SHBA zgjedh Kosovën në tri shtetet e para më mike dhe më prioritare për t’ia dhuruar vaksinat

Kosova do të jetë në mesin e tri shteteve të para që do pranojë nga SHBA’ja kontigjente vaksinash të dhuruara për imunizimin ndaj koronavirusit. Përzgjedhja e shteteve është bërë në bazë të miqësisë dhe prioritetit.

Një gjë e tillë është bërë e ditur nga Ambasada e SHBA’së në Gjeorgji nëpërmjet një komunikate, derisa ka thënë se shteti respektiv, Kosova dhe Ukraina do jenë tri shtetet e para që do marrin vaksinat, shkruan Gazeta Express.

“Këtë javë Presidenti Biden njoftoi se Shtetet e Bashkuara do të ndajë vaksinat COVID-19 me Gjeorgjinë. Gjeorgjia, Ukraina dhe Kosova janë tre vendet e para evropiane që marrin vaksina nga Shtetet e Bashkuara, bazuar në përparësitë dhe partneritetet rajonale”, thuhet ndër të tjera në komunikatë.

Ndonëse nuk është bërë me dije numri i vaksinave që do dhurohen, presidentja Vjosa Osmani përpara disa ditësh ka bërë me dije se më 19 prill iu është pranuar kërkesa për dhurim dozash të vaksinave.

“Më 19 mars 2021, i kam shkruar Presidentit Biden duke kërkuar mbështetjen e Shteteve të Bashkuara për dhurimin e vaksinave në kohën kur Kosova ishte i vetmi shtet në Evropë që ende nuk kishte filluar administrimin e tyre. Më 19 Prill 2021 Presidenti Biden u përgjigj pozitivisht në të cilën ai u zotua për ta trajtuar kërkesën tonë rreth vaksinave. Sot, ne jemi të lumtur të njoftojmë se Presidenti Biden, në emër të SHBA-ve, ka vendosur të dhurojë një numër të rëndësishëm të vaksinave COVID-19 për Republikën e Kosovës”, pati njoftuar Osmani.

Në komunikatë, tutje thuhet se Shtetet e Bashkuara janë gjithashtu të përkushtuara për të mbështetur rimëkëmbjen ekonomike nga pandemia në këto vende. /Gazeta Express/ KultPlus.com

Arta Gashi nga SHBA: Gjyshja tropojane më trashëgoi pasionin për kulturën autoktone

Arta Gashi, artistja shqiptare në New York, në një intervistë flet për veprimtarinë e saj artistike dhe planet e saj në vazhdim. Ajo nëpërmjet punëve të saj artistike, ruan traditat autoktone shqiptare larg vendit të origjinës. Arta është lindur dhe jeton në Shtetet e Bashkuara të Amerikës dhe ka një pasion për pikturën dhe frymëzimi i saj më i madh është kultura shqiptare.

“Ky pasion ka nisur nga familja, nga gjyshërit. Jemi rritur në New York, po jemi shumë të lidhur me traditat dhe kulturën shqiptare. Arti ka qenë gjithmonë pjesë e jetës sime. Është frymëzim dhe çlirim shpirtëror për tú shprehur. Gjithashtu shkollën dhe studimet i ka mbaruar në fushën e artit”, shprehet Arta Gashi në emisionin “Vizioni i Pasdites”.

E pyetur për letrat e veçanta që ajo krijon, Gashi tregon se ato janë unike dhe ndërkohë që luan, njohësh dhe me kulturën shqiptare: “Letrat që unë krijoi për lojë janë të veçanta dhe të ndara sipas grupmoshave. Gjyshja ime ka qenë tropojane dhe gjithmonë i ka ruajtur traditat, që mi ka përcjell edhe mua, sepse interesi im ishte shumë i lartë për këtë pjesë të kulturës. Këtu në New York ka njerëz nga popuj të ndryshëm, të gjithë festojnë festat e tyre, është një lloj krenarie të ruash traditat e vendit të origjinës. Ekspozita ime e parë është hapur në vitin 2008, bashkë me disa miq amerikanë, ndërsa ekspozita e dytë ishte e realizuar me shumë shqiptarë të tjerë dhe ishte një atmosferë shumë e bukur shqiptare. Unë jam rritur këtu, por e ndjej veten shumë shqiptare.”

Artistja Arta Gashi tregon se ka dhe shumë shqiptarë të tjerë që merren me punimin e veshjeve artizanale dhe punime dore, sepse i pëlqen të kultivojnë traditat e vendlindjes.

“Po punoj të krijoi një ekspozitë me miqtë e mi shqiptaro-amerikanë, sepse është dhe një mundësi e mirë për t’u bërë bashkë”, tregon Gashi. / KultPlus.com

Shkëlqimi në baletin botëror i Akreoma Saliut: Filmi, projekt i radhës

Akreoma do të thotë perëndia e Diellit, e duket se shkëlqimi i saj është “vulosur” që në lindje. Balerina shqiptare Akreoma Saliu tashmë po shkëlqen në skenat botërore teksa prej pak vitesh është vendosur në New York të Shteteve të Bashkuara të Amerikës.

Ka studiuar për balet klasik në Shqipëri, por e ka gjetur veten dhe të shprehurin e ndjenjave më së miri në dancin kontemporan. Pikërisht për shkak të pasionit për këtë të fundit dhe talentin të rrallë, për të cilin është ushtruar që në moshën 5-vjeçare, balerina e njohur vendosi të zhvendoset në qytetin e mundësive të mëdha.

Në këtë intervistë për “Diaspora Shqiptare“, Akreoma rrëfen edhe projektin e radhës i cili është një film, teksa rrëfen se në pasionin e saj për artin bën pjesë dhe fotomodelingu.

Të lësh vendlindjen, skenën dhe publikun tënd është një vendim i vështirë. Shqipëria është vendi ku ti u formove dhe u rrite artistikisht. Skena e parë që u ngjite, shfaqja e parë që vure vete në skenë. Përse vendose të rifillosh në Amerikë?

Vendosa të rifilloj në Amerikë për mundësi më të mira, sepse pashë që ky vend mund të më japë më shumë sesa vendi im. Dhe tashmë jam tepër e lumtur që e mora atë vendim.

Vështirësia e fillimit është në çdo profesion. Për ty cila ka qene sfida më e madhe (deri tani) në SHBA?

Vështirësia më e madhe ka qenë periudha e fillimit të pandemisë, mbylljet e shkollave e teatrove këtu.

Aty ky njerëzit kanë pasur pikën më të dobët dhe vështirësitë më të mëdha pra të komunikimi, për ty besoj do të ketë qenë më e lehtë. Pasi komunikimi me gjuhën e trupit është universal?

Unë nuk komunikoj vetëm me gjuhën e trupit këtu. Unë jam gjithashtu mësuese baleti, që do të thotë që çdo gjë që e komunikoj me trupin tim, ja shpjegoj me fjalë studentëve. Të jesh balerinë për mua nuk komunikon vetëm me gjuhën e trupit. Ti quhesh artist, ti edukon një publik të tërë që vjen e të mbështet, ti duhet patjetër të jesh i kompletuar.

Bota e artit është në një konkurrence të vështirë dhe të përhershme me kërkesa shumë të larta. Si ja doli një vajzë nga Shqipëria (me bazat e një shkolle lindore, pasi baleti në Shqipëri i përket shkollës lindore) të përshtatet dhe të shkëlqeje në botën perëndimore të artit. Ishte ndihmë apo pengesë shkolla lindore?

Patjetër që bazat që kam marrë në Shqipëri kanë qenë ndihmesë shumë e fortë për mua, sepse ne marrim baza të forta klasike nga shkolla ruse, e unë vërej që këtu kam bërë dallim nga të tjerët fatmirësisht.

