Shefi i OBSH-së tregon kur mund t’i vije fundi pandemisë

Pandemia e COVID-19 do të përfundojë “kur bota të vendosë t’i jep fund”, pasi “të gjitha mjetet” për të luftuar virusin janë tani në dispozicion, deklaroi sot shefi i OBSH-së Tedros Adhanom Ghebreyesus, duke përsëritur thirrjet e tij për një shpërndarje më të drejtë të vaksinës.

“Pandemia do të përfundojë kur bota të vendosë t’i jep fund, është në duart tona, të gjitha mjetet e nevojshme janë në dispozicion”, tha drejtori i përgjithshëm i Organizatës Botërore të Shëndetësisë (OBSH) në një konferencë në Berlin.

Ai shprehu keqardhjen që deri më tani “bota nuk i ka përdorur me mençuri këto mjete” dhe tha se me “rreth 50.000 vdekje në botë në javë, pandemia është larg përfundimit”.

Kreu i OBSH -së foli në hapjen e madhe të “Samitit Botëror për Shëndetin”, mbledhja vjetore e profesionistëve dhe politikanëve në Berlin.

Objektivi i OBSH-së është që 40 për qind e popullsisë së çdo vendi të vaksinohet deri në fund të vitit dhe 70 për qind deri në mesin e vitit 2022. Tedros thekson rregullisht se i vjen keq për akumulimin e vaksinave kundër COVID-19 në vendet e pasura.

“Është e mundur, por vetëm nëse vendet dhe kompanitë që kontrollojnë furnizimin i kthejnë fjalët e tyre në vepra. Vendet që kanë vaksinuar tashmë 40 për qind të popullsisë, duke përfshirë G20, duhet t’i lënë sasitë e tyre në shpërndarjen e vaksinave në sistemin ndërkombëtar Covax dhe Fondin Afrikan të Prokurimit të Vaksinave (Avat) të krijuar nga Bashkimi Afrikan,” tha Tedros.

“Prodhuesit e vaksinave duhet të ndajnë njohuritë, teknologjitë dhe licencat e tyre dhe të heqin dorë nga të drejtat e pronësisë intelektuale,” shpjegoi ai.

Në një video-mesazh të regjistruar, kreu i Kombeve të Bashkuara, Antonio Guterres, vlerësoi se “suksesi i vaksinave, të zhvilluara dhe të vendosura në treg në kohë rekord, u la nën hije nga tragjedia e shpërndarjes së padrejtë”.

“Ne të gjithë jemi të kërcënuar nga nacionalizmi dhe akumulimi i vaksinave,” tha Guterres./KultPlus.com

Pfizer: Vaksina kundër Covid-19 për fëmijët 5 deri në 11 vjeç është e sigurt dhe tregon përgjigje të fuqishme

Vaksina kundër COVID-19 e Pfizer/BioNTech aktualisht është aprovuar për njerëzit e moshës 16 vjeç e lart, dhe e autorizuar për përdorim te personat e moshës 12 deri në 15 vjeç.

Por në një njoftim të shumëpritur, Pfizer tha të hënën se një provë e Fazës 2/3 tregoi se vaksina e saj kundër Covid-19 ishte e sigurt dhe gjeneroi një përgjigje “të fortë” të antitrupave tek fëmijët e moshës 5 deri në 11 vjeç, përcjell KultPlus.

“Që nga korriku, rastet pediatrike të COVID-19 janë rritur me rreth 240 për qind në SHBA-duke nënvizuar nevojën e shëndetit publik për vaksinim. Këto rezultate të provës ofrojnë një bazë të fortë për të kërkuar autorizimin e vaksinës sonë për fëmijët 5 deri në 11 vjeç, dhe ne planifikojmë t’i paraqesim ato me urgjencë te FDA dhe rregullatorët e tjerë”, ka thënë Albert Bourla, kryetar dhe shef ekzekutiv i Pfizer, në deklaratë.

Ndërsa Dr. Scott Gottlieb, një ish komisioner i FDA dhe anëtar i bordit aktual të Pfizer, ka thënë se një vaksinë për fëmijët e moshës 5 deri në 11 vjeç mund të jetë e disponueshme deri në festën e Halloween, përkatësisht deri më 31 tetor, transmeton tutje KultPlus.

Ndërkohë komisioneri në detyrë i FDA, Dr. Janet Woodcock dhe Dr Peter Marks, drejtor i Qendrës së FDA për Kërkimin dhe Vlerësimin Biologjik, tha në një deklaratë këtë muaj se agjencia do të rishikonte të dhënat për një vaksinë për fëmijët më të vegjël “sa më shpejt që të jetë e mundur, çështje javësh dhe jo muajsh”, pasi u paraqit për autorizim.

“Sidoqoftë, aftësia e agjencisë për të rishikuar këto paraqitje me shpejtësi do të varet pjesërisht nga cilësia dhe afati kohor i paraqitjeve nga prodhuesit”, shkruan ata.

Thirrjet për një vaksinë Covid-19 për fëmijët më të vegjël janë rritur më shumë muajt e fundit pasi rastet u rritën tek fëmijët.

Në këto teste, kishte 2,268 pjesëmarrës të moshës 5 deri në 11 vjeç, të cilët, ndonëse ndiqej akoma një regjim me dy doza, përdornin një dozë më të vogël se sa sasia e dhënë për njerëzit e moshës 12 vjeç e lart, për “sigurinë, tolerancën dhe imunogjenitetin” e fëmijëve më të vegjël.

“Në pjesëmarrësit 5 deri në 11 vjeç, vaksina ishte e sigurt, e ‘toleruar’ mirë dhe tregoi përgjigje të fuqishme neutralizuese të antitrupave”, thanë kompanitë në një njoftim për shtyp.

Kështu, Pfizer dhe BioNTech planifikojnë të ndajnë të dhënat e tyre me Administratën Amerikane të Ushqimit dhe Barnave, Agjencinë Evropiane të Barnave dhe rregullatorë të tjerë së shpejti dhe do të paraqesin një kërkesë për autorizim të përdorimit emergjent në Shtetet e Bashkuara.

Ndryshe, FDA miratoi vaksinën Pfizer, e cila tregtohet si Comirnaty, për njerëzit e moshës 16 vjeç e lart në gusht. Aktualisht ajo është autorizuar për përdorim urgjent tek fëmijët e moshës 12 deri në 15 vjeç.

Rezultatet nga dy prova të tjera në vazhdim – një i fëmijëve të moshës 2 deri në 5 vjeç dhe një i fëmijëve nga 6 muaj deri në 2 vjeç – priten së shpejti këtë vit, thanë kompanitë.

