Hodha nji sy në faqen e parë dhe lexova: Më shkrepi ta shkruej jetën time. Ky mendim më leu tue i pa fotografitë e ndryshme që të përfytyrojnë xha Simonin qysh në kohën e fëmijnisë. Përse të mos e shkruej?
Jeta ime për të tjerët, ndoshta nuk, nuk e vlen asnji dysh, por për mue ka rëndësi, se asht imja, se mund të përshkohet nëpër faza të ndryshme interesante dhe dikur, tue i këndue në këto fletë gëzimet ose hidhërimet e mia, do të kënaqem ose do të pezmatohem. Sikurse pëson ndryshime trupi i njeriut tue u lakue nëpër rrathët e moshës, pa dyshim, ashtu ndodh edhe me jetën.
Mbasandej kapërceva disa faqe e këndova: Mbasandej kush mund të pretendojë se nuk ka në mes të meshkujve djem e burra të bukur? Mos kujton ndokush se nuk ka bukuri mashkullore? Sikur të mundesh me folë femna me atë liri gjuhe që kanë meshkujt, kushedi se sa poezi do të vargëzonte për me e përshkue bukurinë e shokut të vet jo gjini.
Kush mundet me më sigurue se nuk ka me mija femna që tue kundrue mbas kafazit të dritares ose nëpërmjet të perces së hollë, nuk shprazin nga goja mija e mija tubëza vjeshash për ata që u kalojnë pranë, pa ditë se kanë plagosë randë disa zemra të strukura brenda do krijesave të dënueme me burgim të përjetshëm?
Oh, sa e sa sy vajzash, nga plasat e dyerve ose nga birat e kafazeve, ndjekin e përcjellin kalimtarë të rinj me rrafje të forta të zemrave që s’kanë liri e të drejtë shfrimi e dashunimi, megjithëqe natyra edhe ato, sikurse meshkujt dhe ndoshta më shumë se ata, i ka pajtue me ndjesitë e dashunisë. Pak ma andej, mbasi shfletova disa fletë, ndesha në këtë pjesë interesante: S’di se cfarë lidhje mund të mbetet në mes të dy bashkëshortëve kur futet ndërmjet tyne mënia në trajtë shamjeje e rrafjeje?
Grueja që poshtnohet me shamje të randa dhe rrifet, o duhet të jetë lopë që ti meritojë, ose të ketë interes apo frikë nga burri që nuk e këput atë lihej që i ka bashkue dikur formalisht e jo shpirtnisht, sepse jeta e përbashkët, në rasa e në kushte të tilla, bahet e padurueshme. Për ta shmangë cdo mosmarrveshje, për të pasë harmoni të vazhdueshme dhe për të ba nji familje të lumtun , ata që do të martohen përpara se ta bashkojnë fatin e jetës lypet të jenë njoftë, t’i kenë pajtue karakteret dhe ta kenë dashunue njeni-tjetrin. Përndryshe, s’bajnë tjetër vecse krijojnë nji ferr për me e torturue veten dhe për t’i përcëllue në flakët e tij edhe fëmijët që do t’u lejnë. / KultPlus.com
Në akustikën e mrekullueshme të Kishës “Shën Ndou” Kori i Filharmonisë së Kosovës, Ansambli Harkor dhe pianisti Andi Duraku, nën drejtimin e dirigjentit Hajrullah Syla dhuruan spektër emocional përmes një koncerti të pasur artistik, i cili u mbajt për të shënuar 65-vjetorin e vdekjes së kompozitorit Halit Kasapolli, shkruan KultPlus.
Ambienti i errët dhe i ftohtë i sallës ku mbahej mbrëmja artistike që ndërthurte elegancën, seriozitetin dhe misterin i jepte koncertit një karakter mjaft të veçantë, ku në fokus qe edhe vepra premierë “Like the Touch of Rain”, e cila ishte kompozim i vet dirigjentit Syla.
Interpretimi harmonik i tingujve të koristëve me pianon dhe ansamblin harkor që rrjedhte aq natyrshëm me drejtimin e dirigjentit, i cili ishte edhe kompozitori i veprës, mundësoi që fillimisht premiera të prezantohej me një kualitet të lartë, e më pas si e tillë edhe të pranohej nga audienca në sallë.
Vepra “Bash n’zaman të djelmënisë” e kompozitorit Halit Kasapolli e cila u interpretua në nderim të jetës dhe veprës së tij, u dallua nga veprat tjera përmes tingujve mjaft të veçantë. Ndërsa pika interpretuese “Spirit” e Rawn Harbor, i shtoi gjallërinë sallës me tinguj më të lartë dhe më dinamikë duke lënë një shije fantastike te publiku.
Kurse në interpretimin e veprës “Sei, lieber Tag, willkommen” të autorit Johannes Brahms, fillimisht tërhoqi vëmendje radhitja e antarëve të Korit të Filharmonisë, të cilët në dy radhë u shfaqën të përzier grupi i burrave dhe ai i grave. Pastaj ishte energjia dhe timbri i tyre ai që mori me vete audiencën deri në fund të koncertit.
Veprat tjera të cilat u interpretuan në koncertin e mbrëmshëm ishin: “Der Gang zum Liebchen” nga Johannes Brahms, “All Seems Beautiful to Me” nga Eric Whitacre, “ Becoming the Ocean” nga Jake Runestand, “Earth Song” nga Frank Ticheli, “I am the world” nga Lauren Biggs dhe “Jupiter” nga Michael Ostrzyga, të cilat publiku po ashtu i mirëpriti mjaft mirë.
Krejt në fund të koncertit Dirigjenti Hajrullah Syla tha se ndihet shumë i kënaqur që para publikut arritën të paraqesin në mënyrën më të mirë të mundshme një program me kërkesa të larta artistike.
“Gjatë gjithë kohës së interpretimit të koncertit të sotëm kam pasur një ndjenjë tepër të mirë. E pata një feedback mjaft të mirë edhe nga kori kështu që jam shumë i kënaqur me gjithë koncertin. Për një kohë kaq të shkurtër kemi arritur që ta sjellim në mënyrën më të mirë të mundshme para publikut një program të tillë, i cili ishte mjaft sfidues atraktiv” është shprehur dirigjenti Syla.
Sigurisht, gjithë entuziazmin për koncertin e interpretuar dirigjentit Syla ia shtonte edhe fakti që publiku e priti mjaft mirë edhe veprën “Like the Touch of Rain” të kompozuar nga vetë ai.
“Vepra ime është e shkruar për këtë koncert. Ishte një premierë për të cilën është menduar gjatë për t’u shkruar. Përbëhet nga një formacion instrumentistësh harkorë – piano – kor mix. Jam shumë i kënaqur me interpretimin e veprës dhe po besoj që energjia dhe gjithë ajo çka kam dashur të shprehë përmes muzikës është përcjellë sonte te publiku të cilët edhe e pritën mjaftë mirë”, ka thënë Syla duke potencuar se reagimi i publikut e drejton një artist menjëherë drejt krijimeve të tjera
“Për mua si krijues është frymëzim dhe thjesht një shtytje për të vazhduar tutje. Realisht kompozimi është pjesë e jetës sime, është profesion i imi, kështu që sigurisht që kur vepra pritet mirë nga publiku atëherë kompozitori, nuk ka çfarë pret tjetër përveçse të filloj menjëherë me vepra të tjera”, ka përfunduar ai.
