“Le Temps” ka botuar, të shtunën e 29 qershorit 1911, në faqen n°2, një shkrim në lidhje me një intervistë të zhvilluar asokohe me patriotin dhe luftëtarin e shquar shqiptar, Isa Boletinin, të cilin, Aurenc Bebja, nëpërmjet Blogut “Dars (Klos), Mat – Albania”, e ka sjellë për publikun shqiptar :
Na shkruajnë nga Shkupi :
Shefi i famshëm shqiptar Isa Boletini, për të cilin autoritetet turke besonin se e kishin shkëputur nga kryengritja, e la Sokolicën pak ditë më parë, dhe u tërhoq sërish, i armatosur, me tridhjetë prej të afërmeve dhe shokëve të tij, në kodrat e pyllëzuara, që ndodhen afërsisht dy orë me kalë nga Mitrovica.
Ata që e pyetën mbi arsyet e vendimit të tij të ri, Isa Boletini thuhet se u është përgjigjur :
“U ktheva në Shqipëri disa muaj më parë i vendosur për të zbatuar të gjitha aspektet e ligjit.
Pata shpresë se qeveria, nga ana e saj, do të bënte çdo përpjekje për të përmbushur kërkesat kombëtare të vëllezërve të mi, jo vetëm të atyre që ende luftojnë në kufirin turko-malazez, por edhe kërkesat e popullsisë urbane dhe rurale të Shqipërisë Veriore që kërkon edhe emërimin e zyrtarëve shqiptarë, adoptimin e gjuhës shqipe si gjuhë zyrtare, shërbimin ushtarak të shqiptarëve në krahinën e tyre,me pak fjalë, privilegje të kërkuara nga vetë kushtet e ekzistencës së racës shqiptar. Asnjë nga këto nuk na është mundësuar.
Amnistia perandorake dhe disa koncesione që pasuan dëshmuan se ishin të pamjaftueshme në të gjithë Shqipërinë. Prandaj jemi betuar, ne shqiptarët, të mbajmë këtë qëndrim derisa të na plotësohen dëshirat tona.”
I pyetur nëse ai synon t’ua dorëzojë armët autoriteteve, Isa Boletini është përgjigjur :
“Kurrë nuk do të dorëzoj pushkën dhe kamën (thikën) time. Shokët dhe të afërmit e mi do të bëjnë të njëjtën gjë.”
Shefi shqiptar aktualisht qëndron i tërhequr por në gatishmëri. Ai shprehet se do të veprojë vetëm kur situata të jetë e nevojshme.
Thuhet se pothuajse çdo ditë emisarë nga autoritetet e Mitrovicës vijnë tek ai për t’i kërkuar që të kthehet në fshatin e tij.
Qeveria ka vendosur të dërgojë pesë batalione për të shkatërruar bandat që infektojnë rajonin nga Gjakova në Pejë. Shqiptarët e Gjakovës armatosen shumë; kontrabandistë të shumtë kalojnë armë në sasi të mëdha nëpërmjet kufirit serb, sepse pushkët shiten tani në Shqipëri për 20-30 lira turke.
Kolera sapo është përhapur midis trupave në Shqipëri; dje ka pasur 14 raste dhe 12 vdekje.
Nxënësja Era Syla fiton Medalje të Bronztë në Olimpiadën Matematike Evropiane për Vajza – EGMO 2020, shkruan KultPlus.com
“Përfundoi me sukses Olimpiada Matematike Evropiane për Vajza – EGMO 2020. Ekipi i Kosovës në këtë olimpiadë prestigjioze fitoi një Medalje të Bronztë”, thuhet ndër të tjera në njoftimin e Shoqatës së Matematikantëve të Kosovës.
Këtu keni njoftimin e plotë:
“Nxënësja Era Syla fiton Medalje të Bronztë në Olimpiadën Matematike Evropiane për Vajza – EGMO 2020
Përfundoi me sukses Olimpiada Matematike Evropiane për Vajza – EGMO 2020. Ekipi i Kosovës në këtë olimpiadë prestigjioze fitoi një Medalje të Bronztë.
EGMO është gara më e rëndësishme evropiane e matematikës për vajza, në të cilën marrin pjesë pothuajse të gjitha vendet e evropës dhe shumica e vendeve jashtë Evropës marrin pjesë në cilësinë e mysafirëve, të përfaqësuara nga nxënëset më të mira të matematikës. Ky është viti i parë që Kosova merr pjesë në këtë olimpiadë prestigjioze. EGMO është kampionati evropian i matematikës për nxënëset e shkollave të mesme. Prandaj, arritja e Erës është vërtet e jashtëzakonshme.
Shoqata e Matematikanëve të Kosovës e uron dhe e përgëzon nxënësen Era Syla për suksesin e arritur dhe për përfaqësim të denjë të shtetit të Kosovës në këtë olimpiadë prestigjioze!
Shoqata e Matematikanëve të Kosovës mbetet e përkushtuar të kontribuojë me të gjitha mundësitë dhe kapacitetet që ka në dispozicion për t’i mbështetur të rinjtë e talentuar në fushën e matematikës.
Shoqata e Matematikanëve të Kosovës, Prishtinë, më 21.04.2020″
Që nga shfaqja e rasteve të para të personave të infektuar me koronavirus në Kosovë, më 13 mars, ka pasur shtim të lajmeve të rreme dhe dezinfomatave.
Përmbajtje të tilla, si për zanafillën e përhapjes së virusit dhe deri te zbulimi i vaksinës, kanë qenë të përditshme në rrjete sociale.
Ato kanë marrë pëlqime dhe shpërndarje të shumta nga audienca shqipfolëse.
Përveçse përmbajtja ka qenë e paverifikuar, shpeshherë lajme të tilla kanë ndikuar në përhapjen e panikut.
Disa vende të botës kanë krijuar mekanizma për luftimin e lajmeve të rreme në kohën e pandemisë së koronavirusit të ri, por në Kosovë përveç bazës ligjore që rregullon në një masë sanksionet për shpërndarjen e informacioneve të pavërteta nuk ka një mekanizëm adekuat.
Selatin Kllokoqi nga organizata “Democracy Plus” vitin e kaluar ka hartuar një analizë që trajton sanksionet ligjore për personat dhe mediumet që përhapin lajme të rreme ku, sipas tij, ka rezultuar se nuk është e mjaftueshme baza aktuale ligjore.
“Ekziston baza ligjore, por siç duket nuk është e mjaftueshme, sepse gjatë këtyre ditëve apo gjatë këtyre javëve nuk kam dëgjuar ende që ka ndodhur ndonjë rast që ka shkuar në gjykatë për shpërndarje të lajmeve të rreme apo panikut, përkundër faktit se kemi pasur shumë të tilla. Mendoj që edhe te ne në një situatë më të mirë pasi të kalojë kjo pandemi dhe të kemi një qeveri funksionale duhet të merren masa që ligjet që e rregullojnë këtë çështje të adoptohen edhe më mirë në mënyrë që mos ta kemi këtë vërshim të përditshëm të lajmeve të rreme”.
Shpërndarja e propagandës që nxit urrejtje dhe kryerjen e veprave penale është e dënueshme me Kodin Penal në Kosovë, ndërsa ndjekja në rastet penale kryhet në dy forma – me paraqitjen e rastit nga pala e dëmtuar, por edhe nga vetë prokuroria.
Mekanizmi tjetër i parandalimit të lajmeve të rreme zhvillohet përmes kontesteve civile, sipas Ligjit mbi Shpifjen dhe Fyerjen.
Ky ligj e përcakton që autori i lajmit është përgjegjës për shpërndarjen e informacionit, të cilin ai e ka ditur se është i pavërtetë ose është dashur ta dijë se është i pavërtetë.
Ky rregullim ligjor nuk është i mjaftueshëm për të luftuar keqinformimin në kohën e pandemisë së koronavirusit, thotë juristi Kushtrim Palushi.