Pfizer gjithashtu ka marrë autorizimin e përdorimit urgjent nga FDA për të dhënë një dozë të tretë të vaksinës për ata 12 vjeç e lart. / KultPlus.com

Papa: Pandemia është testi më i madh i kohës sonë

Papa Françesku i bëri thirrje Evropës që të tregojë “solidaritet” gjatë rimëkëmbjes ekonomike nga pandemia COVID-19.

Papa i bëri komentet gjatë një vizite në Sllovaki – njërin nga vendet më të goditura në kontinent nga pandemia.

Ai e cilësoi pandeminë si “testin më të madh të kohës sonë”.

“Na ka mësuar se sa e lehtë është – edhe kur jemi të gjithë në të njëjtën anije – të tërhiqemi dhe të mendojmë vetëm për veten tonë”, tha Papa.

Sllovakia, vend anëtar i Bashkimit Evropian me rreth 5.4 milionë banorë, ka pasur përqindjen më të lartë të infektimit dhe vdekshmërisë nga COVID-19 në një periudhë të këtij viti.

“Pas muajve të gjatë dhe të mundimshëm të pandemisë, plotësisht të ndërgjegjshëm për vështirësitë përpara, jemi në pritje të një rritjeje ekonomike, që do të mbështetej edhe nga planet e Bashkimit Evropian për rimëkëmbje”, tha Papa në kryeqytetin e Sllovakisë, Bratisllavë.

Ai paralajmëroi kundër “ndjenjës kalimtare të euforisë” dhe tha se Evropa duhet të tregojë një solidaritet të tillë, që “duke kapërcyer kufijtë”, e kthen atë “në qendër të historisë”.

Një ditë më herët, kreu i Selisë së Shenjtë qëndroi në Hungari, ku foli për “kërcënimet nga antisemitizmi”.

“Është një fitil që nuk duhet të lejohet të digjet. Dhe, mënyra më e mirë për ta fikur atë është të punojmë së bashku, pozitivisht dhe të promovojmë vëllazërinë”, tha Papa.

Vizita e Papës në Hungari dhe Sllovaki është e para prejse ai i është nënshtruar një operacioni në zorrën e trashë, në muajin korrik./KultPlus.com

Falsifikimi i testeve Covid-19, policia e dërgojnë në mbajtje pronarin e fotokopjes në Podujevë

Pronari i një fotokopjeje në Podujevë është dërguar në mbajtje për 48-orë nga policia, nën dyshimin se ka kryer veprën penale “Falsifikim i dokumentave”.

I njëjti dyshohet se falsifikonte teste, duke i printuar ato në formatin A4 me logo të disa laboratorëve në Kosovë. Kështu ka bërë të ditur Policia e Kosovës, nëpërmjet një komunikate për medie.

“Policia përmes zyrtarëve relevant ka filluar verifikimet e nevojshme dhe me aprovim të organeve të drejtësisë ka realizuar bastisje në lokacionin ku dyshohej për falsifikim të testeve, ku ka hasur dhe sekuestruar disa fletë të formatit A4 me teste për Covid-19, me llogo të disa laboratorëve në Kosovë”, u tha në njoftim.

“I dyshuari është intervistuar në prezencë të avokatit mbrojtës dhe pas intervistimit me aktvendim të prokurorit të shtetit, i është caktuar masa e ndalimit për 48 orë nën dyshimin se ka kryer veprën penale “Falsifikim i dokumenteve””.

Siç thuhet në komunikatën e policisë, forcat e rendit kanë sekuestruar një shtëpizë dhe një telefon celular.

Policia do të vazhdojë angazhimet në zbatimin e masave që kanë për qëllim parandalimin e përhapjes së pandemisë, përfshirë angazhimet shtesë në arrestimin dhe sjelljen para organeve të drejtësisë të personave që përfshihen në veprimtari të kundërligjshme. / KultPlus.com

Presidentja Osmani: 503 mijë vaksinat e dhuruara nga SHBA-të janë 503 mijë shanse shtesë për të shpëtuar jetë nga virusi

Presidentja e Kosovës, Vjosa Osmani përmes një postimi në rrjetin social facebook ka bërë të ditur se Kosova ka pranuar gjithsej 503 mijë vaksina të dhuruara nga SHBA-të, e të cilat kanë arritur sot, përcjellë KultPlus.

“Nuk ka asnjë arsye për mos vaksinim! Të rinj, pleq, mësues, shtatzëna, gra e burra, vaksinimi shpëton jetë! Vaksinohu edhe TI të shpëtosh veten, më të dashurit e tu, ekonominë dhe të ardhmen tonë!”, shkruan Osmani.

KultPlus ju sjell njoftimin e saj të plotë:

503 mijë vaksinat e dhuruara nga SHBA-të e të cilat arritën sot në vendin tonë janë 503 mijë shanse shtesë për të mbrojtur e shpëtuar jetë nga virusi.
Nuk ka asnjë arsye për mos vaksinim! Të rinj, pleq, mësues, shtatzëna, gra e burra, vaksinimi shpëton jetë! Vaksinohu edhe TI të shpëtosh veten, më të dashurit e tu, ekonominë dhe të ardhmen tonë!
Faleminderit Presidentit Biden dhe popullit amerikan që na u gjindën sërish pranë, ashtu sikurse gjithherë. / KultPlus.com

Ekspertët zviceranë: Mos i fajësoni kosovarët për përhapjen e virusit

Task Forca Federale e Koronavirusit, në raportin e saj më të ri supozon se çdo pacient i tretë i kujdesit intensiv është infektuar me korona gjatë pushimeve në Kosovë ose Maqedoninë e Veriut. Kjo nxit urrejtje, paralajmërojnë ekspertët, shkruan nau.ch, transmeton KultPlus.

Dina Wyler, drejtoreshë e Fondacionit kundër Racizmit dhe Antisemitizmit, shikon në mënyrë kritike zhvillimet e tilla në popullatë. Nuk është ndonjë gjë e re që në kohë krize të kërkohen “fajtorë kujdestarë”, thotë Wyler.

“Pandemia e koronës shqetëson shumë njerëz. Por urrejtja, ksenofobia dhe racizmi nuk mund të justifikohen asnjëherë”, shton ajo.

Faji u ngarkohet pakicave

“Secilën herë, pakicat janë ato që fajësohen për krizën dhe fyhen”, thotë ajo për Nau.ch. Dhe një gjë e tillë nuk prek vetëm kosovarët. Në mesin e të fajësuarve ishin shpesh hebrenjtë, të huajt në përgjithësi ose njerëzit me prejardhje migrimi.

