Koncerti Inaugurues i Operës së Kosovës mbrëmë solli magjinë operistike të nivelit botëror

Era Berisha

Interpretimi i Orkestrës së Filharmonisë së Kosovës, Korit të Filharmonisë së Kosovës dhe Baletit Kombëtar të Kosovës, mbrëmë nëpërmjet veprave operistike kombëtare dhe atyre botërore, duke përfshirë këtu ariet, koralet, uverturat dhe duetet e ndryshme, erdhi me inkuadrimin e sopranos Adelina Paloja, baritonit Armando Likaj, sopranos Arta Jasharit, sopranos Besa Llugiqit, mezzosopranos Flaka Gorancit, sopranos Kaltrina Miftarit, tenorit Liridon Sadriut dhe sopranos Zana Abazit, të cilët ndezën skenën si yje ndriçuese që po shpërthenin në secilën sekondë, prej momentit kur ora shënoi 19:10, shkruan KultPlus.

Koncerti inaugurues i Institucionit të Operës së Kosovës, i titulluar si “Opera Gala” portretizoi një literaturë operistike që fillimisht mbrëmë Orkestra e Filharmonisë së Kosovës, shënoi nisjen e këtij koncerti të magjishëm me veprën e kompozitorit të njohur Rauf Dhomi, ‘Goca e Kaçanikut’, nën dirigjimin e Edon Ramadanit, për të vazhduar me interpretimin e veprave të kompozitorëve botërorë si: Gaetano Donizetti, Giuseppe Verdi, Wolfgang A.Mozart, Charles Gounod, Giacomo Puccini dhe Georges Bizet, nën dirigjimin e Edon Ramadanit dhe Leonardo Quadrinit, ku krahas tyre nuk mungoi as edhe vepra e mirënjohur e kompozitorit Prenk Jakova “Mrika”, duke sjellë kështu vepra të cilat fuqishëm buronin nga zëri unik i performuesve të njëpasnjëshëm e hynin thellë brenda të pranishmëve për ti futur ata brenda fuqisë mbinatyrore të struktur në çdo melodi e tingull.

Para se koncerti të fillonte, të pranishmit ngadalë po mbushnin vendet e tyre të rezervuara përballë skenës në Sallën e Sportit në Pallatin e Rinisë dhe Sportit, e që kësaj radhe kjo sallë kishte marrë një formë krejtësisht ndryshe. Perdet e zeza e të lëshuara përgjatë gjithë hapësirës, reflektorët që gjithmonë ndërronin ngjyrën sipas programit, karriget blu, imazhet e shfaqura në sfondin mbrapa Orkestrës, podiumet, dritat e ngrohta e të ndezura, lulet e vendosura përgjatë skenës që rrethonte vendin ku Baleti Kombëtar do të performonte, instrumentet diversive që ishin të shtrira në karriget e vendosura për performuesit e të cilat posedonin një hijeshi të paparë kur heshtja kaplonte kohën, si dhe instrumenti i bukur ‘Harpa’ që dallohej dukshëm, ishin këto specifika që krijuan një atmosferë ku perfeksionimi kishte gjetur shtëpinë e përhershme të tij.

Ndërlidhja e dy institucioneve si ajo e Operës së Kosovës dhe Baletit Kombëtar të Kosovës, ishte diçka aq e përsosur dhe e mistershme, saqë ajo fuqi që arti operistik e i vallëzimit e posedon në një frymë të vetme, do të përshkruhej pothuajse si një ëndërr e pashpjegueshme, në të cilën njeriu përhumbet dhe rrezikon nga mos dalja e saj. Një ëndërr si kjo e jo nga ato të zakonshmet, erdhi posaçërisht nga kjo ndërlidhje që solli ngrohtësinë, paqen, krenarinë dhe lumturinë në një koncert të vetëm.

Në skenë, të veshur me të zeza ishin instrumentistët e Orkestrës së Filharmonisë së Kosovës të cilët së bashku me instrumentet si: violina, viola, violonçeli, kontrabasi, flauti, obo, klarineta, fagoti, korno, trumbeta, tromboni, tuba, timpani e perkusionet, përgjatë gjithë koncertit, pa ndalur, sollën interpretime të vazhdueshme të cilat i përngjanin atyre të nivelit botëror. Krahas kësaj Orkestre, ishte zëri i Korit të Filharmonisë së Kosovës, ai që plotësoi pjesën e fundit të një mozaiku operistik. Një mozaik ky tejet magjepsës që shpalosi vokalin unik të Korit dhe muzikën e veçantë mes të instrumentistëve që po performonin me një dëshirë të zjarrtë që nuk po mbaronte dot.

Në ndërkohë, veprat si: “Luicia di Lammermoor”, “La Traviata”, “Dasma e Figaros”, “Romeo et Juliette”, “Madama Butterfly”, “Dasma Arbëreshe”, “Nabucco” dhe “Carmen”, nën interpretimin e sopranove si: Besa Llugiqi, Adelina Paloja, Kaltrina Miftari, Zana Abazi Ramadani, Arta Jashari, Elona Sadiku, mezzosopranove Flaka Gorancit dhe Teuta Kurtit, tenorit Liridon Sadriu si dhe baritonit Armando Likaj, dëshmuan se porsi veshjet e tyre plot elegancë, mbrëmë vokalet e tyre po aq elegant, shpërthyen furishëm përmes teknikave mjeshtërore e lëvizjeve skenike, duke rrëmbyer zemrën e të pranishmëve, duartrokitjet dhe brohoritjet e së cilëve dëgjoheshin ende pa mbaruar veprat.

Për të treguar më shumë rreth krijimit të vendit më të mirë të mundshëm për Operën e Kosovës, për KultPlus foli kryeministri Albin Kurti.

“Sonte u dëshmua se ne kemi përmbajtje, kemi substancë, i kemi talentët tonë që kanë bërë shumë punë, kemi organizim të jashtëzakonshëm që erdhi deri te kjo mbrëmje historike për kulturën dhe artin tonë, meqenëse opera është shumë e vështirë, e këta ia kanë dalë fort mirë”, ka thënë ai.

Sipas tij, ky art i lartë e do edhe një infrastrukturë adekuate dhe se ata pa humbur kohë do të bëjnë hulumtimet për vendin me të mirë të mundshëm dhe gjithashtu për karakteristikat e nevojshme.

“Pra, meqë jemi në përfundim të këtij viti, pa dyshim që vitin e ardhshëm do të fillojmë përgatitjet ashtu që sa më parë të krijojmë kushtet për atë që dëshmuam sonte se nuk ngelim prapa vendeve të rajonit e mbase edhe më gjerë se kaq”, ka thënë Kurti.

Ndërsa, për të treguar për përshtypjet e tij rreth koncertit dhe procesin e provave, për KultPlus foli ushtruesi i detyrës së Drejtorit në Baletin Kombëtar të Kosovës, Niki Musolli.

“Jam shumë i lumtur që çdo ka shkuar sipas planit sepse ne e patëm premierën tonë para një jave e disa ditë e ka qenë goxha problematike, çështja e agjendës por për fat të mirë që është shtyrë në këtë datë dhe kemi pasur mundësi të përgatisim pjesën nga shfaqja ‘Karmen’ si dhe valësin në fund që është dashur të adaptohet nga shfaqja ‘Pushimi i Kalorësve’ me muzikë të Verdit nga Orkestra këtu”, thotë ai.

Sipas tij, provat janë mbajtur në sallën e tyre e të cilat kanë vazhduar deri në ditën e premte. Por, kjo punë e dy institucioneve, ishte tejet e madhe.

“Dy pjesët janë pjesë shumë shumë të bukura dhe janë bota komplet ndryshe nga njëra-tjetra dhe besoj se publikut i ka pëlqyer shumë”, përfundon Musolli.

Po ashtu, dirigjenti Edon Ramadani për KultPlus tregoi se si kapacitetet e të gjithë pjesëmarrësve u treguan sonte, por që të njëjtat janë treguar edhe shumë më herët.

“Ka qenë një organizim i madh duke pasur parasysh se vetëm në skenë kanë qenë rreth 120 muzicientë duke përfshirë Korin dhe Orkestrën, pastaj natyrisht dhe Baleti i Kosovës i cili e zbukuroi tërë këtë organizim e po ashtu edhe në prapaskenë ka qenë një ekip i madh i cili ka punuar për tërë këtë projekt. Kjo nuk është hera e parë që ne realisht po dëshmojmë se mundemi të fillojmë një Operë e punimin e shfaqjes operistike sepse ato janë bërë edhe më herët prandaj tani është momenti që të kemi objektet tona kur ne do të mund të ushtronim veprimtarinë tonë dhe të fillojmë me shfaqjet operistike”, thotë Ramadani.

Sipas tij, kapacitetet u treguan edhe sonte e janë treguar edhe shumë më herët.

“Pas disa vitesh, unë besoj shumë që do të kemi mundësinë që ti kemi dy Orkestra të plota, dy Kore të plota, të cilat do të mund të funksionin edhe në mënyrë të pavarur pa problem. Ishte një program operistik meqenëse ishte festimi i inaugurimit të Operës së Kosovës e veçoria e këtij programi ishte repertori tejet i larmishëm”, përfundon ai.

Kurse, mezzosporanoja Flaka Goranci për KultPlus ka thënë se për të ka qenë një ndjenjë e veçantë këndimi për inaugurimin e institucionit të Operës të Kosovës.

Sipas saj, kjo mbrëmje arrin të krahasohet me koncerte shumë me të mëdha që zhvillohen në vende të tjera dhe të tilla që marrin epitetin si gala-koncerte.

