Morcheeba Band me ritimin unik në një koncert për 15 vjetorin e shpalljes së Pavarësisë së Kosovës

Kryeqyteti me kënaqësi njofton për koncertin e Morcheeba Band, me rastin e 15 vjetorit të Shpalljes së Pavarësisë së Kosovës, përcjell KultPlus.

Sipas Komunës së Prishtinës, koncerti do të mbahet në Pallatin e Rinisë dhe Sporteve, duke filluar nga ora 20:00.

“Bëhuni gati për të vallëzuar nën ritmin e shkrirjes unike të trip-hop, down-tempo dhe muzikës botërore të Morcheeba, derisa ata performojnë hitet e tyre ikonike.

Para performancës së Morcheeba në skenë, warm-up artistët La Fazani dhe Shpat Deda do të na zbukurojnë natën me performancat e tyre elektrizuese, të shoqëruar nga grupet e tyre të talentuara. Këta artistë do të na argëtojnë dhe do të sigurohen që publiku të jetë në frymën e duhur për të shijuar plotësisht performancën kryesore.

Pasi Morcheeba të ketë mbaruar performancën, festa do të vazhdojë me DJ ADRIAN, i cili do t’na sjellë hitet më të fundit. Ky koncert premton të jetë një eksperiencë e paharrueshme që nuk do të donit ta humbisnit”, thuhet në njoftim.

Rezervoni biletat tuaja tani KËTU. / KultPlus.com

Diskutohet menaxhimi i integruar i qendrës historike të Prishtinës

Gjetjet e para të studimit të fizibilitetit drejt Menaxhimit të Integruar të Qendrës Historike të Prishtinës, janë duke u diskutuar nga përfaqësues të MKRS-së dhe MMPHI, Kuvendit të Kosovës, Komunës së Prishtinës dhe OJQ-ve.

Anëtarët e grupit punues po shqyrtojnë analizën mbi gjendjen aktuale të Qendrës nga perspektiva e strukturës urbane, kornizës ligjore dhe kufijve të qendrës historike.

Projekti “Studimi i fizibilitetit dhe plani i menaxhimit për qendrën historike të Prishtinës” synon të integrojë trashëgiminë kulturore në një zhvillim të qëndrueshëm, të gjelbër dhe gjithëpërfshirës për të ardhmen e kryeqytetit.

Ai financohet nga MKRS dhe mbështetet nga UN-Habitat Kosovë, përmes Programit të Zhvillimit Gjithëpërfshirës të financuar nga Qeveria e Suedisë. / KultPlus.com

Komuna e Prishtinës: Deri në fund të vitit do të trajtohen 5000 qen endacakë

Deri në fund të vitit, Komuna e Prishtinës synon t’i trajtojë 5000 qen endacakë, pas lloteve të shpallura për prokurim publik, kështu tha këshilltar i kryetarit të Komunës së Prishtinës, Bajram Gecaj.

Gecaj tha se çdo vit janë ndarë nga 70 mijë euro për trajtim të qenve endacakë. Sipas tij, me këtë shumë bëhej trajtimi i rreth 700 qenve, anipse numri në Prishtinë konsiderohet të jetë nga 5000-10000 qen endacakë.

i tha se tani janë ndarë një milion euro për trajtim të problemit me qentë endacakë. Me 6 llotet e fundit ka thënë se numri i qenve të trajtuar do të shkojë nga 720 në rreth 5 mijë sivjet. Sipas tij, mundësitë e keqtrajtimit të procesit të trajtimit janë minimale pasi “do të sigurohet incizimi i kapjes, trajtimit dhe lëshimit, dhe do të vendosen çipa me të gjitha informatat”.

Gecaj në KTV ka folur edhe për një qendër të trajtimit të qenve endacakë, të nisur në Hajvali, ku tha tha se në të do të bëhet trajtimi dhe mbajtja e përkohshme. Pas trajtimit, sipas tij, qentë janë më pak agresivë, por jo krejtësisht joagresivë.

Gecaj ka apeluar që niveli qendror të merret më urgjent me këtë çështje.

