GKK njofton për hapjen e ekspozitës së çmimit “Gjon Mili”

Galeria Kombëtare e Kosovës ka njoftuar për hapjen e ekspozitës së edicionit të gjashtëmbëdhjetë të çmimit prestigjioz ”Gjon Mili”, përcjellë KultPlus.

Ekspozita “NË TRANZICION: Imazhet mes Faktit dhe Trillimit” vjen e kuruar nga João Ribas.

Pjesëmarrësit në këtë ekspozitë janë: Albe Hamiti, Altin Krasniqi, Arbnor Karaliti, Edona Kryeziu, Edson Luli, Fidan Bejtullahu, Jon Mithi, Laureta Hajrrullahu, Valdrin Thaqi, Valentina Bonizzi , Somer Spat, Neron Deshishku.

Ceremonia e hapjes do të bëhet të mërkurën, me 16 tetor, në orën 20:00 në Galerinë Kombëtare të Kosovës.

Ekspozita do të jetë e hapur deri më 16 nëntor. / KultPlus.com

Ekspozita udhëtuese Bauhaus Imaginista vjen në GKK

Bauhaus imaginista është një projekt i madh ndërkombëtar që mbahet me rastin e njëqind vjetorit të shkollës së artit me fokus të veçantë në shpërndarjen dhe pritjen e saj në botë.

Që nga fillimi, Bauhaus ishte një projekt ndërkombëtar, me studentë dhe mësimdhënës nga Evropa dhe Azia që iu bashkuan kësaj shkolle. Ajo ishte heterogjene dhe gjatë periudhave të ndryshme, ka përshtatshmëri të lëvizjes Arts and Crafts ( Arte dhe Zanate) dhe lëvizjeve tjera siç janë socializmi, komunizmi, spiritualizmi, Konstruktivizmi Sovietik dhe të Neues Bauen (ndërtimi ri). Në vitin 1933 kjo shkollë u mbyll nga nacionalistët socialist ku shumica e studentëve u detyruan dhunshëm të ikin dhe të shpërndahen nga Gjermania në vende tjera ku si pasojë Bauhaus bëhet rrjedhë kulturore e popujve përtej Evropës. Bauhaus imaginista gjen bashkëpunim në pjesë të ndryshme të botës nëpërmjet bashkëpunimeve kërkimore me studiues nga Brazili, Kina, India, Japonia, Maroku, Nigeria, Rusia, Britania e Madhe dhe në SH.B.A.

Këto histori të hulumtuara tregojnë se si Bauhaus kishte kontakte me shkolla dhe lëvizje të ndryshme moderniste ndërkombëtare, se si idetë e Bauhaus u tërhoqën, adaptuan apo u refuzuan duke u bazuar në kushtet vendore të kohës, luftën e ftohtë, politikave jo të përafruara, diktaturave si dhe proceseve të dekolonializmit dhe projekteve zhvillimore. Ato na tregojnë një ri-lexim të statusit kosmopolit të Bauhaus nga perspektiva trans-historike dhe trans- nacionale në lidhje me pyetjet bashkëkohore, të zhvilluara përmes rrjetit të hulumtuesve dhe artistëve.

Bauhaus imaginista largohet nga katër objektet kryesore të Gegenstande të Bauhausit që janë përdorur për të zhvilluar katër kapitujt tematikë dhe konceptual që lidhen me pritjet në vende të ndryshme gjeografike. Këtu përfshihen: Manifesti i Bauhausnga Walter Gropius (1919), që është baza e Korrespondimit me hulumtimin e reformës pedagogjike; Tepihu, një vizatim nga Paul Klee (1927), për kapitullin Duke mësuar nga, që shqyrton përvetësimin kulturor; Ein Bauhausfilm nga Marcel Breuer (1926), ku gjenerohen idetë për evolucionin e dizajnit në relacion me ideologjinë; dhe Reflektorische Farblichtspiele, një mjet ndriçimi nga Kurt Schwerdtfeger (1922), ku gjenerohet kapitulli Ende i pavdekur ku përdoren eksperimente me dritë dhe zë.

Kjo ekspozitë udhëtuese kombinon idetë, kërkimet dhe dokumentimet nga bauhaus imaginista. Artisti Luka Frei ka dizajnuar një strukturë e cila është gjysmë skulpturë dhe gjysmë ekspozitë arkitekturale – si një hapësirë ku vizitorët mund të angazhohen në shumë shtresa të këtij projekti. Aty përfshihen fjalime kuratoriale, tekste dhe imazhe që ndërlidhen me katër kapitujt si dhe dokumentime të programit ndërkombëtar bauhaus imaginista 2018.

Në qendër të këtij instalacioni gjendet një kompjuter ku vizitorët mund të kërkojnë në të gazetën online të bauhaus imaginista, të printojnë nga aty imazhe dhe tekste të cilat mund ti bashkojnë në një dosje. Krahas kësaj shfaqet një program filmik me vepra të komisionuara së voni për temat dhe historinë e Bauhaus nga artistët dhe hulumtuesit bashkëkohor si Zvi Efrat, Kader Attia, grupi Otolit dhe nga Wendelian van Oldenborgh.

bauhaus imaginista është një bashkëpunim mes Bauhaus Kooperation Berlin Dessau Weimar, Institutit Goethe, dhe Haus der Kulturen der Welt (HKW). Ky projekt hulumtues me stacione të ndryshme ekspozuese është pjesë e njëqind vjetorit nga themelimi i Bauhaus (2019). Instituti Goethe e madhështon këtë program me perspektivat ndërkombëtare të saj si pjesë e projektit HKW, 100 vite të tashmes, bauhaus imaginista i bashkoi në Berlin. Ky projekt u mundësua nga fondet e komisionerit federal të qeverisë për kulturë dhe media (BKM). Fondacioni federal i kulturës (KSB), përkrahë ekspozitën në Berlin; Zyra për marrëdhënie me jashtë përkrahë stacionet ndërkombëtare. Partnerët e jashtëm janë Institutet Goethe në Kinë, New Delhi, Lagos, Moskë, New York, Rabat, Sao Paolo dhe Tokio. Po ashtu partnerë tjerë janë edhe Dhoma e pavarur artistike- Le Cube në Rabat si dhe disa institucione tjera. Bauhaus imaginista u realizua në bashkëpunim me muzeun e dizajnit të Kinës (Hangzhou), Institutin e Pavarur Administrativ të Muzeut Kombëtar të Artit / Muzeu Kombëtar i Artit Modern (Kjoto) Garage / Muzeu i Artit Bashkëkohor (Moskë), dhe SESC Pompeia, Sao Paolo.

Bauhaus imaginista do të hapet me 7 qershor në orën 18:30. / KultPlus.com

Galeria Kombëtare sonte mirëpret burrneshat e Britanisë dhe Kosovës

Alberina Haxhijaj

Sonte në Galerinë Kombëtare të Kosovës duke filluar nga ora 18:00 do të bëhet hapja e ekspozitës “Burrneshat”. Kjo ekspozitë kuruar nga Arta Agani vjen si pjesë e ekspozitës “Perceptimet” e cila pos në Prishtinë zhvillohet edhe në Cetinje, Novi Sad, Banja Luka dhe Shkup, shkruan KultPlus.

Burrneshat në Prishtinë është kompozuar në atë mënyrë që të sjellë të ndërlidhura punën e artistëve britaneze, punimet e të cilave janë marrë nga koleksioni i “ British Council” dhe punimet e artistëve nga Kosova. Prandaj vizitorët do të kenë mundësinë që të shohin punimet e artistëve të njohura britaneze si: Madame Yevonde, Clare Strand, Abigail Lane, Rachel Whiteread, Camilla Low, Anthea Hamilton, Laura Aldridge, Helen Chadwick, Tracy Emin, Sarah Lucas, Gillian Wearing, Elisabeth Price, Celia Hempton dhe Lubaina Himid të mishëruara brenda një hapësirë se bashku me punimet e artisteve vendore si: Alije Vokshi, Alketa Xhafa Mripa, Arbana Hajradinaj, Flaka Haliti, kolektivin HAVE IT, Rudina Xhaferi dhe Zake Prelvukaj. 

