Po vazhdojnë koncertet e radhës të edicionit të XXII të festivalit Kosova KamerFest 2023.
Më datë 10 nëntor, në ora 19:00 në Amfiteatrin e Bibliotekës Qendrore të Universitetit të Prishtinës do të mbahet koncerti me Finalistët e Garave ArsKosova 2023.
Diell Pasha, Ledion Halitaj, Elisa Fusha, Sibora Resyli, Ajas Vitaku, Bleta Martinaj, Vesa Shala, Erika Sinani, Ledian Shala, Eriona Krasniqi dhe Urim Maliqi, janë artistët që do të performojnë në këtë koncert i cili po pritet me padurim edhe nga drejtoresha artistike e festivalit, Sihana Badivuku.
Ndërsa, koncerti i fundit i këtij edicioni, do të mbahet më datë 13 nëntor, ora 20:00, në Amfiteatrin e Bibliotekës Qendrore të Universitetit të Prishtinës.
Në këtë koncert do të prezantohen artistët eminent austriak, violinistin Johannes Fleischmann dhe pianistin Philipp Scheucher.
Ky koncert mbështetet nga Ambasada Austriake në Prishtinë. / KultPlus.com
Nesër do të bëhet hapja e edicionit të gjashtë e festivalit ndërkombëtarë të muzikës kamertale “Skupi Kamefest”, shkruan KultPlus.
Nata e titulluar si “Balkan Art Stage” tashmë tradicionalisht bën bashkimin e artistëve e të gjitha trojeve të ballkanit, ku do të interpretohen veprat J.Brahms -piano kuartet Op. 60 no.3 c-mol (1855-75) dhe C.Franck – piano kuintet në f-mol . (1879)
Në program do të luhen vepra nga repertori i hekurt i muzikës së dhomës, Kuarteti i pianos në c-mol ishte ndoshta vepra më emotive autobiografike e opusit instrumental të Brahms.
Edhe pse përfundoi në vitin 1875, rrënjët e saj i kishte 20 vjet para, në periudhën më emotive të jetës së tij – marrëdhënien e dashurisë së dështuar me Clara Schumann.
Brahms vuri në dukje ndikimin e përvojës traumatike në këtë kuartet me dramacitetin e shfaqur me shumë mjeshtri.
Ndërsa piano kuinteti emocional i César Franck qëndron fort pranë veprave më të njohura të kompozitorit francez.
E shfaqur në vitin 1880 për herë të parë nga Kuarteti Marsick dhe Camille Saint-Saëns në piano, kuinteti iu kushtua Saint-Saëns. Konsiderohet si një nga arritjet më të mira muzikore të Franck.
Koncerti do të mbahet më 18 shtator në ora 19:00
Më poshtë gjeni programin e plotë:
Piano – Elena Atanasovska (North Macedonia)
Violin – Tamara Arsovski (Bosnia and Herzegovina)
Viola – Blerim Grubi (Kosova – North Macedonia)
Cello – Mario Guralumi (Albania)
II. Cesar Frank – Piano Quintet in f-minor
Piano – Phoevos Philkas (Greece)
Violin I – Dusan Panajotovic (Serbia)
Violin II – Ron Bakalli (Kosova)
Viola – Stefania Yankova (Bulgaria)
Cello – Dorina Laro (Albania)
Mbremja “Balkan Art Stage” ben bashkimin e artisteve nga gjithe vendet e ballkanit/KultPlus.com
Violinistja finlandeze Pia Siirala, dirigjentja irlandeze Lygia O’Riordan dhe Ansambli XXI-Kosova, mbrëmë në kuadër të festivalit “Kosova KamerFest” kanë dhuruar një program plot lakmi. Me një numër të madh të të pranishmëve që kanë mbushur të gjitha karriget e vendosura në hapësirë, kjo treshe ka përmbyllur mahnitshëm koncertin e fundit që shënoi mbylljen e këtij festivali, i cili tash e disa net ka dëshmuar për një pasion të pakrahasueshëm ndaj muzikës klasike dhe jo vetëm, shkruan KultPlus.
Modelariumi i Fakultetit të Arkitekturës ka mirëpritur mbrëmë këtë treshe, që kanë performuar një program tejet të rrallë, e pothuajse edhe të padëgjuar më parë në kryeqytet. Interpretimi i tyre ka qenë diçka që jo çdokush mund ta bëjë. Karrige të shumta ishin të vendosura përballë “skenës”, dhe në dy anët e saj, kësisoj për të admiruar çdo pozicion të instrumentistëve që hapësira e ofronte. Akustika në këtë vend po ashtu ka qenë diçka mbresëlënëse, duke pasur parasysh qetësinë absolute që publiku e pati.
Duke qenë një numër më i lartë i të pranishmëve, hapësira u bë ende më e ngrohtë. Me një reflektorë, reflektimi i së cilit binte anash skenës dhe dritave normale të objektit, gjithçka filloi fiks në orën 20:19.
Kanë qenë gjithsej dy veprat e vetë violinistes Pia Siirala ato që kanë ardhur mahnitshëm nëpërmjet interpretimit të instrumentistëve të talentuar. Violinistja Siirala shqyrton në veprën e saj “Ulita’s walk”, ndikimin që ka muzika e popujve indigjenë të Rusisë në mënyrën se si muzika dëgjohet dhe perceptohet. Nëpërmjet luajtjes së violinës dhe kompozimit, ajo përpiqet të eksplorojë se çfarë mund të sjellë muzika arkaike, e bazuar në kujtesë në muzikantin e saj.
“Ulita’s walk”, qe një vepër tetëmbëdhjetë minutëshe e cila rrëqethu çdo të pranishëm. E vetme në mes të skenës, violinistja Siirala solli një teknikë tejet të rrallë. Prekte violinën me dorë, e me hark, teksa harkun e lëvizte me një ngadalësi adhuruese. Tingujt që pasonin, hynin thellë në shpirtin e pranishëm, asisoj që të depërtonin edhe më thellë me mesazhin e veprës.
Ndërsa, vepra tjetër nën emërtimin “Zërat polarë” (Pengeneku, Omryl’kot, Mulingaut, Rol’tytval-Jarar), që përkonte me emërtimin e këtij koncerti të fundit, nga violinistja Siirala, ka sjell në skenë Ansamblin XXI-Kosova, me ç’rast është krijuar një mbrëmje që vështirë se harrohet dot. Vepra për orkestër harqesh ka gjallëruar instrumentet diversive. Violina 1 qe e përbërë nga Sihana Badivuku, Leufat Buçuku, Fjollë Koxha, Arsim Gashi, violina 2 qe e përbërë nga Pleurat Doli, Dijetar Zeka, Eliona Raqi, Florentina Hyseni, Festim Haxhikadrija, në violë qenë Blerim Grubi, Entela Qarkaxhija, Alkesta Gllogjani, në violonçello qenë Miltiades Cassaras, Enis Alji, Donjeta Cërmjani si dhe në kontrabas Lulëzim Lushtaku.
Nën dirigjimin e jashtëzakonshëm të Lygia O’Riordan, vepra “Zëra polarë” ka përçuar një ndjesi magjike. Me një stil ndryshe të të dirigjuarit e performuarit, kjo mbrëmje ka qenë dëshmi e prurjeve unike nga bota, që sjellin diçka të veçantë nga vetja dhe e lënë haptazi në çdo vend që ata prekin. I tillë ke rasti me violinisten finlandeze Pia Siirala dhe dirigjenten irlandeze Lygia O’Riordan, të cilat në ndërlidhje me Ansamblin XXI-Kosova kanë përthekuar koncertin e fundit të këtij edicioni të festivalit “Kosova KamerFest”, në mënyrën më të mirë të mundshme.
Ishin duartrokitjet e zgjatura ato që falënderuan këtë treshe për performancën e tyre të pakrahasueshme, me shpresën që të rikthehen përsëri në Prishtinë, për të shpalosur dashurinë e tyre ndaj botës së artit.
Ndërsa, për të treguar më shumë rreth koncertit dhe përshtypjeve të saj përgjatë edicionit, për KultPlus foli drejtoresha dhe njëherit violinistja Sihana Badivuku.
“Publikut besnik prishtinas, Kosova KamerFest i dhuroi 11 mbrëmje koncertale kamertale gjatë këtyre dy muajve. Koncerti përmbyllës ishte diçka më ndryshe dhe risi jo vetëm për publikun por edhe për ne, anëtarët e këtij ansambli ku së bashku fituam përvoja të reja të performimit të veprës botërore premierale “Zërat Polarë” e cila mbrëmë u realizua edhe si pjesë e provimit të Doktoratit të violinistes Siirala. Si drejtore artistike jam mjaft e kënaqur nga koncepti dhe laramania e veprave që u performuan nga artistët botërorë dhe vendorë me rreth 40 instrumentistë dhe rreth 15 vepra premierale”, ka thënë Badivuku.
Sipas saj, edhe këtë vit janë realizuar 7 punëtori në bashkëpunim me prodekanin e degës së muzikës së Fakultetit të Arteve, profesori Drinor Zvmberi dhe punëtori të audio inxhinierit nga Finlanda në bashkëpunim me Universitetin UBT – degën e audio-produksionit dhe menaxhimit që e udhëheq profesoresha Aida Gjikolli.
“Për mua secili koncert ishte i veçantë, duke filluar nga mbrëmja e parë me violinistin e mirënjohur Klajdi Sahatçi, pianisten Merita Rexha-Tërshana, tek koncerti i talenteve të Garave ArsKosova , koncerti për autizmin me fëmijët e talentuar nga shkollat e muzikës së Kosovës, pastaj mbrëmja me pianisten Kristina Laço-Petrollari, çelisten Dorina Laro, violinistin e ri te talentuar Dejon Bendaj, spanjollët Jose.M.Alvarez Losada dhe Pedro Mateo, francezët Celine & Eric Lesage, bullgaret Galina Kovcheva dhe Daniela Dikova, pianistet Syzana Jakupi dhe Alba Muçolli-Dehari, kolegët e mi Blerim Grubi e Aristidh Prosi dhe ENSEMBLE XXI-Kosova me artistet e lartpërmendura”, thotë tutje.
Ndërkaq, ajo po ashtu ka bërë të ditur se edicioni i 22-të varet nga mbështetjet financiare të institucioneve kulturore dhe ambasadave, bankave e kompanive të ndryshme që do të ndikojnë shumë në cilësinë dhe numrin e koncerteve posaçërisht të ansambleve dhe artistëve botërorë që kanë kosto dhe honorare sipas standardeve Evropiane-Botërore.
Një dyshe spanjolle ka dëshmuar për një dashuri të pa krahasuar ndaj muzikës klasike, mbrëmë në kuadër të festivalit “Kosova KamerFest”, me ç’rast ka mbledhur rreth vetes një numër të konsiderueshëm të artdashësve të cilët me vëmendje të lartë kanë pikasur dhuntinë e tyre të veçantë. Violinisti Jose Manuel Alvarez Losada dhe kitaristi Pedro Mateo kanë shkrirë magjinë e tyre në ato instrumente krejt natyrshëm, gjegjësisht, kanë interpretuar një program që ka lënë mbresa të mëdha, shkruan KultPlus.
Modelariumi i Fakultetit të Arkitekturës ka mirëpritur këta dy artistë nga Spanja, të cilët me një program krejt unik, kanë lënë shpirtin e tyre në hapësirë. Karrige të shumta ishin të vendosura mu përballë “skenës” ku dyshja ka performuar. Ndërlidhja e violinës dhe kitarës ka qenë e mahnitshme, ndërsa akustika qe e mirë pikërisht për këtë dyshe.
Arkitektura e hapësirës i shtonte një ngrohtësi ndryshe këtij koncerti. Hijeshia e çdo objekti, e bënte mbrëmjen më të afrueshme me të pranishmit. Ndonëse nuk kishte ndonjë ndriçim specifik ndaj instrumenteve, ajo që sillte dritë përbrenda shpirtit të pranishëm, qe vija melodike e secilës vepër të interpretuar.
Mbrëmë, harku i violinës ka thyer limitet e interpretimit perfekt. Ndërsa, kitara që i bashkëngjitej violinës në një vallëzim melodish, ka qenë ajo që ka rrëmbyer tingujt spanjoll e i ka dërguar edhe përtej mureve të objektit. Kompozitorët si: Joaquín Nin, Leo Brouwer, Manuel de Falla, Feliu Gasull, Joaquín Rodrigo, Astor Piazzolla, janë vlerësuar mbrëmë në mënyrë jashtëzakonshme nëpërmjet dyshes spanjolle. Magjia e këtyre kompozitorëve u shndërrua në një mrekulli interpretuese të dyshes që pasonte lehtazi nga melodia në melodi.
