Pas një nate të bukur në një koncert filarmonie, Lyudmila Makey u zgjua nga zhurma e avionëve që kalonin mbi dritaret e shtëpisë së saj në Kropivnitski në Ukrainën qendrore, shkruan Radio Evropa e Lirë.

Rusia kishte filluar të sulmonte Ukrainën në shkallë të plotë.

Tentimi për të kontaktuar vajzën e saj në Kiev – kryeqytetin ukrainas – ishte gjëja e parë që Lyudmila bëri mëngjesin e 24 shkurtit të vitit 2022

Por, iu desh të priste tërë ditën që të mund të mësonte se ajo ishte mirë.

“Njëzet e katër shkurti ishte me ngjyrë të zezë, gri dhe të bardhë. Nuk pashë ngjyra të tjera”, thotë Lyudmila në një bisedë me Radion Evropa e Lirë në Prishtinë, derisa kujton ditën kur Kremlini filloi pushtimin e vendit të saj.

Ngjyrat e ylberit, thotë ajo, u zbehën për ukrainasit atë ditë.

“Doja ta evakuoja vajzën time nga Kievi por nuk e dija si ta bëja, sepse nuk kishim asnjë mundësi. Vetëm në mbrëmje ajo më telefonoi dhe më tha, ‘Nënë, jam mirë, jam gjallë’”, thotë gazetarja ukrainase e strehuar në Kosovë prej prillit të vitit 2022.

Edhe pse nuk e priste të fillonte, për luftën veçse po diskutohej në bisedat me shoqërinë e saj.

“Dëgjova muzikë (më 23 shkurt në filarmoni) dhe ndjeva se ky koncert mund të jetë koncerti i fundit në jetën time. Dhe kujtoj bisedën me kolegët dhe miqtë atë ditë, ‘ndoshta ditën tjetër lufta mund të fillojë’”, thotë Lyudmila.

Një ditë më pas, ajo thotë se ndodhi dita më e tmerrshme e jetës së saj – tmerri që vazhdoi.

“Nuk dinim si të reagonim, ku të fshiheshim, çfarë të bënim”, thotë ajo, derisa tregon se fillimisht ishin larguar në një tjetër qytet për t’u strehuar.

Kjo luftë, e cila po vazhdon, sipas Kombeve të Bashkuara, mori jetët e mbi 10.000 civilëve në Ukrainë.

Të paktën 40 për qind e popullsisë kanë nevojë për një lloj të ndihmës humanitare.

Presidenti rus Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

Aktualisht, mbi 6 milionë njerëz jetojnë si refugjatë jashtë Ukrainës.

Dikur familja e Lyudmilas besonte se lufta e fundit për të cilën do të flisnin ishte Lufta e Dytë Botërore – ku edhe humbi gjyshin e saj.

“Fatkeqësisht e kishim gabim”.

Lufta në Ukrainë e ka thyer familjen e saj, duke i ndarë familjarët në vende të ndryshme. Disa prej tyre u larguan në vende të tjera të Evropës, ndërsa të tjerë qëndruan në Ukrainë.

Me insistimin e njërës vajzë të saj, që jetonte Bratislavë të Sllovakisë, Lyudmila iu bashkua asaj, pak kohë pas nisi lufta.

Atje kishte lexuar për programin për gazetarë rezidentë, vendosi të aplikonte, dhe në prill të 2022-ës arriti në Kosovë.

“Gazetarët në Rezidencë” është program i iniciuar nga Qendra Evropiane për Liri të Shtypit dhe Medias – ECPMF dhe mbështetet financiarisht nga Qeveria e Kosovës.

Përmes këtij programi mundësohet strehimi i përkohshëm për gazetarët ukrainas.

Kosova, po ashtu, është rreshtuar krah Perëndimit, duke i vënë sanksione Rusisë për luftën e nisur më 2022 në Ukrainë.

Në Kosovë, Lyudmilas i janë bashkuar edhe 13 gazetare të tjera ukrainase.

Ato ndjekin kurse të gjuhës angleze në Prishtinë dhe angazhohen në projekte me mediat ukrainase dhe ato evropiane.

Në mesin e tyre edhe Tetiana Kraselnikova nga Kremençuku, po ashtu, në Ukrainën qendrore dhe Iryna Synelnyk nga Çernihivi, qytet në veri të Ukrainës.

