Komisioni Disiplinor i Federatës së Futbollit të Kosovës, ka hapur procedurë disiplinore ndaj trajnerit të Llapit, Tahir Batatina, për shkak të gjuhës së papërshtatshme në drejtim të gazetares së sportit, Qeqa Krelani në emisionin “Sporti Total” në KTV.
“Gjate debatit televiziv në emision sportiv të KTV-së të datës 11.04.2021, përdori gjuhë të papërshtatshme ndaj gazetares (analistes) së RTK-së, Qëndresa Krelani, e që është në kundërshtim me etikën sportive. Bazuar në nenin 32 paragrafi 1 i Rregullores disiplinore. Kërkohet deklaratë shtesë nga trajneri i FC Llapi, Tahir Batatina. Date:16.04.2021 ora 13:00”, thuhet në njoftim.
Po ashtu, ky organ i FFK-së, ka marr edhe disa vendime dhe ka hapur procedurë disiplinore për disa klube. Me nga 500 euro janë gjobitur trajneri i Gjilanit, Ismet Munishi dhe presidenti i Trepçës ’89, Abedin Zeka për akuza në drejtim të FFK-së./ KultPlus.com
Shqiptarët ka vite që jetojnë në Shtetet e Bashkuara të Amerikës, ku edhe po zhvillojnë bizneset e tyre.
Një prej tyre është edhe Mergim Lala, i cili ka mbi tre dekada që jeton dhe vepron në Houston të Texasit.
Ai udhëheq me sukses një biznes familjar të picerisë, “Brother’s Pizza”, i cili vlerësohet shumë nga komuniteti amerikan, por edhe policia e këtij vendi.
Lala vendosi që gjatë ditës së sotme të qeras me pica uniformat e kaltra në shenjë të mirënjohjes për punën që bëjnë në “District 1”.
“Vazhdoni me punën e mirë në District 1. Komuniteti juaj ju vlerëson”, shkruan në llogarinë zyrtare të picerisë.
Ndryshe, piceria kohë pas kohe i shpërblen pjesëtarët e tjerë që shërbejnë në dobi të komunitetit, të tillë, si zjarrfikësit./KultPlus.com
Historia e Heroit Kombëtar Gjergj Kastriot Skënderbeu në ekranin e madh të kinemasë sigurisht që do të vinte si një produkt ndërkombëtar.
Ndonëse nxori një luftëtar kaq të madh Shqipëria e vogël në vitin 1953 nuk i kishte mundësitë teknike, dhe për hir të se vërtetës as aktorët profesionistë (shkolla e lartë për aktorë “Aleksandër Moisiu”, do të hapej më 16 shtator 1959) për të ekranizuar heroin kombëtarë.
Në ndihmë do të vinte aletati i kohës, Bashkimi Sovjetik i cili do të mundësonte realizmin e të parit dhe të vetmit film biografik mbi Skënderbeun.
Filmi mori pjesë në festivalin e Kanës në vitin 1953 ku u vlerësua me dy çmime, “International Prize” dhe “Special Mention” për regjinë më të mirë.
Në atë periudhë filmi u shfaq në kinematë e pothuajse të gjitha vendeve të Europës, duke i prezantuar në këtë mënyrë publikut europian historinë e heroit kombëtar shqiptarë. Pak kohë më parë studiuesi Aurel Plasari ka publikuar një poster të rrallë të kohës së filmit Skndërbeu.
I mbiquajtur nga Vatikani si “Kalorës i Krishtërimit”, Skënderbeu u vu në shërbim dhe në mbrojtje të Europës së Krishterë, megjithëse kjo e fundit ishte tashmë në prag të kolapsit ndaj fuqisë së Perandorisë më të fuqishme të Kohës, duke e kthyer Shqipërinë në një Barrikadë dhe Fushë Beteje ndaj Shtrirjes Otomane. Në film shfaqet momenti kur Gjergj Kastrioti bashkon princërit shqiptarë duke u martuar me Donikën dhe organizon Lidhjen e Lezhës. Filmi ka skena masive të betejave historike dhe rrethimit të Krujës. Filmi me regji të rusit Sergei Yutkevich kishte një kast ndërkombëtarë aktorësh si Akaki Khorava, aktori gjeorgjian që portretizoi Skëndërbeun, Semyon Sokolovsky në rolin e Hamzait, Veriko Anjaparidze (Dafina) si dhe aktorët e njohur shqiptar Naim Frashëri (Pali), Besa Imami, (Donika), Avdije Alibali (Mamica) etj.
Me rastin e 100 vjetorit të Pavarësisë filmi u restaurua dhe u ridublua në gjuhën letrare, me kastin e aktorëve të njohur shqiptar Rikard Larja (Skëndërbeu) Roza Anagnosti (Donika), Tinka Kurti (Nëna), Robert Ndrenika (Sulltan Murati) etj./disaporashqiptare/ KultPlus.com
Tash e dy vite, Shkelzen Gashi është duke punuar në një projekt, ideja e së cilit është krijimi i një libri që do të dokumentoj masakrat e luftës në Kosovë, me prezantimin e secilës masakër në 500 fjalë, ku do të prezantohen në tri gjuhë dhe do të ilustrohen me fotografi, shkruan KultPlus.
Këtë e ka bërë të ditur vetë Gashi nëpërmjet një postimi në Facebook, i cili ka njoftuar se një nga masakrat që bënë pjesë në këtë libër është edhe ajo e familjes Lipa në Studenicë, për të cilën sipas tij nuk përkujtohet nga institucionet, e për rrjedhojë nuk raportohet as nga mediat.
Më poshtë gjeni statusin e tij të plotë:
Masakra në familjen LIPA
Po bëhen gati dy vite që i kam hyrë një projekti që synon të dokumentojë masakrat e luftës në Kosovë 98-99. Ideja është që ta kemi një libër ku prezentohet secila masakër në 500 fjalë, në tri gjuhë (shqip, sërbisht dhe anglisht), e ilustruar me tre-katër fotografi.
Për fat të keq, një pjesë e masakrave nuk përkujtohen pothuajse asnjëherë nga përfaqësues të institucioneve kryesore politike, e për rrjedhojë nuk shënohen as nga mediat. E tillë është masakra në familjen Lipa në Studenicë të Istogut.
