OKB për Ditën Botërore të Mjedisit: Natyra, në gjendje emergjence

Posted on by Kult Plus

Sot është Dita Botërore e Mjedisit. OKB thotë se, në të gjithë botën, ekosistemet janë të kërcënuara. Nga pyjet dhe tokat e thata te tokat bujqësore dhe liqenet, hapësirat natyrore nga të cilat varet ekzistenca e njerëzimit po arrijnë një pikë kthese.

Sipas Konventës së OKB-së për Luftimin e Shkretëtirëzimit, deri në 40 % e tokës së planetit është e degraduar dhe kjo ndikon drejtpërdrejt ne jeten e gjysmës se popullsisë së botës. Numri dhe kohëzgjatja e thatësirave është rritur me 29 % që nga viti 2000. Nese nuk do të merren masa konkrete, thatësirat mund të prekin mbi tre të katërtat e popullsisë së botës deri në vitin 2050.

Kjo është arsyeja pse Dita Botërore e Mjedisit 2024 përqendrohet në rimekembjen e tokës, ndalimin e shkretëtirëzimit dhe ndërtimin e rezistencës ndaj thatësirës nën sloganin “Toka jonë. E ardhmja jone. Ne jemi restaurimi i brezit.”

OKB bën thirrje të mos kthejmë kohën pas, por të rritim pyje, të ringjallim burimet e ujit dhe të kthejmë tokat, për t’u bërë ne brezi që mund të bëjmë paqe me tokën.

Sipas OKB, koha po mbaron dhe natyra është në gjendje emergjence. Për të mbajtur ngrohjen globale nën 1.5°C këtë shekull, ne duhet të përgjysmojmë emetimet vjetore të gazeve serrë deri në vitin 2030. Pa veprim, ekspozimi ndaj ndotjes së ajrit përtej do të rritet me 50 % brenda dekadës dhe mbetjet plastike që derdhen në ekosistemet ujore gati do trefishohen deri në vitin 2040./atsh/KultPlus.com

Sot hapet Panairi i 24-t i librit “Prishtina 2024”

Posted on by Kult Plus

Ditën e sotme, duke filluar nga ora 12:00, do të hapet Panairi i 24-t i librit “Prishtina 2024”.

Ministria e Kulturës, Rinisë dhe Sportit ka treguar se panairi do të vjen me moton “Përgjigjja është libri” dhe është organizuar nga Shoqata e Botuesve të Kosovës, me ndihmën dhe bashkëpunimin e vyer nga Ministria e Kulturës, Rinisë dhe Sportit, Komuna e Prishtinës dhe Pallati i Rinisë.

Duke filluar nga sot, panairi do të jetë i hapur për vizitorë çdo ditë nga ora 9:00 deri në 21:00, ndërsa më datën 9 qershor do të mbyllet në ora 19:00.

Në panair do të marrin pjesë rreth 100 botues nga Kosova, Shqipëria, Maqedonia e Veriut dhe Diaspora, numri i titujve të rinj do të jetë rreth 2000, kurse numri i titujve të fundit rreth 6000.

Poashtu do të jenë mbi 40 aktivitete, promovime dhe autorë të pranishëm, ku spikasin i ftuari i nderit shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots

Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës. Ky panair përkon edhe me përvjetorë të rëndësishëm që do të shënohen me aktivitete, përkujtime e debate./KultPlus.com

Ronald Reagan: Nëse keni sukses në politikë ka shumë shpërblime, në qoftë se dështoni ju gjithmonë mund të shkruani një libër

Posted on by Kult Plus

Më 5 qershor 2004, në moshën 93 vjeçare, vdiq Presidenti i SHBA-ve, Ronald Reagan.

Një politikan, komentator, aktor dhe anëtar i Partisë Republikane, shërbeu si President i 40-të i Shteteve të Bashkuara nga 1891 deri në 1989. Konsiderohet si një nga presidentët me një karrierë të bujshme në sferën e politikës në Amerikë.

Ronald Reagan ishte president për dy mandate rresht dhe konsiderohet një ndër presidentët më të admiruar, të dashur nga amerikanët.

Ai vlerësohet për kontributin e jashtëzakonshëm për t’i dhënë fund Luftës së Ftohtë me ish-Bashkimin Sovjetik, luftën kundër drogës, për ringjalljen e ekonomisë, për frymëzimin e optimizmit për shumë amerikanë.

Ai njihej për aftësi të veçanta në komunikim.

 Disa nga thëniet e tij më të mira janë:

“Supozohet se politika është profesioni i dytë më i vjetër. Unë kam kuptuar që ai ka shumë ngjashmëri me profesionin e parë më të vjetër.”

“Njeriu ka avantazhe kur zgjidhet President. Ditën pasi u zgjodha, notat e mia të shkollës së mesme u klasifikuan sekret.”

“Politika nuk është një profesion i keq. Nëse keni sukses ka shumë shpërblime, në qoftë se dështoni ju gjithmonë mund të shkruani një libër.”

“Nuk kemi borxh një miliard dollarë, pasi nuk kemi taksuar mjaftueshëm; kemi borxh një miliardë miliard dollarë, pasi kemi shpenzuar shumë.”

“Informacioni është oksigjeni i epokës moderne. Ai kapërcen përmbi muret me telat me gjemba, ai depërton përtej kloneve me korrent.”

“Sot, në qoftë se ju shpikni një çark më të mirë minjsh, qeveria vjen me një mi më të mirë.”

“Unë i bëj thirrje komunitetit shkencor, atyre që na dhanë armët bërthamore, për të orientuar talentet e tyre të mëdha tani ndaj çështjes së njerëzimit dhe të paqes në botë: të na japin mjetet për t’i bërë këto armë bërthamore të pafuqishme.”

“Qeveria gjithmonë gjen një arsye për paratë që ajo merr.”

“Nga katër luftëra që i kam parë në jetën time, asnjëra nuk erdhi për shkak se Amerika ishte tepër e fortë.”

“Udhëheqësi më i madh nuk është domosdoshmërisht ai që bën gjërat më të mëdha. Është ai që i bën njerëzit të bëjnë gjërat më të mëdha.”

“Liria përparon kur feja është e gjallë dhe sundimi i ligjit nën Perëndinë është pranuar.”

“Qeveria ekziston për të na mbrojtur nga njëri-tjetri.”

“I gjithë ndryshimi i madh në Amerikë fillon në tryezën e darkës.”

“Pushteti i koncentruar gjithmonë ka qenë armik i lirisë.”

“Pikëpamja e qeverisë për ekonominë mund të përmblidhet në një fjali të shkurtër: Nëse lëviz, tatoje atë. Në qoftë se ajo vazhdon të lëvizë, rregulloje atë. Dhe në qoftë se ajo ndalon së lëvizuri, subvencionoje atë.”

“Qeveria nuk i zgjidh problemet, por i subvencionon ato.”

“Beso, por verifiko.”

“Detyra e parë e qeverisë është t’i mbrojë njerëzit, jo të drejtojë jetën e tyre.”

“Ne duhet të refuzojmë idenë se çdo herë që një ligj është shkelur, shoqëria është më fajtore se shkelësi i ligjit. Është koha për të rivendosur rregullin amerikan që çdo individ është përgjegjës për veprimet e tij.”

“Unë kam menduar shumë kohë se si do të dukeshin Dhjetë Urdhërimet në qoftë se Moisiu do t’i kishte dhënë nëpërmjet Kongresit të Shteteve të Bashkuara.”

“Ne nuk mund t’i ndihmojnë të gjithë, por të gjithë mund të ndihmojnë dikë.”

