Kumbaro: Sot kur vdiq Nexhmija, në të njëjtën datë Enver Hoxha pushkatoi shkencëtaren Sebiha Kasimati

Mirela Kumbaro ka reaguar përmes rrjetit të saj social Facebook, me rastin e vdekjes së Nexhmije Hoxhës, bashkëshortes së Enver Hoxhës.

Më poshtë postimi i plotë i saj:

Kronikat e lajmeve lajmëruan me bujë vdekjen e një gruaje 99 vjeçare.
Nuk më intereson fundi biologjik i gruas 99 vjeçare.

Por vazhdon më trondit fakti që jeta dhe vepra e saj publike ishin një copë thelbësore e historisë më të zezë që ka jetuar shoqëria shqiptare. Copë të cilën e mbartim në një mënyrë a në një tjetër. Copë me të cilën ende s’i kemi bërë përfundimisht hesapet, të cilës ende s’ia kemi shkruar historinë. Copë që për t’u kthjelluar do të kërkojë shumë vite të gjata komunikimi, rrëfimi, dokumentimi. Ky i fundit sapo ka filluar, – kam parasysh këtu dokumentimin sistemik, të organizuar, të institucionalizuar, dhe jo atë që del me mballoma të sajuara në kopertina gazetash me foto gazmore të diktatorit pa pikë përgjegjësie editoriale për mesazhet që përcjell te të rinjtë apo për lëndimin që u bën viktimave të komunizmit.

Gruaja 99 vjeçare i jetoi vitet e veta dhe e pa se si në shoqërinë që po ndërtojmë, nuk të vrasin për idetë e ndryshme politike. Dhe paturpësisht e plot cinizëm nuk reagoi asnjëherë për mijëra të burgosurit e të vrarët për idetë e tyre edhe thjesht estetikisht të ndryshme.

Në të njëjtën ditë si sot, 26 shkurt të vitit 1951, një grua tjetër, një libohovite e mençur dhe e bukur, një nga shkencëtaret e para shqiptare, Sabiha Kasimati u pushkatua në moshën 39 vjeçare nga regjimi që ngriti e kontribuoi deri në zemër të tij gruaja 99 vjecare.
Disa shifra këto, për të treguar se sa Historia është e padrejtë, por edhe se jeta të lë ca shenja rastësore për të na kujtuar mësimin e Historisë që ende nuk është shkruar!
Kjo gruaja vdiq. Por e shkuara nuk ka vdekur, madje ajo ende as nuk ka kaluar.
Në foto: Sabiha Kasimati, marrë nga Autoriteti për Informim mbi Dokumentet e ish-Sigurimit të Shtetit 1944÷1991. /KultPlus.com

Të ikësh nga ministre si Mirela Kumbaro

Ka hedhur firmën e fundit sot, përkthyesja e shkëlqyer nga frëngjishtja që dëgjoi emrin 5 vjet më parë nga Edi Rama për të lënë kompjuterin dhe për të drejtuar kulturën.

Disa e deshën, disa jo, fundja siç ndodh në politikë. Ajo që veçohet sot për Kumbaro është ‘maniera’ sjellja e hijshme pa kunja, pa sforco, por sikur kjo të ishte gjëja më normale në botë. Në fakt njerëzit njihen më mirë kur ikin se kur vijnë.

Ja çfarë shkruan Kumbaro sot: Krenare👐🏻 qe sot hedh firmen e fundit si Minister i Kultures ne kurorezimin e nje pune 2vjeçare: Krijohet Qendra Kombetare per Librin e Leximin 🇦🇱Shqiperia, njesoj si Franca, Italia dhe jo vetem, do te kete nje institucion te dedikuar per politikat e programet e Librit, Leximit, Krijimtarise, Edukimit permes Emancipimit te Mendjes! Faleminderit Skuadres se Kultures qe e krijoi dhe Qeverise dhe Kryeministrit Rama, qe e miratoi sot Faleminderit te gjithe miqve qe mbeshtesin Levizjen Kombetare per Lexim Ta gëzojmë.”, ka shkruar Kumbaro në Instagram. /KultPlus.com

https://www.instagram.com/p/BssbVYxn8V6/

Kumbaro: T’u lexojmë fëmijëve një libër çdo natë për një Shqipëri të emancipuar

LKL shpall programin “Shttt jam duke lexuar” 15 minuta leximi në 10 shkolla të Tiranës.

Lëvizja Kombëtare për Lexim(LKL), nismë e Ministrisë së Kulturës, pas Kukësit, Tepelenës dhe Gjirokastrës, u ndal në Tiranë, me shfaqjen teatrale “Sekreti i Gishtos së Rritur”, dedikuar fëmijëve si frymëzim për të zgjedhur Librat – miq për gjithë jetën.

“T’u lexojmë fëmijëve një libër, çdo natë dhe këta ta fillojmë qysh herët në barkun e nënës. Prej disa kohësh kemi nisur lëvizjen kombëtar për lexim dhe duam që në të gjitha ditët e vitit të fillojnë të mësohen me idenë se libri do të jetë shoku i tyre më i mirë. E them si prind, si mësuese, si ministër, sepse dua shumë që në këtë nismë të na mbështesni të gjithë, pasi vetëm kështu mund të kemi një Shqipëri të emancipuar”- u shpreh Kumbaro në fjalën e saj.

Lëvizja Kombëtare për Lexim ka në fokus fëmijët nga 0-14 vjeç dhe edukimin e leximit që në fëmijëri. Ministria e Kulturës pas dy fushatave sensibilizuese Takohemi për një Libër, këtë vit do të pasurojë me libra për fëmijë, 12 biblioteka publike dhe 12 biblioteka shkollash në secilin qark të vendit.

“Nuk jam e vetme në këtë nismë, por së bashku me bashkëluftëtaren time, Lindita Nikolla, sepse, asnjë nuk ia del i vetëm nëse nuk bashkohemi të gjithë së bashku, prindër, mësues, shoqëri civile, media. Ju lutem media të nderuara, gjeni pak hapësirë në dritaren e ekranit, apo në portalet tuaja, shtoni diçka çdo ditë për librin dhe kulturën e leximit. Falenderoj njerëzit e skenës, janë të shumtë sonte këtu, ju lutem mendjet tuaja inteligjente, gojëtarinë vendoseni në shërbim të kësaj kulture të dashur, që nuk na tradhton kurrë, librin!”.

Lindita Nikolla tha se Ministria e Arsimit dhe Sportit, nga ana e saj do të pasurojë bibliotekat e shkollave qendër komunitare, në mbarë vendin, ndërsa në kuadër të Lëvizjes për Lexim, dy Ministret shpallën shkollën e parë Pilot, – shkolla Kosova në Tiranë, që do të nisë programin “Shttt jam duke lexuar” e ndjekur nga 10 shkolla të tjera të kryeqytetit, ku do të zbatohet 15 minuta lexim i detyruar, 1 ditë të javës. “Është një aksion mbarëkombëtar që shënon për sistemin tonë arsimor një komponent të rëndësishëm siç është marrëdhënia me librin dhe dijen që përcjell çdo fletë e lexuar libri”- u shprej Ministrja Nikolla.

