May-Linda Kosumoviç merr çmimin aktorja më e mirë në Festivalin Ndërkombëtar të Teatrit në Tetovë

Mbrëmë në Tetovë u ndanë çmimet për më të mirët e Festivalit Ndërkombëtar të Teatrit në Tetovë.

Çmimi aktorja më e mirë shkoi për aktoren kosovare May-Linda Kosumoviç, për rolin e saj në shfaqjen “Zoti i Masakrës” me regji të Besfort Idrizit, shkruan KultPlus.

Shfaqja flet për dy familje të shtresës së lartë shoqërore, apo më saktësisht për dy çifte të prindërve, fëmijët e të cilëve janë rrahur në shkollë. Sjellja e fëmijëve është motivi që prindërit të takohen dhe t’i diskutojnë shkaqet dhe problemet e mundshme që mund të dalin nga një sjellje e tillë e papërshtatshme të fëmijëve të tyre. Pasi prindërit do të takohet dhe të njohin njëri-tjetrin, pavarësisht pritjes së tyre që do të gjejnë zgjidhje të shpejtë dhe racionale, ndodh krejt e kundërta.

Edicioni i gjashtë i këtij festivali nisi më 11 ndërsa përfundoi më 16 tetor. / KultPlus.com

PriFilm Fest zbulon “Kosovo’s Rising Stars” të edicionit të 10-të

Alberina Haxhijaj

“Kosovo’s Rising Stars” është një program i ri në kuadër të PriFilm Fest, që ka filluar vitin e kaluar dhe që ka për qëllim promovimin e aktorëve të Kosovës, shkruan KultPlus.

Në këtë edicioni të 10-të, Yjet e Kosovës në ngritje, të përzgjedhur nga PriFilm Fest janë: Afrim Muçaj, Armend Smajli, Bujar Ahmeti, Doresa Rexha, Fatlume Bunjaku, Florist Bajgora, May-Linda Kosumovic, Rifat Smani, Rina Krasniqi dhe Shpëtim Selmani.

Aktorët të cilët u zgjedhën në kuadër të këtij programi vlerësohen si një aset i çmuar i Kosovës në kuptimin e industrisë filmike.

Festivali përmes përzgjedhjes që bënë mundohet që të promovojë artistët dhe punën e tyre tregoi për KultPlus Fatos Berisha një ndër themeluesit e festivalit PriFilm Fest.

“Vitin e kaluar e kemi lansuar këtë projekt, kjo është hera e dytë. Do të tentojmë si festival që të ndihmojmë në promovimin e aktorëve sidomos në arenën ndërkombëtare në mënyrë që sa më shumë regjisorë dhe producent të huaj por edhe vendor të kenë mundësi që të njihen më punën e tyre, e që mund të rezultojë me angazhimin e tyre në projekte ndërkombëtare”, u shpreh ai.

Në kuadër të Prifilm Fest sot në sallën e vogël të teatrit Kombëtar u dha një projeksion i veçantë, para të pranishmëve. Aty u treguan disa sekuenca nga filma të ndryshëm ku luajnë aktorët e përzgjedhur si pjesë e programit “Kosovo’s Rising Stars”.

“Në mesin e miqve të festivalit, ndërkombëtarëve por edhe para aktores Vanessa Redgrave, patëm prezantimin e aktorëve që janë pjesë e ‘Kosovo’s Rising Stars’. Ne do të vazhdojmë edhe në vitet në vijim për të përkrahur promovimin e aktorëve. E mira e gjithë kësaj është që ne kemi se çfarë të promovojmë pasi që kemi aktorë të mirë dhe dëshira jonë nuk mungon”, theksoi tutje Berisha.

Aktorët do të prezantohen përsëri në përmbyllje të edicionit të 10-të të festivalit pasi që dita e sotme mund të konsiderohet si një projeksion në hapësirë më të vogël, e që ishte i dedikuar për njerëzit të cilët janë pjesë e industrisë filmike.

