Aktorja Vanessa Kirby e ka konfirmuar lajmin se do të luaj në filmin “Mission: Impossible 7” dhe në vazhdimin e tetë të planifikuar.
Ylli 31-vjeçar i kinematografisë e kaluajtur rolin e Alanna Mitsopolisit, ndryshe e njohur me nofkën “White Widow”, në filmin e vitit 2018 “Mission: Impossible – Fallout”, dhe tashti do të rikthehet në dy vazhdimet e ardhshme të filmit me buxhet të lartë, transmeton Koha.net.
Në një intervistë të aktores për revistën “Glamour”, Vanessa ka thënë se është duke u bërë gati t’i fillojë trajnimet për xhirimet e filmit “Mission: Impossible 7”.
Christopher McQuarrie, i cili e ka shkruar skenarin dhe e ka bërë regjinë e filmave “Mission: Impossible – Fallout” dhe “Mission: Impossible – Rogue Nation”, po ashtu është angazhuar në realizimin e dy vazhdimeve të ardhshme të cilat do të xhirohen njëra pas tjetrës.
Projekteve në fjalë ende nuk janë titulluar, por vazhdimi i shtatë i filmit do të lansohet nëpër kinema në korrik të vitit të ardhshëm, ndërsa i teti në gusht të vitit 2022.
Ylli i filmit “Pieces of a Woman” i bashkohet edhe një herë në ekran të madh, yjeve të këtyre filmave: Tom Cruise, Simon Pegg, Rebecca Ferguson dhe Ving Rhames. Ndërsa aktorët, Nicholas Hoult dhe Hayley Atwell, gjithashtu i janë bashkuar ekipit të aktorëve të këtyre projekteve. /KultPlus.com
Ministrja Vlora Dumoshi ka pritur sot në një takim një grup të rinjsh nga Komuna e Prishtinës, me të cilët diskutoi për problemet, sfidat dhe pritshmëritë që kanë të rinjtë, jo vetëm të kryeqytetit por në tërë vendin.
Ministrja i njoftoi të rinjtë kryeqytetas për politikat dhe programin që ka Ministria e Kulturës, Rinisë dhe Sportit (MKRS) për fushën e rinisë. Ajo gjatë bashkëbisedimit me të rinjtë diskutoi por objektivat dhe strategjinë që ka MKRS-ja për të rinjtë, aktivizimin e tyre të mëtejmë në jetën sociale e institucionale dhe në avancimin e tyre në përgjithësi.
Ndër të tjera, ministrja Dumoshi i informoi të rinjtë se do ta kenë mbështetjen dhe përkushtimin e plotë të saj në bashkëpunimin me ta për të çuar përpara synimet e përbashkëta të MKRS-së dhe interesat e të rinjve përmes aktiviteteve e projekteve konkrete ku të rinjtë e Republikës së Kosovës, përpos shkëmbimit të përvojave të mira në kampet që do të organizohen me mbështetje të ministrisë, do të përkrahen edhe do të rritet bashkëpunimi me Këshillat për Veprim Rinor Lokal (KVRL-të) anë e kënd komunave të Kosovës.
Në kuadër të fuqizimit të kapaciteteve të organizatave rinore, Ministrja Vlora Dumoshi, u shpreh se organizatat që merren me rininë do të subvencionohen në ngritje të kapaciteteve të tyre për të nxitur nismat kreative, për të përkrahur integrimi shoqëror të të rinjve përmes kulturës, sportit e rekreacionit, dhe organizimet tradicionale të të rinjve, siç është Dita Ndërkombëtare e Rinisë më 12 gusht.
Po ashtu ministrja u shpreh se do të angazhohet maksimalisht në mbështetje të të rinjve ku do të ketë rritje të vazhdueshme të buxhetit për këtë sektor jetik të shtetit të Kosovës, do të jetësohet strategjia për rini duke zbatuar aktivitetet që parashihen sipas planit të veprimit dhe programit që ka MKRS-ja për rininë në Kosovë.
Ministrja i kushtoi vëmendje dhe përmendi edhe përfaqësimin e të rinjve në nisma kombëtare e ndërkombëtare qofshin ato të rajonit apo më gjerë, duke e konsideruar se këto nisma janë edhe një përvojë e mirëseardhur për të rinjtë në Kosovë, të cilët do të kenë mundësinë e zbulimit dhe zhvillimit të interesave dhe talenteve të tyre. Këto përfaqësime rinore po ashtu do të rrisin kohezionin social ndëretnik mes të rinjve.
Nga ana e tyre, të rinjtë e uruan Ministren Dumoshi për detyrën e re dhe shpalosën disa prej ideve dhe pritshmërive që kanë prej saj si ministre dhe MKRS-së. Ata u shprehën të kënaqur me gatishmërinë e ministres Dumoshi për të mbështetur të rinjtë dhe theksuan se shpresojnë se do të gjejnë mirëkuptimin dhe përkrahjen për projektet që kanë për qëllim të realizojnë në të ardhmen. /KultPlus.com
Njerëzit zakonisht mbajnë kontakt me sy nga 30 deri në 60% të kohës kur janë në bisedë. Por, për të krijuar një lidhje emocionale të vërtetë, duhet të jetë nga 60 deri në 70%.
Përdorimi i kontaktit me sy në avantazhin tuaj është një aftësi që mund të zotërohet me praktikë. Nëse jeni duke u përpjekur të arrini në një pikë gjatë një mbledhje bordi ose duke kaluar një mbrëmje romantike me dikë, vështrimi juaj mund të thotë më shumë sesa fjalët tuaja.
Ky artikull do t’ju bëjë të vetëdijshëm dhe vlerësoni rëndësinë e mësimit të kësaj aftësie të rëndësishme të gjuhës së trupit.
Ju mban më shumë të vetëdijshëm.
Në një grup shoqëror, nëse shihni dikë që ju shikon, mund të filloni të përqendroheni më shumë në veprimet dhe mënyrat tuaja. Mund të jetë një gjë pozitive nëse e merrni atë në mënyrën e duhur. Nëse vëreni që dikush po përpiqet të mos duket se ju ka ngulur syte, kontrolloni dhe shihni nëse ajo që po bëni është e përshtatshme.
Sidoqoftë, largimi i një shikimi nganjëherë mund të përdoret për të ngacmohet gjithashtu. Pra, nëse e shihni që gjithçka është në rregull, por dikush ende po ju shikon, thjesht mund ta injoroni këtë person.
Kontakti me sy rrit vetëdijen. Nëse shiheni romantikisht në sytë e të dashurit tuaj, ata menjëherë do të kenë atë ndjesinë nervoze të fluturave në stomak. Dhe kjo është kënaqësi për të dy.
Të gjithë e dimë se një buzëqeshje është një mënyrë e shkëlqyeshme për të krijuar dhe thelluar një tërheqje. Duke e bashkuar atë me një vështrim të thellë, e çon atë në nivelin tjetër. Lajmi i mirë është se ne e themi këtë jo vetëm nga përvoja jonë, por edhe me mbështetjen e shkencës.
Pavarësisht nëse po flisni me një punëdhënës të ardhshëm ose me dikë që e doni, mbajtja e kontaktit me sy është një shenjë besimi dhe sinqeriteti. Është një mënyrë efektive për të siguruar që ata t’ju kushtojnë vëmendje dhe të mbajnë mend ato që po thoni.
Kjo teknikë mund të jetë po aq efektive nëse po bëni prezantime në biznes ose përpiqeni ta bëni fëmijën tuaj të kuptojë diçka. Kjo u vërtetua edhe në një studim që u krye në Universitetin e Wolverhampton.
Ndihmon njerëzit t’ju vërejnë dhe t’ju mbajnë mend.
Ju mund të keni vënë re se njerëzit e suksesshëm kanë një mënyrë të veçantë për të bërë gjeste dhe shikojnë njerëzit ndërsa flasin. Gjuha e tyre e fortë e trupit është çelësi i suksesit të tyre.
Hulumtimet kanë treguar që kontakti me sy, i shoqëruar me një lëvizje të papritur, si kthimi i kokës ndërsa mbani shikimin drejt dikujt ose një lëvizje e papritur e duarve, mund t’i bëjë njerëzit të marrin vëmendje nga ju dhe t’ju kujtojnë.
Gjuha e fortë e trupit shoqëruar me një vështrim të thellë ka një ndikim shumë të fortë në një audiencë.
Shpesh kemi dëgjuar deklarata si “shikoni në sytë e mi dhe më tregoni të vërtetën” në filma, kështu që është e natyrshme të supozojmë se të gënjesh ndërsa shikon dikë në sy është e vështirë.
Sidoqoftë, është një mit që njerëzit shmangin gënjeshtrën ndërsa shikojnë drejtpërdrejt në sytë e dikujt, dhe shkenca e mbështet këtë. Por ky mit nuk është plotësisht i pabazuar. Edhe pse është e vërtetë që gënjeshtarët bëjnë më shumë kontakt me sytë sesa treguesit e së vërtetës, kur përballen me kontakt të drejtpërdrejtë me sy, njerëzit kanë tendencë të jenë më të sinqertë.
Kjo për shkak të përbërjes tonë të brendshme, e cila daton në ditët tona si gjahtarë dhe mbledhës. Ne nënndërgjegjen tonë besojmë se sytë tanë japin më shumë sesa ato që mund të jemi duke thënë, kështu që ne abstenojmë nga gënjeshtrat ndërsa shikojmë drejtpërdrejt dikë.
Disa nga skenat më romantike në filma janë ato ku të dashuruarit shikojnë në sytë e njëri-tjetrit. Në fakt, ekziston edhe një shkencë pas kësaj. Ju mund të dashuroheni me dikë vetëm duke parë në sytë e tyre, por mund të mos jetë reciproke, sipas hulumtimit.
Studiuesit që përdorin kamera të fshehura zbuluan se nëse një burrë shikon një grua për më shumë se 8.2 sekonda, ai ka më shumë të ngjarë të dashurohet me të, në krahasim me nëse e shikon atë për më pak se 4,5 sekonda.