Ardit Gjebrea, i pranishëm në këtë aktivitet, një nga mbështetësit e nismës së Ministrisë së Kulturës, “Takohemi për një libër” kërkoi ndjesë publike duke u shprehur se nuk lexon sa duhet, sidomos me Anën, vajzën e tij : “Është një inisiativë fantastike, sepse ne sot jemi të kontaminuar, jemi të rrethuar nga fenomene, pa dashur të vendos epitete, por janë të një shkalle rrezikshmërie nga të cilat duhet të mbrojmë veten dhe pastaj fëmijët tanë, libri është nga gjërat e shëndetshme që ne duhet ta bëjmë, prandaj duke filluar nga vetja, duhet ta pranoj, se nuk më pëlqen të gënjiej, them se nuk lexoj, me Anën sidomos, por duhet të lexojmë dhe t’u japim këtë kulturë fëmijëve tanë”.

Nga foltorja e Kuvendit të Shqipërisë, Ministrja Kumbaro ka kërkuar të shpallet emergjenca e leximit, si një alarm që duhet të na shqetësojë dhe përbashkojë në kontribute të gjithëve. “Sekreti i Gishtos së rritur” erdhi në skenën e Teatrit të Kukullave, nën interpretimin e drejtorit të QKF-së, Erion Isai dhe 9 aktorëve të vegjël nga Qendra Kulturore e Fëmijëve në Tiranë, ku secili prej tyre vjen si personazh i dalë nga një libër dhe grish fëmijët që ta lexojnë./KultPlus.com

Kumbaro në Paris, pritet në takim nga drejtoresha e UNESCO-s

Për të dytën herë brenda pak muajsh ministrja e Kulturës, Mirela Kumbaro është takuar me drejtoreshën e përgjithshme të UNESCO-s, Audrey Azoulay. Takimi u zhvillua në Paris, në selinë e UNECO-s, aty ku është hapur ekspozita ‘Një dritare në trashëgiminë kulturore të Shqipërisë’.

“Audrey Azoulay jo vetëm një mikeshë e mirë, por edhe një dashamirëse e vëmendshme e Shqipërisë për kauzat tona të përbashkëta: Edukimin dhe Kulturën. Kënaqësi dhe nder që të merrja përgëzimet e saj në emër të UNESCO-s, për punën që po bën Shqipëria me Trashëgiminë Kulturore”, thotë minstrja Kumbaro.

Ekspozita dhe takimi me drejtoreshën Audrey Azoulay në selinë e UNESCO-s vjen në kuadër të 60 vjetorit të anëtarësimit të Shqipërisë në në këtë organizatë. Ekspozita u çel një ditë më parë nga ministrja e Kulturës dhe do të qëndrojë e hapur për disa ditë. Pjesë e kësaj ekspozite është një koleksion i ikonave bizantine, i piktorëve të rrallë shqiptarë. Me rastin e 60 vjetorit të anëtarësimit të Shqipërisë në UNESCO, në mesin e muajit tetor u organizua në Shqipëri një aktivitet, ku u evidentua puna kolosale e bërë ndër vite për të mbrojtur dhe promovuar vlerat e trashëgimisë tonë kulturore.

Qyteti antik i Butrintit ishte pasuria e parë që u bë pjesë e trashëgimisë botërore në vitin 1992. Më pas vijoi puna me pranimin e Gjirokastrës, Beratit apo Isopolifonisë. Aktualisht Shqipëria ka aplikuar pranë kësaj organizate me pasuri të tjera. Është duke u shqyrtuar dosja për praninë në po këtë listë të Liqenit të Ohrit për pjesën shqiptare, si zgjerim i pjesës maqedonase.

Miratimi pritet të ndodhë në sesionin e korrikut 2019. Më pas do të aplikohet për qytetin antik të Apollonisë, Amfiteatrin e Durrësit, Varret e Selcës apo Kështjella e Bashtovës. Në bashkëpunim me UNESCO-n ka nisur puna për hartimin e Planit të Integruar të Menaxhimit të Parkut të Butrintit që do të përfundojë në pranverën e ardhshme, si dhe po punohet për miratimin e ligjit “Për Trashëgiminë Kulturore dhe Muzetë”. /KultPlus.com

Shpat Deda, gurët e Gjirokastrës i ktheu në skenë të gjallë të kulturës

Ministrja e Kulturës, Mirale Kumbaro, ka falënderuar kantautorin Shpat Deda që zgjodhi ambientet e kulturore si skenë të muzikës së tij.

Gurët e Gjirokastrës u kthye nga ritmet e muzikës në skenën e gjallë të kulturës bashkëkohore duke rrëzuar të gjitha kufijtë, ato të mendjes dhe ato administrative.

Ministrja Kumbaro shkruan: ”Falëminderit Shpat Deda që zgjodhe Trashëgiminë Kulturore si skenë të muzikës tënde! Nga Shkodra në Gjirokastër albumi #AmbëlEThartë i dha jetë Kalasë së Argjiros në qytetin që turizmin e ka bashkudhëtarin e të gjithë muajve”, – shkruan ministrja./ KultPlus.com

Mirela Kumbaro: Fatos Arapi, sinonim i pashmangshëm shqiptar i poetit

Sot ka ndërruar jetë poeti i njohur shqiptar Fatos Arapi. Mirela Kumbaro nga Ministria e Kulturës së Shqipërisë përmes një postimi ka shprehur ngushëllimet e saj për humbjen e poetit duke thënë se ai është ndarë nga jeta vetëm fizikisht duke lenë pas vetes kryeveprën e botës letrare, poezinë.

Më poshtë po ju sjellim postimin e plotë të Kumbaros e cila duke i dhënë lamtumirën ka ndarë edhe disa vargje të poetit.

Fatos Arapi, sinonim i pashmangshëm shqiptar i Poetit, ndahet vetem fizikisht nga jeta duke lënë pas kryeveprën e botes letrare, Poezine!

Sepse siç thotë ai vetë:
“Jeta eshte stacion ndarjesh e takimesh.
Jemi perhere udhetare
dhe nder duar,bagazh te pandare,
nje valixhe te vogel
perpjekjesh,sulmesh,kujtimesh”

Lamtumire POET

Kumbaro takon ekspertë nga “Europa Nostra”, bashkëpunime dhe projekte të përbashkëta

Ministrja e Kulturës, Mirela Kumbaro dhe Drejtoresha e Institutit të Monumenteve, Arta Dollani pritën në një takim pune misionin e ekspertëve të Europa Nostra-s, përfaqësuar nga Anëtari i Bordit, Paolo Vitti dhe Peter Bond dhe Lourdes Llorens Abando, ekspertë teknikë nga Banka Europiane e Investimit.

Pas vizitës në terren, në kishat e Voskopojës dhe Vithkuqit, Vitti u shpreh i mrekulluar për vlerat arkitektonike dhe artistike që përcjellin këto monumente të kulturës, frymëzuar nga trashëgimia e kultit bizantin, duke i cilësuar “ Thesare Unike” në rajon e më gjerë. Misioni u shpreh entuziast dhe sugjeroi përgatitjen e dosjes që këto kisha të vlerësohen me statusin e mbrojtjes si trashëgimi botërore nga UNESCO.