“Problematika e lajmeve të rreme është pa mbulueshmëri ligjore dhe në këtë mënyrë personat të cilët merren me këtë fenomen janë rrjedhimisht pa kontroll. Do të thotë ata mund të veprojnë të lirë pa u frikuar se dikush, ndonjë ‘watchdog’ ose ndonjë institucion përgjegjës është duke i mbikëqyrur. Në këtë aspekt, atëherë lind nevoja që kjo problematikë të rregullohet, nëse jo me një ligj të veçantë, atëherë të rregullohet me akte nënligjore si nga ana e Komisionit të Pavarur për Media, po ashtu nga ana e Këshillit për Media të Shkruara”, thotë Palushi për Radion Evropa e Lirë.
Në Ministrinë e Shëndetësisë thonë se keqinformimi dhe lajmet e rreme kanë ndikim të madh te qytetarët, sidomos tani kur janë të izoluar si pasojë e masave të ndërmarra nga institucionet në përpjekje për të parandaluar përhapjen e koronavirusit.
Përmbajtje të tilla të rrejshme që kanë qarkulluar në rrjete sociale janë denoncuar në polici, konfirmon Faik Hoti, drejtor i Zyrës për Informim në Ministrinë e Shëndetësisë.
“Përmes një komunikimi ditor dhe transparent është arritur që të bindet pjesa më e madhe e popullatës që informatat burimore lidhur me Covid-19 [sëmundjen që e shkakton koronavirusi] t’i marrin nga Ministria e Shëndetësisë dhe Instituti Kombëtar i Shëndetësisë Publike. Përkundër ngarkesave të mëdha, një numër i lajmeve të rrejshme dhe raportimeve me dezinformata dhe të pavërteta janë denoncuar në mekanizmat për siguri kibernetike e privatësi dhe institucionet e sigurisë duke u nisur nga fakti që dezinformatat në situata të emergjencave të shëndetit publik paraqesin edhe rrezikim të sigurisë kombëtare”.
Hoti thotë se Ministria e Shëndetësisë që nga fillimi ka krijuar një plan për informim i cili, sipas tij, ka pasur efekt pasi qytetarët në masë të madhe po informohen rreth koronavirusit nga Ministria e Shëndetësisë dhe Instituti Kombëtar i Shëndetësisë Publike.
Edukimi medial në shkolla si zgjidhje e problemit
Të sfiduar nga përhapja e lajmeve të rreme dhe dezinfomatave, disa vende evropiane prej vitesh kanë të integruar edukimin medial në shkolla.
Futja e kësaj lënde në shkollat e Kosovës mund të jetë një zgjidhje për të edukuar popullatën për përmbajtjen që lexon, thotë Alban Zeneli, ligjërues në Fakultetin e Gazetarisë në Universitetin e Prishtinës.
“Kjo problematikë bëhet edhe më e madhe në rastin e Kosovës, për shkak se shoqëria nuk është e përgatitur. Ne nuk kemi një shkollim publik i cili ofron edhe edukim për media, sepse kjo do të ndihmonte në përgatitjen e shoqërisë për këtë problematikë. Pra, thjesht, njerëzit do ta refuzonin përmbajtjen e rreme dhe nuk do të jepeshin shumë pas senzacionit nëse do t’i kishin informatat paraprake nga shkollimi i tyre”.
Në kuadër të Policisë së Kosovës prej vitesh ekziston një njësit i specializuar kundër krimeve kibernetike, por ky njësit kryesisht merret me krime të natyrave të ndryshme dhe që lidhen me vepra të rënda penale.
Që nga shpallja e pandemisë së koronavirusit, institucione të ndryshme kanë bërë thirrje që qytetarët të informohen nga media dhe burimet kredibile në fushën e shëndetit, siç është Organizata Botërore e Shëndetësisë./ REL
Burrat që bredhin pas turmës së grave mund të ndahen lehtë në dy kategori. Disa kërkojnë tek të gjitha gratë idenë e tyre të gruas, ashtu si shfaqet në ëndërrat e tyre, subjektive dhe gjithnjë e njëllojtë.
Këmbëngulja e të parëve është një këmbëngulje lirike: ajo që kërkojnë te gratë, është vetvetja e tyre, është ideali i tyre dhe mbeten gjithmonë dhe vazhdimisht të dekurajuar, sepse, siç e dimë, ideali është ai që s’mund të gjendet kurrë. Me që dekurajimi i shtyn lule më lule, i jep paqëndrueshmërisë së tyre një farë justifikimi melodramatik, shumë zonja sentimentale e gjejnë emocionuese poligaminë e tyre këmbëngulëse.
Këmbëngulja tjetër është një këmbëngulje epike, dhe gratë nuk shohin asgjë emocionuese në të: burri nuk shfaq për gratë një ideal subjektiv, prandaj dhe gjithshka u intereson dhe nuk mund t’i dekurajojë asgjë. Dhe kjo paaftësi për dekurajim ka brenda saj diçka skandaloze. Në sytë e botës qejfliu epik nuk le gjurmë (sepse nuk çdëmtohet me dekurajim).
Meqenëse qejfliu lirik gjuan gjithnjë të njëjtin tip gruaje, as që vë re kush se ndërron dashnoren, miqtë e tij bëjnë vazhdimisht keqkuptime, sepse nuk e dallojnë ndryshimin midis shoqeve të tij dhe i thërrasin të tëra me të njëjtin emër.
Në gjuetinë e tyre të njohjes, qejflinjtë epikë (është e qartë, në atë kategori duhet të vendoset edhe Tomasi) largohen gjithnjë e më shumë nga bukuria konvencionale e grave (që shpejt i mërzit) dhe përfundojnë pa u shmangur si koleksionistë paradoksesh. E dinë, kanë pak turp për këtë, dhe për të mos i vënë në pozitë të vështirë miqtë e tyre, nuk qarkullojnë publikisht me dashnoret e tyre. /KultPlus.com
Komediani britanik kontrovers, Ricky Gervais, në të kaluarën e ka prezantuar ceremoninë e ndarjes së shpërblimeve “Glob i Artë”, në vitet 2010, 2011, 2012, 2016 dhe 2020, por tani ai e pranon se do t’i pëlqente ta sfidojë veten në rolin e prezantuesit të ceremonisë më të rëndësishme në kinematografi, atë “Oscar”.
Por kushti i vetëm i tij për ta pranuar një përgjegjësi të tillë është, nëse Akademia e Artit dhe Shkencave do t’i jepte liri të plotë në këtë detyrë, transmeton Koha.
I pyetur nga revista “GQ Hype” nëse ndonjëherë do t’i pëlqente ta prezantoj ceremoninë “Oscar”, Gervais tha: “Po, por ata nuk do të ma kërkojnë kurrë një gjë të tillë. Sepse unë nuk do të pranoja ta prezantoja këtë ceremoni në mënyrën e tyre. Por, nëse do të më thoshin se mund të them çfarë të dua dhe do të kem liri të plotë në kryerjen e kësaj detyre, atëherë do të ishte një ofertë tunduese për mua. Dhe pavarësisht se e di që gjërat nuk do të shkonin mirë, sepse jam i bindur që do të ndodhte kështu, prapë do ta pranoja këtë detyrë.”
Edhe pse 58-vjeçari, Gervais, në të kaluarën është kritikuar për humorin e tij të ashpër gjatë prezantimit të ceremonisë “Globi i Artë”, ai e pranon se i ka pëlqyer rikthimi në rolin e prezantuesit edhe sivjet, duke thënë gjithashtu se mendon që kjo ishte performance e tij më e mirë deri më tani.
Sidoqoftë, aktori e ka zbuluar faktin se shakatë e tij të shkruara për këtë ceremoni, ishin dashur të aprovohen nga një avokat, para se ai të dilte në skenë për ta udhëhequr këtë ngjarje. / KultPlus.com
Princ Rogers Nelson i njihur si Princi, ishte një këngëtar, këngë shkrues, intrumentist, producent dhe aktor amerikan. Princi është njohur si inovator, dhe ishte i njohur gjerësisht për punën e tij elektrike dhe me gamë të gjerë vokale. Ai është konsideruar gjerësisht si pionier i tingujve të Mineapolisit.
