Rruga “A” merr emrin e Xhim Xhemës, veprimtarit të madh të çështjes kombëtare

Kryetari i Komunës së Prishtinës Përparim Rama ka njoftuar se rruga “A” ka marr emrin e veprimtarit të madh Xhim Xhema, shkruan KultPlus.

KultPlus ju sjell të plotë njoftimin e kryetarit Rama.

Me 45 vota PËR, asnjë kundër dhe asnjë abstenim, Kuvendi i Kryeqytetit vendosi ta përjetësojë veprimtarinë e paepshme të zotit Xhim Xhema për çështjen kombëtare, duke ia vënë rrugës “A” emrin e këtij njeriu të madh.

E nderojmë përkushtimin e tij të palëkundur për kauzën e lirisë dhe pavarësisë, duke ua sjellë ndihmën e krerëve të politikës amerikane popullit të Kosovës në kohët më të vështira./ KultPlus.com

Rukie Rama, frymëzimi i librit të Kadaresë ‘Natë me Hënë’ bazuar në ditarët e saj të vjedhur

Kryetari i Prishtinës, Përparim Rama, përmes një njoftimi ka bërë të ditur se ka mirëpritur mësuesen Rukie Rama në Prishtinë. Sipas tij, mësuesja është frymëzimi i librit të Ismail Kadaresë, “Natë me Hënë”, i cili bazohet në ditarët e saj të vjedhur, të shkruar gjatë kohës kur ishte e burgosur politike, përcjell KultPlus.

“Ajo është fotografuar këtu me Meriman Brahën përballë Shoqatës së të Burgosurve Politik në Prishtinë, e cila mban arkivin më të madh të historisë gojore dhe koleksionin e njohur të të dhënave në letër të të burgosurve politikë në Kosovë”, shkruan ai.

Më poshtë gjeni postimin e tij të plotë:

Ishte një nder të mirëpresim në Prishtinë mësuesen Rukie Rama.

Mësuesja Rukie është frymëzimi i librit të Ismail Kadaresë, “Natë me Hënë”, i cili bazohet në ditarët e saj të vjedhur, të shkruar gjatë kohës kur ishte e burgosur politike.

Sot ajo është mësuese e gjuhës shqipe në Bruksel.

Na tregoi se si i merrte nxënësit e saj në Tropojë në skaj të kodrës për të parë Kosovën, e cila në vitin 1975 ishte e paarritshme për të udhëtuar nga Shqipëria, për shkak të kufijve të mbyllur të vendit.

Ajo është fotografuar këtu me Meriman Brahën përballë Shoqatës së të Burgosurve Politik në Prishtinë, e cila mban arkivin më të madh të historisë gojore dhe koleksionin e njohur të të dhënave në letër të të burgosurve politikë në Kosovë.

Kjo ishte një surprizë e papritur për ta, të dy ish të burgosur politikë nga regjime të ndryshme dhe që u takuan për herë të parë në Bruksel, më shumë se tridhjetë vjet më parë.

Ne nderojmë sakrificat e Mësueses Rukije dhe z. Braha dhe ngremë lart historitë e tyre e shumë histori të tjera drejtësie, guximi dhe lidershipi ❤️

Qëndrojmë në solidaritet me komunitetin e përndjekur politik duke besuar në universalitetin e të drejtave të njeriut dhe lirive themelore të individëve.

Në shenjë vlerësimi dhe respekti të thellë, Kristalja i dhuroi Mësueses Rukie një karficë filigrani të punuar me dorë, me figurën e 🌻

🌻 ngre kokën për t’u përballur me diellin, simbolikë kjo për shpresën dhe rezistencën me të cilën na frymëzon Mësuesja Rukije. / KultPlus.com

Rama: Sheshi fillimisht deri te Posta, më pas deri te ‘Rrethi me Flamur’

Kryetari i Prishtinës, Përparim Rama, ka deklaruar së fundi se sheshi do të zgjatet fillimisht deri te Posta e më pas do të bëhet deri tek ‘Rrethi me Flamur’.

Këtë deklaratë e ka dhënë sot gjatë takimit me qytetarët e Prishtinës.

“Ulpiana edhe Dardania kanë qasje të shumta, nuk ka nevojë që qasja të jetë në këtë rrugë dhe duhet të dimë që aty po ndërtohet xhamia dhe është tregu dhe do të jetë një ngarkesë në këtë mënyrë siç është. Prandaj fillimisht po mendohet të jetë sheshi deri te Posta. Do të kemi një hapësirë më shumë për fëmijët tanë dhe do të jetë një përjetim më i mirë. Sheshi deri te ‘Rrethi me Flamur’ është për të mirën e gjithë qytetarëve.”, u shpreh Rama.

Në këtë takim ai tha se kjo zgjatje e sheshit do të bëhet me qëllim për t’i dhënë përparësi këmbësorëve./KultPlus.com

Gëzim Gashi dhe Përparim Rama lansojnë projektin ‘UNLOCK KOSOVO’, ligjërata ekskluzive me mysafir botëror për rininë e Kosovës (VIDEO)

Gëzim Gashi, djali shqiptar që asnjëherë nuk i harron rrënjët, përkundër suksese të mëdha si menaxher i marketingut, autor bestseller dhe partner në Institutin OCS për Artet dhe Inovacionin në Los Angeles, ku së fundi ka sjell edhe librin e tij debutues “Unlocked: The Power of You”, kthimin në vendlindje, pothuajse gjithmonë me projekte në të mirë të shoqërisë dhe në veçanti rinisë kosovare, e ka qëllim kryesorë, shkruan KultPlus.

Duke qenë edhe vetë folës në Universitetin e Harvardit, Gëzim Gashi një përvojë të tillë ka vendosur ta sjell edhe në Kosovë.

Gashi dhe i pari i vendit tonë, Përparim Rama kanë dhënë sonte lajmin e madh se po lansojnë projektin e ri për rininë e Kosovës të titulluar “UNLOCK KOSOVO”. Ky projekt do të përfshijë ligjërata ekskluzive me mysafirë botëror për rininë e Kosovës.

Lajmin e ka bërë të ditur vetë Gëzimi përmes një statusi në Facebook i cili është shprehur tejet i lumtur për këtë bashkëpunim me kryetarin Rama duke na dhënë edhe njoftimin e artistja e njohur TESI është duke e promovuar këtë projekt edhe në Neë York.

“NJOFTIM I MADH! Jam i lumtur të ndaj me ju që kam bashkëpunuar me kryetarin e Prishtinës, Përparim Rama dhe së bashku kemi krijuar UNLOCK KOSOVO – një serial masterclass për të rinjtë e Kosovës. Vjen në fillim të 2023. Më shumë informacion së shpejti.

Faleminderit TESI (@hayitstesi) për shpalljen e projektit me ne në New York City!

Kosovë, kjo është për ty. 🔑❤️”, shkruan Gëzimi, duke dëshmuar se puna e tij për Kosovën është e pandalshme dhe e bën me shumë dashuri.

