Fillon rinovimi i teatrit ‘Dodona’

Pas plotësimit të trupës rezidente të aktorëve, tashmë ka filluar edhe rinovimi i objektit të teatrit ‘Dodona’.

Përmes një postimi në Facebook, drejtori i Kulturës në Komunën e Prishtinës, Adrian Berisha, ka njoftuar se sot kanë inspektuar për së afërmi punimet, ku pas këtij rinovimi dyert e teatrit do të happen për aktivitetet e shumta që i presin, shkruan KultPlus.

Postimi i plotë:

Per Teatrin DODONA po nis nje etape e re 🎭

Plotesimi i trupes rezidente te aktoreve te Teatrit “Dodona” ishte vetem fillimi i nje nisme te re per teatrin e qytetit.

Tashme kemi fillu edhe renovimin e “Dodones” ne menyre qe viti i ri sezonal 2021/2022 te na gjeje ne kushte me te mira.

Sot bashke me Visar Krusha kemi inspektu per se afermi punimet qe jane duke u bere dhe jemi te lumtur qe pas ketij renovimi dyert e teatrit do te hapen per shume aktivitete dhe presim qe prodhimi te shtohet e publiku te shijoje sa me shume shfaqje.

Gjithashtu, gjate muajit shtator do te hapim thirrjen per subvencionimin e shfaqjeve teatrale te cilat do te mbahen ne Teatrin e Qytetit “DODONA”.

“DODONA” e meriton te kthehet ne piken ku ka qene dhe te fitoj lavdine e dikurshme./KultPlus.com

Pesë aktorë të rinjë i shtohen trupës rezidente të Teatrit “Dodona”

Pas konkursit të hapur nga Drejtoria për Kulturë në Komunën e Prishtinës për pranimin e pesë aktorëve të rinjë në teatrin ‘Dodona’, sot janë shpallur rezultatet, përcjellë KultPlus.

Drejtori i Drejtorisë së Kulturës në Komunën e Prishtinës, Adrian Berisha ka njoftuar se sot bashkë me drejtorin e Teatrit të Qytetit “Dodona”, Visar Krusha, kanë mirëpritur pesë (5) aktorët e përzgjedhur për trupën rezidentet të Teatrit “Dodona” të cilët njëherit kanë nënshkruar kontratat e tyre.

Aktorët e përzgjedhur nga konkursi janë: Molikë Maxhuni, Arta Lahu, Vjosë Tasholli, Leonit Maloku, Ermal Sadiku.

Teatri Dodona deri më tani ka funksionuar vetëm me katër aktorë rezident, kurse nga sot numri i përgjithshëm i aktorëve rezident do të jetë nëntë (9).

Drejtori i Drejtorisë së Kulturës në Komunën e Prishtinës, Adrian Berisha gjithashtu është shprehur se po synojnë që ky numër të plotësohet në të ardhmen dhe trupa rezidente e Teatrit të Qytetit të Prishtinës të jetë në minimum me njëzetë (20) aktorë rezidentë. / KultPlus.com

‘Ditëlindja’ që shpërfaqi ‘çlirimin’ nga dashuria e madhe familjare që shpie deri në viktimizim

Suada Qorraj

Në ditëlindjen e 25-të të Denisit, nëna e tij sikurse në çdo ditëlindje tjetër, fillon përgatitjet për festë. Denisi që kohë më parë mund të ecte ngadalë, tashmë karrocën e ka mik të përjetshëm. Kurse nëna e tij jeton mes dhimbjeve dhe tendencës për të mohuar realitetin.

Pjesë e familjes ishte edhe gjyshja që jetonte në dy dimensione të ndryshme, të shkuarën dhe të ardhmen, por e plotë në asnjërën prej tyre. Mes harresës dhe kujtimeve që nuk ekzistojnë, për njerëz që kurrë s’kanë jetuar. Një motër që më shumë se kurrë i duhet një nënë për takimin e saj të parë, dashurisë, por mbi të gjitha këshillat mbi të cilat ndërtohet e ardhmja drejt së panjohurës, dashurisë së pafaj. Një baba që nuk duket e nuk flet kurrë, një gjysh që jeton më një këmbë mbi varr. Por, dhe një teze, që njëlloj sikurse nëna, jeton në vetëmohim të realitetit që e rrethon. Një mike, dashuria e së cilës shkon përtej miqësisë. E në mes të kësaj, djali i ditëlindjes, Denisi, i rrethuar mes dashurisë e kujdesit të madh, duke e izoluar kështu edhe më tepër.

Ky rreth përbënte gjithë dramën që kishte ngërthyer shfaqja ‘Ditëlindja’, titulli origjinal i së cilës është ‘Djali im vetëm ecë pak më ngadalë’, e që mbrëmë u dha premierë në teatrin ‘Dodona’.

Përballja e tre brezave të ndryshëm të një familjeje që krahas zbulimit të vetvetes dhe ndjenjave të tyre, fillojnë të njohin njëri tjetrin, u shpalos në mënyrën më të mirë.

Pikërisht kjo ‘Ditëlindje’ nuk është nga ato të zakonshmet që përfundojnë me festë të madhe e të lumtur. Kjo ‘Ditëlindje’ na bënë të reflektojnë për realitetin në të cilin shumica prej nesh jetojnë, e njëkohësisht edhe gatishmërisë sonë për tu bërë një me të. E kjo dramë e shkruar nga autori korat, Ivor Martinić, u jetësua për publikun kosovar nga regjisorja, Iliriana Arifi dhe nën lojën e aktorëve si: Rebeka Qena, Labinot Raci, Igballe Qena, Bislim Muçaj, Sheqerie Buçaj, Florenta Bajraktari dhe Alketa Sylaj.

Në një prononcim për KultPlus, regjisorja pohoi se kishte mbetur e magjepsur kur e kishte lexuar tekstin për herë të parë dhe pikërisht këtu kishte filluar dhe jetësimi i kësaj drame.

Tutje Arifi ka shtuar se beson që është përcjellë mesazhi i shfaqjes sepse personazhet e kësaj shfaqjeje janë ata që shpërfaqin ‘çlirimin’ nga dashuria e madhe familjare.

“Shpresoj dhe besoj fuqishëm që është pranuar mesazhi që kemi dashur ta përcjellim për shkak se nuk është veç personazhi i Denisit ai që sjell një mesazh, një lloj ‘çlirimi’ banal nga dashuria e madhe familjare që e rrethon sepse fundja duhet një çlirim i tillë për të vazhduar jetën dhe ta pranosh atë ashtu siç është” , ka thënë ajo.

Regjisorja mes të tjerash thekson se shfaqja sjellë dashurinë e pakusht të nënës ndaj fëmijës, dhimbjen dhe dilemat që e shoqërojnë atë, por mbi të gjitha shkëputjen që duhet të ndodhë mes fëmijës, që tashmë është rritur dhe kujdesit të tepruar të nënës.

“Është përballja e saj me realitetin, shkëputja e saj ndaj djalit, ajo rruga e qumështit që ndodhë mes fëmijës dhe nënës kur arrijnë në një moshë të pjekur. Këta është dashur ta bëjnë një shkëputje në të cilën djali veç se duhet të ndjehet i lirë, por të njëjtën kohë edhe nëna duhet të çlirohet nga ndjenja e kujdesit të tepruar ndaj fëmijës”, shtoi ajo.

