teatrit të Gostivarit.
Çmimi i skenografisë më të mirë ka shkuar për Enes Dearin e Teatrit Shqiptar të Shkupit. /rtv21/KultPlus.com
“Ka vetëm një gjë që e bën të pamundur një ëndërr që të arrihet: frika nga dështimi”.
2. “Gjithkush duket se ka një ide të qartë se si njerëzit e tjerë duhet të udhëheqin jetën e tyre, por nuk kanëasnjë në lidhje me atëtë tij ose të saj”.
3. “Mos e humbni kohën tuaj me shpjegime: njerëzit dëgjojnë vetëm ato që duan të dëgjojnë”.
4. “Miqtë tanë të vërtetë janë ata që janë me ne kur ndodhin gjërat e mira. Ata na brohorasin dhe janë të kënaqur nga triumfet tona. Shokët e rremë shfaqen vetëm në periudha të vështira, me fytyrat e tyre të trishtueshme, mbështetëse, kur, në të vërtetë, vuajtja jonë po shërben për t’i ngushëlluar ata për jetën e tyre të mjerueshme”.
5. “Dhe, kur ju doni diçka, i gjithë universi komploton ndaj jush për ta arritur atë”.
6. “Sekreti i jetës, sidoqoftë, është të rrëzoheni shtatë herë dhe të ngriheni tetë herë.”
7. “Mos harroni se kudo që të jetë zemra juaj, atje do të gjeni thesarin tuaj”.
8. “Askush nuk humbet asnjërin, sepse askush nuk zotëron asnjërin. Kjo është përvoja e vërtetë e lirisë: të kesh gjënë më të rëndësishme në botë pa e zotëruar atë”.
9. “Cila është gënjeshtra më e madhe në botë? … Ështëkjo: që në një moment të caktuar të jetës sonë, ne e humbim kontrollin e asaj që po ndodh me ne, dhe jeta jonë kontrollohet nga fati”.
10. “Dy testet më të vështira në rrugën shpirtërore janë durimi për të pritur momentin e duhur dhe guximi për të mos u zhgënjyer me ato që hasim”.
11.”Ju keni dy zgjedhje: për të kontrolluar mendjen tuaj ose për të lënë mendjen tuaj t’iu kontrollojë ju”.
12. “Gjithçka që ndodh një herë nuk mund të ndodhë më. Por gjithçka që ndodh dy here, me siguri do të ndodh edhe për herë të tretë”.
13. “Ji i çmendur! Por mësoni si të jeni të çmendur pa qenë në qendër të vëmendjes. Jini të guximshëm për të jetuar ndryshe”.
14. “Pasioni e bën një person të ndalojë së ngrëni, të flejë, të punojë, të ndjehet në paqe. Shumë njerëz janë të frikësuar sepse, kur ai shfaqet, ai shkatërron të gjitha gjërat e vjetra që gjen në rrugën e vet”.
15. “Nëse e doni dikë, duhet të jeni të gatshëm për t’i lënë ato të lirë”.
16. “Pra, unë ju dua sepse i gjithë universi komplotoi të më ndihmojë që t’ju gjej.”
17. “Një fëmijë mund t’i mësojë një të rrituri tre gjëra: të jetë i lumtur pa asnjë arsye, të jetë gjithmonë i zënë me diçka dhe të dijë të kërkojë me gjithë fuqinë e tij atë që ai dëshiron”.
18. “Pranoni atë që ju ofron jeta dhe përpiquni të pini nga çdo kupë. Të gjitha verërat duhet të shijohen; disa duhet të pihen vetëm pak, por me të tjerët, pini të tërë shishen”.
19. “Të presësh është e dhimbshme. Harrimi është i dhimbshëm. Por të mos dish se çfarë të bësh është lloji më i keq i vuajtjeve”.
20. “Kjo është ajo që ne e quajmë dashuri. Kur ju duan, ju mund të bëni cdo do gjë në krijim. Kur ju duan, nuk ka nevojë aspak të kuptoni se çfarë po ndodh, sepse gjithçka ndodh brenda jush”.
21. “Dashuria është një forcë e pazbutshme. Kur përpiqemi ta kontrollojmë, ajo na shkatërron. Kur përpiqemi ta burgosim, ajo na skllavëron. Kur përpiqemi ta kuptojmë, ajo na lë të ndjehemi të humbur dhe konfuz”.
22. “Asgjë në botë nuk është kurrë plotësisht e gabuar. Edhe një orë e ngecur është e saktë dy herë në ditë. ”
23. “Në jetën reale, dashuria duhet të jetë e mundur. Edhe nëse nuk kthehet menjëherë, dashuria mund të mbijetojë vetëm kur ekziston shpresa se do të jeni në gjendje të fitoni mbi personin që dëshironi”.
