Këngëtarja shqiptare me famë botërore, Dua Lipa në një intervistë për Vogue France tregon destinacionet e saj të preferuara të pushimeve, vendin e parë të të cilave e zë Shqiparia.
Ministrja e Turizmit dhe Mjedisit, Mirela Kumbaro ndau sot shkrimin e Vogue, ku përmes Dua Lipës promovohet edhe turizmi në Shqipëri.
“Dua që na bën krenarë dhe na promovon më së miri. Në Vogue France destinacioni i saj numër 1 për pushimet është Shqipëria”, shkruan Kumbaro.
“Nga trashëgimia shqiptare, Dua Lipa pëlqen të shfrytëzojë sa më shumë verën në shtëpi. Një destinacion që thjesht pret të zbulohet, Shqipëria është e mbushur me plazhe sublime, shkëmbinj shkëmborë dhe fshatra tradicionalë, të gjitha këto mbeten relativisht të paprekura nga turizmi masiv”, shkruan Vogue. /atsh / KultPlus.com
Rritja e pandalshme e turistëve që po e zgjedhin Shqipërinë konfirmohet edhe nga të dhënat e Institutit të Statistikave (INSTAT).
Raporti i fundit i INSTAT-it tregon se numri i shtetasve të huaj që kanë hyrë në territorin shqiptar gjatë muajit korrik shënoi rritje me 26.2 %, duke arritur në 1 770 724, pjesa m♪7 e madhe e të cilëve europianë.
Referuar INSTAT-it, numri i shtetasve të huaj që vizituan vendin tonë me origjinë Europën, gjatë korrikut llogaritet 1 694 657.
Nga Amerika u regjistruan 45 821 shtetas, ndërsa lindja e Mesme 14 805 shtetas.
Vetëm gjatë këtij sezonit turistik veror, nga majii deri në fund të korrikut numërohen 3 482 836 shtetas të huaj që vizituan vendin tonë.
Autoritetet në vend kanë deklaruar se numri i pushuesve që kanë zgjedhur Shqipërinë këtë vit, si destinacion ka kaluar priitshmëritë, ndërsa një raport i Organizatës Botërore të Turizmit e renditi vendin tonë të parin në Europë për 3 muajt e parë të këtij viti për rritjen e numrit të turistëve. Ndërsa në botë, vendi ynë renditet në vendin e tretë pas Katarit dhe Arabisë Saudite.
Jo vetëm bregdeti, por edhe Tirana dhe Alpet janë destinacionet e preferuara.
Në total, mbi 5.2 milionë të huaj vizituan Shqipërinë nga janari deri në fund të korrikut. /KultPlus.com
Edhe pse Shqipëria nuk është një destinacion shumë i njohur turistik në mesin e britanikëve, Riviera Shqiptare u ka lënë përshtypje pozitive turistëve që e vizituan këtë verë, sipas një artikulli të gazetares, Hope Brotherton të botuar në “The U.S. Sun”.
Plazhet e saj të bukura dhe çmimet e lira që ofrohen e kanë bërë atë një vend atraktiv dhe një destinacion për mijëra pushues nga e gjithë bota.
Një grup vajzash britanike përmes videove në rrjetet sociale kanë reklamuar bregdetin e paeksploruar të Evropës, i cili sipas tyre ofron pije të lira dhe madje shezllone falas.
Ato kanë postuar në rrjetin social Tik-Tok aventurën e udhëtimit mahnitës duke u surprizuar me bukuritë e Ksamilit dhe Rivierës Shqiptare.
Në mbishkrimin sipër videos shkruhej: “Ishim në një udhëtim në një resort plazhi në Shqipëri. Kemi shpenzuar 12 dollarë (9,50 £) për një shishe me vere të zonës të cilën e kemi shijuar gjatë relaksit në ujërat më të kthjellta të para ndonjëherë”.
“U relaksuam deri në perëndim të diellit dhe shijuam një drekë autentike mesdhetare për vetëm 10 dollarë (7,90 £)”, shkruajnë turistet britanike.
“Kudo që ecëm hasëm njerëz shumë miqësorë”, shkruajnë ato.
Videoja pati 600,000 shikime në platformën e medias sociale, ndërsa përdoruesit lanë komente të shumta.
Një lexues komentoi: “Kjo ka qenë përvoja ime shqiptare! Është absolutisht e nënvlerësuar, por shpresoj që të mbetet kështu”.
Një tjetër lexues shtoi: “Sapo e shtova këtë në listën time të dëshirave”, ndërsa një i tretë shkroi: “Jam shumë i interesuar të vizitoj Shqipërinë”./atsh/KultPlus.com
Sunshade umbrellas and deckchairs on the beautiful Ksamil beach, Albania.
Organizata Botërore e Turizmit e rendit Shqipërinë të tretën për rritjen në turizëm, pas Katarit dhe Arabisë Saudite.
Kryeministri Edi Rama publikoi sot statistikat më të fundit të OBT-së, të cilat i referohen periudhës qershor 2022-qershor 2023.
“Ja edhe tabela krahasuese nga qershori vjet deri në qershorin sivjet, e sapopublikuar nga Organizata Botërore e Turizmit, ku Shqipëria renditet e treta për rritjen në turizëm, pas Katarit dhe Arabisë Saudite, po pa Kupën e Botës”, shkruan Rama.
Sipas INSTAT, numri i turistëve që vizituan Shqipërinë vijoi rritjen edhe përgjatë muajit qershor.
Konkretisht, numri i vizitorëve jorezidentë është rritur me 76.4 % në qershor, krahasuar me qershorin e vitit të shkuar. Në total numri i vizitorëve gjithsej është rritur me 49.7 %, në krahasim me qershorin e 2022.atsh
Saranda vitet e fundit është kthyer në një nga destinacionet më të preferuara turistike për turistët e huaj që vizitojnë vendin tonë me kroçera dhe jahte turistike.
Drejtori i portit të Sarandës, Alket Qendro tha për ATSH-në se “nga janari deri në fund të korrikut në portin e Sarandës kanë mbërritur 32 kroçera dhe anije turistike”.
Sipas tij, gjatë verës ka pasur një numër të lartë të jahteve luksoze që kanë vizituar Sarandën.
“Në janar-korrik në port janë ankoruar 511 jahte turistike”, shtoi ai.
Qendro u shpreh se “kroçerat kanë pasur në bord turistë nga vende të ndryshme të botës si Amerika, Franca, Austria, Belgjika, Brazili, Bullgaria, Danimarka, Gjermania, Hungaria, Italia, Spanja, Zvicra, Ekuadori, Polonia, etj ”, theksoi Qendro.
Qendro tha se “vetëm në muajin korrik kanë vizituar Portin e Sarandës 9 kroçera dhe tragete turistike si dhe 230 jahte”.
Sipas tij, muaji gusht dhe 8 mujori i këtij viti pritet të ketë një tjetër rritje në krahasim me 2022.
Turistët që vijnë me kroçera kanë vizituar sitet turistike e arkeologjike të Sarandës, Gjirokastrën, si dhe kanë shijuar kulinarinë shqiptare të zonës./atsh/KultPlus.com
Qyteti i një mbi një dritareve, ngritur buzë lumit Osum rreth 2400 vjet më parë, çdo vit tërheq me historinë dhe arkitekturën e tij mijëra turistë vendas e të huaj.
Kryetari i bashkisë së Beratit, Ervin Demo, në një intervistë për ATSH-në theksoi se “këtë vit kemi një rritje rreth 50% në krahasim me vitin 2022, ku periudha janar- korrik 2023 numëron rreth 400,000 mijë turistë vendas e të huaj”.
“Rreth 80% e turistëve në Berat vijnë nga vendet e huaja, kryesisht Evropa, por edhe Azia , SHBA , Kanada dhe Australia. Gjermanët, polakët, spanjollët, francezët, austriakët, italianët janë në top listën e turistëve të huaj’, tha Demo.
Berati ka një sërë pikash turistike që zgjojnë interesin e turistëve, u shpreh Demo, disa rej të cilave janë :Qendra Historike e qytetit, Kalaja, Gorica Mangalemi qe kanë pasuri UNESCO, Muzeu Ikonografik Onufri, Qendra Mesjetare, objektet e kultit Bizantin dhe Xhamitë e vjetra të periudhës Otomane.
Por, vitet e fundit turistët po preferojnë edhe atraksionet e eko-turizmit, fshatrat turistik Roshnik, Sinjë , Drobonik, kantinat e verës, aktivitetet rafting në Lumin Osum, ngjitje në malin e Tomorit, hedhje me parashuta nga Mali Shpirag, kanoe në liqenet e Tomorit, ecje me biçikletat malore në rrethinat e Beratit, vizitë në Kanionet e Osumit, pjesëmarrje në turret e gastronomisë në agrobizneset në fshatrat turistikë etj.
