Kryetari i Komunës së Prishtinës, Përparim Rama, ka njoftuar se e ka shkarkuar sot Drejtorin e Shërbimeve Publike, Ilirik Musliu.

Përmes një statusi në rrjetet sociale, Rama është shprehur se këtë vendim e mori për shkak të menaxhimit e mbeturinave, sepse sipas tij gjendja është alarmante.

“Të gjithë jemi dëshmitarë të gjendjes aktuale alarmante në Kryeqytet lidhur me menaxhimin e mbeturinave. Si Kryetar i Kryeqytetit, tash e një vit kam kërkuar në vazhdimësi nga drejtoria përkatëse zgjidhje të kësaj situate alarmante dhe të papranueshme. Por, përkundër të gjitha këtyre kërkesave, gjendja jo që nuk është përmirësuar, por përkundrazi është përkeqësuar. Andaj, sot, kam marrë VENDIM për të liruar nga detyra Drejtorin e Shërbimeve Publike”, ka shkruar Rama.

“Për më tepër, ju njoftoj se, në cilësinë e Kryetarit të Kryeqytetit, kam bërë përpjekje duke krijuar një Task Force dhe kam ndarë buxhet shtesë për këtë drejtori dhe ndërmarrjen përkatëse, por përkundër kësaj mbështetje të vazhdueshme nuk ka pasur rezultate nga drejtoria në fjalë. Prandaj, kam vendosur që të ndërhyjë dhe të marrë përsipër zgjidhjen e kësaj situate”, ka shkruar tutje Rama.

Para një viti u prezantua për herë të parë platformën SuperPuna. Përmes saj është synuar punësimi i garantuar i të rinjve të grup-moshës 18-25 vjeç.

SuperPuna konsiderohet se ka pasur një sukses të jashtëzakonshëm duke arritur që vetëm brenda një viti të bëj ndërmjetësimin e suksesshëm të punësimit të 9,394 të rinjve.

Duke e marrë parasysh këtë ndikim, tashmë Qeveria ka marrë vendim që të zgjerojë grup-moshat që përfitojnë nga kjo platformë nga 18-25 vjeç në 18-29 vjeç. / KultPlus.com

Kryetari i Bashkisë së Tiranës, Erion Veliaj priti në takim nënkryetaren e Bashkisë së Parisit, Anouch Toranian, së cilës i dhuroi në mënyrë simbolike “Sahatin e Tiranës” dhe bisedoi për rritjen e bashkëpunimit mes dy qyteteve.

Veliaj tha se Parisi dhe Tirana janë kthyer në laboratorë të ndryshimeve urbane.

“Jam shumë entuziast për Lojërat Olimpike në Paris. Ekipi ynë olimpik është një ekip modest, por qëllon që shumica e ekipit të Shqipërisë është në fakt edhe ekipi i Sport Klub Tiranës, ndaj mezi presim t’ju kthejmë vizitën në Paris. Jam shpresëplotë që disa nga sportistët tanë, ata të mundjes, të peshëngritjes, të atletikës, gjimnastikës, do të bëjnë një performancë dinjitoze. Shpresoj shumë që Lojërat Olimpike të jenë një sukses, në një botë të përçarë, në një botë që është në luftë, brenda Evropës të jetë edhe një mesazh për paqe dhe për të bashkuar njerëzit, siç sporti mund ta bëjë. Vend më ideal se Parisi, për këtë lloj dashurie të rigjetur të kombeve, nuk mund të kishte”, tha Veliaj.

Kryebashkiaku vlerësoi punën e homologes së tij në Paris, Anne Hidalgo, dhe shtoi se dy qytetet kanë shumë për të mësuar nga njëri-tjetri.

“Anne Hidalgo ka bërë histori suksesi në Paris dhe për këdo që mendon se ndryshimet vijnë lehtë, duhet të kuptojë që edhe në Paris ka debat për pistat e biçikletave, për ndryshimet klimaterike, edhe në Paris ka debat për linjat e autobusëve. Është mëse normale që në një hapësirë ku jetojnë miliona njerëz, qindra mijëra njerëz, të ketë debate për këto çështje, por ajo që kemi parë është që natyra njerëzore është njësoj. Siç është njësoj për të refuzuar ndryshime apo për të bërë rezistencë, ashtu është njësoj për ta përqafuar ndryshimin. Pra, fillimisht ka dyshime për ndryshimin, por kur ndryshimi vjen, njerëzit e përqafojnë”, u shpreh Veliaj.