Sipas saj dashuria e tepruar ndaj fëmijës, në këtë rast Denisit, fillon ta viktimizoj atë. Ndonëse një dashuri e tillë duhet të ekzistojë, nëna duhet ta kuptojë se duhet të tërhiqet dhe të lejoj fëmijën të jetoj i lirë.

‘Ditëlindja’, ngërtheu në vetvete emocione të përziera. Komedia dhe humori i zi që sillet aq mjeshtërisht nga aktorët të bënë të qeshësh e të qash në të njëjtën kohë. Të rikthen në situata që nëse jo krejtësisht të njëjta, përafërsia e tyre dikur është jetuar e përjetuar nga ana jote.

Portretizimi i tre brezave të ndryshëm shpërfaqë gjendjen e një familjeje tipike, e një shoqërie që jeton në mohim të realitetit.

Denisi, djali që feston 25 vjetorin e tij të lindjes, tashmë në karrocë, dikur ishte një fëmijë që vraponte, e më vonë një i rritur që lëvizte me paterica, erdhi mjeshtërisht natën e mbrëmshme nën lojën e aktorit, Labinot Raci.

Për Racin, portretizimi i këtij roli krahas punës dhe lojës që duhet bërë me karrocë ka qenë edhe një ngarkesë e ka sjell emocione të përziera gjatë tërë kohës. Sipas tij ‘Ditëlindja’ tregon një realitet të hidhur të shoqërisë tonë për faktin se kujdesi dhe vetëmohimi i tyre i bënë personazhet, sikurse ai i Denisit, të ndihen keq.

“Realiteti është i hidhur për të gjithë, jo për pjesën pse dikush është invalid dhe është në karrocë, por për pjesën se sa mund ta pranoj shoqëria jonë e sidomos familja. Ata pa dashur, me mendimin që të ju ndihmojnë e të kujdesen për ta, i bëjnë të ndihen keq”, tha për KultPlus aktori.

Tutje ai ka shtuar se ndjesia shpirtërore e gjithsecilit, dashuria që japim për njëri tjetrin në cilëndo situatë që ndodhemi është vetëm një nga mesazhet që përcjellë kjo shfaqje. Por, e bukura e kësaj shfaqjeje nuk ndalet këtu. Regjisorja Iliriana Arifi bëri bashkë në skenën e teatrit anëtarë të familjes që lanë gjurmë në artin dhe kulturën e vendit tonë. Ajo për herë të parë solli përballë publikut në një skenë e shfaqje të vetme, nënë e bijë, Igballe e Rebeka Qenën. Madje edhe në shfaqje ato portretizojnë nënën dhe të bijën. “Ka 50 vite që kam ëndërruar me qenë në skenë me vajzën – është një ndjesi shumë e veçantë, normal edhe afërsia si vajzë – nanë, por edhe si kolege. Ndonjëherë kemi kritiku njëra tjetrën, e herë të tjera kemi përkrah njëra tjetrën”, tha Igballe Qena për KultPlus, teksa shpjegonte ndjesinë e të qenurit për herë të parë në një skenë me të bijën.

Për Qenën e cila në shfaqje pati rolin e Anës, gjyshes së Denisit, e cila mes harresës së saj, jeton me familjen e vajzës, nënës së Denisit, përshtatja me këtë personazh nuk ishte aq e vështirë.

“Rol shumë delikat, por gjatë procesit të punës jam ndjerë shumë rehat, gjithashtu edhe me rolin”, pohoi ajo. Tutje tregoi se momentet që përjetohen përmes këtij roli janë të pandashme, por po aq të bukura dhe me peshë në vete.

“S’mund ti ndash se secila e ka atë peshën në vete, e bukura është kontakti me nipin që është i veçantë sepse gjithmonë gjyshërit kanë afërsi me nipa dhe mbesa dhe i ndajnë sekretet së bashku më shumë sesa me fëmijët e tyre. Brenda një dite ka ngjare ku shihet situata e një familjeje, secili moment është i veçantë dhe i bukur”, shtoi Igballe Qena.

Kurse për aktoren Rebeka Qena, realizimi i kësaj shfaqjeje ka qenë një punë interesante dhe intensive e përcjellë gjatë tërë kohës me harmoni. Ajo ka potencuar se shfaqja sjellë një realitet që ekziston në mesin tonë e që shumë shpesh mohohet.

“Flet për atë se çka do të thotë të jesh ndryshe dhe çka do të thotë kur nuk të pranojnë dhe sa e vështirë është dhe për veten ta pranosh pse je ndryshe, por njëkohësisht edhe sa ju dhemb kjo njerëzve përreth teje. Pikërisht këtu më lindin pikëpyetjet për mënyrën se si ne në rrugë diskriminojmë të tjerët që ballafaqohen çdo ditë me sfidat dhe problemet e veta. Në një formë është një porosi që të dashurohemi dhe të jetojmë jetën duke ndjerë momentin”, potencoi Rebeka Qena për KultPlus.

Pjesë e familjes ku problemet sa janë të dukshme prapë vazhdojnë të mbahen në vete, është edhe tezja e Denisit, gruaja që njëlloj sikurse motra e saj jeton në mohim të realitetit, ngase vetëm atëherë kur ulet në tavolinë mes rrëfimeve të së vërtetës gjen forcën të tregoj se i biri i saj është homoseksual. Pikërisht rolin e kësaj gruaje nën ndikim të përhershëm të tabletave dhe kërkimit të dashurisë, e jetësoj mbrëmë aktorja Sheqerie Buçaj.

Për KultPlus aktorja pohoi se jo vetëm roli i saj, por të gjitha personazhet së bashku nëpërmjet humorit të zi zbërthejnë një realitet të një jete në probleme dhe dashurisë së munguar.

“Mesazhi i shfaqjes është një rreth që jemi duke e bërë e gjithë bota, të gjithë njerëzit janë duke u përballur me problemet e veta e që nuk merret me të tjerët dhe s’ka dashuri”, përfundoi ajo.

Shfaqja ‘Ditëlindja’ – (Djali im vetëm ecë pak më ngadalë), publikun e teatrit ‘Dodona’ që për rreth një orë e gjysmë i dhuroi lot e të qeshura, e ngriti në këmbë për të dhuruar një duartrokitje të madhe e disa minutëshe. Por, kritikat e mira për këtë shfaqje nuk përfunduan brenda dyerve të këtij teatri. Dramaturgu, Jeton Neziraj, në një postim në Facebbok përgëzoi regjisoren dhe aktorët për pasionin, punën e ndjeshmërinë që përcollën përmes shfaqjes.

“Urime ekipit e teatrit Dodona për këtë shfaqje t ‘shkëlqyeshme! Bravo, Iliriana Arifi, për ndjeshmërinë, pasionin e punën me kaq përkushtim! Bravo aktorëve që na kanë mahnitë: Sheqerie Buqaj, Igballe Qena, Rebeka Qena, Alketa Sylaj, Labinot Raci, Bislim Muçaj e Florenta Bajraktari. Për publikun: shkoni e shiheni, kurdo qe ju jepet rasti, ia vlen, 1 milion herë!”, shkroi ai.

