Diskutimet racore e gjinore si të pashmangshme – jepet premiera e shfaqjes ‘Të bardhët’

Posted on by Kult Plus

Flonja Haxhaj

Të premtën, në Teatrin Oda në Prishtinë, u dha premiera e shfaqjes ‘Të Bardhët’ e autorit amerikan Steven Leigh Morris dhe regji nga Besim Ugzmajli. Shfaqja e cila shkaktoi shumë të qeshura në publik, më tepër se kaq,  kishte për qëllim që të vë në pah diskutimet që lidhen me dinamikat racore e gjinore që ekzistojnë në çdo shoqëri, shkruan KultPlus.

Ngjarja zhvillohet në një teatër gjysmë-profesional në Tulsa, Oklahoma. ‘Të bardhët’ ka në qendër Luisin (Shpëtim Selmani), drejtori artistik i teatrit, i cili para vdekjes ka vetëm një ëndërr, të bëjë regjinë e shfaqjes ‘Mbreti Lir’ të Shekspirit, por dinamikat gjatë rrugës, nuk do t’ia bëjnë të lehtë realizimin, nisur nga fakti që ai vetë ka vendosur ta luajë ‘Mbretin Lir’.

‘Të bardhët’ sjell konfliket gjatë provave ku Luisi ballafaqohet me akuza të shumta rreth përzgjedhjes së aktorëve dhe roleve. Ndër to është Priscillia (Verona Koxha), e cila vazhdimisht shpreh pakënaqësitë për vendimet e Luisit dhe frikën e saj se roli i Kordelias mund të zëvendësohet me një aktore me ngjyrë.

Ajo po ashtu gjatë gjithë kohës shpreh revoltën e saj mbi shfaqjen duke e konsideruar jashtë mode dhe se i përçmon gratë.

Në skenën ku po zhvilloheshin provat e ‘Mbretit Lir’, paraqitet edhe Dagu (Bujar Ahmeti), një djalë që sipas Luisit, nuk është lindur për teatër, mirëpo ka punuar për teatër gjatë gjithë jetës së tij. Pavarëisht dramave e konflikteve, Dagu megjithatë është i vendosur, ndonjëherë edhe i ‘kushtëzuar’ të ndihmojë Luisin që ta çojë ëndrrën e tij deri në fund.

Regjisori Besim Ugzmajli duke folur për tematikën e shfaqjes, tha se ‘Të bardhët’ trajton  diskutimet që i përkasin stereotipeve racore e gjinore, diskutime që së shpejti do të vijnë edhe në Kosovë. Më tutje, ai shprehet i lumtur me produktin final që është shfaqur në skenë.

“Kjo shfaqje është një perludi e diskurseve të shumta sociale të cilat janë rrugës për në vendin tonë, pra janë diskutime që lidhen me dinamikat racore e gjinore në shumë vende të perëndimit, mirëpo tek ne janë akoma tema të pakonsumuara dhe mendoj që brenda një kohë shumë të shkurtër do të jenë pjesë e diskutimeve në shoqërinë tonë . Shfaqja na bën një lloj paralajmërimi rreth asaj se çka e pret shoqërinë tonë, jo një paralajmërim ogurzi por një paralajmërim që diçka interesante do të jetë pjesë e diskurseve publike dhe sociale”, tha ai.

Ai më tutje foli edhe për kastën e aktorëve, duke u shprehur se i përkasin aktorëve më të mirë të gjeneratave të tyre.

“Ka qenë kënaqësi jashtëzakonisht e madhe me punu me Shpëtimin, Bujarin e Veronën. Janë aktorë me shumë angazhim, aktorë që janë të gatshëm me bashkëpunu deri në fund dhe po besoj që kemi arritur të kemi një produkt kompakt me të cilin unë jam jashtëzakonisht i lumtur”, tha mes tjerash Ugzmajli.

Pas shfaqjes, për KultPlus foli aktori Shpëtim Selmani, i cili në shfaqje paraqitet me rolin e Luisit, personazhi i cili dëshpërimisht kërkon që para vdekjes të realizojë shfaqjen ‘Mbreti Lir’.  Selmani thotë se kjo shfaqje flet për një tematikë që është pjesë e diskutimeve n çdo shoqëri.

“Luisi është një regjisor i një teatri gjysmë-amator. Është një temë e cila mundet lirisht të gjendet në të gjitha shoqëritë, pra çështja e racizmit. Luisi është pak para vdekjes dhe mundohet që ta bëjë edhe një shfaqje ‘Mbretin Lir’ të Shekspirit që ta lë një mesazh dhe të tregojë se çfarë bote është dhe se si është bota sipas Shekspirit. Në të njëjtën kohë ai akuzohet për përzgjedhje të roleve, akuzohet për racizëm nga dy krahe fundamentale në Amerikë”, tha Selmani.

Ndërkaq, aktori Bujar Ahmeti, i cili në shfaqje personifikon rolin e Dagut, thotë se ky rol paraqet rolin e një djali naiv i cili kushtëzohet në punën e tij, megjithatë mundohet ta mbështesë regjisorin dhe kërkesën e tij të fundit.

 “Dagu është një djalë i cili është aktor, djalë shmë i mire, naiv , i cili mundohet edhe pse ndonjëherë ofendohet ose kushtëzohet rreth punës së tij si aktor, prapëseprapë mundohet ta ndihmojë dhe mbështesë, rolin e Shpëtimit, ‘Luisin’, i cili ka një ëndërr, që para vdekjes ta bëjë një shfaqje – ‘Mbretin Lir’, u shpreh Ahmeti për KultPlus.

Ju kujtojmë që shfaqja ‘Të bardhët’ është produksion i Qendrës Multimedia, shkruar nga Steven Leigh Morris, regjia nga Besim Ugzmajli dhe luajnë aktorët, Shpëtim Selmani, Bujar Ahmeti dhe Verona Koxha./KultPlus.com

Tri nga sopranot më të njohura në Shqipëri – Truja, Kraja dhe Tashko

Posted on by Kult Plus

Tri prej artisteve shumë të talentuara të Shqipërisë, Jorgjie Truja, Marie Kraja dhe Tefta Tashko mbajtën një koncert më 16 shtator të vitit 1937, shkruan KultPlus.

Truja, Kraja dhe Tashko njihen si prej sopranove më të mira që ka pasur ndonjëherë Shqipëria.