Pyetjes se çfarë ka bërë bashkia për promovimin e këtyre pikave turistike, Demo tha se “në aspektin e shërbimeve, kemi përmirësuar ndjeshëm promovimin e Beratit si një destinacion i rëndësishëm i turizmit ndërkombëtar, duke përgatitur një paketë të plotë brandimi dhe marketing të qytetit, website, rrjete sociale, aplikacione mobile, broshura informative, informacionin që jepet në zyrën e Info Point Turistik të bashkisë.
Gjithashtu, shtoi Demo, kemi ndërmarrë një fushatë të gjerë promovimi të bizneseve turistike, duke nxitur edhe krijimin e një rrjeti të aktorëve lokale për menaxhimin e destinacionit dhe koordinimin për përmirësimin e shërbimeve turistike.
Sa i përket masave të marra nga bashkia për mbarëvajtjen e sezonit turistik, Demo u shpreh se “bashkia ka përgatitur një plan të detajuar masash për sezonin turistik, i cili parashikon shërbimet e shtuara në lagjet muzeale dhe në gjithë zonën që frekuentohet nga turistët”.
“Pastrimi, gjelbërimi, ofrimi i informacionit në Info Point të Bashkisë Berat, rregullimi i transportit nëpërmjet Terminalit të autobuzave në periferinë e qytetit, ofrimi i parkimit nëntokësor në Qendrën e Qytetit, me një kapacitet 200 mjete, është duke u ndërtuar parkim i dedikuar edhe në lagjen Goricë”, tha Demo .
Bashkia ka ofruar gjithë kapacitetet e saj për sezonin, duke nxitur eventet kulturore, koncerte, panaire, shfaqje, etj, të cilat kanë rritur interesimin e turistëve.
Sa i përket investimeve që po kryhen nga bashkia e Beratit për t’i ardhur në ndihmë zhvillimit të turizmit dhe jo vetëm, Demo tha se “bashkia Berat ka pasur si prioritet nxitjen e zhvillimit të turizmit duke filluar zgjidhjen e disa problemeve strukturore, që kishin të bënin me rritjen e kohë qëndrimit të vizitorëve në qytet dhe zgjerimin e aktiviteteve të lidhura me eksperiencat dhe përjetimet e turistëve”.
“Projektet në infrastrukturë kanë bërë të mundur rehabilitimin dhe restaurimin e Qendrës Historike të Beratit, ku përmendim projektin e rehabilitimit të siluetës urbane në Goricë duke krijuar një pedonale të bukur buzë lumit dhe pranë lagjes muzeale, restaurimet në Mangalem, rruga e Kalasë, Qendra Mesjetare dhe zona e Muzeut Etnografik, krijimi i një sheshi të bukur tëk Porta e Pashait në Mangalem, krijimi i 100 km shtigje për biçikleta malore në rrethinat e Beratit, shtigjet e biçikletave në fshatin turistik Roshnik, duke përmirësuar ndjeshëm aksesin e turistëve drejt pikave me interes kulturor, historik apo të eko-turizmit”, theksoi Demo.
Bashkia Berat ka organizuar një paketë të plotë eventesh, stacione vjetore, ku turistët ndjekin aktivitetet e lidhura me kulturën vendase.
Demo tha se “ndër festivalet më të rëndësishme përmendim Festivalin e Verës, edicioni i parë i të cilit u organizua vitin e kaluar dhe ishte një sukses i vërtetë me rreth 20,000 vizitorë dhe do organizohet edhe këtë vit në ditët e fundit të shtatorit dhe fillimin e tetorit, ku do të ketë pjesëmarrjen e kantinave më të mira të Shqipërisë dhe Beratit, i cili është qarku me më shumë kantina vere dhe nga kantinat më të mira në Shqipëri. Në Berat ka 12 kantina”.
Gjithashtu, vijoi Demo, gjatë periudhës së dimrit organizojmë Festivalin e Dimrit me evente, panaire, festa gastronomie dhe eventin ‘’Mangalem’s Shade’’ ku shfaqet projektim me drita, kompozime të pikturave të Onufrit, afreske nga kishat Biznatine, mbi shtëpitë karakteristike në Mangalem.
“Përgjatë vitit organizojmë në muajin prill ‘’Maratonën e Gjelbër’’ me pjesëmarrjen e 200 garuesve, të cilët eksplorojnë zonën historike dhe rrethinat e qytetit, Festën e Qershisë në muajin Qershor në fshatin Drobonik, Festivalin e Xixëllonjave në muajin korrik ku promovojmë kulturën vendase, Festën e Fshatit Roshnik në Shtator, Festën e Ullirit në fshatin Bilcë në muajin tetor dhe evente gjatë fundjavave të cilat promovojnë vlerat e kulturës sonë”, tha Demo./atsh/KultPlus.com
Vetëm 4 kilometra larg qytetit të Shkodrës, pasi lë “Urën e Bunës” dhe merr rrugën në të djathtë të shfaqet Shiroka, një nga lagjet më të veçanta të Shkodrës, e vlerësuar si një prej bukurive mahnitëse të veriut buzë liqenit të Shkodrës dhe rrëzë malit të Taraboshit.
Bashkia e Shkodrës publikoi sot disa fotografi nga Shiroka, të cilës investimet e viteve të fundit i kanë ndryshuar faqen, duke i dhënë një rrugë të re, pedonalen brigjeve të liqenit, rehabilitimin e plazheve të vogla dhe së fundmi edhe moli për varkat lundruese.
Ajri i freskët, që vjen nga thellësitë e Alpeve, filtrohet në ujërat e liqenit dhe vjen i shëndetshëm këtu, duke e bërë Shirokën një nga joshjet më të veçanta për të kaluar disa orë ndryshe për shkodranët, por edhe për turistët vendas dhe të huaj.
Shiroka ka histori qindravjeçare dhe kjo mund të vërtetohet nga disa zbulime arkeologjike, që janë bërë në afërsi të saj, në vendin e quajtur “Ullini i vetun”, në vitin 1959, të cilat sot gjenden në muzeun e qytetit.
E njohur që në shekullin e 19-të për aftësitë kurative, Shiroka shumë shpejt do të bëhej një nga zonat më të famshme në vend.
Kjo zonë turistike shquhet për florën dhe faunën e pasur, ku jetojnë në harmoni shumë lloje bimësh, peshqish, shpendësh dhe kafshësh. Pjesa më e madhe e faunës përbëhet nga shpendët.
Numërohen gjithsej 240 lloje, ku më shpesh syri të ndesh pulëbardhat. Për të apasionuarit e peshkimit, fauna ujore ofron rreth 65 lloje peshqish. Më i famshmi krapi, por jo vetëm, edhe karasi, gjuca etj. Kjo pasuri e faunës dhe florës, e bën këtë zonë një ekosistem shumë të veçantë dhe atraktiv./ atsh / KultPlus.com
Çmimet për pushime në Pulia (rajon në Italinë e Jugut) janë shumë të larta dhe shumë më të larta se në vende të tjera, si Greqia, Shqipëria, shkruan faqja e internetit bari.corriere.it.
Për shembull sipas informacioneve një familje me katër anëtarë shpenzon nga minimumi 160 deri në maksimum 500 euro në ditë.
Pas rekordeve të periudhës së lulëzimit dhe pranive në rritje graduale dhe progresive të regjistruara vitet e fundit, a po humbet Pulia tërheqjen e saj turistike?
Është një reflektim që përshkon operatorët në çdo sektor, nga resortet bregdetare te hoteleria, nga restorantet te tregtarët, të prekur edhe pse jo ende të shtangur nga rënia e pamohueshme në këtë këst të parë të sezonit veror.
Shifrat raportojnë një rënie prej 20 për qind të frekuentimit, e cila, në mënyrë të pashmangshme, reflektohet edhe në sektorë të tjerë të lidhur ngushtë me turizmin.
Në Galipoli, një qytet jugor shpenzimet arrijnë deri në 500 euro në ditë
Arsyeja kryesore, sipas treguesve të tregut, është rritja e tarifave dhe çmimeve. Shoqatat e konsumatorëve kanë kryer sondazhe në terren dhe kanë bërë pyetje që tregojnë se një familje mesatare italiane ka shumë vështirësi për të organizuar pushimet në Pulia.
Ka dallime midis zonave të ndryshme turistike të Pulias, por realiteti është një: çmimet janë të larta.
Nga sondazhet duket se në Salento një familje me katër anëtarë që synon të kalojë një mëngjes në plazh, të hajë në një restorant dhe të flejë në një shtrat dhe mëngjes, një natë duhet të shpenzojë mesatarisht. prej 400/500 euro. Dhe kjo shifër vetëm për një ditë.
Duke hyrë në detaje dhe duke përjashtuar zgjidhjet luksoze, për shembull në Galipoli një ombrellë dhe dy shezlong mund të kushtojnë nga 35 deri në 50 euro në ditë; një dhomë dyshe në një shtrat dhe mëngjes nga 106 deri në 265 për strukturat më elegante; për restorantin nga 35 në 150 euro.