Ju kujtojmë që repriza do të shfaqet sonte në teatrin ‘Dodona’ me fillim nga ora 19:30. / KultPlus.com

‘Ditëlindja’ dhe ‘Gogoli’, shfaqje premierë në Dodonë

Përgjatë muajit qershor në Teatrin Dodona do të jepen dy premiera, shkruan KultPlus.

Më 8 qershor me fillim nga ora 19:30 do të jepet premiera e shfaqjes “Ditëlindja” nga Ivo Martinić, në regji të Ilirjana Arifit, në skenën e mbrëmjes.

Kurse më 19 qershor me fillim nga ora 12:00 do të jepet premiera e shfaqjes “Gogoli” nga Arian Krasniqi, në regji të Mentor Berishës në teatrin për fëmijë./ KultPlus.com

Hapet konkursi për 5 aktorë të rinjë në Teatrin Dodona, Berisha: Synojmë që numri i aktorëve rezident të arrijë në 20

Drejtoria për Kulturë në Komunën e Prishtinës ka hapur konkurs për pranimin e pesë aktorëve të rinjë në teatrin ‘Dodona’, shkruan KultPlus.

Teatri Dodona deri më tash ka pasur vetëm katër aktorë rezident, kurse pas këtij konkursi numri i përgjithshëm i aktorëve rezident do të arrij në nëntë.

Në një postim në Facebook drejtori për kulturë në Komunën e Prishtinës, Adrian Berisha ka shkruar se synojnë që këtë numër ta plotësojnë të ardhmen me së paku njëzet aktorë.

“Edhe pse me keta numra trupa rezidente e Teatrit te Qytetit Dodona do te arrije ne nente (9), ne do te synojme qe ky numer te plotesohet ne te ardhmen dhe trupa rezidente e teatrit te qytetit te Prishtines te jete me minimum njezet (20) aktore”, ka shkruar ai,

Ndërkaq në konkursin e hapur nga aplikantët kërkohet që të kenë njohuri në fushën përkatëse të punës të fituar përmes arsimit universitar, të ketë aftësi në zgjidhjen e problemeve për çështjet teknike që dalin nga procesi i punës, të njohë gjuhën shqipe në nivel të shkëlqyer në të shkruar dhe lexuar, e domosdoshme dhe gjuhët tjera zyrtare, si dhe diplomën universitare në aktrim me së paku dy vite përvojë pune të dëshmuar.

Konkursi do të jetë i hapur që nga data 22.04.2021 deri më 06.05.2021./ KultPlus.com

https://prishtinaonline.com/uploads/konkurs_-_shqip-_aktor.pdf?fbclid=IwAR0vBTyq4aqpEdqpWGX-QGWh1g5GDuJ-pgg_SxfU6xrLugkFWuLDRJY-qFQ

Shfaqja për fëmijë ‘Mik-Mik’ përsëri në teatrin ‘Dodona’

Në Teatrin “Dodona” po bëhen përgatitjet e shfaqjes për fëmijë  “Mik-Mik, e cila do të  shfaqet përsëri me datën 27.02.2021 dhe 28.02.2021, përcjell KultPlus.

Shfaqja është realizuar nën regjinë dhe skenarin e Kaltërim Balajt.

Në shfaqje do të luajnë Bashkim Ramadani dhe Rifat Smani,  ndërsa skenografia dhe kostumografia është  bërë  nga Vesa Bunjaku dhe muzika nga Memli Kelmendi.

Shfaqja “Mik-Mik”, flet për ujkun e  stepave, Kojoti, është shumë i uritur dhe dëshiron ta gjuajë zogun që vrapon, Mik-mik, përmes kurtheve dhe truqeve që Kojoti i shpikë, por fatkeqësisht për të, Mik-miku iu ikë pa problem kurtheve të Kojotit, ndërsa Kojoti bie në kurthet që i ka vendosur vetë.

Në këtë aventurë të ndjekjes dhe ikjes në mes tyre, ata e krijojnë një lloj miqësie dhe duket sikur nuk munden të rrinë pa njëri tjetrin. Kjo aventurë e re dhe e bukur për më të vegjlit, është me motive nga filmi i animuar “Roadrunner” dhe i dedikohet fëmijëve të moshave 3+. / KultPlus.com

Shfaqja “Teo, qeni i rrugës” vjen premierë në teatrin “Dodona”

Teatri “Dodona” do t’i hapë dyert për t’i falur momente të bukura fëmijëve nëpërmjet shfaqjes premierë “Teo, qeni i rrugës” për dy ditë me radhë, shkruan KultPlus.

Në shfaqjen “Teo, qeni i rrugës” me regji të Elhame Kutllovcit, shikuesit do të kenë rastin të shohin një rrëfim artistik për një qen që jeton në rrugë dhe të cilin tenton ta marr protagonisti, Lumi.

Teo është një qenush i vogël që jeton rrugëve i vetmuar dhe kërkon ushqim dhe dashuri. Lumi dëshiron ta ketë një qen, por nëna e tij nuk i do qentë në shtëpi. Lumi dhe Teo takohen dhe krijojnë miqësi, por miqësia e tyre hasë në vështirësi, pasi që shumë njerëz përreth tyre nuk janë dashamirë të qenve ashtu siç është Lumi.

Rrëfimi është i bazuar në librin “Teo, qeni i rrugës” me ilustrime nga Tiziano Beber dhe storie nga Sara Carlin. Ndërkaq aktorët të cilët do të jetësojnë rolet në këtë shfaqje janë: Drin Lumi, Edon Shileku dhe Vjosë Tasholli.

Fëmijët do të kenë rastin të zënë vendet e tyre në ulëset e Teatrit “Dodona” më 21 nëntor duke filluar nga ora 12:00 dhe një ditë pas, më 22 nëntor duke filluar nga ora 12:40.

Shfaqja “Teo, qeni i rrugës” është mbështetur nga Komuna e Prishtinës. /KultPlus.com

Teatri ‘Dodona’ hapë dyert me premierën e shfaqjes për fëmijë ‘Mik – Mik’

Teatri ‘Dodona’ ka hapur dyert për shikuesit pas mbylljes që nga fillimi i pandemisë, me premierën e shfaqjes për fëmijë “Mik – Mik”, shkruan KultPlus.

Lajmi është bërë i ditur nga ana e kryetarit të komunës së Prishtinës, Shpend Ahmeti, i cili nëpërmjet një postimi në Facebook ka bërë të ditur se përgjatë këtij muaji krahas kësaj shfaqje do të jepen edhe shumë të tjera, por me respektimin e masave kundër virusit.

“Pas një kohë të gjatë, Teatri i Qytetit “DODONA” hapi dyert e veta per shikuesit me premierën e shfaqjës për fëmijë “Mik-Mik”. Në Teatrin e Qytetit “DODONA” përgjatë muajit tetor do të mund të shihni edhe shfaqje të tjera duke respektuar të gjitha udhëzimet për masat mbrojtëse kundër Covid-19.”, ka shkruar Ahmeti.