Ndërsa Lars Haefner nga Shoqëria Zvicër -Shqipëri bën po ashtu një paralajmërim: “Nuk ndihmon asgjë duke ua ngarkuar fajin qtyre që udhëtojnë – askush nuk sëmuret me qëllim”, thotë Haefner.

Në vend të kësaj, do të kishte qenë më mirë që autoritetet në të dy vendet të reagonin me kohë ndaj kërcënimit që shihej se po afrohej, përcjell albinfo.ch. Në Kosovë, masat e reja janë vonuar shumë. Haefner mendon se për këtë arsye Zvicra duhej t`i paralajmëronte më qartë për rrezikun ata që udhëtonin.

“Fajtori kujdestar” për koronavirusin

Karantinimi i hershëm për të kthyerit e pavaksinuar mund të frenonte përhapjen e koronës, shton Presidenti i Shoqërisë Zvicër-Shqipëri. /albinfo/ KultPlus.com

Nora Tschanz, Gruppenleiterin Pflege betreut, einen Covid Patienten in der Isolationsstation des Universitaetsspital USZ, fotografiert am 19. November 2020 in Zuerich. (KEYSTONE/Christian Beutler)

Çfarë dihet deri tash për variantin Mu?

Organizata Botërore e Shëndetësisë po ndjek një variant të ri të koronavirusit, të quajtur Mu.

I zbuluar për herë të parë në Kolumbi, në fillim të vitit, Mu është raportuar në disa shpërthime sporadike të të infektuarve në pjesë të Amerikës së Jugut dhe Evropës.

Derisa përbën vetëm një pjesë të vogël të rasteve globale, shkencëtarët po studiojnë nëse ai ka karakteristika që e tejkalojnë mbrojtjen e krijuar nga vaksinimi ose infeksioni i kaluar.

Çfarë është varianti Mu?

I njohur edhe si varianti B.1.621, varianti Mu i koronavirusit është zbuluar në Kolumbi në muajin janar dhe tani është listuar si një nga pesë variantet e interesit nga Organizata Botërore e Shëndetësisë.

Kjo do të thotë se OBSH-ja e konsideron atë të vlefshëm për monitorim të veçantë, por e sheh si problem më të vogël potencial, krahasuar me variantet Delta apo Alfa, të cilat janë etiketuar si variante shqetësuese, për shkak të virulencës së tyre të shtuar.

Mu është varianti i parë i interesit që i shtohet listës qysh në muajin qershor. Atëbotë, në listë është përfshirë varianti Lambda.

Sipas raportit më të ri epidemiologjik të OBSH-së, Mu është renditur si “variant me interes” sepse ka një “grup mutacionesh që tregojnë veti të mundshme të ikjes imune”, që duhet të studiohen më tej.

Paul Griffin, ekspert i sëmundjeve infektive nga Universiteti Kuinsllend në Australi, thotë se ekspertët e shëndetit vazhdimisht i përcjellin “variantet e ikjes imune”, që mund ta kenë më të lehtë të infektojnë njerëz të vaksinuar përmes mutacioneve në proteinën e virusit.

“Nëse kjo proteinë do të ndryshonte ndjeshëm, atëherë sigurisht që ekziston mundësia që vaksinat tona të funksionojnë më pak”, thotë Griffin.

OBSH-ja ka thënë se duhen më shumë kërkime për të kuptuar efektet e variantit Mu, por, sipas dr Griffin, nuk ka ende prova që sugjerojnë se Mu i ik imunitetit.

Sipas OBSH-së, prevalenca e variantit Mu në infeksionet globale me koronavirus ka rënë qëkur është zbuluar për herë të parë, megjithatë “prevalenca në Kolumbi (39 për qind) dhe Ekuador (13 për qind) është rritur vazhdimisht”.

Ai përbën më pak se 0.1 për qind të të gjitha infeksioneve globale, por shpërthime të B.1.621 janë raportuar gjithashtu në pjesë të SHBA-së dhe Evropës.

Raporti i epidemiologjisë i OBSH-së thotë se të dhënat paraprake tregojnë se Mu duket se është më rezistent ndaj antitrupave.

Por, dr Griffin thotë se ato teste laboratorike nuk e japin pamjen e plotë se si funksionon imuniteti njerëzor në botën reale.

“Ato studime neutralizuese janë vërtet të dobishme… sepse janë mjaft të lehta për t’u bërë dhe janë mjaft të shpejta, por ato janë pjesë e rrëfimit dhe jo i gjithë rrëfimi”, thotë ai.

Cilat variante të tjera monitorohen nga OBSH-ja?

Mu është varianti i pestë që renditet nga OBSH-ja si variant interesi, ndërsa janë edhe katër variante të tjera më serioze, që janë etiketuar si variante shqetësuese.

Të nëntë variantet janë emëruar me shkronja të ndryshme të alfabetit grek.

Pesë variantet e interesit janë:

Eta, i zbuluar për herë të parë në shumë vende në dhjetor të vitit 2020;

Iota, i zbuluar për herë të parë në SHBA në nëntor të vitit 2020;

Kapa, i zbuluar për herë të parë në Indi në tetor të vitit 2020;

Lambda, i zbuluar për herë të parë në Peru në dhjetor të vitit 2020;

Mu, i zbuluar për herë të parë në Kolumbi në janar të vitit 2021.

Katër variantet shqetësuese, të cilat konsiderohet se kanë potencial për ta përkeqësuar pandeminë, janë:

Alfa, i zbuluar për herë të parë në Mbretërinë e Bashkuar në shtator të vitit 2020;

Beta, i zbuluar për herë të parë në Afrikën e Jugut në maj të vitit 2020;

Gama, i zbuluar për herë të parë në Brazil në nëntor të vitit 2020;

Delta, i zbuluar për herë të parë në Indi në tetor të vitit 2020.

Numri i varianteve të koronavirusit pritet të ndryshojë me kalimin e kohës, sepse sa më shumë që përhapet virusi, aq më shumë mundësi ka për të pësuar mutacione.

Griffin thotë se mënyra më e mirë për të kufizuar mutacionet e virusit është duke kufizuar përhapjen e tij.

“Sa më shumë njerëz që janë të vaksinuar, virusi ka më pak nikoqirë ku mund të jetojë”, thotë Griffin./KultPlus.com

Mumiet egjiptiane mund të zbulojnë historinë e koronavirusit

Mumiet egjiptiane mund të dokumentojnë viruset dhe mikrobet që kanë përdorur për të infektuar egjiptianët, dhe koronavirusi mund të jetë njëri prej tyre.