Meqenëse sot është 22 vjetori i kësaj masakre të tmerrshme, po e sjellë këtu prezentimin e saj në librin “Masakrat në Kosovë 1998-1999”, që do të botohet së shpejti nga ADMOVERE, me mbështetje nga Ambasada e Zvicrës:
STUDENICË
Pas fillimit të bombardimeve të caqeve policore e ushtarake sërbe e jugosllave prej NATO-s (24 mars 1999), në fshatin Studenicë të Istogut, konkretisht në shtëpinë e Salih Zeqirajt, strehohen disa të afërm, gra, fëmijë e pleq të familjes Lipa nga fshati fqinj Kamenicë. Më 12 prill 1999, në fshatrat fqinje Vrellë e Lubozhdë, zhvillohen luftime ndërmjet UÇK-së dhe forcave policore e ushtarake sërbo-jugosllave, me ç’rast vriten 11 ushtarë të UÇK-së. Po këtë ditë familja Lipa vendos të largohet nga fshati Studenicë dhe të strehohet rrëzë bjeshkëve, në fshatin e afërt Kaliqan.
Mëngjesin e të nesërmes, Salih Zeqiraj, bashkë me disa prej grave dhe vajzave të familjes Lipa, kthehet në shtëpinë e vet në Studenicë për të marrë ushqime. Forcat sërbe i zënë në shtëpi, i torturojnë dhe vrasin të zotin e shtëpisë, Salih Zeqirajn 85-vjeçar, si dhe tetë anëtarë të familjes Lipa, që të gjithë civilë të paarmatosur, prej të cilëve katër vajza të moshave 13-15 vjeçare, si dhe katër gra, tri prej të cilave mbi 65-vjeçare. Sipas gazetarit Francesco Grignetti të gazetës italiane ‘La Stampa’, dy vajza të mitura dhe një grua e familjes edhe përdhunohen para se të vriten.
Më pas, forcat sërbe i hedhin trupat e të vrarëve në bunarin e shtëpisë, rreth 20 metra të thellë, dhe i mbulojnë me dhé, gurë, kashtë e gëlqere. Sipër hedhin edhe një televizor të vjetër e një shporet, dhe vënë dinamit, por shpërthimi vetëm pjesërisht i shkatërron muret e bunarit. Trupat më në sipërfaqe copëtohen nga eksplodimi, kurse të tjerët më në thellësi mbesin të paprekur .
Po të njëjtën ditë, forcat sërbe në Studenicë vrasin edhe tri plaka e dy pleq, të gjithë mbi 65-vjeçarë.
Ndërkohë, anëtarët tjerë të familjes Lipa, sikurse edhe banorët e fshatrave Vrellë, Studenicë e Kaliqan, të strehuar rrëzë bjeshkëve, kapërcejnë kufirin dhe dalin në Mal të Zi, ku qëndrojnë disa ditë. Për shkak të pasigurisë, kalojnë në Shqipëri, ku qëndrojnë deri në përfundimin e luftës, pa ditë asgjë rreth fatit të familjarëve që ishin kthyer në Studenicë.
Pas tërheqjes së forcave sërbe e jugosllave dhe hyrjes së trupave të NATO-s në Kosovë, të mbijetuarit e familjes Lipa kthehen nga Shqipëria, duke shpresuar se do t’i gjejnë familjarët e mbetur. Shtëpinë e Salih Zeqirajt e gjejnë të shkatërruar, sikur gati të gjitha shtëpitë e fshatit, vërejnë çdokund njolla gjaku dhe bunarin e mbuluar me gjithfarë materialesh.
Me ndihmën e fshatarëve dhe në prani të KFOR-it italian, më 23 qershor 1999, familjarët i nxjerrin trupat e të vrarëve nga bunari , e më pas i varrosin në fshatin Kamenicë. Një oficer i KFOR-it italian, duke e parë tërë këtë tmerr, thotë “le të shpresojmë se i kanë vrarë para se t’i hidhnin në bunar” .
Në tërësi, sipas Humanitarian Laë Center, më 13 prill 1999 forcat sërbe në fshatin Studenicë të Istogut kanë vrarë 14 civilë të paarmatosur shqiptarë, ndër të cilët gjashtë gra, përveç njërës të gjitha mbi 65-vjeçare, katër vajza 13-15 vjeçare, si dhe katër pleq 65-85 vjeçar.
Për këtë masakër deri më sot nuk është dënuar, e madje as gjykuar, askush./ KultPlus.com
Autorja britanike J.K. Rowling po sjellë një libër të ri këtë vjeshtë, një histori për fëmijë ku të gjitha personazhet do të jenë të reja.
Scholastic njoftoi të martën se “The Christmas Pig” (Derrkuci i Krishtlindjeve), historia e një djali me emrin Jack dhe një lodre të dashur (Dur Pig) e cila zhduket, do të dalë në mbarë botën më 12 tetor.
Rowling është e njohur më së shumti për serinë e saj fantastike “Harry Potter”, por gjithashtu ka botuar romane detektivë me pseudonimin J.K. Galbraith dhe vepra të tilla për fëmijë si “The Ickabog”.
Libri i saj i ri do të ilustrohet nga Jim Field. / KultPlus.com
Sa fort më mundon Vetmia, o nanë E votër braktisa një ditë N’vendlindje ishte vjeshtë Tani vonë Të presin të korrat e brengat
N’mendime më ke tretur Tani, o nanë Për birin që të la në vetmi Shikim imi kah dera, kah dera më përgjon Trokitje të lehta dëshiron.
Ktheu shpejt më ke pas thënë Se brengat më kanë molisur Të presin sokët në varr nën bli Porositë e babit tënd
Kaluan pranvera dhe vjeshta o nanë Që kur të ndjell veç një kthim Nëse vetë nuk do të mundem Do i them birit tim Në vendlindje të shtrojë çdo gëzim
Të lutem jeto me shpresa o nanë Se një ditë dikush do të trokllojë Në atë votër ku së pari zëri im jehoi Andej nipat do të ngrej shtëpinë. /KultPlus.com
Bitche, një qyteze të vogël historike në veri-lindje të Francës, iu mbyll faqja zyrtare e drejtuar nga autoritetet lokale, për shkak se algoritmi i Facebook e konsideroi si faqe që përdorte “gjuhë fyese” (nga anglishtja, bitch – bushtër). Pas kësaj, platforma kërkoi ndjesë dhe riktheu faqen.
