Autor: KultPlus

Publikohen fotografi të rralla të ‘The Beatles’ në Amerikë

Posted on by KultPlus

Më shumë se 350 fotografi të pa publikuara më parë të grupit The Beatles do të dalin në ankand në Liverpool.

Më 24 mars në Liverpool do të hapet ankandi me 413 fotografi të grupit britanik The Beatles, ku 350 prej këtyre fotografive nuk janë parë më përpara. Siç raporton Shtëpia e Ankandi Omega, fotografitë janë realizuar nga fotografi Mike Mitchell në vitin 1964.

Anëtarët e grupit; John Lennon, Paul McCartney, George Harrison dhe Ringo Starr kanë dhënë koncertin e tyre të parë në Shtetet e Bashkuara të Amerikës më 11 shkurt të vitit 1964 në Washington. Po në atë kohë fotografi Mitchell i cili ishte 18-të vjeçar arriti që të merrte akreditimin që të fotografonte nga afër anëtarët e grupit. Disa muaj më vonë, më 13 shtator, ai përcolli koncertin e tyre në Baltimore (Marylan, USA), nga ku u realizuan 413 fotografitë të cilat do të jenë në shitje.

“Ata kanë sjellë gjëra të reja në kontinentin tonë dhe ne dëshironim që të dinim më shumë se kush ishin ata. Kisha shkuar me idenë që të krijoja një portret të këngëtarëve dhe jo me idenë që të përcjellja koncertin”, është shprehur Mitchell në një video në Youtube ku jep më shumë detaje mbi fotografitë e tij.

Për dekada negativët e këtyre fotografive kanë mbetur nëpër kutia derisa avancimet në teknologji kanë mundësuar që këta negativë të fotografive të zhvillohen. Fotografitë janë bërë nën dritën e ambientit pasi që aparati i Mitchell nuk kishte pasur dritë të tij. Mirëpo tani pikërisht drita e cila ka ndikuar në mënyrën e paraqitjes së fotografive i ka bërë të veçanta ato.

Në vitin 2011,në New York, 46 fotografi të grupit Beatles ishin dalë në ankand dhe ishin shitur për 293 mijë e 878 euro. / KulPlus.com

Kujtohuni të shihni lart drejt yjeve, jo poshtë drejt këmbëve…

Posted on by KultPlus

Stephen Hawking

Kujtohuni të shihni lart drejt yjeve, jo poshtë drejt këmbëve. Përpiquni t’i jepni kuptim asaj që shihni dhe habituni çfarë e bën universin të ekzistojë. Bëhuni kuriozë. Dhe sado e pashpresë mund t’ju duket jeta, gjithmonë ka diçka që mund ta kryeni dhe të mjeshtëroheni. Rëndësi ka të mos dorëzoheni.
Gjithashtu me rëndësi është ta shmangni zemërimin, pavarësisht sa e vështirë mund t’ju duket jeta, pasi do të humbni krejt shpresat nëse nuk mund të qeshni me veten dhe jetën në përgjithësi.
Unë e shoh trurin si një kompjuter që ndalon së funksionuari kur përbërësit e tij defektohen. Nuk ka parajsë apo jetë të përtejme për kompjutera që s’punojnë; kjo është një histori përrallash për njerëzit që kanë frikë nga errësira.

Grumbullohen sonte 3600 euro për regjisorin Bekim Lumi

Posted on by KultPlus

Janë grumbulluar sonte 3600 euro nga ankandi i piktura dhe shitja e librave në një organizim artistik në Prishtinë.

Në ndihmë për regjisorin Bekim Lumi, sonte erdhi një organizim tjetër në maratonën e aktiviteteve humanitare, për të ndihmuar në shpenzimet e shërimit të regjisorit Bekim Lumi.

Në këtë ekspozitë u shitën piktura, skulptura, grafika ndërsa të gjitha të hollat do të shkojnë për shërimin e regjisorit Lumi. / KultPlus.com

Aktori Bekim Fehmiu, prapë një cigan në Francë

Posted on by KultPlus

Filmi “Mbledhësit e puplave” me Bekim Fehmiun do të shfaqet në Francë.

Fillimi i muajit prill e sjellë filmin me aktorin legjendar shqiptar Bekim Fehmiu në Morteau në Francë.
Cinema l`Atlante në këtë qytet të Francës do ta shfaqë filmin në kuadër të Festivalit DIVERSITE.

“Mbledhësit e puplave” fitoi çmim në Festivalin e Kanës para 50-të vitesh ndërsa në role kryesore e ka aktorin shqiptar Bekim Fehmiu dhe aktoren Olivera Katarina.

Filmi është realizuar në vitin 1967 ndërsa zgjatë 94 minuta. Këngët kryesore në film i këndonte vetë aktorja Olivera Vuco, midis tyre edhe “Niska Banja”, “Djelem Djelem” dhe “Nu, nu”, shkruan KultPlus.

Në vitin 1967 filmi morri çmimin për filmin më të mirë të huaj në Finlandë, çmimin AURA që jepej nga Shoqata e Regjisorëve e Kritikëve të Filmit.

Në kuadër të Festivalit DIVERSITE do të shfaqen edhe filma të tjerë. / KultPlus.com

Është i gatshëm busti i Skënderbeut në Elbasan (VIDEO)

Posted on by KultPlus

Në Labinot të Elbasanit tashmë ka përfunduar realizimi i bustit të Skënderbeut. Këtë bust, i cili është njëherësh edhe busti më i madh i heroit Skënderbeu në trojet shqiptare, e ka realizuar skulptori Fiqiri Kasa, shkruan KultPlus.