Koronavirusi, i cili qëndron pas pandemisë aktuale COVID-19, është një nga shumë viruset që studiuesit thonë se ka të ngjarë të ketë një histori që shtrihet në Egjiptianët e Lashtë.

Kjo u tha në një studim të fundit të botuar në The Lancet Microbe më 6 gusht.

Studimi u krye nga Jaffer Shah nga Qendra Kërkimore Mjekësore, Universiteti Kateb në Afganistan, Asmaa A Metwally nga Departamenti i Kirurgjisë, Anesteziologjisë dhe Radiologjisë, Fakulteti i Mjekësisë Veterinare, Universiteti Aswan, Aswan në Egjipt dhe Hani Aiash nga Departamenti i Perfuzionit Kardiovaskular, Universiteti Mjekësor SUNY Upstate, Syracuse, NY në SHBA.

Ai pretendon se “Analiza e mostrave historike do të thellojë kuptimin tonë për evolucionin e virusit”.

“Duke marrë parasysh natyrën e koronaviruseve që ndryshojnë dhe praninë e tyre në një gamë të gjerë të mikpritësve (karakteristikat e përbashkëta të shumë patogjenëve të izoluar nga mumiet egjiptiane, të tilla si virusi i hepatitit B dhe poliovirusi), dhe raportet e ndryshme që përmendin se shumë sëmundje të frymëmarrjes kishin prekur egjiptianët e lashtë, ka të ngjarë që koronaviruset të ishin të pranishëm në kohët e lashta. ”

“Për më tepër, ka pasur përpjekje të kohëve të fundit për të bërë analiza të sekuencave të gjenomit të virusit të gripit të ruajtur potencialisht në trupat e mumieve të lashta egjiptiane.”

Kjo i bën individët e mumifikuar egjiptianë “një burim i zbatueshëm për shërimin e ADN -së së lashtë bakteriale dhe virale dhe për të siguruar njohuri mbi evolucionin e patogjenit dhe historinë e sëmundjeve në kontekste unike historike”.

Studimet e mumieve egjiptiane kanë treguar se prania e agjentëve të ndryshëm infektivë dhe jo infektivë dhe sëmundjet e tyre të lidhura në epokën moderne kanë origjinën që nga kohët e lashta, si Schistosoma haematobium, lloji Mycobacterium leprae, virusi i hepatitit B njerëzor, Plasmodium falciparum, Toxoplasma gondii, Corynebacterium spp, murtaja Bubonike, Lia, tuberkulozi, arterioskleroza, poliovirusi dhe Leishmania donovani. / KultPlus.com

Presidentja Osmani: Është akt patriotik që secili prej nesh të vaksinohet sa më parë të jetë e mundshme

Presidentja Vjosa Osmani ju ka bërë thirrje qytetarëve të Kosovës të vaksinohen, nën vazhdën e valës së rritjes së numrit të rasteve të të infektuarve me koronavirus, përcjellë KultPlus.

Ajo me anë të një postimi në rrjetin social Facebook, ka përkujtuar rrezikshmërinë e variantit Delta të koronavirusit, derisa e ka cilësuar vaksinimin si “akt patriotik”.

“Vaksina ka mjaftueshëm për të gjithë, ndaj duhet të ndajmë pak minuta nga dita për ta bërë një veprim, i cili në kohën e sotme është më shumë se sa personal”, ka shkruar Osmani.

KultPlus ju sjell njoftimin e plotë të saj:

Rritja e numrit të të infektuarve me variantin Delta kërkon shtimin maksimal të kujdesit, sepse po s`u vaksinuam të gjithë, të gjithë do të jemi humbës. Secili prej nesh ka përgjegjësi në raport me tjetrin për t`i zvogëluar dhimbjet, e para se gjithash humbjet.

Teksa shqetësimi për variantin e ri të virusit rritet, ne duhet t`i shtojmë përpjekjet për vaksinim. Është akt patriotik që secili prej nesh të vaksinohet sa më parë të jetë e mundshme. Vaksina ka mjaftueshëm për të gjithë, ndaj duhet të ndajmë pak minuta nga dita për ta bërë një veprim, i cili në kohën e sotme është më shumë se sa personal.

Për të mirën e të gjithëve, për sigurinë tonë, për mbarëvajtjen e shtetit tonë, vaksinohuni të gjithë!

Ne duhet dhe mund të ngadhënjejmë ndaj çfarëdo virusi!

Vaksinohuni! / KultPlus.com

Walensky: Varianti Delta i coronavirusit, mes sëmundjeve më ngjitëse që njeh shkenca

Zyrtarët amerikanë të shëndetësisë po vazhdojnë paralajmërimet për rrezikshmërinë e variantit Delta të coronavirusit, për të cilin thonë se është ndër viruset më ngjitëse që njeh shkenca.

Ata gjithashtu u bëjnë thirrje të gjithë të pavaksinuarve që të imunizohen për të mbrojtur veten dhe të tjerët.

Drejtoresha e Qendrës për Kontrollin dhe Parandalimin e Sëmundjeve, Rochelle Walensky, tha se varianti Delta i coronavirusit është një nga viruset më ngjitëse që ajo ka hasur në karrierën e saj 20 vjeçare.

Këto komente ajo i bëri gjatë një konference virtuale shtypi ku tha se infektimet me variantin Delta të COVID-19 po vazhdojnë të përhapen gjithandej në Shtetet e Bashkuara.

“Varianti Delta po përhapet me shpejtësi të madhe dhe tani përbën mbi 83 për qind të infektimeve në Shtetet e Bashkuara. Krahasuar me virusin që qarkullonte në ShBA në fillim të pandemisë, varianti Delta është shumë më i ashpër dhe më ngjitës”, tha ajo.

Walensky u bëri thirrje njerëzve të vaksinohen për të mbrojtur veten nga varianti dhe të frenojnë përhapjen e mëtejme të coronavirusit.

“Udhëzimi ynë është i qartë që kur e publikuam para disa muajsh. Nëse nuk jeni vaksinuar vazhdoni mbajtjen e maskës për të mbrojtur veten dhe të tjerët rreth jush. Dhe më e rëndësishmja, duhet të vaksinoheni për të mbrojtur më mirë veten”, tha ajo.

Në këtë takim nuk u bë e ditur nëse Qendra për Kontrollin dhe Parandalimin e Sëmundjeve po shqyrton mundësinë e ndryshimit të udhëzimit për maskat. Në maj ata thanë se personat e vaksinuar plotësisht nuk kanë nevojë të përdorin maskat kur ndodhen në hapësira publike.