Sipas Angus Bijarnason nga British Council, i cili është zëvendësdrejtor për Ballkanin Perëndimor, duke prezantuar këto punime së bashku i lëmë hapësirë edhe dialogut për të parë se si është pozita artistëve në shoqëri por edhe si prezantohen gratë në art.

“Ajo që e ndërlidhë gjithë këtë, nuk është vetëm ekspozita por edhe bisedimet përmes të cilave do të diskutohen për sfidat me të cilat ballafaqohen gratë të cilat janë artiste. Ky dialog është ajo që i ka bërë galeritë dhe muzetë në Britani të njohur dhe dinamik, pasi që galeritë dhe muzetë në Britani nuk janë një vend i vdekur ku vetëm prezantohen apo shfaqen punimet artistike, por janë vende ku punohet, diskutohet, shfaqen pikëpamje të ndryshme dhe takohen njerëzit. Bazuar në këtë shpresojmë që përmes këtij bashkëpunimi me galerinë të krijojmë një hapësirë të tillë edhe këtu, pasi që përveç që është e rëndësishme që të shohim punimet, e rëndësishme mbetet edhe që të kuptojmë çfarë fshihet prapa tyre”, theksoi ai.

Menaxherja e koleksionit në British Council, Nicola Heald u shpreh se ideja prapa kësaj ekspozitë ka qenë dëshira që të realizojnë diçka për Ballkanin Perëndimor. Sipas saj, duke sjellë ide të ndryshme nuk kishin sesi ti iknin diskutimit kryesor në botë, kohëve të fundit, e që është mungesa e përfaqësimit të grave artiste në koleksione, diçka që nuk vërehet vetëm në Ballkan por edhe në botë.

“Kuratorët e kanë pasur punën me të vështirë në këto pesë vende pasi që të gjithë është dashur që të zgjedhin punimet nga koleksioni i British Council dhe të bëjnë që këto punime të përputhen me punimet e artistëve të vendit të tyre”, u shpreh ajo.

Sipas kuratores Arta Agani krijimi i kësaj ekspozitë ka qenë sfidues, pasi që ajo vë në pah shumë probleme mbi përfaqësimin e grave në art. Ajo theksoi se në mesin e 1 mijë veprave që i takojnë koleksionit të galerisë, vetëm 17 vepra janë krijuar nga gratë. Prandaj, sipas Aganit titulli burrneshat -fjalë e cila përveç kuptimit si “Virgjëreshat e përbetuara” përdoret edhe si kompliment për një grua që ka vendosmëri, sukses dhe fuqi, vë në pah ironinë e kësaj ekspozite.

“Titulli është një koment ironik ndaj diskriminimit të grave që shkon aq larg, deri te atributet, ndërsa në realitet gratë janë motorë shumë të fortë që e mbajnë shoqërinë tonë në lëvizje. Artistet në Kosovë ishin dhe ende janë në një masë, shembujt tipik të diskriminimit gjinor”, theksoi ajo duke u shprehur se tashmë gjërat po ndryshojnë dhe gratë artiste po vlerësohen me një ritëm të vonuar por me hap të sigurt.

Mirëpo, përpos manifestimit të arritjeve të grave artiste në Kosovë, programi do të theksojë si dhe të ngrisë pyetje rreth sfidave të tyre momentale: Pse ka ende aq shumë mospërputhje mes numrit të grave studente të artit, dhe numrit të artisteve të diplomuara aktive? A është të qenit artiste profesion tepër kërkues? A i kundërvihet avancimi i gruas përmes artit, nocioneve konzervative për gratë e asocuara me formën dhe bukurinë, përkundër burrave, personifikimit të funksionit dhe intelektit?

Ekspozita do të hapet sonte në ora 18:00 në Galerinë Kombëtare të Kosovës duke shënuar kështu edhe 80- vjetorin e koleksionit të British Council.

Ekspozita “Perceptime: Burrneshat” është rezultat i bashkëpunimit në mes të British Council dhe Galerisë./ KultPlus.com

GKK publikon programin e ekspozitave për vitin 2019

Në mbledhjen e Këshillit Drejtues të Galerisë Kombëtare të Kosovës të mbajtur me datën 07 dhe 11 dhjetor 2018 u vendos për ekspozitat të cilat do të prezantohen brenda kornizës programore për vitin 2019.

Ekspozitat grupore tani më tradicionale të GKK në vitin 2019 do të jenë:
– Edicioni XVI-të i ekspozitës ndërkombëtare “Gjon Milili;
– Artistët e Rinj– edicioni III-të.

Lista e përzgjedhur/miratuar nga Këshilli Drejtues i GKK të ekspozitave të mediumeve të ndryshme që konkurruan dhe u propozuan janë si në vijim:
– Muslim Mulliqi-vizatime, kurator Visar Mulliqi
– Projekt kuratorial Ardian Isufi &Elton Koritari, Bashkëpunim me Shqipërinë,
– Majlinda Kelmendi, individuale
– Gjelosh Gjokaj, bashkëpunim me Muzeun e Malit të Zi, kuratore Selma Gjekovic,
– Projekt kuratorial Filloart,
– Arian Berisha, kurator James Walmsley
– IRWIN
– Koleksioni i artistëve francez, nga Muzeu i Arteve Bashkëkohore të Shkupit
– Ekspozitë me rastin e 40-Vjerori i themelimit të GKK
– Shkëmbim i ekspozitave me Galerinë Kombëtare të Shkupit
– Shkëmbim i ekspozitave Bashkëpunimi me Bosnje dhe Hercegovinë
– Perceptions :”Burrneshat” , British Council, kuratore Arta Agani

Në kuadër të Programit për vitin 2019 do të ketë edhe programe të ndryshme si:
– Programi i Edukimit
– Programi i Ligjëratës dhe Debatit, Bashkëpunim me Institutin Italian të Kulturës.
– Programi i Hulumtimit. /KultPlus.com

Maksut Vesgizhi solli në GKK copëza të realitetit shqiptar si formë kritike dhe nostalgjike

Alberina Haxhijaj

Galeria Kombëtare e Kosovës ka mirëpritur sonte ekspozitën “Pavilion K”, të artistit Maksut Vesgizhi. Ekspozitë kjo e kuruar nga Matilda Odobashi, shkruan KultPlus.

Në katin e parë të Galerisë Kombëtare të Kosovës sonte kanë zënë vend punimet e Maksut Vesgizhi. Ato u ekspozuan me rastin e hapjes së ekspozitës së tij “Pavilion K”, në Prishtinë. Ekspozitë kjo e cila tërhoqi mjaftë artdashës të cilët vështronin me syrin e tyre kritik këtë ekspozitë.

Të vendosura në fillim të hyrjes qëndronin dy dorashka, ndërsa në mur qëndronin të varura disa rroba, e me të kthyer kokën në anën e djathë mund të gjeni armaturë, dhe thasë të mbushura me sfungjerë, ndoshta një jastëkë ky i ideuar nga artisti.

Pikërisht këto punime vinin në pah edhe multimedialitetin e artistit, diçka që theksoi edhe Drejtoresha e Galerisë Kombëtare, Arta Agani.

Kjo ekspozitë veçanërisht përfaqëson atë drejtim të cilin Galeria Kombëtare e ka marrë gjatë navigimit në rrjedha të artit bashkëkohor me tendencë që të ketë sa më shumë ekspozita interdisiplinare dhe multimediale, që ndërthurin fusha të ndryshme të artit në një identitet”, u shpreh ajo.