Për më shumë të reja rreth projektit, KultPlus do të ju njoftojë shumë shpejtë. / KultPlus.com

Kryetari Rama reagon: Kjo situatë duhet të trajtohet si alarmante nga institucionet e sigurisë dhe të drejtësisë

Gjatë ditës së sotme është raportuar për një grua shtatzënë të vrarë nga burri i saj në oborrin e QKUK-së, shkruan KultPlus.

Për këtë rast ka reaguar edhe kryetari i Prishtinës, Përparim Rama.

Postimi i plotë:

Jam thellësisht i tronditur nga ngjarja që ka ndodhur sonte në Prishtinë, në oborrin e Klinikës Gjinekologjike, ku një grua e re që priste të bëhej nënë, u vra bashkë me foshnjën e saj ende të palindur.

Ky është rasti i dytë i vrasjes së grave brenda një jave dhe kjo situatë duhet të trajtohet si alarmante nga institucionet e sigurisë dhe të drejtësisë.

I shpreh ngushëllime të thella familjes së viktimës duke shpresuar se ky do të jetë rasti i fundit i dhunës e vrasjes së grave në Kosovë. / KultPlus.com

Çelësi i Prishtinës në duar të arkitektit të Bibliotekës Kombëtare “Pjetër Bogdani”

Kryetari i Prishtinës, Përparim Rama, ka njoftuar se i ka dhuruar çelësin e Prishtinës, Andrija Mutnjakoviq, arkitektit të Bibliotekës Kombëtare të Kosovës “Pjetër Bogdani”.

Rama theksoi se pikërisht Bibloteka Kombëtare është shkaku që ka zgjedhur të jetë arkitekt.

“Kënaqësi shumë e veçantë t’i dhurojmë çelësin e Prishtinës Andrija Mutnjaković, arkitektit të Bibliotekës Kombëtare të Kosovës “Pjetër Bogdani”, si një simbol i mirënjohjes dhe vlerësimit nga unë dhe qytetarët e Prishtinës për kontributin e jashtëzakonshëm në krijimin e një veçantie dhe ekspresiviteti të guximshëm të qytetit tone”, ka shkruar Rama.

“Pikërisht godina e Bibliotekës, e cila na jep një ndjenjë krenarie, identiteti dhe nderi, është arsyeja pse zgjodha të bëhesha arkitekt”./ KultPlus.com

Mbyllet “Manifesta 14”, nga një vend ku mungoi infrastruktura e artit, Prishtina u bë qendra kulturore e Evropës dhe botës

Era Berisha

Një nga ngjarjet më të mëdha ndërkombëtare të artit bashkëkohor, “Manifesta 14 Prishtina”, mbrëmë ka mbyllur perden e fundit. E organizuar çdo dy vjet në një qytet tjetër evropian, edicioni i 14-të i Manifestës gjeti hapjen në Prishtinë në muajin korrik, me ç’rast gjithsej 25 hapësira u bënë trendi më i fundit dhe më i ndjekuri në Kosovë. Brenda kësaj periudhe janë shënuar 800 mijë vizita në lokacionet e Manifestës, duke e bërë Prishtinën qendrën më të madhe kulturore në Evropë e jo vetëm, shkruan KultPlus.

Duke i tejkaluar prezantimet e Prishtinës në kuadër të makiatos apo periudhës së pasluftës, Prishtinën tashmë të gjithë e kanë njohur nga një këndvështrim tjetër. Qyteti u shndërrua në muzën e disa nga mediave më prestigjioze në botë por edhe atyre vendore. Përgjatë 100 ditëve, mbi 100 pjesëmarrës kanë ekspozuar artin e tyre dhe emocioni që është shpërfaqur nga puna e tyre, ka dalë përtej imagjinatës së njeriut. Kësisoj, është shfaqur puna artistike dhe kolektive e artit bashkëkohor, një punë kjo që padyshim e ka prekur nivelin botëror e që ka marrë vëmendjen e botës së artit ndërkombëtar.

Vizitorë ndërkombëtarë dhe vendorë kanë pushtuar Prishtinën në masë të madhe. Vëmendja e tyre iu dedikua Manifestës, më konkretisht artistëve pjesëmarrës, nga të cilët ata vendorë qenë rreth 60 përqind (një përqindje më e lartë e artistëve vendas se në shumë bienale të tjera). Puna e tyre e pakrahasueshme iu është prezantuar botës së promovimit, andaj këta artistë kosovarë kanë dëshmuar që shpirti i tyre është i fundosur thellë në “oqeanin” e artit, dhe nuk ka rrugëdalje nga kjo.

Në anën tjetër, Kosova ka dhënë më të mundurën e saj, për të organizuar e mbajtur një ngjarje të përmasave të tilla. Duke pasur parasysh që ardhja në Kosovë e një bienale të tillë që radhitet në mesin e pesë bienaleve më të fuqishme të artit pamor në botë, atëherë mund të themi që Kosova ka arritur t’i thyej limitet e veta.

Kujtojmë se me përfundimin e Manifestës, Ministria e Kulturës është duke ndërmarr hapat që të sigurohet një trashëgimi e prekshme dhe konkrete e Manifestës, gjë që do të finalizohet ditëve në vijim. Gjithashtu MKRS është angazhuar për të mbajtur të ekspozuara veprat e intervenimit artistik të Petrit Halilaj dhe Flaka Halitit deri në fund të vitit 2023. Ndërkaq, ministri i Kulturës, Hajrulla Çeku pati bërë të ditur se ky është viti kur është iniciuar themelimi i Muzeut të Artit Bashkëkohor në Kosovë dhe mendohet që projekti do të zgjasë deri më 2026.

Qe arkitekti italian Carlo Ratti ai që krijoi një vizion urban për Prishtinën, duke sugjeruar mënyra se si vendet e braktisura në të gjithë qytetin mund të ringjallen për përdorim publik. Bienalja ka përdorur këto vende si hapësira ekspozite: “Grand Hotel Prishtina”, “Sheshi Zahir Pajaziti”, “Kino Armata”, “Biblioteka Kombëtare e Kosovës”, “Fakulteti Filozofik – UP”, ”Galeria Kombëtare e Kosovës”, “Galeria e Fakultetit të Arteve – UP”, “Rruga 2 korriku” , “Çelësa punues”, “Gërmia departament store”, “Kino Rinia”, “Qendra për Praktikë Narrative”, “Sheshi Adem Jashari”, “Biblioteka Kombëtare e Kosovës”, “Hamami i Madh”, “Foundation 17 Gallery Space”, “Muzeu Etnologjik”, “Fabrika e Tullave”, “Green Corridor”, “Rilindja”, “Pallati i Rinisë dhe Sportit”, “Prishtina Observatory”, “The Flat”, “Partisan Martyr’s Cemetery Monument”, “Hertica School House”.