“Si mund të përkufizoni një komunist? E po, ai është dikush që lexon Marksin dhe Leninin. Dhe si mund të përkufizoni një anti-komunist? Ai është dikush që e kupton Marksin dhe Leninin.”

“Fjalët më të tmerrshme në gjuhën angleze janë: Unë jam nga qeveria dhe ndodhem këtu për të ndihmuar.”

“Një popull që është i lirë të zgjedhë, gjithmonë do të zgjedhë paqen.”

“Recesioni është kur një fqinj humb punën e tij. Depresioni është kur ti humb punën tënde.”

“Për demokracinë ia vlen të vdesësh, sepse kjo është forma më shumë e nderuar e qeverisë e hartuar ndonjëherë nga njeriu.”

“Brenda kapakëve të Biblës janë përgjigjet për të gjitha problemet me të cilat njerëzit ballafaqohen.”

“Të rrish duarkryq duke shpresuar se një ditë, disi, dikush do të bëjë drejtësi, është sikur të shkosh në gojën e krokodilit, duke shpresuar se ai do të të hajë ty të fundit.”

“Nëse duam vendin tonë, ne duhet gjithashtu të duam bashkatdhetarët tanë.”

“Ne kurrë nuk do të mposhtemi, nëse nuk do të heqim dorë nga Zoti.”

“Kur ju nuk mund t’i bëni ata të shohin dritën, bëjini ata të ndjejnë ngrohjen.”

“Nuk ka kufizime në mendjen e njeriut, nuk ka mure rreth shpirtit të njeriut, nuk ka pengesa për përparimin tonë, përveç atyre që ne vetë ngremë.”

Në vitet e fundit të jetës së tij, ai u diagnostifikua me sëmundjen e alzhaimerit. Një çrregullim i pashërueshëm neurologjik që i shkatërron qelizat nervore të trurit.

Ai vdes në pasditen e 5 qershorit, në shtëpinë e tij në Bel Air, Kaliforni. / KultPlus.com

Bazilika paleokristiane, destinacion i ri për vizitorët në Elbasan

Posted on by Kult Plus

Mozaiku i bazilikës paleokristiane të Elbasanit është hapur për vizitorët prej gati një muaji, duke shtuar një monument të rëndësishëm kulture të kategorisë së parë në ofertën turistike të qytetit.

Me qindra vizitorë, si edhe vetë qytetarët elbasanas kanë vizituar këtë bazilikë, e cila është zbuluar në vitin 2007 dhe shpallur Monument Kulture në vitin 2010, ku sipas historianëve dëshmon lashtësinë e qytetit të Elbasanit.

Shtatëmbëdhjetë vjet më parë në qendër të qytetit, fare rastësisht u zbuluan themelet e një mozaiku të lashtë.

Specialistët e arkeologjisë e vlerësuan këtë si një ndër zbulimet më të rëndësishme. Gjatë gërmimeve të para, një grup arkeologësh zbuloi dy varre në një thellësi prej mbi tre metrash, të cilat i përkasin shekullit të V.

Studimet paraprake tregojnë se bazilika ka përmasa të mëdha, dhe aktualisht është zbuluar një pjesë e Naosit dhe e Nefit jugor. Muri që kufizon Nefin jugor është i zbukuruar me afresk, i cili ruhet mirë.

Mbi dyshemenë e bazilikës janë gjetur fragmente të një amfore nga Gaza e Palestinës, duke treguar se bazilika paleokristiane është shkatërruar përfundimisht në fundin e shekullit të gjashtë ose në fillimin e shekullit të shtatë të erës sonë.

Arkeologët që kanë studiuar murin janë shprehur se ai nuk i përket xhamisë së Namazgjasë, por mendohet të jetë muri i një kalaje të vjetër që i përket periudhës paraosmane.

Kreu i Agjencisë së Kulturës dhe Turizmit në Elbasan, Artur Guni, tha se “në plan është vijimi i gërmimeve, pasi bazilika është në një sipërfaqe më të madhe dhe ende e pazbuluar tërësisht”.

Bazilika paleokristiane e zbuluar në vendin e quajtur “Rrapi i Bezistanit” në Elbasan është një nga monumentet më të vjetra të kultit ortodoks të zbuluara në Shqipëri, ku ruhet mirë një mozaik i tillë./atsh/KultPlus.com

Sot shënohet Dita Botërore e Mjedisit 

Posted on by Kult Plus

Dita Botërore e Mjedisit e njohur nganjëherë edhe si Dita ndërkombëtare e mjedisit është një ditë festive e cila organizohet më datën 5 qershor të çdo viti. Kjo datë është mjeti kryesor i OKB-së për inkurajimin e vetëdijes dhe veprimit për mbrojtjen e mjedisit tonë në nivel global dhe lokal.

5 qershori u caktua si Dita Botërore e Mjedisit në vitin 1972, nga Asambleja e Përgjithshme e OKB-së me qëllim të rritjes së vetëdijes rreth çështjeve të mjedisit si dhe për të tërhequr vëmendjen politike ndaj këtyre çështjeve aq sa edhe për të nxitur veprimin individual në këtë drejtim. U zgjodh kjo datë sepse përkon me ditën e hapjes e Konferencës së Kombeve të Bashkuara mbi Mjedisin, që u mbajt në vitin 1972 në Stokholm, nën udhëheqjen e Programit Mjedisor të Kombeve të Bashkuara. 5 qershori si datë festive dhe botërore e mjedisit ka nisur të festohet që nga viti 1974.

Qëllimi i kësaj ngjarje është të nxisë aktivitete dhe aksione për të arritur ndryshime pozitive në mbrojtjen e mjedisit. Kjo ditë zakonisht përcillet me një tematikë të caktuar.

Në të kaluarën tema të kësaj ngjarje kanë qenë kujdesi për tokën dhe ujin, mbrojtja e shtresës së ozonit, ndryshimet klimatike dhe zhvillimi i qëndrueshëm duke pasur gjithnjë në fokus ruajtjen e shëndetit human. / KultPlus.com

Media britanike “Bristol Live”: Eksploroni Tiranën, kryeqytetin mahnitës shqiptar

Posted on by Kult Plus

Një kryeqytet i gjallë dhe plot ngjyra në Ballkan i është shtuar listës së destinacioneve ku turistët nga Bristoli mund të fluturojnë drejtpërdrejt, shkruan në një artikull e përditshmja britanike “Bristol Live”.

Nga muaji i ardhshëm, Aeroporti i Bristolit do të ofrojë fluturime direkte drejt Tiranës në Shqipëri, që zgjasin pak më shumë se tre orë.

Nëse jeni në kërkim të një vendpushimi të bukur larg plazhit dhe turmave të vizitorëve, atëherë Tirana në Shqipëri mund të jetë destinacioni ideal për ju.

Tirana ndodhet në qendër të Shqipërisë dhe, ndonëse jo pranë detit Mesdhe, ajo ofron një klimë të butë.

Me një bollëk arkitekturash dhe parqesh të bukura, ju mund të kryeni shumë aktivitete, duke e bërë atë destinacionin perfekt për pushime verore në qytet.

Sipas “Skyscanner”, në javën e dytë të qershorit, vizitorët nga Bristoli mund të kryejnë fluturime direkte vajtje-ardhje për në Tiranë për vetëm 89 paund personi.

Nëse preferoni të shkoni me linjë direkte, atëherë fluturimet do të kushtojnë rreth 95 paund me “Ryanair”.

Ndërsa ka një numër të konsiderueshëm opsionesh për pushime në qytet me fluturime direkte nga Bristoli, kjo do të jetë hera e parë që këta vizitorë fluturojnë me linjë direkte në kryeqytetin e Shqipërisë.

