Mick Jagger e Dave Grohl lansojnë këngë dedikuar pandemisë së COVID-19 (VIDEO)

Derisa Mick Jagger bashkë me bendin Rolling Stones ishin duke punuar në albumin ri dedikuar shpresës për një pjesë më të mirë të dekadës, anëtari i bendit Foo Fighters, Dave Grohl preferoi të punojë paksa më shpejtë.

Ai ndikoi në Jagger-in që të realizojë këngë të re. Dhe befasia është kjo, realizuan këngë dedikuar pandemisë së COVID-19. Kënga e tyre titullohet “Eazy Sleazy”, përcjell KultPlus.

Këngën e intepretojnë vetëm ata të dy, Jagger si vokalisti kryesor dhe me kitarë, e Grohl thuajse kudo, me vokal e instrumente të tjera muzikore./ KultPlus.com

Genc Prelvukaj sjell këngën “Hajde ti kthejmë”, shpalos një histori dashurie (VIDEO)

“Gentvs II” është albumi që këngëtari Genc Prelvukaj po e shpalos kohëve të fundit, shkruan KultPlus.

Vetëm një javë pas publikimit të këngës “Ditë e natë”, Prelvukaj sot ka sjell këngën “Hajde ti kthejmë” duke i shpalosur kështu publikut një histori dashurie.

Me tekst dhe muzikë të Prelvukajt, kënga vjen e shoqëruar me video ku na shfaqen pamje të një çifti në kohë të mira.

Për të dëgjuar këtë projekt të radhës të këngëtarit, po ju sjellim videon më poshtë. Përveç në YouTube, këngën e gjeni edhe në çdo platformë tjetër online. / KultPlus.com

‘Frymë’ për të himnizuar dhimbjen, Sata: Është kënga më personale se flet për humbjen e babait tim

Suada Qorraj

Vargje dhimbjeje, dashurie por dhe një lidhjeje që kalon përtej shpjegimeve të zakonshme. E përjetuara që nuk zhbëhet, një jetë e humbur që lë shumë pas vetes, sekondat e fundit, e gëzimin e parë, por krejt në fund një botë e shembur. Pikërisht dhe kënga ‘Frymë’ vie si përjetim personal i kantautorit Vlashent Sata, por që arrin të gjej vend tek secili që dikur jeta i përballi me të njëjtën humbje, shkruan KultPlus.

‘Me pas ditë se ish’ kènë i fundit përqafim t’kisha rrok pak ma shumë, pak ma shumë, pambarim’, janë vetëm rreshtat e parë që krahas mistikes që mbanë në vete lidhja baba dhe djalë, shprehin mall të pafund e të pashoq.

Në një intervistë për KultPlus, Vlashent Sata tregon se kënga ‘Frymë’ mbanë në vete një ndër tekstet më personale, por më të vështira për tu shkruar.

“’Frymë’ është këngë më personale se flet për dhimbjen më të madhe, që është humbja e babait tim, e që besoj që ju ka fol shumë njerëzve që kanë humbur njerëzit e vet. Teksti ka qenë mjaft i vështirë për tu shkruar sepse nuk dija se çka doja të thoja. Më ka marrë plot dy muaj si këngë që të finalizohet komplet’’, thotë kantautori.

Sipas tij kënga flet për momentet e fundit nga periudha kur ti nuk do të jesh më njësoj, ato sekondat që nuk e dijmë që është hera e fundit që përqafon një njeri të dashur, që e dëgjon për të fundit herë, para se jeta të shembet, kurse e vemja shpresë të ngelet horizonti.

‘Frymë’ krahas ndjeshmërisë së madhe që posedon brenda tekstit, ka dhe një tjetër ndjeshmëri po aq të madhe në videoklipin e këngës, ngase mesazhi i saj përcillet dhe përmes kukullave, loja e të cilave sjellë përditshmërinë, dhe lidhjen e një prindi me fëmijën e tij, në një dimension krejtësisht ndryshe.

“Është kënga e vetme që mund ta shikosh po qa intensivisht sa mund ta dëgjosh. Mund të them është projekti më i veçantë që kam bërë, si një lloj ngushëllimi i dyanshëm mes publikut dhe meje, sepse dhimbja e humbjes së një prindi është diçka që nuk zhbëhet”, rrëfen Sata kur pyetet se pse zgjodhi kukullat për të përçuar mesazhin e tij.

Krejt në fund kantautori tregon se kënga është edhe një formë ngushëllimi për të gjithë njerëzit që kanë humbur dikë, me shpresën se dikur sado pak do të kaloj dhe nuk do të jetë nevoja që të shkruhen këngë të tilla./ KultPlus.com

‘Wonderwaves’ sjell këngën ‘Kona’, i dedikohet vrasjes së grave nga burrat zullumqarë (VIDEO)

Jeta Zymberi

“Wonderwaves” që përbëhet nga Shpat Morina dhe Bajram Kafu Kinolli, autodidaktë të muzikës që tërhiqen e frymëzohen edhe nga melosi ballkanik, edhe nga ai modern, kanë sjell së fundmi këngën “Kona”, shkruan KultPlus.

E bazuar në një këngë të vjetër burimore të dasmave, “Kona” (në shqipen standarde këna, bojë dekorative që u vihej grave në kohën e martesës) është komentim emocional e i tendosur për marrëdhëniet martesore mes burrit e gruas, të cilat dijnë të jenë të pabarabarta e të dhunshme. Kënga veçanërisht prek mënyrën se si këto marrëdhënie të kobshme çojnë te vrasja e grave nga burrat zullumqarë, diçka që fatkeqësisht vazhdon të përsëritet kohë pas kohe në shoqërinë tonë.

Sipas krijuesve të këngës, “Kona” paraqet pamje të një të tashmeje që nuk shkrehet dot nga e kaluara — një e tashme që padrejtësisht i quan gratë qytetare të rendit të dytë të cilat meritojnë të përjetojnë dhunë.