“Është një kënaqësi, kam marrë shumë falënderime dhe ndihem i privilegjuar që po e ndërtoj unë këtë vepër, shpresoj dhe dëshiroj që edhe në Kosovë të realizoj një vepër kaq të rëndësishme. Në Labinot të Elbasanit ku po ndërtohet Skënderbeu do të realizohen shumë vepra të tjera, ne e nisëm nga Skënderbeu, pikërisht sepse përkon me vitin e Skënderbeut”, pati thënë Fiqiri Kasa për KultPlus.

Shumica e skulpturave të cilat skulptori Fiqiri Kasa i realizon kanë lidhshmëri me trashëgiminë kulturore.

“Kryesisht bëj punime të veshjeve kombëtare, nga Medvegja, Prizreni, Gjakova e deri në Sarandë. Edhe njëra nga skulpturat e mia ‘Ushtari ilir’ ishte një ide e imja për të sjellë imazhe të historisë sonë kombëtare, pasi nga koha e Ilirisë nuk kemi shumë skulptura. Madje kam ideuar dhe ndërtuar edhe një amfiteatër dhe statujën e ‘Perëndeshës Afërditë’ në vendlindjen time, ku kam pasur edhe mbështetjen e bashkësisë”, është shprehur Kasa, për të cilin skulptura më e dashur mbetet ajo e Skënderbeut. / KultPlus.com

Tre libra për ta njohur më mirë Stephen Hawking

Posted on by KultPlus

Ka ndërruar sot jetë Stephen Hawking, një prej mendjeve më të ndritura në botë, i lindur në Oxford në vitin 1942.

Bashkë me Roger Penrose ai tregoi se Teoria e Relativitetit e Ajnshtajnit konsideron se koha dhe hapësira kanë pasur pikënisjen në Big Bang ndërsa përfundojnë në vrimën e zezë. Hawking ka pranuar 12 diploma të fuqishme botërore ndërsa edhe ka shkruar disa libra gjatë jetës së tij, të cilët edhe sot lexohen për të kuptuar ideologjinë dhe pikëpamjet e tij.

Po i sjellim këtu tre libra të cilët mund ti lexoni nëse dëshironi të kuptoni më shumë për këtë fizikan dhe kozmolog të njohur. Disa prej librave mund ti gjeni edhe në gjuhën shqipe.

“A Brief History of Time”
Rreth 9 milion kopje të shitura të këtij libri të përkthyer në 40 gjuhë të botës tregojnë më shumë për rëndësinë dhe fuqinë e librit të botuar në vitin 1988. Libri është shkruar për fillestarët, për ata që nuk kanë njohuri për teoritë shkencore, ndërsa flet për universin, për kohën dhe për hapësirën, dhe për gravitetin si forcë . Në libër diskutohen relativiteti gjeneral dhe mekanika kuantike dhe për teorinë unifikuese, e cila përshkruan çdo gjë në hapësirë në mënyrë koherente. Hapësirat e zeza janë yjet që kanë kollapsuar në një pikë shumë të vogël.

“The Grand Design”
Si dhe kur nisi universi? Pse jetojmë? Pse jemi këtu në këtë botë? Cila është natyra e realitetit? Pse natyra na pranon dhe pse ligjet e saj janë kaq të pranuara nga ekzistenca jonë? Shkenca, apo Zoti? Pyetjet e shumta janë pjesë e këtij libri që konsiderohet si kryevepra e Hawking. Në libër, mes tjerash përshkruhet se si kozmosi nuk e ka vetëm një histori dhe ekzistencë, por se si çdo histori e mundshme e universit ekziston rastësisht. Një gjuhë brilante dhe shumë e thjeshtë e ka bashkuar Hawking dhe Mlodinow për të shkruar këtë libër.


“The Universe in a Nutshell”
Një mendimtar i denjë, Hawking në këtë libër ka përfshirë nocionet e librave të kaluar. Gati në secilin libër që ka shkruar, ai nuk ka lënë jashtë vrimat e zeza (black holes) apo gravitetin, apo mekanikën kuantike dhe Teorinë M. Në libër vjen edhe “Teoria e Gjithçkaje” – që shtrihet në zemër të universit. Në libër provohet të bashkohen Teoria e Ajnshtajnit dhe ajo e Feynman për të krijuar një teori e cila do të përshkruante gjithçka që ndodhë në kozmos. Libri është botuar në vitin 2001 ndërsa është vazhdimësi e librit të parë që propozuam sot.

I di vendet

Posted on by KultPlus

Poezi e shkruar nga Sibel Halimi.

