Autor: KultPlus

Ed Sheeran, Adele dhe Harry Styles yjet britanikë më të pasur nën 35 vjeç

Posted on by KultPlus

Ed Sheeran, Adele dhe Harry Styles janë ndër njerëzit më të pasur në Mbretërinë e Bashkuar nën moshën 35 vjeç, sipas listës të Sunday Times.

Të gjithë muzikantët kanë një pasuri prej më shumë se 150 milionë paund pas sukseseve në Mbretërinë e Bashkuar dhe SHBA.

Por ata nuk kanë mjaft para për t’u përfshirë në listën kryesore të të pasurve, ku njerëzit duhet të “mburren” me pasuri prej 350 milionë paund ose më shumë.

Për ata nën 35 vjeç, Ed Sheeran, 32 vjeç, renditet i shtati më i pasur me një pasuri prej 300 milionë paund, i ndihmuar nga albumi i tij i gjashtë i shitur me shpejtësi “Subtract”.

Adele, e cila tani është 35 vjeç, është në vendin e nëntë me 165 milionë paund. Këngëtarja e lindur në Londër ka shitur më shumë se 100 milionë albume dhe në fillim të këtij viti ajo njoftoi se rezidenca e saj luksoze në Las Vegas do të zmadhohej. Thuhet se ajo paguan 500,000 £ për shfaqje.

Harry Styles pati albumin më të shitur në Mbretërinë e Bashkuar vitin e kaluar me “Harry’s House”, dhe aktualisht është në turne në MB. Pasuria e 29-vjeçarit është 150 milionë paund.

Në krye të listës kryesore të të pasurve është Gopi Hinduja dhe familja, të cilët zotërojnë biznesee në të gjithë botën dhe pasuria e kombinuar e të cilëve është 35 miliardë paund, nga 28.4 miliardë paund vitin e kaluar.

Sir Jim Ratcliffe kthehet në top 10-shen e njerëzve më të pasur të Britanisë pas dy vitesh poshtë renditjes.

Tani me vlerë 29.6 miliardë £, Sir Jim është ndoshta më i njohur në këtë moment për betejën e tij për të blerë Manchester United, ekipin e tij të futbollit që nga fëmijëria. Ai e bëri pasurinë e tij përmes Ineos, një biznes kimik dhe lëndësh të para.e

Mbreti i sapokurorëzuar Charles III ka renditjen relativisht të ulët të 263-të në Listën e të Pasurve me një pasuri prej 600 milion £. Megjithatë, ai është më i pasur se nëna e tij e ndjerë, Mbretëresha Elizabeth II, e cila kishte vlerë 320 milionë paund, sipas listës së vitit të kaluar.

Në mënyrë të konsiderueshme më e pasur është JK Rowling, autorja e librave të Harry Potter. Ajo ka një vlerë prej 875 milionë funte, një rritje prej 25 milionë funte nga viti i kaluar. Ajo mund të bëhet akoma më e pasur – shkrimtarja thuhet se është në bisedime me rrjetin televiziv HBO për ta shndërruar krijimin e saj më të famshëm në një seri.

Ndërkohë, dy nga yjet e filmave të Harry Potter janë në listën e më të pasurve nën 35 vjeç. Daniel Radcliffe, 33, ka një vlerë prej 92 milionë funte, ndërsa Emma Watson, gjithashtu 33 vjeç, ka një pasuri prej 60 milionë funtesh./Top Channel/ KultPlus.com

Kadare si Kafka, Panairi i Librit në Torino çelet me Kadarenë

Posted on by KultPlus

Panairi i 35-të i librit në Torino, çeli siparin sot në prani të Ministrit të Kulturës së Italisë Gennaro Sangiuliano dhe Ministres së Kulturës së Shqipërisë Elva Margariti. Shqipëria është e ftuar nderi në këtë event të rëndësishëm të librit botëror.


Një lexim në gjuhën e imazhit e veprës “Kronikë në gur”, të shkrimtarit tonë të njohur Ismail Kadare, realizuar nga arkitektja Matilda Pando, pavijoni shqiptar ka tërhequr vëmendjen e mijëra lexuesve.
Më shumë se 40 aktivitete do të jenë me në fokus letërsinë shqipe. Kohët e Kadaresë ishte aktiviteti i parë realizuar në sallën e Shqipërisë. Alessandro Mezzena, gazetar italian foli për universalitetin e letërsisë së Kadaresë, duke e krahasuar me Kafkën.
Sipas Mezzenës Kadare është një nga shkrimtarët më të rëndësishëm të kohës i cili me veprën e tij na tregon një Shqipëri fantastike. “Prezantimi i letërsisë shqipe në edicionin e 35-të të Panairit të Librit në Torino, është një ngjarje e rëndësishme për kulturën shqipe. Për vetë kontekstin historik në të cilën letërsia shqipe u zhvillua për më shumë se gjysëm shekulli, përshfaqja përpara një audience të madhe ndërkombëtare e një historie aspak të ngjashme jo vetëm me vendin fqinj (ftues), por me shumë vende të tjera evropiane, e bën këtë pjesëmarrje të marrë përmasa gati historike.

Historikisht bota kulturore shqiptare dhe latine kanë qenë simboli i europianizmit. Kjo zonë është zona tipike e europianizmit , e vetmja hapësirë ku botohej letërsi artistike që në mesjetë. Dy gjuhët kanë qënë herët pjesë e një filozofie të përbashkët, si pjesë e kulturës së parë europianiste. Mos harrojmë që përkthimi i letërsisë antike të autorëve italianë të mesjetës kanë pasur një rol të rëndësishëm orientimi në rilindjen tonë kombëtare. Kanë qënë e vijojnë të jenë frymëzim për breza e breza të tërë shkrimtarësh, të cilët kanë reflektuar në veprat e tyre vlerat më të mira të këtyre leximeve”, tha Alda Bardhyli./GazetaTema

The Guardian me shkrim impresionues për Shqipërinë, gazetari vizitoi 17 shtete por zemrën ia rrëmbeu Shqipëria

Posted on by KultPlus

Gjatë katër viteve të fundit, kam udhëtuar në 17 vende për librin tim ”Mirupafshim Evropa Lindore”.

Në të, unë përpiqem të përshkruaj një Evropë Lindore të zhdukur, ku pasuria shumëplanëshe kulturor dhe toleranca fetare ishin rregull dhe jo përjashtim.

Shqipëria ishte një nga vendet e pakta ku ajo trashëgimi nuk ishte një kujtim, por një realitet i gjallë. Duke e parë vetë atë kjo gjë më mbushi me shpresë, jo vetëm për Ballkanin, por për Evropën në tërësi, shkruan Jacob Mikanowski për “The Guardian”.

”Ndjeva një lloj frike përpara vizitës sime të parë atje, në vitin 2019. Ju mund ta konsideroni këtë frikë me atë që studiuesja bullgare Maria Todorova e quan “ballkanizma të folezuar”, thënë ndryshe prirja e çdo vendi të Evropës Lindore për ta konsideruar veten si mesataren e artë dhe për të parë fqinjët e tij (sidomos ata në jug dhe në lindje) me dyshim. Unë jam polak dhe kam udhëtuar nëpër rajon prej një kohe aq të gjatë, sa të kem përjetuar çdo lloj shqetësimi. Por, unë jam gjithashtu mjaft i moshuar për të kujtuar imazhet e transmetuara nga Shqipëria pas rënies së komunizmit dhe rebelimit civil që përfshiu vendin në 1997. Edhe pse ka kaluar shumë kohë që atëherë, nuk isha i sigurt se çfarë do të gjeja.