Kurse për pianistin Andi Duraku puna për të sjellë këtë koncert premierë ishte kënaqësi e madhe, pasi pjesëmarrëja e muzikantëve profesional ia lehtësonte mjaft shumë punën.
“Me të vërtetë ishte një mbrëmje e jashtëzakonshme. Ishin të gjitha veprat premierë që u ekzekutuan për herë të parë për publikun tonë. Secila vepër mendoj se është realizuar në maksimumin e tyre. Unë kisha kënaqësinë të interpretoj në shumicën prej tyre me piano. Me të vërtetë është kënaqësi sa herë që bashkëpunoj me këtë kor të mrekullueshëm dhe me dirigjentin Hajrullah Syla” ka thënë pianisti Duraku.
Ndërsa, konert mjeshtri i Filharminisë së Kosovës, Festim Fanaj, i cili në koncert mori pjesë edhe si shikues edhe si interpretues tha se Kori i Filharmonisë në këtë koncert pati një paraqitje mjaft dinjitoze.
“Sonte isha në rolin e udhëheqësit të Ansamblit Harkor, që ka qenë i inkorporuar me Korin e Filhrmonisë, nën dirigjimin e Hajrullah Sylës. Ne si ansambël kemi performuar një pikë, tjerat kanë qenë të gjitha me piano dhe kor. Me të vërtetë kori ka qenë sonte shumë, shumë në nivel të bukur me tinguj të homogjenizuar, ritmikisht, gjithmonë bashkë, me harmoni në mes të tyre. Është vërejtur një dinamikë shumë bukur e thksuar me shumë oscilime, piano dhe de forte” është shprehur koncertmjeshtri Fanaj i cili pati komente shumë pozitive edhe për veprën premierë të dirigjentit Syla.
“Me të vërtetë ka bërë një vepër shumë interesante, shumë të bukur, moderne, kontemporane. Gjithashtu ka pasur edhe sentiment në atë vepër. Mua më ka pëlqyer dhe për këtë e përgëzoj dirigjentin Syla. Besoj që kjo vepër tashmë do të performohet edhe në qytete dhe shtete të tjera” ka thënë Fanaj.
Kurse antarja e Korit të Filharmonisë, Elona Sadiku, për KultPlus është shprehur se se ndihet e lumtur që pas një pune shumë të lodhshme koncerti kishte rezultuar me një performancë mjaft të suksesshme.
Për koristen Sadiku vepra “ Bash n’zeman…” i kishte lënë një ndjenjë të thellë gjatë interpretimit ngase ishte dedikim për kompozitorin Halit Kasapolli.
“Ka qenë vepra “Bash n’zeman…” nga kompozitori Halit kasapolli e cila më ka prekur jashtëzakonisht shumë për shkak se e ka përshkruar jetën e tij të shkurtër si kompozitor. Kjo vepër që është sjellë me aranzhim të kompozitorit Hajrulla Syla tregon historinë e tij se si një sëmundje për një kohë të shkurtër ja ka marrë jetën. Për mua kjo ka qenë kjo pika më e ndjeshme”, ka përfunduar Sadiku./KultPlus.com
Kanë nisur kremtimet dhe përgatitjet për Ditën Ndërkombëtare të Muzeve e cila është më 18 maj dhe synon të tërheqë më shumë vëmendje ndaj këtyre institucioneve të artit, kulturës e trashëgimisë.
Me këtë rast, ministri i Ekonomisë, Kulturës e Inovacionit, Blendi Gonxhja, publikoi në rrjetet sociale një listë institucioneve ku do të ketë aktivitete mbrëmjen e nesërme.
“Nata e Muzeve”, 18 maj, në një mbrëmje plot ngjyra dhe muzikë së bashku me Universitetin e Arteve Tiranë dhe me përkrahjen e Bashkive Shkodër, Durrës, Krujë, Korçë, Fier dhe Berat”, shkroi ministri Gonxhja dhe më pas renditi institucionet e angazhuara: Muzeun Kombëtar “Gjergj Kastrioti Skënderbeu”, Krujë; Muzeun Kombëtar të Artit Mesjetar, Korçë; Muzeun Kombëtar Ikonografik “Onufri”, Berat; Muzeun Kombëtar të Fotografisë “Marubi”, Shkodër; Kullën Veneciane, Durrës; Muzeun Arkeologjik Apoloni; Muzeun Kombëtar të Përgjimeve “Shtëpia me Gjethe”, Tiranë.
Ndryshe nga ditët e tjera të vitit, më 18 maj, muzetë do të rrinë të hapura në pritje të vizitorëve deri në orën 22:00 dhe hyrja do të jetë falas./atsh/KultPlus.com
Shkrimtari dhe historiani i njohur, Jusuf Buxhovi, ka njoftuar se tani e tutje librat e tij mund të shkarkohen përmes faqës së tij elektronike, pa pagesë.
Ai ka bërë të ditur se në faqen e tij gjenden botimet historiografike “Kosova” në tri vëllime, anglisht, “Maqedonia” , anglisht dhe shqip, “Dardania”, “Kosova – histori e shkurtër” dhe “Kthesa historike “1.
Ndërkaq, nga romanet e tij, në faqe gjenden “Shënimet e Gjon Nikollë Kazazit”, “Libri i Bllacës”, trilogji, “Trilogjia gjermane”, “Letrat për Kryeprincin”, “Libri i të mallkuarve”, “Jeniçeri i fundit”, “Dosja B” (shqip dhe anglisht), “Mona” dhe “Dushkaja”.
“Në këtë faqe që mund të shfrytëzohet gratis, gjenden edhe shënime. recensione si dhe opinione të autorit. Faqja do të plotësohet me botime tjera në gjuhët e huaja”, ka shkruar Buxhovi.
Në Akademinë e Shkencave të Shqipërisë u mbajt ceremonia e përurimit të Qendrës së ringritur të Studimit të Arteve, si njësi kërkimore afatgjatë e ngritur pranë Akademisë së Shkencave.
Ceremonia u çel në praninë e emrave të njohur të artit shqiptar me një fjalë përshëndetëse nga akad. Skënder Gjinushi, kryetar i Akademisë së Shkencave. Për punën e kësaj qendre dhe perspektivat e saj foli akad. Stefan Çapaliku.
QSA është një institucion kërkimor-shkencor pjesë e strukturës së Akademisë së Shkencave, i themeluar në vitin 1986. Ajo ka si objekt studimi: artet figurative, teatrin, kinemanë, muzikën, koreografinë, fushat e bashkëveprimit të arteve.
Studimet teorike dhe ato mbi problemet metodologjike ishin parësore përpara vitit 1991. Ndërsa pas vitit 1993 studimet e historisë së arteve në Shqipëri dhe vështrimet kritike e analitike mbi to zunë vendin kryesor, pa përjashtuar edhe studimet në rrafshin teorik e metodologjik, kur ishte e nevojshme.
QSA i kushtoi vëmendje trashëgimisë dhe traditave në artet shqiptare, duke filluar që nga periudhat e hershme, ajo e mesjetës e deri sot; trajtoi çështje e dukuri që lidheshin me rrjedhat bashkëkohore të arteve në Shqipëri. Ajo funksionoi si njësi unike e organizuar në tre sektorë: ai i arteve figurative, ai i arteve skenike dhe kinematografisë dhe ai i muzikës dhe koreografisë.