“Trashëgimia Kulturore nuk është luks, por potencial për zhvillim ekonomik. Qeveria shqiptare prej pesë vitesh ka kthyer fort vëmendjen ndaj trashëgimisë kulturore. Programet si “100 Fshatrat”, apo “Rrugët e Besimit”, nuk janë vetëm sensibilizim ndaj pasurive kulturore, natyrore dhe shpirtërore të Shqipërisë, por një itinerar i pasur i këtyre thesareve që presin të zbulohen për të komunikuar kulturalisht por edhe për të gjeneruar ekonomi lokale”, u shpreh Kumbaro gjatë takimit.
Misioni vlerësoi maksimalisht punën e Ministrisë së Kulturës dhe Institutit të Monumenteve në mirëmbajtjen, restaurimin dhe vëmendjen e treguar ndaj këtyre monumenteve dhe u shpreh i gatshëm të “krijojmë urat e nevojshme të komunikimit dhe bashkëpunimit në nivel institucional”.

Misioni i Europa Nostras u njoh me strategjinë e programit të Trashëgimisë Kulturore, ligjin e ri për “Trashëgiminë kulturore dhe muzetë”, projektet e monumenteve që janë në proces restaurimi, ose pritet të fillojnë përmes partneriteve me donatorë privatë, apo komunitetet fetare.

Në takim u shkëmbyen mendime rreth bashkëpunimit në të ardhmen duke ngritur grupe të përbashkëta ekspertësh në vlerësim, ekspertizë apo zhvillimin e aktiviteteve të përbashkëta në ndihmesë të restauratorëve, ikonografëve, teknikave të restaurimit, etj./ ma.me/ KultPlus.com

Kumbaro dhe studentët e Akademisë 100+Fshatrat vizituan Nepravishtën e Libohovën

Ministrja e Kulturës, Mirela Kumbaro së bashku me studentët e Akademisë 100+Fshatrat vizituan Nepravishtën e Libohovën, duke parë nga afër potencialet e zonës dhe duke diskutuar konkretisht për projektet që ata kanë hartuar.

Agjencia Kombëtare e Planifikimit të Territorit në kuadër të Programit “100 Fshatrat” krijoi Akademinë 100+ Fshatrat. Akademia mblodhi së bashku studentë te nivelit master të arkitekturës e planifikimit, projektimit të peizazhit e mjedisit, të sapo diplomuar të këtyre fushave, si edhe pedagogë të tyre, të cilët ndajnë vlerësime dhe pasione të ngjashme për fshatin dhe besojnë tek potenciali i tij për t’u zhvilluar si pikë graviteti e fuqishme.

Akademia 100+ Fshatrat po ndërtohet sipas shembullit të Akademisë Verore të Atelier Albania (AASA), por me një shtrirje shumë më të gjerë.

Akademia 100+ Fshatrat bazohet në 20 Atelier projektimi të veçanta, por të lidhura me njëra-tjetrën dhe nën udhëheqjen e AKPT-së.

Fokusimi në këto fshatra për të krijuar 100 zona zhvillimi ekonomik rural, të bazuar tek investimet në agroturizëm dhe ekoturizëm, duke shfrytëzuar trashëgiminë kulturore, mrekullitë natyrore, traditën në tërësi, kapacitetet lokale, por edhe investimet e sipërmarrjes. Programi i “100 Fshatrave” është një model për të dhënë shembuj dhe për ta kthyer në një laborator, prej ku të tjerët të mund të marrin nxitjet e duhura, që nga bashkitë deri tek individët.

Ditën e premte, 14 shtator 2018, do të prezantohen 20 lote nga grupet e punës./ KultPlus.com

Ekspozita në GKA, takim informal i tre ministrave të Kulturës

Të pranishëm në hapjen e ekspozitës së artistes Flaka Haliti në Galerinë Kombëtare të Arteve në Tiranë, tre ministrat e Kulturës të Shqipërisë, Kosovës dhe Maqedonisë zhvilluan një takim informal, që sipas ministres Kumbaro, ishte i një rëndësie të veçantë. Kështu, në ceremoninë e hapjes Kumbaro u takua me ministrin e Kulturës, Rinisë dhe Sportit të Kosovës, Kujtim Gashi, si dhe ministrin e Kulturës së Maqedonisë, Asaf Ademi.

“Në takim u diskutua për një bashkëpunim më të frytshëm kulturor midis tri vendeve, për krijimin e një trekëndëshi komunikimi kulturor që do të jetë bazë për forcimin e marrëdhënieve edhe në fushat e tjera”, thotë ministrja Kumbaro.

Në këtë ngjarje artistike të rëndësishme në fushën e arteve pamore në Tiranë morën pjesë artistë, artdashës, profesionistë të kulturës nga Shqipëria dhe Kosova si dhe vizitorë të ardhur nga jashtë dhe përfaqësues të institucioneve ndërkombëtare që jetojnë në Shqipëri.

Flaka Haliti shprehu emocionet e saj për hapjen e kësaj ekspozitë, dhe falenderoi edhe një herë Ministritë e Kulturës së Shqipërisë dhe Kosovës që bënë të mundur realizimin e “Këtu – Apo Atje, Është Më Atje” në Galerinë Kombëtare të Arteve. Artistja e sheh këtë bashkëpunim midis dy qeverive si një mundësi shumë të mirë për artistët nga Shqipëria dhe Kosova për të ndarë përvojat e tyre në fushën e arteve pamore dhe për tu prezantuar tek publiku i të dy vendeve.

Flaka falenderoi gjithashtu të gjithë stafin e Galerisë për punën e tyre dhe dedikimin maksimal në këtë ekspozitë./ ata

Zbulime të papritura në xhami

Prej muajsh tashmë, Ministria e Kulturës dhe Instituti i Monumenteve të Kulturës, ndjekin kantieret e restaurimit të 19 objekteve të kultit të besimeve të ndryshme fetare, nga Jugu në Veri të Shqipërisë.

“E bukura e restaurimit në pasuritë kulturore janë të papriturat që dalin nga shtresëzimet e monumentit, nën tokë apo nën suva, në themele apo në çati”, shprehet ministria e Kulturës, Mirela Kumbaro.

Kështu, në themelet e Teqesë Helvetive dhe të Xhamisë Mbret në Berat, kanë dalë në dritë struktura të hershme, të panjohura deri tani. Këto zbulime bënë të zgjerohet gërmimi arkeologjik në të gjithë sipërfaqen, përtej vijës së themelit të Xhamisë Mbret.

“As unë e askush nuk e fshehim emocionin që ngjall bukuria e mozaikut që shfaqet nën dhe, të cilit nuk do të ngutesha t’i vija asnjë epitet, por pa dyshim po përgatitemi për një destinacion të ri kulturor në hartën e Beratit. Kjo është pak por e sigurt”, përfundon ajo. /Telegrafi/

Kumbaro: Zhvillimi industrial ‘zbulon’ arkeologjinë

Shqipëria zbulon sitin më të madh arkeologjik, ku ruhen tri epoka të ndryshme nga 8000 vite para Krishtit deri tek 1000 vite pas Krishtit.