Më poshtë mund të lexoni statusin e tij të plotë:

Pas një kohë të gjatë, Teatri i Qytetit “DODONA” hapi dyert e veta per shikuesit me premierën e shfaqjës për fëmijë “Mik-Mik”.

Shfaqja “Mik-Mik” vjen me skenar e regji nga Kaltrim Balaj e skenografi e kostumografi nga Vesa Bunjaku.

Në Teatrin e Qytetit “DODONA” përgjatë muajit tetor do të mund të shihni edhe shfaqje të tjera duke respektuar të gjitha udhëzimet për masat mbrojtëse kundër Covid-19.

Bashkë do ta tejkalojmë këtë situatë të re në teatër dhe ta shijojmë e mbajmë gjallë magjinë e teatrit edhe në këto kohëra të vështira për të gjithë!

Ju faleminderit për mirëkuptimin dhe ju mirëpresim!/ KultPlus.com

Pas një kohë të gjatë, Teatri i Qytetit "DODONA" hapi dyert e veta per shikuesit me premierën e shfaqjës për fëmijë…

Gepostet von Shpend Ahmeti am Samstag, 17. Oktober 2020

Teatri ‘Dodona’ publikon programin e shfaqjeve për muajin tetor

Teatri ‘Dodona’ do të filloj të jap shfaqje për fëmijë çdo të shtunë dhe të dielë me vetëm një termin, atë të orës 12:00, shkruan KultPlus.

Lajmi është bërë i ditur nga drejtoresha për kulturë në Komunën e Prishtinës, Blerta Basholli, e cila në Facebook ka publikuar rregullat të cilat duhen respektuar gjatë kësaj kohe.

Më poshtë mund të lexoni statusin e saj të plotë:

Jemi shumë të lumtur që po e publikojmë programin e shfaqjeve që do të jepen gjatë muajit tetor. Për të pasur një koordinim sa më të mirë me publikun në menaxhimin e pandemisë, ju njoftojmë për masat për parandalimin e COVID-19 që duhet të respektohen në teatër, si dhe rregullat e reja që kanë dalur konfrom këtyre masave, si në vijim:

1. Shfaqjet për fëmijë në skenën TEATRI PËR FËMIJË do të jepen të shtunën dhe të dielën, me vetëm nga një termin, dhe atë prej orës 12:00;

2. Biletat mund blihen çdo ditë pune (e hënë-e premte), prej orës 12:00 – 15:00, në sportelin e biletave në Teatrin Dodona, kurse rezervimet mund të bëhen vetëm përmes telefonit 038-230-623 në të njëjtin orar. Në ditët kur ka shfaqje për fëmijë, të shtunën dhe të dielën, nuk mund të bëhen rezervime dhe biletat do të shiten vetëm për ata që i kanë rezervuar ato ditëve të javës. Për shfaqjet në SKENËN e MBRËMJES, biletat mund të blihen edhe në ditët kur ka shfaqje. Numri i ulëseve për të gjtha shfaqjet është i kufizuar;

3. Të gjithë personave që futen në teatër do t’u matet temperatura në hyrje të teatrit;

4. Bartja e maskës në të gjitha hapësirat e teatrit është obligative për të gjithë të rriturit dhe fëmijët prej moshës 6 vjeçare;

5. Respektimi i distancës së paku 1.5m është obligativ;

6. Nuk lejohet qëndrimi në foajenë e teatrit para hapjes së dyerve të sallës së teatrit për shfaqje; Publiku do të fillojë të hyjë në sallë gjysëm ore para fillimit të shfaqjes;

Ju faleminderit për mirëkuptim! Mbesim me shpresën se do të na ndihmoni që ta tejkalojmë së bashku këtë situatë të re në teatër dhe ta shijojmë dhe mbajmë gjallë magjinë e teatrit edhe në këto kohëra të vështira për të gjithë! Ju mirëpresim!/ KultPlus.com

Jemi shumë të lumtur që po e publikojmë programin e shfaqjeve që do të jepen gjatë muajit tetor. Për të pasur një…

Gepostet von Blerta Basholli am Montag, 12. Oktober 2020

Ahmeti: Në buxhetin e vitit 2021, do të bëjmë rregullime të brendshme për të lejuar më shumë pozita për trupë rezidente të Teatrit ‘Dodona’

Mungesa e trupës rezidente në Teatrin ‘Dodona’, mosrespektimi i ligjit për teatrin, si dhe vonesat që tash e disa vite po bëhen nga Komuna e Prishtinës në lidhje me këtë teatër, ka shtyrë aktorët e Prishtinës drejt protestës për aprovimin e kërkesës së tyre.

Ndërkaq sot, ka reaguar edhe Shpend Ahmeti në lidhje me këtë çështje, përmes një statusi në rrjetin social Facebook.

Më poshtë keni statusin e plotë të Ahmetit

Këto ditë kam marr disa mesazhe nga aktorët për Teatrin e Qytetit. Ata kanë të drejtë.

Është totalisht e pakuptueshme se si të gjitha qytetet e mëdha në Kosovë kanë trupa rezidente dhe teatro të qytetit ndërsa Prishtina duhet të harrnohet me gjysëm pagesa vit për vit në Dodonë.

Problemi është i thjeshtë. Ne kemi buxhet, ne nuk po kërkojmë asgjë nga niveli qëndror, përpos të na lejojnë numër shtesë të punësuarve në Dodona.

Për këtë kam dërguar disa shkresa në Ministri të Financave.
Çdo buxhet i Kosovës për çdo institucion të Kosovës e ka të caktuar buxhetin per Paga, NUMRIN e punëtorëve në çdo departament dhe këto nuk na lejojnë ti lëvizim.

Sivjet na kanë lejuar 5 vende shtesë por kjo nuk mjafton për trupë rezidente. Nuk duam gjysmë zgjidhje.

Në takimin që kam patur me Ministren e Financave, Hykmete Bajrami dhe Zv Ministrin Agim Krasniqi para një muaji, prapë na është thënë e njejta gjë.

Megjithatë, ne kemi vendosur të bëjmë lëvizje të brendshme. Në buxhetin e vitit 2021, pra prej janarit do të bëjmë rregullime të brendshme për të lejuar më shumë pozita për trupë rezidente të Prishtinës. Synimi është 20 artistë rezidentë.

Konkursin do ta bëjmë të hapur dhe transparent. Titullin e artistit rezident do ta bëjmë pozitë të arritshme për artistët ndër më të mirët’, ka shkruar Ahmeti. / KultPlus.com

Protestojnë aktorët, Maxhuni: Nëse nuk na plotësoni kërkesat, atëherë mos u krenohuni me neve

Fishkëllima e filikaqave të tyre dëgjohej shumë larg, teksa në duar mbanin pankarta që shkruhej “#përteatrindodona”. Mos realizimi i kërkesave për shtimin e numrit të aktorëve në Teatrin Dodona, i bëri grupin e aktorëve të Prishtinës të protestojnë përpara Komunës së Prishtinës, shkruan KultPlus.

Aktorët e Prishtinës u bashkuan për të shprehur indinjatën e tyre ndaj Komunës për mos realizimin e kërkesave të tyre që 2 vite për krijimin e një trupe rezidente në Teatrin Dodona, në të cilën kryejnë punën e tyre vetëm 4 aktorë.