Ju mund të bëni një vizitë në Bunk’Art 1, një bunker anti-bërthamor i ndërtuar nga qeveria komuniste, i cili tani është shndërruar në një qendër historike dhe arti.

Gjatë vizitës në Shqipëri dhe veçanërisht në Tiranë, ju mund të njiheni me historinë e lashtë të vendit.

Muzeu Bunk’Art 1 është një nga vendet më të mira për t’u njohur me të kaluarën e Shqipërisë.

Tirana ja vlen të vizitohet, edhe nëse nuk jeni adhurues i historisë.

Një tjetër vend i mrekullueshëm që rekomandohet të vizitohet është teleferiku “Dajti Ekspres” i cili ofron pamje mahnitëse të qytetit nga maja e Malit të Dajtit.

Teleferiku “Dajti Express” është nje nga atraksionet e preferuara në Tiranë.

Ballkoni i Malit të Dajtit është një vend relaksi dhe argëtimi, gjithashtu.

Ju mund të shijoni një drekë të shijshme dhe një shishe verë në “Restorant Ballkoni”.

Ky restorant është ndërtuar pikërisht në majë të shkëmbit malor, duke ofruar një pamje magjepsëse të Tiranës.

Nëse dëshironi të eksploroni kryeqytetin shqiptar, sheshi Skënderbej u mundëson vizitorëve të zbulojnë lehtësisht qytetin dhe monumentet e tij të shumta./atsh/KultPlus.com

Poeti që sfidoi regjimin bolshevik

Posted on by Kult Plus

Osip Mandelstam, poeti dhe eseisti rus, është nga poetët më të mëdhenj të letërsisë ruse të shekullit XX, një shekull i hidhur, i cili nuk resht së lëshuari sfida mizore kundrejt poezisë.

Lindi në Varshavë në vitin 1891, në një familje të kulturuar dhe vdiq i drobitur dhe i grimcuar prej shekullit “çakall” dhe persekutimet staliniane në vitin 1938, rrugës drejt kampit ku do ta prisnin pesë vjet punë e detyruar.

Kur u shpërngulën në Shën Petërburg poeti ishte vetëm pesë vjeç. Që fëmijë mësoi gjermanishten dhe frëngjishten. Ndoqi studimet në shkollën prestigjioze Tenichev në vitet 1900-1907. Më pas studioi në universitetin e Sorbonës në Paris, ku ndoqi kurset e Joseph Bedier dhe Henri Bergson. Po aty zbuloi edhe magjinë e poezisë së Verlenit. Shkon në Gjermani dhe kur rikthehet në Rusi, në moshën 20-vjeçare, vijon studimet për filozofi në universitetin e Shën Petërburgut, ku edhe regjistrohet dhe boton poemat e tij të para, në vitin 1913, në revistën “Apollon”.

Osip Mandelstam bën pjesë në gjeneratën e poetëve lindur në vitet 1890, së bashku me Ana Ahmatovën, Boris Pasternakun, Marina Cvetaevën, Majakovskin etj, që lanë gjurmë të pashlyeshme si krijues të rinj të letërsisë ruse. Jeta e trishtë dhe historia e Osip Mandelstam u bë e njohur falë botimit të kujtimeve të bashkëshortes së tij, në vitin 1972, në Francë: “Kundër gjithfarë shprese”. Pas shumë poshtërimesh, akuzash të padrejta, burgosjesh dhe syrgjynosjesh, vdiq nga uria dhe i ftohti, në moshën 47 vjeçe. Vetëm në 28 tetor 1987, nën qeverisjen e Gorbaçovit, emri i tij u pastrua plotësisht nga akuzat e vitit 1934.

Më 27 dhjetor 1938, do vdiste në thellësi të Siberisë, në një kamp tranzit në ferrin e Gulagut, duke e shndërruar stalinizmin, këtë kundërshtar gjakftohtë, një pasion negativ në përkorën e poetit, “mikun e të gjithëve”, – siç do shprehej vetë në vitin 1937, syrgjynosur në kampin e Voronezhit, ngaqë kishte shkruar një epigramë therëse “Alpinisti i Kremlinit” kundër Salinit.

Ky qe edhe provokimi i fundit i poetit ndaj tiranit në këtë duel të pamëshirshëm, i cili do vuloste fatin e tij.

Shumë i ri filloi të botonte dhe të merrte pjesë në diskutime të zjarrta midis poetëve. Me poezinë e tij sjell një përmasë të re të fuqisë dhe botës poetike, që shënoi një disidencë të fortë ndaj parime socrealiste në Rusi.

Më shpjer pra mesnatë, ku rrjedh Jenisej,

Ku pisha mbërrin gjer tek yjtë,

Se ujk unë nuk jam nga gjaku në dej,

Dhe veç i barabarti më mbyt.

“Osip Mandelstam është një mit. Në Rusi dhe në mbarë botën, e konsiderojmë si një martir të poezisë, që e pagoi veprën me jetën e tij. Mbi të gjitha është bërë i famshëm për faktin se qe viktimë e persekutimeve politike, si dhe ngaqë pati shkruar një poemë të pamëshirshme duke denoncuar Stalinin”, – shprehet Ralph Dutil.

“I butë, inteligjent, shpirtëror, elegant, madje edhe i hijshëm, i gëzueshëm, i zjarrtë, përjetësisht i dashuruar, i ndershëm, largpamës dhe i lumtur, edhe në terrin e sëmundjes nervore dhe të tmerrit politik, rinor, madje thuajse vocërrak, i çuditshëm dhe i kulturuar, besnik dhe krijues, i qeshur dhe i paepur, Mandelstam na ka ofruar një nga veprat më të lumtura të shekullit…”, – do shprehej Pier Paolo Paasolini.

Ai qe poet, teoricien, eseist, revolucionar i zhgënjyer, martir, por gjithnjë në beftë për të përgjuar mugullimin e kohës. Një dëshmi e jashtëzakonshme mbi vitet më prodhimtare të poetit të madh rus dhe mbi asfiksinë e kulturës që shoqëroi marrja e pushtetit nga Stalini.

Përbri emrave si Solzhenici dhe Pasternak, emri i Mandelstam ngjall rezistencën kundër regjimit të pamëshirshëm të Rusisë sovjetike. Ka shkruar “Zhurma e kohës”, “Timbri egjiptian”, “Udhëtim në Armeni”, “Poema të zgjedhura” etj.

Çiltërsia e theksit, thjeshtësia e tij tragjike, dinjiteti, humori, i japin kuptim të plotë emrit që autori e kishte shndërruar në devizën e tij: Nadejda që në rusisht nënkupton “shpresë”. Në veprat e tij kapim koherencën e një zëri që ka ditur ta zgjojë mahnitshëm të gjallin.

Të gjitha i humbëm, duke dashuruar,

Në dhjetor të vitit shtatëmbëdhjetë,

Dikush u grabit me vullnetin e popullit,

Tjetri grabiti veten e vet…/Hejza/ KultPlus.com

‘Motiv’, koncerti i Alban Skënderaj! Më 6 qershor në Arenën Kombëtare, koncerti jubilar që shënon 20-vjetorin e karrierës: Do jetë energjik

Posted on by Kult Plus

“Motiv” është koncerti që shënon 20- vjetorin e karrierës së artistit Alban Skënderaj.

Më 6 Qershor në Stadiumin “Air Albania” vijnë këngët më të dashura të repertorit të kantautorit që ja ka dalë gjithmonë të depërtojë në zemrat e publikut. Një produksion i kuruar në detaje, që ka për qëllim të zgjojë copëza të memories tonë kolektive.