“Mendoj që tash na pret një punë mjaft e madhe. Ne kemi parë që kemi gjithë trupën për të krijuar një shtëpi të operës dhe mendoj se patjetër do të jetë punë e madhe e Qeverisë për të arritur të ndërtojë shtëpinë, një objekt si secili institucion që e ka shtëpinë e tij”, ka thënë ajo.

Opera e Kosovës e solli këtë koncert në bashkëpunim me Filharmoninë e Kosovës.

Fotografitë: Majlinda Hoxha & Arben Llapashtica / KultPlus.com

“Tanzminiaturen & Tangata”, premiera e dytë e Baletit Kombëtar të Kosovës për këtë vit

Baleti Kombëtar i Kosovës së shpejti shfaq premierën e dytë për vitin 2021 të titulluar: “Tanzminiaturen” dhe “Tangata”, përcjell KultPlus.

Premiera “Tanzminiaturen” dhe “Tangata” vjen nën koreografinë e Ricardo Fernando dhe asistentes Christine Ceconello, duke u shoqëruar nga meloditë e muzikës së J.S.Bach dhe Astor Piazzollës.

Ndërsa, kostumet janë realizuar nga Ricardo Fernando e po ashtu edhe dizajni i ndriçimit dhe skenografisë.

Premiera shfaqet ditën e enjte në orën 19:00. Kurse, repriza e parë shfaqet të premten duke filluar nga ora 19:00. / KultPlus.com

Ahmet Brahimaj nderohet me pllakatën ‘Post Mortum’ nga shoqata ‘Artal’ në Tetovë

Shoqata ‘Artal’ ka nderuar ish-drejtorin e Baletit Kombëtar të Kosovës, Ahmet Brahimaj me pllakatën ‘Post Mortum’, përcjell KultPlus.

Në postimin e Baletit Kombëtar të Kosovës, thuhet se Brahimaj u nderua për ndihmën dhe kontributin e dhënë në realizimin e Festivalit ndërkombëtar “Meridians” në Tetovë.

KultPlus ua sjell njoftimin e plotë:

Ish Drejtori i Baletit Kombëtar të Kosovës – Ahmet Brahimaj u nderua nga Shoqata “Artal” me pllaketën Post Mortum për ndihmën dhe kontributin e dhënë në realizimin e Festivalit ndërkombëtar “Meridians” në Tetovë./KultPlus.com

Çeku: Ahmet Brahimaj mbetet një prej heronjve tanë popullor që i kanë dhënë shpirt vendit tonë

Në një vjetorin e vdekjes së Ahmet Brahimaj, Baleti Kombëtar dha reprizën e shfaqjes “Sisters” ku Ministri Hajrulla Çeku pati nderin t’i ndaj disa fjalë.

Fjalimin e plotë të ministrit e gjeni më poshtë:

“E nderuara zonja Brahimaj,

E nderuara familja Brahimaj,

Balerin dhe miq të Baletit Kombëtar,

Zonja dhe zotërinj,

Shfaqja e natës së sontme iu dedikua të ndjerit Ahmet Brahimaj, një prej figurave kyçe të zhvillimit të baletit në Kosovë, fillimisht si pjesëtar i gjeneratës së parë të baletit dhe më pas si drejtor i institucionit.

Ahmeti, me kontributin e tij jetësor në kulturë, mbetet një prej heronjve tanë popullor që i kanë dhënë shpirt vendit tonë. Ai i takon gjeneratës që e ka mbajtur kulturën gjallë me rezistencë dhe devotshmëri.

E kemi parë edhe në situatë pandemike që pa art dhe kulturë, muzikë dhe vallëzim, jeta është e thatë. Baleti në Kosovë, si medium, është kulmi i disiplinës, kapaciteteve fizike, ekselencës njerëzore.

Gjatë udhëheqjes së tij si drejtor, Baleti Kombëtar ngriti zërin tonë në botë. Trupa e baletit ka bashkëpunuar me shumë koreografë të shquar ndërkombëtarë, performoi anembanë Evropës, por më e rëndësishmja, u ofroi qytetarëve tanë netë të paharrueshme muzikore.

Pa figura si Ahmet Brahimaj, baleti kosovar do të dukej shumë ndryshe. E gjithë kultura kosovare e çmon, dhe i gjithë populli i Kosovës e nderon punën dhe figurën e tij në këtë përvjetor.

Për baletin kosovar, ai e bëri pjesën e tij, bile në mënyrë të jashtëzakonshme. Tani është radha jonë.

Qoftë i përjetshëm kujtimi për Ahmet Brahimajn.” / KultPlus.com

“Entre dos Aguas & Troy Game”, premiera e Baletit Kombëtar të Kosovës që shpërtheu pamëshirshëm

Era Berisha

Performanca e Baletit Kombëtar të Kosovës, mbrëmë jo vetëm që vërtetoi se trupa e baletit është një trupë që hapat, lëvizjet dhe kërcimet e pa para më parë, i sjellin si një trup i vetëm unik, por trupi i tyre shndërrohet në instrumentalin që dëgjohej, në një dukuri hyjnore që shkrihet tërësisht si një vullkan i zjarrtë që shpërthen atëherë kur nuk pritet nga askush dhe depërton furishëm në shpirtin dhe mendjen e secilit, shkruan KultPlus.

Trupa e Baletit të Kosovës mbrëmë ka dhënë premierën e parë për këtë vit të titulluar ”Entre Dos Aguas & Troy Game”, nën koreografinë e Robert North, i cili për shkak të kushteve pandemie nuk ka qenë i pranishëm në rrugëtimin e plotë të shfaqjes, por në vend të tij ishin dy asistentë dhe njëkohësisht koreografë: Lale Balkan dhe Julian Moss.

Në një ndriçim të zbehtë në sallën e Teatrit Kombëtar, të pranishmit dalëngadalë zunë vendet e tyre të distancuar. Teksa, në fytyrat e tyre shihej padurimi për premierën e cila solli një frymë ndryshe të pa identifikuar, nën qetësinë e publikut, ajo se çka dëgjohej ishin vetëm hapat e qetë të balerinëve që po bëheshin gati të dilnin në skenë.

Pas një brohoritje relaksuese të përbashkët nga balerinët, e cila erdhi prapa perdeve por të cilën tashmë jemi mësuar ta dëgjojmë, dritat humbën zbehjen e tyre duke zbritur në nivelin e errësirës që për një moment kaploi sallën dhe kështu perdja filloi të mbështjellët në vendin e saj për t’iu liruar balerinëve të shpalosin pjesën e parë të titulluar ‘Entre Dos Aguas’. E pikërisht si domethënia e saj që do të thotë në mesin e dy ujërave, balerinet vajza nisën hapat nën melodinë e tingujve latin, ku secila nga to kishte kostume të njëjta por me ngjyra të ndryshme se çka shtyu të formohet ideja se ato po kërcenin në një ritëm shumëngjyrësh.

Këtij ylberi latin, që filloi në një ritëm të butë e pothuajse të ngadaltë, surprizoi publikun kur në skenë iu bashkëngjiten edhe balerinët djem të cilët u ngritën nga karriget e tyre duke rritur intensitetin kur dy gjinitë u bashkuan, jo vetëm në një trup të vetëm por edhe në hapa dhe lëvizje të shpejta, për të cilat vështirë ti kapësh me sy por që është lehtësisht ta dashurosh punën madhështore të tyre në stilin flamengo.

Në një ndriçim sa në të kuqe e herë në të kaltër, tempoja e kërcimeve të shumta fizike në ajër kishin kapluar të gjithë sytë e buzëqeshur dhe adhurues të publikut. Po ashtu, në mesin e pjesës së parë herë pas here, nuk munguan as solot e balerinave që treguan një hijeshi të bukur me trupin e tyre duke ndjekur kështu tingujt instrumental spanjoll.

Me përfundimin e pjesës së parë, duartrokitjet dhe brohoritjet e vazhdueshme bënë që të gjithë balerinët të kthehen në skenë edhe një herë për të shijuar këtë moment të veçantë dhe mjaft inkurajues për pjesën e dytë që do të fillonte pas 5 minutave pauzë.

Teksa balerinët djem po bëheshin gati për pjesën e dytë të titulluar ‘Troy Game’, të pranishmit që as për një moment nuk iu ndahej vezullima në sytë e tyre, e shfrytëzuan rastin që të bisedonin me njëri-tjetrin për magjinë, identitetin, për energjinë që kapërceu nga ta e direkt mbi atmosferën e sallës dhe natyrisht për stilin e ri që pjesa e parë solli.

Ndërsa, kur pjesa e dytë nisi, ajo që e befasoi publikun ishin jo vetëm veshjet armatore por edhe fillimi pa asnjë melodi të vetme. Krejt se çka dëgjohej ishin të qeshurat dhe britmat e gjithsej tetë balerinëve të cilët nisën lojën e tyre për të shprehur talentin e secilit mashkull dhe fuqinë e tyre prej ‘burri’, duke e kthyer teknikën e tyre të lëvizjeve të shpejta në një formë të humorit.

Dinamika dhe harmonia e veçantë e lëvizjeve të tyre, e cila më vonë u shoqërua edhe me melodi, pasoi në një luftë të vërtetë të kërcimeve të fuqishme por që njëkohësisht ishin aq të bukura dhe aq të shpejta saqë vështirë të mbahen mend të gjitha nga audienca por që këtë talent balerinët e kanë të futur thellë brenda vetes duke treguar koncentrimin e tyre përderisa fokusi i tyre mbetet sjellja e magjisë unike që vetëm ata dinë ta sjellin në formën e tyre të mrekullueshme.

Dëshmi për këtë ishte edhe momenti kur secili në sallë u ngritë në këmbë dhe duartrokiti vazhdueshëm me një energji të jashtëzakonshme kur balerinët përfunduan aktin e fundit humoristik por tejet të suksesshëm.