“Suite espanola (Vieja Castilla, Murciana, Catalana, Andaluza)”, “Elegia por Cinito Vitier”, “Suite popular espanola (El pano moruno, Asturiana, Jota, Nana, Cancion, Polo), “L’anima del vent”, “Canciones valencianas (Allegro, Andante moderato, Andantino, Tempo di bolero), “Historia del tango (Bordel 1900, Cafe 1930, Night-club 1960, Concert d’aujourd’hu)”, ishin veprat unike që erdhën nën mjeshtërinë e violinistit Jose Manuel Alvarez Losada dhe kitaristit Pedro Mateo.
Duke filluar nga shprehjet e fytyrës, lëvizja e kokës që vazhdimisht merrte kahje të ndryshme, gishtërinjtë e pandalshëm mbi instrument, mbi tela e mbi hark e deri tek frymëmarrjet që dëgjoheshin në hapësirë, të dy instrumentistët kanë dhënë gjithçka nga vetja e tyre. Kjo dukshëm vërehej kur duartrokitjet e zjarrta zinin vend pas secilës vepër të interpretuar, teksa buzëqeshjet e dyshes qenë vezulluese ndaj këtij publiku. E gjithë vëmendja e të pranishmëve i dedikohej dyshes, ndërsa e njëjta gjë vlente edhe për dy instrumentistët, që fokusin e kishin vetëm ndaj violinës dhe kitarës, që qëndronin përpara tyre.
Ishin duartrokitjet e zgjatura ato që e rikthyen dyshen edhe një herë në skenë. Me një vepër të famshme, ata përmbyllën një orë e gjysmë performancë të mrekullueshme. Qe një teknikë e rrallë që ata e shfaqën mbrëmë, dhe që me patjetër ka frymëzuar edhe fytyrat e të rinjve në publik. Fotografi, video e plot palë sy, kanë mbështjellë këtë natë brenda një foleje melodike krejt të pasur.
Ndërsa, për të treguar më shumë rreth koncertit dhe përshtypjeve të tyre, për KultPlus folën Violinisti Jose Manuel Alvarez Losada dhe kitaristi Pedro Mateo.
“Po ndihemi shumë mirë. Ishte një përvojë e mrekullueshme të luajmë këtu për këtë audiencë që dukej sikur ishin mësuar të shkonin në koncerte muzikore-klasike. Është hera jonë e parë në Kosovë dhe ne kemi ardhur tek dje. Jemi shumë të befasuar për ndërtesat, njerëzit dhe jetën e qytetit. Është si një qytet i mbushur me jetë”, thotë dyshja.
Sipas tyre, programi i përzgjedhur është kryesisht i bërë nga muzika spanjolle dhe latine, dhe disa nga to janë vepra shumë të njohura e disa tjera janë transkripta për repertor të pianos, por ky program nga ta, është luajtur tash e disa vite, andaj dhe atyre u pëlqen ta luajnë pikërisht atë.
“Gjithçka për ne ishte vërtet e re këtu. Ne nuk jemi mësuar me audiencën e këtij populli dhe mënyrën se si i bëni gjërat, por na pëlqen dhe ishte vërtet i organizuar mirë. Mendoj se krijuesja e festivalit, Sihana, po bën një punë shumë të mirë. Ajo është shumë entuziaste dhe na trajtoi shumë mirë. Ne jemi vërtet të lumtur për këtë”, përfundon dyshja. / KultPlus.com
Një dyshe franceze ka mbushur sallën në natën tjetër të radhës, në kuadër të festivalit “Kosova KamerFest”, duke mbledhur kështu rreth vetes artdashës e fytyra të reja që pasionin për muzikën klasike e kishin të shprehur në fytyrën e tyre. Ata patën rastin të shijojnë nga afër interpretimin e rrallë e të fuqishëm, të violinistes Celine Lesage dhe pianistit Eric Lesage, me ç’rast loja e tyre ka dhënë emocione të shumta mbrëmë, shkruan KultPlus.
Si në të shumtën e rasteve, salla e Amfiteatrit të Bibliotekës Qendrore të Universitetit të Prishtinës nuk ka ndërruar pamje, por ishin lulet e vendosura mu në mes të skenës, ato që i dhanë një hijeshi kësaj mbrëmjeje. Në anën tjetër, pianoja bardh e zi qëndronte e vetme në skenë, teksa priste që pianisti francez t’ia nisë magjisë së tij nëpërmjet gishtërinjve. Në anën tjetër, violinistja franceze qe ajo që violinën e shndërroj në trup të dytë të saj, krah saj.
Perdet e zeza në prapavijë vinin në pah këndshëm, kur edhe veshja e dyshes franceze ishte po në të njëjtën ngjyrë. Ndriçimi po ashtu qe elementi kryesor që e afroi këtë mbrëmje në nivel tjetër, me të pranishmit.
Mbrëmë, çelësat e pianos u pushtuan nga melodi e tinguj që preknin skajshmërinë perfekte. Notat e sakta dilnin përtej kontrollit, me precizitetin e pianistit Lesage, ndërsa harku i violinës që manovrohej nga violinistja Lesage lëvizte pa mëshirë, për të krijuar një vijë melodike hyjnore. Vepra e kompozitorëve të njohur si: Jeno Hybay, Cesar Frank, Fritz Kreisler/Antonin Dvorak, u interpretuan në mënyrë të mahnitshme. Mrekullia e tyre dallohej në secilën notë.
Veprat si: “Fantasie Briliante Carmen”, “Sonata in a-major”, “Slavonic fantasy”, “Scenë nga çardash”, “Yarou Yarou”, “Chanson de Tania”, “Sarba Staccoato”, “Csardas Rhapsodie”, erdhën me një frymë krejtësisht ndryshe nga koncertet e herëve të kaluara. Talenti i dyshes franceze kaloi përtej prishtmërive. Përgjatë plot dy orëve, ata dëshmuan për një dashuri ndaj artit klasik, e në veçanti atij francez. Ritmi i tyre në çdo moment ka krijuar një harmoni të paparë.
Lëvizja trupore e pianistit, në ndërveprim me atë të violinistes, ka qenë e bukur për tu vëzhguar. E gjithë energjia e tyre kaplonte instrumentin para tyre, dhe bashkë me to, edhe zemrat në publik. I gjithë fokusi i të pranishmëve binte direkt në skenë, aty ku po shkrihej dhuntia e dyshes franceze, krejt lirshëm, por me një pasion të vërtetë. Qe një punë mjeshtërore e tyre e interpretimit dhe kjo u dallua nga duartrokitjet e zjarrta që merrnin, pas secilës vepër, shumica e së cilave zgjasnin një kohë të gjatë.
Kështu krejt në fund, brohoritjet për këtë dyshe fantastike qenë të jashtëzakonshme. Admirimi për ta dallohej në sytë e secilit, teksa dëshira për t’i falënderuar ata për këtë natë, qe e madhe. Ishte me të vërtetë mahnitëse teknika e tyre e interpretimit dhe kjo veçmas dallohej nga mënyra e tyre unike në ndërveprim me instrumentet.
Ndërsa, për të treguar më shumë rreth koncertit dhe përshtypjeve të tyre, për KultPlus folën pianisti Eric Lesage dhe violinistja Celine Lesage.
“Jemi shumë të lumtur që jemi këtu sepse ishte ëndrra jonë të interpretonim këto pjesë të Transilvanisë, muzikë tradicionale. Për ne në Francë është një ëndërr, sepse ne e duam shumë muzikën tradicionale të Transilvanisë, folklorin, vallet dhe meloditë popullore. Është hera e parë që jemi këtu në Kosovë, publiku ishte shumë i ngrohtë dhe mikpritës, po ashtu ata ishin shumë të fokusuar”, thotë dyshja.
Sipas tyre, pjesa e preferuar ishte e fundit sepse ishte një kompozitor francez, i cili shkroi dhe kompozoi muzikë të shkëlqyer.
“Sonatat kishin një teknikë shumë të vështirë, sidomos për shkak të muzikalitetit të tyre. Ne patjetër do të kthehemi për të performuar këtu. Ne me të vërtetë do të dëshironim të vinim përsëri herën tjetër”, përfundon dyshja. / KultPlus.com
Në vazhdën e koncerteve në kuadër të festivalit ‘KamerFest’, në mbrëmjen e djeshme jehoi Romantizmi dhe Tango të përshtatura për piano dhe violonçel, që u sollën në Prishtinë nga artistet Dorina Laro dhe Kristina Petrollari – Laço, shkruan KultPlus.
Koncerti i cili zuri vend në Amfiteatrin e Bibliotekës Universitare, nisi me suitën italiane për violonçel dhe piano nga Stravinsky, që përcolli një emocion të madh në publikun artdashës përderisa artistet luanin veprat Intrpduzione, Serenata, Aria, Tarantella dhe Minuetto e Finale.
Ritmi ndryshoi me performimin e veprave të Rachmaninof, e për të përfunduar me Tangon e Madhe nga Piazzola.
Mbrëmja që solli jehonën e romantizmit dhe Tangos u përmbyll me duartrokitjet e publikut që zgjatën disa minuta, për të shprehur mirënjohjen për ato emocione që artistet dhuruan në afro një orë e gjysme performim.
Ndërkaq, pas koncertit foli Kristina Petrollari-Laço, e cila ishte edhe e pranishme në koncertin paraprak tha për Kultplus se në koncertin e një nate më përpara nderuan Çesk Zadejën, kompozitorin e njohur shqipta dhe Cesar Fank, ndërkaq në këtë natë zgjodhën një repertor më ekspresiv.
“Ndërkohë me Dorinën kemi mb 15 vjet që intrerpretojmë së bashku. Ekspresiviteti që kanë këto vepra na bënë që t’i zgjedhim për të performuar sonte që na shtynë që t’i bëjmë bashkë. Është një repertor që e duam dhe na përshtatet.”, deklaroi ajo.
Petrollari – Laço më tutje foli edhe për paraqitjen para publikut të Prishtinës duke shprehur se është shumë kënaqësi për të të kthehet para këtij publiku që gjithmonë u japin emocion të veçantë.
Kurse Dorina Laro, e cila erdhi për herë të parë në këtë edicion të ‘KamerFest Kosova’, por jo hera e parë në Prishtinë, pasi ajo u shpreh se vjen në Prishtinë që nga viti 1999, dhe nga ai moment rikthehet shpesh dhe gjithmonë ka një dashuri dhe ndjenjë të veçantë.
“Programi i sotëm është një përzgjedhje mes romantikëve të vonë me tangon, brenda një shekulli por dy llojeve të muzikave të ndryshme, një suitë nga Stravinsky ku dihet se çdo kompozitor është mahnitur nga ajo se çfarë Italia përfaqëson me kulturë dhe art e Stravinsky ka marrë temat e një opera popullore dhe i ka përshtatur në këtë suitë italiane”, u shpreh Laço duke folur për programin.
Ajo po ashtu foli edhe për bashkëpunimin me Kristinën, e i cili sipas Laros daton qysh nga viti 2008 e tani nuk mund të mendojnë të punojmë të ndara.
Ju kujtojmë që ‘KamerFest Kosova’ do të zgjasë deri më 1 dhjetor, me prezencë të artistëve si: String Trio Kosova, Sihana Badivuku, Blerim Grubi, Aristidh Prosi, ArsKosova Competition 2022 laureats, Vesa Dume, Eda Vlaqo, Elsa Gashi, Dejon Bendaj, Kristina Laqo, Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala./ KultPlus.com
Edicioni i 21-të i “Kosova KamerFest”, festivali i muzikës kamertale ka filluar rrugëtimin e tij të suksesshëm tash e një muaj. Pas dy viteve pauzë, festivali ka arritur që të sjell emra të njohur të skenës kombëtare dhe jo vetëm. Talente të reja, njashtu kanë zënë vend të posaçëm në këtë edicion, ndërsa gërshetimi i tyre me emra të njohur, nuk ka qenë aspak e huaj për këtë edicion. Mbrëmë, ka qenë violinisti Dejon Bendaj dhe pianistja Kristina Petrollari Laço, të cilët kanë shndërruar koncertin, në një të paharrueshëm, shkruan KultPlus.
Si në të shumtën e rasteve, salla e Amfiteatrit të Bibliotekës Qendrore të Universitetit të Prishtinës ka mirëpritur një numër të konsiderueshëm të publikut. Në skenë, pianoje e vetme bardh e zi qëndronte gati për t’u pushtuar nga pianistja, ndërsa më vonë do i bashkohej edhe violinës që nën duart e violinistit, do të krijoheshin tinguj të mrekullueshëm. Perdet e zeza në prapavijë dhe ndriçimi nga muri lart, ishin elementet që i dhanë këtij koncerti një pamje më serioze. Të veshur kokë e këmbë në ngjyrë të zezë, të dy instrumentistët kanë dëshmuar për një talent të paparë.
