Riccardo Cocciante vjen në Festivalin e Radio Televizionit Shqiptar

Këngëtari i njohur italian Riccardo Cocciante do të jetë i pranishëm në festivalin e 56-të të Këngës që do të mbahet në Radio Televizionin Shqiptar.

Ndërsa na ndajnë vetëm 10 ditë nga çelja e këtij festivali, organizatorët konfirmojnë se kantautori i njohur italian do të vijë në natën e parë të Festivalit si i ftuari i nderit.

Kantautori i njohur italian Riccardo Cocciante ka qenë në Tiranë për një vizitë zyrtare në vitin 2013. Ai erdhi së bashku me këngëtaren shqiptare Elhaida Dani, pas triumfit të saj në “The Voice of Italy”. Cocciante i ka bërë një promovim të jashtëzakonshëm në atë kohë këngëtares shqiptare që triumfoi në spektaklin italian si zëri më i mirë.

Ndërkohë grupi i organizatorëve dhe krijuesve festivalit të janë në momentet e fundit të përgatitjes. Përveç provave në skenë po mendohet edhe për detajet e spektaklit të çdo nate të festivalit, i cili do të mbahet nga data 21 deri me 23 dhjetor në Pallatin e Kongreseve. Festivali do të moderohet nga Adi Krasta dhe organizimi vjen me regjinë e Pali Kukes. / KultPlus.com

Dëgjoni 22 këngët konkurruese në Festivalin e Radio Televizionit Shqiptar

Janë zbuluar sonte të gjitha këngët, titujt, kompozitorët e këngëtarët që do të jenë pjesëmarrës në Festivalin e Fundvitit në Radio Televizionin Shqiptar.

22 këngë do të jenë pjesë e këtij festivali. Më poshtë po e sjellim lisën por edhe këngët, të cilat këtë vit prezantohen paraprakisht, para se të këndohen me datë 23 dhjetor në Pallatin e Kongreseve, shkruan KultPlus.

Dihet se kënga fituese do të prezantojë Shqipërinë në Eurovizionin e vitit 2018-të në Portugali.

Mes emrave që shohim në këtë edicion janë edhe Xhesika Polo, Mariza Ikonomi, Redon Makashi, Voltan Prodani dhe emra tjerë.

Bojken Lako kthehet në këtë festival për herën e katërt, ndërsa Elton Deda vjen në festival pas pjesëmarrjes në vitin 2011-të, kur u rendit në vendin e dytë. Artemisa Mithi po e bën debutimin e saj në festival, ndërsa Eugent Bushpepa kthehet poashtu në festival pas disa vitesh mungesë. / KultPlus.com

AKULLTHYESIT – “Divorci” (Divorce)
Artemisa Mithi – “E dua botën” (I love the world)
Bojken Lako – “Sytë e shpirtit” (The eyes of the soul)
David & Genc Tukiqi – “Të pandarë” (Inseperable)
Denisa Gjezo – “Zemër ku je” (Dear heart, where you are)
Elton Deda – “Fjalët” – (Words)
Ergi Bregu-Latifllari – “Bum Bum”
Eugent Bushpepa “Mall” (Yearning)
Evans Rama – “Gjurmët” (Traces)
Inest Neziri – “Piedestal” – (Pedestal)
LORELA – “Pritem edhe pak” (Wait a little longer)
LYNX – “Vonë” (Late)
Manjola Nallbani – “I njejti qiell” (The same sky)
Mariza Ikonomi – “Unë” (Me)
NA & Festina Mezini – “Tjetër jetë” (Another life)
Orgesa Zaimi – “Ngrije zërin” (Speak up)
Redon Makashi – “Ekzistoj” (I exist)
Rezarta Samja & Luis Ejlli – “Ra një yll” (A star fell)
Stefi & Endri Prifti – “Mesazh” (Message)
Tahir Gjoci – “Orë e ndaluar” (Stopped clock)
Voltan Prodani – “Pse të desha” (Why would I love you?)
Xhesika Polo – “Përjetë” (Forever)

Zbulohet se kush do ta moderojë Festivalin e Radio Televizionit Shqiptar

Është zbuluar moderatori i edicionit të këtij viti të Festivalit të Fundvitit në Radio Televizionin Shqiptar.