I di vendet kur vetes rrahë shpinën ia kam
Kur në gjunjë s`u përkula
I di vendet kur arratisur jam korridoreve
Kur tej më tej, nji dhimbje m`ka trandë
E vendin tjetërkujt ia kam lanë

I di vendet ku jam lemeritë
Kam vrapu si marathonomak
T`gëzohem mujtë s`kam
Por kumtin e lirisë dhanë e kam

I di çastet kur toka m`ka lëvizë nën kambë
E unë e kam rrëkëllye nji gotë
Jam sjellë, tue provue teorinë e Galileut

I di vendet
kur asht dashtë andrrat mi riandrru

E di vendin
kur kam dhanë shpirt tu shpjegu
se me kanë gru asht me u majtë fort për vete
se të jesh gru asht njësoj si me kanë burrë
peng të nji shoqnie te dy

I di vendet kur kam ec
E jam kthy se s`kam mbërri me ndje kurgja

I di vendet ku jam nis
E s`kam ditë mu kthy

Kur meta vet
Hera erdh furishëm
I thash dielli është mbi kryet tand
Unë s`jam emri yt
Vendet e tua s`janë ato
Këqyri pa bëza
Se diellin veç ashtu e sheh!

Gjenerata e parë e kontrabasit në Kosovë

Posted on by KultPlus

KultPlus ju sjellë sonte një fotografi të vjetër në të cilën mund të shihet gjenerata e parë e kontrabasit në Kosovë .

Fotografia është realizuar gjatë prezantimit të tyre në kuadër të Orkestrës Simfonike të ish RTP-së, Radio Televizionit të Prishtinës.

Pjesë e formacionit ishin edhe Mendi Mengjiqi, Fraim Gashi dhe Uvill Ballata.

Kjo paraqitje e instrumentistëve të Kosovës në kuadër të Orkestrës Simfonike të RTP-së është konsideruar si diçka e veçantë, rast i rallë për kulturën dhe muzikën shqipe. / KultPlus.com

Të huajt e lindur në Kosovë janë më të lumtur se kosovarët

Posted on by KultPlus

Finlanda është vendi më i lumtur në botë, sipas një hulumtimi vjetor të publikuar të mërkurën i cili e vë Burundin në vend të fundit për nga indeksi i lumturisë ndërsa gjen se amerikanët po bëhen gjithnjë e më të palumtur ani pse vendi i tyre po bëhet më i pasur.

Raporti i Lumturisë Botërore 2018 i Rrjetit për Zgjidhje të Qëndrueshme Zhvillimore të OKB-së (SDSN) ka renditur 156 vende në bazë të rezultateve të tyre për GDP-në për kokë banori, për mbështetjen sociale, jetëgjatësi të shëndetshme, liri sociale, bujari e mungesë korrupsioni.

Finlanda u ngrit nga vendi i pestë vitin e kaluar në të parin sivjet, duke e rrëzuar Norvegjinë. Top-10 e sivjetme, si gjithmonë e dominuar nga shtetet nordike, është si vijon: Finlanda, Norvegjia, Danimarka, Izraeli, Zvicra, Holanda, Kanadaja, Zelanda e Re, Suedia dhe Australia.

Në raport është përfshirë edhe Kosova ndërsa renditet kah mesi i listës, gjegjësisht në pozitën e 66-të.

Para Kosovës, nga rajoni është vetëm Sllovenia (51), kurse tjerat renditen pas Kosovës për nga lumturia.

Serbia renditet në pozitën e 78-të, Mali i Zi (81), Kroacia (82), Maqedonia (89), Bosnja e Hercegovina (93) kurse Shqipëria është e fundit në këtë listë për sa i përket lumturisë së shteteve të rajonit, gjegjësisht në pozitën e 112-të.

Vlen të theksohet se SHBA-ja ka shënuar rënie në indeksin e lumturisë, duke u renditur në pozitën e 18-të nga ajo 14 sa ishte më 2017. Britania është në të 19-in vend ndërsa Emiratet e Bashkuara Arabe në të 20-in.

Ndërsa, për herë të parë që kur ka nisur të bëjë matjet më 2012, raporti, i cili shfrytëzon një sërë organizatash zgjedhore, të dhënash zyrtare e metoda hulumtuese, ka renditur edhe lumturinë e migrantëve të lindur në vende të huaja në 117 shtete.

Finlanda edhe në këtë kategori u rendit e para, duke i dhënë vendit status të dyfishtë të artë statistikor.

Të lindurit e huaj më së paku të lumtur ishin në Siri, e cila ka shtatë vjet që është futur në luftë civile.

Ndërsa në Kosovë, vlen të potencohet se të huajt që kanë lindur në vendin tonë, janë më të lumtur sesa vendasit, duke u renditur në pozitën e 45-të, raporton Koha.net.

“Zbulimi më interesant i raportit është konsistenca e jashtëzakonshme midis lumturisë së migrantëve dhe vendasve”, thotë profesori John Helliwell nga Universiteti kanadez “British Columbia”.

“Ndonëse migrantët vijnë nga vende me nivele të ndryshme të lumturisë, vlerësimet e tyre të raportuara të jetës puqen me ato të banorëve tjerë në vendet e reja të tyre”, tha ai.

“Ata që lëvizin në vende më të lumtura përfitojnë, kurse ata që lëvizin në vende më pak të lumtura humbin”. / KultPlus.com

Gati me të rrahura, miratohet Ligji për Gjuhën Shqipe në Maqedoni

Posted on by KultPlus

Me 64 vota pro dhe asnjë kundër, në Kuvendin e Maqedonisë u miratua Ligji për Gjuhët, në një seancë që zgjati shumë por pati edhe tension e dramë.

Deputetët e partisë së udhëhequr nga Nikolla Gruevski, VMRO-së, tentuan që të pengojnë sjelljen e këtij Ligji, por nuk arritën që të pengojnë që i njëjti të hidhet në votim.

