Reperi me famë botërore Drake është parë duke kënduar me flamurin shqiptar në duar gjatë një koncerti.
Gjatë performancës së tij, një vajzë nga publiku e cila mbante flamurin në dorë, e ka hedhur në drejtim të skenës ku po performonte Drake. Ai sapo e sheh flamurin, e merr në duar dhe e vazhdon performancën.
Ndryshe, në albumin e tij më të ri, në një prej këngëve, Drake përmend Prishtinën. Bëhet fjalë për këngën “Polar Opposites”, shkruan Express.
“Ose është mesazhi yt që po e lexoj gabim; Ose thjesht veprimet tuaja janë mashtruese; Nuk e di se si i bëjnë gjërat në Prishtinë; E di që tensioni po rritet; Ka shumë njerëz të vdekur për mua që ende marrin frymë”, thotë mes të tjerash në vargjet e këngës reperi kanadez. / KultPlus.com
Kryeministri i Kosovës, Albin Kurti, ka përkujtuar 32 civilët që u vranë më 9 prill të vitit 1999 në Rakoc të Kaçanikut, në mesin e të cilëve ishte edhe 105-vjeçari Nebih Livoreka.
“Në betejë me forcat armike të Serbisë që kishin sulmuar popullsinë shqiptare ranë heroikisht 28 dëshmorë të UÇK-së. Sot u mbushën 25 vjet”, ka shkruar ai.
Tutje, ai ka shkruar se atë ditë që Kaçaniku ishte rrethuar nga forca të mëdha të ushtrisë dhe policisë serbe që granatonin në të gjitha anët, në mbrojtje të civilëve dolën ushtarët e Ushtrisë Çlirimtare të Kosovës, duke u përballur me forcat e armatosura serbe.
“Në Betejën e Rakocit dhe Betejën e Lagjes së Re, u zhvilluan luftime të ashpra. Në mbrojtje të popullatës civile ranë 28 dëshmorë. Në mesin e tyre edhe katër gra dëshmore: Emsale Frangu, Jehona Raka, Lumnije Raka dhe Mukadeze Lika-Muhaxheri. Sikurse që doli në ballë të luftimeve në prill 1999, ashtu në maj 1998 Mukadezja ishte në ballë të protestave kundër dhunës serbe në Kaçanik”, ka shkruar Kurti.
Ai ka treguar se sot kanë shkuar në Kaçanik për të nderuar kujtimin e burrave dhe grave që lanë pas trashëgimi të pashembullt të guximit, qëndresës dhe dashurisë për atdheun, duke shtuar se nderojnë 28 dëshmorë dhe 32 viktima civile, martirë të vrarë në Rakoc dhe Lagje të Re.
Këshilli i botimeve i Akademisë së Shkencave të Shqipërisë (ASHSH) u mblodh sot për të vendosur për listën e veprave që do të botohen prej saj si ent botues gjatë vitit 2024.
Kryetari i këshillit të botimeve akad. Skënder Gjinushi informoi anëtarët e tij për procedurën e ndjekur deri më tani sipas rregullores për veprimtarinë botuese të ASHSH. Kërkesat për botim i janë paraqitur ASHSH prej autorëve të tyre deri më 31 dhjetor 2023, në gjendje të përfunduar. Numri i veprave të miratuara për botim është 23, duke përfshirë disa tituj të miratuar qysh vjet, por të caktuar në kalendarin e botimeve të vitit 2024.
Përparësi patën fjalorët dhe studimet gjuhësore,duke qenë se sivjet është Viti i Gjuhës Shqipe.
Kryetari Gjinushi njoftoi këshillin e botimeve se 32 tituj të tjerë janë miratuar nga këshillat shkencorë të instituteve të albanologjisë vitin e kaluar, janë kryer të gjitha procedurat e recensionimit dhe diskutimit shkencor, madje edhe prokurimi, por nuk u arrit të bëhej shtypshkrimi i tyre, prandaj janë një detyrim i bartur për shkak të riorganizimit dhe këshilli i botimeve në këtë rast njoftohet për ta gjykuar listën në tërësi lidhur me përputhjen me prioritetet e Akademisë, pa dubluar procedurat.