Të hënën, një qen endacak kishte sulmuar një 4-vjeçar në kopshtin e një çerdheje në Prishtinë. / KultPlus.com

“Dita Ndërkombëtare pa Makina”, një mori aktivitetesh sot në kryeqytet

Me rastin e shënimit të “Ditës Ndërkombëtare pa Makina”, sot në Kryeqytet do të ketë një mori aktivitetesh me qëllim të promovimit të lëvizjes së lirë, udhëtimit me transport publik dhe formave të tjera alternative të transportit, përcjellë KultPlus.

Me këtë rast, sot do të lirohen nga pagesa e Trafikut Urban të gjithë qytetarët.

Ky organizim realizohet nga Komuna e Prishtinës në bashkëpunim me Ministrinë e Mjedisit, Planifikimit Hapësinor dhe Infrastrukturës dhe me Marakli t’Biciklave. / KultPlus.com

Me rastin e shënimit të “Ditës Ndërkombëtare pa Makina”, sot në Kryeqytet do të ketë një mori aktivitetesh me qëllim të promovimit të lëvizjes së lirë, udhëtimit me transport publik dhe formave të tjera alternative të transportit, përcjellë KultPlus.

Prishtina planifikon ta kthejë rrugën “Rexhep Luci” në një hapësirë për shëtitje dhe argëtim

Komuna e Prishtinës po planifikon ta shndërrojë rrugën “Rexhep Luci” në Prishtinë, në një rrugë për shëtitje dhe argëtim, shkruan KultPlus.

Nënkryetari i Prishtinës, Alban Zogaj, përmes një njoftimi në llogarinë e tij zyrtare në “Facebook”, ka bërë të ditur se po planifikojnë të diskutojnë për këto çështje me banorët e lagjes.

Madje ai bëri një krahasim të mundshëm, duke përfshirë një lagje nga Vjena e Austrisë.

“Rruga ‘Rexhep Luci’ lehtësisht mund të kthehet në hapësirë publike për ecje dhe argëtim! Jemi duke e analizuar dhe do ta diskutojmë me banorët e lagjes”, ka shkruar Zogaj.

Një nga rrugët më të frekuentuara në Prishtinë është pikërisht kjo lagje, pasi ka lidhje edhe me rrugën “Luan Haradinaj” në njërën anë dhe me sheshin “Nëna Terezë”. /KultPlus.com

Komuna e Prishtinës bën përgatitjet për projektin “Ndërtimi i Fushës së Minigolfit”

Komuna e Prishtinës është duke bërë përgatitjet për projektin: “Ndërtimi i Fushës së Minigolfit”.

Duke e vlerësuar bashkëpunimin me qytetarët, Komuna e Prishtinës fton qytetarët në një takim konsultativ për të diskutuar rreth këtij projekti.

Takimi do të mbahet të enjten, me datë 08 shtator 2022, duke filluar nga ora 17:00 deri në orën 18:00, në Parkun e Taukbahçes, pranë Restaurant “Parku”. / KultPlus.com

Komuna e Prishtinë në bashkëpunim me KFOR-in me aksion në ndihmë të qytetarëve të Ukrainës

Komuna e Prishtinës, në bashkëpunim me KFOR-in Ukrainas, ka ndërmarrë aksionin për të ofruar ndihmë për qytetarët e Ukrainës, përcjell KultPlus.

Kjo iniciativë do të fillojë nga dita e hënë ku të gjithë qytetarët e Prishtinës, vullnetarisht do të mund të kontribuojnë duke zgjedhur një apo disa nga produktet e listuara, të cilat mund të dorëzohen në një nga 18 bashkësitë lokale.

Njoftimi i Komunës së Prishtinës:

💙🤍 Prishtina për Ukrainën. 💙💛

Komuna e Prishtinës, në bashkëpunim me KFOR-in Ukrainas, ka ndërmarrë aksionin për të ofruar ndihmë për qytetarët e Ukrainës.

Të gjithë qytetarët e Prishtinës, vullnetarisht do të mund të kontribuojnë duke zgjedhur një apo disa nga produktet e listuara, të cilat mund të dorëzohen në një nga 18 bashkësitë lokale të Kryeqytetit, çdo ditë, duke filluar nga dita e hënë, me datë 1 gusht 2022, deri të enjten, me datë 4 gusht 2022.