Fillimisht, ishte Sihana Badivuku, drejtoreshë artistike e festivalit, e cila hapi mbrëmjen me një fjalë rasti.
“Violinisti vjen këtu për herë të parë me koncert recital, përndryshe, ai dhjetë vite më parë ka qenë fitues i garave ‘ArsKosova GrandPrix’ dhe tani po rikthehet si një muzikant aktiv i Shqipërisë, i cili posa i ka mbaruar edhe studimet master në Moskë. Ndërsa, pianistja e mirënjohur shqiptare, Kristina, ka qenë më parë edhe soliste në këtë festival si dhe pjesëmarrëse në shumë festivale të tjera. Shpresoj që ky koncert do të iu lë mbresa shumë të mëdha, posaçërisht emocione të fora”, ka thënë Badivuku.
Ajo tutje ka bërë të ditur se është shënuar edhe përvjetori i kompozitorit shqiptar Çedk Zadeja si dhe kompozitorit francez Cezar Frank.
Në këtë mbrëmje gjithsej pesë vepra kanë gjetur vendin e tyre në atmosferë. Meloditë dhe tingujt që pasonin vazhdimisht nga violinisti Dejon Bendaj dhe pianistja Kristina Petrollari Laço, kanë ngjallur emocione të forta në publik. Kjo vërehej qysh në fillim, kur sytë e të pranishmëve binin direkt në skenë, veshët e tyre ishin të mbushur me muzikë, ndërsa këmbët e tyre trokitnin vazhdimisht në tokë, në hap me vijën melodike të prezantuar.
Koncerti që nisi fiks në orën 20:13, ka sjell një program tejet të bukur, por ajo që i shtoi hijeshinë këtij programi qenë edhe dy instrumentistët që dhuruan shpirtin e tyre në skenë. Lëvizjet e tyre të kokës, duarve, krahëve e edhe të këmbës, ishin të mrekullueshme për t’u parë. Dukej se i gjithë trupi i tyre shkonte pas tingujve, me ç’rast ato me të vërtetë plasoheshin nëpër muret e sallës.
Ishin veprat e kompozitorëve si: Çedk Zadeja, Cezar Frank dhe Béla Bartók, ato që shpalosën një program të veçantë që zgjati fiks një orë. Ndërsa, veprat si: “Sonatë për violinë dhe piano”, “Sonata në A-dur”, “Sarasate Caprice Basque”, “Vallet rumune”, dëshmuan për një seriozitet në të luajtur e dashuri në interpretim.
Kështu krejt në fund, ishte publiku që me duartrokitje ka falënderuar dy talentet që pa ndalë kanë dhënë një performancë të shkëlqyer. Sa herë që dilnin në skenë për veprën e radhës, buzëqeshja e tyre që pika më e fortë në të cilën dallohej pasioni për violinën e pianon, dhe jo vetëm.
Për KultPlus, violinisti Dejon Bendaj ka shprehur emocionet e tij pas koncertit si dhe idenë për bashkëpunimin me pianisten e mbrëmjes.
“Sa herë që vij këtu është një kënaqësi e madhe për të luajtur. Në Prishtinë kam kujtime shumë të bukura dhe njerëzit janë mikpritës ndërsa audienca është në rritje. Programi është i ndarë në dy pjesë. Pjesa e parë ka përfshirë dy sonata, njëra nga Çedk Zadeja dhe tjetra nga Cezar Frank, që i përket periudhës së romanticizmit. Pjesa e dytë përfshin një repertor virtuoz të violinës. Me pianisten, kemi nisur një bashkëpunim prej kohësh dhe ne merremi vesh shumë mirë. Kemi shumë lidhje të përbashkëta për muzikën të cilat ndoshta edhe ndihmojnë në ndërlidhjen tonë skenike”, ka thënë Bendaj.
Po ashtu, pianistja Kristina Petrollari Laço për KultPlus ka treguar përshtypjet e saj për këtë mbrëmje.
“Për mua në Prishtinë është një mrekulli gjithmonë që të luaj e sidomos kur prezent janë miqtë, artdashësit, publiku i dashur e shumë i ngrohtë. Mendoj që ke një koncert me sonata të rëndësishme të violinistikës dhe këtu ke një sallë shumë e dashur për ne por që kushtet nuk janë më të mirat të mundshme. Por, gjithçka shkoi mirë. Dy kompozitorët që i nderuam sonte, ishin dy shtyllat kryesore të repertorit violinistik, andaj menduam që pasi edhe përkohet me dy përvjetorët e tyre, t’i sjellim pikërisht veprat e tyre. Bashkëpunimi me Kosovën, ka qenë shumë i dashur për ne, gjithmonë”, thotë ajo.
Kujtojmë se sonte do mbahet koncerti tjetër i radhës në Sallën e Amfiteatrit të Bibliotekës Qendrore UP, me fillim nga ora 20:00.
Festivali i muzikës kamertale ‘Kosova KamerFest’ po mbahet nga 1 tetor dhe do zgjasë deri më 1 dhjetor ku përgjatë 11 mbrëmjeve koncertale do të shfaqet program dhe koncept i larmishëm me performim të veprave kolosale dhe kamertale të artistëve dhe ansambleve kamertale botërore dhe mbarëshqiptare.
Ky festival do të mirëpresë edhe artistë të tjerë të radhës si: Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala. / KultPlus.com
“Kosova KamerFest”, festivali i muzikës kamertale ka filluar tashmë rrugëtimin e tij të suksesshëm drejt edicionit të 21-të, pas dy viteve pauzë. “New spirits, voices & hopes” ka qenë emërtimi i koncertit të djeshëm që ka shënuar mrekullueshëm koncertin e tretë me radhë. Talentet e reja si violinistja Vesa Dume, pianistja Elsa Gashi dhe pianistja Eda Vllaço kanë sjell një program tejet të bukur e të njohur për publikun artdashës, shkruan KultPlus.
Salla e Amfiteatrit të Bibliotekës Qendrore të Universitetit të Prishtinës mbrëmë ka mirëpritur një numër të konsiderueshëm të publikut. Ndërkaq, në skenë qe instrumenti i pianos bardh e zi, ai që ia ka shtuar hijeshinë kësaj nate. Perdet e zeza në prapavijë dhe ndriçimi i nevojshëm në sallë, kanë qenë elemente shtesë që këtë natë e kanë bërë më të ngrohtë për syrin e publikut.
Fillimisht, ishte Sihana Badivuku, drejtoreshë artistike e festivalit, e cila hapi mbrëmjen me një fjalë rasti.
“Ky është koncerti i tretë me radhë dhe sonte kemi rastin e nderin e veçantë që të kemi tri talente të rralla, që janë finaliste të garave ‘ArsKosova 2022’. Koncertin do ta hap fituesja e të gjitha çmimeve, Vesa Dume, pra është fituese e çmimit ‘Grand Prix ArsKosova’ që është çmimi më i madh i këtij kompeticioni. Ajo njëkohësisht është fituese e shumë çmimeve tjera në rajon dhe Evropë. Ndërsa, pjesa e dytë e koncertit na sjell fitueset e tjera si Elsa Gashi që ka fituar çmimin ‘Ensemble XXI-Lygia O’Riordan’ dhe pianistja Eda Vllaço që ka fituar çmimin ‘Akil Koci’”, ka thënë Badivuku.
Sipas saj, të gjithë të pranishmit do t’i shohin këto talente të reja dhe artiste të rralla në instrumentet e tyre. Dhe me të vërtetë që kjo ndodhi. Vesa Dume para violinës, Elsa Gashi dhe Eda Vllaço para pianos, kanë shprehur një talent që tregon shumë për të ardhmen e tyre, pra një e ardhme pa mëdyshje drejt suksesit.
Violinistja Vesa Dume, qe ajo që hapi mbrëmjen fiks në orën 20:12 me një program që zgjati pothuajse tridhjetë minuta. Ishin veprat e kompozitorëve si: Fritz Kreisler, Niccolo Paganini, Frederic Chopin dhe Felix Mendelssohn, që kanë lënë një gjurmë të madhe në këtë mbrëmje. Dhuntia e violinistes Dume, ka dalë përtej përsosmërisë dhe ka arrirë që veprat “Sicilienne & Rigaudon”, “Kapriqo”, “Nocturno No.20” dhe “Koncert në e-mol, koha 3”, t’i sjellë në mënyrë të mahnitshme.
E shoqëruar në piano por e vetme në luajtjen e violinës, ajo në skenë ka dëshmuar për një pasion të dukshëm për muzikën klasike. Koka e saj ishte në harmoni të saktë me lëvizjet e duarve e gishtërinjve, ndërsa buzëqeshjet që pasonin pas çdo vepre, ishin sinjalizues për një përfundim me sukses të secilës vepër.
Në anën tjetër, dy pianistet e radhës, Elsa Gashi dhe Eda Vllaço, thjesht të lënë pa fjalë. Instrumenti bardh e zi, para tyre u shndërrua në një dhuratë të cilën mezi prisnin ta hapnin. Meloditë e pastra, pushtuan hapësirën krejt lehtazi. Ishin veprat si: “Sonata e hënës, op.27, no.2”, “Adagio sostenuto”, “Allegretto”, “Presto agitato” të kompozitorit L.V.Beethoven, si dhe “Toccata” nga Feim Ibrahimi, ato që erdhën nën mjeshtërinë e pianistes Elsa Gashi. Ndërsa, “Scherzo no.2” nga F.Chopin dhe “Elegie, op.3, no.1” nga S.Rachmaninoff u performuan në mënyrë të jashtëzakonshme nga pianistja Eda Vllaço.
Kështu krejt në fund, ishte publiku që me duartrokitje ka falënderuar këto tri talente të reja që posedonin një talent të rrallë që shumë lehtë vërehej edhe në sytë e tyre, sa herë që ato preknin skenën dhe shfaqnin dashurinë nëpërmjet instrumenteve.
Kujtojmë se sonte do mbahet koncert për fëmijët me autizëm, me titull “Fëmijët për fëmijë – për njëri-tjetrin”, në Sallën e Amfiteatrit të Bibliotekës Qendrore UP, me fillim nga ora 18:00.
Festivali i muzikës kamertale ‘Kosova KamerFest’ po mbahet nga 1 tetor dhe do zgjasë deri më 1 dhjetor ku përgjatë 11 mbrëmjeve koncertale do të shfaqet program dhe koncept i larmishëm me performim të veprave kolosale dhe kamertale të artistëve dhe ansambleve kamertale botërore dhe mbarëshqiptare.
Ky festival do të mirëpresë edhe artistë të tjerë të radhës si: Dejon Bendaj, Kristina Laqo, Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala. / KultPlus.com
Festivali i muzikës kamertale ‘Kosova KamerFest’ rikthehet në Prishtinë në edicionin e tij të XXI-të të shtunën më 1 tetor, përcjell KultPlus.
Në mbrëmjen e parë, në hapjen e madhe të këtij festivali që do të mbahet në Sallën e Amfiteatrit të Bibliotekës Qendrore të UP-së do të jehojë muzika e Gjigantëve Romantikë të interpretuar nga Klaidi Sahatçi në violinë dhe Merita Rexha-Tërshana në piano.
Ky festival do të mirpresë edhe artistë të tjerë si: String Trio Kosova, Sihana Badivuku, Blerim Grubi, Aristidh Prosi, ArsKosova Competition 2022 laureats, Vesa Dume, Eda Vlaqo, Elsa Gashi, Dejon Bendaj, Kristina Laqo, Dorina Laro, Galina Koycheva, Duo Lesage, Celine Lesage, Eric Lesage, Jose Manuel Alvarez Losada, Pedro Mateo, Syzana Jakupi, Alba Muçolli, Ensemble XXI, Lygia O’Riordan dhe Pia Sirala.
Ndërkaq, ‘Kosova KamerFest’ do të mbahet në Prishtinë nga 1 tetor deri më 1 dhjetor 2022./ KultPlus.com
Publiku shkupjan më 30 shtator 2022, do të ketë nderin të dëgjoj një ndër violinistët më të mirë shqiptar. Bëhet fjalë për violinistin nga Shqipëria, Klaidi Sahatçi, karriera artistike e të cilit numëron suksese dhe arritje shumë të mëdha, përcjell KultPlus.
Festivali i muzikës kamertale “Skupi KamerFest”, në edicionin e tij të pestë, dhe në koncertin e pestë me radhë për këtë edicion, sjell para publikut shkupjan, koncertmjeshtërin e parë të orkestrës Tonhalle të Zyrihut.
Koncerti do të mbahet me 30 shtator 2022, në sallën kamertale të Filharmonisë Nacionale të Maqedonisë së Veriut, me fillim nga ora 19:30.