Prej disa vitesh tashmë jeni larguar drejt SHBA-së. A ka të bëjë kjo zgjedhje me profesionin tuaj, duke qenë se baleti kontemporan nuk të ofron shumë mundësi në Shqipëri?

Po, kjo zgjedhje ka të bëjë me profesionin. Në New York më janë ofruar më shumë mundësi.

Krahas baletit kemi parë shumë foto tuajat që na lënë pa fjalë, ku keni bashkëpunuar me të madhin Fadil Berisha dhe fotografin e njohur Ilir Rizaj. Sa vend zë në pasionet e tua bota e fotografisë dhe modelingut?

Po mundohem ti bëj paralel baletin dhe fushën e modeling. Afrohem në gjithçka që ka lidhje me artin.1 nga 5  

Cili është projekti i radhës i Akreomës dhe a përfshihet Shqipëria?

Projekti i radhës : do të marr pjesë së shpejti në një film këtu në New York. Në fakt, gjithmonë i mbaj lidhjet me Shqipërinë se është vendi im dhe gjithmone e them me krenari. Para 2 muajsh ne organizuam një koncert për pavarësinë e Kosovës, dhe ndonëse ishte kohë pandemie globale ne u mblodhem dhe servirem një koncert me vlera për vendin tonë.

Le të flasim pak për jetën tuaj. Na bën përshtypje emri i veçantë, Akreoma. Çfarë domethënie ka dhe kush ua ka vendosur këtë emër?

Akreoma vjen nga greqishtja e lashe dhe do të thotë perëndia e diellit. Personi më i rëndësishëm në jetën time, BABI, ka menduar të më vendosë këtë emër kaq të veçantë.
Cila është e përditshmja juaj në një vend të madh e të zhurmshëm si New York?
Unë e dua shumë New York. Jam mësuar tashmë këtu, jam mësuar me zhurmën, vështirësitë, kaosin, bukurinë e sakrificat që New York më ofron. Mundohem shumë të merrem me aktivitet fizik jashtë shtëpisë në ajër të pastër, punoj për planet e mia të ardhshme gjithashtu. Ditet e javës janë tepër të ngarkura në New York, ndonjëherë them që nuk më mjaftojnë 24 orë.1 nga 5  

A keni krijuar kontakte me shqiptarë të tjerë dhe sa i mbani lidhjet me Shqipërinë.
Patjetër që kam krijuar kontakte dhe me shqiptarë të tjerë, përfshirë këtu artistë shqiptarë.

Cili është mesazhi juaj për rininë shqiptare?
Mesazhi për rininë shqiptare: Është shumë e rëndësishme të ndjekim pasionin, ëndrrat tona, edhe të punojmë fortë për to! Puna gjithmonë shpërblehet. Shqiptarët në fakt, gjjthmonë bëjnë diferencë në çdo vend të botës, sepse janë shumë punëtorë./ Diaspora Shqiptare / KultPlus.com

Vala e parë e emigrimit të shqiptarëve në SHBA në fillim vitet 1900

Shqiptarët ishin populli evropian që iu drejtuan të fundit Amerikës, për shkak të traditës së vjetër për të emigruar në vendet evropiane.

Shqiptari i parë që shkeli në Amerikë është një qytetar i paidentifikuar nga qyteti i Korçës i cili arriti në SHBA në vitin 1876. Pas tij në nëntor të vitit 1877 shkoi në Amerikë prifti shqiptar Prend Doçi.

Shtetasi i parë shqiptar që u vendos në Amerikë shërbeu si bërthamë magnetike për emigrantët e tjerë shqiptarë. Ishte Kolë Kristofori nga fshati Katund i Korçës që arriti në Amerikë më 1884-ën. Pas gjashtë vitesh Kolë Kristofori u kthye ne fshatin e lindjes. Por më 1892, ai u rikthye në Amerikë së bashku me 17 bashkëfshatarë të tij, të cilët formuan bërthamën e Diasporës shqiptare në SHBA. Më 1900 shumë shqiptarë të tjerë iu drejtuan Amerikës.

Numri i shqiptarëve të regjistruar si të tillë figuron të jetë 4105 për periudhën 1900-1932. Shifrat reale janë edhe më të larta, por për shkak të regjistrimit si shtetas të perandorisë osmane ose grekë është vështirë të bëhet një numërim i saktë i shqiptarëve të emigruar në ato vite në SHBA. Ndër këta shqiptarë përmendim mbiemra si: Mortati, Braçe, Luarasi, Peci, Konica, Noli, Millone, Flloqi, Kirkoa, Cikozi, Dishnica, Idrizi, Ymeri, Kamburi, Pandele etj..

Kategoritë e emigrantëve

Emigrantët e parë shqiptarë në SHBA mund të ndahen në dy kategori: në emigrantë ekonomikë, të cilët largoheshin nga atdheu për të fituar para dhe në emigrantë politikë, të cilët detyroheshin të largoheshin për arsye politike. Lidhur me çështjen se cila kategori e emigrantëve ishte mbizotëruese, ka patur mendime të ndryshme. Disa autorë janë të mendimit se emigrantët ekonomik formonin masën kryesore të emigracionit shqiptar në SHBA. Autorë të tjerë mendojnë të kundërtën.

Vitet 1904-1905

Valët më të fuqishme të emigracionit u përkasin viteve 1904-1905 dhe 1909-1912, vite këto të karakterizuara nga tensione të forta politike të krijuara nga ngjarje që sollën shpalljen e pavarësisë, si dhe vitet 1913-1914, veçanërisht vera e vitit 1914 kur Shqipëria e jugut u pushtua prej ushtrisë greke. Në këtë periudhë shqiptarët vijonin të ishin shtetas të Perandorisë Osmane dhe shkonin në Amerikë me pasaporta osmane, prandaj edhe në listat e emigracionit të zyrave amerikane ata figuronin si shtetas osmanë. Një pjesë tjetër regjistroheshin si grekë për shkak të lidhjeve fetare me Patriarkanën e Stambollit dhe prej koncepteve zyrtare të shtetit osman, i cili shqiptarët e besimit ortodoks i konsideronte grekë për nga kombësia. Madje, shumë emigrantë erdhën edhe nga vendet ballkanike, Bullgaria, Rumania, etj, ku kishin emigruar prej kohësh. Si të tillë ata erdhën në Amerikë me dokumente identifikimi jo shqiptare.

Numri i saktë

Si rrjedhojë e të gjithëve këtyre faktorëve, është e vështirë të gjesh numrin e saktë të emigranteve shqiptarë që u vendosën në Amerike në dhjetëvjeçarin e parë të shek. XX. Sipas dokumentacionit zyrtar federal të vitit 1910, në SHBA ndodheshin 625 shqiptare. Gjatë viteve 1911-1914 në ShBA mbërritën 1528 shqiptarë, ndërsa në vitet 1915 deri 1919 numri i tyre bie ndjeshëm në 694 vetë. Në strukturën demografike të Diasporës shqiptare të Amerikës, mbizotëronin burrat, sepse ata, duke dashur të riktheheshin përsëri në atdhe, nuk i merrnin gratë dhe pjesën tjetër të familjes së tyre. Numri i grave shqiptare në SHBA erdhi duke u rritur pas vitit 1920, kur shumë shqiptarë vendosën të qëndrojnë atje si banorë të përhershëm.

Gazeta “Kombi”

Sipas gazetës ‘Kombi’ i pari fëmijë me prindër shqiptarë lindi në janar të 1908-ës në familjen e Kristo Koçit nga Korça. Pjesa dërrmuese e emigrantëve shqiptarë që vinin në SHBA ishin nga Shqipëria e jugut. Fuqizimi nga ana ekonomike i këtyre  emigrantëve nxiti edhe mjaft shqiptarë të tjerë t’i drejtoheshin Amerikës. Pas vitit 1905, interesat tregtare bënë që të hidheshin hapa të rëndësishëm drejt një emigracioni të organizuar të shqiptarëve në SHBA.