“Kona” na nxit të mendojmë për një të tashme kur ballafaqohemi me djajtë e rrënjosun në kopshtin e shoqërisë sonë, në mënyrë që trashëgimia që do t’ua lëmë brezave të ardhshëm të jetë më e mbarë.

“Kona” është përvojë e njëmendtë: sinqeriteti dhe dhimbja që përmbahen brenda saj na shtyjnë të mendojmë, dhe ç’është më e rëndësishmja – me vepru.  

Miksimi dhe masterizimi i kësaj këngë është realizuar nga Tomor Kuçi, incizimi është bërë në Analog Studios, Prishtinë, ilustrimi dhe video animacioni nga Shpat Morina dhe koncepti i videos nga Berat Hasani

Më poshtë po ju sjellim edhe tekstin e plotë të këngës:

Ngjitet kona, more pika-pika

Sikur sonte, bajrak nër çika

Sikur sonte, bajrak nër çika

Ngjitet kona, o me pika të kuqe

sonte je te baba, nesër bohesh nuse

sonte je te baba, nesër bohesh nuse

Ulet nona bukë me honger

Ka metë sofra shpraztë, ah moj motër

se ty nuk t’ka moj motër

“Gjithë o kanë e shtypne. Si ka shku te ai burrë kurrë s’o kanë e lirë, kurrë s’o kanë e knaqne. Kurrë, kurrë, kurrë. Gjithë me lot, gjithë e rrehne, gjithë e shane. Gjithë o kanë e gazepit. Gjithë.”

Shtrëngon nona zemrën, me zor duron

Çikën e çoi nuse, e n’vorr e vajton

Zemrën e çoi nuse, e lule n’varr i çon

Ngjitet kona, pika-pika

Ka ardhë koha, me u mledhë çikat

ka ardhë koha, me u mledhë çikat

Ngjitet kona, pika-pika

Ka ardhë koha, me u mledhë çikat

ka ardhë koha, me u mledhë çikat. / KultPlus.com

“Don’t Judge Me” kënga e re e FKA Twigsit që flet për racizmin në Britani të Madhe

FKA Twigs e ka publikuar videoprojektin e ri muzikor me titull “Don’t Judge Me”, të cilin e sjell në bashkëpunim me reperin Headie One dhe kantautorin britanik Fred Again.

Kënga vjen e shoqëruar me një videoklip të fuqishëm, të cilin këngëtarja e ka bashkëdrejtuar me regjisorin Emmanuel Adjei, i cili në të kaluarën ka punuar me yje të tillë të muzikës, si Madonna dhe Beyoncé.

Sipas një prononcimi për media bëhet e ditur se projekti, “Don’t Judge Me”, e shfaq eksperiencën e të qenit afrikano-amerikan dhe britanik në botën moderne, si dhe e përfaqëson një luftë të përbashkët kundër tiranisë së padukshme të shkaktuar nga paragjykimet kulturore, sistematike dhe strukturore, të cilat shpesh është vështirë për t’i parë dhe ende më e vështirë për t’i tejkaluar.

Së fundmi FKA Twigs e kujtoi abuzimin e tmerrshëm racist që e kishte përjetuar, gjatë kohës sa ishte në lidhje dashurie me aktorin e njohur britanik, Robert Pattinson. Ajo tha se ishte pre e komenteve të rënda dhe injorante nga disa adhurues të zjarrtë të aktorit, gjatë tri vjetëve sa ishte në lidhje romantike me të.

Gjithashtu para pak javësh, këngëtarja britanike emri i vërtetë i së cilës është, Tahliah Barnett, ka ngritur padi kundër aktorit Shia LaBeouf, të cilin e akuzon për abuzim fizik dhe emocional gjatë lidhjes së tyre një vjeçare.

Padia e ngritur në gjykatën e lartë të Los Angelesit, kërkon dëmshpërblim për dëmet e shkaktuara nga aktori, i cili besohet se e ka sulmuar atë seksualisht dhe i ka shkaktuar shqetësim emocional.

Sipas saj, LaBeouf e kishte nënçmuar vazhdimisht duke iu drejtuar me fjalë ofenduese. Në një rast thuhet se aktori e ka përplasur këngëtaren për veture dhe ka provuar ta ngufatë atë. FKA Twigs po ashtu thotë se aktori disa herë, me vetëdije të plotë i ka bartur sëmundje seksuale.

Këngëtarja shumë e talentuar FKA Twigs e posedon një zë interesant dhe stil unik të interpretimit, por jo gjithmonë arti i saj kreativ arrin të kuptohet nga publiku mbarëbotëror. Megjithatë ajo vazhdon të sjell projekte të veçanta në tregun muzikor. / KultPlus.com

Rama Lahaj publikoi këngën e re “Për ty Atdhe”

Tenori i njohur shqiptar, Rama Lahaj për nder të ditës së 28 Nëntorit ka lansuar këngën e tij më të re “Për ty Atdhe”, shkruan KultPlus.

Zëri i mrekullueshëm i Tenorit kombinuar me pamjet magjike të vendeve shqiptare kanë bërë që kjo këngë të duket madhështore për mesazhin që përqon dhe të dëgjohet gjatë, derisa ka njerëz të cilët çmojnë artin e mirëfilltë në këtë botë.

Në videoklipin e këngës “Për ty Atdhe” shfaqet tenori Lahaj me një vajzë, të cilët tërë skenimin e bëjnë për të përquar një mesazh të madh që vërehet në përfundim të këngës.

Prishtina, Prizreni, Tirana, Kruja e vendet tjera të dy shteteve shqiptare u bënë nikoqire e këngës më të re të tenorit, teksa përgjatë videoklipit shfaqen motive të kulturës shqiptare, si veshja, plisi dhe shumë elemente të tjera të cilat e kurorëzojnë këtë këngë.