Ministrja e Kulturës, Mirela Kumbaro dhe Michele Elia, Menaxher i TAP në Shqipëri vizituan një nga sitet e gërmimeve arkeologjike në gjurmën e gazsjellësit TAP në Shqipëri, ku janë zbuluar vendbanime të periudhës prehistorike e deri në mesjetën e vonë, si dhe shumë objekte arkeologjike.

Projekti i ndërtimit të gazsjellësit TAP është zhvilluar paralelisht me proceset arkeologjike.

“Dua të theksoj se gazsjellësi TAP është një ndër bashkëpunimet më të mira që ne kemi me zhvillimet industriale dhe që tregon në të njëjtën kohë që nuk janë të papajtueshme trashëgimia kulturore dhe zhvillimi industrial i vendit, mjafton të kemi bashkëpunim dhe të ruajmë standardet”- u shpreh Kumbaro.

Ndër rajonet ku janë zbuluar më tepër site arkeologjike janë Korça, Berati dhe Skrapari. Përmes këtij projekti është krijuar mundësia të zbulohen site arkeologjike dhe vendbanime të rëndësishme për njohjen, hulumtimin dhe ekspozimin e trashëgimisë sonë arkeologjike.

Michele Elia theksoi se “TAP është shumë i vëmendshëm në këtë projekt, nuk sheh vetëm ndërtimin e tubave, që në fakt është tërësisht infrastrukturë, por edhe gjithçka me të cilën përballet në rrugëtimin e saj kthehet në oportunitet për territorin, qoftë nga pikëpamja sociale ambientale, apo kultore. Ne jemi të impenjuar të ruajmë nivelin më të lartë të standardeve, jo vetëm rajonale por edhe ndërkombëtare”.

Nga gërmimi arkeologjik i shpëtimit deri tani janë zbuluar rreth 600 varre, rreth 11 site arkeologjike, të cilët datojnë nga periudha Helenistike, periudha prehistorike (bronzi i vonë), e deri në periudhën Otomane. Këto materiale janë në proces studimi. Me shumë interes arkeologjik në këtë gërmim është zbulimi i një vendbanimi të periudhës neolitike.

“Në të gjitha sitet e hapura që realizohen në bashkëpunim me arkeologët, jo vetëm gërmimet kanë qenë interesante, por ka qenë një treg pune shumë i rëndësishëm për punonjësit e trashëgimisë kulturore. Kemi mbi rreth 100 arkeologë dhe ndihmës arkeologë të punësuar, që tregon se potenciali I zhvillimit industrial sjell dhe potencial te zhvillimit të tregut të trashëgimisë kulturore”, u shpreh Kumbaro.

Realizimi i gërmimeve arkeologjike, zbulimi i siteve të reja arkeologjike po mundësohet vetëm falë projektit TAP, përgjatë zbatimit të të cilit janë zbatuar kriteret dhe standardet më të larta të zbatimit të ligjit në fushën e trashëgimisë kulturore. /KultPlus.com

Kumbaro: Bekim Lumi mbetet regjisori që sfidoi me art ikjen tokësore

Ministrja e Kulturës së Shqipërisë, Mirela Kumbaro me anë të një mesazhi dërguar Ministrit të Kulturës në Kosovë, Kujtim Gashit ka shprehur ngushëllimet për humbjen e regjisorit Bekim Lumi, shkruan KultPlus.

Kumbaro e ka cilësuar vdekjen e Lumit si një humbje të madhe për teatrin shqiptar. Më poshtë ju sjellim mesazhin e plotë dërguar ministrit Gashi.

I nderuar z.Gashi,

Ministria e Kulturës e Republikës së Shqipërisë shpreh ngushëllimet e thella për humbjen e parakohshme të Profesorit dhe Regjisorit të Artit Skenik, Bekim Lumi.

Ikja e tij është një humbje e madhe për teatrin shqiptar.

Me kontributin e tij të vyer në skenën mbarëkombëtare, me idetë novatore dhe risitë që solli, Bekim Lumi mbetet regjisori që sfidoi me Art ikjen tokësore dhe i qëndroi skenës deri në momentin e fundit.

I bashkohemi dhimbjes së Kosovës, familjes, artistëve dhe gjithë dashamirësve. Ai është Artisti i të gjithë shqiptarëve!
I paharruar kujtimi i tij!

Kumbaro: Dokufest, ngjarja më e rëndësishme kulturore që kemi arritur të ndërtojmë

Sot në Tiranë u mbajt konferenca e përvitshme për media e festivalit DOKUFEST, me ç’rast u prezantua programi i plotë i edicionit të 17 të festivalit, i cili do të mbahet nga data 03-11 gusht 2018 në Prizren, Kosovë.

Ministrja e Kulturës e Shqipërisë, Mirela Kumbaro, tha se DokuFest ka sjellë gjithmonë tema të fuqishme, dhe është shndërruar në ngjarjen më të rëndësishme kulturore në botën e artit shqiptar.

“DokuFest është pa dyshim një ngjarje kulturore shumë e rëndësishme kombëtare. Në mos, në botën e filmit, ngjarja më e rëndësishme kulturore që kemi arritur të ndërtojmë në botën e artit shqiptar me një rreze veprimi ndërkombëtare, dhe jo vetëm rajonale”, tha Kumbaro.

Organizatorët e festivalit: Nita Deda (drejtoreshë), Veton Nurkollari (drejtor artistik), Eroll Bilibani (drejtor ekzekutiv) dhe Samir Karahoda (programer i filmave nacional dhe te shkurtë) prezantuan më gjerësisht temën dhe programin e sivjetmë.

Në këtë edicion do të shfaqen mbi 260 filma në kategori të ndryshme, nëpërmjet programeve garuese dhe atyre speciale, do të ketë përformanca, punëtori dhe panele të ndryshme, që synojnë do ta shndërrojnë Prizrenin në pasqyrë, përmes temës së Reflektimit.

DokuFest në po të njëjtën ditë, do të shfaqë disa filma të përzgjedhur në Amfiteatrin e Tiranës nga ora 20:00. / KultPlus.com

Modelet e rijetëzimit një risi që nxit interesin e turistëve

Ministrja e Kulturës, Mirela Kumbaro vizitoi Hotel Vila Aleksander në Berat, një nga modelet e suksesshme të rijetëzimit të trashëgimisë kulturore.

Aleksandër Nako dhe bashkëshortja e tij, pas kthimit nga Italia, kanë investuar në banesën e pozicionuar në lagjen Mangalem, Berat, duke ruajtur dhe vendosur në fokus vlerat e trashëgimisë kulturore dhe arkitektonike të banesës, tashmë e kthyer në ambient hotelerie dhe restorant, me shërbim të kualifikuar.

Ky model-rijetëzim e njeh publikun me historikun e banesës, situatën urbane, arkitekturën dhe zhvillimin e hapësirave të brendshme, duke modeluar turizmin kulturor , që këtë vit ka një numër të lartë vizitorësh në të gjithë vendin, shkruan a.t.a.