“Emri i qytetit tonë duket se vuan nga një interpretim i keq…gjëja më e habitshme është se Facebook mori kaq shumë kohë për ta korrigjuar gabimin,” u shpreh në një postim kyetari i Bashkisë, Benoît Kieffer.
Facebook mbyll faqen për ‘gjuhë fyese’, por nuk e di
Emri i faqes ishte Ville de Bitche dhe u zhduk nga Facebook në 19 mars pa ndonjë paralajmërim ose arsye të dukshme. Ndërkohë, stafi i bashkisë krijoi një faqe të re, Mairie 57230, kodi postar i qytetit, për t’i mbajtur banorët të përditësuar me lajmet dhe informacionet lokale.
Facebook mbyll faqen për ‘gjuhë fyese’, por nuk e di.
“Unë dhe bashkëqytetarët e mi do të dëshironim të ftonim zotin Mark Zuckerberg që të vizitonte qytetin tonë të bukur dhe të fortifikuar,” shkroi Kieffer.
Ai bëri edhe një shaka/ironi me shprehjen “son of a bitch” (që përdoret si term i përgjithshëm për përbuzje, fyerje, sharje).
“Së bashku, ne mund të nderojmë kujtimin e atdhetarëve dhe miqve tanë amerikanë të cilët erdhën nga Karolina e Jugut për të çliruar qytetin tonë: çlirimtarët e quanin veten ‘sons of Bitche’.”
Ok, qartë. Facebook, puno me algoritmin or mik./ KultPlus.com
Presidentja e Kosovës, Vjosa Osmani, ka thënë se Kosova nuk mund ta ketë prioritet dialogun me Serbinë, derisa nuk sigurohen vaksinat.
Në një takim me ambasadorin e Çekisë në Kosovës, Pavel Bílek, Osmani u shpreh me shpresë se shtetet mike do ta ndihmojnë Kosovën për sigurimin e vaksinave, në diskutimin që patën mbi pandeminë me COVID-19.
“Kurse Presidentja Osmani, duke u ndërlidhur në këtë temë, theksoi se nuk mund të prioritizohet dialogu me Serbinë, teksa nuk sigurohen vaksinat për qytetarët e Kosovës. Ajo potencoi se në këtë kohë nevojitet solidaritet ndërmjet shteteve, ndaj shfaqi shpresën se Kosova do të ndihmohet nga shtetet mike dhe organizatat ndërkombëtare për sigurimin e sasisë e nevojshme të vaksinave për qytetarët e saj”, thuhet në komunikatë./ KultPlus.com
Ministrja e Jashtme e Kosovës, Donika Gërvalla, i është kundërpërgjigjur kryediplomatit serb Nikola Selakoviq, duke thënë se Kosova e pavarur është projekt i përmbyllur.
“Pavarësia e Kosovës është punë e kryer dhe do të ishte mirë për Serbinë sa më parë që e pranon këtë”, është shprehur Gërvalla.
Na fjalën e saj Gërvalla para anëtarëve të Këshillit të Sigurimit ka numëruar të bëmat e Serbisë fashiste mbi shqiptarët, ndërkaq ka përmendur edhe vrasjen e babait të saj, Jusuf Gërvalla.
“Baba im është vrarë nga regjimi i Beogradit në tokë të huaj, në Gjermani. Fëmijëve të mi u them se nuk ka të bëjë me serbët por Serbia duhet ta bëjë dallimin – duhet t’i sjellë kriminelët e luftës para drejtësisë”.
“Kemi gjithë interesimin për të normalizuar marrëdhënien me Serbinë. Kemi interesimin për perspektivën evropiane dhe jo atë të mesjetës. Jemi vend i vogël por i posaçëm. Jemi të vegjël por qëndrojmë drejt. Kemi miq të besueshëm dhe jemi të besueshëm për ta”./ KultPlus.com
Ministrja e Jashtme e Kosovës, Donika Gërvalla, në mbledhjen e Këshilli të Sigurimit ka filluar fjalimin e saj duke thënë se Qeveria e re e Kosovës do të përfundojë epokën e krimit dhe korrupsioni.
Ajo tha se vizionin e Kosovës e dëshmon edhe prapavija e saj në takimin virtual ku mbante flamurin e Kosovës, Bashkimit Europian dhe NATO-s.
Gërvalla përmendi edhe viktimat e luftës që tashmë janë përfaqësues në Parlament e Qeveri të Kosovës.
“Kryeministri jonë ka qenë i gjykuar si student në një montim politik nga regjimi autoritar serb dhe është keqtrajtuar për më shumë se dy vjet në burgjet serbe. Nënkryetarja e Kuvendit është e mbijetuar nga një masakër ku nëna, gjyshja dhe dy vëllezërit e saj ishin vrarë. Ajo ishte gjetur me 16 plumba dhe me zor e mbijetuar. Një prej deputeteve tona me votën më të madhe është përdhunuar nga forcat serbe dhe e ka marrë përsipër që të shtyjë përpara këtë çështje. Asnjë prej përdhunuesve s’ka dalë para drejtësisë deri më sot”.
“Edhe kolegët e mi amerikanë dhe rusë kanë një nënë. Dhe unë jam vetë nënë. S’ka gjë më të dhimbshme dhe të tmerrshme në botë për një nënë sesa ta humbësh fëmijën e saj. Ju ftoj të dëgjoni grupin e nënave të Gjakovës. Këto gra trime që kanë humbur fëmijët e tyre janë ende në dhimbje, por qëndrojmë drejt dhe nuk dorëzohen. Na kërkojnë asgjë më shumë së t’iu tregojmë se ku i kanë fëmijët e tyre. Si është e mundur që Serbia s’ka kurrfarë ndjenje për këtë çështje?”.
Gërvalla ka thënë se Serbia nuk po përballet me të kaluarën e saj gjenocidale dhe se kriminelët që janë autorë të më shumë se 13 mijë të vrarëve në Kosovë shëtisin të lirë në Serbi.