Pak më tutje në hapësirën më të madhe të këtij kati të Galerisë, vend kishin zërë edhe disa tulla të vendosura në qese të plastikës, të cilat qëndronin horizontalisht dhe në rend me njëra-tjetrën. E disa hapa larg tyre, sfungjerët me ngjyrë të verdhë, qëndronin afër mureve në dy anët e kësaj hapësirë. Materialet të cilat mund t’i hasim edhe në përditshmërinë tonë e që dëshmojnë se edhe në arkitekturë por edhe në arte vizuale interesimi i Vezgishit është eksperimenti dhe modernia, duke kthyer njëkohësisht vëmendjen kah kërkimi në artin aktual shqiptar.

Ekspozita “Pavilioni K”, mund të konsiderohet edhe një ribashkim artistik në mes të artistin Maksut Vesgizhi dhe kuratores Matilda Odobashi, pasi që ata kanë punuar edhe në të kaluarën së bashku.

“Për mua punimet që po shihni janë si copëza apo pjesëza të realitetit shqiptarë dhe shqip-folës, të cilat mendoj se paraqiten me një formë sa kritike aq edhe nostalgjike. Një kohë që ndoshta ishte por që edhe vazhdon të jetë sot e asaj ditë”, theksoi kuratorja.

Maksut Vezgishi i lindur në Prizren, në vitin 1960, kreu studimet e Arkitekturës në Universitetin e Prishtinës. Ai punoi si asistent në Fakultetin e Arkitekturës, (1993/95). Njëkohësisht punoi si redaktor artistik edhe në gazeta, në shtëpinë botuese ‘Dukagjini’ në Pejë, në Galerinë ‘Dodona’. Pastaj në Teatrin e Qytetit të Prizrenit, si projekt autorial punoi Dramën Vizuele/Skena Alternative;
‘Proporcione Hyjnore’ (1990). Po ashtu në fushën e skenografisë bashkëpunoi me teatrot në Prizren, Prishtinë, Sisak, Lubjanë, Shkup, Bruksel, Elbasan.

“Më 1978, para 40 viteve takova në Prishtinë ambientet e para moderne për të cilat kam nostalgji. Shtëpia e Mallrave, Mensa e Studentëve, Biblioteka. Arkitektura mi përmblodhi artet aktuale sot edhe atëherë”, ishin fjalët që artisti i thekoi në hapje të ekspozitës para se të ftonte të gjithë të pranishmit që të hynin brenda dhe ta vizitonin ekspozitën. Ekspozitë kjo e cila do të qëndrojë e hapur për një muaj në Galerinë Kombëtare të Kosovës./ KultPlus.com

Ka filluar protesta kundër trajtimit të lopëve nga artisti Sislej Xhafa (FOTO)

Është paralajmëruar që sot në ora 16:30 të mbahet protestë para Galerisë Kombëtare të Kosovës nga aktivistët për të drejtat e kafshëve – United for Animals – UFA.

Kjo protestë po vjen pas hapjes së ekspozitës së artistit kosovar të njohur ndërkombëtarisht Sislej Xhafa, i cili në ekspozitën e titulluar “Të dua pa e ditur”, përveç të tjerash ka edhe veprën “Eight Kosovo Coës”, ku në oborrin e Galerisë Kombëtare të Kosovës, është ndërtuar një ahur në të cilin janë gjithsej tetë lopë që qëndrojnë dhe do të qëndrojnë aty përgjatë 1 muaji, shkruan KultPlus.

Protestuesit tashmë kanë filluar të mblidhen para Galerisë Kombëtare ku edhe po vendosin pankarta me mbishkrime të ndryshme kundër kësaj ekspozite. Ata potencojnë se nuk janë kundër artit po kundër trajtimit që po ju bëhet lopëve.

Ndërsa, sot gjatë ditës, ende pa filluar protesta, udhëheqësit e Galerisë Kombëtare të Kosovës, kanë thirrur konferencë për media ku u bë e ditur e gjithë mirëmbajtja e lopëve. Në konferencë të pranishëm ishin drejtoresha e galerisë Arta Agani, përfaqësuesi i Këshillit Drejtues të galerisë Driton Axhami dhe pronari i lopëve Arben Avdiu.

Si fillim Arta Agani, tha se është e dhembshme që detyrohet të diskutojë çështje të cilat sipas saj duhet të jenë të nënkuptuara dhe të bazuara në kredibilitetin e institucionit të cilin ajo drejton dhe MKRS.

Ndërsa, sa i përket krejt kësaj ‘zhurme’ që është krijuar rreth kësaj ekspozite, vetë artisti Sislej Xhafa është deklaruar vetëm me një fjalë të cilën ia kishte dërguar drejtoreshës së GKK-së, për ta lexuar.
“Unë jam vegjetarian, ju dua pa e ditur”, ka thënë Xhafa./KultPlus.com

Çfarë thonë artistikisht lopët e Xhafës!

Nga Naser Shatrolli

Stalla e Lopëve, ekspozitë e artistit kosovar Sislej Xhafa, në Galerinë Kombëtare të Kosovës, përkatësisht, në truallin e Kampusit Universitar – Intelektual «Hasan Prishtina», aty ku u sendërtuan themelet e dijes në vitin 1974.

U quajt ngjarje kulturore ekspozita e Sislej Xhafës (artist kosovar me nam konceptual ndërkombëtar) e cila po qëndron e hapur në truallin e Kampusit Universitar, pranë Bibliotekës Kombëtare të Kosovës, njëherësh pranë Akademisë së Arteve të Bukura – aty ku kanë ligjëruar emra të shquar me peshë brushe në histori si; Xhevdet Xhafa (babai i Sislej Xhafës) dhe të tjerë.

Mos të më keqkuptoj dikush meqë do parashtroj disa pyetje, ku jo domosdoshmërish, duhet përgjigjur dikush pyetjeve të mia, meqë është vullnet i lirë qytetar parasegjithash!!

Pjesa e ngjarjes konceptuale artistike në Parlamentin e Kosovës, apo ajo brenda Galerisë Kombëtare, kishte një suzhe, një ide dhe një koncepcion global gjersa ashpër dhe mirë, krijojnë përfytyrime provokative karshi vokacionit ideoestetik dhe mesazhit që përcjellin ato (meqë ky lloj tretmani ideoestetik bazën e ka në koncept) – thënë troç, ato pamje flisnin mjaftueshëm.

Varka si subjekt, e thurur me këpucë, do të ishte roman më vete, gjersa flet për njerëzimin këtu e në botë, të cilët, i ka përbi fati i keq – lufta, balta, uji për një jetë më të mirë, ndërsa, si dëshmi do të ngeleshin këpucët e tyre – Oqeania e pamëshirës globale sot karshi varfërisë globale është bërë pikëpyetje universi më vete!!

Kolltuku në formë prapanice që determinon «secili sot po mendon për “bythën” e vet – luftë për të rehatuar bythën» ishte gjetje e qëndrueshme!
Por çka mund të thuhet konkretisht për lopët e gjalla në një Galeri Arti – A ka të bëjë me efekte mediale gjetja e artistit – për të thënë se qytetarët nuk e kanë vendin këtu, ose, qyteti është shndërruar në stallë plehurinash – nisur me artin, kulturën, shkencën, politikën dhe se a duhet bërë diçka apo duhet ngelur kështu..!!!

Pse lopët në Galeri?!
Vizitorët mezi po prisnin për të parë nga brenda lopët e Xhafës.
A fshihet sherri i konceptit të Xhafës këtu – për të futë me vetëdije ajkën kulturore dhe politike e qytetare në stallë? për të shijuar aromën e bajgave të lopës? a do të ishte e mjaftueshme kjo si ide..!!!