Banesat si pasuri kulturore, janë një mundësi shumë e mirë për ti rijetëzuar në bujtina, restorante, qendra shërbimi dhe të tjera aktivitete private fitimprurëse./ KultPlus.com

Pas rehabilitimit, Galeria Kombëtare do ketë emër të ri

Ministrja e Kulturës, Mirela Kumbaro duke folur për turizmin dhe risitë e këtij viti u shpreh entuziaste për këtë sezon që siç tha ajo, i ka kaluar pritshmëritë për nga fluksi i pushuesve.

Ndër të tjera, Kumbaro dha detaje për projektet e reja, si ai për Galerinë Kombëtare të Arteve që merr një tjetër emër, gjatë një interviste për një nga televizionet në vend.

“Muzeu Kombëtar përgatitet për një periudhë rehabilitimi. Brenda vitit do kemi projektin e ri për të kaluar më tej në zbatim. Galeria Kombëtare e Arteve merr emrin e ri, Muzeu Kombëtar i Arteve të Bukura. Ka një fond të jashtëzakonshëm të veprave qoftë të para 100 viteve, qoftë të realizimit socialist. Godina është mjaft e amortizuar, kërkon riorganizim.

Kemi projektin e radhës. Galeria Kombëtare ka statusin monument kulture dhe me ligj ajo nuk preket, por rehabilitohet. Do të ketë një koncept të ri bashkëkohor dhe do të ketë teknologji moderne”,u shpreh ministria e Kulturës, Mirela Kumbaro.

Në fund ajo shtoi se ,”ndërtuam 4 muze në mandatin e kaluar, besoj që të gjitha institucionet e mëdha kombëtare janë në listë sepse që kur janë ndërtuar nuk janë prekur

Itinerari “Rrugët e besimit”, destinacione të reja turistike

”Në periudhën janar-qershor 2018 kemi rritje me 50% më shumë të vizitorëve në krahasim me të njëjtën periudhë të një viti më parë. Kjo pasi këtë vit jemi përpjekur të realizohemi ndryshe me paketa të plota kulturore dhe me itinerare, ku një ndër to është ”Rrugët e besimit”, u shpreh ministrja e Kulturës, Mirela Kumbaro gjatë një interviste televizive.

“Rrugët e besimit” është një itinerar që ka të bëjë me destinacione objektet e kultit, qoftë këto të kultit islam, ortodoks apo katolik. Këto objekte kulti nuk duhet thjesht t’i shohim se i kemi, por dhe t’i mirëmbajmë. Numri i objekteve të kultit të restauruara në këto katër vitet e fundit, ka nxjerrë në pah vlera të cilat harresa, rrënimi, koha dhe mosmirëmbajtja i kishte fshehur”, – tha ministrja.

Ajo shtoi se në itineraret “Rrugët e besimit” në Korçë janë kishat e Voskopojës, në të cilat janë shtatë kisha ku katër prej tyre, kanë mbaruar restaurimin e plotë.

Gjithashtu dhe restaurimi i përfunduar i qendrës historike të Voskopojës përbën një itinerar më vete.

Kumbaro tha se “këto itinerare vijnë për shkak të bashkëpunimit të ngushtë me institucionet fetare, ku kemi një bashkëpunim të shkëlqyer me kishën orthodhokse dhe me këto itinerare kemi bërë një paketë promovimi shumë të rëndësishme”.

“Gjithashtu kemi dhe gjashtë xhami të cilat janë në restaurim, duke përfshirë dhe xhaminë e Et’hem Beut, e cila dhe pse akoma është në kantier është kthyer në një objekt kureshtje për turistët, pasi është një ndër xhamitë më të jashtëzakonshme që ne kemi përsa i përket artit pamor që ka brenda. Do ketë një restaurim të gjatë kjo xhami, ku kemi parashikuar rreth 600 ditë restaurimi sepse për herë të parë ndërhyhet në thellësi që nga themelet deri tek detajet”, – vijoi Kumbaro.

“Kemi gjithashtu itinerare të tjera të ‘Rrugëve të besimit’ ku kemi tre xhami në Berat, xhaminë e Gjirokastrës, xhaminë e Gjin Aleksit në Delvinë dhe gjithashtu po përgatitemi për zbatimin e projektit të xhamisë së Plumbit në Shkodër. Paralelisht janë kishat në Përmet, kisha e Bënjës, kisha e Kosinës, ka mbaruar kisha e Shën Mërisë në Pogon. Gjithashtu përfundoi kisha e famshme e Dhërmiut e cila i rikthehet jo vetëm vizitorëve, por i rikthehet dhe turistëve”, – u shpreh ajo.

Ministria e Kulturës ka të hapura deri tani rreth 30 kantiere restaurimi në të gjithë vendin, nga muzeu i Sinës në Dibër, deri në kishën e Peshkopisë, duke mos harruar restaurimin e Memorialit të Skënderbeut i cili do të përfundojë brenda vitit të Skënderbeut. Gjithashtu, po restaurohet Shtëpia e vëllezërve Frashëri në Përmet.

Një ndër destinacionet e kultit tashmë të mbaruara janë kisha e Mesopotamit dhe kisha e Labovës së Kryqit, që është një ndër destinacionet e preferuara të vizitorëve.

“Këto objekte kulti, pra destinacione turistike, ne ua ofrojmë turistëve në bashkëpunim me Ministrinë e Turizmit me anë të programit ‘Smile Albania’ në të cilin bëjnë pjesë qindra grupe vullnetare të shpërndarë në të gjithë vendin, ku me anë të fletëve me informacionin e duhur dhe me anë të rrjeteve sociale bëhet i mundur informacioni për këto destinacione turistike”, – përfundoi ministrja e Kulturës, Mirela Kumbaro. /a.g/

Mesazhi i Kumbaros pas letrës së 65 artistëve që mbështesin projektin për teatrin e ri

65 artistë të njohur mes të cilëve shumica aktorë dhe regjisorë të Teatrit Kombëtar kanë mbështetur në një letër të hapur ndërtimin e Teatrit të ri Kombëtar.

Letra thekson nevojën për një ndërtesë dinjitoze të teatrit dhe respektimin e një procesi transparent që ruan pronën e Teatrit Kombëtar në funksion të tij.

Artistët i bëjnë thirrje forcave politike të qëndrojnë larg këtij procesi dhe të mos politizojnë betejat e artistëve. Ministria Mirela Kumbaro ka përshëndetur letrën e tyre përmes një postimi në rrjetin social Facebook.

“Falenderim me përulje per te 65 artistet dhe figurat e nderuara qe nga i madhi Pirro Mani, shume te dashurit Fatos e Drita Haxhiraj, te nderuarit Pellumb Kulla, Viktor Zhusti, Gezim Kame, Josif Papagjoni, Luftar Paja, Bashkim Hoxja dhe te 65 artisteve, deri te me te rinjte po jo me pak te rendesishem per te sotmen e te ardhmen, te cilët sot mendojne e mbeshtesin bashkepunimin per Teatrine se Ardhmes”, ka shkruar ajo./ KultPlus.com

Shtëpia e At Gjergj Fishtës nuk do të restaurohet

Ministrja e Kulturës, Mirela Kumbaro, njoftoi nga Lezha se shtëpia e Gjergj Fishtës në Fishtë nuk do të restaurohet për shkak se është objekt privat.

