Ka nisur në Teatrin e Operas Festivali i Muzikës Baroke ‘Alba’. Për 4 muaj do të mbahen 10 koncerte nga 10 grupe të ndryshëm artistikë.
Festivali i Muzikës Baroke “Alba” ka ngritur siparin këtë fillimjavë në Opera.
Koncerti “Serve e padroni”, me arie, duete e simfoni, të nxjerra nga “Opere buffe napoletane”, çeli siparin për 10 koncerte të ndryshme që do të mbahen përgjatë katër muajve nga 10 grupe të ndryshëm.
Pas bashkëpunimit të suksesshëm në Festivalin e Muzikës Jazz, ngjarja muzikore organizohet me Konservatorin e Muzikës “Carlo Gesualdo da Venosa” të Potenza-s.
Gjatë mbrëmjes së parë performuan sopranoja italiane Rita Lacobelli dhe baritoni Sergio Bologna, ndërsa muzika u luajt nga orkestra “Gesualdo”.
“Opera buffe” janë quajtur veprat komike italiane, që janë kryesisht të lidhura me zhvillimet në Napoli në gjysmën e parë të shekullit të 18-të.M.Q./Shqiptarja.com/KultPlus.com
Erërat jugore sollën sasi të mëdha rëre të imët nga Saharaja në Evropën Juglindore, me nivele të grimcave të matura mbi 500 mikrogramë në Greqinë Perëndimore.
Sipas Universitetit të Athinës, nivelet e larta të grimcave pritet të vazhdojnë për disa ditë.
Më tej, në ishullin e Kretës temperaturat arritën në 32 gradë Celsius, ndërsa në Athinë deri në 24 gradë Celsius.
Mjekët kanë këshilluar personat që vuajnë nga sëmundjet e frymëmarrjes ose të zemrës që të mos kalojnë shumë kohë jashtë.
”Puna e mundimshme fizike gjithashtu duhet të shmanget”, thanë ata dhe paralajmëruan se ”nivelet prej 50 mikrogramësh grimcash dhe më të larta mund të çojnë në probleme të frymëmarrjes”./atsh/KultPlus.com
Komisioni për politikë dhe demokraci i Asamblesë Parlamentare të Këshillit të Evropës e ka miratuar sot raportin për Kosovën, duke u hapur rrugën hapave të ardhshëm drejt anëtarësimit në këtë Këshill.
Lidhur me këtë ka reaguar kryeministri i Kosovës, Albin Kurti.
Kurti tha se ky është një hap shumë i rëndësishëm.
Ai theksoi se opinionin e sotëm do ta hedh në votim Asambleja Parlamentare e Këshillit të Evropës.
“Sot Komisioni për politikë dhe demokraci i Asamblesë Parlamentare të Këshillit të Evropës ka bërë një hap të rëndësishëm përpara për Kosovën. Opinioni konfirmon përmbushjen e të gjitha parakushteve të anëtarësimit nga ana e Kosovës dhe rekomandon t’i bëhet ftesë Kosovës që t’i bashkohet Këshillit të Evropës si si shtet anëtar. Asambleja Parlamentare e Këshillit të Evropës do të votojë Opinionin në prill”, shkroi Kurti.
BBC do ta publikojë muajin e ardhshëm një dokumentar kushtuar ikonës së rokut, Kurt Cobain.
Ky program njëorësh e nderon artistin amerikan në 30-vjetorin e vdekjes së tij.
“Momentet që drodhën muzikën: Kurt Cobain” do të emetohet pikërisht në prill, në muajin kur ai i kishte marrë vetes jetën.
Sipas një njoftimi për shtyp, dokumnetari do të “rrëfehet përmes pamjeve të rralla arkivore”, dhe ofron një “llogari viskerale të ditëve që i prinë atij momenti tragjik”.
Teatri Kombëtar i Kosovës ka njoftuar se me rastin e 25 vjetorit të masakrës së familjes Bogujevci do të shfaqë filmin “Kopshti i Hijeve”, i cili e tregon historinë e kësaj familjeje.
Shfaqja tregon historinë e familjes Bogujevci: fëmijët e parë që dëshmuan në një gjykatë për krimet e luftës. Kjo gjykatë i jep formë narrativës në ndryshim, duke rrëshqitur mes kohës, vendit, realitetit dhe imagjinatës. Kopshti i hijeve ekziston në skenë si një botë paralele e kujtesës dhe së ardhmes alternative.
Me një këmbë në Mançester dhe një në Kosovë, familja zë një hapësirë shumë private në një arenë shumë publike. Nëpërmjet fëmijëve që mbijetuan, ne mësojmë për humbjen e tyre dhe qëndrueshmërinë që duhet për të kërkuar drejtësi kundër mosmarrëveshjeve. Llogaritë e luftës dominohen kryesisht nga zërat ushtarakë meshkuj; kjo shfaqje feston llojin e fuqisë që nuk ulet në peshën e një arme.
Kopshti i hijeve është një shfaqje bashkëpunuese, multimediale e zhvilluar me një ekip ndërkombëtar dhe prodhuar nga Teatri i Gjilanit.
Shfaqja jepet më 28 mars, në ora 20:00 në Teatrin Kombëtar të Kosovës./KultPlus.com
Presidenti shqiptar Bajram Begaj ka reaguar pasi ka kaluar pika e Raportimit për anëtarësimin e Kosovës në Këshillin e Evropës të mbajtur në Paris të Francës.