Me këtë rast, shoqata “Muza”, në një bashkëbisedim të shkurtër me Klaidi Sahatçiun, ai ka mundësuar ta njohim më nga afër rrugëtimin e tij artistik, si dhe emocionet dhe pritshmëritë e tij për koncertin që po vjen.
1. Klaidi për artëdashësit shkupjan, të na tregoni shkurt për gjenezën tuaj nga lindja dhe rrugëtimin tuaj deri në Orkestrën Tonhalle të Zurich-ut?
Sahatçiu: Jam lindur në Tiranë, ku dhe fillova studimet muzikore në moshën 6-vjeçare në shkollën “Dëshmoret e Lirisë” gjatë regjimit totalitar. Më tej në moshën 16 vjeçare studiova në Liceun Artistik “Jordan Misja” violinë me Mamica Abazin dhe më pas me Klodiana Skenderin.
Në moshën 20 vjeçare me rënien e regjimit u zhvendosa në Itali për të vazhduar të pasuroj njohuritë në Konservatorin “G.Verdi” të Milanos ku pas dy vitesh mora diplomën me notën më të lartë cum laude dhe Mansion Nderi.
Pas kësaj, pas një audicioni jam pranuar dhe kam studiuar me maestron Salvatore Accardo në akademinë “W. Stauffer” të Kremones dhe më tej me profesorin rus Boris Garlitzky në Lion te Frances në disa masterklase dhe mësime private.
Para se të fitoja pozicionin prestigjioz të Koncertmasterit të Parë të Orkestrës Tonhalle në Zyrih në vitin 2010, kam mbuluar pozicione te tilla si: Violon Solo i Orkestrës Kombëtare të Lionit, assistent Koncermaster i Orkestrës se Zvicrës Italiane, Koncertmaster i parë i Orkestrës së Dhomës së Zyrihut dhe Koncertmaster i Parë i Orkestrës së Teatrit Scala në Milano dhe Orkestrës Filarmonike të Scalës.
2. A jeni për herë të parë në Shkup dhe Maqedoni të Veriut, dhe si po e pritni bashkëpunimin me artistët shqiptar që do te keni në festivalin “Skupi KamerFest”.
Sahatçiu: Vij për herën e dytë, pasi disa vjet më parë kam luajtur me pianisten Merita Rexha Tershana për Festivalin e Ohrit ku jam pritur shumë mirë si nga organizatorët dhe nga publiku .
Ftesa për këtë koncert më entuziazmon dhe jam kurioz dhe i motivuar të luaj me kolegët dhe miqtë shqiptarë Merita, Blerim dhe Aristidhin, dhe të zbuloj dhe të ndjej nga afër atmosferën e Shkupit./Nora Bajrami – Muzikologe/ KultPlus.com
“Kemi siguruar emra të mëdhenj të skenës botërore por në kombinim edhe me artistët shqiptar që t’i hapin dyert e festivalit dhe po ashtu pjesëmarrëse do të jenë edhe talentë të ndryshëm”, kështu kishte thënë ndër të tjera organizatorja e KamerFestit 2019, Sihana Badivuku, në hapjen solemne të këtij edicioni më 17 shtator.
Nga ajo mbrëmje deri
mbrëmjen e djeshme kur edhe përfundoi edicioni i 20-të i këtij festivali
kamertal ndërkombëtar në Kosovë, KamefFesti ka dhuruar mbrëmje spektakulare me
emra emninet si nga rrafshi vendor ashtu edhe nga ai ndërkombëtar me një publik
shumë shpesh të madh në numër, shkruan KultPlus.
Violonçelisti rus
Denis Shapovalov si dhe pianisti amerikan Derek Han kanë qenë dy nga emrat më
të njohur që i janë bashkuar KamerFestit këtë edicion. Nga rrafshi vendor,
violonistja Sihana Badivuku e Blerim Grubi si dhe sopranoja Zana Abazi-Ramadani
kanë ofruar paraqitje të vlerësuara si shumë të suksesshme. Këtë edicion vend
ka pasur edhe për talentet e rijnë si violinisti Leonardo Dimoski nga Maqedonia
e Veriut si dhe pianistja Era Kume nga Shqipëria.
Veçantia e këtij
edicioni ka qenë fillimi i shtrirjes së Kamerfestit edhe në Shqipëri dhe
Maqedoninë Veriore. Kështu, disa mbrëmje që realizoheshin në Prishtinë, janë
dhënë edhe në Tiranë e Shkup, duke krijuar një <Bashkim kombëtar përmes
muzikës>. Në total ky edicion ka pasur pesëmbëdhjetë koncerte që janë
shpërndarë në muajt shtator, tetor dhe nëntor. Ky edicion i KamerFestit është
përkrahur nga Ministria e Kulturës Rinisë dhe Sportit, Ambasada e SHBA-së,
Austrisë dhe Francës.
Koncerti
i fundit për këtë
edicion, u mbajt dje në Sallën e Kuqe. Mbrëmë nuk ishte vetëm përfundimi i
këtij edicioni të KamerFestit, mbrëmë u shënua edhe 20- vjetori i bashkëpunimit
të Kosova KamerFest me Filharmoninë e Kosovës si dhe njëkohësisht është shënuar
edhe 30- vjetori i karrierës së Blerim Grubit.
Me sallën e
stërmbushur nga të pranishmit aty, me emra të njohur publik që kishin ardhur ta
nderonin përfundimin e këtij festivali si dhe me prani të madhe mediale,
gjithçka ishte gati të fillonte koncerti me Filarmoninë e Kosovës, violinisten
Sihana Badivukun, (violë) Blerim Grubin si dhe dirigjentin nga Shtetet e
Bashkuara të Amerikës, Gregory Charette. Për gati dy orë u interpretuan veprat
e Johann Christian Bach/ Henri Casadesus, Wolfgang Amadeus Mozart si dhe të
Igor Stravinskyt.
Organizatorja e këtij
festivali, Sihana Badivuku, ka treguar shkurt për dallimet në kohë rreth
financimit të këtij festivali.
“Kemi pasur ato
baticat dhe zbaticat tona. Nëse e bëjmë një krahasim dhjetë vitet e para kanë
qenë shumë më të lehta me i përballu ekonomikisht sepse kemi pasur përkrahje
shumë më të mirë nga ambasadat dhe Ministria e Kulturës”.
Tutje, ajo ka
përshëndetur edhe zgjerimin e festivalit në Shqipëri dhe Maqedoninë e Veriut.
“Ajo çfarë është për
tu përshëndetur është se me dy ojq nga Shkupi dhe Tirana i kemi bërë disa
repriza, pra jemi zgjeruar edhe në hapësirat më rajonale”.
Në fund, Badivuku
është shprehur e zhgënjyer me sallën ku është mbajtur koncerti.
“Ajo çfarë i dhemb
një artisti është kjo sallë këtu e cila është dënim për artistin”
Blerim Grubi,
e cilësoi si të
veçantë këtë mbrëmje.
“Kjo sonte ishte një
mbrëmje e posaçme dhe e veçantë me kolegen time të luftës
dhe të artit me
Sihanën me të cilën qe tridhjetë vite jemi bashkë dhe luftojmë për gjërat që i
takojnë artit dhe kulturës këtu në Kosovë dhe Maqedoni””
Ai e ka konsideruar
si sukses ngritjen e kuadrit të Kosovës me ish-studentët e tij.
“Më duhet të theksoj
që është një kënaqësi e madhe që sonte ishim me ish studentët tonë, para njëzet
viteve kemi pasur një autobus që vinte nga Tirana apo Shkupi kurse sonte
luajtëm me kuadrin tonë, dhe jemi shumë të lumtur dhe të kënaqur”.
Grubi, mbrëmjen e
djeshme e quajti magjepsëse.
“Mendoj se bëmë një
gjë shumë të mirë sonte mendoj se edhe publiku ishte shumë i kënaqur sonte dhe
bëmë atmosferë magjepsëse”.
Dirigjenti amerikan,
Gregory Charette, ka thënë se atmosfera ishte familjare.
“Ishte shumë gjë e
mirë që mund ta ndjeje një energji familjare mes të gjithëve këtu”.
Dirigjenti amerikan
pati vlerësim edhe për orkestrën e Kosovës.
“Mendoj se orkestra
është gjithmonë në ngritje e sipër dhe kjo është gjëja më e mirë që duhet
përmendur. Cdo herë që unë vij këtu ne mund të bëjmë interpretime më të
vështira”.
KultPlus ka qenë njëri nga sponsorët e këtij edicionit të 20-të të festivalit ndërkombëtar të muzikës kamertale “Kosova KamerFest 2019” dhe po ashtu ka mbuluar pothuajse të gjitha koncertet e realizuara në Kosovë. Për publikun, për kulturën. Me koncertin mbrëmë në Sallën e Kuqe përfundon “Kosova KamerFest 2019”
Orari dhe salla nuk ndryshuan, por kishte ndryshuar formacioni artistik që do të interpretonte në një tjetër mbrëmje të KamerFestit në Kosovë. Ora shënonte 20:20 minuta kur gjithçka ishte gati dhe publiku zuri vendin e tij në sallë, shkruan KultPlus.com
Në skenë dolën pianistja nga Maqedonia e Veriut, Ana Josimovska Cagnazzo, dhe pianisti nga Italia, Antonio Cagnazzo të cilët interpretuan vepra të ndryshme artistike nën duartrokitjet e vazhdueshme të publikut prezent. Që të dy artistët po ndiheshin mirë, ndjenja që do t’i shprehnin pas përfundimit të koncertit.
Pianistja nga Maqedonia e Veriut, Ana Josimovska Cagnazzo, në intervistën e saj është shprehur shume e kënaqur me pothuajse gjithçka që u zhvillua rreth koncertit.
“Ne kishim një koncert shumë të mirë. Për mua ishte kënaqësi që të luaja sonte në këtë festival. Sihana është një violiniste e mrekullueshme dhe një udhëheqëse artistike e mrekullueshme po ashtu, dhe unë jam e lumtur që ajo na ftoi neve. Ishte eksperiencë shumë e mirë dhe prezenca e njerëzve të rijnë që arrita ti shoh ishte diçka shumë e mirë gjithashtu”.
Tutje, pianistja nga fqinjët tanë maqedonas, duke folur për përshtypjet e saj për kulturën në përgjithësi në Kosovë, ajo nuk e ka parë si diçka të shkëputur nga bota tjetër, teksa ka shprehur zhgënjimin e saj për trajtimin e kulturës kudo.
“E kam një përshtypje se në gjithë botën dominon mendimi se kultura nuk është diçka e rëndësishme. Çdokush diskuton vetëm për ekonomi dhe para, kurse për kulturën dhe artin mendojnë se mund të bëjmë edhe pa to siç nuk është ashtu. Pjesa kryesore e shoqërisë e humanizmit është shprehja e natyrshmërisë njerëzore”.
Pianisti nga Italia, Antonio Cagnazzo, pasi vlerësoi organizimin, njëjtë si kolegia e tij, lavdëroi specifikisht punën e Sihana Badivukut, drejtoreshës dhe organizatores së këtij festivali.
“Mendoj se ju keni një organizim të madh dhe një hapësirë shumë të mirë po ashtu. Unë u kënaqa shumë dhe mendoj se ju e bëtë më të mirën me këtë organizim. Sihana është një organizatore shumë e mirë”.
Ai u përgjigj shkurt por në mënyrë përmbajtësore në pyetjet rreth gjendjes së kulturës në përgjithësi në Kosovë.
“Nëse çdo aktivitet kulturor në Kosovë organizohet si ky Festivali i KamerFestit, mendoj se ju jeni shumë në nivel”
Festivali Kosova Kamerfest 2019 do të vazhdojë edhe mbrëmjeve të tjera njëjtë siç do të vazhdojë edhe KultPlusi me mbulimin e të gjitha aktiviteteve të këtij festivali artistik brenda Kosovës, për kulturën dhe për lexuesit tanë. / KultPlus.com
Kamerfesit mbrëmë i ka takuar “Zanave”. Tri artistet që performuan mbrëmë ishin me një emër por jo edhe me një shije dhe kolorit. Në fakt, pikërisht se secila prej tyre ishte në një pozicion ndryshe, një fakt ky dhe bazë e mjaftueshme që publiku të dëgjonte tinguj pianoje, flaute si dhe zërin e çlirët dhe të pastër të sopranos Zana Abazi-Ramadani, e cila qe e përcjellur nga pianistja Zana Badivuku- Basha dhe flautistja Zana Abazi, shkruan KultPlus.