Kënga muzikën e së cilës e kreu Pjetër Gaci, orkestrimin Shpëtim Saraçi dhe me video produksion nga Entermedia, në të gjitha pamjet shfaq dashurinë e një çifti të ri që vizitojnë vende shqiptare dhe praktikojnë tradita tona, teksa përmbyllja e këngës bëhet me propozimin e Lahajt ndaj vajzës pranë monumentit të Skënderbeut.

Kënga e cila në spot shfaq dashurinë e një çifti, mbaron me fjalët “O atdhe sot për ty të lumtur jetojmë”, e që edhe ndjenjat individuale bëhen shënuese të lirisë së atdheut. / KultPlus.com

‘’Mbaje atë qafore sikur përmendore, për një dashuri të parë shkollore’’

Armend Rexhepagiqi është këngëtari dhe kompozitori, teksti dhe melodia e të cilit nuk del asnjëherë nga moda, shkruan KultPlus.

Shtjellimi i tematikave me vargje të thella dhe tonaliteti i mrekullueshëm muzikor e bëjnë të dëgjohet nga gjenerata dhe kohëra të ndryshme.

Dihet se melankolia përherë ka qenë shkak i vargjeve më të thella, këngëve më të bukura, pikturave më rrëqethëse. E tillë është edhe “Qaforja” e Armend Rexhepagiqit, e cila është një shprehje artistike mes pajtueshmërisë së fatit dhe lakmisë të asaj që tanimë është e humbur.

KultPlus ju sjell tekstin dhe këngën “Qaforja”:

E bukur je, floktë gështenjë

I shkurtove prej se ne u ndamë         

E bukur je

s’të lashë shenjë që prap u pamë

E bukur je dhe ende mban nën këmishën

Tënde të bardhë atë qafore

E unë të shoh aq rrallë e përmallë

Mirë jam, po jetohet

Mirë jam, po durohet

Mirë jam le të grimcohet

Krejt çka kam, por mirë jam

Kjo qafore duket madhështore

Sikur krenaria mashkullore

Njëri ta dhuroi tjetri e shijoi

Do t’çahej shkëmbi i fortë

Po të më shihte sot

Mbaje atë qafore sikur përmendore

Për një dashuri të parë shkollore

Ja do të përulem, e po të përkulem

Pas teje t’gjitha panë se kopje të zbehta janë

Mirë jam, po jetohet

Mirë jam, po durohet

Mirë jam le të grimcohet

Krejt çka kam, se mirë jam

Kjo qafore duket madhështore

Sikur krenaria mashkullore

Njëri ta dhuroi tjetri e shijoi

Do t’çahej shkëmbi i fortë

Po të më shihte sot

Mbaje atë qafore sikur përmendore

Për një dashuri të parë shkollore

Ja do të përulem, e po të përkulem

Pas teje t’gjitha panë se kopje të zbehta janë

Mbaje atë qafore, mbaje si fitore

Gjoksin tënd e pata strehimore

Ja po të rrëfehem

Pas teje t’gjitha panë

se kopje t’zbehta janë…

https://www.youtube.com/watch?v=0IcDLZIi8-o&ab_channel=Besn . / KultPlus.com

Adhurim Demiri sjell me shumë nostalgji këngën “Mall Bulevardi” (VIDEO)

Këngëtarin Adhurim Demiri e kujtojmë kryesisht si pjesë të festivaleve të ndryshme, e në veçanti në Festivalin e RTSH-së ku gjithmonë me këngët e tij ka ditur të bëjë për vete publikun, shkruan KultPlus.

Rokeri i cili ka kohë që jeton në Austri, ka shprehur mallin e tij për vendlindjen përmes këngës më të re të cilën sapo e ka lansuar.

“Mall Bulevardi” është poezia e njohur e Pandi Laços që e shkrirë nën tingujt e kitarës dhe kënduar nga zemra e me shumë nostalgji nga Adhurim Demirit, përbëjnë një projekt shumë të dashur.

Kënga e cila e sjell këngëtarin në formë dhe me një stil të veçantë, vjen e shoqëruar edhe me videoklip.

KultPlus ju sjell edhe poezinë e Laços që kësaj radhe na vjen e shoqëruar me muzikë:

“Ka qenë dikur një qytet…
Në vend të zemrës, “një bulevard”
Një bulevard ku mijëra njerëz…
Çdo natë takoheshin”… mos jam përçart ?

Nga mijëra fytyra që kam njohur
Qindra mbaj mend, pak kam harruar
Vallë sa prej tyre shpërndarë në botë
“Mall bulevardi” i ka sharruar?

Nga Vollga vinte një muzikë
“Sahati” e kishte si kolonë zanore
Kafe Gjirokastra, kafe nuk ofronte
Por historira me “dashnore”.

“Më ka marrë malli” për Bar Sahatin
Që ta mbledh veten me një konjak
Një xhiro qejfi në rimorkio
Nga Porcelani në Kombinat.

“Mall bulevardi” për një rrugë
Që e pushtojë tek luaj “botash”
Ku i vjedh kumbllat një gjitoni
Ku gjunjët e brrylat, bëhen copash.

“Mall bulevardi” për një shok të ngushtë
Ai i qetë e unë “gjaknxehtë”,
Unë për “Beatles”, ai për “Stones”
Tek “Ura” ziheshim, po pajtoheshim lehtë.

Për një rrugicë, kam shumë mall
Veç një makinë, kalonte rrallë…
Prisnim gjithmonë, t’i vareshim prapa
“Zukut” të druve, një gërdallë.

“Mall bulevardi” për një tren
Që gjithmonë vonohet, po prapë e pres
Të kap një vend që nga dritarja
Në ecje e sipër, në plazh të zbres.