Pika ime e hyrjes ishte një nga pikat kufitare më të bukura që kam përjetuar ndonjëherë, një shtrirje e egër bregdetare përgjatë liqenit të Ohrit, ku Shqipëria takohet me Maqedoninë e Veriut. Një udhëtim i shpejtë me taksi nga kufiri në qytetin e afërt të Pogradecit ishte i mjaftueshëm për të larguar çdo ankth të vazhdueshëm. Pasi mora veten me një kapuçino buzë liqenit, hipa në një autobus për në Korçë, kryeqyteti kulturor i malësive të thella lindore të Shqipërisë. Me të mbërritur në mesditë, qyteti dukej i shkretë. Me afrimin e natës, pazari ishte i mbushur me njerëz që darkonin jashtë në restorante me kuzhinë italiane dhe qebaptore shqiptare. Mora një pjatë me mish qengji dhe sallatë greke (këtu i thonë “sallatë fshati” – nacionalizmi nuk vdes lehtë) dhe dëgjova një koncert falas të këngëtares pop franceze, Clio.

Kisha ardhur në Korçë për të parë rrënojat e Voskopojës. I njohur gjithashtu si Moschopolis ose qyteti i barinjve, dikur kishte qenë kryeqyteti jozyrtar i vllehëve, një popull shpesh (por jo ekskluzivisht) nomad, që fliste një gjuhë të ngjashme me rumanishten. Në malet në perëndim të Korçës ata ndërtuan Oksfordin e tyre në miniaturë, të kompletuar me një akademi, shtypshkronja dhe kisha të zbukuruara. Qyteti lulëzoi për një shekull përpara se të pushtohej nga Ali Pasha, një prijës vendas, i njohur edhe si “Bonaparti mysliman”, në fund të shekullit XVIII, pas së cilës ajo u fundos në errësirë pothuajse.

Sot Voskopoja është një fshat i këndshëm, në një luginë të vogël të rrethuar nga male të mbuluara me bredha. Shtypi dhe akademia janë zhdukur, por ju ende mund të shihni kryevepra nga David Selenicasi dhe piktorë të tjerë shqiptarë ikonash, në kishat e shumta të saj. Megjithatë, ndonjëherë të nevojitet edhe ndonjë telefonatë. Kisha e Shën Nikollës ishte e mbyllur kur mbërrita. Në pjesën e përparme të saj, takova dy çifte nga Gjermania dhe Franca – të vetmit turistë në qytet atë ditë. Ne telefonuam numrin që pamë në derë; pak minuta më vonë, një prift i sjellshëm vlleh, me rroba të zeza, na futi në një dhomë xhevahiresh me afreske shumëngjyrësh.

Më vonë atë ditë, u nisa vetë në një shteg të vjetër karvanesh që lidhte Voskopojën me qendrat e mëdha tregtare të Ballkanit. Eca për një orë nëpër pyjet e pishave pa parë askënd, derisa arrita te një kishë e vogël pelegrinazhi prej guri, kushtuar shenjtorëve Kostandin dhe Helenë. Pamja e luginës shtrihej për kilometra të tëra, deri në masivin e Tomorit apo Fuxhi i Shqipërisë së mesme dhe një vend pelegrinazhi për të krishterët dhe myslimanët.

I kënaqur nga udhëtimi im i parë në Shqipëri, vendosa të kthehesha. Jeta dhe pandemia bënë të tyren, por në vitin 2022 u ktheva me bashkëshorten për një turne dyjavor. Filluam me Tiranën. Kryeqyteti i Shqipërisë ka shumë për të rekomanduar, arkitekturë eklektike, gjallëri kafenesh dhe restorante të mbushura plot. Është gjithashtu vendi më i mirë për t’u njohur me periudhën më të errët të historisë së vendit, me mbretërimin 40-vjeçar të Enver Hoxhës, diktatorit stalinist që sundoi Shqipërinë nga fundi i Luftës së Dytë Botërore deri në vdekjen e tij në 1985.

Pranë sheshit ”Skënderbej”, një vilë tërheqëse që dikur ka qenë selia e policisë sekrete është kthyer në një muze të quajtur ”Shtëpia e Gjetheve”. Ekspozitat e tij, të cilat përfshijnë pajisje përgjimi, pamje të kontrolluara të mbikëqyrjes dhe intervista me të mbijetuarit e burgimit, zbulojnë aftësinë e jashtëzakonshme që regjimi komunist ishte i gatshëm të bënte për të mbajtur nën kontroll popullsinë e tij. Në një aspekt më estetik, Galeria Kombëtare e Arteve (aktualisht e mbyllur për riparime, por e planifikuar të rihapet në fillim të vitit 2024) ka një nga koleksionet më të mëdha të artit të realizmit socialist të Evropës Lindore.

Muzetë e Tiranës shquhen për thellësinë dhe krijimtarinë e angazhimit të tyre me një të kaluar të vështirë. Megjithatë, për të marrë një ndjenjë të vërtetë për Shqipërinë, duhet të lini pas kryeqytetin. Destinacioni ynë i parë ishte veriu, zona e pakicës katolike të vendit dhe malet e tij të larta. Tradicionalisht vendi i gjakmarrjes dhe malësorëve, kjo është ”Shqipëria e Epërme” e përshkruar nga Edith Durham në fillim të shekullit XX. Ne e filluam vizitën tonë në qytetin e Shkodrës me një udhëtim në Muzeun Kombëtar të Fotografisë ”Marubi”, që paraqet punën e dinastisë më të madhe fotografike të Shqipërisë, të filluar nga revolucionari italian Pietro Marubbi dhe vazhdoi përmes nxënësve të tij shqiptarë. Ajo ofron një dritare në Shqipërinë e mesit të shekullit XIX, pashallarët osmanë, kryekomandantët katolikë, vajzat e haremit dhe madje edhe një luftëtare për lirinë.

Më pas shkuam në luginën e Thethit, në Alpet Shqiptare, në kufi me Malin e Zi. Në të kaluarën, Thethi ishte i shkëputur nga pjesa tjetër e botës nga bora për gjashtë muaj të vitit, duke i dhënë pseudonimin Shangri La i Shqipërisë. Deri vonë mund të arrihej vetëm nga një rrugë me zhavorr, por e shtruar së fundmi./ KultPlus.com

‘Nëna ime kishte vetëm një fustan’

Posted on by KultPlus

Ardita Jatru

Nëna ime kishte vetëm një fustan
e lante natën dhe e thante pranë furnelës.
Ditën e vishte me aromë të re
Nuk e pyeta asnjëherë pse nuk blinte një të dytë
Nuk desha ta kishte një të dytë
Unë ashtu e njoha
me fustanin me lule rozë,
deri te gjunjët.
Kur e bleu një këmishë mëndafshi të verdhë
e preva copash natën më gërsherë
dhe mbusha xhepat.
Nëna heshti dy ditë
e unë gëzohesha nga brenda
që ajo vishte prap të njëjtin fustan
dhe i përsësija vetes,
se dua ti ngjaj.
Tani kam filluar të kuptoj nënën.
Pikëpyetjet e atëhershme i zgjidha,
nga dalin ofshamat
kam filluar të kuptoj
dhe vetëm pse copëtohej,
pse luftonte vetëm.
Fundja pse duhej të kishte një fustan.
Për të gjitha këto, kuptoj një gjë,
rritem dhe i ngjaj asaj
por me fustane të ndryshme
luftoj vetë i dytë
dhe sitnët e mia thinjen para pasqyrës./ KultPlus.com

Gent Rrushi: Shkoja me vonesë në shkollë se dëgjoja këngët në TV Jugosllave

Posted on by KultPlus

Gent Rrushi është një ndër muzikantët më të spikatur në Shqipëri. Ai përveç se është instrumentist, kompozitor dhe pedagog në Universitetin e Arteve, njihet si personalitet i muzikës xhaz.