Ky koncert u mbajt në Bari të Italisë, derisa që të rija vazhdojnë të kujtohen me krijmtarinë artistike që kanë lënë pas. /KultPlus.com

Apple përgatit ekrane që do të riparohen vetë?

Posted on by Kult Plus

Kur bëhet fjalë për pajisjet me ekrane të përkulshme, Apple nuk nxiton.

Edhe pse kanë plane për këtë lloj pajisjeje, prezantimi i tyre nuk duhet pritur për disa vite, madje edhe kur të shfaqen, pyetja është se cila pajisje do të jetë.

Më herët u përmend se Apple po planifikon një iPad apo edhe një Mac me ekran fleksibël, por do të zbulohet se cilat janë planet e tyre në të vërtetë, sepse sigurisht që nuk ka asnjë informacion zyrtar.

Megjithatë, këtë javë u shfaqën informacione për një patentë të paraqitur nga Apple, e cila i referohet ekraneve fleksibël dhe sipas kësaj, “molla” mund të prezantojë një pajisje me “ekran fleksibël vetë-shërues”.

Në ekrane të tilla, gërvishtjet dhe gërvishtjet e tjera të vogla duhet të “riparohen” vetë, pa qenë nevoja ta merrni pajisjen për riparim.

Vetë patenta nuk i referohet ndonjë pajisjeje specifike, por thekson se si ekrane të tillë mund të përdoren në telefona, tableta, kompjuterë, monitorë dhe pajisje të veshura. Ky material mund të mbulojë vetëm pjesën ku përkulet ekrani ose të gjithë ekranin.

Është interesante se ekrani mund të “shërohet” pa pasur nevojë për ndonjë veprim të përdoruesit apo ndërhyrje të jashtme.

Gjithashtu, përdoruesit mund të paracaktojnë rendin në të cilin do të riparohet ekrani, d.m.th., vetë-shërimi mund të aktivizohet gjatë karikimit të pajisjes, nëse bëhet fjalë për karikim me valë ose kur përdorni një kabllo.

Sigurisht, vetë aplikimi për patentë nuk do të thotë që kompania do të prezantojë në të vërtetë një material të tillë, domethënë pajisje në të cilat ekranet do të mund të rinovohen.

Nga ana tjetër, është mirë të dimë se në cilin drejtim po mendojnë dizajnerët e Apple, e megjithatë ekziston mundësia që një ditë në të ardhmen të kemi në dispozicion pajisje për të cilat nuk do të shqetësohemi nëse i hedhim dhe ekrani dëmtohet./alsatm/ KutlPlus.com

‘Nëse Perëndia nuk do të ekzistonte, do të ishte e nevojshme ta shpiknim!’

Posted on by Kult Plus

 François-Marie Arouet- Voltaire (Volter):

1. Unë nuk jam dakord me atë që thua, por do ta mbroj deri në vdekje të drejtën tënde që ta thuash!

2. Triumfi i vërtetë i arsyes është se ne aftëson të vazhdojmë rrugën me ata që nuk e kanë!

3. Ka njerëz që nuk mendojnë më thellë se një fakt!

4. Gjithkush që ka pushtetin të të bëjë të besosh absurditete ka pushtetin të të bëjë të marrësh përsipër padrejtësi!

5. Çdo gjë shumë koti për t’u thënë këndohet!

6. Me anë të vlerësimit, e bëjmë përsosmërinë e të tjerëve pronën tonë!

7. Qeveritë duhet të kenë edhe barinj edhe kasapë!

8. Kur bëhet fjalë për paratë, të gjithë kanë të njëjtën fe!

9. Paragjykimet janë ato që budallenjtë përdorin për arsye!

10. Nëse Perëndia nuk do të ekzistonte, do të ishte e nevojshme ta shpiknim!

11. Çdo njeri është fajtor për të gjitha të mirat që s’ka bërë!

12. Filozofia, vetëm filozofia, kjo motër e fesë i ka hequr besëtytnisë armët nga duart e gjakosura prej kohësh dhe tani që ka dalë helmi, mendja e njeriut habitet me mynxyrat ku e kishte shpënë fanatizmi!

13. Toleranca nuk ka nxitur kurrë luftë civile, kurse mostoleranca e ka mbuluar tokën me gjak!

14. Gjykojeni një njeri më shumë nga pyetjet se sa nga përgjigjet e tij!

15. Zoti na e dha ne dhuratën e jetës; na takon ne t’ia japim vetes dhuratën e të jetuarit mirë!

16. Vlerësimi është një gjë e mrekullueshme: Kjo e bën atë që është e shkëlqyer tek të tjerët të na përkasë edhe neve!

17. Çdokush që ka fuqinë për të të bërë ty të besosh në absurditete, e ka fuqinë të të bëjë që ti të kryesh padrejtësi!

18. Në përgjithësi, arti i qeverisjes përbëhet nga marrja e sa më shumë parave që të jetë e mundur nga një klasë e qytetarëve për t’ia dhënë një tjetre!

19. Unë kurrë nuk kam bërë lutje për Zotin, përveç njërës shumë të shkurtër: “O Zot, bëji armiqtë e mi qesharakë.” Dhe Zoti ma dëgjoi!

20. Është e ndaluar për të vrarë; prandaj të gjithë vrasësit ndëshkohen, përveç nëse ata vrasin në numër të madh dhe nën tingujt e borive!

21. Jeta është e mbjellë dendur me gjemba, dhe unë nuk di asnjë mjet tjetër përveçse të kaloj shpejt nëpër to. Sa më gjatë të ndalemi në fatkeqësitë tona, aq më e madhe është fuqia e tyre për të na dëmtuar!

22. Zoti është një komedian, duke luajtur ndaj një audience që ka shumë të frikësuar për të qeshur!

23. Nga të gjitha fetë, e krishtera sigurisht duhet të frymëzojë tolerancën më të madhe, por deri tani të krishterët kanë qenë më intolerantët e të gjithë njerëzve!

24. Është e vështirë t’i çlirosh budallenjtë nga zinxhirët të cilët ata i adhurojnë!

25. Të gjitha arsyetimet e burrave nuk janë me vlerë sa një ndjenjë e grave!

26. Çfarë është toleranca? Është pasojë e njerëzimit. Ne jemi të formuar të gjithë nga dobësia dhe gabimi; le të falim të gjithë ne reciprokisht marrëzinë e njëri-tjetrit – ky është ligji i parë i natyrës!