Paraprakisht situata brenda kuvendit ishte e tensionuar përderisa kryeparlamentari hapi debat për ligjin e gjuhëve.

Nikolla Gruevski shkaktoi incident verbal ndaj kryeparlamentarit Talat Xhaferi. Por, përplasja fizike mes tyre u evitua nga sigurimi i Kuvendit.

Ligji për Gjuhët është një premtim elektoral i kryeministrit të Maqedonisë, Zoran Zaev dhe koalicionit qeverisës në të cilin bëjnë pjesë edhe partitë shqiptare. / KultPlus.com

Nënshkruhet marrëveshja për tarifat rreth shfrytëzimit të muzikës

Posted on by KultPlus

Pas afër 5 viteve të negociatave mes Shoqatës për Menaxhimin Kolektiv të të Drejtave APIK dhe mediave, në Ministrinë e Kulturës, Rinisë dhe Sportit, është nënshkruar sot marrëveshja për tarifat e përgjithshme që duhet të paguajnë mediet, përkatësisht televizionet dhe radiot, për shfrytëzimin e muzikës si lëndë e mbrojtur me të drejtat e autorit.

Katër kanalet e Radio Televizionit të Kosovës do të paguaj shumën vjetore prej 30 mijë euro tarifë të përgjithshme për të pasur të drejtë të shfrytëzojë muzikën për transmetim. Televizionet me frekuencë kombëtare do të paguajnë nga 6000 euro në vit tarifë, televizionet regjionale 1200 euro tarifë vjetore, TV-të lokale 600 euro, kanalet kabllore muzikore 2400 euro, kanalet tjera kabllore 1800 euro, radiot nacionale 3600 euro, ato regjionale 720 euro, radiot lokale 480 euro, TV-të dhe radiot me fuqi të ulët do të paguajnë 240, respektivisht 180 euro.

Në bazë të marrëveshjes, këto shuma do t’i paguhen shoqatës APIK, e cila përfaqëson repertorin vendor dhe të huaj i cili shfrytëzohet në territorin e Republikës së Kosovës. Mediat obligohen që të aplikojnë për marrjen e lejes në shoqatë. Materialet mund të shfrytëzohen vetëm në bazë të licencës për transmetim të cilët ato i posedojnë nga Komisioni i Pavarur për Media. Çdo tejkalim i kompetencës apo transmetim jashtë licencës do të jetë subjekt i shkeljes së të drejtës së autorit dhe të drejtave të përafërta. Ministri Kujtim Gashi tha se me nënshkrimin e kësaj marrëveshjeje po krijohet një sistem i ri edhe për autorët e këngëve edhe për producentët e tyre. “Nënshkrimi i marrëveshjes për Tarifat e Përgjithshme për shumat e kompensimit që duhet të paguajnë mediat, përkatësisht televizionet dhe radiot, për shfrytëzimin e muzikës si lëndë e mbrojtur me të drejtën e autorit dhe të drejtat e përafërta, është hap historik për vendin në kuadër të krijimit të një sistemi funksional të së drejtës së autorit, ku autorët, producentët dhe performuesit në bazë të kësaj marrëveshje do të kompensohen për shfrytëzimin e veprave të tyre nga ana e mediave”, ka thënë ministri Gashi.

Ministri e ka përshëndetur nënshkrimin e marrëveshjes dhe e konsideron jashtëzakonisht të rëndësishme pasur parasysh rëndësinë e mbrojtjes së kreativitet dhe kompensimin e autorëve për punë e tyre që që bëjnë.

“Unë si Ministër, nga fillimi i mandatit kam takuar përfaqësuesit e Shoqatave dhe kam kërkuar që sa më parë të arrihen marrëveshje për tarifat e përgjithshme për shfrytëzimin e të drejtës së autorit, dhe sot e përshëndes arritjen e kësaj marrëveshje për fushën e muzikës dhe kërkoj që të vazhdohet me arritjen e marrëveshjeve për tarifat e përgjithshme me shfrytëzues tjerë të drejtave të autorit”, u shpreh ndër të tjera ministri. Florent Boshnjaku, nga Shoqata për Menaxhimin Kolektiv të të Drejtave të Autorit, shprehu bindjen se marrëveshja do të ndikojë në zhvillimin e tregut muzikor.

“Mendoj se është dite e madhe për gjithë vendin, sepse nga sot të gjithë jemi palë përfituese të këtij procesi edhe mediumet të cilat e kanë dhënë energjinë e vet dhe mediumet të cilat në baza ditore ndihmojnë që puna e artistëve, krijuesve interpretivë, producentëve, të shfaqet, pra është një interes i përgjithshëm i dyanshëm. Mendoj që fillimi i këtij procesi do të hap shumë rrugë të tregut muzikor për zhvillimin e mediumeve që të krijohet një sistem sa më i mirë dhe më profesional i punës të cilën në e bëjmë”, ka thënë Boshnjaku.

Ndërkaq, Fazli Veliu, përfaqësues i Institutit të Mediave të Kosovës, tha se shpreson që mediat do ta respektojnë marrëveshjen. / KultPlus.com

“Shko pastro pas saj, njollat që i la ajo në qiellin tonë” (VIDEO)

Posted on by KultPlus

Një baladë e fuqishme e Rona Nishliut nuk shkon lehtë në harrim.