Me dashni, nga Prishtina. / KultPlus.com

Lista e fëmijëve të pranuar në çerdhet publike të Prishtinës për këtë vit

Komuna e Prishtinës ka publikuar listën e pranimit të fëmijëve në institucionet parashkollore për vitin 2022-2023.

Rezultatet janë për institucionet parashkollore “Dielli”, “Xixëllonjat”, Yllkat”, “Lulevera”, “Buzëqeshja”, “Fatosat”, “Gëzimi Ynë” dhe “Ardhmërnia”.

Listën mund ta gjeni duke klikuar këtu. / KultPlus.com

“Rame Lahaj International Opera Festival” këtë vit mbahet nën patronazhin e Komunës së Prishtinës

Festivali i parë Operistik në vend dhe rajon, “Rame Lahaj International Opera Festival” këtë vit, me përkrahje unanime do të mbahet nën patronazhin e Komunës së Prishtinës, shkruan KultPlus.

Lajmin e ka bërë të ditur, kryetari i Komunës së Prishtinës, Përparim Rama i cili është shprehur shumë i lumtur.

“Jam tejet i lumtur që sivjet, me përkrahjen unanime të komunës së Prishtinës, marrim nën patronazh Festivalin e parë Operistik në vend e rajon, Rame Lahaj International Opera Festival.

Për artistin tonë Rame Lahaj nuk kam pse të them shumë, pasi vlerësimin ia ka dhënë bota, e ia kam ndjekur shfaqjet edhe personalisht në Berlin e në Londër. Por ajo që për mua, Prishtinën dhe Kosovën ka rëndësi shumë, prandaj edhe do ta përkrahim gjithmonë, është investimi në platformën edukativo/arsimore, të ideuar për talentët lirikë të rinj e në karrierë, e po ashtu në mundësitë e depërtimit të tyre në arenën ndërkombëtare”, ka shkruar Rama.

RLIOF sivjet do të ketë 5 mbrëmje koncertale, ku përveç yjeve operistike nga shtete të ndryshme, vend të rëndësishëm në repertorin e festivalit do të zërë edhe muzika e mirëfilltë shqipe.

“I dashur Ramë Lahaj, Prishtina dhe vendlindja të mirëpresin ty dhe kolegët e tu ndërkombëtarë”, shkruan tutje Rama. / KultPlus.com

Flutra Zymi kundërshton mbajtjen e Sunny Hill Festival në Gërmi:  Ju jeni yje po njerëz nuk jeni, shihemi në gjykatë

Flutura Zymi e njohur edhe si aktiviste për mbrojtjen e ambientit ka dalë me një reagim pas njoftimit të Sunny Hill Festival, Komunës së Prishtinës dhe Ministrisë së Kulturës se ky festival do të mbahet në lokacionin e Gërmisë.

Flutra Zymi nëpërmjet rrjeteve sociale ka ftuar ambientalistët, aktivistët, qytetarët dhe shoqërinë civile që të dalin në protestë, në mbrojtje të Gërmisë.

KultPlus ju sjell reagimin e plotë të Zymit.

Ftoj të gjithë ambientalistët, aktivistët, qytetarë dhe shoqërinë civile se shpejti në protestë në mbrojtje të Gërmisë. Ju njoftojmë për datën e protestës së shpejti.

Nuk duhet leju një grusht analfabeta që qeverisine me u sjell si ky vend është i tyre dhe vetëm i tyre. Shpresoj që Instituti i Kosovës për mbrojtjen e Natyrës nuk ka ba këso lëshime.

Zymi poashtu po për të njëjtin organizim ka reaguar edhe me një status tjetër, duke paralajmëruar se me të gjithë do të shihet së shpejti në gjykatë.  