Por ky konstatim nuk vlen për gratë. Pra, nëse jeni grua dhe shihni një mashkull që ju shikon për më shumë se 8.2 sekonda, dijeni se ai mund të ketë ndjenja për ju!
Vendosja e një kontakti të shëndetshëm me sy ndërsa flasim është një shenjë respekti dhe vlerësimi në shumicën e vendeve perëndimore, përfshirë SHBA. Kjo gjithashtu tregon se ju e konsideroni personin tjetër si të barabartë.
Nëse ndiheni larg prej kësaj, njerëzit mund t’ju perceptojnë si të paaftë ose jo të besueshëm. Por është e rëndësishme të siguroheni që shikimi juaj të mos shndërrohet në ngulitje sysh.
Sidoqoftë, kultura të ndryshme në Azi dhe Afrikë e konsiderojnë të shikuarit drejtpërdrejt në sytë e dikujt që është më i lartë në hierarkinë sociale, si të pasjellshëm dhe mosrespektues. Prandaj është e nevojshme të dini për kulturën dhe traditat e vendit ku ndodheni.
Mund të ju ndihmojë të merrni pjesë në një mbledhje të re shoqërore.
Ndonjëherë mund ta gjejmë veten në grupime shoqërore ku mund të mos njohim shumë njerëz, përveç mikpritësit. Këto raste janë një vend i shkëlqyeshëm për t’u shoqëruar dhe për të krijuar kontakte të reja. Dhe shikimi mund të jetë një mënyrë e shkëlqyeshme për të filluar.
Nëse krijoni kontakte me sy me dikë në një tubim shoqëror, kjo tregon që dëshironi të afroheni me këtë person dhe të bëni një bisedë. Kjo është një mënyrë e mirë për të thyer akullin dhe për të formuar marrëdhënie kuptimplota. / Shkolla Suksesit / KultPlus.com
Interneti është temë kyçe në ditët e sotme. Dita e internetit të sigurt këtë vit shënohet në më shumë se 150 vende të botës. Miliona njerëz i bashkohen ngjarjes “Së bashku për një internet më të mirë” përmes aktiviteteve dhe ngjarjeve të shumta, të organizuara nga të gjithë përkrahësit e ditës së internetit të sigurt. Njëjtë veproi edhe Kosova.
Në ambientet e KultPlus Caffe Gallery, me moton ”Së bashku për një internet më të mirë”, Komiteti Kosovar për Ditën e Internetit të Sigurt – KKDIS i udhëhequr nga Qendra për Studime të Avancuara shënoi ditën e internetit të sigurt.
Të interesuarit, që kryesisht ishin prindër, po dëgjonin me vëmendje se çfarë kishte përgatitur për ta paneli i cili përbëhej nga, Teuta Zymeri- Qendra për studime të avancuara – FIT, Petrit Tahiri – Qendra për arsim e Kosovës dhe Luana Malaj- nxënëse.
Qëllimi i këtij diskutimi ishte që të promovojë një përdorim të përgjegjshëm, të mirëfilltë, kritikues dhe kreativ të internetit dhe teknologjive, veçanërisht nga fëmijët dhe të rinjtë.
Ky aktivitet u zhvillua në bashkëbisedim me prindërit rreth përdorimit të internetit nga ana e fëmijëve. Ndër të tjera, në këtë forum u bisedua rreth aktiviteteve online, rreziqeve potenciale dhe shenjave paralajmëruese kur një fëmijë mund të jetë në rrezik nga përdorimi i internetit.
Fillimisht fjalën e mori Teuta Zymeri e cila pasi falënderoi të pranishmit, tregoi se jo rastësisht kanë vendosur që këtë ditë ta shënojnë në këtë format, d.m.th përmes një bashkëbisedimi me prindërit, duke e ditur rëndësinë e prindërve në edukimin e fëmijëve sa i përket përdorimit të sigurt të internetit.
“Shpesh në punën time, ka ankesa dhe kërkesa nga prindërit rreth kësaj teme dhe për këtë vendosëm që ta bëjmë këtë bashkëbisedim. Duke e ditur që në epokën dixhitale, risitë janë duke avancuar çdo ditë, por me avancimin e teknologjisë edhe përdorimi i internetit nga ana e fëmijëve është duke u rritur vazhdimisht, në të njëjtën kohë edhe shfrytëzimi i të dhënave po monitarizohet në çdo kohë, kjo e bën edhe më komplekse përdorimin e internetit”, tha ajo fillimisht duke u ndalur tutje në disa pika kyçe ku fëmijët kanë më shumë rrezik nga interneti.
“Interneti po përdoret qysh në fëmijërinë e hershme. Aktivitetet online të fëmijëve të cilat më së shumti i kemi vëzhguar gjatë punës sonë, janë: mbrojtja e privatësisë, postimet në rrjetet sociale, mesazhet kërcënuese, bisedat online me njerëz të panjohur, si dhe lojërat e ndryshme, këto janë ato që fëmijët i përdorin më së shumti, por në të njëjtën kohë janë më të rrezikshmet. Të dhënat e fëmijëve tanë, janë çdo moment të rrezikuara nga keqpërdorimet e ndryshme.”
Tutje fjalën e mori Petrit Tahiri i cili tregoi që përmes këtyre aktiviteteve po mundohen të kontribuojnë në vetëdijesimin e përgjithshëm për të mirat që i sjell interneti por edhe rreziqet që i bartë, e kur flasim për rreziqet i kemi parasysh grupet që janë më të cenueshme, e në këtë rast janë fëmijët të cilët mund të jenë edhe viktima të keqshfrytëzimit të internetit edhe prej vetë atyre, por edhe prej dashakeqësve që e përdorin internetin.
“Sipas hulumtimeve që i kemi bërë, të gjitha të dhënat na dalin se problemet që manifestohen në shkollat tona ndërmjet bashkëmoshatarëve, në një apo formë tjetër, burimin e kanë te interneti – rrjetet sociale. Këto na sjellin në një situatë ku shtrohet pyetje, çka duhet bërë?
Po nuk ka një përgjigje konkrete, e rëndësishme është të kemi informatën dhe prindërit sidomos të jenë ata që i mbikëqyrin fëmijët e tyre se si e kalojnë kohën në një pajisje që ka qasje në internet. Përveç mbikëqyrjes, prindi duhet të ketë edhe vetëkontroll, sepse nëse vet e mban telefonin gjithë kohës në dorë, atëherë çfarë shembulli i jep fëmijës?”
Gjithashtu, gjatë këtij diskutimi u fol edhe për problemet që interneti i ka sjellë në shkollat tona.
“Interneti nuk po shfrytëzohet në mënyrën më të mirë. Në shkollat tona rrjetet sociale po përdoren pa kontroll edhe përkundër që janë bërë disa tentativa nga ministria ku ndalohet telefoni në hapësirat shkollore, po ajo ka mbet aty sepse nuk po gjen zbatushmëri. Por, nuk e di edhe sa është vendim i mirë, sepse po kërkohet ndalesë e ndalesa nuk është zgjidhje”, tha Petriti.
Ndërsa nga perspektiva e adoleshentes Luana Malaj, interneti përdoret shumë prej të rinjve dhe sjell shumë dobi.
“Për siguri unë mendoj që prindërit na kanë njoftuar me kohë që mos me i nda me askënd adresat e të dhënat tjera personale, por interneti mendoj që të plotëson, unë personalisht marrë informata për librat, interneti mundet me ma marrë kohën, por nëse unë jam e vendosur të lexoj, atëherë nuk e shoh si pengesë”, tha ajo. Por niveli i Luanës ndoshta është më i lartë se i shumë fëmijëve të tjerë, sepse sipas hulumtimeve, interneti shumë pak përdoret për ta ngritur nivelin e njohurive, më shumë përdoret për lojëra dhe rrjete sociale.
Fjalës ju kthye edhe njëherë Teuta Zymeri e cila tutje i shpalosi edhe disa këshilla.
Sipas saj roli i prindërve në këtë fushë, është t’i edukojë fëmijët se si ta përdorin internetin, të përfshihen në çdo aktivitet të fëmijëve nëse donë që fëmijën ta kenë të sigurt. Prindërit duhet të jenë të informuar se cilat rrjete sociale po i përdor fëmija më shumë, cili është Youtuberi që po i pëlqen më shumë, cila është loja që po i pëlqen, cilët janë shokët që po bashkëbisedon më shumë. Domethënë të gjitha angazhimet e fëmijëve në internet duhet të monitorohen prej prindërve por jo në formën e policit, por të bashkëbisedohet. Komunikimi i hapur me fëmijë është çelësi kryesorë i suksesit për mbrojtjen e fëmijëve, pohoi Teuta.
“Fëmijët duhet ta dinë që telefonin apo secilën pajisje që ka qasje në internet e kanë privilegj, ne si prind nuk jemi të obliguar të ju sigurojmë, e në momentin që e kanë privilegj ata duhet të dinë ta ruajnë. E kjo duhet të bazohet në një rregullore të familjes se si duhet përdorur dhe sa duhet përdorur interneti.”
Ndërsa sa i përket shenjave të cilat paralajmërojnë që një fëmijë është në rrezik nga përdorimi i internetit, aty u cekën disa nga to: kur fëmija shpenzon shumë kohë në internet, kur rrinë natën shumë, në momentin kur t’i i afrohesh dhe ai e mbyll pajisjen, ndryshimi i sjelljes, mossocializimi, mbyllja në vetëve, të gjitha këto u cekën si paralajmërime se kur një prind duhet të shqetësohet.
Kështu u hap edhe diskutimi me të pranishmit, ku pyetjet dhe përvojat që u shpalosën ishin nga më të ndryshmet, por si përfundim, nuk kishte një përgjigje konkrete ose rregulla se si duhet të veprohet në këto raste. Aty u tha që secili duhet të gjejë formën më të përshtatshme. Kryesisht u këshilluan për parime të përgjithshme e që janë: komunikimi, bashkëpunimi, mbikëqyrja dhe vetëkontrolli.