Muzika e tij integron një shumëllojshmëri të gjerë të stileve, duke përfshirë funk, rock, R&B, soul, psychedelia, dhe pop. Princi ka lindur në Mineapolis ku edhe zhvilloi një interes në muzikë, që kur ishte fëmijë, duke shkruar këngën e tij të parë kur ishte shtatë vjeç.
Albumi i tij i vitit 1979 u bë platin për shkak të suksesit të këngës “Why You Wanna Treat Me So Bad?” dhe “I Wanna Be Your Lover”. Ai u pranua në Rock and Roll Hall of Fame në vitin 2004, vitin e parë të drejtën e tij. ‘Rolling Stone’ e renditi Princi në numrin 27 në listën e 100 artistëve më të mëdhenj të të gjitha kohërave.
Princi vdiq ditën e 21 prillit të vtit 206 në Minesota, në moshën 57-vjeçare. /KultPlus.com
Luljeta Pula ka ndarë me ndjekësit e saj disa nga fotografitë e jetës së saj politike, ku shihet të jetë pranë figurave të njohura shqiptare, por edhe Joe Dioguardin, i cili konsiderohet si njeriu i parë që ka nisë ndërkombëtarizimin e çështjes së Kosovës.
Pula ka shprehë keqardhje se si ky njeri nuk është vlerësuar asnjëherë nga Kosova, për shtetin të cilin ka bërë shumë, shkruan KultPlus.
Më poshtë po ju sjellim tekstin e plotë të Luljeta Pulës dhe fotografitë e asaj periudhe.
Lidhja Qytetare Shqiptaro-Amerikane (Lobi) me ne krye Joe Dioguardin ishte e para qe nisi internacionalizimin e ceshtjes se Kosoves, me 1990. Me organizimin e Deshmise ne Kongresin Amerikan, ne Senat dhe ne Departamentin e Shtetit , te perfaqesuesve te Kosoves. Per te mos marre ne kembim asnjehere as vleresim e as mirenjohje nga Kosova./ KultPlus.com
Janë dhjetë dokumentarët, që Netflix ka vendosur t’i dhurojë publikut në shenjë solidariteti, për shkollat e mbyllura prej izolimit.
Përveç shpërndarjes së një fondi prej 100 milionë dollarësh për operatorët e biznesit të spektakleve, pas urgjencës së Koronavirusit, Netflix ka vendosur të dhurojë dhjetë nga dokumentarët e tij më të mirë për publikun. Një iniciativë që ka për qëllim veçanërisht shkollën dhe mësuesit e angazhuar në mësimin në distancë. Midis dokumentarëve të vënë në dispozicion, gjendet gjithashtu edhe dokumentari i jashtëzakonshëm “Planeti ynë”, rrëfyer me hollësi nga David Attenborough, i cili paraqet lloje të ndryshme kafshësh në habitatet e tyre natyrore përkatëse. Është dokumentari i parë natyralist i shpërndarë nga Netflix.
Dokumentarët
Nga “Planeti ynë” tek “Abstrakti”, janë 10 dokumentarët që Netflix ka vendosur t’i dhurojë publikut. I gjejmë të gjithë të mundshëm falas, në kanalin “YouTube” të Netflix (të plotë, me një listë dëgjimi të përshtatshme).
13th
Abstract
Babies
Chasing Coral
Explained
Knock Down the House
Our Planet
End of a Sentence.
The White Helmets
Zion
Vetëm dy prej tyre, ofrojnë një histori për natyrën: “Planeti ynë” dhe “Gjuetia e koralit”, ndërsa të tjerët përqendrohen në çështje politike dhe sociale, me fokus në sistemin e burgjeve ose në periudhat si gjenerues të pabarazisë ekonomike./Konica.al / KultPlus.com
Ministrja e Kulturës, Rinisë dhe Sportit, Vlora Dumoshi, priti sot në takim kryetarët e katër komunave, Qëndron Kastrati, Kryetar i Komunës së Kamenicës, Xhafer Tahiri, Kryetar i Komunës së Vushtrrisë, Ardian Gjini, Kryetar i Komunës së Gjakovës dhe Naim Ismajli, Kryetar i Komunës së Shtimes.
Qëllimi i këtyre takimeve ishte nënshkrimi i katër aneks memorandumeve për mbështetje financiare.
Ministrja Dumoshi dhe Kryetari Kastrati nënshkruan aneks memorandumin e bashkëpunimit për rinovimin dhe funksionalizimin e Shtëpisë së Kulturës “Isa Kastrati” dhe shtëpive tjera komunitare” i cili do të implementohet gjatë vitit 2020.
Ministrja Dumoshi dhe Kryetari Tahiri nënshkruan aneks memorandumin e bashkëpunimit, për projektin “Qendra e Kulturës në Vushtrri” do të implementohet gjatë vitit 2020
Ministrja Dumoshi dhe Kryetari Gjini nënshkruan aneks memorandumin e bashkëpunimit për mbështetjen financiare për projektin “Ndërtimin Qendrës së Kulturës në Rogovë të Hasit” i cili do të implementohet gjatë periudhës 2020-2022.
Ministrja Dumoshi dhe Kryetari Ismajli nënshkruan aneks memorandumin e bashkëpunimit për “ndërtimin e Arkivit të qytetit të Shtimes”
Gjatë këtyre takimeve Ministrja Dumoshi shprehu mbështetjen e saj të pa rezervë si Ministre e Kulturës, Rinisë dhe Sportit dhe theksoi që është prioritet i Ministrisë që drejton që të bashkëpunojë ngushtë me të gjitha Komunat e Kosovës duke konkretizuar projekte të cilat do të jenë të frytshme edhe për nivelin komunal edhe atë qendror. Sipas mundësive të veta, MKRS do të mbështesë të gjitha Komunat që projektet e mira kulturore, sportive e rinore t’i jetësojnë në dobi të qytetarëve. / KultPlus.com
Ministrja e Kulturës, Rinisë dhe Sportit në Republikën e Kosovës, Vlora Dumoshi, përmes një postimi në Facebook ka shprehur ngushëllimet e saj për vdekjen e aktorit Rikard Ljarja, shkruan KultPlus.
Dumoshi vlerëson se Rikardi ka lënë gjurmë të pashlyeshme në tërë kulturën shqiptare si dhe puna e tij e ka bërë atë figurë të rëndësishme në historinë e kulturës shqiptare.
KultPlus ju sjell postimin e plotë të Dumoshit:
E nderuara familja Ljarja,
Me pikëllim të thellë e mora lajmin për vdekjen e të dashurit tuaj Rikardit, aktorit, regjisorit dhe skenaristit tonë të madh, që la gjurmë të pashlyeshme në tërë kulturën shqiptare.
Puna, kontributi dhe angazhimi i tij, në fushën e teatrit dhe sidomos të kinematografisë, e ka bërë atë figurë të rëndësishme në historinë e kulturës shqiptare. Ai me shumë punë dhe dashuri për artin, e ngriti kulturën shqiptare në një nivel tjetër.
Ne në Kosovë, jemi ushqyer me kulturën shqiptare nëpërmjet veprave të cilat na ka sjellë Rikardi bashkë me shumë aktorë e artistë tjerë shqiptarë.
Jemi rritur me filmat ku protagonist ka qenë ai. Nga shumë filmat që Rikardi mori pjesë, nuk mund të harrohen dot “Rrugët e bardha”, “Pesha e kohës”, e shumë filma të tjerë si dhe angazhimi i tij në teatrin “Migjeni” i cili ishte një thesar në mesin e xhevahireve të tjerë që kishte Shkodra.
