Shërbimi gjeologjik në Brazil ka zbuluar një specie të re të dinozaurëve, një kafshë të shpejtë që kishte jetuar në shkretëtirë gjatë periudhës së hershme të Kretakut. Specia e re ishte një kafshë e vogël mishngrënëse e gjatë 60-90 centimetra.
Gjurmët që janë gjetur në Brazil dallojnë nga gjurmët e gjetura të dinozaurëve në pjesë të tjera të botës, ka thënë paleontologu i Muzeut të Shkencave të Tokës në Brazil, Rafael Costa. Periudha e hershme e Kretakut daton nga 100 deri në 145 milionë vjet më parë. Fosilet e dinozaurëve në Brazil fillimisht u gjetën në vitet ’80 nga prifti dhe paleontologu italian, Leonardi./alsatm/KultPlus.com
Filmi “Heshtja e Sirenave” këto ditë pati premierën botërore në edicionin e 47-të Festivalit të Filmit Mostra në Sao Palo, Brazil, një prej festivaleve më prestigjioze në botë, shkruan KultPlus.
Ky film vjen me regji dhe skenar nga Gazmend Nela.
Ikonë studio, sot ka ndarë edhe pamjet e para nga premiera e këtij filmi në Brazil, teksa kanë falënderuar të gjithë ekipin e filmit për punën dhe përkushtimin.
“Kemi nderin të ndajmë pamje nga premiera botërore e filmit “Heshtja e Sirenave” me regji nga Gazmend Nela, në edicionin e 47 të festivalit prestigjioz të filmit “ Monstra” São Palo, Brazil.
Ky film është një bashkëprodhim nga Kosova, Zvicra Maqedonia, si dhe Shqipëria, nga produksionet: Frame production, Ikonë Studio, Alva Film, Skopje Film Studio, Albasky Film, RTS Radio Télévision Suisse dhe In My Country Post Production.
Ky projekt është mbështetur nga Qendra Kinematografike e Kosovës.
Një falënderim i veçantë i shkon ekipës së mrekullueshme dhe aktorëve super të talentuar që mundësuan realizimin e këtij filmi.”, thuhet në njoftim nga Ikonë Studio. / KultPlus.com
Brazili është i famshëm për karnevalet, e që sivjet kanë filluar më 17 shkurt e përfundojnë sot, shkruan KultPlus.
Thuhet se 40 milionë kanë marr pjesë në karnevalet e Brazilit, që konsiderohen të jenë një atraksion i vërtetë.
Kërcim, këndim dhe frymë festive mund të gjenden të gjitha këto në rrugët e Rios. Pjesëmarrësit janë të veshur në mënyrë ekstravagante me kostumet e tyre të ndritshme, ndërsa përpiqen të bëhen kampionë të karnavaleve ashtu sikurse çdo vit./ KultPlus.com
Rrufeja goditi statujën ikonë të Krishtit në Brazil gjatë fundjavës. Statuja 38 m, e vendosur në Rio De Zhaneiro të Brazilit, vizitohet nga gati dy milionë njerëz çdo vit dhe, çuditërisht, është hera e tretë në 15 vjet që goditet nga një rrufe e tillë.
Ende një dukuri jashtëzakonisht e rrallë, rrufeja goditi figurën fetare më 10 shkurt, duke e ndriçuar atë me një shpërthim drite që tani po shihet nga miliona njerëz në të gjithë globin.
Disa arritën të bënin foto të fenomenit, ndërsa fotografi Fernando Braga kapi imazhe dhe video të goditjes së rrufesë teksa ndodhi.
Tani duke u qarkulluar në internet, pamjet magjepsëse kanë mahnitur shumë njerëz, duke u parë më shumë se 20 milionë herë. /KultPlus.com
Të paktën 70 persona u plagosën dhe kishin nevojë për kujdes mjekësor pasi mbështetësit e ish-presidentit brazilian Jair Bolsonaro sulmuan ndërtesat e qeverisë federale të Brazilit të dielën pasdite, sipas sekretarit të shëndetësisë së vendit. 6 persona u plagosën rëndë dhe u dërguan në spitale.