Si përfundim u këshillua që kjo çështje zgjidhjen më të mirë e ka duke ju ofruar mundësi për dialog të hapur fëmijëve, duke i mësuar ata si të përdorin teknologjitë në mënyrë pozitive dhe sigurt, dhe duke qenë vet model i mirë digjital – prindërit mund të luajnë një rol kyç në fuqizimin dhe përkrahjen e fëmijëve në përdorimin e internetit në mënyrë të duhur. / KultPlus.com
Kosova është e para në Ballkan për sa i përket pozitave ministrore të cilat drejtohen nga gratë.
REL ka nxjerrë statistikat ku Kosova prinë me 31 për qind.
Pason Serbia me 23 për qind. Më pas, Mali i Zi me 21 për qind. E pason Maqedonia njëjtë me 21 për qind, Kroacia me 20 për qind dhe Bosnje e Hercegovina me 17 për qind.
Kujtojmë se për herë të parë që nga formimi i institucioneve të Republikës së Kosovës, në qeverinë e re të drejtuar nga Albin Kurti, që përbëhet nga 15 ministri, pesë prej tyre do to udhëhiqen nga gratë.
Ndërkaq, në krye të Kuvendit të Kosovës është zgjedhur po ashtu një grua, Vjosa Osmani e cila zëvendëse të parë ka po ashtu një grua, deputeten Arbërie Nagavci, transmeton Koha.net.
Ministret gra të votuara në Kuvendin e Kosovës janë Albulena Haxhiu, ministre Drejtësisë, Rozeta Hajdari ministre e Ekonomisë, Tregtisë dhe Financave – që të dyja nga Lëvizja Vetëvendosje.
Ndërkaq, nga Lidhja Demokratike e Kosovës, Hykmete Bajrami është emëruar ministre e Arsimit dhe Vlora Dumoshi Ministre e Kulturës, Rinisë dhe Sportit.
Ndërkaq, nga komunitetet joserbe, Emilia Rexhepi do të jetë ministre e Administrimit të Pushteti Lokal.
Një grup shkencëtarësh nga provinca Alberta në Kanada zbuluan një fosil të tiranosaurit të vjetër 11 milionë vite, të cilin e quajtën “engjëlli i vdekjes”.
Doktor Jared Voris nga Universiteti Calgary, i cili ka punuar në këtë projekt, siç transmeton AA, tha se bëhet fjalë për një specie të re të dinosaurit.
Ai theksoi se deri më sot ky është dinosauri më i vjetër i kësaj specie të gjetur në Kanada, duke përmendur se rajoni ku ata kryen kërkime arkeologjike është i pasur me fosile që i përkasin specieve të reja ose më parë të njohura të dinosaurit.
Tiranosauri (“hardhuc tiran”) është një dinosaur parahistorik mishngrënës. Ata kishin origjinën në periudhën kretace dhe ekzistonin deri në zhdukjen e dinosaurëve 65 milionë vjet më parë. / KultPlus.com
Kur kanë kaluar më shumë se dy muaj nga tërmeti i 26 nëntorit, Ministria e Kulturës ka publikuar një raport mbi situatën në të cilën ndodhen monumentet Kulturore, pas asaj lëkundje tragjike.
Kur kanë kaluar më shumë se dy muaj nga tërmeti i 26 nëntorit, Ministria e Kulturës ka publikuar një raport mbi situatën në të cilën ndodhen monumentet Kulturore, pas asaj lëkundje tragjike. Në raport, evidentohet se 23 monumente kanë dalë jashtë përdorimit, 30 prej tyre janë pjesërisht të përdorshme dhe 48 prej tyre nuk kanë pasur problem. Këto monumente ndodhen në zonat e prekura nga tërmeti 6.4 ballë.
Në Komisionin e Medias, ministrja e Kulturës për dëmet e tërmetit në monumentet e kulturës, Elva Margariti raportoi se nga 216 objekte të trashëgimisë, të cilat janë inspektuar pas tërmetit, rreth 30 me risk të lartë. Për rikuperimin e tyre 707 mln lekë. Më rrezikuarat, kulla e Krujës, e cila është rrethuar dhe ka vendosur tabela parandaluese. Si një masë e marrë nga ministria, janë mbyllur muzetë edhe sitet ku Instituti i Monumenteve të Kulturës dhe ai i Ndërtimit panë domosdoshmëri për riparimin e dëmeve.
Margariti bëri me dije se është e vështirë kthimi i tyre në origjinalitet.
Vlora Dumoshi, Ministre e Kulturës, Rinisë dhe Sportit (MKRS), priti sot në një takim përfaqësuesit e Zyrës Rajonale për Bashkëpunim Rinor (RYCO) të kryesuar nga zëvendës-sekretari Fatos Mustafa.
Temë diskutimi e takimit ishte fusha e rinisë, ku konkretisht u diskutua për politikat, programin dhe prioritetet që do t’i ketë MKRS-ja, për një sektor kaq të rëndësishëm të Republikës së Kosovës, si dhe bashkëpunimin rajonal të të rinvje.
Ministrja Dumoshi i njoftoi përfaqësuesit e RYCO-s se rinia do të jetë ndër prioritetet e saj gjatë mandatit sa do të udhëheq MKRS-në. Ministrja e konfirmoi mbështetjen e plotë dhe përkushtimin e saj ndaj sektorit të rinisë dhe u shpreh se do të bashkëpunojë me organizatat që merren me çështjet e rinisë, duke përfshirë edhe RYCO-n.
Ajo e falënderoi përfaqësuesit e RYCO-s për punën e deritashme dhe kërkoi angazhim edhe më të madh për shtrirje dhe aktivitete më të shumta të rinisë. Ministrja gjithashtu kërkoi që të rinjtë e Kosovës si dhe Kosova si shtet të përfaqësohen në mënyrë sa më dinjitoze në të gjitha nismat rajonale.
Ndërsa, përfaqësuesit e RYCO-s, i uruan marrjen e detyrës ministres Dumoshi dhe e njoftuan për aktivitetet e Zyrës Rajonale për Bashkëpunim Rinor (RYCO) dhe për projektet që RYCO ku ka mbështetur organizatat rinore dhe shkollat e mesme në Kosovë dhe në rajon. / KultPlus.com
Mark Ruffalo ka bërë prova për ta siguruar një rol protagonist në versionin televiziv të filmit të regjisorit jugkorean Bong Joon-ho, “Parasite”, i cili e fitoi çmimin “Oscar” në kategorinë “Filmi më i mirë”.
Ylli i filmave “Avengers” ishte i pranishëm në publik të dielën mbrëma, dhe e shikoi se si regjisori i këtij filmi i rrëmbeu katër trofe të rëndësishme “Oscar”, në edicionin e 92-të të ceremonisë së ndarjes së shpërblimeve akadamike. Dhe tashti, ai po konsiderohet si aktorë potencial për t’u angazhuar në serinë televizive të kanalit HBO, të adaptuar nga filmi i shumë shpërblyer nga Kore Jugore, transmeton Koha.net.
Sipas një burimi të panjohur, regjisori Bong po i bashkon forcat me regjisorin amerikan, Adam McKay, në realizimin e pesë ose gjashtë episodeve të serisë, dhe Ruffalo po konsiderohet favorit për ta luajtur njërin nga rolet protagonist në këtë projekt. Ndërkaq, detajet e sakta të personazhit që aktori mund ta luaj në seri, nuk janë zbuluar ende.
Regjisori Bong, i cili bëri histori me triumfin e tij në ceremoninë “Oscar” me ç’rast “Parasite” u bë filmi i parë në të cilin nuk flitet anglisht dhe që e fitoi çmimin akademik në kategorinë “Filmi më i mirë”, së fundmi kishte treguar se ka pasur shumë ide për ta realizuar një seri televizive të bazuar në këtë histori.
Xhirimet për serinë “Parasite” pritet të fillojnë në vitin 2021. / KultPlus.com
Universiteti i Prishtinës “Hasan Prishtina”, ka promovuar pullën postare me logon e 50 vjetorit për nder të themelimit të Universitetit të Prishtinës.
Promovimin e kësaj pulle e ka bërë Posta e Kosovës me rast të shënimit të pesë dekadave të themelimit të Universitetit të Prishtinës si institucioni më i rëndësishëm arsimor, shkencor dhe kulturor në Republikën e Kosovës.
Rektori i Universitetit të Prishtinës, Marian Dema tha se promovimi i kësaj pulle postare është aktivitet i rëndësishëm për Universitetin e Prishtinës si shpërblim i punës së madhe të këtij universiteti.
“Sot është aktiviteti i tretë që do të promovohet pulla postare, 50 vjetori i Universitetit të Prishtinës. Kjo pullë postare vjen si shpërblim i punës së ma dhe që ka bërë Universiteti i Prishtinës për 5 kjo është një vlerë e veçantë, që besoj se është edhe një vlerë e veçantë për Postën e Kosovës sepse e nderon një tempull i cili për 50 vite ka dhënë dritë, ka dhënë profesionist, ka dhënë kontribute në të gjitha fushat”, deklaroi Dema.
Dema shtoi se shtetin e Kosovës e ka lindur ky universitet, prandaj është i lidhur ngushtë me fatin e popullit të Kosovës dhe është obligim për secilin që ta rrisë dhe zhvillojë atë.
“Historikisht fati i Universitetit të Prishtinës ka qenë i lidhur ngushtë me fatin e popullit të Kosovës, po jo vetëm aq, ndoshta nuk është edhe e rëndësishme që këto dy data, data e themelimit të Universitetit të Prishtinës, dhe data e pavarësisë janë kaq afër që do të thotë se këtë shtet e ka lind ky Universitet dhe e kemi obli gim ta rrisim, ta zhvillojmë dhe ta bëjmë një shtet që do të jetë i këndshëm, që do t’i trajtojë të gjithë në mënyrë të barabarta, në të cilin çdonjëri ta realizojë ëndrrën e vet”, tha Dema.
Kryeshefi ekzekutiv i postës së Kosovës, Shefqet Avdija tha janë krenarë që kanë bërë promovimin e pullës postare për Universitetin e Prishtinës me qëllim të promovimit të vlerave në Republikën e Kosovës.
Avdija tha se historia e Universitetit të Prishtinës është e pandashme me historinë e popullit, andaj edhe kjo pullë postare do të udhëtojë kudo nëpër botë me imazhin e tempullit të arsimit si institucioni më i rëndësishëm në Kosovë.