Ku u vendosën emigrantët?

Megjithëse ligji amerikan i emigracionit në vitin 1907 ndalonte ardhjen e emigrantëve në SHBA me para të marra borxh, shqiptarët të cilët në të shumtën e rasteve udhëtonin me para të siguruara në këtë mënyrë, mund t’i bënin ballë atij në pjesën më të madhe, duke deklaruar para doganës amerikane se paratë e udhëtimit i kishin siguruar prej prindërve ose të afërmve të tyre që ndodheshin në SHBA. Shqiptarët e parë që erdhën si emigrantë në Amerikë, u vendosën në pjesën më të madhe të tyre në qytetin e madh të Bostonit dhe pikërisht në pjesën jugore dhe perëndimore të qytetit. Pas Bostonit ata u vendosën në qytete apo qyteza të tjera të shtetit Masaçustes. Qendër e rëndësishme e emigrantëve shqiptarë u bë Anglia e re (New England).

Jetesa

Për një periudhë relativisht të shkurtër një pjesë e emigrantëve shqiptarë, sigurisht më të zotët, arritën të zbulonin të fshehtat e funksionimit të ekonomisë së një vendi që ofronte mundësi pa kufi, ata filluan të merreshin edhe me tregti. Sipas gazetës  ‘Kombi’ deri në fund të vitit 1907 shqiptarët ishin shpërndarë në 12 qytete amerikane. Shumë domethënëse, për integrimin e shqiptarëve në SHBA ishin dhe reklamat që publikoheshin në faqet e gazetës ‘Kombi’, të cilat u bënin jehonë biznesmenëve shqiptarë që jetonin në qytete të ndryshme të Amerikës. Shumë interes paraqet edhe mënyra e jetesës së emigrantëve shqiptarë. Të gjithë bashkëfshatarët ose bashkëqytetarët grumbulloheshin si rregull, në të njëjtat qendra banimi. Kjo dukuri lidhet me faktin se një fshatar apo një qytetar shqiptar i ardhur në Amerikë kthehej shumë shpejt në një pikë tërheqëse për bashkëfshatarët apo bashkëqytetarët e tjerë. / Diaspora Shqiptare / KulPlus.com

E mendonin të vdekur, gruaja mbijeton me muaj në kanion duke ngrënë bar dhe myshk

Një ngjarje e pazakontë ka ndodhur në Utah të Shteteve të Bashkuara, ku një 47-vjeçare ka mbijetuar 4 muaj në një kanion të humbur, duke ngrënë vetëm bimësinë e rrallë që ndodhej aty, bar dhe myshk, dhe ujin e një përroi.

Gruaja, identiteti i të cilës nuk është bërë ende i ditur, ishte zhdukur 4 muaj më parë, dhe kërkimet kishin filluar që kur autoriteteve i kishte bërë përshtypje automjeti i saj i parkuar për kohë të gjatë në parkun e izoluar, i quajtur Diamond Fork Canyon, që do të mbyllej gjatë sezonit dimëror.

Asnjë denoncim nuk kishte ardhur kështu që misteri i automjetit u harrua, deri në rihapjen e parkut, pak ditë më parë.  Gjatë inspektimit të territorit me reliev të vështirë, policia pyjore gjeti një çadër kampingu të vogël me gruan në brendësi, në gjendje të vështirë shëndetësore dhe dukshëm nënpeshë, por jashtë rrezikut për jetën.  

Gruaja u transportua në spital ku tregoi për historinë e saj, edhe pse ende në gjendje konfuze.  Gruaja i ka rezistuar dimrit të ftohtë të kanioneve dhe ushqimit tejet të kufizuar, edhe pse rrëfeu që disa turistë i kishin lënë në fillim disa ushqime.

Sipas autoriteteve gruaja , që nuk rezulton të ketë një familje që ta kërkojë, mund të mos ketë humbur, por të ketë vendosur të rrijë aty disa kohë dhe më pas të ketë llogaritur keq forcat fizike, duke mos pasur më fuqi për të kërkuar ndihmë./a2/ KultPlus.com

Infermierja shqiptare në Bronx zgjidhet “Punonjëse e vitit për 2020-ën”

Prej 15 vitesh Ardita Sopi ushtron profesionin e saj si infermiere në Bronx, SHBA. Media amerikane “News12” ka realizuar një intervistë me infermieren shqiptare, e cila në vitin 2020 u nderua nga spitali ku punon më çmimin “Punonjëse e vitit për 2020-ën”.

Ardita Sopi është pjesë e emigrantëve në kohën e luftës së Kosovës dhe ka përjetuar shumë humbje në atë periudhë të vështirë. Tashmë me pandeminë ato ndjenja trishtimi për shumë humbje jete duket sikur i janë rikthyer sërish.

Për tetë vite Sopi ka qenë pjesë e në Spitalin St. Barnabas dhe së fundmi ajo punon si infermiere në Departamentin e Shërbimeve Shëndetësore në këtë spital.

Vitin e kaluar, spitali e nderoi Ardita Sopin si “Punonjësen e vitit për 2020-ën” për punën e saj duke siguruar mbështetje fizike dhe emocionale për stafin – disa prej të cilëve ndërruan jeta nga koronavirusi.

“Unë kam jetuar në një zonë lufte dhe me të vërtetë në ato kushte jeton me frikën nëse do zgjohesh të nesërmen, nëse do shkosh në shkollë dhe për më tepër nëse do kisha mundësi të diplomohesha”, tregon Sopi.

Sopi arriti në Shtetet e Bashkuara në 1999 pasi jetoi për disa muaj në një kamp refugjatësh në Maqedoni. Ajo thotë se nuk fliste anglisht, por kuptoi që Amerika i ofroi asaj një mundësi për të përmbushur ëndrrën e saj për të qenë një infermiere si nëna e saj.

 “Duke u rritur me shembullin e nënës sime e cila me punën e saj si infermiere jepte maksimumin nga vetja për të ndihmuar të tjerët, unë u ushqeva me të njëjtën frymë dhe doja patjetër të bëja të njëjtën gjë, të kisha një profesion me anë të cilit të ndihmoja të tjerët. Periudha e pandemisë, më solli në kujtesë luftën e Kosovës, ku nuk e dinim se çfarë na pret ditën tjetër, por nuk mungonte solidariteti”, tha Sopi.

Ajo thotë se qëllimi i saj i ardhshëm është marrja e një doktoraturë dhe kontribuimi në shoqërinë amerikane, për të cilën ajo thotë se tashmë i ka dhënë kaq shumë. / Diaspora Shqiptare / KultPlus.com

Një shtet i ShBA-së premton nga 100 dollarë për të rinjtë që vaksinohen

Virgjinia Perëndimore e Shteteve të Bashkuara do t’u ofrojë kursime prej 100 dollarësh të rinjve që e marrin vaksinën kundër Covid-19.

Autoritetet e këtij shteti thonë se shpresojnë që kjo pagesë për personat e moshës 16- deri në 35-vjeçare do t’i motivojë të rinjtë që ta marrin vaksinën, shkruan BBC, transmeton Gazeta Express.

“Fëmijët tanë ndoshta nuk e kuptojnë vërtet se sa të rëndësishëm janë ata që t’i jepet fund kësaj”, tha guvernatori i Virgjinias Perëndimore, Jim Justice, të hënën.

