Muaj: Shkurt 2018

Alberina Haxhijaj

Regjisori Erion Kame është në fazën finale për të sjellë filmin e tij të metrazhit të gjatë – “Një jetë me ty”. Për KultPlus regjisori ka treguar se në fillim të marsit stafi i ekipit filmik do të hyjë në xhirime dhe sipas tij në tetor do të jetë edhe premiera.

Regjisori Kame për KultPlus tregon se dëshiron që filmi me historinë e tij të jetë një atraksion për këtë vend. Dëshiron të tregojë vendet e bukura që i kemi e të cilat sipas tij janë mjaftë shumë, duke treguar edhe histori për njerëz “të bukur” me problematika si të gjithë qytetarët e botës. Sipas tij dëshira për të folur me gjuhën e filmit është një dëshirë që të gjithë e kemi thellë-thellë brenda vetes.

Filmi “Një jetë me ty” ngre një pyetje shumë të thjeshtë: Çfarë është martesa?

“Është odiseja 10 vjeçare e një çifti të martuar. Pra, që nga njohja e deri pas dhjetë vitesh më vonë. E veçanta është se e njëjta histori rrëfehet nga të dy bashkëshortët. Këndvështrimet e tyre janë krejtësisht të ndryshme. Po ashtu edhe qëndrimet. Në një moment të caktuar të filmit, marrëdhënia tyre rrezikohet seriozisht nga hyrja në jetën e tyre e një vajze e cila punon me burrin. Nëse ka një histori mes tyre, apo kjo është pjellë e fantazisë së gruas, por edhe e të shoqit, kjo është për t’u parë”, tregon regjisori, duke shtuar se të dy personazhet e duan shumë njëri-tjetrin dhe kjo ka shumë rëndësi në një marrëdhënie bashkëshortore. Por a është e mjaftueshme? A i përgjigjemi dot pyetjes: Çfarë është martesa?

Në rolin e bashkëshortit në film do të jetë aktori Dritan Arbana, i cili ka mbaruar studimet për aktor në Australi ku ka pasur shumë eksperienca dhe punë. Për publikun shqiptar ai njihet me projektin shqiptaro-australian “Bloodlands”, si producent dhe aktor. Në rolin e gruas do të jetë aktorja e teatrit dhe ekranit, Olta Gixhari.

“Ne kemi filluar provat me Tanin dhe Oltën dhe mendoj se çdo gjë ka shkuar shumë mirë. Presim në fundjavë edhe vajzën që do ti bashkëngjitet projektit tonë. Pjesa tjetër e aktorëve do të jenë emra shumë të njohur për publikun, por do të preferoja që ky i fundit të vinte vetë në kinema për t’i parë”, u shpreh ai duke vlerësuar lartë aktorët të cilët janë pjesë e ekipit të filmit.

Edhe pse buxheti i këtij filmi është shumë i kufizuar, ekipi i filmit po bën të gjitha përpjekjet që lokacionet të gjenden mes miqsh dhe dashamirësish. Deri në këtë moment atyre u janë gjendur shumë të tillë.

“Sigurisht që vendi kryesor i xhirimeve është një shtëpi. Kjo shtëpi është vënë në dispozicion nga Dritan Arbana që ka lënë banesën e tij për të zhvilluar xhirimet. Kjo është një sakrificë e jashtëzakonshme nga ana e tij, pasi vendet e xhirimit mund të krahasohen me një fushëbetejë. Por sakrifica të tilla bëjnë njerëz të cilët ia dinë vlerën artit dhe konkretisht filmit. Shtëpia e Tanit nuk është zgjedhur vetëm se s’kishim alternativë tjetër, por në radhë të parë është një shtëpi e ngrohtë, dinjitoze dhe përfaqësuese për çiftin e filmit”, u shpreh regjisori Kame, i cili kohë më parë pati dhënë komedinë më të njëjtin titull në Teatrin Kombëtar.
Komedia “Një Jetë Me Ty” ka qenë një projekt i Teatrit “A. Moisiu” të Durrësit me Ministrinë e Kulturës. Premiera është dhënë në 9 maj 2016 në Teatrin Kombëtar, kurse ka vazhduar deri në dhjetor 2017 në Korçë. Komedia ka pasur rreth 30 repriza.

“Çifti i aktorëve në skenë, por edhe në jetë, Romir Zalla dhe Suela Bako, janë ata që i dhanë jetë kësaj vepre për herë të parë. Po ashtu edhe aktorja Vilma Hodo e më pas Ina Gjonci. Ka qenë një eksperiencë e paharruar dhe kemi kaluar shumë mirë së bashku, dhe teatri ta jep këtë mundësi. Unë kujtoj çdo moment me ta”, u shpreh regjisori mbi komedinë duke shtuar se filmi ka shumë të përbashkëta me komedinë, por kësaj radhe gjuha e shprehjes dhe konceptimi është tjetër, pasi ai ka dëshirë që në film të flasë me nota më romantike dhe pak më “seriozisht”.