Për të shprehur emocionet dhe ndjenjat pas një shfaqje të tillë, në një prononcim për KultPlus, asistenti Julian Moss i cili për herë të parë ishte në Kosovë për realizimin dhe finalizimin e kësaj premiere, e cilësoi këtë si një natë të mrekullueshme.

“Unë mendojë se ishte një natë tepër e mrekullueshme, trupa e baletit performoi në një mënyrë mjaft të mirë dhe shpresoj se audienca është kënaqur shumë gjithashtu. Ishte shumë e mirë sepse trupa e baletit ka përmbushur pritshmëritë e mia, por që gjëja më e rëndësishme është që publiku ta shijojë performancën dhe kur ata të largohen, të largohen duke u ndjerë se kanë parë diçka që është e mirë”, thotë Moss.

Sipas tij, është e këndshme që në një kohë të tillë pandemike, e cila është një kohë shumë e vështirë për të gjithë, ata kanë arritur të kenë një audiencë të vogël të cilët kanë parë një grup kërcimtarësh duke punuar vërtetë shumë dhe kjo për Moss është gjithmonë gjëja më e bukur sepse ai e dashuron teatrin prandaj duke parë trupën duke kërcyer dhe publikun duke e shijuar, nata për të ishte perfekte.

Ai tutje tregon se pikërisht koreografi i njohur Robert North ka lënë një mesazh për natën e mbrëmshme.

“Unë fola me të në telefon sot në mëngjes dhe ai tha: paçi fat dhe ‘break a leg’, që është një shprehje në botën e kërcimit. Por, edhe pse jo prezent, ai ishte këtu me shpirt”, shprehet Moss.

Duke rikujtuar intervistën e mëparshme për KultPlus ku ai është shprehur se ishte duke kërkuar për një diamant i cili është i vrazhdë por që është dashur ta lustrosh deri në shkëlqimin perfekt të tij, Moss pohon se pikërisht e gjithë trupa e baletit po shkëlqenin sonte dhe kjo është gjithmonë e mrekullueshme.

Ndërsa për të treguar më shumë për momentet e veçanta pas një shfaqje të tillë, për KultPlus, ka folur edhe balerini Fatmir Smani.

“Për neve performanca ishte e veçantë në disa aspekte e sidomos për shkak të pandemisë sepse duke pasur parasysh kushtet tona dhe se si është realizuar e gjitha kjo me kufizime dhe distancë, për të cilat jemi munduar ti respektojmë, por që megjithatë profesioni jonë nuk mund ti përballojë të gjitha gjërat sepse normalisht ka qenë rrezikshmëri për neve por që në fund e gjitha kjo ka një vlerë të madhe”, tregon Smani.

Ai tutje tregon se për të ishte një privilegj që luajti në këtë shfaqje e cila ka emër botëror dhe luhet nga trupat më të mëdha të baletit dhe e cila është përgatitur për një muaj e një javë me praninë e koreografëve fantastikë.

“Është kënaqësi e madhe edhe pse me 20% publik, për neve ka qenë si me qenë 200%”, potencon ai.

Sipas tij, performanca e tyre i ka tejkaluar pritshmëritë e publikut sepse në momentin kur e kanë kuptuar se publiku do të jetë vetëm 20%, ata kanë menduar se energjia do të jetë më e zbehtë por përkundrazi energjia ishte aq e madhe saqë të gjitha ulëset e zbrazëta janë përmbushur edhe me energjinë e atyre të cilët nuk ishin prezent.

Repriza e parë e shfaqjes ‘Entre Dos Aguas & Troy Game’, vjen sonte pastaj është menduar një pauzë e shkurtër sepse teatri do të filloj renovimin e shumëpritur. / KultPlus.com

Baleti Kombëtar i Kosovës vjen me premierën e parë për këtë vit, sjell një frymë të re

Dy rryma krejtësisht ndryshe nga njëra-tjetra, do të frymojnë së bashku në premierën e parë për këtë vit nga Baleti Kombëtar i Kosovës, duke shpalosur kështu lëvizje, hapa dhe kërcime fizike të reja në një tempo mjaft të definuar, shkruan KultPlus.

Para disa javëve në Teatrin Kombëtar të Kosovës, kanë filluar provat e trupës së Baletit për premierën e titulluar “Entre dos Aguas” & “Troy Game’’, e realizuar nën koreografinë e Robert North.

Kjo koreografi shpalos dy pjesë krejtësisht të ndryshme nga njëra tjetra, ku në pjesën e parë ‘Entre dos Aguas’, luajnë balerina dhe balerinë dhe kuptimi i saj do të thotë ‘në mesin e dy ujërave’ e cila shpalos dashurinë dhe dijeninë e koreografit North, për kërcimin në stilin flamengo, ndërsa në pjesën e dytë ‘Troy Game’, luhet vetëm me balerinë dhe shpalos dashurinë e koreografit për muzikën dhe ka të bëjë me termin ‘djemtë janë djemë’, duke futur kështu në ‘luftë’, talentin e gjithanshëm të 8 balerinëve në gjithsej 23 minuta të kërcimit.

Pjesa e parë e koreografisë është e realizuar në vitin 1984 në Londër, ndërsa pjesa e dytë është realizuar në vitin 1974, e cila është luajtur edhe nga 15 trupa të mëdha botërore të baletit. E njëra nga këto trupa do të jetë edhe ajo e baletit kombëtar të Kosovës.

Ndërsa se si erdhi bashkëpunimi me koreografin North, na tregon edhe ushtruesi i detyrës së Drejtorit në Baletin Kombëtar të Kosovës, Niki Musolli.

“Bashkëpunimi me koreografin e njohur Robert North ka ardhur nëpërmjet koreografit Mehmet Balkan, ku pikërisht përmes tij ka filluar ky projekt. Prandaj për trupën e baletit është një privilegj i madh që të realizojë dhe performojë veprat e tij’’ thotë Musolli për KultPlus.

Sipas tij, procesi është shumë i ngarkuar sepse të dy pjesët janë shumë specifike në stilin e tyre, edhe në aspektin muzikor dhe në aspektin e lëvizjeve. Në pjesën e parë do të ketë një stil spanjoll kurse pas një ndërprerje 10-15 minutëshe, për ndërrimin e kostumeve dhe shfaqjen e një botë tjetër në pjesën e dytë, e cila përmban lëvizje krejtësisht të ndryshme me një stil të arteve marciale braziliane, japoneze e të tjera.

Ndërsa në pamundësi që vetë koreografi të jetë prezent për shkak të kohës pandemike, ata që po vëzhgojnë gjithë procesin janë asistentët e tij, Julian Moss dhe Lale Balkan. Për të na folur për provat dhe atmosferën para një premiere, për KultPlus tregon edhe vetë Julian.

“Ne kemi pasur një ftesë nga Niki për të sjell punën e Robert North’s këtu, gjë që është shumë emocionuese sepse po ndodh për herë të parë në Kosovë. Procesi ka filluar në një periudhë më pak se një muaj dhe ka shkuar shumë mirë deri tani. Për momentin jemi në një pjesë shumë intensive, pothuajse sikur jemi duke kërkuar për një diamant i cili është i vrazhdë dhe duhesh ta lustrosh deri në shkëlqimin perfekt të tij”, thotë Julian.

Sipas tij, duhet që koreografia të rafinohet para se të shfaqet në skenë së bashku me ndriçimin, kostumet të cilat nisin nga zero e mbërrijnë në performancë. Balerinët janë duke bërë një punë shumë të mirë, por normalisht është gjithmonë e vështirë që balerinët të mësojnë një stil të ri.

“Secila kompani që takon, sjell një identitet të ri, probleme të reja e po ashtu edhe zgjedhje të reja, andaj edhe pse baleti është vendosur, procesi ende evoluon. Është vetë jeta. Prandaj edhe pse pothuajse secili ka një solo për të performuar, është e rëndësishme i gjithë grupi dhe bashkëpunimi i tyre duke kërcyer për të shprehur një lojë ideore, nga e cila është vështirë të mos duash të kërcesh”, përfundon Moss.

Se si po zhvillohen provat për një hapje të re të një stili të veçantë të paemërtuar ende, për KultPlus tregon edhe balerini Sead Vuniqi.

“Jemi shumë mirë me prova, me Lalen nuk hera e parë që po bashkëpunojmë, kurse sa i përket anës tonë jemi shumë të privilegjuar që kemi edhe një asistent si Gulio i cili ka njohuri të të mëdha rreth baletit, i cili vazhdimisht po na korrigjon në mënyrën e ushtrimit të lëvizjeve të reja që i kemi në këtë shfaqje”, thotë Vuniqi.

Sipas tij, shfaqja është shumë e madhe dhe Julian është shumë i përpiktë në punën e tij sepse fokusi është shumë i rëndësishëm, prandaj edhe vrazhdësia e tij në aspektin disiplinor po i ndihmon atyre si balerinë që të ndihen më mirë duke plotësuar kriteret e tij.

“Një tingull ka dy lëvizje prandaj është edhe pak më e vështirë sesa shfaqjet e tjera të realizuara, kur ka kohë për të marrë frymë. Vazhdimisht gjatë gjithë kohës jemi në kontakt me njëri-tjetrin sepse fokusi është më detajizues sesa shfaqjet tjera prandaj edhe mendoj se publikut do ti pëlqejë shumë, duke pasur parasysh se nuk janë mësuar të shohin një stil të tillë”, përfundon Vuniqi.