Situata paraqitet disi më ndryshe në Gargano. Këtu një familje me katër anëtarë mund të shpenzonte mesatarisht 300 deri në 400 euro. Konkretisht në Vieste shpenzoni nga 25 deri në 40 euro për një çadër dhe dy shezlong, nga 95 në 150 për një dhomë dyshe në një shtrat dhe mëngjes dhe nga 30 në 150 në një restorant për drekë.
“Fluksi i ulët i turizmit në Pulia dhe rënia e frekuentimit është për shkak të rritjes së çmimeve të shërbimeve turistike, shoqëruar me vështirësinë ekonomike për shkak të çmimit të lartë që ka zbrazur xhepat e familjeve puliane. Së pari Covid, pastaj kriza energjetike, me pasojë rritjen e çmimeve të nevojave elementare, bëri që shumë familje puliane të hiqnin dorë nga pushimet e tyre ose në çdo rast të zgjidhnin destinacione më të lira”, sipas operatorëve turistikë. /atsh/KultPlus.com
Juristi Kreshnik Spahiu tha në një intervistë për Euronews Albania se mungesa e traditës turistike dhe arsimimit përkatës bën që Shqipëria të jetë ende e papërgatitur në sektorin e turizmit.
Sipas tij, fakti që sot hapin hotele me 5 yje njerëz nuk kanë bërë asnjë ditë shkollë për turizëm apo nuk kanë asnjë njohuri rreth tij, bën që të mos e shohin klientin si zot shtëpie por si qenie për ta grabitur.
“Shqipëria është e papërgatitur se nuk ka traditë turistike. Shqipëria ka qenë një lloj bunkeri, s’e ka zhvilluar kurrë turizmin. Turistët e rrallë që kalonin në Shqipëri na shikonin si ishulli i Tarzanit. Ne nuk jemi të përgatitur në kuadrin arsimor. Ata që sot hapin hotele me 5 yje nuk kanë bërë 5 ditë shkollë për turizëm, nuk kanë bërë 5 ditë si turistë, nuk kanë shkuar në 5 vende turistike. Kjo sjell turizëm agresiv, që mendon sot për sot. Pronarët e hoteleve e shohin klientin jo si zot të shtëpisë, por si qenie për ta grabitur”, tha Spahiu. / KultPlus.com
Mediet ndërkombëtare vijojnë t’i bëjnë jehonë Shqipërisë turistike, kësaj here duke u ndalur edhe te festivalet e shumta verore që tërheqin turistë nga gjithë bota.
Kryeministri Edi Rama publikoi sot në rrjetet sociale shkrimet e prestigjozes amerikane “New York Times” si dhe të britanikes “Metro” të cilat shkruajnë për “Kala Fest”.
Rama vlerësoi se festivalet verore që po shtohen vit pas viti si “Kala” në Dhërmi, “South Outdoor” në Borsh, “UNUM” në Shëngjin, “Lova” në Livadh etj, janë ndër ambasadorët më të mirë të promovimit, zgjatjes dhe pasurimit të sezonit turistik.
“Për Shqipërinë mediat ndërkombëtare ‘New York Times’ dhe ‘Metro’, të cilat shkruajnë për ‘Kala Fest’ si një event për t’u prezantuar denjësisht me mrekullitë e bregdetit tonë, ndërsa festivalet verore që po shtohen vit pas viti si ‘Kala’ në Dhërmi, ‘South Outdoor’ në Borsh, ‘UNUM’ në Shëngjin, ‘Lova’ në Livadh etj, janë ndër ambasadorët më të mirë të promovimit, zgjatjes dhe pasurimit të sezonit turistik”, shkruan Rama.
Festivali veror “Kala Festival” në Dhërmi (31 maj-6 qershor) përveç atmosferës për adhuruesit e muzikës elektronike, është edhe një promovim i mirë për turizmin e Shqipërisë.
Këtë vit morën pjesë mbi 3000 pjesëmarrës në javë, nga Britania e Madhe dhe vende të tjera europiane, si dhe DJ të famshëm ndërkombëtarë.
Festivali vjen si miksim i përkryer për promovimin e bregdetit, zhvillimin e ekonomisë lokale, konsolidimin e festivaleve dhe nisjen e sezonit veror më herët se çdo vit./ atsh / KultPlus.com
“Janet Reineck pati vizituar Pejën dhe Rugovën mes viteve 80 e 90, për të mësuar më shumë rreth traditave, zakoneve dhe jetës që bëhej në Rugovë atë kohë. Një vajzë e re nga fshati Kuqishtë i Rugovës, që studionte për infiermeri, me emrin Dushe Gjevukaj, u pati bërë guida personale e Janetit, ndërsa edhe sot pas rikthimit të Janetit në këto bjeshkë, të dyja u takuan përsëri në Bjeshkët e Rugovës, thuhet në njoftimin e faqes zyrtare “Ku me shku n’Pejë””.
“Si pjesë e një Etno-Tour me 10 amerikanë të tjerë, e në shoqërimin e guidës Arlinda Shatri, Janet bashkë me grupin vizituan disa pjesë të Rugovës, të cilat i paraqiti edhe përmes fotografive, nga to po i ndajmë disa edhe me ju.
Përgatitja e pites dhe flisë tradicionale, vizita në Liqenin e Kuqishtës, fjetja në shtëpinë e Dushe Gjevukajt në Kuqishtë, e disa aktivitete të tjera janë përmbledhur nga Janet në këtë vizitë shumë të bukur e nostalgjike në Rugovë.
Faleminderit Janet Reineck! ”, thuhet në fund nga kjo faqe./ KultPlus.com
Vera ka nisur dhe bashkë me të edhe pushimet verore, veçmas për mërgatën, ku përveç shkuarjes në gjirin familjar, shprehet edhe dëshira dhe kureshtja se çfarë të vizitojnë në vendlindje.
Revista Albinfo.at kësaj radhe ka përgatitur një mini-guidë të dhjetë vendeve -monumente që nuk duhet t’i humbisni në këtë verë pa i vizituar.
Ciceronja Naile Çekaj nga ”GuideTuristike” (Guide-Ks) ka shpalosur disa vende turistike për lexuesit e revistës Albinfo.at. Ajo shprehet se mërgimtarët në veçanti, e po ashtu edhe turistët e huaj nuk duhet t’i humbasin këto vende pa i vizituar këtë verë.
“Kosova si vendbanim njihet qysh në kohën antike, duke u bazuar në gjetjet arkeologjike në shumë qytete të saj që datojnë që nga parahistoria. Pyetja që marrim shpesh nga tjerët është: “Çka ka me pa në Kosovë”? E pyetja që ju shtrohet juve sot është: sa e njihni Kosovën tuaj? A e dini që Kosova ka gati 60% territor malor? Që mesatarja e tyre arrin mbi 2000 m. Ndoshta keni dëgjuar për ujërat, liqenet e ujëvarat? Po mbetjet ose vendbanimet arkeologjike të hershme parahistorike? Shpellat dhe objektet e kultit mbi 700-vjeçare? Objektet ku flasin për historinë tonë të lavdishme ndër shekuj? Po qytetet e zhurmshme, ku gumëzhijnë të rinjtë, ku bashkë me një kafe, të shoqëron gjithmonë muhabeti i një miku, ku vendi ynë është vendi me i ri në Evropë me mbi 70% të popullsisë? Ky vend i vogël me një histori të madhe…a nuk ia vlen të vizitohet!? Unë them po, prandaj po ju japim vetëm disa prej shumë atraksioneve turistike që Kosova posedon”, thekson ajo.
Këto janë pyetjet që ciceronia Çekaj fillimisht i ngriti për të zgjuar kurreshtjen e secilit prej lexuesve, për të vazhduar tutje prezantimin e disa prej vendeve më të bukura që zotëron Kosova.
Gryka e Rugovës
Naile Çekaj si destinacion kryesor të parën e listoi Grykën e Rugovës, që sipas saj, ky vend është një mrekulli në vete.
“Gryka e Rugovës pa dyshim është ndër pjesët më të bukura që ka Kosova, ku edhe mund t’i quajmë edhe “si mushkëritë” e vendi tonë. E vendosur veç disa kilometra nga qyteti i Pejës, ky pejzash i bukur që është pjesë e Bjeshkëve me Nam (jo të Nemuna, por që kanë emër për bukuritë e rralla të saj) mbetet si atraksioni kryesor i turistëve vendorë dhe të huaj gjatë gjithë vitit, pasi që gjatë verës shumica i ikin vapës për t’u freskuar në ujërat e Rugovës, e gjatë dimrit duke shijuar borën në qendrën e vogël të skijimit në fshatin Bogë”.