24. “Në çdo moment të jetës sonë, të gjithë kemi një këmbë në një përrallë dhe tjetrën në humnerë”.
25. “Gjërat e thjeshta janë gjithashtu gjërat më të jashtëzakonshme, dhe vetëm të mençurit mund t’i shohin ato”.
26. “Mos dëgjoni komentet e këqija të atyre miqve, të cilët, duke mos marrë asnjë rrezik vetë, mund të shohin vetëm dështimet e njerëzve të tjerë.”
27. “Unë nuk jetoj as në të kaluarën time, as në të ardhmen time. Unë jam i interesuar vetëm për të tashmen. Nëse mund të përqendroheni gjithmonë në të tashmen, do të jeni një burrë i lumtur. Jeta do të jetë një festë për ju, një festival i shkëlqyeshëm, sepse jeta është momenti kur po jetojmë tani”.
28. “Askush prej nesh nuk e di se çfarë mund të ndodhë edhe në minutën tjetër, megjithatë, ne përsëri vazhdojmë përpara. Sepse ne besojmë. Sepse kemi Besim”.
29. “Kur duam, gjithmonë përpiqemi të bëhemi më të mirë se sa jemi. Kur përpiqemi të bëhemi më mirë seç jemi, gjithçka rreth nesh bëhet edhe më e mirë”.
30. “Fal, por mos harro, ose do të lëndohesh përsëri. Falja ndryshon perspektivat. Të harruarit humbet mësimin”.
31. “Disa gjëra në jetë thjesht duhet të përjetohen- dhe kurrë nuk shpjegohen. Dashuria është një gjë e tillë”.
32. “Mos u shqetësoni duke u munduar për të shpjeguar emocionet e tua. Jetoni gjithçka aq intensivisht sa mundeni dhe mbani gjithçka që ndjeni si dhuratë nga Zoti. Mënyra më e mirë për të shkatërruar urën midis të dukshmes dhe të padukshmes është duke provuar të shpjegoni emocionet tuaja”.
33. “Një njeri dashurohet sepse e dashuroni. Asnjë arsye nuk është e nevojshme për të dashuruar”.
34. “Kur çdo ditë është e njëjtë me ditën tjetër, kjo është për shkak se njerëzit nuk arrijnë të njohin gjërat e mira që ndodhin në jetën e tyre çdo ditë që dielli lind”.
35. “Kur e presim më së paku, jeta na bën një sfidë të provojmë guximin dhe gatishmërinë tonë për të ndryshuar; në një moment të tillë, nuk ka asnjë kuptim të pretendosh se asgjë nuk ka ndodhur ose të themi se ne nuk jemi akoma të gatshëm. Sfida nuk do të presë. Jeta nuk shikon prapa”.
36. “Është mundësia për të realizuar një ëndërr ajo që e bën jetën interesante”.
37. “Unë mund të zgjedh ose të jem viktimë e botës ose një aventurier në kërkim të thesarit. Është e gjitha një pyetje se si e shoh jetën time”.
38. “Ndonjëherë, ne jemi aq të lidhur me mënyrën tonë të të jetuarit, saqë ne hedhim poshtë mundësi të mrekullueshme thjesht sepse nuk dimë se çfarë të bëjmë me të”.
39. “Nëse filloni të premtoni ato që nuk keni ende, do të humbni dëshirën për të punuar drejt arritjes së saj”.
40. “Mos u frikësoni nga mendimet e njerëzve të tjerë. Vetëm mediokriteti është i sigurt në vetvete, prandaj merrni rreziqe dhe bëni atë që dëshironi të bëni”.
41. “Kurdo që të doni të arrini diçka, mbajini sytë hapur, përqendrohuni dhe sigurohuni që e dini saktësisht se çfarë dëshironi. Askush nuk mund të arrijë objektivin me sy të mbyllur”.
Presidentja, Vjosa Osmani pas zbulimit të shtatores së Ibrahim Rugovës në Podujevë ka folur edhe për protestat e serbëve në pikat kufitare që lidhin Kosovën e Serbinë, ku tha se prapa bllokadave në pikat kufitare me Kosovën, qëndron shteti serb.
Presidentja i ka bërë thirrje bashkësisë ndërkombëtare që të dalë me qëndrim publik për shkeljet e vazhdueshme të Serbisë.