Virgjinia Perëndimore ka qenë në mesin e shteteve amerikane me shkallët më të larta të vaksinimit, por progresi është ngadalësuar në javët e fundit.

Nisma e re nënkupton që personat e grupmoshës së caktuar që vaksinohen mund t’i tërheqin 100 dollarët plus shkallën e interesit në një datë të mëvonshme. Nga kjo shumë do të përfitojnë edhe ata që janë vaksinuar më parë e që nuk janë nën 16 vjeç e mbi 35 vjeç.

Virgjinia Perëndimore është e gjashtëmbëdhjeta në ShBA për shkallën më të lartë të rasteve për numër banorësh. Rreth 52 për qind e 1.5 milion personave të përshtatshëm për vaksinim tashmë e kanë marrë të paktën njërën dozë, por guvernatori tha se rreth 40 për qind e popullsisë mund të ngurrojë që ta marrë vaksinën. / KultPlus.com

Shqiptari vazhdon t’u dhurojë pica falas policëve amerikanë në Texas

Shqiptarët ka vite që jetojnë në Shtetet e Bashkuara të Amerikës, ku edhe po zhvillojnë bizneset e tyre.

Një prej tyre është edhe Mergim Lala, i cili ka mbi tre dekada që jeton dhe vepron në Houston të Texasit.

Ai udhëheq me sukses një biznes familjar të picerisë, “Brother’s Pizza”, i cili vlerësohet shumë nga komuniteti amerikan, por edhe policia e këtij vendi.

Lala vendosi që gjatë ditës së sotme të qeras me pica uniformat e kaltra në shenjë të mirënjohjes për punën që bëjnë në “District 1”.

“Vazhdoni me punën e mirë në District 1. Komuniteti juaj ju vlerëson”, shkruan në llogarinë zyrtare të picerisë.

Ndryshe, piceria kohë pas kohe i shpërblen pjesëtarët e tjerë që shërbejnë në dobi të komunitetit, të tillë, si zjarrfikësit./KultPlus.com

Inagurohet një tjetër statujë e Nënë Terezës në Brooklyn

Organizata jo qeveritare “Rrënjët Shqiptare” në SHBA, drejtuar nga Marko Kepi ka inaguruar një tjetër statujë në Nënë Terezës në Brooklyn New York,  ku jetojnë më shumë se 20 mijë shqiptarë.

Kujtojmë se në vitin 2016 Në platon e Kishës Saint Anthanasius, në Brooklyn u inagurua një tjetër statujë e Nënë Terezës nga po e njëjta organizatë. Në 2016 u organizua një ceremoni e madhe inagurme me shumë shqiptarë të pranishëm.

Monumenti i të Shejtes Nënë Tereza në  Brooklyn  do të jetë i disati në New York.

Monumente të ngjashme janë ngritur, ndër të tjera , në New York dhe Detroit në Shtetet e Bashkuara,e tjerë.

Nënë Tereza lindi në Shkup më 26 gusht të vitit 1910, kur ai ishte pjesë e Perandorisë Otomane, ndërsa vdiq më 5 shtator 1997 në Kalkuta, në Indi.

Në vitin 1928 u largua nga Shkupi në drejtim të Dublinit, Irlandë. Ajo më pas u vendos në Kalkuta (Indi) ku fillimisht u bë mësuese dhe shumë shpejt drejtore e shkollës së vajzave. “Nënë Tereza e Kalkutës” u quajt kur themeloi urdhrin “Misionaret e Dashurisë” (1951) për t’u shërbyer më të varfërve dhe më të pashpresëve të Kalkutës, Indisë dhe gjithë botës. Në vitin 1979, kur mori Çmimin Nobel për Paqe, e gjithë bota mësoi se Nënë Tereza ishte shqiptare

Deri më 1996, Nënë Tereza ishte duke punuar në 517 misione në më shumë se 100 vende. Gjatë viteve, Bamiresia e Misionareve të Nënë Terezës u zgjerua nga dymbëdhjetë në mijëra persona që u shërbejnë “me të varfërve nga të varfërit” në 450 qendra në mbarë botën./ KultPlus.com

Kosnett uron Osmanin për postin e Presidentes: SHBA mbetet e përkushtuar për partneritet të ngushtë me Kosovën

Ambasadori amerikan Philip Kosnett ka uruar Vjosa Osmanin për zgjedhjen e saj si Presidente e Kosovës.

Konsett përmes një postimi në Twitter ka shkruar se SHBA mbetet e përkushtuar për partneritet të ngushtë me Republikën e Kosovës.

Përgëzime për Vjosa Osmanin për zgjedhjen e saj si President, dhe për ata deputetë që kryen detyrën e tyre si anëtarë të Kuvendit. SHBA mbetet e përkushtuar për partneritet të ngushtë me Republikën e Kosovës për të ndërtuar një të ardhme të paqes, drejtësisë dhe prosperitetit për të gjithë qytetarët”, ka shkruar Kosnett.

Vjosa Osmani është zgjedhur sot Presidente e Kosovës, në raundin e tretë të votimit në Kuvendin e Kosovës ku nga 82 deputetë të pranishëm mori 71 vota. / KultPlus.com

“Instituti Shqiptar New York” sjell historinë e familjes arbëreshe në SHBA

“Instituti Shqiptar New York” organizon më 2 prill 2021 takimin online “Historia e arbëreshëve me George Richard Manus”.

Një event bazuar në tregimet e dy vëllezërve arbëreshë mbi historinë, traditat, gjuhën dhe kulturën e komunitetit tyre.

Familja Minici nga Vaccarizzo Albanese, Kalabria, Itali.

George Richard Manus, 85 vjeç dhe vëllai i tij Ronald Manus, 87 vjeç (mbiemri origjinal i familjes ishte Minici) janë të afërmit e fundit që jetojnë në familje që kanë kujtime të gjuhës arbëreshe dhe historisë, këngës së vjetër ose thënie nga gjyshërit e tyre të cilët kanë lindur në Vaccarizzo Albanese, i njohur gjithashtu si Vakarici, në Kalabri. Ata emigruan në Amerikë, New Jork, zona e New Jersey, një periudhë kur pati një valë emigrimi, duke filluar nga mesi deri në fund të viteve 1800.

Programi Arbëresh nga “Instituti Shqiptar” promovon kulturën, muzikën, historinë, trashëgiminë dhe njeh brezat sot me një kuptim dhe vlerësim më të mirë të vlerave dhe traditave të nderuara me kohë të popullit Arbëreshë.

Arbëreshët kanë një traditë të trashëguar gojë pas goje të historisë tyre ndër breza. Tregimi në këtë takim virtual ushqen lidhje me njerëzit në jetën reale. Tregimi i historive është universal dhe është po aq i lashtë sa njerëzimi.

Instituti Shqiptar është thellësisht i përkushtuar në gjetjen e mënyrave të reja për t’u lidhur dhe angazhuar me komunitetin tonë dhe rrjetin e bashkëpunëtorëve nga e gjithë bota, si brenda ashtu edhe jashtë linje.

Takimi do të mbahet në orën 5:30 PM (New York). Regjistrohu / Diaspora shqiptare / KultPlus.com

Sudani ia jep ShBA-së 335 milionë dollarë dëmshpërblim për rastin e 98-ës

Sekretari amerikan i Shtetit, Antony Blinken, njoftoi të mërkurën se Shtetet e Bashkuara kanë pranuar 335 milionë dollarë nga Sudani si dëmshpërblim për viktimat e bombardimeve të vitit 1998.

Në këtë vit, ambasadat e Shteteve të Bashkuara në Keni dhe Tanzani ishin bombarduar, duke lënë të vdekur disa persona. Një pjesë e këtyre mjeteve do të ndahen edhe për familjarët e amerikanit John Granville më 2008.