Përmes një shkrimi, Presidenti Begaj ka deklaruar se kjo arritje e merituar dëshmon përkushtimin e palëkundur politik të Kosovës ndaj vlerave dhe standardeve evropiane.
“Arritje e merituar e Kosovës në rrugëtimin e saj drejt anëtarësimit të plotë në Këshillin e Evropës.
Kjo dëshmon përkushtimin e palëkundur politik të Kosovës ndaj vlerave dhe standardeve evropiane” thuhet në shkrimin e Presidentit Begaj./KultPlus.com
Presidentja e Republikës së Kosovës, Vjosa Osmani, ka pritur sot në takim ambasadoren jorezidente të Emirateve të Bashkuara Arabe në Kosovë, Nabila Abdulaziz Al Shamsi, me ç`rast diskutuan për zhvillimet e fundit si dhe për raportet bilaterale Kosovë-Emirate të Bashkuara Arabe.
Në takim me ambasadoren Al Shamsi, Presidentja Osmani theksoi se Emiratet e Bashkuara Arabe mbeten partnere e Kosovës dhe mbështetëse e vazhdueshme. Në këtë kontekst, Presidentja Osmani ritheksoi rëndësinë e procesit tashmë të përfunduar të heqjes së vizave për qytetarët e të dy shteteve, si hap përpara drejt thellimit të mëtejmë të bashkëpunimit ndërshtetëror.
Me ambasadoren Al Shamsi, Presidentja Osmani diskutoi edhe për një sërë çështjesh në fushën e bashkëpunimit bilateral, edicionin e sivjetëm të Forumit ndërkombëtar për Gratë, Paqen dhe Sigurinë dhe çështje tjera me rëndësi të interesit të përbashkët.
Në këtë frymë, Presidentja Osmani i falënderoi Emiratet e Bashkuara Arabe për përkrahjen në shumë fusha, me theks të veçantë në shëndetësi.
“TIRANA NGA AJRI me sytë e një dëshmitari fluturues” – Metamorfoza spektakolare e kryeqytetit të Shqipërisë, nga rrumpalla e viteve ‘90 tek rrokaqiejt e shekullit të ri, është aktiviteti i zhvilluar ditën e sotme në kinema “Millenium” në Tiranë, për paraqitjen e botimit më të ri të fotografit të ajrit Alket Islami.
Të pranishëm në aktivitet ishin kryeministri Edi Rama, Kryetarja e Kuvendit Lindita Nikolla, kryebashkiaku Erion Veliaj, diplomatë të përfaqësive të akredituara në vendin tonë, e shumë të ftuar të tjerë.
Në fillim të paraqitjes së këtij botimi, përmes pamjeve të videos prezantuese u shpalos evolucioni i kryeqytetit nga vitet ’90 deri më sot.
Alket Islami fotoreporter, autori i librit, u shpreh se, “fluturimin e parë e praktikova për herë të parë në këtë qytet në vitin 1993 dhe më pas Tirana u bë epiqendra e aktivitetit tonë për sportet e ajrit. Lidhja e ngushtë me fluturimin si profesion është e rëndësishme për mua, pasi ka kontribuar në krijimin e një koleksioni të paharruar të pamjeve të qytetit të Tiranës duke e bërë atë të jetë jo vetëm një album me foto, por një rrëfim emocionues dhe frymëzues për të gjithë ata që e shohin dhe brezat që do të vijnë”.
“Nëpërmjet pamjeve nga ajri mund të shohim transformimin gradual të qytetit, nga infrastruktura urbane e deri në objektet kulturore dhe sociale që kanë ndikuar në zhvillimin e tij”, tha ai./atsh/KultPlus.com
Mëmëdhe quhetë toka ku më ka rënurë koka, ku kam dashur mëm’e atë, ku më njeh dhe gur’ i thatë ku kam pasurë shtëpinë, ku kam njohur perëndinë, stërgjyshët ku kanë qënë dhe varret q’i kanë vënë, ku jam rritur me thërrime ku kam folur gjuhën time, ku kam fis e ku kam farë, ku kam qeshur, ku kam qarë, ku rroj me gas e me shpres, ku kam dëshirë të vdes./KultPlus.com
“Marshi i UÇK” -së është një ndër këngët më të njohura dhe më të dashura të cilën e ka sjell me një interpretim rrëqethës artisti i njohur Arif Vladi.
KultPlus ju sjell në mendje këtë këngë të pavdekshme.
Oj Kosovë o djep lirie Çdo kulm shpie nji bajarak UÇK-ëja t’paska hije Për atdhe po derdhet gjak
Po luftojnë djemtë e Kosovës Prej Drenice n’mal t’Gjakovës (x2) Për atdhe lokja m’ka le, për flamurin kuq e zi Jam ushtar në UÇK do ti sjell vendit liri
ref:
Brez pas brezi në k’to votra Jam i lashtë sa vet Evropa (x2) Jo se l’shoj oo asni pllam toke Dy gisht balle mke fale ti loke
Se k’tu jam dem-baba-dem Për Kosovë jap shpirtin tim (x2)
Qofsh i pushkës je shqipëtarë Ta mbrojmë vendin pllambe me pllambe
Se k’tu jam dem baba dem Për Kosovë jap shpirtin tem (x2). / KultPlus.com
Presidentja e Kosovës, Vjosa Osmani, ka reaguar pasi Kosova kaloi me sukses hapin e parë në rrugën drejt anëtarësimit të plotë në Këshillin e Evropës.