Premiera e shfaqjes ”Entre dos Aguas” & “Troy Game”, do të vjen më datë 15 prill, por se në cilën mënyrë do të shfaqet dhe a do të ketë publik, ende mbetet e pacaktuar. / Era Berisha / KultPlus.com

Sonte në televizionin francez ‘Baleti Kombëtar i Kosovës’ vallëzon për mbijetesë

Sonte, më 11 mars 2021, në televizionin francez-gjerman Arte jepet kroniak “Aschenputtel Ballerinas” (Balerinat si Hirushja), njofton TV Arte, transmeton KultPlus.

Kronika e titulluar “Baleti Kombëtar i Kosovës vallëzon për mbijetesë” shfaqet me fillim në orën 19:40, transmeton KultPlus.

Po ashtu mund të shikohet edhe në internet.

Teuta Krasniqi jep gjithçka nga vetja edhe në provën e sotme. Baleti i ardhshëm është shumë i rëndësishëm për solisten e Baletit Kombëtar Kosovar, sepse atë e ka kompozuar dhe koreografuar një nga valltarët e trupës.

20 artistët e baletit bëjnë prova në bodrumin e teatrit në Prishtinë. Pavarësisht kushteve të vështira, pagës së dobët dhe mungesës së çdo perspektive, valltarët mendojnë se është një nder i veçantë të jesh pjesë e baletit kombëtar, përcjell albinfo.ch. Përmes artit të tyre ata gjithashtu duan t’u japin bashkatdhetarëve ndjenjën se ia vlen të qëndrojnë në vendin e tyre të varfër dhe të jenë krijues.

“Baleti Kombëtar i Kosovës vallëzon për mbijetesë” përsëritet nga Arte: Më 12 Mars, 2021 në 12:15 pasdite. Zakonisht mund ta gjeni programin në internet pasi të jetë transmetuar në TV.

Viti i prodhimit është 2018, pra bëhet fjalë për reprizë por pasi nuk ka ndryshuar shumë për të mirë, ja vlen të shikohet edhe sot. / KultPlus.com

Baleti Kombëtar i Kosovës zë vend në ballinën e revistës amerikane të arteve

Baleti Kombëtar i Kosovës ka zënë vend në kopertinën e revistës amerikane të arteve në New York, ‘Revista 1212’, shkruan KultPlus.

Lajmi është bërë i ditur nëpërmjet një postimi në faqen zyrtare të Baletit të Kosovës në Facebook.

“Është një nder shumë i madh për Baletin Kombëtar të Kosovës që të paraqitet në kopertinën e revistës amerikane të arteve në New York – Revista 1212.  Faleminderit 1212digital dhe Lee Bradshaë për mbështetjen e ëndrrave tona”, thuhet ndër të tjera në postim./ KultPlus.com

https://www.magcloud.com/browse/issue/1909286?__r=656386&fbclid=IwAR1gDc58SEgDRob1upVj3XGIP5Q7Dl1VIP_8hfvjH3QcMx0ydHXJXJjWO_k

Është një nder shumë i madh për Baletin Kombëtar të Kosovës që të paraqitet në kopertinën e revistës amerikane të arteve…

Posted by Baleti Kombëtar i Kosovës – The National Ballet of Kosovo on Sunday, January 3, 2021

Baleti Kombëtar i Kosovës do të performojë në ngjarjen ndërkombëtare të kulturës

Baleti Kombëtar i Kosovës do të performojë në ngjarjen e madhe artistike me karakter ndërkombëtar, shkruan KultPlus.

Në mesin e baleteve, teatrove, institucioneve të ndryshme kulturore në organizimin “The Nutshell” është edhe emri i Baletit Kombëtar të Kosovës.

Balerinët kosovar do të performojnë për të qenë pjesë e Misteletoe Cast në kuadër të këtij organizimi, e cila do të transmetohet virtualisht në mbarë botën.

Përgjatë datave 25 dhe 26 dhjetor si dhe 1 e 2 janar do të mund të shihen lëvizjet artistike të pjesëtarëve të këtij institucioni publik.

Për më shumë informacione rreth biletave në ditët e performancave: https://www.facebook.com/BaletiKombetariKosoves/posts/4711055295631488 / KultPlus.com

Baleti Kombëtar i Kosovës pjesëmarrës në performancën ndërkombëtare ‘The Nutshell’ (VIDEO)

Me ftesë nga Mannakin Theater and Dance nga San Francisco, Baleti Kombëtar i Kosovës është pjesë e video-performancës me titull “The Nutshell!” së bashku me shumë kompani të Baletit nga vende të ndryshme si New York City, Kina, Gjermania, Egjipti, Nigeria, San Francisco, etj. 

Kjo është një festim i një tradite 75-vjeçare e shfaqjes së baletit “Arrëthyesi” i adaptuar në kushte të pandemisë duke performuar në ambient të hapur dhe mbajtje të maskave, njoftojnë nga Baleti Kombëtar i Kosovës. / KultPlus.com

https://www.facebook.com/BaletiKombetariKosoves/posts/4694841187252899

Sot ka datëlindjen “babai” i baletit në Kosovë, Ahmet Brahimaj

6 dhjetori përveç lindjes së një fëmiu në familjen Brahimaj, do të shënonte edhe lindjen e një personi i cili do të kthehej në ikonë të Baletit Kombëtar të Kosovar, shkruan KultPlus.

Ahmet Brahimaj lindi në fshatin Novosellë të Pejës. Lidhja e tij me baletin filloi që në bankat e shkollës së mesme, atëherë kur vazhdoi shkollimin në Shkup për të hyrë në historinë e gjeneratës së parë të Baletit të Kosovës.

Viti 1972 përveç që u bë koha kur u rikthye në Prishtinë, kjo periudhë shënon edhe kohën e formimit të Ansamblit të Baletit, për t’u gdhendur në kujtesën kulturore të vendit.

Si solist i kësaj trupe, Brahimaj ka qenë aty në çdo shfaqje të asaj kohe, duke jetësuar role në 38 premiera të baletit.

Mirëpo, ai nuk mbeti vetëm solist, në vitin 1985 Brahimaj emërohet Shef i Baletit. Për punën e tij krijuese ai mori shumë lëvdata, si dhe për nder të 48 vjetorit, u dekorua me “Plaketën e Teatrit Popullor Krahinor” (1986), dhe me rastin e 60 vjetorit të Teatrit Kombëtar të Kosovës, është shpërblyer për punën artistike e krijuese.

Veprimtaria e tij kulturore nuk mbetet vetëm me kaq. Pas luftës, së bashku me disa nga kolegët e tij, hapin Shkollën e Mesme të Baletit, në kuadër të shkollës së muzikës “Prenkë Jakova”, në Prishtinë.

Klasa e Ahmet Brahimajt u diplomua në vitin 2005, dhe është gjenerata e parë pas luftës e njëherit edhe bërthama e Baletit të Kosovës. Gjithashtu, Brahimaj ka kontribuar dhe në formulimin e Ligjit të Operës, Filharmonisë dhe Baletit, Ligj I cili është në funksion tani dhe është aprovuar në vitin 2005.

Edhe pas vdekjes së tij në moshën 66 vjeçare, të gjithë kolegët e tij e kujtojnë me mall dhe dashuri për përkushtimin dhe mundin e madh që dha në skenë dhe për skenën.  Shfaqjet në të cilat ai shkëlqeu me rolet e tij janë listë e gjatë, e që përfshijnë “Karmen” (Don Hose), “Romeo e Xhyljeta” (Romeo), “Zhizela dhe Interplay” (Albert), “Era dhe Kolona” (Komandanti), “Piter Pan” (Kryeplaku Indian),” Kopelia” (Prefekti), “Don Kishoti” (Espado), “Halili e Hajria” (Sadiku), “Bolero e Shtrausiana”, “Vallja pranverore”, “Trëndafili I përgjakur” (Luisillo), “Ritme të zgjuara”, “Kënga e Rexhës” (Valleheqësi), “Besa” (Princi), “Balloja e Kadetëve”, “Zef Lush Marku” (Tri hije të vdekjes), “Loja e Sizifit” (Udhëheqësi I), “E bukura More” (Thanasi), “Legjenda mbi ngadhnjimin” (Vdekja), “Mbrëmje baleti”, kurse Hans Fyelltarin te “Fyelltari” dhe te shfaqja “Tranzicion II” ka luajtur pas luftës, në vitin 2001/02.

Vepra e tij do të mbetet e paharruar për jetën kulturore të vendit. / KultPlus.com

Vjosa Osmani: Premiera e baletit ‘Sisters’ ishte thirrje për vëmendje ndaj artistëve

Teksa dje u dha premiera e veprës “Sisters”, e pranishme për të shijuar magjinë që krijuan balerinët e Baletit Kombëtar ishte edhe ushtruesja e detyrës së Presidentit, Vjosa Osmani, shkruan KultPlus.

Osmani ka çmuar lartë këtë shfaqje e cila ishte dedikim për “babain” e Baletit në Kosovë, Ahmet Brahimaj. Ajo e vlerësuar premierën e shfaqjes “Sisters” si një thirrje për vëmendje ndaj artistëve të vendit të cilët veprojnë në sfera të ndryshme kulturore.

KultPlus ua sjell të plotë reagimin e u.d. Presidentes, Vjosa Osmani:

Janë padyshim disa nga ditët më të vështira këto me të cilat po ballafaqohemi, për shkak të pandemisë. Por rikthimi mbrëmë në Teatrin Kombëtar të Kosovës për të parë premieren e baletit ‘Sisters’ ishte shpresëdhënës, frymëzues, por njëkohësisht, një thirrje për vëmendje. Thirrje për vëmendje të shtuar ndaj artistëve tanë, qofshin baletanë, kineastë, kompozitorë, piktorë, skulptorë, regjisorë, të gjithë ata që me mjeshtrinë e talentin e tyre e ngjyrosin jetën, momentet e veçanta, skenën ku ata përformojnë me ngjyra, lëvizje e tinguj shpesh përtej imagjinatës tonë.