“Ne shpresojmë se kjo do t’i ndihmojë ata që të gjejnë ca qetësi për tragjeditë e tmerrshme që kanë ndodhur. Me këtë proces sfidues pas nesh, marrëdhëniet ShBA – Sudan mund ta fillojnë një kapitull të ri”, shtoi kryediplomati amerikan, shkruan Reuters, transmeton Gazeta Express.

Nga bombardimet që kishin ndodhur në këto dy ambasada ishin vrarë 224 persona, prej tyre 213 në Nairobi të Kenisë dhe 11 në Dar es Salaam të Tanzanisë. Mbi 4.000 të tjerë kishin pësuar lëndime.

Ish-presidenti i Shteteve të Bashkuara, Donald Trump, kishte thënë se do ta largojë Sudanin nga lista e shteteve sponzorizuese të terrorizmit, nëse shteti afrikan e paguan dëmshpërblimin prej 335 milionë dollarëve për viktimat e bombardimeve. / KultPlus.com

Reagimi i grupit “BTS” kundër dhunës ndaj aziatikëve në SHBA

Grupi i famshëm nga Korea Jugore, “BTS”, e ka lëshuar një deklaratë publike përmes së cilës e dënuan urrejtjen dhe dhunën e fundit kundër aziatikëve në SHBA. Ata po ashtu treguan eksperiencat e tyre me racizmin.

Deklarata e shtatë anëtarëve të grupit u postua në rrjetet sociale, me ç’rast ishin munduar të mos marrin vëmendje personale nga ky reagim, por thjeshtë të bënin thirrje për paqe, respekt dhe dashuri.

“U dërgojmë ngushëllimet më të sinqerta gjithë personave që i kanë humbur të dashurit e tyre. Ndiejmë hidhërim dhe zemërim të thellë. Edhe ne i kujtojmë momentet kur jemi përballuar me diskriminim si aziatikë. Jemi detyruar të durojmë komente të ndryshme pa arsye dhe jemi tallur për mënyrën se si dukemi. Madje na pyetën pse aziatikët flisnin në gjuhën angleze. Prandaj, nuk mund ta shprehim me fjalë dhimbjen e të qenit objekt urrejtjeje dhe dhune për një arsye të tillë racore. Përvojat tona nuk janë të rëndësishme në krahasim me ngjarjet që kanë ndodhur gjatë javëve të fundit. Por këto përvoja ishin të mjaftueshme për të na bërë të ndihemi të pafuqishëm dhe për të na ulur vetëbesimin. Ajo që po ndodh tani nuk mund të ndahet nga identiteti ynë si Aziatikë. Na është dashur kohë e konsiderueshme për ta diskutuar me kujdes këtë temë dhe menduam thellë se si duhej ta shkruanim mesazhin tonë. Por ajo që duam ta përcjellë mesazhi ynë është plotësisht e qartë. Ne qëndrojmë kundër diskriminimit racor. Ne e dënojmë dhunën. Ju, ne dhe të gjithë njerëzit kemi të drejtë të respektohemi. Prandaj do të qëndrojmë së bashku kundër këtij fenomeni të keq për çdo shoqëri”.

Megjithëse nuk e përmendën ndonjë ngjarje specifike, deklarata e grupit vjen pas ngjarjes tragjike të 16 marsit e cila ndodhi jashtë Atlantës, dhe ku një person i armatosur i vizitoi tri salla masazhi aziatike ku edhe i vrau me armë zjarri tetë persona, përfshirë gjashtë gra aziatike.

Vitin e kaluar, anëtarët e grupit “BTS” e shfaqën përkrahjen publike për protestat e lëvizjes “Black Lives Matter” kundër racizmit dhe brutalitetit policor në Amerikë. Këto protesta u shpërndanë edhe në shtete tjera anembanë botës.

Në qershor të vitit 2020, grupi shumë i suksesshëm i muzikës K-pop dhe studioja e tyre incizuese “Big Hit Entertainment”, i dhuruar 1 milionë dollarë për grupet e lidhura me protestat “Black Lives Matter”, dhe ndihmuan në grumbullimin e miliona dollarëve tjerë nga fansat e tyre besnik anembanë globit. / KultPlus.com

Bideni do të nderojë 500 mijë jetët e humbura nga COVID-19 në SHBA

Presidenti i SHBA-së, Joe Biden, do të nderojë 500 mijë jetë të humbura nga COVID-19 me një moment heshtjeje dhe ceremoni ndriçimi qirinjsh në Shtëpinë e Bardhë.

SHBA-të pritet ta kalojnë këtë moment të zymtë gjatë ditës së sotme, pak më shumë se një vit që pas vdekjes së parë në vend.

Shtëpia e Bardhë ka thënë se Bideni do të marrë pjesë bashkë me zonjën e Parë, Jill Biden, zëvendës-presidentin Kamala Harris dhe burrin e saj, Doug Emhoff, në momentin e heshtjes dhe ceremonisë së ndriçimit.

Shetetet e Bashkuara të Amerikës kanë pasur më shumë se 28.1 milionë raste positive me COVID-19 që nga fillimi i pandemisë. / KultPlus.com

Në 13-vjetorin e Pavarësisë, SHBA-ja: Raporti me Kosovën i palëkundshëm

Në 13-vjetorin e Pavarësisë së Kosovës, Shtetet e Bashkuara të Amerikës janë shprehur se marrëdhëniet mes dy shteteve mbesin të palëkundshme.

Përmes një postimi në Facebook, Ambasada amerikane ka thënë se mbështet popullin e Kosovës në krijimin e një vendi paqësor e më të zhvilluar për qytetarët e saj.

“Teksa festojmë Ditën e Pavarësisë së Kosovës, partneriteti SHBA-Kosovë mbetet i palëkundshëm. Ne qëndrojmë në krah të popullit të Kosovës teksa ju ndërtoni një shtëpi të drejtë, paqësore e prosperuese për të gjithë qytetarët e Kosovës”, thuhet në urimin e SHBA-së. / KultPlus.com

Si i morën emigrantët në SHBA në vitet 1900 bimët medicinale shqiptare

Njerëzit që largohen nga vendlindja do të marrin patjetër diçka me vete, dikush kujtimet, dikur një send te vyer, por shpesh edhe gjëra të jetës së përditshme të cilat mund tu shërbenin në atdheun e ri.

Në fillim të viteve 1900, atëherë kur nisi edhe vala e parë migratore e shqiptarëve drejt  Amerikës një pjesë e tyre zgjodhi te vendosej në Boston. Kohët e para shumë prej tyre kishin një jetë të vështirë duke jetuar në ndërtesa të vjetra dhe bodrume në mënyrë që të përballonin jetesën, duke punuar në fusha nga më të ndryshmet dhe duke përdorur qoftë shtretërit apo veshjet e njeri tjetrit.

Për të kursyer para për familjet e tyre këta të rinj shpenzuan shumë pak për veten e tyre. Punuan punë të rënda në fabrika në kushte të vështira të strehimit dhe ushqimit të pamjaftueshëm që më vonë ndikuan në shëndetin e burrave dhe djemve emigrantë.

Disa prej tyre humbën jetën në rrethana tragjike. Sëmundja e tuberkulozit filloi të prekë disa nga emigrantët që jetonin në këto bodrume në zonën e Bostonit. Ky fakt ishte një nga shqetësimet që Faik Konica solli në vëmendjen e bashkisë së qytetit.

Ai i ushtroi presion Guvernatorit që t’i akomodonte shqiptarët nga bodrumet dhe t’u jepte një vendstrehim dhe nëse ishte e nevojshme, ai vete do ti përcillte kauzat e tyre në vëmendjen e shtypit. Konica vizitoi vendet ku ata jetonin për të folur dhe në disa raste i këshillonte të ktheheshin në vendin e tyre për te pushuar dhe per tu kuruar.