Sipas të dhënave të përpunuara nga Universiteti Johns Hopkins, nga fillimi i pandemisë Shtetet e Bashkuara regjistruan mbi 34 milionë raste me COVID-19 dhe mbi 610 mijë vdekje. /voa/ KultPlus.com

OKB: Mbyllja e shkollave nga koronavirusi rrezikon një katastrofë gjeneratash

Mbyllja e shkollave të lidhura me Covid-19, e cila prek ende më shumë se 156 milionë studentë në nëntëmbëdhjetë vende, nuk mund të zgjasë më, përndryshe do të jetë një katastrofë gjeneratash. Është ky alarmi i dhënë nga dy organizatat e kombeve të Bashkuara Agjencitë e Kombeve të UNESCO dhe UNICEF ​.

“Kanë kaluar tetëmbëdhjetë muaj nga fillimi i epidemisë Covid-19 dhe arsimimi i miliona fëmijëve vazhdon të ndërpritet. Kjo situatë nuk mund të vazhdojë. Shkollat ​​duhet të mbyllen të fundit dhe të parat që rihapen” , thonë në një deklaratë të përbashkët drejtorët e përgjithshëm të UNICEF, Henrietta Fore dhe të UNESCO-s, Audrey Azoulay, transmeton KultPlus.

Për këta dy zyrtarë, rihapja e shkollave nuk mund të presë fundin e pandemisë, as vaksinimin e të gjithë nxënësve dhe stafit, dhe mund të kryhet “në mënyrë të sigurt”, veçanërisht pasi shkollat ​​nuk janë ndër vendet kryesore të shumimit të virusit, thonë ata.

 “Për të shmangur një katastrofë brezash, ne i nxisim politikanët dhe qeveritë të vendosin përparësinë e rihapjes së sigurt të shkollave. Mbyllja e shkollave rrezikon të ardhmen tonë vetëm për të ruajtur në mënyrë të pasigurt të tashmen tonë”, përfundojnë ata. / KultPlus.com

John Davis vdes pas betejës me koronavirusin

Këngëtari John Davis ka vdekur në moshën 66 vjeç pas një luftë me koronavirusin.

Ai kishte një vokal të pabesueshëm.

Vajza e John, Jasmin, e kujtoi babanë e saj në Facebook me anë të një mesazhi prekës.

Ajo shkroi: “Fatkeqësisht babai im ndërroi jetë këtë mbrëmje pas infektimit me COVID-19. Ai bëri shumë njerëz të lumtur me buzëqeshjen e tij, shpirtin e tij të lumtur, dashurinë dhe sidomos përmes muzikës së tij. Ai i dha aq shumë botës! Ju lutemi jepni dorën e fundit të duartrokitjeve. Do të na mungojë shumë”. / Klan Kosova / KultPlus.com

Insekti nga Kosova bëhet lajm në botë

Zbulimi i insektit “Potamophylax coronavirus” në Kosovë është bërë lajm botëror.

Pak ditë pasi profesori i shkencave në degën e biologjisë, Halil Ibrahimi, njoftoi për zbulimin dhe u shpreh se ky insekt jeton vetëm në Bjeshkët e Nemuna, për të ka shkruar edhe mediumi i njohur për zbulime shkencore “Phys.org”.

Duke iu referuar publikimit në revistën prestigjioze “Boidiversity Data Journal”, kjo faqe ka shkruar se pas analizave molekulare dhe morfologjike ishte kuptuar se është specie në të cilën shkenca s’kishte pasur qasje më herët. / KultPlus.com

“Po mbytemi”, njerëzit dalin rrugëve: Frikë dhe kaos në Brazil

Brazili është një ndër vendet më të prekura nga koronavirusi duke numëruar dhjetra mijëra të vdekur dhe një numër rekord të prekurish çdo ditë.

Gjatë ditëve të fundit vendi është duke u përballur me mungesa serioze të oksigjenit në spitale duke bërë që të ndërrojnë jetë të paktën 11 persona.

Nisur nga situata e krijuar, qytetarët kanë dalë në rrugët e Sao Paolos duke protestuar kundër Presidentit Bolsonari dhe administratës së tij.

Një numër i madh protetsuesish kishin vendosur qese plastike në kokë duke hedhur sloganin “po mbytemi”, ndërsa fotot kanë bërë xhiron e botës brenda pak minutave.

Vetëm brenda 24 orëve të fundit në Brazil humbën jetën 595 persona prej koronavirusit duke e çuar në më shumë se 225 000 numrin total të të vdekurve që prej fillimit të pandemisë. / KultPlus.com

Middleton: Të jesh nënë në këtë epokë

Të jesh nënë në epokën e koronavirusit është rraskapitëse, deklaroi Kate Middleton, Dukesha e Kembrixhit si dhe nëna e tre fëmijëve, George, 7 vjeç, Charlotte 5, dhe Louis 2 vjeç, gjatë një bisede telefonike me disa prindër, për vështirësitë e hasura gjatë bllokimit me fëmijët e tyre, shkruhet në faqen vanityfair.it.

Duke filluar me shkollimin në shtëpi, gjë që e vë Dukeshën e Kembrixhit në krizë sidomos kur bëhet fjalë për detyrat e shtëpisë së matematikës të djalit të saj të madh.

Dukesha zbuloi gjithashtu se gjatë karantinës asaj iu desh të improvizonte jo vetëm si një mësuese, por edhe floktore për fëmijët e saj.

“Fëmijët janë të tmerruar nga prerjet e mia!”, theksoi duke qeshur ajo.

Për të treguar më pas, kësaj here me një ton serioz, se për të “mbështetja më e madhe gjatë pandemisë” ishte bashkëshorti William.

Edhe princi, muajt e fundit, kishte folur për vështirësitë e karantinës me fëmijët, duke rrëfyer se arsimi në shtëpi për fëmijët po i vë nervat në provë.

”Për shkak të shkollimit në shtëpi kam zbuluar se kam shumë më pak durim sesa besoja”, thotë ai. /atsh/ KultPlus.com

Japonezët luftojnë koronavirusin me maska luksoze

Trendbërësit në Japoni tani po mbrojnë qytetarët nga koronavirusi në një stil luksoz me maska me diamante e margaritarë në vlerë prej gati rreth 10 mijë dollarë secila.

Zinxhiri “Mask.com” nisi të shiste maskat e bëra me dorë javën e shkuar. Kompania synon të përfitojë nga shitjet në një kohë kur pandemia ka goditur edhe industrinë e modës.

Maskat e diamantit janë të mbështjella me diamante 0.7 karat dhe me më shumë se 300 copa të kristalit Swaroski.