Ju definitivisht jeni njerëz egoista, mizor të pa kulturë. Njerëz pa pikë respekti për natyrën biodiversitetin. Ju jeni yje po njerëz nuk jeni e as kurrë nuk do bëheni. Shpresoj natyra sa më shpejt të na hakmerret se njeriu nuk e meriton këtë planet. Shihemi në gjykatë që të gjithë!/ KultPlus.com

Jehona Gjurgjeala dhe Egzon Gashi, pjesë e komisionit për përzgjedhjen e drejtorëve të çerdheve dhe shkollave të Prishtinës

Jehona dhe Egzoni, dy ekspertët e pavarur të arsimit që nga sot zyrtarisht do të jenë pjesë e komisionit për përzgjedhjen e drejtorëve dhe zëvendës-drejtorëve të çerdheve dhe shkollave të Prishtinës.

Jehona Gjurgjeala është themeluese dhe Drejtoreshë Ekzekutive e “Organizatës Kosovare për Talent dhe Arsim – TOKA”. Ajo ka përfunduar studimet bachelor dhe master në London School of Economics and Political Science. Jehona po ashtu ka përfunduar programin profesional ne Politika te Edukimit, nga Georgetown University. Ajo ka përvojë mbi dhjetë vjeçare në pozita menaxheriale në ndërmarrje ndërkombëtare – me zyra në Oksford, Londër dhe Kopenhage.

Ndërsa Egzon Gashi është është themelues dhe Drejtor Ekzekutiv i “Teach For Kosova”, një organizatë joqeveritare e cila synon të përmirësojë cilësinë e sistemit arsimor në Kosovë. Egzoni ka studiuar marrëdhënie ndërkombëtare në Universitetin e Oxfordit, ka Master në Edukim në Johns Hopkins University, ku edhe aktualisht është duke ndjekur studimet e doktoraturës në Lidership dhe Sipërmarrje në Arsim.

Jehona dhe Egzoni janë ndër profesionistët më të mirë të fushës. / KultPlus.com

Me rastin e “Ditës së Çlirimit”, Komuna e Prishtinës shpall qytetar nderi gazetarin britanik Vaughan Smith

“Dita e Çlirimit” të kryeqytetit është shënuar sot në Kuvendin Komunal të Prishtinës, me ç’rast gazetari britanik Vaughan Smith është shpallur qytetar nderi për pasqyrimin e luftës së Kosovës në vitin 1999, përmes punës së tij.

Kryetari i Prishtinës, Përparim Rama në seancën solemne tha se gazetari britanik Smith përmes punës së tij ka pasqyruar luftën e fundit në vend.

Ai gjatë këtij sesioni ka prezantuar edhe punën e gazetarit Smith përmes një video incizim.

“Ndër ata që kontribuuan drejt realizimit të ëndrrës tonë për liri ishin dhe shumë të huaj, e që i treguan botës me fjalë e me pamje për ato që po ndodhnin në Kosovë. Gazetar të dedikuar me punën e tyre të cilët bën që zëri ynë të dëgjohej e sakrifica jonë të shihej botërisht ”, ka thënë Rama duke paraqitur një xhirim të shkurtër të punës së gazetarit Smith.

Rama po ashtu tha se sot 23 vite më parë Prishtinës iu kthye shpresa, e shpërblimi i sakrificave shumë vjeçare për të drejtën më të shtrenjtë, lirinë.

“Jemi mbledhur në këtë seancë solemne ta shënojmë këtë ditë kaq të rëndësishme për kryeqytetin dhe mbarë vendin, ‘Ditën e Çlirimit të Prishtinës’. Si sot 23 vite më parë Prishtinës iu kthye shpresa, e shpërblimi i sakrificave shumë vjeçare për të drejtën më të shtrenjtë, lirinë. Kjo ditë shënon fundin e bombardimeve të NATO-s, rrjedhimisht fundin e luftës së Serbisë në vendin tonë. Në kujtesën tonë, kjo ditë ende mbetet ditë e shenjtë, sepse mijëra fëmijë, gra e burra mijëra familje kosovare sakrifikuan jetën për ëndrrën tonë të përbashkët…Fal tyre sot atë ëndërr e gëzojmë si realitet të lirë në vendin tonë. Fal tyre 11 qershori është bërë simbol i shpresës, i fitores së të mirës ndaj të keqes, është bërë fillimi i një kapitulli të ri, të cilin ende jemi duke e shkruar të gjithë së bashku”, tha Rama.

