Këngëtarja Dua Lipa, është në rrugën e duhur për t’u bërë ylli më i pasur femër i popit në Britani pasi bleu të drejtat për publikimin e gjithë punës së saj të deritashme.
Sipas “The Sun”, ajo këtë biznes e nisi me babanë e saj.
Dua ka krijuar një kompani, “Radical 22 Publishing Limited”, në pronësi të përbashkët të saj dhe babait të saj, Dukagjinit, i njohur si Dugi, për të menaxhuar të gjitha asetet e saj komerciale.
Kjo informatë vjen vetëm disa ditë pasi ajo njoftoi se do të ndërpresë të gjitha lidhjet me ish-kompaninë menaxhuese TaP, raporton “The Sun”, transmeton Klankosova.tv.
Një burim tha: “Është një lëvizje tepër e guximshme dhe një deklaratë e madhe e qëllimit për Dua Inc. Dua dëshiron të rimarrë kontrollin e karrierës së saj dhe Dugi është shumë praktik”.
“Ai ndjeu sikur ajo po jepte një përqindje shumë të lartë të të ardhurave të saj dhe pasi u bë menaxheri i saj, ai ndjeu se hapi tjetër logjik ishte të hynte si një partner zyrtar biznesi”.
“Ashtu si kur një futbollist i Premier League përdor vëllain e tij si agjent, ka të bëjë me mbajtjen e familjes afër dhe mbajtjen e kontrollit”.
“Disa njerëz në industri po bëjnë krahasime me Britney Spears dhe babanë e saj Jamie – Dugi është padyshim shumë kategorik – por absolutisht ai ka në zemër interesat e saj më të mira”, shtoi burimi.
Edhe pse Dua e bëri këtë veprim për arsye të ndryshme, megjithatë na bën të kujtojmë grindjen e gjatë të Taylor Swift me Scooter Braun pasi firma e tij bleu regjistrimet kryesore të gjashtë albumeve të saj të parë në 2019 – kohë kur ajo ka ri-regjistruar të gjashtët për të rimarrë pronësinë e këngëve.
Burimi tha për strategjinë e re të Duas: “Në thelb, ky veprim rezonon te Taylor Swift – një yll i madh femër pop që rishkruan narrativën dhe fiton para sipas kushteve të saj”.
“Derisa të mbushë 40-vjeç, ajo do të bëhet miliardere”.
Nesër ajo rikthehet me një këngë të re shumë të përfolur, Houdini, që do të lansohet njëkohësisht në Londër, Tokio dhe Los Anxhelos.
Albumi i saj i tretë do të publikohet vitin e ardhshëm dhe vjen pas një turneu të shitur me 91 shfaqje në ShBA dhe Australi, me të ardhura prej më shumë se 80 milionë funte. /Klankosova.tv / KultPlus.com
Po vazhdojnë koncertet e radhës të edicionit të XXII të festivalit Kosova KamerFest 2023.
Më datë 10 nëntor, në ora 19:00 në Amfiteatrin e Bibliotekës Qendrore të Universitetit të Prishtinës do të mbahet koncerti me Finalistët e Garave ArsKosova 2023.
Diell Pasha, Ledion Halitaj, Elisa Fusha, Sibora Resyli, Ajas Vitaku, Bleta Martinaj, Vesa Shala, Erika Sinani, Ledian Shala, Eriona Krasniqi dhe Urim Maliqi, janë artistët që do të performojnë në këtë koncert i cili po pritet me padurim edhe nga drejtoresha artistike e festivalit, Sihana Badivuku.
Ndërsa, koncerti i fundit i këtij edicioni, do të mbahet më datë 13 nëntor, ora 20:00, në Amfiteatrin e Bibliotekës Qendrore të Universitetit të Prishtinës.
Në këtë koncert do të prezantohen artistët eminent austriak, violinistin Johannes Fleischmann dhe pianistin Philipp Scheucher.
Ky koncert mbështetet nga Ambasada Austriake në Prishtinë. / KultPlus.com
PEN Qendra e Kosovës ka filluar organizimin e mbrëmjeve njëjavore me titull “Prishtina e Artit dhe Kulturës”. Kjo javë kulturore e cila nisi më datë 6 nëntor do të zgjatë deri më 10 nëntor në KultPlus Caffe Gallery.
Gjatë këtyre mbrëmjeve kulturore po shpalosen trajtesa të ndryshme mbi kryeqytetin.
Sot, gjithashtu do të trajtohen tri tema me interes për opinionin.
Me kumtesa do të paraqiten: Ibrahim Berisha – Prishtina ndërmjet kujtesës dhe harresës, Dije Demiri-Frangu – Prishtina e poetëve dhe Osman Gashi – Tri vepra dhe tri variacione të Prishtinës në letërsi.
Mbrëmja fillon në orën 17:00 dhe mbahet në KultPlus Caffe Gallery.
Kujtojmë se kjo javë kulturore është mbështetur nga Drejtoria e Kulturës e Komunës së Prishtinës. / KultPlus.com
Kur mendoni për vendet më të bukura evropiane për të kaluar pushimet, ndoshta mendoni për vende si Franca, Italia dhe Greqia. Shqipëria, e cila regjistroi një rritje rekord në sektorin e turizmit, ndoshta do t’ju befasojë, shkruan gazetarja Tor Brierley në një artikull të botuar në revistën e udhëtimeve “Travel off Path”.
Numri i turistëve në Shqipëri u rrit me 56% këtë vit, krahasuar me vitin 2019. Shqipëria u rendit në krye të listës duke lënë pas destinacionet më të njohura evropiane si Kroacia, Franca, Greqia dhe Spanja.
Ja pse Shqipëria është destinacioni me rritjen më të shpejtë të turizmit në Evropë.
Një histori e pasur Historia e Shqipërisë është po aq e pasur sa ajo e Greqisë dhe Italisë fqinje.
Për pesë shekuj Shqipëria u sundua nga Perandoria Osmane përpara se të shpallte pavarësinë në 1912. Më pas, pas Luftës së Dytë Botërore, Shqipëria u bë një shtet stalinist.
Kryeqyteti i Tiranës krenohet me arkitekturën mahnitëse dhe një ofertë të madhe muzeumesh dhe galerish. Në Berat do të gjeni një kështjellë të shekullit të XIII.
Udhëtarë nga e gjithë bota vizitojnë sitin e trashëgimisë botërore të UNESCO-s, Butrintin.
Katër vende të ndryshme në Shqipëri janë përfshirë në listën e Trashëgimisë Botërore të UNESCO-s në Shqipëri, ndërsa katër vende të tjera janë aktualisht në listën shqyrtimeve të organizatës.
Adhuruesit e historisë tërhiqen nga Shqipëria për shkak të gamës së gjerë dhe të larmishme të ngjarjeve historike që mund të eksplorojnë këtu.
Ashtu si vendet e tjera të Mesdheut, Shqipëria ka verë të ngrohtë dhe të thatë të ndjekur nga një dimër i butë dhe i lagësht. Kjo do të thotë se muajt e dimrit ofrojnë një klimë të shkëlqyer për të vizituar dhe eksploruar vendin.