Çekaj tregon se bimësia, shkëmbinjtë, uji dhe pyjet ofrojnë pamje magjepse që mbesin gjatë në mendjen e vizitorëve. Përveç tjerash, në këtë zonë ajo tregon se ky vend është perfekt për ecje, ngjitje, ku mund të shijohen edhe ushqime tradicionale.
Drini i Bardhë
Hiç më pak se Gryka e Rugovës, Nailja tregon se edhe Drini i Bardhë është një nga atraksionet më të bukura që ka Kosova. Ky atraksion gjendet në Radac të Pejës, është ujëvara më e gjatë në Kosovë, e lumi përshkon diku rreth 111 km nëpër territorin e Kosovës dhe bashkohet me Drinin e Zi në Shqipëri.
“Gjatë muajit maj, ujëvara ka prurjen më të madhe të ujit që zbret nga malet e Rusolisë dhe krijon ujëvarën rreth 30 metra, ku ke mundësi ta shohësh e ta soditësh nga afër, nganjëherë bardhësia e madhe e saj u merr sytë turistëve, prandaj edhe e ka emri Drin, nga ndriçimi i ujit, siç thoshin dikur: ‘uji po n’drin (po ndriçon)”, tregon ajo.
Çekaj tregon se freskia e Drinit të Bardhë duket sikur ta mbushë zemrën me gurgullimat e ujit që sapo të afrohesh, të spërkatë me ujë si një shenjë mirëseardhjeje dhe mikpritëse në vendin tënd.
Kalaja e Prizrenit
Tutje, Naile Çekaj për lexuesit e Albinfo.at sugjeron se mërgimtarët tanë mund të vizitojnë edhe Kalanë e Prizrenit, sepse përmban shumë vlera.
“Fillimisht Prizreni si qytet muze ka shumë objekte të trashëgimisë kulturore, ku gërshetohet historia në periudha të ndryshme, ku pavarësisht kohës dhe luftërave, muret qëndruan po aty, duke ruajtur vlera të civilizimeve të ndryshme”, tregon ajo.
Duke qenë se Kalaja e Prizrenit është objekti me i vjetër i qytetit, Çekaj tregon se muret e saj datojnë nga shekulli V, ku rrethoja e mureve që duket sikur ka edhe formën e një zemre njeriu. Kalaja edhe sot akoma qëndron po aty lart në kodër, duke i dhënë jetë qytetit, e duke i bërë njerëzit të bien në dashuri me Prizrenin që në shikim të parë.
“Sapo të zbritni nga kalaja, mund të vizitoni edhe Muzeun e Lidhjes së Prizrenit, Xhaminë e Sinan Pashës, Shatërvanin, Urën e Gurit, Kishën Katolike dhe objekte të tjera përreth”, tregon ajo.
Shpella e Gadimës
Kosova ka edhe pasuri nëntokësore, e disa nga ato mund t’i përjetoni duke vizituar edhe Shpellën e Gadimës, e vetmja shpellë e mermerit në Kosovë.
“Besohet që 13% e territorit të Kosovës është e përbërë nga shpellat, që shumica e tyre mbeten akoma të pazbuluara. Por, shpella e Gadimës jep një pasqyrë të asaj se çfarë fshihet nën tokën tonë, kristale, liqene dhe gurë nga forma dhe ngjyra të ndryshme që vetë natyra i gdhendi ndër shekuj”, tregon Nailja.
Sipas saj, besohet se Shpella Gadimës u zbulua në vitin 1969 nga një fshatar, përderisa po bënte disa punime. Shpella e mermerit ka disa galeri kristalesh të mermerta që shpesh duken edhe sikur akullnaja dhe që njerëzit i kanë emëruar me emra të ndryshëm në bazë të dukjes së tyre.
Qyteti antik i Ulpianës
Pak kilometra nga Prishtina gjendet Ulpiana, aty ku edhe filloi historia e hershme e një qyteti të hershëm Ilir, e që u mbulua nga pluhuri i harresës për dekada, por tani Ulpiana është një atraksion arkeologjik e turistik që në vete gërsheton aq shumë në pak metra katrorë, tregon Çekaj për Albinfo.at.
“Aty mund të shohësh bazilika dhe pagzimore të hershme, aq të hershme sa nganjëherë duken jo reale, por prapë janë të prekshme edhe sot. Shekulli II merret koha kur u themelua si qytet antik dhe është atraksioni me i madh arkeologjik në Kosovë, ku edhe sot e kësaj dite bëhen gërmime për të nxjerrë në pah pamjen e plotë të kësaj mrekullie antike”, shprehet ajo.
Sipas Nailes, eksponatet që janë gjetur aty janë të prezantuara në ekspozitën e përhershme të Muzeut të Kosovës në Prishtinë, e për ta bërë më të plotë pamjen, duhet ta vizitoni edhe kryeqytetin si dhe pjesën e vjetër të Prishtinës, ku takohen antikja dhe modernia përmes objekteve të veçanta të periudhës otomane, komuniste dhe moderne, gjithmonë të mbushura me elemente kulturore shqiptare.
Këto janë vetëm disa vende që zonja Naile Çekaj nga Guida Turistike e Kosovës ka përzgjedhur për ju, por ka edhe shumë vende të tjera, si ura, muze, liqene, zona të mbrojtura, që do ta bënin edhe me të plotë udhëtimin tuaj, duke mbushur valixhen tuaj edhe me ca kujtime të bukura të Kosovës tonë të “vogël”, por që ka një zemër të madhe.
Nga ana tjetër, edhe Mentor Beqiri nga “Come and Visit Kosovo”, ka shpalosur një mini-guidë të pesë vendeve – monumente që nuk duhet t’i humbisni në këtë verë pa i vizituar.
“Pa dyshim se Kosova gëzon shumë vende turistike që janë mjaft tërheqëse për zhvillimin e turizmit. Destinacionet e saj turistike kanë potenciale të mrekullueshme natyrore dhe kulturore. Me motivet që ka, ofron mundësi të mira për turizëm, pasi që pozita e saj e mirë bën që të jetë tërheqëse, me shumë vende interesante të ndërtuara nga vetë natyra dhe ato nga dora e njeriut”, tregon ai.
Sipas tij, Kosova është e pasur me komplekse të bukura malore, atraktive dhe me natyrën e saj magjepse për syrin e njeriut. Ai shprehet se Kosova paraqet një thesar të pasur të trashëgimisë kulturore, materiale e shpirtërore të periudhave të ndryshme historike.
“Arkitektura e kullave tradicionale, manastireve, kishave, xhamive, më pas dizajni i odave dhe artizanatëve të shumta bëjnë që veçoritë dhe karakteristikat e tyre të dallohen për nga shumëllojshmëria e cilësive, vlerave dhe rëndësisë së tyre, që për çdo bashkatdhetar do të ishin një rifreskim dhe zhytje në historitë e rrënjëve të tyre”, tha ai.
Shpella e Kusarit
Në vitet e fundit, në qytetin e bukur të Gjakovës po promovohet për vizita Shpella e Kusarit, tregon Mentori nga “Come and Visit Kosovo”. Ajo gjendet vetëm 1 km larg fshatit Kusar.
“Thënë më mirë, në brendësi të këtij fshati, me pamje thuajse pyjore, në rrëzë maleve të Pashtrikut, kjo shpellë ka një oborr karakteristik shkëmbor e të shkallëzuar, që mundëson ecjen e vizitorëve që duan të hulumtojnë brendësitë e kësaj shpelle”, shprehet Beqiri.
Shpella e Kusarit karakterizohet me një terren shkëmbor dhe të gjelbëruar, tek e cila vizitorët mund të ecin deri në brendësi të saj dhe të shijojnë pamjet magjepse gjelbërore që kjo shpellë ofron për vizitorët e shumtë.
Ujëvara e Mirushës
“Jo fort larg Gjakovës, në fshatin Rudë të Malishevës, gjendet Ujëvarat e Mirushës, ndryshe e njohur edhe si Park Regjional i Natyrës, një ndër destinacionet më të bukura që ka Kosova. Kjo zonë karakterizohet me një numër të madh të liqeneve me forma dhe madhësi të ndryshme duke përfshirë 16 liqene dhe 12 ujëvara”, tregon Beqiri.
Me pamjen që e ofron ky vend, të mrekullon me rrjedhjen e ujit pranë natyrës dhe cicërimave të zogjve.
Kalaja e Artanës
Vizita e Kalajës së Artanës është ideja më e mire, sipas Mentorit, që ia propozon çdo turisti.
“Kalaja e Artanës gjendet jo larg qendrës së Kamenicës, me të arritur ju nga distanca mund të shihni fortesën e madhe mesjetare, pjesët e mbetura të së cilës mund të vizitohen edhe sot. Sa më afër që i ofroheni, në murin e jashtëm të kalasë shihet një kryq i madh, i ndërtuar në gurë”, tregon ai.