Ai po ashtu u shpreh se shumëçka ka ndryshuar për të mirë nga paslufta e deri më sot, por siç theksoi Rama “rruga është ende e gjatë”.

“Në këtë kapitull të ri është tash radha jonë që ta nderojmë veprën e atyre që sakrifikuan për liri, por jo vetëm me fjalë por dhe me vepra. Sot u përulemi ushtarëve të UCK-së, atyre që rezistuan për të parë Prishtinën të lirë, dëshmorëve dhe familjeve të tyre. U përulemi atyre që dhanë kontribut të pashoq, që hapën shtëpitë e tyre për shkolla, u përulemi atyre që u dëbuan dhe zgjodhën sërish Prishtinën…le ta kujtojmë 11 qershorin që të kujtojmë që misioni ynë që të punojmë për brezat që po vijnë për hir të sakrificës së tyre që sot nuk janë më në mesin tonë”, ka thënë Rama. /KultPlus.com

Trafiku Urban falas në vikend, Komuna e Prishtinës synon fuqizimin e transportit publik

Komuna e Prishtinës po synon që të fuqizojë sa më shumë transportin publik dhe atë alternativ, me biçikleta dhe e-scooters, shkruan KultPlus.

Përmes një njoftimi në rrjete sociale, KP ka njoftuar se transporti i Trafikut Urban për këtë vikend (21 dhe 22 maj) do të jetë falas.

“Të dashur qytetarë, Ju njoftojmë se nesër dhe pasnesër, me datë 21 dhe 22 maj, transporti me Trafiku Urban, do të jetë pa pagesë.Për të mirën e Kryeqytetit, ju inkurajojmë që sa më shumë të përdorni transportin publik dhe alternativ”, thuhet në njoftimin e Komunës së Prishtinës.

Gjatë këtyre datave, KP gjithashtu ka njoftuar se do të vazhdojë testimi i dytë i shndërrimit të gjithë unazës qendrore të Kryeqytetit në qarkore njëkahëshe për automjetet. /KultPlus.com

Komuna e Prishtinës do t’i mbështes me 500 euro lehonat me asistencë sociale

Komuna e Prishtinës  do t’i mbështes me 500 euro nënat lehona të cilat janë përfituese të skemës sociale.

Kjo u bë e ditur gjatë seancës së Kuvendit Komunal, të martën.

Kreu i Prishtinës, Përparim Rama, tha se një propozim tjetër i tyre është subvencionimi me 70 euro që familjet që marrin më pak se 500 euro t’i dërgojnë fëmijët në çerdhe.

Sipas Premtim Fazliut nga drejtoria për Mirëqenie Sociale, nga muaji janar deri në muajin prill kanë qenë 17 lindje të kësaj kategorie.

Ndërkaq, ndihma përfshinë periudhën prej datës 1 janar 2022 dhe me mundësi që të vazhdojë edhe në vitet e ardhshme.

Në bazë të kalkulimeve të prezantuara, brenda një viti rreth 70 nëna lehona do jenë përfituese të kësaj skeme, ose në kosto financiare i bie 35 mijë euro. / KultPlus.com

Lansohet thirrja e vitit 2022 për fushatën rajonale “Kryetari komunal më miqësor me Romët, Ashkalinjtë dhe Egjiptianët”

Organizata “Zëri i Romëve, Ashkalinjve dhe Egjiptianëve’’ dhe Rrjeti ERGO po lansojnë thirrjen e vitit 2022 për fushatën rajonale “Kryetari komunal më miqësor me Romët, Ashkalinjtë dhe Egjiptianët” në kuadër të projektit “Romani Women Power of Change in the Western Balkans and Turkey”.

Fushata synon të rrisë ndërgjegjësimin dhe ndryshimin e qëndrimeve kundrejt përfshirjes së romëve, ashkalinjve dhe egjiptianëve si dhe të kontribuojë në tejkalimin e barrierave të shumta për gjithëpërfshirjen e tyre.