I ftuar në emisionin “Pas Mesnate” në ekranin e ABC News, Genti ka bërë një rrëfim emocionues për jetën e tij, duke u kthyer pas në kohën kur i ati i zbuloi talentin për muzikë.

“Muzika te unë ka ardhur te unë shumë natyrshëm, aq natyrshëm sa nuk di tamam të kem ndonjëlloj përkufizimi. Sidomos im atë ka qene shumë i vëmendshëm ndaj meje dhe kur kam qene shumë i vogël, më ka gjetur një mësues pianoje në klasë të parë, diku 6 vjeç, por me muzikën shenjat i kam pasur më herët, ato që mund të quhen shenjat e talentit. Pastaj, kam vazhduar pa e menduar si fëmijë, pa e ditur që një ditë do të bëhem muzikantë profesionistë”, rrëfeu ai.

Më tej, Genti tregoi se dëgjonte muzike nga televizionet Jugosllave dhe kështu u njoh me hitet e mëdha botërore.

“Kujtoj që çdo ditë nga ora 7 pa 10 deri në 7 të mëngjesit jepeshin hitet e momentit në televizionet e Jugosllavisë dhe unë shkoja përgjithësisht vonë në shkollë, do duhet t’i ndiqja këto sepse duke mos pasur diçka që ta riprodhonim, duhet ta mësonim sot një strofë dhe nesër një tjetër, derisa t’i vinte radha këngës të transmetohej. Kështu bëra repertorin, këngët kanë qene disa nga Beatsel, Michael Jackson, nuk më kujtohen shumë, ABA”, u shpreh muzikanti./abcnews.al

Marin Mema: Propozimi për heqjen e emrit të Hasan Prishtinës nga Universiteti i Prishtinës është absurd

Posted on by KultPlus

Marin Mema

Propozimi për heqjen e emrit të Hasan Prishtinës nga Universiteti i Prishtinës është absurd. Ne duhet të krenohemi me figura të tilla. Unë e kuptoj që ka probleme apo procedura që ndikohen nga faktorë të tjerë, por kjo nuk duhet të na bëjë të tërhiqemi nga e drejta.

Propozimi me sa është bërë e ditur lidhet me pengesat që krijon universiteti i hapur ilegalisht nga strukturat paralele serbe në veri të Mitrovicës. Dhe duke qenë se ai universitet ilegal është emërtuar qëllimisht “Universiteti i Prishtinës” , në arenën ndërkombëtare , Universiteti i vërtetë i Prishtinës emërtuar “Hasan Prishtina” ka probleme në rankimet e procedurat ndërkombëtare. Ky është justifikimi zyrtar. Por pse duhet hequr emri “Hasan Prishtina” UP- së dhe jo delegjitimuar universiteti paralel në Mitrovicën veriore ? Po sikur “nesër” serbët me këtë precedent të ndikojnë në ndryshimin e emërtimeve të tjera ? Të imponojnë gjithnjë e më shumë ? Sot universitetin, nesër aeroportin, stadiumin etj etj etj. Çfarë është kjo ?

Emrat e universiteteve “Ismail Qemali” në Vlorë, “Luigj Gurakuqi” në Shkodër, “Eqerem Çabej” në Gjirokastër apo “Aleksandër Xhuvani” në Elbasan, “Haxhi Zeka” në Pejë, “Kadri Zeka” në Gjilan, “Isa Boletini” në Mitrovicë etj etj janë krenari, identitet. Ne duhet ti vlerësojmë e ruajmë figurat tona e jo ti largojmë, fshehim, shuajmë sipas imponimeve e dëshirave të të tjerëve. Me emrat e figurave nuk luhet.

Universiteti Shtetëror i Arizonës dhe Uni-Universum International College: Fuqizimi i studentëve për një të ardhme më të ndritshme  

Posted on by KultPlus


Arsimi është një shtytës kryesor i zhvillimit personal dhe shoqëror.

Kur bëhet fjalë për institucionet që janë të përkushtuara për të ofruar arsim të jashtëzakonshëm, Universiteti Shtetëror i Arizonës dhe Uni– Universum International College janë dy emra që bien në sy. Këto institucione janë të përkushtuara për të fuqizuar studentët për një të ardhme më të ndritur, duke i përgatitur ata të lulëzojnë në një botë që ndryshon vazhdimisht.

Si ASU ashtu edhe UNI kanë prioritet suksesin dhe mirëqenien e studentëve. Ata ofrojnë një gamë të gjerë shërbimesh mbështetëse, duke përfshirë këshillimin akademik, këshillimin për karrierë, tutorim dhe programet e mirëqenies, për të ndihmuar studentët të lulëzojnë akademikisht, përsonalisht dhe profesionalisht.

Për më tepër, ASU dhe Uni– Universum International College janë të njohur për kampuset e tyre të gjalla dhe dinamike, të cilat u ofrojnë studentëve objekte më të avancuara, teknologji të avancuara dhe burime moderne për mësim, kërkim dhe inovacion.

Për më shumë informata rreth programit kontakto +383 44 144 062, [email protected] ose ndiqni UNI – n në facebook & instagram.  / KultPlus.com

Kurti: Në qershor mbledhja e radhës e Qeverive të Kosovës dhe Shqipërisë

Posted on by KultPlus

Në mes të muajit qershor, qeveritë e Kosovës dhe të Shqipërisë do të bëhen sërish bashkë në një mbledhje të përbashkët. Kështu ka konfirmuar kryeministri i Kosovës Albin Kurti, gjatë një bisede me gazetarë në margjina të konferencës “Diaspora Flet”.

Kohë më parë ishte thënë se mbledhja do të mbahet më 14 qershor në Gjakovë.

14 qershori kremtohet nga gjakovarët si dita e çlirimit të qytetit historik dhe përkujtohet në kalendarin e kësaj treve për të nderuar kujtimin e dëshmorëve që dhanë jetën në luftën për çlirimin e Kosovës.

Ky do të jetë takimi i nëntë mes qeverive shqiptare të të dy shteteve, ndërsa që prej 11 janari 2014, kur për herë të parë nisi ky bashkëpunim, janë nënshkruar dhjetëra marrëveshje. Arritjet më të rëndësishme janë ato të lirisë së lëvizjes në të dy anët e kufirit, në fushën e shkëmbimeve ekonomike, në fushën e energjisë elektrike, në mësimin e abetares së përbashkët, puna e përbashkët për Fjalorin Enciklopedik Shqiptar dhe për Historinë e Shqiptarëve.