Mes të plagosurve ka edhe gazetarë dhe policë. Trazirat erdhën vetëm një javë pas inaugurimit të Lula da Silva, i cili u rikthye në pushtet pas 12 vitesh pas fitores ndaj Bolsonaro në balotazhin e zgjedhjeve më 30 tetor. Të paktën 400 persona janë arrestuar, kanë konfirmuar autoritetet.
Duke vizituar vendin e ngjarjes, Presidenti premtoi se do të ndëshkonte personat e përfshirë në dhunë. Më herët, Lula da Silva i përshkroi ngjarjet në kryeqytet si “barbare” dhe tha se “mungesa e sigurisë” i kishte lejuar mbështetësit “fashistë” të Bolsonaro të shkelin barrierat e vendosura nga personeli i sigurisë. /abcnews.al/ KultPlus.com
Qeveria e Brazilit shpalli tri ditë zi kombëtare pasi futbollisti legjendar brazilian Pele ndërroi jetë në moshën 82-vjeçare.
Në një dekret të publikuar në Gazetën Zyrtare, me nënshkrimin e presidentit Jair Bolsonaro thuhet se “si shenjë treguese e trishtimit për vdekjen e Edson Arantes do Nascimento, Pele, janë shpallur tri ditë zi kombëtare në të gjithë vendin duke filluar që nga publikimi i këtij dekreti”.
Në një postim nga llogaria e tij në Twitter lidhur me vdekjen e Pele-s, Bolsonaro tha se ”Pele e ktheu sportin në art dhe argëtim dhe emrin e Brazilit e transmetoi nëpër botë me futbollin. I uroj durim familjes dhe të dashurve të tij”.
Ceremonia mortore e Peles do të zhvillohet më 3 janar në stadiumin “Santos” ku ai ka kaluar një pjesë të madhe të karrierës së tij./ atsh / KultPlus.com
Rio de Zhaneiro ka anuluar festivalin më të famshëm në botë të karnavaleve për të dytin vit radhazi për shkak të pandemisë së koronavirusit.
Kryebashkiaku Eduardo Paes e njoftoi vendimin në rrjetet sociale, pas një takimi me përfaqësues të grupeve të karnavaleve.
Ai tha se ishte praktikisht e pamundur të mbaheshin karnavalet në rrugë duke ruajtur kufizimet e hyrjes dhe masat e tjera sanitare në festën për të cilën ishin regjistruar qindra grupe.
Sipas të dhënave zyrtare, më shumë se 22 milionë persona në Brazil janë infektuar me koronavirus.
Rreth 618 000 njerëz kanë vdekur në lidhje me Covid-19 në Brazil.
Vetëm SHBA ka regjistruar një numër më të madh të vdekjeve. / KultPlus.com
Revista “Time” shpalli presidentin brazilian Jair Bolsonaro si Njeriun e Vitit, duke tejkaluar kështu ish-presidentin e SHBA-së Donald Trump, punonjësit e vijës së parë shëndetësore, opozitarin Alexei Navalny dhe krijuesit e vaksinave.
Bolsonaro mori 24% të votave të nëntë milionë lexuesve, duke u cilësuar kështu personi më me ndikim (për mirë apo për keq) në 2021.
Javën e kaluar, Gjykata e Lartë e Brazilit urdhëroi një hetim mbi pretendimet e Bolsonaro për një lidhje midis vaksinës COVID-19 dhe rrezikut të zhvillimit të SIDA-s. Presidenti brazilian, i cili do të kandidojë sërish në vitin 2022, është kritikuar gjithashtu për menaxhimin e pandemisë dhe problemet me furnizimin me vaksina.