“Ishte momenti për të kurorëzuar diçka të madhe. Thelbi është muzika, përmasat janë gjigante. Koncerti do jetë shumë i bukur dhe energjik, nuk do jetë ai koncerti meditativ dhe do ketë më shumë energji. Gjithsesi janë edhe momentet kyçe ku unë rrëfehem”, u shpreh këngëtari.

Hitet më të dashura të artistit, dhe këngët e tij të ndjera janë arsyeja për të bërë publikun bashkë një botë më të mirë, sepse muzika e bën botën më të mirë.

“Motiv” është koncerti që deri më tani ka thyer rekord në shitjen e biletave, duke tejkaluar çdo pritshmëri. Ndaj 6 qershori i dedikohet “Motiv”, i dedikohet muzikës dhe publikut./ Top Channel/ KultPlus.com

Shkrimtarët për fëmijë takim në QKLL, sfidat e kësaj letërsie

Posted on by Kult Plus

U mbajt sot në mjediset e Qendrës Kombëtare të Librit dhe Leximit një diskutim i frytshëm mbi letërsinë për fëmijë.

Ky takim që bëri bashkë shkrimtarë të letërsisë për fëmijë erdhi pas hapjes së thirrjes (më 1 qershor) së Fondit të Krijimtarisë Letrare për Fëmijë për vitin 2024, një fond i përvitshëm që mbështetet nga QKLL.

Pjesë e tryezës së diskutimit ishin fitues të këtij fondi ndër vite si: Xhahid Bushati, Rovena Rozhani, Teuta Dhimarko Kasoruho, si dhe shkrimtarë të afirmuar të letërsisë për fëmijë si Adelina Mamaqi, Lefteri Lloshe, Natasha Poroçani, Anila Mullaj etj, të cilët ndanë me të pranishmit sfidat e kësaj letërsie si një letërsi e domosdoshme në rritjen dhe edukimin e brezave që vijnë.

Ata ngritën shqetësimin që kjo letërsi të mos ngelet e izoluar por të mbështetet vit pas viti, pasi mbi të gjitha këto krijime për fëmijë kanë edhe vlera pedagogjike.

Sipas tyre, kjo letërsi nga njëra anë zhvillon aftësitë njohëse të fëmijës, u zgjeron horizontin mendor, në anën tjetër, zhvillon imagjinatën pasi, krijime të tilla i përshtaten mirë të menduarit konkret dhe ende të pazhvilluar të fëmijëve.

Prej 3 vitesh, Qendra Kombëtare e Librit dhe Leximit e mbështet këtë letërsi përmes një fondi të dedikuar.
Nëpërmjet këtij fondi, QKLL-ja synon të promovojë letërsinë për fëmijë, pasi krijuesit për fëmijë janë ata që rrisin dashurinë te fëmijët për librin, që ngacmojnë te fëmijët fantazinë për t’u bërë shkrimtar, hapin dyert e botës fëmijërore, ku mbruhet motivi për të shkruar, për të krijuar dhe për të dashur gjuhën.

Fitues të këtij fondi ndër vite:
Romani “Udhëtim drejt planetit Arbër” me autor Luan Ramën.
Libri didaktiko-letrar “Grama Tik-Tok” me autore Rudina Çupin.
Përralla “Fani në kërkim të dritës” me autore Rovena Rrozhani.
Libri “O trumcak bredharak!”, Xhahid Bushati
Libri “Arushi Oja”, Eleni Birçaj
Sevi Agolli me librin «Hajdutja e buzëqeshjeve»,
Fatmir Gjestila me librin «Lotët e Marit»,
Zimo Krutaj me librin «Jona dhe deti».
Teuta Dhimarko Kasoruho me librin “Aventura e Bebit”
Rovena Rrozhani me librin “Arinjtë duan të fluturojnë”
Xhahid Bushati me librin “Alfabeti i Bletës”./ balkanweb/ KultPlus.com

Kuturu

Posted on by Kult Plus

Poezi nga Timo Flloko

Eci rrugëve kot, kuturu
dhe s’di ku shkoj,
xurxull jam prapë unë- se ajo,
një bohem nuk e do.

Sa të desha, shpirt s’mund ta dish,
të vodhën ty – pabesisht,
me pije mbys dhimbjen pa fund…

Sa e lumtur je, unë s’e di,
me atë që jeton,
mund ta blejë ai për ty dhe botën,
vetëm zemrën, jo!

Mbeti shkretë tani streha jonë,
në luks je ngrirë, në kyç trishton,
si në muze, si një Xhokondë.

Unë në jetë i pasur s’jam vërtet,
por në ëndërr e shoh veten mbret,
nëpër pube tok me miqtë harxhoj,
unë hënën si monedhë.

Ti po fle tani, Xhokonda ime,
shiu si det mbi mua zbrazet,
as rrufetë s’më vrasin dot.
se ka një Zot! / KultPlus.com

Java e Kulturës Italiane, nis edicioni i tetë i ‘Albania International Guitar Festival’

Posted on by Kult Plus

Albania International Guitar Festival e hapi mbrëmë siparin e edicionit të tetë, duke vijuar me aktivitete të shumta përgjatë gjithë muajit.

Festivali u hap me artistin italian, Roberto Tascini, koncerti i të cilit u zhvillua në Liceun Artistik, salla “Tonin Harapi”, në kuadër të Javës së Kulturës Italiane në Shqipëri. Prej më shumë se 20 vjetësh ai interpreton si solist, solist me orkestër dhe në ansambël (EONGuitarQuartet, DuoPorto), në më shumë se 300 koncerte në 20 vende të ndryshme.

Diplomuar në Universitetin e Bolonjës për Ruajtjen e Trashëgimisë Kulturore, si dhe në kitarë dhe arsim muzikor, Tascini në vitin 2005 u bë “Mjeshtër i Artit” në kitarë, duke arritur shkëlqyeshëm “Konzertdiplom” në Musikhochschule në Luzern-Zvicër. Aktualisht është profesor i kitarës në Konservatorin G.Rossini në Pesaro-Itali.

Do të jenë gjithsej tetë artistë ndërkombëtarë nga Italia, Austria, Gjermania, Spanja dhe Holanda të cilët do të zhvillojnë koncerte në Tiranë, Berat, Rubik e Shkodër. Masterclass-e, workshop-e dhe aktivitete të tjera do të organizohen nga artistët e ftuar./atsh/ KultPlus.com

‘Gratë e Tiranës’, ekspozitë për artin dhe solidaritetin në Piramidën e Tiranës

Posted on by Kult Plus

Ekspozita “Gratë e Tiranës”, nismë e Aleancës së Grave Këshilltare Bashkiake të Tiranës do të hapet më 5 qershor tek Piramida në Tiranë.

Kjo ekspozitë synon të mbështesë gratë artiste të qytetit, të cilat deri tani nuk kanë pasur mundësinë të ekspozojnë pikturat e tyre për publikun.

Pjesëmarrëset janë nga mosha 12-vjeçare e deri pensioniste, vijnë nga shtresa të ndryshme të shoqërisë dhe kanë profesione nga më të larmishmet.

Qëllimi i ekspozitës është që këto gra pjesëmarrëse, nëpërmjet punëve të tyre dhe rrjetit artistik që po krijojnë, të mbështesin gra të tjera në nevojë në qytet.

Ekspozita ka pasur shumë interes nga publiku në rrjetet sociale. Ajo synon të sjellë në vëmendje të publikut lidhjen e punimeve fizike të autorëve me mbështetjen e tyre online dhe është e para ekspozitë, që po synon të ketë një kënd të veçantë për pikturën digjitale, si një drejtim i artit pamor që nuk ka pasur vëmendjen e duhur.