“S’po flasim për ngjarjet e shekullit XIX19, por po flasim për tani. Viktimat janë gjallë dhe kryesit e këtyre veprave të pakuptimta që kanë shkaktuar më shumë se 13 mijë viktima janë ende gjallë. Gëzojnë jetën në Serbi përmenden dhe përgëzohen për këto ngjarje. Këto viktima do të ishin 1.2 milionë rusë të vrarë, 2.6 milionë amerikanë apo 11.6 milionë kinezë të vrarë në më pak se një vit. Dhe bota ka parë që pak nga këta kriminelë janë ndjekur dhe atë sa për sy e faqe dhe janë shfajësuar”.
Gërvalla tha se Serbia është përgjegjëse për ndërhyrjet që ka bërë në shtetet tjera ballkanike duke kryer gjenocid në emër të Serbisë së Madhe.
“Kriminelët e luftës kanë ulëse në parlamentin e tyre. Kjo nuk është diçka që mund të thuhet të tejkalohet. Po flasim për vlerat më bazike të njerëzimit. Serbia duhet të marrë përsipër dhe të paguajë çmimin për këto maskara, të lirohet nga rrënjët e veta gjenocidale dhe të bëhet komb i civilizuar. Serbia e ka kaluar një periudhë të errët të një mendësie mesjetare e kthyer nga e kaluara që e ka çuar Serbinë në racizëm, fashizëm dhe gjenocid. T’ju pyes sinqerisht se çka e dallon viktimën e gjenocidit para 80 vitesh kur Gjermania naziste kishte kryer krime ndaj serbëve dhe hebrenjve dhe çka e bën viktimën të kryejë vetë fashizëm dhe të mos ballafaqohet me këtë?”./klan/ KultPlus.com
Zyrtarët në Kinën veriore kanë përuruar atë që ata e cilësojnë si semafori i parë në botë për devetë.
Sinjali rrugor hyri në veprim të dielën në një zonë të njohur për turistët pranë Dunhuang City, në provincën Gansu.
Media shtetërore e vendit shkruan se xhirot në deve janë një nga atraksionet më të mëdha për turistët në zonë.
Por vizitorët tani do të jenë të sigurt nga përplasjet e deveve, falë sinjalit të ri të trafikut, i cili bëhet jeshil për t’i lënë kafshët të kalojnë dhe të kuqe për t’i ndaluar ato./a2/ KultPlus.com
Vende si Dubai apo Katari janë gjithmonë në kërkim të gjërave të reja, e sidomos atyre arkitekturore, me koncepte dhe struktura gjithmonë e më të pazakonta.
Ndërtesat gjigante “që gërvishtin” qiellin në këto vende tashmë janë bërë të zakonshme.
Kësaj here ekipi turk “Hayri Atak Architectural Design Studio” ka shkuar më larg, pasi po ideon projektin e hoteleve lundruese, të cilët mund të gjenerojnë vetë energjinë elektrike, duke mbledhur dhe ripërdorur ujërat e shiut apo mbetjet ushqimore.
Struktura lundruese do të funksionojë në një mënyrë të ngjashme me një gjenerator, duke shfrytëzuar rrymën e ujit, turbinat e erës dhe fuqinë e baticave, duke e shndërruar të gjithë këtë në energji elektrike.
Ndonëse hoteli do të rrotullohet 360 gradë për të vënë në funksion sistemin e tij, mysafirët nuk kanë gjasa të përjetojnë ndonjë marramendje. I ideuar të ketë rreth 152 dhoma dhe një luks që i shkon përshtati vendeve të tilla, hoteli fillimisht do të ndërtohet në Katar, por projekti sipas dizajnerëve, mund të vendoset kudo për shkak të “tiparit të tij të lëvizshëm”.
Ekipi beson se pavarësisht vonesave për shkak të pandemisë, projekti pritet të përfundojë deri në vitin 2025. Megjithatë, synimi është që të punohet për 16 hotele të tilla luksoze. \ a2news/ KultPlus.com
Këshilli i Sigurimit vendosi që të vazhdojë punimet e seancës virtuale për Kosovën përkundër kërkesës së Rusisë që Ministrja e Punëve të Jashtme Donika Gërvalla ta heqë flamurin e Kosovës nga prapavija.
Pas fillimit të seancës, kryediplomatja Donika Gërvalla nuk ka ndryshuar prapavijën dhe flamuri i Kosovës po qëndron sërish prapa saj në ambientin ku ajo po qëndron.
Zahir Tanin, Përfaqësuesi Special i Sekretarit Gjeneral në fjalën e tij përmbledhi ngjarjet e gjashtë muajve të fundit, si zgjedhjet e fundit parlamentare, zgjedhjen e presidentes dhe situatën me pandeminë.
Përfaqësuesi i Rusisë në seancën e Këshillit të Sigurimit të OKB-së që po mbahet për Kosovën ka kërkuar nga udhëheqësi i seancës që Ministrja e Jashtme e Kosovës, Donika Gërvalla të heq flamurin e Kosovës mbrapa saj ose të ndryshojë ambientin.
“Ne nuk jemi kundër ndaj përfaqësuesve të Kosovës, megjithatë dua të ndaj faktin që zonja Donika Gërvalla është ulur para flamurit të Kosovës. Kosova nuk është e njohur si shtet por vetëm si territor, prandaj kërkojmë që për të vazhduar prezantimin ajo ose të ndryshojë pamjen prapa ose të heq flamurin në mënyrë që të vazhdojmë tutje”, tha përfaqësuesi rus.
Ndaj kësaj kërkese të Rusisë, ka reaguar përfaqësuesi i Britanisë së Madhe duke thënë se nuk shohin arsye që të kryediplomatja kosovare të ndryshojë pamjen nga ku do të prezantojë.
“Ky nuk është një takim zyrtar dhe ne nuk shohim ndonjë arsye që ministrja Gërvalla të ndryshojë pamjet mbrapa për të vazhduar prezantimin”, tha përfaqësuesi i Mbretërisë së Bashkuar./ KultPlus.com
Seanca e Këshillit të Sigurimit të Kombeve të Bashkuara për Kosovën ka filluar me tensione, pasi udhëheqësi i seancës nga Rusia kërkoi që ministrja e Jashtme Donika Gërvalla të heq flamurin e Kosovës mbrapa saj.