“Ende nuk mund të besoj se kjo është e vërtetë, sepse është një situatë e tmerrshme, shpresoj që të përfundojë me fitoren tonë”, thotë Tetiana në një bisedë me Radion Evropa e Lirë, e cila në Prishtinë është bashkë me djalin e saj nëntëvjeçar.

Një ditë para pushtimit rus, ajo kishte marrë pjesë në një festë me kolegët e saj. Të nesërmen, thotë ajo, kuptuan se ishte bombarduar klinika në të cilën do të operohej babai i saj.

“Ne besuam se ndoshta do të zgjasë një muaj, por nuk ishte e vërtetë. Ne nuk po mund të shohim fundin”, thotë ajo.

Iryna nga Çernihivi, më 24 shkurt 2022, u zgjua nga një telefonatë e motrës së saj, duke i thënë se kishte filluar pushtimi.

“Nuk e besoja fillimisht, si ishte e mundur në qendër të Evropës, në shekullin 21?”, pyet ajo.

“U shqetësova për familjen sepse nuk e dija çfarë do të ndodhte, është e tmerrshme kur nuk e di se çfarë të pret”.

Disa ditë para se të niste lufta, ajo e kishte humbur babanë si pasojë e COVID-19.

“Nuk isha gati, nuk dija çfarë të bëja, jetova gjashtë javë në territor të pushtuar”, thotë ajo.

Edhe Lyudmila, edhe Tetiana, edhe Iryna ndihen të sigurta në Kosovë, por ëndërrojnë të kthehen në shtëpi.

“Jetoj në Prishtinë, por zemra dhe mendja ime janë në Ukrainë. E di kush janë miqtë dhe armiqtë tanë. E di që kam fuqi të jem e dobishme për Ukrainën, por edhe për Kosovën – këtu takova shumë njerëz, shumë të këndshëm, të shoqërueshëm. Ata ishin gati të na ndihmonin, sepse edhe ata e kujtojnë kohën e luftës këtu në vitet 1998-1999”, thotë Lyudmila.

“Kur më pyesin se a e pëlqej Kosovën, unë ju them jo – e dua Kosovën, është shtëpia dhe dashuria ime e dytë. Kështu do të jetë gjithmonë”, thotë ajo. / KultPlus.com

Presidentja e vendit, Vjosa Osmani, ka thënë se gratë janë boshti i historisë së Kosovës në etapa të ndryshme shtetërore. Një gjë të tillë ajo e deklaroi në konferencën rajonale  “Parlamentarizmi dhe Rezoluta 1325: Perspektivat nga Ballkani Perëndimor”.

“Në bosht të historisë, popullit tonë – Kosovës, si në kohën e rezistencës paqësore ashtu edhe gjatë luftës së Ushtrisë Çlirimtare të Kosovës; edhe pasluftës në procesin e shtetndërtimit, por edhe sot përderisa fuqizojmë pozitën tonë në arenën ndërkombëtare, ka qenë pikërisht roli i grave që ka shtyrë para në mënyrë vendimtare paqen dhe sigurinë në vendin tonë e më gjerë”, ka thënë Osmani.

Presidentja ka deklaruar se pjesëmarrja e grave në proceset e paqes dhe sigurisë s’është veç çështje barazie dhe drejtësisë, por është gurthemeli për arritjen e paqes dhe stabilitetit afatgjatë në vend, rajon dhe më gjerë.

“Kabineti im me përkrahjen e zyrës së sekretarit Blinken do të themelojë qendrën e ekselencës, e cila është bërë pjesë e strategjisë së SHBA-ve për gratë, paqen dhe sigurinë. Pres që në kuadër të kësaj zyre të konsolidojmë gjithnjë e më shumë partneritete të reja dhe të jetësojmë nisma e projekte që fuqizojnë rolin e parlamenteve dhe rolin e grave në to”, ka thënë ajo.

Gratë në rrafshin global sipas presidentes së Kosovës, luajnë rol vendimtar për ndërtimin e mirëkuptimit dhe sigurimit që marrëveshjet e paqes të jenë gjithëpërfshirëse.