E di që fjalët nuk mjaftojnë për të adresuar sfidat e tyre, që për fat të keq janë të shumta, por sonte jam plot fjalë mirënjohjeje ndaj tyre. Sidomos ndaj Baletit Kombëtar të Kosovës, një grup fantastik i vajzave dhe djemve të talentuar, e mbi të gjitha shumë punëtorë, të përkushtuar dhe këmbëngulës, që përkundër sfidave për shkak të kushteve të vështira të punës si dhe sfidat e shkaktuara nga pandemia, sollën në skenë një performancë për çdo lëvdatë. Ju lumtë!

Kjo shfaqje e baletit e dedikuar mjeshtrit të ndjerë, z. Ahmet Brahimaj, është mirënjohje për punën e pashoq të tij për të mbajtur gjallë dhe për të kultivuar baletin në Kosovë. Le të na shërbej në të tjerve si thirrje për këndjellje dhe për vlerësim për punën, kontributin, dhe veprën e gjithë artistëve tanë! / KultPlus.com

Baleti Kombëtar i Kosovës mban nesër konferencë për media

Baleti Kombëtar i Kosovës gjatë ditës së nesërme do të mbajë konferencë për media me rastin e premierës së shfaqjes “Sisters”, shkruan KultPlus.

Konferenca do të mbahet me fillim nga ora 13:00.

“Baleti Kombëtar i Kosovës mban konferencë për media me rastin e Premierës së shfaqjes “Sisters” me koreografi nga Mehmet Balkan. Konferenca mbahet nesër me 02.12.2020 në orën 13:00 në Teatrin Kombëtar të Kosovës”, thuhet në njoftim./ KultPlus.com

Kreshnik Musolli: Baleti Kombëtar i Kosovës, 48 vite histori suksesi

Trupa e Baletit Kombëtar të Kosovës tashmë ka depërtuar në skenën kulturore ndërkombëtare duke mahnitur me çdo shfaqje të realizuar me mjeshtëri.

Trupa është formuar nga Ahmet Brahimaj “Artist i Merituar” në vitin 1972 si Ansambli i Baletit. Ikona legjendare Ahmet Brahimaj shërbeu si Drejtor i Baletit Kombëtar të Kosovës me shumë përkushtim dhe me dashuri, duke lënë pas një trashëgimi madhështore kulturore për Kosovën dhe për gjeneratat në vijim.

Gjenerata e Parë e Baletit të Kosovës përbëhej nga: Ahmet Bahimaj, Abdurrahman Nokshiqi, Gani Loshi, Jonuz Beqiraj, Elez Nikqi, Rrustem Selca, Selajdin Kiqe, Rrustem Bajrami, Hysen Podrimcaku, Esma Mulla, Shqipe Hoxha, Enver Berisha, Shaban Shabanaj, Isa Bajraktari, Gani Shala, Enver Elshani, Sabrije Spahiu, Jashar Berisha dhe Nexhmije Selca. Ato njihen për realizimin e produksioneve me sukses si: “Sokol & Mirusha”, “Halili & Hajria”, “Bolero”, “Legjenda mbi ngadhnjimin”, “Romeo and Juliet”, “Kënga e Rexhës”, “Besa”, “Don Quixote”, “Fyelltari”, “E bukura More”, etj.

Sot Trupa e Baletit Kombëtar të Kosovës drejtohet nga Kreshnik Musolli, i cili shërben si U.D. i Drejtorit të Baletit. Lindur në Prishtinë, Kreshnik Musolli ka përfunduar studimet në regji teatri në Fakultetin e Arteve në Prishtinë në vitin 2013. Karrierën e tij si balerin e filloi në vitin 2007 dhe ka realizuar shumë shfaqe me sukses me balerinët e talentuar të Trupës së Baletit. Në rolin e koreografit Musolli debutoi me shfaqen “Andërr” (2019) me balerinët Sead Buniqi, Sinan Kajtazi dhe Aulona Nuhiu në rolet kryesore. Në baletet e tij, koreografi Kreshnik Musolli shquhet për inovacion, përmbajtje të thellë imagjinare dhe ekspresivitet dramatik.

Identiteti kombëtar i baletit kosovar vazhdon të forcohet dhe prezantohet me dinjitet në mbarë botën nga trupa e baletit, falë përkushtimit dhe punës së balerinëve të përkryer të Baletit Kombëtar të Kosovës, përkatësisht: Aulonë Nuhiu, Abetare Hyseni, Behie Murtezi, Drilon Podrimçaku, Fatmir Smani, Fisnik Smani, Ilir Krasniqi, Jeta Musolli, Kreshnik Musolli, Liridon Mziu, Leonora Rexhepi, Luljeta Ademi, Muhamet Bikliqi, Marigonë Hoxha, Mimoza Bytyqi, Sinan Kajtazi, Nora Gashi, Sead Vuniqi, Vlora Prizreni, Teuta Krasniqi, Vjollca Lugiqi, Besarta Shaljani, Flakarta Qorri, Elmedina Berisha dhe Isa Beg Gjocaj.

Artistët e Baletit Kombëtar të Kosovës kanë krijuar dhe mishëruar personazhe fantastike në rolet e tyre interpretuese, duke krijuar një karakter masiv për imazhin e baletit dhe duke e pasuruar atë me forma dhe stile të reja. Ndër vite, balerinët kombëtarë të Kosovës kanë dhuruar performanca të jashtëzakonshme, që kanë mahnitur dhe entuziazmuar publikun. Trupa e Baletit Kombëtar është prezantuar jashtë Kosovës me këto shfaqe të suksesshme: “Dasma”, “Xhuljeta pa Romeon”, “Ngjyrat e Vallezimit”, “Një Legjendë për dashurinë”, “Newborn-SYN”, dhe “Recomposed”.

Me datën 3 Dhjetor 2020, e enjta, ora 16:00, do shfaqet në Teatrin Kombëtar të Kosovës premiera e dytë e shfaqes shumë të kërkuar “Sisters”, me koreografi nga i mirënjohuri Mehmet Balkan. Shfaqja i dedikohet ikonës legjedare dhe ‘babait” të Baletit Kombëtar, Ahmet Brahimaj.

Intervistë me Kreshnik Musollin, U.D. i Drejtorit të Baletit Kombëtar të Kosovës, Balerin dhe Koreograf

Çfarë do të thotë Skena e Teatrit Kombëtar për ju dhe për gjeneratën tuaj të balerinëve?

Kreshnik Musolli: Skena e Teatrit Kombëtar të Kosoves ka një domëthënie të madhe për ne si gjeneratë e re e Baletit Kombëtar të Kosovës. Aty jemi rritur që nga mosha e re kur kemi filluar të merremi me këtë lloj arti dhe qysh herët kemi pas fat të angazhohemi në shfaqjet e institucionit tonë. Ne ende jemi në pritje të ndërtimit të Teatrit të Operës dhe Baletit ku do të kemi “shtëpinë” tonë pasi që është vështirë të ushtrosh veprimtarinë në objekt të huaj. Poashtu problem për ne është hapësira shumë e vogël si në sallë ashtu edhe në skenë, gjë që ndikon direkt në performancën tonë si balerinë.

Cilat tre shfaqje të trupës së Baletit të Kosovës që kanë qenë më të vlerësuarat dhe pëlqyerat nga publiku?

Kreshnik Musolli: Në përgjithësi të gjitha shfaqjet e Baletit Kombëtar të Kosovës janë vlerësuar shumë si nga publiku vendor poashtu edhe në rajon e Europë në turne e festivale të ndryshme. Një nga shfaqjet më të pëlqyera por edhe më të reprizuara është shfaqja “Dasma” me koreografi nga Mehmet Balkan e cila është realizuar si premierë në vitin 2012 dhe është reprizuar deri në vitin 2017, diku më shumë se 38 herë.

Çfarë konsideroni si të arritura tuaja, me të cilat krenoheni në karrierën tuaj?

Kreshnik Musolli: Balerinët e BKK-së edhe pse në kushte tejet të tmerrshme të punës në sallën e ushtrimeve dhe provave që gjendet në bodrumin e Teatrit Kombëtar, nuk janë ndalur kurrë duke punuar me këmbëngulje e vendosmëri të madhe që të arrihen sukseset që i kemi arritur që nga ri-themelimi pas luftës. Që nga viti 2001 deri më tani janë punuar mbi 50 shfaqje premiera të ndryshme me koreograf nga më shumë se 21 vende të botës duke bërë kështu që institucioni jonë të njihet jo vetëm në vend e rajon por edhe në të gjithë botën. Kjo patjetër që është arritë falë ish-Drejtorit Ahmet Brahimaj i cili është njeriu më meritor për ri-themelimin e Baletit në Kosovë pas luftës.

Poashtu ai e rriti gjithë grupin e balerinëve sikur të ishin fëmijët e tij, të gjithë duke funksionuar si një familje e madhe, kompakte dhe e disiplinuar gjë që ka bërë që të instalohet në mendjen e secilit që vetëm me punë të pandalshme mund të arrihen sukeseset në karrierën tonë pasi që në këtë profesion është shumë e limituar koha që mund të jesh aktiv në skenë. Për fat të keq në muajin Maj të këtij viti Ahmet Brahimaj “Babai” i Baletit të Kosovës u nda nga jeta dhe ne si gjeneratë e re e kemi obligim që të vazhdojmë tutje atë që ai ka nisur duke mos u ndalur asnjëherë me punë e suksese që institucionin tonë ta ngrisim edhe më lart në çdo aspekt.

Së shpejti keni dhe premierën e re me 3 dhejtor, nën koreografinë e të mirënjohurit Mehmet Balkan. Mund të na tregoni për historinë e shfaqjes, dhe elementet që e përbëjnë?