Vite më vonë, emigrantët shqiptarë u bashkuan me familjet e tyre dhe së bashku me ta erdhën edhe traditat dhe zakonet e tyre. Në bisedat me shqiptaro-amerikanë të moshuar u mësua se gratë emigrante sollën me vete rrënjë dhe farëra të bimëve mjekësore, të tilla si salep, çaj mali, kamomil, rigon të kuq dhe të bardhë etj. Ato i kultivuan këto bimë në vazo dhe kopshte, dhe i përdorën  si ilaçe alternative sipas zakoneve të tyre. Gjithashtu, kishte raki, pije alkoolike e bërë nga rrushi në shtëpitë e tyre, e përdorur jo vetëm për ngjarje festive, por edhe si “ilaçe” kundër të ftohtit ose gripit. Po aq vlen të përmendet edhe nëna e patriotit shqiptar Anton Athanasi, e cila kishte marrë nga Shqipëria tharme kosi për të cilat u kujdes që të mos prisheshin për gajtë gjithë udëtimit dy javor.

Në komunitetin shqiptaro-amerikan, kishte një numër të madh të grave  që praktikonin mjekësi alternative dhe që kuronin  shqiptarë që vuanin nga reumatizma, dhimbja e mesit, fraktura, sëmundje të zorrëve, probleme të frymëmarrjes, etj. Ato përdorën “masazhe” dhe “kombinim të çajrave të ndryshëm me bimë mjekësore”. Për infeksionet e lëkurës atao përdornin të verdhën e vezës. Midis tyre kishte edhe njerëz që ndihmuan me “magji”, përfshirë Kolevica, zonjën e mrekullueshme shqiptare nga Lynn dhe Massachusetts e cila përdori magjinë e saj me qymyr.)

Znj. Gloria Hill, shqiptaro-amerikanja e lindur në  Boston nga prindër shqiptarë, kujton shërimin me “filxhanë” për ata që vuanin nga pneumonia. Gratë me përvojë përdornin gota qelqi me një qiri të vogël brenda, të cilat i vendosnin një nga një në pjesën e kurrizit për të sëmurët. Ajo gjithashtu kujton metodën tradicionale të “masazhimit” për dhimbjen e shpinës. Metoda të ngjashme të mjekësisë alternative tradicionale u përdorën nga Arbëreshët e Massachusetts, si dhe emigrantë të tjerë shqiptarë.

Vangjo Llaci, kishte studiuar dhe punuar si mjek në New York që nga fillimi i shekullit të kaluar. Thuhet se Dr. Llaci shpesh thirrej për konsulta mjekësore në shtëpinë e bardhë. Mjekë të tjerë të respektuar të përmendur ishin Dr. Andreë Elia dhe gruaja e tij Dr. Dimetra Tsina-Elia. Të dy ata ishin në praktikë mjekësore në Boston. Dr Andrew Elia ishte kryetari i Shoqatës “Vatra” si dhe një publicist i njohur. Elias njiheshe si aktivist i nderuar i komunitetit shqiptaro-amerikan. Një mjek tjetër i respektuar dhe me reputacion i cili praktikoi në Boston dhe në qytete të tjera më të vogla  ishte Dr. Nicholas Prift. Ai ishte një mjek i përgjithshëm, i cili shpesh thirrej nga prindërit shqiptarë për të vizituar fëmijët e tyre të sëmurë. Ata kishin besim të plotë tek ai për shkak të aftësive të tij profesionale si dhe kujdesit dhe përkushtimit të tij. Dr Gaqi Qano praktikoi stomatologji në Filadelfia.

Disa vite më vonë ai u kthye në Shqipëri dhe punoi si stomatolog deri në fund të jetës së tij. Do të mbahet mend për mbështetjen e tij të fortë në formimin e një grupi stomatologësh. Një emër tjetër i njohur në komunitetin shqiptaro-amerikan në Ëorcester ishte aktivisti shqiptar Dr. John Nasse, me origjinë nga Berati. Gjatë udhëtimeve të tij në Shqipëri, Dr. Nasse ofroi mbështetjen dhe kontributin e tij në sistemin mjekësor të vendit të tij të lindjes. Në komunitetin arbëresh të Milford, afër Bostonit, Dr Nikolla Capece, ishte një tjetër praktikuese mjekësore që përmendet me shumë respekt. Dr. Capece ishte një studiues dhe aktivist i njohur. Ai dha kontribute të konsiderueshme drejt afrimit të komuniteteve arbëreshe dhe shqiptaro-amerikane.

Pas Luftës së Dytë Botërore, dhe deri në 1990, mjekët, dentistët dhe farmacistët me origjinë shqiptare në Amerikë ishin kryesisht fëmijë të lindur nga emigrantë shqiptarë të brezit të parë, të cilët ishin larguar nga territori shqiptar brenda dhe jashtë juridiksionit të Shqipërisë. Për t’u përmendur gjithashtu janë Dr. Ferid Murad, fitues i Çmimit Nobel dhe Kryetar i Nderuar i Shoqërisë Mjekësore Shqiptaro Amerikane, Dr. Vasil Popa, Dr. Agim Leka, Dr. Peter Pochi, Dr. Faton Gashi, Dr. Ramazan Turdiu, Dr. Hamdi Oruci, Dr. Daut Gjoni, Dr. Nedzat Kaliqi, Dr. Filip Çaushaj, dy vëllezërit dentistë Xhelo dhe Mazar Shuaipaj, Dr. Zife Krosi, Dr. Dila Vuksanaj dhe të tjerë.

Materiali kortezi e shoqates ALBANIAN AMERICAN MEDICAL SOCIETY/ KultPlus.com

Përse Harris, Obama dhe Hillary Clinton u veshën në vjollcë në inaugurim?

Zëvendëspresidentja e zgjedhur Kamala Harris, ish-Zonja e Parë Michelle Obama dhe ish-sekretarja e shtetit Hillary Clinton, kanë dërguar gjithnjë mesazhe simbolike përmes veshjeve të tyre.

Sot, megjithatë në ditën e përurimit të Joe Biden dhe Kamala Harris, duket se të tri gratë e fuqishme bënë një deklaratë të përbashkët.

Derisa u futën në ndërtesën e Kapitolit përpara ceremonisë së sotme të betimit, secila prej tyre u shfaqën në ngjyrë të vjollcë. Zgjedhja e tri grave për ngjyrën e njëjtë – e cila është një përzierje e mirëfilltë e ngjyrave të partisë politike, e kuqja dhe blu – mund të ketë qenë me të vërtetë e qëllimshme, duke marrë parasysh kuptimin e ngjyrës për të ngjallur një ndjenjë solidariteti dhe uniteti, sipas The Hill, transmeton KultPlus.

Për momentin historik, Harris zgjodhi një fustan e pallto të tillë nga stilisti Christopher John Rogers, të cilën e kompletoi me dorëza lëkure e take të po së njëjtës ngjyrë.

Clinton zgjodhi një kostum gjithashtu të vjollcë, me një xhaketë elegante të gjatë, një shall lejla e këpucë të zeza.

Obama në anën tjetër zgjodhi një kostum me nuancë kumbulle me një rrip nga Sergio Hudson, një tjetër stilist amerikan që kujdeset vazhdimisht për dukjen e 57 vjeçares.