Ekspozita do të qëndrojë e hapur deri në 8 qershor./atsh/ KultPlus.com

‘Dikotomi’, çelet ekspozita e Ilir Butkës në FAB

Posted on by Kult Plus

Artisti dhe pedagogu i Fakultetit të Arteve të Bukura, Ilir Butka, çeli ekspozitën e tij vetjake të titulluar “Dikotomi”.

Ekspozita me kurator Petraq Papën, u çel më 3 qershor dhe do të vazhdojë të presë publikun artdashës deri më 8 qershor, në Galerinë FAB.

Vetë artisti e konsideroi këtë si një moment të rëndësishëm, pasi është një përmbledhje e punës intensive të këtyre 4 viteve të fundit, që ai e ndan me kolegët artistë, pedagogët, studentët e Universitetit të Arteve dhe dashamirët e artit.

Kjo është ekspozita e parë vetjake e Ilir Butkës i cili më herët ka marrë pjesë në mjaft ekspozita kolektive brenda dhe jashtë vendit.

“I jam rikthyer impenjimit aktiv me pikturën pas një shkëputjeje shumëvjeçare dhe në këtë rikthim unë propozoj një këndvështrim komplet të ri për mua, totalisht i bazuar mbi abstrakten. I isha larguar pasionit dhe profesionit të hershëm pikturës me mendimin se një ditë do të kthehesha, me sigurinë që piktura do të ishte gjithmonë aty duke më pritur me besnikëri dhe tolerancë për ‘’tradhëtinë’’ e pësuar”, është shprehur Ilir Butka.

Artisti thotë se nuk ka narracion në pikturën e tij, por edhe pse mungon figurativja në to, ato gjithsesi mund të konsiderohen si klasike, duke iu referuar teknikës së përdorur në disa prej tyre.

Siç e thotë edhe titulli që mban, ekspozita sjell simbolikisht dualizmin që rrethon piktorin si individ, por edhe vetë pikturën e tij.

“Angazhimi im profesional ka marrë formën e një dikotomie të vërtetë pasi është ndarë prej vitesh tashmë midis filmit, pikturës, fotografisë dhe mësimdhënies. Edhe forma e ekspozimit të pikturave është e tillë, ku dy ose më shumë telajo apo piktura do të jenë të ekspozuara në një kornizë të përbashkët si një punë e vetme e përbërë nga dy ose më shumë krijime të ndryshme, që shpesh kontrastojnë ose kompensojnë njëra- tjetrën”, shpjegon Butka./atsh/ KultPlus.com

‘Virgjëresha Shqiptare’ fiton çmimin e filmit më të mirë dhe aktores më të mirë në ‘Noli Film Festival’

Posted on by Kult Plus

Filmi “Virgjëresha Shqiptare” ka fituar çmimin e filmit më të mirë, përderisa aktorja Rina Krasniqi është shpallur aktorja më e mirë me rolin e “Luanës” në “Noli Film Festival 2024”- Boston, shkruan KultPlus.

Filmi “Virgjëresha Shqiptare” me regji të Bujar Alimani ka fituar çmime në festivale të ndryshme të filmit si në Varshavë, Belgjikë, poashtu dhe në Prishtinë, në PriFest ku ka fituar çmimet kryesore.

Përveç aktores Rina Krasniqi, aktorë të tjerë që janë pjesë e filmit janë Nik Xhelilaj, Astrit Kabashi, Gresa Pallaska, Lulzim Zeqja, dhe të tjerë. Filmi është bashkëprodhim i Kosovës, Shqipërisë, Gjermanisë dhe Belgjikës./ KultPlus.com

Shpallet komisioni vlerësues i thirrjes për ruajtjen dhe restaurimin e Shtëpisë së Kulturës në Runik

Posted on by Kult Plus

Është shpallur komisioni vlerësues i thirrjes së hapur për ruajtjen dhe restaurimin e Shtëpisë së Kulturës në Runik.

Përzgjedhja e anëtarëve të komisionit vlerësues përfshin një kombinim të larmishëm të ekspertëve vendorë dhe ndërkombëtarë të profesioneve të ndryshme në fushën e Trashëgimisë Kulturore, Arkitekturës, Artit dhe Kulturës.

Komisioni vlerësues përbehet nga: Petrit Halilaj, Alban Berisha, Donjetë Murati, Florina Jerliu, Ifeta Nikoceviq, Jurgen Mayer dhe Sali Shoshi.

Opera e Kosovës prezantohet edhe në Paris, interpretojnë solistë të shquar

Posted on by Kult Plus

Opera e Kosovës do të prezantohet para publikut parisien me solistë të shquar të këtij institucioni, përmes një programi të përzgjedhur me kompozitorë botëror dhe shqiptar, shkruan KultPlus.

Pjesë e këtij koncerti i cili do të prezantohet në kryeqytetin e Francës janë artistët: Venera Kajtazi, Sihana Badivuku, Adelina Paloja, Arta Jashari, Agron Peni, Denik Prizreni, Elikona Hysaj, Kaltrina Miftari, kuarteti Amati, Liridon Sadriu, Meriton Ferizi, Okteti Plus, Safet Berisha dhe Zana Abazi-Ramadani.

Koncerti mbahet më 10 qershor, në Theatre du Gymnase Marie Bell- Paris, në ora 20:00./ KultPlus.com

Koncert madhështor për 50 vjetorin e karrierës së Shkurte Fejzës, Ansambli ‘Shota’: Festojmë 50 vite me zërin që ka përfaqësuar kombin tonë!

Posted on by Kult Plus

Një koncert madhështor me titull “50 vjet zëri i kombit” do të mbahet  në Sallën e Madhe të Pallatit të Rinisë, për të shënuar 50 vjetorin e karrierës së artistes Shkurte Fejza, shkruan KultPlus.

Ky koncert është organizuar nga Ministria e Kulturës, Rinisë dhe Sportit si dhe Ansambli i Këngëve dhe Valleve “Shota”.

Përmes një njoftimi publik ansambli “Shota” ka bërë ftesë për pjesëmarrje për të festuar me zërin që për 50 vite ka përfaqësuar kombin shqiptar:

“Ju ftojmë të merrni pjesë në koncertin madhështor të artistës ikonë të këngës shqipe, znj. Shkurte Fejza me titull “50 vjet zëri i kombit”.

Kjo ngjarje e veçantë muzikore është organizuar nga MKRS-dhe AKKV “Shota”. Mos humbisni mundësinë për të përjetuar një mbrëmje të paharrueshme plot me muzikë, mbamendje dhe emocion.

Bashkohuni me ne për të nderuar dhe festuar trashëgiminë tonë muzikore!”, thuhet në një shkrim të publikuar nga AKKV “Shota”.

Koncerti mbahet më 8 qershor, në ora 20:00, në Sallën e Madhe të Pallatit të Rinisë./ KultPlus.com

‘Njerëzit thonë që je duke ndjekur rrugën e gabuar, por ajo është thjeshtë rruga yte’

Posted on by Kult Plus

1. “Jeta vjen me shumë sfida. Ato që nuk do të duhej të na frikësonin, janë ato që mund ti kontrollojmë.”

2. “Pa dhimbje, nuk do të kishte vuajtje. Pa vuajtje kurrë nuk do të mësonim nga gabimet tona. Për të bërë gjënë e duhur, dhimbja dhe vuajtja janë çelësat e të gjitha dyerve.”

3. “Nëse nuk dilni nga kutia në të cilën jeni rritur, kurrë nuk do ta kuptoni se sa e madhe është bota.”

4. “Ne nuk dashurojmë kur gjejmë njeriun perfekt, por kur mësojë të shohim një njeri jo perfekt në mënyrë perfekte.”