Presidentja Osmani ka thënë se shteti i Kosovës do të vazhdojë të punojë me aleatët për t’u siguruar që të gjithë qytetarët të kenë qasje në instrumentet e Këshillit të Evropës përmes anëtarësimit të plotë.
“Ne do të vazhdojmë të punojmë me aleatët për të siguruar që të gjithë qytetarët tanë të kenë akses të drejtë në instrumentet e KiE përmes anëtarësimit të plotë të Kosovës.”, ka shkruar Osmani.
Është hapur audicion për filmin e metrazhit të gjatë artistik nga regjisorja e filmit “Zgjoi”, Blerta Basholli dhe produksioni Ikonë Studio.
Vendosur në periudhën e luftës së Kosovës filmi rrëfen për Duan, një adoleshente, e cila nis një udhëtim për të zbuluar miqësinë, dashurinë dhe në fund të fundit veten e saj. Si një vajzë 14 vjeçare dhe duke qenë një nga vajzat e përjashtuara nga shoqëria. Dua është mjaft e turpshme dhe mundohet të përkufizohet në shoqëri, duke filluar nga stili e deri te gjërat dhe djemt që i pëlqejnë.
Kushtet për aplikim:
Vajza dhe djem nga mosha 13 deri në 20 vjeç
Talent për aktrim
3 foto aktuale (pa grim, me dritë natyrale)
Video prezantuese rreth vetes (pa grim, me dritë natyrale)
Jeni duke kërkuar për vendet më të mira për të vizituar në Shqipëri? Ky vend i Evropës Lindore ka një shumëllojshmëri të jashtëzakonshme peizazhesh duke përfshirë detin, malet, qytetet e trashëgimisë botërore dhe gastronominë e shijshme.
Kështu shkruan Rebeca Serna në të përditshmen spanjolle “Viajeros”, e cila përshkruan në detaje “perlat” natyrore të Shqipërisë turistike.
Nëse jeni në kërkim të natyrës, trashëgimisë kulturore dhe vendeve autentike me çmime të përballueshme, Shqipëria është zgjedhja më e mirë! Ne ju rekomandojmë 14 vendet e mahnitshme për t’u vizituar në Shqipëri.
Berati, qyteti i një mijë dritareve
Destinacioni turistik më i njohur për t’u vizituar në Shqipëri. Një qytet i bukur i Trashëgimisë Botërore të UNESCO-s, më pak se dy orë larg nga kryeqyteti.
Berati është një qytet me më shumë se 2000 vjet histori, ku kultura të ndryshme kanë lënë gjurmë.
Edhe pse i mungojnë monumentet kryesore ai është një muze gjigant.
Imazhi emblematik i qytetit na tregon një enigmë shtëpish të vogla prej guri, që nga bregu i lumit Osum, ngjiten të çrregullta deri në majën e shpatit të kurorëzuar nga kalaja e Beratit.
Qershia mbi tortë janë minaret e holla të xhamive, ezani i të cilave ndërthuret me rrëmujën e jetës së përditshme në qytet.
Berati ndahet në tre lagje të dallueshme historike: lagjja e krishterë e Goricës, lagja myslimane e Mangalemit dhe lagjja e Kalasë, e vendosur në majë të kodrës ku ndodhet kalaja.
Kanionet marramendëse të Osumit
Shumë pranë Beratit ndodhet një destinacion me natyrë befasuese dhe ende i panjohur, Kanionet e Osumit.
Është një grykë e madhe me më shumë se 13 kilometra gjatësi, më e madhja në Shqipëri dhe me mure shkëmbore që arrijnë 100 metra lartësi.
Gjithashtu mund të bëni një vizitë në ujëvarën e Bogovës.
Qasja në këtë zone bëhet përmes një rruge të thjeshtë rreth 30 minuta (një drejtim) dhe, megjithëse e vogël ujëvara është e shkëlqyer për të notuar në verë.
Gjirokastra dhe sharmi i stilit osman
Gjirokastra, një tjetër qytet i përfshirë në listën e Trashëgimisë Botërore të UNESCO-s.
Është pa dyshim shembulli më i mirë i arkitekturës tradicionale osmane në tokën shqiptare, i quajtur ndryshe ‘qyteti i gurtë’.
Ajo që sot është një kështjellë e bukur (pjesërisht në rrënoja) dhe me pamjet më të mira të qytetit, lë të kuptohet për një të kaluar të lavdishme.
Rrugët me kalldrëm të Gjirokastrës janë një kënaqësi e vërtetë për shëtitje të gjata.
Këtu do të zbuloni xhevahire arkitekturore që nga koha e dominimit turk, kryesisht pallate të mëdha dhe elegante me çati të mbuluara me gurë (një tipar dallues i qytetit).
Gjithashtu, nëse ju pëlqen natyra dhe hiking, duhet të dini se ajo është e rrethuar nga male dhe hapësira të bukura natyrore.
Gjithashtu vizitoni Parku Natyror “Syri i Kaltër” apo Parku Kombëtar i Bredhit të Hotovës dhe zona e tij e burimeve të nxehta, Banjat të Benjës.