“Që nga themelimi historia e këtij universiteti mbetet e pandashme me historinë e popullit të Kosovës, universiteti i Prishtinës për dallim n ga Universitetet e Evropës veprimtarinë e kanë zhvilluar në dy fronte atë të luftës për dije dhe atë të luftës për liri. Kjo dëshmoi edhe një herë se shkolla arsimi dhe dija janë parakusht për ndërtimin e lirisë shpirtërore si hap i parë në realizimin e lirisë fizike, prandaj kjo pullë postare do të udhëtojë kudo nëpër botë me imazhin e tempullit tonë të arsimit dhe të dijes”, deklaroi Avdija
UP u themelua me Ligjin mbi themelimin e Universitetit, të cilin e miratoi Kuvendi i ish-Krahinës Socialiste të Kosovës më 18 nëntor 1969.
Kuvendi themelues i Universitetit “Hasan Prishtina” u mbajt më 13 shkurt 1970.
Ndërsa, me 15 shkurt 1970 u mbajt mbledhja solemne e Kuvendit dhe kjo datë u shpall Dita e Universitetit të Prishtinës./Koha.net / KultPlus.com
Drama “Galaksia” do të rikthehet në skenë për publikun. Teatri Kombëtar shprehet se kjo vepër teatrore e autorit Howard Barker, që erdhi në skenë te “ArTurbina”, me regji nga Rovela Lule u mirëprit nga publiku.
“Galaksia” (skena nga një ekzekutim) rikthehet në skenë pas suksesit të madh të 3 netëve të para. Për të gjithë ata që ende nuk e kanë parë këtë shfaqje të mrekullueshme”, bën me dije teatri për dramën, që do të jetë në skenë siç është njoftuar mbrëmjet e datave 13, 14, 15 dhe 16 shkurt. Në skenë te “ArTurbina” vijnë aktorët Olta Daku, Neritan Liçaj, Rjamonda Bulku, Myzafer Zilfa, Lulzim Zeqja, Vikena Kamenica, Paola Kodra, Niada Saliasi, Genti Deçka, Naun Shundi, Monika Lubonja, Ardian Cerga, etj. Teatri Kombëtar shkruan se është një vepër tejet aktuale edhe pse ngjarjet e së cilës janë vendosur në Venecian e shekullit XVI, ajo flet edhe sot po njësoj.
“Lufta e artistit për të thënë të vërtetën deri në fund me veprën e tij dhe mospranimi apo gati-gati ekzekutimi i veprës dhe artistit nga shteti! A janë betejat triumfuese?! Apo ajo që ndodh është masakër?! Të vërtetën e zbulojmë në “ArTurbina” me një kast të mrekullueshëm aktorësh”, pohon teatri. Skenografia në vepër është nga Genc Shkodrani, kostumografe Laedja Hajdari, kompozitor Endri Sina, as.regjisore Paola Kodra dhe piktor Rael Hoxha. “Galaksia” (skena nga një ekzekutim) është e cilësuar si vepra më e mirë e autorit bashkëkohor britanik Howard Barker.
Në qendër të saj qëndron një piktore e jashtëzakonshme (Galaksia) e interpretuar nga aktorja Olta Daku, së cilës i duhet të përballet me luftën e pushtetit ndaj artit! Rovena Kuka është pedagoge, regjisore dhe aktore. Ajo ka mbaruar studimet e larta në Akademinë e Arteve për instrumentin muzikor flaut. Në vitin 2006, diplomohet për regjisurë në po të njëjtën shkollë, sot Universiteti i Arteve. Prej vitit 2010, Rovena Lule Kuka punon si pedagoge e Mjeshtrisë së Aktorit dhe është realizuese e disa veprave bashkëkohore si “Boston Marriage”, “Perversitet seksual në qytet”, “Gruaja në dritare”, etj. Gjithashtu, ajo ka interpretuar në disa filma dhe vepra teatrale, ku ndër të tjera mund të përmendim “Ndërkombëtarët” dhe rolin kryesor në filmin “Maya”. /KultPlus.com
Tirana më 11 shkurt të vitit 1920 u shpall përkohësisht kryeqytet i vendit, duke kaluar më pas në etapa të ndryshme të evoluimit të saj, si gjatë Mbretërisë, periudhës së pushtimit nazifashist dhe komunizmit, si dhe në fazën e tranzicionit.
Gjatë periudhës 100-vjeçare me statusin e kryeqytetit të Shqipërisë, Tirana ka kaluar në faza të ndryshme historike të zhvillimit dhe transformimit të saj në një metropol modern, shkruan Anadolu Agency (AA).
Në Tiranën e sotme bashkëjeton historia me modernen, trashëgimia kulturore me trendet e reja të zhvillimit urbanistik, por edhe turizmi i shumëllojshëm, e ka shndërruar Tiranën në dekadën e fundit, në një atraksion turistik.
Tirana më 11 shkurt të vitit 1920 u shpall përkohësisht kryeqytet i vendit, duke kaluar më pas në etapa të ndryshme të evoluimit të saj, si gjatë Mbretërisë, periudhës së pushtimit nazifashist dhe komunizmit, si dhe në fazën e tranzicionit pas përmbysjes së sistemit diktatorial.
Gjatë një shekulli me statusin e kryeqytetin të Shqipërisë, Tirana ka arritur të ruajë edhe trashëgiminë e pasur kulturore dhe historike, ku sot pjesë e saj janë monumentet e kulturës të kategorive të ndryshme, si xhami, kala, ura, shtëpi karakteristike tiranase, dhe objekte të tjera që mbrohen nga shteti.
Sipas Fjalorit Enciklopedik Shqiptar (Botim i Akademisë së Shkencave të Shqipërisë, viti 2008) historia e Tiranës shënon një kthesë të rëndësishme në vitin 1614 (që konsiderohet edhe viti i themelimit të qytetit të sotëm), gjatë periudhës osmane, kur Sulejman Pashë Bargjini, një sanxhakbej, ndërtoi në qendrën e sotme të kryeqytetit një xhami, një han, një hamam dhe një furrë, që sot nuk ekzistojnë më.
Shpallja e Tiranës kryeqytet
Tirana pas shpalljes së pavarësisë së vendit në vitin 1912 vazhdoi të ishte një qytet me ndikim në vend, ndërsa pas shpalljes kryeqytet të Shqipërisë ka përjetuar ndryshime të mëdha sidomos sa i përket infrastrukturës dhe arkitekturës.
Organet e shtetit shqiptar që dolën nga Kongresi i Lushnjës siç ishin Këshilli i Naltë dhe qeveria u vendosën më 11 shkurt 1920 në Tiranë, që u caktua përkohësisht kryeqytet i Shqipërisë, kurse përfundimisht Tirana u shpall kryeqytet me statutin e Republikës Shqiptare në janar të vitit 1925, duke mbetur deri në ditët e sotme kryeqytet i vendit. Para se të merrte Tirana këtë status, kryeqytet i vendit shërbeu për disa vite Durrësi.
Ndërkohë edhe në kushtetutën e sotme të Shqipërisë mbrohet dhe caktohet statusi i Tiranës si kryeqytet i vendit.
Periudha e Mbretërisë në Shqipëri (1928-1939) shënon një zhvillim infrastrukturor të vendit, ndërsa në Tiranë mbizotëruan ndërtesat e stilit të arkitekturës italiane. Në periudhën e atyre viteve u ndërtuan sheshi kryesor i kryeqytetit, godinat e ministrive, banka kombëtare dhe një pjesë e Pallatit të Brigadave.
Tirana gjatë komunizmit (1944-1991)
Pas çlirimit të vendit në nëntor të vitit 1944 nga pushtuesit nazifashistë, në vend u vendos sistemi komunist, ku ish-udhëheqësi diktatorial Enver Hoxha, i kushtoi rëndësi ndërtimit të objekteve sipas modelit sovjetik, ndërsa statusi si kryeqytet nuk ndryshoi.
Muzeu Historik Kombëtar, Pallati i Kongreseve, Pallati i Kulturës (sipas modelit sovjetik), Tirana International Hotel, Piramida (ish-muzeu i diktatorit Hoxha), Galeria Kombëtare e Arteve dhe shumë pallate banimi janë ende sot disa nga objektet e mëdha dhe të njohura që janë trashëgimi e regjimit komunist.
Pallatet parafabrikate, ashtu si në shumë vende ish-komuniste të Evropës mbeten edhe sot si modele të ndikimit komunist mbi arkitekturën e ndërtimeve.
Pas vdekjes së diktatorit Enver Hoxha(1985), një muze në formën e një piramide u ndërtua në nder të tij, ndryshe e njohur si “Piramida”, ndërsa aktualisht kjo ndërtesë nuk kryen më funksionet e një muzeu.
Ajo që në atë periudhë vishej me mister, ishte zona e “Bllokut”, lagjja e famshme ku ishin të vendosura rezidencat e drejtuesve të lartë të shtetit komunist, ndërsa ishte një zonë e ndaluar që të lëviznin qytetarët. Pjesë e kësaj zone, ishte edhe vila ku jetonte ish-diktatori Enver Hoxha, e cila është një ndërtim i periudhës së komunizmit.
Gjatë komunizmit, përveç ndërtimeve sipas stilit sovjetik, nuk munguan as emrat e udhëheqësve komunistë nëpër institucione, sheshe dhe ndërmarrje të ndryshme, duke patur një ndikim edhe në organizimn e jetës politike dhe shoqërore të vendit.
Tirana e sotme si qytet modern dhe atraksion turistik
E pozicionuar pothuajse në pjesën qendrore të vendit, sot Tirana është qendra kryesore e jetës politike, ekonomike dhe kulturore të Shqipërisë, dhe qyteti më i madh i vendit, ndërsa nga pikëpamja demografike pjesë e qytetit janë përveç vendaseve edhe banorë që kanë ardhur pothuajse nga të gjitha qytetet e tjera të Shqipërisë.