Bregdeti i bukur Shqipëria konsiderohet shpesh një perlë e fshehur e Mesdheut. Ajo ndodhet në pjesën juglindore të Adriatikut dhe në pjesën verilindore të detit Jon.
Shqipëria krenohet me ujërat e saj bruz dhe plazhet me rërë të artë. Ajo ndodhet midis Italisë dhe Greqisë dhe ofron vendpushimeve idilike të plazhit.
Me një vijë bregdetare mahnitëse prej 280 miljesh, disa nga plazhet më të mira në Shqipëri përfshijnë plazhin e Dhërmiut me guralecë dhe qytetin e zhurmshëm të plazhit të Himarës. Riviera shqiptare është shtëpia e lagunave dhe plazheve me rërë.
Peizazhe të mahnitshme Nëse nuk jeni të interesuar për pushime në plazh, atëherë ka shumë arsye pse duhet të vizitoni Shqipërinë. Peizazhet e Shqipërisë janë të ndryshme dhe mahnitëse.
Veriu i vendit është i egër dhe i paeksploruar, duke e bërë destinacionin perfekt për adhuruesit e aventurave. Eksploruesit e natyrës mund të shijojnë parqet kombëtare mahnitëse të Thethit dhe Llogarasë. Këto janë pika turistike të shkëlqyera për shëtitje në verë dhe për ski ose për shëtitje në dimër.
Gjatë muajve të dimrit, majat e mbuluara me dëborë të Alpeve Shqiptare janë një vend i mrekullueshëm për sportet dimërore dhe një vend shumë më i përballueshëm krahasuar me Alpet e Francës apo Italisë.
Një destinacion turistik përgjatë gjithë vitit Megjithëse muajt e verës konsiderohen si kulmi i sezonit në Shqipëri, vendi është një destinacion turistik përgjatë gjithë vitit. Në fakt, shumë udhëtarë besojnë se koha ideale për të zbuluar Shqipërinë është në muajt jashtë sezonit.
Numri i turistëve në vend është më i ulët, që do të thotë se shumë nga atraksionet do t’i keni për vete. Kjo është koha ideale për të eksploruar natyrën autentike të vendit.
Muajt midis shtatorit dhe nëntorit janë koha më e mirë për të vizituar Shqipërinë nëse doni të shijoni ecjet, çiklizmin, vizitat turistike dhe sportet ujore.
Pavarësisht se në cilën kohë të vitit vizitoni Shqipërinë, vendi mbetet një nga destinacionet më të përballueshme në Evropë. /atsh / KultPlus.com
Një diskutim i frytshëm, është realizuar mbrëmë në nisje të javës kulturore “Prishtina e Artit dhe Kulturës”, nga panelistët Jusuf Osmani, Florina Jerliu dhe Artan Krasniqi, mbi disa tema që lidhen me qytetin dhe historinë e kryeqendrës, shkruan KultPlus.
Në ambientet e KultPlus CaffeGallery, Pen Qendra e Kosovës filloi zhvillimin e kësaj jave kulturore nën moderimin e Ibrahim Berishës, i cili fillimisht i falënderoi të pranishmit për pjesëmarrje, për të vazhduar më pas me arsyet e realizimit të kësaj ngjarjeje, duke thënë që Prishtina historikisht ka qenë një qendër e Arit dhe e Kulturës dhe si e tillë konsiderohet një lloj identiteti i kulturor i shqiptarëve.
“Ka shumë tema të cilat i përkasin kësaj fushe por bazuar në monografitë e deritashme, qasjet që janë bërë nuk kanë qenë përmbledhëse, dhe do të duhet sigurisht edhe shumë punë për të parë Prishtinën drejt në shumë aspekte, nisur nga aspekti historik, urban, arkitektonik, artistik, letrar, muzikor, teatror, komunikues, administrativ etj. Temat kryesisht fokusohen në këto aspekte të cilat ndoshta do të ndriçojnë, apo do të krijojnë një hap të ri, për të vazhduar për një ndriçim ende më të madh të vlerave, të kulturës dhe artit në Prishtinë”, ka thënë Berisha.
Ai më tutje shprehu shqetësimin e tij për mungesën e një Monografie të mirëfilltë të kryeqytetit dhe mizore i quajti informacionet mbi Prishtinën, në enciklopeditë e ish- Jugosllavisë si dhe përfaqësimin e kulturës dhe artit të Prishtinës në to.
“Është e habitshme se si sot në vitin 2023, një shtet si Kosova të mos ketë monografi për kryeqytetin. Kam hulumtuar të gjitha monografitë dhe enciklopeditë në ish-Jugosllavi për Prishtinën, dhe është mizore përfaqësimi i kulturës dhe artit në Prishtinë. Dominojnë 4-5 objekte, Graqanica, Tyrbja e Sulltan Muratit, hapësira e Betejës së Kosovës etj.”, ka thënë më tutje Berisha, për t’i lënë radhë panelistes Florina Jerliut me temën “Prishtina-Arkitektura e qytetit”.
Florina Jerliu për të pranishmit, të cilët dëgjonin me shumë kuriozitet dha një kronologji të ndërtimit të qytetit të Prishtinës në periudha të ndryshme historike, në varësi të të cilave edhe rrodhën konotacionet Prishtinë Osmane , Arkitekturë Islame, Arkitekturë Evropiane etj.
“Në fakt Prishtina është një rrëfim i shkëlqyer në kuptimin e Diversitetit të Arkitekturës që ka, pa marrë parasysh nëse kemi të bëjmë me numra të vegjël të ndërtesave, të stileve të caktuara që kanë mbijetuar në vend. Për shembull, Prishtina përgjatë historisë ka krijuar disa atribute identitare që ishte dashur të na informojnë neve sot kur mendojmë për të planifikuar qytetin. P.sh Prishtina dikur ka qenë qytet i kopshteve. Udhëpërshkruesit flasin për oborre, kopshte të gjera, pemishte me bollëk, shtëpi të bukura, me arkitekturë të qytetit dhe tipologji urbane që ndjek trendin e kohës dhe që është shtrirë në gjeografinë ballkanike, në atë kohë natyrisht të ndikuara nga kultura Osmane e shekullit XVI e këtej”, ka thënë ajo.
Panelistja Jerliu, më tej tregoi se Prishtina ka qenë qytet i dy lumenjëve dhe 50 shatërvanëve me një sistem të fisnikëruar të çesmeve, që me pretekstin e ndërtimit sistemi socialist, kishte vendosur të formonte arkitekturën e re të qytetit socialist, duke varrosur qytetin e lumenjëve në qytet të thatë.
Pushtimet e njëpasnjëshme dhe prezenca e sundimtarëve dhe mbretërve të ndryshëm në këtë rajon ka bërë që arkitektura dhe stili i jetës të ndryshoj, mirëpo gjithmonë në dëm të Prishtinës dhe qytetarëve të saj.