Konsiderohet që Bienalja këtë vit është përpjekur për të lënë një trashëgimi për artistët në Kosovë, duke përfshirë hapësirën e quajtur “Qendra për Praktikë Narrative”. Qendra përfshin një dhomë të errët fotografike dhe një punëtori të mbushur me mjete elektrike për t’i përdorur artistët. Autoritetet e qytetit të Prishtinës i kanë dhënë Manifestës ndërtesën për katër vjet dhe fondacioni që drejton bienalen po mbledh fonde për ta bërë atë një institucion të përhershëm.

Mbyllja zyrtare e “Manifesta 14 Prishtina” në Fabrikën e Tullave përkoi me disa fjalime si dhe me një performancë speciale nga grupi Saz’iso.

Drejtoresha e Manifesës, Hedwig Fijen ka falënderuar secilin person që ka qenë pjesë e 100 ditëve, duke përmendur se mbështetja e tyre është simbol i brezit të ri të fuqishëm të Kosovës.

“Pikërisht kur arritëm këtu në Prishtinë i premtova Kryetarit dhe Ministrit se do të ishte edicioni më i mirë ndonjëherë. E mbajtëm premtimin. Mendoj me gjithë zemër që e bëmë. Vetëkuptohet që ne jemi jashtëzakonisht mirënjohës për të gjithë 109 partnerët dhe financuesit tanë. Por para së gjithash, le t’u japim një duartrokitje të ngrohtë sepse shumë prej tyre janë këtu. I jemi thellësisht mirënjohës të gjithë artistëve, ndërkombëtarë dhe kosovarë, për veprat inteligjente dhe brilante dhe për angazhimin e tyre. Tani, unë do të filloj me listën time të pabesueshme të gjatë të emrave të njerëzve që meritojnë njohjen, të cilët dhanë gjithë çka mundën për të ndërtuar këtë edicion të jashtëzakonshëm. Nuk ka audiencë, asnjë njoftim për shtyp, asnjë publikim, asnjë komunikim, pa këta njerëz”, ka thënë Fijen.

Sipas saj, stafi i tyre mbështetës, mbështetja e tyre e përkushtuar është simbol i brezit të ri të fuqishëm të Kosovës. Dhe, nuk do të kishte vepra arti, artistë, ekspozita, vende, asgjë, pa ekipin e tyre të prodhimit. E po ashtu, nuk do të kishte turne ndërmjetësuesish, asnjë program shkolle, asnjë hulumtim para-bienal, nuk do të kishte qytetarë, as nën-kulturë, pa ekipin e tyre të arsimit.

“Faleminderit të gjithëve për gjithçka që dhatë. Faleminderit, audiencave, sepse në fund të fundit, ne i bëjmë të gjitha për ju dhe jo për ne. Më shumë se 800 mijë panë se çfarë ndodhi në qytet. Një duartrokitje e madhe shkon për veten tuaj”, përfundon Fijen.

Ndërkaq, ministri i Ministrisë së Kulturës, Rinisë dhe Sportit, Hajrulla Çeku ka ri-konfirmuar se Kosova ka kapacitetin për të organizuar një ngjarje kaq të madhe të artit ndërkombëtar.

“Faleminderit që jeni sonte këtu. Po e mbyllim një udhëtim të jashtëzakonshëm në të cilin shumë njerëz kanë kontribuar, e unë posaçërisht dua t’i shpreh falënderimet tona si Ministri për Hedwig the ekipin, për punën e tyre të mrekullueshme dhe në të njëjtën kohë dua ta ri-konfirmoj këtë që tashmë është shumë e qartë. Kosova nuk e ka vetëm vullnetin por e ka edhe kapacitetin për të organizuar një ngjarje kaq të madhe të artit ndërkombëtar. Jemi shumë të sigurt që do të vazhdojmë edhe më tutje. Ne ia kemi dalë së bashku me institucionet, artistët, organizatorët, dhe të gjithë ju që keni kontribuar në një formë apo tjetër”, ka thënë Çeku.

Gjithashtu, kryetari i Komunës së Prishtinës, Përparim Rama ka përmendur se trashëgimia e Manifestës, do të jetojë tutje, nëpërmjet ndërtesave, instalacioneve, Fabrikës së Tullave, bibliotekës “Hivzi Sulejmani” dhe “Green Corridor”.

“Është një ndjenjë fantastike për të qenë sonte këtu me të gjithë ju, për të përmbyllur një event aq fenomenal për kryeqytetin tonë, për vendin tonë. Kanë qenë me të vërtetë 100 ditë të mrekullueshme. Ishte me të vërtetë një ëndërr e realizuar, të shihja të gjithë qytetin si muze. Me Manifestën e kemi bërë këtë, por Prishtina përplot 100 ditë është transferuar në një qytet-muze të artit kontemporan. Kam premtuar më herët që trashëgimia do të vazhdojë. Trashëgimia e Manifestës do të jetojë tutje, dhe do të jetojë nëpërmjet ndërtesave, instalacioneve, “Tulltores”, bibliotekës “Hivzi Suljemani”. Po ashtu, do të jetojë nëpërmjet “Green Corridor” dhe ne patjetër që nuk do ta humbasin vrullin dhe do të vazhdojmë të krijojmë gjëra të bukura për qytetin tonë”, ka thënë Rama.

Sipas tij, ata janë të vetëdijshëm që ka shumë punë para tyre por kjo vetëm tregon që nëse njerëzit bashkohen, nuk do të ka çfarë t’i ndal ata për të transformuar kryeqytetin, e për ta bërë një kryeqytet me karakterin më unik në botë.

“E kemi edhe një numër të madh të gjërave që kanë ndodhur këtyre ditëve. Kemi mësuar se çka i duhet qytetit, çka dëshiron qyteti dhe çfarë dëshirojnë qytetarët e Prishtinës. Kjo nuk është lamtumirë. Kjo në fakt është fillimi i “Manifesta 14 foundation” që do të vazhdojë trashëgiminë në qytet. Andaj, të dashurohemi me Prishtinën. Le ta zbulojmë dhe t’i tregojmë botës historitë tona të suksesit”, përfundon ai.

Mbrëmja në Fabrikën e Tullave vazhdoi me një performancë speciale nga bendi “Saz’iso”, që solli tingujt e jugut të Shqipërisë mu në mesin e Prishtinës. Instrumentet diversive në skenë kanë shënuar fundin e një ngjarje kulturore, teksa kanë jehuar nëpër çdo shpirt të pranishëm.

Të rrethuar nga prezenca e dritës së hënës, zjarri gjigand që shërbente për ngrohtësi, reflektorë të ndryshëm që dhanë hijeshi, muzika shqiptare krejtësisht e rrallë, ushqimi i llojllojshëm e pija, të pranishmit kanë qenë dëshmitarë të një rrugëtimi që zor se harrohet dot. Me “Manifesta 14” është rishkruar e ardhmja e kryeqytetit.