Por përfaqësuesi i Rusisë është kundërshtuar nga Britania e Madhe duke thënë se nuk ka asnjë arsye që kryediplomatja kosovare të ndryshojë pamjen nga ku do të prezantojë.
“Ky nuk është një takim zyrtar dhe ne nuk shohim ndonjë arsye që ministrja Gërvalla të ndryshojë pamjet mbrapa për të vazhduar prezantimin”, tha përfaqësuesi i Mbretërisë së Bashkuar.
Ndërkaq, presidenti i Këshillit të Sigurimit të OKB-së, ka suspenduar mbledhjen e hapur virtuale për Kosovën për konsultime të mbyllura pas kërkesës së Rusisë.
Mbetet të shihet pas rifillimit të mbledhjes së hapur se çfarë do të ndodh lidhur me këtë çështje./ KultPlus.com
Ministria e Kulturës, Rinisë dhe Sportit ka rishpallur thirrjet për mbështetje të projekteve në fushën e kulturës dhe rinisë.
Shpalljet e reja bëhen duke u nisur nga fakti se planifikimi i mbështetjes financiare duhet të jetë në kornizat e buxhetit vjetor të reflektuar në Ligjin Vjetor të Buxhetit të Republikës së Kosovës, por edhe në linjë me prioritetet dhe objektivat strategjike të Qeverisë së Republikës së Kosovës dhe të Ministrisë së Kulturës, Rinisë dhe Sportit.
Rishpallja e thirrjeve publike vjen edhe si hap i Ministrisë së Kulturës, Rinisë dhe Sportit për t’iu përshtatur rrethanave të krijuara nga pandemia COVID-19, dhe si vullnet për t’u solidarizuar me njëri-tjetrin por edhe me Ministrinë e Shëndetësisë dhe me organet e tjera që janë bërë pjesë e betejës për zbutjen e efekteve të shkaktuara si pasojë e pandemisë dhe krizës shëndetësore.
Më poshtë gjeni informatat e hollësishme në lidhje me aplikimin.
Për thirrjet publike për mbështetje të projekteve në fushat e rinisë dhe kulturës, vizitoni linkun në vijim:
Maria Callas u adhurua nga audienca në të gjithë botën, por jeta e saj ka qenë gjithçka përveç se një ëndërr, ajo paska qenë më tragjike nga sa ishte menduar më parë.
Për ta zbuluar atë, janë disa letra të pabotuara, që janë bërë më në fund publike në librin ”Casta Diva: Jeta e fshehur e Maria Callas”, shkruar nga Lyndsy Spence.
Nga korrespondenca e pabotuar, që ndodhet në duart e kësaj autoreje, flitet për abuzime dhe dhunë fizike, një martesë e komplikuar me Giovanni Battista Meneghinin dhe hijet e marrëdhënies me dashurinë e saj të madhe, Aristotel Onasis, i cili e braktisi për Jackie Kennedy.
Spence zbuloi marrëdhënien e vështirë të Callas me nënën, e cila ishte përpjekur ta bënte prostitutë e saj gjatë luftës, me ushtarë gjermanë.
Në një letër drejtuar sekretarit të saj, sopranoja më pas rrëfeu se Meneghini i plaçkiti më shumë gjysmën e parave.
“Unë isha një budallaqe që e besova dhe ai akoma po më mundon”, thotë Callas.
Ndërsa Onasis në më shumë se një rast e kishte droguar atë, kryesisht për arsye seksuale.
Callas vdiq vetëm 53 vjeçe, në 1977, dhe nga materiali i pabotuar i mbledhur nga Spence del gjithashtu informacioni i ri mbi problemet e saj shëndetësore, të cilat ndikuan në performancën e saj në vitet ’60.
Me sa duket ajo vuante nga një sëmundje neuromuskulare, që i shkaktoi edhe humbjen e zërit./ atsh/ KultPlus.com
“Those Who Wish Me Dead” titullohet filmi i ardhshëm i aktores Angelina Jolie, i cili i takon zhanrit triler dhe aksion.
Me regji të Taylor Sheridanit dhe i bazuar në romanin e autorit Michael Koryta me të njëjtin emër, filmi në rolet kryesore përveç yllit të kinematografisë Jolie, i sjell aktorët: Nicholas Hoult, Finn Little, Aidan Gillen, Medina Senghore, Tyler Perry, Jake Weber dhe Jon Bernthal.
Filmi e rrëfen historinë e një djaloshi tinejxher i cili është dëshmitarë i vrasjes së babait të tij, në afërsi të një pylli të madh kombëtarë.
I ndjekur nga vrasësit të cilët duan ta mbajnë atë të heshtur, djaloshi në fjalë e gjen veten duke kërkuar strehim në brendësi të pyllit. Shumë shpejt ai e takon një zjarrfikëse veteran dhe eksperte e mbijetesës në shkretëtirë, që në film portretizohet nga Angelina Jolie, dhe e cila i ofron strehim në kullën e saj të vrojtimit. Por situate bëhet e rrezikshme për të dy, kur vrasësit i vënë flakën kullës së vrojtimit me qëllim që t’i detyrojnë ata të dorëzohen, dhe kështu që të dy përpiqen që me çdo kusht t’i mbijetojnë kësaj situate.
Filmi “Those Who Wish Me Dead” planifikohet të lansohet nëpër kinematë e Amerikës dhe në platformën HBO Max, më 14 maj të këtij viti. / KultPlus.com
Projekte të reja të cilat për fokus kanë mbështjelljen e natyrës dhe artit në një rezultat të vetëm, për të kapërcyer sfidën e madhe të ‘luftës’ me ndotjen e ajrit në zonat urbane, tashmë po i shtohen Prishtinës. ‘Vertical Garden’ është projekti i radhës, një projekt ky mjaft vetëdijesues për rëndësinë e ambienteve të pastërta e të shëndetshme, shkruan KultPlus.
Duke pasur parasysh mungesën e madhe të gjelbërimit që ka mbetur nën hijen e betoneve, mureve dhe ndërtesave të shumta të cilat po ndikojnë fuqishëm në cilësinë e ajrit, ky projekt do të finalizojë nevojën esenciale për sa më shumë lule, drunj, bimë dhe pemë.