“Pas ikjes së Osmanëve, erdh mbretëria SKS e ish-Jugosllavisë, e cila e rikthen rëndësinë në periferi, shkon prapa. Qyteti riaktivizohet në periferi, themelon kishat dhe fillon krijimin e vendbanimeve të reja, të tipit Novosellë. Rëndësia e këtij qyteti vjen deri në pikën që Graçanica të bëhet kryeqytet, e Prishtina në atë kohë të ishte nën Graçanicë”, ka thënë Jerliu.
Ajo në fund tha se restaurimi i objekteve që llogariten pjesë e trashëgimisë së qytetetit nuk është efektiv, pa ndërtimin e narrativave të drejta mbi historinë e tyre, të cilat pushtuesit e ndryshëm edhe i kanë shtrembëruar.
Ndërsa, panelisti tjetër Jusuf Osmani, prezantoi temën “Prishtina, qendër administrative kulturore”, i cili tha se ekzistojnë burime të pabesueshme administrative për Kosovën në shtetin e Turqisë, me të cilat mund të bëhej një Monografi shumë e pasur e Prishtinës.
“Për Prishtinën ka shumë burime. Aq shumë kemi gjetur burime në Turqi, sa është e pabesueshme sa burime ka. Tash është lehtë të hulumtosh në arkiva të Turqisë sepse janë të digjitalizuara. Ka shumë projekte, skica të vendbanimeve, qyteteve por edhe të minierave. Unë s’kam ditur që në Korishë ka pasur minierë të Kromit”, ka thënë ai.
Në bazë të atyre dokumenteve që janë rreth 10 mijë sosh, të dhuruara nga arkiva e Ankarasë, qyteti i Prishtinës ka tapitë e qyteteve të Kosovës nga vitet 1847-1910.
“Në 1477 sipas defterit osman Prishtina i kishte 9 lagje. Më vonë këto lagje rriten dhe sipas një dokumenti të vitit 1844 Prishtina i kishte këto lagje: Jararqeribashi, Pirinazi, Alaudin, Hasan Bej, Xhamia Sagir (Xhamia e Vogël) Hasan Emini, Hatunije, Jusuf Çelebi, Mehmet Beu Ramazanije, Jusuf Efend, Xhamia Kebir (Xhamia e Madhe), Romëve, Lagja e Jarar Qerashit, Lagja e Varoshit, Lagjja e Hasanbeut, të krishterët nëpër lagje të ndryshme, Hebrenjtë në Prishtinë dhe Romët e Krishterë”, ka thënë ai.
Ndërsa Artan Krasniqi me temën “Kultura zejtare e qytetit”, vuri në dukje shuarjen e zejeve ekzistuese në kryeqytet përgjatë viteve, sipas të cilit ndryshimi i rrethanave shoqërore, politike e kulturore të cilat e kanë bërë të panevojshëm produktin e zejtarit, rrjedhimisht e kanë bërë edhe shuarjen e zejes.
“Me kalimin e kohës disa zeje janë shuar sepse nuk mund të funksionojnë më si p.sh përpunuesi i hashashit ose prodhuesi i armëve etj. Makisma ta rrënojmë të vjetrën ta ndërtojmë të renë, ka bërë që shteti tash i shpallë luftë zejtarëve,në njëfarë mënyre do të thotë që mekanizmi është shumë më i fortë se sa nevoja për ato zeje. Është shteti ai që i shpallë luftë zejeve dhe zejtarëve, duke i quajtur si të prapambetura, si mbetje të një kohe tjetër, tash i jep valë industrisë së prodhimit industrial”, potencoi panelisti Krasniqi.
Ai, më tutje tha se edhe pse në Prishtinë ka një bashkëjetesë ku kryhen shumë shërbime, ekzistenca e zanateve është në krizë.
“Edhe pse ato mund të ruhen artificialisht, nëse nuk ka nevojë për zeje ato nuk do të ruhen, nëse mbërrijmë me e përmbysë narracionin nuk besoj që mund ta sforcojmë prodhimin e një njeriu që do të bënte një zeje që nuk është në shërbim më. Vetëzhvillimi i Prishtinës ka bërë që zejet në Prishtinë mos të kenë një qendër si në Gjakovë, Prizren ose Pejë deri diku. Kjo është e shkapërderdhur dhe zejtarët nuk e kanë një status të veçantë, por janë të shpërndarë nëpër Prishtinë dhe rrjedhimisht nuk kanë një qendër që kish mundur të realizohej” ka përfundurar Kraniqi për t’i lënë radhë edhe një diskutimi me pjesëmarrësit tjerë./KultPlus.com
Politikanët kurrë nuk e lënë hajninë për ditën e nesërme por vjedhin sot ditën e nesërme ia kanë lënë popullit E kanë kuptuar shejtanët bastardët e atdheut se fjalorit drejtshkrimor i mungon ajo pjesa ku shpjegohet se e nesërmja kurrë nuk vjen / KultPlus.com
Transformimi i Piramidës së Tiranës ka tërhequr edhe vëmendjen e gjigantit mediatik “The Guardian”.
Kryeministri Edi Rama ndau sot në rrjetet sociale artikullin e publikuar në “The Guardian”, ku ndër të tjera vlerësohet se “Piramida zbulon krenarinë për të kaluarën krahas shpresës për të ardhmen”.
“E kthyer në simbolin e Shqipërisë moderne, veç aspektit arkitektonik, Piramida rikrijon edhe modelin e Tiranës plot ngjyra e me një ofertë turistike që po rritet dita-ditës”, u shpreh Rama.
Sipas “The Guardian”, Piramida, një monument i rrënuar i trashëgimisë komuniste në Tiranë është transformuar në një vend argëtues me shumë hapësira.
“Ky është projekti i një seri përpjekjesh për të ndryshuar kuptimin dhe përvojën e trashëgimisë komuniste të Tiranës”, shkruan “The Guardian”, ndërsa heq paralele me Berlinin.
“Punimet e reja theksojnë kompleksitetin e historisë së ndërtesës, e cila përfshin punën dhe aftësinë e njerëzve që e ndërtuan atë dhe gjenialitetin përshtatës të profesioneve të mëvonshme”, shkruan “The Guardian”./atsh/KultPlus.com
Kryeministri i vendit, Albin Kurti, e ka emëruar ministren e Drejtësisë, Albulena Haxhiu, si Koordinatore Kombëtare për mbrojtje nga dhuna në familje, dhuna ndaj grave dhe dhuna në baza gjinore, pas hyrjes në fuqi të ligjit të ri.
Kurti tha se si përgjigje ndaj dhunës, qeveria po e përmirëson edhe kornizën ligjore, teksa shtoi se përpjekjet për ta çrrënjosur dhunën ndaj grave dhe vajzave janë të vazhdueshme
“Për bashkëpunim më të thelluar, me qasje ndër-sektoriale dhe zinxhir institucional të fuqizuar, kemi miratuar Strategjinë Kombëtare për Mbrojtje nga Dhuna në Familje dhe Dhuna ndaj Grave (2022-2026)”.
“Kemi avancuar nëpërmjet definimit të dhunës ndaj grave si vepër penale në Kodin Penal. Po ofrojmë ndihmë juridike falas për viktimat e dhunës në familje dhe me bazë gjinore, pavarësisht gjendjes socio-ekonomike”, shkroi Kurti, transmeton Klankosova.tv.