Artistët pjesëmarrës në “Manifesta 14 Prishtina”: Abazi/Greville/Pinchuk, Larry Achiampong, Astronomy Club of Kosova, Bora Baboçi, Celine Baumann, Elona Beqiraj, Valentina Bonizzi, Anna Bromley, Luz Broto, Lee Bul, Lua Coderch, Daniel Gustav Cramer dhe Haris Epaminonda, Ilir Dalipi, Yael Davids me Andre van Bergen, Cevdet Erek, ETEA, Jakup Ferri, Foundation 17, Lek M.Gjeloshi, Nuria Guell, Driton Hajredini, Artan Hajrullahu, Laureta Hajrullahu, Petrit Halilaj, Flaka Haliti, Lawrence Abu Hamdan, Haveit Collective, Roni Horn, Fahrija Hoti dhe gratë e Krushës së Madhe, Majlinda Hoxha, ICA-Sofia, Astrit Ismaili, Fitore Isufi Shukriu – Koja, Hristina Ivanoska, Emily Jacir, Jelena Juresa, Genc Kadriu, Alevtina Kakhidze, Sejla Kameric, Antoneta Kastrati me Casey Cooper Johnson, Doruntina Kastrati, Kino Armata, Genti Korini, Argjirë Krasniqi, Edona Kryeziu, Katalin Ladik, Luljeta Lleshanaku, Nimon Lokaj, Jumana Manna, Brilant Milazimi, Hana Miletic, Ivan Moudov, Alekta Xhafa Mripa, Alban Muja, Sami Mustafa, Silvi Naçi, Natasha Nedelkova, New Grand (Blerta Hashani, Arbnor Karaliti, Lumturie Krasniqi, Mimoza Sahiti, Valdrin Thaqi, Ermir Zhinipotoku), Tuan Andrew Nguyen, Thao Nguyen Phan, Vigan Nimani, Christian Nyampeta, Off Season, Adrian Paci, Susan Philipsz dhe Radio International Collective, Marubi National Museum of Photography, Marta Popivoda, PykëPresje, Sahej Rahal, Lala Rascic, Carlo Ratti Associati, raumlaborberlin, re.act.feminism, Alicja Rogalska, RomaMoMa me Farija Mehmetin, Ugo Rondinone, Nusret Salihamixhiqi, Secondary Archive, Sekhmet Institute, Selma Selman, Driton Selmani, Dineo Seshee Bopape, Abi Shehu, Chiharu Shiota, Igor Simic, Uyra Sodoma, Speculative Tourism, Beth Stephens dhe Annie Sprinkle, Mette Sterre, StoryLab, Kolektivi the names comes last, tamtam, Miryana Todorova, Vangjush Vellahu, Alije Vokshi, Werker Collective, Sislej Xhafa, Yll Xhaferi, Miki Yui, Driant Zeneli, Hana Zeqa, Lulzim Zeqiri, Dardan Zhegrova.  / KultPlus.com

U vu gurëthemeli për ndërtimin e një çerdheje të re në Prishtinë

Kryeministri i Republikës së Kosovës, Albin Kurti, ministrja e Arsimit, Shkencës, Teknologjisë dhe Inovacionit, Arbërie Nagavci dhe kryetari i Komunës së Prishtinës, Përparim Rama, kanë vënë sot gurëthemelin për ndërtimin e një çerdheje të re në Prishtinë.

Me këtë rast, kryeministri Kurti përmendi investimet në ndërtimin e çerdheve në gjithë Kosovën dhe tha se Qeveria e Kosovës e ka arsimin prioritet, e veçanërisht zhvillimin në fëmijërinë e hershme, kur dihet rëndësia që ka ky nivel i edukimit në zhvillimin e mëtutjeshëm të secilit fëmijë.

Ministrja Nagavci, ndërkaq, theksoi se do të vazhdohet me ndërtimin e çerdheve të reja dhe përmendi faktin që Qeveria ka ndarë dhe e ka rritur buxhetin për ndërtimin e çerdheve dhe shkollave edhe për vitin 2023.

Pasi që tha se po punojmë shumë për të përmirësuar rezultatet në arsim, ministrja Nagavci theksoi synimin për gjithëpërfshirje në edukimin e hershëm. Ajo tha se ky nivel i edukimit është parakusht për zhvillimin e individit dhe shoqërisë në përgjithësi.

Kryetari i Komunës së Prishtinës, Përparim Rama, e vlerësoi fillimin e punimeve për ndërtimin e kësaj çerdheje si shumë të rëndësishme për kryeqytetin.

Objekti i çerdhes, vlera e të cilit është 743 mijë euro, do të jetë me sipërfaqe 1300 metër katror dhe i destinuar për 120 femijë. Çerdhja është projektuar në dy kate dhe përmbanë 5 dhoma për qëndrim të fëmijëve, 3 dhoma të gjumit për femijë, hapësirën për shumë qëllime, kuzhinën, trapezarinë, dhomën e mjekut, dhomën e psikologut, administratën, si dhe hapësira teknike./ KultPlus.com

Parkingu nëntokësor i Prishtinës afër përfundimit, kryetari Rama publikon pamjet për herë të parë

Kryetari i Prishtinës, Përparim Rama ka njoftuar se parkingu nëntokësori kryeqytetit është pranë përfundimit.

Sot, pasdite, ai ka publikuar disa fotografi nga parkingu, ku thotë se 90% e punimeve kanë përfunduar.

Sipas Ramës, zyrtarisht parkingu hapet në muajin nëntor.

“Parkingu Nëntokësor i Prishtinës po përfundon! 90% e punimeve veçse janë kryer, e hapja zyrtare pritet të bëhet në nëntor”, ka njoftuar ai. / KultPlus.com

Kryetari Rama: Trupa e mrekullueshme e Baletit Kombëtar të Kosovës, vazhdon të mbetet imazhi më përfaqësues i kulturës

Gjysmë shekulli punë, dedikim, sakrificë e Baletit Kombëtar të Kosovës, u manifestuan mbrëmë me një organizim që erdhi përplot emocion, në datën që shënoi një përvjetor jubilar të një institucioni që i dhuroi shumë Kosovës për kaq vite jetë, shkruan KultPlus.

Me këtë rast, kryetari i Prishtinës, Përparim Rama ka theksuar se trupa e mrekullueshme e Baletit Kombëtar të Kosovës, vazhdon të mbetet imazhi më përfaqësues i kulturës, civilizimit dhe sakrificës së shoqërisë tonë.