Shtëpia e përfolur e At Gjergj Fishtës në Fishtë të Lezhës nuk do të restaurohet edhe pse është raportuar edhe më parë që ajo është drejt shkatërrimit.

“Objekti që shpeshherë cilësohet gabimisht si shtëpia e Gjergj Fishtës është vetëm një banesë me disa pronarë privatë me një histori pronësie goxha të komplikuar, ku At Fishta ka kaluar pak muaj fëmijërinë e tij”, ka thënë Mirela Kumbaro.

Prandaj memoria për Gjergj Fishtën do të bëhet tek kolegji i Troshanit, të cilit ai i kushtoi pjesën më të rëndësishme të jetës së tij.

Ministrja e Kulturës ishte në Lezhë duke inspektuar punimet për rikonstruksionin e plotë të vendvarrimit të Skënderbeut.

Ajo tha se punimet do të krijojnë probleme gjatë sezonit turistik për vizitorët dhe agjencite turistike, por u kërkon mirëkuptimi të gjithë aktorëve, shkruan abcnews.al./KultPlus.com

250 mijë euro për Varret Ilire të Selcës

Varret ilire të Selcës do t’i nënshtrohen rehabilitimit të tyre pas dekadave të tëra të lëna në harresë të plotë, pa asnjë lloj investimi.

Lajmin e mirë për këtë trashëgimi unikale e ka dhënë ministrja e Kulturës, Mirela Kumbaro e cila thotë se tashmë projekti i rehabilitimit është miratuar, me një vlerë prej 250 mijë eurosh.

“Unikale janë varret monumentale ilire në Selcë të Mokrës, shek. IV-III p.K., që gjenden në faqen lindore të kodrës së quajtur Gradishtë, në të cilën ndodhen gjurmët e qytetit ilir të Selcës së Poshtme. i vizituam bashke me Ambasadoren e Delegacionit Europian, Romana Vlahutin, për të prekur konkretisht jo vetëm një vlerë të rrallë të kulturës shqiptare, por edhe dobinë e projektit që kemi hartuar e miratuar tashmë me një vlerë prej 250 mijë eurosh, për rehabilitimin e varreve, mjaft të dëmtuara nga degradimi natyror, nga mungesa prej dekadash e investimit dhe konservimit”, shkruan Kumbaro në Facebook.

Në Javën e Evropës, vëmendje të veçantë iu kushtua Korçës, Pogradecit, Liqenit të Ohrit dhe varreve mbretërore ilire të Selcës së Poshtme.

Varret monumentale të Selcës janë një pjesë e rëndësishme e qytetit ilir të Selcës së Poshtme. Ato janë aspekti më i njohur arkitekturor i këtij qyteti. Periudha e ndërtimit të tyre përkon me periudhën kulmore të zhvillimit të qytetit./ KultPlus.com

Tre kantieret e restaurimit që nisin në verë

Kumbaro: Ca flasin, ca të tjerë punojnë gjithë ditën

Memoriali i Skënderbeut në Lezhë, Muzeu i Kastriotëve në Sinë të Dibrës – Shtëpia e Vëllezërve Frashëri në Frashër të Përmetit janë tre kantieret e reja të restaurimit që do të nisin këtë verë. Projektet për rijetëzimin e tyre janë miratuar nga Këshilli Kombëtar i Restaurimeve.

Ministrja e Kulturës, Mirela Kumbaro, e cila ndan në Facebook me ndjekësit e saj këtë lajm, thekson se teksa shumë flasin, të tjerët punojnë për rivitalizimin e vlerave të trashëgimisë sonë. “Behari është kohë për turizëm, por edhe për restaurime. Ca flasin gjithë ditën e ca punojnë gjithë ditën, te këta të fundit bëjnë pjesë inxhinierët e Institutit të Monumenteve që kanë përgatitur projektet e restaurimit për 3 objektet e përfshira në kalendarin e restaurimeve të Vitit e Skënderbeut: – Memoriali i Skënderbeut në Lezhë, – Muzeu i Kastriotëve në Sinë të Dibrës – Shtëpia e Vëllezërve Frashëri në Frashër të Përmetit. Këshilli Kombëtar i Restaurimeve shqyrtoi e miratoi projektet dhe brenda verës fillon puna në të tre kantieret. Është padyshim kënaqësi për mua të ndaj me ju këto projekte. Shtëpia e Vëllezërve Frashëri në një nga zonat më të bukura të Shqipërisë #MbajmePremtimet #TurizmiKulturor #RrugetEKujteses”, shkruan Kumbaro.

Muzeu i Kastriotëve ndodhet në fshatin Sinë të Njësisë Administrative Arras Bashkia Dibër. Muzeu ka filluar të ndërtohet në vitin 1982 dhe për herë të parë është hapur për publikun në vitin 1985. Mungesa e mirmbajtjes së vazhdueshme si dhe shkaqet e agjentëve atmosferik përgjatë viteve kanë ndikuar në degradimin e objektit. Ndërhyrjet e parashikuara do të konsistojnë në hidroizolimin e tarracës, prishjen e degradimeve, pastrime, lyerje dhe riorganizim të ndriçimit.

Gjithashtu, objekt i këtij projekti është edhe muzealizimi, riorganizimi i muzeut duke filluar që nga pisjet përbërës të mobilimit dhe deri të elementët që do të ekspozohen dhe mënyra e ekspozimit të tyre. Në Memorialin e Skënderbeut në Lezhë ndërhyrja e parashikuar nga IMK dhe Ministria e Kulturës konsiston në punimet restauruese në monument dhe muret e qytetit Antik, ne rikonstruksionin e mbuleses, konsolidimin dhe restaurimin e piktures murale dhe mozaikut.

Ndersa per restaurimin “Shtëpia e Vëllezërve Frashëri”, janë parashikuar ndërhyrje në restaurimin e çatisë, dyerve dhe dritareve në përgjithësi, eleminimi i çarjeve në fasadë, restaurim të dyshemeve dhe riparime në suvatime. Gjithashtu do të bëhet sistemimi i terrenit përreth./ KultPlus.com

Kumbaro kështu ju ka thënë fëmijëve të saj: Unë jam me origjinë myslimane, babai ortodoks, ju jeni të lirë të zgjidhni besimin tuaj

Mirela Kumbaro

“Unë jam në origjinat e mia myslimane, babai juaj është ortodoks, ju jeni të lirë të zgjidhni besimin tuaj si ta ndjeni dhe kur të doni, rëndësi ka të jemi bashkë ” u jam përgjigjur fëmijëve të mi sa herë që më bënin pyetje për fenë kur gëzonim nga një familje në tjetrën çdo sebep festiv në ditë të Bajramit apo të Krishtlindjeve a Pashkëve.