Më tej, kreu i qeverisë tha se për t’ua lehtësuar financiarisht përballjen me pasojat e dhunës, është miratuar Ligji për Kompensimin e Viktimave të Krimit, ndërsa për trajtimin e dhunimeve seksuale është lansuar Protokolli Shtetëror
“Për t’ua lehtësuar financiarisht përballjen me pasojat e dhunës, kemi miratuar Ligjin për Kompensimin e Viktimave të Krimit”.
“Rregulluam bazën ligjore për dënime plotësuese për personat që shpallen fajtorë për dhunë në familje dhe dhunim seksual, dhe prioritizim të hetimeve dhe gjykimeve për këto raste. Kemi rritur financimin e shërbimeve të strehimoreve për mbi 100% për 2023”.
“Përmes miratimit të projektligjit për shërbime sociale dhe familjare, filluam reformë të thellë për Qendrat për Punë Sociale”, shkroi më tej Kurti.
Tutje, Kurti tha se ministria e Drejtësisë ka planifikuar mbi 80 aktivitete në kuadër të fushatës “16 ditë të aktivizmit kundër dhunës në baza gjinore”, për të cilën tha se do të hapet më 25 nëntor.
“Puna në adresimin e dhunës në familje dhe dhunës ndaj grave dhe vajzave nuk ndalet, vazhdon përditë”, tha ai./KlanKosova/KultPlus.com
Ministri i Kulturës, Hajrualla Çeku ka bërë të ditur se është bërë restaurimi i shtëpisë tradicionale të familjes Sokoli në Prizren.
Shtëpia e familjes Sokoli që ndodhet në rrugën “Adem Jashari” në Prizren, e që bën pjesë në trashëgiminë kulturore, i është ri-konstruktuar çatia, fasada dhe i është bërë trajtimi i strukturës së dyshemesë së meskateve./KultPlus.com
Saranda vijon të jetë edhe gjatë këtij viti destinacioni i preferuar i kroçerave turistike.
Drejtori i portit të Sarandës, Alket Qendro tha sot për ATSH-në se “nga janari deri në fund të tetorit në Portin e Sarandës kanë mbërritur 25 kroçera, nga të cilat 10 të mëdha dhe 15 të përmasave më të vogla”.
“Vetëm nga kroçerat e mëdha në port kanë mbërritur 15 294 turistë, ndërsa nga anijet e tjera turistike kanë mbërritur 4401 turistë”, tha Qendro.
Sipas tij, ajo që vihet re këtë vit është ardhja e kroçerave edhe gjatë muajit nëntor.
“Në fillim të muajit nëntor mbërriti në port kroçera “Nieuw Statendam” me 2497 turistë në bord, të kombësive të ndryshme, angleze, kanadeze, holandeze etj.”, shtoi Qendro.
Drejtori i portit të Sarandës bëri të ditur se “në nëntor presim edhe kroçera të tjera që do të vizitojnë qytetin bregdetar”.
Saranda vitet e fundit është kthyer në një nga destinacionet më të preferuara turistike për turistët e huaj, që vizitojnë vendin tonë me kroçera.
Turistët që vijnë me kroçera kanë vizituar sitet turistike e arkeologjike të Sarandës, Gjirokastrën, si dhe kanë shijuar kulinarinë shqiptare të zonës./atsh/KultPlus.com
Presidentja Osmani është takuar me Princin William, të Mbretërisë së Bashkuar me të cilin kanë diskutuar për bashkëpunime në temat si përkrahja e rinisë në dy tema të rëndësishme aktuale, siç janë projektet e agjendës së gjelbër dhe ndërgjegjësimin rreth çështjeve që lidhen me shëndetin mendor, shkruan KultPlus.
Këtë e ka bërë të ditur Presidentja Osmani përmes një postimi në facebook.
“Kënaqësi të takoj sërish Princin William të Wales-it, në kuadër të ceremonisë Earthshot Prize në Singapor.
Diskutimet tona u fokusuan në bashkëpunimin ndërmjet Kosovës dhe Mbretërisë së Bashkuar në tema si përkrahja e rinisë në projekte të agjendës së gjelbër si dhe në projekte për ndërgjegjësimin rreth çështjeve që lidhen me shëndetin mendor”, ka shkruar Presidentja Osmani në facebook./ KultPlus.com
Rehova, një nga fshatrat më të bukur në vend, është kthyer vitet e fundit në një destinacion turistik për nga resurset e veçanta që ka, që nga tradita, historia dhe mikpritja.
Krahas rijetësimit të kishave, investimet e qeverisë në këtë perlë të Kolonjës janë shtrirë edhe në infrastrukturë.
Së fundmi, po investohet për ndërtimin e rrugës që e lidh me Ersekën.
Kryeministri Edi Rama ka publikuar në rrjetet sociale foto nga ky kantier punimesh për rijetësimin e fshatit.
“Rehova turistike ku dita-ditës po merr jetë projekti për rijetësimin e fshatit dhe ndërtimin e rrugës që do të bëjë lidhjen me Ersekën, duke nxjerrë në pah natyrën magjepsëse të kësaj zone”, shprehet Rama.
E shpallur qendër e mbrojtur si dhe e përfshirë në projektin “100 fshatra turistikë”, në Rehovë po kryhen një së investimesh në infrastrukturë për rehabilitimin e rrugicave, fasadave dhe portat prej guri./atsh/KultPlus.com
Sot u certifikua grupi i parë i pjesëtarëve të Forcës së Sigurisë së Kosovës në Xhudo në kuadër të programit shtetëror “Kosova, Shtet i Xhudos”.
Në këtë ceremoni morën pjesë kryeministri Albin Kurti, ministri i Mbrojtjes, Ejup Maqedonci dhe ministri i Kulturës, Rinisë dhe Sportit, Hajrulla Çeku.
“Uroj shumë që kjo përvojë të ju ketë forcuar edhe më shumë, jo për të sulmuar të tjerët por për të qenë mjaftueshëm të aftë të mbroni vetveten dhe të jeni të përgatitur me teknikën, forcën, dhe qëndrueshmërinë përkatëse. Vetëm kësisoj arrijmë të ndërtojmë një Kosovë të sigurt e demokratike, të lirë e të barabartë për të gjithë”, ka thënë Kurti, sipas komunikatës nga Zyra e Kryeministrit.
Agron Kuka, president i Federatës së Xhudos së Kosovës, ka thënë që këta janë vetëm ushtarët e parë të certifikuar, duke e quajtur rastin e sotëm si gjurmë të përhershme.
“Ne si sport i xhudos bëjmë hapa të lehtë, por ngado që shkelim lëmë gjurmë të pashlyera, dhe kjo sot jam i bindur se do të mbetet gjurmë e përhershme”, tha ai duke falënderuar kryeministrin Kurti si përkrahësin kryesor të programit “Kosova, Shtet i Xhudos” dhe ideatorin e këtij programi, ministrin Çeku.
Në anën tjetër, trajneri i xhudos, Driton Kuka, ka thënë që xhudoja shkon përtej sportit duke shërbyer si shtyllë kryesore e organizimit dhe forcimit të ushtrive në botë, përfshir tash edhe atë të Kosovës.