Në vitin 2000 QSA ndërmori projektin “Enciklopedia e artit shqiptar”, në bashkëpunim me Akademinë e Shkencës dhe Arteve në Kosovë. QSA boton revistën shkencore “Studime mbi artin”, numri i parë i së cilës ka dalë në vitin 1995.
Në shtator 2007 QSA kaloi si institucion pranë Akademisë së Studimeve Albanologjike, e integruar si departament më vete në Institutin e Antropologjisë Kulturore dhe Studimit të Arteve. Me reformën shkencore të vitit që shkoi Qendra e Studimit të Arteve doli edhe njëherë si njësi shkencore më vete, duke shtuar organikën e vet, e cila do vazhdojë të jetë në zgjerim./atsh/KultPlus.com
Shitet në ankand 35 milionë dollarë një pikturë e Claude Monet. Ka zgjatur vetëm 8 minuta “lufta” e ofertave për të patur ‘Meules a Giverny”, e përfunduar në vitin 1893 nga gjigandi i impresionizmit.
Ankandi është zhvilluar në New York, pasi online u hapën edhe shitjet për rreth 50 piktura të artit modern me vlerë prej të paktën 235 milionë dollarë.
Claude Monet ishte një ndër themeluesit e impresionizmit francez, ku drita është elementi thelbësor, pasi nxjerr në pah ngjyrat dhe mënyrën si perceptojmë botën. Shumica e pikturave të tij janë peisazhe të larmishme. Piktura e tij “Le basin aux ninpheas” vitin e kaluar u shit në ankand për shifrën rekord prej 74 milionë dollarë.
Tregu botëror i artit në vitin 2023 shënoi një rënie të ndjeshme./tvklan/KultPlus.com
Sot bëhen 129 vite nga lindja e shkrimtarit Haki Stërmilli, shkruan KultPlus.
Haki Stermilli ka lindur në Dibër më 17 maj të vitit 1895. Ai ishte shkrimtar, gazetar, kryetar i shërbimit sekret shqiptar në vitet 1923-’24 me dekret të Ahmet Zogu, partizan në Luftën e Dytë Botërore, anëtar i KANÇ-it, përfaqësues i Dibrës në Kuvendin Popullor dhe drejtor i Bibliotekës Kombëtare.
Në shkrimet e tij ai trajtoi tema me të drejtat e shqiptarëve të ngelur jashtë kufijve të shtetit shqiptar, republikanizmit dhe të drejtave të femrave.
Stërmilli ishte autor i tre romaneve, mbi 30 tregimeve të shkurtëra, pesë pjesëve teatrale, dy ditareve dhe disa dyzina artikuj publicistikë. Vepra e tij më e njohur është Sikur t’isha djalë të cilin e shkroi 1936.
Veprat tjera të tij ishin Dibranja e mjerueshme (1923), Dashuni e besnikri (1923), Agimi i lumnueshëm (1924), Burgu (1935), Sikur t’isha djalë (1936), Fyelli i Dibrës përmbledhje që u botua në serinë “Visaret e Kombit” (1944), Trashëgimtarët tanë (1950) ndërsa pas vdekjes u botuan ditari “Shtigjet e lirisë” (1966) dhe “Kalorësi e Skënderbeut” (1968).
Romani Sikur të isha djalë është ndoshta i vetmi roman “më i shitur” me ribotimet periodike nëpër vite. Romani është një apoteozë e fuqishme artistike për të drejtat e njeriut në përgjithësi dhe të femrës në veçanti.
Ai zgjoi kërshëri dhe luajti një rol të pazëvëndësueshëm në masën e lexuesve në të gjitha trevat shqiptare. Në vitet ’30, në vitet ’50 dhe deri në dhjetëvjeçarin e parë të shek. 21, romani ka njohur mbi 12 ribotime: në Tiranë, Prishtinë e Shkup, duke shënuar një rekord të paarritshëm në historinë e letrave shqiptare. Romani “vë gishtin” në një lëmi të ndjeshme në jetën shoqërore shqiptare – tragjizmin e jetës së femrës.
Një vend dikur i ndaluar për turistët britanikë, tani i shndërruar në një nga pikat kryesore të udhëtimeve dhe i vlerësuar nga pushuesit falë plazheve të tij magjepsëse dhe çmimeve të lira, shkruan Benedict Tetzlaff-Deas në një artikull të botuar në të përditshmen britanike “Mirror”.
Pas disa dekadash nën regjimin komunist, Shqipëria hapi dyert e saj për turistët në fund të shekullit të XXI, dhe që atëherë ndërtesat gri të epokës komuniste janë zëvendësuar me peizazhet shumëngjyrëshe të qytetit dhe një kulturë elegante kafenesh.
Për më tepër, plazhet e vendit janë vlerësuar si disa nga më të mirat në të gjithë Evropën. Ksamili – një fshat bregdetar në Rivierën Shqiptare – është krahasuar me Maldivet nga përdoruesit e TikTok-ut dhe influencuesit e udhëtimeve.
Plazhet me rërë të bardhë, deti i qetë dhe kasollet e kashtës në plazhe sigurisht që kanë një ngjashmëri të madhe me ishullin tropikal, dhe gjithashtu janë shumë më të përballueshme.
Një industri turistike në lulëzim – do të thotë – se në Ksamil tani ofrohet një përzgjedhje e gjerë hotelesh dhe akomodimesh alternative, ku disa dhoma të disponueshme i gjeni për vetëm 23 euro nata.
“Kur njerëzit shohin foto të këtij vendi, ata menjëherë mendojnë për Maldivet! Por, për fatin tonë, është shumë më afër”, tha një përdorues i TikTok “The Travel Mum” duke e vlerësuar Shqipërinë si destinacionin e ardhshëm të pushimeve.
“Shtojeni atë në listën tuaj të destinacioneve për pushime në 2024”, tha një tjetër.
Aktivitetet e njohura përgjatë bregdetit përfshijnë zhytjet dhe notin – por nëse dëshironi të relaksoheni ka shumë karrige të vendosura përreth bregut ku mund të shijoni rrezet e diellit.
Kostoja mesatare e një birre është vetëm 2 euro, ndërsa vera priret të jetë e këndshme dhe e ngrohtë, me temperatura mesatare deri në 25 gradë Celsius.
Në Ksamil do të keni mundësi të zbuloni Rivierën Shqiptare, një zonë e bukur ende relativisht e paprekur nga turizmi ndërkombëtar, e cila krenohet me vendet e trashëgimisë botërore të UNESCO-s, qytetet dhe vendasit miqësorë.
Pikat kryesore turistike përfshijnë Lagunën e Kripës në liqenin e Butrintit, shpellën enigmatike të Kreshmoit dhe qytetin antik bizantin të Gjirokastrës.
Fluturimet drejt kryeqytetit shqiptar, Tiranë nga Londra nisin nga rreth 70 euro.
Një qytet historik i vendosur mes maleve,
Tirana – një qytet historik i vendosur mes maleve – ia vlen të vizitohet për të shijuar një pushim të këndshëm në qytet, me ndërthurjen e saj të gjallë të së vjetrës dhe të resë që i jep një hyrje të shkëlqyer Shqipërisë përpara se të udhëtoni në pjesën tjetër të vendit.