Kalaja mendohet se daton qysh nga Perandoria Bizantine. Ndërtimi i takon tipit fortifikatë. Kalaja përbëhet nga dy pjesë të ashtuquajtura kalaja e sipërme dhe kalaja e poshtme.
“Po në këtë qytet është edhe Kulla “Kadri Zeka”, një ndër kullat më të vizituara në Kamenicë, e cila ka njȅ arkitekturë të pasur, me vlera historike”.
Liqenati
Mentori tregon se me plot kuptimin e fjalës, Liqenati i Rugovës është parajsa e Bjeshkëve të Nemuna, si vendi ideal për ata që duan ta kombinojnë natyrën dhe notin në ditët e verës së nxehtë.
“Shpeshherë mërgimtarët tanë, nga mungesa e përvojës apo e informacioneve ngurrojnë ta vizitojnë këtë vend, mirëpo duhet treguar se Liqenati është një vend që gjithsecili që posedon veturë, kondicion dhe dashuri për natyrën, mund të shkojë dhe ta vizitojë. Ecja deri aty mund të jetë paksa e lodhshme, mirëpo me të arritur në liqen, ju do të harroni të gjitha dhe do të zhyteni thellë në pamjet përrallore që ofron ky vend”, shprehet ai.
Mbushni mushkëritë me ajrin e pastër të Prevallës
Prevalla është një fshat malor turistik, gjendet 25 kilometra afër Prizrenit.
“Tani që jemi në stinën e verës, Prevalla ka bjeshkë dhe male të bukura si dhe një lumë me shkëmbinj të mëdhenj, ku turistët kanë mundësi të shohin bukuri natyrore nga me të ndryshmet dhe jo vetëm. Ajrin e pastër, të cilin mund ta ndjeni në këtë zone, është e sigurt, pastaj shijimi i ushqimeve të natyrshme dhe mikpritjes, të gjitha këto bashkë të ofrohen në Prevallë”, tregon Beqiri.
Prevalla gjendet në kuadër të Parkut Kombëtar dhe është një ndër vendet më piktoreske që ka Kosova.
Sipas Beqirit, këto janë vetëm disa nga vendet që turistët mund t’i vizitojnë dhe të ndahen të kënaqur gjatë këtij sezoni veror në Kosovë.
Plazhi i Semanit, 18 kilometra larg qytetit të Fierit me hapësira pa fund bregdetare me rërë të imët kurative, plazhe familjare me ujëra të ngrohta është një tjetër destinacion turistik.
Kryeministri Edi Rama ka publikuar në rrjete sociale pamje nga ky plazh dhe fton qytetarët që ta vizitojnë.
Rama shprehet se Semani është një tjetër destinacion turistik për këto ditë të nxehta.
Plazhet e Darzezë dhe Seman po kthehen gjatë viteve të fundit në të preferuarit e shumë turistëve të huaj, pasi janë plazhe të virgjëra me rërë të pastër dhe ujë të kthjellët.
Vija bregdetare e Fierit nuk ofron vetëm plazhe, por edhe vende fantastike për aventurë, eksplorim, peshkim apo sporte ekstreme./ atsh / KultPlus.com
Media globale ”Time Out” shkruan për Shqipërinë duke ua sugjeruar miliona ndjekësve të saj si një vend plot destinacione interesante e aventura për t’u shijuar në çdo cep ku hedh këmbën.
Kryeministri Edi Rama ndau sot në rrjetet sociale shkrimin promovues të “Time Out”, ku përshkruhen bukuritë e natyrës shqiptare nga Shkodra, në Gjipe.
Autori i shkrimit, Stuart Butler, i cili ka udhëtuar shumë në Shqipëri shprehet se vendi ruan ende një atmosferë të një Evrope më të vjetër dhe më të egër.
“Shqipëria është Evropa që nuk e dinit se ekzistonte. Male të thyera të mbushura me shtigje të qeta ecjeje, rrënoja të lashta të fshehura nën hijen e pemëve, plazhe mahnitëse gati për eksplorim dhe qendra urbane me zhvillim të shpejtë”, shkruan ai.
Autori vlerëson se Shqipëria është një vend ku tradita ka rëndësi.
“Një vend me aventura të papritura në fund të çdo korsie fshati me pluhur. Një vend që mund të ndryshojë të gjithë idenë tuaj për Evropën e shekullit XXI. Pra, ku të filloni? Nga kryeqyteti i saj historik, deri te bregdeti i saj i mbushur me plazhe, këto janë vendet më të mira për t’u vizituar në Shqipëri”, shkruan ai. / atsh / KultPlus.com
Ministrja e Shtetit për Standardet e Shërbimeve, Milva Ekonomi në një postim në rrjetet sociale, solli sot një album fotografik të Parkut Kombëtar të Butrintit, që konsiderohet një aset i çmuar për turizmin shqiptar.
Fotot tregojnë pamjet më të bukura të këtij Parku, ku ndërthuren bukuritë natyrore dhe ato historike.
Parkun Kombëtar i Butrintit, është një nga pikat më të rëndësishme të turizmit kulturor, në jug të vendit që tërheq interesin e vizitorëve vendas dhe të huja në çdo strinë të vitit.
Parku Kombëtar i Butrintit ka një sipërfaqe prej 15 hektarësh dhe ndodhet në lartësitë 30-50 metra mbi nivelin e detit. Ai është ngritur në këndin juglindor të gadishullit të Ksamilit. Ka një pozitë mjaft të mbrojtur natyrore, duke u lagur në dy anë nga liqeni i Butrintit dhe në një anë nga kanali i Vivarit.
Parku Kombëtar i Butrintit ofron një numër të konsiderueshëm vendesh arkeologjike dhe konsiderohet si një “mikrobotë e historisë shqiptare”.
Butrinti është një mikrokozmos i historisë së Mesdheut, që prezanton ngritjet dhe uljet e perandorive të mëdha që kanë mbizotëruar në rajon. Sot është një amalgamë e monumenteve që prezantojnë një hapësirë me mbi 2000 vjet, që nga tempujt helenikë të shek. IV para Krishtit, deri në kalatë osmane të fillimit të shek. XIX./ atsh / KultPlus.com
Kreu i AdZM Korçë, Gjergji Koki solli sot pamje nga liqenet akullnajore në malin e Valamarës.
Koki publikoi në rrjetet sociale fotografi të cilat shprehin më së miri natyrën e mrekullueshme malore të trevës Pogradec, Gramsh, Korçë. Dhjetëra liqene akullnajore gjenden në malin e Valamarës që bashkon Pogradecin, Gramshin dhe Korçën në lartesinë mbi dy mijë metra nga niveli i detit.
Pogradeci nuk ka vetëm liqenin, por edhe destinacione turistike malore të cilat kohët e fundit janë rizgjuar nga të apasionuarit e alpinizmit dhe jetesës në harmoni me natyrën. Edhe Valamara është në listën e destinacioneve të preferuara të turistëve dhe entuziastëve vendas të natyrës.
Valamara është mal me lartësi 2373 m në kufirin midis rrethit të Korçës, atij të Gramshit dhe të Pogradecit. Në veri kufizohet me Gurin e Topit. Bimësia përbëhet nga pyje ahu e pishe në pjesën e ulët dhe nga kullota të pasura verore në pjesën e sipërme. / atsh / KultPlus.com
Numri i turistëve në Kosovë ka filluar të rritet viteve të fundit. Sipas Agjencisë së Statistikave, muajin e kaluar, numri i turistëve ishte rreth 29% më i madh, krahasuar me vitin 2022.
Baki Hoti, kryetar i një shoqate turizmi thotë se edhe vitin e kaluar kemi pasur rritje të numrit të vizitorëve. Megjithëkëtë, ai thotë se numri i turistëve mund të jetë shumë më i madh nëse Kosova bën politika më të mira për zhvillimin e turizmit.
Ndonëse me një hapësirë gjeografike jo të madhe dhe politika jo të favorshme për zhvillimin e turizmit, falë atraksioneve e jo vetëm, numri i turistëve në Kosovë po shënon rritje viteve të fundit. Kështu thotë për Radio Kosovën, kryetari i Unionit të Turizmit të Kosovës, Baki Hoti, i cili thekson se vitin e kaluar kemi pasur rritje prej rreth 25% të numrit turistëve e një trend i tillë i rritjes po vazhdon edhe këtë vit.
“Rritja e numrit të turistëve është duke ecur në këtë drejtim edhe këtë vit. Sipas Agjencisë së Statistikave, muaji i kaluar ishte me e 28.9% rritje të numrit të vizitorëve. Në kuadër të kësaj rritje kemi pasur 40% rritje të numrit të turistëve ndërkombëtar. Na gëzon ky fakt se ka një rritje të kërkesës për ta vizituar Kosovën nga grupe të ndryshme të vizitorëve ndërkombëtarë”, tha ai.