Salla ishte e mbushur, ndërsa në skenë arriti ansambli që do të performonte aty. Ata u pritën me duartrokitje të pasuar me një heshtje si shenjë përgatitje për fillimin e koncertit. Veprat të ndryshme të huaja, të interpretuara nga artistet në fjalë përshëndeteshin vazhdimisht, por kulmimi i emocioneve dhe duartrokitjeve erdh kur sopranoja Zana Abazi-Ramadani nën përcjelljen e artisteve tjera, filloi interpretimin e këngës “Valsi i Lumturisë”. Çdo i dyti mysafir ishte me telefon në duar, duke incizuar apo fotografuar. Momentet që ajo dhuroi gjatë asaj performance nuk mjaftonin vetëm që të shijoheshin, ato duhej të ruheshin.
E gjithë mbrëmja ka kaluar nën një atmosferë shumë relaksuese dhe pozitive. Formacioni artistik, përveç anës profesionale ka arritur që tek publikun të transmetonte edhe një energji pozitive dhe të krijonte një klimë miqësore që në fakt ishte edhe një nga veçantitë e kësaj mbrëmje.
Siç ndodh zakonisht, mbrëmja u mbyll me shumë fotografi dhe shkëmbime mendimesh rreth asaj performance, ku vërehej se të gjithë ishin të kënaqur.
Sopranoja, Zana Abazi- Ramadani, ka thënë se programi që kanë pasur nuk ka qenë i lehtë.
“Me të vërtetë ka qenë mjaftë i vështirë, ka epoka të ndryshme dhe secila epokë, secila këngë, secila vepër e ka stilin e vet dhe duhesh t’i përshtatesh stilit të saj. Duhesh të jesh vazhdimisht në formë në mënyrë që të performosh në çdo moment”.
Ajo tutje ka folur për vështirësitë që krijon mungesa e një salle koncertale në Kosovë.
“Me të vërtetë kjo biseda për sallën është bërë si traditë të diskutohet mirëpo, nëse nuk kemi salla si duhet atëherë edhe për neve si instrumentistë dhe si artistë e kemi më të vështirë t’i realizojmë interpretimet tona”.
Zana Abazi, tha se është ndjerë e nderuar që ka ndarë skenën me dy artistet tjera.
“Ka qenë privilegj shumë i madh për mua që ta ndaj skenën me dy profesioniste si profesoreshën Zana Badivuku dhe profesoreshën Zana Abazi-Ramadani. Një mundësi shumë e mirë për mua që më është ofruar nga profesoresha Sihana Badivuku”.
Më pas, shkurt ka treguar edhe për përzgjedhjen e programit.
“Përzgjedhja e veprave është bërë në bashkëpunim me drejtoreshën e festivalit, ndërsa trion që e kemi luajtur së bashku tri zanat, ka qenë vepër e aranzhuar nga profesori Edon Ramadani”.
Pianistja, Zana Badivuku-Basha ka folur pak për organizimin si dhe për provat që kanë pasur së bashku para performimit.
“Mendoj se kemi qenë një ansambël i mirë, jemi përshtatë mirë. Provat i kemi mbajtur dy-tri javët e fundit, jo shumë por mjaftueshëm sa për ta realizuar një koncert, do të ishte mirë që ta vazhdonim këtë bashkëpunim”.
Pianistja Lejla Pula e ka vlerësuar si “shumë të bukur” mbrëmjen e djeshme.
“Ishte një mbrëmje shumë e bukur. Vërtetë jam shumë e lumtur që jemi dëshmitarë që artistët tanë punojnë pa pushim dhe përparojnë gjithnjë e më shumë. Ishte një përshtypje e jashtëzakonshme artistike”.
Ajo ka zgjedhur fjalë të mëdha për sopranon Zana Abazi-Ramadanin.
“Është një prej sopranove më të mira që ne kemi dhe me të cilën ne mund të mburremi vërtetë dhe mendoj se ne duhet të gjejmë rrugë që këta artistë të kemi rastin dhe t’i shfaqim edhe jashtë kufijve të Kosovës”.
Festivali Kamerfest 2019 që po zhvillohet në Kosovë, Shqipëri dhe Maqedoninë Veriore, do të vazhdojë edhe netëve të tjera me aktivitetet të ndryshme artistike teksa edhe KultPlus do të vazhdojë t’i mbajë të informuar lexuesit e tij. / KultPlus.com
Muzika klasike në Kosovë i pa zhvillimet e para ne vitet 1940 me veprimtarinë krijuese te kompozitorëve shqiptarë te Kosovës.
Edhe pse nuk kanë kaluar shumë vite, muzika në Kosovë po zhvillohet me hapa mjaft të shpejt. Vendi yne shpesh bëhet nikoqir i shumë artistëve të mëdhenj botëror, shkruan KultPlus.
Ndërsa mbrëmë, në kuadër të KamerFestit, Amfiteatri i Ri i Bibliotekës Universitare, kumbonte nga tre tinguj të veçantë, që dilnin nga piano, violina e violençelo.
Mjaftuan vetëm këto tre instrumente, që koncertin e mbrëmshëm, të shtatin me radhë në këtë edicion të KamerFest-it, ta shndërronin në koncert magjik. Para një oubliku modest performuan Yesim Gokalp në piano, Ozan Sari në violinë dhe Antonio Gashi në violinçelo, ku përmes tingujve që dilnin nga instrumentet e tyre, bashkëjetonin muzikën sëbashku me publikun prezent.
Me një performancë që zgjati një orë e gjysmë, e që vazhdimisht përcillej me duatrokitje, për të cilat publiku nuk ngurronte asnjëherë, u krijua keshtu një atmosferë që ngjallte emocione të mëdha, si te publiku ashtu edhe te performuesit.
Antonio Gashi, violonçelisti nga Prishtina, për KultPlus deklaroi se e mira e këtij festivali është se artistët tanë të ri kanë mundësi të bashkëpunojnë me artistë të mëdhenj e profesionist. Ndërsa për performancën me artistët e huaj, u nda mjaft i kënaqur, ”Të performosh me artistë nga Turqia është kënaqësi sepse kanë një kulturë muzikore të gjerë”, potencoi ai për KultPlus.
Në violinë luante artisti nga Turqia, Ozan Sari, i cili për herë të parë performonte para publikut kosovarë ne Kosovë. Për KultPlus, tregoi se edhe pse është hera e parë e tij këtu, ai ndjehet mjaft mirë dhe shumë i kënaqur me publikun dhe jo vetëm. ”është kënaqësi shumë e madhe të luash këtu, këtu ndjehem si në shtëpi. Njerëzit, qyteti e shumë gjëra tjera më kujtojnë vendin tim”, deklaroi ai për KultPlus.
Ndërsa, në piano, performoi artistja nga TurqiaYesim Gokalp, e cila u nda shumë e kënaqur e ajo çka i la përshtypje më së shumti ishte interesimi i publikut për muzikën kamertale. ”U kënaqa shumë. Më pëlqen tepër sa shumë kanë respekt njerëzit këtu për neve. Por ajo që më pëlqen më shumë është se publiku këtu, ndëgjon me vëmendje”, tha ajo për KultPlus
E në fund fare publiku pati mundësinë të takonte personalisht artistët e t’i përgëzonin ata për performancën.
Sponsor Gjeneral i Kosova KamerFest 2019 do të jetë Ministria e Kulturës Rinisë dhe Sportit si dhe Ambasada e ShBA-së, Austrisë dhe Francës
Eventi i mbrëmshëm u mbështet nga nga Kuvendi Komunal- Prizren. /KultPlus.com
Mbrëmjet me shumë duartrokitje si dhe publik relativisht të madh janë bërë pjesë e përditshmërisë së KamerFestit 2019 në Kosovë. Veçantia e djeshme ishte një projektor i madh i vendosur në skenë, ku po falënderoheshin sponsorët e këtij festivali, ndër të cilët është edhe KultPlus.com.
Sihana Badivuku, Eric Courreges, Venera Mehmetagaj-Kajtazi, Klevis Gjergji, si dhe Blerim Grubi ishin pjesë e formacionit të djeshëm artistik të cilët për rreth dy orë i dhanë publikut një atmosferë të mrekullueshme muzikore. Pjesët artistike të Johan Hummel, Ludwig van Beethoven, Claude Debussy, ishin tri nga disa pjesët që u interpretuan nga instrumentistët në fjalë.
Violonçelistii, Anton Gashi, e quajti mbrëmje të këndshme, mbrëmjen e djeshme.
“Ishte një mbrëmje e këndshme dhe siç e thash edhe më parë trio i Hummeli-it ishte shumë i mirë për ta dëgjuar”.
Ai vlerësoi edhe violonçelistin francez, Eric Courreges, për të cilin tha se i njëjti është solid dhe i mirë.
“Instrumentist i mirë, po shihet që ka edhe eksperiencë të madhe në muzikën kamertale. Unë e lexova biografinë, ishte pjesë edhe e disa orkestrave franceze, pra një çellsitë solid dhe i mirë”.
“Për mua sonte ishte kënaqësi që bëmë këtë koncert, këtë repertor para publikut”, tha pianisti, Klevis Gjergji, i cili kishte lënë Shqipërinë sonte që të ju bashkohej trupës muzikore në KamerFest 2019.
Ai tha se pavarësisht se nuk kishin shumë kohë për përgatitje, ata ishin kuptuar shumë shpejtë dhe shumë mirë për performancën e tyre të djeshme.
“Në fakt, koha për përgatitje është gjithmonë shumë e shkurtë kur bëhet fjalë për këso bashkëpunimesh sepse të gjithë janë me aktivitete. Në këtë rast kishim edhe më pak kohë, kishim mbrëmë edhe sot, por jemi kuptuar shumë mirë. Kemi pasur të njëjtat ide muzikore”.
Violonçelistit francez, Eric Courreges, i kishte lënë përshtypje mosha e re në publik teksa ishte i kënaqur edhe me kolegët e tij artistikë gjatë performancës së tyre të përbashkët.
“Ajo çfarë më ka pëlqyer këtu dhe që e vërejta që në fillim ishte publiku i ri meqë në Francë kemi një publik më të moshuar. Jam i kënaqur po ashtu edhe me bashkëpunimin me artistët dhe me shoqërimin e tyre”.
Mbrëmja përfundoi me një numër të madh të pranishmëve të cilët iu afruan skenës në pritje për fotografi me formacionin e djeshëm. Mysafirët po shkëmbenin përshtypjet e tyre për një mbrëmje plotë emocion që dhuroi KamerFesti mbrëmë.
KamerFest do të vazhdojë edhe netëve tjera me aktivitetet e tyre artistike të dhëna në Kosovë, Shqipëri dhe së fundmi edhe në Maqedoninë Veriore, duke krijuar kështu një strukturë interesante artistike nëpër trevat shqiptare gjithandej. / KultPlus.com
Me duartrokitje që zgjasnin me minuta të tëra dhe me një paraqitje pothuajse teatrale të violonçelisti rus, Denis Shapovalov, është hapur edicioni i 20-të i Kosova Kamerfest 2019 me koncertin e titulluar “KamerFest Fishekzjarrët”, shkruan KultPlus.
Para një numri të madh të të pranishmëve,
Sihana Badivuku, ka folur në mënyrë të përgjithshme për këtë edicion të “KamerFest”
dhe për karakteristikat që i ka ky edicion.
“Shpresoj që
KamerFest 2019 do ta gjallëroj Prishtinën. Kemi katërmbëdhjetë koncerte që i kemi
planifikuar në muajt shtator, tetor dhe nëntor. Karakteristikë e këtij
edicionin janë datat e shpërndara për koncertet”.
Ajo ka thënë
se pjesë e këtij edicioni do të jenë emra eminent nga brenda dhe jashtë
Kosovës.
“Kemi
siguruar emra të mëdhenj të skenës botërore por në kombinim edhe me artistët
shqiptar që t’i hapin dyert e festivalit dhe po ashtu pjesëmarrëse do të jenë
edhe talent të ndryshëm”. Tutje, Badivuku, ka falënderuar të gjithë
mbështetësit financiar të këtij organizimi që realizohet që njëzet vite radhazi.
“Çdo edicion
mbështetës financiar e kemi Ministrinë e Kulturës Rinisë dhe Sportit por këtë
vit një falënderim të posaçëm shkon për Ambasadën e SHBA-së , Austrisë dhe
Francës”.
Në koncertin
e mbrëmjes së parë të Festivalit, të titulluar “KamerFest Fishekzjarrët” fitues
i Çmimit të parë në konkursin prestigjioz “Tchaikovsky”, Denis Shapovalov, me
Orkestrën harkore të festivalit kanë performuar veprat e Vivaldit, Rossini,
Shapovalov.
Koncerti u
mbajt në Amfiteatrin e Bibliotekës Universitare-Prishtinë duke filluar nga ora
20:00.