Presidentja Osmani në konferencën e Germin: Mërgata jonë është katalizator i ndryshimit pozitiv në Kosovë (VIDEO)

Posted on by KultPlus

Presidentja e Republikës së Kosovës, Vjosa Osmani-Sadriu, në hapjen zyrtare të konferencës “Diaspora flet” të organizuar nga Germin adresoi pjesëmarrësit në një fjalim rasti ku ndër të tjera theksoi se mërgata jonë është dëshmi e vlerave që na karakterizon si shtet.

Vjosa Osmani në prezantimin e saj ka përmendë edhe përfaqësimin e denjë të sportistëve tanë nëpër botë, sikurse edhe të yjeve botërore: Dua Lipa e Rita Ora.

Ngjarja vazhdoi me një seri fjalimesh kryesore që patën në fokus tematika të rëndësishme që prekin mërgatën dhe vendet amë, nga: Joshua Mike, Drejtor i Zyrës për Rritje Ekonomike të USAID; Anila Hyka-Smørgrav, Bashkë-kryetare e Bordit të GERMIN; Avni Mustafaj, Bashkë-kryetar i Bordit të GERMIN dhe Mike Bailey, Ekspert Ndërkombëtar për Angazhimi e Diasporës nga Izraeli.

Ndërkohë, kjo konferencë është hapë nga Kori i Fëmijëvë “Okarina”, të udhëhequr nga Elikona Hysaj Shala, e cila bashkë me fëmijët ka prezantuar disa pika muzikore.

Kjo konferencë që filloi të enjeten, punimet është duke i vazhduar edhe sot, sikurse që do të prezantojë shumë folës edhe gjatë ditës së shtunë./ KultPlus.com

Kryeqytetet evropiane që vizitohen më shumë nga turistët

Posted on by KultPlus

Udhëtimi është rikthyer me ritëm të plotë – por jo të gjitha vendet po përqafojnë kthimin e turistëve. Turmat e turistëve janë bërë problem kryesor në shumë destinacione turistike të Europës.

Për të luftuar mbipopullimin, disa vende kanë zbatuar kufizime, që variojnë nga vendosja e kufirit të vizitorëve në Marsejë, Francë, deri te ndalimi i anijeve turistike në Venecia, Itali.

Por, si mund të shmanget vajtja në destinacionet e mbipopulluara?

Duke përdorur të dhënat nga motori i kërkimit për pushime Holidu, i cili krahasoi madhësinë e popullsisë lokale me numrin e turistëve të vitit 2019, ja cilat janë kryeqytetet europiane me më shumë turistë për banor.

Kryeqytetet më të vizituara në Europë

Amsterdami ka numrin më të lartë të turistëve për banor. Kryeqyteti holandez ka 12 turistë për çdo banorë.

I njohur si “Venecia e Veriut”, Amsterdami ka më shumë se 160 kanale dhe 1200 ura. Qyteti, i njohur si një destinacion për kanabisin dhe alkoolin, synon të ndryshojë tani reputacionin e tij.

Amsterdami dallohet për baret dhe kafenetë elegante, por edhe për institucionet kulturore, si Muzeu i Van Gogh.

Dublini renditet i dyti, me 11 turistë për banor.

Kryeqyteti argëtues i Irlandës është shtëpia e Guinness, dhe turnetë në punishtet e birrës, kanë mirëpritur afër 23 milionë njerëz, që nga hapja në vitin 2000.

Turistët dynden gjithashtu në Temple Bar, një rrugë me kalldrëm e mbushur me bare, ku japin shfaqje grupe folklorike.

Talin, Kryeqyteti i Estonisë zë vendin e tretë, me 10 turistë për banor.

Vendi i Europës Lindore ka shumë për të eksploruar, përtej Talinit. Me Detin Baltik në veri dhe perëndim, ai është shtëpia e mijëra ishujve me pasuri natyrore dhe historike.

Kryeqyteti i Francës, Parisi, renditet i katërti, me 9 turistë për banor.

Qyteti i Dashurisë tërheq vizitorët, që duan të shohin Kullën e famshme Eifel. Ndërkohë, Luvri është muzeu më i vizituar në botë.

Athina, kryeqyteti i Greqisë, është një tjetër nga kryeqytetet më të njohura, me 8 turistë për banor.

Kryeqytetet më pak të vizituara në Europë

Sipas Holidu, Berlini, Madridi, Brukseli dhe Budapesti janë kryeqytetet me “më pak turistë”, me vetëm 2 turistë për banor.

Ndër kryeqytetet e tjera europiane, Praga në Republikën Çeke, ka 8 turistë për banor; Edinburgu në Skoci ka 7; Kopenhagen në Danimarkë dhe Lisbona në Portugali, kanë 6, transmeton monitor përcjell albinfo.ch.

Stokholmi në Suedi, Vjena në Austri dhe Roma në Itali kanë 4. Londra e Mbretërisë së Bashkuar ka 3.

Po qytetet e tjera të Europës?

Dubrovniku në Kroaci, sipas Holidu, mirëpriti mesatarisht 36 turistë për banor në vitin 2019.

Duke qenë se këta vizitorë vijnë kryesisht për pushime verore, qyteti bregdetar është më i mbipopulluar në këtë sezon.

Më pas vijnë Venecia e Italisë, Bruges e Belgjikës dhe ishulli grek i Rodosit, secili me 21 turistë për banor.

Ashtu si Dubrovniku, Rodosi vizitohet kryesisht për pushime verore, kur turmat e turistëve shtohen së tepërmi.

Antalia dhe Muğla e Turqisë, të cilat janë shumë të njohura në mesin e turistëve europianë, kishin respektivisht 5 dhe 3 vizitorë për banor.

Vetëm 8-vjeçe dhe ka mbaruar shkollën e lartë, vogëlushja përgatitet të pushtojë hapësirën

Posted on by KultPlus

Andhara Perez Sanchez ishte vetëm tre vjeç kur u diagnostikua me sindromën Asperger. Ajo nuk kishte miq, sepse shokët e klasës e tallnin. Mësuesit ishin në mëdyshje qe ta pranonin në klasë.

Kjo rezultoi që Adhara të tërhiqej dhe të mos interesohej për mësimet ndërsa refuzonte të shkonte në shkollë.

Për të ndihmuar vajzën e saj me depresion, nëna e Adharës e çoi te një psikolog. Ekspertët zbuluan se IQ-ja e saj ishte shumë e lartë.

Konkretisht, ishte 162, më i lartë se Ajnshtajni. Ata sugjeruan që prindërit ta dërgonin Andharën në një shkollë speciale dhe atje zhvillimi i saj ishte i shpejtë.

Në moshen 5-vjeçare mbaroi shkollën fillore, 6-vjece mbaroi shkollën e mesme dhe në 8-vjeçe mori diplomën e shkollës së mesme. Ajo tashmë ka një diplomë universitare dhe tani është duke bërë master në inxhinieri industriale.

Andhara ëndërron të studiojë për Astrofizikë në Universitetin e Arizonës. Vogëlushja po punon për zhvillimin e një “byzylyku ​​inteligjent” për fëmijët e vegjël me aftësi të veçanta.