Më poshtë gjeni postimin e plotë të tij:

Mbrëmë u shënua 50-vjetori i themelimit të Baletit Kombëtar të Kosovës 🩰
Balerinët nga Baleti Kombëtar i Kosovës dhe ata të Teatrit të Operës dhe Baletit të Shqipërisë, nën përcjelljen e Orkestrës së Filharmonia e Kosovës, sollën në skenë shfaqjen “Halili e Hajria”, që është edhe vepra e parë e baletit shqiptar.
Në një skenë të improvizuar, larg skenës, sallës dhe kushteve që meritojnë këta artistë, të cilët me gjenerata mbajtën gjallë baletin e Kosovës, dëshmuan dhe njëherë vullnetin dhe profesionalizmin që i karakterizon.
Trupa e mrekullueshme e Baletit Kombëtar të Kosovës, vazhdon të mbetet imazhi më përfaqësues i kulturës, civilizimit dhe sakrificës së shoqërisë tonë! / KultPlus.com

Përparim Rama: Sahat Kullës iu rikthye identiteti e ndriçimi

Pas ndërhyrjeve në pjesën e jashtme dhe të brendshme, sot është rivitalizuar monumenti i Sahat Kullës në Prishtinës, përcjell KultPlus.

Kryetari i Prishtinës, Përparim Rama, përmes një njoftimi në Instagram, tha se Sahat Kullës iu rikthye identiteti e ndriçimi

KultPlus ua sjell postimin e plotë:

Jam shumë i lumtur që sonte, në bërthamën e zonës historike të Prishtinës së vjetër, Sahat Kullës iu rikthye identiteti e ndriçimi!

Projekti për ndërhyrjet në pjesën e jashtme dhe të brendshme të objektit, bashkëfinancuar me @euinkosovo dhe implementuar nga @undp.kosovo, e kanë rivitalizuar këtë monument i cili prej kohësh ka qenë jashtë funksionit.

Sahat Kulla është një ndër pikat qendrore të pjesës së vjetër të Kryeqytetit, e cila ruan shumë vlera të trashëgimisë tonë kulturore, dhe më në fund është funksionale dhe i rikthehet qytetarëve dhe vizitorëve të Prishtinës./ KultPlus.com

Kryetari Rama: Kujtimi dhe nderimi për Shenjtoren tonë dhe veprimtarinë e saj na motivon për të shërbyer me dashuri

Kryetari i Komunës së Prishtinës Përparim Rama së fundmi ka përkujtuar Shën Nënë Terezën në 25 vjetorin e vdekjes së saj, përcjell KultPlus.

Më poshtë gjeni postimin e plotë të tij:

Përulje dhe falënderim të përjetshëm për Shën Nënë Terezën, simbolin e paqes, mirësisë dhe humanizmit.

Sot, me rastin e 25 vjetorit të kalimit në amshim të Shën Nënë Terezës, bëmë homazhe para shtatores së saj në Prishtinë.

Kujtimi dhe nderimi për Shenjtoren tonë dhe veprimtarinë e saj na motivon për të shërbyer me dashuri dhe integritet për të gjithë qytetarët pa dallim. / KultPlus.com

Kryetari Rama: Ndër vite ‘Etno Fest’ është bërë platformë për shpalosjen e kulturës materiale e shpirtnore mbarëshqiptare

Kryetari i Komunës së Prishtinës Përparim Rama së fundmi ka cilësuar festivalin Etno Fest si një platformë qendrore për shpalosjen e kulturës materiale e shpirtërore mbarëshqiptare, përcjell KultPlus.

“Për disa ditë me rradhë, do të keni rast të ndiqni shfaqje, ekspozita, instalacione, performanca e diskutime mbi aspekte të etnografisë shqiptare, e të shijoni specialitete të kuzhinës tradicionale”, ka thënë ai.

Më poshtë KultPlus ua sjell postimin e tij të plotë:

Ndër vite festivali Etno Fest është bërë platformë qendrore për shpalosjen e kulturës materiale e shpirtnore mbarëshqiptare.

Për disa ditë me rradhë, do të keni rast të ndiqni shfaqje, ekspozita, instalacione, performanca e diskutime mbi aspekte të etnografisë shqiptare, e të shijoni specialitete të kuzhinës tradicionale.

Një falënderim i veçantë për drejtorin dhe themeluesin e këtij festivali, z. Fadil Hysaj dhe ekipin e tij fantastik që sivjet po na e sjellin EtnoFestin për të 12-tën herë, duke e pasuruar kështu Prishtinën tonë të përjetimeve.

Mos e humbni rastin për të përjetuar vlerat të cilat shpalosë ky festival. / KultPlus.com

Rama: Hapsirat publike në Prishtinë tani e tutje do të jenë nën vëzhgimin e kamerave

Hapësirat publike në kreqytet shumë shpejt do të vëzhgohen nga kamerat, kështu bëri të ditur kryetari i Prishtinës, Përparim Rama.

Rama përmes një shkrimi në rrjetin social Facebook tha se sot u nënshkrua marrëveshja me Policinë për vendosjen e sistemit të kamerave.

“Tash e sa kohë jemi në bashkëpunim të ngushtë me Policinë e Kosovës për hartimin e marrëveshjes për vendosjen e sistemit të kamerave dhe mënyrën e mirëmbajtjes së rrjetit të kamerave në hapësirat publike të Kryeqytetit, marrëveshje e cila u nënshkrua sot” – tha Rama.

Ai theksoi se së bashku me organet e rendit do të realizojnë aktivitete të përbashkëta për sigurinë në kryeqytet.

“Bashkë me Policinë e Kosovës u zotuam se do të koordinojmë aktivitete të përbashkëta për përmirësimin e sigurisë në hapësirat publike të Kryeqytetit” – theksoi ai./ KultPlus.com

Përparim Rama i dhuron Dua Lipës ‘Hyjneshën në Fron’

Sot në Prishtinë do të fillojë festivali ‘Sunny Hill Festival’, shkruan KultPlus.

E para fillimit të festivalit, këngëtarja kosovare me famë botërore, Dua Lipa e cila është edhe organizatore e këtij festivali, ka mbajtur një konferencë për media.

E në këtë konferencë i pranishëm edhe i pari i Prishtinës, Përparim Rama.

Me këtë rast, Përparim Rama i dhuroi Dua Lipës simbolin e qytetit të Prishtinës ‘Hyjneshën në Fron’./KultPlus.com

Nënshkruhet marrëveshje mes Komunës së Prishtinës dhe ‘Sunny Hill Foundation’

Sot në Prishtinë do të fillojë festivali ‘Sunny Hill Festival’, shkruan KultPlus.

E para fillimit të festivalit, këngëtarja kosovare me famë botërore, Dua Lipa e cila është edhe organizatore e këtij festivali, ka mbajtur një konferencë për media.

E në këtë konferencë i pranishëm edhe i pari i Prishtinës, Përparim Rama.

Me këtë rast, Komuna e Prishtinës dhe ‘Sunny Hill Foundation’ kanë nënshkruar një marëveshje bashkëpunimi./ KultPlus.com

Gashi në takim me Ramën: Biseduam për Prishtinën tonë të bukur dhe mënyrën se si të ndërtojmë ura të bukura bashkë

Gëzim Gashi, sipërmarrësi dhe autori ‘bestselling’ i librit ”Unlocked: the power of you”, i cili jetën e zhvillon mes Suedisë dhe Amerikës, këto ditë po qëndron në Prishtinë ku dje është takuar edhe me Kryetarin e Komunës së Prishtinës, Përparim Rama, shkruan KultPlus.