Vdekja e tij është humbje e madhe për artin shqiptar, por korpusi i veprave filmike që ai la pas vete, janë një pasuri e çmuar artistike që ka vulën e kulturës shqiptare dhe bën që emri i tij të mos harrohet kurrë. Fizikisht, ai nuk do të jetë më i pranishëm me ne, por do të kujtohet gjithmonë përmes veprës shumë të çmuar dhe me vlerë që la pas.
E nderuara familje Ljarja, të dashur miq të tij, i tërë komuniteti artistik mbarëshqiptar, pranoni ngushëllimet e mia më të përzemërta.
I përhershëm qoftë kujtimi për të dhe i lehtë i qoftë dheu. / KultPlus.com
Aktori Çun Lajçi, në mesazhin e tij prekës dhe mjaft të ndjerë për humbjen e aktorit të madh të skenës shqiptare Rikard Ljarja mes rreshtat është shprehur, “ti arti i zemrës sime. Pusho n’Shkodrën tande Rikard Ljarja”.
KultPlus ju sjell postimin e plotë të Lajçit:
Pusho n’Shkodrën tande Rikard Ljarja (Përkujtim)
Vonë ishte. S’po me merrte gjumi, e s’po m’rrihej ma pshtetun n’divan. Sytë m’ishin qorrua, tue i ndrrua kanalet e televizorit, gjithë ditën. Trutë po me vlojshin, tue i numërua të infektuemit e katundeve, qyteteve, mahallave…! Zotit po i lutesha, veç për nji nanë t’re, që ishte shtatzanë, e po luftonte me vdekjën! O perendi, ofshana, po çfar mëkati ka ba foshnja n’bark, që ia dergon virusin asaj nane? Dhe e mbylla televizorin. E hapa kompjutrin, thashë t’shoh, si janë këta miqtë e facebook-ut! Se, kemi mbetë si kertollat e pa mbjelluna, tue na shpërthye rrajët pa hi n’dhe! Aktorja shkodrane Dana Xhaj, m’shfaqet me nji fotografi t’aktorit tjetër, Bruno Shllakut. Fooorcaaa Brunoooo… shkruen përfundi fotografisë! M’rreh zemra keq! I shkruej shpejt. – Çka ka Bruno moj e marrë që bërtet foooorcaaaaa! Ma kthen me mirësjellje. Mik, Brunoja po lufton me nji gotitje hemorogjie cerebrale. Asht paralizua komplet ana e djathtë. Sytë i kanë mbetë hapur por s’flet! Ndihmoje Zot them, tue u përbi. I hallakati miqtë tjerë. M’del para shkodranja tjetër, poetja Bona Mulaj Lluka, e madhe sa Fushë Arrza. Ajo me foton e aktorit tjetër, atij Dedës nga filmi, që u ngri n’shtyllë telefoni, tue i lidhë telat e këputun nga bora e fërfëllaza, në ndrrim motesh, veç mos me i lanë shqiptarët, pa i thanë njeni tjetrit gëzuar vitin e ri 19…! – Galë, i them sime shoqe, Rikardi paska vdekë! Lexoj fjalët e Bonës; pse u largove n’kohë pa kohë, tani kur s’mundemi me ta kthye, ate që ti na e dhurove përmes filmit Dede! Bahem i lig, m’lagen sytë. I shkruej poetës, m’trego moj e zanueme, kur vdiq? Sonte, n’Tiranë, nga smundje e keqe! Dhe m’hapet dritarja e vitit 1972, atij marsi t’lulëzimit si n’përralla, t’Çunit me Rikardin, tue ecë Bulevardit Skender Beg! Gjithçka që andrrua e kisha për Shqipninë e Shkodrën, e gjeta tek ai! Nuk ngihej tue lypë Kosovë n’mua, e unë tue gjetë Shqipni tek ai! Milioner n’zemër e xhepat e shkyem, e art n’vete ky Rikardi! Ballin ma puthte, sikur e kërkonte Bekimin, t’preferuemin e tij…e Çunit i thoshte vëlla! I shkova n’konak kur iku ai dreqi i zi, kur ky nisi me i marrë kambët, mu kamë pak, n’vitin 1995. Zemër, Fishtë e raki e bërxolla pak, e cingare LM deri n’mëngjes! Atë natë po flisnim për Ali Pashë Gucinë, për nji grimë film,që po mundoheshim me ba, se andërr e kisha Alinë me luejt e Rikardi me ba regjinë. Por pare, ah pare s’kishim, e filmi kurrë s’u ba! Njiherë qëlloi n’Shkodër. I thashë Marjetës, t’shoqës, po gjej konak dikund tjetër, mbasi Riku s’qenka këtu. E hetoi se po ngushtohesha me fjetë n’konak pa burra! E dini se çka m’tha: Konaku i Rikardit kurrë s’asht pa burra! T’birin e ka këtu. Vërtetë, n’dhomën tjetër kishte pasë qenë i biri, me nji qenë pastor gjerman! Eh! Kishte vetëm dhomë e kuzhinë, por as sarajet e Ali Begut s’ishin ma t’mdhaja! Se Rikard ishte Ai! Gjithkujt i thoshte: Ky asht Çuni, që hecte dathë nëpër Tiranë, n’vitin 1972! E ne bajshim seri! Ç’asht ky artist pa këpucë? Mos asht ndonji provokator, spiun? Kurrë s’me tregove pse? I tregova kur ishim n’Pogradec, me gratë, artistet tona. Edhe Bubulinen e kisha pranë! – Nji palë sandale si t’Bekimit, të Odiseu, i pata punua enkas të nji këpuctarë, dhe me to erdha. Por m’përqeshen natën e parë kur dola n’korzo, n’sheshin e Tiranës! Lloj-lloj batutash m’thanë, dhe unë i turpnuem ika n’hotel Dajt, dhe i hoqa. Heca 10 ditë dath, se tjera s’kisha! Por pata igball, se marsi ishte i nxeht e s’u ftofa! Po ti paske pas kjenë i marrë, m’tha! Mbramë, vonë e mbylla dritarën e kujtimeve, e me dhimbjën për Rikardin, gjumi n’divan m’kishte pasë marrë! S’jam zog, e n’varrim ndryshe s’kam si me t’ardhë Rikard, se kufijtë mbyllë na i kan! Pusho n’Shkodrën tande mik. Ajo të deshti shumë. I thashë Galës: Po ikim nji nga nji! Sa mirë që po iu shkruej, por mua s’kanë me m’shkrua kurrë, se nuk isha si ata!
Pandemia e koronavirusit mund të jetë testi më i madh i udhëheqjes politike që bota ka pasur ndonjëherë. Kancelarja gjermane Angela Merkel përkrah shkencën, ndërsa presidenti Brazilian Jair Bolsonaro e kundërshton atë. Presidenti amerikan Donald Trump bën spektakël derisa kryeministri indian Narendra Modi nuk mban asnjë konferencë të rregullt, megjithëse i ka të bllokuar 1.3 miliardë njerëz, shkruan gazeta ‘The Atlantic’
Jacinda Ardern, kryeministrja 39-vjeçare e Zelandës së Re po ecë në rrugën e saj. Mënyra e saj e udhëheqjes në këtë kohë krize po i bën njerëzit të kujdesen për veten. Mesazhet e saj janë të qarta, të qëndrueshme dhe të kthjellëta, ashtu sikurse qasja e saj. Ajo po punon shumë mirë.
Njerëzit mendojnë se Ardern “nuk predikon mbi ta, por qëndron me ta, pranë tyre”. Ajo ka marrë një diplomë në komunikim. Një nga risitë e Ardernit kanë qenë bisedat e shpeshta live në Facebook, të cilat janë edhe informuese. Kah fundi i marsit, ajo u shfaq në shtëpinë e saj duke ofruar udhëzime; “le të përgatitemi të gjithë” bënte thirrje.