Ky numër i ulët i aktorëve është edhe kundër ligjit për Teatro në të cilin thuhet: “Teatrot profesioniste të qyteteve duhet të kenë ansambël artistik, rezident, të përbërë nga së paku njëzetë(20) aktorë cilësorë të të gjitha gjeneratave”.

Molika Maxhuni, njëra ndër aktoret pjesëmarrëse, në protestë është shprehur se mirësjellja e tyre i ka bërë që ata sot të jenë në këtë gjendje.

“Ne jemi gjithmonë bira e fundit e kavallit. Kjo nuk është mirë për secilin këtu që jemi. Kur po vie puna të krenohet një shtet, përfaqësuesit më të mëdhenj ose ambasadorët po janë artistët dhe sportistët. Atëherë le të themi mos u krenohuni me neve!”, u shpreh Maxhuni.

Në anën tjetër, Leonit Maloku tha se aktorët kanë hasur në vesh të shurdhër që 2 vite te Kryetari i Komunës dhe te Drejtoria për Kulturë, Rini dhe Sport.

“Po shpresoj që Komuna do të reflektoj dhe tash para se ta votojnë buxhetin do të propozojnë që të bëhet audicioni për shtimin e numrit të aktorëve në ‘Dodonë’ dhe të punësohen aktorët e Prishtinës”.

 Ilir Prapashtica, një aktor tjetër i qytetit të Prishtinës, duke thënë se kësaj here nuk do të flasin shumë.

“Sipas informatave të cilat i kemi Komuna e Prishtinës do ta hap një konkurs prej 5 aktorëve, që ajo është e papranueshme për ne si grup i aktorëve të Prishtinës për arsye se 5 aktorë në teatrin e qytetit është për të bërë hajgare”. Veç të tjerash, përgjatë protestës u përmend edhe një deklaratë nga Ministria e Financave se Teatri Dodona i ka 17 të punësuar. Aktorët u shprehën se është për keqardhje funksionimi i tillë i teatrit përderisa 13 prej tyre janë staf teknik dhe vetëm 4 aktorë. Grupi i aktorëve të Prishtinës vazhduan protestën e tyre me duartrokitje dhe brohoritje “bravo” në shenjë revolte ndaj Komunës. Për fund ata në shkallët hyrëse të objektit lanë pankartat e tyre me mbishkrimet “#përteatrindodona”. / Medina Pasoma/ KultPlus.com

Maloku: Për Komunën e Prishtinës, aktorët janë ‘bira e fundit e kavallit’

Suada Qorraj

Dikur Teatri i Faruk Begollit, vendi ku aktrimi i jepte jetë publikut edhe vetë sallës, sot ballafaqohet me probleme të shumta, duke u nisë prej atyre bazike, mungesës së aktorëve rezident.

Aktorë të shumtë kanë kërkuar prej Komunës së Prishtinës të jenë pjesë e ansamblit rezident të Teatrit “Dodona”,  për të pasuar me konferencë për medie, e kërkesë që tashmë po del edhe në rrugë, pasi që, një grup i aktorëve kanë paralajmëruar edhe protestë që pritet të organizohet nesër.

Një iniciativë që kishte filluar dy vite më parë, nga aktorët e kryeqytetit ende nuk ka gjetur zgjidhje. Është fjala për shtimin e numri të aktorëve rezident në Teatrin ‘Dodona’, nga katër sa janë tani, në 20, sa e kërkon edhe ligji për teatro në Republikën e Kosovës.

Në një intervistë për KultPlus, Leonit Maloku, një nga përfaqësuesit e komuniteti të aktorëve të Prishtinës ka treguar se që kur kanë filluar të ngrisin zërin për këtë çështje dy vite më parë, ende nuk kanë marrë ndonjë përgjigje definitive nga ana e Komunës së Prishtinës.

Sipas tij, ishte reagimi i kryetarit të Komunës, Shpend Ahmeti, pas rrëzimit të Teatrit të Shqipërisë, ajo çka i nxiti edhe më shumë komunitetin e aktorëve që të reagojnë për këtë çështje, por edhe premtimet e kryetarit që së bashku të gjejnë një zgjidhje.

“Pasi kryetari i Komunës, Shpend Ahmeti, bëri një status duke shprehur keqardhjen e tij për rrëzimin e Teatrit Kombëtar në Shqipëri, unë i reagova me anë të një komenti duke e pyetur se çka ka bërë për komunën tonë, menjëherë pas kësaj ishte vetë kryetari ai që më kontaktoi dhe tha që të punojmë së bashku në mënyrë që të qojmë përpara kërkesën tuaj. Mirëpo që nga ajo kohë takimet dhe mesazhet me kryetarin kanë qenë të pamundura”, ka thënë Maloku.

Maloku tregon se që nga koha kur është mbajtur konferenca me gazetarë në gusht të këtij viti, Komuna nuk i ka njoftuar lidhur me vendimet që janë marrë së bashku me Ministrinë e Financave.

Përfaqësuesi i komunitetit të aktorëve të Prishtinës, ka vetëm një hall, votimin e buxhetit nga ana e asamblesë komunale gjatë ditës së nesërme. Sipas tij në qoftë se nuk ndahet buxheti përkitazi me kërkesat e tyre atëherë teatri ‘Dodona’ do mbes edhe një vit tjetër me vetëm katër aktorë të punësuar.

“Ne kemi bërë kërkesa për shtimin e 16 aktorëve rezidentë në teatrin ‘Dodona’ përpara votimit të buxhetit në asamblenë komunale, sepse në qoftë se nuk aprovohen kërkesat tona atëherë teatri do të mbetet ashtu siç është, me vetëm 4 aktorë, edhe për një vit tjetër”, ka shtuar ai.

Leonit Maloku thotë se për Ministrinë e Financave, të punësuarit janë vetëm numra, ata shohin 17 të punësuar, por nuk e marrin në konsideratë faktin që teatri ka vetëm katër aktorë. Sipas tij janë aktorët atë që e bëjnë teatrin.

“Ministria e Financave të punësuarit i nuk i sheh ndryshe vetëm si numra të punësuar. Dodona ka 17 të punësuar, ka teknik, ka rojtar, ka biletashitës, ka ndriçues dhe vetëm katër aktorë. Por teatri nuk mund të bëhet pa aktorë, sado të nevojshëm dhe të domosdoshëm që janë pjesa tjetër e stafit, aktorët janë të pazëvendësueshëm”, ka pohuar ai.

Aktori ka thënë se Ministria po synon që të punësoj vetëm edhe 5 aktorë, e që sipas tij nuk janë të mjaftueshëm, madje në kundërshtim me ligjin për teatrot. Ai ka potencuar se Prishtina si kryeqytet ka nevojë për më shumë aktorë, sesa cilido teatër në vend.

Maloku ka shtuar se pas konferencës ata kanë menduar edhe organizimin e një proteste. Duke mos dashur të shpalosë shumë detaje rreth saj, ai ka bërë të ditur se nesër në orën 12:00 përballë Komunës së Prishtinës, komuniteti i aktorëve do të organizojë protestë, për të plotësuar kështu edhe kërkesat e tyre.