Lista e tretë e titujve të përfshirë në programin e veprimtarisë vjetore botuese, që iu njoftua këshillit të botimeve, ishte ajo e veprave me karakter promovues dhe jubilar, 12 tituj, kryesisht akte të konferencave, libra-kushtim, botime në përvjetorë etj.
Lista e periodikëve përmban 18 njësi për këtë vit. / atsh / KultPlus.com
Sot janë bërë 16 vite që nga miratimi i Kushtetutës së Republikës së Kosovës, që u ratifikua me 9 prill të 2008 dhe ka hyrë në fuqi më 15 qershor 2008.
Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.
Në këtë ditë të shënuar ka reaguar edhe presidentja Vjosa Osmani e cila është shprehur se Kushtetuta jonë është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike.
“Sot, në ditën e miratimit të Kushtetutës, e cila është normë supreme që përcakton identitetin dhe vlerat e shoqërisë sonë demokratike, rikonfirmojmë përkushtimin tonë institucional për zbatimin dhe afirmimin e këtyre vlerave.
Kushtetuta jonë është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike”, shkruan presidentja. / KultPlus.com
Sot janë bërë 16 vite që nga miratimi i Kushtetutës së Republikës së Kosovës, që u ratifikua me 9 prill të 2008 dhe ka hyrë në fuqi më 15 qershor 2008.
Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.
Pjesa më e madhe e kësaj kushtetute rrjedh nga plani i ish-presidentit Martti Ahtisaarit, duke i dhënë kështu të drejta specifike grupeve minoritare dhe një ambient më të sigurt për të gjithë qytetarët e Kosovës.
Kushtetuta e definon Kosovën si një shtet me pikëpamje neutrale ndaj fesë – neni 8. Ajo ka 14 kapituj dhe 162 nene.
9 Prilli është zyrtarisht festë shtetërore në Kosovë që do të thotë se institucionet sot e kanë ditë pushimi./KultPlus.com
Ministria e Ekonomisë, Kulturës dhe Inovacionit, së bashku me Institutin Kombëtar të Trashëgimisë Kulturore, Universitetin e Bolonjës, Rajonin e Emilia-Romagna, si dhe Zyrën e Administrimit dhe Koordinimit të Parkut Arkeologjik Apoloni-Bylis, janë duke bashkëpunuar me qëllim mbrojtjen, ruajtjen dhe vlerësimin e vlerave historike dhe arkeologjike të parkut të Bylisit dhe kujtesës kulturore të këtij qyteti antik, si dhe atij të Klosit.
Në kuadër të përgatitjes dhe hartimit të Planit të Menaxhimit të Parkut Arkeologjik të Bylisit dhe qytetit antik të Klosit, financuar nga projekti IPA, është organizuar një dëgjesë publike në Bylis.
Falë kontributit të vyer të shumë autorëve, ekspertëve dhe specialistëve të njohur në nivel kombëtar dhe ndërkombëtar, është propozuar një draftplan që synon të rrisë dhe të ruajë përdorshmërinë dhe atraktivitetin e qytetit antik të Bylisit dhe Klosit, si një hap i mëtejshëm i promovimit dhe ruajtjes së pasurive të trashëgimisë kulturore.
Ky plan synon përmirësimin e aksesueshmërisë, me qëllim promovimin e rëndësisë kulturore të sitit, përmes një rrëfimi historik tërheqës dhe emocional, nxitjes së turizmit kulturor dhe inkurajimit të zhvillimit të qëndrueshëm të zonës./atsh/KultPlus.com
Më 9 prill të vitit 1961 ka vdekur mbreti i parë i Shqipërisë, Ahmet Zogu, i cili ka lindur më 8 tetor të 1985.
Ai ka lindur në Burrgajet nga prindërit Xhemal Pasha Zogu dhe Sadije Toptani.
Pas 13 viteve, ai u bë shef i krahinës së Matit dhe më pas është dërguar në liceun Francëz dhe në Galatasarai të Turqisë për t’i kryer studimet.
Mbreti Zog që në moshë të re ka marrë pjesë në ceremoninë e shpalljes së Pavarësisë së Shqipërisë më 28 nëntor të vitit 1912.
Tutje, vite më vonë, Zogu i emëruar nga qeveria Delvina arrin të bëhet ministër i brendshëm si 25-vjecar.