“Të gjithë janë të mërzitur si pasojë e virusit dhe do të ishte për mrekulli nëse do të ndiheshin më mirë teksa shohin një nga këto maska të shkëlqyeshme”, ka thënë Azusa Kajitaka, punëtore në një nga dyqanet e kompanisë në Tokio, të mërkurën. “Industria e bizhuterive është në rënie po ashtu për shkak të koronavirusit dhe prandaj e kemi bërë këtë pjesë të projektit për të ndihmuar ringjalljen e Japonisë”.

Megjithatë, qytetarët nuk i shohin maskat si të përshtatshme për ta.

“Nëse e bart ndonjë nga këto maska, më duhet të kem veshjen e duhur për t’ia përshtatur. Andaj mendoj se do të më turpëronte”, ka thënë 66-vjeçarja, Mitsue Kaneko.

Maskat e Japonisë janë larg nga më të shtrenjtat në botë. Ky çmim i takon maskave të prodhuesit izraelit “Yvel”, që shet maska me çmim 1.5 milionë dollarë. / KultPlus.com

‘The Sun’: Vaksina që lufton koronavirusin del për një muaj

Lajmi që pritej nga të gjithë, u publikua nga e përditshmja ”The Sun”. Kjo e fundit ka arritur të zbuloi një dokument sekret, ku thuhet se dozat e para të vaksinës anti-Covid, pritet të ofrohen nga Instituti Kombëtar i Shëndetësisë (NHS) në Mbretërinë e Bashkuar, që nga muaji i ardhshëm, pasi pesë qendra të vaksinimit masiv janë planifikuar të jenë në veprim deri në Krishtlindje.

Qendrat e para të vaksinimit masiv janë planifikuar për vendet në qytetet kryesore duke përfshirë Leeds, Hull dhe Londër. Përveç këtyre pesë qyteteve kryesore, mjekëve të përgjithshëm dhe farmacistëve do t’iu kërkohet të ndihmojnë në përpjekjet masive të vaksinimit, me një njësi ambulatore të lëvizshme që do të përdoret për të arritur tek komunitetet e rrezikuara dhe në shtëpitë e kujdesit.

“Kemi gjasa të marrim rezultatet e provës së parë brenda një muaji, dhe kjo do të thotë se skenari më i mirë për vaksinim është pak para Krishtlindjeve”, tha një burim për ”The Sun”.

Të dielën, Matt Hancock konfirmoi se ushtria do të përfshihej në shpërndarjen e një vaksinës. Ministri i Shëndetësisë tha se planet janë për të kombinuar NHS dhe ushtrinë për përhapjen e vaksinës dhe se njerëzit do ta merrnin vaksinën ‘sipas përparësisë’.

Pretendenti kryesor në garën për të gjetur një vaksinë është Universiteti i Oksfordit, ku provat kanë vazhduar që nga Prilli, dhe ka shpresa se vaksina mund të aprovohet nga rregullatorët deri në Krishtlindje.

Rreth 100 milion doza nga Oksford, vaksinë e cila mbetet ende për t’u aprovuar, janë urdhëruar tashmë nga qeveria. Kjo vaksinë kërkon dy doza, 28 ditë larg, që do të thotë se sfida logjistike me të cilën përballet qeveria është dyfish më e madhe. Administrimi i dy dozave të një vaksine për 53 milion të rritur në periudhën gjashtë-mujore do të përfshinte 600,000 vaksinime në ditë.

Dokumentet, e zbuluara në ”The Sun”, sugjeruan gjithashtu që punonjësit shëndetësorë duke përfshirë veterinerë, dietologë, gjithashtu mund të ndihmojnë në administrimin e dozave në publik.

Ata që jetojnë në shtëpi të moshuarish dhe personeli, do ta marrin atë sa më shpejt që të jetë gati. Të radhës janë personat e moshës mbi 80 vjeç dhe stafi i NHS, të ndjekur nga personat mbi 65 vjeç, të rriturit më të rinj në rrezik më të lartë dhe njerëzit mbi 50 vjeç.

Sakaq, një zëdhënës i qeverisë tha: “Qeveria do të bëjë gjithçka që duhet për të hedhur një vaksinë të suksesshme shpejt dhe në mënyrë të sigurt.. Një sasi e madhe e planifikimit dhe përgatitjes tashmë është bërë duke përfshirë sigurimin që ne kemi sigurim adekuat, transport, PPE dhe ekspertizë logjistike. Ne jemi duke punuar ngushtë me NHS dhe do të përdorim ushtrinë në planifikimin e logjistikës kur është e nevojshme, pasi ata tashmë kanë bërë përpjekje të mëdha për të mbështetur me sukses përpjekjet tona operacional”, përfundon artikulli./ KultPlus.com

‘Romeo dhe Zhulieta’ e koronavirusit, çifti italian u dashurua nga ballkonet e shtëpive

Koronavirusi nuk arriti “ta vrasë” dashurinë. Kjo dëshmohet nga historia e një çifti në Itali që u njoh në ballkonet e shtëpive gjatë bllokimit nga koronavirusi.

Ata janë fejuar, duke u bërë një “Romeo dhe Zhulietë” e ditëve moderne në Verona, i njëjti qytet ku ndodhi historia e famshme e Shakespearet.

Për Michele D’Alpaos, ishte dashuri me shikim të parë. Ai e kujton me detaje momentin kur pa 40-vjeçaren, Paola Agnelli, ndërsa ajo ecte në tarracën e banesës së saj në Verona.

“Ishte pasditja e 17 marsit, kur u detyrova të punoja nga shtëpia për shkak të bllokimit”, tha D’Alpaos për CNN. “Unë pashë këtë vajzë të bukur, Paolan. U trondita menjëherë nga bukuria e kësaj vajze, nga buzëqeshja e saj. Unë duhej ta njihja atë.”

Çifti kishte jetuar përballë njëri-tjetrit pothuajse tërë jetën e tyre, por nuk ishin parë asnjëherë. Por atë pasdite, ndërsa motra e saj luante violinë në ballkonin e tyre siç bënte çdo mbrëmje, Agnelli kapi shikimin e D’Alpaos.

“Unë menjëherë mendova: çfarë djali i bukur”, tha Agnelli për CNN, transmeton KultPlus.

Ndërsa të dy ishin të huaj deri në atë moment, fati gjeti një mënyrë për t’i bashkuar ata.

Agnelli rastësisht njohu motrën e D’Alpaos sepse ato vizitonin të njëjtën palestër dhe ndiqnin njëra-tjetrën në Instagram. Mjaft afër për t’i buzëqeshur njëri-tjetrit nga ballkonet e tyre, por shumë larg për t’u përqafuar, të dy kaluan ditët dhe netët e tyre duke biseduar, duke qeshur dhe duke mësuar për njëri-tjetrin.