Sivjet në këtë edicion jubilar do të performojnë rreth 40 artistë botëror si dhe mbarë shqiptar dhe ansamble harkore, pianistike e frymore. 13 Koncerte do të realizohen në Amfiteatrin e Bibliotekës Qendrore të UP-së përpos koncertit të mbrëmjes përmbyllëse i cili do të realizohet në Pallatin e Rinisë-salla e kuqe. / KultPlus.com
Festivali i Muzikës Kamertale – Kamerfest mbrëmë arriti të sjellë koncertin e dhjetë me radhë të titulluar “Udhëtim në Itali”, me bashkimin e një harmonie tingujsh mes instrumentit të pianos nga loja e italianit Maurizio Baglini dhe nga loja e violonçelisti nga Shqipëria Vlorent Xhafaj.
“Kleine Suite op. 23, për violonçello dhe piano” e kompozitorit italian Ferrucio Busonit hapi këtë mbrëmje, ku në lundrimin e tingujve që gjenin bashkimin në sallë, me koordinim në çdo hap të veprës, ata arritën ta mbajnë publikun në lojën e tyre deri në përfundim të kësaj vepre. Pas kësaj, të dy instrumentistët të ulur pranë njëri- tjetrit me një përjetim e prani artistike në secilin tingull e lëvizje sollën zbërthim të veçantë të veprave të kompozitorit Franz Liszt.
“A la capella Sistinia për piano solo” e Franz Liszt i dha mundësinë publikut të Prishtinës të shijojë për pak tërë lojën plot mjeshtëri e precizitet të artistit italian Maurizio Baglini. Qëndrimi i tij me pianon nuk është shumë i afërt, e shkëputja e gishtërinjve të tij nga pianoja nuk ishte e zakonshme. I zhytur tërësisht në lojën e tij, kapërcimi nga një tingull në tjetrin sillte një kontinuitet të një loje të bindshme e plot përqendrim. Mënyra se si shkëputej nga piano e bënte që publiku të ndjente tingujt që ai dhuronte, e mënyra se si e mbante lojën në të bënte që publikun ta marr me vete.
Pianisti i njohur italian Maurizio Baglini, thotë se kishte dëgjuar shumë për Kosovën dhe gjithnjë e ka mbajtur entuziazmi që të vij dhe ta eksplorojë këtë vend dhe këtë shoqëri që e quan multikulturore. Ai thotë se këtu gjen një motiv të veçantë për të luajtur.
“Kosova veçanërisht më jep shumë motivim që të luaj, sinqerisht nuk dua të ju jap komplimente por fuqishëm besoj se këto vende ballkanike do të jenë e ardhmja e Evropës, jo vetëm në kuptimin filozofik, sociologjik por edhe ekonomik. Audienca këtu dhe në Tiranë përben një numër të madh të të rinjve në krahasim me vendet e tjera dhe kjo është shumë inkurajuese”, u shpreh Baglini.
Ai tha se ka luajtur edhe më parë me çelistin Xhafaj dhe thotë se ndonjëherë kanë vizione të ndryshme dhe kjo e bën bashkëpunimin e tyre akoma më pozitiv.
“Ruralia hungarica op.32d, për violonçello dhe piano” e kompozitorit hungarez Erno von Dohnanyi erdhi para përmbylljes së veprës kulminante të kompozitorit të njohur Frederic Chopin. “Sonata për violonçello dhe piano, op. 65” përmes lojës së brendshme solli një gërshetim të magjishëm muzikor tek publiku. Çelisti nga Shqipëria Vlorent Xhafaj, tregoi për rëndësinë e veprave që i sollën mbrëmë publikut të Prishtinës. Ai tha se mbrëmë sollën një repertuar që nuk luhet shumë shpesh por që është shumë i rëndësishëm pasi që vet kompozitorët janë shumë të rëndësishëm, por që disa prej veprave të tyre nuk janë luajtur shumë në histori.
“Për veprat e Liszt për violonçel dhe piano ka një arsye sepse ato nuk kanë qenë të njohura dhe janë zbuluar para dhjetë vitesh dhe mandej janë kompozuar dhe riparë nga disa violonçelist të njohur dhe ka shtatë – tetë vite që luhen edhe në Evropë. Janë vepra të periudhës së vonshme të Liszt, janë vepra të brendshme dhe shumë celebrale pastaj vepra e Dohnanyi është një vepër me tema ballkanike mjaft të forta dhe gati duket si muzika jonë por mjaft e përpunuar mirë sepse kompozitorët e mëdhenj kështu e kanë, e marrin muzikën ashtu siç është bruto dhe e bëjnë një kryevepër më pak prekje të vogla dhe ajo mbetet gjeneratë pas gjenerate dhe bëhet muzikë e njohur edhe për vendet e tjera. Busoni është një kompozitor me ndikim të madh të Bachh dhe çdo vepër e tij është me tema të Johann Sebastian Bach” tregoi Xhafaj.
Ai tha se ndihet i lumtur që për herë të parë performon në Kosovë ndërsa që një kohë të gjatë dëshironte që të luante këtu.
“Sonte salla ishte shumë e ngrohtë dhe u ndjemë shumë mirë. Me instrumentin në të cilin luaj është një instrument i dedikuar muzikës së dhomës (kamertale) si në sonet, kuartet dhe trio dhe për muzikën e ansamblit të vogël dhe luajmë vazhdimisht në festivale të tilla kurse jam shumë i lumtur që festivalet e tilla ka edhe në Kosovë dhe bashkëpunimet mes artistëve nga jashtë, nga Kosova dhe Shqipëria janë më konkrete”, u shpreh tutje Xhafaj.
Veprat që erdhën mbrëmë dëshmuan edhe virtuozitetin e instrumentistit Xhafaj, i cili e nisi dhe e përfundoi mbrëmjen me një afërsi muzikore me publikun e veprat, ndërsa prishtinasit shijuan për herë të parë lojën e tij. Me sytë e mbyllur e në koordinim me pianistin erdhën deri tek vepra e Chopin, të cilën e quajtën kulminante. Kjo vepër është një nga kompozimet e fundit të Chopin.
“Kjo sonatë është vepra e fundit që e ka përfunduar kompozitori, ajo është kryevepër absolute dhe ishte shumë mirë ta përmbyllim koncertin me të”, tregoi Xhafaj për KultPlus.
Një lojë të tillë bindëse e kishte përjetuar edhe publiku i Shqipërisë ku kjo dyshe kishin përformuar dy netët e fundit. Xhafaj tregoi se tash e një kohë të gjatë njihen me pianistin Maurizio Baglini por vetëm vitin e fundit kanë krijuar një raport më të thellë në aspektin e bashkëpunimit muzikor.
“Me pianistin kemi luajtur këtë vit për herë të parë por njiheshim prej 15 vitesh kur unë isha student në Paris dhe ai jetonte në Paris. Tanimë kemi edhe njohje më të thellë muzikore dhe programojmë gjëra në skenë. Poashtu kemi edhe projekte të reja dhe ishte goxha e ndjeshme, pardje kemi luajtur në Tiranë, dje në Durrës dhe sonte jemi në Prishtinë, po e mbajmë atë adrenalinën e koncerteve dhe udhëtimit”, tregoi krejt në fund Xhafaj.
Kamerfest do të vazhdojë edhe sonte me mbrëmjen e 11-të koncertale. Koncerti i sotëm titullohet “Me dashuri nga Austria” ndërsa do të luajnë Erich Oskar Huetter në violoncello dhe pianisti nga Shqipëria Klevis Gjergji.
Koncerti fillon në ora 20:00 në Amfiteatrin e Ri të Bibliotekës Universitare./ KultPlus.com
Në kuadër të festivalit KamerFest, mbrëmë ka performuar pianisti Andi Duraku dhe violinisti Rron Bakalli, të cilët janë fitues të garës ndërkombëtare të muzikantëve të rinj ArsKosova 2018, shkruan KultPlus.
ArsKosova është një ndër garat e cila mbahet në Kosovë dhe organizohet nga fondacioni ArsKosova. Gara ka për qëllim që të vë në pah talentet e ri të cilët garojnë në 19 disiplina ku përfshihen: Violinë, Violë, Violonçello, Kontrabas, Kitarë, Piano, Flaut, Klarinetë, Bas Klarinetë, Saksofon, Fagot, Oboa, Trompë, Trombon, Korna, Tubë, Muzikë Dhome(Kamertale), Solokëndim dhe Solfezh.
Festivali KamerFest në kuadër të objektivit të tij që ka tash e disa vite si festival e që është promovimi i të rinjve, për këtë edicion të 19-të solli një koncert në të cilin performuan pikërisht Andi Duraku dhe Rron Bakalli fituesit e garës ArsKosova.
Andi Duraku i cili performoi i vetëm në piano solli për të pranishmit sonatën nr.23 “Appassionata” në f-mol të kompozitorit Ludëig van Beethoven dhe “Mephisto Waltz” nr.1 në A-dur nga Franz Liszt. Ai përmes këtyre dy veprave dëshmoi titullin e tij si fitues i garës ArsKosova dhe shfaqi edhe potencialin që posedon.
“Si fitues të ArsKosova 2017, unë dhe Rroni kemi marrë ftesën që në kuadër të KamerFest-it të perfomojmë dhe të paraqitemi me një gjysmë recitali. Pjesëmarrja jonë këtu dhe koncerti ishte shumë i rëndësishëm për ne pasi që të tilla koncerte na japin hapësirë që ta prezantojmë punën tonë. Gjithashtu në kuadër të festivaleve të tilla takojmë edhe pianistë apo muzikantë të njohur të cilët vijnë dhe shkëmbejnë përvojat e tyre së bashku me ne”, u shpreh pianisti Duraku për KultPlus.
Në anën tjetër violinisti Rron Bakalli solli sonatën për violinë dhe piano nr. 2 në A-dur të Johannes Brahms së bashku me pianistin Derek Han i cili erdhi nga Shtetet e Bashkuara të Amerikës si dhe carmen phantasy për violinë dhe piano të Bizet-Waxman, shoqëruar nga Arbëresha Shehu. Bakalli është pjesëmarrës në KamerFest që tri vite, mirëpo sipas tij ky vit veçohet më shumë.
“Koncerti sonte ishte një sfidë për ne por edhe një gjë shumë e mirë për të ardhmen tonë. Sonte luajta së bashku edhe me pianistin Derek Han, një pianist i nivelit të lartë dhe shpresoj që edhe në të ardhmen do të kem mundësinë që të luajë së bashku me pianistë të tillë”, theksoi ai për KultPlus.
Në anën tjetër për pianistin Derek Han kjo është hera e pestë që ai vjen në Prishtinë dhe sipas tij është çdo herë mirë të rikthehesh dhe të shohësh sesa progres është bërë në muzikë por edhe në vend. Tutje ai theksoi për KultPlus se loja së bashku me ‘yjet e ardhshëm të muzikës në Kosovës’, siç i quan ai fituesit e garës ArsKosova është një eksperiencë shumë interesante.
“Rron Bakalli është një student i talentuar një instrumentistë po ashtu i mrekullueshëm kështu që ishte kënaqësi që të luajë me të. E gjithë kjo është një eksperiencë e mirë pasi që vijmë këtu dhe luajmë së bashku me studentët, punojmë me ta dhe performojmë në skenë. Ne sjellim një eksperiencë ndryshe dhe ata po ashtu kanë një eksperiencë ndryshe pra bashkohemi së bashku përmes muzikës. Ky është një rast shumë i mirë për të shkëmbyer këto eksperiencat tona në mënyrë që tu japim atyre një mundësi për të parë nga një këndvështrim tjetër. Shkolla këtu e muzikës është shumë e mirë dhe ka profesor të mrekullueshëm por është pjesë e jetës që të shkëmbejmë idetë me të tjerët”, tha ai.
Sonte duke filluar nga ora 20:00 në Amfiteatrin e Ri të Bibliotekës Universitare në Prishtinë do të mbahet koncerti i ardhshëm në kuadër të edicionit të 19-të të festivalit KamerFest 2018./ KultPlus.com
Mbrëmë në Prishtinë ka filluar edicioni i 19-të i Festivalit KamerFest 2018. Ky festival filloi me një mbrëmje të muzikë kamertale e cila mirëpriti artistë nga Kosova, Italia dhe Franca, shkruan KultPlus.
Në Amfiteatrin e Ri të Bibliotekës Universitare, adhurues të muzikës kamertale dhe ndjekës të risive që sjellë çdo edicion i festivali KamerFest, shijuan një koncert të larmishëm i cili solli në skenën e vogël të këtij amfiteatri instrumentistë të ndryshëm.