Ajo prezantoi koncepte të dobishme për njerëzit gjatë kësaj periudhe të vështirë, duke marrë shembuj të ndryshëm justifikues. Ardern theksonte gjithashtu se ky virus mund të jetojë në sipërfaqe për 72 orë, ndaj njerëzit duhet të mbylleshin për disa javë. “Mos u dekorajoni!”, thoshte ajo. /KultPlus.com
Poeti dhe autori i shumë këngëve, Agim Doçi ka kujtuar mes lotësh por edhe me vargje Rikard Ljarjan, aktorin e madh i cili vdiq një ditë më parë.
Pengu më i madh për Doçin është fakti se sot nuk mund t’i japë lamtumirën mikut të tij si pasojë e COVID 19. Por kjo situatë nuk e ka ndalur atë të thurë vargje e të mallëngjejë të gjithë.
“Kam jetuar në Shkodër 16 vjet, e pashlyer do mbetet për mua kur në Kukës erdhi si personazh jetësor për të përjetësuar një personazh të thjeshtë atë “Dedën” e famshëm. Ai ishte një nga rolet më të personalizuar dhe më të realizuar të Rikardit. Dhimbja më e madhe sot është që nuk shkojmë dot ta përcjellim, t’i hedhim një dorë dhe atij shkodrani që me zemërgjerësinë e tij pati ndihmuar të bëhet aktor edhe një djalosh shkodran Frederik Ndoçi. Kanë aktruar bashkë”,- tha ai.
Doçi thuri këto vargje për mikun e tij Rikard Ljarjan:
NE ishim shokë RIKARDI shtrenjt Sa shpejt që ike O NJERI… KUJTESA jonë të ka të SHENJT TI yll i ndezun me DASHURI.
Do ikin vitet TI s’do harrohesh MAGJIA yte – PRINC i aktrimit TI mbetesh YLLË e do kujtohesh SIMBOL i gjallë n’magjin e filmit.
Do jesh tek ENGJËJT perkrah me shokët Po unë RIKARD ku ti çoj lotët? / KultPlus.com
Ka qenë përshëndetja e fundit sot me aktorin Rikard Ljarja, ndarë nga jeta mbrëmë në moshën 77 vjeçare. Miq e kolegë e kanë përcjellë për në banesën e fundit përmes duartrokitjesh, dhe nderimi të heshtur në distancë.
Sipas amanetit të aktorit, lënë familjarëve, ai do prehet në vendlindjen e tij, në Shkodër.
Aktorja e njohur, Roza Anagnosti, e shoqëruar nga bashkëshorti i saj Dhimitër Anagnosti, ka thënë disa fjalë nderimi për Rikard Larjan.
“Ne kemi një miqësi shumë të mirë me familje, ato që ka lënë ai nuk do të harrohen. Ka lënë një pasuri të jashtëzakonshme për artin. Kam punuar me të si regjisor në momente shumë të vështira. Pushtoftë në paqe dhe vepra e tij të ketë një jetë sa më të gjatë”, tha Roza.
Ndonëse po jetojmë ditë të vështira, dhe në izolim total, përcjellja mortore për aktorin ka qenë me miq e kolegë të shumtë. / Standard/ KultPlus.com
Kur një galeri në jug të Rusisë i kishte mbyllur dyert e saj për të ndihmuar në ndalimin e përhapjes së koronavirusit, një artist kishte kërkuar që të vetizolohet në vend që të lërë vendin e tij të punës. Sergei Pronin posa kishte filluar punën si administrator në galerinë “Pushkin”, kur u mor vendimi edhe për mbylljen e institucioneve të tilla. Ai kishte kërkuar leje që të qëndronte dhe tani pikturon, fle, gatuan dhe bën ushtrime nën shoqërimin e një kanarine të quajtur Hertz.
“Unë pata një ide që do të ishte interesante që të qëndroja dhe të punoja një seri me piktura për vetë galerinë ‘Pushkin’”, ka thënë Pronin, 31-vjeçar, i cili që nga 28 marsi ka kaluar ditët e tij duke krijuar në një nga atraksionet kryesore në Zheleznovodsk, në regjionin Stavropol. Ai ka përfunduar pikturimin e një pjese të galerisë dhe tani është duke punuar në një vepër dedikuar poetit Alexander Pushkin, sipas të cilit ka marrë emrin galeria dhe shtatorja e të cilit zë një vend kryesor si kryevepër e ekspozitës kryesore, shkruan sot Koha Ditore.
“Në të ardhmen e afërt dëshiroj që të pikturoj Isadora Duncan duke vallëzuar në galeri”, ka thënë Pronin, duke iu referuar kohës kur balerina amerikane kishte performuar aty në fillim të vitit 1920.
Pronin, i cili bën ushtrime dhe akrobacione në një nga dhomat e shumta të Galerisë, ka thënë se po planifikon që të qëndrojë aty gjatë gjithë periudhës së karantinës, e cila në Rusi për momentin vlen deri më 30 prill.
Muzetë dhe galeritë kanë qenë në mesin e shumë atraksioneve dhe bizneseve që janë mbyllur për shkak të koronavirusit me 47 mijë e 121 raste dhe 405 vdekje të raportuara deri më tash në Rusi. / KultPlus.com
Biskotat në formë patatesh të skuqura të Disney-t janë me siguri një nga shërbimet më të këndshëm të parkut. Tani, Disney po ndan recetën me të gjithë ne, për shkak të situatës nga Covid-19.
Këtu janë të gjithë përbërësit që ju nevojiten:
2 3/4 filxhan miell
1/2 filxhan plus 1 lugë sheqer pluhur
1/2 filxhan plus një lugë gjelle margarinë me bazë bimore
7 lugë gjelle ujë të ngrohtë
5 lugë zëvëndësues të lëngshëm vezësh
1 lugë gjelle melasa
1/2 filxhan me copa të vogla çokollate
Udhëzimet e Disney-t janë super të thjeshta për t’u ndjekur, gjithashtu:
1. Hidhni miell, sheqer pluhur dhe margarinë me bazë bimore në një mikser elektrik. Zgjidhni shpejtësinë mesatare deri sa të krijohet një masë e butë. (Shënim: Ju mund ta bëni këtë hap pas hapi nëse është e nevojshme.)
2. Në një tas të vogël, përzieni ujin e ngrohtë dhe zëvëndësuesin e lëngshëm të vezëve. Shtoni melasa në mikserin tuaj. Përziejini me shpejtësi mesatare të gjithë përbërësit.
3. Hidhni copat e çokollatës.
4. Hidheni përbërjen e përftuar në një tigan dhe lëreni në frigorifer për 30 minuta.
5. Ndizeni furrën gjatë kohës që pregatisni përbërjen në një temperaturë prej 177 °C.
6. Rreshtoni dy letra pergamenë.
7. Krijoni 32 shirita që janë të gjerë 1 cm dhe të gjatë 10 cm. Vendosni 16 shirita në secilën letër të pergamenës.
Piqeni për 20-22 minuta. Shërbejeni me salcat tuaja të preferuara me bazë çokollatë ose luleshtrydhe.
Nëse brumi juaj është shumë ngjitës, Mouse House sugjeron të shtoni një lugë gjelle sheqer pluhur derisa të ngjasojë me strukturën e brumit tradicional të biskotave. / KultPlus.com
Na ishte njëherë… na ishte njëherë e në një kohë të lashtë, një katund, në një cep të humbur të Ballkanit. Ndoshta, diku aty ku sot takohen e ngatërro- hen disa kufij. Diku aty buzë një liqeni. Ngjarja ndodh në këtë humbëtirë, atëherë kur nuk kishte kufij në kuptimin e sotëm. Ndoshta në atë kohë kur Ballkani, apo më mirë Europa Juglindore ishte e ndarë në vilajete, apo ndoshta edhe më herët… Dikur… dikur… … Në një kohë të largët, që ne e shohim pak si turbullt, pak si në mjergull atë kohë, kur në këto vise popullsitë merrnin e jepnin gjithçka me njeri tjetrin. Merrnin e jepnin zakone, kostume, kafshë shtëpiake, gjellë, muzikë (këngë, valle, vaje), përralla, fjalë… Edhe fjalët hynin e delnin nga njëra gjuhë te tjetra dhe shpesh e ndjenin veten mirë aty ku shkonin, shtonin a hiqnin ndonjë mbrapashtesë, ndërronin ndonjë theks, dhe rrinin rehat e bëheshin një trup. Ndonjëherë, rrallë, edhe krushqi bënin. Miqësitë ruheshin por gjithësejcili në punë të tij. Kjo kishte shumë rëndësi.