Në mjediset e Pallatit të Kongreseve në Tiranë nga data 15-19 nëntor do të mbahet panairi i 26-të i librit, një ngjarje mbarëkombëtare e kulturës që pritet me shumë interes.
“Muaji nëntor është muaj shumë i rëndësishëm për kulturën shqiptare. Janë pothuajse 100 ekspozues dhe të gjithë do të kenë mundësi jo vetëm të zgjedhin librat që dëshirojnë por gjithashtu të marrin pjesë në aktivitete”, tha Petrit Ymeri, kreu i Shoqatës së Botuesve në Shqipëri.
Panairi i përvitshëm i librit mbledh bashkë shtëpitë botuese nga Shqipëria, Kosova, Maqedonia e Veriut dhe Mali i Zi, shkrimtarë, poetë, përkthyes dhe lexues, ku njihen me botimet e reja, diskutojnë mbi problematikat e letërsisë bashkëkohore, përkthimit në gjuhën shqipe dhe shumë aktivitetet të tjera me të autorë dhe studiues.
“Unë besoj në rrafshin kombëtar, është ngjarja më e madhe më e rëndësishme në fushën e kulturës. Kemi botues nga Kosova, shumë autorë nga Kosova, kemi gjithashtu stendë edhe nga Maqedonia e Veriut dhe nga Mali i Zi. Është një festë e bukur e kulturës shqiptare, është një festë e bukur e librit në gjuhën shqipe”, u shpreh Ymeri.
Panairi i parë i librit në Tiranë ishte panairi “Tirana 1998”, i organizuar në Qendrën Ndërkombëtare të Kulturës në Tiranë nga 16 deri 20 dhjetor 1998. Prej këtij viti ky organizim është mbajtur rregullisht./euronews.al / KultPlus.com
Festivali i Këngës “Luleborë” është gati për edicionin e 8-të.
“Luleborë” është një festë e muzikës, që organizohet nga Bashkia Shkodër në bashkëpunim me institucionet kulturore të qytetit.
Nga viti në vit, ky festival i muzikës nuk është vetëm i artistëve nga Shkodra, por nga të gjitha trevat shqipfolëse. Qëllimi i këtij festivali, edhe në edicionin e 8-të të tij, është të pasurojë muzikën shqiptare me elemente ritmikë, melodi dhe harmoni që përfaqësojnë kulturën tonë.
Nën kujdesin e një stafi të tërë profesionistësh, Festivali i Këngës “Luleborë” i pret artdashësit në datat 10-11 nëntor, në Teatrin “Migjeni”. / atsh / KultPlus.com
Sot janë bërë 61 vjet nga vdekja e Ana Eleanor Roosevelt, politikanes, diplomates dhe aktivistes amerikane. Ajo ishte Zonja e Parë e Shteteve të Bashkuara e cila shërbeu më së gjati, duke mbajtur postin e saj nga marsi i vitit 1933 deri në prillin e vitit 1945, gjatë kohës së shërbimit të bashkëshortit Franklin D. Roosevelt për 4 mandate.
Presidenti Harry S. Truman do ta quante me vonë ‘Zonja e Parë e Botës’ në nder të arritjeve të saj në fushën e të drejtave të njeriut. Ajo ka shërbyer si e dërguar e Shteteve të Bashkuara në Asamblenë e Përgjithshme të Kombeve të Bashkuara.
KultPlus ju sjell edhe disa thënie nga Eleanor Roosevelt:
“Duhet guxim për të dashuruar, por dhimbja përmes dashurisë është një zjarr pastrues gjë të cilën ata që dashurojnë në përgjithësi e dijn. Ne të gjithë njohim njerëz të cilët aq shumë frikësohen nga dhimbja sa që mbyllen brenda vetes dhe nuk japin asgjë, nuk marrin asgjë dhe në këtë mënyrë tkurren deri sa jetën e bëjnë thjeshtë një vdekje që jeton.”
“Pavarësisht se sa e thjeshtë është një femër, nëse e vërteta dhe ndershmëria janë të shkruara në fytyrën e saj, ajo do të jetë e bukur.”
“Unë besoj që secili mund ta mposht frikën duke i bërë gjërat që gjithmonë ka pasur frikë ti bëjë.”
“Është shumë më mirë të ndezësh një qiri se sa ta mallkosh errësirën.”
“Kurrë mos u mërzit dhe kurrë nuk do të bëhesh i mërzitshëm.” / KultPlus.com
Bashkim Shehu, një nga autorët e rëndësishëm të letërsisë bashkëkohore shqipe, prezantoi romanin e tij më të ri: “Kryevepra të pakryera”. Romani i botuar nga Toena, u prezantua në një ceremoni në Qendrën Kombëtare të Librit dhe Leximit.
“Historia e një shkrimtari vjen përmes një narracioni shkëlqyes të një udhëtimi në botën e pafundme të artit, përmes një stili plot kulture”, thuhet në faqen online të QKLL për “Kryeveprat e pakryera”.
Eventi letrar u moderua nga Majlinda Toçi dhe për veprën e fundit të Bashkim Shehut, folën prof. Dhurata Shehri dhe poeti e botuesi Krenar Zejno.
Bashkim Shehu lindur më 1955 në Tiranë, është një nga shkrimtarët shqiptarë më produktivë të ditëve tona. Deri më 1981 punoi si skenarist në Kinostudion “Shqipëria e Re”. Prej vitit 1997 ai jeton në Barcelonë. Aktualisht punon si këshilltar për Europën Lindore në Qendrën e Kulturës Bashkëkohore të Barcelonës. Disa prej librave të shkrimtarit Bashkim Shehu janë botuar në gjuhë të ndryshme: Rrugëtimi i mbramë i Ago Ymerit (roman); Rrëfim ndanë një varri të zbrazët (roman autobiografik); Vjeshta e ankthit (roman); Gostia (roman) dhe dy përmbledhje me tregime. / atsh / KultPlus.com
Një monument i rrënuar i trashëgimisë komuniste në Tiranë është transformuar në një vend argëtues me shumë hapësira, shkruan gazetari Rowan Moore në një artikull të botuar në të përditshmen britanike “The Guardian”.
Piramida e Tiranës, një kon betoni 21 metra i lartë në kryeqytetin e Shqipërisë u hap në vitin 1988 si një muze për të përkujtuar ish-udhëheqësin Enver Hoxha, i cili për katër dekada deri në vdekjen e tij në vitin 1985 drejtoi një shtet të izoluar komunist në të cilin makinat e shkrimit dhe televizorët me ngjyra ishin të ndaluara.
Monumenti ishte ekuivalenti i tij me varrin e Vladimir Leninit në Sheshin e Kuq të Moskës.
Dizajni i ndërtesës, nga një ekip arkitektësh ishte njëkohësisht fantastiko-shkencor dhe faraonik.
Me kalimin e kohës, piramida shërbeu si një stacion radioje, një klub nate, qendër konferencash dhe një bazë për NATO-n gjatë luftës së viteve 1998-1999 në Kosovën fqinje.