Për të gjashtën herë me radhë, një prej emrave më të njohur të televizionit shqiptar – Adi Krasta, do të jetë një prej moderatorëve të festivalit prestigjioz të muzikës.

Eurovision Albania zbulon se datat e festivalit do të jenë 21,22 dhe 23 dhjetori, e fundit si gjithmonë finalja kur edhe kuptohet fituesi i festivalit.

Eurovision Albania mëson se regjia i është besuar regjisorit Pali Kuke ndërsa skenografia e Albi Çifligut pritet të jetë tepër novatore. Ndërsa artistët që duan të jenë konkurrentë, duhet të dorëzojnë materialet e tyre muzikore pranë Radio Tiranës deri në datën 10 nëntor.

Adi Krasta e ka moderuar festivalin edhe në vitin 1997,1999, 2002, 2003 dhe për herë të fundit në vitin 2006.
Fituesi i festivalit do ta përfaqësojë Shqipërinë në Eurovizionin e vitit tjetër në Portugali. / KultPlus.com

Radio Televizioni Shqiptar e hapë konkursin për Festivalin e Këngës (VIDEO)

Shqipëria ka hapur konkursin për këngën shqiptare e cila do të përfaqësohet në Eurovizionin e vitit 2018-të.

Radio-Televizioni Shqiptar, fton të gjithë krijuesit dhe interpretuesit e këngës së muzikës së lehtë shqiptare, në konkurrimin për pjesëmarrje në Festivalin e “56-të” të Këngës në RTSH, që do të zhvillohet në muajin dhjetor të këtij viti. Konkurrentët duhet të dorëzojnë:
1. Këngën e kënduar, dhe bazën orkestrale të saj, të regjistruar në CD-ë, të përfunduar në të gjithë elementët përbërës të saj
2. Tekstin e këngës
3. Fotografi te këngëtarit ose grupit nëse merr pjesë për herë të parë

Pranimi i këngëve do të bëhet nga data 2 deri më 10 nëntor 2017 Nga ora 09:00 deri në orën 14:00 në Radio Tirana. Përzgjedhja e këngëve pjesëmarrëse, do të kryhet nga komisioni i seleksionimit të këngëve, në bazë të dëgjimit të tyre Në momentin e dorëzimit të këngës, konkurrentët duhet të plotësojnë formularin e dorëzimit të këngës, në të cilin deklarohen nominalisht të gjithë autorët këngës, përfshirë edhe këngëtarin, të cilët nuk mund të ndryshohen nëse kënga shpallet fituese për të marrë pjesë. Kënga s’duhet të jetë e publikuar më parë. Kënga duhet t ë jetë e kënduar në gjuhën shqipe.

Kënga nuk duhet të jetë më e gjatë se 4 minuta. Kënga duhet të jetë e kënduar nga këngëtari që pretendon ta interpretojë atë në Festival. Pjesëmarrësit duhet të jenë të moshës mbi 16 vjeç. Një këngëtar apo kompozitor, mund të marrë pjesë në konkurrim vetëm me një këngë, përfshirë këtu edhe bashkëautorsinë. Një orkestrues apo tekstshkrues mund të marrë pjesë në konkurrim, me jo më shumë se dy orkestrime apo tekste, përfshirë këtu edhe bashkëautorsinë.

Të gjithë autorët e këngës, përfshirë edhe këngëtarin, duhet të jenë shqiptarë. Mosplotësimi i këtyre kushteve, sjell automatikisht, përjashtimin e këngës nga konkurrimi. RTSH, Ju uron suksese në krijimtari dhe ju falënderon për bashkëpunimin. / KultPlus.com