“Më ka marrë malli” për të dielën
Që radioposta të më zgjojë
Një film shqiptar, plot me batuta
“Punë e komisarit, ishte lojë!”

Të pres me ankth, “më ka marrë malli”
Për ndeshjen derbi, Kuq-Bardhëblu
S’ka gjë po humbëm kampionatin…
Mjafton që sot t’u japim “dru”.

“Më ka marrë malli” për një teatër
Për dy bileta gjetur me mik
Për një artist që nuk jeton më
Për pakëz Breht, pakëz Shekspir.

Mall kam për fqinjin që rrinte poshtë nesh
Qe çesmen hapur, shpesh ia harroja
Edhe kur mbesja për një dorë kripë
Në mes të natës mund ta zgjoja.

“Më ka marrë malli” për një top të shpuar…
Që shpesh na ngecte në tarracë
Një kanatiere e bardhë pa mëngë
Me bojë këpuce, numrin “shtatë”.

“Më ka marre malli” që “të gjuaj”
E “t’i bëj naftën” një ditë mësimi
Të bëj një xhiro nga gjimnazet
Nga “Qemal Stafa” te “Petro Nini”.

“Më ka marre malli” për një vajzë…
Diku ka humbur nëpër botë
Ndoshta se njoh, kur ta takoj,
Për të kam ruajtur një pikëz lot…

“Më ka marrë malli” për një kitarë
Dorë më dorë, pak e stonuar,
Kur kthehej prapë, ajo ishte çarë
Të gjithë e donin, ish e bekuar.

“Më ka marrë malli” për një burrë të vjetër
shtynte ngadalë një karroce dore
Nuk është “Ai” i këngës së Battistit
Megjithëse thërret… ”Akullore”.

“Mëka marrë malli” të mbyll xhiron
Nga hotel “Peza” te Universiteti
Do më bjenë këmbët, kot do t’i lodh,
S’do gjej fytyra të këtij qyteti… /KultPlus.com

Elsa Rraqi publikon këngën “Mu”: Ndryshe ish me dashtë, e shumë ndryshe me dashuru

Medina Pasoma
Fotografitë nga Elmedina Arapi

Vargjet autoriale për dashurinë, Elsa Rraqi ka vendosur qysh moti t’i bashkoj me butësinë dhe veçantinë e zërit të saj. Së fundmi, nën kombinim fjalë-zë, ajo ka publikuar këngën e saj “Mu”, shkruan KultPlus.

Këngëtarja e re kosovare, Rraqi duke sjellur këngën “Mu” ka përmbushur pritjet shumë vjeçare të audiencës, ku disa nga ta e dëgjuan këtë këngë në një natë të muzikës.

“Mu” vjen nën një melodi të lehtë dhe nën melankolinë e zërit të Elsës, ku interpretohet teksti i shkruar nga vet ajo, vargjet e secilës përbëjnë një tekst muzikor me gjuhë të hollë e shije artistike. Rraqi për KultPlus shprehet se kjo është kënga e zemrës për të, të cilën e pati shkruar në moshën 19 vjeçare, duke e përshkruar dashurinë nga syri i një observueseje.

“Dashuria është spektër. Ne kemi dëshirë të themi se ajo është romantikja, platonikja, shoqërorja, familjarja por unë mendoj që ka shumë lloje të saj”, thotë Elsa.

Përgjatë këngës “Mu” pjesa kulminante që fal emocion me ngritjet e zërit janë vargjet “ndryshe ish me dashtë, e shumë ndryshe ish me dashunu”. Përderisa “të duash” për Elsën mbetet edhe dashuria familjare, që ajo e merr shembull motrën e saj, ndërsa “të dashurosh”, për të shkon përtej saj.

“Të dashurosh është ta takosh një person që ndoshta as s’e njeh më parë, por të krijosh një lidhje në formën më të pastër të mundshme, e cila dallohet qysh në fillim nga gjuha e trupit, mënyra si shikohen personat, ndjesia në ajër”, shpjegon zëri i ri muzikor që premton shumë.

Arsyeja e emërtimit të kësaj kënge me emrin “Mu” qëndron te fakti që ajo përgjatë kësaj kënge tregon për mënyrën që kërkon të trajtohet dhe të duhet ajo. Ndërkaq, video-spoti i këngës mbetet nën kombinimin e ngjyrave dhe shfaqjen e një lule zambaku, për të cilën ajo thotë se shpreh pafajësi, njëjtë si mënyra se si ajo e ka parë dhe shprehur dashurinë në këtë këngë.

Mirëpo, kënga “Mu” ka një arsye pse ka qenë e pritur dhe e dashur për veshët e audiencës. Studentja e Fakultetit të Arteve Muzikore në Universitetin e Prishtinës, pati performuar para 4 vitesh në një nga lokalet e Prishtinës bashkë me Shpat Dedën dhe Fatjon Miftarin me këngët e saja autoriale, një ndër të cilat ka qenë edhe kjo që tanimë ka dalur në dritë. Nga interpretimet e saja audienca pati mbetur e fascinuar, madje disa edhe u patën përlotur. Mirëpo ani pse në këtë performancë ajo ka krijuar një lidhje emocionale të menjëhershme me publikun, ajo pati ndjerë një hezitim për skenën.

“Gjithmonë kam menduar që arti është shumë i sinqertë, në të jemi të zhveshur, jemi tërësisht vetja dhe kam pyetur veten se a do të doja të më njohin njerëzit kësi soji?”, shprehet Elsa Rraqi.

Muzika për Elsën ka filluar qysh në moshën 2 vjeçare, atëherë kur tok me të folurit kishte nisur edhe këndimin. Gishtërinjtë e saj kanë pasur takimin e parë me pianon sa ishte 8 vjeçe, në të cilën ajo ende vazhdon të luaj.