Pra, në këtë cep të Ballkanit, na ishte njëherë e në një kohë, një katund me pak shtëpi. Gjithsejcili kishte varkën e tij me të cilën peshkonte në liqen. Gjithsejcili kishte shtëpinë e tij. Gjithsejcili kishte një copë pyll, një cop arë, kaun, delet, dhitë, lopën, pulën dhe gjelin e tij. Kishte gruan e fëmijët e tij. Katundi kishte edhe një prift që ishte për të gjithë. E donin, e respektonin, i jepnin edhe hakun. Tek roba dhe mjekra e tij shihnin perë- ndinë, apo diçka që nuk e përcaktonin dot. Nuk hynin të gjykonin thellë. Respekti për priftin ishte një traditë, siç ishte traditë që një ditë në fund të vjeshtë së tretë, mbasi ishin mbaruar të gjitha punët dhe prisnin dimrin, të mblidheshin fshatçe e të pinin, të pinin, të pinin e të këndo- nin, sa tu dilnin tëmthat e të pëlcisnin. Kështu ka mbetur zakon, thonin. Me këtë rutinë, respektonin edhe priftin, festat fetare, Kishën, ardhjen e pranveres, pjelljen e dhenëve… Dhe i respektonin ama. Koha kishte vënë në vend gjithshka. E keqja, nëqoftëse kishte qenë ndonjëherë në këto anë, ishte mënjanuar e harruar. E mira kishte zënë vend kudo. Katundarët ndihmonin njeri tjetrin pa hile e interesë kur ishte nevoja. Festat i bënin bashkë, për gëzimet e njeri tjetrit gëzoheshin të gjithë bashkë, për hallet e njeri tjetrit hidhëroheshin të gjithë bashkë. / KultPlus.com
Programi i “Mare TV” këtë herë iu kushtua bregdetit shqiptar.
“Bregdeti shqiptar, e fshehta e bukur e Europës”, një dokumentar kushtuar bregdetit shqiptar ka arritur kuota rekord të këtij programi në raport me shikueshmërinë, në kuotën e 9.2 % të totalit të ndjekësve të ekraneve gjermane.
“Mare TV” është një institucion në formimin e opinionit turistik gjerman në televizionin NDR, televizioni publik gjerman për Veriun, i ndjekur kudo në Gjermani, Austri e Zvicër.
Ministri i Turizmit dhe Mjedisit, Blendi Klosi deklaroi se në kushtet e pandemisë globale, ky program është një marketing i jashtëzakonshëm i Shqipërisë turistike, për efektet e pritshme pas lirimit të masave dhe rifillimit të udhëtimeve.
Producenti lokal, gazetari Nolian Lole dhe kolegu gjerman Steffen Schneider e treguan Shqipërinë, pikërisht bregdetin jonian, nëpërmjet njerëzve që jetojnë dhe punojnë pranë detit.
“Një numër i konsiderueshëm turistësh vizitojnë vendet ku kamera e “Mare TV” shkon dhe i zbulon. Pamje të mahnitshme të brigjeve joniane janë një ftesë e hapur për shikuesit për të ardhur në Shqipëri”, thotë Klosi.
Falë audiencës rekord së këtij dokumentari, trupa e “Mare TV” thotë se po planifikon një seri të dytë të dokumentimit të bregdetit shqiptar, këtë herë nga Laguna e Karavastasë deri në kufi me Malin e Zi. /atsh/ KultPlus.com
Për të pasur sukses në jetë nevojiten dy gjëra: injoranca dhe besimi në veten.
Shko në Parajsë për klimën, në Ferr për shoqërinë.
Mos ec vërdallë dhe të thuash se bota të ka borxh një jetë. Bota nuk të ka borxh asgjë. Ishte më parë këtu.
Pleqëria është çështje e mendjes mbi materien. Nëse nuk ja vë mendjen nuk është me rëndësi.
Sekreti i të ecurit përpara është të fillosh.
I merr faktet së pari, pastaj mund t’i shformosh si të duash.
Nuk mund të varesh nga sytë kur imagjinata është jashtë përqendrimi.
Është më mirë të mbash gojën të mbyllur dhe t’i lësh njerëzit të mendojnë se je budalla dhe pastaj të e hapësh e të largosh të gjithë dyshimin.
Mirësia është gjuha të cilën të shurdhët mund të e dëgjojnë dhe të verbrit mund të e shohin.
Të frikuarit nga vdekja pason nga të frikuarit nga jeta. Njeriu i cili jeton në tërësi është i përgatitur të vdes në çdo kohë.
Kurdo që gjen veten në anën e shumicës, është koha për pushim dhe për reflektim.
Kurdo që gjen veten në anën e shumicës, është koha për reformim.
Shokët e mirë, librat e mirë dhe ndërgjegjja e fjetur: kjo është jeta ideale.
Mënyra më e mire të gëzosh veten është të tentosh të gëzosh ndonjë tjetër.
Mungesa e parasë është rruga e të gjitha të ligave.
Me sa duket nuk ka asgjë që nuk mund të ndodhë sot.
Nëse e thua të vërtetën nuk duhet të mbash asgjë në mend.
18. Të gjitha përgjithësimet janë gabim duke përfshirë edhe këtë. 19. Patriotizmi mbështetë shtetin tuaj gjatë gjithë kohës, dhe qeverinë tuaj kur ajo e meriton. 20. Guximi është rezistenca ndaj frikës, zotërimi i frikës, jo mungesa e frikës. 21. Të heqësh dorë nga duhani është puna më e lehtë në botë. E di sepse e kam bërë vetë mijëra herë. 22. Kur isha djalosh me 14, babai im ishte aq injorant sa që mezi mund të duroja të e kisha plakun rreth meje. Por kur i bëra 21, isha i befasuar se sa plaku kishte mësuar për shtatë vite. 23. Njeriu i cili nuk lexon libra të mirë nuk ka përparësi mbi njeriun i cili nuk mund t’i lexojë ato. 24. Më mirë një premtim i thyer se asnjë premtim. 25. Kur je në dyshim thuaje të vërtetën. 26. Kam kaluar shumicën e jetës duke u merakosur mbi gjërat të cilat asnjëherë nuk kanë ndodhur. 27. Blejë tokë, nuk po prodhojnë më. 28. Sa më shumë gjërat janë të ndaluara, aq më të njohura bëhen ato. 29. Mos i lejoni shkollimit t’i pengojë edukimit tuaj. 30. Sa më shumë e sqaron, aq më shumë nuk e kuptoj. 31. Kur isha më i ri mbaja në mend çdo gjë, kishte ndodhur apo jo. 32. Sinqeriteti është politika më e mire – kur ka para në të. 33. Nuk është madhësia e qenit në dyluftim, është madhësia e dyluftimit në qen. 34. E gjitha që të duhet është injoranca dhe vetëbesimi dhe suksesi është i sigurt. 35. Mund të jetoj dy muaj me një kompliment të mirë. 36. Le të supozojmë se je një idiot dhe le të supozojmë se je një anëtarë i Kongresit; por po përsëritëm. 37. Klima është çfarë presim, moti është çfarë marrim. 38. Njeriu i cili kapë macen për bishti mëson diç që në asnjë mënyrë tjetër mund të e mësojë. 39. Asnjëherë nuk kam lejuar që shkollimi im t’i ndërhyjë edukimit tim. 40. E pyeta Tomin nëse shtetet gjithmonë kërkojnë falje kur bëjnë gabime dhe ai tha: “Po, të voglat kërkojnë.” 41. Informacioni më interesant vije nga fëmijë, pasi që ata thonë gjithë atë që dinë dhe pastaj ndalen. 42. Humori është bekimi më i madh i njerëzimit. 43. Është nga mirësitë e Zotit që në shtetin tonë ne kemi këto tri gjëra të pa thëna të çmueshme: lirinë e fjalës, lirinë e vetëdijes dhe maturinë për të mos praktikuar asnjërën nga këto. 44. Kur gjuan për dashuri, josh me zemër jo me tru. 45. Shumë gjëra të vogla janë bërë të mëdha përmes llojit të përshtatshëm të marketingut. 46. Kur njerëzit nuk na respektojnë jemi ashpër të dëshpëruar; ndërsa në zemrën private asnjë njeri nuk e respekton veten edhe aq. 47. Raca njerëzore ka një armë vërtetë efektive dhe kjo është e qeshura. 48. Personi i cili nuk lexon nuk ka përparësi mbi personin i cili nuk mund të lexojë. 49. Dallimi mes fjalës së duhur dhe fjalës gati të duhur është sikur dallimi mes rrufesë dhe xixëllonjës. 50. Rrobat e bëjnë njeriun. Njerëzit e zhveshur kanë pak ose aspak ndikim në shoqëri. 51. Le të jetojmë ashtu që kur të vdesim edhe sipërmarrësit t’i vije keq. 52. Kur nevrikosesh, numëro deri në katër; kur je shumë nervoz, betohu. 53. Kujdes nga librat e shëndetit. Mund të vdisni nga një gabim shtypi. 54. Nuk mora pjesë në varrim, por dërgova një letër lajmërimi duke thënë se kam miratuar atë. 55. Gjithmonë respekto eprorët, nëse ke ndonjë. 56. Njeriu është kafsha e vetme e cila skuqet. Ose duhet të. 57. Bëhu i mirë dhe do të jesh i vetmuar. 58. Bëje detyrën tënde sot dhe pendohu nesër. 59. Nëse librat nuk janë shoqëri e mirë, ku do ta gjejë atë? 60. Rrobat nuk e bëjnë thjeshtë njeriun, rrobat janë njeriu. /KultPlus.com
Ylli i muzikës, Bebe Rexha, po qëndron në shtëpi si shumë të tjerë për shkak të përhapjes së koronavirusit.