“Nuk duhet shumë art, e as fjalë shumë të kërkuara për të vërtetuar se njerëzit e Zotit duhet të tolerojnë njëri-tjetrin. Do të shtoja dhe më tepër: do të shtoja se duhet t’i konsiderojmë të gjithë njerëzit si vëllezër. Po si? Si na qenka vëlla turku? Vëlla kinezi, hebreu apo tajlandezi? Po, pa pikë dyshimi: a nuk jemi të gjithë fëmijë të një ati, krijesa të të njëjtit Zot?” Këtë thirrje do të bënte, pas Erazmit të Roterdamit e Xhon Lokut, dhe Volteri më 1763-n, duke parë që Europa e krishterë e kishte të vështirë të hapte dyer për qytetërimet dhe besimet e tjera, duke parë se ndër shekuj fanatizmi fetar kishte derdhur lumenj gjaku.

Sot më shumë se kurrë kjo thirrje e Volterit është këmbanë për Europën që po përjeton shekullin e ri të lëvizjeve masive, në kohën që emigracioni nga vendet myslimane në luftë, i kanë zënë në befasi vendet perëndimore me një qytetërim të lashtë dhe besim fetar të ngulitur. Kavafis e kishte parashikuar shumë më herët që “barbarë”, “të huaj” nuk do të kishte më.

Ne vetë jemi tashmë barbarët, të huajt e këtij shekulli të lëvizshëm. I huaji që jeton ndryshe prej nesh, që mendon ndryshe prej nesh e që beson ndryshe prej nesh, është tashmë komshiu ynë, kolegu ynë, bashkëudhëtari ynë. E në përballjen me të huajin të ndryshëm për nga besimi në fe, për fat shqiptarët e kanë pasur një traditë dhe nuk gjenden të papërgatitur. Edhe pse vendi më i izoluar i botës për gati pesëdhjetë vjet, vendi i vetëm që i shpalli luftë Zotit dhe ktheu idealet në perëndi, përsëri farën e besimit në të mirën, farën e besimit te njëri-tjetri, farën e bashkëjetesës me të ndryshmin prej nesh e ruajtëm si të shenjtë dhe ky është mësimi më i mirë që mund t’i japim botës. Shumë historianë, studiues kanë ngulmuar të gjejnë rrënjët e kësaj harmonie fetare të ngulitur herët në këtë vënd. Dhe shkaqet e arsyet mund të jenë nga më të ndryshme: në fund të fundit furtuna e historisë me luftrat e copëtimet, imponimet e besimit prej pushtuesve padyshim ka lënë gjurmët e veta. Por e rëndësishme është që te shqiptarët nuk u kultivua fara e urrejtjes për sivëllanë, komshiun, të afërmin që besonte ndryshe. Rreziku i shuarjes, copëtimit dhe asgjesimit të një kombi të vogël, të një gjuhe të rrallë e bëri të ndërgjegjshëm shqiptarin shumë herët se “Feja e shqiptarit është shqiptaria”. Pa këtë fe të parë të gjitha të tjerat do të ndjeheshin të rrezikuara.

Për shqiptarët ishte më i rëndësishëm arsimimi, ruajtja e gjuhës shqipe se ndarja në besime. Pikërisht pra te domosdoshmëria e mbijetesës së kombit e të gjuhës shqipe, duhet kërkuar dhe arsyeja më e qenësishme e një harmonie fetare mes shqiptarëve.

Sot vetëm në një unazë të ngushtë qark sheshit të Tiranës ngrihen Xhamia muze e Ethem Beut, si gur themeltar dhe i qytetit të vjetër, Kisha e fisme Katolike pak metra më tutje, Kisha e bukur ortodokse që krijon trekëndëshin barabrinjës dhe Kryegjyshata e bektashinjve në kodrinë. Si një tavolinë e rrumbullakët ku të gjithë ndjehen njëlloj të respektuar dhe të nderuar.
Shqiptarët kanë gëzuar bashkërisht festat e besimeve të ndryshme: Krishtlindjet, Pashkët, Bajramin, Ramazanin apo Nevruzin, kanë lidhur kryshqi, miqësi e kanë krijuar familje duke vënë parësore dashurinë për njeriun pa dallim feje. Ky do të ishte mesazhi më i mirë për të cilën ka nevojë sot bota e qytetëruar: parësore është dashuria për njeriun.

Po kjo e mirë e trashëguar nga të parët tanë është gjithnjë e brishtë si vazo argjile, nëse nuk e ruajmë, nëse nuk e përmirësojmë, ekziston gjithnjë rreziku për tu thyer. Fanatizmi fetar vazhdon të shkaktojë viktima edhe sot në kohërat modern ku informacioni dhe dija nuk mungojnë. Rreziku është gjithnjë te porta.

Ndaj dhe ju përgëzoj për nismën për një konferencë për tolerancën fetare. Nuk mjafton anjëherë të flitet, të komunikohen mesazhe të qarta, të diskutohen dhe të debatohen mendime.
Çdo shmangie për njohje është burim rreziku për keqkuptime. Çdo paragjykim për cilindo besim është vatër për ndezje flakësh urrejtjeje, çdo etiketim i gabuar është start për konflikte. Gjendja në lindjen e mesme, luftrat e vazhdueshme e terrorizmi i përhapur që abuzon me emrin e fesë dhe besimit, është një dëshmi se rinia e sotme ka nevojë për më tepër ndriçim dhe dialog, pa iu trembur përplasjes së mendimeve. Nuk mjafton vetëm informimi statistikor rreth vrasjeve, shpesh deformues i shkaqeve të qenësishme, nevojitet të kuptohet qartë, të njihemi me historinë e gjithësecilit, për t’u bindur se rruga e vetme e mundshme për të dalë nga kjo “luftë e tretë fragmentare”, rruga e vetme për të shmangur urrejtjen, diskriminimin, dhunën është toleranca.

Do ta mbyllje me porositë që Papa Françesku u dha të rinjve në vizitën e tij historike në Tiranë në shtator 2014 pjesë e të cilës pata fatin e jashtëzakonshëm të jem, ku shembulli i tolerancës fetare ishte dhe kryefjala: “Thuajini PO kulturës së takimit e të solidaritetit, PO bukurisë së pandashme nga e mira e nga e vërteta, PO jetës së shkrirë për ideale të mëdha, por besnike dhe në gjërat e vogla. Kështu, do të ndërtoni një Shqipëri më të mirë e një botë më të mirë”./KultPlus.com

Autorët shqiptarë në Panairin e Leipzigut, rrëfejnë pengjet dhe temat e krijimtarisë së tyre

Për herë të parë në Panairin e Leipzigut, Shqipëria prezantoi autorët shqiptarë në stendën shqiptare. Këtë stendë e ka vizituar edhe ministrja, Mirela Kumbaro, ku së bashku me disa autorë shqiptarë kanë zhvilluar një diskutim me temën “Letërsia shqipe me/pa kufi”, shkruan KultPlus.

Ministrja e Kulturës, Mirela Kumbaro gjatë qëndrimit tek kjo stendë theksoi se stenda shqiptare është një stendë e kulturës.