Pjesë kyçe e kësaj fushate është konkursi “Kryetari Komunal më Miqësor me Romët, Ashkalinjët dhe Egjiptianët” i cili po zhvillohet paralelisht në të gjithë rajonin e Ballkanit Perëndimor dhe në Turqi.

Komuna fituese do të përfaqësohet nga kryetari i saj në një cermoni të ndarjes së çmimeve që do të mbahet në kuadër të Javës së Romëve nga data 16 deri më 19 Maj 2022, në Bruksel, në të cilën do të marrin pjesë të gjithë kryetarët e komunave nga vendet e Ballkanit Perëndimor dhe Turqia dhe përfaqësues të lartë të Drejtorisë së Përgjithshme për Fqinjësinë dhe Negociatat për Zgjerim të Komisionit Evropian, (DG NEAR).

Për më shumë informacione rreth çmimit, mënyrës së aplikimit si dhe formularin që duhet të plotësohet dhe të dorëzohet bashkë më dokumentet mbështetëse që kërkohen në aplikim, ju lutemi klikoni në linkun më poshtë:

https://prishtinaonline.com/lajmet/3516/fushata-rajonale-kryetari-komunal-me-miqesor-me-romeve-ashkalinjte-dhe-egjiptianet?fbclid=IwAR24Y_AQ1xtJ29AXNdrn2ICI3dkiHzbehyb5mGnARkIQSZr94xVUXXZBmo8 / KultPlus.com

Komuna e Prishtinës anulon testimin e alarmit nesër

Komuna e Prishtinës e ka anuluar testimin e alarmit nesër, për shkak se do të mbahet manifestimi i Epopesë së Ushtrisë Çlirimtare të Kosovës në shëtitoren e Prishtinës.

“Komuna e Prishtinës ju njofton se, për shkak se nesër, të shtunën më 5 mars, do të mbahet manifestimi i Epopesë së UÇK-së në shëtitoren e Prishtinës, Komuna anulon testimin e Sistemit të Alarmit Publik”, thuhet në njoftim.

Për nesër Komuna e Prishtinës pati paraparë testimin e Sistemit të Alarmit Publik, dy herë nga 30 sekonda. / KultPlus.com

Të shtunën, Komuna e Prishtinës teston sistemin e alarmit publik

Komuna e Prishtinës ka njoftuar se të shtunën do të bëjë testimin e radhës të sistemit të alarmit publik në Prishtinë.

Testimi do të bëhet në orën 12:05, me tingull të njëtrajtshëm dy herë nga 30 sekonda.

“Këtë të shtunë, më 5 mars, në orën 12:05, Komuna e Prishtinës do të bëjë testimin e radhës së Sistemit të Alarmit Publik me tingull të njëtrajtshëm, dy herë nga 30 sekonda”, thuhet në njoftim./ KultPlus.com

Agron Shujaku prezanton një pjesë të projektit që ka synim realizimin e veprave të kompozitorëve kosovar për piano 4 duar (VIDEO)

Piansiti Agron Shujaku së fundmi ka prezantuar një pjesë të projektit që ka për synim realizimin e veprave të kompozitorëve kosovar për piano 4 duar, përcjell KultPlus.

Bëhet fjalë për veprën për piano 4 duar “Pranvera në Prishtinë” e kompozuar në origjinal nga Musa Piperku, që është transformuar në një vepër të bukur pianistike nga kompozitori Kreshnik Aliçkaj.

Piansiti Shujaku tutje bëri të ditur se realizimi i projektit të CD me vepra të kompozitorëve kosovar është subvencionuar nga Ministria e Kulturës, Rinisë dhe Sportit si dhe Komuna e Prishtinës.

Më poshtë KultPlus ju sjell postimin e tij të plotë:

Te nderuar miq,

Po ju prezentoj një pjesë të projektit që ka synim realizimit të veprave të kompozitorëve Kosovar për piano 4 duar.

Është vepra për piano 4 duar “Pranvera në Prishtinë” e kompozuar në origjinal nga Musa Piperku, që është transformuar në një vepër të bukur pianistike nga kompozitori Kreshnik Aliçkaj.

