Autor: KultPlus

Shtëpia Botuese “Faik Konica” ka botuar kompletin me dhjetë vepra të shkrimtarit të njohur Ibrahim Kadriu, shkruan KultPlus.

Ky botim është prezantuar në shenjë të 77 vjetorit të lindjes dhe 60 vjetorin e krijimtarisë së shkrimtarit Ibrahim Kadriu.

Në këtë komplet të veprave, KultPlus ka mësuar se janë këta tituj: “Kohë e varur në litar”, “Kroi i ilaçit”, “Kalorësi i Karadakut”, “Në vajhall”, “Kapërcimi i ujit të madh”, “Misioni rus”, “Pjella e dreqit”, “Përtej binarëve”, “Varri i shitur në Damask” dhe “Ata dy të burgjeve”.

Pas publikimit të kompletit të veprave të shkrimtarit Ibrahim Kadriu, shkrimtari dhe publicisti Jusuf Buxhovi ka thënë se Ibrahim Kadriu është njëri ndër shkrimtarët më të dalluar të letërsisë sonë bashkëkohore.

“Ibrahim Kadriu është njëri ndër shkrimtarët më të dalluar të letërsisë sonë bashkëkohore, me një opus të gjerë, veçmas në prozë, me dhjetëra romane, ndër cilët gjithsesi duhet dalluar “Misioni rus” i përkthyer në disa gjuhë si dhe “Kalorësi i Karadakut”, që trajtojnë tema të një dimensioni të veçantë socio-historik. Kompleti prej dhjetë veprave, pa mëdyshje se paraqet një përfaqësim autorial të punës dhe angazhimit gjashtëdhjetëvjeçar të shkrimtarit, por kjo nuk lë anash edhe veprat tjera të shumta të Kadriut, të cilat zënë një vend të merituar në sfondin e gjithmbarshëm të letërsisë shqipe”, ka thënë Buxhovi./ KultPlus.com

Annie Ernaux është ndër shkrimtaret më të rëndësishme franceze të letërsisë bashkëkohore. Është nderuar me shumë çmime letrare, ndër të cilat “Marguerite Duras”, “Prix de la langue française” dhe “Premio Strega Europeo”, shkruan KultPlus.

Nga Shtëpia Botuese “Dudaj” janë botuar tre libra të kësaj shkrimtareje: “Kujtime vajze”, “Pasion i thjeshtë” dhe “Vendi i babait”.

Annie Ernaux ka lindur në Lilebonne në vitin 1940 dhe është një nga zërat me autoritet në skenën kulturore franceze. Librat e saj janë përkthyer dhe botuar në të gjithë botën

Një nga librat e përkthyer në shqip nga shkrimtarja Annie Ernaux është libri “Kujtime vajze” i cili është botuar nga Shtëpia Botuese “Dudaj”.

Romani “Kujtime vajze”, është një reflektim i fuqishëm mbi shkrimin dhe një epokë thelbësore ekzistence, i cili flet për kujtimet e një vajze të vitit 1958.

Në librat e saj ajo ka zbuluar një metodë të re dhe mundësinë që të jep autobiografia për ta shndërruar rrëfimin e jetës në një instrument kërkimi social, politik dhe ekzistencial./ KultPlus.com

Elvi Sidheri

Poeti dhe muzikanti Sylë Maxhera, mbrëmë, në mjediset e KultPlus Caffe Gallery, promovoi dy librat e tij të rinj, Zana dhe Rrugëve të Botës.

Ky autor me krijimtari të pasur letrare dhe muzikore, si përherë vjen nga Madridi, kryeqyteti i Spanjës, ku jeton prej disa dhjetëvjeçarësh, për të sjellë në Prishtinë artin e tij të shkruar, kësaj radhe në formën e dy librave të krijuar së fundmi, të cilët i përkasin fushës së poezisë, mjeshtëria e tij parësore në letërsi, dhe prozës, një risi për Sylë Maxherën, e palëvruar më parë prej tij në shqip.