Përmes një postimit në ”Instagram”, Gashi njoftoi edhe për çka biseduan.

“Dje pata kënaqësinë të takohem me Kryetarin e Prishtinës, Përparim Rama. Biseduam për Prishtinën tonë të bukur dhe mënyrën se si të ndërtojmë ura të bukura bashkë. Rama ka një energji të jashtëzakonshme dhe ide shumë të mira. Jam i ngazëllyer për kapitullin e ri të Prishtinës. Faleminderit kryetar, po pres me padurim që të takohem me juve edhe herave të tjera”, thuhet në postimin e tij.

Gjatë këtij takimi, Gashi i dhuroi të parit të Prishtinës edhe librin e tij debutues i cili pritet të përkthehet shumë shpejt edhe në gjuhën shqipe. /KultPlus.com

Themelohet zyra koordinuese për Diasporën

Kryetari i Prishtinës, Përparim Rama ka njoftuar se sot është marrë vendimi për themelimin e zyrës koordinuese për Diasporën në kuadër të Kryeqytetit, përcjell KultPlus.

Rama përmes një shkrimi në Facebook tha se hapja e zyrës koordinuese për Diasporën në nivel lokal ishte nevojë dhe kërkesë e kahershme, duke shtuar se sot ai po përmbush edhe një nga premtimet e tyre.

Sipas tij, kjo zyrë koordinuese, e cila do të funksionalizohet shumë shpejt, në vete do të ngërthejë këto aktivitete:

3.1. Organizimi i ngjarjeve që synojnë promovimin e partneriteteve të reja biznesore, rritjen e eksporteve dhe tërheqjen e investimeve të huaja nga diaspora në Kryeqytet. I përgjigjet pyetjeve të diasporës lidhur me zhvillimin e biznesit dhe investimeve te tyre në Prishtinë;

3.2. Ofrimi i këshillave në lehtësim të procedurave administrative dhe shërbimeve të dhëna nga Komuna, veçanërisht gjatë fluksit të madh të vizitorëve nga diaspora gjatë sezonit të pushimeve;

3.3. Zhvillimi dhe shpërndarja periodike e përmbajtjeve të rëndësishme informative me rëndësi për diasporën lidhur me zhvillimet në Kryeqytet, me theks të veçantë në çështjet ekonomike por edhe kulturore;

3.4. Zhvillimi i një mekanizmi për të mundësuar transferimin e njohurive dhe aftësive nga profesionistët e diasporës në departamente të ndryshme komunale (mund të ketë aktivitete të ndryshme në këtë drejtim si trajnime, mentorime, seminare, vlerësime të projekteve, lehtësim i lidhjeve me institucionet, organizatat përkatëse. jashtë vendit);

3.5. Vendos në shfrytëzim marrëdhëniet dhe ndikimin e pjesëtarëve të diasporës në vendet e tyre rezidente, për të promovuar turizmin, produktet vendore dhe sektorë të tjerë ekonomik me interes për Kryeqytetin. Pjesëtarët e diasporës mund ta luajnë lehtësisht rolin e ambasadorit të Komunave në fusha të ndryshme në vendet rezidente;

3.6. Krijimi i databazës përfshirëse të pjesëtarëve te Diasporës nga Kryeqyteti;

3.7. Inicimi i krijimit të platformave filantropike në Diasporë, me qëllim të ofrimit të mbështetjes financiare në kauzat me interes të Kryeqytetit.

Diaspora jonë, paraqet elementin më fisnik e cila gjithmonë mban lidhjen me atdheun, dhe për kontributin tuaj të vazhdueshëm jemi përjetë mirënjohës! / KultPlus.com

Fillon festivali “Meeting of Styles”, kryetari Rama: Prishtinën e shndërruan në një atelie artistike

Tashmë ka nisur edicioni i gjashtë i “Meeting of Styles Kosovo”, nën moton ‘Truth is Light’, me ç’rast Prishtina ka marr ditëve të fundit një tjetër pamje, pak më gjallëruese se zakonisht, shkruan KultPlus.

Me këtë rast ka reaguar edhe kryetari i Komunës së Prishtinës, Përparim Rama i cili e cilëson këtë edicion si një edicioon që ka gjallëruar Prishtinën.

Për disa ditë, Prishtina ishte nikoqire e qindra artistëve të talentuar nga mbarë bota, të cilët rrugën “B” të Kryeqytetit e shndërruan në një atelie artistike ku u prezantuan stile të ndryshme të artit urban.

Edicioni i 6-të i Meeting of Styles Kosovo, me moton “Truth is Light”, shoqëruar me muzikë e energji t’mirë, edhe këtë vit e gjallëroi Prishtinën tonë!

Kryeqyteti po vazhdon të jetë qendër e artit dhe kulturës“, ka shkruar ai në rrjetet sociale. / KultPlus.com

Përparim Rama: Lajm fantastik për Prishtinën, Kino Rinia i rikthehet në menaxhim Komunës së Prishtinës

Kryetari i Komunës së Prishtinës Përparim Rama ka njoftuar se objekti i Kino Rinisë do ti kthehet në menaxhim Komunës së Prishtinës, shkruan KultPlus.

Gazeta online KultPlus ju sjell të plotë njoftimin e kryetarit të Komunës së Prishtinës Përparim Rama.

Objekti i KINO RINIA i rikthehet në menaxhim Kryeqytetit pas shumë vitesh.

Pas një pune disa mujore të Drejtorisë së Pronës, e cila ka siguruar dokumentacionin dhe ka bërë verifikimin e tij, Agjencia Kosovare e Privatizimit në mbledhjen e djeshme të Bordit ka votuar pro kërkesës së Komunës së Prishtinës për rikthimin e Kino Rinisë nën menaxhimin tonë.

https://www.pak-ks.org/Page.aspx?id=1,%208,611

Kjo, pasi kemi vërtetuar nga Arkivat Komunale e Ndërkomunale që ky objekt është pronë e Komunës së Prishtinës, dhe se deri tash, padrejtësisht është menaxhuar si ndërmarrje shoqërore nga AKP.

E falenderoj shumë Drejtoren e Pronës, Doruntinë Maloku dhe gjithë stafin për përkushtimin disa mujor për kthimin e KINO RINISË në menaxhimin tonë. Javën tjetër menjëherë do të nisim me planin e rigjenerimit të një prej ikonave të kryeqytetit./ KultPlus.com

Prishtina vazhdon të mbetet në qendër të vëmendjes së mediave botërore

Kryetari i Prishtinës, Përparim Rama, ka ndarë një tjetër artikull të mediave ndërkombëtare, të cilat po vazhdojnë të shkruajnë për “Manifesta 14”, shkruan KultPlus.

Përmes një postimi në llogarinë zyrtare në “Facebook”, Rama ka thënë se Prishtina vazhdon të mbetet në qendër të vëmendjes së mediave botërore!