“Kur gratë përfshihen në procese të paqes, marrëveshjet e vijnë më shpejt por kanë edhe qëndrueshmëri më afatgjatë. Gratë sjellin perspektiva, strategji dhe zgjidhje unike në tryezë që shpesh anashkalohen në mjediset e dominuara nga burrat”, ka shtuar Osmani./RTK/ KultPlus.com

Në kuadër të partneritetit në mes UNI – Universum International College dhe Arizona State University, stafi akademik i UNI vazhdon të certifikohet për trendet dhe metodologjitë më të fundit edukative përmes Moduleve të ofruara për Zhvillim Pedagogjik të Stafit Akademik. Programi i kësaj radhe paraqet modele më të reja të të mësuarit efektiv dhe angazhimit të studentëve gjatë orëve mësimore. Ky program është i modifikuar sipas nevojave specifike të ligjëruesve të UNI – Universum International College dhe i ofrohet edhe rrjetit të universiteteve partnere të Arizona State University.

Përmes këtij trajnimi, njëra prej profesoreshave të certifikuara, prof. Nesrin Jahja, u shpreh: “Unë kam fituar njohuri të ndryshme të teknikave të reja të angazhimit të studentëve dhe kam mësuar strategji praktike për zbatimin e tyre në hartimin e materialeve mësimore. Për më tepër, jam njoftuar me rekomandime dhe praktika më të mira për të përmirësuar rezultatet e të nxënit. Jam shumë e emocionuar të zbatoj teknikat dhe strategjitë që kam përvetësuar në ligjëratat e mia, duke nxitur një mjedis që promovon suksesin e studentëve.”

Stafi akademik i UNI është trajnuar me materialet e Arizona State University në pedagogjinë më të fundit dhe praktikat më moderne të arsimit.

UNI – Universum International College fuqizohet dhe menaxhohet nga Arizona State University, Universiteti më i madh publik në SHBA dhe #1 për inovacion.

Për më shumë informata rreth mundësive të studimit,  kontaktoni +38344144062, [email protected] ose ndiqni UNI në Facebook dhe Instagram.

Një grup i vogël fëmijësh ukrainas të mbijetuar nga lufta do t’i drejtohen një sesioni privat të këshillit të sigurimit të OKB-së të premten, pjesë e një përpjekjeje të Kievit për t’iu kujtuar amerikanëve kostot njerëzore të një konflikti të prekur gjithnjë e më shumë nga politika e brendshme amerikane, shkruan The Guardian, transmeton Gazeta Express.

Ata që do t’i drejtohen trupit të OKB-së, një ndalesë në kuadër të një vizite më të gjerë në SHBA, përfshijnë Kira, 14 vjeçe dhe Ilya, 11 vjeçe, nga qyteti i rrethuar i Mariupolit, duke shpresuar që historitë e tyre personale do të rezonojnë me republikanët në një kohë kur një paketë ndihme ushtarake për Ukrainën është bllokuar në Dhomë.

“Isha duke qëndruar në një stacion autobusi në orën 6 të mëngjesit, duke pritur të shkoja në shkollë, kur fillova të dëgjoja disa shpërthime. Atëherë kuptova se lufta kishte filluar”, tha Kira për Guardian përpara udhëtimit të saj në Nju Jork, i cili do të pasohet nga një vizitë në Uashington.

Ajo kaloi rreth një muaj duke u strehuar, duke u fshehur në shtëpi, bodrume dhe në një moment në një kishë, pasi Mariupol ishte goditur dhe ushqimi, uji dhe energjia elektrike ishin jashtëzakonisht të pakta.

Në fillim ajo iku te gjyshi i saj, pastaj me babanë e saj, Yevhen Obedinskyi, në “një lagje të zhurmshme”, tha Kira ku “mbi rreth një javë e gjysmë, shpërthimet u dëgjuan gjithnjë e më shumë”. Përfundimisht arriti në pikën ku ata mendonin se duhej të iknin.

Yevhen u vra meqë “rusët po gjuanin në dritare”, Kira dhe familja me të cilën ishte, u desh ta linin trupin e tij pas, duke ikur për t’u fshehur në një bodrum ku mund të duronin edhe pak.

Pas disa javësh të dëshpëruara, vajza, anëtarët e familjes së të dashurës së babait të saj dhe disa familje të tjera më në fund u përpoqën të largoheshin nga Mariupol. Ajo kujton se u thanë se do t’u jepej çokollatë nëse dilnin nga qyteti, por ata u kapën nga separatistët pro-rusë.

Një fëmijë pesëvjeçar në grup u plagos rëndë në kapje. Kira kujton se “ndodhi një bum” dhe ajo përfundimisht përfundoi në një spital në Donetskuun e pushtuar, nga ku thotë se rusët i thanë se do të dërgohej në një jetimore nëse të afërmit e saj nga Ukraina nuk mund të kalonin linjat për ta marrë atë.