27. Unë i urrej femrat, sepse ato gjithmonë i dinë gjërat se ku janë!

28. Burri i cili vendos të befasojë papritur gruan e tij shumë shpesh e ka befasuar veten!

29. Është e rrezikshme të kesh të drejtë në çështjet në të cilat autoritetet e kohës janë gabim!

30. Arti i qeverisjes është për të bërë dy të tretat e një kombi të paguajnë gjithçka që ata mund të paguajnë, për të mirën e një të tretës tjetër!

31. Nuk është e mjaftueshme të shohim dhe të njohim bukurinë e një vepre. Ne duhet ta ndjejmë dhe të prekemi prej saj!

32. Për të patur sukses në botë nuk është e mjaftueshme të jesh budalla, duhet gjithashtu të jesh i sjellshëm!

33. Është më mirë të rrezikosh shpëtimin e një njeriu fajtor sesa të dënosh një njeri të pafajshëm!

34. Tiranët gjithmonë kanë disa hije të lehtë virtyti; ata i mbështesin ligjet para se t’i shkatërrojnë ato!

35. Supersticioni është për fenë çka Astrologjia është për astronominë, vajzë e çmendur e një nëne të mençur. Këto bija shumë kohë kanë dominuar tokën!

36. Dyshimi nuk është një gjendje e këndshme, por siguria është absurde!

37. Rastësia është një fjalë e zbrazur nga kuptimi, asgjë nuk mund të ekzistojë pa një shkak!

38. Asnjëherë mos debato në tryezën e darkës, sepse ai që nuk është i uritur gjithmonë gjen argumentin më të mirë!

39. Origjinaliteti nuk është asgjë veçse imitim i mençur. Shkrimtarët më origjinalë kanë huazuar nga njëri-tjetri!

40. Për të gjallët e kemi borxh respektin, por për të vdekurit e kemi borxh vetëm të vërtetën!

41. Ne kurrë nuk jetojmë, ne jemi gjithmonë në pritje të jetesës!

42. Divorci është ndoshta i së të njëjtës datë si martesa. Unë besoj, megjithatë, se martesa është disa javë më e vjetër!

43. Është një njeri i vështirë ai që është vetëm i drejtë, dhe i trishtuar ai që është vetëm i mençur!

44. Historia është vetëm regjistri i krimeve dhe fatkeqësive!

45. Historia duhet të shkruhet si filozofi!

46. Unë di shumë libra të cilat i kanë mërzitur lexuesit e tyre, por unë nuk di asnjë libër që ka bërë vërtet ndonjë të keqe!

47. Ka të vërteta të cilat nuk janë për të gjithë njerëzit, as për të gjitha kohërat!

48. Të besosh në Zotin është e pamundur, të mos besosh në Atë është absurde!

49. Unë kam jetuar tetëdhjetë vjet të jetës dhe nuk di asgjë për këtë, veçse të dorëzohem dhe të them se fluturat kanë lindur për t’u ngrënë nga merimangat dhe njeriu për t’u gllabëruar nga trishtimi!

50. Është e rrezikshme të kesh të drejtë, atëherë kur qeveria e ka gabim!

Gara ndërkombëtare ‘Tiranathlon’ në Tiranë, shpallen fituesit

Posted on by Kult Plus

Përfundon edicioni i katërt i garës ndërkombëtare “Tiranathlon”, ku morën pjesë garues nga disa vende të ndryshme të botës.

Ky event i madh sportiv, u organizua në Parkun e Liqenit të Farkës. Në këtë aktivitet u bënë bashkë tre disiplinat më të njohura dhe të praktikuara në një garë të vetme: not, çiklizëm dhe vrap.

Fituesit e garës sipas kategorive janë si më poshtë:

Sprint Race – Meshkuj
1. Boris Andreev, Bullgar
2. Nikitas Kallitsis, Greqi
3. Genc Isufi, Kosova

Sprint Race – Femra

1.Stephania Polychroniadis, Greqi
2.Mira Georgieva, Bullgari
3.Julinda Pashku, Shqiperi

Olympic Race – Meshkuj
1. Alexander Bozhilov, Bullgari
2. Panaghiotis Polyzos, Greqi
3. Albion Ymeri Kosove

Olympic Race – Femra
1. Anastasia Peycheva, Bullgari
2. Selena Vlahova, Bullgari
3. Katayun Shamlu, Azerbaijan

Relay Sprint Race
1. Rei Hazizaj, Shqiperi
2. Olsian Veliaj, Shqiperi
3. Bledar Mesi, Shqiperi

Relay Olimpic Race
1. Elvis Xhafaj,
2. Bartolomiej Czyz,
3. Tzmitry Prudnikqu

Me qëllim, mbarëvajtjen dhe organizimin e aktivitetit sportiv “Tiranathlon” në Parkun Helen pranë Liqenit të Farkës, Bashkia e Tiranës, në bashkëpunim dhe me Policinë e Shtetit, kanë hartuar një plan masash për organizimin e lëvizjes së automjeteve gjatë zhvillimit të garës./atsh/ KultPlus.com

Luiza Gega nuk ndalet, sërish kampione në Kampionatin Ballkanik

Posted on by Kult Plus

Atletja shqiptare, Luiza Gega është shpallur sërish kampione Ballkani për të dytën ditë radhazi. Ajo ka triumfuar në garën e 5000m. Nga ana tjetër, David Nikolli është pozicionuar në vendin e dytë për meshkuj në garën e 3000m.

Njoftimi i plotë

Të nderuar miq të medias, vijmë sërish te ju me dy lajme të mira. Në ditën e dytë të kampionatit të 77-të ballkanik të atletikës që po mbahet në datat 25-26 maj në Izmir të Turqisë, atletja e mirënjohur shqiptare Luiza Gega, pasi u shpall kampione Ballkani ditën e parë në garën 3000m me pengesa me kohën 9’26.40, sot, në ditë e dytë, fitoi një tjetër medalje ari në garën e 5000m. Duhet theksuar se nëse në garën e djeshme Luiza përfundoi 20 sekonda më shpejt se vendi i dytë, gara e sotme pati një finish të fortë. Konkurrentja direkte e Gegës ishte Yasemin Can, një keniane e natyralizuar turke, kampione në fuqi e Europës për 10000m.

Gara ishte shumë taktike dhe kampionia jonë e bëri diferencën në 400m e fundit, duke e mbyllur garën e 5000m me kohën 15’38.52. Kujtojmë që Luiza Gega është e vetmja atlete shqiptare pjesëmarrëse në Lojërat Olimpike të Parisit si e kualifikuar. Por përpara Olimpiadës, Gega do të marrë pjesë në kampionatin europian të Romës në qershor, ku do të tentojë të ruajë titullin kampione e Europës në 3000m me pengesa.