Sipas drejtoreshës së këtij festivali të muzikës kamertale, Sihana Badivuku, e veçanta e këtij edicioni janë talentët e ri, laureatët e garës Ars Kosova 2017-2018, pjesëmarrja e ansamblit Ars Kosova si dhe ansambli i klarinetistëve të ri, studentë të Universitetit të Prishtinës. Përtej kësaj ky edicion do të sjellë instrumentistë nga Kosova por edhe nga vendet e tjera të botës.
“Edhe këtë vit ju mirëpresim me një program të pasur të veprave kamertale, kompozitorë që së bashku me artistët tanë, Antonio Gashi, Fraim Gashi tani janë pjesë e pandashme e festivalit. Gjithashtu kemi nderin të prezantojmë edhe emra të ri të instrumentistëve të njohur në skenën ndërkombëtare dhe vendore, si : Rudens Turku, Pierre L, Raffaele B, Vlorent Xh, Maurizio Baglini, Merita R , Klevis Gj dhe artistë të tjerë. Gjithashtu disa prej artistëve dhe profesorëve do të mbajnë edhe masterklasa për studentët dhe nxënësit e instrumenteve përkatëse”, tregoi ajo për KultPlus për të shënuar kështu këtë 19-të vjetor me 13-të mbrëmje muzikore.
Mbrëmja e parë e këtij edicioni filloi më dy instrumentistët Pierre-Laurent Boucharlat i cili vjen nga Franca në piano dhe Raffael Bertolini nga Italia. Ata filluan këtë koncert me kompozitorin Robert Schumann me veprën “Fantasiestucke” për klarinetë dhe piano. Pastaj pianisti Pierre-Laurent Boucharlat solli një vepër të cilën u shpreh për KultPlus se e ka shumë për zemër, e që sipas tij shumë pak pianistë e luajnë pasi që Claude Debussy e shkroi atë në fillim të karrierës kur ishte i ri, “Baladen Sllave”.
“Kam dashur ta luajë këtë pjesë të Debussy pasi që është një pjesë e gjatë dhe e dua shumë këtë pjesë. Një pjesë që shumë pianistë nuk e njohin pasi që nuk është e famshme, pasi që thonë se ka shumë përsëritje, shumë e veçantë dhe e pamundur për ta luajtur. Pa kuptim, pa emocion, po ndjenja por për mua është e mrekullueshme një pjesë e mrekullueshme. Ai e kompozoi kur ishte i ri dhe këtu kemi një Debussy të ri”, u shpreh ai.
Tutje të dy instrumentistët sollën së bashku përsëri një pjesë, kësaj radhe duke përzgjedhur kompozitorin Francis Poulenc dhe sonatën e tij për klarinetë dhe piano në B-dur.
“Ishte fantastike, njerëzit janë shumë mikpritës dhe organizimi ishte i mirë. Ajo që më pëlqeu më së shumti ishte bashkëpunimi me artistët me të cilët edhe performova sonte. Kam luajtur më parë me Sihanën dhe me Blerimin mirëpo jo me të tjerët. Nëse KamerFest më fton përsëri do jem i lumtur të rikthehem. Për mua është shumë e rëndësishme që të luajë me instrumentistë nga vende të tjera dhe të luajë jashtë Francës. Kur dilni jashtë vendit tuaj ju zbuloni kultura të tjera dhe ndjena të ndryshme për kulturën prandaj edhe është kënaqësi që të luajë jashtë vendit”, u shpreh ai për KultPlus.
Mbrëmja vazhdoi me pjesën e dytë e që ishte një homazh për dirigjentin- maestron Bahri Çela. Në këtë pjesë u interpretua vepra “Crisantemi” nga Giacomo Puccini ndërsa nga Camile Saint- Sawns erdhi septetu për piano, trumpetë, kuartet harkor dhe kontrabas në Es-Dur, Op.65. Kjo pjesë bëri së bashku instrumentistët: Pierre-Laurent Boucharlat – piano, Avni Krasniqi – trumpetë, Sihana Badivuku – violinë, Mrika Hoxha – violinë, Erlinda Gashi – violinë, Blerim Grubi – violinë, Antonio Gashi – violinçello dhe Fraim Gashi – kontrabas.
“Nuk mund të fillojmë këtë pjesë pa thënë disa fjalë për dirigjentin Bahri Çela pasi që këtë pjesë ia kemi dedikuar pikërisht atij. Ne si artistë e falënderojmë shumë pasi që ai ka dhënë shumë për kulturën tonë, për arsimin tonë dhe KamerFest-i ishte në mesin e ngjarjeve të para pas vdekjes së tij dhe këto pikë vijnë si homazh për të ”, tha Blerim Grubi.
Koncerti i radhës është sonte duke filluar nga ora 20:00. Ky koncert do të mbahet po ashtu në Amfiteatrin e Ri të Bibliotekës Universitare./ KultPlus.com
Festivali i muzikës kamertale Kamerfest Kosova përmbylli mbrëmë edicionin e tetëmbëdhjetë, duke sjellë koncertin e fundit të titulluar “Artistët Austriakë për KamerFest”, nën interpretimin e ansamblit austriak Trio Alba, shkruan KultPlus.
Pas shumë koncerteve mbresëlënëse, Kamerfesti mbrëmë arriti që në koncertin e njëmbëdhjetë në skenën e Amfiteatrit të ri në Bibliotekës Universitare të sjellë artistë me një shkollim të lartë muzikor në Austri, Livia Sellin në violinë, Philipp Comploi në violoncello dhe Chengcheng Zhao në piano. Ata përmes instrumenteve të tyre sollën një rrugëtim të plotë muzikor në interpretimin e veprave kolosale të Haydnit, Mozartit dhe Smetanas.
Tingujt e këtij ansambli para se të vinin për të parën herë në Kosovë, kishin lëvizur në skenat e festivaleve kamertale në Itali, Austri, Gjermani, në Amerikë të Jugut, në Argjentinë e vende të tjera.
Livia Sellin në violinë dhe Philipp Comploi në violoncello, para publikut u shfaqën të ulur përballë njëri-tjetrit, derisa harqet e instrumenteve që mbanin në duar ngriheshin me të njëjtën shpejtësi, e përcillej mes shikimeve që ndanin me njëri-tjetrin. Përmes lojës së tyre të instrumenteve në harmoni me qëndrimin e tyre në skenë, ata këtij koncerti i sollën më shumë se tinguj duke shfaqur lëvizje artistike brenda pozicionit të tyre.
Jo shumë larg tyre buronin tingujt e pianistes Chengcheng Zhao, që kishte vendosur të gjithë gishtërinjtë në lojë përmes lëvizjeve që shumë rrallë frenoheshin. “Qëllimi ynë nuk është vetëm të qëndrojmë në skenë, por të luajmë një tingull dhe të japim një imazh të saj”, tregoi pianistja për KultPlus.
Të tre brenda skenës vepronin me një instinkt të rrallë artistik, derisa kishin gjetur një pikëvështrim ku shikimet e tyre ndesheshin, ata takoheshin mes tingujsh, e lëvizjet e tyre të kokës lëviznin me shpejtësinë e njëjtë të melodisë. Interpretimi i përkryer e pianistes Chengcheng Zhao i solli një energji të re këtij koncerti, ku dukej sikur asnjë muskul i dorës së saj nuk mbetej jashtë lojës, derisa koka e saj herë përulej shumë pranë pianos e herë kthehej tek instrumentistët e tjerë, e kur intensiteti i tingujve shtohej, vërehej një ngritje e trupit të saj nga vendi ku ishte ulur. Edhe pse ishte hera e parë që ajo performoi para publikut në Prishtinë, ajo thotë se gjatë interpretimit e ndjeu ngrohtësinë dhe komunikimin me të pranishmit.
“Është një kënaqësi e madhe të vij në Kosovë, sepse kam dëgjuar shumë më herë për Kosovës përmes televizionit, radios dhe gazetës por nuk kam ditur kurrë se ku gjendet Kosova. Sot u ndjeva shumë ngrohtë në mikpritjen e publikut, veçmas kur vëreja koncentrimin e tyre të plotë gjatë performancës tonë. Ishte shumë e rehatshme për mua të performoj këtu”, tregoi pianistja kinezo-austriake për KultPlus.
Drejtoresha artistike e këtij festivali Sihana Badivuku rrugëtimin një mujor të këtij festivali e përshkroi si shumë të suksesshëm duke qenë se kishin arritur që këtij edicioni t’i sjellin interpretim nga rreth tridhjetë artistë vendor e ndërkombëtar. Ajo e vlerësoi çdo koncert të këtij edicioni si një festival në vete.
“Duke qenë se është edhe edicioni i tetëmbëdhjetë, duket sikur ia kemi marrë dorën, shpresojmë që ta vazhdojmë edhe për dy vite. Mirëpo si çdo vit dalin vështirësi të reja që si infrastruktura e sallave, bartja e pianove, ambienti i ftohtë. Përkundër vështirësive ekziston edhe energjia e neve si organizatorë dhe e publikut i cili është i etshëm. Nga pikëpamja artistike jemi shumë të kënaqur për shkak se kemi arritur të sjellim rreth tridhjetë artistë eminent dhe të njohur shqiptar dhe ndërkombëtar dhe dhjetë vepra premierë. Mirëpo, kemi shumë pak përkrahje për ta mbuluar një koncert të formatit të tillë”, tregoi Badivuku për KultPlus.
Kritiku muzikor Nestor Kraja tha se këtë festival e cilëson si një nga festivalet më të rëndësishme dhe autoritare që organizohen në Prishtinë, dhe që si i tillë ka nevojë për më shumë përkrahje institucionale.
“Unë mendoj që KamerFesti është një nga festivalet më autoritare në Prishtinë i cili sjellë instrumentist të shquar, organizon mbrëmje të nivelit të lartë kulturor dhe jep një shembull të rëndësishëm edhe për aktivitetet të tjera. Unë mendoj se së bashku me Remusicen dhe Dam Festivalin janë tre festivalet më të rëndësishme që zhvillohen në Prishtinë, të cilët duhet të mos trajtohen si festivale të zakonshme por të mbështeten financiarisht nga Ministria së Kulturës. Festivale si ky promovojnë vlera dhe japin një jehonë të tillë në Evropë që nuk mund të zëvendësohet me asnjë aksion tjetër qoftë politik apo kulturor”, u shpreh Kraja për KultPlus.
Pas çdo interpretimi, duart e tyre ngriheshin lart duke qëndruar në atë pozicion për ca qaste, e ktheheshin me ngadalësi tek instrumentet. Për publikun e sallës ishte e vështirë shkëputja nga kjo lojë e mrekullueshme artistike, andaj përmes duartrokitjeve ktheu në skenë ‘Trio Albën” për shumë herë. Mes duartrokitjeve e entuziazmit, ambasadori i Austrisë në Kosovë, Gernot Pfandler dhuroi buqeta lulesh për këtë ansambël. /KultPlus.com
Kosova KamerFest – International Chamber Music Festival solli mbrëmë koncertin e gjashtë nën interpretimin e Orkestrës Harkore të Festivalit Kamerfest, në përcjellje të pianistit francez Bertrand Giraud dhe pianistit shqiptar, Klevis Gjergji, shkruan KultPlus.
Ky koncert nisi momentin kur Sihana Badivuku drejtoi hapat e saj në mes të Sallës së Kuqe në Pallatin e Rinisë, duke sjellur pas vetes kryesisht një brez të ri artistesh nga Orkestra Harkore e këtij festivali. Kur ata filluan të zënë vend pas dy pianove, skenës iu bashkëngjiten edhe pianisti Bertrand Giraud dhe Klevis Gjergji. Kështu së bashku me një përzierje instrumentesh e melodish, filloi një natë e magjishme muzikore që sollën veprat e Poulenc dhe Britten.
Bertrand Giraud, në njërën piano derisa me mjeshtëri puqiste tastet e saj, herë-herë edhe kryqëzonte lëvizjet e duarve në të, derisa dukej sikur sillte një kërcim të lehtë kur tërhiqte gishtërinjtë së bashku me Klevis Gjergjin në pianon tjetër, ku për disa sekonda tingujt e tyre mbizotëruan sallën, duke u shoqëruar pastaj me një kordinim me Orkestren Harkore.
Bertrand Giraud, i cili nuk po vine në këtë sallë dhe Kosovë për herë të parë, tregoi për interpretimin e tij mbrëmë, ku tha se ky koncert po i ofron atij shumë kënaqësi dhe mundësi të njoh artistë të ndryshëm.
“Sihana Buduvuku është ajo që kujdeset më shumë për përzgjedhjen e veprave, ishte hera e parë me veprat e Polencit sonte, dhe po ashtu edhe me të Schubertit mbrëmë, mirëpo sonte interpretimi me orkestrën ishte më i vështirë dhe më stresuese, sepse veprat ishin më virtuoze edhe unë së bashku me publikun sonte ndjeva shumë kënaqësi”, u shpreh Bertrand Giraud për KultPlus.