“Qëkur kam shkruar komedinë kam përdorur një gjuhë filmike. Megjithatë, tashmë mund të them që shumë prej dialogëve janë redaktuar, pasi filmi ta jep këtë mundësi. Diçka që mund të thuhet, shihet. Po ashtu janë shtuar karaktere dhe personazhe të tjerë të cilët do ta shtyjnë më përpara historinë në mënyrë më organike. Ajo që i bashkon do të jetë qëndrimi. Ky mbetet i pandryshuar. Pra, ideja për të mos dhënë mesazhe të drejtpërdrejta, por t’ia lëmë në dorë shikuesit, nëpërmjet qëndrimit tonë”, është shprehur regjisori Erion Kame.

Ai tregon se ka shumë arsye të cilat e kanë shtyrë të shndërrojë komedinë në një skenar për film të gjatë. Në radhë të parë për të ka qenë dëshira për të fiksuar në ekran një histori e cila nuk i përket vetëm regjisorit. E as shqiptarëve. Është një histori e cila i flet të gjithë shoqërisë botërore. Dhe jo vetëm sot.
“Një Jetë Me Ty” është projekt filmik i financuar nga Qendra Kombëtare e Kinematografisë, në kuadrin e filmave të pavarur – indipendentë, me shtëpi filmike “Black Box” e përfaqësuar nga Tan Kazazi dhe së fundmi filmit i është bashkëngjitur edhe shtëpia e mirënjohur filmike “Kinostudio Dardan” me përfaqësues Gent Prizreni. Skenari ka fituar në bordin e QKK-së që në fund të qershorit të vitit të kaluar. / KultPlus.com

Filmi i parë i metrazhit të gjatë i Blerta Zeqirit ka filluar të shfaqet në kinematë kosovare më 1 shkurt dhe ka përmbyllur javën e parë të shfaqjeve me 1355 bileta të shitura nga vetëm 2 termine në ditë, duke ia kaluar kështu premierave botërore, si Den of Thieves dhe Maze Runner. Nga e premtja “Martesa” do të shfaqet në 3 termine ditore.

Mbrëmë Martesa ka përmbyllur javën e parë të shfaqjes në Kosovë, ku ka arritur të mbushë pothuajse plotësisht sallat e Cineplexx në të gjitha shfaqjet e saj, duke u bërë kështu filmi më i shikuar për javën e parë të shkurtit 2018.

“Edhe pse ishim të kënaqur me premierën botërore në Tallinn, me çmimet dhe me kritikat e jashtëzakonshme ndërkombëtare nga Variety.com dhe Cineuropa.org, nuk e kam pritur aspak këtë interesim nga publiku kosovar. Assesi nuk kam pritur që shikuesit të kenë nevojë të blejnë bileta shumë më herët për të gjetur vend, e gjithsesi jo të kthehen pa e parë filmin për shkak të shitjes së biletave”, tha Producenti i filmit Keka Kreshnik Berisha.

As regjisorja dhe skenaristja Blerta Zeqiri s’e ka pritur një jehonë të tillë: “Jam e kënaqur që një punë 5-vjeçare po arrihet të shikohet nga publiku kosovar, e i cili është edhe arsyeja pse bëjmë film e pse fondet e shtetit tonë shkojnë në kinematografi. Festivalet janë të rëndësishme, por as nuk i afrohen kënaqësisë dhe përmbushjes që e arrin një filmbërës kur publiku e pëlqen filmin. Shpresoj që produksionet e Kosovës gjithmonë të tejkalojnë pritjet me shitje dhe që në një të ardhme të afërt edhe filmi të mund të vetëfinancohet nga shitja e biletave.”

Filmi “Martesa” flet për një temë tabu në shoqërinë kosovare, për dashurinë e ndaluar në mes dy burrave. Megjithatë, “përkundër temës, që para disa vitesh mund të konsiderohej kontraverse, deri më tani reagimet në rrjetet sociale kanë qenë jashtzakonisht të mira, ku ka edhe të tillë që kanë treguar që e kanë parë filmin nga 2 herë. Për këtë arsye, nga dita e nesërme Martesa do të shfaqet në 3 termine në Cineplexx”, thotë producenti, bashkëskenaristi dhe montazheri i filmit, Keka.

Filmi që u përkrah financiarisht nga Qendra Kinematografike e Kosovës (QKK), flet për një trekëndësh dashurie pranë dhe gjatë një martese. Treshen e personazheve kryesore të filmit me skenar të Blerta Zeqirit dhe Keka Kreshnik Berishës e interpretojnë Alban Ukaj, Adriana Matoshi dhe Genc Salihu. Përveç QKK-së, “Martesa” u përkah edhe nga Qendra Kombëtare Kinematografike e Shqipërisë, si projekt me financim minoritar.

“Martesa” tashmë është në rrugëtim nëpër festivale të ndryshme botërore, me 6 festivale të konfirmuara vetëm në 2 muajt e ardhshëm, kurse nga marsi do të shfaqet edhe në kinematë e Tiranës.

Tallinn Black Nights Film Festival, ku më 28 nëntor bashkëprodhimi filmik Kosovë-Shqipëri e ka pasur edhe premierën botërore, bën pjesë në mesin e 15 festivaleve garues të kategorisë A, sipas Federatës Ndërkombëtare të Shoqatave të Producentëve të Filmit (FIAFP), ku filmi u shpërblye edhe me çmimin FIPRESCI – Çmimi i kritikës ndërkombëtare dhe Çmimin special të jurisë për ansamblin e aktorëve. / KultPlus.com