“Në kundërshtim me të gjitha marrëveshjes e Brukselit të cilat janë arritur në këto 12 vite, Serbia edhe njëherë tregon se nuk i intereson lëvizja e lirë, fqinjësia e mirë, përkundrazi ajo po vazhdon të shfrytëzojë banda kriminale për të kryer sulme të vazhdueshme ndaj Kosovës dhe ndaj lëvizjes së lirë. Këto bllokada të cilat janë krijuar kohëve të fundit, të cilat në mënyrë të veçantë kanë për qëllim të terrorizojnë qytetarët shqiptarë donin t’i shfrytëzonin këto pika kufitare kanë vetëm një qëllim, të krijojnë tensione, të destabilizojnë Kosovën dhe gjithë rajonin tonë. Por, në të njëjtën kohë e tregojnë lidhmërinë e drejtpërdrejt ndërmjet shtetit serb dhe bandave kriminale që i kanë organizuar këto bllokada.…I bëj thirrje aleatëve tanë që të dalin me qëndrim publik lidhur me këto shkelje të vazhdueshme nga ana e Serbisë, të cilat po shkelin të drejtat e qytetarëve tanë dhe kanë tendencë ta destabilizojnë paqen dhe sigurinë jo vetëm në Kosovë por në tërë rajonin tonë”, ka thënë Osmani.
Kalaja e Rozafës është atraksioni kryesor i qytetit të Shkodrës që tërheq mijëra vizitorë çdo vit, ndërsa ngrihet në një zonë dominuese dhe me trashëgimi të pasur.
Kryeministri Edi Rama ndau sot pamje nga kalaja e Rozafës dhe muzeu, të mbushur me vizitorë.
Kalaja e Rozafës në Shkodër ka mirëpritur vizitorë të shumtë vendas dhe të huaj, të moshave të ndryshme, ndërsa janë organizuar një sërë aktivitetesh për trashëgiminë historike.
Rikualifikimi i kalasë së Rozafës përmes ndriçimit, një investim i Ministrisë së Kulturës, e ka kthyer atë në një atraksion turistik, të vizitueshëm për turistët vendas dhe të huaj edhe në mbrëmje.
Kalaja e Rozafës ngrihet mbi një kodër shkëmbore në perëndim të qytetit, e rrethuar nga ujërat e tre lumenjve: Drinit, Bunës dhe Kirit. E ndërtuar gjatë Mbretërisë Ilire, ajo përfaqësohet nga një legjendë që tregon mbajtjen e një premtimi, të Besës legjendare./atsh/ KultPlus.com
Shqipëria është një nga ato vende që ka pasur suksesin më të madh vitet e fundit duke tërhequr një numër në rritje të vizitorëve ndërkombëtarë, veçanërisht në periudhën e verës.
Një artikull i botuar në revistën italiane të udhëtimeve “TTi Viaggi” është i radhës që konfirmon një gjë të tillë pasi në mediat botërore po i bëhet gjerësisht jehonë Shqipërisë turistike. Sugjerimet vijnë nga shumë vende të botës që përshkruajnë vendin tonë si një destinacion për të mos u humbur.
Artikulli i revistës “TTi Viaggi”
Falë plazheve të bukura, ujërave të pastra dhe kostos së ulët të jetesës, sot shumë turistë zgjedhin Shqipërinë si destinacionin e tyre të pushimeve. Prej disa vitesh, sidomos pas pandemisë së COVID-19/ës, luftës në Ukrainë e të gjitha problemeve që lidhen me inflacionin, rritjen e kostos së jetesës, kushdo që shkon me pushime kërkon të kursejë sa më shumë që të jetë e mundur, por pa sakrifikuar cilësinë.
Pikërisht duke pasur parasysh këtë, disa vende kanë filluar të rivalizojnë gjigantët turistikë si Greqia apo Spanja, duke u bërë destinacionet e preferuara për pushime verore, me kosto të ulët.
Mes tyre kryeson Shqipëria, e cila përveçse është kthyer në një destinacion perfekt për të rinjtë mund të jetë ideale dhe për ata që kanë një buxhet të kufizuar për të investuar për pushime.
Falë politikave sociale, vendi mesdhetar ka filluar të tërheqë edhe turistë të moshës së tretë e investitorë të huaj po ashtu.
Ka disa faktorë që e bëjnë Shqipërinë të suksesshme. Vendi ballkanik është ende një destinacion pak i njohur edhe pse numri i turistëve që e vizitojnë atë është në rritje e nuk është prekur ende nga turizmi masiv.