Çka i ofron një fëmiu modern nga Prishtina kjo stallë? çka do të mësonte ai nga kjo – a do ti mjaftonte vetëm me pa në televizor Lopën..!!!???
A do të ishte kurdisje e qëndrueshme sikur lopët do të liheshin të lira të lëviznin brenda galerisë, që të byryteshin me brirë nëpër muret e saj për të dhënë një mesazh të fort!!!

A do të ishte intriguese nëse një vizitor do të futej me këpuca të reja në bajga për të shijuar ekspozitën? a do të përcillte mesazhe konkrete në aspektin intutiv – vetëdijesues!!!!

Çfarë thonë lopët e Xhafës artistikisht!?
A do të marr status të veçantë Lopa në momentin që hynë në stallën e Xhafës!?
Pse në Kosovë Lopa krahasohet me vetëdijen qytetare!
P.sh. «Oj lopë», «spakse dy «koçe» mend, «oj lopë e shehrit», madje Lopa është përdorur si sharje ndaj femrës në Parlament!!!

Çfarë fshihej pas dërrasave të Xhafës!?
Përse kishte futur 8 lopë në stallë dhe nuk ishte vetëm një!?
A është plehurinë artistike arti kosovar? a është në nivel të lopës arsimi në Prishtinë? a është në shkallë të stallës vetëdija e përgjithshme në një qytet ku frekuentojnë gjithë bota studentore? A është aromë plehurine qyteti ku ne jetojmë sot!?

Kush i solli lopët në Prishtinë, ishte lopar ai? fukara që ka nevojë për para? A ua ka lëshuar me qira lopët për dy muaj, që të mbahen të mbyllura për përfitime materiale!!!

A është mesazh i qartë për Artistët e sodit që derdhin ngjyrat e shpirtit brenda pëlhurës së kësaj kulture dhe kësaj shtëpie arti, se, ata nuk e kanë vendin brenda kësaj oaze!!!!

Çka fshihet pas stallës së Xhafës!!
A i ka shkuar nëpër mend Xhafës se poshtë galerisë është Biblioteka Kombëtare, në raftet e së cilës qëndron universi i vlerave njerëzore, duke nisur me njeriun e parë prej nga vjen dhe ai. Mjafton me kthy kokën kah kupola e saj. Është pyetje!!??
«Fëmijët nëse e shikojnë lopën në galeri përmes televizorit, a do të mjaftonte kjo sipas idesë autoriale të artistit»!!!

A do të ishte më e qëndrueshme vepra nëse Autori do të kursehej që të shpjegoj suzheun konceptual – në principin e domenit profesional!?
A është analizuar mirë stalla në oborrin e Galerisë – Si do të reagonin kalimtarët?
A do të ishte qëllim era e bajgave që të depërtoj në hapësirën e përgjithshme të Kampusit Universitar!?

Çfarë fshihet pas stallës së Xhafës!?
Nëse do të fuste Lopët në Kishën Ortodokse, gjersa ajo qëndron në truallin e Shkencës, Dijes dhe Artit, a do të merrte kuptim bazik Lopa!?

Cili është statusi i Lopës!?
Lopa ka një status – Është LOPË në fshat – a do të ndryshonte statusi i saj me ardhjen e saj në qytet!!!!
A do të ndryshojnë qytetarët e Kosovës në aspektin e zhvillimit, emancipimit apo do të ngelen brenda logjikës së kësaj stalle – pyetje është?!
Lopa vlerësohet si strehë e mizave gjersa ato jetojnë nën bishtin e saj!! A është mision e vizion i shoqërisë kosovare për të ngelur të përbuzur brenda kësaj logjike karshi manifestit kulturor global..!!!

Po të kishin gojë Lopët, çfarë do të thonin ato..!!!! / KultPlus.com

GKK së shpejti sjellë ekspozitën “Mjegulla”

Galeria Kombëtare e Kosovës javën tjetër do të sjellë ekspozitën e radhës të titulluar “Mjegulla”, shkruan KultPlus.

Në këtë ekspozitë do të prezantohen punimet e artistëve: Albert Allgeier, Driton Selmani, Fatmir Mustafa-Karllo, Gazmend Ejupi dhe Luan Bajraktari. Kjo ekspozitë vjen e kuruar nga Avi Lubin.
Kjo ekspozitë mëton të mendojë për potencialin që ka realiteti i mjegullt si dhe të reflektojë mbi faktin se mungesa e qartësisë mund të krijojë shtigje të reja të pamjes.

“Çka do të thotë të jesh një shtet pjesërisht i njohur, si Kosova? Çka do të thotë të jesh territor në mosmarrëveshje? Në një kohë të stresit gjeopolitik, frustrimi i momentit aktual politik dhe jostabilitetit, kur nuk dihet se çfarë të pritet dhe si të veprohet”, janë pyetjet që shtjellohen brenda ekspozitës.

Ceremonia e hapjes do të bëhet në Galerinë Kombëtare të Kosovës të enjten, më 17 Maj 2018, në orën 20:00./ KultPlus.com

GKK sjellë ligjëratë lidhur me teknikat e përdorura nga çifti Todorov

Galeria Kombëtar e Kosovës sjellë sot ligjëratë mbi teknikat e përdorura nga çifti i artistëve Todorov, të cilët do të flasin mbi inovacionet me materiale të letrës dhe skulpturat elementare, ekspozitë e cila u hap mbrëmë në GKK, shkruan KultPlus.

Todor Todorovi do të prezentoi “Skulptura elementare”, teoria dhe praktika nga e cila paraqet një vështrim të ri mbi skulpturën bashkëkohore dhe lidhjen e saj me elementet natyrore. Daniela Todorova do të flas për “Inovacionet në letër” duke përfshirë kontributin e artit në letër përmes Sofje Letër Art Festit në Jetën Kulturore Evropiane.


Projekti Inovacion në Letër do të zhvillohet nën patronazhin e Sh.T.Z.. Nedyalcho Danchev Dimitrov, Ambasadori i Bullgarisë në Kosovë dhe do të shënojë Presidencën e Bullgarisë të Këshillit të Evropës.
Kjo ligjeratë mbahet sot, më 25 Prill 2018 në GKK , duke filluar nga ora 17:00./ KultPlus.com

Puqet tmerri i Kosovës me veprat e artistit zviceran, paraqitja e kësaj ekspozite përkon edhe me Epopenë e UÇK së (FOTO)

Thomas Hirschhorn solli një ekspozitë më të veçantë në Galerinë Kombëtare të Kosovës. Ekspozita si e tillë mblodhi përplot vizitorë që ishin të interesuar në çdo pamje që ishte varur në muret e Galerisë, shkruan KultPlus.

Gili Hoxhaj

Në hyrje të Galerisë, aty ku ishte ekspozuar puna e tij, qëndronin shumë fotografi nën xham, të cilat krahas tyre kishin edh përshkrimin dhe sqarimin e autorit. Krejt kjo bënte që të njoftoheshe me punën dhe pikëpamjet e tij për “De-piksellimin”. Ai është kundër piksellimit- si formë e cila motivohet nga autoriteti. Arsye e kësaj është se “Sot më shumë se kurrë kam nevojë ta shoh çdo gjë me sytë e mi në botën tonë të vetme dhe askush nuk mund të më tregoj se çka mund të shohin apo të mos shohin sytë e mi”, shkruhet në njërën nga fotografitë.