Lajmi i dytë i mirë vjen nga atleti shqiptar David Nikolli, i cili e mbylli garën e 3000m me kohën 8’07.37, duke u renditur i dyti pas atletit austriak Sebastian Frey.
Në këtë kampionat ballkanik, që ballkanik vetëm emrin ka, sepse pjesëmarrja e ekipeve shkon në 21, duke tejkaluar ndjeshëm rajonin dhe duke përfshirë edhe shtete të tjera si Austria, Izraeli, Qipro, Gjeorgjia, etj., ekipi shqiptar u përfaqësua me 8 atletë, 2 trajnerë, 1 fizioterapist dhe presidentin e federatës shqiptare të atletikës./ abcnews.al/ KultPlus.com

Presidentja Osmani në 25 vjetorin e Masakrës së Tusuzit: Vendosja e drejtësisë për viktimat është përkushtim i çdoditshëm i yni

Posted on by Kult Plus

Presidentja e Kosovës Vjosa Osmani, i ka përkujtuar viktmat e Masakrës Tusuz (Lagjja e Trimave) në Prizren.

Më 26 maj 1999-të, atje forcat e regjimit gjenocidal të Serbisë, vranë mizorisht 27 banorë.

Kjo ndodhi në pragun e lirisë së Kosovës.

Osmani tha se “kjo lagje shquhet për kontributin e dhënë dhe sakrificën për lirinë e Kosovës, ndaj vendosja e drejtësisë për viktimat është përkushtim i çdoditshëm i yni”.

“Qoftë i përhershëm kujtimi për martirët dhe të gjithë të rënët për liri!”, tha Osmani.

‘Chopin Piano Fest’ dhe Filharmonia bashkojnë forcat, dhurohet spektër brilant i tingujve

Posted on by Kult Plus

Vjollca Duraku

Tinguj me një spektër të gjerë frekuencash u dhuruan mbrëmë nga Pianisti François Dumont dhe Orkestra e Filharmonisë së Kosovës, nën drejtimin e dirigjentit Antonie Marguier, në koncertin e shtatë me radhë të Festivalit të Muzikës Klasike “Chopin Piano Fest Prishtina” në Atelienë e Pallatit të Rinisë, shkruan KultPlus.

Adhuruesit e Filharmonisë së Kosovës dhe të Chopin-it kësaj radhe u bashkuan në një koncert të përbashkët, për të përjetuar emocione të thella nga një program i përzgjedhur me shumë shije, me tinguj brilant shumë të fortë dramatik të cilët përmbyseshin nga tinguj të qetë të pianos të cilët dërgonin  në thellësi meditative.

Koncerti i cili zgjati për 90 minuta filloi me interpretimin e veprës “Piano Concerto No.5 in E-flat major, Op.73” me Allegro, Adagioun poco mosso, Rondo: Allegro ma non troppo nga L.V. Bethoven për të vazhduar në pjesën e dytë të koncertit me “ Symphony No. 4 in C minor,  D 417” me Adagio molto, Allegro vivace nga F. Schubert.

Publiku u pasurua artistikisht me tinguj të frekuencave të ndryshme të cilët emeteoheshin qetësisht nga mjeshtria e pianistit Dumont dhe harkorët e Filharmonisë, për t’u bërë më intensivë kur interpretimit i shtoheshin frymorët, për të kaluar në dramacitet kur në lojë hynin të gjitha instrumentet, duke rënë përsëri vetëm në tingujt e qetë, të bukur të pianos.

Nga kjo lojë e mrekullueshme ishte reagimi i publikut që u jepte përgjigje për performancën përgjatë koncertit artistëve që udhëhiqeshin nga dirigjenti plot sharm, elegancë e profesionalitet, Antoine Marguier.

Pas pjesës artistike Pianisti Dumont u shpreh se ndihej i emocionuar nga interpretimi në “Chopin Piano Fest” dhe shumë i lumtur pasi iu dha hapësirë për herë të dytë për të interpretuar në këtë festival.

“Jam shumë i lumtur të kthehem në Prishtinë dhe të kem mundësi ta njoh qytetin dhe kulturën. E ndjej energjinë e mirë dhe dinamike. Isha i emocionuar të kthehem në Chopin dhe të luaj për herë të parë me Orkestrën e Filharmonisë së Kosovës. Dy vite më parë ishte një koncert recital në ‘Chopin Fest’ ndërsa sonte kemi luajtur Koncertin e 5-të të Beethoven. Ky koncert është i fundit i kompozitorit”, ka thënë pianisti Dumont.

Ndërsa organizatorja e festivalit Lejla Pula u shpreh e mrekulluar nga loja e pianistit Dumont dhe interpretimi i  Orkestrës së Filharmonisë së Kosovës.

“E kemi shijuar të gjithë së bashku. Vërtetë një koncert i mrekullueshëm nga François Dumont i cili në bashkëpunim me Ambasadën franceze erdhi për herë të dytë në festivalin tonë ka mbajtur një recital të Chopin-it sepse ai vetë është laureat i garave të Chopinit në Varshavë, do të thotë është një ekspert i madh i muzikës së Chopin-it, por që në këtë koncert rastisi që ai ta luaj në mënyrë të mrekullueshme, me një sensibilitet të jashtëzakonshëm koncertin e pestë të Bethovenit”, ka thënë organizatorja.

Më tej, organizatorja Lejla Pula ka thënë se ndihet e nderuar për pjesëmarrjen e një artistëve të mëdhenj që pavarësisht kushteve jo adekuate për interpretim, ndahen të kënaqur dhe kërkojnë të interpretojnë përsëri nga mikpritja dhe energjia pozitive që e përjetojnë në Festival.

“Ne si organizatorë jemi shumë të lumtur që artistë të mëdhenjë pranojnë të vijnë në Kosovë, për shkak se ende nuk posedojmë sallë të përshtatshme koncertale, pasi ata mund të kenë pak drojë se si mund të tingëlloj pianoja. Mirëpo ata jo vetëm që pranojnë kur i ftojmë përsëri, por ata edhe vet kërkojnë të vijnë përsëri, kështu që në një formë edhe mos me dashtë të vazhdojmë Piano Festin kjo kërkohet nga mysafirët tanë që ndahen aq të kënaqur me mikpritje dhe me të gjitha duke u mrekulluar nga rinia jonë, nga publiku, studentët, audienca e gjerë. Thjesht është një mrekulli”, është shprehur organizatorja.