Në Shqipëri, ju do të keni mundësinë që të hani mirë e të shpenzoni pak. Akomodimet janë të një standardi të lartë, por me çmime të ulëta. Gjithashtu, në vend ofrohen plazhe të mrekullueshme me kosto të përballueshme./ TCH/ KultPlus.com
Në qytetin e Podujevës në një ceremoni të organizuar nga Komuna sot është zbuluar shtatorja e ish-presidentit historik, Ibrahim Rugova.
Shtatorja është zbuluar nga presidentja Osmani, kryeministri Albin Kurti, Teuta Rugova e bija e presidentit, kryetari Shpejtim Bulliqi dhe Fatmir Sejdiu.
Presidentja e Kosovës, Vjosa Osmani po merr pjesë në ceremoninë e zbulimit të shtatores së ish-presidentit, Ibrahim Rugova në Podujevë.
Osmani është shprehur se shtatorja e Rugovës po përjetësohet dhe po përurohet në 7 shtatorin historik.
Presidentja u shpreh se sot presidenti Rugova po i kthehet në bronz Llapit, siç u shpreh ajo, duke u bërë banor i përhershëm i Podujevës.
“Shtatorja e presidentit Rugova po përjetësohet dhe po përurohet në 7 shtatorin historik, në të njëjtën datë, 34 vjet më parë, u miratua Kushtetuta e Kaçanikut, një moment historik në udhëtimin e Kosovës drejt lirisë dhe pavarësisë, për të cilën gjë, tërë jetën ia kushtoi presidenti ynë historik”.
“Shtatorja e presidentit Rugova nuk është vetëm një monument prej bronzi, por një testament i idealeve për të cilat ai punoi deri në vdekje, për Kosovën të lirë, të pavarur dhe demokratike”.
“Prandaj sot po nderojmë kujtimin për udhëheqësin e madh, vizionarin e pashoq, për njeriun i cili me guxim dhe mençuri e orientoi Kosovën drejt vizionit euroatlantik dhe solli vëmendjen e gjithë botës demokratike, pikërisht në Kosovë”.
“Presidenti Rugova ishte simbol i shpresës, një njeri që besonte në fuqinë e fjalës. Në ditët më të errëta të historisë sonë, ai qëndroi i palëkundur me vizionin e tij “pavarësi dhe asgjë më pak”.
“Në ditët më të errëta ai dëshmoi se forca e kombit tonë është përbashkimi dhe vullneti i pathyeshëm për liri, paqe, demokraci dhe pavarësi. Presidenti Rugova i dha, siç themi gjithmonë politikës dimensionin më të rëndësishëm të saj, dimensionin human”, u shpreh Osmani.
“Karnavalet e Korçës” ishte vepra më e mirë e Festivalit Mbarëkombëtar të Komedisë. Vepra me regji të Erion Isait korri shumë duartrokitje në natën e fundit të edicionit të 11-të të Koko Fest.
Regjisori i shfaqjes më të mirë, Erion Isai, u shpreh mirënjohës për gjithë ekipin, për orët, ditët, shpirtin e djersën e derdhur në dërrasat e skenës si dhe që bënë mjeshtërisht dritën dhe sharmin e krijimtarisë.
“Ndihem plot e i motivuar se po, vepra shqiptare ka dinjitet”, shkroi Isai në rrjetet sociale.
Figurat aq të dashura që krijoi Spiro Çomora, Nikollaqi, Olimbia dhe Afroviti, si dhe personazhet e tjerë u ngjitën në skenë nga një kast aktorësh të përzgjedhur.
Aktori korçar Arben Dervishi, i cili u rikthye në skenë pas 12 vitesh shkëputje ishte në rolin e tregtarit Nikollaq Jorganxhi, aktorja Zamira Kita në rolin e Olimbisë, aktorja Paola Kodra në rolin e Afrovitit, për të vijuar dhe me të tjerë personazhe.
Juria e festivalit vlerësoi për regjinë të mirë, Fatos Berishën ndërsa çmimi i karrierës shkoi për Leka Bungon./atsh/ KultPlus.com
Muzeu Historik Kombëtar përkujton sot 7 shtatorin 1910, ditën kur lindi Aleks Buda.
Mësimet e para, i nisi kur ishte 7 vjeç në shkollën fillore të qytetit të lindjes. Pa kryer klasën e dytë i vijoi studimet në Leçe të Italisë. Më 1920 bashkë me dy vëllezërit e tij shkon me studime në Austri. Atje plotësoi filloren dhe kreu më 1929 gjimnazin në Salzburg.