Shumica e fotografive në katin e parë të Galerisë, përmbanin fytyra të gjakosura, trupa të shtrirë në rrugë, trupa fëmijësh e burrash. Shpesh këto imazhe i shohim të censuruara por artisti Thomas Hirschhorn e ka bërë të kundërtën e saj, ai e sjellë tmerrin e fytyrave të tyre të plotë, ndërsa mjegullon prapaskenën. Tmerri është fokusi i tij i qartë. Ai nuk e pranon pikësellimin e bërë në emër të tij për ta “mbrojtur” andaj shkruan “ai që pikësellon është në fakt duke e mbrojtur veten përderisa pretendon se po më mbron mua”, thotë Thomas Hirschhorn.

Arsyeja përse ai bën kolazhe dhe është i interesuar në pikëllim është për shkak të estetikës së tij të fuqishme dhe se fuqia estetike vjen në mes pjesës së pikëselluar dhe asaj të papikëselluar dhe nga logjika jo sistematike e pikësellimit. Ai thotë se pikësillimi në abstraksionin e tij arrin ta krijoi një formë të re. Qëllimi është të kuptohet se si një fotografi ekzistuese e publikuar mund të bëhet abstraksion.

Drejtoresha e Galerisë Kombëtare të Kosovës, Arta Bunjaku- Agani në ceremoninë hyrëse u shprehi mirëseardhje të gjithë të pranishmëve ndërsa tha se ndihen të nderuar që në GKK kanë artistin e njohur zviceran. Ajo këtë ekspozitë e cilësoi si historike.

“Iniciativa për këtë ekspozitë që mund ta klasifikoi si historike ka ardhur nga ideja për bashkëpunim me Zyrën Zvicerane për Bashkëpunim në Kosovë. Iniciativa e përbashkët solli rezultat që ta ftojmë këtë artisti në muajin mars. Ai pranoi që të vij menjëherë në Kosovë, në një afat të shkurtër kohor, gjë qëështë e pazakontë për një artist me renome siç është ai. Si për ata edhe për ne Kosova është një vend interesant, vendi i ri me një histori plot dhunë dhe realitet të modifikuar”, u shpreh Bunjaku- Agani ndërsa shtoi se ideja që kjo ekspozitë është e hapur në muajin mars është sepse muaji jonë pasqyrohet në veprat e tij, muaji që simbolizon muajin e sakrificës.

Xhevat Bajrami nga Ministria e Kulturës, në emër të ministrit Kujtim Gashi, falënderoi artistin e njohur zviceran që ka ardhur në Kosovë në muajin e shenjt të Kosovës, në muajin kur Kosova feston Epopenë e UÇK-së ndërsa shtoi se punimet e tij promovojnë vlera artistike duke e shtuar krenarinë që këtu ardhur një artist i njohur zviceran.

Thomas Hirschhorn ishte ai që e mori fjalën i fundit ndërsa tha se ishte hera e parë që ai ka ardhur në Kosovë, ndërsa e cilëson si një vend të vogël por shumë të bukur. Ai e falënderoi Arta Aganin, kuratorin dhe të gjithë stafin e Galerisë që në mënyrë shumë efikase e bën të mundur këtë ekspozitë.

“Puna ime këtu përfshin punën që unë e kam bërë gjatë dy viteve të fundit. Më pëlqen të bëjë kolazhe sepse më pëlqen t’i marr dy elemente ekzistuese në krijimin e një punë të re. Shpeshherë bëj kolazhe sepse kolazhi asnjëherë nuk është tamam brenda kufijve, po ashtu bëj kolazhe sepse çdo njëri nga ne ka bërë një herë në jetë kolazhe”, u shpreh artisti Hirschhorn, ndërsa tha se ai e sheh piksëllimin si një mjet me të cilin mund ta konfrontoj botën dhe realitetit të tij.

Tashmë dyert e Galerisë Kombëtare të Kosovës do të qëndrojnë të hapura për të gjithë ata që duan të njoftohen me punën e artistit zviceran Thomas Hirschhorn./ KultPlus.com


Në 10-të vjetorin e Pavarësisë, kujtohen sfidat e GKK-së dhe arti alternativ nëpër kafenetë e Prishtinës

Galeria Kombëtare e Kosovës ishte sot nikoqire e konferencës me temën “Tejkalimi i kufijve dhe rinjohja përmes artit” nën ombrellën e aktiviteteve për shënimin e 10-të vjetorit të Pavarësisë së Kosovës.
Alberina Haxhijaj

Arti dhe kultura gjithmonë kanë qenë dhe vazhdojnë të jenë platforma të cila tejkalojnë politikën, problemet dhe diferencat në mes popujve dhe grupeve të ndryshme shoqërore. Kurse tejkalimi i këtyre kufijve dhe thyerja e tabuve mbesin një mision i artit. Mirëpo, cilat janë hapësirat shkëmbyese të cilat kanë qenë me vite në Kosovë? Çfarë roli kanë pasur institucionet publike? Çfarë ka pasur skena kulturore dhe cili është pozicioni i tyre sot në këto lloj shkëmbimesh? Kanë qenë disa nga pyetjet që kanë gjetur përgjigje në këtë konferencë.

Drejtoresha e Galerisë Kombëtare të Kosovës, Arta Agani, e cila edhe bëri hapjen zyrtare të kësaj konference tha se tema mbi të cilën do të diskutojnë është shumë e rëndësishme.
“Titulli i konferencës mund të ndjellë shumë pyetje dhe mund të tingëllojë si një titull i dëgjuar edhe më parë. Mirëpo, ne duhet ta pranojmë se kjo çështje akoma ekziston, kufijtë akoma ekzistojnë dhe ne nuk njihemi mirë në mes veti sa ai përket kulturës, zhvillimit të institucioneve dhe kështu më radhë. Besoj që kjo konferencë do të ngjallë diskutime në mes nesh dhe ne do të vendosim për një bashkëpunim më kualitativ dhe se shkëmbimi i thjeshtë i ekspozitave nuk do të jetë i mjaftueshëm për ne, por do i qasemi një agjende të përbashkët me shtetet në Ballkan”, u shpreh ajo duke theksuar se bashkëpunimet e tilla kanë ndihmuar çdo herë në periudha pas konflikteve.

Fillimisht drejtori i parë i Galerisë Kombëtare, Shyqri Nimani, solli para të pranishmëve kujtimet nga fillimet e punës së këtij institucioni, duke përfshirë vështirësitë që ka hasur kjo Galeri, por edhe krenarinë që kanë pasur kur kanë filluar punën. Ai para të pranishmëve solli kujtimet nga ekspozitat e para.

“Atëherë kemi pasur tri ekspozita kryesore dhe tri ekspozita të artistëve të rinj. Besoj që i rëndësishëm ka qenë fakti, se atëherë secilit artist që i janë ekspozuar punimet në Galeri, ne si këshill ju kemi blerë veprat, afër 500 vepra. Dhe atëherë patëm trashëguar edhe rreth 200 vepra të cilat kanë qenë të mbledhura nga BVI-ja për kulturë”, u shpreh ai, duke i bërë thirrje Galerisë që ajo të vazhdojë këtë traditë të blerjes së veprave të artistëve si dhe të përkrahë artistët shqiptarë të cilët po jetojnë dhe veprojnë jashtë vendit.

Përveç fillimeve u diskutua edhe për një periudhë tjetër të rëndësishme jashtë jetës institucionale. Artistja Eliza Hoxha shpjegoi këtë periudhë, kur Galeria Kombëtare nuk ju ka takuar artistëve, të cilët pikërisht gjatë kësaj periudhë kanë realizuar vepra të shumta.