Ish-presidenti amerikan Donald Trump u rëndit i dyti me 9% të votave, ndërsa 6.3% e lexuesve votuan punonjësit e shëndetësisë duke u renditur në vendin e tretë. Në vendin e katërt, me 6% të votave u rëndit Alexei Navalny.
Shkencëtarët që kontribuuan në zhvillimin e vaksinave kundër koronavirusit u renditën në vendin e pestë me 5.3% të votave./ KultPlus.com
Ishulli Queimada Grande, i njohur gjithashtu si Ishulli i Kobrave, është një ishull që ndodhet rreth 30 kilometra larg brigjeve të Sao Paulos, në Brazil.
Me një sipërfaqe rreth 430 000 metra katrorë dhe gjatësi 1,5 kilometra, ky ishull është i ndaluar për njerëzit me vendim të qeverisë braziliane, pasi aktualisht konsiderohet një nga vendet më të rrezikshme në botë.
Në fakt, në hyrje të ishullit ka një tabelë që informon se zbarkimi në ishull është i ndaluar. Hyrja është e ndaluar për çdo qytetar të zakonshëm dhe aty lejohet vetëm personeli i autorizuar.
Në këtë ishull jeton një larmi e madhe gjarpërinjsh, edhe pse njëri prej tyre spikat mbi të tjerët: Bothrops Insularis. Me ngjyrë të verdhë dhe me përmasa rreth 70 centimetra, karakterizohet si një nga gjarpërinjtë më helmues në botë. Vlerësimet e ekspertëve sugjerojnë se ka një ekzemplar të këtij zvarraniku për çdo metër katror të ishullit, kështu që është më i zakonshmi që mund të gjendet dhe kafshimi i tij mund të shkaktojë probleme të shumta, deri në vdekje. / KultPlus.com
Në Brazil po korr sukses një rrymë e re muzikore, që quhet “trap de cria”. Bëhet fjalë për një lloj të ri hip hopi që tregon jetën e vështirë nëpër “favela”, aty ku “lulëzon” krimi.
Edhe pse kjo muzikë është e panjohur jashtë Rio de Zhaneiros, videoklipet marrin miliona klikime në YouTube. Gjithashtu, ndryshe nga vendet e tjera, artistët e kësaj rryme nuk janë gangsterë dhe armët që përdorin nëpër videoklipe nuk janë të vërteta. Madje, as bizhuteritë.
Por, pavarësisht kësaj, policia e Rios ka nisur një hetim për këto videoklipe, duke i konsideruar si pamje që nxisin krimin dhe lidhjet me trafikantët e drogës.
“Liria e shprehjes ka një kufi dhe kufiri është kur ndodh një krim. Ne nuk mund të lejojmë që fëmijët dhe të rinjtë të kenë idhuj njerëz që mbajnë armë dhe kryejnë krime”, thotë policia.
Por, vetë artistët mbrohen duke theksuar se ata vetëm portretizojnë atë që përjetojnë nëpër lagjet e tyre./ KultPlus.com
Një statujë e re e Jezu Krishtit është duke u ndërtuar në pjesën jugore të Brazilit. Ajo do të jetë edhe më e madhe sesa statuja e famshme gjigante në Rio de Janeiro.
Statuja e quajtur “Krishti Mbrojtës” po ndërtohet Encantado, qytezë e vogël në rajonin më jugor të Brazilit, Rio Grande do Sul, nga një organizatë lokale e quajtur Shoqata “Miqtë e Krishtit”.
E bërë nga çeliku dhe betoni, statuja do të jetë 43 metra e gjatë, gati pesë metra më e gjatë sesa statuja në Rio de Janeiro, shkruan CNN, transmeton Gazeta Express.
Organizata braziliane tha se statuja e tretë më e madhe e Jezu Krishtit në tërë botën. Një statujë tjetër më e madhe se kjo është duke u ndërtuar në Meksikë. Ajo do të jetë e lartë rreth 76 metra. Një monument tjetër i madh për Krishtin është duke u ndërtuar në Poloni.