Më 31 janar të vitit 1925 Zogu shpallet President i Republikës Shqiptare, kurse më 1 shtator të vitit 1928 ai e shpall Shqipërinë monarki, dhe bëhet Mbret i Shqiptarëve.
Pas shpalljes së mbretërisë, më 5 shtator u krijua qeveria e parë e Mbretërisë Shqiptare. Gjatë viteve të monarkisë administrata shtetërore u forcua më tepër megjithëse jo me rrugë demokratike, por me mjete autoritare. Pluralizmi politik u asgjësua. Pati përndjekje politike, burgosje dhe internime. Vendi u shoqërua me trazira të brendshme. Në vitin 1932 ndodhi lëvizja e Vlorës, më 1935 Kryengritja e Fierit, më 1937 rebelimi i Delvinës.
Më 12 shkurt 1946, u nis në Egjipt mbasi merr një ftesë nga ambasadori egjiptian në Mbreti Faruk i Egjiptit. Në qëndrimin e tij nga shkurti i 1946 e deri në verën e 1955, organizoi Lëvizjen e Legalitetit dhe u përpoq të fitonte mbështetjen e shqiptarëve antikomunistë në mërgim.
Në këtë hulli më 25 korrik 1951 udhëtoi për në New York me Princ Tatin me ftesë të shërbimeve sekrete amerikane, me çrast edhe bleu një pronë në Long Island, por iu pamundësua nga autoritetet e emigracionit në Amerikë për shkak të shqiptarëve që donte të merrte me vete. Asokohe, i sëmurë nga kanceri në mushkëri, donte të lëvizte nga Egjipti që kishte ardhur duke u bërë i paqëndrueshëm politikisht. Korrikun e 1955 oborri mbretëror i organizuar nga mbretëresha u zhvendos për në Francë, ku u vendosën në Ville St Blaise në Kanë, buzë Rivierës.
Mbreti ndërroi jetë më 9 prill 1961 në spitalin Foche në Suresnes, pranë Parisit. U shti në dhé në varrezat në Thiais. I biri, Princ Leka, u shpall mbret i shqiptarëve në një ceremoni në mërgim në hotelin Bristol në Paris. /KultPlus.com
Koleksioni më i madh në botë për vepra arti origjinale të Banksy do shfaqet në Soho të Londrës.
Arti i Banksy, që përfshin më shumë se 150 vepra nga artisti anonim me bazë në Bristol do të hapet në 100 Charing Cross Road në 11 Prill.
Veprat e artit përfshijnë Dismaland dhe vepra të tjera më të vonë bëjnë homazh ndaj luftës në Ukrainë.
Ekspozita, që nuk është e autorizuar nga artisti, u vendos më së fundim në Regent Street.
Është sjellë përgjatë botës dhe ka qenë në qytete që përfshijnë Auckland, Boston, Chicago, Gothenburg, Miami, San Francisco, Sydney, Tel Aviv dhe Washington DC. / KultPlus.com
Ditën e sotme është përkujtuar firmëtari i pavarësisë, filatelisti, poligloti, arkivisti, etnografi dhe politikani shqiptar Lef Nosi që lindi më 9 prill 1877 dhe ka vdekur më 15 shkur 1946.
Lef Nosi ka lindur në qytetin e Elbasanit, në një familje ortodokse. Studimet e larta i ka kryer në Athinë, në drejtimin “Farmaci”.
Pa përfunduar studimet, ai u kthye në Shqipëri, dhe u angazhua thellësisht në drejtim të çështjeve rreth historisë dhe kulturës kombëtare.
Derisa ishte ende i ri, Nosi kishte në zotim bibliotekën e dytë më të madhe në Shqipëri. Ai themeloi gazetën “Tomorri” në Elbasan, dhe artikujt e botuar në të kishin frymë kombëtare që nxitën reagimin e autoriteteve xhonturke, që e arrestuan dhe e dënuan me vdekje.
Mirëpo, për shkak të protestave të patriotëve shqiptarë, dënimi me vdekje iu kthye në internim. Më 28 nëntor 1912, ishte një prej delegatëve të Elbasanit në Kuvendin e Vlorës dhe një nga nënshkruesit e Deklaratës së Pavarësisë. Shumë i rëndësishëm konsiderohet fakti se Lef Nosi ishte botuesi i parë i Deklaratës së Pavarësisë së Shqipërisë.