Nga ana e saj, nënkryetarja e Bashkisë së Parisit, Anouch Toranian tha se mezi pret që Shqipëria të jetë pjesë e Lojërave Olimpike në Paris. Toranian përfaqësoi qytetin e saj Parisin në punimet e Samitit të B40, ku Tirana mori Presidencën./atsh / KultPlus.com

Gjatë viteve të fundit në shkollat fillore dhe të mesme në Kosovë ka rënie të numrit të nxënëseve, që si pasojë e kësaj disa shkolla në fshatra rrezikojnë të mbyllen.

Njohës të çështjeve të arsimit po vlerësojnë se rënia e numrit të nxënësve është si pasojë e rënies së natalitetit, migrimit fshat-qytet dhe emigrimit.

Numri i nxënësve në arsimin parauniversitar vit pas viti po shënon rënie, ku kjo dukuri është më shumë e shfaqur në shkollat e viseve rurale në komuna të ndryshme të vendit. Sipas të dhënave të Ministrisë së Arsimit krahasuar më vitin shkollor 2021/22 në këtë vit shkollor janë afër 14 mijë nxënës më pak.

Zyrtarë të Ministrisë së Arsimit në një përgjigje më shkrim për Radio Kosovën kanë bërë të ditur së njëri ndër faktorët që po ndikon në rënien e numrit të nxënësve është rënia e natalitetit.

“Në vitin shkollor 2021/22 në arsimin parauniversitar ishin gjithsej 327 mije e 676 nxënës. Në vitin shkollor 2022/23 ka një rënie të numrit të nxënëseve ku gjithsej ishin 318 mije e 947 nxënës. Ndërsa, në këtë vit shkollor është vërejtur edhe një rënie e numrit të nxënëseve në shkollat e nivelit parauniversitar, ku në këtë vit shkollor mësimin e ndjekin gjithsej 314 mijë e 006 nxënës”, thuhet në përgjigjen e ministrisë së Arsimit.

Se njëri ndër faktorët që po ndikon në rënien e numrit të nxënësve është rënia e natalitetit e thonë edhe njohës të fushës së arsimit.

Dukagjin Pupovci në një përgjigje për Radio Kosovën tha së faktorët të cilët po ndikojnë në rënien e numri të nxënësve në nivel vendi janë rënia e natalitetit, migrimi dhe emigrimi që viteve të fundit ka shënuar rritje.

“Pikë se pari është rënia drastike e natalitetit. Marrë parasysh që vitin e kaluar kanë qenë vetëm 22 mije lindje në Kosovë, ku së fundi Agjencia e Statistikave të Kosovës po numëron edhe lindjet e shtetasve të Kosovës jashtë vendit , thjesht po zvogëlohet numri i fëmijëve. Një faktor tjetër është migrimi fshat-qytet dhe faktori tjetër është emigrimi”, thekson ai.

Sipas Pupovcit, si pasojë e migrimit fshat- qytetet, shumë shkolla në viset rurale po rrezikojnë të mbyllen.

“Rënia e numrit të nxënësve po bën që shumë shkolla të fshatrave t’u vihet dryni. Edhe tash ne e shohim që në zona rurale numri i banorëve është shumë më i vogël, sepse kanë lëvizur që atje dhe numri i fëmijëve gjithnjë është më i vogël”, tha ai.

Dhjetëra shkolla në Kosovë, kryesisht në zona rurale, janë mbyllur viteve të fundit dhe shumë shkolla të tjera në Kosovë po funksionojnë me më pak se 10 nxënës në klasë. / KultPlus.com

Sot do të startojë Grand Slami prestigjioz i Parisit në sportin e xhudos.

Ekipi kosovar do të paraqitet me tetë xhudistë gjithsej, shkruan Gazeta Express.

Distria, Nora dhe Flaka ndeshën të premtën, Laura, Akili e Dardani ndeshën të shtunën, kurse Loriana dhe Shpati ndeshën të dielën.

Ndeshjet eliminuese startojnë nga ora 09:00. / KultPlus.com

 Drejtoria e Përgjithshme e Arkivave (DPA) bën të ditur se janë kthyer mbi 8 mijë dokumente mbi Shqipërinë dhe shqiptarët.