Vendin ku do të vendosen ‘Kopshtet Vertikale’, të cilat do të mbështjellin shtyllat e urës në hyrje të Prishtinës sot e vizitoi drejtori i Drejtorisë për Kulturë në Komunën e Prishtinës, Adrian Berisha bashkë me OJQ Q’art dhe ‘Te Pema’ me qëllim që të shohin mundësitë e integrimit të Gjelbërimit Vertikal me artin.
Në një ambient mes pluhurit, veturave, zhurmës së madhe, ecja dhe vëzhgimi në këtë rreth duket e pa mundur, por disa qytetarë u mblodhën për të parë se çfarë ndryshimi po ndodh në këtë pjesë, ku vërehet një mungesë e madhe e ngjyrave por të cilat tani do të ringjallen e do të mbizotërojnë në mesin e ngjyrës hiri dhe zbehjes së atmosferës.
Ndërsa, se si erdhi ideja për këtë projekt që synon një pamje ndryshe dhe të domosdoshme në hyrjen e qytetit, na tregoi edhe drejtori i Drejtorisë për Kulturë në Komunën e Prishtinës, Adrian Berisha.
“Komuna e Prishtinës në bashkëpunim me ‘TE Pema’, ka ideuar projektin ‘Vertical Garden’, duke pasur parasysh që qyteti jonë ka nevojë për sa më shumë gjelbërim. Pra, në hyrje te Prishtinës nga Fushë Kosova, mendohet që për një periudhë 2 vjeçare, muret të shndërrohen në mure jo me ngjyrë të hirtë por me mure të gjelbërta. Ne e dimë se vitin e kaluar është organizuar edicioni i 4-të i Meeting of Styles, festival ky i cili ka për qëllim që hapësirat e ndryshme ti shndërrojë në hapësira të parkut, pra flasim për muralet si ato në rrugën B dhe tek hekurudha”, tregon Berisha.
Sipas tij, qytetit i nevojitet më së shumti një pamje e tillë, përkundër pamjes vizive e cila shihet çdo ditë nga qytetarët dhe po i ngarkon ata me betonimin që ka ndodhur tash e 20-të vite. Kurse, inspirimi ka ardhur nga kopshti vertikal në Mexico City – ‘Via Verde’, që është formuar për herë të parë.
Tutje ai pohoi se buxheti fillimisht përfshin 60 mijë euro për projektin e Vertical Garden, kurse pjesa e artit në hapësirën publike financohet nga Drejtoria e Kulturës me vlerë rreth 10 mijë euro.
“Po ashtu edhe të gjitha bimët do të jenë të gjalla dhe të cilat e thithin dioksidin e karbonit në sasi të madhe, më një jetëgjatësi në të katër stinët”, potencon Berisha.
Pritshmëritë e tij janë në një nivel mjaftueshëm të lartë duke pasur parasysh reagimet nga qytetarët me mikpritjen e jashtëzakonshme, kur edhe është prezantuar projekti.
Projekti përfshin gjithsej 90 ditë punë duke filluar nga sot, ku ndërtimet e moduleve janë duke u formuar në disa magazina pasi që është një pjesë shumë e frekuentuar e hyrjes në Prishtinë dhe është vendosur që për një kohë në maksimum 2 ose 3 ditë, të bllokohet hapësira që të zbatohet ky projekt. Ndërsa për rëndësinë e projektit dhe bashkëpunimet, foli edhe Dion Deva, Kryeshefi Ekzekutiv (CEO) dhe themeluesi në ‘TE Pema’, duke e konsideruar këtë projekt si një nevojë e veçantë për qytetarët.
“Ky bashkëpunim i dytë erdhi pas një bashkëpunimi të mëparshëm për ’eko ulëset’ në hapësirën e shesheve të kryeqytetit. Jemi profesionalizuar si ekip në ndërtimin e gjelbërimit urban dhe në automatizimin e proceseve, prandaj Komuna e Prishtinës ka vërejtur aftësinë tonë për realizimin e një projekti të tillë dhe në bisedë e sipër kemi vendosur që pjesa më e mirë është rrethi në hyrje të Prishtinës”, tregon Deva.
Sipas tij, sot pas takimit me OJQ Q’art, është menduar që e gjithë kjo hapësirë të jetë jo vetëm një kombinim i ‘Street Art’ ose vetëm i ‘Vertical Garden’, por një integrim i përbashkët për sa më shumë atraktivitet në hyrjen e Prishtinës. / KultPlus.com
Komisioni i Ministrisë së Kulturës për Shqyrtimin e Ankesave, ka anuluar projektin e Agjencisë Turke për Bashkëpunim dhe Koordinim (TIKA), për restaurimin e Hamamit të Madh në Prishtinë.
Lajmin e ka konfirmuar për Radion Evropa e Lirë, Qerim Ondozi, këshilltar për media i ministrit të Kulturës, Rinisë dhe Sportit, Hajrullah Çeku.
“Po, ky projekt është pezulluar. Arsyetimin për pezullimin e këtij projekti do ta bëjmë publik shumë shpejt”, ka deklaruar Ondozi të martën.
Hamami i Madh i Prishtinës pritej që të hynte në një fazë të restaurimit dhe shndërrimit në muze, dhe ishte paraparë që për këtë projekt të investoheshin rreth 1 milion euro.
Më shumë se gjysma e projektit ishte planifikuar të financohej nga Agjencia Turke për Bashkëpunim dhe Koordinim (TIKA) si dhe punimet ishte paraparë që të kryheshin nga një kompani që do të përzgjidhej nga Qeveria turke.
Projekti që ishte prezantuar në ueb-faqen e Komunës së Prishtinës, pati nxitur reagime të shumta për shkak se Hamamit të Madh, i cili është objekt i trashëgimisë kulturore, i ishte ndërruar emri në “Fatih Hamami Muzesi”.
Instituti i Kosovës për Mbrojtjen e Monumenteve (IKMM) pati njoftuar më 3 mars të vitit 2021, se ka refuzuar të trajtojë lëndën për Hamamin e Madh të Prishtinës, pikërisht për shkak të emërtimit.
Shqetësimet e ngritura për projektin për restaurimin e Hamamit të Madh të Prishtinës kanë shtyrë Inspektoratin për Trashëgimi Kulturore që të ndërmarrë hapa drejt rishikimit të projektit.