Ndërsa Italia mbeti nën bllokim për shkak të pandemisë, Agnelli dhe D’Alpaos nuk kishin zgjidhje tjetër përveç se të qëndronin larg. Por më 4 maj, gati dy muaj nga fillimi i historisë së tyre të dashurisë, Agnelli dhe D’Alpaos më në fund ishin në gjendje të takoheshin në një kopsht afër shtëpive të tyre.

“Ne as nuk folëm, u ulëm në një stol dhe u puthëm për gjysmë ore si dy adoleshentë”, tha tutje D’Alpaos.

Aktualisht ata nuk kanë plane konkrete për një martesë, por ajo që dinë me siguri është dëshira e tyre e përbashkët për të krijuar një familje. / KultPlus.com

Dilemat për kthim në shkolla në kohë të koronavirusit

Shtetet në gjithë botën janë duke u përballur me dilema rreth mënyrës së kthimit të fëmijëve nëpër shkolla, teksa vazhdon të ketë raportime për shpërthime të reja të koronavirusit.

Në Shtetet e Bashkuara, vendin e prekur më së keqi në botë nga ky virus, me më shumë se 4.7 milionë persona të infektuar, udhëheqësit e distrikeve shkollore janë duke analizuar një varg qasjesh.

Eksperti i Qeverisë amerikane për Sëmundje Infektuese, Anthony Fauci, ka thënë përgjatë një interviste më 3 gusht se dëshiron që fëmijët të kthehen në shkollë, mirëpo një gjë e tillë duhet të bazohet në kushtet lokale.

“Pozicioni fillestar është që të tentoni sa më shumë për hapje të shkollave”, ka thënë Fauci.

“Mund të jenë disa zona kur shkalla e virusit është aq e lartë andaj kthimi i fëmijëve në shkollë nuk do të ishte praktik”, ka thënë Fauci.

“Prandaj nuk mund të kemi një deklaratë për kthim të fëmijëve në shkollë në SHBA. Varet ku jeni”.

Presidenti amerikan, Donald Trump është duke bërë presion për rihapje të shkollave, duke e bërë këtë një prej çështjeve kyçe para zgjedhjeve të muajit nëntor, pavarësisht pse territori amerikan ka regjistruar rreth 155,000 vdekje.

Kthimi i fëmijëve në shkolla konsiderohet kusht edhe për kthim të prindërve në punë, ndonëse ka shqetësime se nxënësit mund të infektohen dhe të dërgojnë virusin nëpër shtëpi.

Viti i ri shkollor fillon këtë javë në disa shtete, duke përfshirë Xhorxhian, Luizianan, Misisipin dhe Tenesin.

Në mesin e mundësive të ofruara për vitin e ri shkollor janë: shkuarja në klasa, mundësia e mësimit në distancë përmes platformave online, apo kombinimi i të dyja qasjeve.

Megjithatë rritja e numrit të rasteve me koronavirus ka nxitur disa zona që të shtyjnë mësimin nëpër klasa, të paktën në javët e para të fillimit të mësimit, duke përfshirë Llos Angjellesin, Filadelfian dhe Uashingtonin.

Guvernatori i Nju Jorkut, Andrew Cuomo ka thënë se do të njoftojë më vonë gjatë kësaj jave, nëse do të rihapen shkollat në këtë shtet.

Në Indiana, ku shkollat janë rihapur javën e kaluar, rritja e numrit të të infektuarve ka ndikuar në mbylljen e dy institucioneve shkollore, duke vënë në pah edhe një herë sesa i vështirë është kthimi në normalitet.

Ndërkohë që shkollat bëjnë plane, shumë mësues kanë dyshime për kthim në klasa.

Mësimdhënësit e dhjetëra shkollave kanë protestuar nga makinat e tyre rreth planeve të disa guvernatorëve për kthim në klasa gjatë kohës së pandemisë.

Për dallim nga SHBA-ja, pavarësisht pse shqetësimet për shpërthime të reja të koronavirusit janë në rritje në Evropë, dhjetëra mijëra nxënës gjermanë janë kthyer të hënën në shkollë, pas përfundimit të pushimeve verore në landin verior, Mecklenburg-Vorpommern.

Ky është landi i parë, nga 16 sa janë në total, që ka rihapur shkollat prej kur ka nisur përhapja e sëmundjes COVID-19, që shkakton koronavirusi, në mesin e muajit mars.

Në Amerikën Latine, pothuajse i gjithë procesi mësimor është duke u kryer përmes platformave online, apo televizionit, meqë pandemia vazhdon të rëndojë gjendjen në këtë rajon.

Meksika ka njoftuar që më shumë se 30 milionë fëmijë meksikanë do të nisin mësimin në distancë më 24 gusht, ndërkohë që ky shtet regjistron mbi 48,000 të vdekur nga COVID-19.

Sekretari për Edukim, Esteban Moctezuma Barragan, ka thënë se nxënësit do të mësojnë nga televizioni sepse 96 për qind e familjeve kanë nga një pajisje të tillë dhe se mësimi në ambiente shkollore është shumë i rrezikshëm në këtë pikë.

Në zonat rurale, nxënësit do të mësojnë përmes radios.

Moctezuma ka thënë se shumë shkolla që janë hapur, janë detyruar të mbyllen shpejt për shkak të infektimeve në rritje me koronavirus. Në Bolivi, qeveria ka njoftuar për dhënie fund të vitit shkollor, duke thënë se ka qenë i pamundshëm garantimi i edukimit në shtetin ku zonat rurale kanë probleme me qasjen në internet./REL/ KultPlus.com

Valbon Krasniqi: Vizitat familjare, mundësi e infeksionit të lartë

Valbon Krasniqi, ushtrues detyre i Shërbimit Spitalor Klinik dhe Universitar të Kosovës (SHSKUK), ka përsëritur thirrjen e tij dhe të udhëheqësve të tjerë shëndetësorë që sot për festën e Kurban Bajramit, të shmangen vizitat nëpër familje.

I ftuar i emisionin SOT në KTV, ai ka thënë se këto vizita dhe grumbullimet në epidemiologji njihen si faktorë për rritjen e infeksionit.

Kosova po kalon ditë të vështira me pandeminë COVID-19. Vetëm dje u raportuan se në 24 orët paraprake kanë vdekur 16 pacientë me koronavirus.