Megjithëse prishja e Piramidës u propozua për shkak të strukturës gjithnjë e më të rrënuar, kishte edhe një plan për të ndërtuar një teatër kombëtar.
Përfundimisht, bashkia vendosi ta shndërrojë atë në një qendër IT për të rinjtë, një “mjedis ushqyes për të rinjtë shqiptarë”, kostoja e ndërtimit prej 12 milionë eurosh të së cilës do të financohej nga Fondacioni Shqiptaro-Amerikan për Zhvillim.
Një shumëllojshmëri prej 34 kutish shumëngjyrëshe të shpërndara brenda, mbi dhe rreth strukturës së vjetër si blloqe ndërtimi të një fëmije të pakujdesshëm, u projektuan nga kompania arkitekturore holandeze MVRDV.
Kutitë shërbejnë si klasa, kafene, hapësira trajnimi, kafene.
Rreth gjysma prej tyre janë për përdorimin e Tumo, një institucion arsimor jofitimprurës që ofron arsimim pas shkollës falas për adoleshentët në teknologjitë e reja.
Dy kutitë e përkulura, do të shërbejnë për të bërë teatro dhe leksione.
Publiku mund të endet midis dhe mbi kutitë, të ecë në çatitë e tyre, dhe të ulet në tarracat e tyre.
Ato janë grumbulluar brenda piramidës, të fiksuara rreth çatisë së saj dhe përhapen në hapësirën përreth.
Ju mund ta konsideroni kompozimin të ngjashme me një fshat, duke krijuar hapësira joformale midis kutive dhe me strukturën urbane ngjitur dhe me platformat dhe ballkonet e tij që ndjekin ngjarje të paspecifikuara teatrale të së ardhmes.
Pjesa e brendshme e piramidës është e kalueshme dhe e ngjitshme, duke ofruar një eksperiencë të ngjashme me parkun.
Mbi të gjitha, dominon struktura me trarë të prerë, mermer të plasaritur dhe detaje të çuditshme komunisto-brutaliste të ekspozuara.
Por, punimet e reja, nëpërmjet riparimeve selektive dhe futjes së dritës shtesë, dhe kutive me ngjyra, zbulon me sukses fisnikërinë dhe dramën e fshehtë.
Ky është projekti i një seri përpjekjesh për të ndryshuar kuptimin dhe përvojën e trashëgimisë komuniste të Tiranës.
Në Berlin, për shembull, disa ikona komuniste dhe naziste u shkatërruan, ndërsa disa ndertesa të tjera u ruajtën në emër të historisë, dhe me përpikëri siç është restaurimi i Reichstag, ndërtesa historike legjislative e qeverisë në Berlin dhe muzeut “Neues”.
Pasi artisti Edi Rama u bë kryetar bashkie në vitin 2000, blloqet e zymta të apartamenteve në Tiranë u lyhen me ngjyra të ndezura, një mënyrë e lirë, por efektive për të gëzuar njerëzit dhe për të nënkuptuar se vendi po ndryshonte.
Rama është tashmë kryeministër i Shqipërisë dhe rinovimi i qytetit vazhdon me mbështetjen e tij dhe të kryebashkiakut aktual, Erion Veliaj.
Vendi publik qendror i qytetit, dikur sheshi Skënderbej, është pasuruar me një mini pyll me biodiversitet të ashpër.
Disa kulla ngrihen rreth qendrës, të projektuara nga disa prej arkitektëve më të njohur bashkëkohorë evropianë.
Më i gjati prej tyre është “Downtown One”, i projektuar gjithashtu nga MVRDV, një bllok apartamentesh dhe zyrash të vendosura afër piramidës.
Punimet e reja theksojnë kompleksitetin e historisë së ndërtesës, e cila përfshin punën dhe aftësinë e njerëzve që e ndërtuan atë dhe gjenialitetin përshtatës të profesioneve të mëvonshme.
Piramida zbulon krenarinë për të kaluarën krahas shpresës për të ardhmen./atsh / KultPlus.com
Policia e Kosovës ka larguar një pankartë “Kjo është Serbi” nga ura e këmbësorëve në Soçanicë.
Pesë ditë më parë e njëjta parullë është vendosur në rrethojën nga drejtimi nga Mitrovica Veriore në Leposaviq, dhe mbrëmë në urën e këmbësorëve nga drejtimi nga Leposaviqi në Mitrovicën e Veriut, raporton Express.
Ura e këmbësorëve në Soçanicë është ndërtuar në janar të vitit 2021 në mënyrë që nxënësit dhe banorët e këtij vendi të mund të kalojnë të sigurt rrugën kryesore Leposaviq-Mitrovicë Veriore. Jo shumë kohë më vonë, serbët vendosën një pankartë me mbishkrimin “Kjo është Serbi” dhe disa flamuj serbë. / KultPlus.com
KultPlus, gazeta e parë online është drejt përgatitjeve të fundit për të sjell edicionin e gjashtë të mbrëmjes artistike “Ta Zbardhi Ftyrën”, një ngjarje kjo që i sjell Prishtinës emocione të thella, shkruan KultPlus.
Pas pesë edicioneve të suksesshme, edhe kjo mbrëmje artistike do të vjen në formë të kompletuar, emocionuese dhe frymëzuese, sikurse që kanë sjell emocione të pashlyera edhe edicionet e mëhershme.
Edicioni i gjashtë i “Ta Zbardhi Ftyrën”, do të mirëpres një emër të madh të artit shqiptar, sopranon e njohur Elbenita Kajtazi. Kjo artiste e shquar, ka shfaqur talentin e saj të rrallë në teatro prestigjioze dhe ka arritur të frymëzojë audiencën në shumë vende të botës me zërin e saj të bukur dhe interpretimet e mrekullueshme.
Mbrëmja e veçantë e “Ta Zbardhi Ftyrën” do të jetë mbrëmje e emocioneve të forta, bashkëbisedimit të thellë, dhe një performance të paharrueshme nga Elbenita Kajtazi ku kësaj radhe, zëri i saj, si asnjëherë më parë, në asnjë skenë tjetër, do të jehojë edhe përmes këngës shqipe. Në këtë ngjarje, publiku do të ketë rastin të ndjehet pjesë e një spektaklit të jashtëzakonshëm, ku arti, kultura dhe emocionet do të bashkohen në një harmoni të mrekullueshme.
Sopranon Elbenita Kajtazi do ta shoqëroj pianistja franceze Camille Lemonnier, ndërsa me një pikë do të prezantohet edhe solistja Anna Krasniqi. Ndërsa për t’i dhënë madhështi kësaj mbrëmje, në skenë do të ngjitet edhe Kori i Fëmijëve “Okarina”.
Drejtoresha e KultPlus, Ardianë Pajaziti, njëherit organizatorja e kësaj ngjarje të madhe, është shprehur shumë e lumtur që ndër vite ka pasur mundësi të sjell emra të mëdhenj të artit shqiptar si: Sislej Xhafa, Imer Kutllovci, Flaka Goranci, Erza Muqolli, Gjon’s Tears dhe Gëzim Myshketa, dhe se kjo traditë po vazhdon të rritet dhe të zhvillohet nga viti në vit.