Britanikët që mezi presin të largohen me pushime mund të kursejnë deri në 140 euro në pikat e e njohura turistike evropiane dhe destinacionet e plazhit./atsh/KultPlus.com
Me vepra të autorëve të shquar si Bethoven, Listz e Brahms, u mbajt koncerti i dytë i Festivalit të muzikës klasike “Chopin Piano Fest” nga protagonistët Saran Suebsantiwongse- Bariton dhe Alberta Troni- Pianiste, shkruan KultPlus.
Salla edhe këtë herë e improvizuar në Amfiteatrin e Bibliotekës Universitare u mbush të mërkurën mbrëma me adhurues të muzikës klasike, për të shijuar mjeshtërinë e pianistes së njohur Troni dhe baritonit Suebsantiwongse, i cili nga Tajlanda kishte ardhur për të ndarë përvojën që e kishte marrë nga shkollimi i tij në Shkollat e Muzikës në Manhattan dhe në Britani.
Koncerti filloi me drejtimin e drejtoreshës organizative të Festivalit Besa Luzhës, e cila me një fjalim përshëndetës i uroi mirëseardhje publikut në sallë, duke e njoftuar edhe për përmbajtjen e koncertit, pjesa artistike e së cilit do të fillonte pas pak, në skenën e rregulluar me shumë shije dhe finesë.
Dritat u fikën. Menjëherë në sallë u paraqitën edhe protagonistët e mbrëmjes. Pas një përulje plot respekt para publikut filloi interpretimi i veprës së parë “An Die Ferne Geliebte”- A cycle of six songs op.98 nga autori L.B. Bethoven.
Tingujt nga loja aq e bukur e pianistes Toni, përshtateshin shumë natyrshëm me zërin brilant të baritonit tajlandez, duke e emetuar një energji mjaft e këndshme në çdo kënd dhe cep të ambientit, që më pas me karakterin dhe filozofinë e secilës vepër integroheshin pashmangshëm në secilin që gjendej në sallë.
Veprat tjera të cilat pasuan në koncert ishin: “Un sospiro”, “La leggerezza”- Piano Solo e autorit F. Listz, “Meine Liebe ist grun” Op. 63 Nr.5, “Von ewiger Liebe” / Love is forever. Op.43 Nr.1 “Alte Liebe” op.72 Nr.1 të autorit J. Brahms, “Tango-Rapsody” Adions Nonino- Piano Solo nga A.Piazzolla dhe Don Quichotte a Dulcinee, “Chanson Romanesque”, “Chanson epique”, “Chanson a boire” nga M. Ravel.
Para fillimit të pikës së fundit artistike baritoni Suebsantiwongse iu drejtua publikut me një fjalim ku tha se ishte shumë i lumtur që gjendej në Prishtinë për të performuar në Festivalin “Chopin Pinao Fest”, duke treguar po ashtu që kultura dhe vendi i Kosovës në përgjithësi i kishin pëlqyer jashtë mase.
Ndërsa pas koncertit në një prononcim për KultPlus, pianistja Alberta Troni u shpreh e lumtur që kishte arritur një bashkëpunim të frytshëm me baritonin në fjalë, bashkëpunim ky që sipas saj për t’u sjellë në nivel të tillë nuk ishte aspak i lehtë.
“Këtu duhet ta falënderoj edhe ambasadoren në shkuarje të Kosovës në Tajlandë- Bankok, Ulpiana Lamën, e cila gjithashtu vendosi një relacion bashkëpunimi në mes të Kosovës dhe Tajlandës, e pastaj faktikisht janë vendosur edhe konturat e programit. Pas kësaj baritoni ka ardhur në Kosovë kemi bërë një punë intensive, ku më pas siç tregoi edhe ai, i ka pëlqyer shumë vendi, ambienti, kultura njerëzit sepse për të është hera e parë që vjen në Ballkan”, u shpreh pianistja Troni.
Troni më tej foli edhe për procesin e punës nga ku tha se gjithçka ka shkuar shumë natyrshëm, përkundër faktit që baritoni i përkiste një kulture tjetër, për më tepër që edhe programi interpretues ishte me kërkesa të mëdha artistike nga repertori i Bethoven, Ravell dhe Brahmz.
“Zakonisht te ne këndohet muzikë operistike, mirëpo në këtë rast Suebsantiwongse kishte përzgjedhur një repertor pak më filozofik, më të thellë. Nuk ishte e lehtë të ndërlidheshin veprat me njëra tjetrën, sepse kërkonte një koncentrim më të thellë dhe përkushtim. Bashkëpunimi ka shkuar shumë natyrshëm, sepse është shumë me rëndësi përputhja e ngjyrës së tingullit. Ai menjëherë është adaptuar me punën time. Kemi punuar shumë intensivisht sepse megjithatë aziatikët janë të njohur për punë të madhe, derisa ne ndoshta mbajmë prova deri në një orë me këtë kanë zgjatur provat deri në tri orë. Mendoj që në fund kemi dhënë një produkt të bukur”, ka thënë pianistja Troni.
Kurse baritoni Suebsantiwongse ka thënë se ndjehet i impresionuar me kulturën dhe shumëçka tjetër në Kosovë, por mbi të gjitha me kualitetin e zërave të studentëve të Fakultetit të Artit.
“Fillimisht isha shumë i impresionuar me kualitetin e zërave të tyre. Mendoj se biologjikisht njerëzit nga Kosova kanë zëra kaq të bukur, të fuqishëm. Por gjithashtu ka të bëjë edhe me kulturën, siç është muzika folklorike, vendi që inspiron njerëzit të jenë të ndjeshëm, të bëjnë art me zërin. Janë të vetëdijshëm për këtë kualitet dhe me të shkëlqejnë. Përveçqë e kam kuptuar se kanë zëra të bukur, si askund në botë, ata janë studentë që kanë përvojë në këndim”, është shprehur baritoni tajlandez Saran Suebsantiwongse.
Ndërsa, drejtoresha artistike e Festivalit, Lejla Pula ka thënë se vetë prania e publikut në sallë është tregues faktik që “Chopin Pino Fest” ka arritur të ketë publikun e tij, i cili mbi te gjitha përjeton emocione kulmore artistike me vepra të autorëve më të shquar botëror.
“Sonte, ishte koncerti i dytë i radhës. Profesoresha jonë, Alberta Troni, ka përzgjedhur një bariton nga Tajlanda i cili ka ardhur special nga ky shtet i largët prej Kosovës. Është hera e parë që ai vjen në Ballkan për të interpretuar një program sfidues nga më të mëdhenjtë e muzikës klasike. Edhe profesoresha Troni luajti dy etida të Listz-it, një vepër premierë të Piazzolla-s, Kjo mbrëmje kishte një sharm të veçantë. Dhe jam shumë e lumtur që përsëri salla ishte e mbushur me publik kjo tregon që ne kemi arritur ta krijojmë publikun tonë, i cili e di që kur vjen këtu dëgjon vërtetë vlera, vlera kulmore artistike. Kjo është legjitimacioni jonë, letërnjoftimi i festivalit tonë që vërtetë përçon emocione të përceptimit të vlerës kulmore artistike tek artëdashësit”, ka thënë drejtoresha Lejla Pula.