“CRA-Carlo Ratti Associati i bashkohet Manifesta për t’i dizajnuar ndërhyrjet urbanistike në Prishtinë. 👏🏼

Zyra e inovacionit dhe e dizajnit “Carlo Ratti Associati” shfaq rezultatin e programit dhe të vizionit urbanistik për Manifesta 14, Bienalen Nomade Europiane në Prishtinë mes 22 korrikut dhe 30 tetorit të 2022-ës.

Projekti i zyrës CRA propozon një metodologji të re për rikthimin e hapësirave publike në qytet.

Projekti fillon me një varg ndërhyrjesh të hapura të projektimit që nxisin pjesëmarrjen e qytetarëve, për t’i parë dhe për t’i vlerësuar reagimet e tyre gjatë këtyre punimeve në mjedisin e ri. Gjatë shekullit 20, ndryshimet politike dhe ato të regjimit politik nuk sollën tjetër përveçse përplasje të shumta politike në qytetet e Kosovës.

Si rezultat i kësaj, Prishtina vuan nga një mungesë e konsiderushme e hapësirës publike, dhe një numër i madh i banorëve janë të privuar nga e drejta që ta kthejnë ose ta ndryshojnë këtë situatë.

CRA dhe Manifesta 14 paraqitën një shembull të metodologjisë eksperimentale në mënyrë që të krijojnë një risi urbanistike karshi kësaj situate. Kjo metodologji praktike e urbanizmit bazohet në serinë e ndërhyrjeve urbanistike të përkohsme dhe zhvillohet në bazë të reagimeve të qytetarëve.

Në fazën e parë, CRA hartëzoi qytetin për të identifikuar vende të rëndësishme shoqërore e kulturore në të. Në këtë fazë, studioja u bashkua me Ministrinë e Infrastrukturës dhe Transportit (MIT) për të përdorur inteligjencën artificiale në mënyrë që të formohet pamja digjitale e rrugëve të qytetit. Këto të dhëna përkatëse mund të ofrohen sipas kërkesës nga hulumtuesit e urbanizmit të hapur.

Në fazën e dytë vendosen rinovimet ose ndërhyrjet e përkohshme, për të treguar se si lokacionet e shumta, shumë prej të cilave në kushte të vështira e të rrezikuara, mund të rikuperohen edhe nga qytetarët e Prishtinës. Këto ndërhyrje janë me kosto të ulët, për një periudhë afatshkurtër dhe me qëllim spekulativ. Banorët ftohen të votojnë me qenien e tyre, duke vendosur nëse këto ndërhyrje duhen të modifikohen ose jo. Së fundmi, do të mbahen periudha vlerësimi për të lehtësuar sa më parë zhvillimin e qytetit.

Më tutje, themeluesi i CRA-së, Carlo Ratti u shpreh:

“Qytetet në mbarë botën po kalojnë një periudhë të jashtëzakonshme, të kapluar nga kriza të shumta, por ka edhe potencial për rilindje. Duke pasur parasysh një ngjarje pa precedent gjatë shpërthimit të pandemisë Covid-19, pushtetarët u detyruan të bënin eksperimente urbanistike për t’iu përgjigjur nevojave të qytetarëve”

Metodologjia u aplikua për të ndërtuar Korridorin e Gjelbër, një ish-hekurudhë, e gjatë 1.3 km e cila dikur mbushej me makina të braktisura si dhe me plehra. Shtegu i sapoformuar i këmbësorëve përmban pushimore të shumta si dhe hapësira të mbushura me bimë, që lidhin dy vendndodhje të rëndësishme: atë të Manifesta-14 dhe Fabrikën e Tullave.

Vendkalimi u rizhvillua në njëzet (20) ditë punë, duke pasur në konsideratë debatin se si të zgjidhet problemi i këmbësorëve në qytet. Një rrethanë, e cila siguron që të gjithë elementet e këtij korridori të jenë sa më praktike dhe të mund të përdoren edhe në lokacione të tjera.

Ndërhyrjet e tjera urbanistike, të realizuara nga CRA në vitin që lamë pas, janë integruar ndryshe në strukturën sociale të Prishtinës. Për shembull, ish-biblioteka Hivzi Sylejmani, dyert e jashtme të së cilës u morën nga një kompani ilegale parkingu në qershor të vitit të kaluar, u kthyen dhe u shndërruan në një institucion të përhershëm kulturor të quajtur “Qendra e Praktikës Narrative”.

Ish-fabrika e tullave u shndërrua fillimisht si një dhomë urbane, kurse tash u transformua në një qendër mësimore Eco Urban, që u hap së bashku me Bienalen. Këto projekte tregojnë se si urbanizmi i hapur mund të sjellë ndryshime brenda periudhave të ndryshme kohore”, thuhet në postimin e tij. /KultPlus.com

Rama ia ndan “Çelësin e Qytetit të Prishtinës” Erion Veliajt

Kryetari i Komunës së Prishtinës, Përparim Rama, i ka ndarë Çelësin e Qytetit të Prishtinës, kryebashkiaut të Tiranës, Erion Veliajt shkruan KultPlus.

Përmes disa fotografive të publikuara nga Rama në “Facebook” shihet edhe ndarja e këtij Çelësi 

Postimi i plotë:

“Është kënaqësi dhe nder i veçantë për mua që sot, Çelësin e Qytetit të Prishtinës, ia ndaj kryetarit më të suksesshëm që ka pasur ndonjëherë Tirana dhe mikut tim të dashur e fort të çmuar, Erion Veliaj.

Me anë të këtij akti ne pohojmë se forcojmë dhe shtrëngojmë më tej aleancën tonë të palëkundshme dhe frymën e vëllazërisë e të bashkëpunimit mes dy kryeqyteteve dhe vendeve tona, duke dëshmuar se jemi, e duam të mbetemi një. 

Këtë çelës të Prishtinës, Erionit ia dhuruam si një simbol që thotë se kryebashkiaku i Tiranës në Kryeqytetin tonë është jo vetëm një mik gjithmonë i mirëpritur, por se tashmë ndodhet në shtëpinë e vet”, thuhet në postimin e të parit të Prishtinës. /KultPlus.com

Sonte nis ‘Rame Lahaj International Opera Festival’, Çeku: Puna e RLIOF e vendosë Kosovën në rrafshin operistik ndërkombëtar

Flonja Haxhaj

Në Amfiteatrin e Ri të Bibliotekës Universitare, sot është mbajtur konferenca hapëse e festivalit ‘Ramë Lahaj International Opera Festival, shkruan KultPlus.

Koordinatorja artistike e këtij festivali, Ulpiana Alijaj e mori fjalën e para ku u shpreh e lumtur për hapjen e edicionit të dytë të RLIOF duke e cilësuar si një ndër festivalet më të shëndetshme dhe më të rëndësishme për ta vënë jo vetëm Kosovën por edhe artin operistik në një piedestal evropian por edhe më gjerë.