Realizimi i projektit të CD me vepra të kompozitorëve kosovar është subvencionuar nga Ministria e Kulturës, Rinisë dhe Sportit si dhe Komuna e Prishtinës.

Faleminderoj poashtu Teatrin Profesionist “Istref Begolli” për kontributin e tyre si partner i projektit.
Një falemnderim i veçantë për Memli Kelmendi për kontributin e tij në si inxhinier zëri në realizimin e projektit. / KultPlus.com

‘Prite n’Shesh’, aktiviteti nga Komuna e Prishtinës fillon më 10 dhjetor

Komuna ka bërë të ditur se edhe këtë vit do të organizohet aktiviteti “Prite n’Shesh”.

Sipas Komunës, ky aktivitet do të mbahet nga 10 dhjetori deri më 31 dhjetor.

Njoftimi i plotë i komunës:

Komuna e Prishtinës ka kënaqësinë të ju ftojë në aktivitetin e njohur të komunës të quajturin Prite n’Shesh!

Ky aktivitet hapet me 10 Dhjetor 2021 duke filluar nga ora 20:00 dhe do të vazhdojë deri më 31 Dhjetor 2021.

Gjithashtu, 26 bizneset fituese ftohen nesër me datën 8 Dhjetor prej orës 14:00 në Komunën e Prishtinës për t’a tërhequr shortin për numrin e shtëpizës që do të posedojnë përgjatë këtij aktiviteti.

Falënderojmë të gjitha bizneset që aplikuan!/KultPlus.com

Përmbyllet aktiviteti ‘Akull n’Verë’ (FOTO)

Komuna e Prishtinës njofton se e përmbyllën aktivitetin Akull n’Verë, duke thënë se për tridhjetë ditë arritën që bashkërisht t’ia kthejnë sado pak shpirtin Prishtinës, transmeton KultPlus.

“Si Komunë jemi të lumtur që ky aktivitet u përmbyllë me sukses dhe që këtë verë, sado pak, arritëm ta kremtojmë bashkë me bashkatdhetarët tanë, duke lënë pas një vit të vështirë”.

“Jemi të lumtur po ashtu që arritëm të përkrahim biznese të vogla gastronome përgjatë procesit të tyre të rimëkëmbjes nga pandemia, si dhe shumë artistë lokal që ju dha mundësia e performimit përmes subvencioneve nga Drejtoria e Kulturës”, thuhet mes tjerash në postimin e Komunës së Prishtinës në Facebook. / KultPlus.com

Nëshkruhet marrëveshje për intervenim artistik në objektin ‘Kino Rinia’

Sot drejtori në Drejtorinë e Kulturës, Adrian Berisha ka bërë të ditur se është nënshkruar një marrëveshje për një nga objektet më të rëndësishme kulturore, ‘Kino Rinia’, përcjellë KultPlus.

KultPlus ju sjell njoftimin e tij të plotë:

Edhe nje marreveshje te rendesishme e nenshkruam sot. Kesaj rradhe me Shtatëmbëdhjetë per njerin nga objektet me te rendesishme kulturore te qytetit tone, objektin e “KINO RINIA”.
“Kino Rinia” ka kohe qe po e pret shpetimin dhe pikerisht per nje hap tutje ne kete drejtim, sot kemi nenshkru marreveshje bashkepunimi per hulumtim e intervenim artistik ne kete objekt.
Ky objekt ku per me shume se gjysme shekulli ka qene vendtakim per filmdashesit, ka kohe qe ka mbet i braktisur e i pashfrytezuar, por tani bashke me Zyren Zvicerane per Bashkepunim (SDC) dhe Fondacionin Shtatembedhjete po synojme qe ta perdorim artin dhe kulturen si mjet i cili do te sherbejne per ringjalljen e objekteve te harruara.
Po ashtu po synojme te kete zgjerim te pjesemarrjes se komunitetit ne jeten publike duke zgjeru mundesite per artistet vizuale dhe interpretues.
Ta kthejme vemendjen tek objektet e braktisura dhe t’i shfrytezojme ne te mire te komunitetit. / KultPlus.com

Marrëveshje për rifunksionalizimin e Sahat Kullës

Sot u nënshkrua marrëveshja për bashkëfinancimin e restaurimit të Sahat Kullës, me Agjencinë e Kombeve të Bashkuara për Zhvillim – UNDP, përcjellë KultPlus.

