Muaj: Korrik 2018

Shtëpia e vjetër e Kulturës në Obiliq është rrënuar sot, këtë e ka bërë të ditur kryetari i komunës së Obliliqit, Xhafer Gashi.

Sipas tij qytetit po fillon të marrë një pamje më moderne duke ofruar hapësira atraktive dhe në dobi të qytetarëve.

“Qytetit të Obiliqit po i kthehet pamja moderne dhe me realizimin e këtyre projekteve qytetarëve dhe të rinjve të komunës po u ofrohen kushte atraktive për argëtim dhe hapësira të mjaftueshme për organizimin e aktiviteteve kulturore dhe artistike”, ka shkruar ai në Facebook.

Rrënimi i këtij objekti sipas tij liron hapësirën për ndërtimin e Sheshit në këtë komunë dhe njëkohësisht i liron pamjen Shtëpisë së re të Kulturës, projekt ky i cili është në përfundim e sipër./KultPlus.com

Rrapi 600-vjeçar i Ballabanecit në zonën e Krujës është lënë në gjendje të degraduar dhe plotësisht në harresë. Edhe pse monument kulture, për të nuk është vendosur qoftë një tabelë e thjeshtë për të orientuar vizitorët.

Rrapi 600-vjeçar i Ballabanecit në zonën e Krujës është lënë në gjendje të degraduar dhe plotësisht në harresë. Edhe pse monument kulture, për të nuk është vendosur qoftë një tabelë e thjeshtë për të orientuar vizitorët. Rrapi është tepër i dëmtuar pasi është djegur dhe është ndarë në mes, e askush nuk ka treguar as interesin më minimal për mirëmbajtjen e tij, edhe pse ai daton që në kohën e Skënderbeut.

Sipas historisë, rrapit i është vendosur emri Ballabanec, pasi Ballaban Pasha, një renegat shqiptar nga Mati dhe një nga gjeneralët më të mirë të ushtrisë otomane u vra pikërisht në atë vend. Ballabani u varros në Petrelë, ku iu kushtua edhe një tyrbe brenda teqesë (Rrapi 600-vjeçar i Ballabanecit në zonën e Krujës)./ KultPlus.com

Presidenti i Kosovës, Hashim Thaçi me Medaljen Presidenciale Jubilare të Dhjetëvjetorit të Pavarësisë ka dekoruar sot lobistin e çështjes kombëtare, shqiptaro-amerikanin, Ekrem Bardha dhe vajzën e tij, Donika Bardha për kontributin e tyre në lirinë dhe pavarësinë e Kosovës.

Thaçi ka thënë se Kosova do të jetë mirënjohëse për ndihmën e Amerikës ndaj pavarësisë së Kosovës. “Ne do jemi mirënjohës për mbështetjen e shqiptaro-amerikanëve që bënë të pamundurën për lirinë dhe pavarësinë e Kosovës”, ka shkruar Thaçi.

Këtë dekorim presidenti e ka bërë në 242 vjetorin e Pavarësisë së SHBA-së, me ç’rast ka uruar të gjithë shqiptarët që jetojnë atje dhe që forcojnë miqësinë e përjetshme me SHBA-të.

Një fshat i zhytur gjatë ndërtimit të një rezervuari masiv është duke dalë ngadalë nga “varri”.

Mardale Green, në Cumbria, është parë rrallë që kur u zhduk në vitin 1935, kur lugina u përmbyt për të hapur rrugën për Haweswater Reservoir. Qindra fshatarë u dëbuan nga shtëpitë e tyre dhe shumica e ndërtesave u hodh në erë nga Inxhinierët Mbretërorë të cilët i përdorën ato për praktikë të prishjeve.

Mardale i fundit doli nga thellësitë ujore të rezervuarit gjatë një vale të nxehti në vitin 2014. Por fshati shpirtëror po rishfaqet përsëri pasi nivelet e ujit kanë rënë në mënyrë dramatike në mes të nxehtit të pazakontë këtë verë. Fotot tronditëse tregojnë se sa i rezervuarit – i cili furnizon Mançesterin me ujin e tij – është tharë.