Kurse ushtruesi i detyrës së Drejtorit të Filharmonisë, Dardan Selimaj, u shpreh i kënaqur nga bashkëpunimi me Festivalin “Chopin Piano Fest”, nga ku edhe potencoi që bashkëpunimi do të vazhdoj edhe në vitet në vijim.

“Bashkëpunimi i Filharmonisë së Kosovës me Chopin Piano Fest është tradicional, ashtu si edhe me festivale të tjera që organizohen në Kosovë. Kjo ka qenë një mundësi e mirë për të bashkuar forcat siç kemi bërë edhe në të kaluarën dhe besoj që do të vazhdojmë edhe në të ardhmen, ndonëse nuk kemi pasur mundësi që këto vitet e fundit që të bashkëpunojmë me secilin festival për shkak të agjendës të Filharmonisë së Kosovës që nganjëherë nuk përputhen me agjendën e festivaleve, por aq sa kemi mundësi do ta  vazhdojmë si traditë edhe  në vitet që vijnë” ka përfunduar Selimaj.

Koncerti i radhës i “ Chopin Piano Fest” do të mbahet me pianisten Iliriana Gjoni dhe sopranon Milica Lalosevic, më 27 maj, në ora 20: 00, në Amfiteatrin e Bibliotekës Universitare/ KultPlus.com

Kangët e Pakëndueme

Posted on by Kult Plus

Poezi nga Migjeni

Thellë në veten teme flejnë kangët e pakëndueme
të cilat ende vuejtja as gëzimi s’i nxori,
të cilat flejnë e presin një ditë ma të lumnueme
me shpërthye, m’u këndue pa frigë e pa zori.

Thelltë në veten teme kangët e miajesin…
e unë jam vullkani që fle i fashitun,
por kur t’i vijë dita të gjitha ka me i qitun
në një mijë ngjyra të bukra që nuk vdesin.

Por a do të vijë dita kangët me u zgjue?
Apo ndoshta shekujt me ne prap po tallen?
Jo! Jo! Se liria filloi me lulzue
dhe e ndjej nga Dielli (alegorik) valën.

O kangët që fleni reliktet e mia
q’ende s’keni prekun as një zemër të huej,
vetëm unë me ju po kënaqem si fëmia
unë- djepi juej; ndoshta vorri juej. /KultPlus.com

Revista letrare ‘Orfeu’ boton vëllimin poetik ‘Antologji poetike’

Posted on by Kult Plus

Në vëllimin e parë poetik “Antologji poetike” me poezi të përzgjedhura nga Revista letrare, kulturore, artistike Orfeu – Kosovë, janë përfshirë 35 autorë, prej tyre 23 autorë nga e gjithë hapësira shqiptare dhe diaspora, si dhe 12 autorë të huaj të përkthyer në gjuhën shqipe nga Irma Kurti dhe Angela Kosta.

Poezitë e autorëve janë përzgjedhur nga stafi i redaksisë së Revistës Orfeu: Dibran Fylli, Angela Kosta, Irma Kurti. Poezitë e përfshira në vëllimin e parë të kësaj antologjie janë botuar në Revistën Orfeu që nga numri i parë i daljes së saj pandërprerë deri në numrin 17. Poezitë e përzgjedhura, kryesisht janë lexuar nga lexuesit e rregullt të Orfeut, duke u bazuar në Rubrikën “Postimet më të lexuara” të cilat kanë arritur deri në 750 lexues gjatë një muaji. Pra, stafi redaktues, duke u bazuar në këto të dhëna, me përkushtim ka arritur t’i përzgjedhë poezitë më të lexuara të këtyre autorëve që u paraqitën në Vëllimin e – I – të kësaj Antologjie poetike me autorë kombëtar e ndërkombëtar. Revista letrare, kulturore, artistike Orfeu është e vetmja revistë që publikon krijimet e krijuesve nga e gjithë bota, duke përfshirë edhe krijimet letrare, kulturore e artistike të krijuesve të huaj në cilëndo gjuhë të huaj në rubrikën përkatëse “International Poets”./atsh/ KultPlus.com

Në Borsh zhvillohet edicioni i 7-të i South Outdoor Festival

Posted on by Kult Plus

Në Borsh u zhvillua këtë javë edicioni i VII-të i South Outdoor Festival.

Ministri i Ekonomisë, Kulturës dhe Inovacionit, Blendi Gonxhja u shpreh në një postim në rrjetet sociale se, në këtë festival u diskutua mbi praktikat e qëndrueshme në turizëm, mundësitë e punësimit në turizmin kulturor, promovimin e produkteve lokale dhe artizanatit, ndikimin e turizmit në mjedis dhe komunitet e mbi të gjitha për rolin e të rinjve në promovimin e turizmit të përgjegjshëm.

Turizmi kulturor është rritur me mbi 63%, ndaj dhe mundësitë për punësimin e të rinjve të kualifikuar janë rritur, u shpreh Gonxhja.

Gonxhja nënvizoi se, sitet tona kulturore janë një pasuri e pazëvendësueshme, ku është i rëndësishëm kontributi i çdokujt.

MEKI e rendit ndër prioritetet e saj angazhimin veçanërisht të të rinjve, posaçërisht gjatë sezonit veror ku edhe fluksi i vizitorëve është edhe më i lartë, theksoi ai.

Gonxhja shtoi se, festivalet si South Outdoor Festival, janë një mundësi e shkëlqyer promovuese edhe për punimet artizanale, një tjetër pasuri që po tërheq gjithmonë e më shumë interesin e vizitorëve të huaj.

E pranishme në këtë festival ishte edhe ministrja e Shtetit për Marrëdhëniet me Parlamentin, Bora Muzhaqi.

Në këtë festival u diskutuan tema të rëndësishme.

Temat e paneleve u përqendruan te aktivizmi, rrjetëzimi, miqësitë, por edhe te turizmi i qëndrueshëm, theksoi Muzhaqi.

Ministrja nënvizoi se, bisedat me të rinjtë janë gjithmonë frymëzuese, sidomos me vullnetarët aktivë të “New Vision” që këtë herë drejtuan me sukses shumë nga punët e festivalit South Outdoor.