Andhara ëndërron të punojë në NASA dhe të bëhet personi i parë autik që udhëton në hapësirë.

Numër në rritje i kosovarëve po heqin dorë nga shtetësia e tyre

Posted on by KultPlus

Referuar të dhënave, çdo herë e më tepër po shtohen shtetasit kosovarë që po heqin dorë nga shtetësia e tyre. Ministria e Punëve të Brendshme e Kosovës ka treguar se për periudhën janar-mars të këtij viti kanë hequr dorë nga shtetësia e Kosovës 1 mijë e 8 persona, përcjell albinfo.ch.

Dukuria e largimit nga vendi nuk dihet a është më shumë “trend” apo nevojë e ndikuar nga rrethana të tjera.

Pse po heqin dorë nga shtetësia?

“Gjatë periudhës Janar-Mars 2023, në Divizionin e Shtetësisë janë marr 1,019 vendime për Lirim nga shtetësia: 1,008 v. pozitive, 11 v. negative dhe 893 kërkesa”.

Referuar të dhënave numri më i madh i qytetarëve, që kanë hequr dorë nga shtetësia janë nga Gjermania e pasuar nga Austria, Sllovenia, Kroacia dhe të tjera.

Po ashtu në këtë raport thuhet se gjatë periudhës Janar – Mars 2023 në qendrën e Përkohshme të Pritjes për Migrantë janë akomoduar gjithsej 177 migrantë prej tyre 167 (94.3%)meshkuj dhe 10 (5.6%) femra.

“Nga përshkrimi i të dhënave, numri më i madh i migrantëve është nga Maroku me 87 (49%) i pasuar nga Siria 32 (18%), Somalia 29 (16.4%) Egjipti 8 (4.5%) Palestina 8 (4.5%), Algjeria 5 (2.8%) Jordania 2(1.12%), Eritrea 2 (1.1%), Pakistani 1(0.6%) Libia 1 (0.6%) dhe Sudani 1(0.6%) migrant”, thuhet në raportin e MBP-së.

Sipas të dhënave gjatë kësaj periudhe, në pikat kufitare janë kthyer 117 persona të ripranuar nga shtetet e ndryshme. Prej tyre me Forcë 101 (86.3%), Vullnetarë 7 (5.9%) dhe Vullnetarë të asistuar nga IOM 9 (7.7%).

Po ashtu, në Qendrën për Mbajtjen e të Huajve, kanë qenë të akomoduar 5 të huaj ndërsa me Vendimin për ndalim në Qendrën e Mbajtjes për të Huaj, gjatë kësaj periudhe raportuese janë akomoduar 4 të huaj, ndërsa nga Qendra janë larguar 4 të huaj. Numri aktual i të ndaluarave në Qendër është 1.

Gjatë muajit të kaluar në Strasburg është nënshkruar akti ligjor i Bashkimit Evropian për liberalizimin e vizave për Kosovën, duke u mundësuar qytetarëve lëvizje të lirë në zonën “Schengen” nga 1 janari i vitit 2024.

Aleanca Kosovare e Biznesit ka vlerësuar se vetëm vitin e parë nga liberalizimi i vizave, Kosova rrezikon të mbetet me 150 mijë qytetarë më pak.

“Sipas parashikimeve që kemi bërë një vit më herët, ku paralajmërimet kanë qenë që nga viti 2010, 2011, 2016 që do të bëhet liberalizimi, kemi bërë një hulumtim dhe sipas atij, ne vetëm vitin e parë mund të mbetemi me 150 mijë qytetarë më pak. Një vlerë e madhe e cila pritet të lëvizë drejt Europës, për të gjetur mundësi për t’u punësuar”.

Trendi i emigrimit, sipas shifrave zyrtare të institucioneve të Kosovës, është në rritje. Vetëm vitin e kaluar, nga Kosova janë larguar mbi 42 mijë banorë.

Arsyet kryesore të emigrimit të rregullt sipas ASK-së janë bashkimi familjar, martesa, gjetja e një vendi pune apo edhe studime. Në vitin 2020, nga Kosova emigruan mbi 8,000 veta; më 2019 mbi 34.000; dhe më 2018 mbi 28.000.

Pishina e Gërmisë me pamje të re, hapet në qershor

Posted on by KultPlus

Komuna e Prishtinës ka bërë të ditur se pishina e Gërmisë po vjen me pamje të re dhe se do të hapet në qershor.

Në njoftim bëhet e ditur janë duke e lyer guaskën e pishinës, do të ketë investime në amfiteatër dhe në terrenin sportiv.

“Pas 10 vjetësh, pishinës së Gërmisë po i kthehet freskia.

Pishina po vjen me një ambient të ri: guaskë të lyer, investime në amfiteatër dhe në terrenin sportiv, renovim të tualetit, shtretër për relaks, gjelbërim të shtuar, si dhe me kënd të ushqimit dhe aktivitete të shumta artistike për të gjitha grupmoshat.Pishina hapet në qershor”, thuhet në njoftim

Në ditëlindjen e 120-të të Ernest Koliqit, ekspozitë me fotografi të rralla nga familja Koliqi

Posted on by KultPlus

Më 20 maj 2023, në orën 12:00, do të shënohet DITA E BIBLIOTEKËS “Ernest Koliqi” – Prishtinë, që gjendet në Qendrën “BogdaniPolis” në Prishtinë, në ditëlindjen e 120 të Ernest Koliqit, shkrimtar e kontribuues i madh i arsimit shqip në Kosovë.

Për këtë ditë do të bëhet ekspozita me 13 fotografi të rralla nga arkivi i familjes Koliqi, të cilën e ka përgatitur Gjon Koliqi, pjesëtar i familijes Koliqi.

Kurse një intervenim mbi kontekstin sociokulturor të familjes Koliqi dhe ndikimin në personin e Ernestit, do ta mbajt shkrimtari dhe studiuesi i letërsisë Ndue Ukaj./ KultPlus.com

Boksieri Robin Krasniqi meqin e radhës në Stadiumin “Fadil Vokrri” në Prishtinë

Posted on by KultPlus

Boksieri Robin Krasniqi ka njoftuar se d të sjell meqin e radhës në Prishtinë, dhe duke e vlerësuar si një event të madh për Kosovën, shkruan KultPlus.

Më poshtë ju sjellim njoftimin e plotë të Krasniqit.

Si bir i prindërve shqiptarë, si fëmijë i luftës në Kosovë dhe si kampioni i parë botëror, me prejardhje shqiptare, në boksin profesionist, gjithmonë e kam ndjerë obligim të bëj një mbrëmje të madhe të boksit në Prishtinë dhe tani ka ardhur koha, të dashur fansa dhe miq!

Luftën e radhës do ta bëj në stadiumin e futbollit të Prishtinës (Stadiumi Fadil Vokrri) më 5 gusht 2023, duke i ofruar një Event të madhë atdheut tim. Unë po e pres me padurim këtë mbëmje dhe shpresoj që të kem bërë të lumtur edhe shumë prej jush miq të dashur.