Gjatë qeverisjes së Fan Nolit në vitin 1924, ai u caktua kryetar bashkie i Elbasanit, mirëpo me largimin e Nolit, ai u tërhoq nga politika dhe iu përkushtua botimit të dokumenteve me vlerë historike, studimeve gjuhësore, mbledhjes së objekteve arkeologjike, folklorike, numizmatike dhe filatelike.
Me pushtimin italian, u internua në Itali dhe u kthye në Shqipëri në vitin 1942, ku filloi të angazhohet në rradhët e Ballit Kombëtar. Me pushtimin nazist të Shqipërisë, u zgjodh anëtar i Regjencës. Gjatë kësaj kohe, ai ndihmoi në shpëtimin e hebrenjve të cilët përndiqeshin nga autoritetet naziste.
Me ardhjen e komunistëve në pushtet, Lef Nosi u arrestua në veri të Shqipërisë nën akuzën për bashkëpunim me pushtuesit. Gjyqi u zhvillua në sallën e kinema “Kosova”, i cilësuar si “gjyq ushtarak i Tiranës”, ndonëse i akuzuari nuk kishte qenë ndonjëherë ushtarak. Gjatë gjyqit do të deklaronte që: “Regjenca nuk ka patur lidhje me gjermanët”. U dënua me pushkatim më 15 shkurt të vitit 1946. Përgjatë viteve të demokracisë u nderua me titujt “Qytetar Nderi i Elbasanit” në vitin 2004 dhe me urdhrin “Gjergj Kastrioti” në vitin 2007./KultPlus.com
Udhëtarët po i shkëmbejnë gjithnjë e më shumë hotelet me akomodimet në ferma, pasi kërkojnë hapësira më intime dhe të qeta të zhytura në natyrë, ku shërbehen prodhime vendase dhe ku mundësohen një sërë aktivitetesh në funksion të mirëqenies, shkruan Mhairi Mann në revistën britanike të udhëtimeve “RoadBook”.
Imagjinoni skenën: një mikpritës i vëmendshëm ju shërben duke hedhur me njërën dorë vaj ulliri në përbërësit e rritur në kopshtin organik aty pranë. Ndoshta mishi po kullon në një skarë aty pranë, ndërsa ju pini një gllënjkë verë vendase i bërë nga vreshti ngjitur. Një tingull i dobët delesh që kullosin dëgjohet diku, ndërsa dielli lëviz pas një sfondi baritor të kodrave të pafundme gjithëpërfshirëse, livadheve dhe majave. Ju akomodoheni në një nga shumë dhomat, për t’u zgjuar nga natyra të nesërmen në mëngjes.
Nuk është çudi që agroturizmi po lulëzon si një alternativë e jetës së hareshme në fshat dhe ndërgjegjësimit për të qënë miqësor me mjedisin kundrejt banesave të qytetit.
Harrojeni “jetën e thjeshtë”, akomodimet në ferma në vitin 2024 janë të rafinuara, ku ndërthuren ambientet e brendshme luksoze me ushqimet organike.
Në fund të fundit, ku tjetër mund të shijoni produkte të freskëta autentike, përveçse në ferma?
Zhvillimi i agroturizmit
Tregu global i agroturizmit pritet të rritet nga 56,92 miliardë dollarë në 2023 në 60,89 miliardë dollarë në 2024, dhe 79,9 miliardë dollarë deri në vitin 2028, sipas Raportit të Tregut Global të Agroturizmit 2024.
Agroturizmi ndihmon në uljen e varfërisë rurale duke i lejuar fermerët dhe punëtorët e bujqësisë të diversifikojnë biznesin e tyre duke u ofruar vizitorëve mikpritje gjatë natës dhe një sërë aktivitetesh që përfshijnë vjeljen e ullirit, prodhimin e djathit dhe bletarinë.
Claus Sendlinger, themeluesi i rrjetit “Design Hotels”, citohet të ketë thënë shpesh: “Shtëpia në fermë është fusha e golfit të shekullit të XXI”.