Pas përmbysjes së regjimit komunist në vitin 1991, popullsia e Tiranës filloi të rritej ndjeshëm, për shkak të lëvizjes së popullsisë nga qytetet e tjera të vendit, drejt kryeqytetit. Ky ndryshim demografik, solli edhe ndryshime të tjera në infrastrukturë, duke u ndërtuar lagje të reja, ndërsa filluan ndërtimet masive të pallateve, objekteve dhe shesheve të reja, duke e transformuar Tiranën në një metropol modern.
Sipas të dhënave të publikuara nga Bashkia e Tiranës e cila drejtohet nga Erion Veliaj që nga viti 2015, qyteti ka aktualisht 811.649 banorë me një moshë mesatare 32 vjeç, ndërsa sot është një qytet dinamik e gjallërues, në një transformim të vazhdueshëm, si nga pikëpamja demografike ashtu edhe nga arkitektura.
Vitet e para të tranzicionit pas përmbysjes së diktaturës sollën ndërtime kaotike për shkak të lëvizjes së popullsie nga qytete e vendit drejt kryeqytetit, por pas vitit 2000, modelet e zhvillimit urban ishin në fokus të kryebashkiakëve, për ta shndërruar në një metropol të vërtetë evropian.
Gjatë periudhës 100-vjeçare me statusin e kryeqytetit të Shqipërisë, Tirana ka kaluar në faza të ndryshme historike të zhvillimit dhe transformimit të saj në një metropol modern. Në Tiranën e sotme bashkëjeton historia me modernen, trashëgimia kulturore me trendet e reja të zhvillimit urbanistik, por edhe turizmi i shumëllojshëm, e ka shndërruar Tiranën në dekadën e fundit, në një atraksion turistik. Tirana më 11 shkurt të vitit 1920 u shpall përkohësisht kryeqytet i vendit, duke kaluar më pas në etapa të ndryshme të evoluimit të saj, si gjatë Mbretërisë, periudhës së pushtimit nazifashist dhe komunizmit, si dhe në fazën e tranzicionit pas përmbysjes së sistemit diktatorial. ( Olsı Shehu – Anadolu Agency )
Në Tiranë monumentet e kulturës, bashkëjetojnë me ndërtesat e arkitekturës moderne, në disa raste të “fshehura”, por edhe të vendosura në qendër të Tiranës, si dëshmitare e kohës që u ngritën. Nga ana tjetër këto monumente luajnë një rol të rëndësishëm për rritje e numrit të turistëve, që vizitojnë Tiranën, e në të njëjtën kohë në promovimin e saj si destinacion turistik.
Kryeqyteti i Shqipërisë ka një mori monumentesh kulturore të karakterit historik që mbrohen nga shteti, por ato që tërheqin më shumë vëmendjen e vizitorëve pothuajse janë të vendosura në qendër të kryeqytetit, dhe zonën përreth saj, si Kalaja e Tiranës, Monumenti i Kapllan Pashës, Xhamia e Et’hem Beut, Kulla e Sahatit, Ura e Tabakëve, shtëpitë e vjetra që kanë statusin monument kulture.
Mozaikut të monumenteve të kulturës në Tiranë, gjatë viteve të tranzicionit i janë shtuar edhe objekte të tjera kulturore moderne, duke bërë një ndërthurje të shumë elementeve dhe gërshetim të kulturave.
Vetëm në Sheshin Skënderbeu dhe pranë tij, shikojmë që “dëshmojnë” disa periudha të historisë me ndërtesat tipike të tyre, siç është Xhamia Et’hem Beu e periudhës osmane, Muzeu Historik Kombëtar dhe Pallati i Kulturës të periudhës së komunizmit dhe ndërtesat e ministrive që i përkasin periudhës së Mbretit Zog.
Ndërsa vetë Sheshi Skënderbeu pësoi një transformim total në vitet e fundit, ku me mijëra metra katrorë janë shtruar me pllaka guri nga të gjitha trevat shqiptare.
Nga ana tjetër në kryeqytetin e Shqipërisë janë të hapur për vizitorët, përveç Muzeut Historik Kombëtar, edhe Muzeu Arkeologjik i Tiranës, Muzeu Kombëtar i Përgjimeve “Shtëpia me Gjethe”, Bunk’Art (ish-vendstrehimi antibërthamor i Shqipërisë komuniste) dhe Bunkart 2 që tregon për persekutimin komunist në Shqipëri, Muzeu i Forcave të Armatosura të Republikës së Shqipërisë dhe Muzeu Shkencave të Natyrës, ku turistët e huaj “udhëtojnë” në periudhat e ndryshme të historisë, jo vetëm të kryeqytetit, por të gjithë Shqipërisë.
Përveçse një metropol i mbushur me atraskione turistike për shkak të objekteve të trashëgimisë kulturore, nga ana tjetër Parku i Madh i Liqenit Artificial, Mali i Dajtit afër qytetit, përveç atraksione për turizmin e natyrës, ofrojnë për të gjitha moshat ambiente për argëtim.
Ndërkohë Tirana ka ruajtur edhe traditën e bashkëjetesës fetare, ndërsa metropoli i Shqipërisë është vendi ku po ndërtohet Xhamia e Namazgjasë, ndërsa janë edhe selitë e Kishës Katolike, Kishës Ortodokse dhe Kryegjyshata Botërore Bektashiane.
Në dy dekadat e fundit Tirana ka pësuar ndryshime edhe në pamjen e saj. Një pjesë e pallateve të ndërtuar gjatë kohës së komunizmit u lyen në ngjyra të ndezura. Kjo nismë ndërmor nga ish-kryebashkiaku i Tiranës, Edi Rama, kryeministri aktual i vendit i cili i ndikuar edhe nga profesioni i tij si piktor ai vendosi të transformojë fasadat e pallateve që ishin ndërtuar gjatë regjimit komunist, sidomos në sheshet dhe rrugët kryesore të kryeqytetit.
Sheshi i ri i qendrës së qytetit, pallatet shumëkatëshe dhe godinat e tjera social-kulture, restaurimi i godinave kryesore të ministrive në qendër të Tiranës, rinovimi i Pazarit të Ri, ndërtimi i stadiumit të ri “Air Albania” dhe shumë objekte të tjera e shndërruan Tiranën në një metropol modern i cili tërheq edhe vëmendjen dhe interesin e turistëve të huaj nga shumë vende të botës.
Ndërsa Tirana po mbyll shekullin e parë si kryeqytet i vendit, qyteti në dekadën e ardhshme në objektivat strategjikë të institucioneve të vendit synohet të shndërrohet në një qytet policentrik. / Gazeta e re / KultPlus.com
Jackson do të kthehet në rrugë gjatë vitit 2020, për turneun e saj të ri i cili ka për qëllim promovimin e albumit të saj të 12-të të incizuar në studio, “Black Diamond”.
“Tung të gjithëve! I kam dëgjuar me kujdes kërkesat dhe dëshirat tuaja, dhe tani ju informoj se jam duke punuar rreth albumit tim të ri, si dhe gjatë verës do ta realizojë turneun tim të radhës. Që të dyja projektet e mbajnë titullin “Black Diamond”. Shihemi së shpejti…,” kishte shkruar këngëtarja në prononcimin e saj në Instagram.
Turneu i pop yllit të njohur botëror pritet të përfshijë muzikë nga albumi i ri, si dhe hite të ndryshme nga karriera e saj 38-vjeçare si solo këngëtare. Ajo, po ashtu do ta interpretojë albumin e vitit 1989, “Janet Jackson’s Rhythm Nation 1814”, i cili në shtator të vitit të kaluar e shënoi 30 vjetorin e lansimit, transmeton Koha.net.
“Black Diamond” është albumi i parë i Jackson-it në pesë vjetët e fundit, dhe vjen pas albumit të vitit 2015 “Unbreakable”. Ndërsa turneu i këngëtares në Amerikën Veriore, pritet të fillojë me 25 qershor në Miami dhe të përmbyllet më 23 gusht në Tacoma të Washingtonit.
Biletat e koncerteve të këngëtares dalin në shitje nga 13 shkurti përmes kompanisë promovuese “Live Nation”, ndërsa data e lansimit të albumit “Black Diamond” ende nuk është bërë e ditur.
Vitin e kaluar, ikona e muzikës pop Jackson i publikoi ribotimet e disa albumeve të saja klasike, përfshirë këtu incizimin e vitit 1987 “Control: The Remixes”, atë të vitit 1989 “Rhythm Nation 1814”, albumin e 1993-ës “Janet”, atë të vitit 1997 “The Velvet Rope” dhe albumin e vitit 2001 “All for You”. Në korrik të vitit 2019, Jackson e përfundoi pjesën e dytë të turneut “Metamorphosis” në Las Vegas.
Janet Jackson, e cila i numëron 17 këngë të pozicionuara në top 10-shen e toplistave muzikore në Britani të Madhe, po ashtu gjatë verës së kaluar, performoi për herë të parë në festivalin e njohur të muzikës, “Glastonbury”. /KultPlus.com
Dekania e Fakultetit të Shkencave Humane, Edukimi dhe Arteve Liberale në UET Belina Budinit i është akorduar Çmimi “At Zef Pllumi” në Publicistikë për librin e saj të fundit “Ndikuesit/Influencers” si dhe shkrimatrja Vera Bekteshi në kategorinë “Memoralistikë” me librin “Vila me tre porta”.
Bashkia Lezhë” ka ndarë ditën e sotme çmimin kombëtar “At Zef Pllumi” për botimet më të mira në “Publicistikë”, “Memorialistikë” dhe “Monografi”. Pas 4 vitesh mungesë, bashkia u rikthye sërish me këtë çmim për të vlerësuar autorët më të mirë.
Këtë vit, juria e përbërë nga Alfred Lela, Jonila Godole dhe At Vitor Dema, shpalli fitues në kategorinë “Publicstikë” Belina Budinin, në “Memorialistikë” Vera Bekteshin dhe në “Monografi” Sabri Hamitin.
Pas marrjes së çmimit tre autorët u shprehën të nderuar, që u vlerësuan me një çmim shumë të çmuar sipas tyre. Në këtë event të rëndësishëm kulturor nuk munguan autorë të tjerë të shquar dhe iniciatorë të këtij çmimi si, ish-kryetari i Komunës Shëngjin, Salvador Kaçaj dhe shkrimtari Preç Zogaj.