Kreu i DPA-së, Ardit Bido theksoi se kjo tërësi dokumentesh e marrë nga arkivat amerikane, së bashku me dy kolana gazetash, përfshirë “Albania”-n e themeluar nga “enciklopedia shëtitëse”, Faik Konica, kalojnë prej ditës së sotme nën zotërimin e Arkivit Qendror Shtetëror (AQSH), si rezultat i aktit të dhurimit të kryer prej studiuesit Artan Hoxha.

“Sikurse ka dëshmuar edhe precedenca e akteve të dhurimit, materialet dokumentare dhe fotografike të marra në dorëzim prej DPA-së, kanë shërbyer për pasurimin e fondeve, duke ofruar edhe shtysa për nisjen e hulumtimeve të reja. Kujtojmë dhurimin e arkivit vetjak të ngjeshur të poetit Lasgush Poradeci (2017) dhe të veprimtarit politik Reuf Fico (2018)”, u shpreh ai.

Po ashtu, Bido informoi se në AQSH strehohen edhe dorëshkrime të shumta të Musine Kokalarit, në përmbushje të vullnetit të saj që “një pjesë e dorëshkrimeve të dorëzoheshin në Arkivin e Shtetit, pranë Sotir Kolesë” (deklaratë e bërë prej familjares së saj, Bibika Kokalari)./KultPlus.com

UNI – Universum International College, në bashkëpunim me Komunën e Prishtinës dhe Federatën e Basketbollit të Kosovës, organizon ‘Turnir në Basketboll‘ për të festuar 16-vjetorin e Pavarësisë së Kosovës. Ky ngjarje emocionuese është përgatitur për të shfaqur talentet e basketbollit të skuadrave të shkollave të mesme nga e gjithë Kosova, me 20 skuadra pjesëmarrëse që garojnë për fitore. Turniri do të mbahet më 14 shkurt 2024, në Shkollën Don Bosko në Prishtinë.

Suksesi i ‘Turnirit në Basketboll’ nuk do të ishte i mundur pa mbështetjen e sponsorëve. Federata e Basketbollit të Kosovës, Trafiku Urban, Korporata Rugove, Burger King Kosovo, Cineplexx Kosovo dhe Shkolla ‘Don Bosko’ Prishtina kanë sponsorizuar këtë ngjarje, duke treguar kështu angazhimin e tyre në zhvillimin e rinisë në Kosovë dhe në promovimin e sporteve. 

Organizimi i ‘Turnirit në Basketboll’ reflekton përkushtimin e UNI – Universum International College për të nxitur zhvillimin dhe promovimin e të rinjëve të Kosovës. Si forca udhëheqëse pas kësaj ngjarjeje monumentale, UNI – Universum International College synon të ofrojë një platformë për entuziastët e rinj të basketbollit për të shfaqur aftësitë e tyre, ndërtuar miqësi dhe të nxisin vlerat e disiplinës dhe bashkëpunimit. Ngjarja e tillë që shënon sukseset e vendit, siç është 16-vjetori i Pavarësisë, tregon rolin proaktiv të UNI – Universum International College si një nismëtar për ndryshime pozitive, duke kontribuar aktivisht në zgjerimin kulturor dhe sportiv të Kosovës.

UNI – Universum International College fuqizohet dhe menaxhohet nga Arizona State University, Universiteti më i madh publik në SHBA dhe #1 për inovacion.

Për më shumë informata rreth aktiviteteve të tilla,  kontaktoni +38344144062, [email protected] ose ndiqni UNI në Facebook dhe Instagram. /KultPlus.com

Presidentja e vendit, Vjosa Osmani, ka takuar ambasadorin amerikan në Kosovë, Jeffrey Hovenier.

Gjatë takimit, bëhet e ditur se u fol për zhvillimet e fundit në vend, përfshirë ato në dialogun Kosovë – Serbi dhe përgatitjet që po bëhen në lidhje me kërkesën për zgjedhje të reja në veri.

“Presidentja Osmani dhe Ambasadori Hovenier diskutuan edhe për një sërë çështjesh në rrafshin e bashkëpunimit bilateral, edicionin e sivjetëm të forumit ndërkombëtar për Gratë, Paqen dhe Sigurinë, si dhe çështje të tjera të interesit të ndërsjellë”, thuhet në njoftimin e presidencës.

Gjatë ditës, Hovenier ka takuar edhe kryeministrin e vendit, Albin Kurti, ku ka deklaruar se ShBA-ja është e shqetësuar se me vendimin e BQK-së për dinarin serb, Kosova rrezikon të përballet me tensione etnike. /KultPlus.com