Drejtoresha më tej foli edhe për sfidat me të cilat u hasën përgjatë realizimit të këtij festivali, i cili po prezantohej me edicionin e 14-të ende në një sallë jo adekuate.
“Organizimi i këtij festivali është sfidues çdo vit edhe pse kemi mbështetjen e Ministrisë së Kulturës, Komunës së Prishtinës dhe ambasadat. Sfidues është për shkak se duhet gjithmonë të improvizohet salla. Ne megjithatë arritëm të krijojmë një ambient shumë të bukur koncertal, ku ka fatmirësisht edhe akustikë e cila na lejon t’i shijojmë vërtetë këto koncerte” ka treguar drejtoresha.
Ajo më tej tha se koncerti me kuartetin e kitarës dhe koncerti me muzikë Jazz janë risitë që e zhvendosin për dy netë instrumentin e pianos nga “fokusi” i “ChopinPianoFest”.
Gjithmonë kemi edhe risi të festivalit në të cilin fokusi është te është pianoja. Edicioni i sivjetëm dallon mjaft nga viti i kaluar. Ku kemi pasur kuintete, sekstete, duo, trio, ku gjithmonë pianoja është pjesë e festivalit, sivjet kemi edhe dy koncerte ku pianoja nuk është pjesë e ansamblit. Kemi kuartetin e Kitarës me Petrit Çekun dhe një Jazz mbrëmje shumë të veçantë”, ka përfunduar drejtoresha Pula.
Koncerti i radhës i Chopin Piano Fest mbahet me solistin Kosti Deti-Piano, më sonte, në ora 20:00, në Amfiteatrin e Bibliotekës Universitare./ KultPlus.com
Organizuar nga Komuna e Kaçanikut, sot u mbajt diskutim publik lidhur me Draft Statutin e Muzeut të Kaçanikut, ku për hapat e deri tanishëm foli drejtoresha për Kulturë, Rini e Sport Hafize Sallahu, ndërsa pjesëmarrësit i përshëndeti Nënkryetari i Komunës Sabedin Vishi i cili falënderoi këshillin punues në hartimin e këtij draft statuti.
Pjesëmarrësit përgëzuan këtë iniciativë dhe me pyetje të ndryshme nga këshilli punues i këtij draft dokumenti kërkuan sqarime më të hollësishme rreth funksionalizimit të Muzeut.
Sqarime pjesëmarrësit morën nga kryesuesi i këshillit punues të Muzeut Hajredin Rramajli me anëtarët e tjerë të këtij këshilli. Ky dokument tani më është në fazën e dërgimit në kuvend për miratim.
Luan Hajra është këngëtar i cili indentifikohet me zhanrin e muzikës popullore qytetare, shkruan Kult Plus.
Hajra ka lindur më 31 korrik të vitit 1949, në qytetin e Mitrovicës. Fillet e karrierës së tij kanë qenë qysh në moshën 12-13 vjeçare, duke marr pjesë në dasma. Talentin e tij për të kënduar e kishin hetuar orkestra e Sali Currit, për ta bërë më vonë edhe pjesë të aktivieteve të tyre.
Ai nuk ka kryer asnjë shkollë për muzikë, e megjithatë ai arriti të krijonte këngë me të cilat depërtoi në zemrat e publikut. Përgjatë karrierës së tij ai interpretoi përkrah: Esat Bicurrit, Bashkim Paçukut, Liliana Çavollit, Nexhmije Pagarushës, Bik Ndojës, Shyqri Alushit etj.
‘Dashurova unë një vajzë’, ‘Mbrëmja e maturës’, ‘Na ka çu Dudia letër’, ‘Oda me tavan’, ‘Lulëzoi fusha, lulëzoi mali’, ‘O Zambak’, ‘Kur hana del’, ‘Te dugojë e re’, ‘Po ta marrë kangën me saze’, janë disa prej këngëve nga repertuari i tij.
Ai ka vdekur më 27 shkurt 2022.
KultPlus ju sjell këngën ‘Nëpër telat e telefonit’:
14 thëniet më inspiruese të të gjitha kohërave nga Albertin Einstein.
– “Të pakët janë ata që i shohin sytë e tyre dhe i ndjejnë zemrat e tyre”
– “Imagjinata është më e rëndësishme sesa njohuritë. Njohuritë janë të kufizuara. Imagjinata e rrethon botën”
– “Përpiqu të mos bëhesh njeri i suksesit, por të bëhesh njeri i vlerave”
– “Çdo njeri është gjeni. Por, nëse e gjykoni një peshk nga aftësia e tij për t’u ngjitur në pemë, ai do ta jetojë tërë jetën duke besuar se është budalla”
– “Shikoni thellë në natyrë, dhe pastaj do të kuptoni çdo gjë më mirë”
– “Të gjitha religjionet, artet dhe shkencat janë degë të së njëjtës pemë”
– “Në mesin e vështirësive gjendet mundësia”
– “Një njeri që nuk ka gabuar kurrë, asnjëherë nuk ka provuar diçka të re”
– “Gjëja më e rëndësishme është të mos ndaleni së pyeturi. Kureshtja e ka arsyen e vet se përse ekziston”
– “Jeta është sikur biçikletë. Për ta mbajtur balancimin, ju duhet të lëvizni tërë kohën”
– “Në momentin që ndaleni së mësuari, ju filloni të vdisni”
– “Njerëzit e dobët hakmerren. Njerëzit e fortë falin. Njerëzit inteligjentë injorojnë”
– “Anija është gjithmonë e sigurt në breg, por nuk është ndërtuar për atë qëllim”
– “I flas çdo njeriu në të njëjtën mënyrë, qoftë nëse e mbledh bërllokun, qoftë nëse është dekan i fakultetit”. /KultPlus.com
Është mbyllur të mërkurën edicioni i III-të i panairit të librit “Kamza Lexon”, i cili zgjati për tre ditë me radhë. Në këtë panair, u zhvilluan ceremoni për ndarjen e çmimeve, ku ishin të pranishëm shkrimtarë, gazetarë, lexues dhe zyrtarë.
Çmimin e mirënjohjes e mori shkrimtari Bajram Karabolli , Viktor Canosinaj mori çmimin për librin më të mirë për fëmijët, Jamarbër Hoxha “ Forca krijuese në zhanrin prozë dhe poezi, Fatmir Toçi mori çmimin për “Librin më të mirë studimor” ndërsa shkrimtari Ahmet Prençi për “Prozën më e mirë” me Brengën Prokurorit.
Ky i fundit në një pronocim për Euroneës Albania theksoi se ndjehet i emocionuar dhe se ndihet i motivuar për krijimin e një vepre tjetër.Teksa vlerësoi punën e bërë në Kamzë përsa i përket arsimit ,pati një mesazh dhe për të rinjtë.
“Ndjehem i emocionuar. Kjo më jep motiv për të krijuar një vepër tjetër. Shoh që ka një frymarrje tjetër në Kamzë. Shkollat kanë bibloteka të reja. Mesazhi i vetëm është që të rinjtë të lexojnë sa më shumë e të kenë kontakt me librin”-tha Ahmet Preçi.