Kreshnik Musolli: Me datën 3 Dhjetor do të kemi premierën e dytë për vitin 2020 me koreografi nga Mehmet Balkan nga Turqia i cili është një emër me renome botërore. Me të kemi filluar bashkëpunimin në vitin 2010 dhe është shfaqja e pestë që e realizojmë së bashku. Shfaqja titullohet “Sisters” dhe ka si temë dy motra të cilat dashurohen në personin e njëjtë dhe pastaj lindin situatat dramatike mes tyre me xhelozi e inate.

Është një shfaqje e jashtëzakonshme e baletit neoklasik me një muzikë të mrekullueshme të kompozuar nga Erim Ardal nga Turqia. Asistente e shfaqjes është Lale Balkan, Kostumet dhe Skenografia janë dizajnuar nga Tayfun Çebi dhe Video që shfaqet si skenografi virtuale në prapavi përmes projektorit nga Ahmet Şeren. Këtë herë është pak sfiduese puna e organizimit të premierës për shkak të pandemisë së COVID-19 ku masat e qeverisë janë që lejohet vetëm 30% e sallës të mbushet me publik, sepse zakonisht jemi detyruar që të fusim karrige shtesë në sallë për shkak të interesimit tejet të madh.

Sa e karakterizon qytetin tuaj arti i baletit apo arti në përgjithësi në lidhje me mbështetjen nga publiku apo instituiconet lokale? Dhe sa të ndërthurur keni qene në aktivitete jashtë Kosovës?

Kreshnik Musolli: Baleti si art është shumë i dashur për popullatën në Prishtinë e në Kosovë dhe interesimi është shumë i madh në çdo premierë e reprizë të shfaqjeve që kemi. Do të duhej të ishte një përkrahje edhe më e madhe nga ana e Ministrisë së Kulturës, Rinisë dhe Sportit për arsye që ne e kemi problem kyç objektin e Teatrit të Operës dhe Baletit, sepse siç e ceka edhe më lart është tejet sfidë e madhe të punohet në kushtet që i kemi momentalisht ku mungon hapësira e duhur, ajrosja e mjaftueshme e drita natyrale të cilat ndikojnë shumë negativisht çdo ditë në performancën dhe shëndetin e balerinëve.

Problem tjetër ose nevojë urgjente e jona është edhe Shkolla Kombëtare të Baletit që ende presim të themelohet. Vetëm përmes kësaj shkolle e cila do të jetë nën ombrellën dhe kontrollën e Baletit Kombëtar të Kosovës, mund të sigurohen e shkollohen gjeneratat e reja të cilat do ta vazhdojnë këtë art në Kosovë në mënyrë të mirëfilltë.

Sa i përket aktiviteteve jashtë vendit, kemi pas fat të marrim pjesë në shumë festivale e turne në shtetet e Ballkanit e Europës si: Shqipëri: Durrës, Tiranë, Vlorë, Elbasan; Maqedoni: Shkup, Tetovë, Manastir, Dibër, Ohër; Bullgari: Pravets, Sveti Vlas, Ruse; Zvicërr: Cyrih; Itali; Villapiana, Altomonte, Crotone, Napoli; Austri: Graz; Gjermani: Berlin, Hamburg; France: Paris; Finlandë: Tampere, Helsinki, Turku, Pori.

A mendoni se keni lënë gjurmë artistike?

Kreshnik Musolli: Padyshim që Baleti Kombëtar i Kosovës ka lënë gjurmë të rëndësishme në artin e kulturën e shtetit tonë duke treguar një nivel tejet të lartë teknik e artistik në secilën paraqitje si në vend ashtu edhe jashtë Kosovës. Shumë herë është emëruar si Institucioni më i suksesshëm kulturor në vend. Kjo është thënë edhe nga secili koreograf që kemi bashkëpunuar për këto vite, ku secili prej tyre ka punuar e punon në vendet më të zhvilluara me Kompani tejet të sukesshme të baletit dhe janë në gjendje të vlerësojnë këtë punë në mënyrën më të drejtë. / KultPlus.com

Premiera “Sisters” e Baletit Kombëtar të Kosovës shfaqet të enjten

Baleti Kombëtar i Kosovës sjell premierën e dytë për këtë vit, nën emërtimin “Sisters”, shkruan KultPlus.

Nën koreografinë e Mehmet Balkan, të enjten duke filluar nga ora 16:00 do të ipet premiera në Teatrin Kombëtar të Kosovës.

Kjo shfaqje do të jetë dedikuar Ahmet Brahimaj, teksa nëpërmjet lëvizjeve trupore do të performojnë balerinët Luljeta Ademi, Vjollca Llugiqi, Jeta Musolli, Sinan Kajtazi, Fatmir Smani, Muhamet Bikliqi, Behie Murtezi, Leonora Rexhepi, Aulonë Nuhiu, Fisnik Smani, Kreshnik Musolli, Drilon Podrimçaku, Marigonë Beha, Sead Vuniqi, Vlora Prizreni, Liridon Mziu, Mërgime Morina, Nora Gashi, Ilir Krasniqi, Flakarta Qorri, Isa Beg Gjocaj, Besarta Shaljani dhe Elmedina Berisha. / KultPlus.com

Salla e Baletit kundërmon rëndë, balerinët e Kosovës bëjnë thirrje për kushte më të mira

Jeta Zymberi

Pa një sallë adekuate për prova dhe pa një Teatër të mirëfilltë të Operës dhe Baletit, balerinët kosovarë po përballen me vështirësi skenike. Mungesa e një Teatri të Operës dhe Baletit ka kohë që konsiderohet “mëkati” i Qeverive që përkundër fjalëve ende nuk kanë arritur të konkretizojnë asgjë.

Kësaj sfide të artistëve, pritet t’i dalë ballë ministrja e Kulturës, Rinisë dhe Sportit, Vlora Dumoshi, shkruan KultPlus.

Por balerinët, deri në pritje të atij momenti, kërkojnë një zgjidhje të shpejtë sepse kushtet në të cilat ata punojnë janë të mjerueshme.

Me gypa që rrjedhin ujë, pa ngrohje adekuate, me xhama të thyer e pa ajër të mjaftueshëm, salla ku balerinët e Kosovës bëjnë provat është shndërruar në një vend gati të pamundur për punë. Kujtojmë që mungesa e ngrohjes së objektit të Teatrit ku shpesh ka munguar furnizimi me naftë, ka sjell edhe deri te anulimi i shfaqjeve.

Pas një pauze të gjatë për shkak të pandemisë Covid-19, ditën e djeshme, balerinët i janë kthyer ambientit të punës, por kushtet me të cilat po përballen i kanë nxitur ata të reagojnë. Përderisa dimri është në prag, artistët janë në panik që përkundër problemeve të tjera, problemi i vjetër, ai i ngrohjes do të u hap telashe.

Kreshnik Musolli, ushtrues detyre i drejtorit të Baletit Kombëtar të Kosovës ka thënë për KultPlus se gjendja e sallës ku ata punojnë është e mjerueshme dhe kjo ndikon direkt në punën e tyre të përditshme.

“Hapësira është shumë e vogël, ajër nuk ka mjaftueshëm pasi që janë vetëm 4 dritare që hapen tepër pak dhe një sistem ventilimi që është i nivelit shumë të dobët. Gjithashtu dyshemeja ka nevojë të rinovohet komplet sipas kritereve që nevojiten për profesionin tonë. Zhveshtoret dhe banjot janë në gjendje të tmerrshme, madje zhveshtorja e meshkujve nuk ka asnjë dritare brenda”, ka treguar kështu në detaje Musolli për problemet e theksuara të kësaj hapësire.

Sipas tij, e gjithë hapësira e tyre brenda Teatrit Kombëtar duhet të ristrukturohet që të jetë adekuate dhe funksionale.

Përkundër kërkesave të tyre të vazhdueshme për intervenim, deri më tani nuk kanë marr ndonjë përgjigje nga institucionet relevante.

“Kemi bërë kërkesë që sa kohë në ministri dhe janë të informuar shumë mirë në hollësi me të gjitha problemet që i kemi në aspektin e infrastrukturës”, ka thënë Musolli.

Balerina Behie Murtezi, është shprehur se salla ku ata ushtrojnë është baza që i mban si balerinë dhe përderisa kushtet në atë sallë janë të mjerueshme, ata nuk ndihen mirë të punojnë aty. Ajo madje theksoi edhe një tjetër problem, atë të erës së keqe që kundërmon aty.

“E kemi pritur me padurim kthimin në prova sepse kjo është baza që na mban neve balerinëve. Por kushtet që i ofron salla padyshim që na bën të mos ndjehemi mirë secili prej neve. Përveç asaj që sheh syri, aty kundërmon edhe një erë shumë e keqe. Do të doja shumë që fokusi i njerëzve kompetent të jetë të paktën në rregullimin e kushteve të sallës së baletit”, ka thënë Murtezi.

Balerinët mbesin me shpresë të një ndërhyrje sa më të shpejt të institucioneve në këtë hapësirë që për profesionin e tyre është jetike. KultPlus.com

Baleti Kombëtar i Kosovës nga java tjetër nis transmetimin online të shfaqjeve

Situata e krijuar nga Covid-19 ka bërë që çdo aktivitet të ndalet, por artistët kanë gjetur forma të ndryshme që të jenë sa më afër publikut, shkruan KultPlus.

Pas Teatrove të Kosovës të cilat kanë filluar transmetimin e shfaqjeve live në Facebook, një veprim të tillë po e ndërmerr edhe Baleti Kombëtar i Kosovës.

Nga java e ardhshme, Baleti Kombëtar i Kosovës do të fillojë transmetimin online të shfaqjeve, çdo të enjte në ora 19:00.

