Muaj: Maj 2018

Stefano Fasias, artist i njohur grek, drejtues i një ansambli shumë të njohur në Selanik është ndier i befasuar me ndryshimet që ka pësuar qyteti bregdetar shqiptar.

Fasias ka vizituar për herë të fundit qytetin e Vlorës 4 vite më parë, ai erdhi për herë të parë në Vlorë për të marrë pjesë në Edicionin e 6-të të Festivalit Folklorik Ndërkombëtar “Aulona Interfolk”. Qyteti në atë kohë, nuk ofronte asnjë përshtypje të veçantë, pavarësisht peizazhit tërheqës natyror.

Por, sot, ajo çka sheh e ka lënë pa fjalë. Ndryshimet në qytet, “Lungomarja”, rrugët, gjithçka. Është një transformim i plotë dhe i pabesueshëm në kaq pak kohë.

Sot, Vlora për artistin grek është një qytet i mrekullueshëm, i denjë për t’u vizituar nga turistët e huaj. Madje, ai thotë se, me pamjen aktuale, Vlora i kujton qytetin e vet të lindjes, me një profil turistik mjaft të spikatur.

Ka mbetur i befasuar dhe këtë përjetim e përcjell në çdo fjalë që thotë, të cilat i shoqëron me një buzëqeshje të ngrohtë, teksa kthehet herë-herë edhe nga bashkëshortja, duke kërkuar prej saj me gjeste dhe shprehjet e fytyrës edhe një lloj miratimi.

“Kam një përshtypje të mrekullueshme sot për Vlorën. Kam ardhur edhe në vitin 2014, për të qenë në këtë festival të shkëlqyer të folklorit, që organizohet këtu në qytetin tuaj. Por, sapo mbërrita, menjëherë më bëri përshtypje transformimi dhe ndryshimi total i Vlorës”, – shprehet për ATSH-në Fasias. Ai u habit me ndryshim, modernizimin e qytetit, i cili aktualisht i kujton Selanikun, qytetin ku ka lindur dhe jeton me familjen. “Unë u habita me ndryshimin e madh që ka bërë Vlora e cila, kështu, kaq e bukur, më kujton Selanikun, qytetin tim”, – thotë artisti nga Greqia. Sipas tij, Vlora sot është një qytet i denjë për zhvillimin e turizmit, ku turistët e huaj mund të vijnë e të shijojnë, jo vetëm detin dhe bukuritë e natyrës, por edhe bukurinë e qytetit, shërbimet që ofrohen këtu, këtë pamje të mrekullueshme.

Ai shton se, përtej vizitës si artist, do të vinte me kënaqësi në Vlorë për të kaluar pushimet gjithashtu do t’ua sugjeronte edhe miqve të e tij. Por, këtë nuk mund ta thoshte 4 vjet më parë, atëhere kur përshtypjet e tij për qytetin, ishin krejtësisht të ndryshme. “Unë, nëse do të më krijohen mundësitë, do të vij vetë këtu për pushimet dhe do të sjell edhe miqtë e mi, për të pushuar e për të bërë plazh. Dhe, padyshim që edhe ata do të kënaqen. Por, këto fjalë, nuk mund t’i thosha në vitin 2014, kur unë isha këtu për herë të parë, sepse qyteti në atë kohë ishte shumë më ndryshe.

Tani jam i sigurtë, ndihem ndryshe dhe Vlora më ka pëlqyer jashtëzakonisht shumë”, -përcjell përmes ATSH-së, përjetimet e tij për qytetin e Vlorës, artisti nga Greqia, Stefano Fasias, i cili vetëm një ditë pas këtij bashkëbisedimi do të përjetonte edhe një moment tjetër të mrekullueshëm.

Grupi që ai drejton, Ansambli “Epirus” i Selanikut, u kurorëzua me Kupën e Edicionit të 10-të të Festivalit Folklorik Ndërkombëtar “Aulona Interfolk”.

Karnavali i Kulturave në Berlin zhvillohet çdo vit gjatë fundjavës së Ditës së Pesëdhjetë ndërsa edhe këtë vit ka vazhduar organizimi i këtij karnavali që mbledh kultura të ndryshme në kryeqytetin e Gjermanisë, shkruan KultPlus.

Njerëz të kulturave të ndryshme mblidhen në rrugët e kryeqytetin e festojnë me veshjet e tyre tradicionale. Po ashtu në këtë karnaval nuk munguan as shqiptarët, të cilat me veshje tradicionale, vallëzim e këngë u prezantuan para mijëra pjesëmarrësve në Berlin./ KultPlus.com

Mbjellja e mbi 122 mijë pemëve, kthimi i qendrës së qytetit në pedonale, shtimi i lulishteve dhe këndeve të lojrave, e kanë renditur Tiranën si qyteti që ka bërë më shumë ndryshime mjedisore në vitin e fundit. Vlerësimi për kryeqytetin shqiptar vjen në prag të hapjes së negociatave për anëtarësim në Bashkimin Europian, nga Utrechti i Hollandës, ku kreu i Bashkisë së Tiranës, Erion Veliaj, ishte i ftuar në takimin e kryetarëve të bashkive, i cili u mbajt në Javën e Gjelbër të BE-së.

Të pranishëm në këtë event të rëndësishëm për qytetet në ndryshim ishin edhe Komisioneri i BE-së për Mjedisin, Karmenu Vella, Drejtori Ekzekutiv i UNEP-it, Erik Solheim, kryetari i Bashkisë së Utrecht-it, Jan van Zanen, si dhe përfaqësues të qeverisë dhe parlamentit holandez.