I juaji

R. K./ KultPlus.com

Austriakja Hermi Kürner me ekspozitën “Austria dhe Shqipëria” në KultPlus Caffe Gallery

Posted on by KultPlus

Hermi Kürner është një artiste austriake e cila si pasionante e udhëtimeve ka sjell në pah edhe pikturat nga vende të ndryshme, e që këtë herë vijnë nëpërmjet një ekspozite me punime artistike nga pamjet e Austrisë dhe Shqipërisë, shkruan KultPlus.

24 punime me teknikën e akuariel do të prezantohen në KultPlus Caffe Gallery, ekspozitë që do të hapet më 28 maj, në ora 19:00.

Vlora, Kruja, Ura e Mesit në Shkodër, Tirana, Shën Gjini dhe piktura nga vende të ndryshme austriake do të prezantohen në këtë ekspozitë, e cila do të sjell ngjyrat e artistes Kürner.

KultPlus Caffe Gallery po e sjell për herë të parë në Kosovë artisten Hermi Kürner, punimet e së cilës do të qëndrojnë për tri javë.

Kürner është pasionante e madhe e udhëtimeve, ajo edhe në Kosovë vjen me mercedesin e saj old timer nga viti 1974, e cila me makinat e saj ka përshkuar pothuajse shumicën e bregdeteve Slloveni, Kroaci, Mal të Zi e Shqipëri, pa përfshirë udhëtimet e saj në Evropë./ KultPlus.com

Themelohet Shoqata e Miqësisë Austriako-Kosovare, kryetari Arsim Vranovci: Zoti e bekoftë Austrinë

Posted on by KultPlus

Me një ceremoni solemne është shënuar themelimi i Shoqatës Austriako- Kosovare ku kanë marr pjesë shumë personalitete nga vendi dhe jashtë, shkruan KultPlus.

Presidentja e vendit Vjosa Osmani dhe kryeministri Albin Kurti kanë marr pjesë në këtë ceremoni, ku i pranishëm ishte edhe ambasadori i Ambasadës së Austrisë në Kosovë, Christoph Weidinger, sikurse edhe eurodeputeti Lucas Mandl.

Kryetar i shoqatës është zgjedhë Arsim Vranovci, i cili ishte edhe nismëtarë për themelimin e kësaj shoqate.

“Kjo është një ngjarje të cilën nuk e kam bërë vetëm unë. Motoja dy shtete një zemër buron nga fakti se gjysmën e familjes i kemi jashtë vendi. Familja ime jemi katër antarë, dy jemi në Kosovë dhe dy në Austri, prandaj nuk mund të ndahemi. Dua të shtojë vetëm një fjali, pra sic thoshte presidenti ynë historik, dr, Ibrahim Rugova në çdo fjalim të tij, Zoti i bekoft SHBA-të, Zoti e bekoft Kosovën, Zoti e bekoft Austrinë” ka thënë Vranovci para të pranishmëve./ KultPlus.com

‘Jo domosdoshmërisht duhet të qëndrosh, në vende ku thahen lulet e tua’

Posted on by KultPlus

Nga Manuela Toto

Jo domosdoshmërisht
duhet të japësh shpjegime,
për ata që nuk e kanë kuptuar atë, që krijon, o thua.
Mund të reagosh dhe të heshtësh për arsyet e tua.
Jo domosdoshmërisht
duhet të qëndrosh, në vende
ku thahen lulet e tua.
Nuk egziston vetëm një kopsht i vetëm,
dhe ti, për këtë duhet t’ja lejosh vetes privilegjin e Diellit më të mirë.
Nuk të duhet të jesh
i,e kënaqur në shoqërisë e kujtdo për domozdoshmëri.
Vetmia nuk është një dënim,
nëse e zgjedh për t’u gëzuar në paqen tënde.
Jo domosdoshmërisht
duhet të mbledhësh ç’do provokim, sepse jo ç’do gjë meriton vëmendjen dhe kohën tënde.
Jo domosdoshmërisht
duhet t’u mbash besimin premtimeve të vjetra, që të kanë lënë në pritje.
Premtimet, duhet të ushqehen çdo ditë,
dhe universi bekon atë që njeh fundin, duke i hapur portën.
Jo domosdoshmërisht
duhet të jesh shtëpi e qëndrueshme e fortë,
e ç’do emocioni.
Duhet lejuar dhe të kalojë tej e matanë, si të jesh prej ajri.
Jo domosdoshmërisht
duhet të konfirmosh pritshmëritë e të tjerëve.
Mund të mbetesh gjithashtu i(e)paparashikueshëm;
është për ty liri,
dhe mirënjohje e vetvetes.

Përktheu: Herman Çuka / KultPlus.com

Eurovision shpall fituesin, Suedia triumfon (VIDEO)  

Posted on by KultPlus

Eurovision ka nxjer tashmë fituesin e këtij ediconi që u mbajt në Liverpoll, dhe fitues i sivjetmë është këngëtarja nga Suedia, Loreen, shkruan KultPlus.

Kurse pas vendit të parë janë radhitë këngët nga shtetet: Finlanda, Izraeli dhe Italia.

Shqipërinë e ka përfaqësuar këngëtarja kosovare Abina Kelmendi e cila u radhit në vendin e 22 e cila në këtë garë u prezantua me këngën “Duje” dhe poashtu është përfaqësuar me krejt familjen në këtë performancë.

Eurovision vazhdon të mbetet gara më e madhe e muzikës evropiane dhe në vitin tjetër do të mbahet në Suedi./ KultPlus.com

Kasapi i Rrugës së Venedikut

Posted on by KultPlus

Dhurata Hoti

I doli gjumi. U zvarrit ta merrte telefonin, e pa orën, ishte dy e tridhjetë e pesë. I digjte fyti, ndërsa trupin e kishte të këputur, e lëkura po i nxirrte flakë. U ngrit dhe shkoi të pinte ujë. Kishte një shije hekuri a gjaku të mpiksur në gojë. E lau fytyrën, por pas pak vendosi se duhej të bënte një dush. Ndoshta do të bëhej më mirë. Zakonisht gjithçka ishte më e mirë pasi të lahej, edhe nëse era mbetej, edhe nëse gjaku ishte mpiksur mbi lëkurë. Uji e zbuste trupin, sikur i hiqte një peshë që e mbante të mbërthyer.

Kur doli nga banjo u mat ta zgjonte gruan. Ndonjëherë kur ajo flinte i mungonte. I vinte ta zgjonte dhe ta shtrëngonte shumë në krahë, sikur bënte kur ende e donte. Por e dinte se dëshira do të venitej sapo të zgjohej ajo. I mungonte vetëm kur nuk ishte. Gjithsesi, kishte nevojë të dëgjonte një zë tjetër njeriu. Bëri zhurmë me qëllim, por ajo vazhdonte të flinte. I dukej çudi se si arrinte të flinte në këtë vapë. Hoqi dorë, ajo nuk do ta kuptonte gjithsesi.