Fermat më të mira gjenden në Evropë
Akomodimet në ferma në Evropë u bënë të njohura në vitet 1970, veçanërisht në Spanjë dhe Itali. Një tendencë në rritje e akomodimeve në ferma po shfaqet në Greqi dhe Shqipëri, ndërsa Sllovenia dhe Portugalia gjithashtu ofrojnë një rrjet të lulëzuar ofertash të përballueshme.
Mrizi i Zanave Agroturizëm, Shqipëri
Më i miri për: Ambjente gjithëpërfshirëse, kuzhinë të shijshme shqiptare
Adresa: Rruga “Lezhë – Vau i Dejës”, Fishtë, Lezhë 4505, Shqipëri
Çmimi: Nga 60 euro nata
Kjo fermë familjare e vendosur në një fshat të largët në veri të Shqipërisë përshkohet nga ngrohtësia dhe mikpritja.
Shtëpia e fermës origjinale është rinovuar me dhoma me mure xhami që shfaqin pamje gjithëpërfshirëse baritore, ndërsa patat mblidhen në ullishtat e mbuluara nga dielli dhe punëtorët me veshje tradicionale shqiptare mbledhin prodhime të freskëta në fusha.
Restoranti i famshëm, i cili është i popullarizuar nga vendasit, nuk ka menu dhe vaktet bazohen në atë që ofrohet atë ditë.
Porosisni një vakt të plotë me ushqime organike shqiptare për më pak se 45 euro, si peshq të egër, pulë të pjekur në hell, domate turshi dhe djathëra të bëra vetë./atsh / KultPlus.com
Së shpejti Galeria e Artit Tiranë (GAT) do të çelë ekspozitën vetjake të piktorit Buron Kaceli, titulluar “Dhoma e pasme”. Në faqen e saj online, GAT shkruan se ekspozita vjen në vazhdë të konceptit kuratorial “Si ishim, si jemi, si ndihemi-Vetëm, Bashkë”.
Veprat që piktori ka përzgjedhur për këtë ekspozitë vijnë si një hulumtim i fenomeneve të vetë qytetit, njerëzve, lagjeve, komunave, bashkëjetesës në realitetin e ri në përgjithësi, që nga karakteristikat urbane e deri tek transformimi psiko-social i tij, bashkërenduar kjo me rivizitimin e trashëgimisë kulturore dhe interpretimeve bashkëkohore.
Galeria e Arteve Tirane synon një program të qëndrueshëm duke krijuar ekspozitat dhe eventet e saj në kohezion me realitetin bashkëkohor të Tiranës.
“Dhoma e pasme” e Buron Kacelit vjen pas disa ekspozitave interesante që patën jehonë në jetën kulturore në Tiranë si, ekspozita e Kukullave Japoneze,“Ningyo & Na ishte Njëherë’, “Introspeksion” i artistit Toni Milaqi dhe së fundmi ekspozita fotografike “Lana-Tirana,Para-Pas Albania” e fotografit Roland Tasho./atsh/KultPlus.com
Sot ka vdekur veterani i Ansamblit Folklorik “Rugova”, Kapllan Nikçi.
Duke qenë anëtar i Ansamblit Folklorik Autokton ”Rugova”, ai për vite me radhë ka kultivuar dhe bartur kulturën dhe traditën rugovase.
Me pamje dhe zë jashtëzakonisht të veçantë, Nikçi në mënyrë autentike ka shpërfaqur rolin e malësorit dhe karakteristikat e banorëve të Grykës së Rugovës.
KultPlus ju sjell një nga interpretimet brilante të Nikçit:
Eklipsi total i diellit u bë i dukshëm në rajonet e Amerikës Qendrore dhe Veriore sot, (e hënë, 8 prill). Pak pas orës 19:00, miliona njerëz panë Hënën të kalonte përballë Diellit.
Eklipsi total filloi nga Oqeani Paqësor Jugor, teksa rajonet e para të Meksikës e vëzhguan atë nga bregu i Paqësorit.
Rruga e eklipsit kaloi Meksikën dhe vazhdoi në SHBA duke kaluar përmes Teksasit, duke vazhduar në verilindje dhe më pas duke kaluar nëpër Kanada.
Sipas NASA-s, mbi 300 milionë njerëz do të kenë mundësinë të përjetojnë qoftë edhe një eklips të pjesshëm.
Sa i rrallë është një eklips total diellor?