Ngjyra vjollcë ka një kuptim jashtëzakonisht të veçantë për Kamala Harris, pasi shpesh shfaqej e tillë edhe gjatë fushatës për të nderuar Shirley Chisholm, e cila e frymëzoi karrierën e zëvendëspresidentes së re. / KultPlus.com

Njihuni me Jill Biden, zonjën e parë të Shteteve të Bashkuara të Amerikës

E lindur me 3 maj të vitit 1951, Jill Tracy Biden është parimisht një edukatore amerikane e cila ka qenë zonja e dytë e Shteteve të Bashkuara të Amerikës nga viti 2009 deri në 2017.

Jill është martuar me tashmë Presidentin e ri të ShBA-së Joe Biden, ku me rastin e inaugurimit të sotëm, ajo edhe zyrtarisht e merr titullin si zonja e parë e shtetit për katër vjetët e ardhshme.

Zonja e parë ka lindur në New Jersey dhe është rritur në Pensilvani, teksa është martuar me Joe Biden në vitin 1977, duke u bërë njerka e dy djemve të Bidenit nga martesa e parë.

Jill dhe Joe gjithashtu kanë edhe një vajzë së bashku, të quajtur Ashley, e cila ka lindur në vitin 1981.

Çifti ishte takuar në vitin 1975 teksa dy vite më vonë edhe e kanë kurorëzuar dashurinë e tyre me martesë.

Nga viti 1993 deri në 2008, tashmë Zonja e parë ishte pjesë e stafit të kolegjit publik “Delaware Technical and Community”, teksa nga viti 2009 ishte profesoreshë e gjuhës angleze në Kolegjin “Northern Virginia Community”, duke u bërë kështu edhe gruaja e parë e një zëvendëspresidenti që ka mbajtur një punë me rrogë, përgjatë detyrës zyrtare të bashkëshortit.

Jill është gjithashtu themeluese e organizatës jofitimprurëse “Biden Breast Health Initiative”, bashkë themeluese e programit “Book Buddies” si dhe të fondacionit me emrin e njëjtë “Biden Foundation”.

Që nga kandidatura zyrtare e Joe Biden si president në prill të vitit 2019, Jill Biden ishte përkrahëse dhe ka kontribuuar në kampanjën përkrah bashkëshortit, duke e mbështetur vazhdimisht drejt udhëheqjes së shtetit amerikan, që sot zyrtarisht të dy bashkë do ta marrin titullin si të parët e vendit. / KultPlus.com

Bideni do ta propozojë një rrugë tetëvjeçare drejt shtetësisë amerikane për imigrantët

Presidenti i zgjedhur i SHBA-së, Joe Biden, planifikon ta publikojë një projektligj për imigracion në ditën e tij të parë në administratë, duke shpresuar që të ofrojë një rrugë tetëvjeçare drejt shtetësisë amerikane për rreth 11 milionë qytetarë që jetojnë në SHBA pa status ligjor, shkruan agjencia AP.

Është një ndryshim i madh nga administrata e Donald Trump, që kishte politika të ashpëra ndaj imigracionit.

Ky legjislacion e vë Bidenin në rrugën e duhur për të mbajtur premtimin e dhënë ndaj votuesve latinë dhe komuniteteve tjera imigrantë gjatë fushatës parazgjedhore. Po ashtu do të jetë një dallim i madh i politikave, pasi nën presidentin Donald Trump pati politika kufizuese dhe po ashtu dëbime masive.

Ky projektligj ofron rrugën më të shpejt drejt shtetësisë për ata që jetojnë pa status ligjor, por pritet ta ketë të vështirë kalimin në Kongres, pasi nuk pritet të ketë përkrahjen e republikanëve.

Projektligji pritet të prezantohet nesër, kur Biden të marrë drejtimin.

Nën legjislacionin, ata që jetojnë në SHBA nga 1 janari i vitit 2021, pa status ligjor do të kenë një rrugë pesëvjeçare drejt një statusi të përkohshëm ligjor, apo kratonit të gjelbër, nëse kalojnë gjitha kontrollet e nevojshme, paguajnë taksat dhe plotësojnë kushtet tjera bazë. Nga atje, janë edhe tri vjet drejt natyralizimit, nëse ata vendosin të ndjekin rrugën drejt marrjes së shtetësisë.

Pikërisht të hënënë, presidenti i Meksikës, Andres Manuel Lopez Obrador, i ka bërë thirrje SHBA-së të bëjë reforma të mëdha në politikat e imigracionit, pasi mijëra migrantë janë bllokuar nga policia në Guatemala.

Lopez Obrador ka thënë se shpreson që presidenti i zgjedhur i SHBA-së, Joe Biden, të pajtohet të punojë me Meksikën dhe shtetet tjera në këtë çështje.

Rreth 7000 migrantë, kryesisht nga Hondurasi, janë futur në Guatemala. Ata shpersojnë të udhëtojnë për në Meksikë e nga atje të arrijnë në SHBA. / KultPlus.com

‘Kosherja’ që bëri bashkë shqiptarët në SHBA në vitin 1930 (FOTO)

Një prej shoqatave më të rëndësishme të komunitetit shqiptar në SHBA është “Qendra Shqiptare e Nju Jorkut”.

Pararendëse e saj ishte Shoqëria “Kosherja” e themeluar në vitin 1930, si një organizatë, e cila kishte për qëllim të mbante gjallë rrënjët, gjuhën dhe kulturën shqiptare.

Më 1948 ky organizim do të merrte emrin “Qendra Shqiptare e Nju Jorkut” dhe presidenti i parë do të ishte Musa Hajro, i cili u pasua nga Asim Lulo, Eqerem Ruca, Lemi Kokalari, Myfit Demirali, Drita Kokalari.

Një nga veprimtaritë më të suksesshme të Qendrës ishte hapja e shkollës “Kosherja”, ku fëmijët e emigruar mësonin të shkruanin dhe lexonin gjuhën shqipe.

Por Qendra organizonte gjithashtu një sërë veprimtarish kulturore dhe artistike. Një nga ngjarjet më të shënuara është vënia në skenë e dramës “Besa” të Sami Frashërit më 30 shtator 1950, ku rolet e personazheve do të luheshin nga vetë anëtarët e shoqatës.

Për të ruajtur lidhjet mes anëtarëve dhe familjeve të komunitetit shqiptar në Nju Jork, Qendra organizonte çdo vit piknikë, ose udhëtime me anije.

Por përveç veprimtarive me ndikim për komunitetin shqiptar në Amerikë, pas vitit 1990, “Qendra Shqiptare e Nju Jorkut” u aktivizua fuqishëm për të ndihmuar shqiptarët që jetonin në atdheun e tyre, të cilët ndodheshin në gjendje tragjike dhe po përjetonin një krizë humanitare, pas çlirimit nga diktatura komuniste.

Qendra Shqiptare ishte e para që u vu në lëvizje dhe u bë burimi kryesor i sigurimit të fondeve për “Fondacionin Shqiptar të Ndihmës” dhe rezultati ishte sigurimi dhe dërgimi në Shqipëri i ndihmave në ilaçe dhe mjete spitalore me vlerë mbi 10 milionë dollarë.

I njëjti angazhim i Qendrës ndodhi edhe për të ndihmuar kalimin e krizës humanitare që pasoi genocidin serb në Kosovë.

Kjo foto është realizuar në piknikun e organizuar nga Qendra Shqiptare e Nju Jorkut më 15 korrik 1962. Foto kortezi e “Muzeu Kokalari”./ KultPlus.com

Dua Lipa i quan terroristë protestuesit pro-Trump

Situata në SHBA ka dal jashtë kontrollit pasi që protestuesit pro-Trump sulmuan ndërtesën e Kapitolit.

Dua Lipa ka reaguar  me postime në rrjete sociale në kritika drejtuar ish presidentit amerikan.

Ajo i quan terrorist protestuesit që kanë shkaktuar trazira duke u lënduar një numër personash, madje edhe policia.