Babai i Yevhen, Oleksander Oberdinskyi, mori vesh për vendndodhjen e mbesës së tij dhe ndërmori një betejë dymujore për ta kthyer atë në Ukrainë, e cila e përfshiu atë duke bërë një udhëtim të rrezikshëm në Donetsk për ta shpëtuar me sukses.

Prokurori i Përgjithshëm i Ukrainës vlerëson se 528 fëmijë janë vrarë që nga fillimi i pushtimit në shkallë të gjerë gati dy vjet më parë dhe 2134 janë të zhdukur. 19,500 të tjerë besohet se janë rrëmbyer dhe dërguar në Rusi, me disa që janë riedukuar me forcë me një “arsimim patriotik pro-rus dhe të lidhur me ushtrinë”, thuhet në një raport të SHBA.

Gjykata penale ndërkombëtare në Hagë lëshoi urdhra-arresti për Vladimir Putin dhe komisioneren ruse për të drejtat e fëmijëve, Maria Lvova-Belova, në mars të vitit 2023, duke argumentuar se kishte arsye për të dyshuar se ata mbanin përgjegjësi për “deportimin e paligjshëm” të mijëra fëmijëve. / KultPlus.com

Bazilika Paleokristiane e Linit, një monument i shekullit VI, përfaqëson një nga veprat më të rëndësishme të trashëgimisë kulturore në Shqipëri. DRTK Korçë publikoi në rrjetet sociale imazhe fotografike mbresëlënëse të kësaj bazilike.

Bazilika e Linit u zbulua në vitin 1967 nga një ekspeditë e muzeut të Pogradecit. Bazilika përbëhet nga naosi, dy kapela me absidë në jug dhe veri, baptiseri, atriumi, dhe një kapelë katërkonkshe.

Gjithë kompleksi ka dyshemetë e shtruara me mozaikë të cilët shfaqin motive gjeometrike, bimore dhe zoomorfe, ku mbizotërojnë elementët fetare. Mozaiku i Linit është një trashëgimi e çmuar kulturore dhe njëkohësisht konsiderohet si më i veçanti nga të gjithë mozaikët e tjerë me karakteristika fetare.

Sot kjo bazilikë së bashku me mozaikun është kthyer në një pikë interesante turistike. Ekspozimi i mozaikut të Linit ka tërhequr tashmë vëmendjen e turistëve të huaj duke e bërë Linin një ndër destinacionet më të vizitura në Shqipëri./ atsh / KultPlus.com

Udhëtimi në Evropë për një amerikano-latin është bërë një ëndërr e paarritshme. Zhvlerësimi i pesos dhe rritja e çmimeve në mbarë botën janë faktorë që ndikojnë në dëshirën për të vizituar kontinentin e vjetër, sipas një artikulli të botuar në revistën kolumbiane “Cromos”.

Ekspertja e udhëtimeve, Stéphanie Carles rekomandon tre destinacione të përballueshme në Evropë për të udhëtuar, mes tyre edhe Shqipërinë.

Cili është vendi më i lirë për të udhëtuar në Evropë?

Stéphanie Carles ju sugjeron të bëni një turne në Bosnjë-Herzegovinë, Shqipëri dhe Kosovë, tre vende që kanë shumë të përbashkëta, por edhe disa dallime që ia vlen të eksplorohen.

Mrekullitë e Shqipërisë

Shqipëria ndodhet në Gadishullin Ballkanik. Vendi ofron peizazhe natyrore, nga plazhet e pacenuara në brigjet e deteve Jon dhe Adriatik e deri te malet mbresëlënëse si Alpet Shqiptare.

Terreni i larmishëm përfshin gjithashtu liqene, lumenj dhe parqe kombëtare, duke ofruar një shumëllojshmëri të gjerë opsionesh për adhuruesit e natyrës.

Ky vend ballkanik ka një histori të pasur dhe komplekse. Vendi është shtëpia e vendeve të shumta arkeologjike dhe trashëgimisë historike që datojnë që nga epokat ilire, romake, osmane dhe më shumë.

Qytetet si Gjirokastra dhe Berati janë renditur si vende të Trashëgimisë Botërore të UNESCO-s falë arkitekturës së tyre të ruajtur mirë. /atsh / KultPlus.com

https://www.revistacromos.com.co/estilo-de-vida/vida-sana/viajar-a-europa-barato-3-paises-que-puedes-visitar-ganando-en-pesos-colombianos/