Burimet e ujërave termale të Bënjës, ose Banjat e Bënjës
Do të mahniteni me urën e mrekullueshme osmane të Kadiut dhe burimet e ujërave termale të Bënjës, apo siç quhen ndryshe Banjat e Bënjës.
Pa dyshim, një tjetër vend mahnitës dhe shumë autentik për t’u parë në Shqipëri.
Ky vend ndodhet pranë qytetit të Përmetit dhe brenda Parkut Kombëtar të Bredhit të Hotovës.
Udhëtimi këtu është një atraksion i madh në vetvete për shkak të peizazheve spektakolare.
Pasi të keni lënë makinën tuaj në parking, mund të shijoni pamjen e mrekullueshme të kësaj ure mesjetare pranë së cilës ndodhet një grup pishinash termale me ujëra sulfurorë me pamje nga malet dhe me akses të lirë.
Gjithashtu ju këshilloj të ecni përgjatë shtratit të lumit përmes kanionit të Langaricës për rreth 1 kilometër.
Përveç shijimit të një panorame spektakolare, do të gjeni edhe pishina të tjera shumë më pak të frekuentuara.
Syri i Kaltër, Monument Natyror
Në gjysmë të rrugës mes Gjirokastrës dhe Rivierës Shqiptare, Monumenti Natyror i Syrit të Kaltër është kthyer në një nga vendet më të njohura për t’u vizituar në Shqipëri.
Dhe askush nuk dëshiron të humbasë këtë pranverë ujërat blu super intensive që burojnë nga brendësia e tokës në një mjedis të bukur natyror të pyllëzuar.
Është një pikë shumë e vizituar gjatë verës ku noti është i ndaluar.
Riviera Shqiptare, plazhet më të mira në Shqipëri
Shqipëria nuk ka për t’i pasur zili vendet fqinje për sa i përket pasurisë natyrore dhe e ashtuquajtura Riviera Shqiptare është dëshmia më e mirë për këtë.
Ajo ka një shtrirjeje bregdetare prej më shumë se 100 kilometrash plot me plazhe dhe limane me ujëra të pastër kristal dhe bukuri magjepsëse.
Rruga bregdetare gjarpëron mes shkëmbinjve, duke ju ofruar kartolina për t’u mbajtur mend.
Dhe ndër të gjitha është thelbësore të bëni një ndalesë në plazhet më të mira, si plazhi i Kakomes, plazhi i Borshit, i Porto Palermos, i Llamanit, i Himarës, i Jalës dhe i Gjipesë.
Nëse jeni në kërkim të qetësisë zgjidhni muajt maj, qershor, shtator dhe madje edhe tetor, si më të mirët për të shijuar Rivierën Shqiptare.
Rrënojat e Butrintit dhe plazhi i Ksamilit
Në skajin jugor të rivierës ndodhet një nga thesaret më të mëdha për të eksploruar në Shqipëri: Parku Kombëtar i Butrintit.
Vetëm 10 minuta me makinë nga qyteti i Ksamilit, ai është i rrethuar nga një mjedis i bukur natyror dhe strehon rrënojat e qytetit antik të Butrintit.
Gjithashtu një vend i Trashëgimisë Botërore të UNESCO-s dhe me 3000 vjet histori, kjo qendër arkeologjike na tregon ndërthurjen e kulturave të ndryshme nëpër zonë: greke, romake, bizantine dhe veneciane. Komunikimi midis arkitekturës dhe natyrës është brutal.
Ksamili, një fshat bregdetar i mbushur me plazhe me guralecë, ishuj të vegjël dhe i lagur nga ujëra super transparente të një ngjyre të pabesueshme bruz.
Siti arkeologjik i Apolonisë
Kthehemi në brendësi të Shqipërisë për të zbuluar një tjetër nga sekretet e saj më të ruajtura, qytetin grek të Apolonisë në Iliri.
Një vend arkeologjik me vlera të paçmueshme vetëm pak kilometra larg Fierit, qyteti i dytë më i populluar në vend.
Tempulli i Artemidës është një xhevahir. Një pjesë e mirë e thesareve të mbledhura në vend janë ekspozuar në Manastirin e Shën Mërisë, i cili shërben si muze.
Pjesa më e madhe e këtij qyteti është ende nën tokë, vlerësohet se 90% e qytetit antik mbetet për t’u zbuluar.
Le të shpresojmë që puna arkeologjike të vazhdojë dhe Apolonia të shpallet një Trashëgimi Botërore sepse e meriton.
Shkodra, porta e Alpeve Shqiptare
Shkodra është një prej qyteteve më të populluara në Shqipëri me rreth se 100 mijë banorë.
Një nga pikat kryesore të vizitës së saj është Kalaja e Rozafës. Një kullë vrojtimi nga e cila mund të vëzhgoni jo vetëm qytetin, por të gjithë mjedisin natyror që ju rrethon.
Qyteti i Shkodrës shtrihet përgjatë një fushe në brigjet e liqenit të Shkodrës, një xhevahir natyral.
Mënyra më e mirë për të eksploruar qytetin është me biçikletë. Mos humbisni perëndimet e diellit në liqen të cilat janë spektakolare.
Përveçse një qytet i bukur, Shkodra është gjithashtu një pikënisje e mirë për të eksploruar zonën përreth, liqenin e Komanit, Thethin dhe Valbonën.