Edhe pse një këngëtare me jo shumë këngë, Rona Nishliu që prej fillimeve të saj ka ditur të krijojë këngë që nuk harrohen dhe që veçohen.

“Shko pastro pas saj”, shembull, është një prej atyre këngëve të cilat ka goditur mirë në zemrat e fansave. Një baladë që më pas kthehet në pikën kulmore diku nga mesi i këngës, kjo këngë me një tekst të fuqishëm tregon për një dashuri ku hyn personi i tretë, shkruan KultPlus.

Rona i pati realizuar këngës edhe videoklipin, njashtu kreativ dhe interesant.

“Shko pastro pas saj” është një prej këngëve të njohura të Ronës, krahas edhe këngëve si “Suus” apo “Shenja” dhe këngëve tjera që Rona i publikon jo shumë shpesh por gjithmonë e kujdesshme me stilin e saj dhe me emocionin që e përçon me anë të këngëve.

Sot, po e sjellim këtë baladë për ta rikthyer emocionin e saj. / KultPlus.com

Në një spital psikiatrik

Posted on by KultPlus

Poezi e shkruar nga ILNISA AGOLLI

I lypte dashuri natës
dhe lyhej si prostitutë
Ndonjëherë, e harronte emrin
cigaret poshtë kroskotit dhe getat i griseshin gjithmonë shkallëve prej unazës që në fakt;
nuk i pëlqente shumë.
Ditët i humbte kofshëve si burrat
pa ndierë asgjë
Si rolet që nuk luajti kurrë
dhe ndonjëherë harronte të vishte mbathje.
Pasdite flinte me gojë hapur
jargët, ca lot dhe djersë
e zgjonin të palumtur
si dikur në shtratin martesor.

Ndonjëherë ishte e gëzuar
Hante biskota,
pastaj më kërkonte një shkrepëse dhe dilte në oborr
Më thoshte s’e po shkonte në kishë
s’e do të ndizte një qiri për Shekspirin.
Por, ajo nuk e kuptoi kurrë se Romeo ishte një idiot
që harronte emrin në stacion
dhe Zhulieta një kurvë e lumtur
që epshin si thonjtë ,mbase,
në ndonjë dhomë teatri lëmon!
– dëshmoi infermierja ndërsa
aktores i mbuluan trupin lakuriq.
Ishte mbytyr me geta dhe
nga duart i kishin rënë tre biskota
I pëlqenin ato me fiq

Vijnë filmat e ‘Javës së Filmit Frankofon’ në disa qytete të Kosovës

Posted on by KultPlus

Nesër do të shfaqet filmi i parë në kudër të organizimit “Java e filmit frankofon”. Filmat do të shfaqen në Prishtinë, Prizren, Pejë dhe Mitrovicë. KultPlus ju sjellë listën e plotë të filmave që do të shfaqen, të cilët mund t’i ndiqni pa pagesë.

Java e filmit frankofon – 12 deri me 16 Mars

PRISHTINË
• 14 mars : 20 :00 ; L’affaire SK1, F. Tellier (Francë) – KINEMA ABC.
• 15 mars : 20 :00, Demain,apres la guerre C. Wagner (Luksemburg) – Cineplexx.
• 16 mars: 17:30, Wolf,nga Royal Vineyard Street, J. Nemec (Republika e Çekisë) – Aleanca Franceze e Prishtinës.
• 16 mars : 19 :00 Melody, B. Bellefroid (Belgique) – Alliance Française de Pristina.
• 17 mars, 20 :00 – La prochaine fois, je viserai le cour . Anger (Francë) – Cineplexx.
• 18 mars, 20 :00 –Le dernier diamant E. Barbier (Francë) – Cineplexx.
• 21 mars, 10 :00 – S, X. Beauvois (Suisse) – Université de Pristina.

PRIZREN – DokuKino
• 16 mars, 19 :30 –: La rançon de la gloire X. Beauvois (Suisse).
• 18 mars,17 :00- Rétrospective « Triller francez» (Bob Flambeur, J.-P. Melville ; La fleur de mal, C. Chabrol ; Inspecteur Lavardin, C. Chabrol).

PEJË – Kinema Jusuf Gërvalla
• 17 mars, 16 :00 – L’Affaire SK1, F. Tellier (Francë).
• 17 mars, 19 :00 – La rançon de la gloire, X. Beauvois (Zvicërr).

MITROVICË
• 17 mars, 20 :00 – L’Affaire SK1, F. Tellier (Francë) – 7 Arte
• 23 mars : La rançon de la gloire, X. Beauvois (Zvicërr) – Aktiv.
Edicioni i 18-të i “Javët e Frankofonisë 2018” do të zgjasë deri më 31 mars. / KultPlus.com

Sonte, natë muzikore me ‘The Band’ në ROCKUZINË

Posted on by KultPlus

Sonte në Rockuzinë do të performojë grupi ‘The Band’.

Grupi përbëhet nga muzicientë me përvojë të gjatë në skenë, e këta janë Luan Tashi, vokal/kitarë, Luan Macula në kitarë, Labinot Krasniqi në bass dhe Vedo Hasani në bateri.

Individualisht, të gjithë kanë performuar me bende të ndryshme muzikore në këto 25 vitet e fundit, ndërsa dëshira për të performuar live i bëri bashkë ata.