Kryebashkiaku Veliaj dhe homologu i tij në Utrecht, diskutuan në panelin kryesor të takimit të kryebashkiakëve me temë: “Të gjelbërojmë qytetet së bashku”. Veliaj prezantoi politikat mjedisore që po ndjek Tirana dhe se si qyteti është bërë më miqësor me fëmijët, të rinjtë dhe të gjithë ata që duan natyrën. “Është kënaqësi e veçantë që jemi në Utrecht, ku Tirana u përzgjodh si një nga qytetet që po bën revolucion në gjelbërim dhe ekonominë e qëndrueshme. E them këtë sepse sapo filloi java evropiane e qyteteve të gjelbërta dhe fakti që Utrechti prezantoi Tiranën si dy nga qytetet që kanë bërë një revolucion në botë, Utrechti në vitet ‘60, ‘70, ‘80 dhe Tirana në vitet e fundit, na bën të ndjehemi vërtet krenarë”, tha kryetari i Bashkisë së Tiranës.

Ai theksoi se ky vlerësim më së shumti shkon për qytetarët e Tiranës, të cilët kanë përqafuar politikat mjedisore të Tiranës, siç ishte edhe aksioni për mbjelljen e pemëve. “Shpreh mirënjohjen time për të gjithë qytetarët e Tiranës që e prodhuan këtë histori suksesi. Në fund të ditës bashkia ka vetëm një thelë të kontributit për gjelbërimin apo ndryshimin e mentalitetit. Pjesën më të madhe, si ajo për mbjelljen e mbi 120 mijë pemëve, e kanë qytetarët e Tiranës. Ndihem i bekuar që administrata jonë punon në një qytet ku njerëzit e përqafojnë ndryshimin, ku duke filluar nga fëmijët e deri tek të moshuarit, kujdesen për qytetin, e ndjejnë si të tyrin, dhe besoj që fushata e madhe e pemëve mori jo vetëm një vlerësim këtu në Javën Evropiane të Qyteteve të Gjelbërta, por besoj merr çdo ditë uratën dhe vlerësimin e qytetarëve tanë që sot jetojnë në një qytet më të jetueshëm. Por, unë besoj se më e mira është përpara”, tha Veliaj.

Gjatë takimeve që pati me përfaqësuesit e qeverisë dhe parlamentit holandez, kryebashkiaku i Tiranës, Erion Veliaj, u kërkoi autoriteteve holandeze të shohin me dashamirësi hapjen e negociatave me Shqipërinë. Sipas tij, kjo do të sillte një avancim të reformave të nisura nga qeveria shqiptare.

“Unë besoj se qeveria shqiptare ka prezantuar një argument shumë të mirë të mënyrës se si kemi reformuar vendin, shtetin, por edhe ne si kryetarë bashkie se si kemi reformuar qytetet. Për shumë nga përfaqësuesit e qeverisë holandeze apo edhe të Komisionit Europian që ishin këtu sot, teksa shikojnë se si po reformohet shteti ynë nga qeveria shqiptare dhe qytetet tona nga bashkitë, besoj që kanë parë filizat e çfarë do të thotë krijimi i një qyteti dhe një shteti realisht evropian. Nëse do të vazhdojmë të tregojmë historinë e transformimit të shtetit dhe qyteteve tona besoj që do e kemi më të thjeshtë teksa negociojmë anëtarësimin e plotë të Shqipërisë në Bashkimit Europian”, tha Veliaj.

Kryebashkiaku i Tiranës shtoi se vlerësimi që mori kryeqyteti në Utrecht na jep motivim që aksioni i mbjelljes së pemëve të vazhdojë edhe më tej, për t’u kthyer në një nismë të përhershme deri në krijimin e Pyllit Orbital.

“E nisëm me 120 mijë pemë, por gjersa të mbyllim gjithë projektin tonë të Pyllit Orbital duhen rreth 2 milionë pemë. Do të thotë se mbjelljen e pemëve do ta kthejmë në një nismë vjetore, nga fillimi i tetorit deri në fund të marsit. Nëse vazhdojmë me ritmin këtë vit me 120 mijë pemë, nuk do të jemi larg nga dita që do të jemi një qytet si Utrechti apo si shumë qytete të tjera që e filluan këtë proces para 40-50 vitesh”, deklaroi Veliaj./tvklan

Në Gjirokastër ka përfunduar faza e parë e Rilindjes së Qafës së Pazarit që përfshiu restaurimin e thellë të 10 blloqeve, për të qenë gatë këtë sezon veror në pritje të më shumë turistëve të huaj dhe vendas.

Kryeministri Edi Rama ka zgjedhur sot, pikërisht këtë qytet, ku prej dy ditësh ka zhvendosur të gjithë kabinetin qeveritar, për rubrikën e tij të përditshme ‘mirë mëngjes”.

Në statusin e tij, përmes një videoje kreu i qeverisë bën të ditur se Gjirokastra qyteti i gurtë ka pritur një numër të konsiderueshëm në rritje të turistëve.

“Dhe nga Gjirokastra e rritjes së konsiderueshme të numrit të turistëve, ku ka përfunduar faza e parë e Rilindjes së Qafës së Pazarit, me restaurimin e thellë të 10 blloqeve, ku janë zëvendësuar tërësisht edhe çatitë, dritaret, vetratat e dyqaneve, e ku po marrin jetë hotele e bujtina të reja në vend të rrënojave, ju uroj një ditë të bukur”, shkruan kryeministri Rama.