Ndër të tjera vizitoni urën e bukur të Mesit ose qytetin e vogël mesjetar të Drishtit.
Peizazhet në Liqenin e Komanit dhe Lumin e Shalës
Shkodra është një pikënisje e mirë për të zbuluar destinacionet mbresëlënëse të natyrës.
Një prej tyre është liqeni i Komanit, një rezervuar në lumin Drin.
Mënyra më e mirë për të shijuar këto peizazhe është përmes një turneu me varkë.
Porti i nisjes është më pak se dy orë me makinë nga Shkodra, dhe prej andej mund të zgjidhni midis një turneu me varkë ose një udhëtimi pak më shumë se dy orë me makinë në portin e Fierzës.
Kjo rrugë e fundit është ajo që duhet të bëni për të arritur në qytetin malor të Valbonës.
Nëse planifikoni të vizitoni Valbonën dhe Alpet Shqiptare do të mund ta shijoni këtë destinacion gjatë vetë udhëtimit.
Mos humbisni një aventurë në liqenin e Komanit me një varkë të vogël, destinacioni përfundimtar i së cilës janë plazhet bruz të Lumit të Shalës.
Thethi, Valbona dhe Bjeshkët e Nemuna
Bjeshkët e Nemuna, të ashtuquajturat Alpe Shqiptare, përfaqësojnë një zonë të bukur malore në veri të Shqipërisë.
Do të befasoheni nga bukuria e peizazheve dhe hijeshia e fshatrave të saj të vegjël. Ky vend është plot surpriza.
Fillimisht, nisni një udhëtim në një nga fshatrat më emblematike: Valbonën.
Në Valbonë koha duket se ka një ritëm tjetër. Ritmi i përrenjve të saj, i reve që luftojnë me majat e maleve dhe ai i banorëve vendas të angazhuar me punët e tyre të përditshme.
Një mrekulli!. Dhe akoma më e mrekullueshme është kalimi i distancës që ndan Valbonën nga fshati i Thethit përmes një rruge spektakolare ecjeje në zemër të këtyre maleve që zgjat rreth 7 orë.
Thethi është një tjetër perlë e fshehur në një nga pjesët më të largëta të vendit.
Ky fshat i bukur shtrihet përgjatë një lugine plot me ujëvara, pishina natyrore dhe peizazhe që të lënë pa fjalë.
Rekomandohet gjithashtu të vishni çizmet tuaja malore për të zbuluar ujëvarën e Grunasit dhe pishinën natyrore të Syrit të Kaltër.
Kruja, një vend i bukur për t’u vizituar në Shqipëri
Duke ecur nëpër rrugicat e Krujës, do të ndjeni sikur jeni shpërngulur në një vend tjetër pa e kuptuar.
Qendra historike e Krujës është shumë e vogël. Mund të filloni me një shëtitje nëpër pazarin e vjetër.
Eksploroni gjurmët e qytetit të vjetër mesjetar. Një qytet brenda vetë qytetit.
Kruja është tërësisht e rrethuar me mure dhe brenda mund të vizitoni Kalanë, ku aktualisht ndodhet muzeu i Skënderbeut, si dhe Muzeu Etnografik.
Një shembull i mrekullueshëm i arkitekturës osmane të ruajtur mirë.
Në brigjet e Liqenit të Ohrit
Liqeni i Ohrit ndan territorin midis Shqipërisë dhe Maqedonisë së Veriut.
Brenda kufijve shqiptarë gjejmë një hapësirë natyrore në të cilën në skenë shfaqen ujërat e kristalta të këtij gjiganti dhe malet e larta.
Ohri në ditët e sotme është kthyer në një atraksion të madh turistik.
Tirana, kryeqyteti i Shqipërisë
Tirana ka një atmosferë mjaft të veçantë. Ndikimi komunist ndihet pothuajse në çdo cep.
Nga sheshi gjigant Skënderbej te bunkerët e shndërruar në muze dhe ekspozita arti, apo Piramida e ndërtuar në kujtim të diktatorit Enver Hoxha.
Megjithatë, ka një monument që bie në sy mbi këto masa të mëdha çimentoje dhe betony, është xhamia e Et’hem Beut.
Një tempull i bukur që arriti të shpëtojë veten nga epoka më e errët e Shqipërisë.
Një tjetër nga vizitat thelbësore në Tiranë na çon në lartësitë e malit të Dajtit, një Park Kombëtar praktikisht i integruar në qytetin e madh./topchanel/KultPlus.com
Kosova ka marrë dritën jeshile në kërkesën për anëtarësim në Këshillin e Evropës.
Kështu ka bërë të ditur faqja zyrtare e Komisionit për Çështje Politike dhe Demokraci i Këshillit të Evropës (KiE).
Ky raport ka kaluar në Komisionin për Politikë dhe Demokraci në Asamblenë Parlamentare të Këshillit të Evropës me 31 vota për, 4 kundër e 1 abstenim.
Raporti i ish-ministres së Punëve të Jashtme të Greqisë, aktualisht raportuese për Komisionin e Çështjeve Politike të Asamblesë Parlamentare të Këshillit të Evropës thotë që Asambleja i rekomandon Komitetit të Ministrave që ta ftojnë Kosovën që të bëhet anëtare e Këshillit të Evropës.