Sonte, në Rockuzinë, një natë energjike i pret të gjithë që do të vijnë. / KultPlus.com

‘The Republic of Kosovo’ e uron ndryshe 8 marsin

Posted on by KultPlus

The Republic of Kosovo – TROK është një faqe interesante artistike me ilustrime të ndryshme.

Diego – artistja që e mban blogun, ka vendosur që 8 marsin këtë vit ta sjellë në një frymë më ndryshe.

Fotografitë në blog lidhen me fytyra të njohura shqiptare të gjinisë femërore, përfshirë gazetaren Arbana Xharra apo gruan e Ramush Haradinajt, moderatoren e lajmeve Anita Haradinaj.

8 marsi dje u ‘festua’ dhe më pas edhe u protestua për më shumë të drejta të grave në një shoqëri si Kosova.

Fotografitë dhe imazhet e modifikuara mund ti shihni këtu:

Libër i ri në gjuhën gjermane për Gjergj Kastriot Skënderbeun

Posted on by KultPlus

Libër i ri në gjuhën gjermane për Gjergj Kastrioti Skënderbeun.

Autori dhe studiuesi shqiptar Gjon Keka vjen me një libër të ri në gjuhën gjermane mbi jetën dhe veprën e Gjergj Kastriotit.

Në këtë libër i cili përkon edhe me vitin e Skënderbeut, të shpallur nga qeveria shqiptare, studiuesi Keka ka bërë një përmbledhje të dokumenteve dhe fakteve e kronikave nga arkivat e ndryshëm evropian dhe autorëve që kanë shkruar për veprën e Gjergj Kastriotit.

Në këtë vepër që ka një rëndësi të madhe, për arsye se libri i autorit Keka vjen në gjuhën gjermane, libri flet më botën dhe i rrëfen të vërtetën e Kastriotit të madh.

“Në këtë libër kam sjellë fakte të reja, dhe kam qëllim varrosjen e tezave tendencioze për ta shtrembëruar apo njollosur figurën e Gjergj Kastriotit ose përvetësuar atë. Në këtë libër Gjergj Kastrioti del të jetë jo vetëm një arbnor i madh e inteligjent, por edhe një evropian i madh” pohon studiuesi Keka.

Ky është libri i shtatëmbëdhjetë me radhë i Kekës. Libri mund ta gjejnë lexuesit edhe në Kosovë në Librarinë Dukagjini dhe Librarinë Universitare Artini. / Përgatiti Valter Koxhaj

“Moj Hatixhe n’shami t’kuqe”, këngë për gruan apo për robërinë (VIDEO)

Posted on by KultPlus

Bashkimi i zërave të Hamide Sadikut dhe Qazim Berishës e sjellë këngën e njohur “Moj Hatixhe, moj n`shami t’kuqe”.

Një këngë e njohur në origjinal e Hamide Sadikut, mund të pëlqehet sot por në fakt e paraqet një realitet të hidhur të kohës kur u publikua kënga, rreth viteve 70-të.

Gratë dhe robëria që e përjetonin brenda familjeve të tyre, më pas bënte që ato të martoheshin, shpesh pa dëshirë dhe në një familje tjetër ku nuk kishte dashuri.

https://www.youtube.com/watch?v=dw-K29tW1J0&feature=youtu.be

Kënga është folklorike dhe mbetet një trashëgimi e muzikës shqiptare, e cila më pas është interpretuar edhe nga të tjerë këngëtarë dhe ka dalë në versione të ndryshme.

Madje, një prej komentuesve tek kënga në Youtube e ka quajtur realitetin e asaj kohe si realitet shtazor.
Duke lënë anash rrethanat, Hamide Sadiku dhe Qazim Berisha e kanë shkrirë këtë këngë e cila edhe sot dëgjohet me ëndje dhe pëlqehet nga moshat e ndryshme.

Moj Hatixhe moj n’shami t’kuqe,
T’i ngjyn nana moj flokt e kuqe.
Flokt e kuqe t’i shitoftë zana,
A po t’dhimen-o baba e nana?
Baba e nana, moj dy vllaznia,
Shkoj te burri po m’merr pleqnia.
Shkoj te burri po m’merr pleqnia,
Per kanaci po m’rrokin fmija.
Per kanaci po m’rrokin fmija,
Dy herë n’ditë-e o-do fshi shpia.
Dy herë n’ditë-e o-do fshi shpia,
Dy herë n’ditë-e do mushë buria.
Dy herë n’ditë-e do mushë buria,
Máll i kam-moj teshat e mija.
Máll i kamo-o teshat me’i veshë,
Nuk guxoj pej burrit me keshë.
Máll i kam-o teshat e mira,
Lypin bukën-o argatshtia.
Lypin bukën-o argatshtia,
Shumë-e hangrën, iu raftë tërpia!
—
t’shitoftë zana – mallkim.
kanac – pështjellak, përparëse.
argatshti – argatët bashkërisht.

Qeveria ndan 500 mijë euro për ‘Vitin e Skënderbeut’

Posted on by KultPlus

Në mbledhjen e sotme qeveria ndau 500 mijë euro për aktivitetet e “Vitit të Skënderbeut” në 550 vjetorin e vdekjes së tij.

Qeveria ndau sot 500 mijë euro për aktivitetet që do të shënojnë Vitin e Skënderbeut në kohën kur po bëhen 550 vjet nga vdekja e tij.