“Janë krijuar vepra nëpër skena alternative e cila vazhdon të mbetet alternativë dhe asnjëherë nuk legjitimohet si e tillë e që është një vlerë shtesë e Kosovës. Kjo periudhë e cila ka qenë e shkëputur prej institucioneve ka krijuar mundësi të tjera të komunikimit dhe rryma të tjera. Mendoj që është shume e rëndësishme kjo hapësirë kohore edhe gjetja e një nyje e cila kish me e lidhë galerinë e asaj kohe, këtë 10 vjetësh të zbrazëtisë institucionale por edhe të skenës tjetër që eshtë zhvilluar paralelisht si dhe periudhën pas vitit 2000”, u shpreh Hoxha, e cila theksoi se sikur të mos kishin qenë kafe-galeritë apo shkollat-shpija ne kishim qenë dhjetë gjenerata të pashkolluara dhe të mohuar nga çdo gjë që ka të bëjë me jetën publike.

Për këtë periudhë diskutuan artisti Mehmet Behluli dhe Shkëlzen Maliqi duke kujtuar kafenetë e miqve të tyret cilat kanë shërbyer si hapësira ekspozuese si: Hani i dy Robertëve dhe Koha në Prishtinë, pastaj kafenetë e tjera në Pejë dhe në Prizren.

“Ne, Galerinë Kombëtare e kemi pasur bazë të krijimit tonë artistik, aty kanë qenë edhe disa ekspozita tradicionale për të cilat ne punonin shumë për të marrë pjesë si ‘Salloni i Pranverës’. Mirëpo edhe pse gjithçka ka qenë e dirigjuar, ka ekzistuar liria e shprehjes, për dallim nga Shqipëria ku edhe shprehja artistikë ka qenë e kufizuar. Artistët kanë qenë të lirë. Sigurisht këtu nuk hyjnë temat si nacionalizmi, ato të cilat i kemi shprehur me metafora, ku me forma e shtresa të ndryshme e kemi treguar edhe ambicien tonë që të jemi të barabartë apo komplet të pavarur”, u shpreh ai duke shtuar se pasi që janë përzënë nga institucionet nga pushteti serb, artistët kanë krijuar këto hapësira alternative.

“Kafetë tona u shndërruan në institucione shumë të rëndësishme për jetën publike, jo vetëm në art por edhe në politikë. Kurse arti për neve në kohën e alternativës ka qenë formë e rezistencës, protestë, mbijetsë, revoltë”, përfundoi ai. Tutje diskutoi edhe Luan Mulliqi mbi menaxhimin e GKK-së pas viti 2000 dhe iniciativat fillestare për Muzeun e Artit Bashkëkohor i cili u konsiderua i rëndësishëm dhe u bë thirrje për ndërtimin e tij. Në anën tjetër, kryetarja e Këshillit Drejtues të Galerisë Kombëtare të Kosovës, Zake Prelvukaj, shpalosi planet të cilat i ka tani e tutje në Galerinë Kombëtare.
“Në plan programin tonë së pari e kemi programin e ekspozitave, dhe në këtë program hyjnë 16-të ekspozita. Në këto ekspozita kemi artistë vendor, kosovarë por edhe kosovarë që veprojnë jashtë dhe që janë shumë të suksesshëm, mirëpo edhe artistë ndërkombëtarë. Kurse në pikë të dytë e kemi programin e ligjëratave dhe debatit të cilin e konsiderojmë shumë të rëndësishëm, sikurse edhe programin e edukimit”, u shpreh ajo duke theksuar se roli i Galerisë tani mund të ndahet në ruajtjen e aseteve që kanë, sjelljen e ekspozitave të reja por edhe në edukimin dhe stimulimin e artistëve të rinj.
Konferenca do të vazhdojë edhe nesër . Ajo do të jetë e hapur për publikun dhe do të diskutojnë: Andin Tepelena, Dita Starova, Bojana Janeva, Milan Lucic./ KultPlus.com

“Esenca e ekzistencës” sjellë në Kosovë artin bashkëkohor të artisteve nga Maqedonia (FOTO)

“Esenca e ekzistencës”u quajt ekspozita grupore e artistëve nga Maqedonia e cila u hap mbrëmë në Galerinë Kombëtare të Kosovës, shkruan KultPlus.

Gili Hoxhaj

Kjo ekspozitë kishte zënë hapësirë në shumë dhoma të kësaj galerie, duke prezantuar kështu punën tridhjetë artistëve bashkëkohorë të Maqedonisë të cilët reagojnë në mënyra të ndryshme ndaj parimeve ekzistencialiste. Sytë e të pranishmeve kapin këndvështrime të ndryshme të artisteve të cilat vijnë përmes medieve të ndryshme që vizualizonin punën e këtyre artistëve. Puna e tyre ishte shprehur me anë të piktura, grafika, skulptura, duke kaluar te instalimet, objektet, fotografitë, e deri te video projektimet, printimet digjitale, performancat dhe audioinstalimet.

“Esenca e ekzistencës” është një koncept artistik i cili u drejtohet sferave të ndryshme të përditshmërisë, të jetës, ekzistencës, perceptimeve të cilat vijnë nga aspekte të ndryshme drejt esencës së qenies, të mbijetesës, të funksionimit. Këtu përfshihen gjeneza e dashurisë, shpirtërores,të ushqyerit kurse nën këtë diskurs zbulohen edhe çështjet e dinjitetit, ideologjisë, politikës, jetës sociale.

Artistët e përzgjedhur që ekspozuan mbrëmë punimet e tyre janë: Ismet Ramiçeviq, Metodi Angellov, Atanas Botev, Vana Urosheviq, Irena Paskali, Aleksandar Stankoski, Velimir Zhernovski, Gjorge Jovanoviq, Marija Sotirovska, Igor Sekovski, Osman Demiri, Sllavica Janeshlieva, OPA, Mihaela Jovanovska, Zero, Nehat Beqiri, Zeni Ballazhi, Zhaneta Vangeli, Dita Starova Qerimi. Ndërsa kuratorët e kësaj ekspozite janë: Ana Frangovska, Gorancho Gjorgjievski, Maja Cankulovska – Mihajlovska.

Drejtoresha e Galerisë Kombëtare, Arta Agani ishte ajo që u uroi mirëseardhje të pranishmëve ku theksoi se ky bashkëpunim mes dy shteteve do të vazhdoi edhe me tutje.

“Kjo ekspozitë besoj se nuk do të jetë i fundit, do të ketë edhe shumë ekspozita të këtij lloji pasi që bashkëpunimi i Galerisë Kombëtare të Kosovës dhe Galerisë së Republikës së Maqedonisë ka filluar në këtë vit me ekspozitën e artistëve të rinj kosovarë që e patëm në mars në Galerinë Kombëtare në Shkup”, tha Arta Agani gjatë hapjes së kësaj ekspozite.

Sekretari i Ministrisë së Kulturës në Maqedoni, Valmir Aziri tha mbrëmë se ndihet i kënaqur me prezantimin e kësaj ekspozite në Prishtinë, duke hapur kështu një kapitull të ri të bashkëpunimit kulturor mes dy vendeve fqinje.

“Kam kënaqësinë të ju drejtohem sonte jo vetëm për arsyen se kemi para nesh një ekspozitë që sjellë vepra dhe artistë që zgjojnë emocione dhe përjetime të thella artistike. Kënaqësia është shumë më e madhe kur kemi parasysh që me këtë ekspozitë po hapim një kapitull të ri të bashkëpunimit kulturor mes dy vendeve duke lidhur fuqishëm një nga hallkat e bashkëpunimit rajonal të cilit i ka munguar struktura dhe dinamika shpesh herë jo vetëm për shkak të rrethanave objektive, shoqërore e politike të rajonit tonë të trazuar. Është hera e parë në histori që Galeria Kombëtare e Maqedonisë është prezanton në Galerinë Kombëtare të Maqedonisë”.

Në hapjen e kësaj ekspozite fjalën e mori edhe Zëvendësministrja e Ministrisë së Kulturës në Kosovë, Burbuqe Deva e cila theksoi se Ministria e Kulturës e përkrah fuqishëm këtë bashkëpunim sepse është mënyra më efikase e realizimit të marrëdhënieve ndërkulturore me shtetin fqinj.