E kishte kapluar një ndjenjë neverie. Ndihej i uritur sa i gërryenin zorrët, por vetëm paramendimi i rrotullonte barkun. Doli nga shtëpia, në rrugë nuk kishte njerëz dhe iu duk se u bë pak më mirë. Qentë e rrugës rrinin turmaturma. Përnjeherësh filloi t’i shihte si kufoma, me lëkurën e rrjepur, vetëm si copa mishi të gjalla, bile e ndiente edhe erën e tyre prej mishi. Iu duk sikur përkundër kësaj gjendjeje të turbullt, shqisat nuk i kishte pasur kurrë më të mprehta. Gjithçka e ndiente me intensitet shumë më të madh se zakonisht. Si të ishte i droguar. Jam duke përjetuar ndonjë makth, mendoi. Ishte një vend ku shkonte zakonisht, afër njërës prej urave më të vjetra të qytetit. Një vend shumë i qetë, ku nuk shkonte askush, kryesisht sepse dukej shumë i frikshëm, si strehë e njerëzve të rrugës apo e ndonjë psikopati. Mirëpo, edhe për ta ishte shumë i frikshëm, sepse dukej se do të shembej në çdo moment, por ai e njihte mirë dhe e dinte se ishte një nga vendet më të sigurta në këtë botë të pasigurtë. Kishte nevojë të ishte krejtësisht vetëm. Rrugët ishin pa njerëz, por atij i dukej se dëgjonte grahma frymëmarrjesh pas shpine. Kur ai shpejtonte hapat, shpejtoheshin edhe frymëmarrjet. E dinte se nuk kishte njeri, megjithatë kjo nuk e bënte më pak të frikshme. Arriti. Të mbështetur në murin e vjetër, një çift po bënin dashuri. Ata nuk e shihnin, të përhumbur në lojën e tyre. Ai më shumë se që i shihte, i dëgjonte, dhe për një moment filloi të ndihej i eksituar, i kishte shumë afër. Herën e fundit që kishte bërë dashuri kishte qenë para disa muajsh.

Çifti e ndërroi pozitën dhe filluan përsëri. Atë filluan ta kaplonin djersë të ftohta. Deshi të largohej po nuk mundej, i dukej shumë e komplikuar fillimisht, ndërsa pas disa momentesh thjesht nuk ishte i aftë ta bënte. Filloi të vinte një lloj ere, si kërmë e mbytur. U mbajt, sepse për pak e lëshuan këmbët dhe nuk donte që ata ta vërenin. Psherëtimat e tyre po vinin e po bëheshin më të zhurmshme, e krupa e tij më e madhe. Me përpjekje të sforcuara u nis, por u pengua në një gur dhe u rrëzua. Ata e verejtën, filluan të qeshnin por nuk i ndalën lëvizjet e tyre. Ai tani i pa për herë të parë, lëkura e tyre ishte e skuqur shumë dhe ishte bërë me vrraga, si të ishte hequr pjesa e sipërme. Iu duk se era vinte prej trupave të tyre. Filloi të vraponte, pa e kthyer kokën pas. Ata qeshnin dhe e thërrisnin.

U kthye në shtëpi. Gruaja ishte zgjuar dhe e pyeti ku ishte. Ai nuk foli. Hyri në dush, por nuk kishte ujë. Po dridhej. I vinte krupë, por nuk mund të villte. Ajo po përgatiste mëngjesin, era e të cilit e neveriti edhe më shumë. Nuk mund të rrinte as në shtëpi dhe gjithsesi duhej të shkonte të hapte dyqanin. Njerëzit blerjet e mishit i bëjnë në mëngjes. E hapi derën. Bëri një hap prapa, i neveritur prej një ere të keqe që iu përplas në fytyrë. Ai çdo natë para se të shkonte në shtëpi e pastronte mirë dyqanin dhe i linte dritaret hapur për ta ajrosur. Por, era që po vinte në dyqan ishte mbytëse. Si të kishte vdekur dikush dhe kufoma të kishte qenë e mbyllur prej kohësh. E hapi derën dhe dritaret, e ndezi edhe kondicionerin. Po sikur të vinte dikush dhe ta ndiente këtë erë, biznesi i tij do të përfundonte përgjithmonë. Filloi të kërkonte për ndonjë gjë që kishte mundur të shkaktonte këtë erë, anash rafteve, nëpër dysheme. Nuk gjeti asgjë, dhe përkundër masave që morri ai, era nuk hiqej. Kishte filluar ta kapte panik. Nëse do të vinte dikush ai nuk dinte as çfarë të thoshte. I mbylli dritaret dhe derën dhe u ngut të dilte. Kur e pyeti pronari i dyqanit fqinj, ai nëpërdhëmbi diçka se nuk ndihej mirë. Edhe kur u kthye në shtëpi e pyeti gruaja, por asaj nuk i dha as përgjigje. I dukej se po ta hapte gojën era do të përhapej edhe në shtëpi. Uji kishte ardhur. U la gjatë dhe doli me lëkurë të skuqur nga uji i nxehtë. Neverinë e ndiente ende, por ndihej pak më mirë se më parë. U shtri dhe dikur e kishte zënë gjumi.

U zgjua në darkë. Ndihej i uritur, nga kuzhina dëgjoheshin zhurma. Hyri dhe u ul. Ajo ia solli një pjatë me drekën e ngrohur. Mishi në pjatë filloi të lëvizte. Aq iu desh dhe filloi t’i nxirrte zorrët jashtë aty mbi pjatë, pa mundur as të mënjanohej paksa. Gruaja e shikoi e tmerruar. U nervozua dhe filloi ta shante. Ai vetëm u ngrit dhe shkoi prapë në tualet. Edhe aty vazhdoi të villte. Ajo hyri pas tij. Tashmë e shqetësuar e pyeti ç’kishte. Ai i tha të largohej. Ajo filloi të pastronte dhe kur u sigurua që kishte fshirë gjithçka, u largua pa thënë asgjë. Ai vazhdoi të rrinte. I erdhi prapë të villte. Gjumi e kishte zënë në dyshemenë e tualetit. Nuk shkoi më ta hapte dyqanin, pavarësisht se gruaja kishte qenë disa herë dhe e siguronte se asnjë erë nuk po vinte më. Pas tre muajsh vendosi ta nxirrte në shitje. U divorcua me gruan dhe me paratë që mori nga shitja e dyqanit, u nis për diku. Muajt e fundit rrinte vetëm dhe nuk flinte kurrë. Disa thonë se u çmend diku në vendet e perëndimit, disa të tjerë thonë se ka vdekur si i pastrehë./ KultPlus.com

“Frazimini i tij është një zjarr i shndritshëm”, shtypi francez superlativ ndaj Myshketës

Posted on by KultPlus

Pas shfaqjes së premierës së Operës “FALSTAFF” me regji të komediantit të famshëm Denis Podalydes dhe kostume të stilistit legjendar Cristian Lacroix shtypi i specializuar në Francë është shprehur me superlativa ndaj performancës së Gëzim Myshketës.

“Frazimi i tij është një zjarr i shndritshëm i cili mbaron shkëlqimin vetëm kur kuptimi i pentagramit është shfaqur krejtësisht shprehet OPERA ONLINE .

 “I mrekullueshëm Fordi i baritonit shqiptar Gëzim Myshketa vijon CLASSIQUE NEWS. Ndërsa Revista Operistike OLYRIX vlerëson duetin midis baritonit grek Tassis Christoyannis dhe Myshketës si “një dimension pothuajse epik”.