5. “Nëse pyetni njerëzit, shumica nuk kanë bërë atë që kanë dashur. Kjo më dhemb në zemër. “

6. “Nëse mendoj për vdekjen më shumë se të tjerët, është për shkak se unë vlerësoj jetën më shumë se ta.”

7. “Unë do të mundohem të bëj më të mirën time të mundshme në këtë botë.”

8. “Ti mendon, “çfarë nëse do ta bëj një gabim sot dhe do të pendohem’. Por unë nuk besoj në pendim, unë besoj që çdo vendim çon tek të kuptuarit se kush jemi, dhe thjesht duhet të hedhim një hap para, të përkushtohemi dhe të shohim se çfarë do të ndodhë.”

9. “Sa herë që ndihem e humbur, marr një hartë dhe e vështroj deri sa ti kujtoj vetës sime se jeta është një aventurë e gjatë, sa shumë për të bërë e sa shumë për të parë!”

10. “Njerëzit thonë që je duke ndjekur rrugën e gabuar, por ajo është thjeshtë rruga yte.”/KultPlus.com

Bisedë me Rossella Menegazzo / Felice Beato dhe Adolfo Farsari në ‘Marubi’

Posted on by Kult Plus

Muzeu i fotografisë ‘Marubi’  më 14 qershor organizon bisedë me Rossella Menegazzo / Felice Beato dhe Adolfo Farsari: fotografë dhe sipërmarrës në Yokohama.

Historia e dy fotografëve italianë Felice Beato dhe Adolfo Farsari të cilët mbërrijnë në Japoni në gjysmën e dytë të shekullit XIX, flet për udhëtimin, kreativitetin, sipërmarrjen, për artin dhe marrëdhëniet ndërkombëtare.

Imazhet fotografike që ata kanë lënë pas, pjesërisht të koleksionuara në Arkivat Alinari në Firence, na dëshmojnë për tradita e zakone të një vendi që sapo ishte njohur me teknikën e fotografisë e me potencialin që ky mjet i ri kishte në kontekstin e një qyteti të gjallë portual si Yokohama. Beato dhe Farsari e transformojnë fotografinë në një produkt artistik me shtrirje të gjërë dhe kontribuojnë në formimin e gjeneratave të para të fotografëve japonezë duke shënjuar kështu edhe historinë botërore të fotografisë. /Express/ KultPlus.com

Si bëhet kënga rome

Posted on by Kult Plus

Poezi nga Kujtim Paçaku.

nuk ka shumë marifet!
merre një grusht dhembje
shtoji ca pika loti
e pak pluhur rrugësh të pasosura
pak aromë stinësh të dashurisë
në fund
i shton erëza djegëse dashurie
dhe i hedh ca yje përsipër
dhe e lë të piqet
të piqet në zjarr të shpirtit
gjer në agim.

ja pra, kështu bëhet kënga rome…

12 filmat më të mirë për t’u parë në qershor

Posted on by Kult Plus

Më poshtë vijojnë 12 nga filmat më të mirë për t’u parë në qershor, sipas BBC.

1. “Kinds of Kindness”

Kanë kaluar vetëm pak muaj që kur u publikua “Poor Things” të Yorgos Lanthimos, por regjisori grek ka përfunduar tashmë një film tjetër – ose në një farë mënyre, tre filma të tjerë.

“Kinds of Kindness” shtë një trilogji e tregimeve të shkurtra komike të zeza, secila prej tyre e vendosur në një version të çuditshëm të SHBA-së së sotme, dhe secila prej tyre paraqet të njëjtët aktorë në role të ndryshme: Emma Stone, Willem Dafoe, Jesse Plemons, Margaret Qualley. , Hong Chau dhe Mamoudou Athie.

E shkruar nga Efthimis Filippou, i cili ka shkruar filmat e hershëm të Lanthimos, është një rikthim në rrënjët e tij tmerrësisht rrëqethëse, por shpesh gazmore.

“Ky film i gjatë, origjinal të magjeps edhe pse të zhgënjen, duke sfiduar logjikën konvencionale ndërsa paraqet një refren absurd për shoqërinë moderne”, tha Peter DeBruge për “Variety”.

Filmi do të lançohet më 21 qershor në SHBA dhe Kanada, dhe 28 qershor në BM, Irlandë dhe Suedi.

2. “I am: Céline Dion”

Kushdo që kujton filmin “Titanic” në 1997, do të kujtojë këngën “My Heart Will Go On” nga Céline Dion.

Balada ishte një fituese e çmimit “Oscar” dhe Grammy që u bë single-i më i shitur i vitit 1998 – dhe ishte vetëm një nga hitet e Dion.

Kohët e fundit, megjithatë, ajo ka jetuar me një çrregullim të rrallë neurologjik, sindromën e personit të ngurtë, i cili shkakton ngurtësi dhe spazma të muskujve duke e penguar atë të performojë.

Dokumentari i Irene Taylor tregon se si ajo ia ka dalë mbanë.

“Këto dy vitet e fundit kanë qenë një sfidë për mua, udhëtimi nga zbulimi i gjendjes sime tek të mësuarit se si të jetoj dhe ta menaxhoj atë, por jo për ta lënë atë të më përcaktojë”, tha Dion në një deklaratë.

“Ndërsa rruga për të rifilluar karrierën time të performancës vazhdon… vendosa të doja të dokumentoja këtë pjesë të jetës sime për të ndihmuar njerëzit e tjerë që vuajnë nga kjo diagnozë”, shtoi ajo.

3. “Inside Out 2”

Në vitin 2015, “Inside Out” na prezantoi me një vajzë të re, Riley, e cila ishte e mërzitur për ndryshimin e shtëpisë dhe më pas na tregoi të gjitha emocionet brenda mendjes së saj: gëzimin, trishtim, zemërimin, frikën dhe neverinë.

Filmi vizatimor hit i Pixar përfundoi me Riley që u bë një adoleshente, kështu që ankthi ishte tema kryesore e saj.

Regjisori i filmit, Kelsey Mann, i tha Jackson Murphy në “Animation Scoop” se historia e re ka të bëjë me atë se si ne e trajtojmë atë ndjenjë.

“Ka të bëjë me të qëndruarit në të tashmen dhe të shqetësohesh më pak për të ardhmen – thjesht të shqetësohesh për: Mirë”, tha ai.

Çfarë po ndodh tani?’ Kjo është pjesërisht të mësuarit për të menaxhuar ankthin, gjë që ne u përpoqëm të vendosnim në këtë film.”

Filmi do të lançohet më 14 qershor.

4. “The Exorcism”

“The Exorcism” është një film horror me dy “kthime” të mëdha postmoderne. Është historia e një aktori të quajtur Anthony Miller, i luajtur nga Russell Crowe,i cili e humb mendjen gjatë xhirimit të një filmi që është njësoj si “The Exorcist”, duke ngritur kështu pyetjen nëse është i pushtuar nga një demon, apo nëse presionet e xhirimeve po e shtyjnë përsëri në varësitë e tij të vjetra.

Kthimi i parë postmodern është se Crowe luajti në “The Pope’s Exorcist” vitin e kaluar, kështu që ai është një aktor që luajti në një film ekzorcizmi.

Kthesa e dytë është se “The Exorcism” është drejtuar dhe bashkë-shkruar nga Joshua John Miller, babai i të cilit, Jason Miller, luajti At Damien në “The Exorcist” në vitin 1973.