Çmimi kombëtar “At Zef Pllumi” u krijua në 2012-tën dhe ndër vite me të janë vlerësuar veprat më të mira të autorëve shqiptarë.
Ndikuesit/”Influencers”, libri i cili është ndërtuar si analizë kritike e gjuhës së gazetarëve përballë politikanëve në Shqipërinë
“Këtë vlerësim për anën publicistike të librit e shoh si konfirmim të vlerave estetike dhe stilit të të shkruarit, pasi të menduarit shkencor nuk ka pse shihet si i papajtueshëm me gjuhën publicistike. Po kështu ndjej se mendimi kritik është vlerësuar dhe jam mirënjohëse për këtë”, – shprehet Budini gjatë ceremonisë të marrjes së Çmimit.
Dekania e Fakultetit të Shkencave Humane, Edukimi dhe Arteve Liberale në UET Belina Budinit i është akorduar Çmimi “At Zef Pllumi” në Publicistikë për librin e saj të fundit “Ndikuesit/Influencers”, botim i UET Press. Libri është ndërtuar si analizë kritike e gjuhës së gazetarëve përballë politikanëve në Shqipërinë e pas viteve ’90, ndërsa bëhen edhe krahasime me gazetarët dhe politikanët e viteve ’30 dhe gjatë regjimit diktatorial. Prof. As. Dr. Belina Budini është aktualisht Dekane e Fakultetit të Shkencave Humane, Edukimit dhe Arteve Liberale në UET dhe ky është libri i saj i tretë në fushën e mediave dhe të komunikimit. Megjithëse libri ka konstrukt sudimor-shkencor, Budini shprehet se këtë vlerësim për anën publicistike të librit e sheh si konfirmim të vlerave estetike dhe stilit të të shkruarit, pasi sipas saj të menduarit shkencor nuk ka pse shihet si i papajtueshëm me gjuhën publicistike. Në fjalën e saj gjatë ceremonisë së ndarjes së çmimeve në Qendrën Kulturore të qytetit të Lezhës, Budini theksoi se në mënyrë intuitive ndjen se ka zbatuar porosinë e At Zef Pllumit “Rrno për me tregue” si metodë rrëfimtare për librin, duke qenë se libri bazohet pikërisht në rrëfimet profesionale të gazetarëve për rolet e tyre përballë politikanëve në media.
Libri “Ndikuesit” zbërthen gjuhën mbizotëruese për gazetarët dhe mediat në Shqipëri, në të folmet e vetë gazetarëve, ku bie në sy një ligjërim uniformizues për sa u përket roleve që gazetarët konceptojnë se luajnë përballë politikanëve në Shqipëri. Po kështu, ligjërimi i dorëzimit përballë pushtetit politik është dominues, sikurse rezulton nga kërkimet për librin “Ndikuesit”. Sipas Budinit, imponimi i pushtetit politik edhe mbi vetë mediat në forma nga më të ndryshmet dhe gjithnjë e më të sofistikuara, duket se pengon ushtrimin real ose faktik të pushtetit nga ana e mediave, pavarësisht një farë hapësire lirie apo dialogu publik, që ekziston në Shqipëri.
Po kështu, sipas Budinit, mbeten të paartikuluara nga ana e gazetarëve të intervistuar, një sërë rolesh të reja, edhe pse pranohet se kanë hyrë në mjedisin e media-politikës dhe shfaqen si role me ndikim. Të tilla role janë ai i këshilltarit, ekspertit të PR-it, shkruesit të fjalimeve politike, apo role të tjera si ai i polemistit, editorialistit, gazetarit intelektual, gazetarit-ekspert, pamfletistit, gazetarit-pundit ose të brendshëm në politikë. “Edhe pse ka nga të intervistuarit që janë parë ose janë aktualisht në rolet e mësipërme, pak prej tyre iu referohen atyre si role identifikuese për ta. Janë të rralla gjithashtu referencat në lidhje me rolet më të fundit që lidhen me zhvillimet e mediave të reja dhe portaleve, si gazetari-tabloid, karikaturisti, bloger-i apo gazetari-multimedial. Disa nga të intervistuarit pranojnë se disa nga rolet e reja mund të bëhen “shpëtimtare” për “mjedisin e infektuar të mediave tradicionale”, por nuk duket se preferojnë të identifikohen me këto role. Po kështu i paartikuluar mbetet roli i gazetarit të kulturës, të kritikut letrar, të artit apo filmit. Në një perspektivë ku politika vë veten në qendër të medias, kanë mbetur jashtë për fat të keq mjaft figura të mendjes, fjalës dhe kreacionit, që nuk përfshihen në lojën e pushtetit të ditës”, shprehet Budini.
Së fundi, duke iu referuar simbolikës së Çmimit që mban emrin e At Zef Pllumit, autorja pohon se ka pasur fatin ta takojë dhe intervistojë në dhjetor të 2005-ës, duke e publikuar intervistën në gegnisht për forcën e saj shprehëse dhe të mendimit kritik. Është një intervistë në të cilën Padër Zefi shpreh indinjatën e tij të thellë me realitetet e ditës, ndërsa pohon se “këtij populli edhe me i shtie opangën në gojë nuk bërtet”, referuar mosreagimit publik ndaj politikës dhe pushtetit. “Po referoj së fundi një pjesë nga fjala e Padër Zefit në pranimin e Çmimit Penda e Artë që iu akordua në vitin 2006, kur u shpreh se vlerësimi më i madh që mund t’i bëhet një libri është kur juria pranon edhe mendimin ndryshe, edhe mendimin e kundërt, duke e bërë demokracinë të vlefshme. Unë kam të njëjtën ndjesi në marrjen e këtij Çmimi, që mendimi kritik është vlerësuar. Faleminderit për këtë anëtarëve të jurisë”. /Gazeta Liberale/KultPlus.com
Filmi “Brecht” i regjisorit Heinrich Breloer u shfaq për herë të parë gjatë Berlinales – dhe tani vjen në televizionin francez dhe gjerman. Filmi hedh një shikim mbi jetën e poetit Bertolt Brecht.
“Unë mendoj se ne kemi mendime të ndryshme për Brechtin,” thotë regjisori Heinrich Breloer -dhe kjo është e vërtetë. Gjatë Berlinales, festivalit të filmit që u mbajt në muajin shkurt regjisori prezantoi idetë e tij për Brechtin. Premiera botërore e filmit të tij u shfaq në ekranin e kinemasë së festivalit. Tani filmi “Brecht” do të transmetohet në televizion në Francë. Në Gjermani filmi mund të shihet fillimisht tek “Arte” dhe pak ditë më vonë tek ARD. FIlmi është një nga ngjarjet më të mëdha televizive të vitit 2019
Brehti – fiktiv dhe real në kinema
Regjisori Heinrich Breloer shihet (bashkë me kolegun e tij që ka vdekur më 2013, Horst Königstein) si zbuluesi i dramës dokumentareske, së ashququajturës Doku – Drama, një formë e përzier me pjesë përbërëse të filmit dokumentar dhe të filmit artistik. Breloer, e ka kthyer këtë zhanër në mjeshtëri dhe ka prodhuar shumë filma mbi personalitete dhe ngjarje politike, historike dhe kulturore, që janë vlerësuar e kanë marrë çmime.
Doku- Drama vlerësohet nga specialistët për shkak të formës së saj “të hapur”, sigurisht kur kjo arrihet. Filmat tregojnë “të vërtetën” që fshihet pas fiksionit. Ose e thënë ndryshe: Ato pasurojnë filmin dokumentar nëpërmjet shtesave filmike. Kështu që nuk është çudi që Heinrich Breloer mori në dorë Bertolt Brechtin, për të bërë një film për të.
Premiera e filmit Breht në Berlinale 2019, regjisori Heinrich Breloer dhe aktori Tom Schilling
Vizioni i Brechtit për teatrin: Kundër iluzionit si art
Edhe Brecht ka qenë luftëtar i “formës së hapur” artistike dhe kulturës së skenografisë së inskenuar. Spektatorët nuk duhet të merren me çështjen e iluzionit. “Po ashtu si Brecht i ve aktorët të flasin për rolin e tyre, duke ua hequr iluzionin, po ashtu ky lloj distancimi luan një rol edhe në doku-drama, kur unë alteroj dokumentacionin me lojën artistike,” thotë regjisori për formën dhe përmbajtjen e filmit të tij.
Shikuesi e përjeton Brechtin për herë të parë në një doku-drama tri orëshe, gjatë periudhës së Republikës së Vajmarit, periudhë gjatë së cilës ai ngjitet mes yjeve të teatrit gjerman, fillimisht si djalë i ri në gjimnaz ku shkruan tekste jopatriotike, pastaj si poet gjeni në moshë të re, dhe më pas me pjesën “Baal” ku e inaguron veten dhe vet dhe teatrin si makinë emocionale.
“Opera për tri groshë” kthehet në pjesë klasike të teatrit
Aktori Tom Schilling në rolin e Bertold Brehtit
Më pas Brecht shihet si autor i etabluar në skenë, si shkrues i pjesës “Daulle natën” dhe “Opera tregroshëshe”. Kjo e fundit kthehet në sukses shumë të madh teatral gjatë Republikës së Vajmarit. Në fund të pjesës së parë të filmit për Brehtit, shënohet viti 1933, vit kur nacionalsocialistët erdhën në pushtet dhe Brechti morri rrugën e ekzilit për në Pragë.
Pjesa e dytë e filmit e tregon poetin në periudhën e Gjermanisë së paluftës. Në Gjermaninë Lindore, Brechti vlerësohet prej disave si një nga inovatorët më të mëdhenj dhe prej disa të vjetërve shihet me sy skeptik. Heinrich Broeler, tregon në filmin e tij se Brecht ka miq dhe armiq në të dy kampet politike: tek dashamirësit dhe publiku nga njëra anë, por edhe tek burokratët dhe kujdestarët e mendimit të njëtrajtshëm socialist, nga ana tjetër.