Zana, novela e re në prozë nga ky shkrimtar, na ofron një histori prekëse, ky ndjenjat e fuqishme dhe dashamirësia njerëzore, fatmirësisht përmbyllin një cikël vuajtjesh që përndryshe do të kishin pasur një fund të dhimbshëm, kurse Rrugëve të Botës, përbën vazhdimësinë në vargje, të frymëzimit poetik të poetit Sylë Maxhera, i cili përmes disa librave të tjera të mëparshëm, ngaherë është shprehur me bukuri të rrallë poetikisht.

Ndërkaq, pas novelës në prozë, të titulluar Los Inocentes (Të Pafajshmit), të botuar në Madrid disa muaj të shkuara, një krijimi origjinal të tij në prozë, të shkruar drejtpërdrejt në spanjisht, gjithsesi, sikundër e theksuam më sipër, sprova e tij në prozë, përbënte edhe risinë e veçantë të këtij autori në shqip, nëpërmjet novelës Zana.

Për ta kremtuar këtë ngjarje të vyer letrare, dhe gjithashtu edhe vetë autorin e këtyre dy librave, ishin mbledhur njerëz të ndryshëm të letrave dhe artit nga Prishtina, Tirana, e jashtë trojeve shqiptare, miq e dashamirës të autorit, Sylë Maxhera.

I pari që e mori fjalën për ta nderuar autorin, dhe njëherësh për të folur lidhur më dy librat e tij të rinj, në mënyrë tejet shtjelluese dhe të kthjellët, ishte Dan Ibrahimi, një ndër poetët më burimorë dhe të spikatur në skenën e poezisë së Kosovës në ditët e sotme, po ashtu edhe redaktor i novelës Zana.

Vlerësimet, këndvështrimet dhe përshkrimet e Dan Ibrahimit, u ofruan të pranishmëve frymëzimin e duhur për t’i njohur mëtëjshëm këto dy botime, krahas edhe vetë krijimtarisë së deritanishme të autorit, Sylë Maxhera, duke ngjallur më tepër kërshërinë për këtë poet, falë këtyre fjalëve dhe këndvështrimit tejet profesional.

Më pas fjalën e mori miku i autorit, shkrimtari dhe përkthyesi shumëgjuhësh Elvi Sidheri, i cili u përqendrua në kontributin e Sylë Maxherës në gjallërimin e jetës letrare të Prishtinës me praninë e tij dhe poezitë, prozën e muzikën e lëvruar pareshtur prej tij.

Më tutje, nuk munguan të pranishmit në mjediset e KultPlus Caffe Gallery, të cilët dëshiruan të thoshin fjalët e tyre për autorin dhe dy librat e tij, duke nisur nga botuesi Hajdar Fejzullahu, i shtëpisë botuese Lena Graphic, që nuk i kurseu fjalët më të mira për Sylë Maxherën, ashtu sikundër edhe poeti dhe botuesi Lan Qyqalla, botuesi më i vjetër në Kosovë, Abdullah Zeneli, i shtëpisë botuese Buzuku, me humorin e tij ironik si gjithmonë, etj.

Për autorin dhe letërsinë e muzikën e tij, folën po ashtu edhe gazetarja e njohur e Radio Kosovës, autore e disa librave me intervista të kolosëve të letrave shqipe, Vera Pelaj, dhe gazetari e fotografi artistik anglez Marc Perry, i cili e vlerësoi autorin, Sylë Maxhera, për dimensionet multikulturore të krijimtarisë së tij.

Mbrëmja vazhdoi mes muzikës, tingujve të kitarës, haresë dhe atmosferës artistike, duke u shpërfaqur më tutje edhe ana muzikore e Sylë Maxherës, i cili gjithashtu shquhet edhe për lëvrimin e pandalshëm në muzikë, si kitarist, tekstshkrues e këngëtar tejet i zoti.

KultPlus ishte si përherë mikpritës i këtij aktiviteti mirëfilli artistik, duke u shndërruar sërish në vendin e duhur ku artistët t’i gëzohen artit të tyre, duke u ndier si në shtëpinë e tyre./ KultPlus.com