“Jam e nderuar që të jemi pjesë e kësaj ekspozite e cila vjen nga Galeria Kombëtare e Maqedonisë. Kënaqësia e madhe është se pasi që një numër i madh i artistëve me forma të ndryshme shprehëse të artit vijnë në Republikën e Kosovës” ishin disa fjalët hyrëse të zëvendësministres Deva.

Drejtoresha e Galerisë Kombëtare në Maqedoni, Dita Starova Qerimi po ashtu falënderoi Galerinë Kombëtare të Kosovës për bashkëpunimin dhe shtoi se dy shtete kështu mund t’i kalojnë kufijtë duke jetuar kështu në një të ardhme me artin bashkëkohor.

Njëra nga kuratoret e kësaj ekspozite, Ana Frangovska tregoi për KultPlus se kjo ekspozitë është shumë e lehtë për t’u kuptuar nga të gjithë pasi që prek disa nga çështjet me të cilat njerëzit përballen çdo ditë.

“Në këtë ekspozitë kemi sjellë disa çështjet më të rëndësishme për tërë regjionin pasi që kjo ekspozitë do të udhëtoj edhe në vende të tjera të rajonit. Kjo ekspozitë prek çështjen e ekzistencës nga pikëvështrime të ndryshme të artistëve, ato nuk sjellin ndonjë çështje të veçantë por problemet dhe gjërat me të cilat ne përballemi çdo ditë, duke prekur edhe çështje politike të cilat lidhen me shtetet që janë në përudhen e tranzicionit dhe të cilat luftojnë çdo ditë më të ardhmen dhe me historinë. Ne në këtë ekspozitë flasim për religjionin, për ushqimin, mjekësinë pra në përgjithësi për gjëra të përgjithshme që janë njohura për njerëzit e këtij regjioni”, shpjegoi Ana Frangovska për KultPlus.

Të gjithë ata që duan të njihen me ekspozitën e veçantë të këtyre artistëve nga Maqedonia, do të mund ta vizitojnë këtë brenda Galerisë Kombëtare të Kosovës deri më 12 Dhjetor të këtij viti. /KultPlus.com

Galeria Kombëtare e Kosovës me këshill të ri drejtues

Ministri i Kulturës, Kujtim Gashi këtë muaj ka emëruar këshillin e ri drejtues në Galerinë Kombëtare të Kosovës duke ndërprerë kështu mandatin katërvjeçar të këshillit të deritanishëm, shkruan KultPlus.

Sipas këtij vendimi përbërja e këshillit të ri përfshin Zake Prelvukajn, piktore, Driton Axhanin, Xhevdet Pantinan, piktor, Malbora Krajkun, klarinetiste, Arjeta Miftarin, skulptore, Enver Hoxhan, piktor dhe Arlinda Hajrullahun si përfaqësuese e MKRS-së, ndërsa do të mbesin pa i përfunduar edhe dy vite të mandatit të tyre ish-anëtarët Esat Valla (piktor), Nexhat Krasniqin-Nekrën (karikaturist), Ismet Jonuzin (skulptor), Afrim Spahiu (drejtor fotografie), Adriana Marku-Sedaj (skulptore), Luan Shllaku (nga shoqëria civile) e Kimete Berisha, përfaqësuese e MKRS-së./ KultPlus.com

Shkarkimi i këshillave drejtues nis me Galerinë Kombëtare

Ministri i Kulturës, Kujtim Gashi ka vazhduar traditën e pararendësve të tij sa i përket ndërrimit të përbërjes së këshillave drejtues të institucioneve qendrore të kulturës.

Këtë e ka nisur me atë të Galerisë Kombëtare të Kosovës. Pavarësisht se ky Këshill kishte mandat katërvjeçar, Gashi ia ka ndërprerë atë gati dy vjet pa i skaduar.

Së paku dy prej anëtarëve të përbërjes së re të këtij organi, vijnë nga Prizreni sikurse ministri i Kulturës, shkruan sot “Koha Ditore”. Për ndërrimin e Këshillit, ish-anëtarët kanë kërkuar sqarim nga ministri Gashi.

Kabineti i tij ka deklaruar se ai vetëm ka shfrytëzuar të drejtën e tij që të emërojë një Këshill me tjetër përbërje. Vendim për shkarkim të atij paraprak nuk ka. Njëri nga ish-anëtarët e ka cilësuar skandaloz veprimin e ministrit Gashi tek ka thënë se GKK-në do ta drejtojnë njerëz të panjohur.

Sipas vendimit të marrë në ditën e 9-të të këtij muaji, Zake Prelvukaj, piktore, Driton Axhani, Xhevdet Pantina, piktor, Malbora Krajku, klarinetiste, Arjeta Miftari, skulptore, Enver Hoxha, piktor dhe Arlinda Hajrullahu si përfaqësuese e MKRS-së, do të zëvendësojnë ish-anëtarët Esat Valla (piktor), Nexhat Krasniqin-Nekrën (karikaturist), Ismet Jonuzin (skulptor), Afrim Spahiu (drejtor fotografie), Adriana Marku-Sedaj (skulptore), Luan Shllaku (nga shoqëria civile) e Kimete Berisha, përfaqësuese e MKRS-së.

Ish-anëtari i Këshillit Drejtues të Galerisë Kombëtare të Kosovës, skulptori e profesori universitar, Ismet Jonuzi ka thënë se bëhet fjalë për një vendim skandaloz të ministrit./ KultPlus.com

GKK shpallë jurinë për zgjedhjen e fituesit të Çmimit ‘Gjon Mili’

Këshilli Drejtues i Galerisë Kombëtare të Kosovës shpallë jurinë për zgjedhjen e fituesit të edicionit të 15-të të Çmimit Gjon Mili ‘18 në kuadër të Bienales Ndërkombëtare të fotografisë që hapet nesër më 13 tetor në GKK, shkruan KultPlus.

Juria përbëhet nga: Eleni Laperi, nga Shqipëria, kuratore, artiste dhe autore e shumë publikimeve për artin; Vahida Nimanbegu, artiste nga Mali i Zi; Afrim Spahiu, fotograf i mirënjohur Kosovar, themelues i shkollës “Gjon Mili” për fotografi.

Edicioni i pesëmbëdhjetë i ekspozitës Ndërkombëtare të Fotografisë Çmimi ‘Gjon Mili’ vjen i kuruar nga Alfredo Cramerotti dhe asistent kuratori Atdhe Mulla me konceptin kuratorial “HIPERIMAZHI! Imazhet Brenda dhe jashtë ekraneve tona” .

Për këtë ekspozitë kuratori përzgjodhi 18 artist vendore dhe ndërkombëtare që do të jenë pjesë e Gjon Milit 2017.

Hapja e ekspozitës do të bëhet nesër në ora 20:00 në Galerinë Kombëtare të Kosovës. / KultPlus.com

“Autobiografia” e Xhevdet Xhafës nëpërmjet fotografisë (FOTO)

Mbrëmë në Galerinë Kombëtare të Tiranës është hapur ekspozita personale e artistit shqiptar Xhevdet Xhafa, ekspozitë kjo që shënon edhe bashkëpunimin kulturor në mes Kosovës dhe Shqipërisë, shkruan KultPlus.


Ekspozita është kuruar nga James Walmsley, kurse veprat në teknikën mikse janë një pasqyrim i jetës së piktorit, dhe përfaqësojnë ndjenjat dhe qëndrimet e tij veçanërisht mbi çështje sociale dhe politike të kombit shqiptar.