“Fantastik Borshi që gëlonte nga të rinj nga e gjithë Shqipëria dhe jo vetëm, plot me turistë të huaj që kanë zbuluar bukuritë e vendit tonë”, u shpreh Muzhaqi./atsh/ KultPlus.com

’27 lule nga të cilët rritet liria jonë’, Kurti bën homazhe për të vrarët në masakrën e Tusuzit

Posted on by Kult Plus

Kryeministri Albin Kurti, mëngjesin e së dielës bëri homazhe në qytetin e Prizrenit, për të vrarët në masakrën e Tusuzit.

Ai vendosi kurora me lule te varret e të vrarëve, në nderim dhe përkujtim të martirëve e dëshmorëve të Lagjes së Trimave.

“Martirët dhe dëshmorët e kombit janë në njërën anë dëshmi e qëndresës sonë, e rezistencës së popullit, e atdhedashurisë për të jetuar në liri e në paqe në tokën stërgjyshore, por në anën tjetër janë gjithashtu edhe dëshmi e krimeve të Serbisë, e krimeve të kryera gjatë luftës, ku bëjnë pjesë krimet e luftës, krimet kundër njerëzimit dhe gjenocidi”, tha Kurti.

“27 martirët e Tusuzit, janë sot 27 lule nga të cilët rritet liria jonë dhe gëzohet shteti ynë”, shtoi shefi i qeverisë.

Në këto homazhe, teksa përkujtoi të rënët e masakrës, kryeministri u shpreh se në lapidarin e të rënëve është i skalitur emri i Behar Abdylmexhitit, i cili atë kohë ishte vetëm 17 vjeçar, si dhe Fazile Maqkaj, e cila u dogj e gjallë në karrocën invalidore të saj.

Më tej, kryeministri duke përmendur djegien e mbi 300 shtëpive, dhe dhembjen për vrasjen e 27 civilëve nga forcat armike serbe, që sot janë martirë të kombit, theksoi se nevojitet edhe drejtësia e jo vetëm pavarësia e shtetit.

Teksa foli për këtë masakër, për të cilën vetëm dy persona mbahen në burg dhe katër të tjerë ndiqen, Kurti shtoi se numri i ekzekutorëve dhe urdhërdhënësve është shumë më i madh se kaq, tha Zyra e Kryeministrit në një kumtesë, raporton Klankosova.tv.

Kurti i bëri thirrje Prokurorisë së shtetit që me fuqinë dhe dijeninë e saj të bëjë gjithçka, në mënyrë që të ketë drejtësi ata që mungojnë tash e 25 vite.

Kryeministri tha se drejtësia i mbyllë plagët që kullojnë dhe sjellë paqe të qëndrueshme.

Këngëtari i Disney, Richard M Sherman, vdes në moshën 95-vjeçare

Posted on by Kult Plus

Kompozitori Richard M Sherman, i cili shkroi këngë për klasikët e filmit Disney si Mary Poppins dhe Chitty Chitty Bang Bang, ka vdekur në moshën 95-vjeçare në Beverly Hills.

Sherman bashkëpunoi me vëllain e tij të ndjerë Robert, dhe dyshja fituan dy çmime Oscar në 1965 për punën e tyre në Mary Poppins.

Disa nga këngët më të njohura të vëllezërve përfshijnë “The Jungle Book’s Trust in Me” dhe “Truly Scrumptious” të Chitty Chitty Bang Bang./bbc/KultPlus.com

Kulla e Sahatit në Tiranë, monumenti që po tërheq turistët

Posted on by Kult Plus

Kulla e Sahatit, pjesë e trashëgimisë kulturore është objekti që ka identifikuar Tiranën ndër vite. Bashkë me xhaminë Et’hem Beu, janë konsideruar gjithnjë si “kartolina e kryeqytetit”.

Qendra e Tiranës është në çdo moment të ditës e mbushur me turistë të huaj. Shumica e tyre nuk largohen pa vizituar kullën e sahatit, shkruan abcnews.al.

Pasi ngjitin 92 shkallët, vizitorët qëndrojnë disa minuta në lartësinë e kullës së stilit otoman, ku nuk mungojnë shkrepjet e fotografive, të qendrës së Tiranës dhe ndërtesave të periudhave të ndryshme nga ato osmane siç është xhamia, ministritë e ndërtuara gjatë mbretërisë së Ahmet Zogut, muzeu kombëtar dhe pallati i operas dhe baletit gjatë diktaturës komuniste.

Kulla e sahatit është një nga monumentet kulturore të kategorisë së parë më të rëndësishme të Tiranës dhe simbol i trashëgimisë së vjetër të kryeqytetit. Ajo u ndërtua në vitin 1822 me iniciativë të Haxhi Et’hem Beut nga ndërtues të Tiranës dhe zonës së Gollobordës, të shquar për mjeshtrinë e tyre në ndërtim./KultPlus.com

Doug Ingle vdes në moshën 78-vjeçare

Posted on by Kult Plus

Këngëtari i grupit rock “Iron Butterfly” Doug Ingle, ka vdekur në moshën 78-vjeçare.

Banori i Omahas, Nebraska ishte anëtari i fundit i mbijetuar i formacionit klasik të ‘Iron Butterfly’ që performoi në albumin e tyre të dytë në studio, albumin ‘In-A-Gadda-Da-Vida (1968)’.

“Me zemër të rëndë dhe pikëllim të madh njoftoj ndarjen nga jeta të Atit tim Doug Ingle. Babi ndërroi jetë në mënyrë paqësore të premten në mbrëmje në prani të familjes”, ka shkruar djali i tij, Doug Ingle Jr., në një postim në Facebook, siç raportohet nga Deadline./KultPlus.com

Rama: Nisemi nga Rinasi për vallen e dytë kuqezi në Europë

Posted on by Kult Plus

Kryeministri Edi Rama u nis sot nga aeroporti ndërkombëtar i Rinasit për takimin në Milano me shqiptarët e Italisë, në kuadër të turit me diasporën.

Në një postim në rrjetet sociale, Rama ndau pamje nga përgatitjet që po kryhen në pallatin e sportit “Busto Arsizio”  ku do të zhillohet takimi i orës 11:00.

“Nga Rinasi ku po nisemi për vallen e dytë kuqezi në Europë, me shqiptarët e Italisë që sipas kërkesës së tyre do t’i mikpresim në një pallat sporti edhe më të madh se në Athinë, me shpresën që askush nuk do të mbetet pa gjetur vend siç fatkeqësisht na ndodhi në Greqi”, tha Rama.