Tutje, Hoti thotë për Radio Kosovën se me shoqatën që drejton po përpiqet që të përfshijë Kosovën në pakot ballkanike dhe evropiane të turizmit. Megjithëkëtë, Hoti thotë se vendi ynë nuk ka politika të favorshme për zhvillimin e turizmit.
“Për shembull, ne kemi Tatimin mbi Vlerën e Shtuar më të shtrenjtë në rajon. Sipas një hulumtimi që kemi bërë në 25 shtete evropiane, ka dalë që të gjitha shtetet e kanë TVSH-në e zbritshme për akomodim, në raport me TVSH-në standarde. Pra nëse TVSH- në e kanë 20%, atë për akomodim e kanë 5-6%. Ndërsa tek ne TVSH është 18 % dhe është e njëjtë me atë standarde. Një shembull tjetër. Maqedonia i subvencionon operatorët turistikë që mundohen me krijuar lidhje dhe me sjellë turistë të huaj në Maqedoni, dhe ata i subvencionon me 14 euro për çdo natë që rrinë aty”, theksoi Hot .
Sipas Agjencisë së Statistikave të Kosovës, “në vitin 2022, numri i vizitorëve (vendorë dhe të huaj) ishte 460 mijë e 467, prej tyre 35,37%, ishin vendorë dhe 64,63% të jashtëm”. Në raportin e ASK-së për Statistikat e Hotelerisë dhe Turizmit për vitin 2022, thuhet krahasuar me vitin 2021 numri i vizitorëve të jashtëm ishte për rreth 40% më i madh, kurse net-qëndrimeve vizitorëve të jashtëm ishte rritur për 52,0%. / KultPlus.com
Velipoja, një ndër plazhet ranore me shtrirjen më të gjerë në Shqipëri, frekuentohet çdo vit nga mijëra pushues vendas e të huaj.
Kryeministri Edi Rama publikoi sot në rrjetet sociale përshtypjet e pushuesve për këtë sezon veror në Velipojë.
Rama tha se pushuesit “këtë vit e gjejnë më mirë të organizuar, si edhe më të pastër se asnjëherë më parë”.
“E mbajnë pastër më mirë se vjet. Plazhi është plot nuk ka pasur asnjëherë kaq shumë”, tha një qytetar.
Një qytetare u shpreh se “jemi të kënaqur është përmirësuar shumë zona është e lirë, ka pastërti”.
“Siguria në plazh është e mirë ne po kalojmë shume mirë”, tha një tjetër qytetar.
Me një shtrirje prej mbi 14 km, plazhi i Velipojës është ndër më të preferuarit në veriperëndim të vendit edhe për shkak të cilësive kurative të rërës.
Rëra me efektin e saj kurativ, ndërthurja me hijeshi e detit, lumit, delta me ishuj, kodrat, pylli, laguna e fusha, bëjnë për vete çdo vit pushues të shumtë.
Shumë prej tyre janë të përvitshëm në sezonin veror në Velipojë, të tjerë vijnë për herë të parë për t’u rikthyer vit pas viti. /atsh / KultPlus.com
Pavarësisht sulmeve ksenofobike të konservatorëve të Britanisë së Madhe ndaj emigrantëve shqiptarë, Shqipëria është kthyer në një vend shpëtimi për të rinjtë britanikë, duke ofruar festivale si, “Kala” dhe ION, akomodime të lira dhe plazhe të mrekullueshme, shkruan “The Face”.
Sa më shumë t’i referohesh një destinacioni si një vend krejtësisht i ndryshëm, aq më shumë do të bëhet një pikë e nxehtë turistike . Rasti në fjalë? Së fundmi Shqipërisë i është referuar si, Kroacia e Re, Maldivet e Evropës, Karaibet e Evropës, Greqia e ardhshme, e cila po gëzon një rritje të madhe të numrit të turistëve.
Edhe nëse nuk keni qenë kohët e fundit në Shqipëri, me siguri i keni parë pamjet në internet. Për ne që navigojmë, “Toka e Shqiponjave” është shpërndarë kudo në rrjete kohët e fundit. Të gjithë, me sa duket, kanë bërë banjo dielli në plazhet e saj me rërë, janë zhytur në ujërat e paeksploruara dhe kanë kërcyer në festivalet e saj.
Nga viti 2010 deri në vitin 2019, numri i turistëve që shkojnë në Shqipëri çdo vit u trefishua në 3,3 milionë, ku 120 000 prej vizitorëve ndërkombëtarë ishin nga Britania e Madhe. Megjithatë, së shpejti parashikohet që vendi të vizitohet nga miliona turistë britanikë.
Nuk ka qenë gjithmonë kështu. Për dekada me rradhë, Shqipëria i ndaloi hyrjet. Vendi më i izoluar në Evropën Lindore, kombi ballkanik nuk i hapi dyert deri në fund të viteve ’80, duke ekzistuar si një shtet komunist i mbyllur për pjesën tjetër të botës.
Kur lideri i saj stalinist Enver Hoxha vdiq në vitin 1985, turistët filluan të vërshonin drejt vendit, por jo me një ritëm të shpejtë, deri në vitin 1989 ku vetëm 10 000 njerëz në të gjithë globin shkonin në Shqipëri çdo vit.
Mbërritjet filluan të rriteshin në fund të viteve ’90, kur industria evropiane e turizmit filloi të zbulonte potencialin e Shqipërisë për të konkurruar në Mesdhe.
Megjithëse vendi ende përballej me ndërprerje të energjisë elektrike, probleme me ujin e papijshëm dhe ujërat e zeza, në vitin 2003 Ministria e Turizmit vendosi të shkatërronte ndërtesat për të zbukuruar plazhet dhe për të riemërtuar kombin. Shtatë vjet më vonë, Shqipëria ishte vendi më i mirë për t’u vizituar sipas “Lonely Planet”.
Në vitin 2017, ishte vetëm një linjë udhëtimi me “British Airways” nga aeroporti “Gatwick” i Londrës në Tiranë. Tani, ka mbi dhjetë linja, më e lira është “WizzAir”, që ju çon për tre orë për vetëm 27 £.
“Ka patur një rritje të konsiderueshme në numrin e pasagjerëve që zgjedhin Shqipërinë si destinacionin e pushimeve”, tha për “The Face”, Zsuzsa Trubek, menaxhere e Komunikimit të Korporatës “Wizz Air”.
“Numri i pasagjerëve është rritur 27% në gjysmën e parë të vitit në 2023, krahasuar me të njëjtën periudhë në 2022. Për të përmbushur kërkesën, është rritur kapaciteti për të kryer 19 fluturime në javë”, tha ajo.
Shqipëria është ende një destinacion relativisht alternativ. Aktualisht, kryhen më pak se 20 fluturime në javë, dhe numri i britanikëve që shkojnë në Greqi çdo vit është pothuajse 40 herë më i lartë. Por, pritet që numri i turistëve drejt Shqipërisë të vazhdojë të rritet, një besim i çeliktë që ka çuar në investime nga e gjithë bota dhe ndërtimin e një aeroporti me vlerë 125 milionë dollarë në Vlorë, i cili është në punime e sipër, deri në përfundimin e tij në prill të 2024.
Gjithashtu, duke pasur parasysh se pothuajse askush jashtë Shqipërisë nuk dinte për vendin deri 20 e ca vjet më parë, zhvillimi i tij është marramendës.
“Ndërsa Amsterdami po largon të gjithë britanikët, italianët po lodhen gjithnjë e më shumë dhe Lanzarote po vuan sjelljen tonë të keqe, Shqipëria po na mirëpret krahëhapur, duke premtuar një paketë të plotë, gjithëpërfshirëse, diell, plazhe dhe festa të këndshme. dhe një litër birrë të mirë për 200 lekë (vetëm 1,50 £)”, tha ajo.
Shumë njerëz, tërhiqen kryesisht nga festivalet. “Kala”, një festival i nisur në vitin 2018 nga “Mainstage Festivals” dhe i vendosur në Rivierën Shqiptare, ka fituar shpejt zemrat e vizitorëve.
“Ne nuk mund të marrim meritën e plotë për rritjen më të gjerë të turizmit, mendoj se festivalet tona muzikore kanë ndihmuar që Shqipëria të vendoset në hartë për një numër të madh të rinjsh që nuk kishin dëgjuar më parë për të”, tha Juan J. Lopez, drejtor i Marketingut në “Mainstage”.
“Ambjenti në Dhërmi është perfekt, sepse shumica e hoteleve nuk janë shumë larg nga skena. Bonusi i madh? Çmimi i një festivali kampingu ku mund të kaloni një javë të plotë në një hotel në Shqipëri, që do të thotë të mos ketë netë pa gjumë në tenda”, tha Lopez.
Antonia dhe Georgie, të dy 28 vjeç, shkuan në “Kala” muajin e kaluar.
“Dhërmiu ishte vendi ku do të shkonim. Edhe shqiptarët vendas shkonin atje për pushimet e tyre, ishte një vend vërtet emocionues”, tha Georgie.