“Ne pas konferencës hapin tjetër e kemi menduar protestën dhe tash do dalim në protestë nesër në orën 12:00 para Komunës. Kurse me kohë do të mendojmë se cili do të jetë hapi tjetër që do ndërmarrim edhe pse realisht nuk di ndonjë formë tjetër që mund të kryej punë më mirë se protesta”, ka thënë Maloku.

Krejt në fund Leonit Maloku ka thënë se për komunën komuniteti i aktorëve deri më tani ka qenë ‘bira e fundit e kavallit’.

“Siç duket për komunën ne artistët jemi bira e fundit e kavallit, kështu do të mund të thoja, sepse për komunën çdo gjë po ecë edhe pa komunitetin kulturor”, ka përfunduar Maloku./ KultPlus.com

Komuna e Prishtinës hap thirrje për mbështetje financiare për shfaqjet e teatrit ‘Dodona’

Drejtoria për Kulturë në kuadër të Komunës së Prishtinës ka hapur thirrjen publike për mbështetje financiare të projektpropozimeve për shfaqjet e repertorit të Teatrit “Dodona”, shkruan KultPlus.

Kategoritë me të cilat mund të aplikojnë përfshijnë: komedinë, dramën, solo performancën dhe shfaqjen për fëmijë.

 Afati i fundit për aplikim është 30 shtator 2020. https://prishtinaonline.com/uploads/g.d_2-thirrja_per_subvencione_dodona_2020_.pdf

Shatrolli i drejtohet Ahmetit: Në emër të brezit të babait tuaj, kërkojmë të plotësohet trupa rezidente e Teatrit ‘Dodona’

Teatrit “Dodona” tash e njëzet vite i mungon trupa e qëndrueshme rezidente e aktorëve. Numri i aktorëve të punësuar në këtë teatër është shumë i vogël. Tash e një kohë ky teatër funksionon vetëm më pesë aktorë. Mungesa e një trupe rezidente më e madhe në këtë teatër ka ngjallur pakënaqësi në komunitetin e aktorëve të Kosovës, shkruan KultPlus.

Dramaturgu Naser Shatrolli i ka bërë ftesë publike kryetarit të komunës së Prishtinës, Shpend Ahmetit që të dal në një vendim final, në të mirën e aktorëve dhe teatrit “Dodona”. Ai këtë thirrje e ka bërë edhe në emër të brezit të aktorit të njohur Ali Ahmeti, që njëkohësisht është edhe babai i ndjerë i Kryetarit të Prishtinës.

Sipas tij skena ku Faruk Begolli i dha kuptim jetik teatrit, ishte kumti më i madh për artin në kohën sa ishim të okupuar. Prandaj edhe sot Teatrit Dodona – skenës së Faruk Begollit, i duhen aktorët e rinjë, ngase edhe vet teatri sot identifikohet me të.  

“I dashur Kryetar! Do te ishte feste e madhe nese do te krijohej nje trupë e qendrueshme artistike teatrore per Prishtinën ne teatrin “Dodona”. Andaj, ju beje ftese publike edhe ne emer te brezit te babait tuaj, aktorit tone te njohur, tashme i ndjer, Ali Ahmeti, me te cilin me ka ra shorti qe te luaja me te ne teater dhe te Kafeneja jone. Te lutem merr guximin dhe dil me nje verdiktim final, duke rezonuar pro kerkeses se kesaj trupe dhe ketij komuniteti teatror, qe sot ata i duhen si asnje moment tjeter skenes se Faruk Begollit – Dodona gjersa identifikohet edhe me emrin e tij”, ka reaguar Shatrolli nëpërmjet një postimi në Facebook.

Reagimi i Shatrollit ka ardhur si mbështetje e komitetit të aktorëve të Prishtinës të cilët në mëngjesin e sotëm kanë mbajtur një konferencë për media. Gjatë kësaj konference ata kanë kërkuar që numri i aktorëve të punësuar në Teatrin “Dodona” të rritet minimalisht në 10 ashtu siç ligji e kërkon, dhe jo vetëm në pesë ashtu siç operon tash e sa vite. Gjithashtu gjatë kësaj konference është thënë se do të shqyrtohet edhe mundësia e realizimit të protestave para objektit të Komunës së Prishtinës. / KultPlus.com

Aktorët paralajmërojnë protesta nëse trupa rezidente e teatrit ‘Dodona’ nuk plotësohet

Suada Qorraj

Mungesa e trupës rezidente në Teatrin ‘Dodona’, mosrespektimi i ligjit për teatrin, si dhe vonesat që tash e disa vite po bëhen nga Komuna e Prishtinës në lidhje me këtë teatër, ka shtyrë aktorët e Prishtinës që mëngjesin e ditës së sotme të mbajnë konferencë për media, shkruan KultPlus.

Gjatë kësaj konference aktorët kanë paralajmëruar se do të mbajnë edhe protesta mu përpara objektit të Komunës së Prishtinës, deri në realizimin e kërkesave të tyre.

 Leonit Maloku, pjesëtar i komunitetit të Aktorëve të Prishtinës ka thënë se Teatri ‘Dodona’ tashëm ka 15 vite që funksion vetëm me pesë aktorë dhe se ky teatër tash e një kohë nuk ka prodhuar shfaqje profesionale. Sipas tij kërkesa e aktorëve bazohet edhe në ligjet që rregullojë funksionimin e teatrove.

“Teatri ‘Dodona’ pothuajse që 15 vite funksionon vetëm me 5 aktorë dhe kryesisht prodhon vetëm shfaqje për fëmijë dhe nuk prodhon shfaqje profesionale për të rritur. Kërkesa jonë është bazuar në ligjin për teatrin pika nr. 7 nenin nr. 5, ku specifikisht thotë: Teatri i qytetit mund të ketë ansamblin rezident prej më sa paku 10 dhe më së shumti 20 aktorë”, është shprehur Maloku.

Maloku gjithashtu ka thënë se protesta me tenda, monologje dhe poezi do t’i gjejnë aktorët e Prishtinës në qoftë se kërkesat e tyre nuk realizohen. Ai ka shtuar se po të jetë e nevojshme ata edhe do flenë para objektit të komunës në mënyrë që t’ju tregojnë institucioneve se në çfarë pike ka mbërritur kultura në Kosovë.

“Nëse kërkesat tona nuk realizohen ne do të shkojmë në protesta do të vijmë këtu para komunës siç kemi ardhë sot, do hapim tenda, monologje e poezi, çka ju takon aktorëve, që kur të vijë Shpend Ahmeti, kryetar i komunës së Prishtinës t’na sheh neve duke fjetur këtu para komunës dhe të shoh se në çfarë gjendje e ka lënë kulturën në qytetin tonë”, ka deklaruar ai.

Ndërkaq aktori Ilir Prapashtica ka theksuar faktin se të gjithë aktorët e Prishtinës janë duke e kërkuar të drejtën e tyre, pasi që çdokush ka të drejtën e punës, e të protestës, prandaj dhe nuk do të ndalen deri sa kërkesat e tyre do të realizohen. / KultPlus.com

Sonte shfaqet ‘Eshtrat që vijnë vonë’, drama e njohur e Teki Dervishit

Sontë në orën 20:00, në formatin Livestream në faqen zyrtare të Teatrit Kombëtar në Facebook, shfaqet drama ‘Eshtrat që vijnë vonë’, shkruan KultPlus.