Ndryshe, mbështetësit e Donald Trump hynë në ndërtesën e Kongresit, që u detyrua të ndërpriste urgjentisht një seancë të jashtëzakonshme që synonte të vërtetonte fitoren e Joe Biden në zgjedhjet presidenciale./ KultPlus.com

Gallup: Donald Trump dhe Michelle Obama personat më të admiruar në SHBA

Presidenti amerikan Donald Trump dhe ish-Zonja e Parë Michelle Obama janë burri dhe gruaja më e admiruar në Shtetet e Bashkuara për vitin 2020, sipas një sondazhi vjetor nga “Gallup”.

Michelle është gruaja më e admiruar për të tretin vit radhazi, ndërsa Trump mundi bashkëshortin e saj, ish-presidentin Barack Obama, për herë të parë këtë vit, me 18 % të të anketuarve që thanë se e admironin më shumë Trumpin.

Për krahasim, vetëm 15 përqind e amerikanëve thanë se admironin më shumë ish-presidentin Obama.

Përgjigjet u ndanë kryesisht përgjatë vijave të partisë, me Republikanët që thanë se admironin Trump dhe Demokratët Obaman.

Zëvendëspresidentja e zgjedhur, Kamala Harris, u listua si gruaja e dytë më e admiruar në SHBA.

Në përgjithësi, 6 % e amerikanëve e votuan presidentin e zgjedhur Joe Biden dhe 3 % specialistin kryesor për Sëmundjet Infektive, Anthony Fauci./ /atsh/ KultPlus.com

Libri i Barack Obamas thyen rekorde, mbi 3 milionë kopje në vetëm një muaj

Libri “A Promised Land” që në shqip përkthehet “Një tokë e premtuar” ku ish-presidenti amerikan, Barack Obama ka shkruar kujtimet e tij është shitur në mbi 3 milionë kopje, pavarësisht se ka vetëm një muaj që ka dalë në treg.

Shtëpia botuese “Crown” ka njoftuar se shitjet e “A Promised Land” kanë arritur në 3.3 milionë në SHBA e Kanada dhe se libri përparon drejt rrugës për t’u bërë një prej kujtimeve të ish-presidentëve që është shitur më shumë në kohët moderne.

Në “A Promised Land” i cili është një nga dy vëllimet e planifikuara, trajtohet zgjedhja e Obamas si president në vitin 2008 dhe periudha e parë e tij.

Ndërkohë që ende nuk është deklaruar ndonjë datë për botimin e vëllimit të dytë, përcjell tch.

Librat “Dreams from My Father” dhe “The Audacity of Hope” që Barack Obama ka shkruar para se të bëhej president kanë arritur shitje në mbi 1 milion kopje.

Ndërsa librat e ish-presidentëve “My Life” i Bill Clinton dhe “Decision Points” i George W. Bush arritën shitje nga 3.5 deri në 4 milionë kopje.

Libri “Becoming” i ish-zonjës së parë, Michelle Obama, bashkëshortes së Obamas është shitur në mbi 8 milionë kopje në Amerikën e Veriut që nga viti 2018 kur ai doli në treg. / KultPlus.com

Kolegji Elektoral konfirmon Bidenin president

Lansing-Michigan, SHBA, 14 dhjetor (Reuters) – Shtet pas shteti, kolegjet elektorale kanë konfirmuar të hënën demokratin Joe Biden për president të ardhshëm të Shteteve të Bashkuara të Amerikës, duke i dhënë fund përpjekjes së kahershme të Donald Trumpit për t’i përmbysur rezultatet zgjedhore.

Anëtarët e Kolegjit Elektoral nga Michigani, Pennsylvania, Georgia, Wisconsini dhe Arizona – shtet ky vendimtar që Bideni e fitoi dhe për të cilin Trumpi ka ngritur pa sukses proces gjyqësor – kanë dhënë votat e tyre elektorale në favor të ish-nënpresidentit amerikan.

Votat e Kolegjit Elektoral, rëndom një formalitet, kanë fituar një rëndësi të madhe sivjet shkaku i pretendimeve të vazhdueshme të Trumpit për mashtrime të gjithmbarshme në procesin zgjedhor të 3 nëntorit.

Rezultatet kanë treguar për javë me radhë se Bideni ka fituar 306 vota të Kolegjit Elektoral – duke e kaluar pragun e nevojshëm prej 270 sosh për fitore – pas katër vjetësh të turbullt nën udhëheqjen e republikanit Trump. Me këtë, Bideni dhe bashkëgaruesja e tij, Kamala Harris, do të marrin drejtimin e Shtëpisë së Bardhë më 20 janar.

Kalifornia, shteti amerikan me popullatën më të madhe, ia gjeneroi Bidenit 270 votat e nevojshme të Kolegjit për fitore të përgjithshme.

Pas kësaj Bideni, 78-vjeçar, u konfirmua si presidenti më i shtyrë në moshë i SHBA-së.

Ai ka mbajtur edhe një fjalim vonë të hënën, sipas kohës lokale, lidhur me votat e Kolegjit dhe ka shpalosur qëndrimin “për fuqizimin dhe qëndrueshmërinë e demokracisë amerikane”.

Elektorët në Arizona, shtet ky të cilin Trumpi e humbi në garën e sivjetme presidenciale pasi që e kishte fituar më 2016, ia konfirmuan 11 votat e shtetit Bidenit.

“Derisa do të ketë të tillë që do të shqetësohen se kandidati i tyre nuk ka fituar, është skajshmërisht joamerikane dhe e papranueshme që ngjarja e sotme të jetë diç më pak se një traditë e çmuar, e mbajtur me nderim dhe në festë”, ka thënë sekretarja e Shtetit të Arizonës, Katie Hobbs, gjatë votimit.

Demokratja Hobbs ka thënë se pretendimet e Trumpit për mashtrime zgjedhore kanë “hapur rrugën për kërcënimet me dhunë kundër meje, zyrës time dhe atyre që ndodhen në këtë dhomë”, duke u bërë jehonë raporteve të ngjashme për kërcënime dhe frikësim në shtetet e tjera amerikane.

Nën sistemin e ndërlikuar që daton qysh nga vitet 1780, një kandidat zgjidhet president i SHBA-së jo duke e fituar shumicën e votës popullore, por nëpërmjet sistemit të Kolegjit Elektoral, i cili i përcakton votat elektorale të 50 shteteve dhe të Distriktit të Columbias, kryesisht bazuar në madhësinë e popullatave të tyre.

Elektorët janë kryesisht besnikë të partive, të cilët e përfaqësojnë kandidatin fitues në shtetet e tyre, me përjashtim të Maines dhe Nebraskas, që mund t’ua japin votat e Kolegjit Elektoral edhe një kandidati tjetër.

Trump ka paralajmëruar muajin e shkuar se do të largohej nga Shtëpia e Bardhë po qe se Kolegji Elektoral voton për Bidenin, por që atëherë ka vazhduar me fushatën e tij të pashembullt për rrëzimin e fitores së tij, duke ngritur padi të pasuksesshme për të kërkuar numërim të sërishëm të votave nëpër shtete.

Gjasat që votimi i së hënës ta sprapste fitoren e Bidenit nga 3 nëntori ishin pothuajse të barabarta me zero. Pas përmbylljes së votimit në Kolegj, e vetmja kartë e mbetur e Trumpit për përmbysjen pothuajse të pamundur të rezultatit do të mbetet ajo për ta bindur Kongresin që të mos i certifikojë rezultatet më 6 janar.

Në zgjedhjet e vitit 2016, Trumpi i kishte fituar votat e Kolegjit Elektoral, ndonëse i kishte humbur ato popullore ndaj demokrates Hillary Clinton me një dallim prej afro 3 milionë votash./ KultPlus.com