> Fatos Qerimi Emërohet Sekretar në Ministri > Miratohet Koncept-Dokumenti për Pagat > Kalimi i Pakos së Ligjeve në Kuvend, Jetik për Sundimin e Ligjit > Miratohet Deklarata për Demarkacionin si Aneks-Marrëveshje
Kryeministri Ramush Haradinaj propozoi ndarjen e 943 mijë eurove.

“Një numër i aktiviteteve të parapara ndër shqiptare megjithatë propozoj që të ndahen 943 mijë euro prej të cilave 250 mijë do të përdoren për restaurimin e kishës në Prizren”, tha Haradinaj.

Por ministri Bedri Hamza tha se paratë nga rezervat e shtetit po shkojnë drejt fundit dhe u bëri thirrje pjesëtarëve të kabinetit qeveritar që me kohë kërkesat buxhetore t’i paraqesin nëpër ministri.

“E para për të gjitha ngjarjet që do të ndodhin i lus të gjithë ministrat që t’i planifikojnë dhe t’i vendosin me kohë në buxhetin e ministrisë së tyre. E dyta nga çdo njëri prej neve që ka nevojë për rezerva të respektohet afati dhe e treta duhet me pas kujdes për kërkesat e ardhshme për shkak se gjendja e rezervës është duke shkuar nga fundi”, tha Hamza.

Ai kërkoi pastaj që të ndahen vetëm 500 mijë euro për “Vitin e Skënderbeut”.

“Deri në 500 mijë euro ne kemi ardhë me përkrah. Propozimi i Ministrisë së Financave është që të ndahen 500 mijë euro 250 mijë për restaurim të kishës e 250 mijë për zhvillimet e tjera. Pra totali 500 mijë”, tha Hamza.

Pastaj kabineti qeveritar miratoi propozimin e Hamzës. / Kallxo.com / KultPlus.com

NETFLIX me dokumentar mbi sulmet terroriste në Francë

Posted on by KultPlus

Vëllezërit Jules dhe Gedeon Naudet sjellin dokumentar për sulmet e 13 shtatorit, në Francë.

Vëllezërit Naudet, të cilët kanë realizuar dokumentar për 11 shtatorin, rrëzimin e kullave binjake në New York, do të rikthen për të sjellë një dokumentar mbi sulmin në Francë që ndodhi më 13 shtator në vitin 2015.

Filmi do të lansohet në platformën online të filmave – Netflix, shkrun KultPlus.

Personat të cilët kanë përjetuar sulmet e 13 shtatorit në Francë, që lanë 130 të vdekur dhe 413 të plagosur, tashmë janë të gatshëm që të flasin. Netflix ka lidhur partneritet me vëllezërit Jules dhe Gedeon Naudet dhe do të publikojnë tri episode të dokumentarit “13 Novembre: Fluctuat Nec Mergitur”, nga mesi i këtij viti.

Në dokumentar do të dëgjohen historitë e 20-të dëshmitarëve: të mbijetuarve të sulmit, atyre që kanë qenë afër vendeve të sulmit, zjarrfikësve, policëve dhe të tjerëve. Vëllezërit Naudet gjithashtu kanë intervistuar edhe disa politikanë, duke përfshirë edhe kryetaren e Komunës së Parisit, Anne Hidalgo dhe ish-Presidentin e Francës, François Hollande.

“Nuk është as një hetim dhe as raportim. Ne do të përdorim sa më pak imazhe të asaj nate. Ne luftojmë kundër sensacionales. Kjo është një histori e cila tregon virtytet më të larta të njerëzve, flet për mënyrën se si në rimarrim veten”, kanë theksuar ata. Ata kanë treguar se platforma Netflix ka qenë më e përshtatshmja pasi që publiku do të ketë mundësi që të marrë kohën që i duhet, gjatë shikimit të dokumentarit.

“Natën e 13 shtatorit, një komb i tërë është sulmuar. Çdokush është prekur nga kjo ngjarje. Është e rëndësishme të flasim për të. Njerëzit të cilët i kemi intervistuar kanë pasur fjalë mjaftë të mençura dhe shpresëdhënëse për të thënë”, kanë treguar dy vëllezërit regjisorë. / KultPlus.com

Fotografi Armend Nimani, në mesin e të nominuarve për Joop Swart Masterclass

Posted on by KultPlus

Armend Nimani i nominuar për masterklasën që organizohet nga World Press Photo.

Në mesin e 216-të të nominuarve për të marrë pjesë në masterklasën Joop Swart, që organizohet nga Fondacioni për Fotografi World Press, është edhe fotografi kosovar Armend Nimani.

World Press Photo ka publikuar listën e plotë të të nominuarve për këtë masterklasë, aty është edhe fotografi nga Kosova Armend Nimani. Kurse në fazën e ardhshme, do të bëhet përzgjedhja e 12-të finalistëve nga një juri e pavarur dhe profesionale. Finalistët do të ftohen në Amsterdam për një masterklasë në fund të këtij viti.

Përzgjedhja e finalistëve do të bëhet gjatë Festivalit World Press Photo, i cili do të mbahet me 13 dhe 14 prill në Amsterdam.

Masterklasa Joop Swart organizohet nga World Press Photo çdo vit që nga viti 1994 dhe mbahet si një nga ngjarjet më të rëndësishme të këtij lloji të masterklasës. Qëllimi është që të bëjë së bashku individë të cilët kanë eksperiencë për realizimin e fotolajmeve me fotografët e rinj, për të ndarë njohurit dhe përvojat e tyre.