Statuja e re në Brazil është vepër e skulptorit Genesio Gomes Moura dhe e djalit të tij, Markus Moura. Koka dhe duart statujës iu vendosën më 6 prill, ndërsa ndërtimi i plotë i saj, që filloi në korrik të vitit 2019, pritet të përfundojë në fund të këtij viti.
Ndërtimi i statujës do të kushtojë gjithsej 353 mijë dollarë, ndërsa organizata që e nisi projektin po kërkon donacione për të pasur mundësi që ta përfundojë atë.
Brenda statujës do të ndërtohet një ashensor, i cili do t’i dërgojë turistët deri te lartësia ku ndodhet zemra e njeriut në statujë.
Qëllimi i ndërtimit të statujës gjigante është shtimi i turizmit në zonën që ndodhet afër kufijve me Uruguajin dhe Argjentinën. / KultPlus.com
Vetëm gjatë muajit mars në Brazil kanë vdekur 66.570 persona nga COVID-19, më tepër se dyfish se që ishte rekordi mujor në këtë vend, raporton BBC.
Presidenti i Brazilit, Jair Bolsonaro, është përballur me kritika të vazhdueshme për menaxhimin e pandemisë dhe është goditur nga dorëheqjet e profilit të lartë këtë javë.
Por, të mërkurën ai sërish është shprehur kundër mbylljeve që kanë vendosur guvernatorët lokal apo kryebashkiakët.
“Ne ikemi pasur, dhe kemi, dy armiq – virusin dhe papunësinë! Është realiteti! Nuk do ta zgjidhim këtë problem duke qëndruar në shtëpi”, ka thënë Bolsonaro.
Të mërkurën kanë vdekur mbi 3800 persona nga COVID-19 në Brazil dhe janë regjistruar mbi 90 mijë raste të reja pozitive me koronavirus. Në total në Brazil që nga fillimi i pandemisë kanë vdekur mbi 322 mijë persona nga COVID-19. / KultPlus.com
Brazili është një ndër vendet më të prekura nga koronavirusi duke numëruar dhjetra mijëra të vdekur dhe një numër rekord të prekurish çdo ditë.
Gjatë ditëve të fundit vendi është duke u përballur me mungesa serioze të oksigjenit në spitale duke bërë që të ndërrojnë jetë të paktën 11 persona.
Nisur nga situata e krijuar, qytetarët kanë dalë në rrugët e Sao Paolos duke protestuar kundër Presidentit Bolsonari dhe administratës së tij.
Një numër i madh protetsuesish kishin vendosur qese plastike në kokë duke hedhur sloganin “po mbytemi”, ndërsa fotot kanë bërë xhiron e botës brenda pak minutave.
Vetëm brenda 24 orëve të fundit në Brazil humbën jetën 595 persona prej koronavirusit duke e çuar në më shumë se 225 000 numrin total të të vdekurve që prej fillimit të pandemisë. / KultPlus.com
Prej më shumë se dhjetë vitesh Joao Coelho Guimaraes, nga Brazili, kishte humbur kontaktet me familjen e tij. Fatmirësisht, ai u bashkua me të ëmën dhe motrën, falë një videoje virale që u shpërnda në të gjithë botën.
Guimaraes u raportua i vdekur pasi u zhduk një dekadë më parë pas një aksidenti, dhe kaloi vitet e fundit duke mbledhur kanaçe për të siguruar ushqim.
Joao mbase do të kishte mbetur një endacak i përjetshëm, nëse nuk do t’i kishte tërhequr vëmendjen biznesmenit Alessandro Lobo, i cili e pyeti nëse ishte i uritur apo donte para. Por ai refuzoi ofertën, dhe në vend të kësaj e pyeti nëse berberët e tij kishin një brisk për t’i shkurtuar mjekrën.