“Ishte një nga festivalet e para ku kemi qenë, të gjithë aty ishin vetëm për muzikë dhe Vibe të mirë, të gjithë kishin energji të mirë dhe ishte bukur të ishe në një hotel dhe jo në një tendë”, shtoi Antonia.
“Dhe sigurisht që kishte peizazhe, male, plazhe të bukura, kanioni në Gjipe, një ekstazë për syrin tuaj”, tha ajo.
Ky peizazh piktoresk është i përsosur për postimet e bukura si një kartolinë në Instagram. Për ata që nuk shqetësohen për festat, janë pamjet që i nxisin të vizitojnë, veçanërisht pasi ato janë relativisht të përballueshme.
”Kur bëhet fjalë për udhëtime, ka pak mistere të mbetura në Evropë. Shqipëria është vendi i fundit evropian, që nuk është kthyer në një destinacion të qëndrueshëm për pushime në plazh dhe i rrënuar nga turizmi masiv”, tha Lopez.
“Shqipëria ofron peizazhe mahnitëse mesdhetare, ujëra të mrekullueshëm bruz, plazhe të paprekura, ushqim të shkëlqyeshëm dhe çmime shumë të përballueshme”, shtoi ai.
Bardha Krasniqi, një fotografe me origjinë shqiptare, e cila u shpërngul në Britaninë e Madhe kur ishte ende një femijë, kthehet rregullisht në Shqipëri.
“Shkova në qershor dhe vura re se kishte më shumë turistë se zakonisht”, tha ajo.
“Njerëzit me të vërtetë duan të shohin dhe eksplorojnë diçka ndryshe. Shqipëria është në jug të Evropës, kështu që është si një Greqi tjetër. Është diçka e re dhe njerëzit nuk e dinin se ekzistonte. Ka kaq shumë larmi të natyrës, është një çmenduri”, tha Krasniqi.
Ky vizion idilik është përhapur falë rrjeteve sociale. Në fund të fundit, shumica prej nesh tani ndjekin në TikTok Thomas Cook për këshilla udhëtimi, përmes një katalogu gjithnjë e më të përditësuar të destinacioneve më të bukura në botë. Shqipëria u bë virale verën e kaluar, veçanërisht resorti i plazhit Ksamil, shkëlqimi i të cilit nuk po shuhet.
”Gushti do të jetë i çmendur dhe kjo për shkak të TikTok-ut, vitin e kaluar të gjithë ripostonin vendodhjet e tyre”, tha Krasniqi.
”Edhe këtë vit miqtë më kanë dërguar mesazhe si: “Nuk e dija që Shqipëria dukej kështu”, sepse jugu është shumë i bukur’, shtoi ajo.
“Kur shkova për herë të parë në jug të Shqipërisë, muajin e kaluar, takova dy vajza britanike dhe i pyeta se si e kishin zbuluar vendin. Ato thanë nga TikTok-u, është qartë se TikTok po promovon gjithandej Shqipërinë”, tha ajo.
Ekziston gjithashtu efekti “Dua Lipa”. Krahas figurave të njohura si Rita Ora dhe Bebe Rexha, Dua, e lindur në Shqipëri, është bërë një vajzë që promovon vendin përmes postimeve. Në fund të vitit të kaluar, ajo u bë qytetare nderi dhe madje përmbylli turneun e saj botëror “Future Nostalgia” në Tiranë.
Becky dhe Elena, të dyja 24 vjeç, vizituan Shqipërinë javën e kaluar.
“Ne nuk bëmë asnjë kërkim dhe përfunduam në një fshat, një orë larg Tiranës. Pamë anën më pak turistike”, tha Becky.
“Rreth orës 1 të mëngjesit, gjithçka ishte ndryshe. Përpara nesh u shfaqën vajza me bikini duke kërcyer në ballkone, njerëz që zhyteshin në pishinë dhe gjithçka ishte e ndezur njësoj si “My Super Sweet Sixteen”. Ne përfunduam në ato që vendasit i quajnë “vilat e festave” që merren me qira për një natë, të klasifikuara si shumë të zhurmshme nga policia e Tiranës”, shtoi ajo.
Personat e përfshirë në industri janë të prirur të theksojnë rolin e madh që luan turizmi në ekonominë lokale. “Kala”, për shembull, punon me 250 biznese lokale, krijon 200 vende pune çdo vit dhe ka ndihmuar në dyfishimin e sezonit turistik. Dhe organizatorët përpiqen të sigurohen që vendasve të mos u mungojë argëtimi.
“Çdo vit ne rezervojmë një pjesë të biletave për banorët e Shqipërisë, Kosovës dhe Maqedonisë së Veriut, të cilët mund t’i blejnë ato me një çmim të reduktuar”, tha Lopez.
Shqiptarët po përballen me probleme të migracionit. Qasja nënçmuese e Partisë Konservatore ndaj migrantëve shqiptarë, e nxitur nga politikat e Suella Braverman, ka nxitur forma të reja të ksenofobisë. Çështja është komplekse, është e vërtetë që mafia shqiptare ka një rol kyç në tregun e drogës në Britaninë e Madhe, por shumë nga ata që mbërrijnë në BM trafikohen dhe detyrohen të punojnë për këto banda, dhe nuk është një zgjedhje e tyre.
Siç ka theksuar më parë David Neale, një ekspert i migracionit shqiptar, Shqipëria nuk është domosdoshmërisht një vend i sigurt.
“Një shkak i zakonshëm i arratisjes së shqiptarëve nga vendi i tyre është gjakmarrja”, shkroi Naele në “The Guardian”, duke shpjeguar se shumë prej tyre përballen me kërcënimin e sulmeve hakmarrëse nga familje të tjera, që zgjasin me breza.
Ky kontrast midis turizmit dhe torizmit është i vështirë. Ndërsa shumë prej nesh e kalojnë kohën me pushime në Shqipëri, shumë nga vendasit e saj po kalojnë një kohë të vështirë në shtëpi dhe po përballen me qëndrime ksenofobike, përkatësisht, nga Britania e Madhe.
“Fatkeqësisht, shumica e njerëzve nuk dinë shumë për Shqipërinë dhe mbështeten thjesht në stereotipe negative”, tha Lopez.
“Megjithatë, kjo është në avantazhin tonë, pasi aventurierët kur vijnë në Shqipëri habiten shumë kur zbulojnë se të gjitha këto paragjykime jane larg realitetit”, tha ai.
Becky dhe Elena e përjetuan këtë nga afër.
”Të gjithë shqiptarët që na priten ishin të këndshëm me turistët”, tha Becky.
Një punishte vere u ofroi ushqim falas, një vendas i ftoi për raki, një tjetër u ofroi atyre një udhëtim me varkë dhe një taksist madje ndaloi për t’u blerë bakllava.
”Ne e vizituam vendin me shumë paragjykime, pasi familja dhe miqtë tanë ishin të pasigurt, por ishte vërtet argëtuese. Njerëzit ishin vërtet të sjellshëm”, thanë Antonia dhe Georgie.
Një banakier vrapoi për të gjetur vodka për ta, ndërsa një pronar gazetash u dha atyre një kovë akulli pasi mendonte se birrat që shiste nuk ishin mjaftueshëm të ftohta.
Për Krasniqin, pushuesit e verës 2023 do të thyejnë industrinë e turizmit të Shqipërisë.
”Ky vit do të përcaktojë se si njerëzit e trajtojnë dhe respektojnë atë”, tha ajo, duke shtuar se vendi mund të shndërrohet në një tjetër Ibiza, me shpresën se vizitorët do të ndikohen pozitivisht. Ashtu si çdo vend në zhvillim, ekziston rreziku drejt nje kolapsi te turizmit, që numëron mbrapsht drejt erozionit kulturor. Po kështu, nëse të ardhurat nga turizmi rrjedhin në ekonominë lokale, kjo mund të çojë në një rezultat pozitiv për të gjithë.
Sido që të jetë, është e qartë se “Albmania” do të vazhdojë të përhapet në të gjithë Britaninë e Madhe, pasi infrastruktura shtesë dhe një valë e re ngjarjesh e ëmbëlsojnë marrëveshjen, tashmë joshëse.
Së shpejti, vendit nuk do t’i referohen më si Kroacia e Re, Maldivet e Evropës, Karaibet e Evropës, Greqia e ardhshme, por thjesht Shqipëria. /atsh / KultPlus.com
Nis “Vjosa ime”, një event dy ditor në Tepelenë, i cili do të përfshijë zhanre të ndryshme; art, turizëm, muzikë, letërsi, teatër, pikturë, muzikë, panair, trashëgimi, eksplorim etj.
Gjatë 48 orëve të titulluara “Vjosa Ime” do të zhvillohen aktivitete, ku do të ndërthuren koncert me muzikë klasike, mbrëmje poetike, ekspozitë me libra, shfaqje teatri, panair me veshje të ndryshme popullore të krahinës, veshje të punuara me dorë, punime druri, metali, e më tej prodhime kulinarie tradicionale, bimësi medicinale etj.