Të dielën e 12 majit, Kryeministri Edi Rama nisi turin e takimeve “Krenar për Shqipërinë” me diasporën në Greqi, Athinë.

Turi i takimeve vjen në kuadër të takimit me bashkatdhetarët tanë që jetojnë e punojnë jashtë.

Rama pritet të takohet dhe me shqiptarë që jetojnë e punojnë në Londër, Mbretëri e Bashkuar dhe Dyseldorf, Gjermani./atsh/KultPlus.com

“Bloody Moon” shfaqja e fundit në PITF, sonte ceremonia e çmimeve

Posted on by KultPlus

“Mbretëreshat e klubit të natēs” nga Shqipëria u prezantua në mbrëmjen e së shtunës në kuadër të PITF, ku kjo shfaqje solli historinë e aktorit Aleksander Moisiu, por në një formë krejt ndryshe, duke tentuar të përputhet me realitetin në Shqipëri.

Kurse sonte do jetë nata e fundit e Prishtina International Theater Festival, e cila sjell shfaqjen “Bloody Moon” nga Teatri Kombëtar i Malit të Zi.

Shfaqja “Bloody Moon” do luhet sonte nga ora 19:00 në Teatrin AAB “Faruk Begolli”, ndërsa menjëherë pas saj do ndahen çmimet për këtë edicion të PITF.

Këtë edicion shfaqjet janë duke u vlerësuar nga juria profesionale e përbërë nga: Fatos Berisha, Ana Vukotić dhe Amernis Nokšić, sikurse edhe juria e medieve: Ardianë Pajaziti- KultPlus, Teuta Arifaj – ATV Live dhe Lumira Kelmendi – RTK./ KultPlus.com

“Anora” fiton “Palmën e Artë” në Cannes

Posted on by Kult Plus

Filmi komik “Anora” i regjisorit Sean Bakerit ka marrë çmimin kryesor në Festivalin e Filmit në Cannes, “Palmën e Artë”.

Komedia amerikane flet për një punëtore seksi që martohet me djalin e një oligarku rus.

Bakeri pranoi çmimin bashkë me yllin e filmit, Mikey Madison, në ceremoninë e mbajtur të shtunën.

“Nuk e di se çfarë po ndodh tani”, ka thënë Bakeri pasi doli në skenë. 

Përderisa “Anora” ishte filmi më i vlerësuar i serialit, konsiderohet edhe befasi. Shumë kanë pritur që drama indiane “All We Imagine As Light” ose filmi iranian “The Seed of the Scared Fig” të fitojnë. Të dy këta filma megjithatë morën çmime. 

“All We Imagine as Light” fitoi “Grand Prixin”, çmimin e dytë më të rëndësishëm. Ishte filmi i parë indian që garoi në Cannes në 30 vjet. 

Juria i dedikoi çmim special dramës iraniane “The Seed of the Sacred” të Mohammad Rasouloufit. Pak ditë para premierës së filmit, i përballur me dënimin prej tetë vjetësh burgim, ai u largua nga Irani në këmbë. Filmi i tij përmban pamjet reale nga demonstratat 2022-2023 në Iran dhe flet për shtypjen iraniane në një dramë familjare. Turma e Cannes e përcolli me ovacion të gjatë në këmbë.

Filmi “The Substance” me superyllin Demi More, mori çmimin për skenarin më të mirë. 

U mendua se Moore do ta marrë çmimin për aktoren më të mirë, por ai shkoi për grupin e përbërë nga Karla Sofia Gascon, Zoe Saldana, Selena Gomez dhe Adrian Paz për mjuzikllin “Emilia Perez”. Gasconi, që e pranoi çmimin, është aktorja e parë trans që fitoi çmim të madh në Cannes.

“Emilia Perez” fitoi edhe çmimin e jurisë, duke u bërë ndër filmat e rrallë që marrin dy çmime. 

Çmimin për aktorin më të mirë e mori Jesse Plemons për rolin e Yorgos Lanthimos në “Kinds of Kindness”. 

Regjisori portugez Miguel Gomes mori çmimin për regjinë më të mirë në filmin “Grand Tour”.

Çmimi për “Kamerën e Artë” shkoi për filmin “Armand”.

Gjatë ceremonisë, u nderuan me çmime edhe Meryl Streep e Studio Ghibli./tema/KultPlus.com

Fluks turistësh në Kalanë e Gjirokastrës, mbi 50 mijë vizitorë 5 muajt e parë të vitit

Posted on by Kult Plus

Kalaja e Gjirokastrës, falë vlerave historike dhe arkitektonike që mbart vazhdon të ngelet monumenti më i preferuar për t’u vizituar nga grupet turistike vendase dhe të huaja përgjatë guidave dhe udhëtimeve të tyre në qytetin e gurtë.

Drejtoria Rajonale e Trashëgimisë Kulturore Gjirokastër bën të ditur sot se “mbi 50 000 vizitorëve vizituan Kalanë e Gjirokastrës për periudhën janar-maj 2024”.

Sipas DRTK Gjirokastër vazhdon rritja e numrit të vizitorëve në Kalanë e Gjirokastrës, ku në periudhën janar-maj pati rreth 50% më shumë se në të njëjtën periudhë të vitit të kaluar.

Të mrekulluar nga çfarë ofron Gjirokastra, turistët vijnë nga vende të ndryshme të botës për të prekur nga afër bukuritë, historinë, traditat e qytetit muze.

Në çdo stinë të vitit kalaja tërheq mijëra vizitorë duke e kthyer atë ne objektin më të vizituar të qytetit të gurtë.

Kalaja e Gjirokastrës  shtrihet në një hapësirë prej 335 metra dhe ndodhet në kodër nga ku shihet gjithë qyteti, si për të dëshmuar historinë e gjithë rajonit në shekuj. Kulmin e historisë së saj e ka pasur në periudhën e Pashallëkut të Janinës, kur Ali Pashë Tepelena do të realizonte një sërë ndërtimesh të reja apo ndërhyrje të tjera, duke i dhënë Kalasë së Gjirokastrës fizionominë arkitektonike dhe ndërtimore që ka sot./atsh/KultPlus.com

Rama: Liqeni i Mbreshtanit në Berat, me pedonale dhe park të ri

Posted on by Kult Plus

Parku i liqenit të Mbreshtanit, 15 minuta larg qendrës së Beratit është një ndër atraksionet më të reja turistike, në liqenin e Mbreshtanit.

Kryeministri Edi Rama ndau sot pamje nga ky park, i cili ofron një bukuri mbresëlënëse falë dhe investimit për rehabilitimin e plotë të tij.