“Me sopranon Elbenita Kajtazi si mysafiren e këtij edicioni, ne jemi të sigurt se do të shohim një tjetër mbrëmje të padëgjuar plot emocione dhe frymëzim”, shprehet Pajaziti, e cila ka treguar se koordinimi me figura të tilla po është shumë sfidues, pasi që agjendat e këtyre artistëve po janë të prenotuara për një periudhë të gjatë.
“Jemi të lumtur që edhe përkundër agjendave të ngjeshura nëpër botë, artistët nuk po na thonë asnjëherë jo. Përgjigjet pozitive nga artistë të kalibrit të tillë janë motiv për ne që të vazhdojmë me prurje të tilla”, ka thënë Pajaziti.
“Ta Zbardhi Ftyrën” do të mbahet më datë 27 Nëntor në Amfiteatrin e Teatrit Kombëtar të Kosovës (Pallati i Rinisë) në Prishtinë. Kjo mbrëmje artistike ndahet në dy pjesë, bashkëbisedim dhe performancë, dhe pikërisht kjo ndërlidhje bën diferencën nga ngjarjet e tjera kulturore.
Për të qenë pjesë e kësaj mbrëmje, nga sot, ju mund të rezervoni ulësen tuaj përmes emailit: [email protected] duke na dërguar emrin dhe mbiemrin si dhe numrin e ulëseve që doni të rezervoni.
Kujtojmë që në muajin gusht të këtij vitit, presidentja e vendit, Vjosa Osmani e ka dekoruar sopranon Elbenita Kajtazin me titullin Ambasadore Nderi e Republikës së Kosovës me motivacionin: “Për arritje kulmore në muzikën klasike, prezantimin e vlerave muzikore Shqiptare në skenën ndërkombëtare, si dhe afirmimin e Republikës së Kosovës, mbrojtjen e promovimin e kulturës Shqiptare gjithandej nëpër botë”.
Edicioni i sivjetmë i “Ta Zbardhi Ftyrën” mbështetet nga Ministria e Kulturës, Rinisë dhe Sportit, ndërkaq për detaje të tjera KultPlus do të ju mbaj të informuar në vazhdim. / KultPlus.com
Rrjeti i Grave të Kosovës (RrGK) dhe Artpolis – Qendra për Art dhe Komunitet, në bashkëpunim me Bibliotekën Kombëtare të Kosovës “Pjetër Bogdani” organizon ngjarjen e veçantë kulturore “Mbrëmje artistike me V”, që do të mbahet më 21 nëntor, nga ora 20:00 në Bibliotekën Kombëtare të Kosovës, “Pjetër Bogdani”.
“Mbrëmja Artistike me V” është një festë e letërsisë, artit, aktivizmit feminist dhe avokimit për ndryshime shoqërore. V, një dramaturge, autore, interpretuese, feministë dhe aktiviste amerikane, e njohur më parë si Eve Ensler, ka prekur zemrat dhe mendjet e miliona lexuesve me veprat e saj të fuqishme.
“Shko aq larg sa të mos kesh më frikë të mos kthehesh.” – V
Veprat artistike të V dhe kontributi i saj aktivist kanë lënë gjurmë të pashlyeshme në botë. Ajo renditet ndër autoret me numrin më të madh të kopjeve të librave të shitura nga lista e New York Times, me dramat dhe librat e saj të botuara në mbi 48 gjuhë dhe të interpretuara në mbi 140 vende. V është vlerësuar edhe me “Çmimin Tony” për arritjet në Teatrin Amerikan Broadway dhe “Çmimin Obie” për arritjet në shfaqjet e luajtura jashtë Broadway. Ajo njihet edhe për themelimin e “V-Day”, lëvizjes globale me bazë në komunitet për t’i dhënë fund dhunës kundër të gjitha grave dhe vajzave (përfshirë personat cis-gjinor, transgjinor, atyre që mbajnë identitet fluid, dhe jo-binar) dhe planetit. Ajo është themeluese e “One Billion Rising”, fushatës më të madhe për t’i dhënë fund dhunës kundër të gjitha grave dhe vajzave në mbi 200 vende, si dhe bashkëthemeluese e “City of Joy”, një qendër revolucionare udhëheqëse për gratë kongoleze të mbijetuara të dhunës në Bukavu të Republikës Demokratike të Kongos.
“Mbrëmja Artistike me V” ofron një mundësi unike që përmes diskutimit të njoftoheni me perspektivat e saj depërtuese mbi letërsinë dhe përkushtimin e V ndaj kauzave aktiviste feministe e ndryshimeve shoqërore.
Diskutimi do të shoqërohet me interpretime artistike të copëzave nga krijimet letrare të V, të interpretuara nga shkrimtaret/ët dhe artistet/ët e Ansamblit të Artpolis. Mbrëmja do të moderohet nga Zana Hoxha, Themeluese dhe Drejtore Ekzekutive e Artpolis. / KultPlus.com
Projekti/instalacion në hapësir publike, WHERE IS I ( located) / KU GJENDET UNË ( e vendosur) nga grupi Globalodromia FILOART, kuruar nga Arta Agani, është instaluar në fasadën e objektit në qendër të Prizrenit.
Këtë projekt e kanë mbështetur Drejtoria për Kulturë, Rini dhe Sport Komuna e Prizrenit.
Grupi Globalodromia FILOART shfaqet në Kosovë pas disa ekspozitave dhe organizimeve të mëhershme, ku për herë të parë FILOART ekspozon në vitin 1987 në hapësirat e “Boro dhe Ramizit” të atëhershëm, qendrës së rinisë dhe sportit të sotme, me ekspozitën “Kjo nuk është ekspozitë por e kundërta e saj” atë që lirisht mund ta quajmë ekspozita e parë konceptuale në Kosovë. Më vonë shfaqet në Prishtinë në vitin 2001 në ekspozitën NOW që u hap si kollaboracion i artistëve Kosovarë dhe Berlinas në Galerinë e Arteve të Kosovës ndërsa më vonë në vitin 2019 sërish në GKK tani me ekspozitën “GROUPING – MOVING – SPREADING” ku edhe filloi bashkëpunimi me kuratoren. Qysh atëhere lindi ideja që instalacioni HOW LONG IS NOW të realizohet në Prishtinë me një dimension të ri duke tërhequr një tangjentë lidhëse mes Berlinit dhe Prishtinës, duke arritur të realizohet definitivisht në Nëntor të vitit 2022.
Ndërkaq, vazhdim I natyrshëm I këtij bashkëpunimi ishte projekti I rradhës I cili po inaugurohet sivjet, WHERE IS I, në qytetin e Prizrenit.
Qëllimi:
Instalacioni në fjalë ka për qëllim të pasurojë hapësirën publike të qytetit të Prizrenit me një vepër të re arti e cila e bën këtë pjesë edhe pikë interesi të qytetit meqë edhe gjendet në një pjesë shumë të frekuentuar.