Armend Nimani është ndër fotografët më të mirë shqiptarë. Nimani gati çdo javë ka fotografitë e tij të publikuara në El Paisin spanjoll, në The Guardian dhe në mediat tjera kryesore. / KultPlus.com

Mos u dashuro

Posted on by KultPlus

Poezi nga MARTHA RIVERA GARRIDO / Përktheu Aida Baro

Mos u dashuro pas një gruaje që lexon,
pas një gruaje fort të ndjeshme,
pas një gruaje që shkruan.
Mos u dashuro pas një gruaje të mençur,
magjistricë, të krisur, të marrë.
Mos u dashuro pas një gruaje që mendon,
që e njeh botën,
e zonja për të marrë krahë.
Pas një gruaje besimplotë në vetvete.
Mos u dashuro pas një gruaje që qesh
a qan tek bën dashuri, që di
të shndërrojë shpirtin e saj në mish,
sidomos pas një gruaje që dashuron poezinë
(ato janë më të rrezikshmet),
a pas një gruaje që mund
të rrijë gjysmë ore para një tabloje e s’jeton dot pa muzikë.
Mos u dashuro pas një gruaje energjike, të hareshme,
të kthjellët, rebele, moskokëçarëse.
Mos të qëlloftë të dashurohesh pas një kësi gruaje,
se kur dashurohesh pas një gruaje të tillë,
në qëndroftë apo jo pranë teje,
në të dashtë apo jo,
një grua të tillë, s’e harron dot më.
Kurrë!

Vesna Vulović, historia e stjuardesës që i shpëtoi rrëzimit të aeroplanit jugosllav

Posted on by KultPlus

Vesna Vulović nuk ishte grua e zakonshme pasi ajo u përcoll për në varreza 44 vite pasi i kishte mbijetuar rënies më të lartë pa parashutë, përcjellë KultPlus.

KultPlus ju sjellë të plotë historinë e pazakontë të kësaj gruaje.

“Ajo, një ditë do të jetë e vetmja e mbijetuar nga rrëzimi i aeroplanit” , nuk është një fjali që sot prindërit e thonë për fëmijët e tyre. Vesna Vulović , si një fëmijë ishte një fanse e madhe e muzikës perëndimore ndërsa ndjente një simpati të veçantë për “The Beatles” dhe ndërkohë shkoi për të jetuar në Mbretërinë e Bashkuar në mënyrë që ta përmirësonte anglishten e saj. Vesna pastaj u zhvendos në Suedi, megjithatë prindërit e saj nuk ishin të lumtur për tërë këtë lëvizje të saj dhe së shpejti i kërkuan asaj që të kthehej në Jugosllavi.

Vesna Vulović do të kthehej në Beograd, atje ku do të ndjente nevojën për të gjetur një punë. Ajo kishte kaluar disa vite jashtë vendit të saj dhe gjetja e punës në një shoqëri socialiste nuk ishte gjëja më e lehtë. Vulović ishte këmbëngulëse dhe si e tillë nuk mbeti shumë gjatë pa punë.

Një mik i saj po punonte për JAT, linja ajrore kombëtare e Jugosllavisë dhe Vesna do t’u bashkohej së shpejti.

Rrëzimi i aeroplanit

Ka një arsye pse ata individë që kryejnë punën e tyre në aeroplanë rrallë bëjnë lajmet. Vesna Vulović kishte gjasa të ishte pjesë e miliona administratorëve anonimë dhe stjuardesave sikur të mos ishte pjesë e tragjedisë së tmerrshme të Fluturimit 367 të JAT, një avion që po barte pasagjerët nga Stokholmi për në Beograd. Rreth 28 vetë ishin në bordin e fluturimit të janarit të vitit 1972, duke përfshirë edhe ekuipazhin. Gjithçka po shkonte mirë derisa aeroplani po fluturonte mbi Gjermaninë Lindore.

Një bombë shpërtheu në bordin e aeroplanit, duke bërë që avioni të ndahej në gjysmë dhe të dilte dhunshëm nga kontrolli. Ai shumë shpejt do të lëvizte drejt tokës derisa do të rrëzohej në një fshat që në atë kohë ishte pjesë e asaj që njihej si Çekosllovaki. Mund ta cilësosh si mrekulli, fat apo si të doni por Vesna Vulović ishte e vetmja që i mbijetoi rrëzimit të aeroplanit. Si ia doli ajo të mbijetojë, as sot nuk është krejtësisht e qartë, por teoria mbizotëruese është se një karrocë ushqimi e mbështeti atë në anën e pasme të aeroplanit duke e ndalur kështu rënien e saj nga aeroplani, duke kryer kështu funksionin e rripit të sigurimit më të efektshëm në botë.

Fati i saj nuk mbaron këtu.

Vesna Vulović kishte rënë nga 10.160 metra lartësi dhe arriti të mbijetonte por ajo ishte e vetmja e mbijetuar që vazhdoi të rrinte e shtrirë në rrënojat e shtrembëruar të një aeroplani komercial. Ajo u gjet atje nga Bruno Henke, i cili për fat të mirë kishte qëlluar të jetë një ish-mjek në Ushtrinë Gjermane. Henke ishte në gjendje të kujdeset për të sëmurën Vulović derisa ajo të ishte në gjendje të shkonte në spital. / KultPlus.com

John William Bills / Culture Trip