“Në mes të mrekullisë së natyrës në Mbreshtan të Beratit, buzë liqenit, ka tashmë një pedonale dhe park që e kanë shndërruar këtë fshat në një destinacion me plot potencial turistik”, shkroi Rama.

Qytetarët dhe turistët mund të zgjedhin të kalojnë mëngjeset apo mbrëmjet përreth liqenit.

Projekti për rehabilitimin e tij përfshiu shtimin e gjelbërimit dhe pedonalen e re rreth e përqark, për t’i bërë shëtitjet e qytetarëve edhe më të këndshme./atsh/KultPlus.com

Vështrim pas gjurmëve

Posted on by Kult Plus

Poezi nga Dritëro Agolli

Me lodhi mundimi në shpirt tërë jetën
Ta them lakuriq të vertetën.
Po s’munda ta them ngaherë të plotë,
Se ishte zuskë kjo bote.
Tani më vjen keq për aq sa gënjeva,
Megjithëse gënjyen dhe Adami dhe Eva
Të parët genjeshtarë të mjerë
Dhe kjo me jep ngushellim herë-herë. /KultPlus.com

Ulqin, përurohen veprat folklorike “Balada Popullore të Shqiptarëve në Malin e Zi”

Posted on by Kult Plus

Në Ulqin u përuruan dy veprat e njohura të studiuesit Ismail Doda “Balada Popullore të shqiptarëve në Malin e Zi”, të cilat vlerësohen si krijimet popullore më interesante në folklorin shqiptar.

Studiuesi Agron Xhagolli, vuri në dukje, rëndësinë e regjistrimit të baladave ndër shqiptarët në Malin e Zi që, sipas tij, paraqesin një punë studimore në nivel përgjithësues.

“Dr.Doda si njohës i mirë i të folurës së shqiptarëve që jetojnë në Malin e Zi ka ditur që me kujdes dhe vëmendje të regjistrojë si një mbledhës serioz lëndën folklorike duke respektuar parimin fonetik. Vlerat e këtij botimi nuk kanë të bëjnë vetëm me cilësinë dhe vlerat e baladave të përfshira. Lënda e renditur është e përfshirë në dy ndarje të mëdha: balada legjendare dhe balada realiste dhe me grupime të shumët brenda tyre “, tha zoti Xhagolli.

Analisti dhe kritiku i artit, Qazim Muja këto balada i quan vepra të artit, jo vetëm për shqiptarët në rajon, por për tërë njerëzimin me një funksion të veçantë letrarë dhe artistik, të cilat, siç tha ai, duhet të ruhen dhe të mbrohen në mënyrë të veçantë.

“Poezia popullore, qoftë ajo epike apo lirike meriton vëmendje të veçantë për shkak të karakterit të veçantë. Ajo historikisht është më e rrezikuar karshi ndryshimeve dhe zhdukjeve. Në fakt ajo nuk shfaqet gjithmonë dhe gjithkund, nuk gjendet tek të gjitha kombet, por vetëm tek disa popuj siç është rasti i tej theksuar në letërsinë popullit tonë dhe për ruajtjen e mirëmbajtjen e saj kërkohen kushte të veçanta socio historike”, tha zot Muja.

Në këtë kuadër zoti Xhagolli, vuri në dukje, rëndësinë e këtyre veprave, të cilat do të jenë një ndihmesë dokumentuese për folkloristikën shqiptare.

“Vëllimi i baladave është një ndihmesë dokumentuese për folkloristikën shqiptare në përgjithësi. Bibliotekat tona me botimin e këtij vëllimi do të pasurohen me një vlerë të cilësuar me shumë interes,” tha studiuesi Xhagolli.

Studiuesi dhe mbledhësi i folklorit Ismail Doda përkujtoj punën e gjatë dhe të mundimshme si në shkollimin ashtu edhe në mbledhjen e lëndës folklorike (INC)

“I takoj asaj gjenerate të dënuar që nuk guxonim të mësonim në gjuhën shqipe dhe kur janë pjekur kushtet unë u ktheva në vendin tim si bleta dhe duke studiuar në Prishtinë”, tha autori Doada

Studiuesit vlerësojnë se këto botime janë vepra unike që hyjnë në fondin e veçantë të folklorit të popullit shqiptar, shprehur në të folmen e gegërishtes dhe si të tilla fitojnë përjetësinë në antropologjinë kulturore shqiptare./VOA/KultPlus.com

Heidegger: Fati juaj nuk mund të ndryshohet, por mund të sfidohet

Posted on by Kult Plus

Martin Heidegger lindi në Messkirch, në një familje të borgjezisë së ulët e në gjendje të mirë ekonomike, gjë që i mundësoi shkollim solid në universitetin e Freiburg-ut ku kreu teologjine dhe filozofinë, ndoqi mësime të matematikës, të shkencave natyrore si dhe histori, shkruan KultPlus.

Emërohet profesor dhe më 1927 shkruan veprën kryesore « Qenia dhe koha » (Sein und Zeit). Gjatë vitit 1933, kyqet në krahun e social-nacionalistëve mirëpo pas disa muajsh tërhiqet dhe për shkak të kësaj, i ndalohen tekstet dhe mësimdhënia.

Nga kjo kohë, ai do të kthehet në univerzitet vetëm pas luftës, më saktësisht, në vitin 1950/51. Heidegger është themeluesi i egzistencializmit e filozofia e tij, i ka themelet e veta në çështjen e qenies e këtu nën « qenie » nuk bëhet fjalë për njeriun si që mendohej gjer vonë por për të qenunit – jam – egzistencë, që edhe është epiqendra e persiatjeve dhe platformës filozofike të tij.

Kur flet për fatin, filozofi gjerman thotë: “Fati juaj nuk mund të ndryshohet, por mund të sfidohet”. /KultPlus.com

95 vite më parë lindi Miles Davis, artisti që bëri histori në muzikën xhaz

Posted on by Kult Plus

Miles Davis ka qenë kompozitor i shquar i muzikës xhaz. Ai është konsideruar si një nga figurat me më së shumti ndikim në historinë e xhazit në shekullin 20, shkruan KultPlus.

Vitet 50 kanë qenë shumë të suksesshme për të. Me albumin “Kind of blue”, ai arriti t’i shesë 5 milionë kopje në ShBA.

Davis ndihmoi në ngjalljen e popullaritetit të muzikës xhaz. /KultPlus.com