Këto ditë këngëtarja e famshme me origjinë shqiptare i ka shfrytëzuar për të provuar çdo lloj recete shqiptare, të cilat më pas i ka ndarë me ndjekësit e saj në rrjetet sociale. Kjo është një mënyrë e mirë e Rexhës për ta promovuar kulturën dhe traditat shqiptare te publiku mbarëbotëror, transmeton Koha.
Së fundmi këngëtarja e cila si duket e gëzon pasionin për kuzhinën, ka publikuar në Instagram momente të gatimit të gjellës me qepë, e cila preferohet kryesisht nga veriu i Shqipërisë.
“Ushqim shqiptar, 2 orë që të zihen qepët”, ka shkruar Bebe krahas videos së përgatitjes së ushqimit.
Kujtojmë se Bebe Rexha, shquhet si një prej kantautorëve më të talentuara dhe më të suksesshme në Amerikë. Këngëtarja është me origjinë nga Dibra dhe është zhvendosur në SHBA qëkur ishte e vogël. Por, ajo mundohet në maksimum t’i ruajë traditat e vendlindjes, dhe shpesh e kemi parë duke postuar video ku ajo shihet duke vallëzuar me muzikë shqipe, duke e folur gjuhën amtare me familjarët e saj si dhe duke gatuar receta tradicionale shqiptare. / KultPlus.com
Republika Çeke ka njoftuar se mund të organizohen dasma me deri në 10 pjesëmarrës, duke përfshirë çiftin dhe celebruesit, pasi vendi filloi të lehtësojë kufizimet për të frenuar përhapjen e koronavirusit.
“Çifti mund të mos përdorë maska, por të ftuarit e kanë të detyruar”, deklaroi një zëdhënëse e Ministrisë së Brendshme në Pragë.
Ministri i Brendshëm, Jan Hamacek theksoi se kthimi në jetën normale është i nevojshëm.
Ndërkohë sot u lejua hapja e dyqaneve, shitjet e makinave dhe tregjet javore.
“Natyrisht tregjet operojnë vetëm në formë të kufizuar dhe në kushte të rrepta higjiene”, deklaroi Jiri Sedlacek nga Unioni i Tregjeve.
Të hënën e ardhshme qeveria planifikon të lejojë hapjen e bizneseve me sipërfaqe deri në 200 metra katrorë. /KultPlus.com
Kreu i shtetit, Ilir Meta u shpreh i hidhëruar nga lajmi për ndarjen nga jeta të aktorit shqiptar Rikard Ljarja. Me anë të një postimi në “Facebook”, Meta tha se kjo është një humbje e pazëvendësueshme.
“I hidhëruar nga lajmi për ndarjen nga jeta të aktorit të madh, skenaristit e regjisorit të mirënjohur, Rikard Ljarja. Pa fjalë nga dhimbja për këtë humbje të madhe e të pazëvendësueshme, jo vetëm për familjen e tij, për teatrin dhe kinematografinë shqiptare, por për të gjithë brezat që u rritën dhe duartrokitën talentin e veçantë dhe personazhet e paharruara të luajtura mjeshtërisht prej Tij. Si një përfaqësues tipik i një brezi idealistësh me shpirt krijues, të cilët aq shumë e deshën artin dhe Shqipërinë, ky largim në amëshim i Rikardit të madh na ka pikëlluar të gjithëve!”
Presidenti shprehu ngushëllime për familjarët e aktorit dhe theksoi se kujtimi i tij do të jetë i paharruar. / KultPlus.com
Samuel Langhorne Clemens (30 nëntor 1835 – 21 prill 1910) njihet me emrin Mark Twain (Mark Tuejn), ishte një autor dhe humorist amerikan. Ai shquhet për novelat e tij, The Adventures of Tom Sawyer (Aventurat e Tom Sojerit, 1876), si dhe për (Adventures of Huckleberry Finn) (Aventurat e Hakëllberri Finit), e cila me vone njihej si “Great American Novel” (Novela e famshme Amerikane). Twain u rrit në Hannibal, Missouri, ku shkroi Huckleberry Finn dhe Tom Sawyer, te cilat i shkroi me makine shtypi.
Ai gjithashtu punoi si daktilograf, duke kontribuar kështu në gazetën e vëllait te vjetër Orionit. Derisa ai punoi si daktilograf dhe reporter ai shkroi storien humoristike “The Celebrated Jumping Frog of Calaveras Country”, e cila u be aq e popullarizuar saqë e tërheqi vëmendjen e publikut mbarkombetar. Ai arriti sukses mjafte te madh si një shkrimtar dhe spiker. Mençuria dhe satira e tij ishin te vlerësuara prej shume kritikeve dhe letrareve, dhe ai ishte shok me presidente, artiste, industrialiste te ndryshëm si dhe me Mbretërinë Evropiane. Gjendja e tij financiare ishte e dobët, megjithëse ai fitoi mjaft para nga shkrimet dhe ligjëratat e tij. Ai ishte i njohur si humoristi me i famshëm amerikan i moshës se tij, dhe William Faulkner e quajti Twain “babai i literaturës amerikane”.