Zëvendësministri i Punëve të Jashtme dhe Diasporës, Kreshnik Ahmeti në një postim në Facebook ka bërë të ditur se Kosova e ka kaluar suksesshëm votimin në Komitetin e Asamblesë Parlamentare të KiE.
Edhe deputeti i LDK-së, Arben Gashi që ishte komision, shkruan se “ Fitore… Hapi i parë u kry, edhe dy hapa janë dhe kryhet përfundimisht. 31 për, 4 kundër, 1 abstenim”, shkruan Gashi.
Qendra Muzeore Berat dhe Parku Arkeologjik Apoloni, në 100- vjetorin e gërmimeve të Leon Rey, çelën ekspozitën fotografike ” Muzeu në valixhe”. Ekpozita e Muzeut Ikonografik “Onufri” çelet në ambjentet e Trapezarisë, pjesë e Muzeut Arkeologjik Apoloni. Për të gjithë vizitorët e Parkut Arkeologjik Apoloni, kjo ekspozitë sjell më afër imazhet e ikonave dhe Muzeut Ikonografik Onufri, që do të qëndrojnë të ekspozuara aty përgjatë 1 muaji.
Për gati 14 vjet, nga viti 1924 e deri më 1938-ën, arkeologu francez Leon Rey zhvilloi fushatën e gërmimeve studimore arkeologjike. Një pjesë e thesareve arkeologjik të gjetura nga Leon Rey, gjenden në qytetin antik të Apolonisë. Objektet që dolën nga gërmimet e tij pranë qendrës monumentale të Apolonisë, janë pjesë e koleksionit të MAA.
Rey ishte themelues i revistës “Shqipëria-një përmbledhje e arkeologjisë, historisë, artit dhe shkencave të aplikuara në Shqipëri dhe Ballkan” (1925), ai botoi rezultatet e punës së tij atje deri në vitin 1939. Rey gjithashtu themeloi dhe organizoi Muzeun Vlona (1937), por pushtimi italian i Shqipërisë e shkatërroi muzeun.
Në vitin 1945, ai u përpoq të rikthehej në vend, por iu refuzua qëndrimi. Leon Rey vdiq më 3 nëntor 1954 në Paris./atsh/KultPlus.com
Më datë 29 mars 2024, në ora 11:00, do të mbahet tryezë shkencore me temën: “Kabaja – Simbol dhe Identitet i Muzikës Tradicionale Shqiptare”.
Ky event i cili do të mbahet në Parkun Shkencor Inovativ të UBT-së në Lipjan, është një rast i rëndësishëm për të eksploruar rolin dhe identitetin e kabajës në kontekstin e muzikës tradicionale shqiptare.
Në këtë takim do të prezantohen analiza dhe studime thelbësore nga ekspertë të fushës.
Fjala e hapjes do të bëhet nga prof. Blerim Emerllahu, drejtor i Internacional Kosova Clarinet Festival dhe profesor i klarinetës në UBT.
Ndërsa me kumtesa do të paraqiten:
1. Aleksandër Peçi, Mjeshtër i madh, Kabaja, sazet dhe sazeologjia. 2. Bekim Ramadani, Fakulteti i Muzikës, Universiteti i Tetovës. Kabaja shqiptare në Maqedoninë e Veriut: trashëgimia e klarinetistëve dhe kultivimi i formës muzikore. 3. Fatos Qerimaj, Fakulteti i Muzikës, Universiteti i Arteve, Tiranë. Kabaja: Fenomeni muzikor frymëzues. 4. Fatmir Lela, Remzi Lela – Legjenda e klarinetës shqiptare. 5. Krenar Doli, Instituti Albanologjik, Prishtinë. Laveri, Çobani dhe Lulushi – Tre kapedanët e klarinetës shqipe.
“Të gjithë të interesuarit dhe dashamirësit e kulturës dhe muzikës tradicionale janë të ftuar të bashkohen në këtë ngjarje të rëndësishme. Mos e humbni këtë mundësi për të zgjeruar njohuritë tuaja dhe për të bërë një kontribut në studimin e pasurisë kulturore shqiptare”, thuhet në njoftim. / KultPlus.com
Një në gjashtë fëmijë në shkollë është i prekur nga bullizmi kibernetik, sipas një raporti të Organizatës Botërore të Shëndetësisë (OBSH), i cili u publikua sot në Kopenhagë.
Dhuna në internet në veçanti është rritur ndjeshëm që nga raporti i mëparshëm në vitin 2018. Raporti aktual i referohet të dhënave për periudhën 2018-2022.
Rreth 15% e nxënësve kishin përjetuar ngacmime kibernetike. Përqindja e viktimave midis djemve u rrit nga 12% në raportin e 2018 në 15% dhe midis vajzave nga 13% në 16%.
Rreth një në tetë nxënës shkolle të moshës 11 deri në 15 vjeç deklaruan se tashmë kishin ngacmuar dikë në platformat dixhitale.
Ndërsa 11% e djemve deklaruan në raportin e vitit 2018 se kishin ngacmuar dikë në hapësirën dixhitale, kjo shifër tani është rritur në 14%. Për vajzat, shifra u rrit nga 7% në 9%.
Raporti u fokusua në modelet e bullizmit dhe dhunës midis fëmijëve dhe të rinjve. Ai analizoi të dhënat nga më shumë se 279 000 të rinj.
Sondazhi më i fundit në 2021/2022 është kryer në 44 vende dhe rajone në Evropë, Azinë Qendrore dhe Kanada.