Me tekst të Teki Dervishit “Eshtrat që vijnë vonë” është realizuar me regji të regjisorit Martin Kocovski.

Fituese e shumë çmimeve ndërkombëtare, ndër to edhe çmimin GRAND PRIX ne Festivalin Ndërkombëtar të Teatrove në Rumani.

Kasta e aktorëve për këtë shfaqje përbëhet nga: Astrit Kabashi, Bajrush Mjaku, Adrian Morina, Shkelzen Veseli, Lumnie Sopi, Arta Selimi, Albulena Kryeziu, Armend Baloku dhe Bujar Ahmeti. Skenografia dhe kostumet do të përgatiten nga Juliana Voykova, ndërsa muzika nga Oliver Josifovski.
Drama e Teki Dervishit “Eshtrat që vijnë vonë” trajton fatin e individit me identitet të humbur. Raportet mes njeriut i cili për pushtet ka humbur identitetin dhe atij që përpiqet ta ruaj duke e sfiduar presionin dhe realitetin Orwellian në të cilin është futur domosdoshmërisht. / KultPlus.com

Teatri “Dodona” fillon vitin me dy shfaqje premierë

Teatri i qytetit të Prishtinës ‘Dodona’, përgjatë muajit janar, do të sjellë para publikut një program të pasur me shfaqje.


Drejtori i teatrit ‘Dodona’, Visar Krusha, ka treguar për Radio KFOR-in se qysh këtë javë, dy premiera do të ngjiten në skenën e teatrit: “Do të fillojmë me dy premiera. Premiera e parë është të mërkurën më 15 janar, që është premierë e Skenës së Mbrëmjës, pra është shfaqje për të rritur. Është fjala për shfaqjen “Harroje Hollivudin”, nga Miro Gavran dhe me regji të Faik Gashit. ‘Harroje Hollivudin’ sjell ambicien e pashterur të personazhit për t’u bërë aktor si dhe sfidat e njerëzit që ai takon gjatë rrugëtimit.


Ndërsa më 18 janar, e kemi premierën e shfaqjes për fëmijë “Fjalët Magjike” nga Alba Hoxha, me regji të Shkurtë Aliut. Kjo shfaqje ka për temë përdorimin e fjalëve magjike të tilla si: të lutem, falemnderit, ejt. si dhe njohjen e këtyre fjalëve dhe përdorimin e tyre nga fëmijët, pasi kjo ka edhe efekt pozitiv në integrimin e fëmijëve në shoqëri.”

Në skenën e teatrit ‘Dodona’ pergjatë muajit janar do të ngjiten gjithsej 7 shfaqje./KultPlus.com

Teatri “Dodona” 7 shfaqje në muajin janar

Teatri i të rinjve, fëmijëve dhe i kukullave “Dodona”, ka publikuar kalendarin e shfaqjeve për muajin janar.

Në repertorin e këtij Teatri do të jenë 7 shfaqje.

Më 18 janar do të jepet premierë shfaqja “Fjalët magjike” me regji të Shkurtë Aliu. Në program janë edhe dy shfaqje të tjera për fëmijë, teksa në Skenën e mbrëmjes janë paraparë katër shfaqje, nga të cilat njëra premierë. Më 15 janar, do të jepet premiera e shfaqjes “Harroje Hollivudin” me regji të Faik Gashit.

“Dodona” do ta përmbyll muajin janar me shfaqjen “Une jam vetë grua”, me regji të Kushtrim Koliqit. /KultPlus.com

‘Dashuritë e virgjëreshës Madalenë’, nesër premierë në Teatrin Dodona

 

Monodrama “Dashuritë e virgjëreshës Madalenë” do të vijë nesër premierë në Teatrin Dodona, shkruan KultPlus.

Monodrama e shkruar nga Ridvan Dibra do të jetësohet në skenë nga regjisorit dhe në këtë rast edhe skenaristi, Ben Apolloni.

Në rolin e Madalenës do të vijë aktorja Arjola Demiri.

Regjisori Apolloni është deklaruar përmes një postimi në Facebook se gjithmonë i ka pëlqyer të merret me vepra të autorëve që ironinë e kanë figurë qendrore dhe gjithashtu ai pohon se në shfaqje janë disa skena e detaje që një pjesë të audiencës do ta bëjnë të ndihet në siklet.

“Gjithmonë më ka pëlqyer të merrem me vepra e autorë që ironinë e kanë figurë qendrore. E, Ridvan Dibra është mjeshtër i ironisë, prandaj edhe vepra e tij, në prozë e dramë, më pëlqen shumë. Shfaqja “Dashuritë e virgjëreshës Madalenë”, e ndërtuar mbi tekstin dramatik të Dibrës, është një shfaqje teatrore “rreth ushkurit”, një shfaqje që na provokon që në titull, duke na vënë përballë dashurive të një virgjëreshe, duke na vënë përballë figurës, për mua kryesore, të krijimtarisë letrare të autorit. Janë disa skena e detaje që një pjesë të audiencës do ta bëjnë të ndihet në siklet dhe shpresoj shumë që kjo të ndodhë, me sa më shumë prej atyre që do ta shohin shfaqjen! Arti, përveç të tjerash, më pëlqen të jetë edhe provokues, të na vëjë në siklet, të na prekë ku nuk guxojmë ta prekim veten”, shkruan Apolloni teksa tutje tregon që gjatë leximit të kësaj monodrame ai ka menduar edhe se sa shumë është ofenduar femra.

“Duke e lexuar monodramën e më pas duke e zbërthyer atë në skenë, shpesh kam menduar se sa shumë e kemi ofenduar femrën duke e vendosur moralin e saj, vlerën e saj, në një cipë të hollë, në një asgjë, “dy gishta larg anusit “. Zoti na e faltë!
Në skenat e shfaqjes “Dashuritë e virgjëreshës Madalenë”, ka seks, ka të qeshura, ka lot e gjak. Shikim të këndshëm!”, shkruan tutje regjisori.

Shfaqja vjen premierë nesër, më datë 4 shkurt, në ora 19:30, ndërsa reprizë është më datë 5 shkurt. /KultPlus.com

“Mustaqoshi Laroshi” vjen këtë të shtunë në “Dodonë”

Këtë të shtunë në Teatrin “Dodona” vjen shfaqja “Mustaqoshi Laroshi” e bazuar në vargjet e S.J. Marshak, kurse dramatizimi dhe regjia është e punuar nga Melihate Qena, shkruan KultPlus.

Asistent regjie është Avni Hoti kurse kukullat nga Ismail Rama e Melihate Qena, muzika e punuar nga Merita Bajri, skenografia nga Mentor Llaopashtica dhe Valdet Rama. Në shfaqje luajnë Roza Berisha-Fejzullahu dhe Avdi Azemi.

Udhëheqës artistik është Skender Latifi.