Ndërsa Irena Toçi, botuesja e librave të Jamarbër Hoxhes, 13-vjeçarit me aftësi ndryshe, tregoi se pavarësisht moshës Jamarberi është nje autor që vlerësohet lexuesit.
“Është kënaqësi që ku r e kam zbuluar Jamarbërin. Janë poezi filozofike që shprehin përjetimet dhe emocionet. Ky vlerësim dhe mbështetja që i kemi dhënë e kanë nxitur për të ecur në këtë rrugë. Është shumë i vogël në moshë për të qenë një autor i vlerësuar”-tha Irena Toçi.
Sakaq, Liridon Mulaj, organizator i këtij eventi tha se shkrimtarët në këtë panair ishin të zgjedhur, jo vetëm në Shqipëri por dhe nga diaspora. Mulaj përfundoi duke thënë sse synymi i tyre është që ky panair të kthet në një traditë dhe të zhvillohet çdo vit./euronews/ KultPlus.com
Dita Ndërkombëtare e Muzeve e cila kremtohet çdo 18 maj, do të jetë një përvojë e mrekullueshme për të gjithë vizitorët në qytetin e Shkodrës. Një sërë institucionesh si bashkia e Shkodrës, DRTK Shkodër, Muzeu Marubi etj, janë bërë bashkë për t’i sjellë publikut një mori aktivitetesh dhe takimesh kulturore me në qendër edukimin, kërkimin shkencor dhe promovimin e vlerave muzeore të Shkodrës.
Festa nis ditën e premte, 17 maj, në kalanë e Rozafës, e quajtur me këtë rast si “kalaja e mrekullive” ku publikun e presin biseda, facepainting, kuice, arkeologji, trashëgimi, pikturë, muzikë dhe argëtim për fëmijët që nuk duhen humbur.
Kryetari i Bashkisë Shkodër, Benet Beci postoi në rrjetet sociale një kalendar të eventeve të fundjavës, që siç shkruan ai do të jetë plot art, traditë e histori.
Në programin e datës 17 është workshop-i “Komunizmi përmes dokumenteve arkivore”, instalacioni “Zërat e kujtesës”, një ekspozitë e dorëshkrimeve të vjetra, ekspozitë mbi xhubletën, në muzeun “Oso Kuka” si dhe “Muzat”, një performancë poetike.
Po të premten do të ketë edhe një ekspozitë të arkitektëve.
Ndërsa më datën 18 maj, aktiviteteve të mësipërme do t’u shtohet ekspozita e partiturave, shoqëruar me një koncert vokal me vepra të kompozitorëve të qytetit. Gjithashtu në Muzeun e Fotografisë “Marubi” do të ketë punëtori “Magjia e fotografisë” dhe “Manjikana” frymëzuar nga kultura japoneze si dhe do të ofrohen vizita me guidë në ekspozitën e dinastisë Marubi./ atsh/ KultPlus.com
Ukshin m’kanë quejt prej të vogli, prej të gjallmi, nana idiomën e pyllit mbi supe ma ngjiti. Ende nuk ka ndodhë, por kur në varr të visit t’m’kallni, malësorit rranjën e emrit do ia hiqni.
N’trevat tona kur foshnje kam mbërritë, si çdo foshnje e kësaj bote një destin për me falë, m’sundoi shpresa se n’origjinë tamli ish dritë, m’poshti e vërteta se frika pleqve të mi ende s’u ka dalë.
As n’andrrat e mia, mbushë me zanin e saj të plaktë, s’ia paska hekë nanës frikën emri që m’ka ngjitë. Edhe nëse i pjekur vij mes jush, tradhtinë për me matë, do bahem bishë po t’ndij se m’thërrisni Ukshin.
Nëpër troje ku punën kam hedhë, emra trimash mbush pagëzimi, por nuk u mbërrit jeta dhe emri nuk ngjiz dejet. Emrin e trimit e mban dhe amfibi.
Kemi pas kenë për emra ngatërrestarë të mëdhaj, dhe unë foshnjë e naiv u paskam zanë besë, kam besu shku e ardhë, kam besu bir e nanë. Kur m’thërrisnin Ukshin e merrja për betejë.
Me mu bashkë lindën prej gënjeshtre poetët, u nxinë që drita t’kthehej në të folmen tuej. Lindën po me mu prej mashtrimit dëshmorët që shqipja të mos flitej nga gjuhë e huej.
Se shumësia juej në trishtim të shkurtër ka pjellë përbri meje krimin e vogël, tradhëtinë e madhe. E dinit që mes emrash do të zhduknit të flaktët, të urtët, ata që shquenin tmerrin ndër kang e ndër valle.
Nëse vendimi s’e cakton një SOT për m’u ngritë balte, në bajgë ku jeni zhytë nuk mund të derdhet qielli. N’bajgë ku jeni zhytë, ku emri ju kallte, Ukshin do të jetë për ju një fjalë vreri./KultPlus.com
Kinema “Millennium” shfaqi mbrëmjen e djeshme premierë e filmit të restauruar “Gunat përmbi tela”.
Arkivi Qendror Shtetëror i Filmit në bashkëpunim me Fondazione Gramsci di Puglia kanë restauruar filmin “Gunat përmbi tela” të regjisorit Muharrim Fejzo, prodhim i vitit 1977.
Kryeministri Edi Rama ka ndarë në rrjetet sociale një video nga filmi “Gunat përmbi tela”, i cili i është nënshtruar restaurimit digjital.
“Me një tjetër film të kinematografisë shqiptare që i është nënshtruar restaurimit digjital, “Gunat përmbi tela” i regjisorit Muharrem Fejzo, ju uroj një ditë të mbarë”, shkruan Rama, ndërsa publikon dhe linkun e filmit në Youtube.
Restaurimi digjital i këtij filmi dhe aktiviteti i premierës u financuan nga Fondazione Gramsci di Puglia dhe Regione Puglia në kuadër të projektit “Pulja në njëqindvjetorin e ardhjes së fashizmit”.
Filmi “Gunat përmbi tela” u restaurua nga elementet origjinalë negativë 35 mm të AQSHF-së, në laboratorin Dabimus srl të Universitetit të Barit “Aldo Moro”, Itali. Filmi mban emrat e një sërë artistësh nga më të njohurit e kinematografisë shqiptare si: Ilia Terpini në kamera, muzika nga Kujtim Laro, skenari nga Duro Mustafaj, piktor Azis Karalliu, kostumografia nga Alush Shima etj.
Kryeministri i Kosovës, Albin Kurti, tha se më 16 maj 1999, profesori Ukshin Hoti, pas lirimit nga burgu i Dubravës, u rrëmbye dhe u zhduk.Ai tha se edhe pas një ҫerek shekulli më vonë, fati i tij nuk është zbardhur.
“Kosova e shqiptarët në përgjithësi nuk kanë një politikan filozof e teoreticien të politikës sikur ai. Drejtësia për të nuk ka filluar ende”, tha ai.
Ai ka thënë se çdo ditë kujtojmë krimet e pamohueshme që Serbia ka kryer në Kosovë.
“Në këtë ditë, në përvjetorin e vdekjes, përkujtojmë heroinën Marte Tunaj. Me guxim tregoi të vërtetën për dhunën seksuale, të përdorur nga Serbia si armë lufte në Kosovë. Për këto krime, drejtësia është vonuar”, tha ai.
