Muaj: Korrik 2018

Konferenca Ndërkombëtare e Albanologjisë, kushtuar heroit tonë kombëtar Gjergj Kastrioti Skënderbeu, mbylli sesionin e parë, pas një maratone të gjatë leksionesh shkencore.

Tomi Frashëri, Kryetari i Sekretariatit teknik të Vitit Mbarëkombëtar të Gjergj Kastriotit Skënderbeut, tha për Agjencinë Telegrafike Shqiptare se, “me ligjëratën e profesor Ivano Cavallinit dedikuar ‘Skënderbeut dhe muzikës’, e patrajtuar më parë, mbylli sesionin e parë të Konferencës Albanologjike kushtuar heroit tonë kombëtar. Sesioni i parë pati një pjesëmarrje të gjerë profesorësh dhe studiuesish të specializuar në studimet mbi Skënderbeun dhe epokën ku jetoi e të gjurmëve që la pas”.

“Në këtë sesion të parë u referuan 14 ligjërat madhore, të cilat u zhvilluan nga muaji maj, deri në fund të qershorit. Gjithashtu kemi patur dhe një event ekstra kalendarit, i cili u mbajt nga profesorët Aurel Plasari dhe Lucia Nadin, në lidhje me zbulimin e një dorëshkrimi të Marin Barletit “Rrethimi i Shkodrës”, i cili u pasqyrua gjërësisht dhe në media”, – vijoi Frashëri.

Tomi Frashëri gjithashtu bëri të ditur që kjo konferencë ka rëndësi edhe për informimin e brezit të ri mbi figurën e heroit tonë.

“Këto ligjërata kanë sjellë një kontribut jo të vogël, i cili në ndryshim me vitet e mëparshme, kjo dhe për shkak të zhvillimit teknologjik, mund të ndiqet dhe në kohë reale jo vetëm nga publiku që e ndjek në ‘Pallatin e Kongreseve’, por dhe nga gjithë shqiptarët kudo që ndodhen nëpërmjet rrjeteve sociale. Kjo konferencë ka kontribute të reja përsa i përket perceptimit që ne kemi nga ana objektive mbi figurën e Skënderbeut. Gjithçka në sesionin e parë ka qenë në një nivel të lartë shkencor dhe kur këto akte të dalin të botuara në vitin 2019, do të kemi një produkt shkencor mjaft interesant, të cilin do ia lëmë trashëgimi brezave të rinj dhe që do të përdoret në vijim nga studiuesit si referencë”, – u shpreh Frashëri.

Ai gjithashtu shpjegoi dhe detaje e risi mbi sesionin e dytë të kësaj konference, e cila sjell një kontribut shkencor me arkiva dhe dokumentacione mjaft interesante si për studiuesit, ashtu dhe për publikun.

“Sesioni i dytë rimerr punimet duke filluar nga 10 shtatori me profesor Dhori Qirjazi, i cili vjen nga Greqia posaçërisht për këtë konferencë. Ligjëratat do të përfundojnë në fund të muajit tetor, ku do të jenë sërish një cikël ligjëratash shkencore, ku do marrin pjesë rreth 14 personalitete të cilët janë përzgjedhur nga komiteti shkencor”, – tha Frashëri.

Ai shtoi se, “finalizimi i kësaj konference madhore do të përmbyllet me një sesion kumtesash nga data 1-3 nëntor, e cila do t’i japë mundësi studiuesve të tjerë po aq të mirënjohur, të ligjërojnë mbi studimet e tyre rreth Skënderbeut. Konferenca Albanologjike mbyllet në muaj nëntor, i cili është muaj i madh i pavarësisë, por dhe muaji përmbyllës i Vitit Mbarëkombëtar të Skënderbeut”, – përfundoi Kryetari i Sekretariatit teknik të Vitit Mbarëkombëtar të Gjergj Kastriotit Skënderbeut, Tomi Frashëri./ ata

Sot bëhen 28 vjet që kur delegatët e atëhershëm të Kuvendit të Kosovës, miratuan Deklaratën e pavarësisë së Kosovës, e njohur si Deklarata e 2 Korrikut.