Filmi do të lançohet më 21 qershor në SHBA dhe BM

5. “Horizon: An American Saga – Chapter 1”

Kevin Costner ka drejtuar tashmë dy filma perëndimorë, “Open Range” dhe fituesin e çmimit “Oscar”-  “Dance with Wolves”. Tani ky numër është rritur në tre… ose ndoshta katër. Dhe së shpejti mund të jenë pesë ose gjashtë.

Siç sugjeron titulli, “Horizon: An American Saga – Chapter 1” është vetëm pjesa e parë e filmit Western të Costner, të cilin ai gjithashtu e shkroi, e prodhoi dhe e vetëfinancoi.

Ai do të shfaqet për publikun në gusht dhe Costner ka planifikuar të bëjë edhe dy të tjerë.

Filmi do të lançohet më 28 qershor.

6. “Bad Boys: Ride or Die”

Will Smith nuk është shfaqur në kinema që kur goditi Chris Rock para se të fitonte Oscar-in për aktorin më të mirë në 2022.

Por, ai eshte kthyer në “Bad Boys: Ride or Die”, pjesa e katërt në ekskluzivitetin e policëve të Miamit.

Në mënyrë të pabesueshme, kanë kaluar 29 vjet që kur Smith dhe Martin Lawrence luajtën në filmin e parë “Bad Boys”.

Filmi do të lançohet më 5 qershor.

7. “Treasure”

Filmi i parë që trajton Holokaustin që nga “The Zone of Interest”, drama e udhëtimit rrugor e Julia von Heinz ka një qasje krejt tjetër.

“Treasure” përdor trillime dhe anekdota në vend të taktikave tronditëse, por ai ende ofron një pasqyrë hetuese në gjithçka, nga antisemitizmi i rastësishëm deri te murtaja e harresës historike”, tha Geoffrey Macnab për “The Independent”.

I përshtatur nga romani autobiografik i Lily Brett i vitit 1999, “Too Many Men”, filmi paraqet Lena Dunham si një gazetare muzikore nga Nju Jorku, e cila bën turne në Poloni në 1990 me babanë e saj, një e mbijetuar e Aushvicit e luajtur nga Stephen Fry.

Filmi do të lançohet më 14 qershor në SHBA.

8. “The Watchers”

Dakota Fanning luan në këtë thriller misterioz të mbinatyrshëm si një artiste që humbet në një pyll në Irlandë.

Kur një përbindësh e ndjek atë, ajo gjen strehë në një bunker me tre persona të tjerë, ku mëson se asnjëri prej tyre nuk mund të largohet dhe se ata duhet të qëndrojnë pranë një ekrani xhami çdo natë për t’u inspektuar nga “vrojtuesit” e paparë të alienëve.

I përshtatur nga romani i “AM Shine”, “The Watchers” tingëllon si një film i M Night Shyamalan – i shkruar dhe drejtuar nga vajza e Shyamalan, Ishana Night Shyamalan.

Filmi do të lançohet më 7 qershor.

9. “The Bikeriders”

“The Bikeriders” përfshin aktorët më të mirë të këtij viti, duke përfshirë Tom Hardy, Austin Butler, Jodie Comer  dhe Mike Faist.

Hardy luan Johnny, themeluesin e Vandals MC, një klub motoçikletash në Çikago të viteve 1960.

“Filmi i Jeff Nichols është një dramë tërheqëse e ngjashme me “Goodfellas” e Martin Scorsese”, tha Brian Viner për “Daily Mail”.

“Personazhet janë mashtrues dhe të papjekur, megjithatë ne e gjejmë veten duke i mbështetur ata, veçanërisht në rastin e bashkëshortit të Ketit jashtëzakonisht të lezetshëm, të pakrahasueshëm dhe të qetë Benny (Butler), të cilit Johnny…

Filmi do të lançohet më 21 qershor në SHBA, BM, Kanada dhe Irlandë.

10. “A Quiet Place: Day One”

“A Quiet Place: Day One” – me aktorin kryesor John Krasinski paraqet një familje të fshehur në një shtëpi në fermë nga të huajt grabitqarë.

Por, në këtë histori të shkruar dhe drejtuar nga Michael Sarnoski, ne mund të shohim kaosin e shkaktuar nga përbindëshat kur ata bien për herë të parë nga hapësira dhe zbarkojnë në qytetin e Nju Jorkut.

Lupita Nyong’o luan së bashku me Djimon Hounsou, duke ripërsëritur personazhin e tij nga “A Quiet Place: Part Two”.

“Këta janë janë filma thriller horror që kanë këto momente emocionuese, të frikshme, por në thelbin e tyre, ato janë histori për njerëzit që merren me diçka që nuk dinë si ta trajtojnë”, tha Sarnoski Nick Romano për “Entertainment Weekly”.

Filmi do të lançohet më 27 qershor.

11. “Firebrand”

Tashmë ka pasur një seri filmash kushtuar mbretit Henry VIII dhe bashkëshortes së tij të dytë, Anne Boleyn.

I përshtatur nga romani i Elizabeth Fremantle i vitit 2013, “Queen’s Gambit”, kjo dramë elegante paraqet Alicia Vikander si Catherine dhe Jude Law si mbreti Henri me zemër të refuzuar.

Ndërsa oborrtarë të ndryshëm komplotojnë kundër saj dhe shëndeti mendor dhe fizik i mbretit të plakur po mbaron, si mund të sigurojë që ajo të mbijetojë më gjatë se ai?

Firebrand është një thriller historik , i zhytur në ndriçim të heshtur, i mbushur me komplote të gjalla”, shkruan Phil de Semlyen në “Time Out”.

Filmi do të lançohet më 14 qershor në SHBA.

12. “Banel & Adama”

Filmi debutues magjik dhe misterioz i Ramata-Toulaye Sy tregon një çift të dashuruarish të kryqëzuar me yje.

Adama (Mamadou Diallo) është një djalë adoleshent i cili supozohet të bëhet kreu i fshatit të tij të largët Senegalez pas vdekjes së babait dhe vëllait të tij.

Banel dhe Adama sfidojnë traditën dhe jetojnë vetëm në shkretëtirën jashtë fshatit.

Problemi është se kur zona goditet nga një thatësirë ​​e madhe, fshatarët e shohin atë si ndëshkim hyjnor për sjelljen e të dashuruarve.

Filmi do të lançohet më 7 qershor./ora/KultPlus.com

Më 5 qershor hapet Panairi i 24-t i librit “Prishtina 2024”

Posted on by Kult Plus

Ministria e Kulturës, Rinisë dhe Sportit ka njoftuar se më 5 qershor, do të hapet Panairi i 24-t i librit “Prishtina 2024”, me moton “Përgjigjja është libri”.

“Me moton “Përgjigjja është libri” vjen edicioni i 24-t i Panairit të Librit, organizuar nga Shoqata e Botuesve të Kosovës, me ndihmën dhe bashkëpunimin e vyer nga Ministria e Kulturës, Rinisë dhe Sportit, Komuna e Prishtinës dhe Pallati i Rinisë”, thuhet në njoftim.

Ceremonia e hapjes do të bëhet të mërkurën në ora 12:00 dhe do të jetë i hapur për vizitorë çdo ditë nga ora 9:00 deri në 21:00, deri më datën 9 qershor në ora 19:00.

Në panair do të marrin pjesë rreth 100 botues nga Kosova, Shqipëria, Maqedonia e Veriut dhe Diaspora, numri i titujve të rinj do të jetë rreth 2000, kurse numri i titujve të fundit rreth 6000.