Pos pianos, ajo është e zonja edhe në shkrimin e teksteve ku thekson se përherë ndjehet e frymëzuar, duke u thelluar në realen dhe përditshmërinë që e rrethon. Ajo ka ndarë me lexuesit edhe një moment krejtësisht të rastësishëm të frymëzimit.

“Ka ardhur një fqinje te ne dhe duke folur me të ëmën tha: “mërzia e thanë edhe lisin, leje më njeriun”. Nga kjo frazë jam frymëzuar dhe menjëherë e kam shkruar një tekst, veçse kam inkorporuar diçka, “mërzia e than edhe lisin, njeriu s’ka gjithë rrënjë”, tregon kështu tekstshkruesja e këngëve.

Përderisa ajo këndimin dhe krijimin e sheh si çlirim shpirtëror, këtë rrugëtim nuk do ta ndal. Përveç 60 këngëve të saja, të cilat pret t’ia sjell publikut, ajo është e interesuar edhe në krijimin e versioneve moderne të këngëve të vjetra. Këtë veçse e ka nisur. Këngën “Njeri ku je” nga vëllezërit Gërvalla, “Mos ma pi rakinë konjak” të Haki Misnit, këngët e Osman Takës e disa të tjera, Elsa është duke i gatuar tashmë.

Rraqi përveç që do të mbetet një zë i ri dhe i veçantë në skenën muzikore të Kosovës, ajo do t’i shtoj vlerë kësaj fushe të artit edhe me tekstet e saja magjike. / KultPlus.com

“Se shembi tërmeti, por pushteti”, këngëtarët nga Zvicra, këngë për Teatrin Kombëtar (VIDEO)

Marco e Dario Zappa janë muzikantë nga Zvicra, prej vitesh të pranishëm me koncertet e tyre në Shqipëri dhe në Ballkan.

Ata i kushtuan një këngë teatrit dhe shembjes së tij me një muzikë dhe tekst prekës, duke përdorur edhe fjalë shqip.

Kënga ka edhe pamje nga shkatërrimi i godinës së Teatrit. Aty shihet aksioni i policisë për të shembur godinën e TK-së.

Ndërsa, në video ka edhe parrulla në mbrojtje të Teatrit. “Nuk e bëri tërmeti, e bëri pushteti”. Ndër të tjera, Zappa shprehet se edhe “unë jam shqiptar”.

“Shuat një qiri që ndriconte qytetin. Përse?”, thuhet ndër të tjera në teksin e muzikës. Më tej, në tekst nënvizohet edhe se “dhuna e një pushteti të kujton të kaluarën”.

Teksti i këngës në origjinal (italisht):

(Sirene)  Intro. Clarinetto

L’avete lasciato pian, piano morire,

l’avete ridotto pian, piano

a un rudere

poi un sabato, la notte,

il colpo di grazia!

Incuranti di tutti quelli

che per ventisette mesi,

ogni sera, ogni notte

hanno creduto, in questo sogno,

il loro cuore che pulsava.   Perché?

La violenza di un potere

che ricorda il passato…

Se  beri termeti,  (Ciò che non ha fatto il terremoto,

E beri Pushteti! lo ha fatto lo stato!)

Avete spento una candela

che dava luce alla città

E ci chiediamo: perché?

Come era bello suonare

in questo splendido teatro,

sì, un po’ vecchio e trasandato,

ma vero, caldo e molto amato.

Avete distrutto una storia,

soffocando ogni speranza.

Perché?   Perché?   Perché?…

La violenza di un potere

che ricorda il passato…

Se  beri termeti,  (Ciò che non ha fatto il terremoto,

E beri Pushteti! lo ha fatto lo stato!)

Avete spento una candela

che dava luce alla città

E ci chiediamo: perché?

Violino SOLO

Une JamTeatri!         (Io sono il teatro!)

Une Jam Shqiptar, (Io sono Albanese!)

Avete spento una candela

che dava luce…

che dava luce alla città!

Corno SOLO   +  sirena

Perché? Perché? Perché?…

Clarinetto SOLO

L’avete lasciato pian, piano morire,

l’avete ridotto pian, piano a un rudere

poi un sabato, la notte,

polizia e bulldozer!

Incuranti di tutti quelli che…

ogni sera, ogni notte,

hanno creduto, in quel teatro,

in quel cuore che pulsava.

Avete spento una candela!

Avete spento una fiamma!

Che dava vita a tutti… noi!

(Sirene Corno)

Avril Lavigne me këngë nga shtëpia, nderon punëtorët që po luftojnë pandeminë (VIDEO)

Këngëtarja Avril Lavigne, ka ripërpunuar këngën e saj “Warriors” për ta shprehur mirënjohjen e saj për punëtorët e shërbimeve shëndetësore.

Ylli kanadez i muzikës që është në izolim në Los Angeles, ka sqaruar se këngën e ka përpunuar në studion e shtëpisë së saj, teksa klipin e ka xhiruar në oborr.

“Është një dedikim për të gjithë mantelbardhët që janë në vijën e parë të frontit në luftën kundër koronavirusit. Ata janë heronjtë e vërtetë dhe kështu kam dashur që të falënderoj gjithsecilin prej tyre”, ka thënë Lavinge.

Kënga origjinale ishte realizuar si një rrëfim për telashet shëndetësore që kishte pasur ajo shkaku i sëmundjes Lyme, transmeton KultPlus.

“E sfidova atë sëmundje dhe e mposhta. Që prej asaj kohe, më duhet të jem në formën më të mirë të shëndetit”, ka thënë këngëtarja.

Lavigne debutoi në skenën botërore në vitin 2002 me albumin “Let Go”.

Që prej atij viti e deri më tani, ajo ka realizuar gjashtë albume dhe ka shitur mbi 40 milionë kopje nëpër botë.

Ajo ka thënë se njerëzit kanë kaluar shumë kohë në izolim dhe sipas saj, këto momente duhet t’i shfrytëzojnë për reflektim.