Mbetjet e strukturave të lashta, duke përfshirë portat e fermave dhe trungjet e pemëve, tani janë zbuluar pranë vijës së ujit të larguar. Mardale Green u konsiderua si një nga fshatrat më piktoreske në Westmorland, Cumbria. Kur u ndërtua diga Haweswater, ajo ngriti nivelin e ujit mbi 29 metra dhe mund të mbajë 84 miliardë litra ujë.

Diga krijoi një rezervuar të gjatë 6 km dhe rreth 600 metra të gjerë. Muri i saj ka një gjatësi prej 470 metra dhe lartësi 27.5 metra. Rezervuari sot furnizon rreth 25 për qind të nevojave të ujit për Veriperëndimin e vendit. Ajo ushqehet nga rrjedha të ndryshme dhe ujësjellës nga Swindale, Naddkle, Heltondale dhe Laguna Sleddale, shkruan OraNews./ KultPlus.com

Më 4 korrik të vitit 1776, delegatët e 13 kolonive britanike të Amerikës nënshkruan Deklaratën e Pavarësisë, e cila thuhet se ishte shkak i Revolucionit Amerikan. Ky dokument u hartua kryesisht nga 32 vjeçari Tomas Xheferson.

Njëra pjesë e Deklaratës përmbante një listë ankesash kundër mbretit Xhorxhi i Tretë dhe Parlamentit të Anglisë. Pjesa tjetër e Deklaratës, përmbante thelbin e idesë mbi lirinë amerikane, mbi të drejtat e natyrshme që kanë njerëzit.

“Ne besojmë se këto të drejta janë të natyrshme, se të gjithë njerëzit janë krijuar të barabartë, se krijuesi u ka dhënë atyre disa të drejta të patjetërsueshme, si jeta, liria dhe kërkimi i lumturisë. Ne besojmë se për të siguruar këto të drejta njerëzit krijojnë qeveri, të cilat i marrin fuqitë e tyre me pëlqimin e të qeverisurve, se sa herë që një formë qeverisjeje i minon këto qëllime, është e drejta e popullit ta ndryshojë, apo ta heqë atë”, thuhej në deklaratë.

Deklarata e Pavarësisë shihet si një nga dokumentet më të rëndësishme në historinë e Shteteve të Bashkuara. Dokumenti tjetër është Kushtetuta. Në Shtetet e Bashkuara 4 korriku festohet çdo vit si ditë kombëtare, Dita e Pavarësisë.

Më 4 korrik të vitit 1826, mori fund një nga miqësitë më të gjata dhe më të rëndësishme në historinë amerikane, ajo midis Thomas Jeffersonit, autorit kryesor të Deklaratës së Pavarësisë, dhe John Adamsit, mbështetësit të zjarrtë të pavarësisë. Ata vdiqën vetëm disa orë njeri pas tjetrit, pikërisht në 50 vjetorin e nënshkrimit të Deklaratës së Pavarësisë.

Jeffersoni vdiq në shtëpinë e tij në Montiçello të shtetit Virxhinia, kurse Adamsi në Quincy të shtetit Massachusetts. 82 vjeçari Jefferson ishte i sëmurë rëndë dhe luftoi me vdekjen deri pas mesnatës së 4 korrikut. Ndërsa 90 vjeçari Adams, i cili nuk ishte në dijeni të vdekjes së mikut të tij, thuhet se shqiptoi këto fjalë të fundit “Jeffersoni është ende gjallë”.

Ata ishin njohur gjatë konventës së vitit 1776, e cila çoi në vendimin e kolonive britanike të Amerikës për të shpallur pavarësinë nga Anglia. Në vitet e para pas krijimit të Shteteve të Bashkuara, Jeffersoni dhe Adamsi nuk ishin gjithmonë dakord për çështjet e ndryshme politike, por mbajtën një korrespondencë të vazhdueshme për problemet e kohës. Historianët edhe sot i studiojnë dhe i admirojnë letrat e shumta që shkëmbyen ata me njeri tjetrin.