“Pasi që masat për mbrojtjen nga COVID-19 do të vazhdojnë deri në afat të pacaktuar,
Baleti Kombëtar i Kosovës do të filloj nga java e ardhshme transmetimin Online të shfaqjeve çdo të Enjte në orën 19:00, duke filluar nga premiera e fundit dhe në vazhdim premierat paraprake.

Shpresojmë që kjo gjendje do të përfundoj sa më shpejtë që të kthehemi në normalitet dhe të performojmë para publikut tonë të dashur!”, thuhet në njoftim.

“Pushimi i Kalorësve” do të jetë shfaqja e parë që do të transmetohet online, më datë 16 prill në ora 19:00. / KultPlus.com

Baleti Kombëtar i Kosovës anulon shfaqjen “Pushimi i Kalorësve”

Qeveria e Kosovës në një mbledhje urgjente, të mbajtur të mërkurën mbrëma ka marr një sërë masash me qëllim të parandalimit të përhapjes së koronavirusit.

Ndonëse shumë qytetarë deri më tani janë testuar me dyshimet se janë prekur nga koronavirusi, rezultatet kanë treguar se asnjëri prej tyre nuk është infektuar nga ky virus.

Ditë më parë Qeveria e Kosovës ka miratuar edhe Planin e veprimit për gatishmëri dhe reagim për koronavirusin, ndërsa mbi bazë ndau 10 milionë euro për Ministrinë e Shëndetësisë.

Duke u bazuar në këto vendime të Qeverisë së Kosovës, Baleti Kombëtar i Kosovës, ka marrë vendim që të anulon shfaqjen “Pushimi i Kalorësve” dhe të pezulloj aktivitetet e përditshme.

Ky është njoftimi i Baletit Kombëtar të Kosovës:

Në bazë të vendimit të Qeverisë së Republikës së Kosovës më datë 11.03.2020 mbi Masat e reja lidhur me COVID-19

Baleti Kombëtar i Kosovës me keqardhje iu njofton që shfaqja “Pushimi i Kalorësve” anulohet si dhe aktivitetet e përditshme pezullohen deri sa të bëhet dezinfektimi i Sallës së Baletit dhe komplet objektit të Teatrit Kombëtar të Kosovës.

Faleminderit për mirëkuptim! / KultPlus.com

“Pushimi i kalorësve” solli mbrëmë në skenë luftë, dashuri e intriga

 

Xhemile Hysenaj

Baletit Kombëtar i Kosovës mbrëmë dha shfaqjen e parë për këtë vit të titulluar ‘Pushimi i kalorësve’, nën koreografinë e balerinës dhe koreografes së mirënjohur Natalia Osipova, shkruan KultPlus.

Në Teatrin Kombëtar të Kosovës, balerinët zunë skenën për të shpalosur një ngjarje që në vete përmbante ndodhi të shumta.

Ngjarja zinte vend në një fshat të vogël austriak, ku dy shoqe ishin të dashuruara me një kalorës të pashëm, i cili herë pëlqen njërën dhe herë tjetrën. Dy shoqe të cilat luftuan pothuajse gjatë gjithë kohës me njëra tjetrën për të fituar dashurinë e kalorësit.

Kalorësi arrestohet dhe në ndërkohë të gjithë kalorësit tjerë kërkojnë dashurinë e njërës nga dy shoqet që dashuronin atë, nuk shkon gjatë dhe ai martohet më në fund me atë tek e cila qysh në fillim vërehej se e dashuronte pak më shumë.

‘Pushimi i kalorësve’ si një balet klasik i zhanrit të komedisë, i cili gjatë gjithë kohës mbante publikun në emocion me ngjarjet e njëpasnjëshme që ndodhnin sa hap e mbyllë sytë, shpalosi para publikut luftë e dashuri, intriga e lajka, e që në fund të gjitha përfundonin me të qeshura e zbavitje.

Koreografja e shfaqjes Natalia Osipova, tregoi për KultPlus se edhe pse nuk është hera e parë që punon me trupën e Baletit Kombëtar të Kosovës, për të ka qenë një eksperiencë mjaft e mirë të punojë edhe këtë herë me ta.

‘’Duartrokitjet janë nota më e mirë që unë mund të marr në karrierë dhe poashtu jam shumë e kënaqur me trupën e Baletit Kombëtar pasiqë për një kohë shumë të shkurtë ata kanë bërë një punë shumë të madhe”, potencoi Osipova për KultPlus.

Behie Murtezi, njëra nga balerinat, për KultPlus tregonte se përjetoi emocione të mëdha gjatë shfaqjes dhe pas saj, dhe poashtu u shpreh tejet e kënaqur që edhe njëherë pati rastin të punojë me koreografen e mirënjohur Osipova.

“Kjo është shfaqja ime e parë pas një viti e gjysmë pauzë dhe të marrësh aq shumë duartrokitje nga publiku ka qenë një ndjenjë e jashtëzakonshme”, tha Murtezi për KultPlus.

Ndërsa Vjollca Llugiqi e konsideronte punën e koreografes si një punë madhështore, ndërsa tregoi për KultPlus se përjetoi emocione të mëdha në këtë shfaqje që ishte edhe premiera e parë e këtij viti.

‘Pushimi i kalorësve’ la mbresa të mëdha tek publiku, i cili me minuta të tërë vazhduan me duartrokitje e brohoritje pas përfundimit të shfaqjes.

Repriza e ‘Pushimi i kalorësve’ pritet të shfaqet sonte në Teatrin Kombëtar, duke filluar nga ora 20:00. / KultPlus.com

Baleti Kombëtar i Kosovë me katër shfaqje për muajin mars

Baleti Kombëtar i Kosovës do t’i shfaq katër shfaqje gjatë muajit mars, shkruan KultPlus.com

Siç duket Baleti Kombëtar i Kosovës edhe muajin mars do të ketë një aktivitet të konsiderueshëm. Ky institucion përmes një postimi në Facebook, Baleti Kombëtar i Kosovës ka publikuar shfaqjet dhe oraret e tyre, të cilat janë si vijon:

05.03.2020 – Shfaqja “Pushimi i Kalorësve”
Koreografia: Natalia Osipova
Premiera

06.03.2020 – Shfaqja “Pushimi i Kalorësve”
Koreografia: Natalia Osipova
Repriza e parë

12.03.2020 – Shfaqja “Pushimi i Kalorësve”
Koreografia: Natalia Osipova

26.03.2020 – Shfaqja “Exil”
Koreografia: Eno Peçi

/KultPlus.com

Nën koreografinë e Osipovas do të shfaqet premiera “Pushimi i kalorësve”

Bujar Meholli

Baleti Kombëtar i Kosovës do të jep javën e ardhshme premierën e shfaqjes “Pushimi i kalorësve” nën koreografinë e ruses Natalia Osipova, shkruan KultPlus.

Provat për këtë premierë kanë filluar me datën 12 shkurt, ndërsa premiera do të shfaqet javën e ardhshme me datën 5 mars.

Koreografja Osipova për KultPlusin ka shpalosur subjektin e kësaj shfaqje. Ajo shprehet e lumtur për ftesën që është bërë teksa thekson se bashkëpunimi me balerinët kosovarë është mjaft i frytshëm.

“Është shfaqja e tretë në Kosovë, dhe më pëlqen shumë të punoj me këtë ekip për ta shfaqur baletin klasik dhe neomodern, dhe për t’u kthyer te viti 1860 me një kombinim të baletit klasik dhe neoklasik”, thotë ajo.

“Historia është komedi, personazhet janë kalorës që rrinë në një pyll të një fshati austro-hungarez dhe në atë pushim që bëjnë ka plot pasazhe komike që ndodhin gjatë shfaqjes pasi që kalorësia ndalon aty për t’u pushtuar më pas nga dashuria e vashave të atij vendi”, tregon koregrafja.

“Historia zhvillohet në një fshat të Austro-Hungarisë së asaj kohe, meqë jam në Kosovë kam dëshirë të bëjë lëvizje folklorike dhe t’i përshtatem karakterit tuaj.”

E pyetur nëse do të vinte përsëri në Kosovë ajo shprehet se “nëse më ftojnë prapë do të vijë me shumë kënaqësi, sepse ky ekip ka potencial që të bëjë krijime të tilla”, thekson ajo.

“Në secilin vend nuk janë ekipet e njëjta dhe secili balerinë dallon nga tjetri, edhe këtu janë balerinët e talentuar dhe ka secili personalitetin e vet, andaj unë përpiqem që ta shfrytëzojë secilin personalitet të secilit artist”.

Andaj, “Buzëqeshni më shumë”, përfundoi koreografja Osipova.

Kreshnik Musolli, ushtrues i detyrës së drejtorit të BKK-së për KultPlus, tregon detajet e kësaj shfaqjeje, e cila njëherit është para për vitin 2020.

“Provat kanë filluar me 12 shkurt dhe kemi pasur vetëm 3 javë kohë që është rekord sepse zakonisht ne e kemi një muaj si kohë standarde për t’u përgatitur. Premiera do të jetë të enjten si zakonisht, është një proces pune intensiv që po vazhdon”, thekson ai.

“Sot kemi dalë në provat e para për vendosjen në hapësirë, pastaj vjen dekori në mënyrë që mos të jetë diçka statike”.

Musolli tutje tregon interesimin për dy shfaqjet e kaluara derisa për shfaqjen e radhës pret interesim edhe më të madh nga publiku.

“Është premiera e tretë që e realizojmë, dy të parat që i kemi realizuar janë kërkuar shumë nga publiku. Kjo shfaqje zgjat 51 minuta dhe e sjell një frymë të re tek ne, sepse kemi pasur shfaqje më serioze, kurse kjo sjell humor dhe besoj që do të ketë sukses të madh”, shprehet Musolli.