“Teksa bota ngadalësoi, njerëzit kanë më shumë kohë që të mendojnë për gjithçka”, ka thënë ajo. / KultPlus.com

Kënga me terma fyes për të moshuarit nxit protesta në Gjermani

Një këngë satirike për gjyshet dhe mjedisin ka ngjallur protesta para transmetuesit publik gjerman WDR. Qytetarët iu bashkuan protestës në një debat të përbashkët në lidhje me rolin e mediave që financohen nga shteti, shkruan Guardian.

Protestuesit dhe kundërshtarët e protestuesve kanë protestuar jashtë selisë së transmetuesit rajonal gjerman WDR në Cologne të shtunën, pas polemikave virale mbi një këngë për gjyshet dhe ambientin.

Forcat policore mbajtën larg rreth 30 protestues që ishin kundër WDR-së – disa prej të cilëve ishin anëtarë të grupit të ekstremit të djathtë – dhe një turmë më të madhe të kundërshtarëve më të rinj, disa prej të cilëve mbanin parullat, si dhe tregonin besnikëri ndaj: “E Premtja për të ardhmen”, “Prindërit për të ardhmen” dhe “Gjyshet për të ardhmen”.

Në mesin e grupeve protestuese pati edhe gjyshe, të targëtuara në këngën satirike të WDR-së, që i ka quajtur ato “derra të vjetër të ambientit” dhe më vonë target edhe i gazetarit të WDR-së, Danny Hollek, i cili i ka quajtur “derra nazistë”. Hollek që atëherë ka tërhequr fjalët e tij dhe ka kërkuar falje, mirëpo jo para se të pranonte kërcënime me vdekje. Anëtar të grupeve ekstreme të djathta gjithashtu u shfaqen para shtëpisë së tij.

Gjyshet ishin prezent në të dyja grupet, si në ato të krahut të djathtë ashtu edhe në ato të kundërshtarëve, dhe komentet e tyre dhe opinionet në lidhje me këngën dhe pasojat e mëvonshme patën në zemër të debatit rolin që mediat e financuara nga shteti duhet që të kenë.

Për Heidrun Genutt, një gjyshe e cila ka 58 vjet e që ka një nip 1 vjeç, ka thënë se arsyeja pse i është bashkuar protestës së të shtunës është komenti që kishte bërë Hollek.

Duke mbajtur një shenjë që shkruante “Gjyshja ime ishte një ‘Trummerfrau”, një term gjerman që u referohet grave që shiheshin si forca për rindërtimin e Gjermanisë pas Luftës së Dytë Botëror – Genutt ka thënë se ajo ka protestua kundër komentit, që çdokush i cili nuk pajtohet me këngën e WDR-së është një derr nazist.

“Ne jemi njerëz normalë, ne vetëm duam që të vazhdojmë e të bëjmë një jetë normale për veten tonë, fëmijët dhe nipat e mbesat”, ka thënë ajo. Ka shtuar se ishte ofenduar edhe nga kënga pasi që ajo gjithmonë i ndan mbeturinat dhe se ajo është një person që i hap pastën e dhëmbëve për të shfrytëzuar edhe pikën e fundit.

Yadranka 70-vjeçare pajtohet me të. “Komenti ‘gjyshja është një derr nazist’ me të vërtetë më ka nervozuar”, ka thënë ajo. “Unë nuk dua që të mbështes programe të tilla me para”.

Yadranka ka thënë se mediat e shtetit nuk “raportojnë në mënyrë neutrale më” dhe ka shtuar se “ata nuk përfaqësojnë interesat e njerëzve që i financojnë ato”. Ajo ka thënë se është e rëndësishme që të protestojë “për t’iu treguar se e kanë tejkaluar kufirin”.

Në anën tjetër të protestuesve, 67-vjeçarja Martina, e cila ka një nip e një mbesë, 7 dhe 4 vjeç ka thënë: “Mua nuk më pëlqen termi ‘Sau’, sepse nuk jam një derr. Jam një person. Mirëpo përmbajtja e këngës është komplet e drejtë dhe njerëzit duhet që të kenë të drejtë që të flasin për këtë. Unë gjej gjithçka në këtë këngë të saktë përveç pjesës së ‘derrit’. Sigurisht, ju mund të keni mendim të kundërt, mirëpo kur është kundër krahut të djathtë ju duhet të keni vetëm një mendim”.

Edhe 69-vjecarja Christa e cila ka tre nipër e mbesa, 11, 4 dhe 5 vjeç, ka thënë se nuk ishte impresionuar nga këngët, dhe ka menduar që është “qesharake” që të ndihesh e fyer nga ajo.

Për të e vetmja arsye që i është bashkuar protestës së të shtunës është që ajo nuk ka dashur që statusi i saj si gjyshe të përdoret nga krahu i djathtë. “Ata kanë thënë se ne jemi duke mbrojtur gjyshet gjermane – dhe unë nuk dua asnjë mbrojtje nga ta”, ka thënë ajo. “E bëj këtë mjaft mirë edhe vetë”. /KultPlus.com

Vesa Luma paralajmëron për këngën e re, bashkëpunim me artisten me famë botërore

Këngëtarja Vesa Luma e cila prej vitesh jeton në Zelandën e Re, mbrëmë në po këtë vend është takuar me një tjetër artiste shqiptare të njohur botërisht, shkruan KultPlus.

Bëhet fjalë për këngëtaren Njomza Vitia e cila karrierën e saj po e zhvillon në Amerikë, por një koncert që ajo mbajti mbrëmë në Zelandë të Re bëri që të dy shqiptaret të takohen dhe me këtë rast të konfirmojnë një lajm të ri.

Vesa, përmes një statusi në Instagram ka bërë të ditur që ato janë bërë bashkë për të sjellë një projekt, teksa edhe ka shpërndarë një fotografi të përbashkët.