“Në festivalin tonë këtë edicion do të paraqesim një gamë shumë të gjerë të repertorit operistik, por nisur ky edhe nga thelbi dhe muzika shqipe dhe të cilës i kemi dhënë një vend shumë të rëndësishëm dhe që jo më kot e nisim sot festivalin tonë me ‘Ensamble evening’ dhe me një lëvrim të mirë të muzikës folklorike shqiptare e sjellë kjo në një mënyrë shumë të rafinuar nga “Don’t listen to your neighbours” për të vijuar pas me një mbrëmje speciale në kuadër të ‘Opera night’ ku do të kemi dy kolegë nga Italia, sopranoja Erika Grimaldi dhe tenori Leonardo Caimi shoqëruar nga pianisti kosovar Mennan Berveniku i cili vjen enkas për këtë event”, tha Alijaj duke dhënë detaje për programin operistik të këtij festivali.

Po ashtu me datën 26, do të ketë mbrëmje të dedikuar enkas për repertorin e këngëtares Nexhmije Pagarusha.

“Në këtë mbrëmje do të celebrojmë edhe një kompozitor shumë të rëndësishëm shqiptar siç është Çesk Zadeja në 95-vjetorin e lindjes së tij dhe në këtë kuadër do të kemi edhe vepra që do të jenë premierë për skenën kosovare edhe për skenën shqiptare, pasi kemi sjellë vepra të cilat janë premierë në skenën e festivalit  tonë”, tha Alijaj e cila tutje tregoi se më datë 28 do të jetw një mbrëmje shumë interesante, konkludimi i një pune intensive, i cili përmbyllet me koncertin e ‘New Generation’ dhe ofrohet nga e gjithë puna që do të zhvillohet gjatë këtyre ditëve nga mjeshtri i zërit, Jean Bernard Thomas shoqëruar në piano nga Fjorda Veizaj dhe për të arritur kulmin e festivalit në datën 31 në sheshin ‘Skënderbeu’ ku përkrah tenorit Lahaj dhe miqve të tjerë do të performojw për herë të parë në trojet shqiptare një soprano e nivelit ndërkombëtar siç është Angela Gheorghiu.

Më pas fjalën e mori vetë themeluesi i festivalit, Ramë Lahaj i cili falënderoi të gjithë ata që e bënë të mundur realizimin e ‘Rame Lahaj International Opera Festival’ e që këtë vit shënon edicionin e dytë.

“Ajo që më bën të vazhdoj dhe ta përballoj tërë këtë stres është që në shoqërinë tonë të fillojë një lloj tradite ose një festival i natyrës së tillë, që jo vetëm që se ka pasë Kosova por as rajoni. Ajo që më shtyn për me jep tërë këtë energji është dëshira për ta realizuar një festival i cili do të kthehet në traditë dhe do të jetë pjesë e pandashme sepse jam i sigurt që i duhet edhe institucioneve të Kosovës, sidomos nëse flasim për operan, meqë jemi në planifikim të ndërtimit të Institucionit të Operas”, u shpreh Lahaj i cili shtoi se me këtë festival ka dashur të paraprijë, të ndihmojë dhe t’i dalë në ndihmë të gjithë talentëve rinj, që e kanë talentin, por mundësinë të dalin jashtë, të punojnë me trajnerë e kanë pothuajse të pamundur, përcjell KultPlus.

Në këtë konferencë ishte i pranishëm edhe ministri i Kulturës, Rinisë dhe Sportit, Hajrualla Çeku i cili u shpreh shumë i nderuar për prezencën e tij në këtë panel.

Ministri Çeku deklaroi se Kosova që nga viti i kaluar ka bërë hapa konkretë në themelimin e Institucionit të Operas së Kosovës dhe nga ky vit ka proceduar me funksionalizim të këshillit, me staf, me program vjetor dhe zhvillim të kapaciteteve infrastrukturore.

“Puna e komunitetit artistik që përfshin edhe kontributin e Ramë Lahaj dhe kolegët e tij vendorë e ndërkombëtar në festival ‘Rame Lahaj International Opera Festival’, që është unik në Kosovë e rajon po e vendosë Kosovën në rrafshin operistik ndërkombëtar gjë të cilën Ministria e Kulturës e vlerëson shumë në veçanti në aspektin e diplomacisë kulturore”, u shpreh Çeku, e i cili thotë poashtu se Ministria e Kulturës e vlerëson faktin që Ramë Lahaj si artist i skenës botërore operistike kthehet në Kosovë dhe kontribuon përmes festivalit dhe fondacionit ‘Rame Lahaj’.

Në panelin e konferencës hapëse të festivalit ‘Rame Lahaj International Opera Festival’ foli edhe i pari i Prishtinës, Përparim Rama.

“Ky festival operistik ofron kontribut të rëndësishëm e të drejtpërdrejtë  në pasurimin e jetës kulturore të kryeqytetit duke bërë Prishtinën një platformë të rëndësishme të artit operistik meqë festivali ‘RLIOF’ është i vetmi në Kosovë dhe rajon me strukturë të tillë ku përveç programit të pasur dhe artistëve kulminantë, punohet edhe me talentët e rinj për të ndihmuar institucionet kulturore të Kosovës”, tha Rama.

Përparim Rama u shpreh po ashtu se me këtë festival dhe me ngjarjen kulminante më 31 korrik në sheshin kryesor të Prishtinës, jo vetëm që publikut u ofrohet një program me cilësi të lartë artistik të këtij zhanri, por ardhja e artistëve të shquar e promovon Prishtinën në arenën ndërkombëtare, në aspektin më të rëndësishëm, atë të artit dhe të kulturës. 

E për fund, fjalën e mori mjeshtri i zërit, Jean Bernard Thomas, i cili njëherit është edhe trajnuesi i Ramë Lahaj dhe që në këtë festival ka ardhur të ushtrojë edhe shumë talentë të rinj kosovarë.

“Jam shumë i lumtur që ndodhem këtu për të marrë pjesë në festivalin e Ramë Lahaj, të cilin e kam njohur pak vite më parë dhe siç e dini unë jam trajnuesi tij, ne punojmë sëbashku ai është tenor edhe unë jam po ashtu tenor. Unë jetoj shumë larg nga këtu dhe po i thosha Ramës dy ditë para se të vija këtu që njerëzit më flisnin keq për Kosovën dhe jam shumë i surprizuar të shoh si janë evropianët këtu dhe se sa zëra të mirë ka këtu”, tha Jean Bernard Thomas, i cili pas përfundimit të konferencës filloi punëtorinë e tij.

Ramë Lahaj International Opera Festival, i vetmi festival i llojit të tij në rajon, prezanton edicionin e tij të dytë i cili do të zhvillohet në datat 21.07-31.07.2022. Synimi i festivalit është të ndërtojë një urë mes skenës kosovare dhe asaj ndërkombëtare, të nxitë dhe të ofrojë një mjedis ku artistë të rinj premtues zhvillohen dhe ekspozohen, duke hedhur kështu themelet e një tradite të artit të operas./ KultPlus.com