Më 2 korrik 1990, Kuvendi i Kosovës solemnisht shpalli Deklaratën Kushtetuese mbi Kosovën si njësi të pavarur dhe të barabartë me republikat tjera në kuadër të Federatës së Jugosllavisë.

Deklaratën Kushtetuese mbi Kosovën si njësi të pavarur dhe të barabartë në kuadër të federatës apo konfederatës jugosllave e shpallën në Prishtinë 111 delegatët shqiptarë, po edhe të komuniteteve të tjera të Kuvendit të Kosovës. Deklarata Kushtetuese e 2 Korrikut shënon edhe pikënisjen për pavarësimin e Kosovës nga Serbia, duke synuar që të trajtohet si e barabartë me republikat e atëhershme socialiste në federatën jugosllave. Menjëherë pas 2 korrikut, më 7 shtator u miratua edhe Kushtetuta e Kosovës e njohur si Kushtetuta e Kaçanikut./ KultPlus.com

Aksioni i realizuar në Shqipëri për mbledhjen e parave me qëllim të pagesës së dënimit të FIFA’s për “Shqiponjat” e Granit Xhakës dhe Xherdan Shaqirit ka përfunduar me sukses.

Falë solidaritetit të shqiptarëve shuma është mbledhur me shpejtësi. Mirëpo, futbollistët Granit Xhaka dhe Xherdan Shaqiri, përmes familjarëve të tyre kanë njoftuar se nuk do t’i pranojnë paratë e mbledhura, por dëshirojnë që ato t’i japin për qëllime humanitare.

Me kërkesë të tyre do të ketë ndarje proporcionale të shumës prej 25.000 franga zvicerane për shërimin e 3 fëmijëve (një në Shqipëri, një në Kosovë dhe një në Maqedoni) që kanë nevojë për intervenime të shpejta mjekësore. Prandaj, Klan Kosova njofton opinion se ka formuar një komision profesional mjekësor i cili do ta bëjë përzgjedhjen e rastit më urgjent për shërimin e NJË fëmije nga Kosova, të cilit do t’i dhurohen 8.300 franga zvicerane në emër të Granit Xhakës dhe Xherdan Shaqirit.

Të gjithë të interesuarit për t’u bërë përfitues potencial të këtij fondi humanitar duhet ta sjellin dokumentacionin përkatës shpjegues me dëshmitë zyrtare mjekësore deri të hënën, më 2 korrik 2018, në orën 15:00, në ndërtesën e Klan Kosovës, ish Fabrika e Amortizatorëve, në Prishtinë. Pastaj, komisioni profesional i mjekëve do ta bëjë përzgjedhjen dhe do ta kontaktojë familjen e fëmijës.

“Shenja e shqiponjës është si një tatuazh i gëzimit të shqiptarëve në festa, në dasma, në koncerte, në ndeshje futbolli dhe nuk ka brenda asnjë urrejtje apo madje asnjë lidhje me të tjerët, po është thjesht një shenje dalluese që shqiptaret e njohin menjëherë e nuk kanë nevojë për shpjegime!” Kështu ka shkruar Ragip Xhaka, babai i futbollistit Granit Xhaka.

“Prandaj edhe jemi shumë të çuditur me reagimin e atyre që e përjetuan shenjën tonë si ofensive për ta apo atyre qe e trajtuan si gjest politik! Por nuk jemi aspak të çuditur me solidaritetin e shumë shqiptarëve që janë ndjerë keq nga keqinterpretimet e shenjës dhe kanë marrë pjesë në iniciativën e Edi Ramës për të kontribuar simbolikisht për gjobën e padrejtë qe na u vu!”, ka thënë Xhaka për Koha.net.

Tutje, ai ka thënë “I falënderojmë shumë jo për shumën, po për faktin që na kthyen 20 mijë fish gëzimin që u dhamë me shenjën e shqiponjës pas golave!”.

PizzArgovia në Brugg, një piceri e vogël por me pica më të veçanta. Jo vetëm nga shija, por edhe nga forma që të shërbehet. Nëse shkoni aty, mos u çuditni nëse pica që do të konsumoni mund të ketë ngjyrë tjetër.