“I siguruam një ditë për kujdesin ndaj vetes”, tha Lobo, duke shtuar se përveç pastrimit të mjekrës dhe flokëve, ata i dhuruan gjithashtu veshje dhe këpucë, duke e shndërruar atë drastikisht, transmeton KultPlus.
Ndryshimi ishte i jashtëzakonshëm dhe video e shpërndarë në rrjete sociale theu çdo parashikim dhe u pa nga miliona njerëz në botë, përfshirë dhe familjen e Joaos. / KultPlus.com
Popujt autoktonë në rajonin e Amazonës dhe Brazil janë në rrezik të zhduken nga koronavirusi, sipas ekspertëve të shëndetit.
Sëmundjet e frymëmarrjes – siç janë ato që zhvillohen nga viruset e gripit – janë bërë një shkak kryesor i vdekjes për popujt indigjenë.
Brazili ka raportuar mbi 6.000 raste me Covid-19 dhe 240 vdekje.
Infeksionet fillimisht u përqendruan në zonën industriale Sao Paulo. Sidoqoftë, virusi tani është përhapur në të gjithë vendin, përfshirë në territoret indigjenë në luginën e Amazonës. Rasti i parë midis popujve indigjen u regjistrua në shtetin e Amazona.
“Ekziston një rrezik i jashtëzakonshëm që virusi të përhapet në masë dhe të zhdukë popujt indigjenë,” tha Sofia Mendona, një studiuese në Universitetin Federale të Sao Paulo.
Duke iu përgjigjur pandemisë Covid-19, disa indigjenë planifikuan të ndaheshin në grupe të vogla dhe të kërkonin mbrojtje në pyll. Kjo është mënyra se si ata shmangën zhdukjen gjatë epidemisë së fundit.
“Ata do të mbledhin materiale të nevojshme për gjueti dhe peshkim dhe do të vendosen në kampe”, tha Mendona.
Shumë popuj indigjenë nuk kanë mjete për të zvogëluar rrezikun e transmetimit, siç është larja e duarve me sapun dhe ujë, ose përdorimi i sanitizuesve.
Ata gjithashtu shpesh jetojnë në afërsi të njëri-tjetrit dhe ndajnë enët dhe gota, që të dyja ndihmojnë në përhapjen e sëmundjeve infektive më shpejt.
Tani ata këshillohen që të ndalojnë ndarjen e pajisjeve dhe të praktikojnë praktikat tradicionale të izolimit.
Sipas agjencisë federale Funai, ekzistojnë 107 grupe indigjene të njohura në Amazonën braziliane, të cilat nuk kanë asnjë kontakt me botën e jashtme.
Sidoqoftë, prerësit e paligjshëm, gjahtarët dhe misionarët misionarë veprojnë në territoret e t yre dhe organizatat indigjene dhe OJQ-të thonë se ka pasur një rritje të mprehtë të sulmeve vitet e fundit.
Qeveria vazhdon të shkurtojë buxhetin, duke e bërë të vështirë për Funai të mbrojë popujt autoktonë.
Tani, ekzistojnë frika se beteja kundër koronavirusit do të zvogëlojë më tej burimet e saj për të mbrojtur pyllin dhe popujt indigjenë.
Megjithëse disa popuj indigjen janë dakord se duhet të shmangin udhëtimin në qytet për të zvogëluar rrezikun e infeksionit, shumë udhëheqës indigjenë thonë se anëtarët e fisit të tyre kërcënohen nga uria nëse nuk kanë qasje në tregje.
Ndryshe, popujt autoktonë përbëjnë 0.5% të popullsisë braziliane. Në vitet 1960, një shpërthim i fruthit midis anëtarëve të fisit Yanomami në afërsi të kufirit me Venezuelën shkaktoi vdekjen e shumë prej tyre. / KultPlus.com
Një grup valltaresh, në mesin e tyre braziliane dhe të huaja, nga vende të ndryshme të botës, u mblodhën në Rio de Janeiro për ta mësuar vallëzimin e quajtur samba.