Pa mbaruar ende këtë produksion i cili bashkëprodhohet me Teatrin e Madh të Luxembourg dhe Operën e Caen, Myshketa do të vijojë me Operën “La Traviata” në Opera National de Lorraine – Nancy ku do të jetë protagonist së bashku me një tjetër yll operistik shqiptar, sopranon Enlekejda Kamani./ KultPlus.com

Kënga e famshme Jeanny nga Falco vjen edhe në shqip (VIDEO)

Posted on by KultPlus

Përktheu: Ridvan Bunjaku

Xhine, eja, eja
Çohu, të lutem
Je bërë qull
Është vonë tashmë, eja
Duhet të ikim nga këtu, nga pylli,
a nuk e kupton?

Ku e ke këpucën?
E ke humbur
Kur m’u desht të ta tregoja rrugën
Kush humbi?
Vetë ti?
Vetë unë?
Apo, apo vetë ne?

[Refreni]

Xhine, mos jeto në ëndrra
Xhine, jeta s’është ashtu siç duket
Një vajzë kaq e vogël e vetmuar
në një botë akull të ftohtë
Dikush ka nevojë për ty


Xhine, mos jeto në ëndrra
Xhine, jeta s’është ashtu siç duket
Je humbur në natë,
nuk dëshiron të mundohesh e të luftosh
Dikush ka nevojë për ty (hej, zemër)

[Pjesa 2]

Është ftohtë, duhet të ikim nga këtu, eja
Buzëkuqi yt është i njollosur
Ti e bleve dhe unë e pashë
Tepër kuqësi në buzët e tua.
The: “Mos m’u vardis”
Por të skanova saktësisht
Sytë tregojnë më shumë se fjalët
Ke nevojë për mua, ë?
Të gjithë e dinë se nga kjo ditë ne jemi bashkë
Tash mund t’i dëgjoj
Po vijnë
Po vijnë të të marrin
Nuk do të të gjejnë, askush s’do të të gjejë
Je me mua!

[Refreni]

Xhine, mos jeto në ëndrra
Xhine, jeta s’është ashtu siç duket
Një vajzë kaq e vogël e vetmuar
në një botë akull të ftohtë
Dikush ka nevojë për ty


Xhine, mos jeto në ëndrra
Xhine, jeta s’është ashtu siç duket
Je humbur në natë,
nuk dëshiron të mundohesh e të luftosh
Dikush ka nevojë për ty (hej, zemër)

[Folësi i lajmeve]

Lajme blic: Në muajt e fundit
numri i personave të zhdukur është rritur dramatikisht.
Publikimi më i ri i drejtorive vendore të policisë
e raporton edhe një rast të ri tragjik.
Bëhet fjalë për një vajzë nëntëmbëdhjetë vjeçare,
që është parë për herë të fundit
para katërmbëdhjetë ditësh.
Policia nuk e përjashton mundësinë e krimit.

[Ura]

Xhine!
Si duket tash dikush ende ka nevojë për ty, zemër
Xhine, mos jeto në ëndrra
Xhine, Xhine, Xhine
Je humbur në natë,
nuk dëshiron të mundohesh e të luftosh
A s’e di ti se dikush ka nevojë për ty, zemër?

[Refreni]

Xhine, mos jeto në ëndrra
Xhine, jeta s’është ashtu siç duket
Një vajzë kaq e vogël e vetmuar
në një botë akull të ftohtë
Dikush ka nevojë për ty

Xhine, mos jeto në ëndrra
Xhine, jeta s’është ashtu siç duket
Je humbur në natë,
nuk dëshiron të mundohesh e të luftosh
Dikush ka nevojë për ty (zemër)

[Outro]

Xhine, mos jeto në ëndrra
Xhine, jeta s’është ashtu siç duket
Një vajzë kaq e vogël e vetmuar
në një botë akull të ftohtë
Dikush ka nevojë për ty/ KultPlus.com

Rita Ora shkëlqeu në skenën e Eurovision 2023 (VIDEO)

Posted on by KultPlus

Rita Ora e cila ishte e ftuar speciale e edicionit të sivjetmë ka shkëlqyer me performancën e saj, shkruan KultPlus.

Ajo në fillim u shoqërua nga Sofia, valltare nga Ukraina e cila është refugjatë në Britaninë e Madhe e më pas ajo është prezantuar me copëza të hiteve të saj nëpër vite, e cila natyrisht që ka elektrizuar audiencën prezente, por edhe të gjithë ata që e kanë përcjellë nëpërmjet platformave të ndryshme.

Rita Ora është shoqëruar me shumë balerinë, të cilët kanë sjellë edhe koreografi të shkëlqyer, por natyrisht që edhe dukja e saj ishte e mrekullueshme.

Eurovision sonte pat natën e parë, për të vazhduar nesër me të dytën ku edhe do të zgjidhen finalistët për mbrëmjen prej nga edhe do të nxjerr fituesin. Edicioni i sivjetmë po mbahet në Liverpool, alternativë për Ukrainën, pasi që fituesi i vitit të kaluar ishte nga Ukraina. / KultPlus.com

Themelohet Kori i Grave “Muza” në Gjilan, Albina Jakupi: Jetësoni ëndrrën tuaj, asnjëherë nuk është vonë

Posted on by KultPlus

Mësuesja e muzikës Albina Jakupi ka sfiduar vetën edhe më një iniciativë të re për komunitetin e Gjilanit, përkatësisht gratë, e cila tashmë ka sjell formatin e korit të grave “Muza”, që tashmë edhe ka nisë me grupin e parë të grave, shkruan KultPlus.

Në njoftimin zyrtar të këtij kori thuhet se në këtë kor do të promovohen këngët e mirëfillta popullore dhe qytetare.

Albina Jakupi ka thënë për KultPlus se iniciativa për themelimin e këtij kori ka ardhë si rezultat duke u bazuar në përvojën e saj të gjatë si mësuese e muzikës, dhe kjo përvojë ka bërë që të njohë shumë nëna të nxënësve të saj, të cilat i kanë treguar për ëndrrat e tyre të parealizuara, të qenit pjesë e skenës, pjesë e muzikës.

“Gjatë përvojës time si mësuese e muzikës kam pas rastin të njohë shumë shumë nëna të cilat më kanë treguar se dëshirë e hershme e tyre ishte këndimi, por rrethanat e atëhershme, por edhe mospërkrahja nga familjet e tyre, këto ëndrra u kanë ngelë në sirtarë”, ka thënë Jakupi, e cila ka shtuar se pikërisht këto dëshira të fjetura e kanë shtyrë që të themelojë këtë kor dhe të krijojë një vend të përbashkët për gratë që duan muzikën.

“Njoh gra të moshuara, të pensionuara që e kalojnë kohën të mbyllura në shtëpi nga që iu mungon një hapësirë, vend argëtues për to. Duke ditur ndikimin pozitiv që ka muzika – kënga,  e gjithashtu edhe skena, unë kam menduar të formoj korin e Grave “Muza””, ka thënë Jakupi për KultPlus e cila në të njëjtën kohë ka ftuar të gjitha gratë që duan të jenë pjesë e këtij kori të lajmërohen për regjistrim, pasi që regjistrimi për të qenë pjesë e këtij kori është gjithnjë i hapur.

Jakupi ka njoftuar se të gjithë ata që duan të lajmërohen pë korin “Muza”, mund të lajmërohen në https://www.facebook.com/profile.php?id=100092232620352./ KultPlus.com