Në pjesën e dytë të koncertit e gjithë vëmendja u zhvendos tek Orkestra Harkore, e cila solli me një ndjeshmëri të lartë muzikore veprat e Brittenit. Sihana Badivuku, e cila pos interpretimit të shkëlqyer në violinë, në të njëjtën kohë dirigjonte orkestrën me shikim. Së bashku me zëvendëskoncert mjeshtrin Visar Kuci, prapa tyre ishin reshtur edhe njëmbëdhjetë violinistë, kurse përballë saj katër instrumentist të violës dhe katër të violoncellos dhe matanë tyre ndodheshin dy artistë në kontrabas.
Në momentin kur ambienti u mbush nga tinguj të thellë, e publiku dukej se kishte mbetur pa frymë, një zë tjetër i papritur i shtohej këtij interpretimi. Një zë i maces që nuk dihej se nga vinte, bëri audiencën të kërkonte me sy burimin e tingullit të saj, duke u dhënë pas buzëqeshjeve. Mirëpo, Orkestra e tejkaloi me një buzëqeshje shumë të lehtë këtë zë, duke arritur që për të disatën herë në mënyrë shumë të natyrshme ta kthej vëmendjen e publikut drejt vetes.
Sihana Badivuku, drejtoreshë artistike e këtij festivali tregoi për KultPlus se raste të tilla përsëriten shumë shpesh, e që lidhen me problemet e infrastrukturës dhe mungesën e një salle koncertale ndërsa u shpreh shumë e lumtur që sonte sollën një energji të re nga Orkestra Harkore e Festivalit KamerFest.
“Unë jam shumë e lumtur që sot erdhi një energji e re e vajzave dhe djelmoshave që më të vërtetë janë gjenerata të reja të harkorve nga Universiteti i Prishtinës dhe Universitetit të Tetovës. Ishte kënaqësi shumë e madhe të kesh këta solistë të rinj dhe këto janë vepra premierë, që sonte janë ekzekutuar për herë të parë jo vetëm për KamerFest por edhe për gjithë Kosovën. Për kaq kohë të shkurtër jemi munduar ta japim maksimumin dhe sonte jemi të lumtur që publiku e shijoi këtë kënaqësi”, tregoi Badivuku për KultPlus.
Të premten festivali KamerFest Kosova do të sjellë koncertin e shtatë në hapësirat e Amfiteatrit të Bibliotekës Universitare. Duke filluar nga ora 20:00 do të interpretojnë pianisti nga SHBA-ja, Derek Han, Sihana Badivuku në violinë 1 dhe Rron Bakalli në violinë 2, Blerim Grubi në violë dhe Frank S.Dodge në violoncello. /KultPlus.com
Një zë i fuqishëm burri po këndonte rreth gjysmë ore pa nisur koncerti. Ushtrimet e vokalit janë në kërkim të perfeksionit, që publiku ta marrë emocionin më pas në formën më të përkryer, shkruan KultPlus.
E kur koncerti nisë, i njëjti zë sjellë në shqip Antonio Caladara. “Ti pa mëshirë” e nisi mbrëmë koncertin e tretë të Festivalit të Muzikës Kamertale Kamerfest në kryeqytet, me Frano Luffin në bass dhe Klevis Gjergjin në piano. Dyshja, me përjashtim kur në skenë doli edhe Sihana Badivuku në përcjellje, për rreth 90-të minuta e mbajtën publikun në ethe duke e mbizotëruar skenën e vogël në Amfiteatrin e Bibliotekës Universitare në kryeqytet.
Dyshja nga Shkodra erdhën me një repertor që të gjuante emocionalisht nga Mozarti, te Shuberti, tek kënga popullore shqipe “Moj e Vogël”, e deri tek Prenk Jakova dhe një prej kohëve të Operës së njohur Skanderbeg.
Frano Lufi tregoi se në Kosovë ka interpretuar edhe para dhjetë vitesh dhe se kësaj radhe është kthyer në partiturat e fillimit të jetës së tij si këngëtar, për ti sjellë ato në Prishtinë.
“Kur u ftova për këtë festival, thashë me vete pse mos ta sjellë ushtrimin tim të parë të kantos në Shkodër, dhe më pas shkova në partiturat e mia të hershme të cilat janë përkthyer edhe në shqip. Sonte, pos këtij publiku të veçantë të cilin e falënderoj tej mase, duhet të falënderoj edhe përkthyesit e këtyre veprave, emrat e të cilëve shpesh nuk figurojnë në vepra. Meritat i takojnë Luigj Gurakuqit, Haki Bejlerit e përkthyesve të tjerë” tregon për KultPlus Lufi.
Programi muzikor i përgatitur këtë natë u shpjegua paraprakisht çdo performance nga vetë Frano Lufi. Lufi, i lindur në Shkodër, shpërngulet në Itali në vitin 1992, për të vazhduar me paraqitjet e tij në Romë, Verona, Napoli, Genova, Parma, për të arritur edhe deri në teatrin prestigjioz “La Scala” në Milano. Ai ka performuar në operat “Cenerentola”, “Falstaf”, “Lucia e Lamermurit”, “Don Giovanni”, “Aida”, “Boheme”, “Madama Butterfy” e role të tjera.
Krahas tij, jo më pak i saktë e i përjetuar erdhi Klevis Gjergji. Shkodrani i lindur në vitin 1987, në vitin 2013-të fillon studimet e doktoraturës në Piano pranë Universitetit të Arteve në Fakultetin e Muzikës në Beograd, nën drejtimin e Profesoreshës Nevena Popoviq, të cilat i përfundon në vitin 2016-të.
“Për mua ishte një program që kërkonte impenjim dhe përkushtim të madh, por është nderë dhe kënaqësi ta përcjellësh një emër si Frano Lufi” tregon Gjergji.
Nuk është hera e parë për të që vjen në Prishtinë, por thotë se gjithmonë ana pianistike drejt shoqërimit të një artisti tjetër kërkon bashkim në unison me këtë artist, shkruan KultPlus.
“Nga ana pianistike duhet të bëhesh një me artistin, pastaj çdonjëri e ka stilin e vet por kërkohet pak kohë deri ta gjesh mënyrën të përshtatesh mirë. Ishte eksperiencë e bukur të kthehesha në Prishtinë, pasi më parë kam pasur edhe koncert recital e kësaj radhe shoqërova një artist tjetër” tregon Gjergji.
KamerFest do të vazhdojë me koncertin tjetër me datë 23 tetor, me fillim prej orës 20:00 në Amfiteatrin e Bibliotekës Universitare, me Militiades Cassaras në violoncello dhe Klevis Gjergjin në piano./ KultPlus.com
Sihana Badivuku, drejtoreshë e festivalit, tregon se me këtë edicion të 18-të fokusi po kthehet kah rinia dhe instrumentistët e rinj, pasi po mbushen gati dy dekada të festivalit dhe tanimë tek publiku është krijuar një edukatë për muzikën klasike.
Arbër Selmani
Vetëm dy dekada jetë, Andi Duraku secilës garë i vërsulet për fitore. Pianisti nga Gjakova, i lindur në vitin 1997, e ka tanimë një mini-biografi në të cilën figurojnë disa çmime të para, pjesëmarrje në Berlin e në Francë e në Itali, masterklase me emra të njohur të muzikës e instrumenteve klasike.
Andi Duraku mbrëmë për disa minuta qëndroi në piano i përcjellë nga instrumentistët tjerë në koncertin që sjellë frymën e re të instrumentistëve kosovarë, në kuadër të Festivalit të Muzikës Kamertale Kosova KamerFest.
Duraku e nisi këtë koncert të mbrëmshëm shoqëruar nga Sihana Badivuku, Mrika Hocha, Festim Haxhikadria, Dijana Osaj, Pleurat Doli, Festim Fanaj, Rron Bakalli, Vlora Citaku, Fortesa Fejza, Blerim Grubi, Driton Gaxha, Brikena Berisha, Antonio Gashi, Fraim Gashi dhe Miltiades Cassaras. Koncerti i Bahut erdhi në formën e tij më të mirë në pjesën e parë të koncertit, të mbajtur në sallën e re muzikore të Bibliotekës Universitare në kryeqytet, shkruan KultPlus.
Duraku, fitues i “Pianisti i Ri” dhe “ArsKosova 2017” tregon se ndihet i privilegjuar dhe i kënaqur që pati mundësinë të performojë me një formacion të tillë, para një numri njerëzish të cilët mbushën sallën dhe madje pritën në këmbë për të ndjekur koncertin gati dy orësh.
“Unë e interpretova koncertin numër 1 të Bahut, dhe është e vështirë pasi është ndër ato koncerte të rralla ku nuk ka pushime dhe vepra vetëm ecën e ecën si motor. Unë e kam nisur punën për këtë koncert para dy muajsh por gjithçka ishte e lehtë pasi interpretova krahas emrave që janë niveli më i lartë i instrumentistëve që ka vendi ynë” tregon Duraku pas koncertit dhe duartrokitjeve që morri nga publiku.
Profesoresha Besa Luzha, një prej organizatoreve të Kamerfestit në edicionin e tij të parë para 18-të vitesh, tregon se koncerti erdhi i fuqishëm.
“Festivalet e tilla kamertale e kanë këtë qëllim, të tregojnë muzikimin e përbashkët pasi këta artistë takohen për një kohë të shkurtër para koncertit dhe e sfidojnë veten më pas për tu bashkuar në instrumente. Të dy veprat janë të vështira, sikur koncerti në d-mol i Bahut por edhe vepra e Tchaikovskyt, por mendoj se erdhën fuqishëm, si një përzierje e atmsoferës së shkollës ruse por edhe pak emocion italian shkaku i veprës së dytë” tregon Luzha.
Pjesa e dytë e koncertit solli të përthekuar në katër kohë Tchaivkosvkyn, kësaj radhe për sekstet dhe me gjashtë instrumentistë që përcollën mrekullueshëm emocionin duke mos lënë njëri tjetrin prapa në bashkimin e tyre muzikor. Sihana Badivuku e Festim Fanaj në violinë, Blerim Grubi e Driton Gaxha në violë dhe Antonio Gashi e Miltiades Cassaras në violoncello nuk e patën të lehtë të zënë ritmin e shpejtësisë që kërkon një produkt i shkollës ruse, sikur “Souvenir de Florence” nga Tchaikovsky.
Sihana Badivuku, drejtoreshë e festivalit, tregon se me këtë edicion të 18-të fokusi po kthehet kah rinia dhe instrumentistët e rinj, pasi po mbushen gati dy dekada të festivalit dhe tanimë tek publiku është krijuar një edukatë për muzikën klasike.
“Në fakt ne po i përgatisim gjeneratat e reja, sepse janë pjekur kushtet dhe kanë ardhur kuadrot e reja muzikore, njëjtë sikur Andi Duraku i cili sonte ishte i magjishëm por edhe na përfaqësoi denjësisht në Filarmoninë e Berlinit” tregon Sihana për KultPlus.
“Është megjithatë mëkat që festivalet e tilla po përkrahen në mënyrë modeste edhe sot, sepse unë ende i qëndroj parimit të edicionit të parë, se Kosovës duhet t`i vie era Evropë, dhe po punojmë në atë aspekt me të gjithë ekipin por edhe artistët e ftuar në festival” tregon Badivuku.
Festivali Kamerfest do të vazhdojë sonte, me 19 tetor, në ora 20:00 në Amfiteatrin e Bibliotekës Universitare me lojën e Frano Lufit dhe Klevis Gjergjit nga Shqipëria, për të sjellë veprat e Verdit, Schubertit, Mozartit por edhe këngët e ndryshme popullore shqiptare. / KultPlus.com
Sot më 18 tetor do të bëhet hapja zyrtare e festivalit ‘Kosova KamerFest’, shkruan KultPlus.
Edicioni i 18-të i këtij festivali, do të sjellë emra të ndryshëm të muzikës klasike në vend, ndërsa sonte do të dalë para publikut kosovar ‘Fryma e re e garës ARSKosova’ dhe Orkestra Harkore KamerFest.
Do të interpretojnë: Andi Duraku-piano, ‘Fituesi Grand Prix’ në Garën ArsKosova, Sihana Badivuku-violinë 1, Festim Fanaj-violinë 2, Blerim Grubi-violë 1, Driton Gaxha-violë 2 dhe Miltiades Cassaras-violoncelo 2. Sonte do të shpalosen veprat e Bach-Koncert për piano d-minor, BËV 1052 dhe Tchaikovsky- Souvenir de Florence.
Koncerti mbahet në Amfiteatrin e Bibliotekës Universitare me fillim nga ora 20:00./ KultPlus.com