Eklipset diellore në vetvete nuk janë aq të rralla në fakt, ka rreth dy deri në katër që ndodhin çdo vit. Por mundësia për të parë një eklips të plotë diellor është shumë më e rrallë. Toka është mjaft e madhe dhe pjesa më e madhe e saj është e mbuluar nga oqeane.
Në fakt, ky është eklipsi i parë diellor në këtë shekull që është i dukshëm në të tre vendet e Amerikës së Veriut, SHBA, Kanada dhe Meksikë./topchanel/KultPlus.com
Presidenti francez, Emanuel Macron e ka paralajmëruar presidentin Aleksandar Vuçiq, që përgjegjësit e sulmit terrorist në Banjskë, të dalin para drejtësisë.
Siç tha Macron, në një konferencë pas takimit me Vuçiqin, duhet bërë gjithçka, që ajo çfarë ndodhi vjeshtën e kaluar të mos përsëritet më, transmeton klankosova.tv.
”Është e nevojshme që nga njëra anë përgjegjësit për sulmin në Banjskë vjeshtën e kaluar të dalin para gjykatave për të dhënë përgjigje për veprimet e tyre. Duhet bërë gjithçka që të mos ndodhë një dramë e tillë përsëri”, tha Macron.
Ministri i Kulturës, Rinisë dhe Sportit, Hajrulla Çeku, ka bërë të ditur se njëra nga tri kullat e familjes Hajdini në qytetin e Gjilanit është në fazën përfundimtare të restaurimit, shkruan KultPlus.
Ministri Çeku ka bërë të ditur se kulla në fjalë i takon vitit 1947, duke potencuar se një ndërhyrje e tillë konsiderohet një investim për promovimin turistik të zonës së Gjilanit.
“Në këtë peizazh të mrekullueshëm natyror, në lagjen e quajtur Terziaj në Gjilan, gjenden shtëpitë tradicionale të familjes Hajdini. Punimet janë drejt përfundimit në njërën nga tri kullat që do të restaurohen. Në kullën e Xhelë Hajdinit, e ndërtuar në vitin 1947.
Përveç ruajtjes së dëshmive të së kaluarës, këto ndërhyrjejanë një investim për promovimin turistik të zonës.Trashëgimia kulturore vazhdon të jetë prioritet qeveritar”, thuhet në shkrimin e Ministrit Çeku./ KultPlus.com
Federata e Basketbollit të Kosovës ka njoftuar se veteranët e Kosovës kanë fituar turneun në Zarë të Kroacisë.
Sipas një njoftimi për media ky turne është mbajtur nga 5 deri më 7 prill, derisa kanë marrë pjesë ish-basketbollistë të njohur nga Kroacia, Sllovenia, Mali i Zi, Serbia, Bosnja e Hercegovina dhe Maqedonia Veriore.
Veteranët e Kosovës që ishin ish-basketbollistë të shquar, në ndeshjen e parë në grupe, shënuan fitore ndaj O. Ugljan me rezultat 58:44, derisa në ndeshjen e dytë fituan ndaj Zmaj me rezultat 44:37.
Në finale shënuan fitore ndaj Vogoshtica Zadar me rezultat të ngushtë 58:57./KultPlus.com
Festivali ‘SITFY Polonia’, i kryesuar nga artisti dhe regjisori Mazen El-Gharabawy, do të nderojë dramaturgun francez Jean-Pierre Martinez dhe aktorin dhe regjisorin Mirsad Ferati (Kosovë), në edicionin e tij të parë, i planifikuar të zhvillohet midis prillit (20-23). 2024. Të dy të nderuarit janë figura ikonike teatrale dhe karriera e tyre është plot me vepra të larmishme.
Dramaturgu dhe dramaturgu Jean-Pierre Martinez është shumë-talent. Ai është një akademik i diplomuar në ekonomi dhe marketing. Martinez studioi letërsi spanjolle dhe angleze në Universitetin e Sorbonës, së bashku me gjuhësinë, semiologjinë dhe skenarin. Ai gjithashtu luan bateri në shumë grupe rock. Për më tepër, ai punoi si specialist reklamash në kompani të mëdha konsulence dhe shkroi skenare televizive. Martinez dha mësim frëngjisht në një universitet në Teksas dhe dha mësime shkrimi në Paris. Aktualisht, ai është një dramaturg, dramat e të cilit prodhohen në të gjitha kontinentet e botës. Martinez shkroi mbi 100 drama dhe dramat e tij u përkthyen në shumë gjuhë, përfshirë anglishten. Ai është një nga dramaturgët më të suksesshëm evropianë. Dramat e tij interpretohen në të gjithë globin dhe mësohen në shkollat përgatitore, të mesme dhe të mesme, si dhe në universitete në Francë dhe jashtë saj.