 “Çfarë nate, Njomza ju jeni e mahnitshme. Çfarë zëri, çfarë performance, shumë krenare me juve. Mezi po pres për këngën tonë, ky është lajmi”, ka shkruar krahas këtij imazhi Vesa.

Një bashkëpunim që po pritet me padurim është edhe ai në mes të Bebe Rraxhës dhe Mc Kreshës.

Kujtojmë që Njomza këtë erdhi në Kosovë për të performuar në festivalin “Sunny Hill”. / KultPlus.com

https://www.instagram.com/p/B3WkgXaJBWc/

Jehona Lumi publikon këngën e re “El amor”

Këngëtarja e re e estradës kosovare, Jehona Lumi ka publikuar projektin e saj më të ri muzikor.

“El amor”, është këngë ritmike ndërsa videoklipi është mjaft veror, në të cilin këngëtarja Lumi vjen me disa skena mjaftë atraktive, shkruan KultPlus

Për realizimin e këngës është përkujdesur producenti i njohur Zzap, e ndërsa për tekstin është vet Jehona.

Për videon muzikore është kujdesur regjisori Visar Loku.

Ndryshe, kënga “El amor”, pritet të pëlqehet nga fansat e shumtë të Jehonës. /KultPlus.com

“Lum Lumi i Lirë”, kënga që bashkoi artistët drejt mbrojtjes së lumenjve (VIDEO)

Artistë shqiptarë janë bashkuar në një këngë për të mbrojtur lumenjtë e Shqipërisë. Kënga e gjelbër “Lum Lumi i Lirë” përpiqet të kontribuojë pro kauzave në mbrojtje të lumit Valbonë dhe lumit të fundit të egër në Europë, Vjosës.

Muzikantë, producentë, muzikologë, historianë e artistë shqiptarë dhe ndërkombëtarë: Elina Duni, Eda Zari, Linda Rukaj, Rhani Krija, Vlashent Sata, Emiljano Dhimo, Shpat Deda, Gert Kapo, Henning Jung, Kleidi Eski, Sokol Çunga, Mikaela Minga, të gjithë së bashku, bashkëpunuan për të realizuar këngën dhe videon “Lum Lumi i Lirë“. Kjo këngë (një nismë e duos Duni – Zari) lindi si nevojë për përhapjen e informacionit mbi padrejtësitë sistematike që po u bëhen lumenjve, natyrës, si dhe për të mbështetur zërin protestues të banorëve pranë zonave të këtyre lumenjve.

Njëkohësisht, kënga vlen për të fuqizuar ndërgjegjësimin e çështjes në mbarë shoqërinë tonë. Muzika është e gjithëpranishme dhe gjithëpërfshirëse në jetën tonë. Ajo stimulon kënaqësi në tru dhe në gjendjen emocionale. Sidomos kënga është përherë e pranishme në të përditshmen e gjithkujt. Muzika, kënga, nuk është vetëm medium argëtues apo element që na mbledh për t’u dëfryer. Kënga është një mjet i shkëlqyeshëm efektiv, përmes të cilit transmetohet informacioni mbi çështjet e natyrës dhe ç’po ndodh me të, mbi jetën apo problemet sociale. A mund ta ndryshojmë botën me një këngë? Jo, por një këngë ndryshon botëzën dhe perceptimin e secilit prej nesh! Një këng solidarizon, frymëzon, shpëton, fal shpresë. Shqetësimet dhe vullneti për të krijuar një këngë-protestë rrjedhin nga niveli i vetëdijesimit për atë të keqe të pakthyeshme që po ndodh në Valbone, në Vjosë, apo ajo që po ndodh me ujin, ajrin, natyrën, tokën shqiptare, por edhe për natyrën e gjithë botës. Kjo këngë jep “ZA” për shërim, i piskat publikut, për t’i lënë secilit thellë një jehonë vetëdijeje.

Tek “Lum Lumi i Lirë” artistët me vetëdije morën nismën jo vetëm për të prodhuar muzikë, jo vetëm për t’i mëshuar thirrjes: “S’duam tuba, s’duam diga, s’duam pengesa edhe prita, duam çdo njeri i mirë të thërrasë: Lum Lumi i Lirë!”, por krijuan një këngë që ka një qëllim edhe më të epërm: Ku ka lumenj, ka gjithmonë arsye për të ndërtuar ura mbi të cilat ecim dhe përqafojmë hallet e njëri–tjetrit. Është një përpjekje për të bashkuar dhe solidarizuar aktivistët, shoqatat, si ato pro Valbonës dhe Vjosës, por edhe cilindo individ që punon e shqetësohet për ekzistencën dhe vlerat e shoqërisë sonë.

Nga ana tjetër, kënga dëshiron të shpërndajë mesazhin se nuk ka natyrë, lumë, ajër, tokë që të trajtohet si një i nënës e një i njerkës. Në mënyrë të pa partishme dhe vetëm duke bërë përpjekje të përqendruara, por të bashkuar, mund të mposhten vendimmarrësit e gabuar dhe planet e tyre fatkeqe. A do të mundemi të ndërgjegjësohemi për një të vërtetë të madhe se, as në një të ardhme të afërt, por as të largët, kurrë, s’ka për të pasur një Shqipëri të dytë me këtë natyrë si kjo që kemi? Prandaj ejani ta mbrojmë.

Ky është apeli i artistëve si vullnetarë, qytetarë, kolegë, bashkëkombës, mbi të gjitha si NJERËZ. Mos harro të thërrasësh: Lum Lumi I lirë! / KultPlus.com

(Të drejtat autoriale të tekstit përshkrues © Eda Zari)

Të gjitha vallet më pëlqejnë që i luan bota, por më shumë zemrën ma ndez e imja Shota (VIDEO)

Vallja e Shotës është një ndër vallet më të njohura në Kosovë. Vallja luhet ne disa variante: dy vajza dhe dy djem bëhen çifte. Është valle lirike e cila luhet në të gjitha tubimet festive, shkruan KultPlus.