Kjo ekspozitë do të rri e hapur deri më 18 tetor, kurse lexuesit e KultPlus mund të shohin nga afër pamje nga hapja e kësaj ekspozite./KultPlus.com

Xhevdet Xhafa me ekspozitë personale në Tiranë

Të enjten mbrëma në Galerinë Kombëtare të Arteve në Tiranë, do të hapet ekspozita personale e artistit kosovar me renome Xhevdet Xhafa, shkruan KultPlus.

Ekspozita e kuruar nga James Walsmley, është pjesë e kalendarit të përbashkët kulturor në mes të Ministrive të Kulturës të Shqipërisë dhe Kosovës dhe ajo është organizuar në bashkëpunim të ngushtë me Galerinë Kombëtare të Arteve të Shqipërisë. Ekspozita personale e Xhevdet Xhafes shënon kështu bashkëpunimin në suaza të zbatimit të këtij kalendari të përbashkët kulturor në mes Shqipërisë dhe Kosovës.

Ekspozita është një sjellje në etapa të ndryshme të krijimtarisë së artistit, sjellë po ashtu punë të papara më herët në publik. Veprat e Xhevdet Xhafes, të cilat janë të përfshira në këtë ekspozitë e titulluar Autobiografia reflektojnë punë nga krijimtaria e tij nga vitet ’60-ta.

Ekspozita hapet më 14 shtator me fillim nga ora 19:30./ KultPlus.com

“Ofshamë” e Zake Prelvukaj mbërtheu edhe Galerinë Kombëtare të Kosovës (FOTO)

Një prezantim i mahnitshëm i këtyre pikturave nëpër muret e Galerisë Kombëtare të Kosovës, jo vetëm që e kënaqi publikun duke i parë, por edhe duke i ndjerë ato. Përmes syve mund të shihje secilën ‘Ofshamë’ të secilës vijë të krijuar nga Zake Prelvukaj.

Sarandë Selimi

E bardhë, e zezë, ngjyrë kafeje, e verdhë, e kuqe, krem, ngjyrë portokalli… Portret duke ulëritë, trup femre, dorë, mure, shtëpi… ‘Pa Mitrovicë nuk ka Kosovë’, ‘Rroftë Mitrovica’, ‘Stop Manifestimeve pa çlirimin e Mitrovicës’, ‘Mos e prek’, ‘Shpia e Zane’… ‘Art modern’, ‘Demokraci’, ‘Shoot’, ‘Madness’… e krejt kjo ‘OFSHAMË’.

Mbrëmja e së hënës në Galerinë Kombëtare të Kosovës solli këtë qasje përmes pikturave të artistes shqiptare Zake Prelvukaj. Kjo ekspozitë personale e Prelvukajt mblodhi rreth ‘Ofshamës’ shumë miq, artdashës e familjarë të artistes, për të cilën kryeqyteti kosovar ka pritë goxha gjatë që të vijë me një ekspozitë të tillë. Një prezantim i mahnitshëm i këtyre pikturave nëpër muret e Galerisë Kombëtare të Kosovës, jo vetëm që e kënaqi publikun duke i parë, por edhe duke i ndjerë ato. Përmes syve mund të shihje secilën ‘Ofshamë’ të secilës vijë të krijuar nga Zake Prelvukaj.

Kjo ekspozitë u hap me fjalët e drejtoreshës së Galerisë Kombëtare të Kosovës Arta Aganit, e cila menjëherë ia kaloi fjalën ministres në detyrë në MKRS, Vlora Dushmoshit. Dumoshi, tha që është e nderuar të marrë pjesë në ekspozitën e mikes së saj, e cila përveç pikturës dhe talentit të saj, veçori specifike, sipas Dumoshit është edhe gjuha e malësisë të cilën ajo e flet. “Vetë kjo ekspozitë me titullin ‘Ofshamë’ e tregon një rrugëtim të popullit tonë dhe këtë më së miri e shpreh Zakja”, tha Dumoshi.

Ndërsa një katalog më i veçantë se nëpër ekspozita të tjera ishte ky për ekspozitën e Zake Prelvukajt. Në këtë katalog një shkrim të veçantë kishte bërë Shkëlzen Maliqi, me ç’rast lexoi pak pjesë nga ai shkrim.

“Artet bashkëkohore lirinë dhe kuptimin e kërkojnë para së gjithash te vetvetja e jo nënshtrimet e detyrimeve sociale, politike, religjioze… edhe në raste kur këto detyrime duken plotësisht të arsyeshme, ose për më shumë, si vlera sublimë, imponuese, të shenjta. Nga ana tjetër, kuptohet se nga artisti nuk mund të pritet që ai, si qenie sociale dhe politike që është, të shkëputet plotësisht nga jeta dhe zotimet sociale, të cilat në kohërat e krizave dhe të mbijetesës bëhen pothuajse të pashmangshme”, theksoi Maliqi, i cili vazhdoi tutje të thotë se Zake Prelvukaj shprehet plotësisht e vetëdijshme për këtë situatë ekzistenciale të artit.

“Në një bashkëbisedim me sinqeritetin më të madh ajo më kishte thënë: “Në vitet 90-ta, kur unë seriozisht pata filluar të merresha me art, krijimtaria ime motivohej jo vetëm nga dëshira dhe dashuria për artin, por edhe nga revolta””, pohoi Maliqi.

Pasi të pranishmit që ishin në një numër të madh shikuan e shijuan këtë ekspozitë, KultPlus foli me kritikun e artit Ilir Muharremi. Ai tha se Zakja konsiderohet si artiste e guximshme, mirëpo, sipas tij, koha ka ndryshuar, pasi që atëherë sistemi dhe femrat pak merreshin me art, kurse sot merren shumë.

“Motivet nuk qenë më të ndryshme nga ato që i kemi parë të Zakja, si për shembull: Demokracia tani trageti në mesin e këmbëve të femrës. Tashmë janë tejkaluar këto, nuk janë më atraktive, sepse femra është avancuar, duhet të avancohet dhe artistja të jetë përpara kohës së sotme e jo të jetoj me të kaluarën. E veçanta e ekspozitës ishte realizimi i punimeve në stilin e Zakës, herë abstrakt e herë ekspresiv abstrakt, sidomos portretet e shpërqendruara që ma kujtonin Dr. Zhivagon. Por edhe motivi nga lufta e fundit, mbishkrimet. Ka formën, vijën dhe ngjyrën por edhe kompozicionin. Është art i ndërdies, nuk i jep rëndësi veç figurës, por tërë kompozicionit. Ka përjetime individuale, ulërimë, ulërimë e munkut piktorit, klithma por nuk ka krijim të ri mbi sistemet, mbetet me të kaluarën e sistemeve”, u shpreh Muharremi i cili përfundoi të thotë se e sheh më shumë si art individual.

E vetë protagonistja kryesore e kësaj ngjarje, artistja Zake Prelvukaj, iu tha të pranishmëve se e kanë nderuar në rrugëtimin e saj jo të lehtë. Ajo tha se stacioni i saj ishte Prishtina e këndshme dhe e mira, ishte shtëpia e saj e cila gjithmonë u mor me art.

“Mora një rrugë që nuk e dija se ku të qet e ku do të shkoj, mirëpo ajo rrugë ishte më i rëndësishmi në jetën time, në atelienë në të cilën u rrita, studiova, krijova. Këto rrugë nuk duhet t’i shikojmë si të vështira, se njerëzit thonë që ndoshta nuk të shpërblehet puna, por unë për të gjithë ju them se puna shpërblehet dhe kjo puna ime është puna juaj, puna juaj është puna ime dhe në çdo”, u shpreh artistja e cila pas këtij fjalimi morri shumë duartrokitje e pastaj edhe shumë urime.
‘Ofshamë’ e Zake Prelvukajt do të qëndroj e hapur në Galerinë Kombëtare të Kosovës deri më 5 tetor të këtij viti./ KultPlus.com