Figurë politike e diskutueshme: Bertolt Brecht
Leonie Benesch dhe Tom Schilling në filmin për Brehtin
Gjatë jetës së tij Brechti, nuk ka qenë dikush, për të cilin të gjithë kanë të njëjtin mendim, në asnjë kohë dhe në asnjë vend. Edhe në Gjermaninë Perëndimore, të orientuar nga ekonomia e tregut, Brechti ka pasur në periudhën e pasluftës si përkrahës ashtu edhe kundërshtarë të fortë, të cilët e shihnin poetin si “komunist”.
Ajo çka Heinrich Breloer nxjerr në pah në filmin dypjesësh është jeta private e lirikut, autorit të pjesëve teatrale dhe aktivistit politik. Si një zinxhir perlash, tema “Brecht dhe gratë” përshkon të 180 minutat e filmit. Poeti ndriçohet si mik i grave, dhe njeri të cilit nuk i intereson shumë morali dhe mëshira.
Tema e filmit: gratë në krah të tij
“Miqtë dhe punonjësit që e kanë parë filmin”, thotë Heinrich Breloer, mendojnë se “kur sheh filmin të bën të mendosh për #MeToo.”
Kjo është e pashmangshme. Elisabeth Hauptmann, Ruth Berlau, Marianne Zoff, Paula Banhölzer, Regine Lutz dhe aktorja Helene Weigel – e kanë shoqëruar poetin në vitet e jetës së tij. Shpesh ato jetonin paralelisht bashkë me të. Dhe të gjitha vuanin me Brehtin.
Broeler nuk e heq vëmendjen nga këto gjëra, por i ndërthur ato me njëra-tjetrën, jetën dhe veprën, dashurinë dhe finesën poetike. Megjithatë filmi “Brehti” nuk do t’u pëlqejë të gjithëve. Disa mendojnë se vështrimi në pjesën private është shumë intim, shumë personal, kaq shumë vjet pas vdekjes së poetit. Të tjerët mendojnë se filmi e ul Brechtin nga piedestali. Si thotë edhe regjisori: “Unë mendoj se ne të gjithë kemi mendime të ndryshme për Brehtin.” /KultPlus.com
Libri, që prej pak kohe ka dalë në treg, vjen në gjuhën rumune, nga përkthyesi i njohur Marius Dobresku, si botim i shtëpisë botuese “Humanitas”. “Kalorësi me skifter”, i shkrimtarit të shquar Ismail Kadare, është promovuar në Bukuresht. Rreth veprës së Kadaresë, folën shkrimtarja Ana Barton, kritikja letrare Simona Preda, përkthyesi Marius Dobresku dhe shkrimtari dhe dramaturgu Vlad Zografi, njëherazi pasues i një familjeje të njohur shqiptare.
Në cilësinë e përfaqësuesit më të lartë të shtetit shqiptar, i ftuar në këtë mbrëmje ambasadori Ilir Tepelena, iu drejtua të pranishmëve në gjuhën shqipe. “Do të flas në shqip, në atë gjuhë të bukur në të cilën shkruan Ismail Kadare. Kjo është e dyta herë, gjatë detyrës sime si diplomat, që jam në një aktivitet që mbahet këtu dhe të dyja herët, ka qenë për Kadarenë. Kjo tregon për mbështetjen që gëzon shkrimtari. Kadareja e ka çuar gjuhën shqipe në lartësi të mëdha, duke qenë në këtë mënyrë ambasadori më i mirë i vendit tonë në botë”.
Në fjalën e saj Drejtorja e shtëpisë botuese Denisa Komënesku u shpreh: “Ismail Kadare është nga të rrallët shkrimtarët evropianë që meriton prej kohësh të nderohet me cmimin “Nobel”. Është i kandiduar prej vitesh të tëra edhe në listat e basteve letrare, ndaj shpresojmë që ai të marrë këtë çmim, ndoshta vitin që vjen në 85-vjetorin e tij”.
Në fjalën e saj znj. Komënesku foli edhe për projektin e afërt të kësaj shtëpie botuese, që në pranverë do të sjellë për lexuesit rumunë, një nga veprat më të shquara të Kadaresë.
“Kadareja”tha Komënesku”- pushtoi” botën me “Gjeneralin e ushtrisë së vdekur”… Këtë vit, kur mbushen 30 vjet nga themelimi i shtëpisë botuese “Humanitas” do të sjellim për lexuesit tanë, “Gjeneralin e ushtrisë së vdekur”, që shënon edhe veprën e 13-të të Kadaresë. Ju ftoj, ta festojmë bashkë këtë ngjarje”, – janë shprehur drejtuesit e “Humanitas Fiction”.
“Kalorësi me skifter” përmban katër 4 tregime dhe hapet pikërisht me tregimin që i ka dhënë dhe titullin veprës. Në përshkrimin që enti botues i bënte botimit të ri, thuhej: “Ky libër është një udhëtim në botën e absurdit totalitar, një botim që të mbërthen me instrumentet e sakta të një shkrimtari të madh”. Në kopertinën e librit ndodhet Hans Holbein, i riu në një portret-ikonë, i njohur ndërkombëtarisht. /KultPlus.com
Ekipi i “Tokës së Mjaltë” do të shpërblehet me tre milionë denarë, ka vendosur Qeveria në seancën e sotme.
Për këtë
vendim ka informuar ministrja e Financave, Nina Angellovska në profilin e saj
në Fejsbuk.
“Mjaltit
tanë, dje e fituan çmimin Oskar më të vlefshëm- për njerëzi, thjeshtësi,
ndërgjegjësim për mjedis jetësor dhe zemër të madhe. I fituat zemrat tona dhe
të miliona njerëzve nëpër botë dhe me një gjest simbolik duam t’ju
falënderojmë- prandaj sonte sollëm vendim në seancë qeveritare për shpërblim në
para prej 3 milionë denarë për ekipin Mjaltit. Pasi i dhatë epitetin ‘Mjaltë’
vendit tonë. Pasi na bëtë shumë krenar”, ka shkruar Angellovska.
Filmi dokumentar “Toka e Mjaltë” nuk fitoi Oskar, por ishte nominuar në dy kategori- për film dokumentar më të mirë dhe film me origjinë joangleze. / aktuale.mk / KultPlus.com
Aktori Raphael Coleman, ka vdekur në moshën 25 vjeçare.
Lajmin e ka konfirmuar familja e tij. Sipas tyre, aktori nuk kishte probleme të mëparshme shëndetësore, por humbi ndjenjat dhe nuk ka mundur ta rikthejnë në jetë.
“Të festojmë atë që arriti në jetën e tij të shkurtë dhe ta vlerësojmë trashëgiminë e tij”, ka shkruar nëna e aktorit Liz Jensen në Twitter. Coleman u bë i njohur me rolin e Eric Brown në filmin e vitit 2005, “Nanny McPhee”, ku luajti krahas Emma Thompson./21Media / KultPlus.com
Kjo është një pyetje sa naive aq dhe filozofike. Ndoshta ishte dhe mbeti si e tillë, pa një përgjigje përfundimtare dhe bindëse shkencërisht. Kjo dilemë e ka bashkëshoqëruar njeriun për shekuj e shekuj më radhë, shpesh duke u cekur me pamjaftueshmërinë e përgjigjes ose me shndërrimin e një interesimi serioz në një situatë komike. Dhe… sërish kemi mbetur pa përgjigje për pyetjen: Cila erdhi e para, pula apo veza?
Do të përpiqem të sjell një shtjellim shterues referuar materialeve dhe interesimeve që kanë trajtuar, kryesisht vlerësimin që prestigjozja “TIME” i ka dhënë kësaj dileme nëpërmjet gazetarit Merrill Fabry, publikuar më 21 shtator 2016.
Cila erdhi e para, pula apo veza? “Është një problem shumë serioz megjithëse në shumicën e herëve është hedhur poshtë si një pyetje budallaqe” thotë Roy Sorensen, një filozof në Universitetin e Uashingtonit në Shën Louis. Së pari, le të marrim përgjigjen shkencore. Vezët, në përgjithësi, ekzistonin përpara se të vinte pula. Vezët dhe embrionet më të vjetra fosile janë ato të dinozaurve dhe datojnë 190 milionë vjet më parë. Fosilet e Arkeopteryx , të cilat janë më të vjetrat të pranuara përgjithësisht si zogj, janë rreth 150 milionë vjeçare, që do të thotë se zogjtë erdhën pas vezëve.
Kjo përgjigje është gjithashtu e vërtetë, se veza ishte ajo që erdhi e para. Disa krijesa të ngjashme me pulën prodhuan një vezë që përmbante një zog, përbërja gjenetike e së cilës, për shkak të disa mutacioneve të vogël, pësoi transformim duke sjellë pulën e vërtetë. Duke pasur parasysh natyrën zhvilluese të ndryshimeve gjenetike, konstatimi se linja e saktë ndarëse është shumë e pamundur, por pulat u zbutën, duke u larguar nga homologët e tyre të egër, diku në intervalin e 6000-7000 vite më parë. Neil deGrasse Tyson e ka mbështetur këtë ide të një zogu, i cili ishte jo shumë i ngjashëm me pulën, e cila do të rritet si një pulë, dhe Bill Nye u pajtua me këtë.
Disa vjet më parë një grup shkencëtarësh shkruan se si një proteinë e veçantë e nevojshme për formimin e lëvorës së vezëve së pulës u gjet vetëm në vezoret e pulës. Këto të dhëna shpesh raportoheshin si prova që pula ishte e para, por edhe nga shkencëtarët, studimi i të cilëve nuk ishte shumë bindës, njëri prej tyre e quajti pyetjen “argëtuese, por pa kuptim”.