Instalacioni përbëhet prej fjalisë WHERE IS I (KU GJENDET UNË), shkronja me dimensione të mëdha të vendosura në një lartësi prej 12 metrash, të punuara nga material reflektues. Ky material vetëm sa e plotëson domethënien e fjalisë e cila ka për qëllim të nxitë mendimin kritik te qytetari I Prizrenit, dhe ka një dedikim gjithëpërfshirës. Si cdo vepër konceptuale e FILOART, edhe kjo vepër I adresohet individit dhe shoqërisë duke I nxitur ata të rishikojnë aspektin kohor dhe hapësinor momental në nivelin individual, socio-politik dhe ekonomik, duke e hapur mundësinë e ndryshimit të rrethanave drejt përmirësimit dhe pasurimit shpirtëror. Shkronjat reflektojnë hapësirën përballë që është qielli I cili ndryshon brenda ditës por pamja e shkronjave poashtu ndryshon bashkë me reflektimin, varësisht prej pozitës së vëzhguesit. Me këtë theksohet temporaliteti dhe ndryshueshmëria e momentit, këndvështrimit dhe individit si pjesë e shoqërisë e cila poashtu është e ndryshueshme.
Deklarata e grupit:
KU GJENDET UNE (e vendosur)
1997-2019-2021 Globalodromia
„Unë e di se nuk di asgjë“ 1
„Unë mendoj, pra jam“ 2
Këto janë disa nga citimet e njohura nga filozofët që kanë formësuar historinë njerëzore.
Prapëseprapë, lind pyetja, për cilin Unë po flisnin këta filozofë?
Sa herë në ditë një person përdor fjalën Unë?
Gjithçka fillon me Unë.
Unë kam lindur në …
Gjithçka që ne (unë) kemi bërë në jetën tonë, është Unë-(i) që i ka bërë.
Por ku ndodhet Unë?
Deri më tani, asnjë shkencëtar-e, filozof-e, teolog-e apo kushdo qoft nuk mund t‘i përgjigjej kësaj pyetjeje.
“.. Pyetja se ku ndodhet Unë është shumë më e vështirë për t‘u përgjigjur.
Truri është një sistem shumë i organizuar në mënyrë distributive dhe Unë nuk mund të lokalizohet.
Është një atribut për tërësinë e veprimeve të qëllimshme që vëzhguesi mund të perceptojë.” 3
A do të arrijë njeriu (unë) të gjejë vendin e Unë-(it)?
Misteri nuk është larg nesh. Në fund të fundit, është unë që ne (unë) po kërkojmë.
Njeriu mund të udhëtojë edhe në shumë planete ose sisteme diellore dhe të ndërmarrë kërkime
dhe të bëj matje atje, megjithatë, pa e ditur pikën e fillimit (Unë), çdo informacion „i ri“ që arrin
në Unë-(in) (e papërcaktuar) është: i përafërt, jo i saktë dhe për këtë arsye, ende jo saktësisht e matshme.
„Sepse ajo që mund të matet ekziston poashtu“ 4
A mund të gjejmë një krahasim në natyrë për të shpjeguar vendndodhjen e Unë-(it)?
Jo, kjo nuk është e mundur sepse ne nuk e dimë se çfarë lloj njohurie do të kemi duke gjetur vendin
Unë-(it).
Pyetja, „Ku jam (ndodhem)“ është ndoshta pyetja themelore për njerëzimin. Arsyeja është shumë e
thjeshtë, çfarë do të thotë informacion nëse nuk e dimë se ku përfundon informacioni?
Kjo pyetje („Ku gjendet Unë“) mund të formojë një diskurs për të hulumtuar kërkimin e vendndodhjes
së saktë të Unë-(it).
Gjetja e vendndodhjes së Unë-(it) do t‘i përgjigjej gjithashtu një pyetjeje themelore:
Si pjesë e organizimit të aktiviteteve të shumta në kuadër të Javës Globale të Ndërmarrësisë, Shkolla Finlandeze po organizon festivalin vjetor të kodimit për të 6-tin vit radhazi, Junior Code Weekend Fest, më 18 nëntor nga ora 10:00-15:00, festival një ditor i cili fokusohet në zhvillimin dhe praktikimin e aftësive në teknologjitë më të avancuara në treg.
Gjatë festivalit, nxënësit do të kenë mundësinë të mësojnë bazat e kodimit (block coding) nga mësimdhënësit e shkollës duke aplikuar teknologji të ndryshme inovative. Në të njëjtën kohë nxënësit do të praktikojnë njohuritë e tyre të arritura gjatë festivalit dhe të krijojnë produkte teknologjike. Pjesëmarrësit do të pajisen me certifikata në përfundim të projekteve të tyre.
Kush mund të marr pjesë?
Varësisht se a jeni fillestar apo të avancuar në kodim, festivali është i hapur për të gjithë nxënësit. Të gjithë nxënësit e klasave 3-9 mund të marrin pjesë në festival duke plotësuar linkun e regjistrimit. Regjistrimi është i obligueshëm pasi që vendet e pjesëmarrjes janë të limituara.
Nxënësit duhet të kenë me vete laptop ose ipad me të cilën do të praktikojnë kodimin dhe projektet e organizuara gjatë ditës.
Ku mbahet festivali?
Festivali mbahet në lokacionin e Shkollës Finlandeze. Lokacioni mund të gjendet përmes linkut në vijim (lokacioni është afër rrethit të QMI, Prishtina Mall, rruga për Ferizaj, kthesa në të majtë afër Orient Mobile). Nëse keni ndonjë pyetje ose kërkesë ju lutemi ndihuni të lirë të na kontaktoni përmes emailit ose telefonit në 045 235 650.
Duke filluar nga kopshti e deri në edukimin në shkollën e mesme, Shkolla Finlandeze zbaton qasjen e veçantë finlandeze të bazuar në projekte dhe praktikë; Zhvillimit të kreativitetit përmes lojrave dhe metodave kreative; Avancimit në shkenca dhe matematikë përmes eksperimenteve praktike dhe zhvillimit të njohurive të avancuara në robotikë dhe kodim. Sot, modeli arsimor finlandez udhëheq në botë si sistemi më i mirë arsimor për shkak të dallimit nga modelet tradicionale të arsimit dhe aplikimit të teknologjive dhe metodologjive më të avancuara dhe moderne të arsimit. Inspiruar nga sistemi i arsimit finlandez, i cilësuar si “mrekulli e arsimit” nga Banka Botërore, Shkolla Finlandeze aplikon metodat më inovative dhe moderne të mësimdhënies në edukimin e nxënësve dhe rritjen e tyre intelektuale, emocionale, dhe shoqërore.
Me sistemin numër 1 në botë për edukim; me mësimdhënës të shkëlqyeshëm finlandez dhe ndërkombëtarë; me teknologji të avancuar dhe iPad edukativ për secilin nxënës; me mësimin e bazuar në fenomene e lojra, dhe jo vetëm lëndë; dhe me qasjen krejt ndryshe të të mësuarit dhe zhvillimit të shkathtësive të shekullit 21 tek fëmijët, Shkolla Finlandeze në Kosovë është shkolla ndërkombëtare më inovative në vend me sistemin arsimor më të avancuar në Kosovë. / KultPlus.com