Agjencia Turke për Bashkëpunim dhe Koordinim (TIKA) pati hedhur poshtë akuzat e fshehjes së ndonjë qëllimi prapa ndihmës financiare për restaurimin e Hamamit të Madh të Prishtinës. / KultPlus.com
Filmi ‘To the Moon’ i regjisorit Irlandez Tadhg O’Sullivan që fitoi çmimin e parë në Festivalin e Filmit Irlandez, ka përfshirë edhe një poezi në gjuhën shqipe.
Bëhet fjalë për poezinë ‘Elegjia e Pyjeve’ e poetit të shquar shqiptar, Visar Zhiti.
Një film nga regjisori irlandez Tadhg O’Sullivan ku prania e hënës në film, letërsi e forma të tjera të artit në të gjithë planetin janë baza e tij.
Në të është një magjepsje e përbashkët me Hënën që kryqëzon kulturat dhe traditat për t’u bashkuar që formon pikën kryesore. Ai kombinon shkrime ndërkombëtare, klipe filmash nga 25 vende dhe muzikë me efekt soditës dhe atmosferik, i cili, së bashku me natyrën universale të hënës si një simbol.
Kjo është një ode kinematografike ndaj hënës e bërë në një pjesë të madhe nga burime arkivore të kombinuara me fragmente letrare. Interesante ideja se si njerëzit ndër epoka, kanë tërhequr nga hëna ëndrrat e arratisjes, mitet e parajsës, këngët e mallit dhe humbjes, histori të së ardhmes së humbur. / KultPlus.com
Pekini, kryeqyteti kinez, i vlerësuar si qyteti më tërheqës për talentet dhe ekspertët e huaj në Kinë vazhdon të kthejë vëmendjen ndaj Shqipërisë dhe gjuhës shqipe. Edhe pse në periudha të vështira të marrëdhënieve Shqipëri- Kinë, në vitet 78, katedra e gjuhës shqipe vazhdoi ekzistencën, duke përgatitur breza studentësh.
Njësoj si edhe adhurimi kinez për filmat shqiptarë, ku një nga më të pëlqyerit mbetet “Ngadhnjim mbi vdekjen”, për muzikën, ngjarjen, aktoren Eglantina Kume, e cila u prit si aktore e Holliwood-it edhe pas 40 vitesh në Pekin.
Qendra për Hapje dhe Dialog zhvilloi webinar-in e radhës të ciklit “Gjuha shqipe në universitetet e botës”. Ai pati në qendër Katedrën e Gjuhës Shqipe në Pekin, me profesoreshat e nderuara Chen Funghua dhe Ma Sai, të njohura ndryshe me emrat shqip Moza dhe Bora.
Tirana, Pekini, Vlora dhe Gjirokastra komunikuan përmes Qendrës për Hapje dhe Dialog, me lektorët nga Universiteti “Ismail Qemali”, Universiteti “Eqrem Çabej”, Gjirokastër, si dhe studentët e interesuar.
Chen Fenghua, drejtoreshë e katedrës së gjuhës shqipe dhe Qendrës së Studimeve Shqiptare në Universitetin e Gjuhëve të Huaja, Pekin (BFSU) solli një panoramë të përgjithshme për katedrën dje, sot dhe nesër.
Me këtë katedër, BFSU është bërë i pari universitet ku jepet gjuha shqipe në Kinë dhe i vetmi unviersitet me tri nivele të plota në kualifikimin e specialistëve të gjuhës Shqipe. Historikisht universiteti me përgatitjen e shumë talentëve diplomatikë, është njohur si “Djepi i diplomatëve” në Kinë. Pedogogët veteranë si Yin Changliang, Xia Zhen, Jin Bing, Zhang Linhui, Xiao Guifen dhe ekspertët shqiptarë si Agron Fiço, Ruzhdi Stringa etj. kanë krijuar një bazë të shëndoshë të kësaj katedre, ku janë të diplomuar 173 studentë në bachelor, 6 mastër dhe 3 doktorantë.
Ky webinar përkoi me dy përvjetorë të rëndësishme të BSFU-së: 80-vjetori i themelimit të universitetit dhe me 60-vjetorin e themelimit të katedrës së shqipes në këtë universitet. Themelimi i kësaj katedre, e cila jo vetëm ka pasur vazhdimësi, por edhe zhvillime të mëtejshme, lidhet me emrin e prof. Agron Ficos, të cilin vetë Universiteti i Gjirokastrës, përfaqësuar në takim nga profesoresha Spiridhulla Poçi, e mban në vëmendje si një figurë nderi i këtij qyteti.
Pas themelimit në vitin 1961 të ciklit të studimeve Bachelor, katedra është pasuruar në vitin 2000 me pranimet në nivelin Master. Më vonë, në vitin 2014 kjo katedër u pasurua me ciklin e studimeve doktorale. Përveç mësimdhënies, kjo katedër i kushton rëndësi edhe studimeve albanologjike. Prej vitit 2017 funksionon si e tillë Qendra e Studimeve Albanologjike pranë këtij universiteti.
Ky universitet konsiderohet si një model studimi për gjuhët e huaja, duke u quajtur ndryshe edhe “djepi i diplomatëve”.
Zhvillimi i tri cikleve të plota të studimit të shqipes në këtë universitet, veç faktit se i pajis studentët me diploma ndërdisiplinore, jep gjithashtu mundësinë që tri vitet e para të studimit të kryhen pranë këtij universiteti dhe më pas viti i fundit në universitetet ku studiohet gjuha shqipe në Shqipëri.
Prof. Merkuri dhe prof. Poçi e panë këtë takim si një mundësi për të rinisur një marrëveshje të mëparshme ndëruniversitare, e cila ekziston si një kontratë kuadër, e cila ka nevojë të çohet më tej. U përmendën takimet në konferenca shkencore ndërkombëtare të zhvilluara midis universiteteve , si dhe u theksua dëshira për të pasur programe bashkëpunimi dhe shkëmbimi.
Po ashtu studentët folën për ndjesinë e tyre për studimin e gjuhës shqipe dhe për interesin e tyre në projektet e shkëmbimeve studentore.
Ma Sai, solli në vëmendje punën e bërë në fushën albanologjike, duke përmendur sidomos punën për hartimin e teksteve dhe fjalorëve.