Sipas raportit, numri i incidenteve të bullizmit në shkolla në përgjithësi ka mbetur relativisht i qëndrueshëm.
Rreth 11% e nxënësve thanë se ishin ngacmuar në shkollë, ndërsa 6% deklaruan se kishin ngacmuar dikë në shkollë. Kjo sjellje ishte më e zakonshme tek djemtë (8%) sesa tek vajzat (6%).
Një në 10 të rinj ishte përfshirë tashmë në përleshje fizike, me një dallim të qartë midis gjinive: 14% e djemve në krahasim me vajzat me 6%.
“Me të rinjtë që kalojnë deri në 6 orë në internet çdo ditë, edhe ndryshimet e vogla në shkallën e ngacmimit dhe dhunës mund të kenë implikime të thella për shëndetin dhe mirëqenien e mijëra njerëzve. Duhet të merret një angazhim për të mbrojtur fëmijët nga dhuna dhe dëmtimi, si në internet ashtu edhe jashtë tij”, thuhet ne raport./atsh / KultPlus.com
Në ambientet e amfiteatrit të TKK-së në Pallatin e Rinisë dhe Sportit në Prishtinë, Ministria e Kulturës Rinisë dhe Sportit sot ka mbajtur ceremoninë e ndarjes së çmimeve në fushën e teatrit, shkruan KultPlus.
Në këtë ceremoni mori pjesë edhe Ministri Hajrulla Çeku, i cili edhe bëri ndarjen e çmimeve.
Çmimi Kombëtar për Vepër Jetësore në Fushën e Teatrit ju nda post mortem artistit Muharrem Qena.
Ndërsa Çmimi Vjetor për Aktorin më të Mirë në fushën e Teatrit, iu dha aktorit Adrian Morina për rolin e Mefistifelit në shfaqjen “Fausti” dhe rolin e O’Brien në shfaqjen “1984”.
Çmimi Vjetor për Shfaqjen më të Mirë në fushën e Teatrit për vitin 2023, iu nda shfaqjes “1984” nga Igor Mendjisky, produksion i Teatrit Kombëtar të Kosovës.
Çmimi Vjetor për Regjinë më të Mirë ju dha Fadil Hysaj për regjinë e shfaqjes “Fausti”.
Kurse Çmimi Vjetor për Prezantim të Suksesshëm Ndërkombëtar në fushën e Teatrit iu dha Qendrës Multimedia.
Përndryshe sot në botë shënohet Dita Botërore e Teatrit./KultPlus.com
Ermal Meta ka njoftuar publikimin e albumit të tij të radhës me këngë të papublikuara, Buonafortuna, më 3 maj 2024.
Përmes një postimi në rrjetet sociale ai ka njoftuar publikun për datën e publikimit dhe ka ftuar të gjithë që ta ndiqni në vazhdim për më të rejat.
“Përshëndetje miq. Po dridhesha. Albumi im i ri, Buona Fortuna, del më 3 maj. Dhe një urim për të gjithë ne që të gjejmë vendin tonë në botë. E gjeta dhe zbulova se edhe ti je në atë vend. Më ndiqni dhe më doni. Mezi pres t’ju tregoj pjesën tjetër.
Shihemi përreth. Me dashuri, Ermali.”
Pak javë më parë, më 8 mars, u publikua “L’unica Peril”, kënga e kantautorit që parashikonte projektin e tij të radhës.
Ermal Meta ka paralajmëruar edhe një turne të ri që do ta çojë në fazat më të rëndësishme të gadishullit këtë verë. Një emision i ri që shënon rikthimin në dimensionin live në një vit shumë të rëndësishëm për të.
Biletat për turneun, të organizuar dhe prodhuar nga Friends and Partners dhe Vertigo, janë në parashitje në TicketOne.
Më poshtë mund të lexoni dhe gjeni kalendarin e plotë të datave:
13 korrik Festivali i Bukurisë, Teatri Romak – Verona
18 korrik Festivali Anima, Amfiteatri i Shpirtit – Cervere (CN)
19 korrik Live në Genoa, Arena del Mare – Genoa
28 korrik Festivali Anaxum, Arena del Marinaretto – Palazzolo Dello Stella (UD)
11 gusht Festivali La Versiliana, Teatri La Versiliana – Marina di Pietrasanta (LU)
21 gusht Festivali i Muzikës Oversound, Piazza Libertini – Lecce
24 gusht Sotto Il Vulcano Fest, Amfiteatri Falcone e Borsellino – Zafferana Etnea (CT)
25 gusht Dream Pop Fest, Teatro di Verdura – Palermo
5 shtator Festa Verore e Romës, Auditorium Parco della Musica Ennio Morricone, Cavea – Romë
14 shtator Carroponte – Sesto San Giovanni (MI). / KultPlus.com
Bleuennn Battistoni vlerësohet si valltarja yll e Operas së Parisit. Ish-balerina e parë, 25 vjeçe hyri në shkollën e operas në 2014 dhe në trupën e baletit në 2017.
Baleti i Operas së Paris që nga 26 Marsi ka një yll të ri. Bleuenn Battistoni, ka qenë dikur balerinë e parë, është emëruar si yll në skenën e Pallatit Garnier të martën me propozim të drejtorit të baletit Jose Martinez, ka njoftuar instituti në një komunikim.