“25 vite pas, Serbia jo vetëm që nuk pranon këto krime por ende i fsheh ato. Për paqe dhe siguri në rajonin tonë, ballafaqimi me të kaluarën dhe përballja me drejtësinë janë të domosdoshme”.
Tutje ai tha se Republika nuk ndalet në betejën për drejtësi për të gjitha krimet e kryera nga Serbia gjatë luftës në Kosovë.
Piktura e realizuar nga Leonardo da Vinci (14 maj 1495).
Leonardo da Vinci fillon Darkën e Fundit, pikturë murale në sallën e ngrënies së manastirit Santa Maria, Milano.
Një nga pikturat më të famshme në botë, dhe një nga më të studiuarat, shqyrtuarat, dhe satirizuarat ndonjëherë. Piktura paraqet skenën e Darkës së Fundit të Jezusit me dishepujt e tij, ashtu siç është thënë në Ungjillin e Gjonit.
Piktura fikson pikërisht momentin kur Jezusi bën të ditur se një prej tyre do ta tradhtonte. Kritikët thonë se e veçantja e Darkës së Fundit është vetë Jezusi. Sipas një gojëdhëne, kur Da Vinci arriti tek tiparet e Jezusit, ai ishte pushtuar nga zemërimi dhe e kishte të pamundur të imagjinonte a të përqëndrohej; iu desh të harronte shkakun e zemërimit (një lloj mënyre kerkim ndjese), që t’i kthehej qetësia, dhe arriti të krijojë figurën e Jezusit siç njihet sot.
Lind pyetja: Ç’është ndjesa, nëse jo çlirim nga mendimet shqetësuese (harresë) – prej nga rrjedh edhe shprehja ‘Harroje!’, që e lejon njeriun të ecë./Liberale.al/ KultPlus.com
Presidentja Vjosa Osmani e ka kujtuar veprimtarin Ukshin Hoti në 25-vjetorin e zhdukjes së tij.
Ajo ka thënë se prej 25-vjetësh, emri i intelektualit e atdhetarit Ukshin Hoti mbetet në listat e personave të zhdukur me dhunë nga regjimi gjenocidal i Serbisë.
“Më 16 maj 1999, ai u lirua nga burgu i Dubravës, porse nga ajo ditë, fati i tij, njësoj sikurse edhe mbi 1600 të zhdukurve me dhunë mbetet peng i politikave të vazhdueshme të Serbisë, e cila fle mbi varreza masive”.
“’Ku është Ukshin Hoti?!’, ende tingëllon si thirrje për zbardhjen e fatit të intelektualit e veprimtarit, i cili angazhimin për Republikë e pati kauzë jetësore. Kosova tashmë është Republikë ndaj e kemi obligim angazhimin për zbardhjen e fatit të Ukshin Hotit dhe për drejtësi. Jemi të përkushtuar që krahas me zbardhjen e fatit të tij, ta vendosim drejtësinë në mënyrë që historia të mos na përsëritet”, ka thënë Osmani.
Përfaqësues të Fondacionit Shqiptaro – Amerikan për Zhvillim (AADF) theksuan sot se projekti i tyre për menaxhimin e Butrintit synon vetëm ruajtjen e pasurive arkeologjike dhe shtimin e vizitorëve në atë zonë me rëndësi të madhe të trashëgimisë kulturore të Shqipërisë.
Në fund të prillit Gjykata Kushtetuese i hapi rrugën menaxhimit të Butrintit përmes një fondacioni, duke rrëzuar kërkesën e një grupi deputetësh opozitarë për anullimin e marrëveshjes midis ministrisë së Kulturës dhe AADF-së.
Përfaqësuesit e AADF-së pohuan para shtypit se ky fondacion do të dhurojë një fond mbi 6 milionë dollarë, por asnjëherë nuk do të jetë ai menaxhuesi i Butrintit, i cili është pronë e shtetit shqiptar.
Fondacioni Shqiptaro – Amerikan për Zhvillim, AADF, është angazhuar për projekte të ndryshme në përfitim të Parkut Kombëtar të Butrintit me një fond prej 6.18 milionë dollarë amarikanë, ndërsa drejtues të tij theksuan sot se ky Fondacion nuk është dhe nuk do të jetë menaxhues i Butrintit.
Kryetari i Bordit, Michael D. Granoff, tha sot në një konferencë për shtypin se në Planin e Menaxhimit të Integruar të Butrintit AADF është donator në këtë projekt, që synon ruajtjen dhe promovimin e Butrintit, si zona më e rëndësishme e trashëgimisë kulturore në Shqipëri.
Ai theksoi se AADF-ja ka nisur punën për ta ndihmuar Butrintin shumë vite më parë, dhe për të ruajtur ato vlera të trashëgimisë kulturore për një kohë të gjatë, të cilat janë pasuri publike, në pronësi të shtetit, i cili është përgjegjës për to.
“Puna ose misioni ynë në lidhje me Butrintin është se si mund ta bëjmë atë që të funksionojë në mënyrë më të efektshme dhe më të qëndrueshme. Ne dëshirojmë të ruajmë vlerat që gjenden atje dhe turizmi të rritet, dhe të kujdesemi që më shumë njerëz të shohin atë pjesë të mrekulleshme të Shqipërisë. Ne nuk punojmë për qeverinë, por me qeverinë, që programe të tilla të funksionojnë në mënyrën më të mirë. Fondacioni për Menaxhimin e Butrintit kryesohet nga ministria e kulturës. Lidhur me Gjykatën Kushtetuese, ne nuk ishim pjesë e atij vendimi; ishte një çështje midis një pjese të qeverisë dhe një pjese tjetër për tu siguruar që këto lloj strukturash të funksionojnë mirë”, tha zoti Granoff.
Ministria e Kulturës dhe Fondacioni Shqiptaro-Amerikan për Zhvillimin (AADF) arritën një marrëveshje dy vjet më parë, që menaxhimi i një pjesë të Parkut Kmbëtar të Butrintit të kryhet nga një fondacion i krijuar rishtas për një afat 10-vjeçar, me të drejtë ripërtëritje.
Kjo mënyrë e re e menaxhimit të Parkut të Butrintit u kritikua nga një mision i përbashkët i UNESCO-ICOMOS, ndërsa një grup deputetësh opozitarë i kërkuan Gjykatës Kushtetuese, që ta anullonte atë marrëveshje si antikushtetuese.
Por Gjykata Kushtetuese, pasi pranoi se u ndesh me “një marrëveshje atipike, e cila nuk kishte të ngjashme në vendet e Europës perëndimore, por vetëm në disa shtete të Evropës lindore”, në fund vendosi t’i hapte rrugë asaj dhe menaxhimit të Butrintit përmes një fondacioni.
Sipas shpjegimeve të Gjykatës, kjo marrëveshje ka krijuar mekanizma garantues për ruajtjen e rolit parësor të shtetit në administrimin e pasurisë së trashëgimisë kulturore kombëtare, e parë kjo në këndvështrimin e ruajtjes dhe konservimit.
Nga ana tjetër drejtuesit e fondacionit shqiptaro- amerikan thanë se në 15 vjetorin e krijimit, AADF numëron 80 projekte të financuara me mbi 120 milionë dollarë në sipërmarrje, arsim, kulturë dhe turizëm në tetë zona të Shqipërisë, duke mbështetur bizneset vendase.