“I jam shumë falënderues PriFilm Fest-it që na ka ftuar, është nder për ne të jemi këtu dhe të prezantojmë vetën tonë. Është nder të jemi pjesë e të zgjedhurve si “Yjet e Kosovës në ngritje”, u shpreh aktori Shpëtim Selmani.
Të jesh pjesë e kësaj përzgjedhje sipas aktores Fatlume Bunjaku është shumë e rëndësishëm për faktin se disa prej tyre, duke përfshirë edhe aktoren Bunjaku, janë në fillim të karrierës së tyre si aktorë.

“Besoj që rëndësia qëndron edhe te fakti se kjo bëhet pikërisht në kuadër të PriFilm Festi-it një festival i cili çdo vit e më shumë ka evoluar duke përfshirë këtu edhe mysafirët me nam botëror. Mbështetja e artistëve të ri është shumë e rëndësishme dhe ndjehem shumë e privilegjuar edhe për faktin që puna jonë është prezantuar edhe para aktores Vannesa Redgrave”, theksoi aktorja Fatlume Bunjaku për KultPlus.

Pikërisht ideja e projekti dhe përzgjedhja e vitit të kaluar ka qenë mjaft intriguese për aktoren Doresa Rexha e cila këtë vit përcolli përsëri ceremoninë e prezantimit, por tani si pjesë e ekipit të përzgjedhur nga festivali.

“Vitin e kaluar vetëm e kam përcjellë këtë program si shikuese dhe e kam vlerësuar shumë idenë e këtij programi. PriFilm Fest çdo herë është befasuese me përkrahjen që ua jep aktorëve. Kur mora lajmin që këtë vit unë jam pjesë e përzgjedhjes ishte një privilegj i madh”, u shpreh ajo për KultPlus.

Vitin e kaluar pjesë e përzgjedhjes në kuadër të “Yjet e Kosovës në ngritje”, ishin aktorët: Andi Bajgora, Blerta Ismaili, Dukagjin Podrimaj, Lum Veseli, Lyra Xhoci dhe Tristan Halilaj./ KultPlus.com

Maylinda Kosumoviq, pjesë e projektit teatror në Matera të Italisë

Foto: Boubkar BENZABAT

Silvia Graubaldi ka angazhuar disa aktorë për një shfaqje të radhës.

Aktorja Maylinda Kosumoviq është pjesë e këtij projekti. Ajo ka treguar se në Lecce të Italisë po mbahet punëtoria e parë ndërsa më vonë do të pasojnë punëtoritë tjera.

“Tema e shfaqjes ka të bëjë me Qytetin e Materës, i cili ka qenë dikur ‘turpi i Italisë’ ndërsa sot konsiderohet si vendi më kulturor brenda shtetit” tregon Kosumoviq.

Punëtoria e parë për projektin teatral ‘The poetics of shame’ po mbahet me regjisorin Italian Massimiliano Civica ndërsa në nëntor do të vazhdohet me punëtori në Matera me regjisorin Maja Kleczewska. Në Shkup do të pasojnë punëtoria e radhës dhe më pas edhe një tjetër workshop do të mbahet me Jeton Nezirajn.

“Më pas nga janari deri në mars do të jemi prapë në Matera ku do të kemi prova 45 ditë me koreografen dhe regjisoren Gribaudi, dhe këtu do të jetë edhe premiera e shfaqjes” tregon Maylinda Kosumoviq.
Gribaudi ka lindur në Torina ndërsa ajo fokusohet sidomos në hulumtimin e trupit dhe raportit të tij me audiencën.

Në vitin 2009 ajo fitoi në garën Giovane Danza d’Autore ndërsa puna ‘A corpo libero’ u prezantua më pas edhe në Festivalin e Vallëzimit në Dublin dhe në Bienalen e Venecias. Që nga viti 2011-të rreth 60 pjesëmarrës kanë qenë pjesë e punëtorive të saj, shkruan KultPlus.

Kosumoviq në anën tjetër është ndër aktoret më aktive momentalisht në vend. Ajo ka qenë pjesë e shfaqjes Bordel Ballkan ndërsa është pjesë edhe e leximit të radio-dramës ‘On Kosovo Field’ – fituese e çmimeve për radio-dramë në BBC, mes projekteve tjera ku merr pjesë. / KultPlus.com

1 mijë e 475 euro u mblodhën mbrëmë për Bekim Lumin

Mbrëmë në kryeqytet në Klubin M është organizuar një festë me muzikë të viteve 90-të, për ta ndihmuar regjisorin Bekim Lumi i cili po ballafaqohet me sëmundjen e kancerit, shkruan KultPlus.