“Meqenëse këto festa shoqërohen me shumë vizita, me grumbullime, atëherë duhet të them se çdo grumbullim në epidemiologji njihet si faktor shumë i lartë i infeksionit. Ne po i lusim qytetarët, pasi kemi situatë shumë të rënduar, shumë më shumë se në festën e kaluar. Kjo na obligon të kemi kujdes të shtuar. Sot me qëllim po u iki shifrave sa i kem të shtruar në klinika, por duhet të them se dje kemi vendosur të hapim edhe një repart në QKUK për pacientët me COVID-19. Kemi hapur një repart në Klinikën e Gjinekologjisë dhe tash kemi pesë të tilla për këta pacientë”, ka thënë epidemiologu Krasniqi. / KultPlus.com

Kirgistani shndërron hotelet dhe restorantet në spitale për koronavirus

Hotelet dhe restorantet në Kirgistan janë shndërruar në spitale të përkoheshme pas ankesave të shumta për mungesë të shtretërve në spitale për trajtimin e pacientëve me koronavirus.

Kirgistani i ka raportuar më shumë se 33,000 raste të koronavirusit dhe mbi 1,300 të vdekur. Të martën, zyrtarët shëndetësorë njoftuan se në këtë shtet janë shënuar 548 raste të reja.

Sistemi shëndetësor jostabil, me vetëm 2,036 shtretër për pacientët me virus, filloi të shkojë drejt kolapsit. Pacientët ankoheshin se është e pamundur të gjenden shtretër të lirë në spitale, shkruan “The Guardian”, transmeton Gazeta Express.

Për këtë arsye u aktivizuan njerëzit e rëndomtë për të ofruar ndihmë. Hotelet dhe restorantet u shndërruan në hapësira për pacientë. Aktivistët gjetën rroba mbrojtëse, ilaçe si dhe ushqim e pije për punëtorët shëndetësorë.

Spitalet raportuan më pak pacientë dhe vullnetarët thanë se tash po pranojnë më pak thirrje gjatë natës nga njerëzit që po kanë vështirësi në frymëmarrje. / KultPlus.com

Kompania zvicerane premton maskën që e shkatërron koronavirusin

Kompania zvicerane e higjieno-teknologjisë (Livinguard) premton një lloj maske që jo vetëm i filtron koronavirusët, por edhe i shkatërron ata, shkruan Blick, transmeton KultPlus.

Kreu i kompanisë Sanjeev Swamy 59-vjeçar, së bashku me hulumtuesit, ka zhvilluar një proces që mund të përdoret për të vetdezinfektuar sipërfaqen.

Swamy dëshiron të futet në tregun e materialeve për mbrojtje nga koronavirusi. Ai e ka transferuar teknologjinë e tij te prodhimi i maskave. Në parim: sipërfaqeve si tekstili u jepet një ngarkesë e fortë pozitive. Nëse bakteriet apo viruset – që kanë ngarkesë negative – vijnë në kontakt, atëherë shkatërrohen.

Sipas Swamyt kjo çon deri te shkatërrimi i patogjeneve.

“Duhet të imagjinoni se është si magnet. Nëse virusët i afrohen maskës sonë, atëherë tërhiqen dhe shkaktohet një lloj i qarkut të shkurtër ku virusët shkatërrohen dhe largohen nga maska”, ka thënë Swamy.

Por a funksionon vërtetë?

Swamy premton: “Teknologjia jonë ka dëshmuar se shkatërron 99.9 për qind të koronavirusëve, që vijnë nga prekjet”.

Sigurisht ata që mbajnë maskat e Livinguard janë të mbrojtur nëse përkujdesen edhe për masat tjera higjienike, si larja e duarve dhe mbajtja e maskave në mënyrë korrekte.

“Është gati e pamundur që të kalojë ndonjë gjë nëpërmjet maskave tona”, ka thënë Swamy. / KultPlus.com

Greta Thunberg do t’i dhurojë 100,000 euro për luftimin e koronavirusit në Amazonë

Aktivistja e njohur nga Suedia, Greta Thunberg, njoftoi përmes rrjetit Twitter se do t’i dhurojë 100,000 euro për luftimin e koronavirusit në Amazonën e Brazilit.

Ky njoftim erdhi pasi figura e famshme u shpërblye me Çmimin Gulbenkian për Humanizëm, i cili ka vlerë monetare prej një milionë eurosh.

Donacioni që do të merret nga shuma e këtij çmimi do të dhurohet për organizatën “SOS Amazona”, që është pjesë e “Fridays of Future Brazil”, organizatë që po ofron ndihmë në luftën kundër koronavirusit në territoret e njerëzve indogjenë.

Thunberg gjithashtu njoftoi përmes një deklarate se 100,000 euro të tjera do t’ia dhurojë Fondacionit “Stop Ecocide” për të ofruar ndihmë që krimi ndaj mjedisit të bëhet krim ndërkombëtar.

Përmes një videoje të publikuar në rrjetin social, vajza me famë botërore tha se do t’i japë si donacion të gjitha të hollat e çmimit të madh, por nuk dha hollësi për përfituesit e tjerë. / KultPlus.com

ENVI Committee – Exchange of views with Swedish environment activist Greta Thunberg

Maska, arma më e fuqishme kundër koronavirusit

Me prova në rritje, maskat po ndihmojnë në parandalimin e transmetimit të koronavirusit, edhe nëse një person i infektuar ka vënë maskë është në kontakt të ngushtë me të tjerët.

Robert Redfield, drejtor i Qendrave për Kontrollin dhe Parandalimin e Sëmundjeve, tha se ai beson që pandemia mund të vihet nën kontroll gjatë katër deri tetë javëve të ardhshme nëse “ne mund të bindim të gjithë të vënë një maskë tani”. Komente të tij, të bëra të martën me Gazetën e Shoqatës Mjekësore Amerikane, pasuan një editorial që ai dhe të tjerë shkruan, duke theksuar “prova të bollshme” të përhapjes asimptomatike dhe duke theksuar studime të reja që tregojnë se si maskat ndihmojnë në zvogëlimin e transmetimit.

Hulumtimi që citoi Dr. Redfield përfshiu një studim të botuar rishtazi që sugjeron që përdorimi universal i maskave kirurgjikale ndihmoi në uljen e niveleve të infeksioneve të konfirmuara Covid-19 midis punonjësve të kujdesit shëndetësor në sistemin e kujdesit shëndetësor Mass General Brigham në Massachusetts, përcjell albinfo.ch.

Komentet e tij janë mesazhi më i qartë akoma nga CDC, mes debatit të ashpër mbi maskat e fytyrës, nxitur fillimisht nga mesazhe të zyrtarëve federalë dhe globalë për domosdoshmërinë e tyre dhe më pas nga ata që theksojnë liritë individuale. /KultPlus.com