Në mars të vitit 2013, Kuvendi i Republikës së Kosovës miratoi një ligj që e bën Shotën një pjesë të aktiviteteve kulturore të Ansamblit Kombëtar të Këngëve dhe Valleve. Me veshje tradicionale kjo valle, sjellë një atmosferë të veçantë në të gjitha tubimet festive.

Dashuria ndaj kësaj valle reflektohet si tek valltarët që me lëvizjet e tyre e jetësojnë atë, po ashtu dhe tek shikuesit që me duartrokitje e përcjellin atë. Andaj KultPlus sot ju sjellë një këngë që më së miri flet për dashurinë e shqiptarëve ndaj kësaj kënge. Kjo këngë ka qenë një hit i viteve të 90’ta.
KultPlus ju sjellë tekstin e kësaj këngë së bashku me interpretimin e Gafur Muratit.

E dua sangon,e dua sangon zemra ime thërret
Karnevalin brazilian ëndërr e kam ne jetë
Edhe katrin edhe shqiptatin hiq si adhuroj
Çdo pjesë e trupit me vallëzon’
Kur t’i dëgjoj
Ne te vërtet çdo valle unë e dua
Zemër muzikale, rreh në mua

Refreni
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota e, imja Shota, e imja Shota

E dua tangon,e dua tangon
Eni pra të vallëzojmë
Boten tonë te bukur rinore
Edhe me ta zbukurojmë
Dhe flamenkon edhe flamenkon pa mas me pëlqejnë
Sa herë që atë e luaj zemrën ma rrëmben
Ne te vërtet çdo valle unë e dua
Zëmër muzikale rreh për mua

Refreni:
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota e imja Shota e imja Shota

Refren:
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota
Te gjitha vallet me pëlqejnë
Qe i luan bota
Por ma shumë zemrën ma ndez e imja Shota, e imja Shota, e imja Shota.

Rita Ora paralajmëron këngën bazuar në tregimet e fansave

Këngëtarja me famë botërore Rita Ora në një intervistë për Daily Star ka paralajmëruar këngën e re, që thotë se është e bazuar në tekstet e fansave.

Kënga quhet “Proud” dhe është në partneritet me “Absolut” në projektin “The Open Mic”, teksti i së cilës është shkruar në bazë të teksteve të fansave, transmeton Koha.net.

“Kur më kishin treguar se ishte prej fansave dhe njerëzve që zakonisht nuk dëgjohen apo s’mund të ndriçojnë tregimet e tyre, thashë: ‘kjo është perfekte, sepse mund të shkruaj një melodi, një këngë për tregimet e tyre’. E kam bërë këtë dhe kënga titullohet ‘Proud’, dhe është një incizim i mrekullueshëm, e cila do të publikohet gjatë javës së Grammyt”, është shprehur ajo./ KultPlus.com

Bebe Rexha me dy këngë në Top 10 të iTunes

Këngëtarja shqiptare Bebe Rexha po vazhdon të korrë suksese me këngët e saj.

Përmes një postimi në Facebook ajo ka bërë të ditur se është në Top 10 në iTunes me dy këngë të saj, transmeton Koha.net.

“Meant to Be” në bashkëpunim me Florida Georgia Line mban vendin e pestë, përderisa me këngën më të re “Home”, në bashkëpunim me Machine Gun Kelly dhe X Ambassadors, mban të nëntin./ KultPlus.com

Festohet 50-të vjetori i themelimit të ansamblit ‘Kastriotët’ (VIDEO)

Ansambli i këngëve dhe valleve “Kastriotët”nga Ferizaj ka organizuar koncert me rastin e 50 vjetorit të themelimit.

Shumë valle e këngë u prezantuan nga disa ansamble nga trojet shqiptare./ KultPlus.com

Paul McCartney, me këngë për Donald Trump në albumin e ri (FOTO)

Duket se këngëtari dhe kompozitori i njohur britanez, Paul McCartney, ka për të thënë diçka për presidentin e Shteteve të Bashkuara të Amerikës, Donald Trump, në albumin e tij të ri, shkruan KultPlus.

Këtë e bëri të ditur vetë këngëtari, McCartney gjatë një vizite që u kishte bërë studentëve të artit në Institutin e Artit në Liverpool, ka shkruar Billboard, përcjellë KultPlus.

‘Nganjëherë situata në botë bëhet kaq e çmendur, saqë duhet t’i japësh një adresë’, ka thënë përpara studentëve, këngëtari 75 vjeçar, McCartney.

Të bëjë një këngë e cila do të kritikonte, Donald Trup, nuk është edhe krejt e papritur, pasi McCartney, ka përkrahur Hillary Clinton në vitin 2016, dhe së fundmi në një intervistë të realizuar me gazetën australiane, ‘Daily Telegraph’ McCartney ka kritikuar presidentin e SHBA-ve.

‘Unë nuk e përkrahi Donald Trupin. Ai është paragjykues, dhe paragjykimet e tij, me raste janë edhe në mes të njerëzve’, ka thënë këngëtari, Paul McCartney, i cili tani mendimin dhe kritikat e tij për Trump, do t’i sjellë përmes këngës.
Lista e muzikantëve që kanë kënduar apo janë shprehur kundër Trump përfshin Fiona, Death Cab, Roger Waters, Joan Baez, Carole King, Loudon Wainewright III, Billy Bragg dhe Lady Gaga, e cila të mërkurën, lëshoi një deklaratë të ashpër në Twitter, pasi Trump njoftoi ndalimin ushtarëve transgjinorë në ushtrinë amerikane. /KultPlus.com