Këtë takim e bëri mjaft interesant edhe pjesëmarrja e znj. Eranda Allmetaj, Eksperte e Gjuhës Shqipe dhe Pedagoge në BFSU, e cila e ka kryer doktoraturën e saj pranë kësaj katedre dhe tashmë jep kontributin e vet si eksperte e gjuhës shqipe në këtë universitet.
Prej këtij webinar-i, ashtu si edhe në webinar-et paraardhëse të zhvilluara nga Qendra për Hapje dhe Dialog për studimin e shqipes në Mynih, Kozencë, Sofje dhe Vjenë, del edhe njëherë në pah interesi mjaft i lartë i studentëve dhe i pedagogëve për të pasur shkëmbime dhe bashkëpunime ndëruniversitare.
Cikli i webinar-eve do të vazhdojë edhe me katedra të tjera ku studiohet gjuha shqipe në botë. /KultPlus.com
Një seancë e Këshillit të Sigurimit të Kombeve të Bashkuara ku temë do të jetë Kosova, do të mbahet sot pasdite në Nju Jork të Shteteve të Bashkuara të Amerikës.
Gazeta Express mëson se Kosova në këtë seancë do të përfaqësohet nga zëvendëskryeministrja dhe ministrja e Punëve të Jashtme dhe Diasporës, Donika Gërvalla.
Në seancën e cila do të kryesohet nga Vietnami dhe do të zhvillohet në mënyrë elektronike, do të diskutohet Raporti i Sekretarit të Përgjithshëm të OKB-së mbi punën e UNMIK për periudhën nga shtatori 2020 deri në mars 2021.
Raporti i fundit i Sekretarit të Përgjithshëm të OKB-së, Antonio Guterres mbi punën e UNMIK-ut përfshin zgjedhjet e parakohshme parlamentare të Kosovës më 14 shkurt dhe aktakuzës e Prokurorisë Speciale në Hagë kundër ish-udhëheqësve të UÇK-së në nëntor të vitit të kaluar si ngjarjet kryesore politike.
Raporti thekson se këto ngjarje e kanë ngadalësuar dialogun midis Kosovës dhe Serbisë dhe se paqja e qëndrueshme, stabiliteti dhe zhvillimi socio-ekonomik në Kosovë dhe rajon varen nga progresi i qëndrueshëm i dialogut që synon normalizimin e marrëdhënieve midis dy vendeve.
Së fundmi, Kosovën në Këshillin e Sigurimit të Kombeve të Bashkuara e përfaqësoi ish-kryediplomati, tani kryeparlamentari i Kosovës, Glauk Konjufca. / KultPlus.com
Një takim për të prezantuar librin më të fundit të prof. Lucia Nardin mbi figurën e Skënderbeut do të mbahet të dielën, më 18 prill dhe organizohet nga shkolla shqiptare “Scanderberg Parma”, botimet Besa, Albania Nevvs, me iniciativë të shoqatës “Forum Donne Indipendenti” me qendër në Parma dhe shoqatës Aquasport Terme, në bashkëpunim të ngushtë me grupin “Mësoni shqip-Padova”.
Ky takim do të nisë një sërë iniciativash për t’i dhënë zë shumë fakteve historike, arkivave, mediave dhe botimeve që dëshmojnë për lidhjen e fortë të dy vendeve dhe kontributin e Shqipërisë në Evropë nga antikiteti deri më sot.
Libri “Skënderbeu, një biografi e rizbuluar” është shkruar në Venecia nga Giancarlo Saraceni dhe është botuar në 1600. E qartë, koncize, dhe larg qasjeve ideologjike, ajo përqendrohet në teknikat ushtarake që i dhanë epërsi Skënderbeut mbi ushtri më të mëdha në numër se sa të tijat.
Një biografi që është rezultat i një konkretizimi krejt venecian, por i hapur për epikën dhe përrallën, dëshmi se sa ka qenë Shqipëria e pranishme në historinë kulturore dhe artistike të Serenissima.
Studiuesja Lucia Nardin nga Venecia ka kaluar shumë vite në Shqipëri duke dhënë mësime dhe duke bërë hulumtime. Ajo ka botuar “Statutet e Shkodrës”, duke e sjellë atë në dritë nga biblioteka e muzeut venecian: Një “monument” i historisë mesjetare të Shqipërisë.
Ajo rindërtoi fenomenin e migracionit shqiptar në provincat veneciane midis shekujve XV dhe XVI me librin “Migrimet dhe integrimi”. Rasti i shqiptarëve në Venedik (1479-1552). Përveç kësaj, studioi traditën ikonografike të Gjergj Kastriot Skënderbeut në anijen e Dukës së Venecias, të famshmin Bucintoro.
Në Shqipëri u botua edicioni dygjuhësh “Shqipëria e rizbuluar” (Onufri, 2012). / Diaspora Shqiptare / KultPlus.com
Albumi i këngëtarit shqiptar Raif Hyseni është nominuar për çmimin “CD of the Year” nga “Accordion Stars Magazine” në New York. Këngëtari shqiptar prej vitesh jeton në Shtetet e Bashkuara të Amerikës dhe vitin që lam pas vendosi që investimin e tij në muzikë për vite ta investojë një album, si një trashëgimi e vlerave etnomuzikore dhe bashkëpunimeve të shumta ndër vite.
Lajmi për nominimin e albumit të Hysenit është bërë i ditur nga Anna Cordoba, kryeredaktore e Revistës. Bordi Redaktues dhe shkrimtarët e revistës “Accordion Stars” kanë përzgjedhur disa personalitete të fizarmonikës për vitin 2021, ndër to edhe bashkëshortin e këngëtares së njohur të muzikës popullore shqiptare, Merita Halili, Raif Hysenin.
CD-album i Raif Hysenit u publikua në dhjetor të vitit 2020. Në album marrin pjesë 28 muzikantë. Muzikantët janë shqiptarë nga Shqipëria, Kosova dhe Maqedonia. Por gjithashtu marrin pjesë edhe muzikantë amerikan nga Nju Jorku, Nju Xhersi, Konektikat, Illionis, Miçigen, Nju Meksiko, Arizona, Finladez e Turq. / Diaspora Shqiptare / KultPlus.com