“Premiera e radhës do të jetë më 14 maj me Blenard Azizajn që vepron në Berlin, ai do të sjellë një shfaqje moderne, kurse ne do të bashkëpunojmë për herë të parë me të, e po ashtu do të vazhdojmë në nëntor me premierën e fundit me koreografin turk Mehmet Balkan”, bën me dije ai.

Interesimi për shfaqjen “Pushimi i kalorësve” pritet të jetë mjaft i madh. /KultPlus.com

Eno Peçi një ditë para premierës, i fascinuar me profesionalizmin e balerinëve, i tmerruar me kushtet ku punojnë

Bujar Meholli

Premiera e shfaqjes së balerinit dhe koreografit të njohur Eno Peçi “Exil” do të shpaloset nesër, dhe për të folur rreth saj sot është mbajtur një konferencë për medie në ambientet e Teatrit Kombëtar të Kosovës, shkruan KultPlus.

Situata socio-ekonomike në vendin tonë është mjaft e rënduar dhe kohët e fundit kemi qenë dëshmitarë të braktisjeve të mëdha të vendit, kryesisht nga të rinjtë, dhe me synimin e njëjtë, një perspektivë në vendet tjera.

Dukuritë negative u kanë shërbyer artistëve për t’i përdorur në veprat e tyre artistike, në mënyrë që t’i sensibilizojnë njerëzit që të përballen me problemet deri në zgjidhjen e tyre.

Në skenën e Teatrit Kombëtar së fundmi ka zbarkuar balerini dhe koreografi i njohur nga Shqipëria Eno Peçi i cili ka kohë që jeton dhe vepron në Vjenë, ndërsa lëviz nëpër teatrot më të njohura botërore me shfaqjet e tij.

Qëndrimi në Kosovë për të është eksperiencë e veçantë, sikurse edhe për balerinët të cilët kanë pasur rastin të mësojnë dhe të bashkëpunojnë me të.

Në konferencën e sotme përveç Peçit ishin prezent edhe tre balerinë të cilët folën para audiencës për shfaqjen dhe bashkëpunimin me koreografin Peçi.

Ushtruesi i detyrës së Drejtorit të BKK-së Kreshnik Musolli hapi konferencën duke dhënë disa detaje për shfaqjen, teksa falënderoi bashkëpunëtorët për realizimin e “Exilit”. Pastaj prezantoi autorin Peçi, i cili e tregoi në pika të shkurtra historinë e shfaqjes.

“Shfaqja quhet ‘Exil’, dhe historia bazohet në vitet ’97 dhe ‘98 në ngjarjet që kanë ndodhur në Shqipëri. Por kjo nuk është autobiografia ime.

Janë dy familje të ndryshme me probleme për shkak të situatës socio-politike, janë shqetësimet dhe përpjekjet për t’i dërguar fëmijët diku tjetër ku kanë një të ardhme më të mirë” shpjegoi ai.

“Bashkëpunimi me balerinët kosovarë ka qenë fantastik, për ftesën që më bëri Teatri unë zgjodha “Exilin” sepse është diçka që u përket të gjithë shqiptarëve anembanë botës, pavarësisht se unë për bazë kam marrë vitet ’97 dhe ‘98, periudha kur kam lënë Shqipërinë. Prandaj mendova se kjo pjesë do t’i përshtatet shumë Baletit të Kosovës”, tha ai.

Duke folur për kualitetin e shfaqjes, ai u shpreh se kanë punuar aq shumë, saqë s’mund të merret me mend.

“Kemi punuar nga mëngjesi në darkë duke bërë një punë të jashtëzakonshme dhe të përkushtuar. Unë lëviz nëpër shumë teatro nëpër botë, por jam mahnitur nga puna e këtyre balerinëve dhe nga ky proces ata kanë arritur një kualitet që krahasohet padiskutim me teatrot tjera të botës dhe me kënaqësi do të merrja edhe një ofertë tjetër për të bashkëpunuar me këta balerinë”, tha ai.

I pyetur për kushtet në të cilat kanë bërë prova dhe kanë punuar, ai shprehu indinjatën e tij.

“Kushtet janë të mjerueshme, dhe është vështirë të punohet kështu. Si balerinë ne duhet të ushtrohemi gjatë tërë ditës, e kemi procesin e punës sonë që është mjaft i komplikuar dhe kushtet e mira janë të domosdoshme për një balerin”, potencoi ai, duke marrë shembull një rast kur balerinët ishin veshur me xhupa për shkak të ftohtit të madh që mbretëronte në Teatër.

“Në ditën e parë të provave pashë gjithë balerinët me xhupa, ata po rrinin ashtu derisa e mora vesh që ishte akull ftohtë dhe uji që rridhte në bodrumin e Teatrit s’e lejonte të hapej sistemin e ngrohjes. Këto kushte më befasuan dhe më erdhi keq për balerinët që s’mund t’i kryenin punët që kishin ndërmend”, u shpreh ai.

Megjithatë, provat për shfaqjen kanë shkuar mirë dhe prezenca e Peçit ka ndikuar mirë tek balerinët të cilët u shprehën të ngazëllyer për rastin që të bashkëpunojnë me të.

Balerini Mehmet Bikliqi tregoi përvojat e tij duke e quajtur eksperiencën e jashtëzakonshme.

“Ka qenë një eksperiencë e jashtëzakonshme edhe nga ana teknike edhe nga ana artistike, faktikisht ne kemi punuar me këto stile dhe mënyra e shpjegimit të Enos nuk ka qenë vetëm koreografi por edhe shkollë për neve që e kemi përfituar gjatë këtij procesi. Eno ka dhënë më shumë sesa e ka pasur për detyrë. Stili i tij ka disa specifika të cilat ai i ka shpjeguar me një gatishmëri të lartë, edhe si janë edhe si duhet t’i bëjmë këto stile.”

Ka qenë gjithçka për neve, shkollë dhe shfaqje, Eno na ka involvuar në konceptin e kësaj shfaqjeje dhe i gjithë ekipi këto ditë është duke jetuar me shfaqjen” u shpreh Bikliqi.

Edhe balerini tjetër Fatmir Smani u shpreh i kënaqur me përfshirjen në këtë shfaqje.

“Sot e kësaj dite shqiptarët shohin mundësinë për të ikë jashtë vendit, andaj e kemi pasur të lehtë të futemi në shfaqje, sepse e kemi ndjerë atë sikurse dhe ndjenjën e një të riu që i duhet të ikë jashtë. Eno ka qenë transparent dhe puna ka shkuar në përgjithësi mirë. Kemi punuar shumë që të dalim sa më mirë para publikut”, potencoi Smani.

Edhe balerini Sead Vuniçi potencoi se puna me Enon ka shkuar mirë dhe se ata kanë mësuar shumë prej tij për t’u ngritur në karrierën e tyre profesionale.

Shfaqja do të mbahet nesër dhe pritet të ketë interesim të madh nga publiku për shkak të tematikës sociale dhe aktuale për kohën tonë, megjithëse ngjarja për bazë ka vitet e shkuara. /KultPlus.com

Baleti Kombëtar i Kosovës shfaq premierën e katërt për vitin 2019

Në Teatrin Kombëtar të Kosovës, të enjten e 5 dhjetorit, shfaqet premiera e katërt e Baletit Kombëtar të Kosovës, shkruan KultPlus.

Shfaqja ”Exil” është shfaqja e katërt premierë për vitin 2019, e cila është realizuar nën koreografinë dhe konceptin e Eno Peçit.

Ndërkaq, përveç premierës, artdashësit kanë mundësi që reprizen e shfaqjes ta shohin edhe të premten me 6 dhjetor. / KultPlus.com

Baleti Kombëtar i Kosovës me shfaqjen “Pristine Conditions”, kushtuar natyrës së Prishtinës

Baleti është ajo gjini artistike e cila i shpreh ndjesitë e saj përmes lëvizjeve te shoqëruara me muzikë, shfaqje skeniko-muzikore e trupës vallëzuese.

Baleti Kombëtar i Kosovës, mbrëmë në skenën e Teatrit Kombëtar, erdhi me një performancë të shkëlqyer kushtuar qytetit të Prishtinës, shkruan KultPlus.

Prishtina, sipas etimologjisë, lidhet me ”Pranverën (ujin)”, si dicka që duhet të jetë e pastër, e paprishur dhe e freskët, dukë bëtë ështu që ema kyqe e kësaj shfaqjeje të mbrëmshme të jetë ”Save the nature, save the future”.

Një performancë që për bazë kishtë ruajtjen e natyrës, ku përmes vallëzimit të jashtëzakonshëm të trupës së Balëtit, shaqej revolta e shqetësimi për natyrën e për kujdesin ndaj saj, duke bërë kështu që edhe publiku i mbrëmshëm të ndahet shumë i kënaqur dhe të emocionuar nga ajo që panë.

Kjo shfaqje u realizua në kuadër të programit të edicionit të dytë të Javës së Kosovës për Zhvillimit të Qëndrueshëm që po zhvillohet nga 16-22 shtator 2019.

KSDë’19 organizohet nga Qeveria e Kosovës, gjegjësisht Ministria e Mjedisit dhe Planifikimit Hapësinor dhe Ministria e Zhvillimit Ekonomik, në bashkëpunim me Zyrën e Bashkimit Evropian në Kosovë / Përfaqësuesen Speciale të BE-së, Deutsche Gesellschaft für Internationale Zusammenarbeit (GIZ) GmbH) në emër të Qeverisë Gjermane, Balkan Green Foundation (BGF) dhe Instituti për Politika Zhvillimore (INDEP)./KultPlus.com