Përvjetorët që shënohen në Panairin e 24-t të librit janë:

– 100-vjetori i lindjes së At Zef Pllumit

– 100-vjetori i vdekjes së Franz Kafkas

Në panair do të jenë mbi 40 aktivitete, promovime dhe autorë të pranishëm, ku spikasin i ftuari i nderit shkrimtari francez Éric Faye, fitues i Çmimit të Madh për roman të Akademisë Franceze dhe i Çmimit Deux-Margots

– Botimi dhe promovimi i vëllimit testament të Rexhep Qosjes, po ashtu i ftuar i nderit

Panairin pritet ta vizitojnë rreth 40000 vizitorë: studentë, nxënës të shkollave të mesme dhe fillore të Kosovës, qytetarë dhe personalitete të shquara nga jeta akademike, letrare, politike e intelektuale e Kosovës. Ky panair përkon edhe me përvjetorë të rëndësishëm që do të shënohen me aktivitete, përkujtime e debate./KultPlus.com

‘Ekrani i Artit’ në Shkodër vjen me edicionin e shtatë

Posted on by Kult Plus

Nga data 5 deri më 9 qershor, Shkodra do të mirëpresë edicionin e shtatë të festivalit të filmit “Ekrani i Artit” me vepra të videoartit, filmit të shkurtër e të gjatë, dokumentar e fiksion, punime nga artistë vendas dhe ndërkombëtarë që do të shfaqen në Kinema Republika, Art House, Galerinë e Arteve, Vendin e Dëshmisë e Kujtesës, Qendrën Rinore Arka, Auditorin Françeskan, Galerinë Oda dhe në Kalanë e Rozafës.

Nën titullin Solitude and Multitude filmat e edicionit të sivjetshëm eksplorojnë këto skaje të pandashme të ekzistencës njerëzore ku vetmia dhe shumësia, individi dhe komuniteti, thjeshtësia dhe kompleksiteti, intimiteti privat dhe dimensioni publik përvijohen mes nuancash, kalimesh e sfumaturash të panumërta.

Ndryshe nga vitet e tjera, një ekspozitë e kuruar nga Lek M.Gjeloshi e Zef Paci sjell në Galerinë e Arteve pesë artistë me instalacione video e audio, ndërsa Art House mirëpret të parën ekspozitë personale të artistes Nora Bzheta.

Në Art House do të zhvillohen gjatë ditëve të festivalit programe të ndryshme duke filluar nga “Personal narratives, family myths” të kuruar nga Sylvia Schedelbauer e duke vijuar me një përzgjedhje me videoart nga koleksioni i Fondacionit In Between Art Film të kuruar nga Edi Muka. Me 8 qershor do kemi një fokus në tre vepra video të William Kentridge nga koleksioni Moschini e Fischetti ndërsa të dielën me datë 9 një program me videoart shqiptar të kuruar nga Elsamina Musiq e Xhulian Millaj.

Ndërkohë Auditori Françeskan do të mirëpresë një program të sjellë nga Roland Sejko me nëntë filma të shkurtër të prodhuar nga nëntë regjisorë italianë ekskluzivisht me materiale të Arkivit të Instituto Luce në Romë. Programi mbledh filma nga Claudio Giovannesi, Alina Marazzi, Pietro Marcello e Sara Fgaier, Roland Sejko, Alice Rohrwacher, Giovanni Piperno, Marco Bonfanti, Paola Randi e Costanza Quatriglio. Te ky Auditor do të shfaqet ditën e diel me datë 9 edhe filmi i Eneos Çarka Another Day.

Në Vendin e Dëshmisë e Kujtesës, Santiago Sierra sjell videon e tij më të fundit The Maelström ndërsa Gentian Doda me grupin Was Bleibt Kollektiv prezantojnë filmin koreografik Gjurmë.

Qendra Rinore Arka do të mirëpresë për tre ditë shfaqjen e tre filmave të shkurtër që vijnë nga festivali i mirënjohur italian Concorto Film Festival. Të tre filmat, Night Shift, Sardine dhe Lovers ishin fitues të edicionit të vjetshëm të këtij festivali.

Dalja nga qyteti, që në dy vitet e fundit e kishte parë programin e festivalit të shpalosej buzë liqenit, këtë vit do t’i drejtohet Kalasë së Shkodrës me instalime video e projeksione fotografike nga Lek M.Gjeloshi e Sara Passerini dhe me projektimin në natën e datës 8 qershor të filmit të Wael Shawky, I am Hymns of the New Temples.

Kalaja e Shkodrës do të jetë për dy netë edhe arenë e një programi muzikor të përzgjedhur nga Rubin Beqo e Nita Deda, program i cili do përfshijë gjatë ditëve të festivalit edhe Bed Station si dhe hapësirat e ish Konsullatës italiane në Shkodër.

Qendra e festivalit mbetet Kinema Republika e cila mirëpret një seri me filma të gjatë e të shkurtër duke filluar me dy filmat e natës së hapjes nga Driant Zeneli e Roland Sejko e duke vazhduar me një program të kuruar nga Tea Paci ku përmendim filma nga regjisorë e artistë si Cecilia Vicuña, Noor Abed, Evi Gjoni, Hoda Taheri, Fabrizio Bellomo, Emilien Dubuc, Helena Wittmann, Vasilis Katsoupis, Bo Wang e Ilir Hasanaj.

Ky vit shënon edhe edicionin e tretë të punëtorisë së koordinuar nga Melisa Paci që sheh nxënësit e shkollave 9 vjeçare të dialogojnë me punën e një artisteje bashkëkohore. Këtë vit nxënësit e shkollave “Ismail Qemali” e “Miqësia”, kanë punuar për një periudhë gjashtë mujore në dialog me veprën e artistes Claudia Losi dhe punimet e tyre do të shfaqen në Galerinë Oda me datë 7 në ora 17.00.

Ish Konsullata Italiane në Shkodër do mirëpresë një program të kuruar nga Ajola Xoxa me tri vepra në video të Anri Salës, Anna Ehrenstein dhe Lek M. Gjeloshit.

Një seri bisedash e takimesh do të shoqërojne ditët e festivalit ku veçojmë prezantimin e Pavjonit shqiptar në Biennalen e Venecias me protagoniste artisten Iva Lulashi dhe kuratorin Antonio Grulli i cili do mbahet në Qendrën Rinore Arka me datë 6 Qershor, ora 16.00. /Konica.al/KultPlus.com

Java e Kulturës Italiane, nis edicioni i tetë i “Albania International Guitar Festival”

Posted on by Kult Plus

Albania International Guitar Festival e hapi mbrëmë siparin e edicionit të tetë, duke vijuar me aktivitete të shumta përgjatë gjithë muajit.

Festivali u hap me artistin italian, Roberto Tascini, koncerti i të cilit u zhvillua në Liceun Artistik, salla “Tonin Harapi”, në kuadër të Javës së Kulturës Italiane në Shqipëri. Prej më shumë se 20 vjetësh ai interpreton si solist, solist me orkestër dhe në ansambël (EONGuitarQuartet, DuoPorto), në më shumë se 300 koncerte në 20 vende të ndryshme.

Diplomuar në Universitetin e Bolonjës për Ruajtjen e Trashëgimisë Kulturore, si dhe në kitarë dhe arsim muzikor, Tascini në vitin 2005 u bë “Mjeshtër i Artit” në kitarë, duke arritur shkëlqyeshëm “Konzertdiplom” në Musikhochschule në Luzern-Zvicër. Aktualisht është profesor i kitarës në Konservatorin G.Rossini në Pesaro-Itali.

Do të jenë gjithsej tetë artistë ndërkombëtarë nga Italia, Austria, Gjermania, Spanja dhe Holanda të cilët do të zhvillojnë koncerte në Tiranë, Berat, Rubik e Shkodër. Masterclass-e, workshop-e dhe aktivitete të tjera do të organizohen nga artistët e ftuar./atsh/KultPlus.com