Gjatë këtyre aktiviteteve do të organizohen edhe ture me një guidë profesionale në pika kryesore që përfshijnë site të trashëgimisë kulturore si Ujëvara e Peshturës, Uji ftohtë, në grykëderdhje të Drinos, ku lidhet me Vjosën, etj.
Me mbështetjen e Ministrisë së Kulturës e Bashkisë Tepelenë, do të realizohet edhe një koncert i pianistit e multiinstrumentistit Robert Bisha, i cili do të shoqërohet nga një bandë frymore. Koncerti “Home Neverland” do të mbahet në Kalanë e Ali Pashë Tepelenës, mbrëmjen e së dielës.
Ndërsa në pedonalen buzë Vjosës do të zhvillohet “Këndi i librit”, një kënd i veçantë kushtuar poetëve dhe autorëve tepelenas si Petrit Ruka, Ilirjan Zhupa, Lirim Deda, Maliq Lila, Agim Shehu, Izet Cculli, Xhezo Canaj, Islam Kalemi etj, veprat e të cilëve do të ekzpozohen në kuadër të projektit “Vjosa ime”.
Shumë nga poezitë e njohura të tyre dhe poezi të tjera do të interpretohen nga aktorët e mirënjohur Ndriçim Xhepa, Luiza Xhuvani, Kristian Koroveshi në një mbrëmje peotike të organizuar me këtë rast. /atsh / KultPlus.com
Prestigjiozja britanike “The Telegraph” i ka kushtuar një shkrim vendeve të Ballkanit i cili dekadat e fundit është kthyer në një mundësi udhëtimi.
Në këtë shkrim ku renditen 10 vendet të cilat sugjerohen për t’u vizituar, “The Telegraph” thekson se vetëm vitin e fundit mbi 4 milionë turistë britanikë e kanë vizituar këtë rajon.
Sa i përket vendit tonë, prestigjiozja britanike shkruan se “e cilësuar dikur si një djerrinë neo-staliniste e betonit postkomunist, Shqipëria ka lulëzuar në dekadën e fundit për sa i përket imazhit të saj”
Përveç bregdetit, në shkrim i vihet theksi edhe kulturës dhe historisë së vendit tonë.
Në shkrim theksohet se atje ku shkëlqen, Shqipëria shkëlqen shumë. Vlora shënon pikën ku bashkohen Adriatiku dhe Joni, ngjitur me Gadishullin e Karaburunit.
“Vlora shënon pikën ku bashkohen Adriatiku dhe Joni, ngjitur me Gadishullin e Karaburunit. Deti duket po aq fotozhenik edhe më poshtë në bregdet, në Sarandë. Megjithatë, duhet të shkoni në brendësi të vendit dhe shpaloset një ëndërr piktoreske, vende të lashta historike si Butrinti, Bylisi dhe Apolonia. Qytetet e mrekullueshme osmane si Gjirokastra dhe Berati zbukurojnë peizazhin.’- shkruan “The Telegraph.
“Parku Kombëtar i Llogarasë strehon një tjetër lloj lartësie shqiptare nën maskën e maleve të larta”, thuhet në këtë artikull. / KultPlus.com
Lumi i Shalës, në liqenin e Komanit po tërheq çdo vit një numër të lartë turistësh vendas e të huaj, për shkak të bukurisë që natyra i ka falur kësaj zone.
I cilësuar nga mediet e huaja si një “parajsë e vogël”, ky lum është padyshim destinacioni më i preferuar sidomos nga të rinjtë.
Emanuel Pjetri, guidë turistike në Pukë, tha për ATSH-në se ” nga 1 qershori e deri tani mund të ketë pasur afërsisht 12 000 vizitorë. Në ditë ky lum është vizituar nga 400 -500 persona në ditë, ndërsa fundjavat normalisht ka pasur një numër më të lartë”. Sipas tij, për të vizituar lumin e Shalës udhëtimi me varkë nga Komani zgjat 1 orë e 20 minuta.
“Turistët shijojnë eksplorimin e zonës me varkë, ngjitjen në majat përreth me pamje spektakolare, si dhe zhytjen në ujin e freskët të lumit të Shalës, ushqimet tradicionale që ofrohen në bujtinat e ngritura pranë tij”, theksoi Pjetri.
Pjetri tregon se vizitorët në udhëtimin e tyre vizitojnë kanionin te lumi i Shalës, ujëvarën e Qerretit të Vilës, Shpellën e Kaurrit (murgjëve) etj.
Lumi i Shalës buron rrëzë Alpeve Shqiptare dhe ka një gjatësi prej 37 km prej burimit në majën e Radohinës e deri në Drin. Lumi Shalës dallohet me ujin e tij të veçantë ngjyrë blu e thellë.
Ai është i pasur me një shumëllojshmëri peshqish, por më e përhapura është trofta, që rritet vetëm në ujërat e ëmbla. Ngjyra e kaltër dhe e ftohtë e ujit është karakteristike e këtij lumi, shkëmbinjtë e thepisur që e rrethojnë, duken sikur prekin qiellin./ atsh / KultPlus.com
Të udhëtosh vetëm është diçka, që të gjithë duhet ta përjetojnë, për të zbuluar kuptimin e vërtetë të “lirisë” ose, më saktë, “kaosit të kontrolluar”.
Ju duhet të jeni drejtuesi i vetes, kapiteni i anijes suaj, ai që vendos nëse do të shtypni butonin e gjumit apo zgjimit. Mund të shkoni në shumë vende, nëse nuk do t’ju duhet të negocioni me të tjerët, apo t’i prisni ata!
Imagjinoni të jeni në gjendje të anuloni në mënyrë impulsive një udhëtim në muze dhe të zgjidhni të shijoni një ëmbëlsirë. Asnjë paragjykim, asnjë vendtakimi me miqtë, vetëm kënaqësi, përcjell abcnews.al.
Por, ku të fillojmë? Cilat janë vendet më të mira për ata që udhëtojnë vetëm? Ka shumë potencial për të gjithë ata që udhëtojnë vetëm. Të debatosh për vendet më të mira për të udhëtuar vetëm, është si të pyesësh se cila është shija më e mirë e akullores.
Në listën ku përfshihen 37 vende më të sigurta për të udhëtuar vetëm ndodhet edhe Shqipëria, destinacion që shpesh herë është anashkaluar.
Revista kulturore e cila vizitohet mbi 100 milion herë brenda muajit ka përfshirë Shqipërinë si vend i sigurt për të udhëtuar vetëm.
Në këtë artikull Shqipëria përshkruhet edhe si ilirët e lashtë.
”E strehuar në Ballkan, Shqipëria u ofron udhëtarëve një shans për të gërmuar në një cep të Europës, shpesh të anashkaluar.
Shqipëria është një nga ato vende, ku nuk dihet se çfarë të presësh. E vendosur pak larg shtegut të rrahur, është plot surpriza, gjë që krijon një eksperiencë të veçantë.
Zbuloni sekretet e ilirëve të lashtë, kthehuni në rivierën e mbuluar nga dielli ose gjeni veten mes bukurisë së paprekur të Bjeshkëve të Nemuna. Shqipëria pëshpërit përralla të së shkuarës, histori të së tashmes dhe premton një udhëtim të paharrueshëm.
Në përgjithësi, udhëtimi në Shqipëri është i sigurt. Ka rreziqe të vogla, por asgjë nuk duhet t’ju pengojë të shkoni atje”, thuhet në artikull. / KultPlus.com
Kryeministri Edi Rama ka publikuar në rrjetet sociale pamje nga Driloni i cili do jetë një pol i ri ekoturistik në Pogradec dhe në qarkun e Korçës.
Rama nënvizon se Driloni këtë verë do të jetë falë vënies në jetë të një super projekti transformues në një nga destinacionet mahnitëse për të gjithë vizitorët, të huaj apo vendas.
Projekti rikualifikues që shtrihet në 170 hektarë të parkut parashikon investime në infrastrukturë për xhiro me biçikleta, kullat e vëzhgimit për shpendët, vijat ujore që mund të përshkohen me varka apo edhe mjetet elektrike miqësore me mjedisin.
Rikualifikimi i projekti po zbatohet në bashkëpunim mes Agjencisë Kombëtare të Zonave të Mbrojtura dhe AADF.
Të gjitha ndërhyrjet janë bërë me qëllim ruajtjen e mjedisit dhe biodiversitetit të zonës, si edhe do të pasohet nga një plan menaxhimi.
Ky projekt lejon që vizitorët të mos shëtisin vetëm në pedonalen e Drilonit, por përmes kalimeve dhe urave të shkohet deri tek burimet e Drilonit dhe në Tushemisht./ atsh / KultPlus.com