Sahat Kullla, si një prej monumenteve me të shquara të trashëgimisë kulturore në Prishtinës, shumë shpejt pritet të rifunksionalizohet duke rikthyer kujtimet e së kaluarës sonë të përbashkët.

Projekti po realizohet me propozimin e studentëve të Fakultetit të Arkitekturës në Universitetin “Hasan Prishtina”, nën mentorimin e profesoreshës Florina Jërliu dhe asistentit të saj Rron Beqiri dhe do të implementohet bashkë me organizatën CHWB./ KultPlus.com

Të enjten nënshkruhet marrëveshja për restaurimin e Sahat Kullës

Të enjten do të nënshkruhet marrëveshja mes Komunës së Prishtinës dhe UNDP-së për restaurimin e Sahat Kullës, njofton Komuna e Prishtinës.

Marrëveshja do të nënshkruhet me fillim në ora 10:00 në afërsi të këtij objekti.

“Nesër nga ora 10:00 deri ora 10:35, Komuna e Prishtinës dhe UNDP do të nënshkruajnë marrëveshjen për restaurimin e Sahat Kullës, pranë këtij objekti kulturor. Më këtë rast, drejtori i Drejtorisë së Kulturës, Adrian Berisha si dhe përfaqësuesja rezidente e UNDP-së në Kosovë, Maria Suokko do të mbajnë një fjalë rasti”, thuhet nga Komuna e Prishtinës. / KultPlus.com

Prishtina feston fitoren e Distria Krasniqit, KOK-u pret medalje edhe nga sportistët e tjerë

Komiteti Olimpik i Kosovës (KOK) në bashkëpunim me departamentin e sportit dhe kulturës së Komunës së Prishtinës, kanë organizuar festë në sheshin “Zahir Pajaziti” në Prishtinë në nder të fitores së medaljes të artë të Distria Krasniqit në Lojërat Olimpike ”Tokio 2020”.

Musa Selimi anëtar i Bordit të Komitetit Olimpik të Kosovës, tha se pas Majlinda Kelmendit, tanimë po shndrisin edhe sportistë tjerë kosovarë.

Ai tha se nga Tokio 2020 presin edhe medalje tjera, ndërsa uroi të gjithë shqiptarët për triumfin e Distria Krasniqit.

“Pas Majlindës po shndrisin edhe yjet tjerë. Po shndrit një yll i cili sot i dha botës një kampione të vërtetë. Shpresojmë të kthehemi me numër më të madh të medaljeve pas disa ditëve. Vlerat olimpike po shndërrisin në Kosovë, rinia jonë e shkëlqyeshme po demonstron që Kosova jonë e dashur ka yje, ka njerëz me zemër të madhe që po na përfaqësojnë denjësisht. Urime Prishtinë, urime Kosovë. Urime të gjithë shqiptarëve kudo që janë”, tha ai.

Edhe Fitim Rexhaj nga drejtoria e departamentit të kulturës nga Komuna e Prishtinës, tha se presin nga sportistët tjerë rezultate të njëjta si të Distria Krasniqit. Edhe ky uroi të gjithë shqiptarët për këtë fitore historike.

“Ne presim rezultate të mira edhe nga sportistët tjerë. Ndërsa ne i përkrahim të gjithë sportistët kosovarë pa dallim dhe urojmë që nesër edhe Majlinda të sjell një rezultat të ngjashëm dhe të na gëzojë e të na bëjë krenar. Urojmë Distrian për këtë rezultat dhe shpresojmë që edhe sportistët e tjerë të na gëzojnë kështu. Gëzuar për të gjithë”, tha ai.

Në këtë mbrëmje ku pjesëmarrja ishte e madhe u ekspozuan video nga garat e Distria Krasniqit në ”Tokio 2020”, ndërsa u hodhën edhe fishekzjarrë të shumtë.

Më pas mbrëmja vazhdoi me interpretimin e këngëve nga disa bende të njohura muzikore. / KultPlus.com