Jeta e hershme Mark Twain lindi në Florida, Missouri, me 30 nëntor, 1834 Ai ishte i biri i Janë, një shtetas i Kentucky dhe John Marchal Clemens nga Virginia. Prindërit e tij u takuan kur babai i tij u shpërngul në Missouri dhe u martuan disa vite me vone, me 1823. Ai ishte femiu i gjashte nga 7 fëmijët ishin gjithsej, prej te cilëve vetëm 3 mbijetuan. Vëllau i tij Orion (1825-1897), Henry dhe Pamela (1827-1904) vdiqën në një shpërthim në anije. Motra e tij e quajtur Margaret (1833-1836) vdiq kur ishte 3 vjeç, dhe vëllai i tij Benjamin (1832-1842) që vdiq 6 vite me vone. Kur Twain ishte 4 vjeç, familja e tij u shpërngul për në Hanibbal, Missouri, një port detar në qytetin e Missisipit, i cili ishte një inspirim për shkrimin e librit “The Adventures of Tom Sawyer and Adventures of Huckleberry Finn”. Kur Twain ishte 11 vjeq, me 1847, i vdiq babai nga pneumonia. Një vit me vone ai u be daktilograf. Në vitin 1851 ai filloi te punonte si daktilograf dhe kontribuoi në artikujt dhe skeçet humoristike për gazetën Hannibal, një gazete që posedohej nga vëllau i tij. Kur ishte 18 vjeçar, ai e leshoi Hannibalin dhe punoi si shtypes në New York City, Philadelphia, St. Luis, Cincinnati. Ai iu bashkëngjit Bashkimit Ndërkombëtar Tiografik te posaformuar, bashkimit te shtypësve dhe gjate mbrëmjeve u edukua në bibliotekat publike, duke gjetur kështu informata me te gjera sesa në shkollën tradicionale. Clemmens kane ardh St. Louis në Keokuk me 1854, dhe jetuan në Muscatine gjate periudhës se verës te vitit 1855. Gazeta Muscatine publikoi 8 storie te cilat kishin pothuajse 6000 fjale.
Martesa dhe fëmijët Përgjatë vitit 1868, Twain dhe Olivia Langdon u fejuan, ndërsa në shkurt te vitit 1870 u martuan në Elmira, New York. Langdon vinte nga një familje e pasur dhe liberale dhe nëpërmjet saj Twain takoi shume aboltioniste, socialiste dhe aktiviste për te drejtat e grave dhe barazi shoqërore. Ai gjithashtu takoi edhe shkrimtarin dhe socialistin Eutopian, William Dean Howels, me te cilin pati shoqëri për një periudhe te gjate. Ata kishin 3 vajza : Susy (1872-1896), Clara (1874-1962), Jean (1880-1909), dhe një djalë i cili vdiq kur ishte 19 muajsh nga sëmundja e difterisë. Martesa e Twain dhe Olivias zgjati 34 vite, deri me 1904 kur Olivia vdiq. Te gjithë anëtaret e familjes Clemens janë varrosur në varrezat e Woodlawn në Elmira.
Dashuria për shkencën dhe teknologjinë Twain ka qene i fascinuar pas shkencës dhe hetimeve shkencore. Ai pati një shoqëri te afërt dhe te gjate me Nikola Tesla. Ata kalonin shumë kohe sebashku në laboratorin e Tesles. Ai zotëroi 3 zbulime duke përfshire një përmirësim në rregullimin rripave (shiritave) për ndarjen e rrogave (për te zëvendësuar rripat llastik) Libri i tij A Connecticut Yankee in King Arthur’s Court karakterizon një udhëtues te kohës nga Amerika bashkohore duke përdorur dijen e tij për shkencën për te prezantuar teknologjinë moderne Arturianit te Anglisë. Ky lloj i linjës se storieve me vone do te kthehej në një karakteristike te përbashkët te fanta-shkencës nen-zhanër, historisë alternative. Në vitin 1909 Tomas Edisoni vizitoi Twain në shtëpinë e tij në Redding, Connecticut, dhe e filmoi atë. Një pjesë e filmit u përdor në “Prince and the Pauper“ (1909), i cili ishte një film i shkurte.
Jeta e mëvonshme dhe vdekja Twain kaloi në një periudhe te depresionit te thelle, e cila filloi me 1896 kur vajza e tij Susy vdiq nga Meningjit. Vdekja e Olivias me 1904 dhe e Janë me 1909 e thelluan errësirën e tij. Me 20 maj te vitit 1909 miku i tij i ngushte Henry Rogers vdiq papritmas. Në vitin 1906, Twain filloi autobiografinë e tij në North Amerikan Review. Në prill Twain dëgjoi që mikesha e tij Ina Coolbrith humbi te gjitha pronen e saj në San Francisko nga tërmeti. Twain e formoi në vitin 1906 një klub për vajzat që ai i shihte si mbesat zëvendësuese, the Angle Fish dhe Aquarium Club. Shumica e anëtareve ishin te moshës 10-16vjet. Twain shkëmbente letra me vajzat e klubit “Angel Fish” dhe i ftonte ato në koncerte dhe teatre si dhe për te luajtur lojëra. Universiteti i Oksfordit e nderoi Twain me një doktorate nderi për shkrimet e tij, me 1907. Në vitin 1909 është cituar për thënien e tij : ”Unë erdha në ketë bote me Halley’s Comet me 1835. Kjo do te vije prape vitin tjetër dhe un pres që te shkoj me te. Do te ishte zhgënjimi me i madh i jetës sime në rast se unë nuk shkoj me Halley’s Comet. Almighty ka thëne, padyshim : “Tani këtu janë këto dy kapriqe te pa numërueshme ; ato kane ardhur sebashku dhe duhet te shkojnë sebashku.” Parashikimet e tij ishin te sakta- Twain vdiq nga një sulm në zeme me 21 prill 1910 në Redding Connecticut, një dite pas qasjes me te afërt te kometës në Toke. Kur presidenti William Howard Taft dëgjoi për vdekjen e Twain tha: “ Mark Twain dhuroi kënaqësi-gëzim te vërtet intelektual për miliona njerëz, dhe puna e tij do te vazhdoj te dhuroje kënaqësi për miliona njerëz që do te vijnë… Humori ishte Amerikan, por ai ishte njësoj i vlerësuar nga njerëzit e Anglisë dhe njerëzit e vendeve tjera si dhe njerëzit e vendit te tij. Ai ka dhuruar një pjesë te pavdekshme te literaturës Amerikane“. Funerali i Twain ishte në “Old Brick”, Press Byterian në kishën e New Yorkut. Ai u varos me familjes e tij në varrezat Woodlawn në Elmira-New York.
Vepra E gjithë vepra e Mark Twain inspirohet nga ngjarje dhe vende ku jetoi apo vizitoi, ndaj konsiderohen si autobiografike. Vepra e tij ndahet përgjithësisht : Përshtypjet e udhëtimit ; Kujtimet e fëmijërisë dhe rinise se hershme Narracionet satirike te ambientuara në Mesjete dhe Rilindje. Mark Twain, në maksimumin e famës se tij, ishte një celibritet në Amerike, për kohen e tij.
Veprat :
The Celebrated Jumping Frog of Calaveras County, 1867, novele Innocents Abroad, 1869, novele udhëtimi Roughing It, 1872, udhëtim nga Mississipi në Las Vegas The Gilded Age: A Tale of Today, 1873, novele The Adventures of Tom Sawyer, 1876, novele A Tramp Abroad, 1880, kujtime udhëtimi |1601: Conversation, as it was by the Social Fireside, in the Time of the Tudors, 1880, novele The Prince and the Pauper, 1881, novele Life on the Mississippi, 1883, tregim autobiografik The Adventures of Huckleberry Finn, 1884, novele Tom Sawyer Abroad, 1894, novele Pudd’n’head Wilson (Wilson lo Zuccone), 1894, novele Tom Sawyer Detective, 1896, novele A Connecticut Yankee in King Arthur’s Court, 1889, novele Following the Equator, 1897, tregime udhëtimi The Man That Corrupted Hadleyburg, 1900, novele King Leopold’s Soliloquy, 1905, satire politike The War Prayer, 1905, novele * The Eva-s diary, 1906, novele The $30,000 Bequest and Other Stories, 1906, novele What Is Man ?, 1906 A Horse’s Tale, 1907 Captain Stormfield’s Visit to Heaven, 1909, tregim i gjate Letters from the Earth, 1909, novele e botuar pas vdekjes The Mysterious Stranger, 1916, novele e botuar pas vdekjes /KultPlus.com