Sipas këtij komunikimi Alexander Neef, drejtor i Operas Kombëtare të Parisit, ka emëruar Bleuenn Battistoni balerinë të parë “në meritë të përfaqësimit të baletit La fille mal gardee të Frederick Ashton, në të cilin ajo luajti rolin e Lizës”.
“Bleuenn Battistoni ka për të dhënë diçka të re në këtë rol me partnerin e saj Marcelino Sambe (artist i Baletit mbretëror të Londrës), të dielën e 31 Marsit në orën 19 e 30. Ajo do të vallëzojë rolin kryesor të Giselle (sipas Jean Coralli dhe Jules Perrot) më 29 Prill kur të marrë pjesë në premierë në moshën pak më poshtë se 28 vjeç, në 4, 14, dhe 16 Maj në Pallatin Garnier”- thotë komunikata e operas.
Lindur në 1999 në Lion, Bleuenn Battistoni që vallëzon në baletin e parë të Operas së Parisit ka shtatë vjet, u shpall si balerinë e parë në 2023.
Ajo filloi vallëzimin në moshën 4 vjeçare në rajonin e saj të lindjes përpara se të bashkohej me Konservatorin Superior Kombëtar të muzikës dhe vallëzimit të Parisit dhe më pas, që nga 2014, me shkollën e dansit të Operas Kombëtare të Parisit ku ka marrë pjesë që nga 2017 në këtë trupë baleti të Operas. /Tema / KultPlus.com
Një studim i ri përdori analizën e ngjyrave për të zbuluar ujin më të kaltër në botë – dhe rezultatet mund t’ju habisin.
Tani mund të zbuloni saktësisht se ku është uji më i kaltër në botë, falë një renditjeje të re nga ekspertët e udhëtimit në CV Villas, Evropa është shtëpia e deteve më të kaltër në botë.
Për të arritur në renditjen, studiuesit përpiluan një listë të gjatë të plazheve më të njohura dhe më të bukura në botë. Më pas erdhi analiza e ngjyrave, e cila përfshinte marrjen e imazheve të pa redaktuara të plazheve nga Google Maps, duke përdorur një mjet pikatore ngjyrash për të përcaktuar hijen e saktë të ujit dhe duke ndërthurur atë nuancë me nuancën zyrtare më blu të blusë (YInMn Blue, në rast se ju jam kurioz), shkruan WorlWide.
Dhe duke mposhtur brigjet me famë botërore të Maldiveve, Bora Bora, Kroacisë dhe Greqisë, rezulton se Plazhi i Pasqyrave në Shqipëri ka ujin më të kaltër në botë. Kush e dinte?
Greqia ende dominonte listën, duke pretenduar pesë nga dhjetë hapësirat më të mira dhe shtatë në 30 vendet e para. Por me kaq shumë ishuj dhe brigje të mrekullueshëm si Paralia Mpouka, Voulisma Beach dhe Omprogialos, nuk është çudi që vendi u rendit aq mirë, as se plazhet e saj së shpejti do të mbrohen më mirë.
Destinacionet në Bullgari, Francë, Mal të Zi dhe Skoci gjithashtu u renditën në 30 vendet e para. / KultPlus.com
Si sot, më 27 mars të vitit 1866 u lind dramaturgu atdhetar, Andon Zako Çajupi.
Për hir të së vërtetës, quhej Andon Çako, ndonëse identifikohet gjerësisht si “Çajupi”. Me këtë emër mundi të mbarte në krijimtarinë e tij gjurmë të pashlyeshme të vendlindjes, Zagorisë, ku gjendet mali prej nga derivon pseudonimi i tij letrar.
Pas shkollimit bazë, do ta linte Zagorinë për t’iu bashkuar të atit, Harito Çakos, veprimtar në lëvizjen atdhetare. Atje do të ndiqte një kolegj francez, prej të cilit kultivoi njohuri të larmishme. I pajisur me botëkuptim europian, do t’i drejtohej Gjenevës, ku në vjetët 1887-1893, kreu studimet për drejtësi.
Më tej, u vendos në Kajro dhe nisi të ushtronte profesionin e avokatit. Do të hiqte dorë nga kjo detyrë për t’iu përkushtuar lëvizjes patriotike të shqiptarëve të ngulimeve të Egjiptit. U bë figurë protagoniste e shoqërisë atdhetare e kulturore të atjeshme, përmes përpjekjeve për të siguruar mbrojtjen e interesave të Shqipërisë dhe të popullit shqiptar.
Përmbledhja poetike “Baba Tomorri” (1902) që përfshin edhe komedinë “Katërmbëdhjetë vjeç dhëndërr”, veçohet si vepra e tij kryesore. Në gjallje, u botuan “Përrallat e La Fontenit” (1921) përshtatur prej tij në shqip, “Lulet e Hindit” (1922), një sërë vjershash të letërsisë sanskrishte. Pena e tij u vlerësua edhe në rrafshin e publicistikës të kohës, sidomos me pamfletin “Klubi i Selanikut” (1909).
Ndërkaq, la në dorëshkrim pjesën më të madhe të veprave të tij, sikurse mund të përmendim poemën “Baba Musa lakuriq”, tragjedinë “Burri i dheut” dhe komedinë “Pas vdekjes”.
Çajupi u nda nga jeta në Kajro, më 11 korrik 1930. / KultPlus.com