“Kur flasim për integrimin evropian kultura është ajo që na përfaqëson me se miri, e cila luan edhe rolin e promotorit politik dhe ekonomik ne integrimin evropian. Anëtarësimi në TRADUKi është një nga promotorët e integrimit”, ka thënë Kumbaro.

Diskutimi u mbajt nën moderimin e Mimoza Hysës, e cila tha se koncepti i përfaqësimit të letrave shqipe në këtë panair është krijimi i hapësirës së dialogut gjithëpërfshirës.
“Letërsia na ndihmon për të rrëfyer izolimin e pazakontë dhe tranzicionin e gjatë për të kuptuar veten dhe tjetrin. Ndaj në të njëjtën stendë shqiptare përfaqësohemi me shkrimtarin Ismail Kadare dhe Kasëm Trebeshinën, për një dialog të hapur”, ka thënë ajo.

Tre shkrimtarë, të ndryshëm nga njëri tjetri rrëfyen pengjet dhe temat e krijimtarisë së tyre, ndërsa një pyetje që u ngrit atje për autorët është “Kush përfiton më shumë: ai që ikën, apo ai që rri?”.

Thanas Medi emigrant në Greqi prej shumë vitesh rrëfeu ngulmimin që e kishte shtyrë të rrëfente historinë e një pakice të harruar: vllehët. Historia e popullit endacak që ngrinte kasollet buzë lumenjve, ku në një te tillë kishte lindur dhe vetë, historia e ruajtjes së një kulture me tradita, rite të çuditshme. Këngë e shumë magji. Për Thanas Medin shtegtimi dhe lëvizja bëhet për një jetë më të mirë dhe është rritje e njeriut.

Gazmend Kapllani rrëfeu për një tjetër shpërngulje të dhimbshme, atë të emigrantit. Dhe obsesionin e tij për kufijtë: ata të dukshëm dhe ata të padukshëm. Për Gazmend Kapllanin bota nuk mund të jetojë pa emigracionin, pa njohjen me tjetrin që vë në provë gjithsecilin. Kush përfiton më shumë pastaj është pyetje një milion dollarëshe.

Udhëtimi i Manjola Nasit është “Një udhëtim e gjysmë” është shtegtim në kohë Është Fari, syri i madh që sheh e ruan të gjithë që shkojnë e vijnë pa lëvizur.

Pjesëmarrës në stendën shqiptare ishin Ministri i Kulturës së Maqedonisë, Robert Alagjozovski, Ministri i Kulturës së Malit të Zi, Aleksandar Bogdanović, drejtoresha e rrjetit Traduki, Antje Contius, përfaqësues nga Kultur Kontakt dhe Ministria e Kulturës së Austrisë, etj./ KultPlus.com

Kumbaro vizitë tek shkolla artistike në Gjirokastër, i plotëson dëshirën flautistit të talentuar (FOTO)

Ministrja e Kulturës dhe deputetja, Mirela Kumbaro gjatë vizitës së saj në qarkun e Gjirokastrës është ndalur në shkollën artistike “Feim Ibrahimi”, ku i ka bërë një surprizë të bukur njërit prej nxënësve të talentuar të kësaj shkolle.

Kumbaro i ka dhuruar një flaut të ri Anxhelos nga Përmeti, duke i plotësuar kështu dëshirën e tij. Dëshirë, që ishte bërë publike edhe në kronika televizive për shkak të kushteve të vështira ekonomike të Anxhelos, i cili flautin e ka objektin më të çmuar.

“Në shkollën artistike “Feim Ibrahimi” në #Gjirokastër me Anxhelon nga Përmeti, flautistin e ri që sot u pajis me flaut të ri siç e dëshironte. #EdukimPërmesArtit”, shkruan Kumbaro në faqen e saj në Facebook, ku ka publikuar edhe disa foto.

Nga shkolla artistike, Kumbaro tha se qëllimi i kësaj vizite është të shkohet drejt një iniciative për të mbështetur me instrumente muzikore shkollën e vetme artistike të Gjirokastrës. Javën që vjen, kjo shkollë do të pajiset me instrumenta të tjerë muzikorë, që u vijnë në ndihmë fëmijëve të talentuar që studiojnë aty.

Ministrja e Kulturës shoqërohej në këtë vizitë edhe nga deputeti tjetër i qarkut të Gjirokastrës Flamur Golemi./ KultPlus.com

Mozaikët e rrallë në qytetin e Durrësit (VIDEO)

“A jeni kurioz për të parë mozaikët e rrallë apo të provoni vet sesi ndërtoheshin këto vepra arti dikur? Atëherë duhet të shkoni patjetër në Durrës!”, kjo është ftesa që bën Ministrja e Kulturës, Mirela Kumbaro teksa ka publikuar një video të veçantë nga vizita në Muzeun Arkeologjik të Durrësit, ku shihet sesi po punohet për të riprodhuar një nga mozaikët e rralle te qytetit te Durrësit, ai i hipokampit.

“Mozaiku i hipokampusit, ku është? Si është? Doni të provoni si ndërtoheshin mozaikët e Durrësit? Në Muzeu Arkeologjik Durrës, tryeza e Qazim Kertushes dhe Ivo Mojit eshte krijimtari dhe zbavitje që rikrijon mozaikun e fshehur nen toke. Vizitoni muzeun dhe zbavituni ! #NdertoMozaikun Mos e humbni keto dite procesin e krijimit, Behuni bashkeautore te mozaikut! #EjaNeMuze #EdukimPermesKultures”, shkruan Kumbaro në Facebook.

Mozaiku i Hipokampit ndodhet në lagjen nr.5 të qytetit të Durrësit. Mozaiku në fjalë është zbuluar në vitin 1947 nga arkeologu Vangjel Toçi dhe pas konservimit të tij, ai ka qëndruar për shumë vite i mbuluar me rërë. Në fund të viteve ‘80, mozaiku është rihapur nga arkeologu Moikom Zeqo, i cili ka kryer dokumentimin dhe mbulimin e tij.

Mozaiku ndodhet 2.5m nën trotuarin e rrugës Kasem Durrësi, me një sipërfaqje rreth 50m2.

Mozaiku është punuar me teknikën bardh e zi dhe paraqet katër skena me motive nga mitologjia të punuar me gurë kubik të zinj në sfond të bardh. Hipokampi (kal deti me bisht peshku), erosi me delfin si dhe triton me krahë të hapur. Mozaiku ka zbukuruar dyshemenë e një godine luksoze të shek. i pas Krishtit.

Drejtoria Rajonale e Kulturës Kombëtare Durrës, falë dokumentave arkivore dhe vizatimeve me detaje të mozaikut me Hipokamp (kal deti me bisht peshku), ka nisur punën për riprodhimin e mozaikut për ta ekspozuar në ambjentet e Muzeut Arkeologjik Durrës që vizitorët të njohin vlerat e këtij mozaiku.

Ky riprodhim po kryhet nga skulptori Qazim Kërtusha (restaurator pranë DRKK Durrës) dhe restauratori Ivo Moja.

Vendin se ku do të ekspozohet ky mozaik do të shqyrtohet për vendimmarrje në Komisionin Shtetëror të Muzeve./ KultPlus.com