Kjo pyetje ka mbetur pa përgjigje për shekuj me radhë, sikurse ka qenë objekt dileme edhe për mbretërit e mendimit, filozofët më të shquar. Historia fillon në Greqinë e Lashtë. Aristoteli ishte duke menduar qartë për këtë lloj pyetjeje, thotë Sorensen, megjithëse ai shpëtoi duke thënë se të dyja, si veza ashtu edhe pula, shkuan pafundësisht prapa dhe ata kishin ekzistuar gjithmonë. Një përkthim në anglisht i François Fénelon, i vitit 1825 mbi filozofët e lashtë, përshkroi perspektivën e Aristotelit: «Nuk mund të kishte qenë e para veza që të vinin zogjtë, ose do të kishte qenë një zog i pari që i dha fill vezëve; sepse një zog vjen nga një vezë. ”
Ishte historiani i lashtë Plutarku që i dha pyetjes formën e saj të qëndrueshme, “Pavarësisht, nëse pula apo veza erdhi e para, ajo tronditi mendimin njerëzor dhe nxori në pah një problem të madh dhe me shumë peshë, dhe që kishte të bënte me pyetjen themelore nëse bota kishte një fillim”.
Shekullin e pestë, një studiues romak, Macrobius, shkroi se njerëzit “bëjnë shaka për atë që ju mendoni se është një gjë e parëndësishme, në pyetjen, se nëse pula erdhi së pari nga veza apo veza nga pulë, por çështja duhet të konsiderohet si një pyetje me rëndësi themelore. ”
Filozofët e krishterë, Augustini dhe Shën Thomas Aquinas kaluan kohë duke menduar si ta katandisnin mrekullinë dhe mendimin e urtë të filozofëve grekë me sigurinë e botëkuptimit të tyre fetar, thotë Sorensen. Në fund të fundit, duke kuptuar pyetjen e bazuar në mënyrë të vendosur në Zanafillë, pula do të vinte e para.
Disa qindra vjet më vonë, historiani natyror italian, Ulysse Aldrovandi do të shkruante shkurtimisht për këtë çështje, duke zbuluar se pyetja ishte e njohur, por u rishfaq në vitin 1600. “Unë e tejkaloj këtë nga një pyetje e kotë në një kurozitet. Ai beson të vërtetën biblike si përgjigjen e këtij rebusi. Në librat e shenjtë thuhet, shton ai, se e para ishte pula. Këto libra mësojnë se kafshët u krijuan në fillim të botës; kështu që pula nuk vinte nga veza por nga asgjëja. ”
Megjithatë, deri në shekullin e 18-të, gjërat do të ndryshonin. Denis Diderot, një mendimtar i rëndësishëm iluminist dhe redaktues i Enciklopedisë, nuk e shikoi pyetjen aq të thjeshtë. “Nëse çështja e përparësisë së vezës mbi pulën ose pulën mbi vezën, ju vë në siklet, kjo është për shkak se ju mendoni se kafshët ishin fillimisht ato që janë aktualisht,” shkroi ai në 1769. “Çfarë marrëzie!” Diderot, e kaluara e një kafshe ishte po aq e pasigurt sa dhe e ardhmja e saj.
Charles Darwin në librin e tij “Mbi origjinën e specieve” e ndërlikoi çështjen pas botimit në 1859, Sorensen vëren. Teoria e evolucionit e bëri të qartë se në një farë mënyre Diderot po shikonte në drejtimin e duhur, por theksi i saj në ndryshimin gradual (dhe parimet e Gregor Mendel të trashëgimisë gjenetike) prodhuan kombinimin e sigurisë dhe misterit që vazhdon edhe sot e kësaj dite. Veza duhet të kanë ardhur e para, por nuk mund të thuhet kur. Është një luftë për të bërë dallimin midis një specie nga një tjetër, duke pasur parasysh që ka shumë mbivendosje, ndërsa speciet përshtaten ngadalë.
Edhe pse shkenca është mjaft e vendosur, filozofët vazhdojnë të merren me këtë çështje. Është më se e e qartë, pyetja mbetet një pikënisje e frytshme për të gjitha llojet e meditimeve, përfshirë këtë edhe atë mbi origjinën tonë, si erdhëm, nga erdhëm. Një pyetje që kurrë nuk e kemi trajtuar seriozisht në vetvete është pyetja thelbësore e njeriut mbi marrëdhënien që ai ka me të panjohurën dhe ethet gjithnjë në rritje për ta shtytur më tej kufirin zotërues. Për njeriun modern, nuk ka pyetje që nuk kanë gjetur përgjigje dhe kjo ngase ai i ka parë dhe trajtuar çdo dilemë, si pikënisjen e sfidës së tij për ta merituar roilin e favoritit në planetin tokë.
E megjithatë- Cila erdhi e para, pula apo veza? ka mbetur pa një përgjigje të gjithëpranuar. / KultPlus.com
Hapni sytë e shikoni realitetin me sy, shihni se jemi vendi ma i mbrapambetun i Europës e konkurojmë edhe për botën. Pse?… Mjerisht duket se tash shumë kohë ne nuk na punon logjika si tjerëve: i thurim lavde vedit për mbrapambetjen tonë, turpet i quejmë ‘virtyte të larta të kombit’. Jemi verbue shpirtnisht pse na mungon mendja e kthjelltë e inteligjenca për me pa se ku jemi; na mungojnë vullneti e trimnia për me thanë të vërtetën .
Shka na mungon ne që mos të jemi si europjanët tjerë? Toka, jo; dielli e deti, jo. Na mungon mendja e mentaliteti e, mbi të gjitha dashunia. Nuk na sjell lavdi lashtësia, në qoftë se nuk jemi të qytetnuem. Nuk na sjell lavdi origjina, në qoftë se jemi të përçamë dhe mendojmë si t’i bajmë vorrin vëllaut.”
“Zoti asht i madh. I kjoshim falë atij të lumit që ka krijue vdekjen, se përndryshe njerëzit do t’kishin me kenë gjithmonë skllav të tiranve. Edhe kta do t’desin nji ditë e ti duhet të jetojsh vetëm sa me tregue. Kurrgja në mos kjosh i zoti me ba, rrno vetëm për me tregue. A e kupton ç’ka due me t’thanë? Mbaruen të tjerët, mbarojmë na,… mbaron dhe ti: të gjithë shkojnë si qeni në rrush po nuk kje dikush me kallzue se si kje puna. Kush të teprojë le të kallzojë. / KultPlus.com
Libri që prej pak kohe ka dalë në treg, vjen në gjuhën rumune, nga përkthyesi i njohur Marius Dobresku, si botim i shtëpisë botuese “Humanitas”.
“Kalorësi me skifter”, i shkrimtarit të shquar Ismail Kadare, është promovuar në Bukuresht.
Rreth veprës së Kadaresë, folën shkrimtarja Ana Barton, kritikja letrare Simona Preda, përkthyesi Marius Dobresku dhe shkrimtari dhe dramaturgu Vlad Zografi, njëherazi pasues i një familjeje të njohur shqiptare.
Në cilësinë e përfaqësuesit më të lartë të shtetit shqiptar, i ftuar në këtë mbrëmje ambasadori Ilir Tepelena, iu drejtua të pranishmëve në gjuhën shqipe. “Do të flas në shqip, në atë gjuhë të bukur në të cilën shkruan Ismail Kadare. Kjo është e dyta herë, gjatë detyrës sime si diplomat, që jam në një aktivitet që mbahet këtu dhe të dyja herët, ka qenë për Kadarenë.
Kjo tregon për mbështetjen që gëzon shkrimtari. Kadareja e ka çuar gjuhën shqipe në lartësi të mëdha, duke qenë në këtë mënyrë ambasadori më i mirë i vendit tonë në botë”.
Në fjalën e saj Drejtorja e shtëpisë botuese Denisa Komënesku u shpreh: “Ismail Kadare është nga të rrallët shkrimtarët evropianë që meriton prej kohësh të nderohet me cmimin “Nobel”.
Është i kandiduar prej vitesh të tëra edhe në listat e basteve letrare, ndaj shpresojmë që ai të marrë këtë çmim, ndoshta vitin që vjen në 85-vjetorin e tij”.
Në fjalën e saj znj. Komënesku foli edhe për projektin e afërt të kësaj shtëpie botuese, që në pranverë do të sjellë për lexuesit rumunë, një nga veprat më të shquara të Kadaresë.
“Kadareja”tha Komënesku”- pushtoi” botën me “Gjeneralin e ushtrisë së vdekur”… Këtë vit, kur mbushen 30 vjet nga themelimi i shtëpisë botuese “Humanitas” do të sjellim për lexuesit tanë, “Gjeneralin e ushtrisë së vdekur”, që shënon edhe veprën e 13-të të Kadaresë. Ju ftoj, ta festojmë bashkë këtë ngjarje”, – janë shprehur drejtuesit e “Humanitas Fiction”.
“Kalorësi me skifter” përmban katër 4 tregime dhe hapet pikërisht me tregimin që i ka dhënë dhe titullin veprës. Në përshkrimin që enti botues i bënte botimit të ri, thuhej: “Ky libër është një udhëtim në botën e absurdit totalitar, një botim që të mbërthen me instrumentet e sakta të një shkrimtari të madh”. Në kopertinën e librit ndodhet Hans Holbein, i riu në një portret-ikonë, i njohur ndërkombëtarisht. /konica.al/ KultPlus.com
Aktorët që kalonin në tepihin e kuq për të vazhduar më pas në sallën ku zhvillohej ceremonia e çmimeve Oscar, dukeshin secila më bukur se tjetra, duke tentuar të paraqisnin stilin e tyre unik apo ndonjë kauzë të caktuar, shkruan KultPlus.
Në nominimet për kategorinë e regjisë më të mirë, të gjitha nominimet ishin burra edhe pse kritikët e filmit kanë vlerësuar shumë lart edhe regjisoret gra.
Kjo gjë ka bërë që aktorja e famshme Natalie Portman të shfaq revoltën e saj për këtë dukuri, duke qëndisur në pelerinën e saj emrat e të gjitha grave regjisore që nuk u nominuan në kategorinë e ”Regjisë më të mirë”
”Doja të njihja gratë që nuk u njohën për punën e madhe që e kanë bërë”, u shpreh ajo në një intervistë në tepihun e kuq.
Gratë regjisore të qëndisura në pelerinën e fustanit të saj ishin: Lorene Scafaria, Greta Gerwig, Mati Diop , Marielle Heller, Melina Matsoukas, Alma Har’el, Celine Sciamma dhe Lulu Wang. / KultPlus.com