Shkolla “Paraiso de Tuiuti”, ka qenë dhe mbetet djepi i kulturës për klasën punëtore të këtij vendi për afro 60 vjet, shkruan rtv21.tv Njëra prej valltareve të këtij vallëzimi është Jessica Hahn-Chaplin, nga Anglia. Jessica është pjesë e lëvizjes së të huajve të cilët shkuan në Brazil për të mësuar vallëzimin samba. Valltarja angleze e cila njëherësh është mësuese vallëzimi në Bristol, mendon se vallëzimi samba është paksa i komplikuar. Ajo ka thënë se është bionde dhe se kjo ka qenë problem që të përshtatet me këtë vend. Jessica po ashtu ka treguar se orët e mësimeve të këtij vallëzimi mbahen në lagje të varfra, që është tronditëse për këtë sistem. Tutje ajo ka treguar se është mësuar të mbaj orë vallëzimesh në studio me pasqyra, e këtu në Brazil, kjo nuk ndodh dhe kjo e bën të vështirë.
Mësuesi i vallëzimit në këtë shkollë është Alex Coutinho, i cili ka thënë se të interesuarit e huaj për vallëzimin samba shkojnë atje vetëm për të mësuar këtë vallëzim, dhe kthehen në vendet e tyre, dhe ajo që e bën interesante këtë është se ata promovojnë kulturën braziliane në vendet e tyre. Sipas tij, të interesuarit qëndrojnë nga dy apo tre muaj në Brazil për të mësuar sambën.
Njëra prej valltarëve të tjerë në këtë shkollë është edhe japonezja Tanaka. Ajo ka treguar se për shkollën “Paraiso de Tuiuti”, e cila ua mëson këtë vallëzim edhe të huajve ka kuptuar nga Istagrami. Kështu, ka kontaktuar me personat përgjegjës dhe ka shkuar atje.
Shkolla e vallëzimit samba “Paraiso de Tuiuti” po ashtu po bëhet gati për karnavalin e famshëm vjetor në Rio de Janeiro, i cili do të fillojë me 21 shkurt e do të përfundojë me 26 shkurt 2020./21Media/ KultPlus.com
Këngëtarja shqiptare me famë botërore, Bebe Rexha po vazhdon të mahnis publikun me performancat e saj,që po i mban në shumë vende të botës, shkruan KultPlus.
Një atmosferë të mahnitshme, e ka krijuar në Sao Paulo. Atje ajo ka kënduar para mijëra fansave, të cilët e kanë përcjellur më shumë fërshëllima, duartrokitje e vallëzim.
Turneu i saj quhet “Witness tour”, ndërsa ky turne do ta dërgoi këngëtaren edhe në shumë vende të tjera të botës.
“Një tjetër shfaqje e pabesueshme. Të falënderoj shumë Sao Paulo!”, ka Bebe Rexha në llogarinë personale në Instagram.
KultPlus ju sjellë të plotë videon e koncertit të saj atje./KultPlus.com
Një vit më parë me nismë të ministrit Ditmir Bushati, shtatorja e Nënë Terezës mbërriti në Rio de Janeiro të Brazilit, ku në Katedralen Metropolitane të Rio de Janeiro në gusht të vitit 2016-të, u zhvillua ceremonia e dorëzimit të Shtatores së Nënë Terezës, vepër e skulptorit Thoma Thomai, dhuratë simbolike e popullit shqiptar për popullin brazilian me rastin e shenjtërimit të Nënë Terezës, shkruan KultPlus.
Ndërsa së fundmi në një meshë madhore drejtuar nga kryepeshkopi kardinal Orani Joao Tempesta, u zhvillua edhe ceremonia e inaugurimit të pllakës, dedikuar humanistes shqiptare.
Në vijim, KultPlus, ju sjellë videon ku bëhet inaugurimi i kësaj pllake dedikuar të shenjtës Nënë Tereza./ KultPlus.com