Mirsad Ferati është aktor dhe regjisor nga Mitrovica e Kosovës. Është themelues dhe drejtor artistik i “Mittrix Fest” prej 14 vitesh. Ferati ka magjistruar për aktrim në Universitetin e Prishtinës, Kosovë. Ai luajti role të shumta në shfaqje teatrale, filma, seriale, programe radiotelevizive dhe stand-up komedi. Nga viti 2008 deri në vitin 2011 ka punuar si drejtor i Qendrës kulturore “Rexhep Mitrovica”, pastaj drejtor i teatrit profesional në Mitrovicë. Në vitin 2011, Ferati u bë aktor, shkrimtar dhe producent në Mitrix Culture. Ai është anëtar i AITA/IATA. Për më tepër, ai është themelues dhe producent i Festivalit “Të rinjtë në skenë”, dhe anëtar i rrjetit global të universiteteve teatrore, RITU.
Ferati mori çmime të shumta në festivale teatrore në mbarë botën, duke përfshirë: Festivalin Ndërkombëtar të Teatrit “Apollo” (2012), dhe “Ditët e Komedisë Shqiptare”, Preshevë (2017). Ferati luajti mbi 50 role në skenë në “Sekretet e dashurisë”, “Gjashtë personazhe në kërkim të një autori”, “Mbretëresha pa kurora”.
Shfaqjet pjesëmarrëse, që do të garojnë për çmimet e edicionit të parë, janë si më poshtë: shfaqja e nderit, “Një vrasje e vogël e pafajshme” (Kosovë), “Twór” (Poloni), “Mos na hakmerre” (Rumani), ” Burrnesha – Virgjëresha e betuar” (Itali), “Maxima Star” (Spanjë), “Diçka po gërryen në kokën time” (Oman), “një grua në telashe” (KSA) dhe “Siemprevivas” (Spanjë)./SiftyPoland/KultPlus.com
Rok grupi kosovar MAK u formua në vitin 1973 dhe si grup ka funksionuar deri në vitin 1978.
Gjashtë anëtarët e këtij grupi ishin Haki Misini, Mehmet Tupella, Rexhep Ismajli-Bulli, Halil Bajraktari, Sedat Isufi dhe Xhevdet Gashi. Grupi “MAK”, konsiderohet pionier i rok muzikës kosovare dhe ka merita të mëdha për popullarizimin e rok muzikës në vend.
Haki Misini, është i vrarë nga forcat serbe gjatë luftës në Kosovë dhe Mehmet Tupella konsiderohet ende i zhdukur.
KultPlus, sot po e sjell këngën “Moj e mira te pojata”, një ndër këngët më të famshme të këtij grupi që kanë lënë gjurmë të thella në muzikën shqiptare:
Moj e mira te pojata Moj e mira o, te pojata, hije te paskan flokt e gjata Hije t’paskan o, flokt e gjata, shkurtoj pak e tu preft nafaka
Syri yt vasho si filxhani, vetllat t’holla eh sikur gajtani Shtati yt vasho si selvie, goja jote o si kutie (Uh dala t’plastë)
Shumë o djal jam bo merakë zëmra don me m’plasë në bark Smut jam kanë o qe sa javë nuk je ardhë me m’pa Te kishe ardhë o dej te arra ish qu dada t’kish dal para Po s’je ardhë o me m’pa mu prandaj mo s’të du
A s’ma falë vash syrin e zi e, ta run baca si synin e tij e A s’ma falë vash gojën ni herë e, ta shijoj vetëm ty arblere
Uh djal i dadës Djalë kam ra në krahror tan, shejë në faqe mos me m’lanë, Shejë në faqe mos me m’lanë, nana më qorton Dalim në bashqe me shetit, trëndofilet me i ujit Du me m’than vetëm një fjalë, se të dua djalë… / KultPlus.com