Pjetri dhe Armendi, nuk jetojnë në Itali, në vendin i cili njihet për pizza, por në Zvicër. Ata kanë bërë një kthesë në përgatitjen e këtij specialiteti, pasi që, nëpërmjet gatimit ata po bëjnë edhe vepra arti. Pjeter Perlepi dhe Armend Hajdaraj ka kohë që në picerinë e tyre kanë filluar të eksperimentojë me artin në pica, shkruan albinfo.ch.

Ndërkohë puna e tyre ka zgjuar interesimin e të tjerëve, të cilët për kuriozitet po shkojnë të shijojnë picat e tyre, edhe për shijen por sidomos edhe për ngjyrën. Pos picave tjera të shijshme, ata së fundi kanë vendosur të përgatisin pica me ngjyrë të zezë.

Pjeter Perlepi nga Komuna e Gjakovës ka 30 vjet që jeton në Zvicër. Ai ka mbaruar zanatin për të përgatitur ëmbëlsira në ëmbëltore. Pjetëri ishte rritur në furrë dhe e ka trashëguar profesionin nga babai i tij që tashmë është pensionuar dhe kishte furrën e tij në Zvicër.

Braktis zanatin e ëmbëltoristit, në kërkim të sfidave të reja
Por, ai vendosi të bëjë diçka tjetër dhe të merret me specialitetin e picave. “Doja një profesion të ri, pasi duke bërë torta dhe ëmbëlsira u bë monotone, dhe kam punuar edhe disa punë tjera. Edhe pse nuk isha i sigurt, ky zanat më hyri në qejf. Kam punuar 1 vjet e gjysmë aty dhe pastaj edhe në një piceri tjetër për rreth 3 vjet e gjysmë”, shprehet për albinfo.ch Pjeter Perlepi.

Më pas Pjetri dhe Armendi kanë vendosur që të kenë një piceri të tyre. Dhe kështu hapin picerinë “PizzArgovia”, që ka hapur dyert tashmë një vit në Brugg.

Po përse pica të zeza?
Disa të tilla i kishin shijuar në Itali, por ato ishin me ngjyra. “Na ka pëlqyer shumë ideja, dhe kemi vendosur që t`i bëjmë vet, por jo me ngjyrë. Kemi shikuar receta të ndryshme. Është më e shëndetshme, është më e shijshme. Kemi kërkuar diçka më të veçantë. E kemi nisur testimin, dhe e kemi provuar me familjarët tanë, të cilët ishin të befasuar.”

Pastaj një mendim për zbulimin e tyre e kanë marrë edhe nga miqtë e tyre.
Lajmi se në picerinë e tyre po bëhen pica të zeza ishte përhapur me shpejtësi. Tani mysafirët e tyre konsumojnë gjysma pica të zeza dhe gjysma pica tjera, të zakonshme.

“Ne nuk kemi pritur se do të kishte kaq shumë interesim. Kemi menduar mbase të kemi porosi për 10-20 pica në javë, por që na shkojnë më tepër nuk kemi besuar. Kemi pasur mysafirë të ndryshëm dhe special, vetëm për të ngrënë pica të zeza. Kjo të motivon për punë”, thotë Armendi për albinfo.ch, i cili prej disa vitesh ushtron profesionin e gastronomit në Zvicër.

Ja si “i nxijmë” picat

“Eshtë një preparat medicinal që është i lejueshëm dhe quhet “kohle aktiv” (karbon aktiv). Ne e kemi marrë vetëm atë produkt dhe e kemi kombinuar me miellin tonë, pastaj kemi shfrytëzuar edhe idetë e të tjerëve dhe kështu kemi bërë picën e zezë”, tregon për sekretin e kësaj pice Armend Hajdaraj nga Gjakova.
Ai thotë se nuk janë frikësuar që te eksperimentojnë për të bërë një picë të zezë. “Ne kemi dashur të japim diçka të re në Zvicër dhe me këtë ia kemi arritur. Një risi për konsumatorët. Ideja ka qenë që ne jemi të rinj dhe po ofrojmë diçka të re. Deri më tani jemi të vetmit në Zvicër me pica të zeza. Ka me ngjyra tjera, por jo me ngjyrë të zezë”, thonë Armendi dhe Pjetri. / KultPlus.com