Më tej ndoqi studimet në Universitetin e Vjenës, në Institutin Ballkanistik, në vitet 1930 – 1935 ku mori mësime nga profesorë të njohur, si Karl Paç, Reiniger dhe Norbert Jokl. Gjatë kësaj periudhe u aktivizua në Shoqëninë e studentëve shqiptarë Albania të Vjenës, së bashku me Lasgush Poradecin, Skënder Luarasin, Eqrem Çabejn, Krist Malokun, Qemal Butkën etj., duke qenë edhe bashkëpunëtor i revistës “Dialëria” të kësaj shoqërie.
Në vitin 1938 u kthye në Shqipëri. Punoi së pari, si arsimtar në Gjimnazin e Tiranës. U lidh me Lëvizjen Nacionalçlirimtare dhe më 1944 u zgjodh nënkryetar i Këshillit Antifashist të qarkut të Elbasanit. Në vitin 1955 u bë njëri nga organizatorët dhe studiuesit më me përvojë të Institutit të Historisë dhe të Gjuhësisë, i sapokrijuar.
Me krijimin e Universitetit të Tiranës më 1957, Aleks Buda do të ishte një nga themeluesit e katedrës së historisë dhe të kursit të historisë së Shqipërisë në këtë universitet.
Aleks Buda vdiq pas një sëmundjeje të rëndë, në Tiranë, më 7 korrik 1993./atsh/ KultPlus.com
Anija kozmike Starliner e Boeing ka përfunduar udhëtimin e saj të kthimit në Tokë – por astronautët që supozohej të mbante mbeten pas në Stacionin Ndërkombëtar të Hapësirës.
Anija bosh udhëtoi në mënyrë autonome pasi u shkarkua nga laboratori orbital, shkruan BBC, transmeton Klankosova.tv.
Kapsula, e cila pësoi probleme teknike pasi u nis me Butch Wilmore të Nasa-s dhe Suni Williams në bord, u konsiderua shumë e rrezikshme për t’i çuar astronautët në shtëpi.
Në vend të kësaj, ata do të kthehen me një “SpaceX Crew Dragon”, por jo deri në shkurt – duke zgjatur një qëndrim tetë-ditor në ISS në tetë muaj.
Artistja e madhe shqiptare, Vaqe Zela, është portretizuar në Tiranë nga piktori me famë ndërkombëtare Maximiliano Bagnasco.
Përmes një shkrimi në rrjetin social “Facebook”, e bija artistes Irma Rodiqi, ka shprehur mirënjohje të thellë për dashurinë që populli shqiptar i dhuroi në të gjallë e në të vdekur nënës së saj.
Ndërsa, për muralin me portretin e Vaçe Zelës ajo është shprehur të jetë e bindur se nëna e saj po vëzhgon e lumtur nga qielli, për përjetësimin e saj si yll me dashuri dhe art edhe në muret e Tiranës.
“Nuk ka pasuri në botë që do të mund të zëvendësonte sado pak dashurinë tuaj të pakufishme! Atë që i falët sa ish gjallë dhe i falni edhe sot. Jam e bindur që ajo na vëzhgon e lumtur nga qielli, të cilit ju me adhurim i shtuat një yll në ditën e largimit të saj nga kjo jetë, dhe prej sot edhe nga muri në të cilin e përjetësuat me aq shumë dashuri e art. Ju jeni Shqipëria e saj e shenjtë, Shqipëria ime e dashur – Ajo që nuk vdes kurrë!”, ka shkrur Rodiqi në facebook.
Më poshtë gjeni shkrimin e plotë në “Facebook”:
Po ku ka si ti o Shqipëria ime!» – Nuk ka varg që mund të shprehë më fuqishëm mirënjohjen time të thellë. Jo rrallë dëgjoj, «Sikur të kish lindur në një vend tjetër…» E kam thënë për herë të parë atë ditë, kur me dashurinë tuaj të pafund, ma bëtë më të lehtë përcjelljen në amshim të nënës sime të shtrenjtë, dritës së jetës time. E kam rithënë kur në stadium kumbonte zëri i saj mes brohorimave dhe lotëve tuaj dhe nuk do të rresht së përsërituri sa të kem frymë: Nuk ka pasuri në botë që do të mund të zëvendësonte sado pak dashurinë tuaj të pakufishme! Atë që i falët sa ish gjallë dhe i falni edhe sot. Jam e bindur që ajo na vëzhgon e lumtur nga qielli, të cilit ju me adhurim i shtuat një yll në ditën e largimit të saj nga kjo jetë, dhe prej sot edhe nga muri në të cilin e përjetësuat me aq shumë dashuri e art. Ju jeni Shqipëria e saj e shenjtë, Shqipëria ime e dashur – Ajo që nuk vdes kurrë!/ KultPlus.com