Fondacioni AADF, organizatë jofitimprurëse filantropike, është një program amerikan, si pjesë e marrëdhënieve mes SHBA-ve dhe Shqipërisë, i cili ka nisur punën me 30 milionë dollarë nga viti 1995, për të mbështetur kompani të ndryshme dhe sektorin privat dhe nga viti në vit ka riinvestuar në vend çdo të ardhur që është shtuar nga kjo veprimtari.
“Fondacioni i ngritur nga parlamenti shqiptar për të menaxhuar Butrintin nuk është AADF, por është BMF, Fondacioni për Menaxhimin e Butrintit. Është ky fondacion që ka si detyrë nga qeveria shqiptare të bëjë çdo gjë që është vendosur dhe projektuar në marrëveshje. AADF është pjesa e dhurimit të fondeve, një partner strategjik që është angazhuar të dhurojë një fond të konsiderueshëm të hollash në mënyrë transparente, profesionale dhe të disiplinuar, por asnjë herë nuk ka qenë dhe nuk do të jetë AADF-ja që do të menaxhojë Butrintin. Këtë do ta bëjë BMF”, tha Martin Mata, bashkëdrejtues ekzekutiv i AADF-së.
Gjashtë muaj më parë misioni i UNESCO-s u dërgoi autoriteteve shqiptare një raport, ku thekson se “vetëm themelimi i Fondacionit nuk mund të përmbushë rekomandimet e misioneve të mëparshme, të Komitetit të Trashëgimisë Botërore dhe vetë Planit të menaxhimit për një menaxhim të integruar të Butrintit”.
Misioni kritikoi ashpër edhe ndryshimin që qeveria u bëri kufijve të Parkut të Butrintit, duke hequr dhe lënë jashtë 802 hektarë të tij nga Zona e Mbrojtur e Butrintit, një vendim për të cilin misioni nuk u njoftua dhe as UNESCO nuk e ka miratuar. Qeveria miratoi lejen e parë për ndërtimin e një resorti turistik në gjirin e Manastirit vetëm një muaj pas heqjes së 802 hektarëve nga Parku Kombëtar i Butrintit. /Voa/ KultPlus.com
Muzeu Kombëtar i Artit Mesjetar iu bashkua temës së Ditës Ndërkombëtare të Muzeve, me hapjen e ekspozitës kushtuar figurës së Johan Pagëzorit. Tema e edicionit të këtij viti është “Muzetë, Edukimi dhe Kërkimi shkencor”.
Rreth temës referuan: Mitropoliti i Korçës, Johan Pelushi, dr. Andre Llukani dhe dr. Ahilino Palushi. Të ftuar të rëndësishëm të qytetit, të botës akademike, si dhe admirues të botës bizantine, vlerësuan aktivitetin me pjesëmarrjen e tyre duke shprehur kënaqësinë dhe krenarinë mbi trashëgiminë tonë kulturore.
Ekspozita solli figurën e Johan Pagëzorit, si një nga figurat më komplekse, të jashtëzakonshme dhe më të pikturuara në traditën ikonografike bizantine.
Ekspozita përmban 13 ikona të cilat, janë paraqitje të ndryshme të tij, i përkasin autorëve dhe periudhave të ndryshme dhe pjesa më e madhe e ikonave ekspozohen për herë të parë.
Muzeu Kombëtar i Artit Mesjetar, vazhdon të jetë aktiv në zbulimin, restaurimin, studimin dhe përshfaqjen e vlerave të jashtëzakonshme që mbartim, duke mundësuar njohjen e thellë të historisë dhe të kaluarës mbi trashëgiminë tonë kulturore, besimin, zhvillimin në shekuj dhe ç’vendi i përkasim./atsh/ KultPlus.com
“Unë jam vetë grua” do të shfaqet më 24 maj në Teatrin Kombëtar, duke filluar nga ora 20:00 Shfaqja me një aktor (Adrian Morina) pati premierën vite më parë në Teatrin Dodona.
Shfaqja me regji të Kushtrim Koliqit, ku Adrian Morina si aktori i vetëm në skenë luan më shumë se 30 personazhe, na sjellë një histori të një jete tejet të vështirë të një personi transgjinor gjerman – Charlotte von Mahlsdorf, e cila i ka mbijetuar regjimit Nazist dhe atij Stasi.
Shfaqja fituese e çmimit “Pulitzer” dhe e çmimit “Toni” është shfaqje që bazohet në bisedat dhe intervistat e Doug Wright me transgjinoren gjermane, njëherit tregtaren e antikuareve Charlotte von Mahlsdorf, si dhe në autobiografinë e Charlotte të vitit 1992, të titulluar po ashtu “Unë jam vetë grua”./KultPlus.com
Në Ditën Botërore të Agroturizmit, kryeministri Edi Rama publikoi sot në rrjetet sociale një kolazh pamjesh të mrekullueshme, ku ndërthuret larmishmëria e bukurive natyrore të shndërruara në atraksione turistike, falë sipërmarrjeve agropërpunuese.
Rama shprehu mirënjohje të veçantë për sipërmarrjet agroturistike që kanë hapur dyert anembanë Shqipërisë, duke i dhënë jetë zhvillimit të ekonomisë familjare dhe industrisë turistike.
Sot në vendin tonë, janë mbi 260 qendra agroturistike, ndërsa fluksi i lartë i turistëve të huaj që po zgjedhin vitet e fundit Shqipërinë si destinacion turistik ka nxjerrë në pah nevojën për shtimin e kapaciteteve akomoduese.
“Në Ditën Botërore të Agroturizmit, një mirënjohje e veçantë për sipërmarrjet agroturistike që kanë hapur dyert anembanë Shqipërisë, nga njerëz të punës të mbështetur tek vendlindja apo kthyer nga emigracioni në vendlindje, të cilët kanë bërë një zgjedhje fituese për të ardhmen e tyre, duke rritur ekonominë familjare dhe kontribuar për Shqipërinë 2030 me zhvillimin e kësaj dege krejt të re të industrisë sonë turistike”, u shpreh Rama./atsh/KultPlus.com
Instituti i Librit dhe Komunikimit, shtëpia botuese “Toena” dhe Akademia e Shkencave përurojnë veprën “Don Kishoti shqiptar” të akademikut Ali Aliu, vepra më e përkthyer dhe më e ribotuar e tij, që mban nëntitullin “Një histori letërsie ndryshe”.
Veprimtaria u organizua në 90-vjetorin e lindjes së autorit dhe vijon dy veprimtari akademike të mëparshme në këtë kuadër.
Përurimi u hap nga znj. Irena Toçi, drejtore e Institutit të Librit dhe Komunikimit.
Kryetari i Akademisë së Shkencave prof. Skënder Gjinushi përshëndeti veprimtarinë dhe uroi akad. Ali Aliun për ditën e lindjes dhe për veprën e tij me shtrirje në mbi 60 vjet.
Për veprën e sapo ribotuar (me ripunim nga autori), si dhe për personalitetin e tij, folën Shaban Sinani, Zija Çela, Majlinda Rama dhe Arian Leka.
Qendra e Librit dhe Komunikimit i dorëzoi akad. Ali Aliut diplomën e vlerësimit./tema/KultPlus.com