Derisa në kryeqytet po organizohen edhe shumë mbrëmje e aktivitete të tjera humanitare, mbrëmja e kaluar ka qenë iniciativë e dy aktoreve, Alketa Sylaj dhe May-linda Kasumoviq. Ato sot kanë treguar lidhur me fondet që janë mbledhur nga ky organizim.

“Shoke dhe kolege, mrame ne nejen e M-it, perpos qe jemi knaqe shume, gjithashtu i kemi mledhe 1,475 euro bashkarisht. Falemnderit shume krejtve per kontributin edhe bashkepunimin. Jeni t’mrekullueshem!”, kanë shkruar ato./ KultPlus.com

Aktorët paralajmërojnë grevën me kampanjë në rrjete sociale – #veçpojukqyrim #ngrevë #meaktoret #5

Kanë mbetë vetëm edhe pesë ditë nga koha kur mund të pezullohet krejt repertori i Teatrit Kombëtar të Kosovës, pasi që, aktorët rezident të këtij institucioni kulturor kanë kërkuar nivelizim të pagave me ato të profesorëve të Universitetit, shkruan KultPlus.

Sot ka nisë kampanja e grevës nëpërmjet rrjeteve sociale, me sloganin #veçpojukqyrim #ngrevë #meaktoret #5, dhe aktorët rezidentë kanë bërë të ditur për KultPlus, se kjo kampanjë do të vazhdojë deri të premten, në mënyrë që ti kujtojnë MKRS-së, se ditët drejt grevës po ofrohen.

“Ne po e quajmë fushatë, ku çdo dite do ta paralajmërojmë ministrin se dita drejt grevës së përgjithshme po ofron. Kjo kampanjë do të vazhdon deri të premten, e të premten do të dalim me një konferencë”, ka thënë Gresa Pallska për KultPlus.

Kurse Albulena Kryeziu Bokshi përpos që ka konfirmuar për këto zhvillime në TKK, ajo ka thënë se me këtë kampanjë po rritin presionin drejt plotësimit të kërkesave të tyre, dhe sipas saj, vetëm të premten do të kuptohet vendimi definitive I trupës rezidente të TKK-së. Ndërkohë, pjesë e kësaj kampanje është e gjithë trupa e TKK-së./KultPlus.com

Së shpejti filmi “Rregullat e artit”

Agnes Nokshiqi e cila është një prej aktoreve të këtij filmi me skenar dhe regji Aleksandar Rusjakov, ka njoftuar se së shpejti do të vjen filmi “Rregullat e artit”, që i takon takon zhanrit triller, por në përmbajtje është dhe melodramë dashurie, shkruan KultPlus.

Personazhi kryesor është detektivi privat Alberti, i cili në qytet mban agjencinë e tij private. Nëpërmjet disa rasteve të tij që kanë të bëjnë me tradhti në dashuri, zbulojmë pasionin e vërtetë të detektivit, obsesionin e tij jetësor e cila nuk është e drejtuar drejt spiunimit voajerist të jetës së tjerëve, por drejt kapjes së pjesëve të fateve njerëzore, momente që ai i ngrin në aparatin e tij. Ky film i shkurtër nga njëra anë është një rrëfim i jetesës moderne dhe të tjetërsuar, dhe nga ana tjetër është një odë e vërtetë për artin.

Në këtë film, sipas faqes zyrtare të filmit me rolet e tyre luajnë aktorët: Sabedin Selmani, Amernis Nokshiqi, Xhevdet Jashari, May-linda Kosumovic, Mirlinda Sahiti, Luran Ahmeti, Blagica Terpkovska, Adrian Aziri, Jana Stojanovska, Muzafer Etemi, Ziba Radonqiq, Agnes Nokshiqi, Arsim Kaleci, Elita Ziberi dhe Hanis Bagashov./KultPlus.com