Përmbajtja e shfaqjes lidhet me një vajzë të vogël e cila ka një kafshë manare, një maçok. Vajza kujdeset për maçokun por ai nuk i kupton këshillat e vajzës dhe vazhdimisht shkakton rrëmujë nëpër shtëpi. Koha kalon dhe vajza rritet. Një ditë ajo duhet ta lërë lojën, t’i merr librat dhe të niset për në shkollë./ KultPlus.com

Teatri i Prishtinës “Dodona” të shtunën hap sezonin

Teatri “Dodona” i Prishtinës hap sezonin e ri teatror ditën e shtunë duke filluar në ora 12:00 dhe 13:00 ku do të jepet shfaqja për fëmijë “Kësulëkuqja”.

Shfaqja është punuar sipas përrallës së Vëllezërve Grim nën regjinë e Melihate Qenës.

Kukullat nga Valdet Rama, muzika nga Violeta Rexhepagiqi, piktura nga Musa Kalaveshi, ndërsa luajnë: Roza Berisha-Fejzullahu, Avdi Azemi dhe Valdet Rama.

Shfaqja bën fjalë për dy fëmijë të cilët luajnë teatër para shtëpisë. Ata kanë emrat e tyre Agim dhe Shpresë. Por nuk ka emër edhe kukulla me të cilën ata luajnë. Ata pasi e mësojnë se të gjithë fëmijët në sallë I kanë emrat e tyre fillojnë ta kërkojnë edhe një emër për kukullën, Në shportën e lodrave e gjejnë një kësulë të kuqe. Kjo është kësula e kuqe më e famshme në botë, duke I’u falënderuar një gjysheje. E vajza këtë dhuratë nuk e heq asnjëherë nga koka. Por që përralla jonë të shkoj si duhet nevojitet edhe një ujk për ti vështirësuar gjërat. E ku është ujku natyrisht se është edhe gjahtari. Kjo është përralla për kësulëkuqen por e treguar në një mënyrë krejtësisht të re./KultPlus.com

“Shfaqja që shkon keq” nga Bashkim Ramadani vjen premierë në teatrin Dodona

“Shfaqja që shkon keq” nga Henry Lewis, Jonathan Sayer e Henry Shields, ka rënë në duart e regjisorit Bashkim Ramadani i cili me një kastë të gjerë aktorësh i janë përkushtuar punës për të sjellë një shfaqje që në natën e premierës të shkojë ashtu siç është më së miri, shkruan KultPlus.

Regjisori Bashkim Ramadani

Shfaqja zhvillohet në premierën e shfaqjes së dramës misterioze “Vrasje në shtëpinë e Havershamëve” e shkruar nga Suzi H.K. Braidsuell, e vënë në skenë nga Shoqata Dramatike e Universitetit Politeknik të Kornleit.

Një trupë amatore e cila së fundmi ka hasur në një vepër e cila në vete përmban po aq personazhe sa ka edhe vetë trupa aktorë është zgjidhja ideale për të bërë një shfaqje nga e cila pritet sukses i madh.

Në shfaqje bëhet fjalë për një njeri i cili gjendet i vdekur në dhomën e tij të gjumit në mbrëmjen e fejesës së tij dhe me këtë rast bën të dyshuar çdonjërin, e dyshimet padyshim do bien tek ata që e “donin”. Shpërfaqje e dashurisë së fshehtë, tradhti e intrigë do ishin ndër temat kryesore që kjo shfaqje do i prezantonte publikut të saj. Por aty ku pritshmëritë janë të mëdha çdo herë mund të pritet edhe dështimi. Drita që ndalen dhe ndizen vend e pavend, rekuizita e skenografi që mungojnë e prishen, personazhe që u bie të fiket, janë ndër problemet me të cilat ballafaqohet kjo trupë aktoreske e cila di vetëm një gjë, “Shfaqja duhet të shkojë deri në fund PATJETËR”.

Kasta e aktorëve të kësaj shfaqje përbëhet nga: Mikel Markaj, Leonit Maloku, Kaltrinë Zeneli, Gani Morina, Edlir Gashi, Alban Rexhaj, Armend Zeqiri.

Premiera e shfaqjes vjen përpara publikut në teatrin Dodona, më datë 13 korrik në ora 20:00.
Asistent regjie e shfaqjes është Armend Zeqiri, skenografia nga Dhurim Ismaili, kostumografia nga Agnesa Malushaj, mjeshtër ndriçimi – Skender Latifi, ndërsa dizajni i posterit është Mentor Berisha. / KultPlus.com

“Çifti hapur” këtë të enjte në Dodona, Për Bekimin

“Çifti hapur”, me tekst të Dario Fo dhe France Rame dhe me regji të Kushtrim Koliqit do të shfaqet këtë të enjte në Teatrin “Dodona”, në mënyrë që të kontribuohet në shërimin e regjisorit Bekim Lumi, shkruan KultPlus.

Një vepër gjithmonë aktuale dhe fantastike mbi raportin burrë-grua, me situata sa qesharake aq edhe të prekshme. Kjo shfaqje ngrit një dilemë kryesore se a është “Besnikëria bashkëshortore gjë e vjetruar apo nuk ekziston me?”

Kjo shfaqje jetësohet nga aktorët: Edona Reshitaj dhe Besart Sllamniku.

“Me u kënaqe, me u argëtu dhe njëkohësisht me kontribu për diçka madhore, është gjeja më e lehtë qe mundeni me bo”, ka shkruar aktori Besart Sllamniku.

Kjo shfaqje prezantohet në kuadër te Kampanjës humanitare #PërBekimin, në kuadër të se cilën do të prezantohet “Muaji Artistik” në Teatrin Dodona, ku çdo javë shikuesit do të kenë mundësinë të shkojnë dhe ta shohin nga një shfaqje me përzgjedhje të mrekullueshme./ KultPlus.com

Ilir Bokshi së shpejti sjellë premierën “Hollishit” (FOTO)

Bazuar në “Gurë në xhepat e tij” nga autorja Marie Jones, së shpejti vjen shfaqja “Hollishit”, me regji të regjisorit Ilir Bokshi e producente Albulena Kryeziu, shkruan KultPlus.

Kjo shfaqje premierën do ta ketë në Teatrin Dodona në kryeqytet me ç’rast edhe hapet ky teatër pas renovimit, saktësisht “Skena e mbrëmjes”.

Shfaqja është një tragjikomedi për një qytezë-provincë e cila “pushtohet” nga një produksion hollivudian të cilët vijnë për të xhiruar një film. Në qendër të storjes janë Çarlli Konllon dhe Xhejk Kuin, të cilët sikurse shumica e banorëve të qytezës, janë punësuar si statistë filmi. Komedia rrjedhë nga përpjekjet e produksionit që të krijojnë një “ndjesi provinciale” -një nocion romantik, i cili shpesh bie ndesh me realitetin jetësor.

Shfaqja jetësohet nga aktorët Adrian Morina dhe Ylber Bardhi, ndërsa pas skene ka një ekip në përbërje të: dramaturg-Shkëlzen Berisha, asistent regjie-Butrint Pasha, muzika-Art Lokaj, kostumografe-Albulena Borovci e producente Albulena Kryeziu.

“Hollishit” është mbështetur nga Ministria e Kulturës së Kosovës, Drejtoria për Kulture e K.K. Prishtinës dhe teatri AAB “Faruk Begolli”./ KultPlus.com